#شقراء_بغداد

بارت_1

هذه حكايتنا راح تبين تفاصيل صغيره تمر بيها كل انثى بحياتها تكون متكدر تعبر عنها بالكلام لان الواقع مايسمح ومايكون هناك شخص يسمع ...

خطوات تتخذها الانثى بدافع المعروف ورد الجميل واكيد كل انثى ماتكمل الا بالصبر😔 ...

بطله هالروايه راح تجسد معنى ان تكون الانثى زهره بوادي الحياه الي كل يوم يفاجائنا بلاكثر ...

لكن لنا رب رحيم ... هذه هي كلمه صبرها المعتاده

راح تشوف كل بنت جزء من ذاتها او جزء من لياليها الي حفرت بذاكرتها اثر باحدى تفاصيل هالروايه ...

زهراء بنت بغداد من مواليد ١٩٦٥.. عندها اخوه اثنين "مصطفى.. علي" واخت"دعاء " وكلهم اصغر منها ...
والدها موظف بسيط وامها معلمه عربي بمدرسه ابتدائيه يعيشون حياه بسيطه باحياء بغداد القديمه

بعد ماعرفتو منو هي اساس الروايه خلي ندخل بيتهم لنشوف زهراء عن قرب اكثر ...

-١٩٨٠-

-صباح الخير يمه
- هلا صباح النور
-اخواني ماكعدو راح نتاخر على المدرسه
-اي كعدو بس ديغيرون ملابسهم لتخافين عيني محد يأخرج على الاصطفاف
-هههههه لااا مو ست سليمه تريد تنطي هديه للشطار بالاصطفاف اليوم ولازم اروح من وكت
دصيحيلهم بسرعه خلي يجون
-هسه دصبري شبيج هياتهه مدرستج وهسه ساعه ٧وعشره تلحكين ... دكلي هسه ورايحه اصيحهم
- هااا ست شطوره شبيج تصيحين من الصبح
- ياخي يعني يوميه تأخروني خلي نروح يلا

وطلعنا اني ومصطفى وعلي ودعاء .. كلهم للابتدائيه واني للمتوسطه بعدلي سنه واصير اعداديه واني شاطره واحب اقرا هوااي ..

وصلنا مدرستهم تبعد عن مدرستي فرعين اوصلهم واروح لمدرستي طبعا بابا مانشوفه الا باليل او الجمعه والسبت لانه يطلع من السته الصبح ومن يرجع هو نايم واحنا نرجع نتغدا ونام من نكعد هو طالع وهكذا الحال كل يوم ....

بالمدرسه .....

- صباح الخير رقيه ...
- صباح النور همزين متأخرتي
ست سليمه انطتنه هاي الشرايط نلبسهن هيج صفح واني اخذتلج واحد هاج البسي
-ايي همزين يلا راح البسه ..

بدا الاصطفاف والجو بارد لانه شهر الواحد وهالشهر ثلج الهوا .. استلمنا هدايا ورحنا للصفوف
خلصنه خمس دروس وطلعنه مريت على اخواني ورجعنه سوا كالعاده اكل سبح ونوم للعصر
ساعه ٤ كعدنا كلنا نقرا عدنا حولي بالبيت يصير بي شباك جبير بي حدايد بالطول صايرات والضلع الي بصفه باب زجاجي منقش كله يطل ع الكراج هنا احنه نكعد نقرا وكلنا مفرشين الكتب بالكاع وامي يمنه تكشر فواكه وتنطي لكل واحد منه
وبعدين تشرح لاخواني وتسمعهم لو تكعد تخطط دفاترنا وتسوي زخرفات بيهن لان متقبل نكتب الا دفاترنا مخططه تكول حتى يكتبولكم احسنت ومن هاي الاشياء
واحنه هم تعودنا وصرنا نتنافس ويه صديقاتنا حتى نخلي دفاترنا احلى منهم...
رجع بابا على العشه كعدنا سوا وبعدين ضلينا نلعب صارت ساعه تسعه لازم كلها تنام

———-⭐️⭐️⭐️———

بنت عاديه وحياه هادئه ككل عائله بزمن الثمانينات
ياترى شنو الي كاتبه القدر لزهراء حتى يخليهه تكون غير عاديه !!!!!

🌱🌱 ملاحظه !!!!⭕️
القصه طويله والاحداث حقيقيه وتستمر لحد جيلنا هذا حتى الي يقرأ ويشوف كلشي عادي بنظره فهو تمهيد لازم تمر بي الروايه لان القدر مايجي مره وحده لكن على شكل تخطيط واحداث بسيطه ....

الي بنفسه يعرف شنو الي راح تسوي هالبطله لانها فعلاً تستحق كلمه بطله ... يتابع باقي البارتات ..

#شقراء_بغداد

بارت_٢



مَرت الايام وصارت امتحانات نصف السنه ونجحنا كلنا .. صارت العطله رحنا لبيت بيبي الي دائماً نجتمع عدهم عندي ٤عمات وعمام اثنين

احلى الاوقات كانت من نجتمع على الاكل ويصير الضحك والسوالف الحلوه وشلون حلو يكون البيت كله ياكل من سفره وحده بدون تذمر وبدون انتقادات
ويصير الليل ويبدأ وقت التعلوله ...

جيران بيت بيبي عدهم بنات اثنين بعمرنا اني و مصطفى
فنطلع باليل بعد العشى نلعب ركيضان ونلعب توكي
ومرات نلعب العصر ويه ولد المنطقه وولد عماتي هم نلعب طوبه كلنه كانت اوقات متنسي ابدد...

نرجع للبيت الساعه عشره تقريبا ونلكه بيبي فارشه الاستقبال وغرفتها من الطول للطول لان هي متقبل اله كلنه ننجمع عدها بالعطله ونبقى اسبوع او اكثر
فنام اني واخواني وبنات عماتي الكبار وولد عمي يم بيبي بغرفتها ...تصير بس للاحفاد ..
اطفي الضوا وتغطينا كل واحد بطانيه وكل اثنين تخلي فوك بطانيتهم لحاف الي يصير بالنص ستن سمائي او وردي او اصفر ومخيط داير مدايره بالابيض كلش ثخين وناعم يصير .. وتنام هي على جربايتهه الحديد المصبوغه بالاخضر الفاتح
وترتجي على المخدتين العاليات الحاطتهن وادير وجهه علينه وتحجيلنه قصه

وتبدأ .... كان يا مكان. في قديم الزمان ...
جان هناك بنت اسمها "نــبـعه " واخوتها سبعه ....
تضل تحجي بيبي بهدوء وصوتها بي نبره من التشويق
رغم هي دائماً تحجيلنا هالقصه بس دائما احنه نسمعها كأنها اول مره تحجيهه ...
هاي نبعه عليهه جمال ماشايلته بنيه العين هالطول والوجه هالعرض جنه گمره .. والخشم تكول عود شخاط وبي زرفين هنا وهنا ... وحلكهه صغيرون والشعر اسود اسود جنه ليل تضفره وكصيبتهه تشحط وراهه ..
وجان ابن الملك يدورله على عروس ضل يمشي من ديره لديره ويتنكر يريد يشوف ياهي الزينه يلكطهه .. وليش ما فايت بديره نبعه وشايفهه تغسل على الجرف ومنعجب بيهه وبجمالهه ورايح سآل على اهلهه وثاني يوم رايح لاهله وكايللهم مااخذ الا نبعه هسه تمشون تخطبولي نبعه
اهله تفاجئو شبيهه هاي نبعه وهيج متخبل عليهه كالو دنروح نشوفهه ... ولمو غريضاتهم ومشو لديره نبعه ..وهناك ابوه الملك من شافهه تعجب تعجب بحسنهه وكبل خطبوهه اله والملك وابنه فرحانين هيج مرت ابن الملك حلوه ..
وليش ماهذني بنات خاله وعمه جانن يردن هنه يصيرن العروس وماتن بغيرتهن ماتن
وكومن بيوم العرس من اخذوهه ع الهودج الزفافه
وهنه راحن يمهه ع اساس يشوفنهه شبيهه وينطنهه مي تشرب هاي وكت اليكعدون يرتاحون بالطريق
وراحن يمهه وجان وحده تكللهه ..
ماانطيج مي اذا ماتنطيني وحده من عيونج
هاي نبعه تفاجأت وخافت وهي خطيه عطشانه
ضلت هذيج تخوف بيهه وتذب بالمي كدامهه وتلوعهه عليه ونبعه ساكته وتبجي جان تكللهه انطيج عيني وشلعتهه وانطتهياه وضلت خطيه نبعه بتك عين ... وهم مشو مشو وجان ترد الثانيه تكللهه ماانطيج اكل واشمرج هسه من الهودج اذا ماتنطيني عينج الثانيه وكامت نبعه تبجي
وتصيح ومحد يسمعهه جان ياخذن عينهه بالكوه
وجابن وصله وشدنهه عله عينهه وكللهه خاف يسالج ابن الملك لاتحجين شي سوي نفسج خرسه تره بس نسمعج تحجين وياه شي نجي نموتج
وخطيه جان نبعه تضل ساكته ومن وصلو للقصر ونزلوهه اخذنهه لغمطن وجهه بالسيان وخلن عليهه ريحه مطيبه وكعدنهه وسدن الباب
جان يطبلهه ابن الملك وهو فرحان مرته احلى وحده بالديره ويريد يشوفهه وجان يلكاهه سوده مصخمه وريحتهه تكتل ومعصبه عيونهه
جان يضل يصيح عليهه ويكللهه هاي شمسويه بنفسج ليش هيج وهي ساكته ماتحجي
رجع يصيح ويحاجيهه وهي ابد مافتحت حلكهه
جان صاح الخدامه اجتي اخذتهه سبحتهه ورتبتهه وجابتهه اله ... كعد وشافهه شلون مرتبه وجسمهه حلو كللهه شبيج منو سوه وياج هيج ماحجت بس ساكته .. عباله تستحي وعافهه وجان ثاني يوم يسألهه شبيهن عيونج ليش شادتهن متحجي هم عافهه وضل اسبوع عايش وياهه ومتحجي وياه هيه .. جان يطب عليهه بيوم ويسمعهه تبجي كعد كللهه سولفيلي شبيج تره اذا ماتحجين اكص راسج
وهي خافت وحجتله كلشي وكلتله اخذن عيوني وضمنهه كللهه شلون تضلين هيج عميه جان تكله
اله تجيبهن وتذبح عصفور وتلزكهن بدمه بعيني ويرجعن ... جان يكللهه خوش هسه اني اتصرف
وراح جمعهن بنات عمه وخاله ودزهن للتعذيب وهنه من خوفهن دلنه مكان عيونهه وين ضاماتهن
وراح اخذهن وذبح عصفورين ولزك بدمهن عيونهه وشدهن وثاني يوم نبعه فتحت ورجعت تشوف وعاشت ويه ابن الملك وصارت حامل
وجان هم يجن هذنيج البنات ويخطفنهه واخذنهه ذبنهه بالبير وضل ابن الملك يدور عليهه وماكو يدووور وماكو مالكاهه .. عاد الملك زوجه وحده من عدهم وجان يجون اخوتهه لنبعه ..
كالو خلي انشوف اخيتنه شلونهه شلون عايشه
واجوي لابن الملك وكللهم اختكم ماكو شردت
هذوله ماصدكو عرفو بيهه شي وضلو يدورون عليهه ومايلكونهه .. وجان اخوهه الصغير يروح يركض وره نعجه وهي تركض يم البير وهناك وجان يوكع ويضل يبجي ويصيح نبعه نببعه
جان نبعه تكله ..

وانه شبيدي وشبديه ابن الامير نايم على اديه
والشعر جاسيني والمي غاطيني ...
وضل هو يبجي ويصيح نبعه وهي هيج تردله
لحد ماسمعوه اخوته واجوي وطلعو نبعه
وشافو بيدهه ولد وحجتلهم الصار والملك اخذ البنات حطهن بالتنور وحركهن ورجعت لابن الملك واخوتهه عاشو يمهه
وعاشو عيشه سعيده ..

ونضل نسألها بعدين
بيبي شلون عاشت بالبير هيج !
تكول جانو العصافير والفارات يجيبولهه اكل
ونرجع نسألهه ...
شلون الدم لزك عيونهه ؟
تكول مو هذا مال عصفور مو مثل دمنه هذاك قوي ويلزك بسرعه
ونرجع نسألهه ..
بيبي وشسمو ابنهم ؟
تكول واني شعرفني شسموه عفتهم ومشيت بعد مادريت شسموه ..

ونرجع نكللهه ....
بيبي احجيلنا بعد وحده حبابه حبابه ... ونكوم من فراشنا ونصعد على جربايتهه ونهوس ونصيح بعد وحده يلاا بيبي بعد وحده وهي تسكت بينه واحنه منسكت لحد ماتحجيلنا قصه ثانيه ...
قصه حديدان ...
ونرجع لمكانه ونتغطه ونندار عليها حتى تشوفهه شلون تحرك ايدهه وحركات وجهه ... وهي تكول...
حديدان ولد قوي ويحب البطات ويروح كل يوم للنهر
حتى ياخذ بطاته هناك وجان تطلعله سعلوه...
تريد تاخذه تاكله ... بس هو ذكي ويكوم يركض وهي تركض وراه ......ويروح ويبني بيت من طين ...
وتضل بيبي توصفلنا شكلهم بالقصه واحنه نضحك
وجنه مصدكين شلون هو يبني بيت مره من طين ومن حديد ومن خشب وشلون يختل بالركيه ...

طفولتنا تصورلنا كل هذا حقيقي ..العصفور ودمه والعيون التنشلع جنه مصدكيهه ومركزين حتى نسمعهه ونفرح من تكول عاشو عيشه سعيده نتخيل هاي بعد ضلو حياتهم بس يضحكون وفرحانين واحنه هم راح نعيش عيشه سعيده بالنهايه ..

