رد واحد كال فوك 35 سنه على موتت اهل السبع وانتي تدرين الحقيقه چااا ليش ماحجيتي الجان تعرفيهه
فجر... ماعدنه سند غير الله والسبع واعرف اذا حجيت السبع راح ياخذ بثاره واحنه منو النه احنه كوم لحم بنات اني واختي ومرته يتيمه منو النه؟؟ كلهه تسد الباب بوجهنه واحنه عايشين بخيره وبزوده وجنت اتمنى السر يظل مضموم للموت بس هسه وبهاي الحاله ومن يجي يتعده علي وبسببه سنتين هو فاقد النظر مااسكت لو كلفني الامر روحي

جنت مفتخره حيل بنفسي واني كلما احجي اشوف نظرات الكاعدين نظرات اعجاب وواحد يهمس باذن الثاني ماعدا جبار ماباوعتله بس جان يحاول يسكتني والشيخ يصيح بي بس السبع ماباوعتله خاف يمنعني ومااكدر اخالفه...

الشيخ.. بنتي الي عليج تحجين التعرفي بس قبل لاتحجين كدام الكل هاي البت امانتي موامانه السبع ياجبار ويا ازلامه اليمسهه بشعره يحسب انچتل على ايدي وكول زلم الناصريه مايسويهه

كلهه صاحت عد عيناك شيخ احنه انريد حقيقه المرحوم ودمه مايروح الجان جبار الكتله واذا واحد ثاني بيوم منهن جان فاضل شيخ علينه وماقصر ويانه

رد واحد من طرف المضيف كال انه لسه عايش بخيره والخبزه الناكلهه من خير المرحوم بيوم اجيته وكتله ماعندي والحال ضاگ بينه ودز واحد من ازلامه وبنالي غرفتين انه واهلي وانطانه كاع صغيره وهسه انه مسويهه محل واسترزق منه يوميه حته ابني الصار وره وفاه ابو السبع من يكمل اكل يكول الفاتحه لشيخ فاضل لان يسمعنه انكول ناكل بخيره ...

فجر.. جانت كلمات المدح وهي توصف عمي المرحوم تخلي العين تدمع والسبع ساكت ضرغام بصفي حرك نفسه وادنه عليه كال احجي فضيني ...

بعد ماخلصوا من كلامهم اشرلي الشيخ احجي بديت بكامل التفاصيل انقلهه شلون حجاهن لشهد وياسين مخلي ايده على فخذ السبع حته لا ينفعل ويكوم ...

ابو شهد.. يابنتي ياشهد اذا بيوم صار عليه شي هذا السر امانه عندج من يصير الوقت المناسب وتشوفين ابن عمج بمحنه ويسأل منو قاتل ابو روحي اوكفي بوجهه وكليله عمك الشيخ جبار كتله واذا طلب منج دليل احفظي كلامي زين واكعدي احجيله لاتنسين حرف الله يحاسبج لان دم عائله لسه بالكاع

بيوم التهموني بقتل اخوي عضيدي الزود وانه ربيت بيده
بفضله درست ووصلت وبفضله حماني من العشيره الرادت تكتلني اخوي الجنت اخذ الشور منه مومن ابوي وابوي الشيخ الجان مايطب مضيف اذا مافاضل وياه

حبسوني بغرفه بالبستان طين لان تهموني انه القاتل واجت زينب مرت اخوي جانت هستوهه متزوجه وحامل وفتحت الي الباب وطلعتني وكالتلي اشرد جبار ذابهه براسك وشردت وره شهر وماكدرت اظل ودم اخوي وعائلته بالكاع رديت برجليه للقصر وبيومهه ظليت بالبستان اريد اشوف الوضع شلونه

صار الليل وبيت اخوي المرحوم هيكل جان يبني بي وانه
اتختل بين الشجر وبنص الليل واسمع رجلين زلم تفتر بالبستان وصوت الحيوانات وانه اضم بروحي لا احد يشوفني جاي انه اريد اعرف الحقيقه وربج مايعوف دم مسلم سال وانهدر ومايظهر حقه

شفتهم على ضوه الگمر طبوا بيت اخوي الهيكل وانه طلعت صرت من وره البيت جانو 5 ازلام اعرفهم حق المعرفه اخوي جبار ورجل اختي نوفه اسمه عبيد واسعود جان بعده مراهق واثنين من ازلام القصر من حمايه الشيخ وجانو يحجون بطاري يدورون عليه حته يكتلوني ويكولون اخذنه بثاره

سمعت سمع اذني عبيد يكول لجبار احنه تورطنه انت ماكلت هيج كلت اكو واحد يشيل الجريمه وينه الواحد ذبيتهه براس اخوك وهالشرد جيبلك واحد يكول انه كتلت وبگت الفلوس وخلصنه

جبار.. اسكت يعبيد انه اعرف شغلي ابوي مصدك علي هو الچتل فاضل وعلي بعد مايرجع يخاف دمه مهدور وانه
وصلتله خبر اذا اجه ينكتل واخوي واعرفه جبان ومايجي
هسه السالفه تنطم هنا كتلنه فاضل وعائلته وبعد ماله حصه لا بالورث ولا بالشيخ هسه ابوي يموت من قهره على فاضل ويصير شيخكم جبار وكل واحد بيكم يوصله المقسوم

عبيد.. شحصلنه انطينه الحصه التفقنه عليهه وين الكاع
وين الفلوس فاضل عنده املاك اخذتهه كلهه انت احنه
اتفقنه نچتله والفلوس بالنص
جبار.. بس خلي يموت ابوي والحصه تجيكم واخذوهه
من هالشارب هسه مااكدر احجي لان ابوي يشك هسه
انطيكم التطلبوا والباقي وره موتت ابوي

فجر.. هذا كل الحجي بابا سامع الحجي وكال راح يطلبون دليل كليلهم دليلهم العباس ياخذون عبيد للعباس ع ويحلفوا هناك والعباس ينطيهم الحقيقه كال لا ياخذون جبار لان جبار ظالم ويحلف عادي عنده وكال الحقيقه تاخذوهه من عبيد

من ضمن الموجودين عبيد كمز من مكانه ويكلهم جذب
هاي تجذب علي يجذب شلون اكتل خال ولدي
وجبار يصيح جذب واسعود ماموجود من سالفه عقيق الخطف السبع كاله وين مااشوفك اكتلك وبعد ماشوفنه وجهه

انگلب المضيف بس صياح والسبع على كعدته من جنت احجي لزموا كتف السبع حته لاينفعل بس شفنه عكس التوقع كاعد والمضيف وحده اشتعل نفسهه الزلم الجابهه جبار حته يهدون على السبع انگلبوا ضده ...

ابو علاء..مرحبا عليكم ياجماعه هسه الحقيقه انكالت وبدون دليل ودليلنه ابو فاضل هسه نتوجه لكربلاء واذا انت عبيدبريء احلف بالعباس وروح وهاي السالفه تندفن هنا ولاسمعنه ولاشفنه واحنه نتكفل السبع مايمسك بسوء ..

طلعت هاي الزلم كلهه من المضيف واني ركضت ليجوه
وجهي عركان كلبي ماطور عقيق تبجي تريد تعرف شكو
طب السبع اخذ محفظته وطلع كال رايح لكربلاء وضرغام وياه لاتخافون ...

اجت ام جراح يمنه وادك على خدودهه شلون طبيتي وكدام المضيف حجيتي شلون هيج وظلت تلوم بيه بس جنت اسمع صوت واحد وهو صوت ضميري مرتاح عقيق قلقه على السبع حته من يتصل مايرد وبعدين طلع ناسي تليفونه ظلينه لليل واحنه قلقين وكل وحده بينه دمعتهه بعينهه انخاف السبع يسويهه ويكتل جبار...

عقيق... صارت ب1 بليل نسمع الباب انفتح ركضنه كلنه ام جراح ماعافتنه طبوا ضرغام والسبع تعبان جبتله مي وام جراح تتوسل بيهم يحجون ...

السبع.. شنحجي جنت اقنع بنفسي واكول خلي يطلع
واحد غريب ولا عمي اخو ابوي حته مرات اسد عيوني واذاني عن لا اشوف ولا اسمع الحقيقه بس هاهي الله راد يظهر الحق

ام جراح.. حلف؟؟
السبع..بالاول كال احلف بس من وصلنه حاجينه واحد من اليشتغلون بالامام سوالنه مجال وطبينه وياه كاله ابو علاء شيل ايدك على العباس واحلف انت لامشارك ولاسمعت ولا شفت بس شال ايده ظلت ترجف يريد يحجي مايكدر وطلع يركض مفزوع ويصيح احنه كتلناه ...

شكد جانو يحجولي عن شارة العباس ويكولون اليريد يحلف بي جذب يشوفه كدامه وينفزع وهذا الشفته بعبيد عبالك شافيوم القيامه عيونه تريد توكع من محاجرهه ويركض مثل الخبل والناس تباوعله ...

بس اسعود حلف شال ايده هو وجبار وحلفوا مامشاركين ولايدرون يعني حلفوا بالعباس وطلعوا حته يضحكون كل
رهبه ماعدهم كولت الشيخ يكول هو الظالم مايخاف من الله يخاف من عبده ...

ام جراح.. وشراح تسوي بسلا تكتل ياالسبع امشيه عليك
العباس ابو فاضل تعوف ثارك. منو النه حته ابني مو سند الي انه امك الربيت على ايدي لخاطري يوليدي لا تفجعني بفراكك

ضرغام.. ماياخذ بثار اكو دوله واكو قانون راح نشتكي وعبيد يروح يعترف وكل واحد ياخذ جزاته لاحزب جبار ولا بطيخ الدعوه والشكوه ماتصير هنا نشتكي ببغداد احنه غركانين بعد مانخاف

ام جراح.. ماشفت حزبه شلون يهدد؟؟
ضرغام.. مالكم علاقه خلوهم عليه هذوله ينرادلهم جره زينه حزبيش وهم وين الزايعته الكاع يصفك وره خروفه
السبع اذا سويت شي وروح ابني مااعرفك ولاتعرفني بعد

السبع.. فجر ليش ساكته اذا تدرين ماالومج بس السويتي اليوم مااعرف اكوم ابوسج من راسج لو اكعد اعاتبج ليش ماحجيتي
فجر.. علمودك مااريد مشاكل ودم سامحني ضميت عليك

السبع... وانت ضرغام كلت انت تحجي اذا ماحجت
فجر يعني انت تدري؟؟
ضرغام.. من تخربط ابو شهد واخذته للمستشفى هناك
كالي بس ماحجه هواي بس كال جبار القاتل وهو جان حيل متخربط وكتله مو وقته وراهه مات بس جنت ادري سمعت من ابو شهد

السبع.. وانتي عقيق هم تدرين؟؟ طلعت كلهه تدري
وانه اخر واحد يدري بثاره
عقيق.. منين ادري همزين ماادري لان اجي اكلك
مااسكت. بس احسن ماحجوا حته ماتقتله احنه وين انروح اذا صار بيك شي ...

عقيق.. جان تعبان حيل كام ضرغام وام جراح واحنه
رحنه لغرفتنه ماله طاقه يحجي بس خله راسه
على رجلي واني افرك بگصته وغفه من التعب...

ثاني يوم الكل ساكت وانحاول مانفتح الموضوع بس التليفونات ادك على السبع وياسين كلساع يجي
صادفت جمعه وكاعدين على الغده ودك تليفون السبع
انسمعه يكول كله لا ماعدنه مره للزواج

من سده كال بدت رحمه الله من الشيوخ الكاعدين انعجب بلسان فجر وخطبهه ضحكت فجر وكالتله منا وجاي احجز مواعيد كلساع واحد يخابرك غير هو اني وانعجبت بروحي...

فجر... مدده بفراشي ولبابه تقره ودك تليفوني رساله
فتحتهه رقم دولي ومكتوب سباعيه من يومج ووكحه
وعرمه ومحد يكدرلج وفوك كل هذا اذا طبيتي للگلب
مااطلعين منه دبدوبه شلونج ادري راح تحجين عليه بس
السويته علمودج ...

اقره برساله واعيب بحلكي ابد ماتفاجأت برسالته لان
جان عندي احساس على اي لحظه يراسل قريتهه
مرتين وكتبتله منو حضرتك؟؟ لان هواي كالولي هذا
الكلام هسه اني منين راح اعرفك منو انته؟؟

شويه ورد مو اكلج عرمه على اساس ماعرفتيني؟؟
ولاتجذبين متابعج اكثر من مامتابع صحتي واعرفج
فارغه كلشي ماعندج لاتبيعين ثگل عليه

فجر.. انت منو؟؟
... اواب
فجر... ايباااااه شنو هاي شذكرك بيه حته شكلك
نسيته كلي بعدك نفس شكلك لو صرت روسي
اواب... احبج

فجر..والله مستخف ابن الشيخ وين الدشداشه
وين العرض التحجي عنه يله عمي معذور بس هاي
رسالتك راح اشوفهه للسبع ولابوك حته يذكروك
باصلك

دزيتهه وانتظر ومارد سديت التليفون اي شعور ماعندي
حسيت نفسي حاقده علي ولازم انطي المقسوم
حاجيت كلبي من رخصتك نسحب منك القياده ونسلمهه
للعقل بين مانأدب الدكتور ...

لبابه... كلما اسمع صوته بالبيت لو يجي على السبع
ادخل الغرفه ابد ماشفته مروه نهائي مالهه حته ام جراح
دكول ملتهيه بجهالهه وبطلبات جراح يمكن بديت اتعود رغم الحزن رغم الكسره بس نفسي الهه حق عليه...

