البارت الثالث والعشرون

نسينا الراحه من يوم الفگدناك
ونسينه ارواحنه بس مانسيناك
رحت والخير كله راح وياك
عرفنه بقيمتك لمن خسرناك 💔

،،،،،،،،،،،،،
#ثأر_الضابط

،،،،،،،،،،،،،،،

لارا،،بقيت ساكته ماحجيت وهو يصيح الو الو

جليت صوتي وگتله اتفضل منو حضرتك?

المتصل،،حضرتي معجب بيج وبعيونج الحلوات
لارا،،بسرعه سديته بوجها وانطيته حضر
بقيت اسأل نفسي منو هذا ومنين جاب رقمي
اول شي اجه ابالي هاي خطه من راهب احتمال ايريد يختبرني الهاي المرحلة وصلة عدم الثقه بيناتنه بعد السواه بيه صرت كلشي اتوقع منه

ثاني يوم الصبح گعدت علئ صوت الهوسه جيران الحجيه جايات يساعدنها يلگطن بالتمن ويحضرن بالجدورة الكبار يغسلنهن الباجر

اجت الحجيه لازمه الچفچير بيدها واتهوس بي گدامي لزمت طرف اصابعي اتهوس ولازمه ايدي وبيدها الثانيه الجفجير ضحكت عليها وهي تسوي حركات بوجها

تالي رحت غسلت واسمع ذني يشمرن بالحجي من صبحية الله الناس اتگول ياالله وهنه حايرات متگابلات وياي

احلام،،گعدت المسعدة توها
والله ياراهب ماادري شنگول علئ سوايتك هاي لو العروس غير بت جلال جان لعبنه لعب بعرسك

زهرة،،اني هم مثلج مالي نفس بشي لو ماامي اخاف تتعب جان مامديت ايدي واشتغلت

لارا،،تركتهن ورجعت للغرفه عندي احبس روحي ولااكابلهن واگعد
فتحت الجرار طلعت العصارة دهنت رجلي النفخ البيها فاش وصايرة دائرة حمرة صغيرة

انفتح الباب وتفاجئت بجية سارة گمت بوستها فرحتني بجيتها

سارة،،عود صدگ تحجين??
اليوم الحنه مالتج وكاعدة وحدج??

لارا،،لعد شسوي

سارة،،شوف هاي ام اللعد بيويه گولي چااااا
چا وشحلاة الچا بشفة اهواي

لارا،،ضحكت گتلها اي كملي

سارة،،ههههه والله نسيتها بس من اسمعها بحلگ قويسم احس گلبي يرفرف مال اخذلي منه حبه بالحلگ علئ هلحچايه

لارا،،ههههههه عزاا

سارة،،بويه غير اذا اخذتلي مجعه منه ادخل مستشفئ

لارا،،ههههه مجعه شنو ?
سارة،،خااايبه بووووسه بوووسه
اويلي خايفه بيوم عرسنه اصخم الوجوة واني الي اطلع اگلهم مبروك اخذت ابنكم

لارا،،ههههههههه خرب بعرضج صدگ تحجين??

سارة،،شوف هاي البطرانه
تدرين من شوكت احبه?

لارا،،اي باالله من شوكت

سارة،،والله حتئ اني ماادري من اشوكت بس المهم فتحت عيوني علئ حبه
تدرين شتمنئ??

لارا،،اي عيني اطربينه شتتمنين??

سارة،،من يروح للدوام اتمنئ اصير بطول نيلز
حتئ يحطني بجيبه وين مايروح

لارا،،هههههههه خررب بعقلج
اتذكرت راهب واختفت ضحكتي دنگت ورفعت راسي كتلها هلگد تحبي?

سارة،،خيه غير هو النفس اليصعد وينزل
لارا،،الله يتمملكم يارب

سارة،،اللهم امين والله من كد مانذرت راح اخلص عمري اوفي نذور هههههه

لارا،،صدك خلتني اضحك وياها من كل كلبي

رجعت سالتها بس فرق العمر بيناتكم كلش جبير

سارة، ،اليسمعج اتگول انتي وياه نفس الكبر لو ماانتي اكبر مني بسنه وحدة جان شحجيت
وهم ازيدج من الشعر بيت حلاة الزلمه من يكون عمرة جبير اتحسي واعي وناضج يفهمج بدون متحجين خو مااخذلي واحد بگدي
نطبگ اخباله علئ اخبالي وشدو روسكم يگرعان هههههه تالي الوادم لو تهج لوتحج من ورانه

لارا،،ههههههه موشرط اكو صغار بس عقولهم ناضجه

سارة،،والله اني كافله علي حتئ لوبعمر هتلر

لارا،،ههههههه ولج كافله شنو?

سارة،،يعني قافله باللغه الزعطوطيه مالتي
لارا،،ههههههه الله يساعد المسكين عليج

سارة،،اوف ربي هو بس خل يجي هلمسكين زوج اليخلي يوصل باب الحوش احبسه بالبيت واگابله واگعد
لارا،، بقينه نحجي ونضحك نستني سوالف احلام واختها تالي انتبهنا راح الوكت

سارة،،ياالله عيني يالعروسه حتصير ب12انزلي اسبحي واتغدي حتئ ب 1ونص تاخذج عمتي وعمتج للصالون

لارا،،جريت نفس احسه يطلع من روحي هم علئ گلبي بكبر الجبال
نزلت وياها بس هنه ماحجن يمكن استحن من ام قاسم

للوحدة ونص كملت سبح لبست بنطرون وتيشيرت لفيت حجابي وعمتي جابتلي العبايه من الخياطه لان كالتلها متوازين ع الخياط خلصتها بسرعه

لبستها علئ قياسي فيت والله كارثه الحجيه حافضه طولي حفض

لبستها ونزلت لگيته گاعد يشرب جاي وبيدة چگارته بس ساكت مايحجي لابس دشداشه بيجي
نزلت والحجيه گامت تهلهل طلعت علاكه جكليت طشت فوگ راسي مسويتلي اجواء العرس كلها رغم معرفتها هلزواج گدام الناس وبس

نهض من مكانه عدل دشداشته وطلع شغل السيارة
واحنه طلعنه انتبهت ضرغام يزين بالصاله يعلگ نشرات

بادلته الابتسامه وطلعت ورة الحجيه
هي گعدت يمه واني بالكشن الوراه
الكل ساكت ماكو اي كلام
كسر الصمت هو من وصلنه للصالون سال الحجيه ابيش الساعه اجي اخذجن?

ام احلام،،يمه جبتي موبايلج?

لارا،،هزيت راسي بمعنئ لا

راهب،،من ارجع اكسرة حتئ تصيرلج عبرة

لارا،،تركته ونزلت فالح بس بالتهديد والاهانه عود عريس اليوم ونازل تهديدات

نزلنه دخلنه للصالون واستلمتني المرة هي وبناتها تسريحه ومكياج لبسني بدله زيتوني

وسألن عمتي كم تبديله راح اتبدل وشنو الالوان??
جاوبتهن الحجيه وهنه خلن ضلال يلائم كل الوان البدلات هادئ موصارخ
حتئ الحمرة هادئه المكياج عبالك بصالون تركي مسويته شغلهن مرتب

كملنه والحجيه حطت الجادر علئ متوني
ورفعت الكبوس علئ راسي
للساعه ب 4اجه دخل طفل گال منو ام راهب?
ابنج بالباب

طلعت الحجيه وام قاسم ساعدتني بالبدله طلعت برة حسيت بي اتقرب مني اشوف بس طرف دشداشته لان مدنكه

فتحلي الباب حتئ اصعد وامه لمت البدله من الطرف حطتها بالسيارة فاتح تبريد السيارة ثلج صايرة

مشغل اغنية كاضم الساهر

اكرههاا

واشتهي وصلها

واانني احب كرهي لها

احب هذا الئم في عينها
احب هذا الئم في عينها

وازورها ان زورت قولها

اكرههاا

لارا،،بگلبي گلت اي والله ع الجرح الاغنيه تكرهني ومحاولات قربك مني تخليني استغرب كرهك الي

الحجيه وام قاسم ايصفگن وايهلهن بالسيارة

وصلنه يم المرور الحجيه طلعت علاكه چكليت فتحت الجامه وصارت اطش ع الشرطه الموجودين بالسيطرة وهمه يضحكون ويلگطون بالچكليت واحد منهم شال ايدة يهوس ابتسمت الله يحفضهم
ناس تفرح من تشوف غيرها فرحانه

صحاني صوته

راهب،،نزلي الغشوه علئ عيونج زين

لارا،،يبو حتئ بهاي حاط روحه
نزلت الغشوة بدون ماجادله

وصلنه للبيت دخل السيارة للگراج اتلگتنه جهال ماشايفتهم يمكن جهال جيرانهم
ام قاسم والحجيه يمشن بصفي وهو طلع
دخلنه للصاله اهواااي نسوان بحيث صايرة خنگه وحارة رغم سبلت يشتغل ومراوح

گعدت والنسوان اتصفگ واتهوس والحجيه بنصهن فرحانه حلوة علاقتها ويه جيرانها عبالك اخواتها يرگصن وياها فرحانات الفرحها

باوعت بناتها مبدلات وكاشخات ويصفگن مبينات گدام الحضور عود هنه فرحانات
بداخلي گلت سبحان الله عائله كلها اتجيد التمثيل وماخذين ادوار البطوله باامتيتاز

منو اخوهن?

