- صباح الخير عيني شو تاخرتي
- مو اني اطلع متاخره شويه من البيت وضليت انتظر المنشأه
- دطلعي من وكت يمعوده حتى نكعد نسولف نفتر
هسه لازم نروح كبل للمحاضره
- يلا عادي من نكمل نطلع نفتر

دخلنه محاضره بعدين طلعنه نزلنا سوه واول مافتحنه باب الاستعلامات صار بوجهنه ولد صارت عيني بعينه
هو رأساً حجه ..

- انتي هين يولو من ساعه ادور عليج
- ههههه زهراء هذا أيوب الولد الي كتلج وصيته
على الماده البارحه
- اهلا وسهلاً
- هلا بيج ... اكضبي يولو هاي مادتكم رحت اخذتهن من ولد الاقسام وجبتهن الكم
- شكراً ايوب ماقصرت
- العفو يلا انا اروح
.
.
- ولج هذا منين لكيتي
- شبيج ويانه بالشعبه مشفتي
- لا ماشايفته ابد
- انتي مطفيه يكعد ويه الولد المخابيل بلاخير
وصوته عالي يهرج الدنيا ماتسمعي من يحاجي الاستاذ
- مادري مامنتبهه عليه ولا على اي واحد منهم
بس لهجته غريبه هذا منين
- من الانبار هوه
- شجابه هنا
- مادري والله شكلولج عليه دلاله مال القسم
- ههههههه لج مو هيج قصدي
- ادرري داشاقه شبيج
.
.
مر اليوم عادي وبالبيت ...

- بيبي شصار وياهم اليوم شسوو

- هذوله ناس شرانين يابيبي مدري الله شورطني بيهم عندت اله اخذهه لابوج وهو مجان رايدهه اني شجاني وتخبلت عليهه .. الله عماني عنهه

- هسه صارت بعد لتلومين نفسج بيبي

ضلت تجيب وتلوم بنفسهه لان اختارت هالمره من دون هالنسوان ...

بعد يومين بالكليه ........

كاعدين بالمحاضره وفرح ملتهيه تكتب ملاحضات
واني مركزه على الشرح فسأل الاستاذ على
حل وحده من الخوارزميات ورأساً جاوبه ايوب
هو وكاعد شرحها اله بالتفصيل كله كوم اكتبهه
كام كتبهه وشرحهه النه .... اني وفرح صفنه
هذا شوكت لحك يفكر بيهه ويحلهه !!!!!

طلعنا من المحاضره واجتي علينه "روعه "بنيه ويانه بالقسم ....

- شلونكم بنات
- الحمدلله
- اكدر ارجع وياكم اليوم اخويه ميكدر يجي ياخذني واني اخاف وحدي اطلع
- اي اييي شكو بيهه من نخلص دوام تعالي
يم الباب الرئيسي ونطلع
- ماشي ،،، زهراء مو اطلعين وتنسيني
- لااا والله اضل انتظرج

خلص الدوام وطلعت لكيتهه واكفه اول ماشافتني ضحكت واجتي عليه .... فرح طريقها غير عن طريقنا فطلعنه وحدنا ....

- زهراء حكلج شغله ،،، تدرين من اول مادخلتي
القاعه اني كلت الله شكد حلوه هالبنيه

- هههههههه انتي الحلوه عيني

- والله شبيج حتى شكد تمنيت نصير اصدقاء
بس انتي اختفيتي ثاني يوم

- اي مو مكدرت اجي يومين داومت بس الاربعاء
والخميس

- ايي اني عبالي انقلتي لو بطلتي كلت راحت
بعد ماشوفهه ،،،، بس همزين لكيتج

- هههههههه وين اروح يمج باقيه

- عفيه انتي شكد هادئه عكس فرح هذيج متسكت
انتي ولاتحجين اليوم كله اشوفج تحجين كلمتين
والباقي مستلمته فرح

- لاااا فروحه حبابه والله على نياتهه بس هي شويه مرحه اني طبعي خجول فمااحجي هواي

- هههههه والله اني حبيتج كلش عجبتني عيونج
علميني ارسمهن مثلج

- ادللي باجر اجيب الكحله وياي وارسمهن الج
.
.
ضلينه الطريق كله نسولف هي حجتلي على عائلتهه عدهه اربع اخوان واخت صغيره مريضه بعقلهه ونسوان عمهه اثنين موضفات عايشات وياهم هنه المتحكمات بالبيت ...

وصلنه للمنطقه هي نزلت بدايتهه واني كملت نهايه
الطريق وحدي .... شفت علي من بعيد اشرتله
اجاني ورجعنه سوا ....

خطيه لكيت بيبي محضره الغدا واكلهه يجنن
مو مثل اكل امي تسوي مال استعجال
لا بيبي تعتني بالطبخه وتكثر بلاكل وماكو واحد
يكوم اذا ممخلص ماعونه ....

تغدينا ونمنا كعدت العصر تنظيف وغسلت ملابس
وقريت اخواني صارت بالسبعه حضرت العشه
كملنا و اختي تنظف المطبخ باليل واني رحت حضرت ملابسهم للدوام وسبحت والدنيا شته بااارده اكعد بغرفتي فوك واشغل الصوبه واضل متلفلفه بالبطانيه واكعد اقره ساعه وانعس اروح انام ...

الصبح بالكليه ......

- اكلكم بنات خلي نشوفلنه واحد يشرحلنه هالماده
بزعت روحي منها شلون هم نرسب !!!

- فرح يعني هو منو مفتهم ديجي يشرح كلمن حاير بنفسه ،،،

- لااا اني هسه اروح اشوفلي واحد يشرح معليه
اني شنو اضل مطفيه بالمحاضره هالماده شيقراها
بلامتحان ...

راحت وضلينه اني و روعه كاعدين اجتي وياها ايوب

- هاا السلام عليكم
- عليكم السلام
- كومن بنات خلي نروح للحديقه الوره ايوب حيشرحلنه هو مضبط اموره بيهه

كمنه اني و روعه ورحنه للحديقه احنه البنات كعدنا على المصطبه وهو ضل واكف كدامنه حاير شلون يشرح اخر شي صاح بينه ...

- يولو انتن جايباتني هين اضل واكف شلون
اشرح بله ،، كومن اكعدن بالكاع حدري

كمنه كعدنا صرنا مثل دائره وهو يشرح ويكول
حلن هاي وكتبن هاي كلش مرح هو وبسرعه يندمج
ويه الكل اني و روعه بس نضحك منحجي شي
و فرح كل شويه سالفه ....

عبرت ساعه ونص على كعدتنا كمنا عزمناه على
الغدا ورحنه كلنا للكافتريا ....

- عليش متاكلن انتن

- هاا لا دناكل
- عوفهن عوفهن ايوب هذني فاهيات هسه اني وياك نقضي على الاكل ويضلن هنه يتصفنن

- هنه اليخسرن يابه املو بطونكم هسه يجينه
هالعمران المشيب يسلك ابو ابونا
- ههههههههههه
- انتن كرايب اشو كلش متصافيات
- لا زهراء صديقتي بس احنه نرجع سوه وصرنا
مقربات هيج
- هاااا ايييه الله يديم الي بينكم وفرح انتي ضلي
هيج اخذتهه لصديقتج منج
- لااا اذبحهن اثنينهن بعدين هي صديقتي الي اول
اني عرفتهه بالبدايه حقي اكثر بيهه مو زهرتي
- اكيد حبيبتي
.
.
ضلينه نتشاقه وهو مثل فرح مايسكت يحجي عن كل شي السياسه عن العميد وعن الطلاب وهذا
لتمشون وياه وهذاك حباب هذا اهله منا وهالبنيه
حبابه وفقيره ذاك شاطر وهذاك غشاش
مبقه واحد مافصله شنو هوه ... واحنه بس نضحك
على سوالفه وهو وفرح كل شويه متعاركين بشغله
.
.
بعد مرور اسبوع ...

صارت عطله راس السنه واني كنت غايبه باليوم
الي قبله فدوامت على السنه الجديده ...
شفت فرح واكفه تنتظرني رحت عليها بوستهه
وكعدنا ...

- لج زهرااااء ماتدرين شصاار

- حسيت صاير بيج شي من هاي ضحكتج
الشيطانيه

- لج لاااا تذكرين هذا احمد الولد الكتلج عليه
شكد هادىء وحلو

- اي شبي

- بيوم الي غبتي بي اجه صارحني

- ياااااا صددك ولج خاف يطلع عنده سوالف
مو زينه

- لاااا شعبالج اني هيج ثوله رحت وصيت
جماعه وجابو كل اخباره وكلش فقير واهله
طيبين هو شاطر

- عزا بعينج لج انتي شنو هسه ماعرفنه منو يخطب منو انتي لو هو

- يااخطوبه انتي دااكلج حب حبببب

- النوب علينه حب لج بابه وين عدنا حب
مو عيب هالسوالف يريدج يجي يخطبج وفضت
السالفه ،، بعدين كليلي انتي شحجيتي وياه

-كلي اني نعجبت بيج من اول سبوع بس خايف
اجي احاجيج واستحي من صديقتج وانتي متعوفيهه فلكيتهه فرصه اليوم

- هههههه هاي لان رحت تلعبون هيج ورايه

- اني كتله افكر واردلك خبر ،، كلي الج لحد
صباح اليوم الاول من السنه الجديده لازم تكليلي
اي او لا

-يعنيي اليووم !!! بعدج محجيتي مو لاتوافقين

- ههههههه اكلج بس مو تضربيني

- لااااااا لج بس لاحجيتي

- اييي الصبح اول ما دخلت لكيته بوجهي
اخذني على جهه وكلي هسه تكليلي جوابج
قبل لايجون الطلاب وتصير هوسه
وكتله موافقه وعفته ومشيت ...

- لجج غبيه غبيه بهالسرعه حبيتي شساللفه

- مادري اني مو كتلج عجبني هادىء وعينه مو زايغه هسه شصار يعني خلي اجرب

- اوووف منج دنتبهي زين على نفسج لاتجيج
حجايه
.
.
صارت هالايام فرح بعيده عني شويه واكثر وقتها
ويه احمد مرات ميدخلون محاضره ويضلون يفترون مرات يطلعون خارج الجامعه ومرات اشوفه هو يدرسهه وتضل تضحكلي من بعيد ...

بقينه اكثر شي اني و روعه هي كلش تعلقت بيه
احنه مالنه دخل باحد بقيه البنات اني مااحجي
وياهن قليل يعني ماارتاحلهن كلش متكبرات
لان اغنياء حتى هنه ميختلطن باحد لا من ولد ولابنات مجموعه وحدهن يمشن ويسولفن ....

قسمنا حدد بعد يومين حفله التعارف ....
رحت اني وعمتي العصر للسوك واشتريت
ملابس للحفله اخذت فستان ماروني طويل ومخصر
وفوكاه عمتي اختارتلي شال ثخين ينحط
على الجتف وهو عريض وطويل يعني بس مجرد
احطه على جتفي لونه رصاصي وحذاء رصاصي
كعب ناصي ....

صباح يوم الحفله ......
لبست وحطيت مكياج بس كحل فوك الجفن وحمره ماروني وشعري رفعته كله وبس نزلت خصل كصيره على وجهي رحت للدوام واول مادخلت اتمشى للاستعلامات شفت روعه كدامي اخذتها ورحنا عدلنا شويه بالحمامات وطلعنا للقاعه الجبيره الي بيهه الاحتفال ....

كانت مزينه كلها وعلى المنصه واكفين الولد يتشاقون ويقلدون على بعضهم وبنات اثنين فاطمه ونهى هنه مستلمات مسؤوليه ترتيب الكيك
وتعاركو على سالفه شلون نختار منو يكوم
فأخذو من كل واحد منه شغله وحطوهه على المنصه وكل واحد يكوم يعرف عن نفسه وبعدين من ينزل يختار وحده من هاي الشغلات ويكوم صاحبهه

كامت فرح والبنات كلهم والولد بقينه بس اني
ولد اسمه رائد وايوب .،، صار دوري كمت
مرتبكه وخجلانه ....

- اسمي زهراء من الكفاح .. باب الشيخ .. عندي اثنين اخوه واخت واني اكبر وحده بيهم ،،، اكو شي تحبون تعرفوه

- منو اول شخص حبيتي بالكليه
- ههههه اكيد فرح و روعه والباقي بعدني ماعرفهم
- شنو هوايتج ولونج المفضل
- هوايتي الكتابه ... اما لوني المفضل
فهو الابيض والاخضر ...

نزلت من المنصه واختاريت قلم وكفت اشوف صاحبه منو جان يكوم ايوب باوعلي بنظره مطمئنه اجه اني قبل ميوصل حطيته على الميز ونزلت

- لج فرح متت ضحك هاي انتي ليش هيج
تضحكين بيه عابتلج

- لج انتي ثوله داكلج انتبهي على ايوب
انتي عبالج انصب عليج

- ليش شبي

- لج مشفتي شلون صافن عليج وحاط ايده
على خده وماد رجليه شطولهن مشفتي حتى
محجه ولا سألج شي

- اي وشسويله واذا صافن قابل بس اني موجوده

- لاا امي الواكفه تحجي هناك

كام هو انطه شعر على عشيرته بالبدايه
وبعدين عرف نفسه ....

- انا ايوب ابن شمر اصلي انباري ساكن بغداد
انا صغير اخوتي ...

كملو تعارف وكعدنا ناكل وبعدين كمنا اخذنا
صوره جماعيه واخذنا احنه البنات وحدنا صوره

جان تجي فرح وجايبه احمد وايوب وياهه وكالت تعالن ناخذ صوره ويه استاذنا الصغير ...

رحنا اخذنا صوره وطلعنه للبيت ماكو محاضرات
اليوم ....

البيت مشاكل امي متخلص كل يوم محكمه وطلابه
بيبي تمرضت وحرنا بيهه بالدكاتره صار ضغطها
دائما صاعد وتون من راسها ومعدتها ...
ابويه مهموم ومقهور علينه وميكدر يسوي شي
اخوتي منتبهين بدراستهم واني وابويه نبعدهم
عن مشاكل البيت ومنخليهم يعرفون شي

بالدوام صارت فرح بعيده كل البعد عني
احاجيها على كد السلام وقتها كله ويه احمد
صار عدنا امتحان وهالماده بس الولد
يعرفون بيهه احنه البنات مطفيات لان هي كلها رموز ...

صار ايوب ويانه اني و روعه وهو يشرحلنا
صرنا كل وقتنا سوه ناكل او بالمحاضره يكعد
يمنه ويسولف ويشاقه ويانه ...

مره اجتي عليه فرح من دنطلع للبيت وكفتني وحجت وياي على جهه ....

-زهرااء اسمعيني زين اني ماكدر اضل وياج
بالدوام لان احمد ميخليني اروح واحس نفسي
تورطت بهالسالفه

- مو كتلج فكري زين كبل استعجلتي

- لج هو حباب والله ويموت عليه بس خانكني
لا يخليني اشاقه ويه احد ولا اكعد ويه البنات
يكلي اغار اشوفج بعيده عني ..