رجعت خبر بيد السبع رفضت دكتور اسامه مااكدر اعالج
الخطأ بخطأ ثاني وره اسبوع جنت كاعده بالقاعه واجت
صديقتي كالت دكتور اسامه يريدج كمت اريد اشوفه شيريد دخلت لغرفته جان مدنك يكتب اشرلي اكعد

لبابه.. داز عليه دكتور؟؟
اسامه.. بغض النظر عن الصار وتقدملج لان شفت انسانه مناسبه الي انسي هالموضوع وناقشيني دكتورج لا اكثر حاب اساعدج اذا انتي عندج رغبه
لبابه.. بشنو؟؟

اسامه.. بحثكم اول مره يبحثون عنه واكيد هالشي مثل اي دفعه سابقه العماده تتكلف بنشره بمجلات علميه هالموضوع تبنته العماده وراح تحصلون على درجه عاليه علي وقارنت درجاتج وتقديراتج مال السنوات السابقه طالبه ناجحه واريد اطرح عليج موضوعو الدراسات اذا حابه تكملين

لبابه.. قصدك ماستر ادرس بس بي منافسه واخاف مااكدر وشويه دكتور نفسيا تعبانه اني يعني هاي السنه حته ماركزت بدراستي اعذرني على كلامي

اسامه.. ماكو واحد بينه مرتاح كل انسان همه لون بس اني حاب اساعدج من باب الانسانيه لا اكثر لاتعبري استغلال الموضوع انسد انتهه بس قبل لا اتقدملج جان هذا الموضوع ابالي وقبلج هواي طلاب ساعدت بحكم اختي دكتوره بالتنافسي وحجيتلهه عنج وكالت شجعهه تكمل

لبابه.. يقبلوني؟
اسامه.. معدلج ينقبل اكيد بس يبقه اصرارج وعزيمتج
ماظل شي على الامتحانات مالتج اذا حابه ادرسين
لازم تقرين من هسه لان وره اسبوع من امتحاناتكم
يبدي التقديم ولازم انتي متهيئه حته هم من يمي اسرع
نتيجتج اريد جواب اكيد

وخليني اكون صريح وياج كل سنه اختار طالب اوطالبه متوفقه اساعدهه وكل تكاليف الدراسه اتحملهه اني اومرات اختي نعتبره زكاة العلم والمكان الوصلنه اله بفضل الله

لبابه... تسلم دكتور اذا اقدم مااحتاج اي تكاليف بس محتاجه دعم معنوي لا اكثر لان نفسيا ماثره على دراستي وان شاء الله باجر ارجعلك الجواب...

طلعت من يمه والموضوع حيل عجبني وارتاحيت اله
رجعت سولفت للسبع كال اتوكلي دكتور اسامه خوش انسان واني وياج لاتخافين بسرعه اتخذت قرار ورجعت خبر لاسامه ثاني يوم وبديت ادرس للتنافسي ولدراستي كل وقتي صار دراسه حته ماالحك اسمع قال وقيل ....

رانيا.. شدكول بيه ولد لو بنيه
ضرغام.. كلشي الجان اليجي من الله هله بي
رانيا.. شنسمي اذا ولد
ضرغام.. ليث
رانيا.. واذا بنيه
ضرغام.. انتي اختاريهه خاف اسميهه ودكولين
ليش خاف حبيبتك السابقه

رانيا.. شخبار اقبال
ضرغام.. لو ادري محاجي شراح يسكتج
رانيا.. احجي واشرتله بالسجينه جنت اسوي زلاطه
وهو كاعد
ضرغام.... *
رانيا.. صوتك لحد يسمعك شلون اللسان منحرف

ضرغام.. سمعت مشتكيه على بيت عمهه وساجنيهم
وماخذين تعهد عليهم وتتواصل ويه الضابط دكول زينه
هسه صارت احسن من قبل
رانيا.. الله يوفقهه بحياتهه ويعوضهه

ضرغام.. اني مااتعوض
رانيا.. حيل شايف نفسك
ضرغام.. ليش مااشوف نفسي كلشي عندي الحمدلله
رانيا.. باوعتله صفح ودرت وجهي
ضرغام... ماتعوفين لبيدج وتجين اسلم على ابني
رانيا..الطبيبه كالت 9 اشهر ممنوع ممنوع رحمي تعبان
ضرغام.. شفمهمه الطبيبه تعاي بويه بس انسلم

رانيا.. والله مامستعده اخسر طفلي اكعد راحه
كام واجه بصفي وباسني من وره اذني وكال طفلج
طفلي قابل مااريده بس عاد لاتصيرين حقيره على الاقل
تصبيره

رانيا.. ضرغام لايجون الجهال والله اخاف يصير شي
اتحمل بعد 4 اشهر
ضرغام.. يله اشوفلي وحده بهاي ال4 تعذريني
مااجذب عليج
رانيا.. سويهه وشوف شسوي

دنگ على رگبتي يبوس بيهه مااتحمل قربه واخاف
على طفلي حته ايدي ماتساعدني وادفعه بادلته البوسه
واحنه ناخذ نفس الهوه ابتعد هو من ذاته وحضني
وكال نصبر وانشوف...

عقيق... ضرغام يركض بالدعوه وجبار يوميه داز تهديد
علينه بس جراح هو يطلع للحزب حته مره رفع اسلاح
بوجهم وخابر على المركز وشردوا قلق هاي الايام ولا انساه اذا طلع للباب السبع اركض وراه خاف يسوي شي..

بيوم منهن رجعت من الدوام لكيت ام جراح يمنه كعدنه
يمهه انسولف كالت فدوه لأسمه ابو فاضل ماقصر اسعود محد يعرف شبي متخبل يكلهم افتح المي اشوفه دم
لو يكلهم واحد يركض وراي لو يفز يحجي ويه روحه ويوميه ماخذي لمكان وهسه يكلك مخبل من راجع من كربلاء لسه بينت شارة العباس وحته يأذي اهله وحابسي
بغرفه ومايعرف حته اهله كايليلهم هذا مشور بي..

ظلت يمنه لليل واجه جراح اخذهه من يجي يتلفت
بس يريد يلمح لبابه ومايشوفهه عينه على باب
الغرفه شوكت تطلع بس ابد ماطلعت ..

مشت الدعوه وراح عبيد اعترف بكلشي واخذوا جبار
وعبيد وهناك معترفين بكلشي هم وازلامهم واسعود مخبل رابطي بحبل وحته كايم يفتر بالشارع حافي
ويرفع ملابسه كدام الناس وكل عرفت من وره حلفانه الجذب

بعدنه ننتظر الحكم مال جبار وهالمره كلهه ويه السبع
وكلما يكول اكتله ضرغام يوكف بوجهه ويبطل
يكول نار بكلبي وماتهدأ حته وضعه الصحي موتمام دائما ضغطه مرتفع ويقهر بروحه...

طلعت من الدوام اني وفجر جان اخر امتحان عدنا واحس نفسي ارتاحيت بعد ايام متواصله من التعب والسهر بقت بس النتيجه اني متاكده من نفسي مجاوبه بس وعدي لجمره يخليني اقلق وافكر لازم انجح وارفع راسه فززتني فجر وهيه تسحب الكتاب من ايدي

فجر... عقيق تشمين ريحه الدجاج الشوي؟
عقيق... لا وين شميتي
فجر... دومج مطفيه موهسه مرينه على مطعم

عقيق... وانتي مثل البزون تشمشمين هسه بس نوصل للبيت اخابر السبع يجيبلج.بس لاتفضحينه واني اشوفج صافنه عبالي تفكرين بأجوبتج طلعتي مركزه وي ريحه الدجاج

وصلنه للبيت سياره السبع موجوده بلباب مو من عوايده يتواجد بلبيت بهيج وقت طبينه للبيت بعدني بلطرمه كرصتني فجر من ايدي

فجر....كوليله انتي تردين موتكولين فجر والله ازعل عليج
عقيق....هاي انتي لسه بالج يم الدجاج
فجر...اي غير،جوعانه

عقيق....لبابه بعدها بلدوام فتحت باب الغرفه وطبيت لكيت السبع فاتح القاصه مالته وبيده اوراق من شافني رجعهن لمكانهن واجه بتجاهي

السبع...هااا بويه اجيتن.؟
عقيق....اي كملنه امتحان من وقت اليوم
السبع...وشلونج؟
عقيق...جمره خايفه

السبع...وليش الخوف يانسمتي وتقرب،لمني لحضنه
عقيق...والله درست وجاوبت بس اخاف ماانجح الدكتور صعب حيل
السبع...كولي يالله وان شاء الله من الاوئل ومدام كملتي امتحانات صار وقت تسوين العمليه

عقيق....تحجي صدك؟
السبع...مجذب عليج بيوم
عقيق..لا موقصدي بس تفاجأت
السبع.لا على بالي بس جنت منتضرج تكملين امتحانات
خلي اروح اصلي

عقيق....حجاها وطلع ركضت وراه صحت جمره
التفت عليه كتله جيبلنه من المطعم مابيه حيل اسوي غده تعبانه
السبع... خلي اصلي واروح هستوني اجيت
عقيق...خلي اسال فجر شنو مشتهيه للغده وصحت لفجر اجت تمشي خطوه وترجع خطوتين ليوره مبينه سمعتني

عقيق،... السبع راح يجيبلنه غده شنو تردين يجيبلنه حجيتها وشبح ابتسامه مرسوم على وجهي
فجر..ماعرف بكيفكم شتجيبون اكل وياكم
السبع...راح اجيب سمج من راس الشارع

عقيق..لا لاجمره والله تجذب من اجينه بطريق اشتهت دجاج شوي وضلت تشمشم بريحه
السبع...ابتسم وكال تدلل اصلي واروح
عقيق...اباوع لوجه فجر كام مايتفسر ستوها تريد تحجي وتبرر جمره عافنه وطلع وما حس غير تهجم عليه من شعري

فجر....اني شكتلج مو صيتج ياام نص السان ماتستحين توبه اذا اكلج على شي خبيثه

عقيق....واني ماجذبت موانتي شتهيتي دجاج احجي وياها ولزمتها من بديها وبايدي،الثانيه لزمتها من اذانها وهيه لزمتني من كصيبتي وعاضتني من ايدي كتلها هديني،واهدج عضتني حيل من زندي عطت بصوت عالي ضربتها برجلي، ابطنها بعدنه متكامشين طبت لبابه من شافتنه اجت تركض

لبابه....صدك ماتستحن كل وحده شكبرها وتتعاركن مثل الجهال يمته تعقلن بس فهمني خلي يجي السبع اله اكله
يشوفلجن حل صوتجن للشارع
فجر.. كليله وشوفي شسوي بعقيق اوكفيلي هين عبالج
اعوفج عقيق انعاااااله

عقيق.. عيبت عليهه ورحت غسلت وهي تصيح انعال
ابو الاصبع تسمع وتسكت تغلسين ام كفشه البرتقالي
خلي تنام لبابه وشوفي شسوي بيج تفشليني كدامه
هسه يكول ام بطن...

اخاف اجاوبهه بس رحت صليت بين مااجه كعدنه تغدينه
وكلما ارفع راسي تخزرني ولبابه تكرصهه تريدهه
تسكت ردت اجمع المواعين لبابه ماقبلت كالت عوفيهن
رحت للغرفه مددت بحضنه وانسولف على العمليه
ماانكر خوفي بوقتهه

مر اسبوع والبيت هدوء، السبع بده يحضر،للعمليه مالتي بيومها طلعنه من الصبح لبغداد بس اني وياه اول شي رحنه على بيت ضرغام لكيت رانيا مجهزه الغده تغدينه يمهم للعصر،ورحنه على دكتور مالتي نفس كلامه غير،العمليه ماتفيديني طلعنه من يمه وثاني يوم لازم نسافر للهند بذاك اليوم مانمت امثل اني نايمه على كد ماخايفه القلق والتفكير، بلعمليه اكلني

مارحنه لشقه بعد الصار،كرهتها وماحب اطبها فرشتلنه رانيا بلغرفه مددت بفراشي وماعرف شنو شعوري صاحولي للعشه سويت نفسي نايمه ماريد اي شي اريد ابقه وحدي السبع عاف العشه واجه يم راسي

باسني من شعري وكال مانايمه لاتجذبين عليه
وادري بيج خايفه انه مااجازف بيج اذا ماكلهه
كالت ناجحه العمليه نسبه نجاحها زينه وانه وياج واريدج تبقين قويه وابتسامتج متفارك وجهج من اشوفج ضايجه اني اضوج

عقيق....رفع راسي وباوعت بعيونه وعيونه مليانه دموع كتله جمره تحبني.؟
السبع....هااا بيها الخير،اذا هذه المگدر خاطرج بويه وعلي احبج بس لاتبجين ورفع ايده مسح دموعي بطرف ابهامه

وكال كومي نطلع نتعشه بره بدلت وطلعنه شويه
بس اتعشينه ورجعنه بسرعه نمت اريد اشرد من التفكير
والقلق كعدنه من الصبح وصلنه ضرغام للمطار بعد ما ودعناهم صعدنه بلطياره وبده العد التنازلي عندي اجذب اذا اكول ما خايفه