اجت سارة ملفلفه بالعبايه اول مادخلت نزعتها وانطتها العمتها
طالعه كلش حلوو بفستانها القصير للفخذ واصل

شعرها المدرج اسود وناعم زايدها جمال ويه بشرتها اليضه ودورة وجها

اجت وكفت گبالي
وصارت اتقسم اتقسم بالرگص ركصها خرافي خلت النسوان فاتحه احلوگها ام قاسم اباوع شفايفها يتحركن مبينه تقرة المعوذات
كل شويه وصاحتلها حتئ تگعد وسارة مغلسه
بگلبي گتلها اليوم اتنامين بالفراش من العين علئ هذا ركصج

استمرت الحفله ساعتين لبست بيهن بدلتين وفساتين اثنين اني ماخليت الحجيه اتاجر بدلات
گتلها جبتيلي فساتين حلوات البسهن ويه البدلات

بعد ماراحت العالم اني ميته تعب مابقه احد بس الحجيه وبناتها

ردت اصعد استوقفني صوتها

ام احلام،،يمه لارا ترة ماترهم اتنامون كل واحد بغرفه

لارا،،عرفتها اتريد تجمعنه
گتلها اسفه عمه بس هذا جان شرطي مااگدر اتقبله بعد كلشي صار

احلام،،وعساج لااتقبلتي هامه جهامه انتي وشايفه روحج?
اجيبله تاج راسج والاحلئ منج واهلها ينرفع بيهم الراس
بعد عليش شايله خشمج?

ام احلام،،يعني انتي مااتوبين?

احلام،،ضلي انتي وياها يجي يوم اتشمرج بدار العجزة هاي الحيه الصفرة مبينه تتمسكن وهي تخبث من جوة لجوة
ام احلام،،استغفرررك ربي واتوب اليك
تونه جنه فرحانين لازم اتسممينه بسوالفج
شو هي ساكته وانتي التخبثين

لارا،،واگفه استمع الكلامهن حتئ اكره اخوهن ويزيد حقدي اله بگلبي

الحجيه التفتت الريحانه گالتلها

الحجيه،،حبوبه خابري ابوج خل يجي ياخذكم ترة امج ربتلي عله

احلام،،عرفتها من اجت راح نطشر بسببها
تدللين حجيه يكمل العرس ونولي

لارا،،صعدت للغرفه مديت ايدي فتحت خيط البدله
بقيت بس بالداخليات بس لابسه اتگ قصير فوگاهن

انفتح الباب ودخل راهب يمكن مامتوقع يشوفني بهيج منضر
بقه صافت واني الارتباك والخوف خلني مااندل دربي والمصيبه اريد شي استر بي روحي ماكو كانه كل الملابس طارت من گدامي

مالگيت روحي غير فتحت باب البوفيه وگعدت رديت الباب علئ جسمي جريت الملابس وكعن بحضني حتئ استر رجليه
اجه يمي گعد كدامي وگوة كاتم ضحكته

راهب،،شتضمين?

لارا،،اطلع اريد البس

راهب،،منو كاضج ماتلبسين?

لارا،،گاعد كدامي وعيونه علئ جسمي ويگول منو كاضج
گتله اطلععع اريد البس

اقترب مني وجها گبال وجهي مايفصلني شي
حجه وعيونه علئ شفايفي

راهب،،ترة شايف كلشي ماكو داعي اتضمين

لارا،،كانه فتح الجرح بيدة بدون مايقصد مايدري بحجايته هاي خلاني يزيد حقدي علي قاطات
انجمعت الدمعه بعيني
وجابته بدون تردد

شفت? يعني ماكو داعي نسوي عرس باجر لان الشي الي لازم اقدمه الك بالعرس انته اخذته قبل اوانه وبدون ارادتي سلبتني كلشي
غمض عيونه بتعب كانه عرف روحه غلط
بكلامه

راهب،،شسويلج وتنسين?

لارا،،طلگني

ابتسم بتعب

راهب،،باجر عرسنه وتردين اطلگج?

لارا،،جريت الحجاب خليته علئ راسي ونزلت اطرافه علئ صدري اغطي روحي

گتله زواجنه بس الخاطر امك وكلام الناس لااكثر ولااقل

لتتصور بعد كلشي صار اقبل علئ نفسي انطيك فرصه ونرجع كانه ماصار شي

راهب،،اعوضج

لارا،،بعديش?

راهب،،انطيني فرصه
لارا،،مالك اي فرصه يمي
راح اعيش اهنا الخاطر اتفاقنه اني وياك حتئ مالك شغل ب اهلي

بس ك زوجين نجوم السما اقربلك انته بطريق واني بطريق

عگد حواجبه ضايج من كلامي نهض من مكانه دنگ باوعلي

راهب،،نشوف باجر بشنو يفيدج كلامج

لارا،،تركني وطلع اجذب اذا اكول ماخفت بالعكس اتملكني الخوف بس بداخلي اكول لويموت مااخلي يلزم طرف ثوبي

صاحولي ع العشه مانزلت دخلت ريحانه بيدها صينيه بيها اكل عرفت الحجيه دزتها مايهون عليها انام بدون اكل وهي تدري مااريد اگعد يم بناتها لان يطلعن روحي بسوالفهن اخذتها منها اتعشيت اليوم طابخات العشه من وكت لان راح تبدي حنة الزلم

راهب اتفق ويه مطعم انو يسون لفات كباب سفري
گاللهن ماراح اتعبجن كله جاهز اجيبه

صعدتلي الحجيه گالت البنات وام قاسم وسارة وكم وحدة من الجيران كاعدات راح تبدي الحفله انزلي اتونسي وبطلي الختله بالغرفه وحدج ترة تتعقدين بعدين بس من اتنزلين بدلي ورتبي نفسج وحطي اشويه مكياج
گلت فشله اردها گمت لبست فستان طويل من الجابتهن فتحت شعري ورفعت اطرافه بالقراصه
خطيت عيوني وحمرة حمرة خفيفه رشيت شويه عطر ونزلت بس قبل ماانزل خليت الحجاب علئ راسي عيب من ضرغام

صارت بوجهي احلام باوعتلي عوجت حلكها ودنگت راسها يم اختها اكيد گصتني عبالها ماانزل

سلمت عليهن وگعدت بدة المطرب يجرب المايك والفرقه تعزف بهدوء بعدين شو اتغيرت الموجه

وصار الرگص جوبي اتمنيت اگوم اشوف رگصهم اشلون لان ابغداد ماشايفه حفلات اعراس يرگصون بيها الجوبي

كلهن طفرن للاستقبال الحديقه جبيرة ترسوها كراسي ونشرات كلها سوالف ضرغام وقاسم

طلعو مرتبيهن العصر راحن للاستقبال طفن الضوة الجام مضلل محد يشوفهن انحشكن بركن واحد يعني بشباك واحد من الجها البيها همه

الحجيه،،گومي ابنيتي وياي خل انشوف ونتونس
لارا،،جرتني من ايدي گومتني وگفنه بااول شباك وهنه ب اخير واحد بس هنه مسيطرات عليهم اكثر
جهتنه بيها دنگة مضيعه نص الشوفه

اباوع اشلون اترتبو واحد بصف الثاني وقاسم لزم راس الدبكه بيدة السبحه لابس خليجي
انتبهتله كلش يشبه راهب بالشكل عبالك تؤام ولاجنهم جيران عبالك اخوة

راهب مخلي ادي ورة ضهرة يباوعلهم ويحجي ويه جماعته البصفه
اشويه وصار واحد ورة ضهرة شو هذا طفر من مكانه مثل الفز وذوله يضحكون علئ راهب وهو يسويلهم بيدة نعلعله يشتمهم

ماعرفت شنو السالفه حجيت ويه عمتي بصوت ناصي گتلها عمه شسوله ليش هيج ?