ونام بعد هاي القصه .... نكعد الصبح نلكه عماتي وابويه وامي وعمي وبيبي كلهم ملتمين حوالين الصوبه وقوري الجاي وسفره الريوك ممدوده .....

الحنيه الي بلمتهم ماخلتنا نحس بالوقت شلون يمشي كلشي كان من اروعه ببساطته وروحه الطيبه ....

رجعنا لبيتنه وتحضرنا للدوام يوم الاحد ...
بدأ النصف الثاني من السنه الدراسيه وكان هادىء
وبدأ جو الربيع يملي المكان ... كنا متفقين ان بيبي تاخذنا ونروح لبيت عمتي الصغيره "سوسن" بالعطله بعد ماتخلص الامتحانات وفعلاً خلصت الامتحانات وبعد اسبوع رحنا الهم

... بيت عمتي ...
-اكلج يمه خلي نروح لبيت خوالنه بالعرب
-شيودينا يابنتي الطريق هنا هنا
-لا يمه الله عليج دخلي نروح وناخذ البنات هم ماشايفات خوالهن ونكضي عطلتنا هناك
- منو ياخذنا
-هسه اوصي حميد "زوجها" يتفق ويه صديقه واروح لجيرانه اخابر على نضال "عمتي الثانيه" هم تجي ويانه
- بس البنات شلون لبسهن
- هم صدك يلا اخذهن باجر للسوك اجيبلهن كم دشداشه وحجابات وغراض لبناتهم وجهالهم صوغه الهم
- اي لعد الصبح نروح نتسوك وحضريلنا الكبه هم يحبوها ونروح ثاني يوم
.
.
صار يوم الروحه لخوال بيبي ... وعمتي خلتنه نلبس حجاب هي لبستنه بايدهه .. واخذت النه عبايات
وهي وبيبي اشترن قطع قماش وقراصات وصبغ اظافر ومحابس وحتى عطور وسون كبه كميه جبيره واخذنها وكيك لكل عاائله وحده ... وطلعنا ....

وصلنا لطريق بيت عمتي نضال ... وكفنا انتظرناهه طلعت للشارع .. اجتي هي وبنتهه اكبر مني بسنه "ليلى " .. بس هي اكثر من اخت الي
الفرحه واللهفه الي كانو عندي ماتنوصف لاني احس رايحه لمغامره وكلشي حلو وياي ليلي الي ماحب الطلعه من دونهه ...

بعد طريق طويل كنا طالعين من الخمسه الفجر وصارت بثمانيه احنه نمنا بالطريق ...كعدتنا عمه راح نوصل اكعدو يبنات ...

-كلنه حجينه باستهزاء ..عمه هو هذا العرب الي خبصتونه بي ...(جان الطريق تراابي وبس كم نخله من بعيد مبينات والابقار ماليه الشارع والريحه ماتنوصف من بشاعتهه)

- لا لا هههههههههه دصبروا شويه هاي هسه من نوصل هذا البيت اشوفكم شلونه العرب

- لا انتو تضحكون علينه ماريد ابقى هنا بهالريحه الجايفه خلي نرجع

وضلينه نتوسل بيبي ترجعنه لحد ماكالت هسه ننزل واذا معجبكم نرجع عيب بعد وصلنا ميصير ...

جان اكو نزله تدخل بفرع ضيق وبعدين سياج كبير مشبك فتحه ولد شاب اسمر .. دخلت السياره وبعد مسافه نزلنا كدام البيت كان مفتوح ومقابيله حديقه واسعه وعلى جهه اليمنه من الحديقه اكو جدول مي صغير همه يسموه "ساجه" ومتجمعه يمه بطات ودجاج يمشي بكل الحديقه
واصوات الكتاكيت والبلابل ماليه المكان ...

دخلنا والنسوان ماعرف منين يطلعن كل وحده من جهه ماشاء الله شنو من جسم لو اكل سبع وجبات باليوم ماصير مثلهن ..

عدهم بنيه اصغر مني بس مبطله من المدرسه اسمهه "نورس" ... سمره وشعرهه محنى احمر طويل وعدهه شامتين بخدهه جسمهه مليان بس مو مثل البقيه ...هاي ضلت ويانه وابد معافتنه ...

اول مكعدنا بس كملو سلام اجني البنات مدو سفره الريوك ... كل ماتشتهي العين حطوه ...
اني صفنت هاي شوكت لحكو يسون اكل هلكد ؟؟؟
كعدنا ناكل بس ياسبحان الله طعم الاكل عدهم يجنن
ابد مماكله مثله حتى طعم البتيته او البيتجان يختلف
وعلى طول كعدتنا " ياهلااا زارتنا البركه .. ضيوف عزاز يمنه اليوم.

"
بعد ماخلصنا الاكل طلعنا نفتر بالحديقه واجتي نورس ..

- يا خاله تعالو اشوفكم الديره
- يلا بنات خلي نمشي وياهه يلا بسرعه

اخذتنا لبستانهم مشينه وره البيت كاع من طولها لطولها خضار وباطرافها اشجار برتقال ضلينا نمشي بيهه ونشوف اشجار التين وبينهن اشجار العرموط وبالجهه اليمنه مزروع النخل صاير مثل الحاجز عن الكاع الي بصفهم ....

بعد مسافه رحنه على اليسره مزروع البيتنجان وكعدنا نتعلم نحوي مثلهه شي كلش حلو وممتع شلون بنص الخضار كاعدين نجمع المخضر ونمسحه من التراب ويصير يلمع وريحتهه تجنن ...

بعدين شفنا اشجار الزيتون بس كان بعده ممستوي
ياسبحان الله شكله شلون يفتح النفس ...
ضلينه نفتر بالبستان وكل شويه نسألهه"نورس شنو هذا ،،، شلون يزرعوه ،، شوكت يقطفوه "
وهي تضحك وتجاوبنه ومرات عمه تجاوب بدالهه
وكل هالمشي والفره وبعدنا مواصلين الشط
ردنا نرجع لان تعبنه حييل ومقبلنه بعد نروح نكمل
عمه كالت عادي هسه البيوت البقيه الي نروحلهم هم عدهم شط وشوفوه ...
...................
بعد الغدا رحنا لبيت ثاني بمنطقه ابعد من بيتهم
وصرنا نسمي "بيت الغابه " لان من اول مدخلت السياره
بوسط اشجار النارنج وهي متشابكه وكانت بدايه الغروب فشكلها يشبه الغابه لان المكان كله بس اشجار من كل جهه..
تعشينا عدهم وكلش نعسنا اني و بنت عمي وولد عمتي وليلى نمنه واحنه كاعدين ع القنفات ماحسينا الا عمه تكعدنا
وتكول راح نروح لغير بيت ...
احنه صفنه عليهه ... يعني هم اكو بعد بيوت مرحنالهه لعد هذوله شكد ؟؟!!!
وصلنا للشط وصارت من جهه اليمين نزله ضيقه دخلنا بيهه وصار كدامنا بيتين على اليسره ومن اليمين صار بستان كله نخل ... بين كل بيت مسافه بيتين عدنا بغداد

رحنا للبيت الثاني كعدنا يمهم وبمجرد مادخلنا التمو البنات وكلهن محجبات وبيض حمر يجنن ..
عمه اخذتنا لغرفه ثانيه وضلت بيبي والولد كاعدين يم الكبار ورحنا هناك بس بنات ...
والسؤال الوحيد الي انسألنه احنه البنات بي
"انتي مامزوجه !!!"
اي بعدني ..
ياااا بعدج
اي ليش شعندي من هسه متزوجه
هنا وجهن ينكلب ويصير نظرات متتفسر
بعدين فرشو ونمنه راساً .....

صباح اليوم الثاني ......

كعدت على اصوات الابقار وصوت النسوان على جهالهم اشوف ماكو هنا احد بس احنه البنات وابن عمتي
الساعه ٧ وربع معقول كاعدين قبلنه شعدهم من وكت
رحنا غسلنا دخلت المطبخ اشوف البنات كلهن واكفات يطبخن ويغسلن مواعين شكلهم مكملين ريوك
كعدنا احنه حطولنا صينيه كلها لبن خاثر وبتيته وجبن العرب الابيض وكلاصات حليب ....

اكلنا واكلهم يفتح النفس .. يخليك تمسح الصينيه
سالت عمه وعرفت انهم كاعدين من الخمسه !!

رحنا افترينا بالبستان مالتهم .. وصلنا شجر الرمان
سبحان الي ابدع بخلقه الريحه الي بي تسحر
وشكله يشهي ..

وحده من بناتهم ويانه تمشي عمرهه ٩ سنوات بس البنيه حركه كلش .. ووحده من النسوان الكبار هم وعمتي
فاني رحت على عمه كتلهه..

-عمه خلي نقطف من هذا الرمان
- عمتي ضلت تضحك وكلهم يضحكون المره الي ويانه كالت هسه بنيتي اكطعلج وحيده
-بنتي كولي نكطع او نحوي هنا ميكولون نقطف عيب
- اي عمه شمعرفني اني هيج
اني قاريتهه بالمدرسه نقطف الرمان والبرتقال مو صح
- عمه المدرسه تختلف عن حياتنا هنا بعدين افهمج هسه اكلي هالرمان احسن

اني اكله حبه حبه اخاف اتوسخ .. والبنيه الي ويانه اكلته بعضتين وخلصت فاجتي كلتلي ...
-تردين افتحهه الج
- لا عادي دا اكل مابيهه شي

كلش استحيت وحسيت كأني ماعرف شي
ليلى كانت تتصنع شخصيه وتصرفات مو الهه
تتصرف بمياعه اكثر وكلامهه اكثره متكبر رغم انها مو هيج ... اما طيبه فبس مهتمه تشوف بالخضار وحايره بدشداشتهه شلون تمشي بيهه لانها طويله عليهه وعريضه ....

طلعنا من البستان مرينا من يم مره تسحب بالبقره وتمشي
ضليت صافنه عليهه شلون قويه هي رغم انها كلش ضعيفه وناعمه بس مبينه قويه ...

هنا صدك معنى الام تشوف بعينك احساسه وحنانهه وتشوف الفطره شلون بتصرفهم وشلون يرحبون بضيفهم
ويحسبوه واحد منهم واعز ... فعلا اهل كرم واخلاق وطيب .... عشت وياهم يوم واحد بس ولحد هسه ماعرف اساميهم كلهم اصلاً بس شفتهن احن من امي
واطيب منها .. مالكيت عند امي حنيه او اهتمام
مو معناه انها هاملتنه لا بس هي مو المره الي كلبهه على بيتهه وعيالهه ... عدهه نوع من الغرور وبعيده كل البعد عن ابويه ...

هنا شفت شلون المره تقدس زوجها وتحترمه وتلبيله كل حاجاته قبل ميطلب والكلمه الطيبه متنزل من لسانهه وبيتهن مملكتهن يتنافسن حتى يخلنه احسن من غيرهن
شكد تمنيت امي تكون وحده من هذني النسوان ..
.....
خلص الغدا ورحنا للشط كانت اول مره اوكف قريبه من الشط هيج ... من بعيد شفت ولد يمشي ورانا من طلعنا من البيت لحد ماوصلنا للشط .. بعدين اجه سلم على زوج عمتي ووكفو سوا واجه واحد يمهم هم ضلو يسولفون وهو يختلس نظره علينه كل شويه ....
كان طوله متوسط واسمر حلوه ملامحه وعنده عضلات وسط ...

وهناك اجه محمد وصعد للنخله ونزل التمر وضل يحاول يحجي وياي واني مرديت ولا شي اله

- ليش مقبلتي اذا ابالج شي كليلي حتى افهم
زين بس خلي احاجيج شويه بس تعالي

واني امشي بسرعه وهو يمشي وراي واخته وياي وتضحك بهدوء
وصلنه البيت ولكيت بيبي تكول لعمهم يحضر سياره حتى نرجع
رحنه نحضر للغدا حتى العصر نرجع وبهالاثناء اجتي عبير وطلبت مني اروح احجي ويه محمد بالغرفه الاخيره ينتظرني اني مقبلت بالبدايه بعدين هي اصرت وكلتلي اذا متردي فهمي هالشي اني تعبت منكم

- محمد
-واخيراً اجيتي ... ليش تشلعين كلبي هيج
- عفيه اني ماكدر اتاخر اخاف احد يجي بس ردت اكولك اني ماكدر على طلبك واترجاك لاتفتح الموضوع بعد
-ليش يعني ليش شتريدين حاضر يصيرلج بيت وحدج ابنالج ودراستج كملي ماامنعج
- لا عفيه لا ماكدر
- زين انتي مفكرتي ليش اني مصر عليج هيج
-ليش؟؟
- لان حبيتج من شفتج واني احس مالازم اضيعج
ارجوج فكري ولاتحرميني من هالسعاده والله حتى برفضج الي هم فرحان وهسه من سمعت بيبتج تريد ترحون كلبي انعصر
- شوف اني اقدرلك كل هذا واذا تحجي عن حب فاني ماعرف شنو تقصد اني ماعندي هلاحساس
وشغله ثانيه ايجوز انته متعرفهه
اني مريضه اذا لاحظت وهالشي مو اي احد يتحمله
فارجوك خليك بعيد عني لاني مامفكره ولا افكر بالزواج هسه مستحيل
- ادري بيج مريضه والكل عارضتني من اختاريتج
بس اني اريدج
- صار لازم اروح اسفه ماكدر على طلبك ...

