- لا طنشيني من اباوعلج
- ماطنشتك انته بس تخزر بيه
- وانتي متفهمين
-شفهم !!
- كم مره كايلج من زلم كاعده البسي شي مستور
- انتبه على كلامك مو انته تعلمني الستر
- لاااا تعالي اخذيلج راشدي بعد
- احترمني بالاول .. لبسي مابي شي ومامسويه شي يخل بسمعتي ..
- بلا حجي زايد واصعدي نزعي هالخركه اللابستهه والبسي شي طويل وعريض
- من انته بيتي لا تتأمر عليه .

اخذت الكلاص ورحت وعفته وحده .. انطيتهم المي وشاورت ابويه اريد اصعد شويه اذا يقبل .. هزلي براسه بمعنى اي ... واني عفتهم وصعدت ...

سديت باب غرفتي وتمددت على بطني وخليت المخده فوك راسي واحس جسمي يرجف من العصبيه ..
لشوكت يضل كابوس محمد يلاحكني !!!!

وره شويه هدئت اخذت واحد من كتبي ونزلت وعيني عليه بكل تحدي كعدت بالاستقبال وحدي واقرا..

وهو يلوب يروح ويجي كل شويه على اساس يروح للسياره واني مارفعت عيني اله مطنشته وبالي كله يم الكتاب ...

صارت ساعه ١١ وامي دزت علي يشوي سمج بره وكلتلي احضر التمن والزلاطه وهي كعدت تحضر المركه ... احنه نشتغل وام محمد كاعده وحاطه سله الخضره يمهه على الميز وتسولف ...

حجتلنه على كل عربهم ومنو تزوج ومنو خلف ومنو بنى وتسأل على كل شي ....

جانو جايبين وياهم صناديك برتقال و خيار وفلفل وبيتنجان وجدريه روبه ..

طلعت للطارمه وبايدي سله اريد اجيب خيار وفلفل
واني كاعده اطلع منهم اجه محمد ووكف يمي
رفعت راسي باوعتله وهو عيونه نااار اخذت نفس
ورجعت اطلع بالخيار وعفته واكف محجيت شي وياه

- مو خلص الشهر وين وعدج

اخذت السله وكمت وكفت كباله وركزت بعيونه ..

- مااظن الوقت مناسب لهيج حجي دتشوف ابويه مريض واني مشغوله

- هااا حضرتج ترديني على مرامج شوكت ما ست
زهراء تفرغ نحجي .. اسمعيني عدل طولت خلكي
وياج باليكفي ومخليج تسرحين وتمرحين بكيفج
خليني وياج بالتي هي احسن ولا تختبرين صبري

- عيني لا تكلف نفسك ولاتحملهه اكثر من طاقتهه
زواج اني مازوج واعلى مابخيلك اركبه ماتهمني

درت وجهي ودخلت المطبخ حطيت السله بعصبيه
على الكاونتر ورحت صعدت لغرفتي مطايقه وجوده

والخوف سره بجسمي لان ادري بيهم مو ناس خير
مانزلت بعد ولا حتى سلمت عليهم من طلعو

صعدتلي امي وفتحت الباب بعصبيه بعد ما راحو ..

- انتي متكليلي شبيج لشوكت تضلين بعقلج الصغير
هذا
- شكو شسويت
- فوك شينه كوه عينه ... لج المره كاعده وانتي تشمرين السله وتمشين وتطلع العالم ومتكلفين نفسج تسلمين لاتحترمين اب ولا ام ولا حته الخطار .... ادب سزز عاجبتج نفسج ومنغره على سواد عيونج

- انتي هسه شتريدين حجيج هذا مايقدم ولا ياخر عندي لان انتي حالج حالهم متهميني

- لج كلبه اني اربيج اليوم هاي عينج الا افكسهه

ضلت تشتم وتهوس واجه اخويه مصطفى طلعهه بره اني كمت قفلت الباب وضليت كاعده ابجي ..

كل البنات امهاتهن يفزعولهن ويسالن شبيهن وليش مقهورات الا امي كل همهه اطلع واعوفلهه البيت

مو وقت وكعتك يابه هاي الناس ذايبه وكلهه راح تلتم عليه ...

صار الليل نزلت اطمنت على ابويه وانطيته علاجه سالني شصار كتله شي عادي على سوالف المطبخ

هو مابي حيل يحجي ويسال اكتفى بجوابي وتمدد ونام سويتلي كهوه واخذتهه وكعدت بالطارمه ..

بيدي دفتري الاصفر وقلمي الاسود وكعدت اكتب ...
🎋
🎋
الثاني عشر من آيـار من سنه ١٩٨٥...