الحجيه،،هههههه هاي عادة عد الشباب يسونها للعريس

لارا،،هم مافهمت قصدها شويه واجه راهب وگف يم شباك الواگفين يمه هو اواحد وياه منطينه ضهرهم
اباوعله شطوله وشضخمه
حسيت بروحي شگد قريبه منه بس هو مايشوفني

اسمع صوته وهو يحجي ويه صاحبه ويضحك اجو اثنين لحگو
راهب،،هههه اليلحگني انعل والدي ولد النعل شگيتو ط........لولابس درع احسنلي

لارا،،يبوووو هسه فهمت امه حطت شيلتها بحلگها خربانه ضحك واني متت خجل اشلون سخيفين
كلامهم كله انحراف

اخر شي جرو بعدة ماوصل يمهم رفع ايدة يفر بالسبحه اباوعله اشلون لابس الدشداشه البيضه والغترة البيضه والسبحة بيدة هيبته تخطف الانفاس بس المخربه قساوتة

لزم راس الدبكه بمكان قاسم يرگص ويفر بسبحته

لگيت روحي تايها بتفاصيله صعب من اتكون واگف بنص الطريق لاانته مكمل طريقك ولاانته راجع النقطة البدايه

لااگدر اسامحه وافتح صفحة جديدة وياه بعد كل الصار ولااگدر ارجع مثل ماجنت قبل مااشوفه وادخله بحياتي

اختنگت ورجعت المكاني گعدت وهنه بقن يتفرجن رفعت راسي صار اگبالي يفتح بالجدور الكبار

ضرغام خلاهن بالمطبخ ترسهن ثلج وقواطي ببسي حتئ يبردن
دخل وراه ضرغام وقاسم جريت العبايه خليتها علئ راسي لبستها عدل لان قاسم وياهم رفع راسه باوعلي وبتسم قاسم منطيني ضهرة وهو صاير وجها الجهتي
كل واحد بيدة صينيه يطلعون من الجدور قواطي ويحطون بالصواني
بعدها اخذو علب السفري وزعوهن
قبل لاتنتهي الحفله صعدت لان حيل تعبانه اليوم وخاصتا من حنة النسوان العصر احس روحي لسه متشنجه

ردت انام ماكدرت
سمعت صوت موبايلي جريته هم رقم غريب
شنو سالفة الارقام الغريبه هليومين?

فتحته گلت الو اجاني نفس الصوت

المتصل،،من حضرتيني عبالج اتخلصين مني
والله الف رقم اجيب ومنين مااتحضريني اجيب غيرة واتصل حتئ اسمع صوتج

لارا،،جاوبته صوتي يرجف
من منو انته وشتريد ?
عيب عليك تتصل علئ اعراض الناس

المتصل،،دخلتي بعقلي شيطلعج بعد

لارا،،سديته ورجعت انطيته حضر بس جسمي يرجف
الله لاينطيك منين طلعتلي
ماگدرت انام منا خايفه من باجر وانوب هذا طلعلي صفح مدري منين

مانمت غير الفجر گعدت ب 11علئ صوت قفلت الباب
فزيت من مكاني مااعرف منو جان اهنا

باوعت للميز الموبايل موهذا مكانه اذكر بليل خليته يم راسي جريته فارغ شحن
شنو سالفه هلموبايل عبالك صاير مسكون

كعدت لفيت حجابي ونزلت يمهم لگيت ام قاسم والحجيه وكم وحدة نفس جاراتها الكبارية بعمر ام احلام منصبات الجدور ع النار ومنگعات معاجن تمن واللحم يفور علئ صفحه صدگ اجواء مال عرس بس هو اشلون عرس

ام احلام وام قاسم كل مايشوفني يصفگن ويهلهن واحلام وزهرة يشتغلن بس يگلبن بعيونهن كلشي ماعاجبهن

الحجيه،،يمه ترئ ب 2نروح للصالون

لارا،،هزيت راسي بمعنئ اي

ل12ونص صبن الغدة مدن السفرة كلها كعدن حتئ جاراتها بس راهب ابد ما شفته
گاعدين نتغدة انفتح الباب ودخل مبين مزين وجها يلمع والشوارب محددهن مزين من الصفاح حفر خفيف ومن فوگ شويه عالي گالبه بترتيب لورة

سلم وصعد لفوگ نزل بيدة ملابسه توجه للحمام

كملنه اكل ونقلنه المواعين يالله طلع امه هلهلت وهو مبتسم اعرف مو من گلبه مبين من وجها عينه مني درت وجهي عنه

للساعه ب 2سبحت ولبست فستان قصير لبست حجابي وعباتي ونزلت يمهم

لگيت ضرغام ينتضرنه استغربت اليوم موهو
تالي امه گالت اهواي شغل عندة بس هو يجي ياخذنه

للساعه 4ونص كملت وگعدت علئ صفحه لابسه بدلتي البيضه بس اليندسني ابجي بوجها
وينها الفرحه مالتي?
جنت انتضر هذا اايوم بفارغ الصبر بس من اجه كرهته وكرهت احلامي كلهن ويه راهب

اخذتلي الابنيه كم لقطه بعدها هو هم اجه بدون ماانتبه رفعت راسي شفته لابس قاط اسود
طالع صدگ هيبه لاكن بس بالوجه گلبه مثل سواد الليل
امه لبستني الغشوة والجادر حتئ نطلع لان سيارات اهواي برة
وگف يمي سحب ايدي لزمها ارتعد جسمي
حكم قبضته علئ ايدي
منا اني خايفه وانوب عطرة ترس المكان

الابنيه لبست عبايتها واجت اخذتلنه كم صورة بالطارمه مال بيتهم لان الصالون من ضمن البيت بابه داخلي موللشارع

كملنه وطلعنه صعدنه بالسيارة كل شويه اگول راح انجبح واوگع علئ وجهي هم رهبه وهم راهب
والاثنين انجمعن فوك. راسي

فررونه شويه وقاسم هو اليسوق
كل شويه يطلع المسدس من الجامه يرمي ويفززني
من خوفي اني الي الزمه حيل وهو يبادلني يعصر ايدي بمعنئ اهدي

صارت ب6رجعونه للبيت دخلو السيارة جوة قبل لاانزل نزل قاسم وطلع برة
وراهب وامه نزلوني دخلوني جوة كلشي مااشوف
هوسات وهلاهل وجكليت

اتعشت العالم وصار وكت الزفه گلبي انقبض
كلها راحت بقت بس ام قاسم وسارة
وكم وحدة من الجيران
ام احلام،،گومي يمه اصعدي الغرفتج لان ربعه راح يزفون

لارا،،كل جزء بيه يرجف وخايفه گومتني الحجيه صعدت فوگ فتحت باب الغرفه مالته ودخلت
گعدتني اتعجبت علئ ترتيبها ابد ماشفتها ولادخلت بيها
فرشه بيضه ضخمه والورد ع الفرشه
والعطر مالته تارس الغرفه انمغصت بطني والدوخه لزمتني

طلعت امه شويه وسمعت صوت ضجة مال زلم جوة يهوسون

گمت قبل لايجي فتحت الباب وركضت الغرفتي اني وبدلتي

دخلت وقفلت الباب من الداخل

شويه وسمعت خطواته بالممر اتعدئ الغرفته

هي دقايق واندگ الباب بقوة

راهب،، افتحي الباااب

يتبع....