..... يمكن نسيت احجيلكم عن مرضي .. الناس تسميه مرض واني اشوفه نعمه .. اني مريضه اكزيما من كنت بالرابع ابتدائي بسبب صدمه سببهه امي خفت بوقتهه وبعد يومين بينت عندي بشكل خفيف وبعد شهرين انتشر المرض بكل جسمي والدي اخذني لكل دكتور وماكدرت اسيطر على انتشاره الى ان صرت بالمتوسطه بدا يخف من جسمي بس بايدي ورجلي ماراح وضل يجي بموسم ويختفي بموسم ثاني
ضليت اعاني من كلام الناس وانتقادهم بالدوام وباللعب بس تعودت وكأن ربي انطاني قوه وقابليه نسيان كبيره لكلامهم لدرجه ان اي شخص يحجي مجرد مادير وجهي عنه انسى ومايوجعني كلبي من كلامه
......
رجعنا لبيتنه وكل الطريق افكر اذا راح يتعرضلي مره ثانيه او ينسحب ...
.....
وره فتره ...
رحنا الجمعه لبيت بيبي وهناك اول ماكعدنا بعد ماحاطين الغدا سمعنا الباب اندكت وسمعت صوت زلم باوعت
من الشباك واشوف محمد ....
هنا صرت ارجف واحس كلبي راح يطلع من مكانه خايفه بس لا يحجون بالخطوبه ....
وضليت ادعي ان مايحجي شي لبيبي لان اهلي واعرفهم
من يحجي احد بخطبه بنيه يكومون يكاطعون اهل الولد
ويتعصبون هيج طبعهم حتى ويه عماتي هم خلوهن يزوجن متاخر بسبب هذا طبعهم ...

صار الغدا وكعدوا بينهم يسولفون واني من بعد ماسلمت ماطلعتلهم ... وصار ال خفت منه
حجو بموضوع الخطبه واهلي رفضو راساً
راحو الجماعه وشفت محمد وجهه ميتفسر وبس ساكت
ماحجه ولاشي ....

بعد طلعتهم اجتني بيبي ..
-تدرين انهم هسه رادوج لابنهم محمد
-هاا وانتي شكلتيلهم
-هه احنه ننطي بنتنه للعرب شبينه ..بنتي صح همه ناس طيبين واخلاق وحالهم احسن من حالنا بس انتن بنات بغداد مدبرن عيشتهم
هناك عجن وخبز من الفجر وعيالهم هواي رادلهم حيل للزرع والحلال هذني وين تكدريلهن
-اي صح حجيج بيبي زين ماوافقتي

حسيت حمل وانزاح مني اهلي واكفين وياي وهمزين متعاركو وياهم بس اني متاكده انهم مايرحولهم بعد ...

وبعد ماخلصت من الثالث ونجحت للاعدايه جنت طالعه من المدرسه و واكفه ويه صديقتي واشوف محمد اجه عليه يتمشى بكل ثقه
وكف يمي وكال ...
- شلونج زهراء ان شاء الله بخير
-ش شجابك هنا
- اريدج بكم حجايه وحدنا
صديقتي كبل راحت وضليت اني اطكطك من الخوف
-عفيه احجي الي تريده هسه اذا اهلي عرفو يذبحوني والله
- اهدي اهدي لاترجفين بس اريد اكلج تره بعدني احبج
وراح اجيب اهلي مره ثانيه واخليهم يسألوج وانتي وافقي اذا كلولج تقبلين بيه
- لا لا عفيه لتجيبهم اهلي مو مثل ماعبالك ميقبلون بنت تزوج هسه
- ادري ادري بس اخطبج وشوكت متخلصين مدرسه نتزوج انتظرج انتي بس وافقي
- ماريد لا ماااريد روح عفيه الناس تضل تحجي عليه
-عوفي النااس لتخبليني ... صار شكد انتظرج ماغزر بعينج هاي سنتين صار واني متزوجت لخاطرج
مثل ماني انتظرت وتحملت كلشي انتي هم لازم تتحملين
فهمتي وخلي بالج توافقين بكيفج او غصب عنج
اخذج اخذج ماشيييي
- روح مني رووح
-كافي لتبجين امشي اوصلج للبيت
-مااريد بس عوفني اني ارجع

#شقراء_بغداد
بارت_٣

هذا الولد اشوف بعيونه موتي الخوف هو كل الشعور الي
احسه وياه ... عرفت ان نهايته من حياتي ماراح تكون بهالسهوله الي ظنيتهه وبعده الطريق ببدايته
رجعت للبيت وبقيت يومين بالفراش وخايفه وحرارتي مرتفعه ...
هذا الشي يصيرلي لان اي انفعال يأذيني بمرضي ويخلي كل جسمي حار فأتهرب من الحساسيه بالمنومات الي هنه علاجي الوحيد بوكتهه ...

سمعت بعد اسبوع انهم اجوي خطبوني مره ثانيه من بيبي ولانهم مايندلون بيتنه ماحجو ويه ابويه لحد الان
وكالعاده بيبي ترفض وهي كل الامر بايدهه محد يعترض على كلامهه...

بس الي تغير هالمره ان اهلي تغيرو وياي وظنو اني عندي شي ويه الولد

بعد شهر بنهايه امتحانات نصف السنه وكت طلعتنه للبيت شفت محمد واكف بركن المدرسه
من شافني اجه عليه كبل كلتله ...
- شعندك هنا مره ثانيه
- الناس تسلم بلاول
- ماريدك ولااريد اسلم عليك
- بكيفج بس تره اشتاقيتلج واجيت اشوفج
- انته متخاف عليه متكول اذا اهلهه او احد من الجيران شافني شيصيرلي شبيك انته شبييك
- خلي يشوفونه حتى يعرفون حبنا ويوافقون كافي ترا تعبوني اهلج بيبتج مراضيه بيه كل مادز اهلي تردهم ليش شناقصني حتى هيج رافضه
- انته ياحب تحجي بي !! وبعدين بيبي تعرف مصلحتي ومغلطانه هيه
- هاا يعني بعدج متريديني ،، جاوبي ليش ساكته
- ماعندي جواب فهمك كفايه
- لججج اسمعيني زين،، مو محمد الي تذلوه فاهممه وخشمج اليابس هذا اكسره اكسره واذا مارضيتي اليوم ترضين باجر
واني الغبي الي رايح واشتريلج هدايا واذكرج بكل نفس بس انتي متستاهلين والله لو مو كلبي هذا الي مسهرني ليلي ماشفتيني اطخلج راس ...
- محمد لاتحجي هيج عفيه بس احنه منرهم سوه يعني اني بعدني صغيره وحياتكم اني ماكدرلهه وشلون تريدني احب وامشي بطريق ابويه ميرضى بي البنيه اهم شي سمعتهه افهمني
- بس افهمني افهمني وانيي ليش ماتفهميني هااا جاوبي لييييش لييشش لان مو ابن بغداد ماترديني هااا احجييي
- عفيه بلا عصبيه لتخوفني اكثر
- الله يلعنك يالشيطاان استغفر الله هاي سكتت لتضلين تبجين كافي مردتي كلبي
- اسفه والله اسفه ادري صعبه عليك بس اني اخااف من اهلي ماكدرر
-زين اسكتي اسكتي امسحي دموعج كافي
-ماشيي
- تعالي وياي
-وين؟؟
-هنا بالركن شويه
- ليشش
- هسه تعرفين
رحنه وانطاني كلاده فضه بشكل ورده
وكال .
- هاي مثل اسمج زهره وهاي العلبه افتحيهه انتي
- هاي اقلام حلووات
- اي واحد منهن حبر واحد اسود جاف كلت تستفادين منهن
- شكرراً كلش حلوات
- تره متعرفين شكد انه اصيرن غير انسان وياج انتي بس لتعانديني شتريدين يجرالج
ولتخافين مني بعد ....ماكدر اذيج ابد
- زين صار لازم اروح تاخرت
- روحي بأمان الله .. وراح اخلي بعطله اخير السنه اهلي يجون
- مع السلامه

من رجعت لبيتنه واني احس بندم وخوف بنفس الوقت ... بس الشي الوحيد الي متاكده منه ان ماراح تعدي على خير هالمره ...

الي خلاني اوافق على اخذ هدايا ان هو كسر خاطري متعني المسافه ومنتظر من الصبح حتى يشوفني احس بالذنب تجاهه لاني مدااكدر ابداله نفس شعوره ففكرت ان انطي فرصه تخلي يرتاح شويه وهو اكيد بيبي ماراح تقبل ويمل بعدين ويروح ...

هيج فكرت وكنت اكبر غبيه ...
بعد يومين اجتي وحده من المنطقه حجت ويه امي
انها شايفتني من كنت ويه محمد بهذاك اليوم
وهنا صرت بموقف ماكدر ادافع عن نفسي واكول جذب ولا اكدر اكول اي واحبه لاني ماحبيته ومارايدته اصلا هو فارض نفسه عليه ...

فهمتهه كلشي الصار من بعد ما اخذتلي رزاله مرتبه ..فحجيت كلشي من البدايه ...
بعد ماسمعتني كالت اني اتصرف ...
عرفت بعد فتره انها تحاول تقنع بيبي توافق بمحمد وتزوجني بس هي رافضه وتعاركت ويه امي على هالموضوع ...
انتهت عركتهم بانها ماصارت تروح لبيت بيبي ابد ..

بعد ما خلص الدوام واجتي العطله خلال اول شهر من العطله صارت جيت اهل محمد وحجو بالموضوع وهالمره طلبو ان يجون لبيتنه ويشوفون ابويه
بيبي مكدرت تردهم لانهم خطار بكل الاحوال
وجابتهم لبيتنه .....

حجو ويه ابويه واخيراً توصلو لحل انهم ينتظروني اكمل دراسه يلا تصير الخطوبه ... واشترطو اهلي انه مايجي ويشوفني اله اتخرج من السادس ...

هذا هو نصيب محمد وصار بس مو رغبتي وادري بابويه يحترم خاله وميكدر على طلبه وبلاخص بعد ماعرف انهم حاجين اكثر من مره بالموضوع

الاهل دائماً الاهل المرتبه الاولى ...
والعقل هو الحاكم الاول والاخير ....

صرت مثل مارادو ومثل ماتمنى محمد ومثل كل شخص نصح وساهم برأيه بهالخطبه لان من سمعت اقاربنا انهم ينطون بغداد للمحافظات حجيهم اغلبه نصائح شلون اكدر اعيش هناك واستهزاء بالحجايه الثانيه ...

ماحسيت بشي من غضب او فرح او رفض كلشي كان عادي المهم ماراح يخوفني بعد ... بس همي هو شلون اعيش وياه واني اخاف منه ؟؟؟؟

مالمت ابويه بقراره ولا اعترضت لاحد على شي
كنت افكر انه راح يسعدني لان مبين يحبني ويريد رضايه واكيد اهلي لو ما يشوفون هالشي زين الي

مايوافقون فاكيد همه يردون مصلحتي ...

بهاي الفتره نجحت من الخامس اعدادي ..
وبيوم كنت راجعه من بيت صديقتي دخلت البيت
شفت امي شايله غراضهه وتريد تطلع من البيت
وابويه كاعد بلاستقبال بكل هدوء ورزانه يباوع عليهه
شفت اختي دعاء بالمطبخ رحت سألتهه...

- شنو السالفه شصاير هنا
- اسكتي ابويه عصبي هسه لايسمعج
- هسه شحجيت غير افهم امي وين رايحه
- رايحه لبيت اهلهه مترجع بعد
-شننوووو
- بعدين احجيلج هسه بس اسكتي

هنا رحت سألته لامي وهي واكفه تطلع غراضهه من باب المطبخ

- ماما شوكت ترجعين

دارت وجهه عني وفتحت باب الشارع وطلعت بدون حتى متودعنا
رحت لابويه وسألته
- بابه شكو شصاير ليش هيج تصرف امي ويانه شبيكم
- انسيهه لامج
- شبيك بابه شنو انسيهه
- مثل مسمعتي وفهمج كافي
- ليش ليش
- بعدين بنتي بعدين
اجه وحط ايده على كتفي وراح صعد لغرفته
عيونه كلهه نظره ندم وقله حيله .. هاي اول مره يكون ابويه بهذا الوضع ...
رحت لدعاء حتى افهم شصار
- هسه احجي شصار
- اجه رجال على ابويه وكله عليكم دين وماوفيتوه
وهسه الرجال صاحب الدين يريد فلوسه
وهاي الفلوس كلهه امي ماخذتهه بدون علم ابويه
وهو من يسألهه متجاوب ولاتكله ليش اخذتهن وشسوت بيهن
-وتالي شصار
- بعد مراح الرجال ابويه سألهه عن فلوسه الي جمعهن من اخر سنه وطلع نصهن ماكو
وهي تكول مادري بيهم فابويه بعد ماتعاركو وكضوهه صياح
كللهه ترحين لاهلج ومن تجاوبين اسئلتي تكدرين اطبين البيت ....
- اويييللي عليك ياابه ماتهنى بعيشته وياها النوب حتى بفلوسه مايتهني مو هذا تعبه اكو مره تاخذ تعب زوجهه
- لج صفنتني ولاكأنها امنا الي نعرفها حتى ماعتذرت ولابررت اي شي بقت رافعه خشمهه ومشت
- الله اليستر من الجاي

عمامي عرفو بالسالفه والدين كان كبير فبعد كعدات العشاير ويه اهلهه اتفقو انها تدفع اقساط للرجال والفلوس الي ضاعت من ابويه ماحجه عليهن ولاخله احد يعرف
بس احنه ووصانا منحجي شي

مرت ٣ اشهر على روحتهه وهي ماسألت على اي واحد بينه كأنها ماعاشت ويانه كل هاي السنين

صار البيت مسؤليتي ... بيبي اجتي عاشت يمنه لان احنه مانعرف كلشي بالبيت فهي علمتني كل شغله وهي الي شالت كل امور البيت ماتخلي ابويه يصرف شي على مسواك او عزيمه كله هي ...

