#شقراء_بغداد

بارت_٧


مشت الايام وايوب كل يوم يوصلني ويوصيني انتبه على نفسي .... وكل الطريق يحجيلي عن عائلته وعن حديثه بالذات خلاني اعيش بكل تفاصيلها واني مشايفتها ...

بعد اسبوع ماصار احد يلحكني من هذوله الجماعه
رجع روتينه طبيعي .... بالكليه كلها عرفت بارتباطنا وكلها تحبنا وتكول انتو متوالمين ..

ماصار يوم وزعلني بي ولا تعدا وياي بالكلام حتى
مايعلي صوته عليه ويشجعني على الكتابه ويجيبلي
كتب اتعلم منها شلون اكتب ....

بيوم من الايام جان هو رايح بمهمه لكربلاء ومناك راح زار الامام فمن اجه الصبح ماخلاني ادخل المحاضره ورحنا لمكانا المعتاد ....

- لو تدرين شلون كلبي مفرفرح عليج
احس روحي طفل ومضيع امه بالسوك والله هيج انا احتاجج واشتاقلج

- اني عندك ووياك بكل وقت لاتخاف

- دحكي شو اشتريتلك

طلع كلادتين بشكل مقود السفينه وحده لونها ابيض
والثانيه زيتوني ... وكلي اختاري .. اختاريت الي
لونها ابيض ...

- هاي. وحده عندج تضل ووحده عندي
مادامنا سوا ضلي لابستها

- اكييد راح تضل غاليه على كلبي

- البسها الج

- لا لا اني البسها

- هههههههه جبانه

- استحي شبيك

- وانا بحبو لمستحاكي

عرفت منه ان حجي اهل حديثه يكون مشابه
للسوري شويه وكالي بصريح العباره يسموها ام الدلع حديثه واغلب ناسها شُكر وعيونهم ملونه وحلوين ..

فدائما اطلب منه مايحجي بلهجه هاي الا كدامي ...
وهو مايعارض طلبي ويضل كل مانكعد سوه يحجيلي بهاي اللهجه ...

بعد اسبوع بدت امتحانات نصف السنه ... والمواد صعبه فابتعدنا شويه وصار كل وقتنا بالدراسه .....

كل يوم امتحان الصبح نوكف اني وياه ويراجعلي
ويشرحلي كم سؤال او فكره ماخذهه من ولد الاقسام الداخليه الي بالمرحله الثالثه ويفهمني عليهه هو واكف ويحط الورقه على الحايط ويشرح واني احاول اركز وياه بس قربي منه ولون خدوده وشفايفه تصير ورديه كلش بالبرد تشتت تفكيري ....

عدت الامتحانات بخير صح صعبه المواد بس تعبنه بدراستها ... هو باخر يوم يوصيني انتبه على نفسي ويحجيلي قصايد بدويه ماكدرت احفظهن لان صعبه عليه كلماتهن ... وهو من يكملهه يفهمني ليش وشلون نحجت هالقصيده وبيا موقف ....

اتفقنا على ان نصير نتواصل بالرسايل واتفقنا كل ٣ ايام نتبادل الرسايل ويكون المكان هو عند سندانه الورد الي بابنه ....

طوال الفتره هاي امي شاده وياي من دون الكل
اني مااشكيهه لابويه انقهر عليه لان ماعايزه مشاكل هو تعبان ومريض فاني اردهه واتعارك وياهه

اخويه مصطفى وعلي كل وقتهم بالطوبه ودعاء بيت جيرانه تكضي العصريه وتسهر مرات يمهم ... همه ناس كلش خلوقين ولدهم دُره مالهم شغل بالرايح والجاي ....
بناتهم بكصتهه وتضل يمهن تلعب ويشوفن كارتون سوه وابويه مايحجي شي لان يعرف بيهم ناس طيبين ..

اني عندي صديقه من الابتدائيه وياي بس اخوه بطلهه من خلصنه ثالث وضلت كاعده بالبيت تنتظر زواجهه حتى تخلص من محكوميه اخوها ....

كل فتره امر عليهه نكعد نسولف ونتغدا سوا هي بنفس منطقتنه فمره اني راجعه من بيتهم ودخلت بفرعنا .. احنه فرعنه صاير عريض شويه لان بالبدايه قريب الشارع ...

شفت سياره البيكم طابكه بابنه كملت طريقي وصلت يم الباب سمعت صوت ورايه انداريت لكيت محمد واكف وشايل بيده صندوك رمان ... اني جمدت بمكاني بس فاتحه حلكي وواكفه ...

- شلونج زهراء ماشاء الله كبرانه

- شششجاابك هنا

- هو هيج يسلمون شنو شجابني غير مرتي واجيت
اسلم عليها وياي اهلي لا تخافين ماجاي وحدي

هو كال هيج واني احس واحد وخنكني بلكوه صرت اتنفس يعني هذا بعده يريدني مرته لعد وبابا مو كلي انسي واني احل السالفه !!

فتحت الباب ووكفت على صفحه وهو دخل حط الصندوك وراح كعد يمهم بالهول ... اني ضليت
بنفس وكفتي اتنفس قوي اريد اهدء ... وبعدين كلت
اني ابويه وياي مايخذلني ويجبرني ان رفضت هو
مستحيل يجبرني ويزوجني الهم ....

قويت نفسي وكلت خلي اكرهم بيه ... اني بوقتها لابسه فستان قصير لحد الركبه لونه ماروني وجواه كالون اسود وشعري فاتحته بس شايله خصله صفح بماشه

رحت سلمت على امه وخالته السعلوه كل مره تجي
واخته صغيره وابوه ... شفتهن رجعن يبسبسن كلت والله اله اطلع حركتي بيجن دصبرلي وكمت رحت بدلت

لبست ستريج نيلي وبلوز على الحافه وردي عريض ومدنفش ورتبت شعري ورفعت الردانات شويه واخذت روايتي باقيلي بوقتهه خمسه وعشرين صفحه وتخلص

اخذتهه ونزلت اطكطك بشحاطتي ولا اهتميتلهم اخذت كرسي من المطبخ وحطيته بالطارمه الي صايره بنص البيت

وكعدت وحطيت رجل على رجل واقرا وكل شويه
اكلب بشعري منا ومنا وهو شلونه عيني يخبل واني فاتحته والعب باطرافه بايد والثانيه لازمه بيهه الكتاب

اجتي عليه امي كالت ...

- كومي حطينه الغدا خاتون

- شكرا سبقتكم تغديت يم صديقتي

- دكومي عيب العالم كاعدين وكل شويه سالين عليج

- ليش شعدهم ويايه اعرفهم يعرفوني شعندي كاعده يمكم انتو سوالفكم على كدكم اني مالي مكان بينكم

- انزول عليج من لسان

راحت وهي ادردم عليه وحدهه اني منطيتهم الاذن الطرشه وضاله اقرا ... اجتي اخته الصغيره اسمها
بنين وكفت يمي وتباوع بالكتاب ...

- ليش تقرين شنو عندج امتحان

- هههه لا لا هذا الكتاب مو مال امتحان هذا قصه
وكاعد اقراهه

- اني ماحب اقرا ماعرف اقرا زين

- لااا سهله القرايه وحلوه كلش انتي بيا صف

- اني بالثاني وانتي ياصف

- اني هم بالثاني بس كليه ان شاء هم فد يوم تكبرين وتصيرين بالكليه مثلي

- الله واصير حلوه مثلج بس ماريد اقرا قصه مثلج

- ههههههههههههه لااا لاا بكيفج ترا تقرين الكليه
مالهه دخل بالقصه هي هم مدرسه بس مال كبار

بهالاثناء بابا صاحني ودخلت عليهم وبايدي الكتاب
وبعدهه الضحكه بوجهي

- هاا بابا

- تعالي باباتي اكعدي هنا يم خالاتج شويه يسالون عليج

- اي بابا تدلل ..... كعدت يمهن وانداريت عليهن

- اييي شلونكم ان شاء الله مرتاحين بالكعده عدنا
كلتها ورفعت شعري ورجعته ليوره وانتبهت عين
محمد عليه كلت فرصه واجتي ليش اضيعهه اله
اليوم اخبلهم ....

الخاله : اكلج عيني هاي انتي منين جايبته للملزوك
هااذ
وتأشر على الستريج ..

- اخذتلياه بيبي عجبج الستريج !!

- شنييي

- اااه اعذريني شويه حرف الراء مايضبط عندي
اسمه سترريج

كلتها بمياعه وهذاك عينه عليه وابوه هم مركز عليه وبابا طلع من يمهم هو وامي مدري شيسولفون

فاني استغليتهه وصرت اتموع بحجيي واعلي صوتي
حتى يسمع محمد وابوه ... ادري بيهم يتخبلون من هيج بنات واني اريد اخبلهم .....

الام : اكول يمه محمد صيدتك معوجه حلك

- هههههههه هااي شنو خاله معقول محمد يصطاد شي معيوب

- يمه اني راضي بصيدتي

الام : اييي خلي نشوف نصيبك تاكلها لو لا

من سمعتها هيج كلت دصبريلي واخليج انتي الي تتوسلين بيه ابعد عن ابنج ....

كمت من مكاني وافتر بالهول بطولي الناعم الحليو
بالستريج وابوه يلعب بشواربو ويباوع وكفت يم
المعرض مالتنه وسويت نفسي ادور على شغله
هو جذب ماعندي شي بس اريد احرك كلبهن لان
هنه يحسبني وحده بنت شوارع من لبسي فكلت خلي يشوفن بنت الشوارع عدل ....

اجه باب جان صحت عليه واني بعدني فاتحه الباب
مال المعرض ...

- بابا عفيه ممكن تنطيني هذيج العلبه مداكدر الوحهه

- اي بابا ادللي .. وهاااي العلبه لبنيتي الكصيرونه

- حضنته وكتله بغنج ... بااابااا لاتكول عليه كصيرونه

هو ضحك ومسح على شعري وراح كعد يم ابوهم
وهنه صافنات عبالك ديشوفن فلم ومحمد وجهه احمررر

اجتي امي من بعد ماخلصت المواعين وكعدت يمنه
ودعاء اخذت بنين وصعدن يلعبن ...

الام : هاا ام زهراء وين رحتي فكدناج
- عيوني والله غسلت المواعين واجيتكم
- وليش ما البنوات يساعدنج كله عليج

باوعت عليه اني لعب باطراف شعري وكتلهه هاا

- ليش متغسلين المواعين بدل امج مو خطيه هي تشتغل وانتي كاعده تدلعين

- بابا مانعني من غسلهن واي شي يتعلق بالتايت
مايقبل اتقربله لان ايدي تتحسس منه وهو يخاف عليه

حجيته وابتسمتلهه ورجعت فتحت كتابي ومادرتلهه
بال وسمعت الخاله المصونه تكول ..

- لج ام محمد هاي مصيبه اذا اطببيهه بيتج اسمعي
مني ولاتناسبين هالعايله مشفتيهم شلون لامستحه
لاادب يتحاضنون بنصنه ويتمايعون هي وابوهه

-غير هالولد السباني بيهه دسكتي هسه بعدين نتفاهم

ضحكت بهدوء وعيني بكتابي بابا كلي سويلنه جاي
اني كمت رحت للمطبخ وكتابي بايدي ماذبيته ..

حطيت القوري على النار ودااحضر بالاستكاين
وفات عليه محمد وخالته ...

- هاا محتاجين شي

محمد - اريد احاجيج

- اي كول اسمعك ... احاجي واني اغسل بالاستكاين
بس اخضهم بالمي واحطهم ..

- عوفي الزفت الي بايدج واسمعيني

- اني كتلك اسمعك رجاءا بلا الفاظ سيئه احجي شتريد

الخاله : كررره عينك يامحمد هه

- خاااله اطلعي على جهه بله خلي اتفاهم وياهه

راحت هي باب المطبخ وكفت وتهز بايدهه معاجبهه
الوضع عيني ... وهذا واكف وصاك سنونه ويحجي

- انتي شهالصلافه العندج متكولين رياجيل كاعدين
تفرفرين وزرورج مبينه وضحكتج شعلوها

- ايي

- وبعدين انتييي شلوون تطلعين لوحدج بالشارع مدري وين تسيبين ولا عبالج سالفه الكليه ماداري بيهه لبسج هذا اذا متغيري اشككه عليج

- هههههههه لااا والله وبصفتك منووووو جاي تحاسبني هااا كلي انته ابويه لا اخويه هم لا منو انته رجلي اكيييد لااااا انته مجرد اقاربي ميخصك اذا اني البس اطلع احجي مااااعليييييك مفهوووم

- لججججججججج جااااا والفاتحه القريناهه هااااا هاااا مو سنييييين انيييي انتظر بيج هاااي مو بعييينج

- خلي نصحح الامور محمد انتو قريتو فاتحه قبل ٤ سنوات مااشي واني وبابا متفاهمين وهو يعرف اني رافضه الزواج هذا وشغله الانتظاار اني ماجبرتك

- هي هييي هييييييييي شنو رافضه شنوو بابا شبييج انتي شو طولان لسانج هاي الكليه هيج اطول السان

- والله عيني ماطولان لساني انته اسئت الفهم واني
وضحتلك وخلي يكون بعلمك مره الثانيه ان ادخلت بحياتي ولبسي واي شي يخصني كل كلمه حجيتها اروح احجيها لبابا وخلي هو يتفاهم وياك

- اصبريلي بس اصبريييلييي تهدددين مووو بسييطه اشوفج محمد منو

- وخر عن طريقي خلي اودي الجاي

عفته يفرك بوجهه وراح غسل وخالته واكفه وتضحك عليه وهو صاح عليهه ورجعو كعدو ...