#ثأر_الضابط

#البارت24

تذكر جنت ?
من تعتنيلي بلهفتك
مشتاگ حتئ اتشوفني
وتلگاني روحي مشگكه
ولمسات اديك اتروفني
تتركني هسه قررت?
ينطيك گلبك ننتهي
وبس ب الاحلام تشوفني
تتركني هيج بلا ذنب?
بررلي حتئ لوجذب
مليت ?گلي گمت امل
شيحمله ليلي بوحدتي
ماينحمل بعدك ترة
وجذبت گتلك ينحمل 💔

،،،،،،،،،،،،
،،،،،،،،،،،،

لارا،،اسمعه يضرب بالباب بقوة
گمت ارجف خايفه يضربني ويرجع يفشلني كدامهن
رجع ضرب الباب حيل
راهب،،اتفتحييين لابلقررران اشلللللعه
لارا،،گعدت بالگاع يم الجربايه خفت من صوته اليرعد سديت اذاني بثنين اديه مااريد اسمع صوته
ضل يضرب بقوة شويه واتوقف صوت الدگ
سمعت هوسه يمه ومن ضمن الاصوات صوت الحجيه
ام احلام،،ولك يممه كافي عوف البت لاتنجلط من وراااك
راهب،،ويطبها مرررض
افتحي ولللج
لارا،،،بقيت علئ گعدتي بلحضه ضرب الباب انفتح نهضت من مكاني مفزوعه امه لزمت متنه تمنعه بس هو جان قافل جرني من ايدي سحبتها بس هو لازمها حيل لزمت بثوب الحجيه وهي هم صارت بنصنه تمنعه
راهب،،وخري يمه
ام احلام،،عوف البت
راهب،،البت مرتييي
ومو اني. مررة التمشي كلمتها عليييه
لارا،،نترت ايدي منه وگفت ورة الحجيه
راهب،،تجين لو اخذج سحلل
لارا،،خاتله بضهر عمتي واهز براسي رافضه اروح وياه
ماحسيت غير لزمني من رگبتي مثل المجرم من يلزمو
اخذني للغرفه گوة عيني علئ عمتي تجي تخلصني
اختنگت حسيت راح تنعاد عليه نفس ذيج المرة من اتقربلي گوة مجرد التفكير سببلي نوبة هلع موطبيعه
احس علئ ساعه ادخل باانهيار عصبي
دخلني للغرفه حشرت بالباب مااريد افوت وياه
اعرف كل الجاي يسوي عناد بيه مايريد حجايته تنزل للگاع كل اليهمه كرامته اما كرامتي يضربها بستين انعال مويمه
راهب،،عوفي الباب?
راح اكسرر اصابيعج والله
لارا،،مابقئ للصبر حدود ماگدرت اتحمل اكثر احس قوتي انهارت
كعدت بالگاع وصرت اضرب علئ وجهي مثل المخبله لاخليت تسريحه ولابرگع كلهن شمرتهن الحجيه لزمتني
بس فقدت ماعندي حيل اكتم اكثر
شترريد مني بعدد?
فهمنييي شتريد وشخلييييت?
من اددددخل وياك الغرفتك اكو شي باااقي حتئ اقدددمه الك?
الحجيه،،شتحجين انتي يمه گولي ياالله

لارا،،عمه تعبت والله تعبت تررة حرام وضلم هذا
كل ذنبي حبيت ابنج ومشيت وراه مثل العميه جنت فرحانه وياه بااحلامي الورديه
اول مامدلي ايدة لزمتها بقوة مشاني وراه واني مغمضه عيوني لان واثقه منه
لزم ايدي واخذني وياه دخلني بعالمه مشيت بطريقه بدون ماانتبه لمن صحيت علئ نفسي لگيته عايفني ورايح وباقيه وحدي بذاك الطريق
رفعت راسي باوعت بعيونه وكملت كلامي وگوة يفهمون مني
اذا ماتحبني ليش اخذت ايدي ومشيتني وراك?
اذا ماتحبني ليش خليتني اتعلق بيك هلگد
اذا ماتحبني ليش وهمتني بحبك اووعودك الكلها جذب بجذب
لزمتني الحجيه تهدي بيه وخرت ايدها گتلها عمه بس خل احجي وياه
بس جاوبني استاهل كل السويته بيه?
جااوب لاتسكت استااهل هلكثر طعنات منك?
ماقدمتلك غير حبي وبالمقابل قدمتلي خنجر طعنتني بي الف طعنه بضهري
بوكت الجنت اخطط العرسنه انته جنت اتخطط تكسرني
بوكت الجنت فرحانه انته جنت اتخطط ترجع حقك
مالي ذنب بيهم والله مال مالي ذنب
دنكت وشمرت روحي بحضن الحجيه
هو واگف ماتحرك يباوعلي عيونه حمر
دار وجها ضرب الباب بيدة بكل قوته اخواته واگفات علئ صفحه ماحجن واني منهارة بحضن امه
اني گاعدة بالباب وهو بداخل الغرفه شال التحفيه ضرب بيها المرايه كسرها
صار يفتر منا ويرجع منا وشكو شي كدامه يكسرة
الغرفه غدة خرابه من گد مافلش غراضها
اخر شي عافنه ونزل شايط
عمتي تمسد علئ راسي حسيت روحي يتيمه بدون اهل بتمسيدها علئ راسي امسح دموعي ينزلن غيرهن وعيوني يأبن التوقف
صرت اناشغ بحضنها مثل الطفله
گومتني واحلام واگفه بالباب من شافت اخوها راح نفثت سمها لان البيها مايخليها لازم تشمر احجايه
احلام،،مرض براسج هججتي الرجال عيارة تتنغوصين المثلج تحلم تحصل مثل اخوي وانتي يمه يمه يمه من عيارتج تعرفين شلون اتلعبيها صح
لارا،،مابيه اجاوبها بس مدري شصعد براسي من شفت الحجيه وگفت خلت ايدها بصدر ثوبها وشگته من الطول للطول عليها
كورت اديها وصارت تضرب علئ صدرها
ام احلام،،ولكمممم كااافي يهل الرحممم كااافي ترة جزعت گلوبنه وملينه
بيت لوجحيييم
لارا،،زحفت يمها لزمت ايدها اليوم اني وياها غاوين لطم بسبب ابنها
فاطمه اجت يمها تبجي تسكت بيها ضرغام واگف يم الدرج مايگدر يصعد لان لابسه بدله
سمعته يصحح جزعان من الوضع
ضرغام،،كافي يممه رحمه النبييج اله تشعليها ياالله ترتاحيين

احلام،،وشحجيت كلها تريد تاكلني مجذبه خوما مجذبه

لارا،،نزلن وحدة ورة الثانيه والحجيه يمي گوة تتنفس تهز براسها وتضرب علئ صدرها الزمها وترجع تضرب
الحجيه،،مااضل اهنا مااضل احسنلي واشرفلي اخذ بنت الوادم واهج منااا
فاطمه،،كافي يمه
لارا،،گومناها. ورجعنه للغرفه مالتي گعدتها ع الجربايه مددت وغطيتها
سديت الباب وفاطمه واگفه يمه لان قفله مكسور
طلعت دشداشه اتقربت يمها فتحت السحاب
نزعتها ولبست دشداشه
مديت ايدي الشعري صاير كفشه شكدها صرت اجر بالماشات واشمر
كملت لفيته بقراصه
باوعت بالمرايه وجهي مخلوط الوان من البجي والدموع
طلعت كلنس مائي وصرت امسح واشمر ع الميز كعدت بالگاع اجت فاطمه كعدت يمي الحجيه منضرها يكسر الخاطر نايمه وثوبها مفتوح
گتلها جيبيلها ثوب خل اتبدل جنت بالگوة يطلع صوتي من الصريخ احسه انجرح
فاطمه،،عوفيها نامت من تكعد انزل اجيبلها
لارا،،جرت افراش من النضيدة فرشتلنه واحد بصف الثاني
سدت الباب وخلت وراه مخدة حتئ مايضل مفتوح
اتمددنه اني وياها والغريب هي تبجي واني ابجي بدون صوت
سالتها ليش تبجين بلعت ريگها وگالت
فاطمه، ،وليش حتئ ماابجي
شوفي حياتنه اشلونها ?
من جابتني امي لهذا يومنه يمكن عشت بس اول ثلث سنين من عمري مرتاحه ومن گد ماجنت مرتاحه ماجاي اذكرهن ولااذكر وجه ابوي وملامحه
اشگد احاول اذكره مااگدر
جنت بالمدرسه ابقه سنتين لابسه نفس اللبس حتئ بالشته ابقئ لابسه قميص الصيف يكتلني البرد ماعندي قمصله والبنات مايرحمن يعيبن لان قميصي صاير لونه باهت من الشمس وتنورتي بيها الف خيط وخيط من گد ماتنشگ وارجع اخيطها
جرتني المدرسه كدام الطالبات وكالت بصوت مسموع العدها ملابس ماتريدهن خل تجيبهن الفاطمه خطيه هاي هم اختجن بالصف
صح رادت اتساعد بس موبالاسلوب الصحيح
كسرني كلامها وكسر بداخلي الف خاطر
رجعت للبيت واني مهضومه واتمنئ مااداوم
بس امي لحت وقنعتني ارجع لان شاطرة ودرجاتي عاليه
رجعت وريتني لارجعت
صعبه اتشوفين روحج مالج قيمه بنضر الناس والناس تتصدق عليج
دخلت للصف واني اشوف كل وحدة كدامها ع الرحله علاگه بيها ملابس
استصغرت روحي وكرهت نفسي
تركت المدرسه ورجعت للبيت ابجي بحرگه
ذبيت روحي ع الدراسه ردت اطلع معدل عالي واتخرج واخذ الشهادة واشتغل حتئ احقق كل احلامي