بعد فتره صار الدوام ... وهاي مرحله السادس الي
ويحتاجلها تركيز وجهد واني اكثر يومي بالمطبخ وغسل الملابس صرنا نتعاون اني واختي على البيت وهي تاخذ مكاني وقت الامتحان تدريس اخويه الصغير مسؤوليتي
الاكبر ....

صرت ادرسه العصر واكمل عشه ارجع ارتب فراشهم واروح ابدأ اقرا ... كلش انخفض مستواي بالدراسه
رسبت باربع دروس بالشهر الاول ....
ومع ذلك ماهتميت وضليت احاول اكثر من قرايتي
وعدلتهن بنصف السنه ونجحت ....

بهالفتره اني نسيت محمد وكلشي يخصه ... لان اصلاً ماعندي وقت افكر بي وهو هم اختفى ...
صارت العطله ارتاحيت من مسؤوليه تدريس اخويه
وضليت اعيد قرايه الكتب من جديد حتى اتحضر للامتحانات الوزاريه .....

هنا بهاي الفتره امي صارت تطلب الطلاك وتصر عليه وابويه رافض هالشي بالبدايه ...
بعدين صارت تتصرف تصرفات طفوليه كأن تلبس ملابس ضيقه وتزيد مكياجهه وتحجي على ابويه بالسوء كدام صديقاتهه .. ويوصلنه حجي من الجيران عليهه
من كانو يسألوهه شلون تفكرين بالطلاك واولادج وين يرحون ...
تجاوبهم ....... هذوله ولدهم مو ولدي همه يحنون عليهم اكثر مني خليهم همه يربوهم ...

هاي الحجايه الوحيده الي سمعناهه من امنه النه خلال هالفتره كلهه ....

كان كل يوم يمر عليه اكرهه اكثر .. اكره اهمالها
اكره غرورهه وحتى ان كوني بنتهه ...

لاني تبهذلت بين بيت ودراسه ومسواك وتدريس
كلها خلتني ازيد كره عليهه لانها مفكرت بيه واني بمرحله تخرجي وتحديد مستقبلي ...
ولا حبت ابويه وكانت زوجه صالحه اله بالعكس عذبته من بدايه زواجهم ...

مع العلم انها كانت كل فتره من احنا صغار تروح لاهلهه وتبقى اربع شهور او شهرين وترجع ... وبيبي هي الي ربتنه وحارت بكلشي هي هملته ....

بعد مرور ٣شهور .......

صار وقت عطلتي حتى اتحضر للوزاري ... اخواني هم وقت امتحاناتهم فصرت ادرسهم وبعدين ادرس وبيبي خطيه هي شالت عني كلشي بالبيت ..امي وابويه مازالو على نفس الوضع هي تريد طلاك و عركات بالمحاكم ...

رغم كل الاشياء السيئه الي صارت بس ابويه بقى مبتسم ويحاول ميحسسنا باي نقص وتحمل كلشي من امي
وماحجه عليهه بالسوء كدامنا لحد مابدت صحته تتدهور

صار عنده مرض الرعاش خلاه يفقد قوته وصعب عليه المشي ودائماً دايخ ..
هالسنه صارت عليه مثل الجحيم ... مارادت تخلص وتخصلني مرارتهه ....

صارت الامتحانات النهائيه ... وصرت مبتعده عن عائلتي واختي هي صارت تسوي كلشي بالبيت ويه بيبي

وتعبت نفسي كلش حتى انجح ... والحمدلله بعد فتره طلعت نتائج وحصلت درجات زينه ونجحت

قدمت على كليه العلوم وانقبلت قسم علوم رياضيات رغم جنت ماحب هالقسم بس نصيبي بعد ...

توكلت على الله وقدمت والدوام بعد اسبوع ..
رحت اشتريت ملابس وحضرت نفسي للدوام ...
الكليه بعيده عن بيتنا بس ابويه علمني الطريق ومنين اصعد وارجع وكلي اني اثق بيج واريدج تنتبهين على نفسج وتختارين الصديق الي تشوفين بي نفسج ....

بهالفتره بيت محمد سمعو بخبر تخرجي واجوي على ابويه ومحملين كل انواع الفواكه والمخضر واللبن وجايين ...
اني من شفتهم كلبي انعصر .. كنت مرتاحه بنسيانهم وطلعو همه مناسين ...

رجعو حجو ويه ابويه وبيبي حتى تكون الخطوبه هالشهرين ..
بس ابويه رفض وكللهم اذا ازوجت هسه متكمل كليتهه
واني اريدهه تتخرج وتصير عدهه وظيفه
وتحجج بموضوع امي هم واجلو الموضوع للسنتين الجايات ..
بس هالمره مارتاحيت من تأجيلهم لان عرفت مصيري مايتخطاهم ..

بـدايــه دوام الكليه ..

اول يوم دوام اخذني والدي وبقى هناك ينتظرني كملت دوام ورجعنا سوا ماكان اكو هواي محاضرات والطلاب اغلبهه ممداومه ...
ماعرفت اي صديقه ولاحجيت ويه احد هناك ..

بعدها يومين مداومت لان والدي تعبان وخفت اروح وحدي ...
اجتني بيبي باليل ..

- زهراء كاعده
- اي بيبي حبيبتي تعالي كعدي
- هاج خلي هاي الفلوس وياج مصرف الج وباجر روحي داومي
- بيبي عندي فلوس خليهن الج هذني
- لا تحتاجين كلشي يصير يايمه ماتعرفين يومج شبي
- بس بيبي اني اخاف اروح وحدي
- لاااا انتي بنيتي السباعيه ليش تخافين هو طريق
ولازم تكبرين وتعتمدين على نفسج احنه مدايميلج يايمه
- الله يطول بعمرج حبيبه كلبي والله بدونج اضيع
انتي اكثر شي احبه بهالدنيا

وبوستهه من راسهه واديهه وضليت حاضنتهه ...

ثاني يوم كعدت من الصبح ولبست تنوره رصاصي وقميص ابيض وشعري طويل يوصل للخصر
رحت لبيبي ضفرته الي صفح واخذت دفتري وجنطتي وطلعت ...

اول ماطلعت قريت ايه الكرسي ودعيت ربي يسهلي ومشيت ...
كنت سريعه بمشيي صعدت المنشأه ونزلت بعد عشر دقايق وضليت امشي حوالي ربع ساعه حتى وصلت القسم ...
وكفت اباوع على اللوحه الي مكتوب بيهه اسم كليتي وضحكت بهدوء ودخلت ...

ماكنت اعرف احد هناك فرحت كعدت على مصطبه وحدي وضليت اشوف الطلاب واخمن منو راح يكون مرحله اولى منهم ...

اجتي بنيه كعدت يمي قصيره وشعرهه اسود طويل وهي سمره ووجهه يضحك ...
-صباح الخير اكدر اكعد يمج
- اي طبعاً تفضلي
- اسمي فرح بالمرحله الاولى وانتي
- زهراء هم مرحله اولى
- اييي زين طلعنه نفس الشي بس شو مشايفتج
- اني اليوم يلا داومت
- هااا دكومي خلي نروح للمحاضره

دخلنا القاعه وكعدنا بالسره الثالث ... اكثر الطلاب
كانو ولد .. دخل الاستاذ جبير بالعمر ومشيب
اسمه عمران .. ضل يشرح واحنه
كلشي مانفهم وكال باجر امتحان ...

- اكلج فرح هو احنه شخذنا حتى باجر امتحان
- لا هاي اخذنا محاضره الثلاثاء واليوم وحده
وهو من البدايه كال كل مانخلص موضوع امتحان سريع
- زين شلون اني حتى الماده ماعندي ولا اعرف اسمها
- هسه ندبرهه اني هم مثلج هم ماعندي الماده

طلعنا للكافتريا اكلنا وضلينه نضحك هي بس تسولف واني اضحك على سوالفهه ومااحجي شي

- زهراء امشي نروح نحجي ويه هذا الولد لان هو اخذ الماده ووزعهه للطلاب
- لاا اني ابقى هنا انتي روحي اني انتظرج
-ماشي
.
.
ضليت كاعده وحدي واشرب عصير شويه ورجعت
- لج هذا يكلي ماعندي نسخ بعد
- هاي شنوو
- لتخافين عيني اني كدهه كتله اعتمد عليك اريد
ادبرلي اثنين وسالني المن الثانيه كتله وحده ويانه
- يجوز هسه يغلس عليهن ومايجيب
- لاا بابه انتي متعرفين هذوله شنو
بس تنخيهم يسون كلشي حتى يكبرون نفسهم كدامج
- ههههههه طلعتي مو هينه

كملنا محاضرات ورجعنه للبيت ... لكيت بيبي
محضره الغدا واخوتي راجعين من دوامهم
تغدينا ونمنا كعدت العصر وسمعت بيبي تحجي
وتصيح على ابويه ...

- كله منك انطيتهه عين لحد ما شاخت من الاول كتلك ضب مرتك عبالك احاجي حايط

- حجيه شبيج عليه شبيييييييج عايزني اني عايزززني

- بيبي شبيج شصاير

- امج عيني دازه تبليغ بالمحكمه تريد تاخذ شكو شي هي جابته للبيت لو تدفعون فلوسهن

- شنوووو يعني تريد غراض بيتنه !!!

- لااا هي متريدهن تريد فلوووس بس كاتبه هيج
حتى تمشيهه ،،، ربي ماتلعنهه هالمره غراض جهالهه تريدهن شنو من نفس نفسهه

- بابا هاي شبيهه ليش تسوي ويانه هيج

- شمدررريني الله خبلهه علينه

- طلكهه وخلي نخلص

- اذا اطلكهه لازم ادفعلهه كوم فلوس وهي مسويه
طلب بالمحكمه ان ماعدها مكان تكعد بي ومسويتلهه
لعبه ولازم لو تكعد بالبيت لو اشوفلها سكن

- هاي شنووو منين طلعت هالسالفه هاي مو كومه
ناس تطلك شو مسوو هيج

- يمه هو النغل شلون يصير مثلهه تبحش الكاع وتطلع مصايب ومحاكم

- هي متسوه ادفعلهه هذا كله ،، خليهه هيج تبزع
وتتنازل اني اعرف دواها
.
.
ضلو يتعاركون هو وبيبي وقرر ابويه باجر ياخذ عمامنه ويكعد ويه اخوتهه ويتفاهم ...

ضليت اقري اخواني وسويت العشه حضرت ملابس المدرسه الهم وحضرت ملابسي وبعدين سبحت ونمت

ثاني يوم بالكليه ...

- صباح الخير فرح

- صباح الخير عيني شو تاخرتي
- مو اني اطلع متاخره شويه من البيت وضليت انتظر المنشأه
- دطلعي من وكت يمعوده حتى نكعد نسولف نفتر
هسه لازم نروح كبل للمحاضره
- يلا عادي من نكمل نطلع نفتر

دخلنه محاضره بعدين طلعنه نزلنا سوه واول مافتحنه باب الاستعلامات صار بوجهنه ولد صارت عيني بعينه
هو رأساً حجه ..

- انتي هين يولو من ساعه ادور عليج
- ههههه زهراء هذا أيوب الولد الي كتلج وصيته
على الماده البارحه
- اهلا وسهلاً
- هلا بيج ... اكضبي يولو هاي مادتكم رحت اخذتهن من ولد الاقسام وجبتهن الكم
- شكراً ايوب ماقصرت
- العفو يلا انا اروح
.
.
- ولج هذا منين لكيتي
- شبيج ويانه بالشعبه مشفتي
- لا ماشايفته ابد
- انتي مطفيه يكعد ويه الولد المخابيل بلاخير
وصوته عالي يهرج الدنيا ماتسمعي من يحاجي الاستاذ
- مادري مامنتبهه عليه ولا على اي واحد منهم
بس لهجته غريبه هذا منين
- من الانبار هوه
- شجابه هنا
- مادري والله شكلولج عليه دلاله مال القسم
- ههههههه لج مو هيج قصدي
- ادرري داشاقه شبيج
.
.
مر اليوم عادي وبالبيت ...

- بيبي شصار وياهم اليوم شسوو

- هذوله ناس شرانين يابيبي مدري الله شورطني بيهم عندت اله اخذهه لابوج وهو مجان رايدهه اني شجاني وتخبلت عليهه .. الله عماني عنهه

- هسه صارت بعد لتلومين نفسج بيبي

ضلت تجيب وتلوم بنفسهه لان اختارت هالمره من دون هالنسوان ...

بعد يومين بالكليه ........

كاعدين بالمحاضره وفرح ملتهيه تكتب ملاحضات
واني مركزه على الشرح فسأل الاستاذ على
حل وحده من الخوارزميات ورأساً جاوبه ايوب
هو وكاعد شرحها اله بالتفصيل كله كوم اكتبهه
كام كتبهه وشرحهه النه .... اني وفرح صفنه
هذا شوكت لحك يفكر بيهه ويحلهه !!!!!

طلعنا من المحاضره واجتي علينه "روعه "بنيه ويانه بالقسم ....

- شلونكم بنات
- الحمدلله
- اكدر ارجع وياكم اليوم اخويه ميكدر يجي ياخذني واني اخاف وحدي اطلع
- اي اييي شكو بيهه من نخلص دوام تعالي
يم الباب الرئيسي ونطلع
- ماشي ،،، زهراء مو اطلعين وتنسيني
- لااا والله اضل انتظرج

خلص الدوام وطلعت لكيتهه واكفه اول ماشافتني ضحكت واجتي عليه .... فرح طريقها غير عن طريقنا فطلعنه وحدنا ....

