من يتعب واني اضل بس دموع تتجارى بدون اي صوت واضل متمدده على هالحال الي يعوفني بيهه ولثاني يوم الظهر يلا اكوم اغسل وامسح اثر الدم الي يطبع بجسمي وارجع انام ومن اكعد بالليل اشوف محمد منظف الغرفه واعرفه منظف كل البيت لان علي يأمره بهالشي علمود جماعته الي يجون كل ساعه واحد طاب واحد طالع ...

جسمي صرت اشوفه ازرك ومطكع بمكان العض اخضر ومورم من عدا الشخوط الي ملت كل رجلي وزنودي وبطني والجروح الي جوه مالحكت حتى تلتئم ويزيد بيها ويلجمها وبكل هالوجع اني ماعندي صوت وقابليه بعد اعيط واحجي خلص نفذت كل طاقتي ..

الى ان بيوم اندكت الباب الظهر و وره شويه سمعت صوت مريه بالبيت واجاني محمد وكعدني وكالي ..
- كومي عمتج اجتي تسال عليج
واياااج تحجين شي اذبحج انتي وياها

كمت لبست دشداشه طويله وردان وطلعتلهه
جان كبل ضربت على صدرها وكالت ..
-يايمه اسم الله الرحمن هاي شصايرلج شجاج هالشكل وجهج

بوستهه ببرود وكعدت بصفهه وكلتلهه ..
- مريضه هالفتره
- دكولي احجي منكطعه اخبارج صار خمس شهور ماشايفيج ولاندري بيج عشتي متي هو هيج تكطعون مايصير ياعمه والله مايصير
- حقج عمه هو اني تمرضت ومحمد بالشغل
وهيج مشت الايام
- بله هسه اني همزين كلت اجي اشوفج وعرفت بيج مريضه وصايره جلد وعظم امج واخوتج مايدرون بيج
-لا مايدرون
- سوده عليه يايمه شصاير بحاااالج ليش هيج شنو مرضج شجاج
- مادري هيج وجع بالمعده صرت احسن لاتهتمين
- ماعندج الا العافيه
-الله يعافيج عمه ..خلي اكوم اجيبلج شي تشربي
-لااا لاااا اكعدي ماريد شي
-لاا عمه شنو السالفه
- لاا والله كلشي ماريد اني هسه اروح بالبيت الجهال عايفتهم وحدهم ومريتلج من الدوام طلعت واجيت عليج كبل
-شنو عمه حتى متتغدين عندي مايصير هيج
- دسمعي هسه عوفي الغدا
-خير شنو
- اجيت اكلج باجر مسوين ثواب على روح امي وابويه وابوج ببيت عمج وكلنه راح نلتم باجر على الغدا فلازم تجين انتي ورجلج زيين

باوعت لمحمد وهو ياشرلي لا بعدين كلتلهه
- اي ان شاء الله نجي شلون لعد
- اي زين لعد باجر نتشاوف ونشبع حجي هسه خلي اروح الجهال بالبيت وحدهم ضالين

طلعت وياهه بره ومن ضربت عيني الشمس غمضت وكلت الحمدلله ربي شممني هوا
قبل مانوصل لباب الشارع كلتلهه بصوت ناصي

- عمه حبابه كولي هسه لمحمد ع اساس انتي باجر تجين عليه تاخذيني لان هو ميقبل اروح اعرف بي
-ليش يمه ميقبل
-هسه دكولي هيج وباجر اني احجيلج السالفه كلهه مال هالشهور كلهن بس ارجوج كولي هيج كدامه

شفته اجه يمنه وسكتت وضليت اباوعلهه انتظرهه تحجي وهي صفنت بوجهي شويه وباوعت لمحمد وكالت ..
- مو تنسين حضري نفسج من وكت باجر اني ب ١١ الصبح اجي عليج اخذج حتى نعاونهم بالغدا
- اي عمه ماشي انتظرج ب ١١

بوستهه وسلمت عليهه وراحت واول ماسد الباب محمد كالي ..
- ماتطلعين باجر لو يجي الحر سمعتتتي
- كيفك لا تخليني اروح وخليهم يجون كلهم وتنفضح كدامهم

عفته وطبيت للبيت رحت لغرفتي وسديت الباب وضليت افكر ..هاي فرصتي باجر حتى اطلع منا
واخلص منهم بس وين اروح ؟؟؟

اذا اروح لبيت عمي ما يعوفني هناك راح يجي ياخذني وماكدر احجي كدامهم اكيد يجذب حجيي
وهمه يثقون بي وماريد افضح نفسي واصير على كل لسان ...
واذا اروح لبيت اهلي بعد اخطر لان هي امي متصدك تخلص مني يمكن حتى البيت متخلوني ادخله ..

ضليت افكر شسوي وين اروح المن التجىء
وبهالاثناء سمعت صوت علي اجه ومحمد كعد يحجيله على جيه عمتي وهو رأساً صاح ..
- متعتب الباب ويطبهم مرض ماكو طلعه
محمد- يمعود خلي تروح وناخذ فرصتنه باجر
البيت يضل النه مانخاف بعد تفضحنه خلي نستفاد هالمره شبيك فرصتنا جاي اكلك
- منين تجيب
-انه ادبرهه ماعليك بس خلي نخلص منهه لا نوب يجون عمامهه وعماتهه وشيخلصنه نطيح بلسانهم بعد شيفضهه
- اييييييييي خليهه تصخم تولي لانعل ابوهه يابو الجابهه وانته اسمع اذا اجيت ومالكيت الي بالي امشيك وراهه ومالفيك هنايه بعدددد فهمممت
- لاااا تخاف انه ادبرهه كتلك مضمونه عندي

جنت اتسنط على حجيهم وضلت بالي شيريد يسون باجر وشنو هالشي الجبير الي كدر يخلي علي يوافق اطلع من البيت بس حتى يحصله ؟؟؟

ضليت افتر بالغرفه اروح واجي وافكر شسوي واخلص منهم وين اروح ؟؟
وكل مكان افكر بي اكول لا يلحكوني مااخلص منهم ...

وصبح الصبح واني مالكيت حل ولا قررت وين اروح .. سمعت علي طلع من الساعه سته وضل محمد نايم واني رحت سبحت ومشطت وصعدت فوك فتحت الكواني على كيف وطلعت الذهب وضميته جوه ملابسي
واخذت الدفاترونزلت بهدوووء ورحت للغرفه ..

جان الجو بارد بس ماعرف ياشهر ماجنت اركز بشي ومن زمان ناسيه اخر تاريخ جنت واعيه بي
وملابس الشته اني مامطلعتهن لكيت بكنتوري بس الصيفي وماهتميت ردت بس البس واطلع

بين مااني اكلب بالكنتور سمعت صوت محمد يكح وعرفته كعد وراح للحمام ..باوعت الساعه بالتسعه
وعلي يرجع ب ١٢ لازم اطلع قبل جيته ...

ضليت الوب وافكر شسوي شسوي ..