جنت حيل اتعب اشتغل بالخبز من غبشه الحد مايصير وكت الدوام واذا دوامي الصبح ارجع من المدرسه بوجهي اركض ع المعجانه اعجن واخبز
اكمل وارجع اخثر روبه وي امي وابيع
مرت علينه اسنين عوز صعبه مرة امر من الحنضل ماتنجرع شفنه ضيم ومصايب واهواي اذكر نمنه بدون عشه
جانت امي التحصله تشتري بي ملازم الراهب
حتئ هو المسكين ماشاف شي مثل الشباب جابها قهر بقهر
بالدموع والتعب والضيم وصلت للسادس بنات لبسها ارقئ مايكون حياة كامله من كلشي
صرت اتجنبهن واتجنب احجي كلمه وياهن
بس بنات العز يحتقرن الفقير
اكو منهن يجن يعرضن المساعدة بنيه صادقه
واكو منهن يعرضنها حتئ يفشلني لان اشطر وحدة بالمدرسه
تالي كرهت كلشي وكرهت الكتب والقرايه
وبطلت ماوصلت للمدرسه من يومها
شكد حاولو المدرسين يرجعوني بس رفضت لان كلشي طلع من گلبي
وكلت العوض براهب يعوضنه كلشي مر بحياتنه
لارا،،هي تبجي واني ابجي وياها
حقدت علئ امي وابوي لان بسببهم اكو ناس عانت ماعانت بسبب اذيتهم
ردت احجي فاجئني صوت الحجيه عبالي نايمه بس طلعت كاعدة وسمعت كل حجي فاطمه الجانت ضامه راسها بالمخدة كاتمه صوت شهگاتها
ام احلام، كافي يمه الراح راح بنيتي
لارا،،فاطمه دارت وجها للجها الثانيه اشوف بس متونها تهتز بدون صوت مبينه تبجي
مااعرف بيومها شوكت نمنا وكل وحدة بينه نامت دموعها بخدها
گعدت الصبح مالكيت لافاطمه ولاالحجيه نازلات جوة
لبست حجابي ونزلت يمهن صار بوجهي راهب اجت فاطمه بيدها صينيه الريوگ خلتها كدامه
دفعها بيده وگام من شافني
احلام،،يااا ريوگك خويه اگعد اتريك
راهب،،شبعت
زهرة،،شاف وجه البومه وانسدت نفسه
خطيه حتئ مابات اهنا رجع الفجر غادي طينه من المشروب بسبب الماتتسمئ
لارا،،تركتها ورحت للمطبخ يم فاطمه عيونها وارمه
رجعت بدون صوت تتحرك تروح منا وترجع منا جابت الصينيه واجت سالتها الحجيه وين?
فاطمه،،اخذت البدلات ترجعهن الصاحب المحل
لارا،،بقيت گاعدة بالمطبخ بالگاع اشرب جاي وفاطمه هم كاعدة يمي واخواتها بغرفة امهن
همزين طلعت فاطمه رغم الاذيه الشافتها بس ماقسئ گلبها مثل اخوها واخواتها
بقت نقية وبيضه گلب مثل امها
شويه ونهضت اريد ارجع المكاني فوگ
صعدت فتحت الغرفه صارت بوجهي ريحانه لازمه موبايلي

ضيكت عيوني گتلها شجنتي اتسوين?
ريحانه،م مو جنت مارة الغرفة خالو وسمعت م موبايلج يدگ
لارا،،قبل مااحجي شمرته ع الميز وطلعت تركض

گلبي مامرتاح الها بس المن احجي وشگول خفت انوب تورطني وياها
اخذت الموبايل گلبت بي ماكو اي اتصال وحتئ مكالمات مالتي ويه ساندرا ومحمد محذوفات
حاذفه كل السجل
صار وكت الغدة رجعت الحجيه دزتلي فاطمه كالت امي اتكول خل تنزل تتغدة
نزلت يمهم كلهم كاعدين
ضرغام،،لارا بلا زحمه ممكن موبايلج لان مرة شفته بيدج نفس نوعية جهازي
حذفت البرنامج واريد احمله منج لان مايتحمل من سوق بلاي
لارا،،ردت اگوم اجيبه فاطمه كالت اني صاعدة للطابق الثاني اطفي الاجهزة واجيب موبايلج
صعدت شويه ونزلت جايبته بيدها بس جايني اتصال سمعت النغمه اشرتلها بيدي بمعنئ منو
فاطمه،،رقم غريب مايضهر اسم
لارا،،اتذكرت الرجال اليتصل وانوب راهب رفع راسه يباوعلي يترقب حركتي عاگد حواجبه مبين من وجها اليحجي وياه يهفه راجدي من العصبيه
راهب،،ماتجاوبين??
لارا،،بقيت ابلع بريگي
بس ماجاوبت نقذتني امه حجت وياه بسرعه انطيته صامت وطيران حتئ محد يگدر يتصل
اخذ الجهاز ضرغام فتح البرامج گال حتئ انتي ماعندج
رجعه الي ياالله جريت نفس ماادري ليش خايفه بدون مااسوي شي يستوجب كل هذا الخوف بس يمكن لان طبعي جبانه بسرعه يتملكني ويسيطر عليه الخوف بسهوله
كملنه اكل بس الكل ساكتين لان راهب مبين علئ ساعه ينفجر حجيه وتصرفاته كلها نتر بنتر
كسر الصمت بصوته
راهب،،فاطمه اغسلي بدلتي واكويها باجر التحق
ام احلام،،ليش يمه موطالب اجازة عشر تيام
راهب، قابل معرس حتئ ابقئ مجاز
لارا،،عرفته يبسمرني هز ايدة يستهزء
راهب،،الخاطرج يمه سويت العرس حتئ ماتضلين زعلانه
بعد عليمن ضال اهنا وعايف دوامي
لارا،،صدك اتمنيت يبتعد حتئ ارتاح واخذ راحتئ مجرد وجودة يضايقني
عافنه وطلع واحلام وزهرة اتصلو بيهن ارجولتهن لان ماگدرو يجون بالعرس العرفته عدهم دوام وخفارات وشغلهم ماكو اجايز لذالك مااحضرو العرس
گالولهن بعد ثلث ايام نجي حتئ نرجع كلنه سوة للبصرة
عفتهن وصعدت لفوگ رجعت الجهاز علئ وضعه خاف يتصل ابوي لومحمد لوساندرا
اهلي عدهم علم زواجنه البارحه ساره بيوم الحنه اخذتلي لقطات ودزتهن علئ جهازي
علئ گد مااكدر بينت روحي فرحانه

