#شقراء_بغداد

بارت_١١


الليالي ثكيله تمر على روحي ..بالنهار اكول انسى واكدر واكره والهي نفسي بشغل البيت وبالكتب
او اطلع لبيت جيرانه يهود جانو بفرعنه كلوبهم حيل طيبه وكعدتهم حلوه اضل وياهم نثرم اللحم والبصل والبنات الصغار يكعدن يعزلن الكرفس من باقي الخضره وامهم تعجن التمن ونلتم ونحط
طاوه الحشو الجبيره بالنص وبيهه ٣ خواشيك
وبسدهه صينيه فارغه وطاسه الي بيهه العجين
ونحط كاسه المي ونضل نكع ايدنه ونلف بالكبه
ونسولف ونضحك ومن تكمل الكبه اكوم اغسل واطلع لبيتنه وعلى العشه ادزلي امهم ماعون متلتل كبه مكلايه ذهبيه لونهه ومكسبه ... تعرفني احب شلون تستوهه هيج فدزلي واكعد اكلهه هي وحاره بدون خبز وافر البيت اوزعلهم كل واحد ياخذله وحده ونضل نكركط بيهن ...

ثاني يوم اخذ اخويه علي الصغير واروح للسوك الصبح .. جانت الشورجه منهه بسطيات مال مسواك تازه بره صايره .. نروح ناخذ من هناك
الفواكه بسطيات شكبرهه انواع الفواكه بيهه
اجيب من كل شي كيلوين وارجع على الكصاب
براس المنطقه صاير واخذ منه لحم مثروم ويضل يكلي ..
عمو اكثر ليه لو بس لحمات تريديهن
واني اكله ..
خليلي وسط .. ودارينه
ويكلي..
بعيني وهاي احلى لحمات لاحلى كحيله

اخذهن منه واني اضحك يسموني هواي كحيله
لان اني دائماً مكحله بكحل العرب ...
هاي بيبي جانت تجيب حجر الكحل وتدكه ناعم وتسحنه وتعبي النه بمكحلات صغار وتنكع العود
مالهن بزيت الخروع وتخلي ينشف وبعدين تخلي بالمكحله وتوزعلنه كل وحده ومكحلتهه ...

واني تعودت كل مااسبح وامشط اطلع المكحله واخذ العود واخط بنص عيني هنا وهنا وبعدين
اتعطر واضل اسير على صديقاتي بالمنطقه لو هنه يجن عليه ونطلع نكعد بيت وحده ثانيه ...
منطقته ملمومه بدرابينهه الضيكه وشبابيكهه واحد بوجه الثاني مشبجات بالطول والبوب كصار واكو بيوت تصميمهه يصير اول متدخل ممر صغير وبعدين المطبخ على اليمنه واليسره هول وبالنص حولي وفوك غرف نوم بس ماكو بيتونه صاير البيت من النص مفتوح ليفوك ومن فوك صاير مشبك حديد بشكل مثلث هاي وكت المطر يخلون جادر والحولي بس صبه ومجرى ويمشي المي بي .. كلش حلو الجو يصير بالكعده كدام الغرف وصوت المطر ينزل ...
احنه بيتنه صاير ثاني بيت ببدايه الدربونه
بالحولي مخلين سنادين ورد بالاطراف ومتسلق
على الدنكه ملتف عليهن وبالطرف الي كدام الهول
مخلين حب مال مي وكلاص استيل وياه ...
وكت الي نريد نتشمس نجيب البساط ونمده ونكعد ومرات اني اضل امشط على هالشميسه او نقرض اظافرنا ..
واذا نريد ننظف خضورات لو التمن نظفه والماش هم نحط الصينيه ونكعد نلكط ع الضوا ...

يخلص النهار الي اعيشه بكل تفاصيله ..اخلق الشغل واسوي اله وكت وامشي بي وكتي
وابقى فارغه البال بالليل الا من حب هالاشكر الي سكن روحي وتغلغل بيهه ...

اضل كاعده وفاتحه البرده واباوع من شباك غرفتي على هالكمره واسأل شلونه ؟ هم بخير احواله ؟ طلع بواجب لو بيته ؟ يذكرني يحن لايامنه لو نساني ؟
واضل احاجي هالكمره .. ياريتج تضوين ظلمتي بخبر منه .. ياريتج تجيبين الي مرسال من ريحته
واهون بي اشواكي ...

انام وعيني على هالسمه جني انتظر تلمحلي بشي واصبر روحي بيهه واني ادري ماتت هذيج الليالي

ومشت الايام وصار وكت روحتنه عليهم مسوين ذبيحه عيد الاضحى وعزمونه ...
ورحنه اني وامي وابويه وعمي وبيبيتي واخواني
تلكونه بكل هلا ومرحبا وطارو بجيتنه عليهم واسمع النسوان وحده تصيح للاخرى هاي خطيبه محمد الحضريه جت ..
ويجن يتراكضن يسلمن ويبوسن عبالك عندي وياهن عشره عمر وهنه نصهن جيران الهم
فرحانات بجيتنه لديرتهم والضحكه شاكه وجوهن

اني جنت مخيطه دشداشتين وحده حمره ووحده سمائي وعندي وحده هم جنت مخيطتهه قبل لونهه وردي فاتح وسألت بيبي شحط على راسي هناك
كلتلي كلهن يلبسن من هالفوط بس مايغطن كل راسهن لحد الكذله اهم شي عدهم الركبه والصدر مغطايات ..
واخذت وحده من بيبي سوده ساده وناعمه وهي هناك لبستهه الي وخلتلي جنكال مذهب ومشرشب وكحلتني وطلعتني عربيه مأصله .. بحيث من طلعت ويه بيبي من الغرفه وشفت ام محمد ابتسمت ابتسامه رضى وجن هم وانزاح من كلبهه من شافتني بالدشداشه ومحجبه ...

اني هم ارتاحيت كلت هالسالفه اخلص منهه مابيه حيل كل ساعه متعاركه ويه وحده من وره اللبس
هنه يومين يكضن شلون مجان وارجع لطبيعتي

حطو الغدا والتمينه النسوان كلنه على سفره وحده
عماته وخالاته وبناتهم كلهن ياكلن شويه ويضلن يتفحصن بشكلي شويه اللخ واني بس مدنكه واكل على كيف ...

كملو الولد قبلنه الاكل واجوي محمد واخوانه ينكلون بالصياني المواعين للمطبخ الي جنه كاعدين ناكل بي لان مطبخهم حيل جبير بعدال نص بيتنه ...

حطوهن وطلعو وبعدين كامن بناتهم يصبن الجاي واحنه البقيه نلم المواعين من السفره وفرغناهن
وجان يكومن اثنين من خالاتهم ويحطن المواعين بصياني وياخذنهن ويطلعن بره ..
اني صفنت عليهن شويه وجان تجي ام محمد وتصيح يمي ..

- لتصفنين مدي ايدج وشيلي هالغراض والحكيهن
- ليش متغسلون هنا !
- غددي يمه نغسلهن هنا عليش ! شني يكلون علينه جايفات المكسرات يغسلن بسنك ومطبخ ! لاا حبيبه
عيب عدنه مره تكض جدرهه وتغسله على سنك
احنه على الساجه نغسل هاي ماي ربنه وجاري ونظيف ونكعد نشطف بي هالجداري
- لعد المن مسوين سنك اذا هيج
- هاذ نخض ادينه عليه وكت الطبخ ونترس منه ماي هسه امشي خذانا الحجي وضاع الوكت علينه احزبي يلا

رحت شلت الجداري وطلعت يمهن واني افكر بحجيهه عود ليش يكولون عليهن وصخات وجايفات اذا يغسلن بسنك ؟ ؟؟؟؟

ورحت حطيتهن يمهن وضليت اباوعلهن شلون بساع بساع خضنهن وحده تجلف وتكوم والثانيه تخضن وتجفيهن بالصينيه وماحس الا برمشه عين ملو صينيه كامله وكلولي شيليهه جوه ..

اني اعرف بنفسي مادبرهه اشيل صينيه هلكبرهه متلتله مواعين والكاع كلهه طين اروح اعثر واوكعهن وشيخلصني بعد ..
ضليت واكفه حايره لا اني الاكدر اكللهن ماكدر اشيلهه استحي ولا الاكدر اعوفهه وامشي
وجان اشوف امي طلعت وشايله بيدهه فجه نفضتهه بره .. اني كبل استنجدت بيهه واشرتلهه تجي ...
اجتني وشاورتهه ..
- هذني يريدني اشيل هالصينيه واني ماكدر شيليهه انتي لو نتعاون عليهه
- امده حضي اي والله متكليلي شلون حتعيشين هنا
دتعاي

ودكت شالتهه واشرتلي اشيل وياهه بس شلتهه شويه وهي اخذتهه ومشت للمطبخ توديهن
وهذني كامن يضحكن ويكللي ..
- هاا مادبرينهه تدزين امج
- اي ماكدر ثكيله
- حكج عيني وين معلمه عله الثكل انتي كله خده وراحه
- لا تره اني هم اشتغل بالبيت بس مطبخنه كامل ونغسل ونحط ع الكاونترات مانتعب هيج انتو ليش ماتستخدمون السنك ؟
- اااهيييي حته يشرونه عله الحبال نصيت بيت فرحان نسوانهن كاتلهن العجز
- ياا تره شدعوه مكبرينهه للسالفه هسه مو العالم كله دتغسل هيج
- لا حبيبه انتم شكل واحنه شكل

سكتت لان همه مايتناقشون الي عدهم وخلص انتهى صح او غلط انتهى مابي نقاش ..

على هاي وكفتي واجه محمد يمنه .. اني من وصلنه بس سلمت عليه من بعيد وبعد ماشفته
وهسه اجه يمي مادري احساسي مخربط اول ماخطر بالي ايوب حسيت ان اله شي بداخلي وراح ينأخذ مني هيج خايفه عليه ...

باوعلي وكال ...
- متساعديهن عليش واكفه
- ماعرف شسوي وهنه خلصن

رفع حاجبه وقوس شفايفه لجوه ومعاجبه الوضع وخالاته يتمضحكن ويتبسبسن عاد اني كلتلهم ..
- من رخصتكم
ودرت وجهي اريد اروح وجان يصيح عليه
- وين ماشيه اكفي
انداريتله وكلتله ..
- ها
- وين ماشيه
- اروح اشوف اخواني
- وانه كلتلج امشي ؟ هو هاذ احترام ! تديرين ظهرج وتمشين ولاجن زلمه واكف جدامج !
- بس اني ترخصت منكم ليش محجيت شي
- اي من مااحجي ماتمشين مو بكيفج تصرفين سامعه !

درت وجهي عنه واكابر على دمعه ماريدهه تنزل مادري ليش روحي صايره صغيره وعلى ادنى سالفه ابجي ... جان سمعته يكلي ..
- امشي روحي لاخوتج

مشيت كبل بدون لا اندارله ولا اكله شي مشيت واني امسح دمعتي وماخليت احد يشوفني ابجي
رحت كعدت يم بيبي وضليت لازكه بيهه تكلي
روحي اطلعي شوفي هالخضار تمشي ويه البنات بالبساتين مااقبل اكوم وعماتهم يتوسلن بيه واني مجلبه بيهه مااكوم ...

كضيتهه اكل رمان وتمر واني كاعده يم بيبي
يجن بناتهم يسولفن وياي ويكللي امشي نطلع نفتر اكللهم لا عوفوني يم بيبي ماريد اطلع ...

للعصر كامت بيبي واخذتني وياهه لغير بيت من عمامهم هم كعدنه شربنه جاي واكلنه كليجه وكلهم يحجون ويتمضحكون واني كاعده ساكته وبس اباوع بالوجوه ... رغم كل اهلي وياي وهذوله هم اهلنه بس احس بغربه مو مكاني هذا ولا هاي راحتي ..احسبهن ساعه ساعه ديخلص اليوم ويجي الثاني ونرجع لبيتنه ....

امي بعد ماشفتهه صايره هي وام محمد دهن ودبس وكعدتهن وكومتهن سوه ... واخواني كضوهه يلعبون ويه جهالهم ويفترون بالبساتين واني كارصه يم بيبي مجلبه بعباته وكاعده تحجي عليه يضحكون نسوانهم عليه وحتى جهالهم ومااكوم ولا اطلع لحد ماصار العشه كعدنه تعشينه وبعدين يلا كمت حتى اشيل مواعين للمطبخ وبس وديتهن
نسوانهم كبل طلعوني من المطبخ ومقبلن اشتغل بشي ... طلعت وجان اشوف محمد متمدد بالحديقه يم عمي وابويه وعمامهم وعينه عليه ..

مادرتله بال ورجعت كعدت يم بيبي ...
جنت كلش نعسانه وكل شويه واشاورهه شوكت نروح نام وتكلي هسه اصبري ...
ضليت لازمه المهفاويه واهفي بيهه واتصفن بالحياطين واسمع لسوالف بيبي وحجيتهم
تعرفت بيهه على هالعائله من جدهم الاولي لولدهم هسه ومنو تزوج ومنو خلف ومنو مات وكلشي فهمت على عشيرتهم ...

جان يجي اخويه علي وكال ..
- بيبي يريدوج بره
-ها منو يريديني
- ابويه والزلم هنا

ترخصت من الحجيه وكامت واني كمت وياهه
طلعنه بره وهمه صاير بيتهم عالي بي صبه عاليه
وبعدين تنزل منهه للحديقه وماعدهم شي اسمه سياج كله مفتح على الشجر ...