- زهراء حكلج شغله ،،، تدرين من اول مادخلتي
القاعه اني كلت الله شكد حلوه هالبنيه

- هههههههه انتي الحلوه عيني

- والله شبيج حتى شكد تمنيت نصير اصدقاء
بس انتي اختفيتي ثاني يوم

- اي مو مكدرت اجي يومين داومت بس الاربعاء
والخميس

- ايي اني عبالي انقلتي لو بطلتي كلت راحت
بعد ماشوفهه ،،،، بس همزين لكيتج

- هههههههه وين اروح يمج باقيه

- عفيه انتي شكد هادئه عكس فرح هذيج متسكت
انتي ولاتحجين اليوم كله اشوفج تحجين كلمتين
والباقي مستلمته فرح

- لاااا فروحه حبابه والله على نياتهه بس هي شويه مرحه اني طبعي خجول فمااحجي هواي

- هههههه والله اني حبيتج كلش عجبتني عيونج
علميني ارسمهن مثلج

- ادللي باجر اجيب الكحله وياي وارسمهن الج
.
.
ضلينه الطريق كله نسولف هي حجتلي على عائلتهه عدهه اربع اخوان واخت صغيره مريضه بعقلهه ونسوان عمهه اثنين موضفات عايشات وياهم هنه المتحكمات بالبيت ...

وصلنه للمنطقه هي نزلت بدايتهه واني كملت نهايه
الطريق وحدي .... شفت علي من بعيد اشرتله
اجاني ورجعنه سوا ....

خطيه لكيت بيبي محضره الغدا واكلهه يجنن
مو مثل اكل امي تسوي مال استعجال
لا بيبي تعتني بالطبخه وتكثر بلاكل وماكو واحد
يكوم اذا ممخلص ماعونه ....

تغدينا ونمنا كعدت العصر تنظيف وغسلت ملابس
وقريت اخواني صارت بالسبعه حضرت العشه
كملنا و اختي تنظف المطبخ باليل واني رحت حضرت ملابسهم للدوام وسبحت والدنيا شته بااارده اكعد بغرفتي فوك واشغل الصوبه واضل متلفلفه بالبطانيه واكعد اقره ساعه وانعس اروح انام ...

الصبح بالكليه ......

- اكلكم بنات خلي نشوفلنه واحد يشرحلنه هالماده
بزعت روحي منها شلون هم نرسب !!!

- فرح يعني هو منو مفتهم ديجي يشرح كلمن حاير بنفسه ،،،

- لااا اني هسه اروح اشوفلي واحد يشرح معليه
اني شنو اضل مطفيه بالمحاضره هالماده شيقراها
بلامتحان ...

راحت وضلينه اني و روعه كاعدين اجتي وياها ايوب

- هاا السلام عليكم
- عليكم السلام
- كومن بنات خلي نروح للحديقه الوره ايوب حيشرحلنه هو مضبط اموره بيهه

كمنه اني و روعه ورحنه للحديقه احنه البنات كعدنا على المصطبه وهو ضل واكف كدامنه حاير شلون يشرح اخر شي صاح بينه ...

- يولو انتن جايباتني هين اضل واكف شلون
اشرح بله ،، كومن اكعدن بالكاع حدري

كمنه كعدنا صرنا مثل دائره وهو يشرح ويكول
حلن هاي وكتبن هاي كلش مرح هو وبسرعه يندمج
ويه الكل اني و روعه بس نضحك منحجي شي
و فرح كل شويه سالفه ....

عبرت ساعه ونص على كعدتنا كمنا عزمناه على
الغدا ورحنه كلنا للكافتريا ....

- عليش متاكلن انتن

- هاا لا دناكل
- عوفهن عوفهن ايوب هذني فاهيات هسه اني وياك نقضي على الاكل ويضلن هنه يتصفنن

- هنه اليخسرن يابه املو بطونكم هسه يجينه
هالعمران المشيب يسلك ابو ابونا
- ههههههههههه
- انتن كرايب اشو كلش متصافيات
- لا زهراء صديقتي بس احنه نرجع سوه وصرنا
مقربات هيج
- هاااا ايييه الله يديم الي بينكم وفرح انتي ضلي
هيج اخذتهه لصديقتج منج
- لااا اذبحهن اثنينهن بعدين هي صديقتي الي اول
اني عرفتهه بالبدايه حقي اكثر بيهه مو زهرتي
- اكيد حبيبتي
.
.
ضلينه نتشاقه وهو مثل فرح مايسكت يحجي عن كل شي السياسه عن العميد وعن الطلاب وهذا
لتمشون وياه وهذاك حباب هذا اهله منا وهالبنيه
حبابه وفقيره ذاك شاطر وهذاك غشاش
مبقه واحد مافصله شنو هوه ... واحنه بس نضحك
على سوالفه وهو وفرح كل شويه متعاركين بشغله
.
.
بعد مرور اسبوع ...

صارت عطله راس السنه واني كنت غايبه باليوم
الي قبله فدوامت على السنه الجديده ...
شفت فرح واكفه تنتظرني رحت عليها بوستهه
وكعدنا ...

- لج زهرااااء ماتدرين شصاار

- حسيت صاير بيج شي من هاي ضحكتج
الشيطانيه

- لج لاااا تذكرين هذا احمد الولد الكتلج عليه
شكد هادىء وحلو

- اي شبي

- بيوم الي غبتي بي اجه صارحني

- ياااااا صددك ولج خاف يطلع عنده سوالف
مو زينه

- لاااا شعبالج اني هيج ثوله رحت وصيت
جماعه وجابو كل اخباره وكلش فقير واهله
طيبين هو شاطر

- عزا بعينج لج انتي شنو هسه ماعرفنه منو يخطب منو انتي لو هو

- يااخطوبه انتي دااكلج حب حبببب

- النوب علينه حب لج بابه وين عدنا حب
مو عيب هالسوالف يريدج يجي يخطبج وفضت
السالفه ،، بعدين كليلي انتي شحجيتي وياه

-كلي اني نعجبت بيج من اول سبوع بس خايف
اجي احاجيج واستحي من صديقتج وانتي متعوفيهه فلكيتهه فرصه اليوم

- هههههه هاي لان رحت تلعبون هيج ورايه

- اني كتله افكر واردلك خبر ،، كلي الج لحد
صباح اليوم الاول من السنه الجديده لازم تكليلي
اي او لا

-يعنيي اليووم !!! بعدج محجيتي مو لاتوافقين

- ههههههه اكلج بس مو تضربيني

- لااااااا لج بس لاحجيتي

- اييي الصبح اول ما دخلت لكيته بوجهي
اخذني على جهه وكلي هسه تكليلي جوابج
قبل لايجون الطلاب وتصير هوسه
وكتله موافقه وعفته ومشيت ...

- لجج غبيه غبيه بهالسرعه حبيتي شساللفه

- مادري اني مو كتلج عجبني هادىء وعينه مو زايغه هسه شصار يعني خلي اجرب

- اوووف منج دنتبهي زين على نفسج لاتجيج
حجايه
.
.
صارت هالايام فرح بعيده عني شويه واكثر وقتها
ويه احمد مرات ميدخلون محاضره ويضلون يفترون مرات يطلعون خارج الجامعه ومرات اشوفه هو يدرسهه وتضل تضحكلي من بعيد ...

بقينه اكثر شي اني و روعه هي كلش تعلقت بيه
احنه مالنه دخل باحد بقيه البنات اني مااحجي
وياهن قليل يعني ماارتاحلهن كلش متكبرات
لان اغنياء حتى هنه ميختلطن باحد لا من ولد ولابنات مجموعه وحدهن يمشن ويسولفن ....

قسمنا حدد بعد يومين حفله التعارف ....
رحت اني وعمتي العصر للسوك واشتريت
ملابس للحفله اخذت فستان ماروني طويل ومخصر
وفوكاه عمتي اختارتلي شال ثخين ينحط
على الجتف وهو عريض وطويل يعني بس مجرد
احطه على جتفي لونه رصاصي وحذاء رصاصي
كعب ناصي ....

صباح يوم الحفله ......
لبست وحطيت مكياج بس كحل فوك الجفن وحمره ماروني وشعري رفعته كله وبس نزلت خصل كصيره على وجهي رحت للدوام واول مادخلت اتمشى للاستعلامات شفت روعه كدامي اخذتها ورحنا عدلنا شويه بالحمامات وطلعنا للقاعه الجبيره الي بيهه الاحتفال ....

كانت مزينه كلها وعلى المنصه واكفين الولد يتشاقون ويقلدون على بعضهم وبنات اثنين فاطمه ونهى هنه مستلمات مسؤوليه ترتيب الكيك
وتعاركو على سالفه شلون نختار منو يكوم
فأخذو من كل واحد منه شغله وحطوهه على المنصه وكل واحد يكوم يعرف عن نفسه وبعدين من ينزل يختار وحده من هاي الشغلات ويكوم صاحبهه

كامت فرح والبنات كلهم والولد بقينه بس اني
ولد اسمه رائد وايوب .،، صار دوري كمت
مرتبكه وخجلانه ....

- اسمي زهراء من الكفاح .. باب الشيخ .. عندي اثنين اخوه واخت واني اكبر وحده بيهم ،،، اكو شي تحبون تعرفوه

- منو اول شخص حبيتي بالكليه
- ههههه اكيد فرح و روعه والباقي بعدني ماعرفهم
- شنو هوايتج ولونج المفضل
- هوايتي الكتابه ... اما لوني المفضل
فهو الابيض والاخضر ...

نزلت من المنصه واختاريت قلم وكفت اشوف صاحبه منو جان يكوم ايوب باوعلي بنظره مطمئنه اجه اني قبل ميوصل حطيته على الميز ونزلت

- لج فرح متت ضحك هاي انتي ليش هيج
تضحكين بيه عابتلج

- لج انتي ثوله داكلج انتبهي على ايوب
انتي عبالج انصب عليج

- ليش شبي

- لج مشفتي شلون صافن عليج وحاط ايده
على خده وماد رجليه شطولهن مشفتي حتى
محجه ولا سألج شي

- اي وشسويله واذا صافن قابل بس اني موجوده

- لاا امي الواكفه تحجي هناك

كام هو انطه شعر على عشيرته بالبدايه
وبعدين عرف نفسه ....

- انا ايوب ابن شمر اصلي انباري ساكن بغداد
انا صغير اخوتي ...

كملو تعارف وكعدنا ناكل وبعدين كمنا اخذنا
صوره جماعيه واخذنا احنه البنات وحدنا صوره

جان تجي فرح وجايبه احمد وايوب وياهه وكالت تعالن ناخذ صوره ويه استاذنا الصغير ...

رحنا اخذنا صوره وطلعنه للبيت ماكو محاضرات
اليوم ....

البيت مشاكل امي متخلص كل يوم محكمه وطلابه
بيبي تمرضت وحرنا بيهه بالدكاتره صار ضغطها
دائما صاعد وتون من راسها ومعدتها ...
ابويه مهموم ومقهور علينه وميكدر يسوي شي
اخوتي منتبهين بدراستهم واني وابويه نبعدهم
عن مشاكل البيت ومنخليهم يعرفون شي

بالدوام صارت فرح بعيده كل البعد عني
احاجيها على كد السلام وقتها كله ويه احمد
صار عدنا امتحان وهالماده بس الولد
يعرفون بيهه احنه البنات مطفيات لان هي كلها رموز ...

صار ايوب ويانه اني و روعه وهو يشرحلنا
صرنا كل وقتنا سوه ناكل او بالمحاضره يكعد
يمنه ويسولف ويشاقه ويانه ...

مره اجتي عليه فرح من دنطلع للبيت وكفتني وحجت وياي على جهه ....

-زهرااء اسمعيني زين اني ماكدر اضل وياج
بالدوام لان احمد ميخليني اروح واحس نفسي
تورطت بهالسالفه

- مو كتلج فكري زين كبل استعجلتي

- لج هو حباب والله ويموت عليه بس خانكني
لا يخليني اشاقه ويه احد ولا اكعد ويه البنات
يكلي اغار اشوفج بعيده عني ..

- شدعواه قابل راح ناكلج عفيه اني محبيته

- دعوفي هالسالفه هسه خلي احجيلج شصار

- شكوو ولج بعد
- هذا ايوب اجه عليه البارحه وحجه وياي من
احمد جان بلامتحان بعده وكلي اريدج تشوفين
زهراء اكو بالهه احد وشنو تفكيرها بيه

- شنوووووووو هذا شبي تخببل؟؟؟ ليش هيج يحجي

- لج ياثوله مو كتلج ميه مره نظرته الج مو خاليه
صدكي هو يحبج لان هو حاجي ويه احمد
وهم موصي يحاجيني حتى اشوفج تقبلين بي
اذا اجه يتقدملج يكول مااحاجيهه بغير صفه
الا بالحلال

- لا فرح لا مستحيل

- لج انتي شكد غبيه وين تلكين واحد مثله
جمال واخلاق وشفتي شلون طيب وعلى نيته
وديكلج اله اخطبج يلا احاجيج يعني يريد يجي
لبيتكم وياخذج بالحلال حتى لاتصير عليج سمعه
وين تلكين هيج واحد يخاف عليج وميت بيج

- لج مو هو السبب هو ماقاصر بس اني
ماكدر والله ماكدر ىكليله هالسالفه يشيلهه
من باله لان تعبه وتعبني

- بس فهميني انتي تحبين احد اكو شي بحياتج
انطيني سبب خلي اقنعه يكف عنج

- عوفي اسبابي الي ولا دكليله انتي حجيتي
وياي فهمي بطريقه انج فهمتي مني بس بدون
متحجيلي ماريد يجي ويحاجيني بالسالفه
ولا اريد صداقتنا تخرب خلينه هيج احسن

- اوووف منج ماشي مااحجي بس انتي فكري
وحتى لو سنتين عادي يرضى بهالشي

- لا سنه ولا عشره اني ماكدر وخلص الموضوع

رجعت للبيت متغيره احوالي شبيه اني هيج خايفه
خطر بالي محمد هذا اختفائه مايبشر بخير ادري
بي بس لا يسويلي سالفه ويقنعهم يقدم العرس
————-————

كل العالم تغير وكل شي اعتربته الناس من ضمن حريه وديموقراطيه بس الزواج عمره ماكان الا من ضمن العادات والتقاليد والجزء الثاني قسمه ونصيب ...