سلاماً على من يؤنس فكري المنبوذ ...
كالندى على طرف الورق طيفك يااشقري .. كثيراً
هو شوقي وقليلاً حيلتي .. التمس من دفء ذكراك
وما مضى من ايام طرباً اراقص بهِ ايامي ...
فطرف الحبل معك بدأ بالتمزق وكثيراًهو من ينهش به وانا لازلت انتظر من الرحمن يوم اعيش به حريتي كم وددت لو انك هنا تسندني وقت ضعفي وتحامي عني ... تلك النظرات الحانيه كم وددتها لو كانت هنا اليوم وانا بين البيع وغصب الشراء ... تطمئنني بانك معي واني لست احارب لوحدي بطريق مجهول امشي الى السراب ورمال الدرب تحرقني متى ستكن معي ؟؟
متى اكسر القيد من على عنقي ؟؟
🎋
🎋

سديت الدفتر وضليت اباوع بالسما افكر ياترى وينه هسه ؟؟ وشلون حاله ؟ بعده يذكرني وهم مثلي مايغفى الا يذكر ايامنه ؟؟

وشلون بيك محمد مادري ظالمتك لو ظالمه نفسي
بس الحب بالكيف والله بالكيف ....

اخذت دفتري وصعدت نمت ... ومرت الايام ...

وابويه تحسنت صحته ورجع يوكف على حيله وامي رجعت هادئه وحبابه وياي ولاكأن شي صاير ..

وبعد مرور شهر وصلتني رساله من ايوب...
كان محتواها ...
⭐️⭐️
الى امي ومالكه قلبي ..
اما بعد فشوقي لكِ قد ثار بركانه .. واني لا زلت اذكركِ حتى في منامي اجدكِ ...
احبكِ احبكِ احبكِ ..
بقدر ما نبض القلب احبكِ .. كيف حالك يااميرتي ؟
اتمنى ان تكونِ بخير والا يكون قد حدث مايضيق على قلبكِ الصغير ... اما عن حالي فانا مشتاق لعينيكِ اعذري بعدي هذه الايام يااميرتي .. قد كنت بمهمه فاوضاع البلد سيئه والعدو من بيننا والواجب يقتضي مني كل هذا البعد ..

ذهبت للبصره اسبوع واشتريتُ لكِ هذهِ المفكره اُكتبي لي بها كل مايحدث بايامكِ هذه .. اكتبي كل مااشتقتِ الي .. واكتبي لي بعض من ذلك النثر الانيق الذي تكتبيه في لياليكِ فانا مشتاق لكل تفاصيلك
ياانستي .... اريد اخباركِ باني ساذهب الى الرمادي بأذن الله غداً سأحضر عرس اصغر اعمامي ..
وبعد عودتي سأذهب بتدريب سري لكن لم اعلم المكان بالضبط فهذا يبقى سراً حتى تحين لحضه الذهاب .. ولاتقلقي علي فانا بحفظ الله ..
اهتمي بنفسك وادعي لي دوماً وكونِ قويه بغيابي
فأنتِ امرأتي التي اثق بها ..

حبيبك المخلص
ايوب
⭐️⭐️

قريتها وكلبي ينبض بلهفه حتى اعرف كل كلمه كتبها شنو .. اتسابق ويه الثواني حتى اخلصها ...
حضنتها لصدري وشميت ريحتها وارجع اباوع لخط كلماته الثابت ... ضليت اردد الحمدلله لانه بخير ولان وصلني خبر منه ...
اخذت المفكره اتلمس غلافها الجلد الجوزي واتصفح اوراقها البيض المخططه برصاصي كانت اطراف الورقه ذهبيه وكل ورقه مكتوب بيهه تاريخ واليوم واول صفحه مكتوب بيهه ...

" اهداء الى امي ... ابن شمر" وتوقيعه ...

ضحكت من كل كلبي من قريتهه .. جيته المفاجأه هاي نستني كل الصار وكل تعب الانتظار ...

بعد مرور ايام ..

وقت الظهر اني حرارتي مرتفعه بسبب الحساسيه
كل جسمي نار وروحي خاويه نايمه بغرفتي
وفجأه تدخل عليه دعاء ...

- ابويه يريدج انزلي بسرعه
- ليش شكو
- ........
.
.
يتبع 🌸🌸🌸

#شقراء_بغداد

بارت_١٠



- انزلي بسرعه ابويه يريدج
- ليش شكو
- كومي داكلج

نزلت واني جسمي نحلان نزلت كعدت بالهول وابويه يمه خطار بالاستقبال ..

سألتهم منو هنا كلهم ساكتين ومحد يرد عليه بس يصفنون بوجهي شويه وسمعت ابويه طلع برا وصل الجماعه وسلم عليهم ورجع ...

اني منتجيه على اليده مال الكرويته وسانده راسي بايدي ودخل ابويه وجهه جامد وهادىء ...

كل الوجوه ثابت نظرها عليه وهو بكل هدوء تحرك بالغرفه وايده اثنينهن وره ظهره وكف كدامي وكال ..

- راح اسألج وانطيج خيارين وتجاوبين بقناعتج
تكرهين بيت محمد ؟

- اكره ملحتهم وياي بس

- زين .. ابوج وكلمته لو حريتج بالمحبه .. اختاري لانج فهمتي قصدي وين

انتزعت كل الكلمات من عقلي ورجف كلبي وتوقفت بصدمه عن مسار الثواني الي تمر بيه ...