من الحديقه صاحوهه ..
- هلا بالحجيه هلا تعاي جابلينه خل نسمع حسج نشوفج عليش كارصه بالحجره ماتشمين هالهوا الطيب هاذ

- والله غير الحجيه سوالفهه ماينشبع منهه وصارلنه زمان ماكاعدين هالكعده وخذتنه السوالف

جان يكوم محمد وسوالهه مكان حتى تكعد ع الفجه
واني قبل ماتنزل للحديقه جريتهه من عباته وكلتلهه بصوت ناصي ..
- بيبي اني وين اروح اجي وياج لو عيب
- يبو يابيبي والله ذبحتيني ماتكعدين ويه هالبنوات
- بيبي ماحبهن
- دتعاي وياي
- مو هذوله كلهم زلم اني شكو كاعده هنا
- اكعدي بسد ابوج واسكتي

نزلت للحديقه واني ضليت صافنه استحي اروح اكعد بسد ابويه وعمامهم كاعدين يمه ضليت واكفه امشي خطوه وارجع خطوه وحايره ...

جان يجيني محمد وكالي ...
- امشي وياي
- وين
- شنو وين اريد اكعد وياج
-ليش شكو نكعد
- مرتي واريد اشوفج شويه مايصير

كالهه ومشى كدامي راساً واني مشيت وراه بقله حيله لان ماعرف وين اروح ...
اخذني لجهه بيتهم وكعدنه جوه شجره عرموط
بحديقتهم .. هو ثاني رجليه وحاط ايده عليهن واني كاعده ورجليه صفح والعب بالحشيش وساكته ... جان يكلي ..
- انتي تعرفين بيه ششتغل ؟

باوعتله وسألت نفسي نفس السؤال صدك اني اعرف شيشتغل ؟ جان كلتله ..
- لا ماعرف
- ههه زين والله زين مرتي ومتعرف بيه ششتغل
زين شتعرفين عليه كليلي بله اريدن اسمع منج
- ماعرف شي عليك غير صله القرابه بين اهلنه
- بس هيج!
- اي بس هيج
- ليش يعني ماتعرفين شي عليه مو رجلج انه لو غلطان ؟؟؟ شلون تتزوجيني ومتعرفين شي بيه
- مامختلطه وياك حتى اعرفك منين اعرف يعني
- زين انتو مو عدكم تلفون بالبيت
-اي
- هلبت مره اسألي عليه بي مو رقمنه عدكم
وامي تحاجي امج دايماً عليش ما مره خذيتي السماعه منهه وسلمتي على امي على اهلي سألتي عليه عايش ميت شصاير بحالي
- مو بالي هالشي
- اي هو انه اعرف انه كِلي اصلاً مو بالج
لين لو بالج جان سألتي جان ردتي تعرفين شي عليه تكلين هاذ رجال حصير ام بيته خلي اسال واعرف شي عليه اشوف وين اراضيه جا انه متزوجلي مره لو حجاره لخاطر ربج ماتكليلي شسالفتج

ضل يكطع بالحشيش ويشمر ويحجي ويعاتبني واني دمعتي بعيني ماعرف شحجي شكله ..
اني بالي كله مشغول بحب رجال ثاني !
اكله اني ليلي يكضي احلم بعيون وشكار هالانباري ..اكله اني نهاري اتشرد بي من نفسي
منين يريدني اذكره واسأل عليه واني نفسي ناسيتهه ومتلوعه بنار ذكرى ماعرف مصيرهه وين !!!!

ضليت ساكته مارديت شي وهو هم سكت
وره شويه جان يكلي ...
- لخاطر نبيج تعدلي وياي
- هسه شمسويتلك اني
- هو هنا المصيبه انتي مامسويتلي شي ماتصرفين وياي حسب الاصول هسه انه ماحس كاعد ويه مرتي احسج هيج غريبه لو كاعد ويه خالاتي هم احسن اكرب منج اليه ... موش كتلج تكربي مني
خلي بينه مواصل يابت الناس مايصيرن هالشكل
احنه بينه زواج وبيت ماتكليلي شلون حنعيش
- محمد يعني شسوي ماعرف شلون اتواصل وياك الي تريدني اعرفه احجيلي انته عنه افهمني اني استحي ماعرف اجي واذب نفسي عليك
- زين بويه زين
- اي لا تضل تحجي عليه تره مو بس وحدك الي مغثوث من هالشي اني هم معاجبني كل هذا
- يعني شني المعاجبج بالضبط
- كلشي معاجبني
- انتي عليش رضيتي بهالزواج ! هاا شغيرج !
- هيج عجبني
- لا ماصدك يعجبج لين لو عاجبج جان حطيتي عينج علي بس انتي وراج سالفه فهميني اهلج غصبوج علي !
- لا مغصبوني اني بكيفي وافقت
- يعني تريدني مثل ماانه اريدج

سكتت هنا لا اكدر اكول اي واجذب ولا اكدر اكول لا واطب بدوامه اسئله منه ..
جان يكول ..
- احبنج وعلي من ذاااااك اليوم لليوم رويحتي ترفرف بطرواج .. دخيلج وعلي تعبان من هالدنيا
لا تزيدينهه علي .. انه ليالي اتحلم بجيتج لحياتي وتغير اوضاعي وانسعد وارتاح عليش يوم الاجيتي تكسرين احلامي كِللللهه واضلن حاير بامرج !
- ان شاء الله اسعدك
- انه كِلي امل بيج لا تكسرين بيه .. انه من ايدج هاي لايدج هاي شتردين حاضر اطلبي على مد عينج يصيرن لج .. بس اريدن راحتي وياج بس هاي وكلشي تطلبي عليهه اعتبريه صار
— لا تسلم كلشي ماريد
- ياحلاه صوتج ياكحله

ابتسمتله ودنكت جان يكلي ..
- انه ماسودني بيج غير هالثكل والهداوه هاي
تذكرين بهذيج جيتكم شكثر جانن وياج بنوات
من بنات عمنه وبنات خالنه
- اي اذكر
- وبناتكم هم اثنين وياج وكلهن حلوات وشكر وجسم وطول ومناكصهن شي بس انه كلبي رف بس عليج هيج من اعاينج تكعدين بهداوه وحلكج ماينطك غير جلمتين وما تصنعتي ولا تكبرتي كعدتي بعودج الرفيعون هاذ وماهمتج هالدنيا من جدامج انه جان كلبي ينسلب مني بكل نظره اعاين لج بيهه
- هاا زين عرفت هالشي
- تصدكين انه من يوم مااهلج نطوني جلمه تصيرين الي كمت اشتغل واجد ليل نهار بالزرع
وعزلت حصتي عن اهلي حته ابنالج البيت
كلت اريدنهه معززه تضل وماتتعب انه ماجايبج لاهلي والزرع والحلال لاااااا انه جايبج ليه اريدن اشبع رويحتي من طولج جدام عيني اريدن راحتي وياج ضلي بس ليه ماريدن منج شي بس خلي بالي مرتاح وياج
- ان شاء الله اكدر على راحتك
-ان شاء الله .. اي احجيلي عليج شتحبين ماتحبين
اريدن اعرف كلشي عليج

- ماعندي شي مميز .. حياتي بسيطه واحب الهدوء بكل شي
- زين وكليتج صاحباتج
- كليتي حلوه ودراستهه صعبه شويه وعندي بس صديقات اثنين اكضي وياهن وكتي
- والولد ؟
- مالنه دخل بيهم
- هاا .. اي خلج حذره ماريدن اسمع مسلمه على ولد لو حاجيه ويه ولد زين
- ماشي .. ماكلتلي شنو شغلك
- جندي وشغلي بمجانين .. واحد عشر ايام التحق لكركوك وانزل خمسه ايام والثاني اوصل ضابط وياي هناك بالنقطه
- الله يوفقك ويحفظك
- ربي يسلمج ويحفظج ياعوينتي

ابتسمتله ورفعت راسي اباوع للسمه جان يكلي
- باجر وره الريوك حسبي حسابج نطلع
- وين
- اشوفج البيت
- هاا هو وين صاير
- كبل السده الي تنزل على بيتنه هاذ
- اي زين

ضل يباوع عليه واني اباوع للسمه وبعدين حط ايده على جتفي اني جفلت ووخرت منه بس هو ضل مجلب بجتفي ورجعني لمكاني واجه قرب راسه يم ركبتي واخط نفس قوي ونزل ايده على ظهري راسا وخرت وكمت وكلتله ..
- ديربالك تعيد وياي هالسوالف
- شسويتلج انه ! شني مو حكي اكضج مو حلالي انتي وانه مشتاكلج شني العيب والغلط بالسالفه وهيج تهددين
- حلالك حقك هالسوالف متعنيلي لاتلزمني وكافي
- هاااا ولشوكت انه اضل هيج وياج !!
- ولا تحلم تطخ شعره مني كبل العرس
ولا تضل كل شويه وتكلي مرتي وحلالي ومدري شنو ماتزوجنه هسه حتى تكعد تلزم بيه بكيفك
هالمره صارت مره اللخ غير تعامل تكله مني
- اهدي اهدي شسويتلج هسه انه ماتكليلي
- من رخصتك اروح انام تصبح على خير
- الله وياج

انداريت ومشيت للبيت ورحت للغرفه الاولى لان همه عدهم اربع غرف وهول وديوان وحولي بينهن وع الطرف صاير الحمام والمطبخ

رحت ولكيتهم فارشين شفتلي مكان فارغ ونمت بي
وغطيت راسي بالبطانيه وضليت امسح بدموعي الي ماعرف ليش تنزل بس اعرف اكو حركه ساكنه صدري مكادره احملهه ازيد من هيج ...

كعدت الصبح على صوت اختي دعاء تكعدني
كمت وشفتهم كلهم كاعدين ولامين الفراش
رحت اخذت ملابسي سبحت ورحت كعدت بالغرفه وحدي امشط وجان يطب عليه محمد
باوعلي ورفع حاجبه وابتسم واني مانطيت اي رده فعل ضليت على كعدتي لازمه خصله من شعري وامشط بيهه جان يتقرب يمي وكال ...
- هاي انه كل صباح راح يصيرن بنور وجهج هاذ يابختي والله

ماحجيت شي وضليت مدنكه وامشط .. جان يكلي
- خفي ايدج ورانه روحه وانتي لساعج ماتريكتي
احزبي
- ماشي

مشطت ع السريع وكعدت اظفر وهو مرتاج على البوفيه ويباوعلي .. كملت وكمت رجعت المشط بمكانه ولبست حجابي وجان يجي يمي وراد يخلي ايده على وجهي راساً وخرت منه وطلعت من الغرفه ...
رحت للمطبخ صبحت عليهم وكعدت جان وحده
من خالاته كالت ...
- صار الضحى ياعيني مامش ريوك بعد زهبنه الغدا
- اي احسن ماشتهي اتريك

عوجت حلكهه وهزت بايدهه واني درت وجهي منهه وجان يجي محمد وكالي ..
- زهراء كومي البسي عباتج وصيحي امج يلا انه انتظرجن بالسياره
-ماشي

كمت رحت للغرفه اخذت العبايه وحطيتهه على راسي وطلعت دورت امي واخذتهه واجتي وياهه ام محمد هم ورحنه صعدنا بالبيكم واخذنه للبيت

عشر دقايق وصلنه البيت .. منطقه فارغه وبيهه شكم بيت مطشرات كل واحد بجهه والشارع بعده محفر والرمل والانقاض بعدهن باب البيت ..

وكفت وصفنت عليه ودكات كلبي احسهه تنغز بيه ليش هالشي ديصير !! مارايده هالولد ولا رايده هالمكان ليش دالكه الي حياه تنبني هنا!؟؟؟

الباب كصيره لون اسود والسياج هم ناصي
فتح الباب ودخلنه .. على اليسره تواليت ومغسله
وحديقه صغيره بعدهه بس طين .. طرمه طولانيه
صايره وباب للمطبخ وبسده باب الاستقبال وصاله صغيره وبعدين غرفه النوم على اليمنه والحمام بالنهايه صاير .. ودرج وفوك غرفتين وباب السطح ....
جنت افتر واباوع لكل ركن من البيت واشوف شلون تعبان بي وعيونه تلمع وهو يأشرلي ويكلي هنا اريد هيج اسوي وهيج اجيب وانتي اختاري الالوان بذوقج ..
جان بعده البيت بس بياض وباقي يشد نقاط الكهرباء ..الكاع فارشهه نايلون فوك الصبه
والشبابيك حاط يمهن قوطيه صبغ ابيض وفرشه
جان يكول ...
- هاي جنت اصبغهن قاط ثاني صبغ الحداد موش كافي بعد رادله
- اي زين .. شوكت صبغتهن
- كبل ماتجون جنت اشتغل بيهن
- عاشت ايدك خوش مرتبهن

من سمع مني هالكلام ارتاحت نفسيته وضل يضحك ويسأل امي شلونه البيت ويحجيلنه شلون
تعب بنكل الانقاض وباب الشارع هو صبغه وباب الحمام وضلت بس الشبابيك يكملهن ويطبك الكاشي وكال علكيفي اشتغلهن بعد عدنه وكت طويل ..
وصاني افصل بردات وكعد يقيسلي بالفيته طول وعرض الشبابيك وراد يكتبهن ماكو قلم هنا
عاد جاب خشبه وكسرهه وبالنبله مالهه سواهه بالصبغ وكتب على كارتونه صغيره .. جنت اضحك على منظره شلون مخبوص ومن كلبه يسوي الشغله .. يعني جان يكدر يأجله لغير مره يكتبهن على راحته وينطيهن الي بس هو مايصبر

ورجعنه لبيتهم ... تغدينه وطلعت ويه البنات اساعدهن على كد اشيل وانطيهن يغسلن وبعدين كمت اخذ منهن واخضهن بالمي ...
ورجعنه رتبناهن بالكاونتر وهنه مسحن الكاع
جان يجي محمد وصاحني ..