جان توكع عيني على كتاب القرآن وراساً دمعت ..
من زمان اني هجرته بعد ماجنت اكضي الليل بختم اجزائه .. رحت رفعته وبسته وخليته على وجهي
وكلت ...

سامحني ياربي جزعت وتجاهلت ذكرك وقربك
عمداً سامحني حجيت الي ما يجوز بحقك وحق صفاتك الجليله ، لا اله الا انت سبحانك اني كنت من الظالمين ..

ضليت اردد بهاي الايه واني مخليه القرآن على وجهي وابجي وبعدين دخل محمد وكالي ..
- ايييي متبطلين مناحه انتي دومه وجهج مبوم
امشي حطيلي اكل يلاااا

مسحت دموعي وحطيت القرآن ع الميز ورحت
سويتله ريوك وخليت الصينيه ع القنفه ورحت للغرفه ...

دحست الذهب بالجنطه وطلعت عندي كم فلس جنت ضامتهن بالشلته مال الدوشك هم حطيتهن
وخليت فوكاهن فوطه الحبيبه مانطاني كلبي اعوفهه .. وخلييت كتاب القرآن وكلت ..
ياربي احميني ويسرلي امري هالمره اسألك يارب بحق اسمك العظيم الاعظم ياربي تيسرهه الي هالطلعه يارب

سديت الجنطه وبدلت ملابسي و ردت اخذ عبايتي وكلت اخاف يشك بيه خلي ابقى اتصرف على طبيعتي .. ورحت خليت شويه كحل بعيني واني ايدي ترجف وكل شويه موكعه شي ومخبوصه
افتح بالكنتور واسد و اعدل بملابسي واهفي على وجهي ومادري شسوي بس ادعي تعدي بسلامه هالروحه ...

صارت ساعه ١٠ جان يكول محمد ...
- وينهه عمتج لساعهه ماجت
- مادري يجوز هسه على جيه

شفته مبدل ومتعطر ويباوع كل شويه للساعه ويتأفف ويمشي ويكول ..
- رااح يجي ماضله شي وانه بعدني مارحت
وينهه متكليلي وين صااارت

ضليت ساكته وكلبي يرجف رجف اخاف يضل ينتظر ومايروح وشسوي النوب راح يحبسني اكيد
جان تصير ساعه ١١ وهو كال ...

- انه راح امشي ما ضلي وكت وهاي عمتج
اكيد على جيه انتي حسبي حسابج بالليل انه اجي اردج هنايه وحجايه وحده لو فكيتي حلكج جدامهم اهجم الدنيا على راسج وراس الخلفج ومايكف بعيني احد سمعتتتتتي تجفي الشر عنج وعن اهلج واخوتج تره اصخم عيشتج وعيشتهم

هزيت راسي باي وضليت مدنكه ومسويه روحي خايفه كدامه ومطيعه اله .. ومارفعت راسي لحد ماطلع .. اخذت نفس وركضت اخذت جنطتي وعبايتي وردت اطلع وتراجعت كلت خاف بعده بالباب لو قريب بالمنطقه ويشوفني ....

وضليت الوب بالبيت افتر وعيني على الساعه
وخايفه اطلع من البيت احس بس راح افتح الباب الكاه واكف لو يجي علي بوجهي وضليت متردده اوصل لباب الشارع وارجع اختل بالبيت لحد ما شفتهه صارت ساعه ١٢ الا ربع وضليت اكمز
هسه راح يجون واني بعدني ماطلعت ..

كلبي يرجف وايدي وركبتي ترجف بالكوه واكفه
عاد رحت بره كلت لازم اطلع وبعدني اريد امشي للباب سمعت صوت سياره طبكت اني كبل ركضت لوره البيت بصف الكيزر ختلت وحاضنه العبايه والجنطه ومخليه ايدي على وجهي وكاتمه نفسي اخاف ينسمع ويحسون بيه ...

سمعت صوت محمد ووياه بنات يتمضحكن
وطبو جوه واني ضليت اتراجف بمكاني
اخاف اطلع واخاف اضل ويكشفوني
وضليت اردد ...
يارب يارحيم ساعدني قويني يااارب دخيلك يارب

وره شويه انفتحت الباب وسمعت صوت واحد يمشي عرفته من صاح على محمد هذا علي
وهنا اني كمت ابلعم وابجي شسوي هسه شلون راح اطلع !!!!

ضليت امسح بدموعي واقوي بنفسي لازم اشرد
هاي فرصتي ..
وضليت انتظرت اصواتهم خفتت ومشيت واني مدنكه على كيف وصلت لشباك الهول ومااسمع صوتهم فباوعت من طرف الجامه وشفتهم بوضع
مخززري .. همه والبنات مصاليخ
محمد يمه وحده والثانيه واكف تصب بالعرك
وعلي متمدد ويمه اثنين كل وحده على جهه
ورايحين بغير عالم ...

اني كبل حطيت ايدي على حلكي والدموع تجري وكاتمه النفس ومشيت ويه حايط البيت بهدوء
وفتحت الباب واني اتلفت وطلعت وعفتهه مفتوحه
وبره لبست حذائي وركضت للشارع العام ..

اركض واتلفت والناس تباوع عليه بس خوفي جان اكبر من اهتم للناس بس اريد اشرد اخاف يلحكوني
ووكفت تكسي وهو من شافني هيج الهث وحلكي يابس كبل كالي اصعدي اصعدي ...

صعدت وهو رأساً حرك ومشى وحتى مسألني وين
تروحين .. ضليت اكول الحمد والشكر الك يارب الحمد والشكر الك يارب ..
ولازمه كلبي وبديت شويه شويه اجر نفس وهو كالي ..
- اختي اساعدج بشي كولي لا تخافين
- لا تسلم
- وين اوصلج كولي حتى لو ماعندج فلوس لا تستحين مني والله مايردج غير السانج كولي شتأمرين برسم الخدمه
- الله يخليك اخي تسلم اخذني

وسكتت مادري وين وين !!! بعدين طلعت من الساني ..
- اخذني للكاظم و وو بسرعه
- صار ان شاءالله نوصل بسرعه

حمدت ربي جابلي هالسايق خلوق وابن اوادم
ووصلني لبدايه السوك الي منه ادخل للامام
نطيته كروته ونزلت ورحت مشيت خلصت السوك ومن هناك رحت كبل للحمامات توضيت ورحت
للحضره دخلت واني ابجي ..

الخوف والوحده الي جنت عايشتهم تعبرو بهالدموع والشهكات الي خلت هالنسوان تتلفت عليه وضليت مجلبه بالشباك وبس ابجي واتذكر
بيبي من تجيبني هنا وشلون تزورني وتدعيلي
وابجي محتاجتهه اريدهه بهاي شدتي اريدهه ترجع تحاميلي مثل قبل اريد ارجع انام بحضنهه بامان وانسى كل همي

جنت من كد الخنكه الي بصدري والشهكه الي تشك بلعومي مااكدر احجي شي ولا ادعي بشي
بس لازكه نفسي بالشباك لحد ما جرتي مريه وياهه واخذتني كعدتني مسحت وجهي وانطتني مي ..شربت شويه وتشكرتهه جان تكولي ..