تذكرت بابا وشلون جانت امنيته اسوي العمليه واعيش طبيعي حالي حال الناس جمره ماترك ايدي ولا لحظه حس بيه خايفه ماعرف شلون وصلنه ماتذكر تفاصيل الرحله لان جان عقلي مشوش وخايفه اول ماوصلنه حجزنه بلفندق بعد تعب الطريق والقلق نمت حسيت على عطر السبع قريب مني وايده تغلغلت بشعري فتحت عيوني باوعتله صافن عليه

السبع..شلونه الحلو اليوم
عقيق...الحمد الله بوجودك اصير،زينه
جمره... يلا كومي ورانه كومه ولازم تكونين جاهزه
عقيق...كمت بسرعه غسلت وجهزت نفسي نزلنه جوه بلمطعم تريكنه وطلعنه للمستشفى جان اكو مترجم ويانه احاول اكون طبيعيه ماريد السبع يضل باله يمي شافني الدكتور،وسوالي تحاليل كامله حدد موعد العمليه

والخوف بده يسيطر،عليه شعور كلش صعب تنحط بهيج موقف عمليه القلب من العمليات الكبرى تذكرت بابا شلون جابني للبصره حتى يعالجني وبتالي فارقتنه المنيه و عافني بقيت وحيده ورب العالمين حط السبع بطريقي،وماعافني،وحدي وهنا وكلت امري الى الله مستحيل يعوفني،بهيج ازمه مثل مسهلي،وجود السبع بحياتي متاكده راح يسهل العمليه عليه توضيت وصليت وكعدت اقره قران وي كل كلمه انطقها تنزل دموعي بعجز وقله حيله بيومها وكلت امري لرب العباد ونمت بدون تفكير

السبع جان حاضر وياي بروحه وجسده ثاني يوم توجهنه للمستشفى وهنا القلق بين على السبع اكثر،مني وحتى ضغطه ارتفع جهزوني لغرفه العمليات وهو ماترك القران يرتل ايات يم راسي وصوته يبعث الراحه والسكينه الروحي بقيت اسمع لصوته وعينه بعيني ماعرف شكد مر من الوقت وشنو صار بس جنت افكر اكدر ارجع واسمع صوته مره ثانيه واشوف عيونه المليانه حب لو لمسته ايده الكلها طمأنينه وامان الي جانت هذه الاساله ادور براسي فقط لان ماعندي شي،اغلى منه

صاحوا اسمي واخذوني وعيني علي عيوني غوشت
من الدموع واني كلما ابتعد كلما صورته تتلاشى كدامي
دخلت وماادري اطلع سالمه لو اطلع بنفس الحاله لو
تزود سوء حالتي بس عيون السبع وصوته باذاني
وهو يكول لخاطري صيري قويه....

.
يتبع........

#خبايا_الاقدار
❤️♨️♨️

... البارت الثامن والسبعون


وانته وحـْدك َ
لا شمع
لايـْاس
لاعگدة ظفيره
ولا حلم يچـويك وتغني اعله هونك َ.!
.......

لبابه...خابرنه السبع من الصبح كال دخلوها للعمليه وهسه صار الضهر وماكو خبر كل منخابره يكول بعدها هواي تاخرت فجر جانت كاعده يمي وتقره قران بالنه يمها سالتها فجر هم تحسين شي العمليه تنجح؟؟؟

فجر....ماعرف ماحس،بشي بس عقيق خطيه شلون تتحمل والسبع هسه شحاله عليها
لبابه....عقيق قويه وان شاء الله تنجح وترجع تمشي على طولها بعدنه نحجي دك مبايلي رانيا تتصل فتحت خط وكتلهه هااا بشري ماكو خبر

رانيا...ولج ناجحه ناجحه وصاحت بصوت مملي فرحه وهسه بلانعاش السبع خابر ضرغام وحجاله
لبابه....الحمد الله وشكر ولج فجر ناجحه العمليه ناجحه احجي وي فجر ونكمز بنص الهول ونسيت رانيا على خط لحد مافصلته بوقتها فرحتنه ماتنوصف صار شكد مفرحانه بس بعمليه عقيق احس الدنيا ضحكت النه لان عقيق نقيه طيبه تستاهل كل خير

فجر جانت ناذره تصلي 20 ركعه شكر لله واني نذرت
اصوم ثاني يوم لوجه الله مجرد مااتخيل لاسامح الله
صاير بيهه شي انهار اختنه تعتبر وربت بيناتنه ومايوم اذتنه ولا سمعتنه كلمه موحلوه...

من راح السبع اجت ام اواب يمنه هي والحجيه ام ياسين
شكد حاولو انروح ابيتهم وفجر ماقبلت وبالاخير هن اجن
يجي الشيخ ياسين يمر يشوف شمحتاجين ويروح ومخلي واحد من رجاله بالباب ام جراح ماكدرت تجي لان مروه وحدهه بالبيت وجراح صاير دوامه خفر ...

اني مركزه على التنافسي طلبت من ام اواب تخابر الشيخ
حته اروح للجامعه اسأل عن التقديم ومحتاجه كتاب للامتحان بدلت واباوع لنفسي حيل ضعفانه النور طافي بوجهي كل ملامحي باهته رغم التعويد واحمد الله على كلشي بس تبقه الكسره البكلبي محد يشوفهه بس احساسهه ماينجرع

وصلت للجامعه مابيهه طلاب بس الجايين يقدمون
والي عنده تأييد دخلت لقسمي شفت طلاب وياي هم مقدمين والي من غير دفعات سألت طالبه عن كتاب كالت مموجود الكتاب وصار هواي ادور علي بس يكولون موجود عند دكتور اسامه هسه يجي وانشوفه

مرت ساعه يله اجه انسان بسيط حيل كل الطلاب تحبه وكف وياهم يحجي واحنه من بعيد التفت شافني ابتسم وكمل كلامه ويه الطلاب وصعد لغرفته واني والبنيه صعدنه انريد الكتاب جان بعده ماداخل الغرفه صاحت البنيه دكتور دكتور التفت علينه وكال نعم...

حجيت اني دكتور محتاجين الكتاب وماظل وقت على الامتحانات وعدنه نقص بالمعلومات هز راسه وكال هسه
اشوفه الكم بالمكتبه انتظروني هنا...

كعدت واني صافنه على حالي يمكن الله دزه هديه اليه يساعدني اخذت نفس وانقبض صدري واتذكرت جرحي
شلون اتقبل غير شخص اتمنى ادوس على كلبي واصير
قويه واكمل حياتي واكون اسره مثل مامشت حياته
بس شلون بكلبي الضعيف ...

كمل شغله وطلع فززني صوته وهو يكول لبابه وين صافنه باوعت البنيه رايحه واني صافنه تاخذني وصفنه ترجعني وملامح الحزن مرسومه على وجهي كمت كتله العفو دكتور مامنتبهه

اسامه.. الظاهر حزنج قوي وتفكيرج عميق بحيث
انرسمت على ملامحج كل افكارج ساعه تعقدين
حواجبج ساعه تصكين على اسنانج

لبابه.. العفو ممنتبهه كمنه نمشي لجهه المكتبه ويسولف
اسامه.. انتي ببدايه طريق طويل وهذا الطريق جدا صعب
مو كدراسه لاصعب كشعور عندج لان وضعج مومثل بقيه
الطلاب راح بكل عثره ترجعين لنفس المحطه وتلومين نفسج وهالشي راح يأثر على مستقبلج اذا ناويه تكملين وتعتمدين على نفسج خليج قويه

لبابه.. دكتور الهموم من تتراكم تخلي الانسان مايحس بطعم اي انجاز يسوي ولايفرح حته بنجاحه
اسامه.. حقج وسابقا كتلج ماكو انسان مرتاح كل واحد همه لون لادكولين هنيال فلان وفلانه لان هم تلكين بيهه نقص كل واحد عنده شي وناقصه شي انتي العليج تكولين اني احسن من غيري ...

اضربلج مثال راح تتعرفين على اختي بيوم الامتحان ان شاء الله ومتأكد من راح تشوفيهه راح تقررين حياة ثانيه
الكلام الراح احجي اعتبري دعم الج مااحب الانسان الضعيف نهائي وخاصه اذا كانت من جنس حواء الله فضلكم بهواي علينه وانطاكم قوه صبر وتحمل معناتهه لازم تكونين قويه...

لبابه.. شبيهه الدكتوره موهي نفسهه الدكتوره عُلا
اسامه.. اي نفسهه انه ابوي متزوج اثنين وعلا من مرته الثانيه بس هاي حصلهه وماتت امهه وابوي رجال مستبد تعارك ويه خوالهه وعاف بنته تربت بعيد عنه لحدماصارت بالاعداديه جابهه يمنه مااعرف شلون احجيلج عنهه بس جان يعاملهه غير معامله حته مايسمحلهه تكعد تاكل ويانه وجان يهدده بس ترسب تبطل ...

احنه اخوتهه ندعمهه ومانتعارك واندافع الهه مع العلم عدنه 4 اخوات من امنه بس علا جانت المظلومه الوحيده اخواتي من امي موفريلهن اخر دلال والحجي مفضلهن على الولد وولاوحده توفقت بالدراسه بس علا كل سنه يدزون على ابوي يشكروا ويكرموهه وكل هذا ومايوم رفع من معنوياتهه

جبرهه على الزواج من ابن خالي كلنه بوقتهه اعترضنه وماعبرنه كال اتبره منكم وماتكسرون حجايتي وزوجهه
وهي بالمرحله الرابعه وجنه نتوسل بابن خالي بس يخلي تكمل وبطلهه لان ماخذ الحجي من ابوي وكايله بطلهه من الدراسه وهي مرحله رابعه هندسه

سنه وحده ظلت ويه ابن خالي وخانهه وياريت خيانه بالمعقول لا طعنتين تزوج عليهه وبغرفتهه نقل غراضهه بالمخزن وسواهه خدامه لمرته وكام اتزوج الثالثه وهي محبوسه بغرفه مخزن قديم عدهم وجانت ماتحجيلنه تخاف من ابوي لحدمايوم اجت سولفت لاخوي الجبير وهنا طلكناهه وعلى اثرهه انجلط الحجي لان صارت مشاكل...

اني ممتزوج الوحيد باخواني كالت امي اخذهه واطلع واخذتهه واجرت بيت وحدنه ورجعتهه لدراستهه رغم شكد جانت حزينه جنت من اجي اكلهه لاتهتمين تضحك بوجهي ودكول انت لاتفكر بيه اصلا اني جوهره والله خلصني منه المهم نجحت الاولى على دفعتهه مباشرة درست ماستر وراهه دكتوراه بحيث ماانطت مجاا لنفسهه ...

كامت تجيهه بعثات لمصر وللاردن واني داعم الهه وموبس اني اخواني كلهم يكولون نمشي راسنه مرفوع بيهه صعدت لاعلى مرحله ومن ترقيه الى ترقيه لحدماعينوهه رئيسه قسم ومااكتفت كل دوله بيهه مهرجان تشارك واسمهه صار لامع بين كل جيلهه ...

اكو بنات من اقربائنه جانن يضحكن عليهه لان تزوج عليهه رجلهه وماصار عدهه اطفال وهسه يتحسرن على الحياه العايشتهه حره طليقه الكل يمدح بيهه بس رفضت الزواج وبالاحرى كرهت جنس ادم بسبب ابوي والمعامله الشافتهه منه ومن رجلهه ...

لبابه.. وصلنه للمكتبه واني اسمعله احس كلامه موطاقه ايجابيه لاااا كانو باب وانفتح بداخلي وبعث نور بسرعه
اجه ابالي ياريت اصير مثلهه بسرعه كتله خلي اشوفهه
كون اصير مثلهه.

ابتسم ومد ايده كدامي كال تفضلي خلي انطيج الكتاب واخذج الهه موجوده هسه استلمنه الكتاب وكل اليشوفه يباوعلنه انتبهت على نفسي شجاي اسوي امشي وياه بنص الكليه وانسولف اني رفضته ليش سامحتله يحجي ؟؟ هذا السؤال الوحيد الي مالگيتله جواب ...

اخذني لقسمهه دخلنه غرفتهه كامت بابتسامه متوسطه العمر تقريبا نهايه ال30 راقيه راقيه حيل لابسه تنوره سوده وستره جوزي وابتسامتهه حلوه ومبينه انيقه كامت كالتله خاف غلطان بالطريق دكتور اسامه جايني برجليه

ضحك وكالهه لامواني طالبتي رادت تتعرف عليج وانتي مسوؤله عن التنافسي اريدج تهتمين بيهه خوافه شويه
ابتسمت وسلمت عليه تأقلمت بسرعه كعدت تسولف وتشرحلي عن الامتحان واناقش ومنطلقه موهاي لبابه التتختل وره حزنهه

انطتني رقمهه خاف احتاج شي وطلعت من يمهه خابرت الخط واسامه ظل يمهه امشي مبتسمه وحدي شعور حلو من يكون عندك طموح من اني كاعده يمهه شكد يجون كبار اساتذه وهي بلقبهه العلمي اعلى منهم عجبتني شخصيتهه حيل وقصتهه ادل على قوتهه موكل انخانت اندثرت ولا كل التطلك مالهه حق تمارس حياتهه ....

عقيق....فتحت عيوني واحس راسي ثكيل وكوه اجر النفس باوعت بس الاجهزه وصوتهه اليوتر كدامي شاشه سوده ماادري صارلي شكد بس كمت اصيح جمره محد يرد عليه مااكدر اتحرك اخاف ماعندي الم بس راسي من البنج ...