اني قدمتلهم الجاي وصلت عنده ماراد عفته ورحت رجعت الصينيه بالمطبخ واخذت كتابي ورجعت يمهم وعيني بالكتاب اندمجت بي لان اني كلش احب هالروايه " مابين القصرين " لنجيب محفوظ وماباقي كم صفحه وتخلص فكلش مندمجه بيهه عفت امي وامه يحجون حتى ماصرت اسمعهن وبالي كله على الروايه كأني عايشه وياهم واضحكوحدي ويه الكلام واعبس وياهم بغير عالم رحت

ماحسيت الا على امي ادغني رفعت عيني عليهه
وشفتهن واكفات ولابسات عباياتهن ويباوعلي بنطره استحقار .. فرحت الصراحه هيج اريدهن يفكرن بيه

- ااه راح تروحون بعده الوقت مو متاخر

الام : لا حبيبه الوققققت مشىى وانتي ماتدرين

- اييي صحيح اني مادري على شي بعد من اقرا روايتي هاي كوولش احبهه يله المهم توصلون بسلامه

بوسته بالهوا وكلبي اكول دروحو مو خنكتوني
والخاله راحت كبل متريد تسلم بعد احسن خففت عليه حملهه ... ومحمد ماشفته اصلا شوكت طلع ....

راحو همه اني تمددت ورافعه رجليه على القنفه وبايدي الكتاب واجتي امي ادري بيهه تريد تنفجر وحان وقتهه

- يالمحنايه عيني كومي لمي الاستكاين

- اي مو مشكله هسه المهن .. كمت لميتهن وغسلتهن
ورجعت تمددت بنفس مكاني وهم رفعت رجلي

- انتي شنو من بنيه من تشوفين ناس كاعده اذب هالكتاب
واحاجيهم انتبه وياهم عيييب هيج عييييب هالكتب متعلمج الاصول لو بس تعلمج طول اللسان

- هسه اني مطوله لساني عليج

- اكصه الج عاايز والله

- لعد خلص من اطول لساني عليج عود احجي ورزليني هسه عوفيني خلي اقرا

- وانتي شكو هيج تحاجين الولد مو عيب ميكول عليج ممربايه وماعدهه اخلاق تلاسنين الرجال

-هااااا اشوف الاخبار بسرعه وصلتج هاي خالته السعلوه حجتلج مو

- يااا صخاام تكول عليهه سعلوه لج المره شسوتلج وكارهته فوك شينه كوه عينه

- والله عيني شوفي اكلج لا انتي ولا هي ولا ابنهم
تهموني لو بكد شعره شايفه شعره شنو هيج انتو متهموني وابنهم من يطاول وياي بالحجي اطاول عليه لو محترمني مااحاجيه ماااشي فلضلين تحجين وانتي مفاهمه شي

- وينه ابوج خلي يجي يشوف لسانج المترين هذا
وينننننه

راحت صاحت ابويه نزل وهو يافف دخل عليه اني
كعدت وكتله ...

- بابا عفيه كللهه خلي تعوفني يعني اني شمسويتلها
اطلع عصبيتها بيه يعني كاعده اقرا وممسويتلكم شي

- اييي تمسكني كدامه تمسكني وقبل شويه لسانج
شطوله شفت شلون اليوم ماحترمتهم وضلت مكابله
هالكتاب وممعبرتهم مو عيب شيكولون علينه

- انتي معليج بيهه بنتي حره تكعد وتسولف باليعجبها وبعدين هي ماتعرفهن شتسولف وياهن يعني واذا تقرا اني اشجعهه تقرا احسن ماتقضي وقتها بالسوالف مالها معنى بنتي تعرف قيمه وقتها

- اي بابا يعني هنه سوالفهن مو بعمري وبس ينتقدن بيه فاني كلت اتجنبهم حتى لا يضوجوني ولا اضوجهم وروايتي مابقالهه شي وتخلص وضليت منتبهه بيهه ماشوف اني ضريتهم مو صح ؟؟

- اي بنتي صح ماعليج بيهم كملي قرايتج اني اريد
انام ماريد صوت بعد

راح بابا صعد واني ابتسمتلهه بنصر وهي طلعت
من الهول بعصبيه رجعت تمددت على بطني واضحك
على السويته بيهم يستاهلون والله اكرهم ...

وبهاللحضه تذكرت ايوب واليوم المفروض نتراسل لان صار ٣ ايام من اخر مره شفته بيهه كمزت من مكاني وركضت حتى افتح الباب واجه اخويه مصطفى ورافع حواجبه بمعنى شعندج ...

- هاا اجيت من اللعبه

- ايي شعندج هنا

- ااااا هو دكو الباب واجيت اشوف منو بس هيج

- ماكو احد روحي حطيلي غدا جوعان

رحت للمطبخ وحميت الاكل وصبيتله ووديتله الصينيه ورحت لغرفتي وكل شويه اباوع من الشباك خاف يجي

صارت الساعه عشره بالليل كلها نامت واني بالي يمه بغرفتي كاعده وسمعت صوت على الشباك كمت من فراشي فتحت البرده وشفت ايوب واكف ويفرك بايده وينفخ بيهن من البرد .... باوعتله واشرتله

حط ايده بجيوبه وضل يضحك واشرلي انزل رحت فتحت الباب بهدوء ونزلت واني اتلفت خاف احد يشوفني .... وركضت وطلعت فتحت باب الشارع

وشفته وهو قريب يمي كلبي يريد يطلع من مكانه وضحكتي ماليه وجهي تقرب وحط الظرف بايدي
وضحكلي وراح ...

من كثر لهفتي عليه ماعرفت احجي شي سديت الباب ودخلت بالاستقبال فتحت الضوا وكعدت فتحت الظرف وقريت المكتوب ....

⭐️⭐️
حسناء يا ظل الربيع، مللت أشباح الشتاء سوداً تطل من النوافذ كلما عبس المساء
حسناء.. ما جدوى شبابي إن تقضى بالشقاء عيناك.. يا للكوكبين الحالمين بلا انتهاء لولاهما ما كنت أعلم أن أضواء الرجاء سوداء ساجية.. وأن النور من صنع النساء هي نظرة من مقلتيك وبسمة تعد اللقاء ويضيء يومي عن غدي، وتفر أشباح الشتاء

عيناك.. أم ليلًُ ينام على وسائد من ظلال ساج تلثم بالسكون فلا حفيف ولا انثيال إلا صدى واه يسيل على قياثر في الخيال إني أحس الذكريات تلفيها بالظلال .. في مقلتيك مَدى تذوب عليه أحلام طوال، وغفا الزمان.. فلا صباح ..ولا مساء ولا زوال! أني أضيع مع الضباب سوى بقايا من سؤال: عيناك.. أم ليلًُ ينام على وسائد من ظلال!
اشتقت لكِ يا وردتي .. سأذهب بمهمه لاربع ايام
في البصره .. وددتُ منك القبول لإكمال ديني معك ..
واخيراً اهتمي بنفسك جيداً .

حبيبك المخلص
ايوب ..

⭐️⭐️

قريتها بكل لهفه وفرح رحت صعدت طلعت اوراقي الي بلون بني مصفر وقلمي الاسود وضليت احرك بالقلم واني افكر ... ياترى هو يشعر بكل هاي الاضطرابات الي بيه ؟؟؟؟..

صار ذهني مشوش واعتلت رجفه بارجاء صدري
ومحيط مخيلتي ... رفعت راسي للسماء وكلت ..

ربي رحماك اغثني ربي رحماك قوي قلبي ...
فقلبي الضعيف يحتاج لقوه منك ...

رجعت اباوع للورقه والقلم وكتبت ....
⭐️⭐️
سيدي العزيز ايوب ..بعد التحيه ...

اريد ان اقول شي ربما تجهله او انك لم تفكر به
فانا بصفتي انثى مثل باقي النساء في بلاد الشرق
الفظ بعد ابي نعم نعم الفظها كالببغاء ...
وبصفتي بنت جميله حسناء لابد ان اكون داخل
قلبك ياقوتهً حمراء ... هذا هو قلبي نقياً صافياً
كالماء ... لابد ان اكون في عينيك الجميله نجمهً
في السماء .....

هل تراك سيدي داءاً لكل دواء !!
ام هل تراك رجل الوفاء !!
انا عنك لن اسئل كي ادع قلبي يتعرف
عليك فقلبي الصغير يعرف اشياء كبيره ...
رغم ان الحب اكبر .. واعرف ان ذات الله العظمى
تسكن قلوب العشاق ... والشمس ياسيدي تخرج
من ارواح العشاق في الشتاء تدفىء يدينا الباردتين .. عن قلبي فلا تسأل فأنت مالكه واعلم بمملوكك مني ..
واخيراً اود ياسيدي ان تكتب لي كثيرا ً...
فكلامك يزرع في قلبي الامان

كن بخير دوماً وعُد بسلامه لي ....
زهراء

⭐️⭐️

حطيتها بظرف وعطرتها ورحت حطيتها بالمكان
المتفقين عليه .. ورسالته ضميتها بكنتوري ...

مرت الايام وكل وقتي اقضي بالكتابه او اكمل قراءه كم كتاب عندي ... وبهالفتره امي صارت حبابه وياي

تغيرت جذرياً صارت تطلع تشتريلي ملابس واحذيه ومرات تجي تكعد تسولف وياي وتعتذر على اشياء قبل ..مااطمئنيت لهالتغيير بس كذبت ظنوني ..

رحت يومين لبيت بيبي احلى اوقاتي هي من اكون
يمها احبها اكثر من اهلي ... هي اطير من الفرح
بجيتي يمها وتحير شتشريلي والاكل اله تخلي
بطني تنتفخ يله تعوفني ... والليل يكضي بقصصها
وسوالف عماتي مرات ...

احنه عائله بطبعها بسيطه بكل شي وبنفس الوقت عزيزين نفس ... حاله الماديه وسط بس الي يشوفنا
يكول اغنى الناس لان بيبي وعماتي وابويه طبعهم
كريم لدرجه ان الضيف مايطلع من البيت الا وياه
هدايا لكل عائلته نفر نفر الكبار والصغار ...

واحيان يجون اقارب بيبي يباتون اسبوع او اكثر
وبهالاسبوع بيبي تجيبلهم كل الي بالسوك وتاخذهم
زيارات ببغداد ... ومتنقص عليهم شي ..

فكل العشيره والجيران يحبوها ويحمدون بيها وبابويه بس عمي عنده نوع من البخل كلش حريص بفلوسه ويكلب الدنيا على الفلس عكس بابا ... الي هو يروح ينطي للناس والي يسمع بي مريض يجيبه بيتنه وياخذه بايده للدكتور ومايرجعه لبيته الا وهو زين وكل هذا من فلوسه ماياخذ شي منهم ....
وعمي الثاني الصغير هذا ماله دخل باحد كل همه عائلته وصيته يحب يبني عالمه الخاص .. ابد ميدوخ نفسه بمشاكل العائله وحجيهه عايش حياته وحده ..
اني واخواني طالعين على بيبي بالشكل والتصرفات والطيبه .. لان احنه ماشفنا امنا هواي كل وقتها بالدوام او زعلانه بيت اهلها هاي ذكرياتي منها ...

اولاد عمي عكسنا طالعين على امهم عناد وشويه
مرات يصيرون حبابين من مايسمعون
كلام امهم ....

اما عماتي فكلهن جمال وطيبه وسبعات كلش ماينغلبن عيبهن الوحيد مهووسات بالنظافه لدرجه ....

بابا انسان مثقف لدرجه معلمنه على الاحترام لنفسنا والاخرين واهم شي الكرامه .. هو بنه ثقتنا بنفسنا على حجر اساس هو ...

الله خلقك لسبب مو عبث فلازم تكون مسؤول حتى
تحقق سبب خلقك وتخلي وجودك نافع للارض
الي منها ترتزق ....

هذا كلامه خله بيه حلم وهو اني لازم الكه ذاتي واحقق شي يخلني اخلد بالدنيا بعد فنائي ....

بابا يكول من نتناقش بامورنا المستقبليه للدراسه ...

"شتريد اتصير صير بس صير آدمي "

بالبدايه كنت اضحك على هالحجايه ومن كبرت عرفت شكد معناها عميق .... صح لازم الانسان ماينغر بالدنيا ويتصرف بحيونه لاجل غايته .. مالازم تكون حياتنه غابه وصراع لاجل البقاء لازم تكون تعاون لاجل الرضى ....

بهذا اليوم بديت بكتاب اسمه ..
" تحف العقول لآل الرسول "

كان عباره عن اقوال تجذب العقل للتفكر والتفكير
من بينها قريت عن الامام علي عليه السلام ...

" يأتي زمان عليكم ترون مافي الشرق والغرب في
ايديكم... "

وكان اكو جدل عليها حتى اني انتابني الفضول شلون
يصير الشرق والغرب بايدي؟؟؟؟

بس ماشكيت بالقول لان الامام علي اكبر من ان ينشك بكلامه ... بس بقى بنفسي اشوف هالزمن الي ذكره شوكت يصير !!!