- بنتي خيرج كسرتي كلبي بحالج شصاير وياج
- هواي شغلات
- انتي وحدج احد وياج
-وحدي
- اهلج وين لعد
- ميتين
-اووف الله يصبرج يايمه الله يصبرج وينطيج مرادج باب الحوائج مايرد احد اندعي واطلبيه
مايرد احد هذا كريم ابن كريم اندعيه وهمه اهل البيت كادرين على كل الجروح

هزيتلهه براسي وهي كامت راحت واني كمت اخذت تربه واجيت صليت وضليت اقرا بالزياره واقرا قرآن وبعدين تمددت وصافنه بحالي وين وصل ..

اذكر ايامي قبل جانت الدنيا كلها احسها ملك يميني
وحاسديني العالم على عيشتي مدللـه وبنت خير
وناجحه بحياتي وعندي اهل حاسديني على محبتهم
وتعاملهم وثقتهم بيه وهسه صفيت لا اهل ولا بيت
ولا اي نجاح بحياتي كدر يفيدني حتى وظيفتي انحرمت منها ومادري شنو حالي هسه بيهه
ولا حبيب ولا اهل ولا صديق وحيده وضايعه ومتشرده من اهلي والناس وحايره وين اكضي ليلي وشلون اعيش ووين اروح !؟؟؟؟.

رحت طلعت تمشيت وشفت تلفون بالشارع رحت
صرفت دينار واخذت واحد من الدراهم ذبيته بالتلفون وخابرت روعه طولت يلا جاوبتني
كبل من سمعت صوتهه كلتلهه ...
- رووعه خيه محتاجتج
- زهرااء ولج وينج موتيني كل مااجيج ماكو وين انتي شبيج احجيلي
- لج داده موتوني ماخلو عليه عيشه
- بس لاتبجين وفهميني على كيفج
- بعدين روعه بعدين .. اريدج تخابرين ايوب
وكليله .. كليله خلي يخلصني منهم اثنينهم روعه ارجووج كليله يخلصني منهم والله بس يعرفون بيه مايرحموني والله
- انتتتي ويييين احجيي وين
- كليله نخيته نخيت ابن شمر لا يخليهم يوصلوني ارجوووج وصليله هالحجي
- اوصله والله احجيله بس هو هسه مو بيتهم
قبل شهر رجع لاربيل يم ولد عمه يشتغل ماعرف شوكت يرجع والله هو ودعني وسالني عليج قبل لايروح ومن هذاك اليوم لليوم ماعرف شي عليه
-لااااااا ياااربي لااا دخيييلك لااا
- لتخافين اليوم احرك تلفون اهله واخليهم ينطوني رقم اوصل اله بي احاجي والله مانسى بس كليلي وين انتي شصاروياااااج احجيلي الووو الوو وينج

من سمعت منهه ايوب مسافر تحطمت نفسيتي والخوف رجع سيطر عليه وذبيت السماعه وضليت ابجي وبعدين عفتهه ورحت امشي
وامسح بدموعي ورجعت للحرم تمددت واني
اباوع للضريح وابجي واكول ...

ياربي شنو حكمتك من عذابي هذا كله ..شسويت ذنب بحياتي وهيج تعاقبني بي بالدنيا قبل الاخره
ذنبي الوحيد العشت بي معذبه ضميري واستغفر عليه هو اهون الف مره من الحلال الي عشته

وين انطي وجهي المن التجىء !!! منو اليكدر يحميني منهم ! اني اجيت لهالحرم احتمي باهل بيت نبيك ياربي مالي غيرهم مكان بهالدنيا
لا تخليهم يلكوني وياخذوني ومايرحمون بيه

جنت ابجي واحاجي ربي وبعدين غطيت راسي بالعبايه ونمت من التعب .. ومااحسيت الا على صوت اذان الفجر ..

كعدت وعدلت شالي الي جنت لافته على ركبتي
رحت للمغاسل ..غسلت وتوضيت ورجعت
صليت الفجر وكعدت اسبح واني صافنه على الضريح وافكر شسوي هسه ؟؟؟

وين اروح ؟

.

#شقراء_بغداد

بارت_٢٥


اصبحنا واصبح الملك لله .. توكلنا على الله
اه على ريحتك يبلادي ...
وكت الشروك كرب وانا ماصليت ...
ياالله ...
الله اكبر .....
.
.
ابو جراح ... ياشيخ يااااا شيخ
-هينه هينه يول ... شبيك تصارخ
- يااشييخ امشي معاي
-خيييرك يولد
- امشي معاايه ياشيخ
-هيني جيت
-امشي ناحيه البستان
- البستااان!! احكي الخبر ياولد
- حرمه ياشيخ حرمه

عبرت باب الديوان مسرع ولحقتو لناحيه البستان

- هاذي ياشيخ تحت هالتينه
- محدن يكرب صوبها
نزلت لحدرها وادحكلك ذيك البنت الحنطيه كانها غزال مجروح ... مستنده على الشجره وعبايتها على كتفها منسدله على الشعر الاسود المنثور على وجهها وشامه الركبه حدر اليسار اول ماخذا عيني شامه الركبه ..

كربت على وجهها وشلت شعرها باطراف اصاابيعي ونثرتو لوره اذنها .. دحكت العرق مالي جبينها وشفاها تنطق بهمس
كربت اذني من شفاها وسمعت...

الهي اني مسني الضر وانك ارحم الراحمين

بصوت ناعم ومتعب كأن هالبنت هذيانه من الحمى
من سمعت كلامها الي ماتوكفت لحضه عنو
قلت هاذي دخيلتي مدامها تطلب الرحمه

- صييياااح
- عونك ياشيخ
- شيل ا غراض البنت والحكني ع الديوان وتروح تصحي الشيخه ماريد بشر يعرف بالدحكناه سمعتني !!
- امرك امرك

رفعت راسها وخليتو على ايدي وعدلت عبايتها على جسمها ومديت اليد الثانيه تحت رجلينها وشلتها وهي ماوكفت همس بهالايه .. كل شوي اكرب حدرها عسى انها تقول شي ثاني واسمعها لكنها داومت بحكياتها .. ودحكت المصحف بحضنها ماهدتو

امشي بيهه بسرعه تااوصل هالديوان الي صار ببعد السما ...

دخلتهه بيتي وحطيتها بفراش شيوخ وانا داخلي مرتاح ومخايف منها .. بنت اجواد من تراتيلها

- خير يايمه ... من الحرمه ذي !!
- ماعرفتها يايمه لقيتها عند شجر التين وتهذي من الحمى داريها يايمه داريها
- ايه زين زين
-خلي بالك عليها لاطلع لعند الولد وراجع
- وصيهم يايمه بالماي البارد وقماشه ابرد وجهها فيه
- ان شاء الله يا يمه
.
.
- يولو حدري هينه اثنينكم
- امرك ياشيخ
-اسمعوني زين .. هالحرمه طاريها ماينذكر لابين اهلنا ولا ديرتنا ،،، حريمنا مايسمعن بجيتها لحين انا احكيلون . فهمتو ؟؟؟
- تم ياشيخ
- زين البنت عندها حمى خذولها المي البارد
- تأمر ياشيخ

ايييه وشسالفتج يمزيونه ؟؟؟؟ وشدلاكي عليه !