يتبع....

#شقراء_بغداد

بارت_٤


مشت ايام عادي نفس المشاكل بالبيت وفرح وصلت
الحجي اله بس هو ماتغير وياي ولا بين اي شي
الى ان مره عدنا امتحان وكاعدين نشرح بالقاعه
لوحدنا روعه ترخصت وكامت للحمام واني كمت
افتر بالقاعه وايوب كاعد على ميز الاستاذ
اجه صديقه اسمه منير يركض ووجهه اصفر
كعد رأساً وبالكوه ياخذ نفس ....

- هاي شبيك منير يول ليش تركض هيج

- خلي اخذ نفس واحجيلك

- ول يابه احجي شبيك تكاونت ويه واحد

- لاا بس تذكرون هاي البنيه الحلوه اروى
هاي الي جنه نطلع ونكعد سوه

- ايييه شبيهه

- اجتني بنت خالتهه وتكلي انته ماخذها لمكان
ولاعب بشرفها واني عندي شهود والبنيه هسه
ممداومه واهلهه يردون يبطلوهه ويردون يجون
يحجون للعميد باجر كالت امهه تجي

- عززا بعينك منير هاي صدك مسويهه انته

- زهراء والله العظيم مامسوي اي شي والله
تفاجأت من حجتلي اني وياها بس ناكل سوه
ونتمشى مرات نكعد بالمحاضره سوه بس لا
ماخذهه لمكان ولا مسوي شي شبيكم اني اجيتكم
تساعدوني لو تصيرون ضدي ...

- يول هسه بنت خالهه وين مشت لو بعدها

- لا راحت لكليتهه هي اجتي دتحذرني منهم

- استغفر الله لك يابه هذا شرف شرررف شلون
تسوون هيييج

- هااي شبيك ايوب داكلك ممسوي شي قسم
بالله مالازمهه للبنيه ومقهور عليهه اهلهه يردون
يبطلوهه وخايف عليهه ،،، لك حتى ابويه لو درى
تنكلب الامه عليه ...

- زييين فهمت هسه روح لابوك واحجيله خلي يسمع منك احسن من غيرك حتى يعرف يتصرف
وام اروى اذا اجتي باجر خلي ابوك يجي هم
حتى يتصافون بالحجي وانته احلفلهم واذا
مثل ماكالت بنت خالتهه عدهه شهود خلي تجيبهم
ويشهدون مدامك ممسوي شي لاتخاف ..

- لك والله ريكي نشف ماعدكم مي هنا

- ماكو يابه شايفنا مفتحين محل كلها خلك قاعه

- اني رايح لابويه هسه بعد مااكدر اصبر اكثر
وانته استفسر من الولد خاف حاجين شي
بس مو تحجيلهم سالفه كلهه وزهراء فدوا افهمي
من البنات شبيهه

- ماشي ماشي روح ارتاح ولا تخاف
- روح يابه روح الله يستر من لسان هالعالم
يااابه شنوو ذول واحد يتهم بشرف لاحول ولاقوه
الا بالله

- ايوب اعتقد السالفه بيهه جذبه ومصلحه
لان منير غني يجوز اكو لعبه صايره

- حتى لو اكو نفرض اكو مو يجون يتهمون البنيه
بعدين هو يحبها منير لو يردون زواج وهيج
تكدر تقنعو يزوجها ماتستاهل كل هالسالفه

- ماادري بس سوالف الحب وهاي اذيه مو نفع
عن نفسي ما أمن بيه

- ايييه كلتيلي ماتأمنين يجيج يوم وتعبديه
مو بس تأمنين بيه

- هههههه ههههههههههه ماالحك لذاك اليوم

- ههه لييش تخافين تموتين

- نفس الشي ماتفرق ،،، كوم خلي ننزل اني ضجت هنا

- لاا مننزل اكعدي اشرحلج دتنجحين ماريدج
تضلين مطفيه بالماده

- اني شعليه هو ديرسبني مو داقره

- هههههه ههههههههه

- شبييك !!

- داقرره اقرره ،، هههههههه ول يابه انتي عليش تحجين هيييج

- يااا هاي شبيك اني شعليه هو هالحرف يكسر
عندي شسويله ،، بعدين انته شكو تضحك
ماسامع واحد يكسر بالراء

- هههههههههههاااااا اسكتي احسن

- والله مو صوجك صوجي اني كاعده يمك ومخليتك تتمضحك بكيفك

عفته واخذت جنطتي وطلعت اسمعه يصيح
عفته ومشيت شكو يضحك على حجيي على اساس
هسه حجيه شلون ابو يولو ...

لكيت روعه جوه صحت عليهه ..

- انتي وينج شكد صارلي انتظرج

- موو لكيت بنات ديحجن على السفره وبقيت
يمهن التهيت بالسوالف

- ياسفره هاي

- الولد اقترحو نروح سفره للجزيره وناخذ اكلنا هناك ونكضي النهار ونرجع وجنت دااشوف منو
تروح حتى اكول لاهلي

- ااففففف ومنو حتروح منهن

- بعد ممقررين انتي تجين

- لاا ماريد عوفيني هسه راح اطلع اتمشى
تجين وياي لو تبقين

- لا اجي اجي شبيج ضايجه

- مابيه شي

طلعنه وتمشينا كتلهه نطلع للمكتبه ورحنا اشتريت
كتاب للدكتور علي الوردي احب كتاباته
ورجعنه اول ماكعدنا اجه ايوب ...

- وين جنتو
- زهراء رادت تروح للمكتبه اشترينا كتاب واجينه
ليش اكو شي
- هااا شو اشوف شنو هالكتاب
- ماانطيك عوف
- انطيني اشوفو شنو وارجعو
- كتلك ماا ماانطيك وبعدين لاتحاجيني روح
- هاي شنو متعااركين من شوكت تعاركتو
- يابه روعه انتي احكمي ... انا ضحكت على
حجيها بالراء وهي زعلت ومشت تستاهل السالفه!
- ايوب مااسمحلك تضحك على اختي وانته غلطان ويلا اعتذرلهه يلاا
- لااااه علينه النسوان تتأمر لااا يابه لااا
اسمعيني يابه احنا رجاال من ظهر رجاال
مو مره تمشي كلمتهه علي وانا ان ردت اعتذر
اعتذر بكيفي مو بحجيج
- هههه النوب هو الزعل
- ايييه سمعتج ترا لاتبسبسين
- وذا سمعت شكو تزعل هي ادافعلي لان تحبني
- وانا ماكو احد يحبني يدافعلي
- ماكووو لااا واني ماريدك تعتذر ماشي
وهاك الكتاب اخذه الك

خليته بأيده واخذت روعه ضاجت منه ورحنا للقاعه هو شويه واجه كعد ورانه ،، قنعت روعه وضحكتهه ونسينا السالفه ... من دنكوم هو حط الكتاب كدامي وطلع بسرعه ....

- هذا شبي ليش هيج يسوي مو كتل نفسه عليه

- مادري شو حطه وراح ،، ياا شوفي هاي
حاط ورقه

ورقه صغيره بيضه حاطهه مبينه من الكتاب فتحتهه
كاتب بيهه ....

اعتذر لاسائتي لجمال حرفك ورقه صوتك
ابن شمر ...

- هههههه روعه شوووفي
- ههههههههههه شكد حلوو هذا ابو يولو هيج
يعرف يكتب ويتغزل
- لج مادري تفاجأت بله هسه شسوي
- هذاا عينه طالعه خااف ....
- لااا روعه لااا كافي لاتحجين ولا شي

ضلينه نضحك وطلعنه نزلنا وسلمنه على البنات
دنطلع للبيت لكيناه واكف يم الباب الرئيسيه
ويباوع بضحكه اجه يمنه وكال ...

- باجر نعوض درس اليوم كلهه كطعتو علينه
تعالن من وكت
- ماشي
- ههههه ياب روعه لاتزعلين منا غير كلامج يدك بغيرتنا يايابه
- ما عليه راح اضل زعلانه لحد مااشتري كتاب
مثل زهراء واشوف شلون تراضيني
- لججججج روعه متعرفين تسكتين
- يولووو فضحتينا.ههههههههههه
- هههههههههههه اتشاقه والله شبيك نسيت السالفه
هم استاذ هم شاعر هوايه هيج
- كافي روعه ،،، ايوب باجر نتفاهم على الشرح
هسه خلي نروح تأخرنا ... مع السلامه
- الله وياكم
.
.
- لج رووعه ليييش هيج شكد عيب خجلتي الولد
- اييي احسن حتى يعرف اني موجوده مو عباله
مادري بسوالفه من يتغزل بيج ويباوعلج
- لج عززاا ياغزل هذا هو اعتذارررر
- ههههههههه والله حقه من يضحك هالولد
بس شكد رجولته قويه شفتي من كلمه صارت
عينه تجدح
- اييي احسن هيج يبقى رجولته لايكه ويه شكله
- هاااا عيني ام شكله شكو تباوعين انتييي
- هههههه لج شبيج يعني ع اساس انتي ممنتبهه
عليه شكد ضخم
- وحلو هم ابد مشايفه هيج ولد اشكر وحلو
- دكااافي لتضلين تفصلين بالولد امشي

.
.

بالليل كعدت برا اقره بالكراج كملت حل المسائل
واخذت الكتاب من فتحته اتذكرت الورقه رجعت
قريتهه وضحكت ...

ابن شمر ياترى شنو قصتك ؟؟؟؟

ثاني يوم الصبح كعدت احضر الريوك وبيبي
تكعد باخواني ابويه طالع من وكت للمحكمه
طلعنه للدوام ودعاء وعلي عدهم اجتماع
بمدرستهم رحت وياهم للمدرسه ...

نبهوني على دعاء خامله بالدرس ومتنتبه
وضلو يسألوني على امي واكضيهه جذبات
حتى بس اخلص من الموضوع طلعت وياهه
بالساحه ...

- دعاوي ليش هيج معلماتج يشكتون منج شنو
المدتفهمي ليش متكليلي

- اني افتهم بس همه يضوجوني هذني البنات
يحجن عليه يكولن امهه متريدهه خطيه ويضلن
يعيبن عليه واني انقهر وماانتبه بالدرس

- معليج بيهن حبيبتي بعدين احنه مو كلنه وياج
اني احبج وبيبي وبابا لاتضوجين

- بس اني اريد امي ليش كلهم امهاتهم تحبهم
واني لاا صار سنه مشايفتهه ليش متحبني هيه

- حبيبتي هي عدهه ظروف واخوانهه ميخلوهه
لتضوجين هي هسه كم يوم وتجي تشوفج
هسه اضحكي يلا اضحكيي اضحكي لج

- ههههه كااافي لا ادغدغيني كاافي

- ااييي عفيه بالبطله اريدج هسه تروحين
وتنتبهين بالدرس واكسري خشمهم اريدج اطلعين
درجات عاليه حتى يكولون هااي شلون شااطره
دعاوي ومتحتاج احد صيري قويه

- اييي اله اجيب اعلى درجه واخليهن يغارن
خلي يصبرلي هذني امهات الكفشه

- ههههه اي ضوجيهن بشطارتج يلا روحي
يلاا .. اني تاخرت على دوامي

- مااشي

باستني بخدي وراحت لصفهه طلعت مقهوره عليهه
خطيه طفله شمدريهه بامهه وعمايلهه ...
صدك راح تصير سنه وهي ماسالت عنا ولا شافت
واحد من اخوتي شكد كلبهه قاسي علينه
هاي لو بيبي لو بالنار هم تجي تشوفنه وتطمن علينه ... الله يهديها ربي لاتخلينه نظلمها بس
انته دتشوف شكد دتأذينا ومبهذله احوالنا ...

ضليت الطريق كله افكر بسالفتهه واحاجي ربي
عليهه هو الوحيد اليسمع ويفهم شعوري بيهه

وصلت الكليه ساعه عشره لكيتهم ديطلعون من
المحاضره اجتي عليه روعه رأساً ...

- زهراء وينج ليش مادخلتي محاضره

- هستوني وصلت جنت بالمدرسه اخوتي
عدهم اجتماع ورحتلهم من وكت علمود الدوام

- ليش وامج ابوج وينهم شكو انتي ترحين

- عدهم شغل ،،، شلونهه المحاضره هم امتحن ؟؟

- لاا مامتحنه بس ايوب جان يدور عليج ومخبوص

- ليش شيريد

- شبيج مو باجر حنمتحن بماده دكتور نعمان
واتفق ويانه نشرح من وكت اليوم اني اجيت وانتي
ماكو هو مشرح شي كال نهايه الدوام

- هااا زين سويتو لان عندي هواي اساله بيهه
البارحه قريت شويه وحليت كم شغله بس عندي
اشياء مفاهمتهه وينه هو خلي نحاجي

- اكيد يم جماعته خلي نكعد وهو يشوفنه ويجي

كعدنا نسولف ونراجع بالماده الثانيه دخلنا المحاضره
واجه ايوب كعد يمنه من جهه روعه واخذ دفترهه
يكتب بي ويحطه كدامنا ...

- من اطلعن كبل للحديقه عندي طلعه ولازم نخلص بسرعه شرح

كتبتله روعه ..
- خاف مانلحك نشرح اذا مستعجل اجل طلعتك

- نلحك معليج هسه انتبهو وبعدين نحجي

اني اضحك عليهم من يكتبون ويتهامسون
طلعنه وهو راح ويه الولد واحنه للحديقه كعدنا
شويه واجه كعد وجايب دفتره وياه ...