للمغرب واندكت الباب طلع بابا يشوف منو وصاحني
-ها بابا
- بنتي هاي البنيه تريدج تعالي شوفيهه

طلعت وشفتهه بنيه صغيرونه شعرها قصير ومسويه كرون وقمصلتها منفوخه مسمنتها ...

- هاا حبيبتي كولي
- دنكي دنكي

نزلت لمستواها وشاورتني ...

- هذا عمو ايوب كلي تروحين لزهراء تنطيها هاي العلاكه وتبوسيها

باستني وضحكت لها ورجعت بستها مرتين

- هههه هو وينه هسه ؟؟

- بالسياره هناااك هو وبابا

مديت راسي من الباب واشوف سياره طابكه براس الفرع ...
- يااا هذا تخبل اكيد شلون جاي هو وابوج
زين تعالي وياي جوه حتى انطيج رساله ترجعيهه اله ..

دخلنه للبيت وكعدتهه بالهول وانطيتهه كليجه وعصير كعدت تاكل واني فتحت العلاكه ...

لكيت بيها كتاب وسوار ناعم ذهبي وظرف فتحته ..
وقريت المكتوب .....
⭐️⭐️
الى مالكه قلبي واميره حياتي ...

بعد ان قرأت مكتوبك وتمعنت بافكارك المطروحه اقررت بإنك من كنت انتظر طيله اعوامي الماضيه زدتني شرفاً وعزاً باختياري لحبك المجنون ولاتخافي واطمئني انتِ ياقوتتي وابنتي وامي وامرأتي ... انا لوالدك طائع ولقرراه سامع ولكِ حامي ولعفتكِ وشرفكِ انا صائن
انا ياانستي ابن الغربيه لايوجد بتربيتي جزء
اهوج للتلاعب بالنساء فكيف
ان كانت اميره النساء !!!!
انتِ لي وطناً وملاذ آمن وانا لست محتل
كونِ لي حياه وامان فانا مغترب وانتِ
مسكني الوحيد بكِ انا ارى الحياه ولن اعدم
حياتي باذيتك ..اسكني بي وكونِ على
يقين بإن غير الموت لن افارقك ..
كونِ بخير دوماً وتذكريني وانتِ
تقرأي هذا الكتاب .. هذا السوار
جلبته لكِ من البصره احتفظي به
واعلمي بأنني مشتاق لكِ للحد
الذي لا يطاق.. احبكِ اكثر من كل كثير

حبيبك المخلص
ايوب
⭐️⭐️

بعد ماقريت المكتوب صعدت لغرفتي حتى اكتبله .. كالعاده اوراقي وقلمي الاسود ...

الي اختلف اني ماحبيت ابين كل هالشعور المكتظ
بداخلي بحبه دائماً متحفظه بمشاعري تجاهه رغم
انها معلنه بالحب بس مو بقول لساني ..

فكتبتله ...
⭐️⭐️
انيق المشاعر وكنزي الاوحد ايوب..
اعتليت فكري دوماً بعذب فكرك واخلاصك وكثره شهامتك .... شكراً لكل مافعلته لي ..شكراً لهداياك
المميزه دوما .. يسعدني انك بخير وان الراحه متجليه بحروفك مرهفه الاحساس ... اتمنى ان تكون قد اتممت مهمتك من دون ازعاج او تعب ... انتبه لِخُطاك وتذكر انك وديعتي عند الله فلا تجعل عملك يشوه حقيقه الملاك الذي استودعته الرحمن كن دوماً كما علمتني ان تكون عليه صادق ومثابر وامين ومحب رغم الاذى ... واخيراً وطنك يستأنس بمكاتيبك وبشوقك فداوم على اسعاده ..

ملاذك الامن دوماً
زهراء
⭐️⭐️
حطيتها بالظرف وعطرتها ونزلت ضامتهه بملابسي ومن وصلت للبنيه انطيتها الهه وضمتها بقمصلتهه واخذت ورده من السنادين الي عدنا وفهمتها تنطيها الهه

صار الليل وعقلي ماترك ثانيه بدون مايفكر بي ...
كمت طلعت الكتاب الي جابلياه وكعدت اقرا ...
حسيت على الساعه ١ بالليل اول مره اسهر هيج على كتاب يمكن حبيته اكثر لانه منه فمااحس بالوقت من يمشي ... نمت واني بداخلي فرحه وكأن كل خلاياي ترقص بانغام الحماس والرضا ....

مرت الايام وبقى على الدوام ٦ ايام بهالاثناء اني
طالعه يم صديقتي لانها جيرانه فشوكت مااضوج
اروح يمها ... اندكت الباب ورجعت صديقتي تكلي
اخوج بالباب يريدج ترجعين وياه ...

اني هم سلمت عليهم وطلعت شفت مصطفى واكف
يم العمود ينتظرني مشيت اله ...

- هااااا شعجب جاي عليه هالمره
-اجونه خطار وامي كالت تجي تساعدني
- منو اجه ؟؟
-اهل العرب
- هاااا

مشينه واني ادعي كون محمد وخالته مو وياهم ...
وصلت البيت ودخلنا سمعت صوت بيبي هنا
راساً دخلت للاستقبال ورحت سلمت عليهه وبعدين
سلمت على النسوان جانن اربعه ورجولتهن هم
ومحمد اكيد مايفوت الكعده هاي بس خالته ماكو
والبقيه ماعرفت غير امه وابوه منهم .....

جيت كعدت يم بيبي ...
- بيبي منو هذني ماعرفهن
- هاي مرت عمه جاسم ضويه ومرت عمه جبار سناء وهذيج خالته هديه وامه
- هااا وهو شكو جاي
- دسكتي لا يسمعنج يمعزايه
- اوووف هاهيه سكتت اني رايحه اشوف شيحتاجون بالمطبخ

رحت غسلت ورفعت شعري لان جنت فاتحته وماغيرت ملابسي عناد بيهم ... كعدت صبيت الاكل وحضرت زلاطه واخواني ينقلون للسفره ...

سوينه سفرتين للزلم والنسوان هيج طبعهم همه مياكلون سوه مادري من شنو يستحون وهمه خوال وعمام

كعدت اكل وبالي مو يمهن ابد يحاجني اجاوبهن
مايحجن اني ساكته واكل .... كملنا اكل لميت السفره وبالمطبخ دعاء اختي تغسل مواعين ...

اني رجعت رتبت الهول ورحت داعزل بالمطبخ
صاحتني امي ...

- تعالي ماما حبيبتي عوفي المطبخ اختج تكمله

رفعت حاجبي وباوعت على دعاء وفاتحه حلكي
هاي منو الي دتحجي لو اني سمعي كام يخربط !!!
خلي نشوف تالي هالمسرحيه .... رحت كعدت يمهم واتصنع ابتسامتي وياهن ...

خالته هديه مره جبيره كصتني كص بعيونهه واني
دااظفر شعري صفح وهي تباوعلي ...

- اكول يبنيتي انتي ياصف
- خاله اني كليه مرحله ثانيه
- هاااا زين زين هوجست من شفتج هالكداتج كلت
ماتنفع اتزوج
- ههههههههه اي خاله بعد وقت للزواج

اباوع لامه تلوف بحلكهه وتتمضحك من جوه لجوه
اني مااخذ وانطي وياهم بالحجي لان ماارتاحلهم
مو تكبر مني بالعكس كلش متواضعه اني بس هذوله مو مال ينطون عين
اجتي بيبي كعدت يمنه وكالت ...

- اكلج بيبي حبيبه هذني خالاتج وعماتج ورجولتهن جايين خطابه عليج

بهاللحظه اني صفنت بوجه بيبي وكلبي رجف رجفه موت ...

- والولد شاريج وصارله سنتين يبني بيت بالولايه
حتى ياخذج يكول ادري بيهه ماتكدر على العيشه
هناك وهسه عمامه حاجو ابوج وحاجوني واني
هذول خوالي واثق بيهم واعرف طينتهم والقريب
اولى من الغريب

- بيبي ارجوج ارجوووج لاتكملين

- يابيبي دسمعيني هسه انتي ليش هالشكل قافله
الولد صارله سنين ينتظر نكله هسه روح بنتنه متريدك

- بيبي الولد على راسي اصيل وشهم وصاحب كلمه والف من تتمناه بس اني لا مو رفضي هو رفضي الزواج هسه ماريد

ام محمد - ليش ييمه البكدج مو خلفن تردين تعنسين هنا بيت اهلج البنيه مصيرهه بيت رجلهه هيه خطار عد اهلهه

- خاله هو...

بيبي - هسه كومي شوفي ابوج وحاجي هو كال خلي تجيني للمطبخ وتفاهمي وياه

كمت وكلبي بعده بنفس هالرجفه .... رحت وشويه
واجه بابا وامي هم ...

- بنتي هسه والله حطوني بموقف صعب جايبين
حتى السند مال البيت ويكلولي صار سنتين ابنه
يبني بي لبنتك ... وخوالي هذوله حاير والله حاير
شردهم

- ابو زهراء عيني ليش تحير وين نلكه هيج ولد
شاري بنتنه من سنين وهو مشايف ظفرها غير يعني رايدها ويحبها وهاي كم مره جونا من الباب ومحملين اشكاال فشله نردهم وهمه مابيهم عيب

- وهي شلون اذا ماتريد قابل اجبرها المشكله همه
لازمين عليه اني انطيتهم كلمه ذيج السنين لان بوقتها احرجوني مثل هسه وكلت يكبرون ويصير الي بي خير بس الظاهر قراري خاطىء اتخذته

اباوعلهم واسمعهم وكأني مااسمع ...رغم كل الحجي والحجج الاكدر احجيهه هسه ضليت ساكته كأن لساني توقف عن النطق ... رجع بابا كال ...

- راح اكللهم نردلهم خبر لاتخافين بنتي ولاتهتمين

- ابو زهراء عليمن المطاله اخصم السالفه هسه
شلون يضلون كل يوميه رايحين راجعين

- اي بابا كللهم ينطونا وقت نفكر بحل

عفتهم ورحت صعدت لغرفتي وقفلت الباب وارتاجيت على الكنتور واني محاوطه ايدي على رجليه ولامتهم لصدري والعبره خانكتني لاول مره احس بضعف

لاول مره اسمع صوت انكسار داخلي ...
شنو الاحجي ويه نفسي مادري .. شلون اتصرف
معقول اصير زوجته !!!!!

وايوب وحبه وين يصفى بي الدهر ؟؟؟؟؟

معقول اني اعرض ابويه لموقف حرج مثل هذا بعنادي وادري انه خجلان منهم ومالاكي حل يردهم بلطف واذا عاند مثلي رتح يخسر قرابتهم ...

والحل شلووون ؟؟؟؟؟؟؟

الهي اختر لي ولاتخيرني ... ضليت اردد هالدعاء
وجسمي كله يرجف خوف وقلق وضعف ....

حتى ايوباذا ردت اكله رادلي انتظر ٣ ايام
وشلون احجيله وهو حاط كل امله بيه واحلامي
وياه واماني معقول اضيعهن لاجلهم !!!!!

مر اليوم كله واني بغرفتي مطلعت لليل وصعدلي
بابا فتحت الباب وكعد بصفي ..

- خير بنتي شبيج

- بابا ماريد اخاف منهم

- لااا انتي بنتي السباعيه تخافين لا لا ممقبوله منج
ابد .. و ترا الولد طيب وخلوق واني بنفسي
كعدت وحجيت وياه كلتلهم اني ماريد شي اريد
اسمع منه هو وكعدت حاجيته على جهه والولد
فاهم وكلي مثل تبقى بهالدلال واني لو ما شاريهه
ماانتظر هالسنين كلهه جان هسه ابني يمشي لو مزوج بنتي اني ماجاي اقنعج اني بس اريد اوصلج الصار والقرار قرارج انتي واني وياج بكل شي تريدي فكري على راحتج كلتلهم اسبوع ونردلكم خبر

- ماشي بابا

حط ايده على جتفي وضغط عليه وطلع ... واني
ضليت بحيرتي تايهه ... بس اريد طريقه اوصلها
لايوب بلكي يلكالي حل ...

مر يومين على جيتهم واني بحيرتي باقيه وادعي
ان ربي يخليلي امل يخلصني من هالزواج المدبر

كتبت لايوب كلشي صار وحطيت الظرف بالمكان
المعتاد وضليت انتظر اليوم كله .. ومر العصر
والمغرب واجه الليل وايوب ماكو واني عيني على
الشباك اليوم كله ومابين ...

متمدده بفراشي وسمعت صوت سياره طبكت
فتحت الشباك بس الضوا قوي ماميزت شي
ضليت اباوع لحد ما شفت ايوب واكف وبيده
الرساله ... هنا كلبي ارتاح ورد بيه الدم بعد
ماايست بس ربي رحيم ماينسى عبده ...

شفته ضرب ايده بالحايط ورفع راسه يباوعلي
اني فتحت الشباك وصرت اباوعله ودموعي تجري ضل يفرك بلحيته وشعره ويروح ويجي اخر شي كتب على نفس الورقه وحطهه بمكانهه واشرلي انزل وهو راح صعد بالسياره ومشى ..

نزلت اركض اريد اعرف شراح يسوي ويخلصني
فتحت الباب بهدوء وجريت الرساله واخذتهه وصعدت فتحتهه وقريت. ...
⭐️⭐️
امي يانور دنياي ... طمئني قلبك وامسحي
دمعك ياغاليه انتي لي وانا لن ادع غيري يحظى
بكِ ..