طلعت لباب المطبخ وكفت يمه ...
- امشي حطي عباه على جتفج وخلي نطلع نتمشى
- وين نتمشى بهالظهريه
- ماعليج هسه امشي يلا احزبي
- زين هسه اجي

رحت جوه واخذت عبايه واجيت اطلع اجتني اخته كالت ..
- وين النيه
- محمد يريدني نطلع
- هااا ماشاءالله كمتي تحنين ورضيتي
- شتقصدين؟
- كبل تصيحين الغوث من محمد هساع اتمشورون
- وغاثج هالشي يعني
-لا عشتو عليمن يغثني وانه بحالكم
- اي زين .. من رخصتج تاخرت

عوجت حلكهه وتقلد حجيي واني عفتهه ومشيت
وافكر شلون بهالعائله كل شويه وحده منهن كالبه خلقتهه عليه هسه اني شمسويتلهن!!!

رحت لمحمد وهو مشى كدامي وشويه مشينه عبرنه جهه البيوت وصرنا بنص البستان جان يكلي ..
- تعاي امشي كريب مني

رحت تقربت منه وصرت امشي ويه مشيته واباوع لشجر الرمان والنخل جان يلزم ايدي وضغط عليهه لان اني ردت اسحبهه منه ومن سوه هالحركه كبل وكفت وضليت اباوعله ..
احس ببروده ايده واصابعه الرفيعه يدخلهه بين اصابعي ويبتسم ويكلي ..
- محد يشوفنه هنا وانتي حارمتني من كلشي خلي احظى بلمسه ايدج عاد

دنكت وهو رفع وجهي وضل يباوع بعيوني وكلي
- احجي وياي خلي اشبع بصوتج وسوالفج لاتضلين تستحين مني

ابتسمتله وهزيت راسي وهو ضحك وضغط على ايدي وكال..
- تعاي اوكلج رمان

اخذ بايدي ومشى لشجره رمان وضل يباوع وكطع وحده وسط وكبل فتحهه بايده وقسمهه نصين وانطانياهن .. اني قدمتله النص الثاني وكلتله ..
- اكل انته هم
ابتسم واخذهه مني وكالي ..
-تعاي نكعد هنايه
- خاف اكو حشرات
- ههههه لا بويه ماياكلنج
-ادري بس
- لاتخافين مامش شي بس دود هم تخافين من الدود
- ههه لاا مو لهدرجه
- جا اكعدي

جان اكو حجارات هو طبك وحده بسد اللخ وكعدنه
اول مره اكعد ويه محمد هيج كأني حبيبته ومرته من صدك واشوفه هادىء ويضحك وياي ..دائماً
لقائنه يصير بغصب واعصاب ومعاتب ماشفت شخصيته شنو اسلوبه تفكيره كلشي ماعرفت عنه قبل وهالكعده صارت تمهدلي طريق حياتي الجديده وياه ...
جنت اكل واباوعله كل شويه وهو عينه على المكان .. اني على طول كعدتي افكر معقول هذا الشخص الي راح اتزوجه واضل وياه كل عمري ؟
هذا الي راح اسلمه نفسي واعتمد عليه بكل حياتي ؟
مااحس بشي تجاهه لا كره ولا حب ولا اي شعور
مجرد فراغ يحاوط اسم محمد بداخلي ...

كمل اكل وكام راح لساجه صايره وره هالشجر
غسل بيهه واني ضليت كاعده اكل لان اني اكلهن شويه شويه ... جان يجي يكعد يمي ويكلي ..
- همزين مافتحتلج الثانيه جان ضلينه للغروب على هاذ اكلج
- هههه شسوي متعوده
- شلون حتسمنين على اكلج هاذ
- وليش اسمن
- جا تضلين هيج ضيعفونه
- اي شكو بيهه
- شني جا انه ماريدن اكضلي منج لحمه جا نتحاضن عظام
- عزاا عيب شهالحجي
- جا انه جاذب !
- هسه مو انته هم ضعيف شكو تحجي عليه
- الزلمه موش مثل المره واحمدي ربج انه ضعيف جسمي حتى مااجعصج
- محممممد كافي
- ههههههه شوفيلج چاره اريدن بيج لحمه اشبع بيهه شوكي
- الله كريم

ذبيت الكشور من ايدي ورحت للساجه غسلت وشربت مي منهه بارد يخبل .. وانداريت لكيته جاي عليه دامشي وجان يكلي ..
- اكفي
وكفت وباوعتله جان يطلع فلوس من جيبه وحطهن بايدي ..
- هاي مصرفج ضمي عندج
- لا تسلم عندي ممحتاجه والله
- لا لا جايج دوام اجمعيهن يفيدن تشترين دفاتر ملابس خليهن جوه ايدج اخذيهن وبلايه عناد يلا
- مشكور
- ضميهن لاتخليهن هيج بايدج
- وين اضمهن هسه !خلي من نرجع احطهن بجنطتي
- لاااا ضميهن هسه
- ماعندي جيب بدشداشتي من ارجع لو خليهن يمك واخذهن بعدين
- لااا ضميهن هنا
-وين ؟

ضل يحك بشعره ويأشرلي بحواجبه وعيونه اني مفهمت بالبدايه وضليت عاقجه حواجبي واكله شنو
وهو يمتمت جان يحجي بسرعه .. بصدرج بساع عاد فضيني .... كالهه ودار وجهه ومشى بعيد عني .. اني ضحكت وضربت كصتي وضليت اكول .. ثول الثولني اي والله ثووول ..

خليتهن وعدلت عباتي ومشيت يمه واني مدنكه
وحابسه الضحكه موقف يفشششل واريد بس اشرد منه واكعد وحدي ...
اندارلي وضحك وكال ..
- انتبهي نوبه الثانيه
-ماشي
- اكلج انه باجر التحق ومن الاربعه الفجر لازم امشي
- تروح وترجع بالسلامه
-الله يسلمج
- تبقى عشر ايام مو
-اي من انزل يمكن اجي اشوفج
- ان شاء الله
- انه جبتج هنايه هالساع لين ارد اشبع بشوفتج واودعج براحتي ابوج كال العصر تمشون
- هاا ماجنت ادري
- اي هو من كملنه غده كالي نشوفلكم سياره وانه وصيت الولد يجيبون بيكم ثانيه وناخذكم للولايه ومناك اخذلكم سياره
- تعبناكم ويانه
- لاا ياعوينتي تعبكم راحه .. راح اشتاكلج يازهره
- تشتاقلك العافيه
- ربي يعافيج امشينه يلا
- محمد .. عود انتبه على نفسك
- صار يابعد هالعين انتي صار

مشينه للبيت وهو كل شويه يوصيني اخابره ويعيد عليه رقم المركز مالهم ويكلي احفظي ويعيده عليه يمكن بالعشر مرات هو يعيده حتى ماانساه واخابره اسأل عليه ....

وصلني لباب المطبخ وراح يم الزلم .. طبيت جوه

ورحت للغرفه لكيت امي دتلم بالغراض وامه كاعده وتسولف وبناتهم هم كم وحده كاعده وكلهن
كاللي ...
-هااااا وين جنتي
- ويه محمد
-وين رحتو
- تمشينه هنا شويه ورجعنه
- هاااا

ضلت امه تباوع عليه واني انزع العبايه وفتحت الحجاب هم وجان تكلي ...
- كالج باجر راح يمشي للواجب
- اي كلي يطلع الفجر
- هااا مانطاج شي
- شي مثل شنو

كلتهه واني حاطه عيني بعينهه جان تكول ..
- شدراني انه هَيج كلت بلكت ذاكرج بهديه شغيله منا منا جم فلس حط بايدج كلت مريته ويحبنهه كتل روحه عليهه لابد يدللهه ويذكرهه بشي

اني من طريقه حجيهه من تمد بالكلمه وتأشر بايدهه وتعابير وجهه فهمت انهه مو ميته علينه
وانما تريد تعرف شصار مصار بينه وشينطيني وشيجيبلي تريد تعرف كلشي وطخت بالي موقف محمد من ضل مصر على ان اضم الفلوس ماراد احد يشوفني لازمتهن يعني ميريد امه تعرف
فضحكت وكلتلهه ...

- يكفيني وكفته وحجيه الحلو وياي
- هاا شني هاذ حجيه الحلو
- ماشاء الله عليه نساني الوكت وياه بسوالفه
الله يحفظه ويرجعه بسلامه
- هاا جن دخانه الحب بينكم علت
- اييي يامحلاهه وياه

كامت تباوع لامي وقوست شفايفه لجوه وهي شابكه اصابيعهه وتحرك بابهامهه واحد بالثاني
وامي هم رفعت حاجبهه مستغربه هالحجي
اني هنا فهمت هذني الاثنين صافات سوه على بليه سوده لان اثنينهن مو طبابات خير ..

واني حجيت هيج قصداً لان مهما يكون يبقى كدام العالم رجلي وماريد ينكسر بيه ولا تجي كلمه مو زينه بسببي .. هو مو ذنبه ان كلبي ساكنه غيره
حتى يتشمتون بي اهله ولا ذنبه اني مااهوى عيشتهم وناسهم ولا ذنبه طبعي وفكري غير عنهم
هو حبني بصافي نيه وتعب وضل وفي لهالحب وحصله بالحلال وهم ماتعدى وياي ويحسب حساب كلمتي ورضاي عيب وغلط مني لو عاملته بالشين والتكبر والتجاهل ومااحفظ حقه بالكلمه الحلوه كدام اهله .. مااذنب وياي بشي مشاكلي ويه نفسي اني مسؤوله عن حلهه عيب على نفسي لو حملته هو مسؤوليه مشاكلي واذب الصوج بي
هو الصوج صوج كلبي بسرعه فتح بيبانه للغرب
وخلاني معلعله ....

رجعنه للبيت وصرت اكضي الايام بالتطريز احب اطرز تعلمت من جارتنه مره باربعينيات العمر
ارمله وتكعد دائماً اطرز وتخيط للمهفات واني اكعد يمهه بالباب العصريه وتعلمت منهه وصرت اطرز على جفيه بالطرف ارسم شكل ورده لو شكل نجمه واكعد اطرز عليه بالخيط وهسه صرت اضبطه اكثر فكمت اسوي نقشه داير مداير الوصله الي اشتغل عليهه صح اطول بيهه بس مونستني ..

وره اسبوع من رجعتنه خابر محمد على بيتنه وامي انطتني احجي وياه بس سلمت عليه وجان يكلي ماراح انزل الا وره اسبوع ثاني هم
ماضجت ولا بالغت برده فعلي دعيتله يرجع بالسلامه وسديت الخط ...
دائما ً يدور بالي سؤال واحد بس ..
ليش قدره يحبني ؟

مشت الايام ورجع محمد لاهله وره اسبوعين وراد يجيني واني جنت بيت بيبي وطولت بالرجعه وهو لغاهه والتحق مره ثانيه ...

اقترب وكت الدوام وصرت اجهز لدوامي بدون واهس بس اريد تمشي هالايام مابالي اي شي
الي ردته تبخر من ايدي مابعده شي يملي عيني

وبليله الدوام سمعت ضربه على شباك غرفتي كمت فتحت برده شويه واباوع ماكو احد
رجعت اريد اتمددهم سمعت شي انركع بالحديد مال شباك رحت فتحت البرده وباوعت وشفت
واحد ملثم واشرلي انزل وراح ركض ...

احتاريت وخفت منو هذا الي جاي هالوكت
فكرت يمكن ايوب بس لا هاي مو هيأته وضليت
متردده انزل لو لا ؟
واخر شي نزلت كلت خلي اشوف شنو الجابه لبيتنه ومنو هذا ؟
————-————

#شقراء_بغداد

بارت_١٢



احتاريت وخفت منو هذا الي جاي هالوكت
فكرت يمكن ايوب بس لا هاي مو هيأته وضليت
متردده انزل لو لا ؟
واخر شي نزلت كلت خلي اشوف شنو الجابه لبيتنه ومنو هذا ؟

رحت فتحت باب الشارع ومديت راسي وشفته واكف براس الفرع ويباوعلي .. احتاريت شسوي اصيحه او اروحله شلون افتهم منه شيريد؟
جان شفت علاكه يم السندانه باوعتله وبعدين دنكت اخذتهه رفعت راسي باوعت بعد مشفته اختفى

سديت الباب وصعدت ركض لغرفتي وكعدت اخذ نفس وحاضنه العلاكه بعدين هدئت شويه ورحت جريت الغطى وغطيت راس اختي وشغلت الضوا
وكعدت افتح بالعلاكه على كيفي وشفت بيهه صندوك خشبي محفور ومنقش طلعته وشفت ملزوك عليه ورقتين .. الاولى جانت عنوانه
والثانيه جان مكتوب بيهه ..
"عذراً لفوات الميعاد لكن الشخص الموكل اليه تسليمها اليكم قد استشهد قبل ان يتلقى الامانه
وانا بدوري تلقيتها من ذويه لكونهم لم يستطيعو الوصول لصاحبها المرسل لم يعد لهذا اليوم من سفره "

قريتهه والخوف بدا يسيطر عليه وضليت متردده بفتح الصندوك واني لهاللحظه ماعرف منو المرسل وشكد فات على وكت وصولهه الي !!