- ايييه شلونكم يابه ،، وينج الصبح ضربتينه بوري

- جان عندي شغله وتأخرت يله وصلت

- شنو شغلج بله اليأخرج على دوامج

روعه :اخوانها عدهم اجتماع بالمدرسه وراحتلهم

- روووعه

- شكوو يولو تخزريها واذا حجت هسه قابل شنو
شصار عجل اهلج عليش ميرحون للمدرسه

- عدهم شغل مايلحكون ،،، خلي نشرح يله
ماكدر اتاخر هواي

- لييش هم اكو شغل عندج

- اي ويادوب الحك اقره وامتحانات اخوتي هم
خلي نشرح يلاا كافي حجي

- وانتي شعندج كله اخوتج اخوتج امج وين

- عدهه شغل لتضل تسأل اذا متشرحون حتى اكوم

- لا يابه راح نشرح

صار يشرحلنا ويكول حلو هذا وهذا روعه كالت اروح اشتري واجيكم اني ضليت احل وهو يحاجيني ماارد عليه مامنتبهتله دااكتب وجر القلم من ايدي

- هاي شنو شبيك

- مو احاجيج ليش مطنشتني

- انته مو دتشوفني احل شكو تزعجني

- انا هين الاستاذ من اكلج عوفي تعوفي وتحاجيني

- هاي عفته يلا شتريد تحجي اسمعك كولي

- هوو اريد اسألج تجين ويانه بالسفره الخميس

- لا مااروح عندي شغل

- شسالفه الشغل هذا شعندج مكتب ومادري

- يعني اله تعرف كتلك عندي شغل ومالي واهس
اروح اصلاً روحو انتو

- انتي من اجيتي وشفتج من بعيد مدري شبيج
جنج مخنوكه شصاير وياج اليوم

- لاا ماكو شي هيج علمود اختي شويه مو زينه
بالدراسه وضوجتني

- اييه عادي يابه جهال بعدهم هسه اله اجيبلج
عشره خلي تجيب تسعه شكو بيهه

- هههههه مو قصه عشره وتسعه بس اخاف اني
مكاعده ادرسهه زين وخايفه عليهم

- اهلج وينهم زهراء احجي الصدك

- كتلك عدهم شغل وممتواجدين دائماً

- جذابه وبعينج بعد يولو انتي حاسبه مااعرفج
انا من صوتج مبينه تجذبين ،،، انتي على نيتج
لا توسخين نفسج بالجذب اذا خايفه مني تحجيلي
فالج الامان

- وشنو الضمان

- ايوب مايجذب عليج مو من رجولته هاذي الطبايع

- وانتو شكو مهتم لاهلي وسالفتهم

- مو همي اهلج اليهمني انتي ماريد اشوفج
يوم بدون ماتضحكين

- لاتخاف كلشي بخير اني واهلي وعلى اهتمامك
فشكراً وهسه اجتي روعه وخلي نكمل شرح ورايه
طريق

- ايييه اشردي اشردي لاشوفج وين ترحين

روعه : هااا بس لا قريتو بدوني

- لاا انتظرناج انتي شكو تتاخرين
- مو هذني البنات يوكفن ويسلمن كل شويه
وحده جايه والتهي وياهن جبتلكم بيبسي اشربو

.
.
طلعنا ورجعنه للبيت كملنا الغدا وكعدت اقرا
امتحاني كملت للعصر نمت بره ساعتين كعدت
وكفت احجي ويه بيبي بالمطبخ واسمع صوت
مصطفى يصيح بالهول ...
ركضنه عليه ولكيناه واكع بنص الطبله ومكسوره هي وايده معوجه وهو يوون ويصيح ...

- لك يمه عزا العزاك شجابك ع الطبله

- بيبي ايدي بيبيي اااااه

- ولج روحي جيبي عباتي وكعدي ابوج يلا ولج
تحركي

ركضت اجيب العبايه والشحاطه وكعدت بابا
كمز بسرعه ونزله ركض اخذوه للمستشفى
واحنه بقينه ننتظر اني وعلي ودعاء

اباوع على الطبله شكسرها هي خشب وقويه
معقول بس يطخهه تنكسر بي وهو اصلاً ضعيف
شفتهه مكسوره رجلها ومكلوبه سألتهم شجابه
عليهه كالو كعد عليهه ديقط اقلامه ومن كام هي
انعوجت ووكع عليهه ....

لليل ورجعو مجبسين ايده وووجهه اصفر طلعو
ماخذي للمجبرجي وطاكهه اله وروحه مفرفحه
اجيت بوسته وغطيته نام واني محضره العشه
تعشينه وكلت لبابا باجر اروح اخذله اجازه من مدرسته وقبل ... خطيه بيبي مكامت من عنده
وكل شويه جايبتله شي توكله وتضحكه ....

ثاني يوم الصبح رحت للمدرسه اريد اخذله اجازه مقبلو الا اروح للمستوصف واسويهه مناك
واني مستعجله على دوامي عفتهه و
طلعت بسرعه اريد الحك على المنشأه وصعدت
وصايره ازدحام تخنك ضليت واكفه لحد ما وصلت
نزلت وامشي بسرعه اريد الحك اراجع قبل الامتحان
وصلت واني وجهي عركان وشعري كفش
شفت ايوب بالباب واكف ...

- هاي شبيج يولو شصايرلج

- مابيه شي اجيت اركض عوفني اريد اغسل

عفته ورحت للحمام غسلت وعدلت شعري رجعت
ضفرته وعدلت كحلتي وطلعت لكيته واكف بنهايه
الممر مال الحمامات ...

- شعندك هنا

- انتظرج اطلعين دشوف شسالفتج خبلتيني

- ياسالفه شبيك اجيت متاخره وردت الحك على
الامتحان بس هيج

- ول يابه انتي ليش تتهربين مني مااكل بشر انا
اكفي هين احاجيج

- عفيه خلي اكعد والله تعبت رجليه من الركض
خلي ارتاح وشتريد تحجي احجي

- زين تعاي اكعدي بالاستعلامات
جنج طالعه من حرب تلهثين وكالبه الامه على امتحان

- يلا هسه كلي شتريد بالضبط لان اريد اراجع
باقي بس نص ساعه يادوب الحك

- شتراجعين يولو هنه كلهن قانونين ومسائل شعنده
تعاريف لو نقاط تراجعين عوفي هالدفتر واخذي نفس ارتااحي

- هاي عفته وهسه خليني اهدء شويه واركز
لاتحجي شي

عفته يضحك وحده وغمضت عيوني ورجعت راسي على الحايط هدئت وارتاحيت فتحت عيوني لكيته
مرجع راسه على الحايط وصافن عليه ...

- ههههههه شبييك يولو

- هاي شنو تاخذين حجي

- ردتك تصحى مدري وين صافن

- صافن بيج هواي حلوه

- ايوووب انتبه على كلامك مااحب هيج حجي اني رجاءاً لاتحجي بهيج مواضيع

- هاهيه يابه سكتنا غير نكول الحك يصير نجذب
لا ميصير يولو انا الي بكلبي على لساني
شفتج حلوه كتلج حلوه لو شايفج مصخمه اكلج
مصخمه ومتنرادين

- ياااا شكد جريء انته عيب هالحجي

- اييه تعودي علي لا كل حجايه تكليلي انتبه ورجاءاً
وهالسوالف انا شيخطر بالي احجي اييه مااضمضم
كدامج انا

- بس مو هيج اعرفك اني

- ليش شتعرفين عني انتي

- اعرف بيك كتوم ومتحجي كل السوالف العندك

- مو كلتلج كدامج هيج احجي ويه الغير غير فهمتي

- لا مفهمت ومااريد افهم اريد اطلع ضجت
يلا اشوفك بعدين

اخذت جنطتي وكمت رحت يم روعه وكم بنيه وياهه كعدنا نحجي على المتحان وهي خايفه ومتوتره بعدلهه شويه وتبجي واني لازمه ايدهه واضحكهه لحد متعدل مزاجهه دخلنا الامتحان والاسئله صعبه كلش ايوب خلص اول واحد وطلع واحنه ضلينه نجيبها منا نوديهه منا تالي طلعنه وشفناه واكف بالممر ينتظر اول ماطلعنه صاحنا

- هااا جاوبتو ترا نفسهن الشرحتهن البارحه
يول شبيجن وجوهجن صفره لتجلطني

روعه - مجاوبت اني كلشي نسيت راح ارسب
- اني نص ونص بس اكو امل انجح

- اااخ يابه انا صارلي اسبوع المن اشرح يولو
عليش متقرن شيبتن راسي وانا اعيد بهالقوانين

- كاافي ايوب يعني فوك ماطالعين ضايجين
تزودهه علينه متشوف روعه شلون ضايجه خطيه
وانته تصيح عليهه

- علكيفج يابه شحجينه احنه هسه ناخذهه
ونريكهه ترجع باب اول يلا امشو

رحنه كعدنا ناكل وهو دفع االحساب وروعه تنزل دمعه وتمسح الثانيه لحد ماهو ضل يضحكهه بسوالفه ومدخلنا محاضره طلعنا اني وياهه نفتر بره الجامعه اشترينا اسوارات نفس الشي سوه
ورجعنه نتمخطر بكيفنه هنا وهنا .....

- زهرااء الله عليج تعالي ويانه بالسفره ماريد اروح وحدي مو هلكد اني ويه البنات

- مااكدر حبيبتي لاتزعلين

- ليش متكدرين هو اعتبري دوام مايفرق شي تره

- ماادري خلي اشوف اهلي بس اني مالي واهس
للطلعه بهيج اماكن هالوقت

- هو لاني ادري بيج ضايجه اريد اونسج واضحكج
حبابه احجي ويه اهلج وقنعيهم

- اشوف اليوم اكول لبابا وارجعلج خبر

- يااربي يوافق ابوج ونطلع سوه ونشبع اكل وضحك
وصور لج ماعدنه صوره سوه بس مال الحفله

- ناخذ بلايام الجايه بعدنا تونا بدينه

- زين اكلج هذا ايوب شبي هيج يركض ورانه لكل مكان شو ممرتاحتله

- هههههه لج شبيج هو هيج طبعه يندمج ويه الكل
وماعنده رسميات بالصداقه لاتخافين قابل شيريد
.
.
كمل الدوام ورجعنه للبيت شفت اخويه وكتله باجر اخذلك اجازه يومين وكلي وراهه ارجع اداوم صرت زين وبعدين بيبي كالتلي نظف الاستقبال اني واختي كمنا جرينه القنفات والزوليه ومسحنا واني اجيت امسح القنفات اشوف بيهن لفه صغيره مال شعر اسود وخشن طلعته منه واجتي دعاء هم لكت وره البردات مثله وهم لفه صغيره دائريه ...

- بيبي بيبي تعالي شوفي شلكينه

- شلكيتن شو دشوف. .. ياااه هذا شنو وحده منجن
كاصه شعرها وضامته هنا؟؟؟

- لاا والله بيبي انتي مو موصيتني مااكص شعري
والعب بي واني مثل ماوصيتيني باقيه
ودعاء شعرها موهيج اسود ...

- خاف اخوتج داحسينه هنا

- بيبي اخوتي شعرهم اشكر مو هيج اسود مفحم

- ابقن هنا اني رايحه لبيت ام اسامه هي تعرف
بهالسوالف اني ماعرف بيهن

راحت بيبي واحنه كملنه تنظيف وسدينا الباب وطلعنه
اجتي بيبي وشمرت عباتهه بالطرمه وصاحت ..

- ولج يمعزايه هذا طلع شعر خنزيز

- شنوووو خنزيرر !!! شجابه هناا

- انه ادري شجابه اركضي جيبي نفط خلي احركه

رحت جبت النفط وبيبي ادير عليه واني حطيت عليه
ورقه بيهه نار وهذا بي نار بس مايموع ردت بيبي
حطت فوكاه بعد نفط صارت تطلع منه ريحه تلعب
النفس وكام يصير كوم كوم لحد ماطفت النار بي

- كومي جيبي الحرمل واترسي السطل مي وملح
وخل وامسحي بي البيت كله بسرعه يلا بنيتي
انتي واختج امسحنه من فوك للكراج يلا تحركن

- بيبي غير نفهم هذا شجابه هناا شو حتى ريحته
تخنك هو هيج يطلع من يحترك الشعر

- لج يايمه ماتدرين بالمضموم الله وحده يعلم
ام اسامه تكلي هذا عمل وبعد الله اعلم

- ياااا عمل ؟؟؟ هذا منو يسوي هيج بينه

- دعوفي السوالف امشي امسحي البيت قبل
الغروب

مرت يومين واني شفت امور البيت ماتسمح افتح
موضوع السفره ويه ابويه فتركته ومارحت ....

بعد شهرين اخويه فتحو ايده من الجبس ...
ومشاكل امي ماتخلص من عركه لعركه وصلت لمرحله
انها تكول لعمي وابويه من يحجون بموضوعنا ...

" هذول مو ولدي ولدكم همه انتو ربوهم "
وخوالي الشرفاء يكولون ....

" لعد تردون اختنا تضل خدامه لولدكم حقها تعيش
وتدلل مو بس الك ولولدكم تكضي عمرها انطيها
حقها وانته حير بولدك "

من بعد هذا الحجي صارت العركه الاكبر تضارب
عمي وخالي وصارت كعداتهم بديوان واحد من شيوخ العشيره الكبار بغير منطقه وهناك ابويه
عاند وياهم شيطلبون يكللهم ميصير لحد ما
خربو كعدتهم بعركه ثانيه وكلمن رجع لبيته
وضلو على القضايا بالمحاكم ....

صارت امتحانات نصف السنه .... اني قريت
بالعطله الي انطوها النه بس اسبوع وبوقت الامتحانات صرت اقري اخوتي بالنهار واني
اقرا بالليل .....وابويه هم يقريهم مرات ....