انتظريني غدا آتي مع عائلتي لخطبتك
كونِ قويه من اجلي ...
⭐️⭐️
قريتهه ودموع الفرحه بجيته بللت الورقه ضليت
الليل كله اتكلب مغمضتلي عين بالي افكار ماتخلص ... وخوف وتوتر والفرحه بمجرد ان ايوب وعائلته يدخلون بيتنه هاي وحدهه كافيه تشغل فكري ....

ثاني يوم كعدت ونظفت وغسلت الطارمه ورشيت
السنادين بعدين رحت سبحت وضليت بغرفتي
كل شويه البس وانزع وشعري مره اظفره مره
ارفعه وارجع افتحه واضل مكفشه وارجع امشط

لحد ماصارت العصريه اني مبقيت شي مسويته
امي انتبهت عليه وضلت تحوم فوك راسي ...
واجتي لغرفتي وكفت وتخوصرت ...

- شعندج اليوم هاا شضامتلج من ضميمه
- شعندي يعني شايفتني مسويه شي غريب
- اييي هوستج هاي معاجبتني
- ايي وشنو يعني شتريدين توصلين
- عووذه شلون ترد دروحي شايفه نفسج مدري على شنو
- استغفر الله
راحت هيه وضليت افتر بالغرفه وعيني على الشباك شوكت يجون توترت اكثر من اي مره بحياتي

الباب اندكت واني كمزت من مكاني وركض للشباك وشفت سيارتين طابكات بابنه ... وايوب بهيبه شكله بالدشداشه والعكال والغتره شامره ليوره .. واكف يدك الباب وحواليه نسوان اثنين وزلم اربعه ... فتحلهم اخويه مصطفى ...

اني بقيت بغرفتي افتر مادري انزل لو ابقى محتاره
وماريدهم يعرفون ادري بي جاي ....

ضليت شويه لحد ماصاحتني امي نزلت متوتره والفرح مالي كلبي وادعي يتحقق الي اتمناه ....

الزلم كاعدين بالاستقبال والنسوان الاثنين بالهول ... دخلت سلمت وقدمتلهن عصير تمر هند ...

- ماشاء الله عليج يابنيتي وردايه مفتحه
- اي صدكتي يايمه عين الله عليهه

ماحجيت شي بس اتبسم ومدنكه وكلبي يريد يطلع من مكانه اريد اعرف شديحجون ....

المره الجبيره طلبت اكعد يمهه .. كمت كعدت بصفهه حضنتني وباستني واني هم بستهه شاورتني ...

- والله ماضنيت هالزلمه المشورب هالعرض عرضو يوكعو عود البان هاذ .. ابنا مكعدنا من امبارحا بنص هالليل ومخلينه انذار وكاد والدو واخو وعمامو لهين بالغصب

- اسفه اني ماردت اسببلكم مشاكل

- العشك يايمه مايعرف اب واخ فتصير المشاكل
موانتي السبب لاتهمي ... عسى ان والدج يرضى
والله عزيز علي وادري بمكابرو على نفسو ومادحكتو هالشكل الا امبارحا ... انا جدتو ام امو وربيتو على ايديا اعرف اطباعو وكلبو وان كان اختار مايستغنى .. ربنا يستر ان رفضو اهلج ..

- ربنا رحيم وراح مايخلينا باذى ... جده ممكن طلب

- اطلبي يابنيتي

- ان صار ورفضو فمن تشوفي كوليله اني فخوره بي وبوسي من راسه وشدي على اصبعه الخنصر واهتمي بي اكثر من كل وقت

- صاار يايمه عسى ربنا يجمعكم والله مايهدالو بال
ا ذا عندو اهلج ويسوي عيشتنه جحيم انا ادري بتركيبتو لهالولد

ضليت ساكته واباوع بالوجوه وامي عيونها تخزر بيه هاي شراح يخلصني من لسانها بس لاتسويلي مشكله هناك وسمعنا صوتهم على وعرفت هذا صوت ايوب

- عمي جيناك بالخير والطيب ليش تردنا هالرده هيج تجازي ضيفك

- ياابني داكلك البنيه مخطوبه الامر طالع من ايدي

- استغفر الله استغفر الله

- يابه ابو مصطفى من سالنا على المحروسه بنتكم
محد جاب طاري خطبتها تضحكون علينه انتم لو شنو

- لا يابه لاضاحك عليكم ولاشي البنيه كرابتنا رايديها من هي وصغيره وقارين الفاتحه واني منطي كلمه لخوالي هاي كل السالفه

- هذا هو فهمناك ابو مصطفى

- عمي رجيتك لاتكسر بختي هيج

- ايوووب يابه امشي خل نتوكل ورانه طريق

- عوفني يابه البنيه راح يزوجوها ياطريق

- اكلك انته شعندك ويه بنتي هااا حاجيني تعاااااال حاجيني شعندك وياهااا

- صلي على نبيك ابو مصطفى

- عليه الصلاه والسلام بس فهموني ابنكم شعنده ويه بنتي شجابك عليهه احججججججي

- عمي انا لا خايف ولا مستحي لاني مامسوي حرام انا البنت احبها وشاريها بدمي ولاتظن اني محاجيها لو مكربلها البنت تروح بطريقها وتجي بطريقها وانا احبها من بعيد لبعيد

- هااااا هاي مالكييت تحب غير بنتتتتتيييييي وجاي بكل عين صلفه وتكلي احبهااا وتتوسل

- ايييييه احبها وربي يشهد بصفاء نيتي الهه و الله والله وجلاله اسم الله ماشفت مثل ادبها ولا عرفت مثل اخلاقها والله حاسبها بنيتي واخاف عليهه والله والله روحي مثل الطير المذبوح تلوب من وكت العرفت راح تزوجوها

- سكتوووووووه لااجرم بي

- ياعمي انا ماظلمت ولا اجرمت ولاتعديت شرع الله وجايك على سنه الله ورسوله ... داخل عليك ياعمي لاتهدم حياتي بيهه انته بيدك تكدر تزوجها الي وعهد علي ارعاها وادللها مثل دلالك وازيد

- استغفرررر الله استغفر الله لك منين طلعتلي انتتته لك يابه افهم اني منطي كلمه للناس اني ماعندي مشكله وياك ولااكرهك ومناقصك شي بس السالفه طلعت من ايدي هسه ذاك الرجال صارله سنين ينتظرها وباني البيت ويجهز شكله روح غيرت رايي مانطي هاااا
فهموني ياخوان بالله عليكم ترضوهاا

- والله حقك يارجل موقفك صعب وكلمه الرجال صعبه وموقف ولدنا اصعب شلون تريده يوكف يتفرج عليهه من ياخذوها ليموت بكاعه

- ابو مصطفى هي االبنيه راضيه بهذاك ولدكم !!!

- هااا بعدها دتفكر بس ترضى ترضى

- لاااا مو ترضى كول تجبروها لو تخلوهه بالواقع
ماترضى من كيفها

- ايوووب يابه كف الله يرضى عليك

- هسه ابو مصطفى كلمتك الاخيره تانعرف دربنا

- اعذروني يابه غير جيتكم بوكت متاخر ماريد اتخاجل ويه خوالي وانته ايوب رغم هوستك واجفصك بالحجي بس كبرت بعيني رجولتك وصدقك شفعولك ولا جان سويناها دم على حجيك
- على راسي عمي انته ... بس خلي اكلك حجايتين
ضل اذكرهم كل هالعمر ....
الاولى بنتك ماتنسعد ان زوجتها لذاك وكل ماتجيك
ركز بعينها وشوف دمعتها وتذكرني بوكتها وخلي
خوالكم ينفعوكم كدام دمعتها
والثانيه انا هسه راح اطلع من عتبه بابكم ومادري
بيا ساعه اموت هاي روح وعند الله مكضبها بس
ما اسامحك ليوم الدين من نتكابل عند عرش ربنا
بذاك الوكت ان سالني ربي عنك اسامحك
والياخذها بذمته كل كسره كلبي وحركه روحي
يلا يابه مالنا بعد كعده هين ... حجييييه

- ايووب ياابني
- عمي انته حر ببنتك بس كلامي لاتنساه واحلفك
بمحمد نبينا لاتسمعها كلمه تغثها وتجرحها لان انا
حبيتها هي مالها ذنب بنتك الشرف والعفه يريدون
منها وانا وكلبي نتجازه .... يلاااا انا طالع كبلكم
.
.
سمعت الباب نفتحت وهو طلع وطبك باب الشارع
حييل .. اجتي امه وبيبيته بوسني واني بس دموع
تتجاره ماكدرت انطق بحرف ... واسمع صوت
الهورن خبص الدنيا بي ... ايوب محروك كلبه
ومابقى شي ماسواه ويه ابويه الله يعلم بحاله هسه

طلعو همه واني ركضت صعدت لغرفتي وقفلت
الباب وتمددت ابجي كلبي يوجعني راح كل الامل
صارت صدك والاحبه اختفى من حياتي يعني فرحه عمري انباكت مني بدقايق .....
.
.
✨ يتبع.

—————————

#شقراء_بغداد

بارت_٨


من بعد ماراحو عائله ايوب بقيت ابجي بغرفتي خوف وقهر لحلم تبخر بلحضه ...ضليت على هالحاله لليل محد وصل غرفتي ولاحتى على العشه نزلت.. صارت ساعه ١١ واندكت الباب فتحت ولكيت ابويه واكف وشايل وياه صينيه صغيره بيهه كلاص حليب وكعك ابو السمسم ابتسمتله واخذتهه منه وكعدنا على الجربايه

- شبيج باباتي ليش هيج تغيرت حالتج من العصر لهسه

- تعبانه شويه بابا

- شوفي هو سالفه هالولد مدتخش بعقلي فاحجيلي
السالفه من البدايه حتى اكون وياج مو ضدج ،، انتي بنتي الاثق بيهه واعتمد عليهه بكلشي احجيلي ولتخافين

- بابا هو الولد ويانه بالقسم بس ما عندي شي وياه
غير الحجي العادي مثل كل الزملاء البقيه بس هو
عنده نوع من الاهتمام الي غير عن بقيه الطلاب

- شلون هذا الاهتمام .. احجي بنتي غير افتهم اذا مو اني احل مشاكلج لعد منو يحلهه الج فهميني

- يعني هو مثلا يهتم بكل المحاضرات الي يشرح اذا فاتني موضوع ومرات يجي يوصينا انتبهو من فلان مجموعه اذا تاخرت على المحاضره هو يحاجي الاستاذ حتى يقبل يدخلني وينبه عليه ماتاخر بعد يعني هيج اشياء

- هاااا يعني مثل ولي امر صاير عليج هناك مووو

- اي هيج يعني

- زين وهذا حالج كله لان مقبلت بي تريدي يعني

- لاا مو علموده بس من سمعت حجيكم تبينلي ان زواجي من محمد شي ثابت مايغيره حتى قراري بالرفض واني ماريده محمد واهله ماحبهم وميناسبوني بابا

- بس يابنتي الولد كرابتنا واهله نعرفهم وناسهم خوش ناس اهل ضيافه ونخوه والولد صارله سنين ينتظر وهذا اولى من هذا

- بابا اني مداكلك اريد هذا اني ماريد محمد هو وكلشي يتعلق بي ماريده مو لسبب الولد الي اجه بس اني نفسي ماترغبه ولاترغب اهله وانته شفت بعينك شلون يحجون عليه وبيتنا لعد هناك شيسون بيه

- والله حيرتيني

- بابا هسه يعني ضروري اتزوج عوفهم واني ماريد الزواج لا منه ولا من غيره خليني هنا عندك اداريك واداري اخواني واكمل دراستي وان شاء الله احصل ماجستير شيفيدني الزواج شهادتي وياي تنفعني اكثر

- بنتي البنيه مصيرها تتزوج والشهاده تجي بس
البنيه لازملها بيت يحويها ورجال يسترعليهه ويحاميهه اني مو دايملج يا بابا اخوتج كل واحد باجر عكبه يتزوج ويكون حياته اني وامج كبرنا شلون تضلين وحدج انتي

- لعد فدوه بابا سوي اي شي بس لا تورطني بمحمد والله مااطيقه واخاف منه ارجوك ارجوك اذا تحبني وتريد مصلحتي لا تزوجني اله

- نشوف شلون تاليهه خليني افكر هسه اكلي انتي
وغسلي ونامي والصباح رباح

- ماشي تصبح على خير

راح وضليت اكل ارتاحت نفسيتي من فهمت ابويه
شنو رغبتي وخوفي واثقه مايخليني بحيره ولا يجبرني لان اني غاليه عنده ...

مرت ايام وصار وقت الرجعه للدوام واني حيل متخوفه من الدوام ماعرف شلون راح اشوف ايوب شلون احواله صارت وشنو سوه الايام هاي ماعرفت عنه خبر وبالي يمه كل ثانيه افكر بي .....

يوم الاحد ... كشخت وتعطرت وطلعت مستعجله اريد بس اوصل واشوفه بس اريد المح عيونه وذاك الامان وصلت وعيوني ادور عليه بكل مكان ...سلمت على البنات واحجي وياهم وكل فكري يمه وينه ليش ما شفته

صار وقت المحاضره رحنا دخلنا والاستاذ اخذ الحضور وهو ماكو خلصت المحاضره وماتحملت بعد لازم اسئل رحت على فرح وكتلهه تسال احمد بلكي سامع من الولد شي عنه ...