بين وجوه اخوتي البارده و نظره امي المنتصره
ولمعه عين ابويه اني اندفنت ....

يكلي قناعتج .. مثل الي يكلك لو اذبحك لو تشرب السم وانته اختار ... وبالحالتين موت ..

اريد انطق بس لساني يعجز بهاللحضه .. طالت فتره الصمت بينه وادخلت امي ..

- فضيها عاد مو ابوج واكف ينتظر وانتي تصفنين

- خليها على راحتها

دنكت راسي واني احارب دمعتي لا تنزل وتخليهه تتشمت بيه لازم اكابر واضل قويه كدامهه حتى واني اموت .....

- بكل قناعتي بابا اختارك ماتغلى عليك حتى روحي

كلتها وكل كلمه تلجم كلبي وتدمي لان اعرف بالعواقب وهو رفع راسه بفخر وابتسم ابتسامه رضا وكال ..

- الاحد الجاي الخطوبه

هزيت راسي بموافقه واستأذنت منه وصعدت لغرفتي قفلت الباب وذبيت نفسي على الجربايه وابجي بحركه وصمت جريت الغطى وصرت اعض عليه من حركتي والنار الي بكلبي والعبره الخانكتني حتى الدموع تتسابق
حتى تنزل وتحرك هالخد ...

كلشي انتهى بلحضه احلامي وحبي ورغباتي كلها انباكت مني بغفله والي يذبحني اكثر اني بايدي امشي نفسي على الجمر واتبسم بوجوهم ...

مادافعت وحميت احلامي وحبي سلمته الهم بكل طاعه واحترام ومغلف بالحب والرضا .. سلمتهم كلبي الي ينعصر من الحزن الي بي ...

ماعرف شلون وليش وشمعنى هاليوم ولا منو الي اجه بس كلهم تعاونو على ذبحي بكل سريه وهدوء ..

باقي خمس ايام للخطوبه شلون راح اكول لايوب شلون اوصله الخبر وهو ماكو ...

مر اليوم بغرفتي والدموع ونمت بحراره جسمي وحراره كلبي وعدا هاليوم ....

وبدأ يوم جديد واثار البارحه باقيه على يومي هذا ماراحت بروحته ولا هدئت بليله ...

نزلت سبحت وطلعت سويت كهوتي وكعدت بره لوحدي الساعه سته الصبح كلهم نايمين واني عيني على الطيور احسدهم بحريتهم المكان الي مايعجبهم يغادروه بلا تفكير
وبلا سلاسل تحاوطهم من كل مكان ....

اني رابطني حب ايوب مخليني عاجزه عن كلشي دونه وطاعه الاهل والوعد الي منطيه يخلني اعجزعن ان احلم بأي شي عدا رغباتهم ...

مر اليوم عادي هادىء وكأن الكل تخاف تفتح موضوع الزواج حتى ابويه كأنه شي ويريد يضمه ...

ماسألت عن الي اجه البارحه وحجه ولا شنو الي صار لان كله بعد مايفيد ...

ثاني يوم سمعت جيرانه رايح مستلم النتيجه من جامعتنه
فكلت لابويه اروح اجيب نتيجتي ..

بالبدايه كلي اني اروح اجيبهه بس اني تحججت بالصديقات وهالاشياء وقنعته ...

الليله كلها ادعي كون يجي للدوام بس هاي فرصتي وياه
بلكي يكدر يسوي شي ينقذني اكيد ماراح يخليني اروح من ايده بهالسهوله ...

كعدت من الصبح وبدلت وكشخت وطلعت وكلي لهفه وامل لشوفته ...
وصلت للكليه وكضيتها سلام ويه البنات وكل وحده اسألهه شطلعت وبعدين صعدت اخذت نتيجتي وطلعت ناجحه فرحت لان عبرت هالمرحله بس عيني بعدها ادور على مالك نظرها ...

واني دانزل على الدرج صار مقابيلي رفعت راسي وابتسمتله هو وياه ولد ترخص منهم ونزل وياي ..

- هاا شطلعتي بشريني

- اكيد ناجحه

- الحمدلله عفيه بأمي شاطره رفعت راس انتي

- تسلم .. جنت خايفه لا مااشوفك

- لااا اجيت حتى اضبط الوضع ويه الاداره يحسبولي سنه عدم رسوب واشوف ترتيبات الدوام والكتب

- اي زين تسوي بس اني عندي موضوع وياك لازم نحجي بي

- اييه امشي نكعدلنه بمكان وانتفاهم

يمشي بصفي بكل وقار احس كأني تحت جناحه محميه من كلشي ومايوصلني بس الدفو والامان والضحكه

اكيد الناس كلهم عميان حتى ماعرفو انه يشتغل ضابط مدري اني لان ادقق بي بكل شي اعرفه !!

بس مشيته والصوت الرنان وطريقه سلامه برفعه ايده للولد وهو يمشي ومداير بال وبنفس الوقت ماناسي احد هالاتزان العجيب بشخصيته اكبر من ان ينخفي ..

كعدنا بمكان هادىء من الحديقه وكلي ..