رجعت للديوان وادحكها على حطه يدي مدده وتهذي ..وكفت حدرها وامي تغسللها راسها وايديها

- يمه ،، خلك عندها انا اروح احضرلها عشبه تريحها
- زين يمه زين .. لكن حريمك يايمه ولاكلمه يسمعو
- ماتوصي حريص ييمه

كعدت حدرها وبيدي سبحه ودعيتلها بالشفا
جريت من يدها المصحف وحسيتها متمسكه بي خليتو عندها

ضلت عيني تحفظ تقاسيم وجهها من عينها الوارمه وحاجبها الثخين الطويل ،، خشمها الناعم الاحمر المنحوت ،شفتها الذبلانه ومتيبسه و شامه ركبتها الصغيره حدر اليسار من البلعوم
شكلها طفله شلون ماشيه لوحدها ؟؟؟؟
- ماصحت البنت يابني
- لا يمه ماصحت
- تدنى خليني اشربها هالعشبه تداويها وتخفف حمتها

شربتها العشبه وانا طلعت بره وكفت احكي مع ولد عمي صياح واسأل بامرها وفجأه طلعت علي امي وكالت ..
- ياابني اكرب هين
- هيني ييمه ... خير وش عندك
- احدر دحك البنت وشبيها

رفعت ردان قميصها وكعدت ترفع بيدها وتأشرلي عليها .. دحكت اديها متلونه ومتورمه من زراك وسواد وخضار واثار جروح ومابيها شي ناصح وراحت امي رفعت ردانهه الثانيه ونفس الشي بيها ..
..قلتلها
- استريها يايمه استريها لاحول ولاقوه الا بالله
- ياابني هالبت ممثلين بجسدها ياايمه مايجووز
نسكت عنها
- مانسكت ياايمه مانسكت .. خلها تصحى وانتفاهم وناخذ حكها

عفتها وطلعت وانا صدري ضاق ماعرفت وشسالفتها !!! والافكار صارت تضارب بهالراس وماتوكف ..

سمعت صوت امي تحكي ..
- ياابني ارسل واحد من الولاد يجيب الحكيمه لهينه
البت علتها اكبر من الحمى ياايمه تعجل تعجل

رحت لعندها وقلتلها ..
- خييير يايمه وش بلاها البت
- ماهو بوكتو ياابني تعجل الحكيمه دربها بعيد الحك ارسل عليها من الولاد ياابني تحررك
- زين يايمه زيين

رحت رسلت ابن عمي صياح يجيب الحكيمه لهينه
ومن بعدها اجوي علينه رجال من الديره تسالمنا
وقلتلهم ..
- هاليوم ديواني مكفل عندي مريض لكن الربعه ببيتي مفتوحه ليكم حياكم يالربع حياكم الله

اخذتهم وضفتهم بالربعه ودزيت على الكهوجي
قدم كهوتهم وضليت كل حين كايم ارحب بضيف جديد واتناقش بامور كثيره من هالصباح وفكري كلو على جيه الحكيمه يمتى تصل لهين ؟؟

ومن بعد ساعه دخل علي بالربعه صياح وسلم وحدر لعندي و قالي انه جابها وهي الحين بالديوان عند البت ..
تطمنت دامها وصلت لهين بسرعه وكمت وصيت
الولد على الغدا ومشيت للديوان اتحرى امرها
وشصار فيه ؟؟

دكيتو لهالباب وانا اصيح لامي تحدر هينه
ووكت الي افتحت الباب قالتلي ..
- الله الاكبر لا حول ولا قوه الا بالله
-خيييرك يايمه وشبلاها

- كبير بلاها ياابني كبير .. الها الله الها الله
- يايمه البت مواته! علميني شبلاها
- ماعرف يايمه ماعرف .. روح لعند ضيوفك ياابني وحالها انا ادزلك خبرو
- يايمه لو حالها صعب ناخذها المستشفى
- الحكيمه هين تطمن دايرين بالنه عليها
-عجل وش حكيك هاذ يايمه
- من بلى مادحكتو ماني ببطر فزعانه ولاتسألني وش دحكت منها خلها مستوره
- ظليمه والله ظليمه

نفضت عباتي بغضب ومشيت للربعه كعدت وانا
افر السبحه بيدي هين وهين والي يحكي معاي ماركزلو وتالي منهم من توكل لشغلو ومنهم الي ضل هينه يتغدا ...

جابو الغدا والكل اكلت الا انا مالي نفس الزاد
رحت لعند البت ودكيت الباب واجتني امي ودحكت بعينها دمع وانا من زمان مو شايفو لهالدمع عندها
استغربتو وكضبت يدها وقلتلها..

- يمه يالعزيزه وش هالدمع هاذ يايمه
- ياابني ماهو بحجر هالكلب ومايبكي حالها
- يمه علميني وش حالها هاذ الي بكاكِ
- خلها مستوره يابني خلها مستوره ،، الحكيمه ودها تمشي لديرتها ارسل من ياخذها

دخلت لعندها وانا ضليت صافن بحكيها وش صاير لهالبت وامي ماترضى تحكيلي عنو ؟؟؟

وصيت ولدنا ياخذ الحكيمه لديرتها ورجعت لعند الضيوف وكابلتهم للمسى ومشو و حدر غيرهم
و وكت الغروب امي طلبتني اروح لعندها وترخصت وكمت لعند الديوان دخلت ودحكت
البت بنفس نومتها وعلى جبينها قماشه بيضه
ومتغطيه بثلاث بطانيات .. دحكت لامي الي كامت وحدرت لعندي ..

- يمه البت ما صحت
- لا لساعهه على هالنومه وماضنها تصحى اليوم
لكن خلك عندها انا ودي امشي البيت اصلي واتعشى وارد لعندها ماطول عليك
- زين يمه زين انا هين اضل عندها تريحي انتي

سديتو للباب وراها وكربت حدر البت وتلمست خدها وجبينها بعدو حار ودحكت شيشه دوا حدر راسهه ومعها المي والمصحف الي كانت ماسكتو
تحيرت بامرها كثير وتخوفت حالها والي جرى عليها !!!

كعدت حدرها وانا اسبح وادعي لها لبين ما رجعت امي وانا رحت لعند ضيوفي وكابلتهم لنص الليل
وكل من يسأل عن الديوان وش بلاه مكفل اليوم
احكيلو عندي فيه مريض ...