- شدعواه قابل راح ناكلج عفيه اني محبيته

- دعوفي هالسالفه هسه خلي احجيلج شصار

- شكوو ولج بعد
- هذا ايوب اجه عليه البارحه وحجه وياي من
احمد جان بلامتحان بعده وكلي اريدج تشوفين
زهراء اكو بالهه احد وشنو تفكيرها بيه

- شنوووووووو هذا شبي تخببل؟؟؟ ليش هيج يحجي

- لج ياثوله مو كتلج ميه مره نظرته الج مو خاليه
صدكي هو يحبج لان هو حاجي ويه احمد
وهم موصي يحاجيني حتى اشوفج تقبلين بي
اذا اجه يتقدملج يكول مااحاجيهه بغير صفه
الا بالحلال

- لا فرح لا مستحيل

- لج انتي شكد غبيه وين تلكين واحد مثله
جمال واخلاق وشفتي شلون طيب وعلى نيته
وديكلج اله اخطبج يلا احاجيج يعني يريد يجي
لبيتكم وياخذج بالحلال حتى لاتصير عليج سمعه
وين تلكين هيج واحد يخاف عليج وميت بيج

- لج مو هو السبب هو ماقاصر بس اني
ماكدر والله ماكدر ىكليله هالسالفه يشيلهه
من باله لان تعبه وتعبني

- بس فهميني انتي تحبين احد اكو شي بحياتج
انطيني سبب خلي اقنعه يكف عنج

- عوفي اسبابي الي ولا دكليله انتي حجيتي
وياي فهمي بطريقه انج فهمتي مني بس بدون
متحجيلي ماريد يجي ويحاجيني بالسالفه
ولا اريد صداقتنا تخرب خلينه هيج احسن

- اوووف منج ماشي مااحجي بس انتي فكري
وحتى لو سنتين عادي يرضى بهالشي

- لا سنه ولا عشره اني ماكدر وخلص الموضوع

رجعت للبيت متغيره احوالي شبيه اني هيج خايفه
خطر بالي محمد هذا اختفائه مايبشر بخير ادري
بي بس لا يسويلي سالفه ويقنعهم يقدم العرس
————-————

كل العالم تغير وكل شي اعتربته الناس من ضمن حريه وديموقراطيه بس الزواج عمره ماكان الا من ضمن العادات والتقاليد والجزء الثاني قسمه ونصيب ...

يتبع....

#شقراء_بغداد

بارت_٤


مشت ايام عادي نفس المشاكل بالبيت وفرح وصلت
الحجي اله بس هو ماتغير وياي ولا بين اي شي
الى ان مره عدنا امتحان وكاعدين نشرح بالقاعه
لوحدنا روعه ترخصت وكامت للحمام واني كمت
افتر بالقاعه وايوب كاعد على ميز الاستاذ
اجه صديقه اسمه منير يركض ووجهه اصفر
كعد رأساً وبالكوه ياخذ نفس ....

- هاي شبيك منير يول ليش تركض هيج

- خلي اخذ نفس واحجيلك

- ول يابه احجي شبيك تكاونت ويه واحد

- لاا بس تذكرون هاي البنيه الحلوه اروى
هاي الي جنه نطلع ونكعد سوه

- ايييه شبيهه

- اجتني بنت خالتهه وتكلي انته ماخذها لمكان
ولاعب بشرفها واني عندي شهود والبنيه هسه
ممداومه واهلهه يردون يبطلوهه ويردون يجون
يحجون للعميد باجر كالت امهه تجي

- عززا بعينك منير هاي صدك مسويهه انته

- زهراء والله العظيم مامسوي اي شي والله
تفاجأت من حجتلي اني وياها بس ناكل سوه
ونتمشى مرات نكعد بالمحاضره سوه بس لا
ماخذهه لمكان ولا مسوي شي شبيكم اني اجيتكم
تساعدوني لو تصيرون ضدي ...

- يول هسه بنت خالهه وين مشت لو بعدها

- لا راحت لكليتهه هي اجتي دتحذرني منهم

- استغفر الله لك يابه هذا شرف شرررف شلون
تسوون هيييج

- هااي شبيك ايوب داكلك ممسوي شي قسم
بالله مالازمهه للبنيه ومقهور عليهه اهلهه يردون
يبطلوهه وخايف عليهه ،،، لك حتى ابويه لو درى
تنكلب الامه عليه ...

- زييين فهمت هسه روح لابوك واحجيله خلي يسمع منك احسن من غيرك حتى يعرف يتصرف
وام اروى اذا اجتي باجر خلي ابوك يجي هم
حتى يتصافون بالحجي وانته احلفلهم واذا
مثل ماكالت بنت خالتهه عدهه شهود خلي تجيبهم
ويشهدون مدامك ممسوي شي لاتخاف ..

- لك والله ريكي نشف ماعدكم مي هنا

- ماكو يابه شايفنا مفتحين محل كلها خلك قاعه

- اني رايح لابويه هسه بعد مااكدر اصبر اكثر
وانته استفسر من الولد خاف حاجين شي
بس مو تحجيلهم سالفه كلهه وزهراء فدوا افهمي
من البنات شبيهه

- ماشي ماشي روح ارتاح ولا تخاف
- روح يابه روح الله يستر من لسان هالعالم
يااابه شنوو ذول واحد يتهم بشرف لاحول ولاقوه
الا بالله

- ايوب اعتقد السالفه بيهه جذبه ومصلحه
لان منير غني يجوز اكو لعبه صايره

- حتى لو اكو نفرض اكو مو يجون يتهمون البنيه
بعدين هو يحبها منير لو يردون زواج وهيج
تكدر تقنعو يزوجها ماتستاهل كل هالسالفه

- ماادري بس سوالف الحب وهاي اذيه مو نفع
عن نفسي ما أمن بيه

- ايييه كلتيلي ماتأمنين يجيج يوم وتعبديه
مو بس تأمنين بيه

- هههههه ههههههههههه ماالحك لذاك اليوم

- ههه لييش تخافين تموتين

- نفس الشي ماتفرق ،،، كوم خلي ننزل اني ضجت هنا

- لاا مننزل اكعدي اشرحلج دتنجحين ماريدج
تضلين مطفيه بالماده

- اني شعليه هو ديرسبني مو داقره

- هههههه ههههههههه

- شبييك !!

- داقرره اقرره ،، هههههههه ول يابه انتي عليش تحجين هيييج

- يااا هاي شبيك اني شعليه هو هالحرف يكسر
عندي شسويله ،، بعدين انته شكو تضحك
ماسامع واحد يكسر بالراء

- هههههههههههاااااا اسكتي احسن

- والله مو صوجك صوجي اني كاعده يمك ومخليتك تتمضحك بكيفك

عفته واخذت جنطتي وطلعت اسمعه يصيح
عفته ومشيت شكو يضحك على حجيي على اساس
هسه حجيه شلون ابو يولو ...

لكيت روعه جوه صحت عليهه ..

- انتي وينج شكد صارلي انتظرج

- موو لكيت بنات ديحجن على السفره وبقيت
يمهن التهيت بالسوالف

- ياسفره هاي

- الولد اقترحو نروح سفره للجزيره وناخذ اكلنا هناك ونكضي النهار ونرجع وجنت دااشوف منو
تروح حتى اكول لاهلي

- ااففففف ومنو حتروح منهن

- بعد ممقررين انتي تجين

- لاا ماريد عوفيني هسه راح اطلع اتمشى
تجين وياي لو تبقين

- لا اجي اجي شبيج ضايجه

- مابيه شي

طلعنه وتمشينا كتلهه نطلع للمكتبه ورحنا اشتريت
كتاب للدكتور علي الوردي احب كتاباته
ورجعنه اول ماكعدنا اجه ايوب ...

- وين جنتو
- زهراء رادت تروح للمكتبه اشترينا كتاب واجينه
ليش اكو شي
- هااا شو اشوف شنو هالكتاب
- ماانطيك عوف
- انطيني اشوفو شنو وارجعو
- كتلك ماا ماانطيك وبعدين لاتحاجيني روح
- هاي شنو متعااركين من شوكت تعاركتو
- يابه روعه انتي احكمي ... انا ضحكت على
حجيها بالراء وهي زعلت ومشت تستاهل السالفه!
- ايوب مااسمحلك تضحك على اختي وانته غلطان ويلا اعتذرلهه يلاا
- لااااه علينه النسوان تتأمر لااا يابه لااا
اسمعيني يابه احنا رجاال من ظهر رجاال
مو مره تمشي كلمتهه علي وانا ان ردت اعتذر
اعتذر بكيفي مو بحجيج
- هههه النوب هو الزعل
- ايييه سمعتج ترا لاتبسبسين
- وذا سمعت شكو تزعل هي ادافعلي لان تحبني
- وانا ماكو احد يحبني يدافعلي
- ماكووو لااا واني ماريدك تعتذر ماشي
وهاك الكتاب اخذه الك

خليته بأيده واخذت روعه ضاجت منه ورحنا للقاعه هو شويه واجه كعد ورانه ،، قنعت روعه وضحكتهه ونسينا السالفه ... من دنكوم هو حط الكتاب كدامي وطلع بسرعه ....

- هذا شبي ليش هيج يسوي مو كتل نفسه عليه

- مادري شو حطه وراح ،، ياا شوفي هاي
حاط ورقه

ورقه صغيره بيضه حاطهه مبينه من الكتاب فتحتهه
كاتب بيهه ....

اعتذر لاسائتي لجمال حرفك ورقه صوتك
ابن شمر ...

- هههههه روعه شوووفي
- ههههههههههه شكد حلوو هذا ابو يولو هيج
يعرف يكتب ويتغزل
- لج مادري تفاجأت بله هسه شسوي
- هذاا عينه طالعه خااف ....
- لااا روعه لااا كافي لاتحجين ولا شي

ضلينه نضحك وطلعنه نزلنا وسلمنه على البنات
دنطلع للبيت لكيناه واكف يم الباب الرئيسيه
ويباوع بضحكه اجه يمنه وكال ...

- باجر نعوض درس اليوم كلهه كطعتو علينه
تعالن من وكت
- ماشي
- ههههه ياب روعه لاتزعلين منا غير كلامج يدك بغيرتنا يايابه
- ما عليه راح اضل زعلانه لحد مااشتري كتاب
مثل زهراء واشوف شلون تراضيني
- لججججج روعه متعرفين تسكتين
- يولووو فضحتينا.ههههههههههه
- هههههههههههه اتشاقه والله شبيك نسيت السالفه
هم استاذ هم شاعر هوايه هيج
- كافي روعه ،،، ايوب باجر نتفاهم على الشرح
هسه خلي نروح تأخرنا ... مع السلامه
- الله وياكم
.
.
- لج رووعه ليييش هيج شكد عيب خجلتي الولد
- اييي احسن حتى يعرف اني موجوده مو عباله
مادري بسوالفه من يتغزل بيج ويباوعلج
- لج عززاا ياغزل هذا هو اعتذارررر
- ههههههههه والله حقه من يضحك هالولد
بس شكد رجولته قويه شفتي من كلمه صارت
عينه تجدح
- اييي احسن هيج يبقى رجولته لايكه ويه شكله
- هاااا عيني ام شكله شكو تباوعين انتييي
- هههههه لج شبيج يعني ع اساس انتي ممنتبهه
عليه شكد ضخم
- وحلو هم ابد مشايفه هيج ولد اشكر وحلو
- دكااافي لتضلين تفصلين بالولد امشي

.
.

بالليل كعدت برا اقره بالكراج كملت حل المسائل
واخذت الكتاب من فتحته اتذكرت الورقه رجعت
قريتهه وضحكت ...

ابن شمر ياترى شنو قصتك ؟؟؟؟

ثاني يوم الصبح كعدت احضر الريوك وبيبي
تكعد باخواني ابويه طالع من وكت للمحكمه
طلعنه للدوام ودعاء وعلي عدهم اجتماع
بمدرستهم رحت وياهم للمدرسه ...

نبهوني على دعاء خامله بالدرس ومتنتبه
وضلو يسألوني على امي واكضيهه جذبات
حتى بس اخلص من الموضوع طلعت وياهه
بالساحه ...

- دعاوي ليش هيج معلماتج يشكتون منج شنو
المدتفهمي ليش متكليلي

- اني افتهم بس همه يضوجوني هذني البنات
يحجن عليه يكولن امهه متريدهه خطيه ويضلن
يعيبن عليه واني انقهر وماانتبه بالدرس

- معليج بيهن حبيبتي بعدين احنه مو كلنه وياج
اني احبج وبيبي وبابا لاتضوجين

- بس اني اريد امي ليش كلهم امهاتهم تحبهم
واني لاا صار سنه مشايفتهه ليش متحبني هيه

- حبيبتي هي عدهه ظروف واخوانهه ميخلوهه
لتضوجين هي هسه كم يوم وتجي تشوفج
هسه اضحكي يلا اضحكيي اضحكي لج

- ههههه كااافي لا ادغدغيني كاافي

- ااييي عفيه بالبطله اريدج هسه تروحين
وتنتبهين بالدرس واكسري خشمهم اريدج اطلعين
درجات عاليه حتى يكولون هااي شلون شااطره
دعاوي ومتحتاج احد صيري قويه

- اييي اله اجيب اعلى درجه واخليهن يغارن
خلي يصبرلي هذني امهات الكفشه

- ههههه اي ضوجيهن بشطارتج يلا روحي
يلاا .. اني تاخرت على دوامي

- مااشي

باستني بخدي وراحت لصفهه طلعت مقهوره عليهه
خطيه طفله شمدريهه بامهه وعمايلهه ...
صدك راح تصير سنه وهي ماسالت عنا ولا شافت
واحد من اخوتي شكد كلبهه قاسي علينه
هاي لو بيبي لو بالنار هم تجي تشوفنه وتطمن علينه ... الله يهديها ربي لاتخلينه نظلمها بس
انته دتشوف شكد دتأذينا ومبهذله احوالنا ...

ضليت الطريق كله افكر بسالفتهه واحاجي ربي
عليهه هو الوحيد اليسمع ويفهم شعوري بيهه

وصلت الكليه ساعه عشره لكيتهم ديطلعون من
المحاضره اجتي عليه روعه رأساً ...

- زهراء وينج ليش مادخلتي محاضره

- هستوني وصلت جنت بالمدرسه اخوتي
عدهم اجتماع ورحتلهم من وكت علمود الدوام

- ليش وامج ابوج وينهم شكو انتي ترحين

- عدهم شغل ،،، شلونهه المحاضره هم امتحن ؟؟

- لاا مامتحنه بس ايوب جان يدور عليج ومخبوص

- ليش شيريد

- شبيج مو باجر حنمتحن بماده دكتور نعمان
واتفق ويانه نشرح من وكت اليوم اني اجيت وانتي
ماكو هو مشرح شي كال نهايه الدوام

- هااا زين سويتو لان عندي هواي اساله بيهه
البارحه قريت شويه وحليت كم شغله بس عندي
اشياء مفاهمتهه وينه هو خلي نحاجي

- اكيد يم جماعته خلي نكعد وهو يشوفنه ويجي

كعدنا نسولف ونراجع بالماده الثانيه دخلنا المحاضره
واجه ايوب كعد يمنه من جهه روعه واخذ دفترهه
يكتب بي ويحطه كدامنا ...

- من اطلعن كبل للحديقه عندي طلعه ولازم نخلص بسرعه شرح

كتبتله روعه ..
- خاف مانلحك نشرح اذا مستعجل اجل طلعتك

- نلحك معليج هسه انتبهو وبعدين نحجي

اني اضحك عليهم من يكتبون ويتهامسون
طلعنه وهو راح ويه الولد واحنه للحديقه كعدنا
شويه واجه كعد وجايب دفتره وياه ...

