لبابه.. جراح شوكت نرجع
جراح.. ليش ضجتي ؟
لبابه.. لا بالعكس مرتاحه هنا اكثر بس فجر امتحاناتهه
الاحد خلي نرجع السبت حته تقره
جراح.. عكب باجر نرجع حته انه دوام ماينطوني اجازه..

لبابه.. جنت كاعده على حافه الجربايه واسولف وياه
وهو مدد كمت اريد انزل جوه صاح لبابه نطلع نفتر شويه
لبابه.. بكيفك
جراح.. لادكولين بكيفك كليلي نطلع
لبابه.. اي خلي نطلع ضايجه..

جراح.. يله تحضري
لبابه.. هزيت راسي بابتسامه وفتحت الكنتور بدلت كملت
كلشي ونزلت لفجر وهو عفته يسبح وكال ابدل واجي..

لبابه.. فجوره راح نطلع اني وجراح
فجر.. لبابه بطني توجعني
لبابه.. اخذتي علاجج
فجر.. اي بس من اكل عبالك يصيغ ضغط حته مااستطعم بالاكل
لبابه.. اخذي مسكن وهسه اشوف عمتي شكالهه الطبيب

عفتهه ورحت لعمتي بالغرفه كلبي مامرتاح ومتاكده
ضامين عليه كعدت يمهه واني اتوسل تحجي شبيهه
فجر
ام جراح.. تنهدت وكالت ادري بحالتج تعبانه وماانريد
انزودهه عليج منتظرين امتحاناتهه تخلص ونسويلهه عمليه

لبابه.. شبيهه عمه والله جاي تموتوني هاي اختي ليش
تضمون عليه بس هاي عندي
ام جراح.. اسم الله عليج بنتي كلت تخلصن امتحانات ونكلج
الطبيب ابو البصره كال بالسونار طالعه ورم على القالون
بس من اجينه لهنا لايمه قالونهه سليم والورم على الكبد
وجاي يضغط على معدتهه

لبابه.. لطمت بقوه على وجهي يمه اسم الله خاله لادكوليهه
مااكدر اخسر بعد بيه ولابيهه ابوس راسج لادكولين
بيهه شي

ام جراح.. ولج لبابه تخبلتي ابدال ماتدعيلهه يايمه
مانعوفهه وحته للخارج نطلعهه تخلص امتحاناتهه
ويشيلون الورم وبعد يسون فحوصات ادق لاتخافين الطبيب
كال نحاول بالعلاج واخر حل العمليه..

خابرو شيخ ياسين واواب كال ابو صديقه اكبر طبيب
بالباطنيه باربيل كال ناخذهه اله لاتخافين يابنتي موهاي
عقيق اتشافت من التزمت بالعلاج هم تشافه اخيتج
بس لاتحسيسهه

لبابه.. شمرت جنطتي بالكاع وكعدت كمت ابجي بحرگه
منين التفت مصيبه بس فجر عندي خلي ياخذ عمري
ولاياخذهه مني الهي تعبت موكلهن فد صبه عليه
اني ضعيفه ويتيمه وماعدنه احد غيرك..

ظلت عمتي تحجي يمي بس روحي مشتعله على اختي
اسمع صوتهه ادردم على عقيق ليش لسه ماجايه
اسمعهه تصيح خلي تجي الصفيره واني اعلمهه شامرتني
بنص العرسان وعايفتني اتصفن...

صاح جراح وينج لبابه ماردت اروح بس عمه
كامت تحجي عليه ولاتخليهه تحس ومابيهه
شي بس هيج نار وشابه بصدري من الخوف
ومتسهظمه على حالتنه...

طلعت لكيتهه تشوف افلام كارتون وتكرز حب
كتلهه تريدين اجيبلج شي جانت مندمجه كالت
لا مااريد صفنت عليهه اخذت نفس وطلعت ..

حرك السياره جراح انتبه عليه كال شبيج
ليش تبجين؟؟
لبابه.. ليش ماكتولي على فجر
جراح.. واذا كنالج شراح تقدمين تأخرين انوب
تزوديهه لاتفاولين عليهه مابيهه شي الطبيب
كال حالتهه زينه ومانعوفهه خلي تخلص امتحاناتهه
ونراجع بيهه..

لبابه.. سكتت ويه تنهيده جمره بداخلي تشتعل
يسألني وين انروح خلصتهه بكيفك بكيفك
جان شهر الخامس الجو حلو حيل بليل السمه صافيه
كال راح نتمشه شويه وانروح نكعد شويه على دجله..

اتذكرت من جنه صغار بابا يجيبنه هنا هو وماما
ومره وكع حذاء فجر وكامت تبجي علي
وكالت ماارجع للبيت اله تشترولي واحد وخلت بابا
يفتر بليل اله نفس تك حذائهه

ماقصر ويانه ابد هذا الموقف ابد ماانساه شايلهه
جانت بالاول ابتدائي ولابسه تك وكل محل يفوتله
يقنع بيهه بابا اخذي غيره وهي دكله اله التك مالتي
اكلته البطات ...