ولنص الليل فرغت من الضيوف وكمت رحت لعندها كابلتها انا وامي وندحك لوجهها المصفر
وهي تغير لها بالكمادات وانا ادعي لها واحكي لامي وش عندي من اخبار اليوم تخص ديرتنا

ونمنا عندها اثنينا وانا كل حين افز وادحكها نايمه ماصحت ولطلوع الفجر كمت صليت وضليت مكابلها و وكت الي امي صحت ومشت تتوضى
هي صحت وفتحت عينها تدحكلي بتعب وانا كمت
لعندها وصحت لامي ردت لعندنا وكابلتها تحاكيها وماترد عليها ورجعت غمضت عينها ونامت

ضلينه متحيرين بامرها ومانعرف وش نسوي لها
ومابيدنا غير الصبر عليها ...
وصبرت عليها يوم ثاني وانا اتفقد حالها كل حين
وامي ماتركتها تاكل وتصلي حدرها ماطلعت من الديوان ونومنا عندها

ولليوم الثالث .. صلينه الفجر انا والوالده و وكت الي فرغنا من الصلاه والتسبيح دحكناها صاحيه
وتدحك علينا ...

كربت امي حدرها وتلمست وجهها والبت حولت نظرها حدري ورجعت تدحك لامي وحكتلى ..

- تقبل الله صلاتكم

امي تبسمت ودحكتلي وردت دحكتلها ..
- دعيتلك فيها يابنتي طمنيني حالك زين الحين
تشكين من شي ياذيكي
- الحمدلله زينه

عدلت كعدتها وصارت تنزل ردانها وتقفلو ورفعت شعرها عن وجهها ودحكتلنا وحكت ..

- منو انتو

دحكت لها وقلتلها ..
- رحمه الله الك يالاخت

تبسمت بتعب وقالتلي ..
- الحمدلله على ما رحم

امي مسكت يدها وقالت ..
- يابنتي طمنيني حالك زين !
- زين ياشيخه زين
- وش علمك انا شيخه !
- صفاتك سابقتج ومدليه عليج
- والله لانك نبهه

تبسمت وحكتلها بتردد ..
- يا شيخه من بعد اذنج اريد اغسل اكدر؟
-ايه يايمه تكدري

قلتلها ..
- تفضلي يالاخت من هين

رفعت الغطى من رجلها وكامت ومشت لعندي وانا طلعت قبلها دحكت المغاسل الي بره فارغه واخذتها ليها وعفتها ومشيت شوي بعيد عنها

دحكتها من طلعت من الحمام وراحت تغسل
احنا مغاسلنا صايره بشكل صبه عاليه وفيها
حنفيات كثيره على طولها والي يغسل يرفع رجلو
على الصب ويغسلها او يمد ايدو تحت هالمي
لكنها غير ..

كعدت على الصب ورفعت رجولها لنص الحوض وفتحت عليهم المي وميلت شعرها الطويل لعند ظهرها وغسلت وجهها وركبتها ومسحت على طول شعرها باديها المتبلله .. واخذت المنشفه
من الطرف نشفت فيها وصفطتها ورجعتها مرتبه لمكانها ولبست حذائها الكعب وحدرت تتمشى بهداوه
وانا ادحكلها وهي عينها على المكان من حولها
تمشي واديها تلاعب اطراف شعرها لحين ما وصلت حدري .. دحكتلي وتبسمت وقلتلي ..

- شُكراً لانك واكف تنتظرني
- من الواجب هذا يالاخت

دنكت ومشت كدامي لعند الديوان ودخلت كعدت حدر امي بطريقه انا ما مدحك مره هالشكل تكعد
ضامه رجولها وميلتهن لعند جهه اليسار وظهرها مشدود وحايره بشعرها تجمع فيه وتميلو ليمينها

شلت عيني منها ورحت وصيت ولدنا على الريوك لهين يجيبو ويكثر فيه ورجعت لعندهم وسديت الباب ..

كعدت كدامها وبينا مسافه وامي حدرها ..

امي شالت الغطى ولفتو حول كتافها ودثرتها به
لانها كانت لابسه قميص خفيف والجو هينه مثلج
هالوكت ..

امي كانت تسألها على صحتها واذا كانت تشكي من شي ياذيها وترد ليها بكلمه الحمدلله وزينه
ماسالنها عن شي وهاذ الواجب انها لازم تاكل من زادنا وتريح وذاك الوكت بكيفها تحكي الي تريدو

ووكت الي اندكت الباب هي فزت ودحكتلي وانا طمنتها وكمت فتحت الباب واخذت الاكل من الولد
وحطيتو كدامها ورجعت لمكاني .. حكتلها امي ..

- كِلي يابنتي هاذ زادك وجوب تخلصينو كلو
- ماكدر عليه كله ياشيخه تفضلو وياي وناكل سويه
- لااااه هاذ زادك يايمه كِلي هني ومري على كلبك

مامدت يدها ناحيه الزاد ودحكتلي وتبسمت وحكتلي ..
- يااخي تفضل اكل وياي ..انتو تعبتو علمودي
وبعده الصبح هسه بدا مامعقول اكلتو قبل هالوكت
- لااا يالاخت كفي زادك واشبعي بطنك ماعليكي مننا

دنكت شويه ورفعت عينها ناحيتي وحكتلي ..
- اعرف عن الشيوخ ما يرفضون طلب ضيفهم معقول تكون عكسهم

تبسمت بوجهها وحكيتلها ..
- والله وغلبتيني وانا ابو جراح

وكمت ناحيتها وكعدت حدرها على الصينيه
وهي حكتلي ..
- انتو الي غلبتوني بكرمكم وطيبكم
- ما سوينا غير واجبنا سمي بالله وكِلي

مدت ايدها ناخيه الزاد من بعد ماانا اخذت اول لكمه وبموقفها هاذ رفعت من قدرها بعيني
ودحكتها تاكل بهداوه كأنها ماليه بطنها قبل ساعه
ولا كأنها الي من يومين ماكلت شي والله يعلم بالي قبلو كم يوم .. ظنيتها ماتخلي شي يفوتها لكنها
مبينه بنت عز ...

دحكت لامي وحكت ..
- هذا الخاثر صاحبته روحها طيبه
- صدكتي يابنتي هاذي مرتو لابو جراح هي العملتو

دحكتلي وتبسمت ..
- يستاهلها ابو جراح

ضحكت بداخلي على لفظها لاسمي .. ضلت تاكل بهداوه وامي تحث بيهه تكمل الاكل كلو وهي تتحج بالشبع وماكملتو ...

اخذت الصينيه طلعتها للولد اخذوها للبيت
ورجعت لعندهم ...

كعدت بمكاني ودحكت لامي وهي قلتلها ..
- يابنتي كأنك مو ببنت ديرتنا
- صدكتي ياشيخه اني من بغداد
- بغداد !!! وش جابك لهينه وش مشاكِ الدرب كلو وانتي صغيره اهلك وينهم عنك
- ههه شيخه اني مو صغيره لهدرجه لايغرج شكلي الناعم تره عمري ٢٥

انا ماكدرت اخفي صدمتي بيهه ..البت الي حملتها طول الطريق وهي بخفه الريشه بيدي حسبتها بنت ال١٧ واثاريها تطلع اصغر مني بسنه !!!