اجت ممرضه هنديه تحجي ويه دكتور واني بس صافنه
طلع الطبيب واجن اثنين غيرن ملابسي ولبسني احزام للصدر ونقلني على غير سرير واخذني لغير غرفه ربع ساعه وينفتح الباب واشوف السبع كدامي

رغم الثقل البراسي شهكت من شفته وصار عندي الم
بصدري بسرعه اجه عليه باسني هواي متفرق من راسي
وجهي وهو يكلي الحمدلله يارب الحمدلله عدت عقيقتي
شتحسين الحمدلله على السلامه

عقيق...جاوبته بثقل زينه بس شصار صارلي شكد
وجهك تعبان
السبع....صارلج سبوع نايمه بلانعاش والحمد الله حالتج مستقره وهسه نتاكد بعد من الدكتور

عقيق.. اسبوع هواي
السبع.. اي اكو منهم طلعوهم 3 ايام من الانعاش بس انتي كال اله نتاكد وعمليتج ناجحه الحمدلله هسه الباقي
عليج تصيرين سباعيه وتساعدين روحج حته اطيبين بسرعه
عقيق... ظلينه يومين بعد بالمستشفى وطلعنه للشقه المترجم ويانه ماعافنه ابد صحتي زينه بس حركتي
قليله اديه مااكدر احركهم ولسه ماشفت جرح العمليه ...

كلهه تخابر السبع وفجر ولبابه ورانيا حاجيتهم من السبع
اشتاقيت للبصره جنت اكذب من اكول اريد اخلص واطلع
منهه اصلا هواهه صاير بين عيوني كلساع واكله عود هاي والبصره ماكو مثل حرهه وهواهه ...

عقيق.. اريد اسبح ضايجه من نفس الملابس
السبع.. كال ممنوع المي كومي اساعدج هو ااصلا جرحج
مامضمد هاي لو يمنه جان لفوا من فوك ليجوه
عقيق.. جونه ملوث هذوله شعدهم احنه شخلت بينه الحروب والاحتلال قبل الناس وين تعرف الامراض هسه طفل يطلع بي خبيث اسم الله...

السبع.. كومي يله غسلي ولاترفعين ايدج ممنوع
اله يسمحلنه يله تتحركين
عقيق.. السبع بهاي الفتره حسيته الام التداري بتهه
من بعد العمليه هو يبدلي ويغسل وحاير بيه حته اخجل منه بس ماعندي غير حل...

جرح العمليه 15 سم من جهه كلبي رغم قهري تشوه جسمي بس اكول الحمدلله على الاقل صرت انسانه
طبيعيه وامارس حياتي بدون الحبوب التعبت منهه
ومااكدر انساهه يوم واحد

اخر يوم طلعنه تمشينه سوه واشترينه شغلات بسيطه
للبنات الطبيب كال صحتهه تمام وخلي تسافر لاتخافون من اي شي بس العلاقه الزوجيه تبتعدون عنهه مده 3 اشهر والعمل الشاق مده 6 اشهر والسبع يهز براسه ويكول
الله كريم ماادري لشوكت يتحملني....

رجعنه للعراق وتلكانه ضرغام انبات يمهم وثاني يوم
نروح للبصره علمود مااتعب تلكتنه رانيا بطنهه جبيره
وكوه تحجي وتاخذ النفس دكول الحمل متعبني
مشتاقه لفجر وللبابه شوكت يجي الصبح وانروح...

فجر... خاله ام اواب تليفونج يدك
ام اواب.. الله اكبر
فجر.. رحت شفته اواب يتصل وهي تصلي عجبني
اخبث فتحت خط كلت الو كال هلو يمه شلونج
فجر.. هله يمه يابعد امك شلونك يوليدي؟؟

اواب.. يمه !!!! منو انتي
فجر.. الجنيه
اواب.. فجري
فجر.. فجرك شنو عيني امك تصلي تكمل وتخابرك
اواب.. اوكفي اوكفي شلونج ام اللسان
فجر.. بخير

اواب.. عساج بخير دراستج شلونهه
فجر.. وانت شعليك
اواب.. جاي اسالج خلي عندج ذوق لسه ماتعلمتي
فن الرد
فجر.. ايبااااه يحجي بالفنون عمي حقكك غير عشت
بغوسيه
اواب.. وين وين بروح امج عيديهه كولي روسيا

فجر... جاي تقلد بشرني ماصرت اب
اواب.. اصير اب؟؟؟؟ ليش منين شنو متزوج وماادري
فجر.. غير تزوجت الغوسيه وفغحنالك حيل
اواب.. شو الصمي ياروسيا هو على ورق علمود الجنسيه ومقابل فلوس بسلا متحمله عليه علمود هالشي

فجر.. اني!! ليش اتحمل عليك بصفتك شنو؟؟
اواب.. فجر كافي تمسلت الغربه شاگه حلكي ورفضتيني
عينك عينك وهم سكتت وهسه مسويه نفسج
كلشي ماكو ترى اعرفج بطلي ثگل وداعه ابوي احبج

فجر.. عيني اواب المزيون باجر يجي السبع
واله اكله عليك كلما تخابر دكول احبج شنو هناك
مايدرسوك بس احبج حبتك حيه دكيت الدكه وسافرت
واتزوجت وجاي دكول احبج

اواب.. لللللللج فجر
فجر.. اجت امك وديربالك دكول احبج لان اخزيك
جرب كولهه مره ثانيه وشوف شسوي بيك
سديته وركضت للغرفه

شويه واجتني رساله منه كاتب احبج بعدج دبدوب
كالولي رشيقه بشريني بخدودج راحت ؟؟
قريتهه واني ابتسم اني الك يااواب 3 سنوات صارلك
وهسه جاي دكول احبج والله لشوفك الويل...

عقيق... رجعنه للبصره تلگني البنات جنت تعبانه بسرعه
نمت ماكعدت للمغرب طلعت من الغرفه واسمع فجر
تحجي ويه السبع وهو يكلهه لاتجاوبي اني اخابره
واعرف شحجي وياه كعدت بصفهه والسبع طلع كتلهه
شكو؟؟

فجر.. اواب يدزلي رسائل وكلت للسبع علي
عقيق... عزااا ولج شلون دكليله انتي موتحبي
فجر.. يعني اذا احبه اسمحله يدوس عليه شوكت مايعجبه ويرجع شوكت مايريد

عقيق.. وهسه راح تخلي بموقف موحلو واحتمال ينسحب من صدك
فجر.. ماينسحب بس خلي يعرف اني مومن التعرف عليهن يضحك عليهن بكلمه 3 سنين اخذ مني واني افكر واشتاقله وهسه يكلي احبج اطلعهن من بين عيونه

عقيق.. والله تخوفين
لبابه.. عليمن تسولفن
عقيق... ابتسمت لبابه صايره حلوه
لبابه.. امتحنت تنافسي وانتظر النتيجه ادعيلي انقبل
عقيق.. ان شاء الله لاتفكرين انتي تستاهلين كل خير

بعدنه انسولف اندك الباب ام جراح جايه بوستني
وكعدت كلساع تشبگ لبابه وتتحسر عليهه من كامت
لبابه سألتهه فجر شخبار مروه ؟؟
ام جراح.. ملتهيه بولدهه وجراح فوك وهي جوه
ماينام يمهه ومليت من الحجي وهي متحمله على شنو
ماادري وجراح يون على لبابه...

فجر.. وصحته شلونهه
ام جراح.. نفسهه يابنتي من يعصب مايخلي شي مايكسره صارلنه اسبوع بدون تلفزيون كسره
لو يكتلهه للاسوء حته ماياخذ علاج وراح يهلك روحه
وبس يدخن ...

عقيق.. ظلت تسولف ومن تجي لبابه تسكت حته لاتنقهر
بيومهه باتت يمنه ثاني يوم لبابه طلعت نتيجتهه
ناجحه وفرحنه الهه حيل اجونه هواي خطار يتحمدولي على السلامه بس جماعه القصر محد اجه ...

مرت الايام هادئه ولبابه انقبلت وجراح رجع من جديد
يتوسط ويوميه داز احد وماتقبل كام يتوسل بس يشوفهه ماتخلي وصلت بيهه من تطلع بالشارع دكول خاف يشوفني تنزل خمار على وجهه بحيث عاقبته
بشوفتهه وهو يتوسل بفجر بس مره وحده وهي ابد
ماقبلت لان تدري بي يراقبهه ...

اما جبار انحكم ببغداد هالمره مافاده حزبه وطلعت علي كومه شكاوي ومن ضمنهن ضحى هم قدمت شكوه وهذا كله ضرغام الركض بيهه وانحكم 15 سنه سجن وصارت سمعته بالكاع حته القصر محد يروحله ومحد يحترم اولاده عاصم يكول جابلنه العار تالي عمرنه ...

السبع صح اخذ حقه بالقانون بس دائما يكول كلبي نار
المثله المفروض ينكتل حرام شكم عائله بعائلته دمرهه
وخاصه من انضم للحزب وبالجديد الحزب يركضون وره ضرغام يكول حته عارضين علي انضم ويانه وندفعلك هلكد فلوس يريدون يستغلون الضباط والمراتب...

رانيا... ضرغام يمكن راح اجيب
ضرغام.. جيبي يله
رانيا.. لاتشاقه والله عندي الم خايفه ضرغام
عليك الله لاتخليني اجيب طبيعي خلي اسوي عمليه

ضرغام.. اخذج للمستشفى
رانيا.. اخاف لايسون بيه مثل لبابه
ضرغام.. اخذج لاهلي كومي بدلي هي موكالتلج هاي الايام ولادتج
رانيا... كمت بدلت وماما خابرت وسام ودت يمه
الاولاد وراحت وياي جانت ب5 العصر اخذني العصر
بمستشفى اهلي ونظيفه وعنايه دخلت لصاله العمليات
ب9 جبت طفلي وفرحتي ماتنوصف حته الالم نسيته

مخليته على صدري واشم بي والفرحه بعين ضرغام
اجه ليث ونور الدنيا وطايرين بي جانت عطله
وكال من يبدي الدوام اسويلج امومه وسيف ورضاوي
ماينامون اله ينام ليث يكلولي انتي نامي واحنه نكعد وياه....

حياتي حيل هادئه ضرغام مدللني رغم شغله وتعبه
بس مامقصر ويانه الله كتبلي حياه هادئه بعد تعب
ومشقه وسام على وضعه كل جمعه ياخذ الاولاد
وهم كبروا وكامو يحتاجون ابوهم بس بنفس الوقت متعلقين بضرغام لان مايوم رفضلهم طلب...

بعد مرور 6 اشهر..

عقيق... الطبيب سمحلي بالحمل كل شهر دموعي
بعيني الظاهر لازم فرحتي تظل ناقصه والسبع
تعب حته من كدما يصبر بيه كمت الح علي اراجع
نسائيه واخذتني ام جراح وهنا جانت الصدمه بعد مادزتني على تحاليل وفحوصات كالت عندج ضعف بنشاط البيضه وهالشي ينراد وقت طويل للعلاج حجمهه موبالمستوى المطلوب ...

رجعت ابجي دخلت بكأبه موطبيعيه حته السبع تعارك
وياي ويصيح لوادري مامسويلج عمليه وظالين هيج
من كدما تنگين براسي الله مقدر هالشي شنو بيدي
اخر شي استسلمت وكعدت وسكتت ظليت اراجع
بس بدون فائده وماشفت نتيجه...

لبابه... اداوم 3 ايام بالاسبوع الدكتوره علا حيل حبابه
وصارت قريبه عليه شحتاج تساعدني واسامه نفس الشي وكل هذا ومابدر منه غلط حته مايباوع ولاكانو بيوم تقدملي...

جراح شكد حاول حته كام يتصل وغيرت خطي
تعمدت احرمه من شوفتي ادري يراقبني وظليت البس
خمار من اوكف على الشارع جنت من اتذكر جرحه تنزل دمعتي هسه من اتذكره اشمئز واكره نفسي شلون
دفنت نفسي ايام وشهور واني اندب حظي...

بيوم منهن جنت بالغرفه واجتني رساله من رقم
غريب مكتوب لو تصير عندج كرامه وتعوفين
جراح راح يجي ابنه الثالث واني حامل شوفي حياتج
ترى مرجعه لحضني ...

كلماتهه سهام بكلبي ليش كلما اريد انساه ارجع
اتذكره لو يذكروني بي ليش هيج ياجراح
بعدين مسحت دمعتي مثلا شنتظر منه اكيد راح
يخلف مره ومرتين موهي الكال عليهه حلت بعيني....

بلعت الكسره مثل كل مره وكتمت حزني من جديد بس هالمره مااثر على وضعي بالعكس زدت نشاط واقره ومهتمه بدراستي حيل بس يبقه الليل تراكمات الحنين تهيج بي..

وره شهر اجت ام جراح وانفتح الموضوع
وكتلهه مبروك حمل مروه تفاجأت كالت منيلج
هالحجي سولفتلهه كامت تذم بيهه كالت هاي الهه يوم
كتله من الكتلات يموتهه لو صدك يطلكهه والجهال تظل

ام جراح.. جذابه منين تحبل وهو مايوصل يمهه
اشوفهه تبدل وتعدل وتنزله ويرفضهه ومن حاجيته
ردت اصحي على زمانه يكلي مااشوفهه مروه الحلوه
ماادري شلون غلطت هيج غلطه وكل مره يتهدد يريد
يطلكهه واني اتعارك وياه الجهال مالهم ذنب

لبابه... معلم على الصدمات كلبي صارت كلما تحجي امه
ماانصدم من كدما ضگت اللوعات والمرار بحبي
اله هذا الحب الحاملته اله بده يتلاشه وماعندي اي مبرر
بداخلي مجرد مااريد اسامحه اتذكر شلون باوع بعيني قبل يوم ويكلي بس انتي عندي وثاني يوم يطلع متزوج...