- اييه يالحبيبه احجيلي

-هو يعني .. شوف هو كلشي صار فجأه و..

- احجيلي من الاخير

- خطوبتي الاحد

- شنووووووو

- ابويه اجاني قبل ٣ ايام وجان يمه جماعه بس طلعو سألني تختارين ابوج وكلمته لو حريتج بالمحبه

- واختاريتي ابوج موو

- اي ماكدرت ايوب موقفي صعب وهو كلش جدي بحجيه جان خفت وشفت العيون حواليه منتظره تتشمت اذا مو بيه بابويه

ايوب ماكدر اكمل هيج ساعدني سوي اي شي اني ماتحمل البعد عنك
احجي شي ليش ساكت !!!

-شكدر اسويلج الحل بايدج مو بيدي

- اني ماكدر على كل هذوله وحدي وانت ماعرف
عنك خبر حتى لو صار شي اني شلون اوصلك

- اني امري مو بيدي الوطن يطلبني بأي لحضه ولازم البي

- واني مو وطنك ودااضيع من ايدك

- ااااخ ياربي شسوي اناااااا

نصدمت من رده فعله توقعت اذا احجيله يمكن يتخبل ويحرك الدنيا بس طلع كلش بارد بهالموضوع

حسيت نفسي غبيه وذليله واني كاعده اطلب منه يسوي شي وماروح منه بس لو يريدني ويخاف ضياعي ماينتظرني احجي شي ...

- لا تسوي شي ولا تعب نفسك وتفكر .. اني رايحه وهالموضوع اعتبره مانفتح وشكراً لوقتك الي سمعتني بي

- زهراااء اووكفي اوووكفي احاجيج

- شنو شتريد تحجي بعد

- وين رايحه وعايفتني هيج وشهالحجي هذااا هاا

- لو تحس بالي احسه جان ماصار كل هذا

درت وجهي عنه ومشيت ودمعه تنزل ودمعه تنمسح بس طلعت باب الجامعه صرت امشي بسرعه ورحت كعدت على مصطبه واني احس بكلبي يتكطع ندم وخذلان وخوف وحب ماريده يروح ...

مسحت الدموع بكبرياء الي ملازم تضعف وتضل صامده حتى وهي متألمه بس العالم يحب الضعيف واني ماراح اطاوعه ...

رجعت للبيت وبشرت ابويه بنجاحي ومابينت شي ابد وكلت راح اعاند وادوس على كلبي اذا هو سهله عنده روحتي فمااستصعبهه على نفسي ...

ضليت الليل كله اكابر على نفسي وجزء الثاني مني يبجي مقهور ميريد يحول هالحب لنسيان او كره

كعدت من الصبح ورحت لابويه وكتله ...

- اريد اطلع اشتري ملابس ماعندي شي مناسب ليوم الاحد

ابويه صفن بوجهي وكأنه يريد يشوف الانكسار او الرفض او حتى خوف بس مالكه غير الصمود والنظره الواثقه من الي تسويه ...

- اييي بابا ادللي اخذي امج وروحي اشتري اليعجبج عفيه بنتي هيج اريدج بابا رفعه راسي وتبيضين وجهي كدام خوالي

- ان شاء الله

رحت حضرت نفسي حتى اطلع للسوك وامي راحت تبدل ملابسها ... واكفه كدام المرايا واحاول امسح الم نفسي عن نفسي ...

طلعت واني امشي على وجع افكاري والخذلان كأني اعاقبه واعاقب نفسي بالقوه هاي كلها ..

طلعت اشتريت فستان وردي طويل وبي تطريز بالحاشيه وبي ردان كيبور ردته هيج لان جسمي متعب من الحساسيه هالفتره .. واخذت حذاء كعب عالي كلش واشترينا تحضيرات للمهر ورجعنا ...

بالليل اسمع امي تحجي بالتلفون وتكول..

- اي محضرين كلشي وماناقص بس جيتكم عيوني اي اي اكيد هي كالت داده احنه مسوينالهه شي هلا بيكم عيوني هلا بيكم

سدت التلفون واني جنت انزل على الدرج وباوعتلي بنظره نصر وهي تكول ..

- تعاي عروستنه حبيبه هاي عمتج الخابرت وتكوول اشترينه الذهب والاحد بالاربعه العصر همه يمنه
وجانت تسال عليج وشتريدين من غراض

- اي وشكتيلها بله

- كتلها بكيفكم من تجون نتفق بالباقي

- هااا اي زين ابويه وين اريد احاجي

- يم جماعته بالباب

اختي دعاء كاعده تعزل بملابسها واخواني برا كاعدين وبس امي تحوم فوك راسي وتوصي ..

صيري عاقله ولا تضلين تعاندين واضحكي بوجوهم ورجلج لو كلج المي احمر تكليله اي احمر وتسكتين

ومن هالحجي الي مايقدم ولا ياخر عندي .. مخليتهه تحجي وتمثل براسي دور الام النصوحه لان تعب روحي اكبر من التفاهه هاي كلها ...