- ايييه شلونكم يابه ،، وينج الصبح ضربتينه بوري

- جان عندي شغله وتأخرت يله وصلت

- شنو شغلج بله اليأخرج على دوامج

روعه :اخوانها عدهم اجتماع بالمدرسه وراحتلهم

- روووعه

- شكوو يولو تخزريها واذا حجت هسه قابل شنو
شصار عجل اهلج عليش ميرحون للمدرسه

- عدهم شغل مايلحكون ،،، خلي نشرح يله
ماكدر اتاخر هواي

- لييش هم اكو شغل عندج

- اي ويادوب الحك اقره وامتحانات اخوتي هم
خلي نشرح يلاا كافي حجي

- وانتي شعندج كله اخوتج اخوتج امج وين

- عدهه شغل لتضل تسأل اذا متشرحون حتى اكوم

- لا يابه راح نشرح

صار يشرحلنا ويكول حلو هذا وهذا روعه كالت اروح اشتري واجيكم اني ضليت احل وهو يحاجيني ماارد عليه مامنتبهتله دااكتب وجر القلم من ايدي

- هاي شنو شبيك

- مو احاجيج ليش مطنشتني

- انته مو دتشوفني احل شكو تزعجني

- انا هين الاستاذ من اكلج عوفي تعوفي وتحاجيني

- هاي عفته يلا شتريد تحجي اسمعك كولي

- هوو اريد اسألج تجين ويانه بالسفره الخميس

- لا مااروح عندي شغل

- شسالفه الشغل هذا شعندج مكتب ومادري

- يعني اله تعرف كتلك عندي شغل ومالي واهس
اروح اصلاً روحو انتو

- انتي من اجيتي وشفتج من بعيد مدري شبيج
جنج مخنوكه شصاير وياج اليوم

- لاا ماكو شي هيج علمود اختي شويه مو زينه
بالدراسه وضوجتني

- اييه عادي يابه جهال بعدهم هسه اله اجيبلج
عشره خلي تجيب تسعه شكو بيهه

- هههههه مو قصه عشره وتسعه بس اخاف اني
مكاعده ادرسهه زين وخايفه عليهم

- اهلج وينهم زهراء احجي الصدك

- كتلك عدهم شغل وممتواجدين دائماً

- جذابه وبعينج بعد يولو انتي حاسبه مااعرفج
انا من صوتج مبينه تجذبين ،،، انتي على نيتج
لا توسخين نفسج بالجذب اذا خايفه مني تحجيلي
فالج الامان

- وشنو الضمان

- ايوب مايجذب عليج مو من رجولته هاذي الطبايع

- وانتو شكو مهتم لاهلي وسالفتهم

- مو همي اهلج اليهمني انتي ماريد اشوفج
يوم بدون ماتضحكين

- لاتخاف كلشي بخير اني واهلي وعلى اهتمامك
فشكراً وهسه اجتي روعه وخلي نكمل شرح ورايه
طريق

- ايييه اشردي اشردي لاشوفج وين ترحين

روعه : هااا بس لا قريتو بدوني

- لاا انتظرناج انتي شكو تتاخرين
- مو هذني البنات يوكفن ويسلمن كل شويه
وحده جايه والتهي وياهن جبتلكم بيبسي اشربو

.
.
طلعنا ورجعنه للبيت كملنا الغدا وكعدت اقرا
امتحاني كملت للعصر نمت بره ساعتين كعدت
وكفت احجي ويه بيبي بالمطبخ واسمع صوت
مصطفى يصيح بالهول ...
ركضنه عليه ولكيناه واكع بنص الطبله ومكسوره هي وايده معوجه وهو يوون ويصيح ...

- لك يمه عزا العزاك شجابك ع الطبله

- بيبي ايدي بيبيي اااااه

- ولج روحي جيبي عباتي وكعدي ابوج يلا ولج
تحركي

ركضت اجيب العبايه والشحاطه وكعدت بابا
كمز بسرعه ونزله ركض اخذوه للمستشفى
واحنه بقينه ننتظر اني وعلي ودعاء

اباوع على الطبله شكسرها هي خشب وقويه
معقول بس يطخهه تنكسر بي وهو اصلاً ضعيف
شفتهه مكسوره رجلها ومكلوبه سألتهم شجابه
عليهه كالو كعد عليهه ديقط اقلامه ومن كام هي
انعوجت ووكع عليهه ....

لليل ورجعو مجبسين ايده وووجهه اصفر طلعو
ماخذي للمجبرجي وطاكهه اله وروحه مفرفحه
اجيت بوسته وغطيته نام واني محضره العشه
تعشينه وكلت لبابا باجر اروح اخذله اجازه من مدرسته وقبل ... خطيه بيبي مكامت من عنده
وكل شويه جايبتله شي توكله وتضحكه ....

ثاني يوم الصبح رحت للمدرسه اريد اخذله اجازه مقبلو الا اروح للمستوصف واسويهه مناك
واني مستعجله على دوامي عفتهه و
طلعت بسرعه اريد الحك على المنشأه وصعدت
وصايره ازدحام تخنك ضليت واكفه لحد ما وصلت
نزلت وامشي بسرعه اريد الحك اراجع قبل الامتحان
وصلت واني وجهي عركان وشعري كفش
شفت ايوب بالباب واكف ...

- هاي شبيج يولو شصايرلج

- مابيه شي اجيت اركض عوفني اريد اغسل

عفته ورحت للحمام غسلت وعدلت شعري رجعت
ضفرته وعدلت كحلتي وطلعت لكيته واكف بنهايه
الممر مال الحمامات ...

- شعندك هنا

- انتظرج اطلعين دشوف شسالفتج خبلتيني

- ياسالفه شبيك اجيت متاخره وردت الحك على
الامتحان بس هيج

- ول يابه انتي ليش تتهربين مني مااكل بشر انا
اكفي هين احاجيج

- عفيه خلي اكعد والله تعبت رجليه من الركض
خلي ارتاح وشتريد تحجي احجي

- زين تعاي اكعدي بالاستعلامات
جنج طالعه من حرب تلهثين وكالبه الامه على امتحان

- يلا هسه كلي شتريد بالضبط لان اريد اراجع
باقي بس نص ساعه يادوب الحك

- شتراجعين يولو هنه كلهن قانونين ومسائل شعنده
تعاريف لو نقاط تراجعين عوفي هالدفتر واخذي نفس ارتااحي

- هاي عفته وهسه خليني اهدء شويه واركز
لاتحجي شي

عفته يضحك وحده وغمضت عيوني ورجعت راسي على الحايط هدئت وارتاحيت فتحت عيوني لكيته
مرجع راسه على الحايط وصافن عليه ...

- ههههههه شبييك يولو

- هاي شنو تاخذين حجي

- ردتك تصحى مدري وين صافن

- صافن بيج هواي حلوه

- ايوووب انتبه على كلامك مااحب هيج حجي اني رجاءاً لاتحجي بهيج مواضيع

- هاهيه يابه سكتنا غير نكول الحك يصير نجذب
لا ميصير يولو انا الي بكلبي على لساني
شفتج حلوه كتلج حلوه لو شايفج مصخمه اكلج
مصخمه ومتنرادين

- ياااا شكد جريء انته عيب هالحجي

- اييه تعودي علي لا كل حجايه تكليلي انتبه ورجاءاً
وهالسوالف انا شيخطر بالي احجي اييه مااضمضم
كدامج انا

- بس مو هيج اعرفك اني

- ليش شتعرفين عني انتي

- اعرف بيك كتوم ومتحجي كل السوالف العندك

- مو كلتلج كدامج هيج احجي ويه الغير غير فهمتي

- لا مفهمت ومااريد افهم اريد اطلع ضجت
يلا اشوفك بعدين

اخذت جنطتي وكمت رحت يم روعه وكم بنيه وياهه كعدنا نحجي على المتحان وهي خايفه ومتوتره بعدلهه شويه وتبجي واني لازمه ايدهه واضحكهه لحد متعدل مزاجهه دخلنا الامتحان والاسئله صعبه كلش ايوب خلص اول واحد وطلع واحنه ضلينه نجيبها منا نوديهه منا تالي طلعنه وشفناه واكف بالممر ينتظر اول ماطلعنه صاحنا

- هااا جاوبتو ترا نفسهن الشرحتهن البارحه
يول شبيجن وجوهجن صفره لتجلطني

روعه - مجاوبت اني كلشي نسيت راح ارسب
- اني نص ونص بس اكو امل انجح

- اااخ يابه انا صارلي اسبوع المن اشرح يولو
عليش متقرن شيبتن راسي وانا اعيد بهالقوانين

- كاافي ايوب يعني فوك ماطالعين ضايجين
تزودهه علينه متشوف روعه شلون ضايجه خطيه
وانته تصيح عليهه

- علكيفج يابه شحجينه احنه هسه ناخذهه
ونريكهه ترجع باب اول يلا امشو

رحنه كعدنا ناكل وهو دفع االحساب وروعه تنزل دمعه وتمسح الثانيه لحد ماهو ضل يضحكهه بسوالفه ومدخلنا محاضره طلعنا اني وياهه نفتر بره الجامعه اشترينا اسوارات نفس الشي سوه
ورجعنه نتمخطر بكيفنه هنا وهنا .....

- زهرااء الله عليج تعالي ويانه بالسفره ماريد اروح وحدي مو هلكد اني ويه البنات

- مااكدر حبيبتي لاتزعلين

- ليش متكدرين هو اعتبري دوام مايفرق شي تره

- ماادري خلي اشوف اهلي بس اني مالي واهس
للطلعه بهيج اماكن هالوقت

- هو لاني ادري بيج ضايجه اريد اونسج واضحكج
حبابه احجي ويه اهلج وقنعيهم

- اشوف اليوم اكول لبابا وارجعلج خبر

- يااربي يوافق ابوج ونطلع سوه ونشبع اكل وضحك
وصور لج ماعدنه صوره سوه بس مال الحفله

- ناخذ بلايام الجايه بعدنا تونا بدينه

- زين اكلج هذا ايوب شبي هيج يركض ورانه لكل مكان شو ممرتاحتله

- هههههه لج شبيج هو هيج طبعه يندمج ويه الكل
وماعنده رسميات بالصداقه لاتخافين قابل شيريد
.
.
كمل الدوام ورجعنه للبيت شفت اخويه وكتله باجر اخذلك اجازه يومين وكلي وراهه ارجع اداوم صرت زين وبعدين بيبي كالتلي نظف الاستقبال اني واختي كمنا جرينه القنفات والزوليه ومسحنا واني اجيت امسح القنفات اشوف بيهن لفه صغيره مال شعر اسود وخشن طلعته منه واجتي دعاء هم لكت وره البردات مثله وهم لفه صغيره دائريه ...

- بيبي بيبي تعالي شوفي شلكينه

- شلكيتن شو دشوف. .. ياااه هذا شنو وحده منجن
كاصه شعرها وضامته هنا؟؟؟

- لاا والله بيبي انتي مو موصيتني مااكص شعري
والعب بي واني مثل ماوصيتيني باقيه
ودعاء شعرها موهيج اسود ...

- خاف اخوتج داحسينه هنا

- بيبي اخوتي شعرهم اشكر مو هيج اسود مفحم

- ابقن هنا اني رايحه لبيت ام اسامه هي تعرف
بهالسوالف اني ماعرف بيهن

راحت بيبي واحنه كملنه تنظيف وسدينا الباب وطلعنه
اجتي بيبي وشمرت عباتهه بالطرمه وصاحت ..

- ولج يمعزايه هذا طلع شعر خنزيز

- شنوووو خنزيرر !!! شجابه هناا

- انه ادري شجابه اركضي جيبي نفط خلي احركه

رحت جبت النفط وبيبي ادير عليه واني حطيت عليه
ورقه بيهه نار وهذا بي نار بس مايموع ردت بيبي
حطت فوكاه بعد نفط صارت تطلع منه ريحه تلعب
النفس وكام يصير كوم كوم لحد ماطفت النار بي

- كومي جيبي الحرمل واترسي السطل مي وملح
وخل وامسحي بي البيت كله بسرعه يلا بنيتي
انتي واختج امسحنه من فوك للكراج يلا تحركن

- بيبي غير نفهم هذا شجابه هناا شو حتى ريحته
تخنك هو هيج يطلع من يحترك الشعر

- لج يايمه ماتدرين بالمضموم الله وحده يعلم
ام اسامه تكلي هذا عمل وبعد الله اعلم

- ياااا عمل ؟؟؟ هذا منو يسوي هيج بينه

- دعوفي السوالف امشي امسحي البيت قبل
الغروب

مرت يومين واني شفت امور البيت ماتسمح افتح
موضوع السفره ويه ابويه فتركته ومارحت ....

بعد شهرين اخويه فتحو ايده من الجبس ...
ومشاكل امي ماتخلص من عركه لعركه وصلت لمرحله
انها تكول لعمي وابويه من يحجون بموضوعنا ...

" هذول مو ولدي ولدكم همه انتو ربوهم "
وخوالي الشرفاء يكولون ....

" لعد تردون اختنا تضل خدامه لولدكم حقها تعيش
وتدلل مو بس الك ولولدكم تكضي عمرها انطيها
حقها وانته حير بولدك "

من بعد هذا الحجي صارت العركه الاكبر تضارب
عمي وخالي وصارت كعداتهم بديوان واحد من شيوخ العشيره الكبار بغير منطقه وهناك ابويه
عاند وياهم شيطلبون يكللهم ميصير لحد ما
خربو كعدتهم بعركه ثانيه وكلمن رجع لبيته
وضلو على القضايا بالمحاكم ....

صارت امتحانات نصف السنه .... اني قريت
بالعطله الي انطوها النه بس اسبوع وبوقت الامتحانات صرت اقري اخوتي بالنهار واني
اقرا بالليل .....وابويه هم يقريهم مرات ....

بيبي خطيه تكوم وتكعد تتحسب عليهم وعلى ذاك
اليوم العرفتهم بي .....

هي جبيره وجتوفها كامت
توجعها من الشغل بالبيت .....

صرنا منخليهه تسوي شي بس الغدا والباقي
متعاونين بي اني واختي .....

بهالفتره ابويه صار انطوائي كلش بعيد عن العالم
كره كلشي وحتى الدوام قدم على اجازه مرضيه
وضل شهرين ممداوم ...

الامتحانات كلها ايوب ويانه يساعدنه بكلشي
ونطلع نلكاه منتظرنه صرنا نكعد نتشاقه ونضحك
واجتي مرات نكعد لوحدنا يضل يلمح بمواضيع
اني اتهرب منه لحد ما اجه اخر يوم بلامتحانات

- اكول يابه تطلعون نشرب كهوه ؟؟

- وين يعني

- مكان هنا اعرفو ثقافي وبي كتب لفد ناس يعجبها

روعه : هااا هي يعجبها واني شلون اتصفن عليكم

- اجيبلج جاي انتي هههههه.... هااا تروحين زهراء
صدكي يعجبج المكان ....

- مادري شتكولين روعه نروح

- ماروح اني ماحب هاي السوالف انتو روحو

- لا اذا متجين ماروح وحدي

- يااابه امشن اثنينجن روعه انتي اجيبلج كيك وجاي زيين هييج

- ههههههه اي قنعني قنعني بس يله لخاطركم خطيه بعد متشاوفون ههههههه

- شنو هالحجي شبيج

- يولو ماتجذب البنت هاي عطلنا

- انته مكيف على حجيها ...

- امشن يلا حتى لتتاخرن يلا يابه كومن
.
.
طلعنا وتمشينا مسافه طويله تعبنا وكل مانكله
ها وصلنا يكول بعد وكفنا شربنا مي وكملنه مشي
لحد ماوصلنه ريحه البن واصله براس الشارع

مقهى ادبي كله كتب وطاولات قليله والجرايد بره
والشياب واكفين كل واحد وجريدته ....