ركن السياره بالكراج ونزلنه نتمشه اشم هوه
احسه ينگطع مايملي صدري سولفتله على موقف
فجر ابتسم كال اني مامالحك على ابويه مااتذكره..

جراح.. جان عمري يمكن 4 سنوات وابرار هستوهه جايبتهه امي وجابو شهيد ومااتذكره غير بس ملامحه
وصورته على الحايط بس من كبرت شويه شويه السبع
اكبر من عدنه وتعلقت بي

جان ينام بغرفته واني بنص الليل اعوف امي واروح
انام يمه واتعارك ويه امي اكلهه اريد غرفه مثل السبع
شنو منيمتني يمج بس تخوفني بجبار واسكت

لبابه.. من صغركم وجبار يخوف
جراح.. جان يحطنه بالمضيف ويلعب العگال علينه
الوحيد السبع مايكتله لان مره كتله وثاني يوم شك
راس عامر وفتح المي على الزرع ومات غرگه كله
جان هستوه ناثر حنطه

لبابه.. وضرغام مووياكم
جراح.. ضرغام جان ابو عايش ويم بيت جده بس من مات اجو عاشو يمنه لان ابو ضرغام ابن عم جبار
ومن ماتت امه عاش ويانه هذا خبل محد يكدرله
اكثر واحد ينكتل هو واكثر واحد خبل جبار

مره منهن قشمرني كال روح راقب جانت اكو حضيره
ممليه جواميس وعجول والمسوؤل عنهن عباس ابن جبار ومن ازلام القصر خلاني لهيتهم واراقب وفتح الحبال مالتهن وخلاهن فاتن على المضيف وبيومهه جبار عنده
كعده يحلهه وصارت الزلم مطافر

ومحد دره جبار لزم عباس طيح حظه ولحدهسه
مرات اهدده بيهه لان ضاعن عجول كومه واثنين
من الجواميس ماكدرو يلزموهن ...

لبابه.. انطلقت وياه كمت احجيله على طفولتنه ونضحك
نسيت اني منو ونسيت حزني صار صوت ضحكتي
عالي وهو لازم اديه وكفنه على الجسر والدنيا كمره
اشوف الضحكه مرسومه على وجهه ...

رجعنه للسياره اثنينه مبتسمين اليشوفنه يكول
طالعين بموعد تعارف مو ازواج رجعنه للبيت
السبع وضرغام موجودين بالصاله من طبينه صاحوا
وين صرت انريد نبدي يله...

رانيا مخليه قوري الجاي وتعمر نركيله دكول
هاي عاده صارت ويصيح خوش تعمرين
صانع الاستاذ استاذ ونص...

كعدوا بالصاله يلعبون طاولي الباب مفتوح اشوف جراح
شحطوا شحط يكلهم موهيج والسبع طلع بيهم كووول
كل داس يخلص السبع فايز وضرغام يرجع على جراح
يكله من وراك خسرنه...

اخذت صينيه الجاي وديتهه كال ضرغام تعاي اكعدي
بلكي يشوفج جراح ويستعدل ويعرف يلعب
جراح.. شوف لعبك هو السبع انطه مجال

السبع.. ذبوهه براسي يله لعبوا هالداس وحدكم
وخلي انشوف انت لو ضرغام
جراح... ماالعب ويه ضرغام شوفه حته الصايات كسرهن
هو هيج اليحرك ذاب عصبيتك بيهن

ضرغام.. اني تايب ماالعب وياكم خاصه انت جراح
مايوم لعبت وياك وفزت
جراح... ولك اني ياهو مالتي انت خسرت تذبهه براسي

لبابه.. ضرغام خسر وبالي جراح انت خسرتني
من حرگه دمه ايد لازم الجكاره وايد الاستكان
وصاح جيبن القوري تنكطن علينه واحد وره واحد

رانيا.. ولجن هو منا ماينحمل وانوب شحنو صدك جذب عقيق كومي اخذي السبع خلي يبطلون
هاي العصبيه يذبهه بيه شوفن شلون يجدح

فجر.. هسه عقيق تغوح للسبع تكله جمغه يله
وجمغه مايندل دغبه بعد
عقيق.. عابتلج هسه يسمعج
فجر.. مامكذبه عيوني يله غوحي وشوفي شيكلج

عقيق.. دفعني للصاله صحت جمره يله انروح
كال يله تحضري فجر واكفه على الدرج صاحت
ها شكلنه لاجمره ولا السبع يبقه كدام هاي الحمصايه
هالكبرهه بيهه كل البله...

لبابه.. تونسنه حيل بس بقت غصت مرض فجر مسيطره عليه واخاف تتأزم حالتهه رفعت الغطه مددت جراح
بعده يم ضرغام شويه واجه نزع تشيرته ومدد بصفي...

اخذني بحضنه وهو يلعب بشعري حرك اصابعه
على كتفي غمضت عيني وصار يحركهن بشكل
دوائر يكزبر جسمي وارجع باحساس حلو
دنك باسني بوسات متفرقه وصار ويه كل بوسه
يشمني حيل ...