اخذت نفس وفتحت قفل الصندوك وشفت بي شماغ ابيض ومخطط باسود ورصاصي خفيف تلمسته وشلته فتحته ووكع بحظني ظرف .. ذبيت الشماغ من ايدي وفتحت الظرف بسرعه اريد اعرف منو
وشنو سالفه هالمرسال ؟
فتحت الرساله وقريت ...

⭐️⭐️
الى امي ومالكه قلبي
سلامي لكِ ياقره عيني ومكتنزي ..
انا الان اكتبُ لكِ وانا على وشك الذهاب للتدريب في القواعد الخاصه .. سأغيبُ عنكِ لشهور لا علم لي بعددها ولكن اعلم انكِ ستشغلين فكري فيها ..
يا انستي فلتعذري قبيح فعلي معكِ في ذلك اليوم
ولتعذري صمتي وتكَبُلي امام حضره دمعكِ ياغاليه
فلتعذري مالا تعلميه عني فأنا ياانستي مؤتسر للوطن ..
صغيره انتِ لا تدركين حجم اُسري كم هو كبير
ورقيقه وشفافه انتِ لايمكنكِ ان تري في اي مستنقع انا اغوص .. خائف عليكِ مني وممن حولي خائف عليكِ من كل مالاتعلميه ياجميلتي
لستُ بناقض للعهد فانا لم اتخلى عنكِ ولن اتخلى
انا فقط كنت مُكبل الايدي عنكِ .. رجائي منكِ الا تحملي في قلبكِ الصغير عتاب او خيبه
فوالله انا متأكل الجوف مما قد حدث بيننا
انا محاط بالنيران من اربع جهاتي ياانستي قلبي
متيمًُ بكِ ينشدكِ ليل نهار .. شاغل الفكر بكيف حالك؟ كيف حال قلبكِ الذي استودعتيني اياه ؟ الا يزال عامرًُ بالحب لي ؟ الا يزورك شوق !
فانأ دائم الشوق لكِ وليديك الحانيتين واسأل دوماً متى اللقاء ؟
ليتكِ ياجميله تعلمي كم من الحزن يستوطن اجوف صدري .. اليوم انا اتجرد من كامل رُتبي ومسؤولياتي واتجرد من انفة الرجال ومن كل مايحيل بي عن البوح لكِ بمكنون شعوري .. لم يعد بمقدوري التخفي تحت قناع الثبات والشموخ والارض تتزلزل من تحت قدمي بكِ...
لاترحلي ولاتبعُدي لاتصيبيني الجنون بموافقتك لقرار والدك لاتخسريني وطني مرتين لا تجعليني متشرد فوق ارضي ، لاتجعليهم يكبلوكِ مثلي كونِ حره وحرريني معكِ انتِ قادره لست مثلي تحملين اعباء الجبال ، ان قلبي يحترق بكل ثانيه تمر عليه ببعدك وخوفي ان يُستعمر وطني ويُسلب مني مجدداً .. انا راضخ لكِ بكامل رضاي تحت جناح حبك انا استلقي بامان لاتسلبيني اماني
وانتِ اول من يبوح له القلب واول من يرتجيه
قد كشفت لكِ عن مايدور بخاطري من حزن واسى وخوف حرمان فانا لاازال بحبك ذلك الابن الذي يرتجي عطف امه .. انا ابكيك ياانستي فقد خمرتُ بك حباً حد الهذيان لا ترحلي ..
واخيراً ياانستي هذه هديه من فلسطين بلاد مقدسه تليق ان تكون في حضره يديكِ .. انا الان مرتدي له فقد خُيل لي انكِ ستحبينه معطراً بعطري ولا اعلم ان كنت قد اصبت !
استودعكِ الرحمن ياامرأتي الحنون

حبيبك المخلص
ايوب
⭐️⭐️

جنت اقرا والدموع تتجارى والف فكره وفكره بالي بس قطعهه كلها التاريخ بنهايه الورقه جان مكتوب بشهر السابع واحنه هسه بالعاشر واليوم هو على الموعد ماخلف وياي على موعدنا ب٣ايام وره اخر مره التقينه بالكليه وقبل خطوبتي !!!!

ليش موصلتني بوكتهه ليش!!!
شنو حكمتك ياربي من هالتأخير !
جنت اني ليالي اتعذب من كوني اريد اكرهه واحقد عليه وماكدر كلبي مايطاوعني واروح اسوي شغلات وادوس بيهه على كلبي وهو ماله ذنب بشي ! بعده يريدني ويريد رضاي ويتوسل الي ابقى واكون عون اله !
شسويت اني ليش استعجلت ؟؟

ضليت لازمه الشماغ حاطته على وجهي وابجي
ندم واشتياق وحيره كلهه تجمعت بصدري بهاللحظه .. هالرساله فجرت بركان بداخلي ماسكن ولا هدأ ولا وكف اسئله ومعاتب لروحي ولهالقدر .. يعني ليش موصلتني بوكتهه ليش قدره هالولد يستشهد ويضيعني هيج !!
بس فات الاوان بعد شتنفع هالرساله وشينفع هالاعتذار والندم كله شينفع هسه !!!

اختنكت من البجي والغصه الي بلعومي واكفه
من حركتي وبجيي على حظي وخوفي عليه
وين هو هسه ؟ شلون راح اواجهه ؟ كل ماافكر شلون اواجهه وشنو اكول لو سألني لو اجاني متلهف ..

راح اخيب ظنه بيه وهو يسميني مرته
وراح اخذله وهو رايح ومتأمل بيه اوكف وياه

طلع الصبح واني على كعدتي ابجي واحاجي نفسي ومحتاره شسوي ..
كمت ضميتهن بالكنتور ورحت تمددت بفراشي وتغطيت واني تعبانه وعيوني حاره بعد مكدرت افتحهه .. غفيت شويه وحسيت على اختي تكعدني للدوام كلتلهه ماروح ورجعت نمت .. وضليت اليوم كله بفراشي مابيه حيل اكوم ولا اسوي شي
فكري متشتت وكلبي يوجعني من القهر .. هالمكتوب بدل مايفرحني ويريح كلبي قسم ظهري نصين بوصوله هسه ....

تمرضت هاليومين صار عندي وجع براسي ونشله ونحول وكضيتهه بالفراش وثالث يوم صبحت بوجه محمد .. لكيته بغرفتي ويكعدني وامي يمه
ضليت بس مفتحه عيوني وصافنه عليهم ..

نزلو واني كمت بدلت ونزلت غسلت ورحت كعدت يمهم .. يسألوني شلون صرت واجاوبهم
بزينه واني حتى مادري شلون دتمشي بيه الايام

كامو اهلي وضلينه وحدنه ..ومثل عادته يكوم
ويجي يكعد يمي واني بس اباوعله بطرف عيني وبعدين ادير وجهي عنه .. بدون مايحجي شي
راد يلزم ايدي وبس لامست اصابعه جف ايدي
اني سحبتهه بهدوء وهو ضل يتأفف جان كلتله

- شوكت رجعت من دوامك
- بارحه وخابرت عليج طلعتلي امج وكالت مريضه واجيت اشوفج وجنابج شايله خشمج عليه
- ليش شسويتلك
- يعني هسه انتي شكل مره مشايفه رجلهه صار شهرين وهم فوكاهه راد من الجبهه ! شمالج انتي هيج ماعندج احساس
- تره مريضه
-مابيج شي هاي شلوناتج كاعده وشني مريضه ماتعرفين تسألين علي؟ ماتعرفين تتحمديلي بالسلامه برجعتي .. جلمه طيبه ماتعرفين تكلين

سكتت ودرت عيني منه كلش مابيه حيل اتجادل ولا ابرر اني روحي بالكوه حاملتهه ..
جان يكوم ويكلي ..
- امشي صيحي اهلج خلي اسلم عليهم
- اكعد هسه وين رايح
- لااا لااا خلهه هالسوالف بويه ماتمشي عندي
ومنا وهيج لا اشوفج ولا اصلج بشي منا لما تنعدلين وياي .. اكعدي ويه روحج وشوفي شجاي تصخمين وياي وانتي احكمي بيهه
- محمد
- امشي صيحي ابوج يلا تحركي

جان يحجي وعيونه ناطه واخر شي صاح بيه ورحت صحت اهلي اجوي سلم عليهم وطلع
واجتي امي تهتف ...
- ولج شلووون بيج انتي شلوون ياحظي الاكشر بيج ولج ليش شالعه كلب الولد ولج بيمن طالبته شبيج وياه انتي متكليلي شبيييج
- ماسويتله شي
- وطلعته هاي شنو لج خمس دقايق ملحك يكعدهه وياج شسويتي وطفرتي هيج لج انتي مو شكول نعمه والله .. هالبنات تتحسر على هيج قسمه وانتي ادفرين بيهه برجلج ضلي خلي يسويج بعدين مكفخه من وره اسلوبج هذا
- ماريده ماريده كافي تلحون عليه ماتقبله افهمووو عاد مااتقبله مارييييده

فقدت بهاللحظه جنت واكفه بنص الطرمه واصيح وابجي وابويه واكف ويباوعلي وساكت وامي تجيب وترزل تالي كالت ..
- هسه يلا صرتي ماتريدين وينج هذيج الايام تتختلين وياه ومشيته على اصابيعج شجاج كلبتي
- ماتختلت وياه لتسويهه سالفه واني مارايدته من قبل بس انتو انتو جبرتوني اقبل بي وتدرون بيه ماريدهم كلهم هالعشيره ماريدهم
- دسكتي لج ماتريد مو هو بكيفج هاي بعد قسمتج تنجبين وتسكتين وتنعدلين وياه لا اكسره لراسج نطيناج عين زايده استكويتي

باوعت لابويه بنظره عتب وهو ساكت ماادخل بشي واكف وحاط ايده وره ظهره ويباوعلي
بشموخ .. تمنيته يحجي اي شي يسألني ليش ماريده ليش تعبانه ليش هيج ابجي ومااتقبله
او يفكر بعيشتي وياه هيج شلون ترهم ..
بس ماكال شي واني ماتحملت اشوفه هيج كأنه ديكلي انتي وحدج وهذا نصيبج ولاكأن هو الي جابه الي .. عفتهم ورحت صعدت لغرفتي كبل طلعت علاكتي ولميت هدومي وبدلت واني ابجي ماوكفت الدموع ونزلت جوه تلكتني امي ..
- خيرج عيني وين موليه
- معليج بيه
- وسم لهالشكول يطبج طوب وين متولين ولي شعليه بيج عشتو

عفتهه ورحت لابويه جان كاعد يشرب جاي وبيده الجريده كلتله ..
-اريد اروح لبيت بيبي
- انتظري اخوج يجي ويوصلج
- ماشي

استغربت حجيه وياي هيج حتى ماباوع لوجهي على نفس كعدته وعينه بالجريده وبس حجه هالكلمتين ورجع يشرب الجاي ولا اهتم لاي شي صار وياي وهو الي قبل بدون مااحجي يفهمني شبيه ويشاركني كل تفصيل هسه تخلى عني ..

رحت كعدت على الدرج وانتظر اخويه يرجع من الدوام .. واتذكرت كنتوري وبي الغراض رحت ركض صعدت قفلته واخذت المفتاح ورجعت انتظر .. لحد مارجع من الدوام كبل تلكيته وبس شرب كلاص مي وطلعنه ضل يسألني شصاير
كلتله تعاركت ويه امي بعد ماحجه شي سكت
وصلني لبيت بيبي وكعد تغدا ورجع واني ضليت نايمه على رجلهه وهي تسألني شكو شصاير وياج
ماحجيتلهه شي لان ماينفع بعد مادام ابويه متخلي عني بهالسالفه محد يكدر ينفعني بعد غيره ...

ضليت نايمه على رجلهه وهي تمسح على راسي ونمت شويه وكعدتني كلتلي كومي بدلي وخلي نروح نزور الكاظم ونغير جو ..
بيبتي بيهه طبع من تريد شغله واتصير بالهه سالفه كبل تلبس عباتهه وتمشي مايهمهه الوكت ليل صبح ولا تاخذ رأي احد كبل تلبس وتمشي ...

طلعنه بس اني وياهه وماكلنالهم رايحين نزور
وبالطريق رحنه اخذنه نص كيلو موز ولالنكي
وصعدنا سيارات الكاظم ومشينه ...