ابتسمت وهو يباوع عليه دخلنا وكعدنا وروعه تتمضحك كام هو يطلب وهي خربت ضحك ..

- لج شبييييج روعه فضحتينا

- لج والله ماكدر اسكت خطيه اضحك عليه
يريدج تحسين وانتي مطنشته هههههههههه

- لج كافي كم مره كتلج هالاشياء عيب عييب مايصير وهو لازم يفهمها ماكو داعي احجيها

- انتي مدري شلونج عيب وعيب يكلج اجي لاهلج
تكولين عيب يكلج احاجيج هم عيب شيسوي
يموت نفسه لو شيسوي حتى ترضين

- ماريد منه شي بس خلي يجيب الكهوه وكافي
.
.
- كهوه ساده ؟؟

- ايي

- مثل ماتوقعت تفضلي .. وهاي الكيك لروعه تدلل
تتعب وياي

- ايييي شكراً والله تستاهلون التعب اثنينكم حباببن

- كافي احجي مفرد مو جمع

- روعه من رخصتج انا راح احاجي زهراء وانتي جنج ماتسمعين

- ههههههههههه طلع هالكيك مو محبه بيه بس حتى
تسكتني بيهه وتاخذ راحتك

- ايوب خير شنو شتحجي

- انا جبتج هين ارد افهم شسالفتج

- عفيه رجعنا لهالموضوع

- لا والله فهميني كليلي اي شي اقنعنيني بشي
يخليني اشيلج من بالي

- هذا كله مجرد اعجاب وممكن ينتهي بكم يوم
ماريد نكبر الموضوع

- يولو يااعجاب انا من اول اسبوع دخلتي بالي
ومبقيت طريقه مااحاول افهمج بيها وماترضين
زين كليلي اذا خايفه مني بشي والله اجيب اهلي
الكم واخطبج واخليج تفوتين الكليه وحلقتي بايدج
يابه احنه رجال ديوان مالنه شغل بسوالف اللعب
بشرف العالم ....

- مو هنا المشكله ولا خايفه منك بهذا الشي بس
حياتي متناسبك واكو اشياء ماكدر احجيها الكم
لانها خاصه ومهمه فياريت تفهم ان رفضي لصالحك
اكثر مما هو لصالحي ...

- زهرااء عندكم مشاكل بالبيت ماتهمني انا رايدج
انتي .. تردين انتظرج لوكت تتعودين علي انتظرج
مايهمني الوكت اليهمني مااخسرج

- رجاءاً انسى هالموضوع لاني من احجيلك
شي معناه نخسر هواي فخلينه هيج

- انتتتي تفهميني لو لا اكلج انااا متولع بيييج
دحجي يبنت الناس خلي افهمج انتي شسويتي
بيه ....
تخيلي معي ... انا لاكي قلم وواكف بنص هالطريق واسأل هالقلم المن المن صارلو عمر هالقلم
عندي اجيتي انتي بدون ماتحجين شي اخذتي
ومشيتي بضحكتج اعتبري هالقلم هو كلبي
كليلي شلون بيه اناا بهالحال ...

- غلطت باخذه بدون قصد ارجع اخذه مني ودور
صاحبه الي يحفظه اني حياتي متناسبك وان عجبك
ضحكي وشكلي بس الباقي ياذيك تفهمني
اني مااستهزء بشعورك بس اخاف عليه لانك شخص
حساس وادري برجولتك وطبعك مايرضى بالجذب

-هسه انطيني حل انتي فهمتي مشاعري وفهمتي
طلبي اذا متردين اخطبج ورافضه مشاعري الج
انا شسوي يعني هاا اضل احاجيج هيج وانا
بالي الف سالفه وسالفه

- اووووووف شدخلتنا بمواضيع ..
راح اطلع بره شويه وارجعلكم ماشي بس افكر
بشي عن اذنكم

.
.
.
طلعت بره وكفت على جهه واريد اصفي هالموضوع
من جهه محمد ماادري بي شيسوي واذا هالزواج
راح يصير او لا ومن جهه اني مارايدته لمحمد ادري
بكل نفسي ماترغبه .... ايوب رجال طبعه حلو
ويعجبني بثقته بنفسه واطباع منطقتهم بس
اني ماريد اكله على خطوبتي ويروح يتأذى من يسمع بهالشي واخاف لا متصير بعدين ويطلعني
جذابه واريد اخلص منه ........

هدئت شويه ورجعتلهم .....

- لكيت حل

- اييييه هانت روعه هانت

- هههههههه خلينه هالمرحله اصدقاء لاني
احترم شعورك واحترم طريقه تعاملك وياي بي
فماريدك تدخل بمواضيع تعبك وتعبني وبنفس
الوقت اني بعدني ماعرفت عنك شي يحتاجلي
وقت اكثر

- وحياتج والاشياء الضامتهه علي ؟؟؟

- هاي يبقن مكانهن واني اقرر بيهن

- يمتى تحجيلي عنهن

- اذا ماكدرت اتخلص منهن احجيهن

- زيييين هي ماهانت كلش لكن يلااا نصبر
ها روعه تردين بعد كيك

- كااافي شبعت رجعوني للبيت سطرتوني بحجيكم
اريد اناام

- روعه انتي سمعتي شي

- لا ايوب شسمع ليش انتو حجيتو شي

- ههههههه اييييه هذا المطلوب
يلاا يابه كومن ...

- ايوب هالكهوه طيبه كلش وذوقك حلو باختيار المكان

- اييه يولو بعدج مشايفه شي من ايوب
.
.
.
طلعنه والطريق كله يتمشى يمي ويضحك حتى مشيته فرحان بيهه كانه طفل ويكمز هنا وهنا رغم رجولته
وصوته العالي وضخامه جسمه بس تصرفه غييير

وصلت البيت نفس الروتين المطبخ والتنظيف بس
ماكو قرايه عطلنه ..... رحت نمت كعدت العصر
ماكمت من الفراش بقيت متمدده وافكر بي ليش
هيج اني مااكدر ارده رد قوي واخلي يروح
ليش اخاف فقدانه واخاف صداقتنه تخرب ؟؟؟؟

اول اسبوع من العطله عادي كله نفس الشي
ثاني اسبوع اجوي اهل محمد علينه .....

تغدوا وشربو جاي وامه وخالاته يتبسبسن كل شويه
اني مامحجبه لان ماعدنا الا قلييل بغداد محجبات
فكعدت كدام ابوهم وعمهم وهنه عادي لابسه نص
ردان وطويل وبدون حجاب مثل لبسي كل يوم

اشوف حركات وجههن عليه كل شويه ضجت وكمت
يعني شيردون مني هيج لزكو ..... وشكو هالبسبسه كل شويه مايعرفن الاحترام ....

بيبي جابتهن بغرفتنا وبقو الرياجيل وحدهم
اجتي خالته الصغيره يمي كعدت ...

- اكلج هذا الي ابيدج شنو شو جنهه محروكه مدري مزلغهه

- خاله هاي حساسيه لا محروكه ولا مجرحه

- يااااا وهاي تضل متروح اووي يمه هاي شلون
تاكلين هيج

- هذا امر الله واني ماضايجه منه واذا زعجج منظره مامضطره تباوعين على ايدي ...
والحمدلله مادام عافاج من الي ابتالني بي اشكريه
يكون افضل من انتقادي ...

- ياااااه شكلنالج عيني وطلعتي لسانج هالطول
عشتوو عود هاي تريد تصير جنتنا

- ماتجاوزت عليج خاله اني بس اريدج ماتشيلين
ذنبي مو اكثر

- وليش اشيل ذنبج يمه شحجينا حتى نشيل ذنبج
ماكو واحد ميشوف هالشوفه ميسال عنهه
باجر حبيبه من تصيرين عدنه ميه وحده تسألج
هم تكليلهه هالحجي ليكصنج نصين والله ..

- الله كريم

سكتت ماريد الح وياهه بالحجي وهي همجيه
بكل تصرفاتها حتى بكعدتها وحركات اديها هالاصابع متوكف من تحجيلهه سالفه تشمر بيهن
منا ومنا ...

بيبي كلتلي جيبي البوم الصور شوفي لعمتج
كمت جبته واجيت كعدت يمهه وهي تشوف وتسأل
هذا منو وهذا ابن فلان يااا شلون صاير ...

لحد ما وصلت صوري بالكليه ...

- يا يمه هاي وين الصور

- هاي بكليتي

- شهكت وضربت على صدرها ..... هاي تطلعين
هيج كدام الزلم يايمه ومن ذولي الي يمج

- هذني صديقاتي الي بالنص والبقيه زملاء بالقسم

- ولج تعاي نجيه شوفي شوفي ييمه لو يدري بيج
محمد هيج تطلعين وتفرفرين بشعرج كدام هالزلم
يااايمه شيسوي شيعمممممل

- خاله بابا قابل بهذا الشي واحنه ماعدنه بنات محجبات هنا بكل بغداد ممسويه شي غلط اني
مو صح بيبي

- صدك هالحجي حجيه تخلون بنتكم هيج تطلع

- ام محمد عيني هنا مو مثل عدكم وابوهه وعمامهه
واهلنه هنا كلهم هيج يخلون بناتهم ونسوانهم
كفيلج الله هاي هسه جيران كلهم ماتلكين وحده
محجبه بيهن ... لاتحجين هيج وتخوفين البنيه

- على بختج حجيه شمخوفتهه احنه عيب عدنا
هيج ومحمد اذا درى هيج مرته تطلع يشك حلكهه

- خاله اني بعدني ماتزوجته حتى يحاسبني بعدني
بيت ابويه وابويه هو يقرر رجاءاً هالكلام منج مامقبول بحقي اني مسويت شي غلط وكاعده
تهدديني بمحمد عندي اب واني امشي بشوره بس

- لج هاي وياي تراددين ... ياااه بكد جف ايدي ولج انتي تردين حجايتي

- ام محمد علكيفج وياهه هاي بعدهه طفله ومدللـه
ماتعرف شحجت لاتاخذين بخاطرج منها

- حجيه بنتكم لسانهه طويل رادله كص هاي لو
بيتي اني اعرف شلون اربيهه

- بس اني متربيه احسن تربيه

- زهراء روحي منا يله روحي عيب تراددين بالمره

- بيبي لعد متسمعين شتحجي عليه اني شسويتلهه

- اييييييي حجيه هاي بنات بغداد كلهن هيج
مايحترمن ولسانهن مترين ... لحد لفك يامحمد
على هالمره المختارهه ... كومي نجيه صيحي
لعمج خلنا نمشي كومممي

- يااه وين كايمه ام محمد على بختج يااا داده
تطلعين من بيتي زعلانه ابد والله تعاي لج تعاي
اعتذري لعمتج يله وبوسيهه

- بيبيييي

- لاتخليني اعيط هسه تعااااي اعتذري
عيب اجيبلنه حجايه تعاااي يله

- اعتذر خاله ماقصدي شي سامحيني

بستها وهي نافخه ريشها عيني وبيبي تهدي بيهه
اخذت البوم وطلعت وعفتهم ....

لل٦ وراحو اجيت على ابويه ...

- بابا عفيه شوف هاي ام محمد شسوت بيه
اليوم تكلي انتي ممتربايه

- هاااي شنو حجيه شنو السالفه شصااار

- غير بنتك تراددهه بالحجي وهذيج عربيه متسكت
وانهدت عليهه بالكوه راضيتهه

- متاكد بنتي متغلط على احد واذا ردتهه معناه
ام محمد حجتلهه شي مو زين ... شكلتلج بابه

- بابا شافت صوري بالكليه وكامت تلطم على صدرهه وتشهك وتكول ياا هاي بناتكم هيج يفرفرن

لو محمد يدري يشك حلكهه اني كتلهه اني ممتزوجته بعدني وعندي ابويه وامشي بشوره
واني مغلطانه بشي حتى تحجين عليه. شو هي
بعد ماسكتت وسوتهه هوسه وبيبي تكلي اعتذري

- هااااي شجااابهم علينننه احنه وين وهمه وين
ليش شبيهه بنتي وهيج كلبت الدنيا استغفر الله
ماضلت عليه بس هاااي وتكمل

- بابا انته مو معلمنه مانقبل بالخطأ بحقنه ونعترض
وندافع بادب واني سويت نفس الشي وبيبي تكلي
اعتذري واعتذري ليش اني مغلطت شكو تجبريني
اعتذرلهه هي غلطت بحقنه المفروض هي تعتذر

- دكاافي يابنتي كاافي حاركه اعصابج عوفيه
راحت وراح شرها وياها .... يابنتي هذوله ماعدهم
بنيه تطلع هيج همه اذا مو دشداشه وعبايه وربطاتهن زلمهن مايخلوهن يعتبن الباب فاستغربت
شكلج هيج بالدوام ويمج الولد مامتعودين بعدهم

- يعني شلون بيبي اذا ماعجبهم اني مجابرتهم
عليه خلي يروحون اصلاً اني ماريدهم مااكدر
اسكت واعيش ويه هيج ناس بيبي حبابه لا تورطوني وياهم

- كاافي بابه كافي روحي لغرفتج اني اتصرف
وهالسالفه متنعاد بعد روحي اصعدي ارتاحي
مو زين عليج العصبيه كافي بنتي ...

.
.

خلصت العطله ورجعنا للدوام ... صارت علاقتنه
اقوى اني وايوب وكل كعدتنا سوه تعلقت بي
اكثر من كل شي ..... بس ماحجيت على اي شي
من حياتي لان اطمئنت من حجي بابا ان يصيرلي
الي اريده من بعد ذاك الموقف ......

كل يوم بعد ماتخلص المحاضرات نكعد بالحديقه
وحدنا وروعه تروح تاكل او تحجي ويه بقيه البنات فمره مارحت كعدت يمه ضليت ويه روعه هو يفتر يروح ويجي ماكعد لحد ما اجه علينه واخذنا اثنينه
ورحنه كعدنا بنفس مكانه ......

- عليش متجين مو تدرين بيه انتظرج

- مو دنسولف ويه البنات .. روعه شبيج ضايجه

- انتو شكو شاتليني يمكم عوفوني خلي اروح

- امشي يابه امشي هاي وصلت الامانه

- وييين ..

- يولو عوفيهه خلي تروح اريدج بشغله

- شنو ياشغله

- هاي بارحه رحت ويه ولد القسم لكربلاء
بيت واحد من خوالهم ورجعنا الفجر فطلعنه وشفت
هذا الخاتم فضه عجبني اخذته الج

- يجننن هذا شكررراً

- انطيني ايدج خلي البسو الج

- لا اني البسه

- عجل ماانطيج لو انا البسو لو ماكو

- شنوو لاا ميصير
- بس البسو باصبعج مااكل بشر انا يولو
- بس بسرعه
لبسني بايدي اليسره وراد يضل لازمهه جريتهه منه بسرعه وهو يضحك وبي طبع من يصير بهيج موقف يضل حاط
ايده بشعره ويدنك ويضحك ...

- ايوب ليش حبيتني وانته تعرف اني ..