سنه 2015 ناقشت رسالتي وحصلت امتياز ولهذا اليوم
وجراح يتوسل يشوفني بطلت اسأل عنه بطلت انتظر الحوبه بطلت اتبع اخباره واراقب حسابه فجر وعقيق
اخر سنه الهن راح يتخرجن ونفس خبالهن وعقيق دومهه ضايجه على موضوع الحمل والسبع ملتهي بشغله...

كمت اقره للدكتوراه والدكتوره علا تشجعني
كمت اغمض عيني يجي اسامه ابالي واكوم
ادعيله هو ساعدني وطلعني من حزني وصار الي
اسم وكيان وحته اناقش واحجي بدون خوف وتردد

بيوم منهن اجه السبع كال اريدج بشغله كعد وفتح
موضوع اسامه وكال حاجاني مره ثانيه لبابه تخسرين
اذا ماقبلتي بي يمكن اصعب قرار اتخذته بحياتي
وظليت اسبوع كامل مامرتاحه وافكر واخر شي
حجيت ويه فجر كالت ثقي باحساسي اسامه
هديه ربج بعد التعب...

كلت انطي لنفسي فرصه وعلا كالت راح ينطيج مجال
اذا شفتي نفسج ماتأقلمتي وياه كل واحد بطريق
وهو انسان متفهم حيل رجعت خبر للسبع اني موافقه
دمعتي بعيني وكلبي يذم بيه ويكلي وجراح!!!

بس ماردت ابقه على ذكراه ردت اكمل حياتي
اني ماارجعله مستحيل بعد ليش دافنه نفسي
بهيج حياه وخاصه اسامه عندي شعور مريح اتجاهه
وتمسكه بيه خلاا 3 سنوات خلاني اتذكر كلام ماما
الله يرحمهه اخذ اليحبك ولاتاخذ التحبه ....

رجعت خبر للسبع بعد تفكير طويل واستشاريت رانيا وصديقتي ام جراح زعلت ومااجتني ابد السبع
حدد يوم المشيه الجمعه وقبل يوم اجت رانيا وضرغام
شكد هوسه وفرحانين بس ملامحي طافيه مثل طفيه الشموع وكت الغروب...

جانو مخبوصين الشيخ ياسين يكول ناس معروفين
ومتمكنين ماانريد نتفشل وياهم واني ايدي على خدي
وكلبي مقبوض اكو دموع تجري من كلبي قبل عيوني
بس اخاف ابجي كدام الكل اليوم بس مشيه وعقد شيخ بدون حفله بعدين نتفق حته نسوان مااجن لسه كله عن طريق الزلم ....

جنت كاعده ومدنگه راسي واسمع صوت رانيا صاحت
بصوت فززنه كلنه كمت وكفت عبالي واحد تكهرب شفت ضرغام شغل سيارته وبس التراب وراه والسبع واكف بالباب وايده على راسه ...

كلبي كالي جراح اااي جراح بي شي دموعي النزلت
من كيفهه والعبره الوكفت ابلعومي كلهه دكول
جراح بي شي طلعت حافيه امشي كلهن واكفات بالطرمه
بس اني جنت جوه كتلهن شصاير ؟؟

واني اغمض عيني ولايكولون بي شي اجاني
صوت ام اواب وهي دكول جراح مايدري وراجع
على ابنه بالسياره وكاتله بمكانه !!!

.
يتبع........

#خبايا_الاقدار
❤️♨️

#البارت التاسع والسبعون



انكسر كأس مُنذ ثمانية أعوام دون قصد فانجرح قدمي وترك ندبة بقت إلى اليوم. كلما نظرت لها تذكرت شكل الكأس ومن كسره وكيف، فما ظَنك بالأنفُس.؟
......
لبابه... الدنيا انهدت على راسي عمري مادعيت علي بأذيه الضمير عمري مادعيت على اطفاله وصحته صح حد يومه وقضاء وقدر بس موبهالموقف شلون يعيش بتأنيب الضمير وهو قتل ابنه بيده
ركضت بدون شعور للسبع دمعتي وكعت كتله روحو وياه لاتعوفو هز راسه وكال راح اروح فوتن جوه ام اواب يمنه
السبع خابر على اسامه كاله عدنه حاله وفاه ساعه واحنه وحده تباوع بوجهه الثانيه اخر شي ام اواب كالت لازم نوكف لام جراح
رفضت اروح ماردت مروه تشوفني وعبالهه شمتانه بيهه بس اصرت اله اروح ومحد بمي يظل خابرنه ياسين دزلنه سياره ورحنه الباب جان مفتوح على حيله وصوت العياط من جوه وصوت عمتي ام جراح وهي تصيح شحال كلبك يا وليدي
نزلنه بدموع اجر بكلبي والله مااتمنيت هيج ينفجع ردت حوبتي بتوفيقي اتوفق واعيش ماردت هيج يصير
بيهم ابنه حيل حلو وعيونه ملونه وشعره اشگر يشبه
مروه وكل اليشوفه يتعجب بجماله هيج راح بهبه ريح
دخلنه للصاله نسوان هواي الجيران واهل نوال واهل القصر وعماتي خفت حيل لاتكوم مروه تطردني بس الشفته خلاني امشي بدون شعور واكعد كدامهه وابجي ...
مروه لاشعر ولا وجه ولا وادين منهاره يلزموهه تصرخ بعلو صوتهه ابني هسه بحضني مايعوف اخو وحده المنظر مااتمنى لبشر موهي الدمرت حياتي بس مااتحملت منظرهه وكمنه نبجي وياهه
نسوان اطب ونسوان تطلع وهاي الدكول الله يساعد امه
وهاي الدكول الله يساعد ابو كتله بيده والتكول دمه بالشارع واكثر ماهزني وحده كالت شفته من رجع علي وانمرد بالكاع حته ملامحه مختفيه الضربه قويه...
رانيا جانت كاعده بعيد وتبجي واشوف مروه تزحف بنص النسوان وحضنت رانيا وتصيح خاله ابني راح انتي كتيلي
ماتفرحين بحياتج من مكرج والله فجعني بي لو مااخذني
اني ولا ابني ...
اخر شي تعبت كومتهه رانيا للغرفه ماتكدر تمشي تريد توكع جانت لابسه دشداشه لونهه سمائي بدلتلهه ولبست اسود وكامت منين مامنين تجي الناس هلكد كرايب اشوفهم بس بالفاتحه والعرس...
صار الليل وكالو مناك اخذوا الطفل للنجف ومروه ماسكتت ولادقيقه هو واخو تؤام متماثل بحيث كلساع يجي يكلهه ماما كلبي يوجعني ويأشر على كلبه ويسأل عن اخو لو يجيب سيارته يكلهه اريد العب وياه رغم كلامه مكسر بس يكسر الخاطر....
جنت كاعده بغرفه ماما القديمه ورانيا ترضع بابنهه يمنه
ودكول سهاد مخابره امي مسافره هي وساره بكركوك وعافت بتهه وحدهه حته محد الهه مخليه راسهه بالكاع وبس ام جراح يمهه ...

رانيا.. هم دعيتي علي بعزيز كلبه؟؟
لبابه.. لا والله مايوم دعيت لان مااريده ينفجع صح خان واستغفلني بس مولهدرجه احقد علي ترى جراح ابن عمي
قبل لايكون زوجي مااتمنى هذا الدعاء للعدو اني ماشفت
طفلي واشهر حزينه شحال هو وهي ام
بعدني اسولف فتحت التفتت على صوتهه وكالت قبل شهر كالتلي ام جراح لبابه يتيمه وماتروح حوبتهه وضحكت عليهه من حجت حوبتج ماطلعت بجراح طلعت بيه اني اني دزيته يركض وره ابو هو مايدري عافه بالبيت
اني دمرتج واخذته منج كوه جراح مارادني واني اخذته بالحيله وهسه من كام يكرهني كمت ادور كشافات واسحوره ودفعت لوحده فلوس بس تسوي تفرقه بينكم ولزمتني عمتي وكالتلي ترى ربج منطيج مهله وعلى ساعه يضربج وتنفجعين وماصدكت
لبابه.. اسمع كلامهه ومامستوعبه تحجي بدون شعور كعدت بالكاع مدت رجليهه وتضرب براسهه بالحايط وتصيح اني اني الله فجعني بابني لان مشيت بدرب الحرام
ماكدرت احرك ساكن اباوعلهه شسوي احقد عليهه لو اكول الله يساعدهه لو الومهه الصار صار وضربه رب العالمين قويه قسمتهه نصين هزيت راسي وكتلهه الله يغفرلج وماياخذ الاطفال بذنبج مو وقته هالحجي الله يصبرج
رانيا.. كومي عقيق اخذي ليوثي من حضني رجلي خدرت
وانتي مروه تعالي وياي ابنج خطيه يبجي وياج الحجي ماينفع بعد كومي غسلي ومددي لاتوكعين
عقيق..اخذت ليث واخذتهه رانيا لغرفتهه باوعنه على لبابه اشرت لاتحجون منو اني حته اتشمت بطفل الله يغفرلهه ويصبر جراح اذا اكلكم تحجون عليه كلبي نار واتمنى اقاسم جراح نفس الحزن والله عبالك ابني النار البجراح نفسهه بكلبي...
ب1 بليل يله رجعوا من النجف جنت مدده وسمعت صياح عمتي ماكدرت اكوم ماردت يشوفني وعباله مثل مروه بسببي طلعت كلهه على الصوت مال بجي امه اجت عقيق تمسح بدموعهه كالت تبجين على حاله حته مارفع راسه
بهاي الليله مانمت كلساع اسمع صوت مروه وهي تنوح نوح الحمام لو اسمع النعي مال ام جراح قريب الفجر كمت توضيت اريد اصلي كلهه نايمه كلنه بتنه يمهم ونسوان نايمه بالصاله رحت للمطبخ ام جراح كاعده بس شافتني بجت كالت شفتي اشصار بجراح يامصيبه ماوكعت براسه ...

مااعرف شحجي وشلون اواسي بس ابجي وياهه جان باب المطبخ مفتوح كلبي حسني هو بره طلعت للطرمه شفته مدنگ بالحديقه ولازم راسه باثنين اديه ولابس اسود...
اخذتني رجليه ووكفت يم راسه اريد امد ايدي اريد الزمه
اريد احضنه اريد اهدي من روعه اريد اشاركه حزنه ماكدرت ماحاس على وجودي ابد اديه محاوطه ركبته وراسه بالكاع حابسه شهكتي لايسمعني بسرعه دخلت جوه مااكدر اتواجه وياه لان راح اضعف...
ظليت بالمطبخ اباوعله شفت ضرغام طلع يفرك براسه وهو يصيح جراح كوم طب جوه يجره من ايده مايكوم تقربت اكثر على الشباك الفجر هستوه طالع والدنيا گمريه وصوت البجي مالته وصل لاعماق گلبي...

كام يبجي وضرغام كعد كدامه ويكله قبلك دفنت 3 مرتي واولادي ومالگيتهم غير فحمه وهم بسببي احتركوا ربك راد هالشي موبكيفك ولابكيفي لاتسوي هيج صحتك تعبانه شوف ايدك الماوكفت لو النزف من خشمك
جراح.. شفته حته ملامحه مختفيه بيدي كتلته من عصبيتي قبل اسنين ردت اكتل لبابه ووراهه ردت اكتل نفسي وهسه شنو ابني بيدي كتلته ضرغام عيتيش راح اعيشهه شلون اشوف اخو النسخه منه وهو بيدي موته ماسمعته من صاح بابا يكولون يصيح وراك ولازم حذائه بيده
انه مااستحق اكون اب ولا حته الي حياه انه انسان مريض نفسي كالي الطبيب قبل ترى نهايتك تكتل وتأذي وهاي نهايتي تعبت محد حاس بيه تعبت يوم واحد اريد انام بدون الم تعبت وتالي طول عمري اعيش بهذا الذنب
ضرغام.. مابيك شي ابنك مات قضاء وقدر لادكول اني كتلته الله راد هالشي استغفر ربك وكوم امه خطيه هم موهينه عليهه لاتحمل نفسك المسوؤليه الله انطا والله اخذه
جراح.. لبابه كللهه خلي ترتاح طلعت حوبتهه صح مادعت عليه بس الله بيمن يفجعني لو بامي لو بابني وهاي بابني شلون هيج وزني الشيطان وهيج سويت ضرغام شلون هيج دمرت نفسي وعايش بالم
ضرغام.. لا اله الا الله كوم عاد وسحبه من ايده مايكدر يمشي ايده ترعش بقوه دنك راسه بالمغسله وصاح بصوت عالي السبع السبع طلع السبع يركض لزم جراح من كتفه بسرعه شمر نفسه بحضن السبع ومدري شيحجي وياه بس يطبطب على كتفه...
لبابه.. خلصت الفاتحه 3 ايام ومروه وحدهه امهه واختهه مااجن انكسرت ادمرت موهذيج مروه ام اللسان عينهه بالكاع وصوتهه مختفي باليوم الثالث رجعنه للبيت بس رانيا ظلت يمهم...
عقيق.. فجر شعجب ماحلمتي هالمره
فجر.. جنت سهرانه
عقيق.. يعني ماحسيتي؟
فجر.. اليسمعج يكول فجر جني هو احساس وبالصدفه يجي
عقيق.. حسي بيه اصير حامل
فجر.. لا ماتصيرين حاليا
عقيق.. امداج ولي
فجر.. عقيق حاسه اواب بي شي
عقيق.. شبي؟؟
فجر... شمدريني كلبي يوجعني وافكر بي هواي
عقيق.. انتي خبله من كلتي علي للسبع
فجر.. وماتدرين شكاله السبع
عقيق.. ماخابره كال ادري بي يحبهه وهو قبل لايسافر كايله ارجع واخطبهه والسبع يكول سفر اواب جنبنه مشكله ويه جبار لان لو يدري صدك يريدهه جان ماتردد بمشكله جبيره
فجر.. هسه شلون نعرف اواب شبي؟
عقيق.. خابري
فجر.. لا انتي دكي من خطج واذا كال الو معناتهه مابي شي
عقيق.. خاف يدري السبع
فجر.. عود كليله فجر ذبيهه براسي انتي استاذ بالتهايم
عقيق..جبت تليفونه ودكينه رقمه وقفلنه الباب انفتح الخط وصوت ابنيه كالت الو مين معي اواب هيدا الرئم عربي
فجر..اخذت التليفون وصحت سم بگلبج وبگلب اواب وينه هذا ابو النسوان
... عفوا مين معي اواب في الحمام
فجر..هلوووو هلووووو يسبح العريس اشتعلت عشيرته
وسديته وركعت تليفون عقيق على الجربايه