هناك طبينه للحضره وجان ازدحام وبيبي تجيبني تخليني كدامهه وتحاوطني بايدهه وادفع بالنسوان من يمي وتسويلي مجال حتى اوصل الشباك ومن الزم الشباك هي توخر ايدهه وتجي بصفي وتكعد تندعي لابويه ولعمامي وتدعي بالستر والعافيه لكل العايله واني هنا انسى همي واضل بس مركزه بحجيهه ودعائهه وشهكتهه من تصيح
ربي فدواتك ربي تحفظلي هالويلاد وتكوم تشهك وتبجي وتدعي لاهلهه بالرحمه ومااسمعهه تدعي شي لنفسهه فيصير لساني يردد ويه دعائهه
ربي احفظهه النه وطول بعمرهه وارزقهه الصحه والعافيه ..ربي لاتحرمني منهه ربي شافيهه
ويتحول كل همي هي ونطلع نصلي الزياره
واني اكعد اقرالهه الزياره وهي تردد وراي لان هي متعرف تقرا وتكتب بس تعرف بالحساب والساعه ...
وبعدين نروح ناخذلنه نص دجاجه مشويه وخبز ونكعد بالصحن ونحط الاكل ونضل ناكل اني وياهه ومثل يمنه نسوان هم ننطيهم ويجي جاهل من بعيد ويكللهه ..
حبوبه اريد من هاي ويأشر بخجل على الموز
وبيبي تنخبص وتضل تلملمه من كلشي تفرغله علاكه وتحطله موزه ولالنكيه وخبزه تلف بيهه شويه من الدجاجه وياخذ العلاكه ويروح يركض وهو حافي واني امد راسي واباوعله شلون تتلكاه امه ويكعدون ياكلون سوه واضل احجي لبيبي
شيسوون ونضحك ..

وبعدين نكوم نلم العلاليك ونذبهن بالزباله ونروح نفتر بالسوك وبيبي تلكطلي بهالقراصات والطوك
والسوارات الملونه والنوب تضل تعزل هاي لبنت فلان وهاي لبنت فلانه وتلم علاكه من كل شي
والنوب نروح لابو القماش هم تكص قطعتين الي ولاختي وبعدين تكعد تكدرلهه شحاطه واني اجيب واكوم يمهه وهي تنزع وحده وتلبس الثانيه وهم
تاخذ اثنين وتكول هاي الثانيه اضمهه صوغه شوف من نصيب منو تصير ...
ونطلع بره السوك نشتري حامض حلو وجياس شاميه ونروح نركب ونرجع للبيت وكت الغروب
وهناك تكعد توزع كل واحد حصته وتضم حصه اخواني ويه حصتي ...

وثاني يوم من الصبح ساعه سبعه اكعد الكاهه كاعده ومخدره الجاي وتكوم تحط الطاوه وتحط بيهه لكلوكه الدهن وبين ماتموع هي تغسل البتيته المثرومه وتملحهه وتحطهه بالطاوه وتضل تكلب بيهه لحد ماتكسب واني واكفه اخبط البيض وانطيهه تحطه فوكاهه وتنتظرهه تجمد شويه وتكلبهه وبعدين تحط الطاوه بالصينيه وكرصه الخبز وهي تحط بيضاتهه السلك ونكعد نتريك وحدنه والبقيه يسون ريوكهم وحد بس اني تطبخلي

ونضل اليوم كله لو نعزل بالكنتور وندعفس بالغراض لو نخيط مخاد وشلتات الهن لو نكعد
العصريه حاطين صينيه بيهه خبز مكلى بالدهن وعليه الشكر واستكانات الجاي وبين ماننتظر الجاي تكوم بيبي تصفك وتغني ..

خدري الجاي خدري .. عيوني المن اخدره

واحنه وياهه نصفك ونطك اصبعتين ونغني للجاي منا لما يفور ونصبه ونكعد ناكل ....

وضليت ٣ ايام يمهه نسيت الدنيا ومابيهه من اسمع صوتهه وسوالفهه وفطاريتهه وضحكهه مايضل هم بحياتي كلشي يصير حلو عندي ...

باليوم الثالث اجوي ابويه واخواني كعدو تعشو يم بيبي واخذوني رجعت وياهم للبيت وجنت اباوع لابويه واذكر هذاك موقفه واشوفه لحد هسه ماسألني شي ولا اله اي رد فعل يبين بي مهتم لامري ...

بصباح ثاني يوم طلعت لدوام المرحله الثالثه
وجانت افكاري بطول الطريق على ايوب شصار بحاله هسه بهالتدريب الي لليوم ماينعرف وين اراضيه وشلون عيشته هناك ..

وصلت للقسم وتلكوني البنات بالسلام والاحضان وضلينه وحده تحجي للثانيه اخبارهه وتفاجئو بخبر خطوبتي وكلهن ضلن صافنات بوجهي ويسألني وايوب ؟؟ واني ابتسم واكللهم كلمن ونصيبه بعد
ويسألني .. شلونه علاقتج بي وباهله .. واكللهم
زينه ومرتاحه وناس طيبين وضليت محافظه على ابتسامتي وياهن وكعدتي الهادئه ومابينت كبر انفعالي تجاه هالموقف وكلهن جانن يسألن ويستفسرن عن كلشي حتى عن المهر والذهب واللبس بس روعه الوحيده الي ساكته وواكفه تباوعلي وحتى ماباركتلي ولا كالت اي شي انتظرت راحن البنات واجتي يمي ولزمت ايدي
وضغطت عليهه واني هنا بعد ماكدرت اتحمل كبل نزلت دمعتي وهي ضلت تهدي بيه وتكلي ..
كافي تكابرين على نفسج منو اليستاهل بيهم وهيج حاركه روحج بالقهر
اني ماحجيت شي لان ماكو كلام عندي يكدر يفيد بشي او يفهمهه شنو اني عايشه .
مسحت وجهي ورحت اتمشى للقاعه بكل اناقه وثقه وراس مرفوع واسلم بطريقي بابتسامه على الطلاب الي اعرفهم من غير مراحل ..ودخلت المحاضره واني كاعده واسمع التبسبس من وراي وكدامي يتناقلون الخبر بينهم واني مامنطيتهم اي اعتبار ولا كأني حتى اسمعهم او انتبه لحركاتهم
كضيتهه مركزه على الصبوره واهدىء بروحي

من طلعت من محاضره رحت على روعه وكعدنا وحدنه وضليت احجيلهه شنو صار وياي بالتفصيل
وحجيتلهه ان ايوب مختفي صارله شهور وماعرف عليه شي وشنو اسوي لو اجه وحاجاني
جان تصفن وتكلي ..
لاتعذبينه اكثر وتأملي بلا شيء خلي يتقبل الواقع وينسى
مارديت على حجايتهه هاي لان اني بنفسي ماراضيه انسى شلون اكدر اخلي ينسى !!!

رجعت للبيت بعد ماكمل الدوام وضليت اليوم كله اتصفن وافكر بهالحال شلون تاليه !!!!

مَر شهر على هالحال ..

محمد ماله اي خبر لا يوصلني ولا يتصل ولا اسمع اي شي من اهلي عليه واني هم مابادرت بأي شي التهيت بالدراسه
وبنص شهر ال ١١ جنت طالعه من المحاضره الاولى ورايحه حتى اشوف روعه وناكل وبين
مااني امشي شفت روعه وتأشرلي رحت يمهه
وصرت اني كدام الشباك وبين مااني احاجيهه
سمعت صوت ضحك عالي من وراي .. رجف
كلبي وكبل عيني صارت على الجامه كدامي وشفته جاي يتمشى ناحيتنه ...
روعه لزمت ايدي واني صار نفسي سريع وايدي ترجف واكللهه امشي نروح ماريد اشوفه وهي ماتقبل تكلي وصل بعد عيب نروح وتطمني بعينهه
لحد ما قطع هذا كله صوته وهو يكول ...

- ها السلام عليكم
انداريت وباوعت لعيونه الي جانت مليانه عتب وهو مركزهه عليه ..اني وكعت الكتب الي بايدي وضلت روعه تشيل بيهن واني بس صافنه عليه
ودمعتي بطرف ركشي ضاله جان يكلي بصوت كله حسره ..
- شلونج يا امي
هنا اني استسلمت ودمعت عيني ودنكت هو ضل يتأفف وكلي تعاي نكعد بس اني عفته ومشيت
بسرعه روعه تصيحني واني امشي اسرع اريد بس اطلع من هالمكان ماكدر اواجه لساني انعقد ماعرف احجي شي ولا اكدر اتصرف برزانه ماحب يبين ضعفي كدامهم وهنا كل الطلاب عينهم عليه ماريد اصير حجايه يتناقلوهه بينهم ...

طلعت من القسم وبعدين طلعت من الجامعه كلهه ورحت عبرت الشارع وجان اكو مصطبات هناك رحت كعدت وضليت بس مدنكه واهدي بنفسي
منا لما هدئت ضليت اباوع ع الشارع وافكر شسوي هالمره شردت منه مره الثانيه شلون؟

حسيت على صوته قريب انداريت شفته جاي يمشي واجه كعد يمي جان يكول ..
- ول يابه انتي ليمتى تضلين مركضتني وراج
بالحرام انا اسحسل هالزلام وانا كاعد ماحرك رجل الا انتي تشلين حالي
- ليش اجيت وراي جان بقيت ماجبرتك
- ول يابه ما جنج مشتاكه
- اي
- لا تجذبين يولي انا قاريج من عينج
- وين جنت ويين بس فهمني وين
- يولي بارض الله انا جنت متبهذل كلتلج رايح للتدريب
- صار اربع شهور ايوب ياتدريب هذا فهمني
- تهدي وانا احجيلج
- ماكدر لا تطلب مني اهدء
- زين امشي وياي تا نروحلنه بمكان امان ونحجي

مشيت وراه واخذني مسافه بعيده من فرع لفرع وبعدين طلعني على شارع عام وعبرناه ومنتزه هناك جان رحنه كعدنه .. صدك جان مكان فارغ
وبنص الشارع صاير بس صوت سيارات محد كاعد هنا ...
- دحكي يابت الناس انا من شهر السابع الى نص الثامن انا بمعكسر خاص وماكل طن وحل هناك
ونور محمد معيشينه رعب نفسي واحدنه مايكدر يكول للثاني من يا عمام انته لو منين اهلك هيج حتى لو نريد نتعارف بينه مانكدر ضالين بس مصفنين بهالوجوه
- شنو ليش متكدرون
- محد ينطي حجايه عليه ولا احنه النصدك باليحجي فمانسأل ولا نتحاجى على كد الضروره
- ماتثقون باحد انتم
- احنه جماعه نثق بمشرق الشمس وغروبهه وغيرهه ماعدنا شي ع الفطره كله موثق ومحسوب
- هذا صعب هيج شلون حتعيش ويه الناس بهالافكار
- يولو وانتي تحسبيني عايش ! انا دافن روحي من زمااان انا اتمشى واراعي صحتي وشكلي لاجل شغلي
- تفرج ان شاء الله .. وين جنت بقيه الشهور
- رجعت لاهلي انا جنت كايللهم رايح بسفر ويه صاحبي ومن رجعت اهلنه رادو نمشي للرمادي
ورحت هناك كضيت عشر ايام وصارت كونه
-شنو كونه ؟
- عركه عركه
-ايي
- ايه وتصاوبت برجلي
- عززاااا يمه اسم الله
- والله هذا الجرى دحكي هاي رجلي كبل ثلاث ايام فتحتهه
- وشوداك بنص المعارك انته اووف ياربي شلون بيك
-يولو عجل ترديني اكعد واهلنه يتكاونون وماافزع
- وشفادت هالفزعه هسه
- قدر وصار
- وشلونهه هسه ماتاذيك مو
-لا زينه زينه لا تخافين
-وكعت كلبي والله اني موتي من وراك تصير يوميه منشف دمي ليش هيج لييش
- هههه يولو بالحرام عايشين الاكشن احنه والله هالجرى علينه ماجرى على بني ادم
- ايي والله من بعد ما صار هالصار تاكدت حظنه ماينفع بشي
- شنو الصار ؟
- على سالفه الشهيد والرساله
- ياشهيد
- ماتعرف
-يولو احجي شتكصدين
- الرساله الي وصيت صاحبك يجيبهه الي ماوصلتني بوكتهه
- عجل يمتى ؟
- قبل شهر وصلت شنو ماعرفت بي استشهد قبل ميوصلهه ؟
- انا عرفت بالولد استشهد بس مادريت ماوصلهه لج انا من وصلت اهلنه ليله وضحاهه طلعت للرمادي وماحاجيت اهله ..عجل منو وصلهه
- واحد يكول مستلمهه من اهل الولد وجاي ع العنوان
- ياسبحان الله قدر ومكتوب
- ايوب اني اسفه
-عليش اسفه؟
- رسالتك متأخره اجتي واذتني اكثر ماتريحني بوصولهه
-انخطبتي ؟
- اي ..اسفه ماكدرت اسوي شي ولا اني الي دريت بمكتوبك هذا صدكني كلبي تكطع وعيني مانشف دمعهه من ساعه الي قريته ولحد ليله البارحه اني انوح على فقدك واشتياق الك سامحني بس والله مادريت بيهه

ضل ساكت ويباوعلي ورافع حاجبه بعدين جان يعدل كعدته ويدير وجهه مني وهو يباوع للشارع كلي ..
- معذوره يايابه معذوره هو انا مامكتوبلي احصل وطن قسمتي من هالدنيا اضل متهجول

- اسفه والله مادريت بيك هيج تريدني اني جنت مقهوره منك بهذاك اليوم وقرار ابويه كسر ظهري وردت اقهرك مثل ماقهرتني بس مادريت والله والله مادريت هيج احساسك انته تكتم عني كلشي
- يولو انا تعرفيني من نظرتي شلون ماتعرفين كلبي وشنو بي من حب ول انا كايلج انتي امي انتي روحي شلون تفكرين بيه بهالشكل ول لاتطلعيني من ديني اسكتي