- لاتكملين المرض مو اختيار قدر امي انتي صرتي بالي من يوم الحاجتني فرح على الماده
هي كالتلي عندي بس اكو وحده ويانه تريدها وتستحي تجي ... انا ضلت بالي منو هاي الي
تستحي تطلب هيج شغله بسيطه وانا اعرف هالبنات كلهن اذا يردن شي يجن وضليت انتظر
اليوم كله حتى اعرف منو هاي .....
ولحد مااجيتن بالصدفه كدامي انا جذبتني عيونج

- هههههههه هاي كلهه واحنه مندري

- ايييه عجل ان مانتبهت على عيونج عليمن انتبه
وضليت من ذاك اليوم اتبعج من مكان لمكان اشوفج
منين تصعدين ويمتى تصلين الجامعه وانتبهت
عليج هادئه لحد يوم الحفله اناا هييين استسلمت

- ليش شصار بالحلفه

- يولو ان لبستي الماروني بعد ارجعج لبيتج وماخليج
تدخلين الجامعه بعد ... يضوي بيج وانتي عليش
تلبسين مكصف يبرز جسمج كلو تخلين اتكاون
ويه الولد عليج

- شنووووو!!

- ايييه بذاك اليوم واكف ويه جماعه من الثالث
وانتي مشيتي من يمنه وهمه صارو يحجون ويكلون
هاي احلى وحده بين صديقاتهه وعينهم زايغه
عاد انا جريتو من ياختو وكلتلو هالبت تخصني وكرابتي
اكصو للسانك مره الثانيه
وهو ذيج الروحه حتى من يفوت من يمي مدنك

- ههههههه اشوف ليش كامو ميسألون
الولد اذا كعدنا سوه قبل جنت يوميه اسمع حجايه

- لاااا انا مشيتهه بينهم على انج كرابتي من
بغداد وسكتتهم هم ماريد تجيج حجايه مو زينه
واروح اذبحو بكاعو اليحجي ماتحمل انا بهيج
سوالف لو كاتل لو مكتول اييه ماسكت

- تلوكلك هالشهامه
- عند عيناج

- اممم دائماً اسئلك شجابك لبغداد ومتجاوبني
لييش بله

- اوووو ردينااا يولو اجيت كيفي انا ردت اجي واجيت لاتشغلين بالج

- مااا والله اله تكولي ليش تضم عليه احنه مو متفقين نكون صريحين بكل شي

- اهااااااا جبتيهه ان حجيتلج تحجيلي الضامتو

- لاا ماريد لاتكولي ... خلي اروح تاخرت

- ول يابه اموت وعرف شنو الماترضين تحجييي

- خلي يكون عندك صبر اكثر واحجيلك
يلاا مع السلامه ...

.
.
من طبعي خصوصياتي مو موضوع مساومه
فكل شي عداهه ممكن استغني عنه .....

رجعت للبيت وكالعاده شغل وتدريس وطبخ كملت سبحت ونمت ... صرت اسمع صوت مثل صوت رياح هيج قويه وصوت رجلين تتقرب اكثر يمي اريد افتح عيني ماكدر اريد احرك ايدي رجلي او حتى اندار ماكدر جسمي متيبس ....

صرت اصيح اصيح بس صوتي مايطلع لحد ما
صار هالصوت كلش قريب مني اني اذاني صفرت
يله كدرت افتح عيني كمت احرك ايدي احجي
عادي مابيه شي اباوع على الساعه ٣:١٥

ضليت كاعده صافنه شنو الي صار اني مجنت
احلم اني كاعده وحاسه بكلشي حواليه شنو الصار

رجعت تمددت نمت بسرعه ... كعدت الصبح جسمي
نشيط اكثر من كل مره ... مر اليوم عادي بالليل تكرر
نفس الشي وبنفس الساعه ...

صار وقت الامتحانات الشهريه ... نكعد اني وروعه
وكدامنه ايوب اذا ماعرفنه سوال اكله بصوت ناصي
يكتب بورقه ويحطهه بايدي او يرد ...

مرات يكعد بصفي ويكلي شكتب اكتبي واني اكتب مثله واحصل درجات عاليه .... هو يحل واجبات الي ويجيبهن ومكتوب عليهه اسمي وروعه تكعد تنقل منه وترزل وتتعارك ليش ميجيب الهه هم ...

مَر شهر على حاله الاصوات هاي حجيت لبيبي
تكلي اقري المعوذات قبل لاتنامين والتزمي بصلاتج

سويت مثل ماكلتلي ونفس الشي ماتغير صرت اتعب
اكثر من اي وقت لان جسمي احس شي يطلع من
ظهري وبعدها رأساً انام واكعد ماتذكر شي لحد
العصر او الظهر يلا اذكر .......

بالكليه .....

- هاي شنو ايوب هم رجعت للتدخين كم مره حجينه
بهالسالفه مو تدري اكره اليدخنون

- ياامي ماكدر متعود عليهه راح اقلل منا وهيج

- جذاااب

- ههههه مدري ليش بس انتي اخليج تكليلي جذاب
وماازعل

- لاني من اكولهه انته من صدك جذاب متقلل منها
وراح اتضل ادخن واني حيل اكره ريحتهه واتحسس
منها ...

- يابه هااي زتيتهه زين هيج

- شنو الفايده فد شويه اشوفك تدخن مسوينه شي
اكلك انتظرني هنا شويه واجي

- ويين رايحه
- هسه اجي
رحت للمحل اشتريت اربع نساتل من نوع واحد ورجعتله ....

- شوف ابني هاي بدال جكايرك المكروهه اخذهن
كل ماتريد جكاره اكل بدالهه نستله وخلص من هالسم
الي تشربه ....

- هههههههههه ول يابه الجكاره مو مثل النستله
ماااااكدر هيج مره وحده اعوفهه

- اوووف بكيفك ضل دخن بس لاتجي يمي لاني اكره
ريحه الدخان هاي واذا تريد تعوفهه كلي حتى يوميه
اجيبلك من هاي النستله

- هههههههههههه مااوعدج بهاي اذا
كلش كلش ماريد ادخن لازم اخذ بس نفس بس
احبسه مااستنشقه واطلعه يعني نص تدخينه بس اهدىء نفسي بيهه

- ميخالف شويه شويه تتعود هسه هاهيه بعد كل يوم
نستله تشجيع لترك التدخين مااشي

- ماشي عيني ماشي وين نكدر نعترض احنه
هاي القاضي امر ونفذ الحكم

ضلينه نضحك وصار ياكل من النستله وانطاني نص
منهه متعود كل شي ياكله لازم ينطيني نصه واني
هم نفس الشي اقدمله من اكل ..... الطلبه كلهه
صارت تعرف اني اخصه فمحد منهم يحجي شي
ولاحتى سلام ميسلمون عليه يخاوفون منه ....

صرت كل يوم اشتريله من هاي النستله ياكلهه
وندخلمحاضره ومن نخلص دوام هم انطي وحده ياكلهه ويسولف وياي ويقرالي قصايد بدويه

ويحجيلي على طبيعه عيشه اهلهم ..... متفاهمين كلش احنه لدرجه افهمه من صوته اذا ضايج او تعبان

وصار اذا عنده مشكله بالبيت يخليني مادخل محاضره ويكعد يحجيلي كلشي صار ويه اهلهه
وشنو احساسه واخلي يهدىء ويضحك يكلي هاهيه نسيت السالفه خوش علاج وبعدين يروح ....

متفاهمين لدرجه ان يحس بيه اذا نقهرت ويكلي ثاني
يوم انتي بارحه مقهوره شصار وياج اني احجيله
بس مو كل التفاصيل لان اكو اشياء ماادري اذا
لازم احجي بيهن او لا ...

صارت امتحانات اخير السنه ... اول امتحان مخبوصين بي وايوب يراجعلنه ويذكرنه وسوو هيج
وانتظروني هنا وجايبلنه كهوه كال حتى تصحصحو

جاوبنه زين ورجعنه للبيت ... روتين البيت نفسه
اضافه لتدريس اخواني لان وقت امتحانتهم ...

بالليل نايمه كعدت فجأه افتح عيوني على كيف
واشوف شخص يبتسم وحلكه جبييير وكاعد كدامي
على الفراش من جهه الحايط .... اني ركزت اكثر
دااشوف منو هذا هنا .... واشوف شكله مجرح
وازرك على سواد لونه وعيونه بييييض ويحرك براسه
يمنه ويسره ويضحك ......

اني عطت بعلو صوتي وهو .......

———-———-

#شقراء_بغداد

بارت_٥


عطت باعلى صوتي وغطيت راسي وهو حسيته
كام لاني احس بحركه الغطى واني اردد ادركني
ياعلي ادركني ياعلي ....

حسيت شي وكف يم راسي اني بعد انتهيت من الخوف اذاني صفرت وغفيت محسيت بشي بعد

كعدت على صوت اخواني بالغرفه كمت جسمي
متكسر ماتذكر شصار بالضبط لحد مانزلت
غسلت وصعدت ابدل اباوع على الفراش شصار
هنا ماذكر بس احس اكو شي .....

بدلت وتريكت وطلعت للامتحان ... كملت الامتحان
وكاعده دانتظر روعه تطلع وايوب يم الولد اني صافنه
هيج على الشجر واتذكرت شصار جفلت رأساً على
صوت ايوب يكلي شبيج ....

- هااا مابيه شي راح ارجع هسه

- وين يولو اكفي شصارلج عليش هيج مرتبكه

- تعبانه اريد ارجع للبيت بعدين نحجي سلملي
على روعه واعتذرلي منهه يلا مع السلامه

طلعت ركض من الجامعه بس اريد اوصل البيت
اول ماوصلت رحت على بيبي ...

- بيبي بيبييي وينج

- هااا هااا هاي شجابج هسه شبيج

- بيبي تعاي داكلج شي .. اليوم ساعه ٣وربع
الفجر كعدت وشفت كدامي هيج واحد كاعد لونه
ازرك على سواد وحلكه جبير ويضحك سنونه هووواي وبيييض وبس يهز براسه كدامي اني
عيطت وضليت خاتله جوه البطانيه بس حسيت
بي يم راسي بعد غفيت بيبي عفيه هالشي هواي
ديصير وياي ونفس الصوت ديرجع

- اسم الله الرحمن يمه شجاج خاف تحملين يمه

- بيبي والله مو حلم والله اني كعدت وشفته كدامي
على فراشي والله من طلعت منا ناسيه بس هناك
اتذكرت وخفت واجيتج

- كومي اخذج لبيت سيد سروط دشوف شسالفتج
كل يوم بلوه تجينه كومي

رحنه لبيت الساده دخلنه ورجال يطلع عمره ٤٠
تقريباً كلي تعالي كعدي يمي رحت كعدت وسولفتله
على كل شي ....

- زين بنتي هم تشوفين بمنامج انج متزوجه او
واحد وياج يحبج تحبيه يحبج

- لاا بس هذا الصوت بنفس الوقت كل يوم

- زين من شفتي سوالج شي حجالج شي

- لا بس يضحك ومن وكف يم راسي اني بعد
محسيت على شي لحد الصبح

- زين هسه راح اقرالج وحسئلج اسئله انتي
شيدور بالج تكولي

- ماشي

هو ضل يقرا ايات ويكرر بيهن وحاط وصله خضره
معطره على ايدي ولازم ايدي بيهه ضل هوايه
يقرا لحد ماضل يسأل ...

- بحق القران ومنزله هل انت عربي

- مجاوبته شي لان هو ينتظر اني احس بجواب او شي يلا اكوله

-أ انت اعجمي ... أ انت يهودي ......

وضل يسأل واني ماجاوبه شي لحد ما كلي

-التزمي بصلاتج بويه ولاتنامين لوحدج بعد وسبح
المغرب لاتسبحين واخذي هذا البخور تبخري بي
لمده اسبوع وهالورقه نكعيهه واسبحي بيهه

- عيني سيدنا ماتكلي هالبنيه شبيهه ليش دتشوف
هالسوالف

- حجيه هذا نوع من الجن يسموه العاشق
يضل يحوم على المره بس ان شاء الله هي قويه
وراح تقاومه بذكر الله واهل البيت صيري سباعيه
ولاتغفلين عن ذكر الله بكل وكت

- ماشي

طلعنه ورجعنه للبيت وبيبي حجت لابويه على الي صار اني رحت سبحت ونمت كعدت العصر لكيت
عمتي وبنتهه ليلى يمنه ...

ضلينه نسولف وبعدين كعدت اقره هي هم كعدت تقره واتفقنا نطلع اثنينه سوه للامتحان باجر

كملت قرايه لكيت ابويه مقري اخواني ردت انام
فوك بيبي مقبلت نومتي يمهه بالهول فرشتلي
ونمت اني واخواني يمهه واختي وليلى فوك ...

نايمه واحس رجليه تيبست اصابعي تشنجت
وتوجعني فتحت عيني ماكو شي وبيبي عايفه
الضوا مفتوح اريد احجي اصيح بيبي ماكدر

متسمعني ومحد يسمعني ظهري تشنج كمت اردد
بذكر ياعلي ياعلي ... والصوت يتقرب مني اكثر
ويقوى اكثر لحد ما اختفى رجع جسمي عادي

كعدت ورحت للمطبخ ابجي وادعي ..
ياربي خلصني من هالشي تعبت تعبت حتى
نوم ماكدر انام مثل العالم ..

رحت صعدت واني جسمي تعبان كل حيل ماعندي
تمددت يم ليلى وغفيت رأساً حسيتهه حضنتني
وغطتني نمنه ... بره شويه هم رجعلي نفس
الشي كعدتني ليلى ...

- زهرااء لج شبيج اكعدي تسمعيني

- ايي اسمعج شبيج

- شبيج تونين وهاي صوت يطلع منج شكووو
خوفتيني

- ااااه لج تعبت والله تعبت ماكدر بعد

- نامي بحضني مايجيج شي حبيبتي نامي
لاتبجين كافي سمي باسم الله ونامي يلا
انتي بحضني لاتخافين محد يوصلج بعد

بجيت شويه وغفيت جسمي مثل خدران ماحس على
شي بسرعه انام ومن اكعد ماواعيه كلش

شويه وسمعت صوت ليلى عاطت فتحت عيني

- شبيج شكو

- لج دااكعدج هم رجعتي تونين وجان شي
ينفضني من رجلي

كامت فتحت الضوا اني ضليت ابجي خايفه وهي نزلت لامهه وحجتلهم اجتني بيبي تقره علي ايات وتبوس بيه وابويه هم شافني وكعد يقرالي قرآن ...

لحد ماصارت بالسبعه هي كامت تبدل واني كتلهم
ماكدر اروح لان كلش ماكدر اتحرك حتى ايدي
مابيه حيل ارفعهه ....

شفتهه نزلت اني غفيت ....

سمعت صوت يمي يحجي بهدوء ...

- زهراء زهراء

- هااا

- انتي الي ماعوفج

بهاللحضه انجر الغطه من فوكايه وحسيت بهوا
قوي صار على وجهي كمت على حيلي ودخلت
ليلى ...

- انتي حجيتي مو

- شحجي شبيج جنت اتريك واجيت اخذ جنطتي

- لعد منو يصيح باسمي
ياربي دخيلك تعبت ماتحمل اكثر بعد تعببببت

كعدت بالكاع وضليت ابجي اجتني بيبي وعمتي
يسكتوني واخذوني نمت بقت عمتي كاعده يمي

ماحسيت الا الظهر ابويه كعدني كلي لبسي
عباتج وانزلي صديقي شيخ جوه خلي يشوفج

اني بالكوه لبست جسمي نحلان اخذتني عمتي
للهول كعدتني وبقينه بس اني وياه وابويه ...