ودزيتهن حتئ ابوي يرتاح كلبه مايبقه متعذب بسببي
اول مافتحت الجهاز رجع الرقم اتصل ماجاوبت
اجتني رساله فتحتها كاتب
المتصل، ،اسمج حلو وصوتج حلو وشكلج حلو
لارا،،قريتها عرفته من هذا الحقير الماعرف منو هو
رجع دز
المتصل،،موشلعتي گلبي بس كولي الو حتئ ارتاح
لارا،،انطيته حضر كل مااحضرة ثاني يوم يرجع برقم جديد
اتمنيت اروح الراهب احجيله بس خفت لان جنت شاكه بريحانه گلت هاي بنت اخته واني الانسانه الدمرها لخاطر انتقامه اكيد راح يصدگ بنت اخته ويجذبني. اذا احجيله
للمغرب كلهم وكفو كل واحد بمكان يصلون واني رحت للحمام اريد اغسل واتوضه
فتحت الباب ماينفتح مقفول من جوة
هم سمعت صوت ناعم يادوب ينسمع بس مامفهوم
بقيت انتضر شويه وطلعت ريحانه باوعتلي عوجت حلگها وعبرتني
بگلبي گلت وراج مصيبه بس خايفه تورطيني وياج
دخلت للحمام كملت وطلعت صليت بغرفة الحجيه
طلعت لگيت احلام واگفه بالمطبخ تسوي عشه ويه فاطمه وزهرة گاعدة بالصاله ابنها بحضنها
طلعت برة للحديقه شفت الحجيه تشكل بالصوندة تريد تسگي الحديقه
العصر من سبحت لبست اتراك وردي اكثر ملابسي اتراكات
صح مايقبل بس ماعندي غيرهم وهم مااريد ابين اني انفذ كلامه
جنت گاعدة واباوعلها انفتح الباب ودخل راهب
اجه يمشي سريع عبالك يريد يتعارك
لزمني من ايدي وجرني لجوة
راهب،،شعندج برة والسطوح عاليه تنشافين انتي وهذا اتراكج
عود ليش ماتسمعين الكلممه?
لارا،،نترت ايدي واخواته يباوعن تركته وصعدت ماجاوبت سمعت احلام اتگله والله وكحه يرادلها تكسير راس
مانزلت غير لمن صبو العشه مااصدك اشوكت اكمل وارجع للغرفه
واخيرا كملو نقلت كم ماعون وياهن وصعدت وزهرة تصيح شردت من المواعين
الحجيه اتگلهن ماتموتن منهن عوفنهن اني اغسلهن
بقيت گاعدة اتصلت بساندرا مشتاقتلها بس شويه واترخصت مني يردون يرحون البيت جدهم
ضوجه گلت خل اتصل بسارة شويه تضحكني سوالفها
ابن الحلال بذكرة باوعت هي المتصله جاوبتها شو هاي ماتنفهم سالفتها مدري تضحك مدري تبجي وساعه تصرخ اريد افهم سالفتها ماجاي افهم اخذتني حاصل فاصل بعياطها
ولللج شكوو اشبيج خوفتيني
سارا،،باااجر المشيييه لاراااااا باجررر
لارا،،ضحكت صدك مخبله گتلها اهدي وفهميني
سارة، شفهمج خل اصدگ اول شي وبعدين افهمج
اتمنئ انتي يمي لج لارااا اريد واحد يكفخني علابي حتئ اصدگكككك
لارا،،ههههههه والله انتي حلوة والف واحد يتمناج مايحتاجلها كل هاي الهوسه
سارة،،ماريد من الالف غير قويسممم
لارا،،حبيبتي الله يهنيكم

بس ماكتيلي شوكت اجو اهلج
سارة،،البارحه واليوم عمتي فاتحت اهلي بالموضوع وابوي قبل
وعمتي كالت خير البر عاجل انخليها باجر المشيه مال الزلم والاسبوع اليجي يعقدلكم السيد
لارا،،بقيت احجي وياها واضحك ترتاح نفسيتي من تحشش وتقلد
اجتني مكالمه واني احجي وياها شفت الرقم راهب
ولايبطل هاي الحاله شكاك عباله الناس كلها مثله
نهيت المكالمه وياها دگ الموبايل هم رقم غريب
بقيت صافنه اشلون اخلص من هاذ الطلع روحي
بس لازم احجي الراهب حتئ يتصرف حتئ مابعدين يصير شي واتورط
قطع تفكيري دخوله والموبايل بيدي والرقم جاي يتصل
وصل يمي سحب الموبايل من ايدي باوع للرقم وباوعلي
ضيگ عيونه وفتح خط
احس ريگي نشف وجسمي گوة شايلني
راهب فتح خط وفتح سبيكر
المتصل،،مشتاقلج ليش هيج قاسيه وياي
لارا،،اباوع فتح عيونه متفاجئه
رفع اصبعه بمعنئ لاتحجين ولاصوت
وضل يستمع للمتصل واني جامدة من الخوف
المتصل،،لارتي
راهب،،حضر الچفن مالتك ياگوا.....

يتبع

البارت الخامس والعشرون

مرات احسك عدو بس اختل بسدة 💔

،،،،،،،

،،،،،،،،
،،،،،،،،

راهب،،حضر الجفن مالتك ياگواد
والله لنبشك نبش لوتشرد لسابع ارض هم اطلعك

لارا،،ذاك بسرعه سدة وراهب بدون لاسؤال ولاجواب مااحس غير جرني من شعري قربني من وجها
تحس راح ينفجر من العصبيه

راهب،،لارتتتته مووووو??

لارا،،عيوني غرغرت بالدموع لازم راسي ويعت بشعري احسه اتگطع بيدة

گتله و والله م مااعر ماعرفه انطيني م مجال افهمك

للاسف عبالك فقد ايد لازم شعري والايد الثانيه مشغلها راجديات علئ وجهي رفعت ايدي ضربها نزلتها
رجع ضربني علئ خدي وكل ضربه احس راسي ينتفخ من الهبطه علئ ساعه اوگع

راهب،،ااااحجي منووو هذاا ?

لارا،،اتنفس گوة نفسي اختنگ من الخوف گتله وا والله مااعرفه جن جنت ار اريد احجيلك
راهب،،والله لنعل ابووج لابوووو اليوم الفكررت بي اخذللي وحدة گح.......

لارا،،علئ صوت صياحه انفضحت وكلها اجت تركض جان مايشوف كدامه غيري اني وبس
امه اجت تركض المرة مخترعه وخايفه جرتني منه لزم ايدها نترها وسحلني ورة ضهرة يمنعها توصلني

جنت بيدة مثل الخرگه بس اشوفهم مااسمعهم احس اصواتهم بعيدة

احلام،،ولللج الله ياخذج شمسوييه يمعزاايه من اجيتي ماجبتي غير المصاايب وياااج

زهرة،،ابوها منووو راح تهجم بيتنه الله لاينطيج

ام احلام،،ولجن بسجججن خل نفتهممم

راهب،،اطلعن لااحرگهااا ومحمد اطلللللعن

لارا،،يمكن صار عندي خفقان احس گلبي علئ سرعة دگاته يريد يطلع من حلگي

مثل الحرارة تطلع من اذني وصدري احترگ مديت ايدي افرك بصدري رجع عليه دفعني وكعت علئ طرف الجربايه ماجنت متوقعه راح يدفعني والجربايه بيها مربعات حديد
صار اصبع ايدي بين المربعات ذبيت ثگل جسمي كله علئ اصبعي
حسيته طگ مدري انكسر بس ماياذيني لان الخوف اكبر من الوجع صرت لويذبحني هم من الرهبه مااحس بشي

دفع امه واخواته طلعهن برة قفل الباب ورجع

ام احلام،،وللك يممه علئ بختتتك خل نفهم السالفه استهدوو بالرحمن

راهب،،احجي ولج هووو هذااا الرفضتيني امس الخاااطرة?