ضليت ابجي ومدنكه وهو يتأفف ويفرك براسه تالي عافني وكام واني زدت بالبجي كلبي محروك وخجلانه منه اني ماردت اواجهه ادري بنفسي ماكدر .. شويه ورجع وكف كدامي وكلي ..
- تبطلين بجي لو امشي ماتحمل هيج اشوفج انا

ماجاوبته وضليت مدنكه وامسح بوجهي وجان يمدلي جفيه وكلي ..
- خربتي كحلتج يولي ريت عيني عمت كبل لاشوفج تبجين حدري
- لا اسم الله عليك
- لا تناشغين وتلينين ساسي امسحي دموعج واشربي هذا يلا

باوعتله وهو ابتسم اني هم اخذت منه الجفيه وابتسمت ومسحت وجهي وعدلت كحلتي حسب ماهو يكلي امسحي منا ومنا وبعدين اخذت منه بطل بيبسي وشربت شويه وجان يندار عليه ويكلي

- دحكي يابه انا ملهوف عليج طول هالشهور بالله العظيم تزيدين ماتنكصين بهالراس ول انا ماعرف شمخلي الله بيج من شي يحكمني برضاتي
-هههه
- ول ابويه انتي لو تزوجين وتخلفين عشرين جاهل وتطلكين هم تضل نفسي بيج واخذج بس كون هالزمان ينصفني ويكف وياي
- ماامن بالزمان اني بعد كلب جز منه
- حكج ياا يابه والله حكج وانا بعد روحي تعلعلت منو
- هسه شنسوي تره اني ضايعه بينكم انته اكدر احجيلك حزني وهمي بس غيرك لا مايفهم
- احجي يا يابه احجي
- الكالي حل ايوب انته تدري اني مامحصله من هالارتباط بس العتب والرزايل من الاهل لان ما
- فهمت لا تكملين
- زين والحل شنو ماريد اضل هيج والله تعبت نار انتظارك هالشهور هلكتني وخوفي من الجاي شاغل فكري ماكدر افكر بشي غيره خايفه من كل شي
- والله ماعرف شلون انا باهلج ول انا سامع الاهل سند للبنيه اشو عدكم العكس يابه .. احنه بنواتنه مشيخات بالبيت ومايحتاجلهن تعلوم ولا جبر هنه سيدات انفسهن شبلاهم اهلج يا يابه ماتكليلي
- ماجانو هيج والله هسه تغيرو ابويه تغير هواي
صاير مايهتم لاي شي وياي وامي ماتصدك اعوفلهه البيت واطلع تتمناهه يوم يوم
- الله ويه الحك وهو الينصفنه عجل احنه نتبهذل ونعشك ونناطر ليل وكمره ومانطخ حرام وعين بعين الله ويجي غيرنا ياخذ على الحاضر مو حك هذا يايابه مو حك
- الله كريم
- دحكي هالايام انا اريدج تريحين بالج وفكرج وتركزين بدروسج ماضل شي للامتحانات اريدج متميزه يولو
- وانته هم هالسنه شد حيلك لا تكضيهه غياب الله يخليك
- ان شاء الله بس خلي هالمهاميج يعوفني وانا اعدل اموري
- راح تضل تحاجيني ؟
- بالدوام لا خوفاً عليج وعلى سمعتج بس اضل ادزلج مكتوب على موعدنا
- ميخالف هذا يغنيني ويصبرني على كل شي
- يولو ديربالج تحاجيه كلمه وحده بالحرام اسويج نصين لو عرفت منطيته وجه ومجابلته لا تخليني اتخبل عليج وازعلج مني لان انا مااسكت ولا ارحم بملكي فهمتي
- فهمت ياعيني فهمت
- عساه بالموت مالج دخل بي وامج لو تلطخ راسهه بالحايط لا تسمعيلهه ولا تكليلي خطيه وحرام ومدري شنو والله ما من خطيه غيرنا ومحد منعول سلفاه غيرنا احنه التهجولنه يولي همه خربو علينه دنيانه لاتنطيهم وجه
- ماشي ياعيوني تدلل
- ايه انتبهي
- صار تأمر
- يول مشتاكلك انا
- وانا مشتاكه
- ههههه يولو لا تذبحيني هالشكل
-ههههههه
- تحبيني
- ايي
- شنو
- اي احبك
- والله ؟ شكد تحبيني
-بكد جمالك
- ومنيلي جمال انا
- اصل الجمال انته ابني
- ول يابه انا هايم بيج بالحرام كلمه منج تصعديني للجنه وترجعيني للدنيا

ضحكت ودنكت وهو تلمس اطراف اصابعي واني درت وجهي عنه وضحكت وخر ايده وضل ياخذ نفس قوي ويكول ..
- ايييييه هالساعه احس الهوا بصدري جنت مخنووك ياامي مخنوك بلياج
- اسم الله عليك يايمه
- تمشين نتغدا ؟
- لا خلي ارجع للبيت خاف تاخر بعد
- بعد وكت خلي نتغدا وارجعج
- لا لا ماكدر خاف احد يشوفنا
- هايهيه يابه امشي اوصلج البيت

مشينه واني بس اباوع لطوله مشيته ايده وين يحركهه شعره الاشكراني وخطوط قميصه من الكعده لاحظته ضعفان كلش ومن صعدنا بالسياره وكعدنا مايكدر يثني رجله الا يمدهه ومن سألته
يكلي بعدهه تأذيني شويه ..

وصلني للمنطقه وراح واني رجعت كلي ضحكه وفرح وراحه ونمت مرتاحه وماكعدت للمغرب
وكل شويه اذكر حجاياته واضحك ...

بالدوام صرت اشوفه من بعيد لبعيد وبينه بس ابتسامه ومراسيلنه ما نكطعت كل ٣ ايام متفقين
بنص الليل يم السندانه اني احطله رسالتي بالبدايه ومن اسمع الصوت ع الشباك انزل واخذ رسالته
وهيج استمرينه يحجيلي بيهه انواع الغزل والاشتياق ومايحطلي ظرف بدون ما وياه فد شغله
مرات ورده بلون اصفر مثل مااني احب ومرات
اسوار او مشبك شعر ويكتبلي البسي حتى اشوفه
ومرات نستله او جكليت واني هم كمت من ارجع من الدوام اشتريله شغلات واضمهن واخليهن اله

مره خليتله سبحه بلون نيلي وبيهه فصوص ذهبيه بالنهايه وشفته ثاني يوم شايلهه ويفر بيهه ومن هذاك اليوم مافاركت ايده .. ومره خليتله دفتر ملاحظات وقلم ومره سوينه كليجه بالبيت وعزلتله بقوطيه صغيره ومره محفظه وهيج عايشين بسعاده بمراسيلنه لحد ما بيوم بشهر ال ١٢ امي
اجتي عليه العصر للغرفه وطبت وقفلت الباب
.
.
.
يتبع ..

#شقراء_بغداد

بارت_١٣



لحد ما بيوم بشهر ال ١٢ امي
اجتي عليه العصر للغرفه وطبت وقفلت الباب
باوعتلهه باستغراب واني كاعده على جربايتي اقرا
جان تتجتف وتباوعلي بغزره وتحجي وتعوج بحلكهه كالت ...

- جنهه طابتلج الزعله
- يازعله!
- زعل رجلج محمد خلي اذكرج بي جوز ناسيته الله اعلم شو منو ماخذ عقلج ومنسيج رجلج وحلقتج المشموره بالكنتور من ذاك اليوم لليوم
- هااا وانتي شعليج بيهه اذبهه البسهه اني حره لو حتى هنا تتدخلون
- انجبي لج انجبي ادبسسز لسانج بس يمي فالح يلعلع
-استغفر الله هسه شنو المطلوب فهميني شتريدين
- لا عازني الله عليج .. تسمعيني زين والله وقسم بالله ان ماجريتي وياه عدل اشوفج نجوم الظهر ومو بس راسج حتى ظهرج اكسره واخليج عوجه والناس تتفرج عليج اني لا خايفه ولا مستحيه تجرين عدل اكف عنج تضلين مبهذله حالنه بعنادج لا والله ايدي والكفخه
- والله هواي مصدكه نفسج وتهددين
- واكص لسانج يطايحه الحظ
- اني طايحه حظ انتو شعدكم حاركين روحكم عليه عوفوني لا اني اريدكم ولا انتو تحبوني وتريدوني بعد شكو هاللزكه شكووو
-مميتين على سواد عيونج كلمن يداري خبزته لا تصدكين نفسج وتنفخين ريشج تره لو ما ااااني محد يكلبج ويدك بابج وتضلين هنا معنسه على كلوبنه
- لاخلفه الله على اليدك هالباب ع اساس اني كاتله روحي على الزواج الاكشر هذا
- انتي قبلتي بي وبعد تتحملين كلشي يصير وسوالف المزعطه هاااااي ماتمشي عدنه سمعتي
- انتي ياهو الحاركج عليه كليلي بله هاي صارلي شهور كاعده ومنجبه شجابج عليه اليوم
- والله بيت عيالج يكومون ويكعدون بسيرتج فضحتينه خليتيني بالوجه الاسود كدامهم ابوج يسد بابه ويكعد وانتي تفرفرين بهالشوارع واني الماكلتهه عمتج كلساعه وداكه هالتلفون وياابني وياطلابه ابني انعدلي وياه عاااد مو بطيتي كلبه من ساعه السوده الخطبج بيهه
- اكلج مدامج هيج محترك كلبج عليه وعلى اهله كليله خلي يطلكني ويروح بحال سبيله ولا اذيه ولا ياذيني
- صخااااام الصخم وجهج ان شاء اللله ولج ياكبحيه هيج سهله عندج جنهه شربه مي تطلكين
- اي شكو لعد مو احسن مااروح واتبهذل
- لو براسج خير ومره تعرف اداري بيتهه وعيالهه ماتتبهذلين انصمي وحطي عينج على رجلج تاليتج تكومين بدفره وتكعدين بدفره لو ماجريتي عدل العيال ماتتحمل العناد واللسان اليلعلع
- مااااريد اتزووووج سمعتتتي لو اعيد.
- تتزوجين ورجلج فوك راسج شنو دنلعب احنه يوم اريد ويوم ماريد والله اكسره لراسج لو ضليتي بعنادج هذا ادبسسز اني باجر عازمتهم يجونه واريد اشوف شلون هالخشم اليابس تضلين رافعته عليهم لالزمج اشكج نصين
- شنو تعزمين بكيفج ماريدهم داكلج ماااريد
- انجبببي غصبا عليج مااخذ برايج اني باجر يجون ومثل الاودام تتصرفين
- اخزيج كدامهم والله باعي لاتحطين راسج براسي تره والله ابهذلكم مااضل ساكته وتعرفين عنادي فلا تندكين بيه احسن
- اني كلت باجر يجون يعني يجووون واريد اشوف بنت ابوهه الماتمشي عدل
- زييييين انتي جبتيهه لنفسج والله لسويكم فرجه كدامهم مدامكم هيج تجبروني وماتسمعون حجيي وتضلين تصرفين بكيفج بحياتي فتتحملين كلشي اسوي
- لاتخزينه كداااامهم ولج لاتخليني ابتلي بييج
- لاتضلين تدخلين بحياتي معليج بيه

صار مشادد بينه بالحجي وعلت اصواتنه واني كمت فتحت الباب ونزلت كبل لبست شحاطتي وطلعت لبيت جيرانه بصفنه كعدت يمهم هي شافتني ضايجه كامت دزت اخوهه جابلنه جيس قمر الدين وكعدنه ناكل ونسولف غيرت مزاجي شويه وره كم ساعه رجعت للبيت كبل صعدت لغرفتي ولا حتى شفت ابويه وحاجيته لان ادري بي ميوكف وياي مادري شنو الغيره عليه ..

ثاني يوم الصبح سمعت صوت هوستهم جوه ضليت بفراشي مانزلت وره شويه جان تصعد امي
فتحت الباب وكبل كالت ..
- يالمسعده انزلي عاد صار الظهر والعالم اجوي
- جايين عليج مو عليه انتي العزمتي مو اني
- شلون تريد ابتلي بيهه هسه ولج انزلي رجلج جوه
لاتفضحينه
- ماانزل يعني ماانزل

اجتي عليه وتجر بايدي واني ادفع بيهه اخر شي عتيت ايدي منهه وكتلهه ...
- انتي جبتيهم وتدرين بيه ماطيقهم وكتلج لاتتدخلين بحياتي ماتسمعين مني وهسه ماانزل لو تذبحيني
- ويطبج مرض فوك مررررض

طلعت واني كمت سديت الباب وقفلته ورجعت تمددت وافكر هالجاي اسوي صح لو غلط ؟
من جهه همه كبروسهه براسي هالزواجه وكلهم يدرون ماريد وحتى محمد هم يعرف ماريده وضالين مصرين على هالزواج لمصالحهم واكول حيل خليهم يتحملون نتيجه ضغطهم عليه ومن جهه
اكول الولد شذنبه هو بس رادني زوجه اله بالحلال وكلشي يطالب بي هو حقه الشرعي وغلط هيج اسوي بي .. بس عقلي يكول شي وكلبي يكول شي وضليت تايهه مره اريد انزل ومره اتراجع لحد ما
اندكت الباب صوت اخويه علي كمت فتحتله ..
- ابويه يكول خلي تنزل بسرعه
- زين

رحت بدلت ملابسي وعدلت شعري ونزلت جان اشوف امي تضحك وتباوع عليه وهي كاعده يم ام محمد ..
رحت سلمت عليهه وعلى ابوه وعليه من بعيد

ورحت للمطبخ ضليت واكفه واشلع بالشعفورات الي يم اظافري جان تطب عليه ام محمد وامي
باوعتلهن بملامح جامده وجان ام محمد تكول..
- هاي نوم الظهاري مايخلص هلبت تكعدين تعاونين امج بالبيت يوم عطله واكعد اكنس امسح مو خطيه عايفتهه كل الشغل عليهه
- بعد وكت هستوهه ساعه تسعه الحك اشتغل
- ياوكت احنه هيج وكت عدنا نطبخ الغده
وكافين البيت والحلال والزرع ماخذيلنه كشه عليه
يمه انتي نايمه بالعسل والوادم تهورف من طكه البريج
- هههه ام محمد عيني خليهه بعدهه مدللـه بيت اهلهه شعنده وياهه والبيت صغير مايحتاج شغل خطيه هي هاليوم عطلت وعدهه امتحانات خطيه ترتاح
- اييه الله يهديها

باوعت على امي ورفعت حاجبي بتعجب لحجيهه
وبعدين رحت حطيت الجاي على النار وفتحت الثلاجه طلعت شويه جبن وخبز وصبيت كلاص جاي وعفتهن ورحت كعدت على الدرج اكل
وره شويه صاحتني حتى نسوي الغدا ورحت كعدت اسوي التمن وهي كلساع تشاورني امشي روحي للهول خلي ادزلج محمد واحجي وياه عدل واني اطنشهه واخذ الخضره وابسط بالكاع واكعد انظفهه واخليهه تتافف وام محمد كاعده بس تسولف على عربهم شصار مصار بيه واني ماشارك بالحجي بس ساكته ...