بيبي خطيه تكوم وتكعد تتحسب عليهم وعلى ذاك
اليوم العرفتهم بي .....

هي جبيره وجتوفها كامت
توجعها من الشغل بالبيت .....

صرنا منخليهه تسوي شي بس الغدا والباقي
متعاونين بي اني واختي .....

بهالفتره ابويه صار انطوائي كلش بعيد عن العالم
كره كلشي وحتى الدوام قدم على اجازه مرضيه
وضل شهرين ممداوم ...

الامتحانات كلها ايوب ويانه يساعدنه بكلشي
ونطلع نلكاه منتظرنه صرنا نكعد نتشاقه ونضحك
واجتي مرات نكعد لوحدنا يضل يلمح بمواضيع
اني اتهرب منه لحد ما اجه اخر يوم بلامتحانات

- اكول يابه تطلعون نشرب كهوه ؟؟

- وين يعني

- مكان هنا اعرفو ثقافي وبي كتب لفد ناس يعجبها

روعه : هااا هي يعجبها واني شلون اتصفن عليكم

- اجيبلج جاي انتي هههههه.... هااا تروحين زهراء
صدكي يعجبج المكان ....

- مادري شتكولين روعه نروح

- ماروح اني ماحب هاي السوالف انتو روحو

- لا اذا متجين ماروح وحدي

- يااابه امشن اثنينجن روعه انتي اجيبلج كيك وجاي زيين هييج

- ههههههه اي قنعني قنعني بس يله لخاطركم خطيه بعد متشاوفون ههههههه

- شنو هالحجي شبيج

- يولو ماتجذب البنت هاي عطلنا

- انته مكيف على حجيها ...

- امشن يلا حتى لتتاخرن يلا يابه كومن
.
.
طلعنا وتمشينا مسافه طويله تعبنا وكل مانكله
ها وصلنا يكول بعد وكفنا شربنا مي وكملنه مشي
لحد ماوصلنه ريحه البن واصله براس الشارع

مقهى ادبي كله كتب وطاولات قليله والجرايد بره
والشياب واكفين كل واحد وجريدته ....

ابتسمت وهو يباوع عليه دخلنا وكعدنا وروعه تتمضحك كام هو يطلب وهي خربت ضحك ..

- لج شبييييج روعه فضحتينا

- لج والله ماكدر اسكت خطيه اضحك عليه
يريدج تحسين وانتي مطنشته هههههههههه

- لج كافي كم مره كتلج هالاشياء عيب عييب مايصير وهو لازم يفهمها ماكو داعي احجيها

- انتي مدري شلونج عيب وعيب يكلج اجي لاهلج
تكولين عيب يكلج احاجيج هم عيب شيسوي
يموت نفسه لو شيسوي حتى ترضين

- ماريد منه شي بس خلي يجيب الكهوه وكافي
.
.
- كهوه ساده ؟؟

- ايي

- مثل ماتوقعت تفضلي .. وهاي الكيك لروعه تدلل
تتعب وياي

- ايييي شكراً والله تستاهلون التعب اثنينكم حباببن

- كافي احجي مفرد مو جمع

- روعه من رخصتج انا راح احاجي زهراء وانتي جنج ماتسمعين

- ههههههههههه طلع هالكيك مو محبه بيه بس حتى
تسكتني بيهه وتاخذ راحتك

- ايوب خير شنو شتحجي

- انا جبتج هين ارد افهم شسالفتج

- عفيه رجعنا لهالموضوع

- لا والله فهميني كليلي اي شي اقنعنيني بشي
يخليني اشيلج من بالي

- هذا كله مجرد اعجاب وممكن ينتهي بكم يوم
ماريد نكبر الموضوع

- يولو يااعجاب انا من اول اسبوع دخلتي بالي
ومبقيت طريقه مااحاول افهمج بيها وماترضين
زين كليلي اذا خايفه مني بشي والله اجيب اهلي
الكم واخطبج واخليج تفوتين الكليه وحلقتي بايدج
يابه احنه رجال ديوان مالنه شغل بسوالف اللعب
بشرف العالم ....

- مو هنا المشكله ولا خايفه منك بهذا الشي بس
حياتي متناسبك واكو اشياء ماكدر احجيها الكم
لانها خاصه ومهمه فياريت تفهم ان رفضي لصالحك
اكثر مما هو لصالحي ...

- زهرااء عندكم مشاكل بالبيت ماتهمني انا رايدج
انتي .. تردين انتظرج لوكت تتعودين علي انتظرج
مايهمني الوكت اليهمني مااخسرج

- رجاءاً انسى هالموضوع لاني من احجيلك
شي معناه نخسر هواي فخلينه هيج

- انتتتي تفهميني لو لا اكلج انااا متولع بيييج
دحجي يبنت الناس خلي افهمج انتي شسويتي
بيه ....
تخيلي معي ... انا لاكي قلم وواكف بنص هالطريق واسأل هالقلم المن المن صارلو عمر هالقلم
عندي اجيتي انتي بدون ماتحجين شي اخذتي
ومشيتي بضحكتج اعتبري هالقلم هو كلبي
كليلي شلون بيه اناا بهالحال ...

- غلطت باخذه بدون قصد ارجع اخذه مني ودور
صاحبه الي يحفظه اني حياتي متناسبك وان عجبك
ضحكي وشكلي بس الباقي ياذيك تفهمني
اني مااستهزء بشعورك بس اخاف عليه لانك شخص
حساس وادري برجولتك وطبعك مايرضى بالجذب

-هسه انطيني حل انتي فهمتي مشاعري وفهمتي
طلبي اذا متردين اخطبج ورافضه مشاعري الج
انا شسوي يعني هاا اضل احاجيج هيج وانا
بالي الف سالفه وسالفه

- اووووووف شدخلتنا بمواضيع ..
راح اطلع بره شويه وارجعلكم ماشي بس افكر
بشي عن اذنكم

.
.
.
طلعت بره وكفت على جهه واريد اصفي هالموضوع
من جهه محمد ماادري بي شيسوي واذا هالزواج
راح يصير او لا ومن جهه اني مارايدته لمحمد ادري
بكل نفسي ماترغبه .... ايوب رجال طبعه حلو
ويعجبني بثقته بنفسه واطباع منطقتهم بس
اني ماريد اكله على خطوبتي ويروح يتأذى من يسمع بهالشي واخاف لا متصير بعدين ويطلعني
جذابه واريد اخلص منه ........

هدئت شويه ورجعتلهم .....

- لكيت حل

- اييييه هانت روعه هانت

- هههههههه خلينه هالمرحله اصدقاء لاني
احترم شعورك واحترم طريقه تعاملك وياي بي
فماريدك تدخل بمواضيع تعبك وتعبني وبنفس
الوقت اني بعدني ماعرفت عنك شي يحتاجلي
وقت اكثر

- وحياتج والاشياء الضامتهه علي ؟؟؟

- هاي يبقن مكانهن واني اقرر بيهن

- يمتى تحجيلي عنهن

- اذا ماكدرت اتخلص منهن احجيهن

- زيييين هي ماهانت كلش لكن يلااا نصبر
ها روعه تردين بعد كيك

- كااافي شبعت رجعوني للبيت سطرتوني بحجيكم
اريد اناام

- روعه انتي سمعتي شي

- لا ايوب شسمع ليش انتو حجيتو شي

- ههههههه اييييه هذا المطلوب
يلاا يابه كومن ...

- ايوب هالكهوه طيبه كلش وذوقك حلو باختيار المكان

- اييه يولو بعدج مشايفه شي من ايوب
.
.
.
طلعنه والطريق كله يتمشى يمي ويضحك حتى مشيته فرحان بيهه كانه طفل ويكمز هنا وهنا رغم رجولته
وصوته العالي وضخامه جسمه بس تصرفه غييير

وصلت البيت نفس الروتين المطبخ والتنظيف بس
ماكو قرايه عطلنه ..... رحت نمت كعدت العصر
ماكمت من الفراش بقيت متمدده وافكر بي ليش
هيج اني مااكدر ارده رد قوي واخلي يروح
ليش اخاف فقدانه واخاف صداقتنه تخرب ؟؟؟؟

اول اسبوع من العطله عادي كله نفس الشي
ثاني اسبوع اجوي اهل محمد علينه .....

تغدوا وشربو جاي وامه وخالاته يتبسبسن كل شويه
اني مامحجبه لان ماعدنا الا قلييل بغداد محجبات
فكعدت كدام ابوهم وعمهم وهنه عادي لابسه نص
ردان وطويل وبدون حجاب مثل لبسي كل يوم

اشوف حركات وجههن عليه كل شويه ضجت وكمت
يعني شيردون مني هيج لزكو ..... وشكو هالبسبسه كل شويه مايعرفن الاحترام ....

بيبي جابتهن بغرفتنا وبقو الرياجيل وحدهم
اجتي خالته الصغيره يمي كعدت ...

- اكلج هذا الي ابيدج شنو شو جنهه محروكه مدري مزلغهه

- خاله هاي حساسيه لا محروكه ولا مجرحه

- يااااا وهاي تضل متروح اووي يمه هاي شلون
تاكلين هيج

- هذا امر الله واني ماضايجه منه واذا زعجج منظره مامضطره تباوعين على ايدي ...
والحمدلله مادام عافاج من الي ابتالني بي اشكريه
يكون افضل من انتقادي ...

- ياااااه شكلنالج عيني وطلعتي لسانج هالطول
عشتوو عود هاي تريد تصير جنتنا

- ماتجاوزت عليج خاله اني بس اريدج ماتشيلين
ذنبي مو اكثر

- وليش اشيل ذنبج يمه شحجينا حتى نشيل ذنبج
ماكو واحد ميشوف هالشوفه ميسال عنهه
باجر حبيبه من تصيرين عدنه ميه وحده تسألج
هم تكليلهه هالحجي ليكصنج نصين والله ..

- الله كريم

سكتت ماريد الح وياهه بالحجي وهي همجيه
بكل تصرفاتها حتى بكعدتها وحركات اديها هالاصابع متوكف من تحجيلهه سالفه تشمر بيهن
منا ومنا ...

بيبي كلتلي جيبي البوم الصور شوفي لعمتج
كمت جبته واجيت كعدت يمهه وهي تشوف وتسأل
هذا منو وهذا ابن فلان يااا شلون صاير ...

لحد ما وصلت صوري بالكليه ...

- يا يمه هاي وين الصور

- هاي بكليتي

- شهكت وضربت على صدرها ..... هاي تطلعين
هيج كدام الزلم يايمه ومن ذولي الي يمج

- هذني صديقاتي الي بالنص والبقيه زملاء بالقسم

- ولج تعاي نجيه شوفي شوفي ييمه لو يدري بيج
محمد هيج تطلعين وتفرفرين بشعرج كدام هالزلم
يااايمه شيسوي شيعمممممل

- خاله بابا قابل بهذا الشي واحنه ماعدنه بنات محجبات هنا بكل بغداد ممسويه شي غلط اني
مو صح بيبي

- صدك هالحجي حجيه تخلون بنتكم هيج تطلع

- ام محمد عيني هنا مو مثل عدكم وابوهه وعمامهه
واهلنه هنا كلهم هيج يخلون بناتهم ونسوانهم
كفيلج الله هاي هسه جيران كلهم ماتلكين وحده
محجبه بيهن ... لاتحجين هيج وتخوفين البنيه

- على بختج حجيه شمخوفتهه احنه عيب عدنا
هيج ومحمد اذا درى هيج مرته تطلع يشك حلكهه

- خاله اني بعدني ماتزوجته حتى يحاسبني بعدني
بيت ابويه وابويه هو يقرر رجاءاً هالكلام منج مامقبول بحقي اني مسويت شي غلط وكاعده
تهدديني بمحمد عندي اب واني امشي بشوره بس

- لج هاي وياي تراددين ... ياااه بكد جف ايدي ولج انتي تردين حجايتي

- ام محمد علكيفج وياهه هاي بعدهه طفله ومدللـه
ماتعرف شحجت لاتاخذين بخاطرج منها

- حجيه بنتكم لسانهه طويل رادله كص هاي لو
بيتي اني اعرف شلون اربيهه

- بس اني متربيه احسن تربيه

- زهراء روحي منا يله روحي عيب تراددين بالمره

- بيبي لعد متسمعين شتحجي عليه اني شسويتلهه

- اييييييي حجيه هاي بنات بغداد كلهن هيج
مايحترمن ولسانهن مترين ... لحد لفك يامحمد
على هالمره المختارهه ... كومي نجيه صيحي
لعمج خلنا نمشي كومممي

- يااه وين كايمه ام محمد على بختج يااا داده
تطلعين من بيتي زعلانه ابد والله تعاي لج تعاي
اعتذري لعمتج يله وبوسيهه

- بيبيييي

- لاتخليني اعيط هسه تعااااي اعتذري
عيب اجيبلنه حجايه تعاااي يله

- اعتذر خاله ماقصدي شي سامحيني

بستها وهي نافخه ريشها عيني وبيبي تهدي بيهه
اخذت البوم وطلعت وعفتهم ....

لل٦ وراحو اجيت على ابويه ...

- بابا عفيه شوف هاي ام محمد شسوت بيه
اليوم تكلي انتي ممتربايه

- هاااي شنو حجيه شنو السالفه شصااار

- غير بنتك تراددهه بالحجي وهذيج عربيه متسكت
وانهدت عليهه بالكوه راضيتهه

- متاكد بنتي متغلط على احد واذا ردتهه معناه
ام محمد حجتلهه شي مو زين ... شكلتلج بابه

- بابا شافت صوري بالكليه وكامت تلطم على صدرهه وتشهك وتكول ياا هاي بناتكم هيج يفرفرن