- احجيلي عمي شديصير وياج

- عمو تعبانه والله بابه هو يفهمك

- فهمني ابوج وحجالي بس اريد اسمع منج
حتى لو شكم حجايه

- عمو كل يوم هيج يصيرلي بس اليوم اكثر
اسمعه يكلي انتي الي ويصيح باسمي يم اذني
من الساعه ٣ بالليل لحد السبعه كل شويه
اكعد على شغله وجسمي مابيه حيل ارفعه

- زين اكعدي هنا بالكاع ومددي رجليج

كعدت يمه وهو على القنفه اني تعبانه بالكوه كاعده
وهو ضل يقرا ايات يقرا لحد ماحول على جهتي
اليمنه ضل يقرا سوره الاخلاص اني ضجت

كمت ماريد اسمعه صرت اتافف واحتريت كلش
هو كام يزيد بقرائتهه اخر شي كتله ..

- عوفني مدا اتحملك

- ميخالف هذا الاريده

- لتلح وياي تره لو اكتلك لو تكتلني مدااطيقك روووح .... بااااابه كله خلي يسكت ويروح

- اصبري بابه شويه عيب هالحجي

اني متحملتهم كان شي خنكني كمت عفتهم وطلعت
للمطبخ كعدت بحضن بيبي ومحتره وعركانه

اجاني ابويه وكعد يحاجيني وعيونه مدمعه اني
ماكدر ارد عليه مدري شبيه عفته وكمت صعدت
نزعت ملابسي ولبست دشداشه خفيفه ونمت

احس عليهم يجون يمي مااكدر احاجيهم اريد
بس انام .... ضليت للمغرب كعدتني بيبي

نزلت جوه غسلت مابيه حيل اوكف رجعت تمددت
بس مانمت ولااكلت ضليت متمدده بس راحت
المغربيه اني تغطيت ونمت ولحد ثاني يوم يله
حسيت عليهم يكعدوني الصبح ....

كعدت سبحت واكلت وبعده جسمي تعبان رجعت
نمت وضليت على هالحال ٣ ايام ....

اربع امتحانات مرحتلهن ... ابويه ماخذلي اجازه
من الكليه ... صار يوم الخميس ابويه كعدني العصر

كلي كومي سبحي وبدلي رايحين زياره لعلي ابن
الحسين (عليه السلام) ... اني بدون مااسال
ولا اناقش كمت سبحت وتحضرت وعمي ابو ليلى
موجود وهو اخذنه بسيارته ....

رحنه الطريق كله اني نايمه ومماكله شي من البارحه
وصلنه المغرب لشريفه بنت الحسن ( عليهم السلام)

زرنا وبيبي تدعيلي وعمتي واني بالكوه امشي وياهم
هنه زورني طلعنه كعدنا شويه همه اكلو لفات اني
مااكلت صعدنا بالسياره وكملنه الطريق...

ضليت حاطه راسي على الجامه واباوع على الطريق
لاافكر بشي ولا ادعي شي ولا بالي اي شغله

مجرد اباوع وحتى مادري شيحجون وياي
لحد ماوصلنه بالليل .... نزلنه شفتهم طلعو بطانياتهم ومخاد ورحنه .. بابه حاضني
ونمشي خلو البطانيات بره ودخلنه زرنه

اشوف اشكال النسوان هنا واصوات الزلم من
الجهه الثانيه يصيحون وكلهه تصيح ياعلي
ويصلون على محمد باعلى صوتهم ...

نسوان مخابيل هنا كاعدات وكل وحده تحجي
قصت بنتهه او اختهه للثانيه .... اني عفتهم
كلهم واريد اكعد ارتاح اخذتني عمتي يم

مريه وبنتهه كاعدات بزاويه الشباك سوتلي مكان
كعدت وحطيت راسي على الشباك وغمضت عيني

الريحه طيبه هنا ونسمات بارده تجي من ورايه
حسيت على ايد عمتي وهي تغسل وجهي وايدي
بالمي كتلهه عوفيني ...

رجعت غمضت واسمع مريه تحجي ويه عمتي

- بنتكم تشفى باذن الله جيتو للمكان الصحيح
هنا مايطلع احد عليل كلها ببركه اهل البيت
تتشافى .... كليلهه تتقي ربها وماتنساه

اني فتحت عيني باوعتلهه وبسرعه غمضت كأني
غفيت للحضه وحسيت بحروره بجسمي ونفسي
ضاق كعدت كتلهه..

- عمه خلي نطلع عفيه كومي كوومي

- اكعدي بنتي لاتخافين

الحراره تزداد وصرت افتح بدكم القميص وااوخر
العبايه اريد هوا وعمتي تغطي بيه وتكلي يا شجاج

رجعت نفس المريه اجتي وحطت ايدهه على راسي
واني ابجي بس ماكدر احجي مخنوكه ..

- تهدي يايمه امامج يحضرج تهدي

اني مايعنيلي بذاك الوقت كل حجيهم بس اريد
اتنفس مخنوكه وروحي احسه تنجر مني ومتطلع

ضليت هيج ابجي ومخنوكه لحد ما هديت فجاه
رأساً طلعت ادور على ابويه .... رحت كعدت يمه

وهو يحاجيني ويريدني اهدىء اني زدت بالبجي
واريد اروح اتقيء .... رحت للحمام اني وعمتي

ضليت حوالي نص ساعه اريد اتقيء وماكدر
تبهذل حالي ولاكادره اطلع ولا بيه حيل ابقه

جرتني عمتي وكومتني رحت تمددت يم بابه حضنته
ونمت مرتاحه كل تشنج بجسمي ماكو
ولا اصوات ولا حتى صفير ....

كعدت لكيتهم حاطين كيمر وصمون وجاي
ودياكلون ....

- صباح الخير
- ااه اخيراً كعدتي جبناج تنامين احنه لو نريدج
تزورين تشوفين

- حلوه النومه هنا .. بقولي جوعانه كلش

- الهم صلي على محمد الامام انطانه مرادنه
كومي بابه كومي اكلي وصلي ركعتين شكر
لرب العالمين وزوري الامام تشكري منه
رجعج تحجين وتاكلين الف الحمدلله الف الحمدلله

- ماشي بابه

كعدت حضنته وكمت اكل هواي خلصت صمونتين
وياهه كيمر السده وهو دسم يجنن ...

كمت مرتاحه ولاكأني نفسي الجانت روحي تريد
تطلع مني بالليل ....

رحت صليت وزرت وتشكرت ربي واهل البيت خلصت
من هالكابوس بحياتي ....

رجعت للبيت نشيطه
ومرتاحه واضحك ويه اخواني واتشاقه ...

بيبي راحت ذبحت دجاجتين وحده طبختهه وحده
دزتهه ثواب للفقراء بالمنطقه ...

رحت كعدت اقره امتحان السبت واتذكرت ايوب
كلت ياترى هم سأل عليه او افتقدني .. ؟؟؟؟

الصبح كعدت من وكت واكفه البس وكل فكري يمه
ومستعجله بس اريد اطلع ... كشخت ورتبت شعري

طلعت بسرعه واول ماوصلت الجامعه اخذت نفس
وتمشيت للقسم ... من طبعي امشي بهدوء وخطواتي
بطيئه بس من اتأخر اضل اركض ....

باوعت على الساعه بعدها بثمانيه وربع بعد وكت
على الامتحان وماشفت روعه لحد هسه ....

لمحته واكف يم اصدقائه ويدخن وعاقج حواجبه
وكفت بمكاني واباوعله وابتسم احب شخصيته
انتبهت عليه ضحك وعافهم واجه عليه ....

- يولو انتي صدك تحجين ويننننننننج كلبت الامه
العربيه عليييج عليش تعوفين الامتحاناااات

- هههه شلونك

- لاتلعبين باعصابي شلوني يعني محترك وبمدي
اكضبج واخذج من هين تاافهم شقصتج

- اهدىء اهدىء السالفه طويله نحجي بيهه بعدين
هسه خلي اراجع شويه مو كلش مضبطه الماده

- عجل من صارلج اربع ايام شتسوووين اذا مقاريه

- ايووب كتلك بعدين لاتضل تحجي عليه عفيه
- استغفرررر الله ول يابه انا احجي من نار كلبي
عليج ما مترهي عليج انا افهمي .... دحجيلي
لاتزعلين مني يولو ... اارفعي راسج شووو

- هاا حتى هم تصيح عليه

- يولو والله انا متبهذل من وراج افهمي اسف

- لاتكول اسف ماحب اسمعهه منك ... هسه عادي
مصار شي

- يبعد كلبيي مشتاكلج انا ،،، ومشتاك لدكه الحنج
هاي بضحكتج

- كاافي عفيه استحي

- ههههههه وانا اموت بمستحاج امشي للقاعه
ماضل شي للامتحان ولاتخافين جاوبي ولتعوفين
شي فارغ

-ماشي
- انتظرج من تطلعين بنفس مكانه زين
- ماشي
.
.
دخلت للامتحان وجاوبت نص ونص هواي اشياء مقريتهه وجايبيهه .... طلعت ضايجه رحت كعدت
انتظره .... شفته اجه وشايل بايده علاكه حلويات

- هااا بشري

- مو كلش بكل الاحوال الدور الثاني ينتظرني

- اييييه عجبتج السالفه ... هسه عوفيهاا خلي
ناكل نعدل هالمزاج

- اييي والله بوكتهن لاني ممتريكه طلعت مستعجله

- كلي يابه بالعافيه كلهن لج .... ايييه شصار هالايام ماتحجيلي ..

- راح احجيلك ولازم تصدكني تره ماجذب عليك

- يولو احجي والله كلبي شعوط اصدكج شلون مصدكج

- اسمع لعد ................................ هسه فهمت
ليش عفت الامتحانات

- لاحول ولا قوه الا بالله ... الحمدلله الحماج من شرهم
وهسه شلونج

- احسن الحمدلله

- تصدكين انا كلبي مقبوض بالايام هاي والله مارتحت
حسيت بيج شي لو تدرين كل يوم اكضب روعه تحقيق
واخر شي بارحه زعلت وكامت متسلم علي ... ههههه
كلو لاجلج اناا حتى للتسجيل رحت اسأل عنوانكم وين
كلت اخذ روعه وارح بس اتطمن عليج

- امممم واني عبالي الاحساس جذبه طلع بعده
يشتغل .. ههههه اني مشفتهه لحد هسه وينهه

- راحت ويه البنات كبل شوي فاتت من يمي وشايله خشمها علي انا لحيت وعليت صوتي عليها زعلت

- لااا خطيييه خلي اكوم اشوفهاا قبل لاتطلع

- وووين بالحرام ماتمشين خطوه من هييين
يولو انا اكلج مشتاكلج وكالب الدنيا عليج تكليلي
اروح! لاتخليني اطلع عن طووووري

- ماشي ماشي اهدىء هاي كعدت

- اييييه خلي اشبع من شوفتج كلهن جم يوم وانحرم
منها ول يابه والله كلبي ينعصر عصر من اذكر العطله
انا وشلون اتحمل هالشهور كلها

- تهون تهون لاتفكرلهه

- لاا انا اجيج بالدور الثاني ايييه ادري بنفسي ماصبر للدوام

- هههههه احسن هيج لاني هم اريد اشوفك

- ايييه ياصلاه محمد بدت المشاعر تحرك ... يمتى
تحنين على هالكلب متكليلي

- عفيييه لاتحجي هيج لاتحرجني ارجوك

- لااا لااا انتي تأمرين مو تترجين عند عيناج انا خذي وكتج هذا حكج .. لو تضلين
خمسين سنه مرجعج لايوب مو لغيرو

- واثق هواي. شمدريك بالزمن شضام

- اييه على كولت اهلنا يكلون...
لاتآمن للدهر فعايلو شينات ... بس انا واثق من
كلبج مايدخلو غيري وربج الكاتبو يصير لو بعد دهر

- الله كريم ... ايوب احجيلي عن الانبار اريد اعرف عنها اكثر

- اااه يالانبار شوصفلج عنها ... من تدخليها
عينج ماتلكه غير الخضار والسما الصافيه
وين ماترحين تسمعين ياهلاا بالضيف ياهلا بخوينا
حتى وان مايعرفو ... كل بيت مفتح ابوابه للرايح
والجاي واهل خير اهلها ... الكرم العدهم ماعد
مدينه مثلها .... يذبحون على عدد ضيوفهم

- يعني شلون على عددهم مو هوااي

- يعني مثل اجوي ٣ زلم كبار وياهم جم ولد
وحريمهم يذبحولهم ٣ ذبايح وبره ساعه مثل
اجه ضيف من غير اهلهم هم يذبحوله وتصير ٤
ذبايح وشرط كلهن ينطبخن ماينضم شي منهن
وابو البيت يعزم عمامو وولاد عمو وحريمهم
وجارهم ويمدون السفره من الطول للطول كلها
هبيط واللبن وذاك الخبز الحار والفواكه ماتشتهي
عينج وطول الوكت يهلون بي وشيطلب ضيفهم
ماينرد لو يريد ثيابهم العلى جسمهم ينطوه

- الله شكد حلو هيج ناس هنا مو كلهه هيج ذاك من ذاك يسوي هيج عزايم

- ماكو مثل كرم الانبار

- اني كلش حبيت الانبار منك

- اااه لو تشوفين حديثه يازهرااء وسفه على هالزمن
البعدني عن ترابهاا وسفه

- شنو حديثه

- حددديثه ياعيني هي وحده من مناطق الانبار
بس هاي جنه هي وعانه ... جنه تعرفين شنو جنه
صايره كلها على النهر واكو جسر معلك على
النهر صاير هذا من تمشين عليه وانتي مخنوكه
وبالج كومه هموم كلهه تحسيهه تضيع من جمااال
المنظر ماكو غير السما فوكج والمي جواج ..
وكبالج خضار يفتح النفس ....

- خليتني اتمنى شوفتهه لحديثه

- اييييه والله لو ترحيلها مالج نفس تطلعين منها
احنا بيتنا جان جبير حوالي ٤٠٠ متر وعدنه جم
دونم والدي زارعهن اشكال ومقسمات مرتبات
كدام بيتنه اكو حوالي ٧٠٠ متر هاي بس خضار
بدون لا شجر ولانخل هيج مفتوحه نهايتهه على النهر
صايره يعني احنه جنه ناخذ ريوكنه ونكعد نتريك هين
صوت المي تسمعيه من تكعدين بالنهايه ...

- ماشاء الله لعد ليش عفتو هالمكان وجيتو هنا

- راح احجيلج السالفه اسمعي ...

انا عندي ولد عمام خير من الله ... خواني الكبار
اثنين ماتو واحد استشهد وواحد كتلو ابن عمنه
تكاونو وذاك ضمله ضميمه واخذو غدر ..
امي من لوعتها على ابنها الثاني تمرضت ووكعت
بالفرااش شهرين هي ماتحجي شي ...
هذاك انهزم مالكيناه ... صار مشادد بالحجي
وتكاونه وصارت مذابح ... بعد يومين انا وابوي
واحد من عمامي اخذنا سلاحنه وطلعنه ندور على
هالنذل اجانه خبر هو بفلان مكان رحنه عليه
ليش ما هناك اجوي خوانه وولد خواله وهم تكاونه
ومايرضون يسلموه النه ... المهم دخلو ناس وطلعنه
من بيتهم بالطريق ولحكتنه سيارتهم طبكو طبكنه
نزلو يتوعدون ويشمرون بحجيهم واحد رفع سلاحو
على ابوي انا جريت سلاحي وكتلتهم اثنينهم
ولد خواله وجانو جماعه منهم شاهدين ...

صارت الكعده بعد جم يوم وكنالهم اخذتو منا واحد
ومارضيتو تسلمو جتالو وولدكم يرفعون سلاحهم
علينه شتردون نسكت وجيب الفصل ودي الفصل
صفت علييييه كالو نوكف الثار والدم لازم اطلع
من المنطقه وماافوتلهه الا بموتتهم ....