كملنه الغدا وهمه راحو يصلون اني ضليت اعزل بالمطبخ وراهه اجوي اخوتي اخذو السفره مدوهه ونكلو الاكل وردت اصعد لغرفتي وجان يصيحني ابوه لمحمد وخلاني اكعد وياهم اكل وضليت طول الاكل اني مدنكه واكل وماخليت عيني بعينه
وكمت حتى اسوي الجاي واخواني يلمون بالسفره
جان يطب محمد عليه للمطبخ وشايل بيده كم ماعون انداريت باوعتله وهو تقرب يمي مديت ايدي واخذتهن منه وخليتهن بالسنك ورحت صبيت الجاي وصحت اخويه مصطفى اجه اخذ الصينيه ومحمد بعده واكف حسيت ان ماكو مجال بعد لازم نحجي فعفت الي بيدي ووكفت كدامه جان يكلي
- ليش تسوين بيه هالشكل انه بشني اذيتج
- اني متاذيه من كل شي انته ماتفهمه
- شني الي تريدي فهميني
- محمد اعذرني بس ماكدر
- بشني ماتكدرين
- ماكدر اكمل هالزواج اسفه بس والله ماكدر
- صدك تحجين !!! انه عايفج كل هالشهور واكولن بلكي تحن وتصحى على نفسهه والكه منج خير واتاني يوم يوم ارد من الجبهه واسمع خبر من اهلي عليج تالي تجين تكليلي ماكمل هالزواج
- محمد افهمني ماريد اجذب عليك واملك على وهم الي تريده مو عندي
- لج انه جبتج بدم كلبي هيج تاليتج وياي هيج تطلعين تكرهيني وتردين بس خلاصج مني ! ليش ولج ليش شسويتلج انه من شين وهيج تجازيني
- اني بس دااصارحك حتى لتعتب عليه بعد لان مالي قابليه اتحمل عتب ولوم انته متعرف شيصير وياي هنا ومتعذر ومتدري شنو بداخلي انته بس تشوفني مقصره بحقك
- صوجج انتي البعيده مني لو معتبرتني رجلج وتجين تحجيلي همج وضيك صدرج جان لكيتي ركبتي سداده لج واجيبلج حكج من حلك السبع بس انتي ماالج نفس بيه وتضلين كل عمرج ماترغبيني وماتفكرين بيه مثل مافكرن بيج
- ماكدرت والله هالشي صعب
- لا تتعبين روحج اليوم انه الي بعد ماريدنج ومالي نفس بمره ماتهمهه عيشتي وموتي انه عفتج ردت تنعدلين وتحكمين ضميرج وعكلج وياي بس مع الاسف ماظنيت روحي رخيص هالشكل عندج
وصليهه لابوج ..

نزع حلقته وذبهه على الكاونتر وراح يم اهله اني ضليت مقهوره عليه وضميري يأنبني دائماً حجيه يوجع كلبي انقهر عليه هواي بس ماريد اضل معيشته بجذبه والوكت يمشي وتاليتي اوكع بيهه

وره شويه راحو واجتي امي يمي بالمطبخ واني واكفه انظف جان تكلي ..
- هااا حسرته لخشمج وجبتج غصب عنج عبالج ماكدر عليج وتنفشين ريشج عليه

غسلت ايدي وانداريت عليهه وضحكت وجريت الحلقه من فوك الثلاجه وخليتهه بايدهه وكلتلهه

- وعبالج اني مااسوي الي براسي هاي حطيهه ويه حلقتي المشموره بالكنتور ووصي امه مره الثانيه من تخابر تجي تاخذهن وروحي بدربج هم احركيني يم ابويه واعلكيهه بيوم واحد وخلصيني

عفته ادعي عليه وتضرذ على صدرهه وتباوع كل شويه للحلقه ورحت اخذت ملابسي وطبيت سبحت
وكل شويه اذكر حجايته من يكلي
ليش تسوين بيه هيج اني بشنو اذيتج ؟

ماارتاحيت رغم شكد جنت اتمنى هاللحظه واخلص منهم بس ممرتاحه لان حسيت كسرت كلبه واذيته ..
شلون راح ابني سعادتي على تعاسه غيري ؟؟؟

طلعت من الحمام ولكيت الحرب منتظرتني
ابويه كبل صاحني وصوته مايبشر بخير
وامي متجتفه و واكفه يمه وترفع بحواجبهه وتتشمت .. جان يكلي ..
- تعااالي هاي شنوو
- يابه هو
- شنوو هووً شنوو ساكتلج اني كل هالايام واكول بنتي عاقله وجبيره وواعيه تعرف تتصرف بحياتهه. هي تحل مشاكلهه بس الظاهر بعدج زغيره ويراد اعلمج بكل شي ولا جنج بنت العشرين
- يابه
- تغيرتي مو هذيج بنتي الربيتهه معلمه ومعدله تحسب حساب الجبير قبل الصغير ..

صايره تفكرين بس بنفسج وبس ماكلتي اهله سمعتي سمعت ابويه اهلي كلهه ماحسبتي حسابهه بمزاجج انتي جنابج تخربين عشرتنه ويه خوالنه وتكاطعين بينه عشره عمر تكطعيهه وتخلين بينه الزعل والنفوس متكاطعه علمود والله شنو مااحبه من شوكت احنه عدنه هالسوالف منين متعلمتهه !! اني هيج ربيتج ! هيج علمتج وثقفتج حتى تكبرين وتنزلين راسي كدام خوالي ! احجي

- يابه احنه ممتفاهمين وماكدر على عيشتهم ليش متفكر بيه بس بالخوال والسمعه اني ماسويت شي غلط والله وعيونك يابه ماغلطت اني بس ماريد زواج فاشل وفهمته هالشي وهو كال اني ماريدج بعد و ذب الحلقه
- وانتي كيفتي خلصتي مو. كيفتي والضحكه شكت الوجه تفرحين وتضحكين على حساب اهلج هيج نفسج انانيه ومايملي عينج بس التراب .. الرجال بالموت كل يوم ويجد ويتعب ويريد يوفرلج بيت وعيشه زينه وحضرتج تتبطرين والله شنو عيشتهم عرب وشبيهم العرب مو ناس مو اوادم مثلنه !
ليش احنه اصلنه منين مو منهم هذا اصل ابهاتنه واجدادنا مانستنكف منه سمعتتتتي

- يابه والله اني مو هيج والله بس افهمني ماكدر نفسي ماتتقبله ارجوك كلي اي شي اسوي بس لاتجبرني بهالزواج

- بنتي اني ادرى بمصلحتج انتي طيش الشباب عامي على عقلج ومايخليج تفكرين عدل اني من اختاريته الج ادري بي. رجااال وينشد بي الظهر يحامي عليج وعلى اخوتج وكرايبنه منه وبينه بعدين نكدر نطب ونطلع عليهم وتضلين بينه ماتنكطع علاقتج باهلج الغريب مثل الذيب ماينعرف شنو مضمومه يابنتي

- والله ماريد لا غريب ولا قريب ماريد اتزوج يابه خليني يمك ادرس واتخرج واشتغل مو بحاجه الرجال حتى اعيش

- اليوم انتي بحيلج وتحجين هالشي باجر من تكبرين تتندمين على هالحجايه

- يابه الله يخليك

- اسمعيني عاد هالشي الصار مايتكرر اني وامج راح نتدخل هالمره ونصلح الصار ومره الثانيه اذا سمعت بنفس هالمشاكل وسوء التصرف والخلق ويه الرجال ما ارضى عليج وتعرفيني من ماارضى على احد بتصرف شلون اصير كفي الشر وبطلي طيش وعندج هسه بيت ورجال همه اولى بالتفكير من غير شي فهمتي

- مو عدل يابه والله مو عدل ليش تغيرت عليه هيج وماصرت تسمع مني ليش شسويتلك

- ماراضي عليج بالرعونيه هاي تريدين اصير كلمه بحلك الرياجيل هناك بعربهم تخلين الناس تكول عليه ماعرفت اربي واضب بنتي هيج تريدين شيبتي تاليهه

- لا يابه لو اموت ولا اسمع هالحجايه عليك

- لعد فكري زين واتصرفي بعقل كافي طيش سكتتلج بما يكفي بعد القرار يمج اني مااجبرج
تريدين ترضيني تمشين بالطريق الرسمته الج
تريدين تغضبيني تمشين بهواج

دنكت وبجيت هاي ثاني مره ابويه يختبرني برضاه ويدري بي نقطه ضعفي يخيرني وهو يدري الاختيار اجباري ..
ماحجيت شي بس هزيت براسي بموافقه ورحت ركض لغرفتي كملت بجيي هناك وكرهتهم بهاللحظه كرهت هالبيت وهالاهل وهالعشيره كلهه

ضليت اليوم كله بغرفتي وعيني ورمت من البجي
شسويلهم بعد حتى يفهمون ماريد وماكدر مايشوفون روحي يشوفون بس اهلهم وسمعتهم وحجي الناس واني اروح اندفن بالحياه ماعليه شي
المهم همه وتفاخرهم على اساس موتي ...

ثاني يوم العصر سمعت امي مخابرتهم بس مادري شحجت ولا سألت لان اعرف هي من وحدهه تجيني .. وره العشه اجتي كالتلي ..
- خاتون حضري روحج باجر رايحين لكربلا
- منو يروح
- اني واخوتج وهناك رجلللج ينتظرنه ويه اهله
- ليش
- حتى تعدلين هالصخمتي جم دوب اضل اكلج انعدلي ويه رجلج هاي تاليهه طيرتي الرجال من ايدج ولو ماااني اتدخل وارجع ماي وجهج جان هسه رايح وكايل لاهله وتكب هالعيطه احمدي ربج تلاحكتلج
- اي زين
- يلا من الصبح باجر نطلع عدلي جهرتج والبسي شي زين وملون لا تضلين بهالخرك
- معليييج بلبسي كم مره اضل اكلج لتدخلين بحياتي
- اهمداااج وامده حياتي المصخمه العوجه الخابصتني بيهه

راحت وهي ادردم واني ضليت لازمه راسي واعصر بي حتخبل ليش هيج ديصير ليييش ! !!

من الفجر كعدنا ولبست ثوب سمائي فاتح على بياض وضفرت شعري وكحلتي ونزلت جان تكول
- صلوات همزين فادت بيج الرزاله وصرتي تتعدلين لرجلج عفتي شكل الارمله هذيج
- من الصبح يعني شلون ماتعوفيني انتي
- عوووذه من هالوجه المبوم شلون صباح هو بدا بوجهج الله اليستر شراح اشوف من مصايب هاليوم
- اي والله الله اليستر من هالشوفه

عفتهه ورحت كعدت ع الدرج وانتظر اخوتي يكملون وبعدين طلعنه صعدنه لكربلا واخوتي مكيفين والطريق كله ماهدئو بس يكمزون ويلعبون وياكلون واني بالكوه حامله روحي ...

ومن وصلنه هناك امي كالت نروح نفتر للامام العباس هناك همه ينتظرونه ورحنه .. اني جان كلبي يدك سريييع ومتوتره وبس افكر شحجي وياه
شسوي اني ماعرف غير اضل ساكته واذا حجيت فبس اصده عني شلون هالمره اعتذرله وانطي وعود اني على نفسي ماكدر عليهه بس ابويه كسر ظهري هو الي كسر ظهري ...

ماحسيت الا واحنه يمهم سلمت على امه واخته وهو سلمت عليه ردلي بس هلا ... بعدين مشينه
وامي تكرص بيه وتكلي امشي وياه لتضلين ثوله وتضيعين جيتنه ..