انتظرت رجعه بابا واول ما دخل البيت لكاني كاعده بالطارمه باوعلي وضحك ..

- هااا باباتي شعندج هنا

- بابا اريد اكلك شي

- اي تعاي خلي نفوت وكليلي

دخلنا بالهول وكعدنا وامي اجتي كعدت لان مبين من عيونها الفضول كاتلها ..

- اي كولي بنتي

- بابا اليوم ام محمد خابرت وحجت ويه امي سألتها شنو الي نريده

- اي مافهمت هسه شنو

- اني طلبي لا ذهب ولا البيت عندي شرط واذا قبلو بي اكمل هالزواج واذا لا فتعذروني

- هاااا اي بله كليلي شنو هالشرط يابه

-شرطي هو ان ماتزوج الا بعد التخرج

- بعد التخرج !!!!! سنتين !!

- اي سنتين لان هسه مااخاطر واروح لمكان ماعرفه واحمل مسؤوليه البيت والزوج والدراسه سوه ماكدر

ابويه صفن يفكر بيهه وامي نطت من يمهه بحركه كلب..

- شدعواج عيني مو كومه تزوجن واصغر منج
هنه كنسا ومسحا عزا العزاج يا زهيره سنتين
اي بيمن طالبه الولد مو شلعتي كلب كلبه

- اني هاي قابليتي وماجذب عليكم هسه زواج مادبره اتخرج ويصير خير .. ها بابا شتكول

- هاهيه بنتي قرارج مناسب وعجبتيني لان تعرفين
قدرتج وقدره تقبلج للشي

- على بختك ابو زهراء والجماعه شلون مو صارلهم سنين هم يكعدون ينتظرون

- هاهيه الي يريد الحلو يصبر على مره واني اوافقهه الرأي حتى اشوف محمد يستاهل أمن بنتي عنده لو لا

- بابا لعد كللهم من هسه ليش بعدين ينحرجون خلي يكون عدهم علم احسن

- اي اليوم امج تخابرهم وتفهمهم على هالحجي
اطمني بابا مايكون خاطرج الا طيب

- تسلم بابا حبيبي ربي يخليك النا

ارتاح فكري هيج اكدر انسى ايوب على راحتي ومااتأذى بذكراه هسه وعسى انهم مايقبلون ويخلص كل هذا ..

ثاني يوم الجماعه رجعو خبر انهم موافقين ...

على ان هم محمد يكول خلي تخلص الحرب هم ويتزوج على راحته ...

ومشت الامور عاديه .. الكل تجهز للخطوبه من امي لعماتي وبيبي الي كل يوم جايه وتنبهنا على شغله حسب اصولهم ... وتنبه على لبسي وتصرفي

وصار يوم الاحد واني بعدني اكابر وكل ما اذكره
اكول ميستاهل وارجع اكمل التحضيرات كأني اعاقب حبي اله بمشيتي بكل ثقه بهالدرب ....

خلصت ام الصالون التسريحه والمكياج ورجعت للبيت ووياي بنات عماتي اثنين ...

ترخصت من الكل وصعدت لغرفتي قفلت الباب وانتجيت عليه واني اضم بشهكاتي واحارب الدمعه الي متعلكه بالرمش ... رحت وكفت كدام المرايه ...

وايدي ترجف وكلبي نبضاته اسمعهن من الخوف
وكل هذا واني بين اكرهه وبين اريد ابقى لحبه وفيه

اول حب واول خذلان اول نبضه اله دتوجعني حيل
توجع بهالكلب وبهاللحضه بالذات ....

مسحت دمعتي وعدلت نفسي واني اكللهم جايه
اخذت نفس عميق واريد اتحرك للباب وبداخلي
شي مكسور شي مديتحمل يوكف بعد
يخلي الدمعه ترجع تنزل وارجع امسحهه وابتسم واكابر بفكري الى ان وكفت ودست على كل وجعي وكلت اني قويه مايكسرني رجل ماقدر الحب الي حسيته اله ...

ونزلت والهلاهل تتعالى بكل درجه انزلها ..
وبيبي تطش الجكليت وتهوس وتهز بفوطتهه

رحت كعدت على القنفه واجوي يمي وعمتي الصغيره تصورنا بكامرتها ...

اجتي بيبي وحضنتني واخذنا صور هيج وصوره
اني ودابوس ايدها وراسها ... بقت كاعده يمي وحاضنتني كانها تعرف اني محتاجتها اكثر من كل
شي اليوم ....

اباوع لاختي مشغوله تعدل بشعرها وامي تحضر
بالكيك وملتهيه والبنات يركصن كدامي ودخلو وياهم عمامي هم ركص شويه وهنه كيفن على جيته ...

بعدين سمعنه اخويه مصطفى يكللهم اجوي الزلم
فعمي طلع من عدنا واستقبلهم ويه ابويه وبقيه ولد
عمهم والنسوان دخلن بالهلاهل والجكليت من كل مكان

اجتي امه بوستني وراحت واجتي خالته الي كل مره تجي وياهم بوستني وكعدت يمي وضلت تعرفني على كل وحده تجي تسلم عليه ...