قلتلها ...
- ٢٥ متاكده !!
- اي والله ٢٥ ومتزوجه ومتوظفه

رفعت سبحتي وخليتها على رجلي واتكأت على المخده وقلتلها ...
- سولفي يالاخت سولفي

ارتبكت وضلت مدنكه وتلعب بشعرها وامي تدحك لي وانا ادحكلها وما غصبناها على الحكي لحد ما هي قلتلنا..
- اليوم شكد بالشهر

جاوبتها وانا مستغرب هالسؤال..
- ١٠/٢٨
- هاا احنه بشهر العاشر
-ايه وماضلو يومين ويخلص عجل ماتدري بالتاريخ ؟
- لا من زمان مادريت عنه والبارحه من وصلت شفت الجو بارد ردت اعرف ياشهر هذا
- اااا يالاخت ازيدك بمعلومه ماتدرين عنها
-اي شنو
- هاليوم هو الثالث الك بينه
- اااه معقول لعد وهاليومين شنو صار
- ماصار شي غير انك نايمه وتعبانه
- وانتو ٣ايام باقيين يمي
-اييه عجل نتركك!

تبسمت ودارت نظرها لامي وكضبت يدها وتشكرتها بكل حنيه ..
- هواي اشكرج ياشيخه تعبتي وياي وتركتي راحتج علمودي اشكرج ياعيوني من كل كلبي اشكرج
- واجبنا هذا تجاه ضيفنا ماسوينا الكثير يابنتي
- لاا تعبتكم وقلقتكم واخذت وقتكم هذا كله يحتاج اشكركم عليه بفضل الله وانتو اني تحسنت صحتي
- الحمدلله دامك صرتي بخير وسلامه كلو فدا لعينك
- تسلمين ياشيخه ..صحيح تذكرت شغله

اندارت وصارت تدور جنطتها واخذتها فتحتها وطلعت منها فلوس وحدرت لعندي .. وكفت كدامي
بتنورتها النيلي القصيره المنفشه والي باينه صغر خصرها و نعومه كاحلها وقميصها الكريمي الخفيف وبارزه من فتحة الياخه عظام ركبتها
انتبهت لها وهي تحكيلي ...

- ابو جراح هاي من وصلت كاعكم جنت تعبانه وجوعانه كلش فاخذت من شجرتكم اربع تينات وكلت من يطلع الصبح ادفع حقهن
- وش تحكي انتي ما يلزمو تدفعي حقهن كلهن اربع تينات مايلزمو
- لاا هذا حرام اني اخذت بدون علمكم لازم ادفع فلوسهن وهذا الدينار اعتبره حقهن
- دينار على اربع تينات كثير انسيه يالاخت
محاللـه مايلزمو اعتبريها لوجه الله ومحالـله بيهن
- لااا ياابو جراح مو اني الي تصيرلي الصدقه
مثل ما هذا مالك هذا مالي اخذ هالدينار واعتبره
حقهن بلا زياده او نقصان

تبسمت واكدت بفعلها واصرارها ونبرتها الجاده
بالحكي انها بنت عز ماترضى بالمساومه ..
اخذتو منها وهي تشكرتني فوك ماانها دفعت اضعاف حق هالتينات تشكرتني لان اخذتو منها
ومن بعد هالموقف انا زادني فضول اعرف وش قصتها ؟؟؟

رجعت لمكانها ومن كعدت داست على شعرها
وضلت تسحب بيه وتلمو .. امي ضحكت وقلتلها.
- يا صلاه النبي على هالشعر يايمه منين جايبتو
- وارثته من اهلي
- خليني اظفرو لك باين متعبك بطولو

امي تقربت حدرها واخذت تظفرلها والبت دمعت عينها وصارت تحاول تتماسك وتمسح دمعها
امي سألتها ..

- وش علامك ياابنتي
- تذكرت بيبيتي هم هيجي جانت تظفرلي
- هاا ووينها عنك
- عافتني من زمان راحت لدار حقها
- الله يرحمها ويسكنها جنتو
- امين يارب

كملت امي شعرها وخلت ظفيرتها المتينه على جنبها الايسر وبيدها مسحت على وجهها وقالتلها..

- وش تعبك يابنيتي وش اذاكِ احكيلنا ناخذلك حكك ونسندك .. تراكِ دخيله بيت شيخ مسيط وكبير ديرتو وبفضل الله حالنا وكوتنا ترهب عدوينا ومحسبه كلمتنا بين اهلها ، انتي بامان هينه لا تخافي مننا كلمتك الي تحكيها ماتعتبو للباب هذا لا تخافي واطلبي كل الي بخاطرك ويجرى لك

دحكت لامي بعين حزنانه ورجعت دحكتلي وانا قلتلها..
- يالاخت على مد عينك اطلبي انتي دخيلتي
لو تطلبين كل جاهي ومالي انزلو لعند ايدك ومااردك اطلبي

سكتت شويه وحكت ..
- اني مااريد شي صدكوني اني ماعرف شنو محتاجه حتى اطلبه منكم
- يالاخت لو تايهه ندليكِ ولو خايفه نامنك
- ياابنتي احكيلنا وش قصتك ونتساعد عليها

دنكت وبصوت هادىء حكت ..
- اني تزوجت شبه مجبوره من قبل ٣ سنوات
كلشي جان عادي لحد مااجهضت حملي الاول
من بعدها بدات المشاكل بحياتي .. تخرجت من كليتي و وراهه اعزاز كلبي وسندي الوحيد بهالدنيا توفو .. ابويه وبيبيتي .. مااحجيلكم شنو من حزن واجهت بي بس اكتفي باني ماجنت واعيه ولا حاضره حتى العزاء ومن بعدها وبسبب الحزن والخساره الي صارتلي اعتكفت عن كلشي وهنا رجلي ماتحمل هالشي وهو جان يريد ولد والله مارزقني بحمل بعد هذاك واستغلها ضدي
وهو جان جندي ووكت الي تسرح مااشتغل شي و خلاني اشتغل واني ادبر العيشه واشتغلت محاسبه بمصرف وفجأه اكتشف ان رجلي مديون للاقمار
ورحت فكيت دينه وبعدها صرت اشوفه سكران ويطلع ويعوفني بالبيت لاكثر من يومين ومادري عنه وين راح .. وبعدها عرفت انه منطي البيت مقابل ضمانه لحياه اللهو الي دخل بيهه والي منطي اله جان ابن عمه وهو يطلبني ثار وراد ينتقم وضل ٣ سنين هو يخطط لانتقامه مني ونفذه بيه من خلال رجلي وحبسوني اثنينهم بالبيت من شهر الخامس جان هذا اخر تاريخ اتذكره ومن بعدها ماصرت اميز بين الايام ولا بين ليل ونهار والله دزلي عمتي رادتني احضر ثواب مسويه لاهلي ببيت عمي وكدرت استغلهه واشرد من عدهم لان مايرحمون
- زين يابنتي امك اخوتك وينهم عنك اعمامك ليه ماسألو عنك
- امي هه ياشيخه لا تسأليني على امي واعمامي همه بس اثنين ومن قبل همه مالهم دخل باحد واخوتي صغار بعدهم بالمدارس .. واني مارحت لاحد منهم لان اعرف ماراح اسلم يمهم .. ياشيخه رجلي يصير ابن خالهم واهلي يثقون بيهم ويعزوهم اكثر من ولدهم مستحيل يصدكون بيه لو حجيت شصاير بداخل هالبيت من عجب
لذلك اني عفت كلشي وره ظهري ومشيت
- وشدلاكِ حديثه تعرفي احد هينه وماشيه ليه !
- من السيط عرفتها دافيه و وطن مامثله وطن
واجيت اهرب بيهه من اثر بغداد الي دمى كلبي

سكتت واحنه سكتنه على كبير حزن هالحكي
من نبرتها وراها وجع كبير واثر مدفون لحديثتنا بجوفها .. رجعت حكت ...