ضليت انتظرها بره ربع ساعه اجتني وتكول ..
ايوب مسافر للكويت صارله اربع ايام ومايعرفون شوكت يرجع .....

من صدمتي حتى مارديت شي عليهه عفتها ومشيت رحت كعدت وحدي بمكان هادىء والصدمه اثاراها بعدها عليه ....

يعني شلون يسافر وميكولي مو يعرف اني احسب
يوم يوم حتى اداوم واشوفه ونحجي ونلكه حل شلون هيج يروح وميودعني لو بكلمه .. هاي صارت اسمع من الغريب احواله !!!!

دمعت عيني بحسره وقله حيله حسيت صدري ينقبض ويفك كل مافكر انه هناك واني كاعده انتظره ....

بعدين هديت نفسي وكلت الغايب عذره وياه يجوز شغله خلاه يروح مستعجل ومالحك يودعني ....

مرت الايام وصارن اسبوعين وهو ماكو عنه اي خبر وكل يوم اني اروح للدوام بامل اشوفه راجع واعاتبه وارجع بخذلاني وحسرتي للبيت ....

محتاجته شوق ولهفه وضياع وهو مو داري عني شي كل ليله افتح البرده واضل واكفه انتظر على الشباك بلكي يمر ....

الانتظار صعب اخذ مني ضحكتي وصار كلشي رمادي بحياتي مايبهرني شي بس رجعته وشوفه طوله وعيونه

بالاسبوع الثالث .... طلعت من الدوام ساعه ١٢ ونص ودامشي وحاضنه كتبي وعيوني بالكاع وسمعت واحد يصيح باسمي رفعت راسي وانصدمت توقفت بمكاني

- محمد ؟؟؟؟
- شلونج
- زينه. شجابك هنا
- عندي شغله هنا وكلت امر اسلم عليج
- هاا وشدلاك بكليتي هم !!
- اكو رجال ميعرف بمرته وين تروح وتجي اكيد اندلهه بس مصارلي مجال اسير عليج من كبل
- هاا ،، زين من رخصتك وكفتي وياك هيج محلوه
كدام الطلاب اني لازم ارجع للبيت
- اي امشي اوصلج بسيارتي
- لا مشكور اني ارجع
- كتلج امشي اني جاي حتى اشوفج
- واني كتلك ماريد اني ارجع

درت وجهي عنه ومشيت اجه ورايه ماهتميتله رحت
بسرعه وصعدت بالمنشأه وهو ضل واكف ويفر براسه منا ومنا ....

شيخلصهه هاي حتى للكليه لحكني والله لو يشوفك ايوب يسويك وصلتين ويعلكلك باب الكليه ....

رجعت للبيت وحجيت لابويه على جيه محمد وكتله
هواي يضايقني كل مره الكاه بوجهي وهو كلي اني
اتفاهم وياه وبعد مايتعرضلج ....

امي خانسه هالفتره الحجايه الي تعجبهه او ماتعجبهه تسمعهه وتسكت ومادير بال لشي ...

مر يومين وبنفس الوقت طلعت من الكليه وهم لكيت محمد واكفلي درت وجهي عنه ومشيت اجه ورايه وكفت بكل هدوء ماريد تصير مشاكل وامن ...

- محمد شنو الي تريده مني مو عيب عليك لاحكني

- اذا انتي ماتنطين مجال افهمج شسوي يعني كتلج
امشي وياي نحجي

- اني ماريد احجي شي وياك لو يدري بيك ابويه هنا مايرحمك روح وعوفني

-زهرااااااء السانج احفظي ... جيت اريد احجيلج كلمتين وامشي لاتسويهه سالفه عليه

- امري لله امشي نحجي بغير مكان هنا ماريد تصير عليه سمعه محلوه

- امشي سيارتي عبور الشارع

- لاااا ماكتلك نروح بسيارتك كتلك نمشي كم خطوه يعني اني ماصعد ويه غريب

- هسه اني غريب صرت !!!

- كنت ولا زلت غريب القريب هو الي اني اريده قريب مو الي يربطني بي وثاق عائلي

- انتي ليش هيج كارهتني شمسويلج اني هاااا

- ماكرهك بس انته تزعجني بتصرفاتك

- لااا والله تكرهيني اني صوجي باقي هالسنين احب وحده ماتكلف نفسهه تكلي شلونك شجابك هالطريق خير بيك شي بس فالحه تطرد وتلاسن

- لا فهمتني غلط ماعندي شي وياك بس انته تحرجني يعني شنو توكفني كدام كليتي خلي نحجي لاا وتريد اصعد وياك بسيارتك اذا بابا عرف شيكول عليه هااا خليك بموقفي يعني اجي اخذ وانطي وياك بالحجي تريد

- لج بابه افهمي انتي مرتتتتتتي مرتتتي ابوج ليش ميرضى

- شنووووو مرتك من شوكت صرررت مرتك

- جاا والفاتحه القريناهه والبيت الابناه والفلوس الي بدم كلبي لميتهه لزواجنا هاي كلهه عندج بالرجلين تروح

- محمد انته ليش دتبني امال بشي فارغ تدري بيه ماوافق بهالزواج والفاتحه الي نقرت من اني وصغيره وهسه كبرت وكلشي تغير

- وانه شو ماتغيرت باقي على حبج وفي شو ماكلت كبرت وماكلت متريد ولا هتميت لحجي الوادم زهررراء انتي ليش متنطيني فرصه اشوفج حبي شلونه لج والله ماكو احد بهالكون يحبج مثلي اني تحملتج وصبرت وتعبت كله لاجل الكاج بيتي كليلي بشنو غلطت وياج ؟؟؟؟؟

- محمد ارجووك كافي

- لا لا فهميني اني جاي اليوم اريد افهم اني شمسويلج وهيج كارهتني !!!
فديوم غاثج مسمعج كلام محلو
حارمج من شي ؟؟ ضحكت عليج بشي ؟؟ اذيتج ؟؟
بكتج كتلتج ؟؟؟ فهميني شمسويلج اشو شايلج بالصلوات ترفضيني واجيج محمل اشكال للبيت واجبر اهلي يجون لخاطرج حتى اشوفج واحسبهن يوم يوم هالسنين تمشي حتى نتزوج ...... فهميني يبنت الناس انه بشنو غلطت وياج شنو لان حبيتج وردتج بالحلال !!!!!!
ليش ساكته فهميني ....

- انته ماسويتلي شي بس اني ماريد اتزوج الخطا مو بيك افهمني ارجوك اني خايفه واصرارك هذا يزيدني خوف

- تدرين ليش خايفه مني ورافضتني لان ماتعرفيني
ما منطيتني مجال اشوفج الحنيه الي بكلبي الج
يامره والله حبيتج وماذنبت ليش حاركه كلبي وملوعه روحي وسنيني ....كليلي شبقى ماسويته حتى ترضين وين شايفتلج رجال يتوسل بمره ترضى بحبه وتتزوجه
زهرااء اني صرت هيج مو لاني ماعندي كرامه بس انتي مامخليتلي طريق اجيج منه وكلبي ماجاي يرحمني كليلي شذنبي اني عايش على امل وانتي تهدمين بي

ضليت صافنه بحجيه صحيح هو شذنبه ؟؟؟؟
ليش هيج صرت انانيه وماشوف تعبه لاجلي ولا وفائه جاي ويتوسل واني اعامله بارذل المعامله صعبه هيج

- طيب انطيني مهله افكر

- زهراااء لاتضلين معلكتني هيج لا اني للسمه ولا للكاع

- شوف ماجذب عليك اني خايفه من هالزواج ومامقتنعه بي بس ماريد اظلمك فعوفني على راحتي هالفتره وخليني اعرف اتصرف بهدوء رجاءاً محمد

- زين اخليج على هواج وباقي انتظر ردج الج شهررجعيلي بي خبر

- ماشي

- زين اني اروح انتبهي على نفسج وفكري زين

- الله وياك

من بعد كلامي ويه محمد تخربطت افكاري وصرت بين نارين .. نار حبي بايوب ونار حب محمد الي ماترضى تطفى وتحرك كلشي حواليه حتى تحصلني ....

العقل يحجي شي والكلب يريد شي واني التايهه بين
الاثنين ... كل المنطق والعقل متوقف على رجعه
ايوب بلا شوفته ماكدر اتخذ قرار ولا اتحرك خطوه وحده .... اصلا احس حياتي وكفت على اليوم الي طلع بي من بيتنه وايامي تنتظر رجعته حتى تتغير

صرت اكضي الليل فاتحه الشبابيك ومطفيه الضوا
وعلى ضوا الكمر اسهر صافنه بي ...

صرت انتظر الليل حتى انفرد بغرفتي واكعد اكتب
هذا الشعور المكتوم .....
🎋
الثالثه صباحاً ....
في بدء ظلام يوم ربيعي اخر بهواءه البارد مصحوب بنفحه ترابيه رقيقه من عام ١٩٨٥...
هدوء وصرير اُذن هو كل مايحدث الان لكن دون
سلام داخلي فهذا الاخير قد اضاعه نظري ...
بكونهِ قد اُفتقد عند تمعني فيي فأراني كأني لست

هنا لا انتمي لجسدي الذي صاحبني ليل نهار ...
كأن تعابير هذا الوجه ليست بإحد اعرفه ام تراه هو
الذي لا يعرفني ؟؟؟؟ كم يبدو عقلي على نقيض تام
بالواقع من حولي ... كأنه من زمان لم يدركه تجول جسدي على رمال هذهِ الارض .....
يداهم تلك الافكار العقلانيه طيف ملاك اشقر لايأبه بما جرى لي لكن كل ما فيي يناديه وياليته يسمع انين روحي عليه ليته التمس لي عذر قبل الرحيل عذر اطمئن به قلبي المتشرد خوفاً لفقدانه .. يلوي الطرق اليه ولااجده فيها افكيف اطمئن عقل يحكم بدلائل بسراب لم يعد !!!! ولإي درب اشكو قله حيلتي مع نفسي لاترضى ولاتنسى ولا عن العهد تتخلى ...
🎋
صار له شهر وهو غايب عني وكل شي بيه بهت
عجيب امر الانسان مايروي روحه لا اهل ولا نعمه ولا نجاح ولا اي شي عدا محبوبه !!!

صارت الامتحانات وصرت اهرب من افكاري وقلقي للكتب واضل اقرا واروح بكامل اناقتي وضحكتي وماخليت احد يحس بالي بيه غير ربي محد عرف كبر كسري ووجعي ....

باقي اسبوع ويخلص الشهر الي انطانياه محمد وراح يرجع هو واهله علينه ... وابويه يحوم على الموضوع وبيبيتي وعمي كل جمعه يدزون عليه ويجن عماتي ويفتحون الموضوع وكل واحد يطلعلي ميزه شكل

بس اني اشوف روحي ماكدر رغم كلشي بس ماكدر شلون انسى ايوب بهالسهوله حتى ان هو نساني وراح ومايرجع للعراق بعد بس روحي ماتكدر تعدي يوم بدون ذكراه .. اذا ماختمت الليل بكتابه عنه واتذكر كل تفاصيله مااكدر انام ....

صارله ٣٧ يوم من سافر واني كل ليله اتاني
على الشباك اخاف يمر واني نايمه ...

يوم الجمعه عزمتنه بيبي على ثواب غدا مسويته جدي الله يرحمه .. وهناك متجمعين كل عماتي
وخوات بيبي هم موجودات البيت متروس جهال
اني فرحت بروحتي هناك لان ردت اشوف بنات عمتي صار هواي ماملتقين بسبب الدوام ...

من وصلت ركضت عليهن حضنتهن ورحنه لوحدنا ضلينه نسولف وكل وحده تحجي عن دوامهه ومنو تقدملهه ...

بنت عمتي ليلى ولد جيرانهم خاطبهه من اهلها وباقي بس اخوها الجبير يوافق ويخطبون رسمي ...

والثانيه هند مالهه هم ولا تفكير بشي غير تشتري
احذيه وحمره تمووت عليهن مو بانصاف مولعه بيهن بحيث متشاركنه بالحجي الا اذا حجينه بطاري المكياج والملابس ...

هي متابعه القنوات الي تذيع افلام مصريه وشنو يسون الممثلات تسوي مثلهن ... تكص شعرها مثلهن وترسم الكحل حتى مشيتها مثلهن من يمشن مستعجلات بالكعب الرفيع والجنطه الصغيره المربعه بايدهن ..

وباثناء ماكاعدين نسولف سمعنا صوت قوي وهزه
رجت الشبابيك وتكسر الجام كله ... اصوات عماتي تعالت واحنه ركضنا عليهم للهول لكينه عمتي الصغيره وابنها مفشوخ راسهم بالكزاز الي وكع عليهم ...
وباب الشارع معوجه لانها ناصيه وبس شكل زخرفي مو حديد وقوي ....

بيبتي كامت تصيح مرعوبه ..

يبوووووي اجتنه ايران فاتو علينا يبووووي ولجن الحكنجيبن عباتي بنتي حتموووت كووومن ولجن
سترك ياربي على هالبلد ... شوكت تكضي هالحرررررب مو خلصو شبابنه ياربييييي

احنه نتراكض وحده تجيب العبايه وحده طلعت بالشارع ادور على الولد يجون ياخذوهم للمستشفى وحده تجيب الشحاطه والجزدان وهي بس تصبح علينه وعمتي دمها بطولها صار وابنها مجرحه اديه وراسه ....