واني بس ابوسهن وبالي مو يمها وهي تكلي اسمائهن حتى بوجوهن ماركز ...

اجتي بيبي وكالت كومي البسي عباتج وادخلي للسيد اني وحذائي العالي وفساتني الي وراي بمتر كمت واجتي امي انطتني مثل كاب ابيض طويل لبسته واجتي امه تكول ....

لا عيني حطن عليهه العبايه هذا يكشف عليه الابيض وجرت عباتهه وحطتهه فوك جتفي ودخلتني للاستقبال

ولدهم طلعو وبقه بس هو وابويه وعمي وابوه والسيد

بهاللحظه كلبي صدك راد يطلع من مكانه واني اسال نفسي معقول هذا حقيقه !!! الشخص الي جنت اكره سماع اسمه ويصيبني الرعب من جيته اليوم اني كاعده يمه وراح اصير بذمته !!!
شدا اسوي اني !!

فزيت من صفنتي على صوت السيد وهو يكلي موافقه
ان يصير محمد زوج الج يابنتي ..

اخذت نفس وكلت ..
ربي انت الحكيم والمعين توكلت عليك يارب ..

- موافقه

بعدها صارت الهلاهل والاصوات العاليه ماتميز
منها شينحجي ... كمت رجعت لمكاني والكل تركص وتهوس واني صافنه مادري احس نفسي بغابه ومااندل وين اني ماشيه بس اعرف لازم امشي لان التوقف خطر بنص الطريق ...

بعدها دخل محمد وكعد يمي سلم عليه وكتله
وعليكم السلام ...
حتى ما باوعت لشكله ولا دققت بملامحه او لبسه
بس اريد يخلص هاليوم احس راح ينفذ صبري
بأي لحظه ..

جابت خالته علبه الذهب ومديت ايدي ولبسني الحلقه والمحبس وبعدها السوار .. انطتني الحلقه لبستها اله بسرعه وبعدها اجتي بيبي وكالت ...

- محمد اخذ هاي هديتي لبنيتي تراجي اريدك تلبسها
- بيبي حبيبتي ليش كلفتي نفسج
- شلون غير قطعه من كلبي وفرحانه بيج
- ياروحي انتي عسى ربي يديمج الي

وبوستها والدمعه بعيني فرحت بيهه رغم ماتعنيلي
شي هالخطوبه كلها بس مجرد وكفتها وياي وتقديرها الي كدام هالعالم كفيل بأن ينطيني قوه اكمل بي الطريق

تقرب هو عليه ولبسني التراجي وعينه على ركبتي
وصدري .. بعدين وخرت بدون ما اكله شي بس
ابتسامه بسيطه ....

اجتي وحده من خالاته وكالت ..

- اشو ادنى ياعيني خل ناخذلنا شجم صوره ويه العرسان

وهو ادنى عليه كلش وخله ايده وره ظهري وانتجى
على اليده مال القنفه ..

اني على نفس كعدتي وثباتي ماهزني حتى قربه
بس كل الي اريده اني اصعد لغرفتي واسد الباب
عن هالعالم ...

كامت خالته وراحت تركص وهو على نفس قربه
باوعتله وكلت ..

- شنو ما راح تدنى عاجبك تضل هيج قريب

هو رفع حاجبه وكال ..

- اسفين يابه هاهيه ماتكربلج بعد

وادنى لمكانه الاولي خلص كلشي بسرعه بسرعه
وراحو واني ضليت على نفس كعدتي وافر بالحلقه
وتفكيري بعالم بعيد عنهم ...

اجني البنات وكالن كومي نركص تحججت بالكعب
ورجلي توجعني وعفتهن يركصن لوحدهن ..

وبيبي وعماتي ملتهين ويه خوالهم ومسويلهم كعده
خاصه بس الكباريه ...

صار المغرب واني مااكلت غير قطعه الكيك
الي اكلني اياها محمد .. راحن البنات صبوا
الاكل وجابو صينيه مليانه اشكال ..

عفتهم ياكلون وصعدت لغرفتي قفلت الباب وكعدت
على الجربايه بس صافنه ..

كلشي ما بالي بس مداستوعب كل الي ديصير وبرجليه دامشيله ....

فتحت التسريحه وجمعت الماشات بعلبه ونزعت
الذهب حتى الحلقه حطيتهن بعلبه ...

ولبست دشداشه خفيفه واخذت ملابس ونزلت للحمام مسحت المكياج وسبحت .. طلعت كعدت اكلت ويه عماتي وسوالفهن وشقاهن نسني وحدتي شويه ..

لنص الليل راحو كلهم لبيت بيبي واني رجعت لعالمي الي يحتضني بكل هدوء ودفء غرفتي ...

متمدده وافكر بكل الي ديصير واتذكر تعب كلبي
بحب هالرجال الي يصعب عليه حتى كرهه

صوت ايوب وروح ايوب ساكناتني ... مخليني
بكم عمي وصم عن بقيه العالم ...