- اني ما عندي اي طلب يمكم انتو كفيتو ووفيتو بكرمكم وطيب اخلاقكم .. ومشاكلي اني اعيشها وادبرها وحدي ماريد اتعبكم بيها ولا اريد تتورطون ويه اصحاب مشكلتي ماارضى عليكم الاذى مني
- ما مقبول هالحكي يالاخت الناس لاهلها وانا قلتلك انك دخيلتي ان ماتعرفيها فتعني انك بحمايتي وسدي وسدك واحد للممات
- تسلم اني اعرف شهامه الانباري شلون تكون
وادري بيك ماتقصر وياي بشي بس اني مامحتاجه شي الحمدلله اني بس جنت محتاجه اطلع من هذاك البيت غيره كلشي مااحتاج

كامت وكفت واحنه كمنا وكفنا حدرها وامي تحكيلها ..
- لوين طالعه مايجوز يابنتي وين تمشين وانتي ماتعرفي احد هينه
- مايحتاج اعرف احد اني اعرف حديثه وهي تعرفني لاتخافين عليه ادبر اموري
- ماتطلعي والله وانتي لحالك
- يالاخت مايحوز تمشين لوحدك بهالديره
- ماتخاف مايصيرلي اذى اكثر من الصار
- لاا هالكلام ماينفع هين اكعدي هينه بينه بيتك صار ماترهم مشيتك وعيشتك لحالك اكعدي هينه بين حريمي معززه مثلهن ومايلوحك اذى وراسي يشم الهوا
- يسلم راسك بس لا ماكدر اعيش عندكم تعذرني
ياشيخ
- يولو تعصين امر شيخك

من حكيتلها هيك دحكتلي بسرعه وركزت عينها على وجهي وبدات هالنظره تتلاشى لحد ما وكعت من طولها وامي كضبت راسها ..
دنكت لعندها وشلتها لفراشها وجبت المي رشيتو على وجهها وما صحت وامي زاد خوفها عليها
وطلبت ارسل لها الحكيمه ...

طلعت من عندهم مسرع ورسلت ولدنا يجلبو الحكيمه لهين وصرت امسح على وجهي وانا اذكر نظرتها الي عجزت افسرها وش تعني .. امشي بهالحديقه وانا هالنظره كدامي صورتها ماتزحزحت حتى وانا احكي مع هالرجال الي كانو يسألو عني من هالصباح وبالي عندها وش بلاها كانت بخير وش جرالها ! انا كلمتي وش سوت لها ؟؟؟؟

ماكدرت اطل عليها لكثره هالرجال عندي و مادخلت للبيت حتى ادحك الحكيمه يمتى تصل لهين ...

ووكت الي وصلت ترخصت منهم واخذتها للديوان وسألت امي عنها وعرفت حالها نفسو ...

رجعت لعند الرجال ودخلنه البيت للربعه وتكهوينا
وتحاكينا بكثير امور ومنها من ينشد حالي هالايام وتغيبي عن مجالسهم وارد بعندي مريض وينتهي الكلام وترجع كدام عيني نظرتها ياعليم الله وش بيها من خفى واسرار ....

صار وكت الغدا وانا فكري كلو عندهم وش سوو للحين ماصحت!! ترخصت ومشيت لعندهم
ودكيت الباب فتحتلي امي طلعت وسدتو وراهه مالحكت اسألها شي وامي نترت بيدها وحكت ..

-البنت حامل ياابني حامل
- وشوو حامل !!
- اييه يابني الحكيمه تقول انا كنت شاكه بامرها واليوم عادت فحصها وتوكدت بحملها
- وهذا الي كنت تخفينه عني البارحه
- لااه لاااه هذاك غير لا تربط بينهم
- عجل وش عندها ازيد بعد
- قلتلك خلها مستوره انا كل حين ارجع اعيدها لك ياابني لاتسأل عنها
- ايييه زين زين يايمه زين ،، وشلونها الحين صحت !
- ايه صحت فتحت عينها شوي ورجعت نامت
والحكيمه تقول انها تحتاج راحه وكاعد تحضرلها
بدوا يقوي حيلها ويشد عودها
- الله يرحم بحالها والله انها حزنتني عجل كل هالبلى يجرى على مره هالكد كدها ماتكدر تشيل حجاره ويتوالى عليها اثنين ظليمه بالله ظليمه

رجعت للبيت وكعدت وانا النار تاكل بجوفي وعيني سهيانه بحالها فوك هالبلى يجي الحمل
وش هالحكمه من جيتو ! وش قدرها ؟؟؟؟

لوكت الغروب امي طلبتني ورحت ليها ودحكت البت صاحيه ..حكيتلها..
- سلامتك يالاخت ما عندك الا العافيه
-الله يعافيك

دحكت لامي وهي حكتلي..
- يابني انا حكيت معها واقنعتها تضل عندي لحين مايشد عودها من جديد ونكعد نتفاهم بامرها
- زين تسوين يايمه وانا ماارضاهه تمشي من بيتي
هالشكل خلها ترد صحتها وانا اخذ حكها

دنكت امي لها وكضبت يدها وكعدتها وقلتلها ..
- امشي معاي للبيت هناك تريحي وانا وياكِ نكعد بداري وماعلينه باحد

كامت معها وانا طلعت كدامهم للبيت ودخلت من باب الوراني وصحت ...
- يهالحريم احدرو هان

طلعن الحريم .. ام جراح زوجتي . . واختي الكبيره مناسك وتصغرها صفيه .. حكيتلهم ..
- كواكم الله
- الله يكويك ياشيخ
- اسمعوني زين .. هالحين راح تدخل الشيخه ومعها بنت .. ماتسالن وش جابها وش اصلها من فصلها كل العليكون تدارن حالها وتسندن كلبها بلكمه زينه وماتطلع سالفتها عتبه هالباب والي تعصي تعرف زعلنا ثكيل
مناسك - تم خويه ماتدير بال عندي انا اكوم بواجبها
- يحفظك الله

دخلت بهالحين هي وامي تتمشى بهداوه وضعف وهي كاضبه يدها لامي وتدحك لينه .. حكيتلها بصوت عالي..
- حياكي يالاخت حياكي بهالبيت تفضلي

عبرتلي بمعنيها عن الشكر ودخلت ويه امي لدارها وانا بعد ماتطمنت عليها طلعت اكضي شغلي
ومجالسي الي تركتهم لاجلها ...