عقيق.. شبيج كسرتي تليفوني
فجر.. سمعتي ولج سمعتي واني الزماله افكر بي
عقيق... انطي مجال نفتهم هو موكال بس ورق
فجر.. اشششش ضربيني على حلكي اذا كتلج بعد
عقيق.. بعدهه تحجي وتفتر بالغرفه دك تليفوني رقم اواب
كتلهه رجع اتصل اخذته مني وصاحت شتريد متصل
اواب..هاي انتي ام نص اللسان
فجر..ماتستحي دكول مامتزوج وجذب وانته حاطهه بنص بيتك وترد على تليفونك
اواب.. لا اله الا الله اول شي على كيفج بطلي عصبيه
وخليني احجي وياج بهدوء
فجر.. ياهدوء ماتستحي ادزلي احبج وانت تسبح بشقتهه
اواب... فجر بيمن احلفلج ماكو شي بيناتنه واصلا مووحدي بالشقه هاي ابرار احجي وياهه هي صديقه ابرار وتجي يمهه
فجر.. وانت شعندك بشقه بس نسوان اشو مستفلگ الوضع
اواب.. عاب هاللسان الشقه شقتي ابرار اجت تقره يمي
لان ابو الصيانه بشقتهه وهاي اجت وماادري راده على التليفون خفي علينه علويه فجر
فجر.. اواب انت واحد سرسري ماتستحي ادور بنات خفيف ماعندك حيه حضور ممثل بارع اذا خابرت بعد اخزيك تخزي خووووش
اواب.. طيح الله حظج على هاللسان الزفر والله لو يمي اله افرك حلكج زعطوط كدامج وتغلطين شايفتني اطب بشقه واطلع من شقه حته دكولين سرسري عرمه ماترهملج جاره

فجر.. سديته بوجهه حيل عصبت حقير ابو اذان
عقيق.. فجر خلص رصيدي شنو هاي بس فتحت خط
عليه انصرف
فجر... اني بيا حال وانتي حايره برصيد امشي من وجهي
عقيق.. الله يهديج
عفتهه وطلعت ظلت طول اليوم معصبه بليل كاعده اسولف ومااحس غير افلتهه واكول للسبع اشتريلي رصيد اليوم خلصته فجر اريد اسد السالفه ماكدرت حيل انقهرت والله موبنيتي افتن بس حجيت بعد
سكت هو بس رزلني وكال ممنوع تتصلين من رقمج بعد
بس رايح محاجي فجر. كايلهه لاتخابرين من وراي
يريد يجي ويخطبج ماعنده مخابرات بالتليفون
وكالعاده اكلت المقسوم من فجر وبس شعري يطاير بالبيت
لبابه ... كل خميس انروح يسوون ثواب وهم مااشوفه
وهو اصلا مريض صوت كحته مال شايب لمحته من بعيد
بس ماشافني لاف ايده بشاش وبعدهه على نفس الرعشه
وضعفان حيل والوجه صاير اسود مسيطر علي الحزن
رانيا.. شكد شايفه حقيرات بس مثل اختي ماشفت ولجن راح يطلع اربعين الطفل وهي اتخم بكركوك وعايفه بتهه وحدهه
لبابه.. مو ادافعلهه من جابتهه هنا شنو من ام هاي
رانيا.. منيلهن امومه انطيهه فلوس وونسه اتكيف
لبابه.. مروه حيل تعبانه
رانيا.. كلش تعبانه صح السوته ماينغفر بس هاي الكسره
صحتهه على زمانهه ولج بالفاتحه من اخذتهه لغرفتهه
بدلتلهه وهي تريد توكع والله ماادري انقهر لو اكول حيل بيهه من ايدهه
جسمهه ازرك يمكن مايلحك يطيب من الكتل كلت مو وقته احجي بس حاجيتهه البارحه دكول مايطيقني جراح واحبه مااكدر اعوفه وهاي من عافته لبابه لسه عصبيته وحرگته يطلعهم بيه لازم خرسه مااحجي بس احجي كلمه يكتلني

لبابه... شجاريلهه منو ضربهه على ايدهه
رانيا.. اااوف من النفس الاماره بالسوء تحبه امداه هالحب
المابي احترام وتفاهم كتلهه شلون تتحملين هالكتل
بس الظاهر ادمغت
لبابه.. جان يضربني راشدي ابجي وازعل شهر شلون
متحملته ترى اني عشت وياه وجنت اضغط على نفسي
وعود يداريني وهم يوميه بالطبيب شحال هسه هي
وبهذا وضعه الزفت
رانيا.. هم كلهم مخابيل وحق الله عشيرتكم كلهه خبال
ليش ضرغام قاصر خوب هذا طكه ونص شعره ابيض
وبعده على الخبال
لبابه. .. بس ضرغام حيل يحبج ويحترمج ومايكدر يأذيج
رانيا.. هم غلط من ضم عليه بس تاكدت ماعنده شي وهسه وراه وراه حته من يجي من الدوام اشم ملابسه يكلي اشبيج تشمشمين جنج بزونه اخاف عطر منا منا
لبابه.. لا مايسويهه واقبال جانت قبلج وساعدهه وتورط
لو يحبهه ويريدهه مايطلكهه
رانيا.. وانتي احجيلي بوضعج اكيد راح تأجلين موضوع اسامه
لبابه.. حاليا تأجل خابرتني اخته وكتلهه كالت اخذو الوقت براحتكم شويه خلي يعدي شكم شهر فشله منهم
رانيا.. خلينه صريحين اذا طلبج جراح مره ثانيه وبهذا وضعه ترجعين
لبابه.. لاااا رجعتنه بدون فائده هو مريض واني مااتحمل
الثقه بيناتنه انعدمت انتهت على شنو انحارب ونعيش والصراحه مااكدر ابعده من ابنه وخاصه راح يتعلق بي
اكثر مال يطلك مروه وارجعله مستحيل انتهه جراح
حبنه ورقه خريف وطشرهه الهوه وكل واحد
راح بصوب وبعد هيهات نلتقي بنفس
الغصن ...
رانيا... كملنه العشه ورجعنه نومت ليث الي ماخذ شويه متي ومن ابو بس كل اليشوفه يكولون ينطيج شبه اكثر
بس وكح 24 ساعه يبجي ويناغي ولازم شايلته وافتر...
خليته بفراشه وضرغام ينظف بسلاحه صحت شكم
اكلك لاتنظفه هنا لاتسويلنه قدر
ضرغام.. خلصت ماكو شي باجر عندي دوام
رانيا.. واحنه انظل هنااا
ضرغام.. اي يومين وارجع انكمل الاربعين وانروح
رانيا.. وضع جراح شلونه
ضرغام.. موزين .. البارحه اخذناه للطبيب ضغطه
معلك طبيبه النفسي كال اي جاره ماترهمله اذا ظل
هيج نهايته يتخبل راسه كايم ينمل من الادويه
وهاي ايده دمرته حته مايكدر يلزم اسلاح بيهه
وبس واحد ينيش وراه يفصلوا من دوامه
رانيا... الله يشافي موهينه علي انتو لاتعوفو وحده
ضرغام... تعالي احاجيج
رانيا.. مددت بصفه مخليه ايده جوه راسه وحرك اصبعه
على خشمي وكال تدرين شصار ؟؟
رانيا.. شصار
ضرغام.. نزل اصبعه على شفتي وكال اقبال مطلگه
من ابن عمهه ومتعرفه على ضابط عن طريق البنيه الساعدتهه والرجال عندي عائله و4 جهال ومتزوجهه
ومرته درت وهسه تريد تطلك
رانيا.. يعني هاي متعلمه على هجمان البيوت صح حقهه تريد تخلص من الوضع البي هي بس مو على حساب عائله بس اذا هو رايدهه تختلف
ضرغام.. لااا اعرفه. من بعيد سولفولي علي متزوج عن
حب ومستقر وحياته طبيعيه ومتزوجهه بالسر محد يدري ودافع فلوس لعمهه وجايبهه ببغداد هو من بغداد
وهي مخبثه ومخابره مرته ودرت وهسه هم وكعت نفسهه بمصيبه
رانيا.. هسه يطلكهه وترجع لنفس الحفره
ضرغام.. مااعتقد لان الظاهر اكو اتفاق بينه وبين عمهه
او البنيه الوسيطه المهم استقرت وسامع جنت متزوجهه

واجه يريد يسالني عن السبب حرت شگله ماترهم اكله
خفت من رانياا
رانيا.. انت خفت؟؟ بله متسكت
ضرغام.. اطلقي سراحي وشوفيني خمس اقبالات اتزوج
رانيا.. ضربته ببطنه مواكلك منحرف
ضرغام.. هسه شكلتي ولو اقبال وحده
رانيا.. ضرغااااااااام تريد اشوفك اخبالاتي تالي الليل
ضرغام.. اي هو هذا النريده اخبالج تالي الليل بس على كيفج ترى جرحي طاك من جديد
رانيا... نام نام احسنلك وجرحك ضمده
ضرغام.. باجر التحق مااكدر اروح ريگي يابس
رانيا.. باوعت بعيونه واني مبتسمه قرب راسه
خلا على راسي وباسني من شفايفي ومن ورا
اذاني هستوهه مندمج وصاح ليث كمزت من يمه
وهسه يسكت وهسه ينام وغفه ضرغام وكعد وهو على فد ونه ...
كعد الفجر واني هستوني غفيت حسيت علي يبدل فتحت عيني بثقل كتله اسويلك ريوك تقرب عليه وهو يدكم
يقميصه دنك باسني وكال لانامي هو ابن الكلب خله
مجال
حضنته من ركبته وبسته وظليت اباوعله لحدماكمل
وطلع ورجعت غفيت اقل الساعه وكعد حته ماالحك
اسبح واعتني بنفسي من وراه 24 ساعه يبجي وتعالو
شيلوني...
لبابه... طلع الاربعين وكل واحد رجع لحياته نسمع اخبارهم جراح وضعه لاسوء ويكولون شايله بحيله
ومروه نفس حالتهه منا جراح وضغطه عليهه ومنا
حزنهه على ابنهه..
رجعت علا فتحت الموضوع وياي وحاجيت السبع
كال خلي يخطب بدون هوسه اصلا جراح انسان ميت
لااحساس ولامشاعر وبيومهه من سامع بالمشيه
مالتي متهور وصار الصار وكايلهم خليهه تشوف حياتهه
خسارتي جبيره ابني وهي مااوكف بطريقهه لان راح اذيهه ومحد يتحملني. ..
اجن النسوان امه واخواته والدكتوره وعمته اتفقن
على المهر حبابات حيل بس كلبي مكسور مااحس بأي شي بيومهه شكد بجيت ودعيت الله ينسيني جراح ويعوضني دعيت ياربي من هاي اللحظه ازرع محبه
اسامه بكلبي ونسيني المريت بي...
جاب ناس قليله وعقدلنه الشيخ من وره الباب
ماشفته بس صرت مرته شرعا كلما اغمض عيني
تنزل مني دمعه حاره ياترى راح اكدر اكمل وياه
وانسه الصار لو ابقه بنفس الدائره ادور...
وره يومين بالضبط اندك الباب طلعت فجر تكمز
جنه وحدنه والسبع طالع صاحت منو منو محد رد
رجعت خلت الحجاب على راسهه وطلعت واسمع صوت
شهكتهه شعلوه صحت فجر منو؟؟...
ماردت باوعت من المطبخ واشوفهه مخليه ايدهه على حلكهه واواب واكف كدامهه ومبتسم تمد ايدهه تتلمس بي حقيقي لو جذب وايدهه راحت على اذانه وهي ماتدري بروحه وهو متفاجىء بحركاتهه...
.
.
.
يتبع........