رجعت ليلى تركض من الشارع وياها ولد غريب
ورجال جبير بالعمر اجوي شالوهم وخلوهم بسيارتهم ومشو بسرعه والمنطقه كلها انكلبت صياح وونين

طلعنه كلنا بالشارع نشوف شصاير ونسمع الولد اجوي يتراكضون ويصيحون ...

صاروخ واكع بركن الجامع ومسوي تراب وبيتين واكعات على اهلهم ...

والاهالي كلها تراكضت فزعه وشايلين بطانيات
وركضو لراس الشارع هو مكان الجامع وراحو
ويحاولون يطلعون الاهالي الجوه ....

والي كدرو يوصلوه وصلوه وركضو بي للمستشفى والي مكدروله ضلو ينتظرون النجده والاسعاف

بهذاك اليوم المنطقه عم عليها الحزن والكل واكفه
بالباب تنتظرلها عزيز يرجع بسلامه لبيته ...

كل ٣ نسوان اربعه واكفات باب واحد من البيوت
ويواسن باهل المصاب ... وكم رجال بقى يروحونويجون يجيبون الاخبار ويودون مساعدات الهم ويهدئون النفوس والجهال تتباجى من الخوف والرهبه

صار اربع سنين على الحرب نغافل الخوف بالضحك والاكل والسوالف ويداهمنا بلحضه جايب عزيز شهيد ويحرم اهله طعم الراحه ... ويزرع الرهبه بكلوب الاطفال ويبعدهم عن الحياه الورديه ويمليها الهم بالدم والحزن .....

سنين شفنا بيها الويل من الخوف بساعه الساعه نلكه صارت الحرب جو _ ارض وبره كم يوم صارت ارض _ ارض .... والواكع بيها هالشباب الي كضو سنينهم على الحدود والي منهم تأسرو بايران ومامعروفلهم خبر ... والي استشهد وهو على باب الزواج لو الي ينتظر طفل وكل هالتضحيه ماوقفت هالحرب كأنها تريد تقضي على واحد من البلدين يلا تتوقف .....

للعصر ورجعت عمتي وبيبي وابن عمتي الصغير ً
مخيطين راسهم واديهم ملفلفه ووجهم اصفر ...
بيبتي صاعد ضغطها وجايبيها عمي وابويه يمشوهه على كيف وانكلبت هذيج الفرحه بالمه لخوف وحزن

لليل واجوي رجال عماتي واتحمدولهم بالسلامه واخذوهم وراحو بس عمتي الي انصابت بقت واني هم بقيت يم بيبي ماكدرت اعوفها وهي تعبانه كلبي يضل يمها

وابويه هم بات ويانه هالليله ... فرشنا كلنا بالهول
وتمددنا وكلمن باله حسبه واني حسيت على بيبي
كل شويه كايمه تلوب بالبيت رحت عليها ...

- بيبي حبيبتي شبيج اشو مامرتاحه

- يابيبي منين اجيب هالراحه وجاري الليله بكبره ينام

وضلت تبجي ودمعه الادمي الجبير توجع اذا نزلت
حضنتها وضليت امسح بدموعها واوسي بيها ...
وهي كعدت بالطارمه وتحجي وتباوع للسمه ...

- اااه ياام سرمد راحت ليالي الانس وغدينا ترابات
حرب مطشره ... سوده عليه حبيبه لادار دنيا حضيتي بيها ودار الاخره تناديلج
اااااوف يهالعراق شحملت من ضيم وشخسرتنه من شباب وينه وينه الي تبلعه كاعك ،،، شذنب هالعايله تصير ويه التراب وتموت مكسره بالحجار هذا

- بيبي هذا حكم ربنا والي يعترض على امر الله جريمه ماعدنا غير انا لله وانا اليه راجعون
ادعيلهم بالمغفره والرحمه احسن من البجي حبيبه

- الحمدلله على بلاءه ونعمه يبيبي من حركه كلبي على جارتي اني اون والوب هاي عزيزه وبني ادم هذا يموت موته ذليله ليش مانبجي وننعني ليش هو كلب من لحم ودم لو حجار حتى منحس بغيرنا

- حقج والله بس صحتج بيبي لا هم ضغطج يرتفع
فدوا حبيبه كومي خلي نام وريحي بالج الصار مو هين اليوم ولازم ترتاحين باجر مو ترحين للنجف غير بيج حيل ياعيني

كامت وهي تستغفر وتتحسب على الي سوه هيج بلدنا رحت حضنتها ونمت وضليت اشم بريحتها

ترجعني لايام الطفوله من جنت اجيهه زعلانه لو متعوره وتخليني على رجليها وتخطيني بفوطتها تخليها على وجهي واصير اشوف ضفايرها الحمر من الحنه شلون نازلات على صدرها واغفى على ريحتها واسكت من البجي وانام وانسى كلشي .... اوووف شكد محتاجه لحضنها هذا الدافي ولمسه اديها الناعمه رغم كلها تجاعيد بس ناعمه وحنونه .....

هي امي وروحي ووطني بدونها مالي حياه ...

.
.
مرت ايام الفاتحه ورجعنه لبيتنه ورجع تعب الدوام
والانتظار الي حفر بكلبي اثره ... وبهاليوم كاعده وحدي مثل كل مره واجتني روعه هي رسبت لذلك ماتكون وياي دائماً ...

- شلونج زهراء
- الحمدلله وانتي شلونج
- ممرتاحه لان انتي تعبانه ادري بيج
باعي اجيت اليوم حتى احجي وياج وافتهم منج شصاير كلش معاجبني وضعج هيج ليش يعني لييش
- روعه هاي الليش صعبه متنحجي بكلمتين
- زين ايوب شبي وينه
- مسافر وماعرف شي عنه .. روعه الانتظار صعب واهلي ديضغطون عليه بالزواج وهو ماكو ماعرف شتصرف راح انجن والله
- الله يكون بعونج بس غير نفهم وين راح حتى الامتحانات راحت عليه شينجحه هالسنه
- هسه بس خلي يكون بخير ويرجع بسلامه وكلشي يهون ..
- الله كريم وانتي لتضلين هيج حاركه كلبج وهو رايح متونس وعايفج هيج مشلوع كلبج شويه فكري بنفسج

ضلت روعه تحجي عليه وتنصحني واني بالي مو يم كلامهه ولا يعنيلي شي الا رجعته لان هو صار مثل مرضي شكد اعالجه وهو باقي بيه ...

مرت عشر ايام وصارت امتحانات نهايه السنه
صرت بهالفتره ماسوي شي غير بس اقرا حتى الهي نفسي عن التفكير بي وادعي كل ليله ان يرجع بسلامه

كمل اول اسبوع من الامتحانات وبقى بس امتحانين
وتخلص السنه واني ماشفته وكل مااسأل احد عنه
مايعرف شي كأنه اختفى عن وجه الارض ...

وباليوم القبل اخر امتحان ...جنت طالعه من القاعه
وواكفه كدام الكافتريا انتظر البنات يطلعون ...
وانتبهت على صوت يمي يكول ..

- هاا السلام عليكم

انداريت واني ممصدكه هذا صوته اي صوته مااخطىء بي مستحيل

- ايوب ! .. وشهكت وبعدين ضحكت ممصدكه وكفته يمي حتى لساني انعقد ماعرف شحجي وشكوله

- شلونج ياابه شنو عليش تضحكين
- فرحانه برجعتك
- هههه امشي تانكعدلنه بمكان هسه راح يضلون كل شويه واحد جايني السلام وعليكم السلام

امشي وياه واني ممصدكه هذا حبيبي رجع ودايحاجيني صارلي انتظره شهرين ونص واخيراً ربي رحمني برجعته ،،، رحنه كعدنا بمكان بعيد عن الطلاب وهادىء وضلينه واحد يباوع بعين الثاني ويتمعن بوجهه راح كل الحجي وراح الزعل والعتب وضل بس الشوق

- ماريد اكلج مشتاق لان صغيره كدام شعوري بيج
- وين رحت وعفتني طوال هالشهرين شلون هنت عليك
- والله مجبور .. تذكرين بيوم الطلعت بي من بيتكم
بوكتهه كل شياطين الدنيا براسي صارت وكرهت حتى اهلي واهلج وكرهت حتى نفسي ... وبالليل اجاني ولد من جماعتي بالشغل يصير جيرانه وكعد يحجيلي دازيه واجب بنص ايران استخبارات ويروح متخفي ومجهزين مجموعه وياه وهو خايف على اهله لان عنده اربع خوات وامه واخوه صغير ... فكتله اني اروح بدالك ضلينه نتعارك لحد ماقنعته ورحت للآمر وحجيتله
ان الولد صحته ماتساعده واني بمكانه ومنا ومنا لحد ماقبلو

- يعني جنت بايرااان !!!

- ايييه بايران

- يااالله دخيلك شوداااك مو تدري بيهه نارر هناك

- هو انا كتلج كرهت روحي وكلت هي موته موته
خلي اروح شهيد احسن من اضل بحبج اتلوع

ورحت وقبلها قدمت على اجازه بالدوام بس من طولت الجماعه مرسبيني

- ولييش تاخرت انته اصلا شلون تروح وتدري
بدا الدوام يعني هم تريد تحرك كلبي وتحرمني منك
وهم تلوع كلب اهلك وتضيع مستقبلك لييش كل هذا
بسببي !!

- هو انتي الج الحصه الاكبر بيها بس من رحت ماجنت ادري اطول هلكد كلت لو اموت باسبوع بالزايد لو ارجع واخلص الشغل ،، بس هناك اشتباكات قويه والريس ماخذ من مناطقهم والمنطقه الي جنه بيهه اخذوها فحولونا لغير منطقه حتى ننطيهم اخبار شيصير هناك
وهناك انحبسنا لا نكدر نروح للاراضي الاخذوهه العراقين راساً ننكشف ولا نكدر نضل اخاف يكشفونا وكضيناها تختل لحد ما كدرنا نسافر لتركيا وبالف يالله يلا عبرونا ومن هناك كدرنا نجي لاربيل وبعدين لبغداد ... الله كفيلج لو مضروبلي طلقتين احسن من اللوعه العشتهه القصف فوك روسنا ماتدرين ياساعه
تجيج ضربه تايهه ... والجهال والنساوين تعايط
وفوك كل هذا لازم تضل متنكر حتى باللاكل نتختل لان اكلهم ماينجرع واحنه نطبخ وحجينه مو كلش مثلهم وضالين حابسين النفس ....

- الحمد لله الي رجعك بسلامه وكحل عيوني بشوفتك والله كلبي خلص من الانتظار وعيني على درب وكل يوم اكول هسه يجي وماكو

- يا روح روحي انتي والله غصب عني

- مايهمني كل هذا اني ماضايجه منك المهم
انك رجعت بخير وسلامه والله كتبلك عمر جديد

- ربي يتمملي هالعمر وياج والله ياروحي كلام ابوج لليوم يرن باذني مانسيته وحاير شسوي

- خليها للزمن ايوب

- مايتأمن الزمن يمشي بالي مانهواه

- دائماً كول الهي اختر لي ولا تخيرني لان ربنا هوالعالم والحكيم احنه مالنه علم بشي فهو الافضل ان يختار دربنا

- والنعم بالله .... اييييه يولو اشو ضعفانه وشكلج تعبان

- غير بسبب خوفي عليك

- ربي مايحرمني منج ولا من خوفج عليه
تدرين ياامي ... هناك كل ليله اسهرها وكل فجر
يطلع عليه اناديج ويه كل نسمه هوا بارده واتمنى لو هالهوا البارد الي يمر عليه يمر عليج ويوصل السلام

- ااه ياايوب لو تدري هاليالي شكد حملت اسرار وشكاوي وكل يوم ادعيلك بي ترجع بسلامه وربي يحفظك من كل سوء

- هذا دعائج وخوفج هو مثل خوف الام لابنها
اني ترا من زمان معتبرج امي واكلج ومرات اخاف تضحكين علي

- لاااا ليش اضحك بالعكس افرح

- هاا زين عجل لاتعوفين ابنج وحيد

- ومنو اغلى على كلبي اكثر من ابني حتى اعوفه لاجله

- انتي امي وبنتي وحبيبتي وربي يكدرني واخليج زوجتي

-ان شاء الله

ضلينه لل ١ الظهر بس نحجي ووعدني يجي باجر
ورجعت للبيت والفرح روى جذور روحي ورجعها للحياه وتغير هاليوم ورجعت تمشي ايامي ....

وثاني يوم رجعت اكعد للدوام بكل نشاط ولهفه حتى اشوفه وااطير بداخل عيونه ... ورحت بدلت وتمكيجت وطلعت وكملت الامتحان وبقيت انتظره يخلص الاوراق مالته عند رئاسه القسم ويجي عليه ...

وطلعنه بهاليوم لنفس المقهى الي رحناله اول مره
واني فوك ريحه الكهوه الي بكل مكان ساحرتني
كدامي ضحكته بس مو مثل كل مره ..