عاد بطئت مشيتي وصرت وراهم ورحت قريب منه ومشينه بهدوء واثنينه ساكتين ضليت افكر وافكر ولساني ماينطق اي شي افكر بي من حجي وارتبه ماينطق احاول احجيهن بس ماكدر عاد اخر شي كلتله ....

-محمد شلونك
- زين
- خلي نزور و راهه اريد احجي وياك وحدنه ممكن
- يلا ماشي
رحت شردت منه واني اجر النفس عبالك جنت داخله حرب وهو فعلا حرب بيني وبين نفسي
رحت كلتلهم خلي نزور هسه .. وطبينه للامام العباس عليه السلام ..

اني شفت الضريح لو الله ذب عليه البجي حسست هنا من يحس بيه وينصفني هنا اكدر اشكي ويسمعوني مايجبروني .. وضليت ابجي واكله
" ترضاهه ياابو فاضل هيج يكسرون ظهري
والله مازليت ولا مديت ايدي لحرام ولا عقت اهلي ليش هيج يصير وياي ويخلوني انذل وينكسر كلبي وهمه يفرحون ليش مو بشر مثلهم وعندي احساس ترضاهه لو بنتكم هيج تكسرون بختهه وانتم تشوفون دمعتهه ليش مو الاهل يكولون خيمه وحزام ظهر ليش همه اليصيرون اعداي "

ضليت اشكيله وابجي واني مجلبه بالشباك وبعدين يلا رحت من تعبت وريكي نشف .. طلعت وادور على اخوتي على امي مادري وينهم جان اشوف محمد يأشرلي رحت عليه وكلي ..
- وينج صار ساعه
- جنت ازور اهلي وين
- راحو يصلون
- اي صدك اني هم ماصليت
- جا شجنتي تسوين لخاطر ربج
- ازور كتلك ازور

انداريت وعفته ورحت شفتلي مكان وصليت بي
وبعدين رحت يمه واخذني عليهم ورحنه زرنا الامام الحسين عليه السلام وهناك اني اكتفيت بس بكلمتين .." انصفني ياابا عبدالله "

وطلعنه صلينه ورحنه حتى نتغده وراهه طلعنه وامي اخذت ام محمد وراحن للمحلات وضلينه اني وياه واكفين وحدنه .. بهاللحظه اني لو ما كلمه ابويه ولا اعبره ولا اديرله بال بس ادري لو رجعت ومارضيت ابويه بي راح اخسره
فكلتله ..
- محمد اني اسفه على الصار

باوعلي بطرف عينه وهز راسه ودار وجهه مني
- خلي ناخذ فرصه ثانيه و نبدي من جديد
- هم اهلج جبروج هالمره .. شوفي يابت الناس انه رجال اريدن راحه بالي لين انه اجي من الموت كاره حتى النفس الي بصدري اريد ارتاح ماريد اضل شالع كلبي بيج ومن هسه اكلج اذا تكدرين على راحتي احطج على راسي وانسى كلشي منج وابدي وياج من الصفر واذا ماتكدرين عليهه خليج بيت اهلج وداري ابوج واخوتج احسن ليج لين انه ماجذب عليج يوم الماتمشين عدل وياي لو ويه اهلي وتضلين باسلوبج هاذ ماتلكين الي يسرج مني وهاذ حك انه ماجاي اتشرط عليج انه صبرت سنين وتعبت وضال لساعني بلايه زواج اريدن راحه بالي ماجيبج شلاع كلب بيتي فهمتيني
- اي فهمتك
- واذا ريحتيني وخليتي بالي مرتاح وقايمه بواجبي وواجب اهلي ومحترمتهم وصاينتهم اخليج بطن عيني ومااحرمج من شي والي تريدي يجرالج لا تكولين اخاف منك ومدري شني انه مااكص ركاب انه الي يمشي وياي عدل احطه بنص عيني واداري واليعوج مايلكه مني خير ربات عسكريه انه بويه افهميني هالنوبه وكليلي شني التكدرين عليه
- ان شاء الله اكدر اسعدك وماقصر وياك واعذرني على الي فات
- هاي قرارج اكيد مو نوبه الثانيه وتطلعيلي بغير درب
- لا اكيد قراري هذا
- بكيفج لو احد ضاغط عليج مااخذج جبر انه بويه هاي مخيرج كدام اهل البيت لو ماترديني كولي لا تورطيني بعدين وتشلعين كلبي تره والحسين روحي بزعانه من هالدنيا وماعرف ياساعه الي ارد بيهه لهلي بتابوت اريد اعيشلي جم يوم مرتاح بدنيتي كليلي لو انه موش بنفسج كولي حاط عليج اهل البيت لا تعيشيني بمرار بعدين

دنكت ودمعت عيني موقفي صعب والله ماعرف شكول اكله اي مجبوره من ابويه هناك شيخلصني منهم اكله لا واخاف اقصر بحقه ..

- احجي بويه لا تسكتين كليلي اي لا ريحي كلبي
- اي موافقه على كل شي والي تريده اني حاضره بي
- برضاتج
- اي برضاتي كله برضاتي
- الحمدلله الي تفاهمنه ولج والحسين كلبي يعزج يامره شاريج انه قدري هالشي
- ان شاء الله

ضحك وتقرب يمي كلش وكال ..
- تبجين ياكحله شني خفتي مني ؟
- لا بس هيج مادري
- هههه امسحي دمعج وامشي خلي اشتريلج شي بمناسبه صلحنه
-لا تسلم ماريد اتعبك ماكو داعي
- امشي لاتعاندين شكول كولي اي سمعتي
- اي

مشيت وياه واخذلي كلاده فضيه ناعمه تشكرته عليهه وهو رجع وجه يضحك ويسولف ويه اخوتي ويتشاقه وامه تضحك وامي وجهه ارتاح ورجعو ويانه للبيت ابويه استقبلهم بسلام حار ونامو يمنه العصريه وعلى العشه ابويه دزلهم من بره مشاوي وامي كملت السفره وتعشو ورادو يروحون ابويه ماخلاهم اله يباتون هالليله يمنه واني ضاله بس اتبسم بهالوجوه وداخلي متهشم وكلبي معصور
المن ادير الوجه كلهه كبت بوجهي يوم الصحت لا
ويوم الرضغت الهم كلهه صارت حنينه وطيبه
وضليت يمهم جوه نتعلل وحاطين حب شمسي وفواكه ونتفرج تلفزيون وابويه ومحمد منطلقين ضحك ونقاش ويذكرون ايام كبل وابويه يحجيله على خدمته بالعسكريه ويتناقش ويه محمد على
وضعه بالمعسكر ويسأله على ضباط يعرفهم
وهيج كضت السهره ...

فرشتلهم حتى ينامون وجان ابويه يكوم يترخص منهم حتى ياخذون راحتهم واجه يمي وحط ايده على جتفي وباوعلي وكال ..

- بنتي رفعه راسي حبيبه ابوهه باره بي اصيله هالبنيه لو شتكول محمد
- لا عمي والنعم منها والنعم من ماربيت
- ههههه الله يحفظكم لشبابكم يلا اخذو راحتكم بابه نامو نامو

عافنه وطلع واني عدلت فراشهم وجان موجود بس اخته واختي واني وياه وامه ويه امي كاعدات جوه
جان يكلي بصوت ناصي ..
- اريد اكعد وياج شويه شلون
- تاخر الوكت هسه خليهه باجر
- باجر نطلع من الصبح مايصير مجال
- لعد ماكدر هسه وكت متاخر واهلنه راح ينامون
- بس شويه مانتاخر بعدني ماشبعت منج دبريهه يلا

بهاللحظه طبت امي وامه وشافتنه نتبسبس جان امي تكول ..
- امشي بنتي اخذي محمد واكعدو سولفو بالهول خطيه هم ماكعدتو وحدكم ضلينه لازكين بيكم هههه مو صح ام محمد
- اي والله خطيه ابني محروم

اباوعله يضحك واباوع لامي وهي تضحك ونظراتهه تتشمت وبيهه تاذيني اكثر من كل شي
ماتحملت بعد هالمهزله وعفتهم وطلعت رحت للمطبخ وضليت افتر ولازمه راسي واستغفر ربي
لحد ماسمعت صوت محمد رفعت راسي وشفته واكف بالباب كبل ابتسمتله وكلتله ..
- اجيبلك شي
- لا بس جيت اشوفج جنج تعبانه
- لا مابيه شي هيج شويه من طريق
- هاا زين ضل بالي عليج
- لا ماكو شي تعال نكعد

ابتسم هو ورحنه للهول كعدنه عفت الباب مفتوح وكعدت شويه مسافه يمه جان يكلي ..
- تعاي ليجاي عليش تشردين مني
- لا عيب خاف يجي احد
- كومي سدي الباب
- لا لا خلي عيب شيكولون علينه
-شني عيب كومي سدي
- ماريد عفيه خلينه هيج هسه مو كاعدين بعد شكو
-شجاااي احجي اله تعاندين من اكلج كومي لتراددين كومي سدي وتعاي يلاا تحركي

كمت وكل جسمي يرجف بس لساني يردد يارب يارب ميته خوف بهاللحظه ماعرف وين اشرد منه
وهو براسي براسي .. سديته وبعدني مامنداره وحسيت عليه حضني من وره اني جفلت وبسرعه وخرت منه وضليت ارجف وهو رجع تقرب مني
اني كمت حتى حجي ماعرف احجي بس ارجع ليوره وهو عاد جرني من ايدي وحضني واني ادفع بي وهو فاقد ولا جنه .. يخلي راسه بركبتي وبشعري واني ادفع بي واضرب على صدره
واكله
- وخر راح اصيح والم عليك اهلي
- مرتي انتي حلالي
- لتسوي هيج محمد وخر ماحب هالسوالف وخررر مننني عوفننني
- ولج شيبتي كلبي خلي اتهنى بيج لحضه شجاااج
- وخرر مننني وخررر

عافني و وخر وضل يباوعلي وعينه حمره دم تخوف واني بلايه شي ارجف والنوب هذا صار اعصاب جان اكوم ابجي وخليت ايدي على وجهي وهو ضل يتافف ويكلي ..
- شجاج يمعوده متكليلي شكو هالبجي
- ليش تسوي بيه هيج شنو شايفني رخيصه لهالدرجه وهيج تسوي
- ولج انتي مرتي شني رخيصه
- بعدنا ماتزوجنه محمد عيب هالسوالف هسه تصير لو مره من عدكم تسوي بيهه هيج ؟ ترضوهه انتو جاوبني
- لا مانرضاهه
- لعد ليش تسوي هيج وياي وتلزمني واحنه بعدنا ممتزوجين شلون تريدني اتقبل هالشي فهمننني
- اسف انه مشتاكلج وحك علي وروحي لايبه عليج واكولن حلالي ومااكضنهه واطفي شوكي منهه
- من اجي لبيتك تصرف بكيفك ماامنعك بس هسه هالشي عيب وميصير ماارضاهه اني
- صار بويه صار حكج علي ماتنعاد ان شاء الله
بسج بواجي دخيل ربج شكد حساسه ترفه انتي وعلي ماتحمل دمعتج

شفته صار غير شخص ابد مو هذاك محمد الي ويه اهله كاعد ويتامر ويزامط هنا يمي حتى صوته يختلف وصار يداريني مثل الجاهل ينطيني مي ويغسل وجهي وينشفه ويحاجيني بانواع الغزل والاعذار وماعافني الا تطمن اني مازعلانه عليه
يلا راح نام واني صعدت لغرفتي حضنت بطانيتي وضليت ابجي جواهه والله ماعرف شسوي حسيت
روحي انجرت مني بمجرد حضني شلون لو صار العرس واني هيج سدت باب ماتحملتهه وياه وكزبر جلدي من الخوف ..

اني هاليوم غبت بي من الدوام وثاني يوم هم غبت
لان ماردت يوصلني للكليه ولا يدققون بلبسي ويضلون يحجون ويزيدوهه عليه واصلا نفسيتي حيل تعبانه من الي صار .. خلصو ريوك و ودعناهم وهو وصاني اخابره على رقم المركز مالهم كل يوم بالسبعه بالليل وكلي عكب باجر يلتحق ...

راحو وامي تمشي وتهلهل وتكول ..
- ساعه المباركه الي نعدلت بيه الخاتون وبيضت وجوهنه

عفتهه الحجي وياهه ضايع .. رحت طلعت لجيرانه بناتهم صديقاتي ونكعد نسولف ونضيع الوكت
ورجعت وكت الغدا تغدينه ونظفت المطبخ وصعدت لغرفتي نمت .. وبالليل كعدت احضر ملابسي و وياهه احضر نفسيتي لازم احجي لايوب الي صار كله مايصير اضم عليه شي واخون ثقته بيه اني معودته على الصراحه ...

وضليت سهرانه افكر شسوي بهالحال ايوب شنو ذنبه وشراح يصير بي !! اني بله انتهيت من زمان بس ايوب شلون ؟؟.

ثاني يوم طلعت للدوام ومقرره احجي وياه اليوم وهناك اول ماخلصت محاضره الاولى ضليت ادور عليه ودزيت روعه تكله حتى يجي يحاجيني بره الجامعه وطلعت انتظره بنفس مكان هذاك اليوم عبور الشارع على المصطبه ..

واجاني كعد يمي وكال ..
- وينج يولو غايبه يومين يمتى حتنتبهين على دروسج
- ايوب
- ياستار يارب مبين وراج مصيبه كولي يابه شعندج
- ابويه ماخلالي قرار
- احجيلي من الاول كلشي دفعه وحده