#خبايا_الاقدار
❤️♨️

... البارت الثمانون


اعلم ان اشيائي الجميلة لاتدوم
وانت اروع الاشياء التي حصلت ليـّۓ
يا سندي وملجأي في هذه الحياة
أشتاق ڵـڱ واعلم ان وقت الرحيل قد حان
انهم ينتزعون قَلبـ♡ــيے. م̷ـــِْن اضلعي
قد صار اللقاء بيننا محال
وطال الفراق كثيرا طال
لم يكن في حسباني ه̷̷َـَْـُذآ السؤال
كيف خطفوك مِڼـّي ولم اكن في استعداد
سلبوا مِڼـّي حياتي اماني وانفاسي
اعلم ان كل شيء في زوال
وهاهي راحتي قدت زالت
وبت في انتظارر
ايجمعنا قدر بعد ه̷̷َـَْـُذآ النوى؟ ؟!
ام حلقت بلا عودة؟ ؟
.....

اواب.. عوفي اذاني يمعوده وفوتي لااحد يشوفنه
فجر.. انت حقيقي
اواب.. لا مزيف دفوتي ترى واكف بالشارع اني
فجر.. ادنيت ليوره ودخل واني مصدومه التفت عليه

اواب.. شلونج
فجر.. الحمدلله على السلامه
اواب.. الله يسلمج السبع اكيد موبالبيت مااكدر ادخل بس اجيت اشوفج اليوم الصبح وصلت
فجر.. شو فجأه اجيت
اواب.. ماتدرين ليش تسوين نفسج فقيره

فجر.. ليش
اواب.. افتحي خط عليه وراح اخابرج والله يافجر اذا السانج المگطوم كام يهلهل ماتلومين غير روحج
وبعدين شدعوه هلكد صاير حلوه وين راح الكرش والشحم

فجر.. مااكدر اجاوبه مذهوله مصدومه شلون اجه وليش
بس اهز براسي طلع وكال افتحي خط راح اتصل بيج شلتهه ركضه ليجوه ادور على تليفوني وعقيق تصيح شجابه شجابه..

طبيت للغرفه وقفلت الباب وانتظر يدك ثواني واتصل من رقم غريب بس كلت الوو جر نفس وكال شحلاتهه بحلگج
ليش هيج سويتي بيه وخلتيني عفت الامتحانات واجيت
تعبي يروح من وراج

فجر.. شمسويه؟؟
اواب.. ماتدرين؟؟ لهدرجه مستعجله وتريدين تزوجين
فجر.. يازواج؟؟
اواب.. ابوي صار اسبوع يخابرني يكلي فجر قبلت بابن
الشيخ ابو علاء وهالاسبوع المشيه خلاني مااندل دربي
شلون حجزت وشلون اجيت حته اهلي تفاجوا بجيتي
كله من وراج

فجر.. ايااا لوتي يا شيخ ياسين عمي صدك شيخ
لعبهه صح عليك يامسكين اوبي والله محد خطبني
واصلا اول مره اسمع منك

اواب.. صدددك؟؟
فجر.. وداعه جبار الماحلف بي صدك صح خطابتي هواي
وارفض بس ابو علاء ماخطبني لابنه ولامشيه ولابطيخ

مايعرف شيحجي ساعه يعصب وساعه يسكت تخبل
حجه على ابو وبعدين رجع عليه انتي الدبه كله
من وراج هلكبرج ولعبتي بيه
فجر..لتصيح شبيك خاف ضايج لان عفت الغوسيه
اواب.. دنجبي انجبي احسابج على سوالفج بعدين
وهسه خلي اروح لابوي بعدين اخابرج

فجر..طلعت اركض وره ماسديته ادور على عقيق جانت بالمطبخ لزمتهه من اذانهه من خدودهه
عقيق... ولج لبابه الحكيلي انجلبت فجر

شعري تجر بي اذاني اتجرهن خدودي ملختهن حته اصبعهه طب بحلكي عوفيني اترجاج اواب رجع اني
شكو عليج الله عوفيني

لبابه.. وخري عنهه انتي وتاليتهه وياج
فجر..كلبي انكطع غير اعبر عن فرحي اوكفيلي عقيق
بس هالمره
عقيق.. امشي ولي والله اضربج بهاي العوده بس تجين
لبابه.. مخبله انتي فجر شفتي اواب لو جني

فجر.. شسوي طالعه على عمي جبار دمي حار اااخ عقيق
بس كرصه وحده حبابه حبابه وركضت وراهه
عقيق.. يمه يمه ولج عوفيني هدي شعري ولج اذاني
كامت توجعني فجر حبابه عوفيهن

لبابه.. وخررري تخبلتي راح اخابر السبع والله
ولج فجيران وخري شعرهه ملختي
فجر.. ااااخ ولج لبابه لومااكبر مني املص اذاناتج
لبابه.. بيج انفصام موصاحيه ماشايفه وحده تحب الاذان
تتلمسين بأذاناته شكلتي لروحج

فجر.. احبه ساهره يوم احبه ولج عقيق ام كفشه
احبببببه
لبابه.. طايحه الحظ متستحين هيج تحجين
فجر.. خفي علينه ست لبابه منو جان يتختل حته يشوف
المايتسمه امشي خليني فرحانه

عقيق... بس يجي السبع اكله عليج خلي يروح يلقحوج انجلبتي شعري تهلس من وراج
فجر.. فد جرعه من اواب ولقحوني وداعه جبار حته
عض وتخرمش العب بيج فلق

لبابه.. اكعدي ثگلي وفهمينه شعنده جاي
فجر.. جيبولي ياسين امرعده من اذانه ولجن هو شيخ
وجبار شيخ غير رجعه سحل وعباله صدك راح انخطب
لبابه.. منو يخطبج بهذا عقلج ؟؟

عقيق.. سمعت الباب انفتح كتلهن اسكتن يمكن السبع
كمت شفته طلع هو تلگيته مبتسمه ضحك كال هااا
هم مكتوله ؟؟
عقيق... شمدريك؟؟

السبع.. موهذا شعرج مهلس واذانج حمر هجمت عليج
فجر شسويتي؟؟
عقيق.. خلي تولي تجيهه الحاله
تعال فوت عندي سالفه وياك!!

السبع.. راح يأذن الاذان ولج ياسالفه سالفتج الماتخلص
انوب كلبج تصلح لو صدك جبتي الذيب من ذيله
عقيق.. اششش لاتسمعك فجر وتخزيني

طب سلم وراح للغرفه واني دخلت وراه جان يبدل كعدت
على الجربايه واهز برجليه دنك على المرايه يعدل بشعره
وكال شعندج كوه ساده حلكج طلعيهه وخلصيني..

عقيق.. خلي انشيل من البصره
السبع.. الله يستر من سوالفج منيلج هاي الفكره
عقيق.. شعدنه هنا موهذاك ضرغام استقر ببغداد احنه هم خلي انروح راح نتخرج وبعد شكو
السبع.. مااعوف كاعي ولا محافظتي بويه رجال بصراوي مالي بحياة بغداد رفاهيه خلينه هيج واكعدي راحه

عقيق.. لعد نظل ندفع ايجار
السبع.. لانرجع لبيتنه من تزوج لبابه انه علمودهه طلعت
وعفت بيتي وكاعي..
عقيق.. ماتغير رأيك؟؟
السبع.. عقيق بطلي افكار يوميه شكل من تشتاقين
لبغداد كليلي اوديج بس استقر مااكدر ...

عقيق.. بدل وطلع وفجر تغني اتجيب من هاي الاغنيه
مقطع تلزكهه بغيرهه وصوتهه جنه سماعه حاجه بربع
وتجبرنه نسمعهه ...

لبابه.. دك تليفوني علا جاوبتهه كالت اسامه اخذ رقمج
راح يتصل بيج وحبيت ابلغج صار اسبوع على عقدنه
بس ابد ماحجينه ولاتواجهنه شعور غريب عندي بس مااعرف شريد

سديته واني لازمه راسي وافكر شسويت بروحي
اريد ابدي حياه جديده واريد واريد بس كلبي
رابطني من كل الجهات اتقدم خطوه ويذكرني
بي مااكدر انسه..

دك تليفوني اترددت اجاوب اقنع بنفسي واريد
اسوي نفسي طبيعي هو دكتوري وخجلانه منه
جاوبته كلت الوو سمعت طكه الجداحه معقوله يدخن
ابد ماشايفته...

اسامه.. شلونج
لبابه.. الحمدلله وانت
اسامه.. اسأل عنج ليش مااجيتي هالاسبوع
لبابه.. اخذتني النومه
اسامه.. نوم الهنا

لبابه.. شكرا
اسامه.. اهلي يريدون يتعرفون عليج اكدر اخابر
السبع ابن عمج واستأذن منه تكدرين؟؟
لبابه.. هااا يعني ضروري استحي منهم
اسامه.. عاده عدنه وامي اكلت راسي ليش لسه مااجت
لبابه.. بكيفك اذا قبل السبع ميخالف

مااعرف شحجي وياه تغير الحديث على الدراسه
شويه ونهه المكالمه احاول بكل طاقتي اتكيف ويه
الوضع رغم اكو اعجاب بشخصيته بس شسوي لكلبي
الماعنده غير جرحه ...

اجه السبع على العشه كال خابرني اسامه
باجر معزومه على غده يمهم ومايصير ترحين
وحدج وفشله ادز ام جراح وياج واستحيت ارفض

فجر.. مارفضت وام جراح ماتروح وماترهم لبابه
تروح وحدهه ممكن دكول شلون رهمت 3 اختيارات
ومابيهن اجابه صحيحه

السبع.. وتاليتهه وياج انتي اله ازوجج واخلص منج
شعندج ويه عقيق يوميه مهلسه شعرهه
فجر.. هي تعيل بيه لاتشوفهه ساكته بيهه كل البله
واذا اجت وكالتلي تعالي اسولفلج سالفه كول راحت بيهه فجر...

السبع.. هااا هي هم تسولفلج
فجر.. سوالفهه كلهه فاگسه
عقيق.. باوعلي وابتسم واني مدنگه اكل
فجر.. شوفهه غلست ام السوالف العوجه
السبع.. اكلي ام اللسان وخلصينه ...

عقيق.. كملت والسبع كلما يباوعلي يبتسم وره العشه
ظلينه ويه لبابه تلبس وتنزع وفجر لعبت بيهه خلقه تنسق الهه وتضحك عليهه خلتهه لبست الكنتور كله ودكلهه
محلو....

يوميه قبل النوم اصلي ركعتين وانام كملت صلاه واجيت مددت بصفه عبالي نايم لان الغرفه ظلمه ادنيت بسته
من خده لزمني من زندي بسرعه وكال مااتوبين !!

عقيق.. فززتني عبالي نايم
السبع.. انتظرج مشتاگلج
عقيق.. اني هم كومه كومه قاطعني ببوسه قويه
وهو يضمني بحضنه مثل كل ليله دافيه كلبي سليم
وصار تعبير مشاعرنه وحبنه اقوى قبل يتقيد
بصحتي...

مايوم صاح بيه مايوم زعلني حته اذا غلطت بالاول يعلمني وينصحني ووراهه يقسي بالكلام حته
لا اعيدهه عشت وياه عروس طول ايامي ماحسيت
نفسي صرا عاديه وحبه يجدد يوم بعد يوم

لبابه.. لبست فستان طويل مخصر وكلبي يدك سريع
اخذت عهد على نفسي احفظ اسامه حته بفكري
حرام عليه حته افكر بجراح دك تليفوني معناتهه
وصل فجر وعقيق سولي زفه سخيفات يله طلعت

صعدت بصفه كلت السلام عليكم رد عليه وحرك السياره
كلشي باسامه راقي ومن عائله مثقفه وهادىء من طلعنه
من منطقتنه التفت عليه كال ليش ايدج ترجف ؟؟
لبابه.. استحي رايحه وحدي بس ماكو احد وياي
اسامه.. عليمن تستحين علا بالبيت وامي هسه تشوفيهه
ترتاحين الهه...

لبابه... سكتت وصلنه لبيتهم بناء البيوت القديمه التبعث الراحه صف السياره بالباب ونزلنه من فتح الباب اجه طفل صغير صاح عمو كال هذا ابن اخوي الجبير دخل
كدامي صاح علااااا
طلعت تركض وتصيح هله هله بجنتنه بوستني
ودخلتني للصاله لگيت امه سلمت عليهه ومرت اخو الجبير عائله هادئه حيل

كعدت بنصهم واني مستحيه وبنفس الوقت مستهظمه ليش ماعندي احد فجر توسلتلهه ماقبلت تجي ام جراح ماترهم اجيبهه مكانج خالي ياماما الف رحمه على روحج
لو عايشه جان كتلج القهر من وراي...

ام اسامه.. بنتي لبابه هاي عائلتنه ماعدنه احد كل ولدي طالعين بس الجبير يمي وعنده اثنين ولد والبنات متزوجات وعلا تعرفيهه وهسه فرحتنه اسامه وابو توفه قبل سنتين

لبابه.. الله يرحمه اني هم كاعده يم ابن عمي ماعدنه احد
ام اسامه.. سولفلي اسامه كلشي كل انسان اله نصيب
ولازم يشوفه وسبحان الجمعكم بدون ميعاد وخله اسامه
بطريقج مولان ابني بس الله يحبج حيل انسان صايم مصلي عنده مخافه الله وبر الوالدين من مات ابو وهو على فراش الموت ويدعي لاسامه ويكول اني راضي علي ..