لارا،،الساني معگود اريد اجاوبه مايطلع صوتي هزيت راسي بمعنئ لاااا

راهب،،ااادري تكرهيني ادرري اذذيتج بس مواطعنيني هلطعننه هاااي
ولللج حقيرررة جنت ناوي افتتتتح صفحه جديدة وياج ونعوف الحقد ونعوووف كلشي تااالي طلعتي ساااقطه نفس ابوووج بنتتت الكلب

لارا،،نزع احزامه وصار يجلدني بي
العجيب لاصرخت ولاصحت متبنجه جوة ايدة وهو بدون رحمه يضرب

اخذتني الرجفه وغمضت اسمع بس صوت طبع الحزام علئ جلدي
حسيت بروحي جاي انازع وهاي لحضاتي الاخيرة
متمددة علئ صفحتي الجهته وجهي صاير للجها الواگف بيها
ردت بس يتوقف وينتبه الحالتي الساني ثگل
رفعت وجهي علئ كيف وبدل ماتجي ضربة الحزام علئ جسمي اجت علئ وجهي من جهة الحديدة

بعدها كلشي مادريت رحت بضلام دامس
اسمع صريخ وهوسه بس ماجاي افرزن الاصوات

كل الاعرفه اني ميته وصرت اسمعهم بس مااشوفهم

بعد فترة هيست برودة علئ وجهي كفيله تسحبني من الضلمه الجنت بيها فتحت عيني بثكل وشهگت مثل الجان غركان وطلعو بااخر لحضه
ركزت بالوجوة اني بحضن الحجيه گاعدة بالگاع مخليتني بحضنها

وتذب ماي بارد علئ وجهي
درت وجهي باوعتله گاعد بالگاع لزم راسه بين ادي

ويباوعلي بحقد وكره يمكن لو ماامه جان اني هسه ميته

راهب،،احجي ولج منو هذاا
ام احلام،،كااافي ولك يممه كافي شفتهمتت منها انته ?
لارا،،لزمت بثوبها حيل صار وجهي بصدرها ضميت روحي خايفه يرجع يضربني حلگي مااكدر افتحه والساني ماينطق حرف يرجف

نهض من مكانه وگف كدامي

راهب،،وحگ من نزل القران علئ محمد مااعوفج اذا ماتحجين منو هذا الساقط الخنتيني ويااه
اذا مااذبحكم اثنينكم مااتسمئ راهب

ام احلام،،بسكك يممه بسك
ااانه ادري المتهم يبقئ بريئ منا لمن تثبت ادانته جااا غيرر انته نقييب وشايف وعايف ومستجوب وادم جااا هي هيج گالوهااا

راهب،،هذااااا عررضي يممه تعررفين شنوو عرضي?
يعني يمم عرضي ماافكرر. گدامج هسسه غضب الله راااهب مونقييب

لارا،،اباوعله اشلون يفرفح ويضرب بيدة علئ راسه ومن رهبتي اتمنئ ادخل بين ضلوع الحجيه

ام احلام،،استهدي برحمانك وليدي ترة كلشي مامفتهمين
لارا،،وبلحضه جرني من حضن امه حتئ هي شهكت مامتوقعه حركته

طلع من الغرفه واني ساعه اخطي خطوة واني واگفه وساعه يسحلني بالگاع مدري اشلون نزلت الدرج سحل

كلهن نزلن وراي ماسمعت بس الحجيه تصيح وتلطم واخواته يصيحن ربيها من جديد

شمرني جوة الدرج لميت رجليه واني ارعش اريد ادافع عن نفسي بس ماكو قوة ولاحيل ولاحتئ السان يحجي

زمخ بريحانه كالها انطططيني شااالج

نزعت شالها انطته الخالها وهي هم ترجف

كعد كدامي ركبه ونص جر اديه اثنينهن ربطهن بطرف الشال وضبط الشدة علئ ايدي حيييل
لزم الطرف الثاني ربطه بحديد المحجر مال الدرج

ماذبحني غير احجايته من التفت الهم وكالهم

راهب،،هاااي تبقئ مررربوطه مثل الجلبببه اهنااا اليرووح واليرجع اريدة يتتتفل عليهااا
لارا،،اديه مرفوعه للمحجر ومخليه راسي بينهن اتمنيت ميته ولاهلموقف
دموعي تجري واناشغ مثل الطفل اريد بس واحد ينكسر خاطرة عليه ويخلصني ماكو حتئ الحجيه كاعدة بعيد عني تلطم علئ ررجليها خافت منه من سمعته حلف يذبحني اذا وحدة فتحت الربطه مال ايدي

گعد گدامي ع الزوليه والبيت صنته اذا تذب الابرة ينسمع صوتها
بس الحجيه كل شويه ولطمت وبجت وهو ولايمه ولاجنها امه ويسمع توسلاتها

بقيت علئ گعدتي اكثر من ساعتين
انفتح الباب ودخل ضرغام من شافني فتح عيونه

ضرغام،،ه هاي ش شكو

لارا،،محد جاوبه اتقرب مني حتئ يحل ايدي زمخ بي

راهب،،عووفهااا

ضرغام،،بس خطيه خاالي موهيج

لارا،،كعد يمي جر ايدي حلها ادنيت لورة من شفته نهض بسرعه واجه علئ ضرغام كومه من ياخته وضربه راجدي

وكف متفاجئ. بردة فعل خاله بس ماحجه كلمه غير
ضرغام،،رحم الله والديك خالي

لارا،،اجت الحجيه هي وفاطمه گومني والحجيه ماسكتت كل شويه وگالت

ام احلام،،ولكم يممه نافخه علييينه حيييه
كل شوويه وصارت اطلابه

احلام،،لاوالله موحية من اجت بنت العار انهجم البيت

لارا،،اخذني للغرفه مال الحجيه اسحل بروحي سحل دخلني وطلعن قفلن الباب من برة
ماادري شنو صار وراي بس اسمع صوته گلب البيت گلاب نزل دوسه ونص بالغلط والفشار

وكل شويه يضرب الباب يريد يكسرة

گعدة بلگاع لامه رجليه الصدري واختض مثل السعفه
ماكو شي ابالي غير الوم روحي لان ماحجيتله حتئ مايصير الصار هسه

انتبهت ل اصبعي وارم صاير شكبرة من شفته ياالله حسيت بالوجع بس الوجع موطبيعي احس ايدي مگصوصه بقيت لازمتها اخاف اطخ الاصبع لان وارم
ل 2بليل يالله هدئ صوت عياطه والكل سكتو بس ماهدئ الالم بقيت گاعدة واعض بيدي الثانيه من الوجع
انفتح الباب فزيت عبالي هو بس ارتاحيت من شفتها الحجيه وفاطمه

دخلن وقفلن الباب من جوة
اول مااگعدت عمتي يمي خليت راسي بحضنها وبجيت من كل گلبي بس حتئ بجيتي بدون صوت كاتمتها خايفه يسمعني ويرجع يجلدني مرة ثانيه

ام احلام،،سودة بوجهي يعمه شو دگعدي خل افهم منج السالفه ترة اني لسه مثل الاطرش بالزفه

لارا،،گوة گعدت جسمي اوجهي يونن من الالم بس جنت لازم احجيلهن
حجيت كلشي صار واشلون موبايلي يخلص رصيد وشحن بدون مااستخدمه واشلون اسمع احد يدخل للغرفه واني نايمه ومن اكعد الگه الجهاز متغير مكانه
ختمتها بريحانه من اسمعها تحجي بصوت ناصي بالحمام مرات اشوفها تضم شي بين الملابس ومرات بملابسها الابستهن

فاجئني ردة فعل فاطمه

فاطمه،،عررفتهااا والله
جنت حتئ اني شاكه بس گلت بعدها طفله يمكن اني مشتبها واستحيت احجي خاف امها تزعل

ام احلام،،اصخااام الصخم وجهج امل
كل هلمصايب من ورة زعطوطه خلت خالها زين ماذبح مرررته الله يكسر رگبتها بهليل

انه اريد اگوم افهم السالفه اليوم اهجم الحوش علئ راسها وراس امها الماعرفت تربيها

فاطمه،،يمه اكعدددي الصبح حققي مو هسه الوادم ناامت

ام احلام،،ميلللي عنييي وروح ضياااء ماانام اذا ماانبش السالفه اليوم گومي ويياي

لارا،اخذت فاطمه وطلعت گمت علئ حيلي لكنتور الحجيه بي مرايه انصدمت بوجهي من الخوف ماهيست بالوجع بس من شفته اخترعت
شفتي مشگوگه من الطرف بس موكلش

بس اكثر شي عيني اجت الضربه عليها البياض صاير احمر منجمع بي الدم

وجوة عيني وارمه منفوخه من ضربه الحديدة
مارجعن غير ورة ساعه
بهذا الوكت انتهيت من الوجع اتمنيت اذبح روحي حتئ ارتاح ماينحمل ابد

من رجعت الحجيه وفاطمه شافني الحجيه ركضت صاحت الضرغام
جابتلي عبايه وحجاب لبستهن واني گاعدة مابيه حتئ انهض
اجه ضرغام سندني من جها وفاطمه من الجها الثانيه