- احسك مامرتاح

- والله يابنت الناس هالايام خانكتني

- لييش ياابني

- انا ماراح اشوفج لحد السنه الجايه
ومادري اهلج وهذاك السلبوح شراح يسون
والله هم على كلبي وحاير بي

- واني مثلك خايفه وحايره والمشكله اهلي هواي ديلحون بالموضوع حتى بيبي وعماتي هم ادخلو

- من بعد ماشفت موقف ابوج وشكد توسلتله وردته
بس يغير رأيه حتى لو ماينطيني كلمه هسه لو كايلي خليني افكر وارتب اوضاعي احاجي خوالي اي شي جان صار عندي امل بس ابوج مايتنازل عن كلمته انا رجال واعرف هالسالفه كلش زين فتشوفيني مهموم

- واني شنو ذنبي ! ابويه من جهه وكلمته وسمعته
وحبك من جهه ومحمد الي فنى عمره وهو ينتظرني بجهه يعني اني المن اضحي !!

- لاتذكرين اسم هالادمي كدامي وتخلين عقل مايضل براسي
- اهدء ياعيوني

- ربي يجيبج ياطولت البال صبرك يالهي

- ياابني خلي عينك بعين الله وعند الله تدابيرها

- والنعم بالله هسه خلي اعيش وياج هالحضه والكاتبه الله يصير

ضحكنه وثنينه ندري ممرتاحين وبالبال الف حسبه
بس هو كسر جو الحيره ولحزن بوحده من قصايده
البدويه الي ماكدر احفظهن لصعوبه لفظهن عليه
لكن معناها رائع وصوته بيهه كأن مانكتبت الا لحتى هو يقرأهه ....

بعدها طلعنه وضلينه نتمشى حتى نحصل سياره
وانتظرنا منشأه وصعدنا وهو من الازدحام ضل واكف وخلاني اكعد ومحاوط الكرسي بايده مسوي مثل سد عليه لان ازدحام والناس تتضارب واحد بالثاني وهو يتخبل من هالسالفه ....

بس صار مجال كومني وكعدنا بلاخير وكلي ..
- خلي بالج انتي ملكي وحلالي وروحي الي بثها ربي بهالجسد وان اخذج مني القدر كجسم مايخذج مني روح والله على كد تفكيري بيج ناسي حتى اهلي

- ربي لا يحرمني منك والله انك اعز من نفسي عليه

- تسمحيلي الزم ايدج اريد اطمن كلبي بيها

ترددت بهاللحظه وابتسمت ودرت وجهي عنه وسمعته يكلي ..هاا..

بصوت ناصي كلش ويقرب ايده بخفه ليم اصابعي فاني هم قربت ايدي شويه وتلامست اصابعنا حسيت مثل شراره او تيار لامس كلبي وهو خله اصابعه فوك اصابعي ودخلهن بين الفراغات وحضن ايدي
ضليت مدنكه واضحك بهدوء مادري من الفرح لاني لمست ايده واحس بحبه اكثر مادري من الخجل وياه مادري على روحي الي انخبصت بس لزمت ايده ..

- عسى رب الي عرفني عليج يجمعني بيج لو باخر
يومين بحياتي هم راضي

- ترا كلبي راح يطلع من مكانه كافي عوف ايدي

- مااكوو ماعوف خلي اشبع منها يولو ماتدرين شلون الدقايق جاي تلعب سباق وياي حتى تاخذج لبيتج وتحرمني شوفتج عوفيني اشبع بيج

ضليت اضحك على حجيه وروحي من كد خوفهه وحزنهه على فراقه هالايام بس فرحانه بكعدتي وياه تقرب هو يمي حتى يكعد ولد ووخر ايده من ايدي بس جتفه وايده خلاهم كلش يطخون بيه بحيث كعدتنا متلازكين وومنا الهوا عالي ويجيب كل عطره واضل استنشقه لحد ماتمتلىء رئتي يلا اخذ زفير وضليت هيج لحد ما وصلنه شارعنا ...
وبدت لحضات الوداع ولمعت عينه وعيني وعم السكوت بلحضه لازم نودع بالسلامه بس الكلب مايرضى يترك ولا هالعين ترضى تدير نظرها وتمشي وضلينا واكفين وعيونا تتمعن بتفاصيل الثاني تجمع لايام الفراق وتكسب القوه من هالنظره حتى تواجه الي جاي ...

- روحي يابنت روحي والكلب يدعيلج والعين لشوفتج تضل تشتاك
- مع السلامه يا ورده عمري وربيع ايامي
ضل واصلني بمراسيلك وانتبه على نفسك ترا
اتأذه لاذاك يااابني
- على موعدنا نضل

انداريت ومشيت كم خطوه ورجعت التفتت اباوعله
صافن عليه وابتسملي ورجعت ابتسمتله وانداريت
ومشيت واختفى ظله وراح بدربه واني بدربي
وعلى الموعد ضلينه ....

✨
.
.يتبع ..

#شقراء_بغداد

بارت_٩



التاسع من آيـار لسنه ١٩٨٥...
عند بزخ هذا الفجر اتلمس ذلك الجليد الذي يكسو اطرافي وارى لاول مره ان للجليد ملمس خشن وجاف فانفيه من مسمى الجليد .. اراه كالماس يبرق بين ثنايا الاصابع فاعود للمسهِ واجده متعرج كشكل الماس لكنه ليس بأملس ولانقي ... انه ممتلىء الندوب ومتيبس الدماء
فتراودني فكره انه كالقمر ابيض وساطع ومليء بالحفر ليس بأملس ولا نقي ولديه تعرجات لكن الفرق اني لدي الاف منه في هذا الجرم الجسدي وليس واحداً كما هو ينير الجرم السماوي فأبتسم لفكري الرقيق على فكري
كم هو ساذج بلطف ومتألم بعطف .. يمسح عن افكاري رغبه البكاء وتعاظم الحزن وينسي النقص الذي تفتقد لرؤياه عيني بتأملات نقيه بيضاء تحول الابيض المميت لزهر في وادي معتم ينتظر شروق شمس حنطيه لتذيبه
انا والمرآه نتبادل الانظار تريني البشاعه فازينها بالرحمه لنفسي باني استحق ان اكون جميله كما انا ..
فانا زهره داخل الصدف ...
.
.
وقت الصيف وحره وقت متعب لامثالي .. الحراره وكثره التراب تغير جلدي وتحمره .. صح ماعشت بيوم على مدار ١٢ سنه بنقص وكنت مثل ماسمع من كلام الشفقه والاستغراب بس يبقى شعور يوجع بداخلي يذكرني كل فتره يوصل الاذى لمرحله الدمع
ان المرض مرض وان غلفتي الالم بالامل .... لذلك وبهذا اليوم قررت اكتب طريقه تعايشي مع فكري لمرضي ...

كل عطله اني اكرس وقت فراغي للكتب الكل يكولون عني ممله من هالناحيه ويعتبروني اتصرف باكبر من عمري بس اني الي حياه ثانيه ويه الكتب ...

مااجذب اذا اكول اني اول ماافتح الكتاب اشم اوراقه واتلمس اطرافه وافصل عن الحواليه من اقرا .. اصير ماسمع شيكولون اخلي الحوار الي داقرا بمثابه فلم داباوعه بعقلي واشوف شلون الابطال ديتصرفون

وصلت لمرحله اني ادون بدفتر صغير كل جمله تعجبني واكتب بين قوسين اسم الكاتب والكتاب والصفحه ...
هذا صار بيه مثل الهوس مو مثل اي بنت حبت الكتب لاجل الثقافه والصيت .. اني احبها لاني استمتع بكوني اعيش بعوالم ثانيه غير عالمي وافتخر بذاتي كوني احب الشي الي ماحبوه البقيه بمثل هاي اللهفه ....

ويقاطعني باثناء كتابتي دخول اخويه مصطفى وهو يشهك بنفسه ... مالحكت اساله وكال...

- الحكي جيبي فلوس ابويه وكع واغمى عليه

كمت ركضت طلعت الفلوس من بنطرون بابا ونزلت ركض ورحت لكيتهم ملتمين يمه واجه علي وجايب اصدقائه اثنين وياه والسياره بره ..
صعدت يمه وره وخليت راسه بحضني ومصطفى يم السايق والطريق كله الوم بنفسي شلون مامنتبهه وادعي مايصيرله شي والدموع ماتوكف ....

وصلنا المستشفى واخذوه للطوارىء وضلينا ننتظر لحد ماطلعوه واخذوه للمصعد ...

مصطفى يركض وره الدكتور يريد يفتهم منه وهذاك ماينطي مجال يحجي وعافه ومشى وضلينه بحيرتنه واكفين وشويه ولحكنه عمي وابنه وبيبي ....

- مصطفى شصار ليش هيج ابوكم
- عمي والله هيج فجأه كال مخنوك وطلع يتمشى بالكراج وماحسينه الا واكع
- يمه عمت عيني عليك يايمه شفت بشبابك غير القهر والمرض وليدي
- بيبي الله يخليج لاتعبين نفسج هيج هسه يتحسن ابويه قوي ويتجاوز كل هذا

احجي و اواسي نفسي واواسيها اقوي نفسي حتى لا تاخذني الافكار لبعيد ....
وضلت بيبي تلوب وعمي صار عصبي وضل يصيح ويكله خلي نفتهم وعود ابجي وهي انقهرت اكثر لان رفع صوته عليهه بس هو متوتر وطبعه هيج عصبي بكل لحضه يصيح ... ضليت حاضنه ايدها واجيبلها
مي اشربها وانطيتها حبايه الضغط و را ساعه اجه الدكتور ووياه دكتور ثاني اكبر منه ووكفو يحجون ويه عمي على جهه ...

وشويه واجه عمي وكال ..
- يمه ابو زهراء ضاربته جلطه خفيفه الحمدلله
مااثرت على جسمه بشي بس صايرات اكثر من وحده بنفس الوكت ومدوخاته وهسه اخذوه للعنايه ومنكدر نشوفه هسه الا يصحى

هو كال هيج وبيبي ماوكفت بجي مره تحمد الله مره تلوب على ابنها واني خنكتني العبره ودموعي خانتني بلحضتها .. شلون ابويه يصيرله هيج واني مو يمه

ولليل ضلينه ننتظر وسمحولنا نشوفه ورحنه لغرفته واول مادخلنه اني عفت ايد بيبي وركضت عليه حضنته وابجي وراسي يم ركبته ..

ابتعدت عنه واجتي بيبي حضنته وتشم بي وتبوسه وبعدين عمي واخواني وضلينه نحاجي شويه وهو يرد بكلمتين ويسكت من قهري عليه ماكدرت اضل كاعده ضليت افتر بالغرفه لو كل شويه اطلع للممر وارجع اشوفه مادري شسوي خايفه عليه وكلبي مامطمن

بعدين عمي كال لازم نرجع للبيت وبقى بس هو ومصطفى يمه واحنه رجعنه ..
اني رحت يم بيبي لبيتهه تلكتنه مرت عمي تسأل على بابا حجيت وياهه شويه ورحت فرشت وتمددت

- اكلج خاف هاي امج مسويتلهه شي غاثته للرجال احجيلي بيبي شصاير

- لا والله بيبي كلشي ماكو لامتعاركين ولا شي

- لعد شجاه رجال مثل الورد ساعه الساعه يوكع هالوكعا

- العلم عند الله حبيبه عسى ربي يشافي ويرجعه سالم غانم لبيته

- يمه وليدي كلبي ملجوم عليه وين الله وام البنين يشافي ويرجعه لصحته وعافيته

ضلت بيبي تدعي وتنذر لسلامته واني غفيت من تعب ماحسيت الا عليه تكعدني وحاطه صينيه الريوك يمي

كعدت بوست راسهه ورحت غسلت ورجعت كعدت يمهه تريكنا اني وياها وبنات عمي يموتن ولا بيبي ادللنه هيج

يكومن يسون عركات بينهن ويسمعن حجي وامهن تنفخ نفسهه وتضل مثل الواحد خانكهه ماطول احنه هنا ..

بس بيبي معلمتني ان ماهتملهم مادامهه بهالبيت هي يبقى بيتنه واحرار شوكت نجي ونروح وهي الحاكم والامر هنا ....

حضرنه الاكل اني وبيبي وهي تسوكت الفواكهه والكعك وخلت مرت عمي تخبز واخذنه هم ويانه وطلعنه اخذنه تكسي ورحنه للمستشفى ...

لكينه امي ودعاء هناك وعمي ومصطفى هم ..
حطينالهم الاكل وبيبي طلعت الشوربه وضلت توكل ابويه وتمسح بحلكه مثل الطفل وماخلتني لا اني ولا امي نوصل يمه الا هي اداري بايدهه ...

للظهر واجني عماتي هم كعدن سلمن عليه واتحمدله بالسلامه ورجعن ويه بيبي للبيت اني بقيت يمهم وكالو راح يجون الزلم جيرانه فعمي كال لمصطفى يرجعنه للبيت ....

سلمت عليه وبوسته وطلعنه ... الطريق كله هدوء
بغداد بالليل مثل الخيال .. بس اضواء صفر وحمر والشوارع هادئه ونظيفه والهوا الي يضرب بالوجه ينعش الروح ...

واخذني الهوا لاهل الهوى لايوب وايامه .. شكد محتاجه وجوده يمي هسه محتاجه نظره عيونه وصوته الشجي

صحيت من صفنتي على صوت ابو كريم جارنا وهو يسلم علينه .. باوعت للمراجيح الي خالهه والسفينه الصغيره تذكرت طفولتي ...