لبابه.. حمدت الله انطاني هيج شخص تعويض عن تعبي
النظره البعينه تكفي اتاكد هو يحبني ويخاف عليه
شويه وكالت علا تعالي اشوفج البيت فرتني بيتهم وغرفه
اسامه وظليت كاعده يم امه وهو مدري وين راح

صار الغده يله اجه اخو الجبير عسكري ماموجود. ومرته حبابه بس اسامه اجه ويانه تغدينه وكال تعالي نكعد شويه من حجه هيج حسيت رجليه خانتني اكيد راح يسوي مثل كل المخطوبين واتذكرت اليوم المشوؤم
من نجتمع اني وجراح وحدنه ...

كعدنه بالاستقبال بالاول حجينه سوالف عاديه
وعن المهر والتجهيزات جنت مخليه اديه بحضني
ومااحسه غير لزم ايدي وعبالك تكهربت ردة فعلي قويه
وكانو واحد تحارش بيه كمزت بسرعه وابتعدت وظليت
واكفه وهو صافن عليه وحجه بتساؤل اعتذر ماقصدي افززج...

لبابه.. شفت نظره بعينه مثل الفتهمني بلعت ريگي وكتله لاجنت صافنه بس كلبي يدك بأذاني شلون بيج يالبابه
شلون راح تعيشين وانتي لسه كلبج خاين عقلج..

رجعت كعدت بصفه شفته كلساع يفرك ركبته متوتر
وضاج حيل اتعوذت من الشيطان واحاول قدر المستطاع
اكون طبيعيه وخليت ابالي الله يعاقبني واصلا هذا اختياري مالازم هيج اسوي ..

حجيت واني مدنگه اسامه اسفه ماقصدي بس لان ممتعوده
اسامه.. عليمن اسفه ماصار شي بس اريد شي واحد منج لبابه اني موصغير رجال جبير وفاهم ودارس وخاصه الانسان الي احبه افتهمه من عيونه لاتجبرين نفسج عليه وياريت تكونين قبل مااتخذتي قرار الخطوبه تكونين مفكره ومتخذه قرار نهائي

لبابه.. حقك اني راح احجي وياك مثل ماقبل تعودت احجيلك اني مامفكره بأي شي من السابق ورغم حزني بس اكو بصيص فرح بداخلي بس تبقه اثار التجربه السابقه مسيطره عليه اني انسانه مؤمنه واخاف الله
لاتتوقع راح اخونك حته بتفكيري ..

اسامه..لاتحجين هيج اني عاذرج كل واحد بينه من ينجرح من شي يبقه ندبه بحياته اقل موقف يتذكرهه
ابد مايوم فكرت ارتبط بوحده فكرهه موصافي شكد جانن بحياتي بنات وماحبيت بس ليش انتي بالذات هذا السؤال مالگيتله اجابه ...

لبابه.. الله يحبني ودزك اليه
اسامه.. ابتسم وكرص خدي وكال ارجعج احسج متقيده
غير مره نكعد ونسولف وتتعودين
لبابه.. كمت سلمت على اهله ورجعت للبيت لزمنؤ فجر وعقيق يحققن شحجي شأكول بسرعه بدلت ونمت...

مرت الايام اني واسامه هيج علاقه سطحيه استاذ وطالبته مااعرف شفسرهه بس اي كلام حب ماكو بيناتنه
بيوم منهن اجه السبع كال ام جراح مريضه واتفقنه انروحلهه واخذنه العصر نزلنه بالباب وراح..

جانت سياره جراح موجوده دخلت فجر كدامنه دكينه باب المطبخ فتحته عمتي بوستنه وفرحت بينه جنت من ادخل هذا البيت تنزل دمعتي هسه من ادخله استحسف سنيني الضاعت بي...

شويه ونزلت مروه نفس الاناقه رغم حزنهه وعيونهه مورمه بس بعدهه مثل الشمعه جسم رشيق وبيضه
ولابسه دشداشه سوده قصيره جنه كاعدين بغرفه عمتي
سلمت علينه طبيعي وكعدت...

كلشي سبل وكلشي بي صالح وروحتي هاي يمكن صحتني على زماني وصحت كلبي النايم تحت
انقاض الوفاء..

رافعه شعرهه اصفر ذهبي حلو وركبتهه مااكدر اباوعلهه
اخذ النفس وصدري يمتلي الم واني اشوف هاي الاثار
نفسهه الجانت تنطبع على جسمي هسه عادتهن من جديد
معقوله اني هيج خادعه نفسي وفانيه عمري

اشوف ام جراح تخزر بيهه تريدهه تلبس شي تغطي ركبتهه لان منظرهه فضيع بس هي مامنتبهه قدمتلنه
عصير واني حسبه تاخذني وحسبه تردني لاول محطه
توقفت بيهه...

اجه ابنهه كالهه بابا يصيحج كامت ويمكن هاي اول مره
اكون فضوليه وادخل بغيري اخذتني رجليه بحجه اغسل
واريد اشوفه النكر عشرتي شلونه كالو صحته موتمام
كالو حزين وكالو ليله يخلصه سهر وتدخين...

شفته بعيني !! شفته بكلبي!! عقلي يكول هااا صدكت ياگلب هو موالك ؟؟ وكلبي مثل اليضم نفسه
وينكر هو شاف حته لا ينصدم ويصدك...

ماد اديه بالسنك يغسل وهي حاضنته من وره ومخليه
راسهه على ظهره وهو ماتحرك عافهه براحتهه اسمع صوت بجيهه وهو يغسل واندار عليهه لزمهه من اكتافهه ويباوعلهه بنظره عطف ...

بسرعه ركضت خاف يشوفني عرفني البنات وام جراح
واني اختنكت اريد اطلع مااكدر بعد اني جاي ادمر نفسي
وماواعيه لروحي اني جذب لا قاومت ولادرست اني
بعدني اراوح نفس المكان...

كلت لعقيق خابري السبع مااتحمل اظل بعد توسلت بام جراح لايدخل للغرفه وكامت كالتله واجت مروه كعدت
يمنه مااكدر ارفع راسي وكرهت نفسي حيل حيل لان ماصنت النعمه العندي ...

طلعنه واني اضغط على اسناني بس وصلنه ركضت للغرفه وقفلت الباب وباوعت لنفسي بالمرايه وخليت
ايدي على كلبي اليوم ادفنك. بيدي اليوم يحرم عليه
اذكر اسم جراح اليوم اتبره منك واحسبك متت

اليوم ابدي من جديد اليوم كدام نفسي وكدام رب العالمين لاجراح ولا ذره من العشته وياه راح اذكره
عندي انسان نعمه ولازم اصونه بكلشي..

من هذا اليوم حته كلامي تغير ويه اسامه مابجيت
ولا حبست نفسي بالغرفه مثل كل مره بالعكس اول شي
سويته خابرت اسامه وكتله تعال نطلع بعد مانستأذن
من السبع...

شهرين ضبط صار جراح مثل السراب بحياتي من ينذكر اسمه خاليه من كل المشاعر وكانو يحجون على واحد
غريب اكتفيت بكلشي اكتفيت بالصار وبالعشته والويلات الشفتهه...

بدلت وطلعت اليوم اروح للكليه يوم بالاسبوع كملت
شغلي ودكيت على اسامه كال تعالي لغرفتي ماكو احد
جان عطله وقليل الطلاب بس العنده شغله يجي
دكيت الباب جان يخابر كعدت علما كمل وكال شلونج
حبيبتي..

نسمه هوه دافيه ومرت عليه هم جان يكولهه جراح بس جنت اشك بداخلي واكول خاف نوال خاف خاف خاف
لحدما صرت مااحس بكل كلمه اخلي بيهه شك وهالشي
خلاني عشت ايام واسنين ماافرح بكلامه لان وراه الشك يسيطر عليه...

اسامه.. حيل متغيره لبابه بكلشي متغيره حته شكلج
صاير مرح اكثر جنتي حزينه
لبابه.. مرتاحه وياك الحمدلله الفضل لله والك
لان ساعدتني ماادمر نفسي بالتفكير خاصه بعد ماتوفت
ماما صرت اخاف من كلشي ومحد يسمعني وينصحني
بس هسه احجيلك كلشي بدون خوف وتردد

كام من مكانه وافتر عليه خله أيده على كتفي ودنك باسني من خدي بهدوء ميلت راسي برجفه گلب
مجروح يأبى يتعايش ويه الوضع

هو مدنگ على الكرسي وصاير وراي رفع راسي
من فكي وصار عكسي ودنگ باسني من شفتي
بوسه هادئه وابتعد

جسمي كزبر واحس بروده بكل جسمي وكلبي
يضرب بصدري بقوه وكانو رافض اليصير بس
عقلي جان مستحوذ على كلشي بحيث ماانطيت
مجال لكلبي يهدني حيل من جديد

ظليت مدنگه وخجلانه من شافني هيج كال
امشي اوصلج رجعنه الطريق كله فاتح اغنيه
محمد عبد الجبار شمسين لحدماوصلنه نزلت
واكو شعور خفي جميل بداخلي...

بدلت وكاعده ارتب بالكتب ودك تليفوني رقم غريب
فتحت واسمع صوته وهو يجر نفس ويكول
عساني مارجعت من الموت وعساني بقيت بالأسر
ولا اشوفج ويه غيري ....

دمعت عيني بسرعه ردت اجاوب كال لاتحجين بس اسمعيني انه حيل مشتاگلج فوك ماتصورين ادفع عمري كله مقابل يوم اشوفج واسمع ضحكتج واسمع اسمي
من حلكج وهذيج لبابه البريئه..مااستاهل انه ولو ادري بروحي خوش انسان واستاهلج جان وكفت كبالج مره ومرتين بس الله خلصج مني انه انسان سيء أذي احبابي
قبل نفسي اتمنالج حياه حلوه تستاهلين تعيشين حياة هادئه صبرتي وتحملتيني بس انه موخوش ادمي ..

لبابه حيل احبج اشوف صورتج بكل مكان ليلي يخلص
سهر على ذكراج عيشي حياتج وانه ادعيلج قبل نفسي
ابريني الذمه وسامحيني سببتلج خيبة امل جبيره
وخذلتج هواي

لبابه...حجه هالكلمات وشهكه نفس عاليه وماكدر يكمل
وكال مع السلامه وسده مابجيت على فراكه ولا حبه
بجيت علي هو وين واصل ليامرحله اذيه وعجز وتأنيب
ضمير مسامحتك والله يوفقك...

انطوت صفحه جراح وراحت بمهب الريح
واستقرت على ضفه نهر وكلما يجي الروج
يبتلعهه وتمحي شكو ذكره بداخلهه...

اما فجر اواب زعلان عليهه على دكاتهه وببغداد
يسوي بمعامله الدراسه وحته مايتصل
ولاسمعنه شي عنه وهي تاكل بروحهه

..

رانيا.. وحق الله ياضرغام العب لعب اذا صار شي
بس انت ضابط الله بلاني يوم اقبال يوم اصخام
وهسه عليه سليمه
ضرغام.. شبيج ثلاثينيه جاده بس اسمهه مخربهه

رانيا.. ضرغاااااام
ضرغام.. وجع صوتج واصل ليجوه هي سليمه معجبه
بيه شسويلهه مااكدر اردهه
رانيا.. لاتستفزني تعرفني مخبله
ضرغام.. لا اعرفج ثوله

رانيا.. راح ابجي والله
ضرغام.. ضحك بصوت عالي شكبرج بعد تصيرين وتغارين يابه وروح اهلي ماعندي شي ولااعرفهه
وهذا صديقي كلب ابن كلب يتشاقه

رانيا.. جذاب
ضرغام.. والله
رانيا.. مااصدكك
ضرغام...تعاي اخليج تصدكين بطريقتي
عندي طريقه جديده ماتجين
رانيا.. اليوم انام يم الجهال وديربالك تصيحني

ضرغام.. نزلي واكسر رجليج حلفتلج ماعندي شي
صدك جذب رانيا والله تخوفين
رانيا.. انت تخاف انت ؟؟؟
ضرغام.. لا بس اخاف تضوجين والحزن يخلي الواحد
يكبر واذا كبرتي اتزوج عليج وشلون سالفه من انتي
شابه ماتنحملين انوب تصيرين عجوز

رانيا.. وخررر لاتلزمني ديربالك تبوسني
ضرغام.. لا بس اقبلج ماابوسج شوفي ذكرتيني باقبال
رانيا.. ولك ضرغااااااام

سد حلكي بايده وحضني من خصري ويضحك
اموت على العصبي بويه كلنه تمردي بس موشعلي
ابهاتنه رنوووو حبيبتي ادري بيج رعنه راح اوخر ايدي
ديربالج تصيحين وتفضحينه

وخر ايده درت وجهي كام يبوس بيه واني زعلانه
باسني من وره اذاني استسلمت وصرت
بخبر كان وتحولت عصبيتي لحب وغزل...

عقيق... جنت اعزل بالكنتور دنيا العصر اليوم
السبع عنده شغل بالفاو لسه مااجه خابرته
قبل شويه كال راجع بالطريق ومن راد يسده
كال مشتاگلج حضريلي سالفه من سوالفج...

صار المغرب وادك علي مايرد وصار الليل
وكلوبنه مثل النار خابرت على جراح
مايرد يمكن ب9 الساعه واندك الباب صوت
اواب صاح افتحن اني اواب ..

ركضت فجر قبلنه فتحته واني جنت بباب المطبخ
سمعته وهو يكلهه لادكولين لعقيق السبع
بالسجن مدري منو مخلي حبوب بسيارته
وموكفته السيطره.....

.
يتبع.......