بس النفس وكرامتهه عزيزه اني المن اتعب واضحي واواجه ويه شخص ماكلف نفسه حتى برده فعل تسوه

ونمت على امل اني انسى باليوم الثاني والي بعده
وبعده واجتي اسابيع وليالي واني بحبه اتغنى واعيش

بعد شهر ونص على الخطوبه ...
امي كالتلي .. محمد باجر جاي هو وامه واخته

- ليش شعدهم جايين

- يالله متفتح عقلها لج يمه غير رجلج وجاي يشوفج
بيهه ليش هالسالفه غيرج وحده تلكيهه اطك اصبعتين مو انتي مثل البومه صايره علينه ليش

- هسه شكو كبرتي الموضوع عبالي عدهم شي
هسه شسويلهم واذا اجوي هلا بيهم

عفتهه ورحت اباوع تلفزيون .. وبوقتهه مسرحيه
عراقيه باديه وكاعدين نضحك عليهه ويه اخواني
وطلع واحد بيهم يحجي بلهجه الانبار ...

واني كلبي كمز من مكانه وصرت ادقق بحجيهم و
احفظه واضحك ويه حجاياته والفظهن بصوت ناصي كأن رجع بيه الدم من اسمع هي لهجه ...

الصبح امي مخبوصه تحضر بالمسواك وتعزل
وتصيح سون هيج وجيبن هيج ...

اني صعدت لبست ثوب نيلي ومطرز باخضر
مثل طول كل الفساتين الي عندي ثلاث ارباع ..

وضفرت شعري صفح ونزلت ...
وامي استلمتني ..

- يحظي يا غبره دحطيلج كحله حطيلج بوطره
حمري هالحلك الاعوج هاذ

- اكلج عيني ياامي ما رايحه لحفله حتى الغمط وجهي عوفيني هيج

- امداااج اي والله ضيعي للرجال طيري من ايدج
وخل يفيدج غرورج وعنادج هذا بعدين ام السان
متصيرلج جاره ضلي يحظي ضلي هيج وشوفي
هالنسوان من يتزوجن يحيرن شيتفنن بنفسهن لازواجهن
وانتي ضلي مدلغمه هيج

- اي اي اضل هيج والميعجبه كيفه ميخصني
لتخليني اصعد واقفل الباب ومانزل لو مو يصير محمد

- اووووي دروحي ناقصتج اني وناقصه بلاويج

عافتني وراحت تشتغل وادردم واني مثل الواحد
وجان ينتظر يطخوه وينفجر .. والدموع تكت
ماوكفت بجي واختي خطيه تحوم فوك راسي
شبيج وشبيج واني بس ابجي لحد ماسمعت
الباب اندكت وطلعو اخواني وابويه يرحبون بيهم

رحت غسلت وعدلت شعري وطلعت بابتسامه
متعبه سلمت عليهم وبوستهن .. مثل كل مره سلام
بارد لمحمد وادير وجهي عنه واروح التهي بأي شي

حطينه الغدا وكملنه وصرنا ننقل بالمواعين وكعدنا
ناكل اني كل مارفع عيني الكاه يباوعلي ادير وجهي عنه واكمل اكل ...

وشلنه السفره وضلن اخته واختي يغسلن المواعين
واني اخذت الجاي قدمتلهم ..
واخذت استكاني وكعدت يم اخويه علي ..

كاعد يرسم واني الون بجهه وهو يرسم بالباقي
وبعدها سمعت صوت امي تصيحلي رفعت راسي

ولكيتهه واكفه يم باب الاستقبال وتباوعلي هذيج النظره
الاكرهه الي تبين بيهه انها تحبني وحنينه وياي

- تعالي ماما ويانه هنا
- هااا ... كلتهه واني بعد بايدي القلم وشفت محمد
ابتسم وعدل شواربه وراح دخل للاستقبال
وامي واكفه تأشرلي بحواجبهه وعيونهه وحلكهه
يفر منا ومنا ..

كمت ورحت يمهه ..

- شكو شعدكم هنا
- تعاي رجلج يريدج
- وشيريد مو ابويه كاعد مايستحي يكعد وياي هنا
- لج لج لتخلين اطلع عن طوري هسه لعد شكو
سموه رجلج يولي دفوتيي مو بطيتي لكلبي

دخلت وهو منتجي على التخم وايده حاطهن على
الجهتين ويتمضحك ...

- واخيراً مرتي زهراء شرفت
- اي

كلتهه ورحت كعدت بعيد عنه وضليت العب باطراف شعري .. هو عدل كعدته وضل يرفع بشعره وبعدين كال ..