- كل هذااا صاير وياك معقووول

- ايييه وغيرو وغيرو عاد جيت انا هين لصاحبي
كعدت عندو شهر واهلي لمو غراضهم ودبرنا بيت
هين وكعدنا ... وانا لليوم الحسره تجر بكلبي
على حديثه مشتاااك لكاعها وهواها هينه بغداد
شكثر حلوه وكلشي بيهه بس حديثه ااخ ياحديثه

- عسى ربي يرجعك الها وترجع راحتك وسعادتك

- انتي هوااااي عوضتي فكدانها يعني للنص حبج
نساني شوكها ... والنص الثاني تصليه من تصيرين بغرفتي

- لهدرجه يعنيي اني معوضتك عنهه ومادري
بس شلون يعني اني ممسويتلك شي هو بس دنحجي سوالف عاديه ونقرا شلوون

- الاحساس يولو دحجي هالربع كلهم انا اكعد
وياهم اكثر من هلي وما يملون الفراغ الي بروحي
الا انتي من ادحجلج من بعيد وانتي تبخترين
بمشيتج وشعرج يتطاير انا انسى كل شي
واضل اتمعن بيج ماحس الا انج مليتيني فرح
وانتي ماسويتي شي بس تمشين حالج حال كل واحد .. بس ربج من يعلك هالكلب باحد مايهمو
شنو نوع الحجي لو المكان المهم يحس وكافي

- هههههههه هواااي دااكتشف شغلات ماجنت
متصورتهه عندك يعني لهدرجه تركز بمشيتي

- انا شعلي انتي تبخترين بمشيتج وتخلين المغمض
يشوف ... صدك انتي عليش ماتمشين مثل هالبنات
بسرعه من تمرين من باب الجامعه لحد ماتصلين
هين تخلين عيونهم عليج ادحج

- واني شعليه هاي مشيتي ماعرف امشي بسرعه
لو اركض ركض حتى الحك بالمنشأه لو امشي هيج
بعدين شكو يباوعون عليه شنو مشايفين وحده تمشي يعني

- ول يابه هنه يمشن وانتي تمشين هذني مصكوعات وحدتهن هالكبرها تهز الكاع بمشيتها
انتي وييين هلكدوتج ولبسج ااااخ مكدر احجي
بس انتي تجذبين العين لانج صغيرونه

- هههه واني عبالي اصلاً ممبينه طلعت احسن منهن
هههههههه ههههههههههههه

- اضحككككي وانا عيني على هاذ وذاك اخاف
تزيغ عيونهم واروح اكسرو لراسهم ول يابه خايف
لانفصل من براج ... ولد مرحلتنه كلهم متكاون وياهم فتلكيني اكعد ويه اهل الثالث والرابع اعقل منهم

- بعدك باول سنه وكضيتهه عركات وياهم شبقيت
للتخرج

- انا كلتلهم من الاول هالبنت تخصني وهمه مايفهمو بالحجي خلهم يفهمو بالضرب ... وانا
صارلي سنننه اكلج ايدج لاتخليهه مكشوفه هيج
البسي ردان ليمتى حتسمعين الكلااام

- شسوي اذا همه هيج يبيعون بالسوك منين اجيب
يعني على السنه الجايه عود اغير

- ايييه خلي نشوف بله شتغيرين

- ايوب لازم اروح تاخرت

- ايييه يلاا انا اوصلج اريد اندل بيتكم

- لاااا شنو توصلني عيب شيكولون عليه الناس

- ول يااابه انتي امشي بدربج وانا وراج ماحاجيج
بس اندل بيتكم اخاف يصير شي امشي لاتعاندين

- زيين بس مو تتقرب يمي خليك بعيد

- ايييه اييه فهمناا ياعيني قابل ماخاف عليج انا
يابنت الناس امشي يلاا
.
.

طلعنه سوه امشي وهو ورايه صعدنا .. اني كعدت
هو ضل واكف كدامي وكل ماواحد يصعد او يجي
من يمي يحط اديه على الحديده مال المقعد
ويبعدهم لحد ماكامت البنيه الي بصفي اجه هو كعد ....

- اااخ تكسرت رجليي من الوكفه والمدافع هاي انتي
شلون كل يوم هيج تجين هاي كلهه اطخطخ بيج

- يعني مرات شسوي اذا ميصيرون كدامي الا
عمالقه ميكولون هاي البنيه تنجعص بينهم لاا
يدافعون لحد مااكعد اني اموت من ريحتهم وشكلهم

- هههههههههه ااااخ يااابه انا اشوفلج جاره ماخليج هيج ،،، هاي شنو الدفتر الصغير هذاا

- هذا دفتر خاص بي كتاباتي

- هاااا هذاا هوووه شو انطيني تاشوفه
- لااا ماريد تقراهن
- بس جم وحده بنفسي اعرف شتكتبين
- ماشي بس اني اطلعلك وحده وانته اقراهه
شوف هاي الاخيره

- ايييه مبين عندج هواي مضاميم هالسطور
ماتجي من دون احساس مو صح حجيي

- اي صح وراهه شي

- اييه ماتحجيلي عنو

- وصلنه هسه لازم ننزل

- مبخوته والله ... يلا انزلي

نزلنه ودعته وصرت امشي وهو ورايه .. مره يروح
يمنه ومره يسره واني مثل مشيتي بطيئه واضحك عليه شلون يباوعلي بالختله ... لحد ماوصلنه فرعنا
شفت مصطفى واكف اجه عليه ودخلنه للبيت سوه
صعدت لغرفتي ركض فتحت البرده وباوعتله ..

واشرتله يروح هو حط ايده براسه ضحك وراح
رحت تمددت بملابسي واضحك على سوالفه
وشكد فرحانه وياه كأنه دنيا ثانيه غير الاعيشهه
.
.

اليوم هو اخر يوم بلامتحانات يعني خلصت هالسنه
من طلعنه من الامتحان رحنه كعدنا ثلاثتنه بنفس
المكان اجني البنات ويسلمن ويسولفن وهو كام يم
الولد بوقتها مسوين عزيمه واجوي الولد رتبو الاكل

وشقاهم واصوات ضحكهم شعلوهه .. كعدنا ناكل
وهمه يتعاركون بلاكل كل واحد يجر الماعون من الثاني ....

السمج الي حاطي مبقو منه ولا نتفه والكباب صارت
عليه ملحمه ... احنه البنات كاعدات ناكل بهدوء
ونضحك من جوه لجوه عليهم .....

خلصنه الاكل وكلنه تساعدنه ونظفنه المكان وجنه
مجمعين بينه وجايبين كيكه هم قطعوها وكعدنا
ناكل جان يجي ايوب جر الماعون من ايدي وكلي
امشي وياي ....

كمت رحنه لوحدنا وهو شايل ماعونه وياه ...

- شبيك ليش جبتني هنا
- يولو خلنا ناكل سوه
- هههههههههه صددك تحجي
- اييه شنسوي بماعونين هاذ يكفي يلا هاج كلي
- والله عليك سوالف

اخذت الشوكه واكلت انطيتها اله واكل ويباوعلي
ويضحك وصرنا واكفين وهو شايل الماعون واني
اكل ....

اني خليت ايدي جوه الماعون مداسيطر بلاكل
هو نزل ايده وحطهه فوك ايدي واشرلي بعينه
بمعنى لاتوخرين ....

اني صايره استسلم كدامه شيكول شيسوي مااعترض وبس اضحك وياه روحي تفرح بوجوده

- وهااي خلصناهه .. يلا كافي عوف ايدي عيب لايجون الولد

- ايييه عفناهه يابه ،،، اريد اكلج انا حشتاكلج
وحتضلين بالي كل هالشهور الله يصبرني عليهن

- واني هم راح اشتاقلك بس انتبه على نفسك لاتضل كل يوم متعارك ويه اهلك وابتعد
عن مشاكلهم مثل مادائماً اوصيك اصنع جوك الخاص بيك وحدك بعيد عنهم

- ان شاء الله .. وانتي ضلي اتذكريني وانا اضل
اوديلج سلام

- شلوون

- يا امي كل ما يلامس خدج الترف هاذ الهوا
البارد اعرفي انا دازلج بي سلام لان انا اعرف
روحج تحب البروده وانا بعد احبها فخلها تجمعنه
بسلام وذكرى ماعندي شي اوصلج بي غيرو

- ماراح انسى هالشي ابد

- يولو خلي اوصلج مايهلي تمشين عيني ماشبعت
منج
- لاا اخاف احد يشوفنه من المنطقه او
بالطريق لا خلينه هيج ماريد احد يعرفك

- هاهيه صاار يابه صاار وين نكدر نجادل احنه
جدام هالصوت هااذ والله نتبهذل ويشعل اسلافنه

- ههههههههه كافي عفييه مو اكلك لاتخجلني هيج

- اوووف يولو والله حشتاك للضحكتج هااذي ودكه
الحنج انا تدرين انام واصحى وهي بالي شدهتني
بالله العظيم

- هههههههه شلون شسوي يعني حيرتني تريد
مااضحكلك ؟؟؟

- اذبحج باالله العظيم ان ماتضحكيلي انا عجل
المن تضحكين
- لا تضووج اضحكلك والله هاي شوف ضحكت
هههههههه
- اييييه هيج اريدج

- زين راح اطلع هسه

- يبعددد كلبيييي وهلي درب السلامه دربج

- ربي يحفظك ويرزقك ويحميك الي
انتبه على نفسك

- ويحفظج لي ديري بالج بالطريق

ضحكتله وانداريت اروح اجه طخ ايدي ومشه وهو
يبتسم ... رحت اخذت جنطتي وروعه كاعده تنتظرني
وطلعنه للبيت ......
.
.
.
مرت ايام وايام واني كل لحظه افكر بي مايروح
من بالي مرات اطلع دفاتري واقرا شيكتبلي بيهن

واضحك على سوالفه اضل متمدده صافنه وبالي
عيونه الزرك ورموشه الطوال حييل حلو هوه
بس مدبدب شويه وضخم .... اديه ملمسهن احسه
بعده بطرف اصابعي .... كلش مشتاقتله ..

امي وابويه موقفين الدعاوي هسه وينتظرون واحد
منهم يتنازل ..... هي كل فتره اطلع سالفه تعبانه
وتسويلهه مشكله عليهه حتى تطلك بدون متتنازل
وابويه يكول ماانطيهه درهم متستاهل ...

واحنه ضالين ويه بيبي هي دايره بالها على البيت
والمصرف لان نص راتب ابويه اخذوه نفقه الها
ونص الثاني للمحامين .. فيبقى شي قليل منه
مايكفي للبيت .. بيبي هي شايله المصرف من تقاعد
جدو وعمامي هم دائماً يروحون ويجون علينه ....

بهالفتره اخبار بيت محمد واهله انكطعت واني كيفت
ماصدكت يرحون واهلي ينسوهم ..... ضليت ملتهيه

بشغل البيت واخواني ....
والمسواك صار عليه كل يوميه الصبح او بين يوم ويوم اروح اتسوك بيبي متقبل اجيب هواي مال اسبوع تكول ناكله تازه والسوك قريب شعدنه مكومينه بالثلاجه ....

جان شيزود من فلوس مسواك تنطيني منهن بيبي
واحطهن بقاصه حتى اشتري بيهن ملابس للدوام

ابويه عنده كتب كووومه كل الانواع بالسياسه
وعلم النفس والدين والروايات والشعر كلشي
عنده فا اضل كل فتره ماخذتتلي كتاب اقراه

لان ماعندي شي اسوي اضوج وقبل جنه بالعطله
نروح بيت جدي يم خالاتي نتونس هسه ماكو طلعه

عماتي هنه يجنه واني ماكدر اعوف البيت واطلع
كم يوم يمهن فصار كل وقتي بالكتب ....

قبل شهر من الامتحانات كعدت اقره عندي خمس
مواد لان طلعت النتائج ابويه جابهه الي وطلعت
بواحد فوك الاربعه الاجلتهن .......

ذبيت كل حيلي بالماده ولاكأنهه كليه عبالك بكلوريا
مره ثانيه ماصدكت اخلص من السادس طلعتلي
هاي صفح ... وابويه يكوم ويكعد اقري واقري
.
.
صار وقت الامتحان ... كشخت وتعطرت وطلعت
مو بالي الامتحان كد مابالي ايوب راح يجي لو لا

اول ماوصلت عيوني ادور عليه بكل مكان ...
مالكيته دخلت الامتحان ومشفته .. طردت الافكار
كلهه من بالي وركزت والله زين جاوبت كلشي ...

طلعت اتمشى وضايجه لان ماشفته احس الكليه
مالها معنى من دونه ... داامشي واسمع صوته
يحاجي صديقه ... اني رأساً لساني لفظ اسمه
انداريتله بلهفه وحاضنه الدفتر بايدي واباوعله

طبطب على جتف الولد واجه عليه ورافع حاجبه
وعيونه الفرحه بيهه مبينه ...

- ايووب

- يالله يالله شكثررررر مشتااااااكلج ومشتااك
لاسمي بصوتج الناعم هااذ

- شلوونك شوكت اجيت عبالي مااشوفك ايست

- لاا يولو انا مو انطيتج وعد اجيج كتلج ماصبر
يمكن انا حاسب لهاليوم اكثر منج اجيت بالنتيجه
ومالكيتج ورحت اخذت الجدول حتى اعرف يايوم
تجين

- هههههه مو بابا هو اجه اخذهه مقبل اجي

- ااااوف انا لو تدرين بحالي شلون مصبر
نفسي والله اكضي الليل كلو كاضب صورتنا
واتذكر بصوتج وسوالفج ابوسها واحطهه جوه
مخدتي وانام

- هههه هيج صاير بيك من ورايه خطيييه

- ايييه اضحكي شجاريلج انتي ... امشي تانشولفنه مكان نكعد بي

.
.

- اييييه احجيلي شسويتي هالايام
تذكريني لا ماحن كلبج علي واجي اخطبج

- ايوب الوقت مو مناسب للخطوبه بعد انتظر
وبعدين اني دائماً اتذكرك

- هااا يعني بديتي تبادليني بالمشاعر لو بعد
انا هاي الحاركه عقلي بالتفكير تحبيني لو لا ؟؟

- اممممم مادري ههههههه لاتسالني هيج ماعرف
اجاوبك

- يولو هي لو ايه لو لا

- مو هسه بعد بعد اصبر شويه

- استغفر الله ليمتى اصبر يولو انا ماحب المخاتل
عليش هالشهرين انا محروم من شوفتج...
اجي ادك بابكم واكابلج واكعد واطفي نار كلبي
بصوتج انتي عليش ماترديني اخطبج ؟؟

- راح احجيلك بس اريد تنطيني وعد
ماتغير نظرتك عليه وتفهمني

- الج الامان واوعدج لو شما تكلين انتي
مايغيرج شي بكلبي وعلى هالشارب حجيي

-شوف هو قبل كم سنه واحد من خوال بيبي
اجه خطبني

- هاااااا

- اسمعني ايوب ... هو اهلي رفضو بالبدايه
بس هو كام يلح ودز اهله اكثر من خمس مرات
اخر شي بابا كال هذا خالي وغالي عليه اجاني
برجليه لبيتي يطلب ماارده وقرو الفاتحه بوكتهه

- زهرررراااء

- انته وعدتني لاتنسى

- كملي اييه

- اي اهلي اصلا ماخذو رأيي راساً وهمه كاعدين
اتفقو بينهم وراحو واني حتى ماشايفته بس مرتين
قبل مايصير هالموضوع ... بعدها ماشفناهم ولا سمعنه منهم شي لحد عطله نص السنه ...