تلكاني ولدي جراح بعمر ٤ سنين حدر يركض وتمسك بثوبي .. شلتو وبوست خدو وهو يوكلني من تفاحتو الي بايدو .. اخذتو معاي المجلس مثل مامعتاد وهو من ندخل يهدا ويضل كاعد حدري
ويدحك للوجوه ...

لليل رديت البيت وصحت لام جراح تحضرلي الحمام .. ومشيت سبحت وطلعت لعند امي
دكيت بابها وطلعتلي قلتلي ..
- نعيماً يايمه
- الله ينعم عليكي يالغاليه بشريني كيف حالها
-يكطع الكلب يابني ساعه الدرت من الحكيمه انها حامل بكيت بوجع ومن بعدها لازمت السكوت
للحين هي ضاله على اكله الصبح الي كلناها معها
- وشلوون تخليها يايمه مايجووز
- وانا ادحسو للاكل بالكوه بفمها ماتريد تاكل ولا تكعد ولا تسوي شي غير انها مغطيه راسها ونايمه
- البت مصدومه يايمه حكها حكها عجل هالسنتين
كلها ما حبلت الا هالحين .. خلي بالك عليها يايمه
- ماتوصي يابني ماتوصي. ،،، روح دارك تريح

بوست راسها وصعدت لغرفتي لكيت ام جراح
نايمه و حدرها جراح .. ذبيت ثيابي ونمت واول ماغمضت عيني صارت نظرتها الاخيره كدامي
وكل ماانطيها لتفسير ماترهم ونمت على فكري
وش خلف هالنظره من حكي ؟؟؟

وثاني يوم صبحت على الوالده ومشيت للمعمل
تاركو هالايام .. انا عندي معمل اخشاب نصنع
فيه الاثاث وغرف النوم ... تفقدت حالو وكضيت النهار فيه ووكت رجعت سألت الوالده عنها وحكتلي
انها على نفس نومتها مافاد معها حكي ولا غيرت ثيابها ولا حطت شي ببطنها ...

صعدت لغرفتي انجضعت وانا افكر بحل معها
ووكت الي غفيت دخل ولدي جراح يحكيلي
ان رجال يطلبوني بالديوان ..

لبست عباتي واليشمغ والعكال ومشيت لعندهم
ومن سالفه لسالفه كضى هالوكت مع الرجال
لعند الليل بعد الساعه عشر دخلت البيت ودزيت
صفيه تطلبلي الوالده ...

حدرت لعندي وكعدنا سويه وسألتها ..
- ها يايمه حالها نفسو
- ايه يابني نفسو البت ذبلت كدام عيني وجهها مصفر وعينها خافته والسكوت الي هي بيه مايطمن ياولدي مايطمن
- ماعرفتي وش اسمها
- لا والله ماعرفت ماتنطك بشي هالبت غير هالحكيات الي سمعناهون ماعرفت
- زين يمه زين .. انا اترخص منك اريد احكي معها كلمتين
- ايه يابني روح لها

رحت لعندها وسديت الباب .. وكفت ادحكلها وهي نايمه على فراش امي والعين مفتوحه وصافنه بهالفراغ ..
تعمدت وحكيتلها ..
- يولو دحكي عليا

دحكتلي بنفس هالنظره وثبتتها علي وانا رفعت شماغي لوره وحكييتلها ...
- اسألك بحب الله ونبيو اطلبي مني شي .. اطلبي الي يخطر ببالك وانا اسويه لك لو كان مانخلق اخلقو لك ولا تضلين بهالحال
انا مكدر اضل ادحكلك وانتي تذبلين ببيتي
دخيليتي مايجوزلها التعب عندي .. اطلبي لاتسكتين

بنفس نظرتها وهدوئها حكتلي ...
.
يتبع..

عيوني يرهمله قميص وشوز ابيض وشال وجنطه اسود
او قميص وشوز ابيض وشال والجنطة زيتوني

او قميص اسود والشال والشوز والجنطة ابيض
او قميص نفس هاللون👇🏻😻 يكولله نفطي(زيتوني غامق) والشوز والجنطة بيجي فاتح والشال أسود

وعادي بكيفج قميص أو بدي

وجل الحاجب وباودر شدو للحاجب هذيني🙃 اثنينهن أحسن من القلم لان القلم بالاستمرار يسبب تساقط شعر الحاجب

#ملوكه

هج درجة زيتوني غامق يجنن وياه🥰✨

#ملوكه

عمري هاي من الدلال الزايد
لاتخلين الطفلة تتحكم بيج انتي لازم تتحكمين بيها
اذا كبرت عل هج نمط فأنتي حيل رح تتأذين🤦‍♀💔 ..فغيري بالتربية
اول شي الطفل من يريد شي حتلو جان غلط ويريده ..فالأم كون تمنعه وتجاوبه السبب بكلمتين مختصر عل كد فهمه
يعني مثلا اليوم الصبح اكلت اهواي نساتل وبليل هم رادت بعد فأنتي كوليلها اكلتي صبح فموزين بعد تأكلين باليوم مرة اطيج
واذا أصرت وكامت تبجي فانتي اتجاهليها حتلو ركعت روحها بالحايط لاتجاوبيها بعد منا لمن تتعب فهي من وحدها تسكت

ليش الطفل من يريد شي وميحصله يبجي؟ حته يخلي اهله ينتبهون وينفذون طلبه
بس لمن يشوف محد مهتم اله ولاديراله بال تلقائيا يسكت من وحده😅

فسالفة الحضن والبوس مو بمحله ولادايما تسوي ..بس من تكون عاقلة او سمعت كلامج او قبل لاتنام حضنيها
ومن تغلط او تأذي او تعاند خليلها حد
ودايما اذا تسمع كلامج شجعيها وكوليلها اذا شفتج عاقلة اطيج الشي اللي تحبي وهكذا واكو اهواي نصائح ناشرتهن قبل فهسه اوجهن

غيري وياها لمدة شهر كامل واذا شفتي استجابة بشريني🥰

#ملوكه

التعامل مع الطفل العنيد👆🏻🌚

#ملوكه

نصائح تربوية🙃👆🏻

#ملوكه

طريقة تربية الطفل🥰

#ملوكه

نصائح لتنمية الذكاء للطفل😎👆🏻

#ملوكه

حبيبي حسب درجة البنفسج اذا فاتح أو غامق
نزلت قبل عنه هسه اوجهن
فالشال تختاري حسب الصور اللي وجهتن وبعد تنسيقين.. شال وبطرون نفس لون وشوز وجنطة لون

او جنطه وشوز وشال لون واحد
لو دزاتلي صورته 😅🌚حته اشوف درجه البنفسج واللي يرهمله

#ملوكه