- تعاي اكعدي يمي شعندج شارده
- لا هيج زين مرتاحه اني
- اي زين كيفج

كالهه وكام واجه كعد بسدي ..باوعتله واني عاكده حواجبي وكلتله ..
- ليش كمت
- انتي مرتاحه بس انه لا .. ماارتاح اذا مو يمج
- هااا
- تدرين شكد تمنيت هاليوم يجي واكعد واسولف وياج براحتي .. ماريد اضيع ولا لحضه من كعدتي وياج
- امم
-ليش احسج ممرتاحه وياي
- لا ماكو شي
- زهراء تره صرتي مرتي ..شكو متجببه مني هيج ..اذا بالج شي احجيلي بس لاتضلين هيج وياي
-كتلك ماكو شي
- زين ماكو شي ماكو شي ماشي

درت وجهي منه وجان حسيت ايده على ايدي كبل جريت ايدي وخزرته ..
-شبييييج
- شنو هالتصرف هذا؟؟؟؟
- تصرفيش شكو كفرت حلالي انتي شسويت !
- لا تلزمني ماحب هالسوالف
- انتي شسالفتج !!! هاا ؟؟ فهميني شنو مجبوره عليه انتي شبيج !
- مو اني الي انجبر
- جا مدام برضاج عليش هالتجبجب كله !!!
لا تحاجيني ولا تخليني اكضج ولا الج نفس بيه
شلونك ماسمعتهه منج شني تكضين حياتج هيج وياي !!
- لا بس بعدني ممتعوده عليك بس هيج

- افهمج بس هم ليني وياي شويه يعني انه شلون اصلج وانتي مسدده كل البوب بوجهي .. شويه انطيني مجال اتفاهم وياج تعرفي عليه مو ردتي سنتين نطول بخطوبتنه استغليهه اعرفيني بيهه وافهمي اطباعي افهمي عيشتي شغلي افهمي مشاعري شلونهه وياج تقربي اليه خلي يصير بينه حب وتفاهم حتى نعيش مرتاحين ومتفاهمين
- ان شاء الله

ابتسمتله وهو بادلني الابتسامه وبعدين اجتي امه دكت الباب كمت فتحتلهه واجتي كعدت وكالت
- اسمعي حبيبه خاف محمد نسى وماحجالج انه احجيهن لج
- شنو. ؟
- بيت وبينالج جهازه عليج انه مفارغه واسكن السواكه واجهز بي انتي هنايه ماعندج شي اشتري شني اليلزمج بي من الخيط للابره جهزي بكيفج
انه وراي عايله وحلال وزرع يردن حيل واجد عليهن تعذريني
- لاا خاله محشومه ولا يهمج سوالف بسيطه هاي
- اي وشغله الثانيه اريدن اوصيج على اوليدي تحطي بعينج ومايوم تعصينه بحجايه وتدارينه مثل الماي بالصينيه هَيج اريدنه وياج .. تره لو سمعت ضايك خلكه منج بشي ماتلومين الا نفسج ولاتزعلين مني هاذ ولدي اعز عله كليبي منج
- لا حقج هذا ابنج .. ان شاء الله ماقصر وياه بشي
- اهلج كالو يسون جيه علينه هالايام حسبي حساب لبسج وتكبعي عدل هناك زلامنه ماترضى بالمره المعرايه هالشكل

صفنت عليهه وسكتت محجيت شي لان بعد عيب مو مال اردهه بهالحجي ..

وره شويه راحو واني رحت للمطبخ شفت المخضر اشكال بصناديك مكومه هنا وباوعت لابويه شلون كاعد ومرتاح ويشرب بهاللبن
كلت ..
حياه جديده هاي ولازم اكون مسؤوله
عن كل شي بيهه وحتى حجي محمد صحيح
لازم اتعرف عليه واتقبله واستغل هالسنتين ماريد اكسر واذي نفسي ازيد من هيج بعد ..
..
.يتبع

فدووة لكلبج❤️عمري
وتدللون ان شاء الله اسوي😻هالفقرة

#ملوكه

عيوني احتمال هالحبوب مال تحسس او من الحر وهاي اللي بالظهر هم تصير من الحر🤦‍♀💔 او تكون حبوب الشباب

فانتي شتسوين يوميا استعملي ماسك التمن كلش زين ومجرب هالماسك هم يبس الحبوب وهم يقلل من الأثار
فخلي عل ايدج وخل أحد يسويهن عل ظهرج فد 10 دقايق وغسلي
يوميا منا لمن يقلن..وبعد ماتطلعين من الحمام اهم شي رطبي جسمج كله

#ملوكه

طريقة ماسك التمن لتبييض البشرة 💆🏻‍♀💞-

حبايب اللي تستعمل هالماسك كون من تخلين عل وجهج ..خلي همين عل رقبة حته لايصير فرق🌚💔..
واستمرن عليه بشكل يومي..وضروري بعده ماسك ترطيب البشرة✨


#اعـاده_توجيـــہ_لصديقتج
#ملوكه
@stylegrils

حبي كتبي بالبحث كلمة قصة فيطلعلج اشكال وانتي حركي بالسهم🌚🌺

#ملوكه

منا وليجوة اغلب القصص👆🏻😇

حبي مدام من كرايبج وحيل قريبة عليج فتكدرين تفاجئيها وتسويلها سبرايز من كيكة وحلويات وعصاير ونفاخات وترتيل وتصير لمة حلوة 😍💞 وفد هدية نازكة
واكو افكار للهدايا دزيتهن قبل فهسه اوجه

#ملوكه

منا وليجوة أفكار عن الهدايا 😻👆🏻