اجوي امه وخالاته وابوه وتعاركنا احنه النسوان
وحجيت لابويه وهو كال سدي ع السالفه بعد

- يعني هسه انتو شنو مخطوبين لا

- مادري والله
اني كتلهم ماريده لاتورطوني بيهم وهو
كلي يصير خير ولاتفكرين بالسالفه المهم راحتج
ومن ذاك اليوم مانفتح موضوعه بعد ولاشفناهم

- مدام ماجوي ولغو السالفه بعد الهم نيه ترا
لاعبالج خلصتي منهم اله يجون ويكلون كل واحد
بطريقو يلا

- ياريت يكولون هيج لاني ماكدر اتحملهن كلش

- وانتي عليش محجيتيلي هاااا

- خفت لا متفهمني لان بالبدايه ماجنه هيج متفاهمين وبنفس الوقت ماريد اخسرك اني مرتاحه
وياك وهذا اصلا ماعرف شي عنه وتأملت بحجي
بابا كلت بعد مايرجعون وحتى اذا اجوي هو ميقبل
لان يدري بيه ماريد .. فكلت بلكي تنسد السالفه
بدون متأثر عليك ماردتك تنقهر والله اخاف عليك

- ااااوووف ااااوف يول لو ضاله عليج معنده
وراكبه راسج وتبهذلين حالي برفضج والله اهون علي من هالحال .... هسه لو اجه وخطب رسمي
انا شسوي بحالي هااااا

- سامحني ا ماردتك تنقهر والله خفت على مشاعرك وبعدين اهلي مستحيل يزوجوني هسه
لا اله ولا لغيره

- النوب هاي عليييش بله

- لان امي مو هنا وبس اني وبيبي دايرين بالنه
على البيت وابويه تعب واخواني صغار بعدهم

- هااااا هسه فهمت سالفتج طلعتي دايره البيت
انتي .. يولو عليش متحجيلي من كبل شتدرين بيه اتشمت لو افضح سرج

- كتلك بالبدايه مو هيج علاقتنه واني اصلا. دائماً
افكر احجيلك بس اتردد اليوم كلت ماريد بعد جذب
وياك وخلي كلشي يكون مكشوف

- زين سويتي لان لو صاير شي وانا ادري بي
بعدين يصير المعاتب ثكيل .... هيج انا وياج مالومج
بشي اعرفج انا واعرف بالج مو عند غيري

- الحمدلله مازعلت لان والله زعلك مايهون عندي

ابتسملي واخذ ايدي ولزمها بثنين اديه ويباوعلي

- اطمني هالكلب عمرو مايزعل عليج انتي جنتي
شلون اطلع منها بزعل !!! واخذج من بينهم بس
اوكفي وياي وخليج واثقه بيه تصيرين حلال ايوب

دنكت وهو يضحك .. ويكلي..

- اضحكي خلي اشوف حنجج ارفعي راسج يولو
ميت عليج انا مو وكت خجل

- ايوب

-عيونه وسنونه كولي

- ههههههه هههههههههههه سواااللفك تضحكني كلش ههههههه اوووف ياربي شلون بيه وياك

- ههههههه عجل انا شرايد غير هالضحكه هو انا
جاي متعنيلهه

- امم ماحجيتلي شمسوي بالعطله

- كاعد اشتغل والله بمعمل مال بيبسي وكاضي
وكتي بي

- ايي الله يوفقك المهم مايتعب شغلهم

- لااا زيين محسوبج حديد شيهمو ،،، وانتي

- اني مكضيتهه بشغل البيت واقرأ كتب خلصت
كتابين

- هاااا ايييه زين زين تثمنين وكتج عفيه عليج
هيج اريدج ما تتركين الكتب ابد وانا اخذج للمتنبي
فد يوم ان شاء الله واشبعي هناك

- اييييي ياااريييت كلش احب هالمكان جنت اروح
ويه بيبي من تستلم راتب بس هسه صار سنتين
مارحتله من وره الهوسه مالحك

- انا موجود يولو انا اخذج اصبري للدوام واشبعج
كتب ... ماكتيلي شسالفه امج وينها

- هه امي مادري عنها شي بس اعرف عايشه
وتسوي مشاكل عوفها لاتذكرني بيهه اني عندي
بيبي هي امي

- الله يحفظها لبيبي صرت احبها من حبج الها
اريدج توعديني شيصير شي يضايكج وتتعبين
بي احجيلي عنو انا افهمج واحبج ماتغير عليج
بالعكس ازيد حب وثقه بيج من تحجيلي همج

- اني اصلا ارتاح بحجيي الك نفس افكاري انته

- ايييه عجل غير اولاد شهر واحد احنه نفس الصفات والافكار متراهمين يولو من الله خلقنا

.

بعد كم يوم خلصت امتحانات ولنهايه الاسبوع اخذت النتيجه ناجحه ....

صرت مرحله ثانيه دوامي احبه اكثر بسبب وجودهم
تعلقت بي اكثر وهو صار مايمضي اليوم بدوني

الكل صارو يعرفون حبه الي وبنفس الوقت يعرفون
احنه ممرتبطين تام يعني .....

بالبيت ......

كعدت من النوم العصر لكيتهم مخبوصين وعمي
يصيح وابويه يلبس بدشداشته وبيبي تتحسب
وتدعي رحت عليهه ....

- خير بيبي شصاير !!!

- لج ااااخ ييمه اااخ هالولد حركوهه لروحي
تعبي وحيلي كله ضيعوه كله من هالحيه حسبي
اللله عليج حسبي اللللللله عليج

- عمو شبيكم ليش هيج بيبي تحجي فهموني

- يمه دكافي لخاطر ربج كااافي ....
الشيخ وولد عمنه رايحين يرجعون امج

- شنوووووو لاااا مستحيل مطب هالبيت بعد

-كلنه مرايدين رجعتها وهسه رايحين لبيتهم ذولاك
سبقونا وراحو انتي ديري بالج عليها

راحو واني ضليت اداري بيبي واخواني رجعو للبيت
هم عرفو ضلو صافنين والكل اوضاعه مخربطه ..

لليل حطيت العشه اكلنه شويه بيبي مقبلت تاكل
وكضتهه شرب نومي بصره لضغطها ....

سمعنه الباب نفتحت دخلو ولد عم ابويه وعمي صاح
على بيبي طلعت لبست عباتهه وراحت ......

دخلو للاستقبال وسدو الباب واصواتهم عاليه ...

- حجيه هي بنتكم وغلطت وانتو عايله وخطيه هالبنيات
يضلن بليه ام ...والمسامح كريم

- يااا حيه لج سويت براسج خير اني نطيتج بيت
وعايله تاليهه تعضين الايد التنمدلج ... حسبي
االله بس اكول حسبي الله عليج .... لاعبالج حوبه
ابني وهالويلاد تضيع برجعتج هنا والله لتضل
تلاحكج كل عمرج
كوم حسن "عمي" اخذني لبيتي يلااا

طلعت بيبي وعيونه ناار ادري بكلبهه كوم حجي
بس محجت احتراما لولدهه وحماهه كاعدين
لمت غراضهه واني اشبكهه وابجي واكلهه لاتروحين
اتوسل بيهه تاخذني وياهه متقبل ...

طلعت وصتني على البيت وصتني ادير بالي منها
راحت واني احس اختنكت من الاعصاب بسببهه
فتح ابويه الباب وكللهه تعاي ...

اجتي وشلون خاطه حواجبهه نزعت عبايتهه وكفت
خلت ايدهه بجيوب دشداشتهه ....

ابويه عافنه وطلع ... راحت هي سلمت على اخويه
مصطفى ردلهه عادي وتضحك بوجه وتكله شلونك
شلون صاير حلو هو دار وجهه وراح طلع ....

اجتي يم علي هم بوسته وحضنته ع اساس هي
الام الحنونه المحرومه من جهالها خطيه ...

هو بعده صغير فرح بجيتهه ... اني كاعده على
القنفه بالهول واباوع على تمثيليتها وحاطه رجل
على رجل ومرتاجه .....

اجتي وكفت كدامي درت وجهي عنها ...

- شنو مراح تسلمين على امج

- درت وجهي عليهه وكلتلهه برود ..
وينهه هيه اني مشايفتهه !!
هزت راسها وراحت صعدت ....

بقيت افكر هاي شراح تسوي بينه هسه اذا هي
من بعيد لبعيد مبقت مشكله مسوتهه النوب بيتنه شتسوي ؟؟

نمنه هاي الليله والكل باله الف فكره وفكره ....
كعدت ثاني يوم عرفت من اختي هي حاجيتلها
ان ابويه ضاربها واذانها توجعها .... وتشكيلها
عليه وابويه متعارك وياها وغالط على اهلها ومانعها

من شوفتهم وممنوع يوصلون منطقتنه ويشوفوهه
او حتى يحاجون واحد من عدنه ....

حضرت الاكل اني ورتبت البيت ماعتمدت عليها
بشي ... مارحت للدوام ضليت بغرفتي كارهه البيت
بيهه ... ابويه يحاجيني حتى الين وياها ويوصيني
برضا الام واحاديث الرسول عن الام بس اني
مااقتنع لان كل شي مابقالهه عندي لا محبه لا احترام
لا تقدير ولا شكر لاي شي منها هي محته بايدهه

احس هذا حدي وياهه وانتهت عندي كأني ماعرفتها
بيوم ولا دمي من دمها .....

صعبه اني تبهذلت سنتين ونص بسببها شلت مسؤوليه بيت وجهال وحر الصبحيه بالسوك افكر بملابسهم
وبالاكل وشلون ادبر المصرف ... صح بيبي وياي
بكلشي بس هي توجهني للشي واني اسوي كلشي

اخوتي ماحسو بالتعب نفسي لان كلشي يلكوه حاضر
كدام عينهم ... اكلهم شربهم ملابسهم نظيفه ومصفطه
دراستهم وياهم بيهه معفتهم ...

اني وحدي مات كلبي بسببهه لاني تعبت ايام وايام
واني الي اواجهه اسأله المعلمات عنها واني اواجهه
نظره جيرانه وحجيهن ... اني باهم مرحله بحياتي
واتخرج من الاعداديه مالكيت كلمه مبروك منها
ولاحتى سألت شكد معدلي شراح ادرس كلهن متعرفهن ..... معقول انسى اهمالها وتعبي بسببها
وهي متهنيه يم اهلها واتقبلها وعادي الفات مات !!!!!

اني مامحتاجتلها بحياتي بعد فوجودهه وعدمه سواء
وعلى هالاساس كضت ايامنه .....

اني مبتعده منهم ملتهيه بدوامي و
هي وابويه ميتحاجون على كد الطلبات وكل واحد بجهه ... مرات اسأله ليش قبل ترجع ؟؟؟؟

يكلي عمامنه وشيوخنا تعبو من السالفه طولت ورادو
يلزكوها شلون مجان بس حتى يطلعون من الموضوع
ماعدنه ذيج الزلم الزينه الينشد بيهه الظهر ....
وهمه عشيرتهم ناس نذله ماعدهم اي خوف من ربهم
يدرون الحق شنو ويضموه في سبيل ماتنكسر هيبتهم
والسالفه طالت وانجبرت ارجعهه مو حباً بيهه بس
لان الوضع جبرني على جيتهه وبلكي تتعدل ويصيرلهه درس ....

ابويه همه جبير وهو صبور الى درجه متنوصف
يضحك ويشاقه كدامنه ويدرس اخواني ويشتريلهم
ويعاملهه زين كدامهم بس ادري بي الهم كاتله
ولعبانه نفسه من شوفتهه .....

بالدوام ......

ايوب صارله يومين بالقائم عنده شغل هناك واني
ماعندي علاقه باحد بس هو و روعه ... جنت لابسه تنوره قصيره ورديه وقميص كريمي تعودت هالفتره اخذ وياي كتاب اقرا بي الهي نفسي ...

مثل كل مره اتمشى وبايدي كتابي رحت من جهه
الحديقه الصغيره كعدت على طرف السياج الي
محاوطين بي الورد واكو شجره وحده بي وهو ناصي .... فكعدت عليه وارتاجيت حطيت غراضي على جهه وضليت اقرا ....

طولت هواي والموضوع عاجبني وكل فكري يمه
اجتني روعه جرت الكتاب من ايدي ...

- لججج ماتملين اني من يمي اختنك من اشوف
الكتب بايدج

- حقج ماتعرفين شلون اني اموووت بهالكتب

- لج دعوفي خلي احجيلج شغله ،،، باعي هذاك
الولد ابو النيلي الكصير

- هذا ابو العيون المطفيه شبي

- ههه لج كاعدين اني والبنات هناك وهو يروح ويجي من يمج صارله ساعه ويفر بشواربه ههههههههه البنات كالن روحيلهه راح ياكلهه بعينه

- ههههههههه. ياااااا خبااال كون يدري ايوب
والله يسوي نصين

- ايي ماكو ايوب تطلع عيونهم بس والله صاكرهم
ممخليهم يتحركون مو بس علينه حتى على كل البنات هم يدافع هيج

- زلمه معدل عينييي قابل مثل هذوله المنتفين
شوكت يرجع طول هناك ؟؟؟؟

- الله يحفظه خطيه غير من شغله تدرين بي مايغيب ابد مكالبل الكليه وكاعد

- اكلج شصار على هذا حسين الخطبج توافقين لا

- لا طبعا ماوافق شعندي اخذلي واحد اني اكبر منه ماريده عيني ولا بالي احد

- ههههه ادري بالج بس تفترين وتضحكين على الرايح والجاي

- هههه هاهيه مدامج تعرفين شكو تسأليني
كومي خلي ندخل محاضره

.
.
كمل اليوم عادي وبدا دوام مرحله اولى وصار اسبوع ايوب ماجاي للدوام كلش ضليت بقلق عليه
ماعرف المن اسأل وشلون اتواصل وياه ؟؟؟؟؟

ادعي كل يوم يكون بخير ومصايرله شي
الاسبوع الثاني اول ماوصلت القسم لكيته واكف
وضحكته ماليه وجهه ويحجي ويه الولد...

اني وكفت ابتسمت طرت من الفرح لان شفته بخير
وضليت بمكاني واكفه واباوعله واحمد ربي رجعه
بسلامه الي هو شفته اشر للولد يرحون ضحكو
همه وراحو .....

تمشيت شويه واباوعله وهو هم يتمشى ويباوع رافع
حاجبه ويبتسم صرنا قريبين ...

- حمدلله على السلامه وين هالغيبه هااا

- الله يسلمج ياامي والله بشغل طولت ايييه
شلونج هاا مشتاكتلي مبين

- ههههههه لاااا

- اييييه انا هم ادري لا يلا شنسوي نصيبنه هاذ
حدري تانروح نكعد

ابتسمتله ورحنه وكل الطلاب عينهم علينه لان هو
من يمشي وياي مثل الحمايه يصير بحيث يبين
للكل هاي البنيه تخصني ... وهو يمشي ويباوع
عليهم منا ومنا خاف واحد نظرته ماتعجبه ...

رحنه لمكانه المعتاد جان اكو ولد ٣ كاعدين بي
همه شافوه سلمو عليه وكامو كلي اكعدي ..
وراح عليهم وكفو بعيد يحجون ورجع كعد ...

من طبعه من اكو احد يكعد فاتح رجليه ويسند
اديه عليهن ويلعب بشعره لو شاربه ويحاجيني ...