من جنه نجي اني وبنات عماتي كاشخين بملابس العيد الي نخليهه يم راسنه من الليل حتى الحذاء والقراصات

كلهن مصفطات بترتيب يمنه ونام واحنه نحسب دقيقه دقيقه حتى يجي الصبح ونروح نلعب ...

وصلنا للبيت واني صعدت طلعتلي ملابس ورحت سبحت طلعت كعدت اكل بالمطبخ وحدي الكل نامو ..

ثاني يوم كعدني مصطفى وكال راح يطلعون ابويه وانزلي جهزي مكانه ...

نزلت لكيت امي متوليه المهمه اني سويتلي كهوه وكعدت اشربها واتأمل الي مخبوصين كدامي بهدوء ...

اجتي امي بالمطبخ تحضر الاكل ومخبوصه الي يشوفها يكول ماكو مثلها مره ..

استغفرت ربي كلت اني لشوكت اضل اظن السوء بيهه انسان وغلط مره قابل نضل نحسبها عليه كل العمر هم تغيرت وصارت عينها على بيتها وادريهم وتريد تصحح الغلط ...

مرت الساعات بسرعه واجوي عمامي و ولدهم وياهم ابويه ورجال عماتي هم وياهم ... احنه محضرين جربايته بالهول تمدد عليه والتهينه بالغدا والخطار ...

خلص اليوم بكل تعب بس تعب فرح لان رجعه ابونا للبيت رجعتله الحياه ....

فزيت من نومي على صوت دعاء وهي تعيط فوك راسي ...

- شكو شبييج من الصبح تهوسين

- كومي اهل العرب اجوي وكاعدين جوه وامي خبصت الدنيا عليج
- عززاااا هذوله شجابهم هسه اوووف اصبح بوجهم الله اليستر من هاليوم
- دنزلي عااد خبلتني كل شويه جيبي ودي مابيه حيل انتي روحي
- اي اي كمت اييي

طلعتهه من الغرفه ووكفت صفنت شسوي هسه اكيد محمد يستغلها فرصه حتى ياخذ جواب ...

طلعت ثوب نص ردان وطوله جوه الركبه بشبر
لونه زيتوني فاتح وبي دكمتين بالصدر وبس ..

رفعت شعري ونزلت للمطبخ غسلت ورحت سلمت عليهم ... واحد من اخوانه جاي وياهم وابوه وهو وامه ... بوست امه وسلمت عليهم من بعيد وعيون اخوه مثل الي شايفله اختراع جديد وكاعد يتصفن بي

مدرتله بال لا هو ولا محمد الي جمعته بالسلام وياهم ما خصيته بشي .. رحت للمطبخ لكيت امي دتحضر الريوك ساعدتهه وفرشنه سفره صغيره ..

وكعدو كلهم واخواني هم اني رحت للمطبخ وعفتهم اسمع ام محمد تصيحني ورجعت..

- ها خاله
- متجابلينه وتكعدين تاكليلج لكمه
- الف عافيه خاله اني ريوكي غير شي لا يضل بالج اكلي بالعافيه

محمد باوع عليه وخزرني على اساس اني مهتمه
درت وجهي ورحت للمطبخ ...

طلعت الدله الصغيره وحضرت الكهوه وطلعت الهيل وانتظرت تفور للاخير واخلي .. رحت حضرت الكوب المتعوده اشرب بي .. وطلعت الكليجه ... حطيت الهيل وعليت النار خليت الرغوه تكثر وصبيتهه

هذا ريوكي كل يوم اذا ماكو كليجه لازم كيك او جرك كعدت على الميز ومثل كل مره اول شربه من الكهوه اذكر بيهه صاحبهه الي ماغاب عن بالي ...

بعدني دااكل واجوي شايلين المواعين والولد راحو يغسلون على المغسله الي يم الحمام والميز صاير
بمقابل الفتحه لباب المطبخ الداخلي فاشوفهم ..

مدري شعنده هذا كل شويه ويخزرني شمسويتله مادري دنكت وكملت اكلي واجتي امه ...

- ياااه هذا اكلج عيني مايوصلج عتبه الباب
- لا خاله مابي شي اني متعوده على هيج اكل الصبح ماحب اكثر بالدهون احب شي خفيف
- يادهون يمه هنه كلهن بتيتات وبيضات قابل حاطين تشريبه
- كلمن ونفسيته خاله .. اني عندي الكهوه اولى من هذني
- اييي صدكتي كلمن ونفسيته

كمت عزلت المواعين ودعاء غسلتهن ورحت كعدت يم بابا وانطيته علاجه .. وضلو همه يسولفون واني ملتهيه اقرا بنشره العلاج ...

سمعت امي كالت جيبي مي .. كمت للمطبخ فتحت
الثلاجه طلعت السراحيه ورحت للملحق حتى اطلع الكلاص وسمعت صوت محمد ورايه ...

- لا طنشيني من اباوعلج
- ماطنشتك انته بس تخزر بيه
- وانتي متفهمين
-شفهم !!
- كم مره كايلج من زلم كاعده البسي شي مستور
- انتبه على كلامك مو انته تعلمني الستر
- لاااا تعالي اخذيلج راشدي بعد
- احترمني بالاول .. لبسي مابي شي ومامسويه شي يخل بسمعتي ..
- بلا حجي زايد واصعدي نزعي هالخركه اللابستهه والبسي شي طويل وعريض
- من انته بيتي لا تتأمر عليه .

اخذت الكلاص ورحت وعفته وحده .. انطيتهم المي وشاورت ابويه اريد اصعد شويه اذا يقبل .. هزلي براسه بمعنى اي ... واني عفتهم وصعدت ...

سديت باب غرفتي وتمددت على بطني وخليت المخده فوك راسي واحس جسمي يرجف من العصبيه ..
لشوكت يضل كابوس محمد يلاحكني !!!!

وره شويه هدئت اخذت واحد من كتبي ونزلت وعيني عليه بكل تحدي كعدت بالاستقبال وحدي واقرا..

وهو يلوب يروح ويجي كل شويه على اساس يروح للسياره واني مارفعت عيني اله مطنشته وبالي كله يم الكتاب ...

صارت ساعه ١١ وامي دزت علي يشوي سمج بره وكلتلي احضر التمن والزلاطه وهي كعدت تحضر المركه ... احنه نشتغل وام محمد كاعده وحاطه سله الخضره يمهه على الميز وتسولف ...

حجتلنه على كل عربهم ومنو تزوج ومنو خلف ومنو بنى وتسأل على كل شي ....

جانو جايبين وياهم صناديك برتقال و خيار وفلفل وبيتنجان وجدريه روبه ..

طلعت للطارمه وبايدي سله اريد اجيب خيار وفلفل
واني كاعده اطلع منهم اجه محمد ووكف يمي
رفعت راسي باوعتله وهو عيونه نااار اخذت نفس
ورجعت اطلع بالخيار وعفته واكف محجيت شي وياه

- مو خلص الشهر وين وعدج

اخذت السله وكمت وكفت كباله وركزت بعيونه ..

- مااظن الوقت مناسب لهيج حجي دتشوف ابويه مريض واني مشغوله

- هااا حضرتج ترديني على مرامج شوكت ما ست
زهراء تفرغ نحجي .. اسمعيني عدل طولت خلكي
وياج باليكفي ومخليج تسرحين وتمرحين بكيفج
خليني وياج بالتي هي احسن ولا تختبرين صبري

- عيني لا تكلف نفسك ولاتحملهه اكثر من طاقتهه
زواج اني مازوج واعلى مابخيلك اركبه ماتهمني

درت وجهي ودخلت المطبخ حطيت السله بعصبيه
على الكاونتر ورحت صعدت لغرفتي مطايقه وجوده

والخوف سره بجسمي لان ادري بيهم مو ناس خير
مانزلت بعد ولا حتى سلمت عليهم من طلعو

صعدتلي امي وفتحت الباب بعصبيه بعد ما راحو ..

- انتي متكليلي شبيج لشوكت تضلين بعقلج الصغير
هذا
- شكو شسويت
- فوك شينه كوه عينه ... لج المره كاعده وانتي تشمرين السله وتمشين وتطلع العالم ومتكلفين نفسج تسلمين لاتحترمين اب ولا ام ولا حته الخطار .... ادب سزز عاجبتج نفسج ومنغره على سواد عيونج

- انتي هسه شتريدين حجيج هذا مايقدم ولا ياخر عندي لان انتي حالج حالهم متهميني

- لج كلبه اني اربيج اليوم هاي عينج الا افكسهه

ضلت تشتم وتهوس واجه اخويه مصطفى طلعهه بره اني كمت قفلت الباب وضليت كاعده ابجي ..

كل البنات امهاتهن يفزعولهن ويسالن شبيهن وليش مقهورات الا امي كل همهه اطلع واعوفلهه البيت

مو وقت وكعتك يابه هاي الناس ذايبه وكلهه راح تلتم عليه ...

صار الليل نزلت اطمنت على ابويه وانطيته علاجه سالني شصار كتله شي عادي على سوالف المطبخ

هو مابي حيل يحجي ويسال اكتفى بجوابي وتمدد ونام سويتلي كهوه واخذتهه وكعدت بالطارمه ..

بيدي دفتري الاصفر وقلمي الاسود وكعدت اكتب ...
🎋
🎋
الثاني عشر من آيـار من سنه ١٩٨٥...

سلاماً على من يؤنس فكري المنبوذ ...
كالندى على طرف الورق طيفك يااشقري .. كثيراً
هو شوقي وقليلاً حيلتي .. التمس من دفء ذكراك
وما مضى من ايام طرباً اراقص بهِ ايامي ...
فطرف الحبل معك بدأ بالتمزق وكثيراًهو من ينهش به وانا لازلت انتظر من الرحمن يوم اعيش به حريتي كم وددت لو انك هنا تسندني وقت ضعفي وتحامي عني ... تلك النظرات الحانيه كم وددتها لو كانت هنا اليوم وانا بين البيع وغصب الشراء ... تطمئنني بانك معي واني لست احارب لوحدي بطريق مجهول امشي الى السراب ورمال الدرب تحرقني متى ستكن معي ؟؟
متى اكسر القيد من على عنقي ؟؟
🎋
🎋

سديت الدفتر وضليت اباوع بالسما افكر ياترى وينه هسه ؟؟ وشلون حاله ؟ بعده يذكرني وهم مثلي مايغفى الا يذكر ايامنه ؟؟

وشلون بيك محمد مادري ظالمتك لو ظالمه نفسي
بس الحب بالكيف والله بالكيف ....

اخذت دفتري وصعدت نمت ... ومرت الايام ...

وابويه تحسنت صحته ورجع يوكف على حيله وامي رجعت هادئه وحبابه وياي ولاكأن شي صاير ..

وبعد مرور شهر وصلتني رساله من ايوب...
كان محتواها ...
⭐️⭐️
الى امي ومالكه قلبي ..
اما بعد فشوقي لكِ قد ثار بركانه .. واني لا زلت اذكركِ حتى في منامي اجدكِ ...
احبكِ احبكِ احبكِ ..
بقدر ما نبض القلب احبكِ .. كيف حالك يااميرتي ؟
اتمنى ان تكونِ بخير والا يكون قد حدث مايضيق على قلبكِ الصغير ... اما عن حالي فانا مشتاق لعينيكِ اعذري بعدي هذه الايام يااميرتي .. قد كنت بمهمه فاوضاع البلد سيئه والعدو من بيننا والواجب يقتضي مني كل هذا البعد ..

ذهبت للبصره اسبوع واشتريتُ لكِ هذهِ المفكره اُكتبي لي بها كل مايحدث بايامكِ هذه .. اكتبي كل مااشتقتِ الي .. واكتبي لي بعض من ذلك النثر الانيق الذي تكتبيه في لياليكِ فانا مشتاق لكل تفاصيلك
ياانستي .... اريد اخباركِ باني ساذهب الى الرمادي بأذن الله غداً سأحضر عرس اصغر اعمامي ..
وبعد عودتي سأذهب بتدريب سري لكن لم اعلم المكان بالضبط فهذا يبقى سراً حتى تحين لحضه الذهاب .. ولاتقلقي علي فانا بحفظ الله ..
اهتمي بنفسك وادعي لي دوماً وكونِ قويه بغيابي
فأنتِ امرأتي التي اثق بها ..

حبيبك المخلص
ايوب
⭐️⭐️

قريتها وكلبي ينبض بلهفه حتى اعرف كل كلمه كتبها شنو .. اتسابق ويه الثواني حتى اخلصها ...
حضنتها لصدري وشميت ريحتها وارجع اباوع لخط كلماته الثابت ... ضليت اردد الحمدلله لانه بخير ولان وصلني خبر منه ...
اخذت المفكره اتلمس غلافها الجلد الجوزي واتصفح اوراقها البيض المخططه برصاصي كانت اطراف الورقه ذهبيه وكل ورقه مكتوب بيهه تاريخ واليوم واول صفحه مكتوب بيهه ...

" اهداء الى امي ... ابن شمر" وتوقيعه ...

ضحكت من كل كلبي من قريتهه .. جيته المفاجأه هاي نستني كل الصار وكل تعب الانتظار ...

بعد مرور ايام ..

وقت الظهر اني حرارتي مرتفعه بسبب الحساسيه
كل جسمي نار وروحي خاويه نايمه بغرفتي
وفجأه تدخل عليه دعاء ...

- ابويه يريدج انزلي بسرعه
- ليش شكو
- ........
.
.
يتبع 🌸🌸🌸