عرفته منطيهم السويج مال سيارته حتئ ياخذوني للمستشفئ

اخذوني الحجيه وضرغام وفاطمه خطيه ماقبلت اله تجي وياي والطريق كله تدعي ع الجان السبب
انقهرت علئ روحي وصرت ماابجي من الوجع بس ابجي علئ الشخص الي مايثق بيه واتهمني بدون مايتفاهم وياي عكس امه واخته مصدگات ابرائتي

وصلنه للمستشفئ دخلنه للطوارئ الدكتورة من شافتني شهگت گالت مااگدر اسوي اي شي اذا مااتقدم بلاغ مبينه متعرضه للتعنيف

اني بس اريد اتخلص من الالم وهي تريد تفتح محضر گعدت بالگاع مااگدر اوگف بس دموعي تجري
نص ساعه واحنه كاعدين وجف ايدي صار مثل النفاخه سمعت صوته عبالي يتهيالي بس من شفته دخل هو وقاسم اتاكدت منه هو

ضرغام مبين زعلان من خاله من شافه دار وجها وهو. صار يحجي ويه الدكتورة طلع هويته وشوفها للدكتورة والشرطي
سكتو ماحجو شي

گومتني فاطمه وضرغام حولوني القسم الاشعه
طلع كسر بالعضم
بعدها الدكتور گال لازم انجبر العضم بس بالبدايه لازم نسحبه

دخل هو وياي وفاطمه
عمتي وضرغام ماخلوهم يدخلون
گعدت بس روحي اتلوب خايفه
الدكتور گعد گبالي راد يلزم ايدي ماخليته

الدكتور،،بابا مدي ايدج بس اشوفها حتئ ترتاحين من الوجع
وبعدها اصبها الج وانطيج مسكن حتئ اتنامين مرتاحه

لارا،،الوجع مايوجع غير راعيه اباوعله يحجي بهدوئ واني اتمنئ اگلب المستشفئ بالصايح من الالم
راد يلزمها رجعت سحبتها خايفه ماحسيت غير وگف گدامي لزم ايدي حيل بحيث الدكتور مسيطر جر راسي حضنه وهو واگف ايدي الثانيه لازمه طرف العبايه حاطتها بحلگي اعض بيها

بلحضه جر الاصبع بدون وعي صرخت صرخة احس بلعومي انجرح منها
اسمع الدكتور ايگول عفيه بالسباعيه خلصنه الجزء الاصعب مابقئ شي

بس اني منتهيه بس عيوني تتحرك والعرگ اخذني

بدة يصب بجف ايدي كمل وانطاني مسكنات وضربوني ابرة هم مسكن
گاله الدكتور عينها متاذيه اخذها باجر للدكتور الاختصاص ينطيها علاج
دخل ضرغام گومني هو وفاطمه وهو بقه منتضر ياخذ الوصفه من الدكتور

طلعت صار قاسم بوجهي مبين يريد ينفجر بس نضرته نضرة عطف علئ حالتي

طلعنه من المستشفئ اخذ السويج من ضرغام گاله روح ويه قاسم اني راح ارجعهم
صعدت اني وفاطمه بالورة مااگدر ابقئ گاعدة
مددت خليت راسي بحضنها والحجيه كعدت يمه

ماحجه ابد بس سرعته جنونيه حتئ امه خافت
گالتله راح تگلبنه لاتمشي حيل بس هو ولاجن يسمعها

وصلنه للبيت نزلنه وگفت سيارة قاسم احنه دخلنه وهو ضل واگف برة
سمعت بس صوت ضربه مااعرف منو ضرب منو طلع ضرغام يركض زمخ بي راهب حتئ يدخل

رجع سالته بيبيته اشبيهم?

ضرغام،،قاسم نايم علئ صدر خالي يتعاركون

لارا،،الحجيه اخترعت رادت تطلع جرها ضرغام گالها عوفيهم بيبي سالفه بينهم مالنه دخل بيهم
بهاي اللحضه الحقد الشلته بگلبي علئ راهب كغيل انو لواشوفه سابح بدمه مايهمني ولايرف گلبي اله تركتهم وطبيت جوة گوة اشوف دربي المسكن اشتغل مفعوله اريد بس انام

دخلت الغرفة الحجيه جريت مخدة نمت بالگاع بدون فراش بس اتغطيت بالعبايه
ماحسيت علئ روحي بعد غير گعدت علئ الم قوي فزيت الشمس طالعه گعدت شفت الحجيه نايمه يمي

وخرت البطانيه مغطيني واني نايمه بس باقيه بدون افراش يمكن ماهونن يگعدني من شافني نايمه

رفعت ثوبي واني اشوف طبعات الحزام صايرات خيوط زرگ ومن يضرب بحديدة الحزام الضربه تصير اقوة فيصير الجلد بنفسجي غامق

كفيت ارداناتي هم نفس الاثار ماگدرت انهض اريد اشوف وجهي اشلون صاير لان البارحه الورم موكلش

استندت بيدي الثانيه وگمت اول ماوگفت لزمتني الدوخه انتجيت ع الحايط
وصلت للمرايه وجان اشوف وجهي مگلوب گلاب وعيني فد مرة مچبدة دم وجواها اثر ازرگ كلش بسرعه بجيت

هذا حدي وياه اعوفه قبل ماياخذ روحي
شنو ذنبي اتحمل كل هل ضرب والخاطر منو?

بهاي اللحضه كل الاجه ابالي انهزم منه لو شيصير خل ايصير المهم اخلص روحي

دورت علئ موبايل الحجيه مالگيته يمها
فتحت الباب وطلعت الساعه تقريبا7الصبح كلها نايمه

گوة مشيت متوجها للحمام اسحل بروحي علئ ساعه اوگع

باوعت للدرج اتذكرت البارحه من ربطني
جريت حسرة طلعت من روحي بعد وبعد شنو لازم اشوف منك يراهب

كملت طريقي للحمام اتفاجئت بوجودة واگف گدامي مقرب اذنه للباب

جحضت عيوني خفت صارت مجرد شوفته ترعبني

رفع ايدة بمعنئ لاتتحركين والايد الثانيه رفعها الوجها سوالي حركه ب اصبعه وهو مخلي علئ شفايفه بمعنئ لاتحجين شي

عرفته جاي يتصنت للشخص الموجود داخل الحمام

يتتتبع

علينا وعليكم وينعاد عليكم بالصحة والعافية🤗🦋

حبي اي وصفة اعشاب اخذيها بعد ساعتين_3 من الفطور🙃✨

#ملوكه

عمري جل الصبار اذا تستعملي للبشرة فهو كمرطب

وتكدرين تخلي بأطراف الشعر حته تقللين من التقصف
واذا تضيفين وي بقية الخلطات عادي هم يصير😇

#ملوكه

الله يساعدكم جماعة السادس🥺 مابقى شي كم شهر وتخلصون وتصير سوالف..فاللي يتعب ومكضي ليل وصبح بالقراية اكيد يحصل نتيجة تعبه
وان شاء الله تتوفقون 😻💞وتحصلون أعلى المعدلات

وهاي الخلطة اذا ليمون موزين يوميا لان يتحسس كون تستعملي بس مرتين بالاسبوع

فالافضل اذا لكيتي اسكينول حته تستعملي يوميا لانو هو مثل غسول مخصص للبشرة ومايصير للوجه فاستعماله للجسم فقط☺️

#ملوكه

هههه ...عادي عيوني
اساسا مو كلشي تشوفي نفسه يصير لان مرات من نحلم تكون عبارة عن رموز وغير تفاسير

هسه مثلا اني قبل لاانخطب صار فد مرتين احلم عندنا بلبل لو الكى قفص بي جم بليل لو فد يوم حلمت اكو دجاجه واني ماخذه بايدي بيضها..وطبعا صار عندي فضول فلمن فسرته بكوكل لابن سيرين طلع تفسيره انو العزباء رح تنخطب او قرب زواجها..وصدوك بعدها بكم اسبوع انخطبت

فقصدي انو مرات نحلم شي وتفسيره شكل😅💔

#ملوكه

حبي ناشرة قبل عن الرجيم لو الحفاظ عل الوزن بايام رمضان🌚🌺 هسه اوجهن

#ملوكه