حسيت بلهفته حسيت اني ويه حبيبي وزوجي
جراح القديم الهادىء الحنين كلما الفظ اسمه
واكول جراح يتعمق اكثر بالبوسه باسني من كل مكان
ضربني علي واذاني حته اديه بوسهم

حسيت نفسه ثقل وصارت لمساته اكثر قساوه
اكول بلكي ماتتازم حالته لان هالمره يختلف
طبك اديه اثنينهم ورفعهم ليفوك عرفته اجته
الحاله حركت نفسي حيل كتله جراح الله عليك
عوفني...

همس يم اذاني بصوت خافت لاتخافين مااذيج
لبابه.. كل مره دكول هيج وتكسرني عوفني فدوه
الله عليك عوفني
جراح.. والله مااذيج بوعي اني بس رخي نفسج
اهدي

لبابه.. عوف اديه جاي تضغط عليهم حيل جراح
عوفني لاتأذيني
جراح.. مااذيج. بس اهدي والله مااذيج
هاي بوعي اني انتي حبيبتي
لبابه.. ترك اديه وهو يحضني حيل خلاني هدئت
صدك متغير صدك بوعيه بس ماانكر عنده قساوه
وعنف بس موبطريقه وحشيه مثل قبل...

غمضت عيني وهدئت سلمت نفسي اله واني وياه
بكل احساس اندمجنه بالكامل ارواحنه تعانقت قبل
اجسادنه عشت احساس رغم الالم ورغم قساوته
بس لهفته وحبه مااكدر اوصفهه

السانه ماسكت من كدما كال احبج اموت عليج
انتي عمري انتي گلبي انتي الي افديج بروحي
لبابتي حبيبتي...

ماردته يبتعد ابد ومااريد تخلص هاي الليله
لابعرسي ولا بغيرهه ولاغيرهه عشت هيج
احساس عاش وياي بكامل جوارحه قدم عطاء
وحب واحساس خلاني انسه كلشي مريت بي
وكأنو اليوم انولدت...

نايمه على صدره كال متأذيه هزيت راسي شويه
انت قاسي..
جراح.. بس مومثل قبل لبابه مافرحانه مثلي
متغير هواي جنت مااشوفج منو المهم ارضي
رغبتي بس هسه شفتج حبيبتي ولبابه التعلقت بيهه...

لبابه.. صح متحسن حتلو اذيتني فدوه الك
اني وياك منا لمن ترجع القديم
جراح.. تحملتي هواي وان شاء الله اعوضج عن
كلشي

لبابه.. جراح مااخذت احتياطات خاف اصير حامل
جراح.. واذا صرتي
لبابه.. لا مو الوقت المناسب نتقرب اكثر يله يصير حمل
جراح.. قابل نحاول نحب بعض بعينج شفتي متحسن
ومدام امي موجوده الله ينطيهه العمر تربي الج وانتي دوام

لبابه.. ظلينه انسولف لحدما غفيت وهو بعده كاعد
كعدت الصبح قبله جان حاضني ودافن راسه برگبتي
ظليت العب بشعره لحدما كعد...

صح 4 ايام بس من العمر ماتمنيت ارجع للبصره
لوما الامتحانات اله اظل هنا رجعنه كل واحد
لدوامه وجنت متأمله جراح هاهي تحسن بعد
مايرجع مثل قبل...

عقيق.. رجعنه للبصره ماعندي دوام بس مرات
اكعد اراجع الي اكدر علي وضعي اني والسبع
حلو ماتقربلي غير بس من ليله الفندق بس غامرني
بحنانه ليليه اعيش بحب ولهفه بس مايتقربلي

رانيا.. جنت اكنس بالدرجات مال باب الصاله لان ممر صغير وكبل لباب البيت لميت الزبل واشوف ورقه بيضه
ملفوفه بطابوگه فتحتهه ومتروسه كلمات تهديد
وقتل يهددوني بيه وبجهالي يكلوله مانكتلك نكتل الجهال والمره اذا مااجيت للدرب .

ركضت للبيت ادور على تليفوني طلعت رقم ضرغام
خابرته احجي وارجف كال سدي الباب عليج
هسه جاي بالطريق ماحجيت لماما بس الخوف موتني

نويت ابطل الجهال من الروضه خاف يسوون بينه
مثل ماسوو بعائلته وراحوا بدون ذنب نص ساعه
واجه ينزع بملابسه واني افتر وراه واحجي لازمه
الورقه بيدي...

ضرغام.. كاااافي رانيا صرعتي راسي الحيوانات هواي
وناس عايشه على الدم شسويلهم مو اول مره اتهدد
حته بالسياره الكه شلون اترك شغلي حته يرتاحون

رانيا.. يهددون بجهالي اذا صار شي عليهم شحجي
شكول
ضرغام.. مايصير يخافون من ابوهم ترى وسام موقاصر
واله صيته ومنصبه مايخطون هيج خطوه ضده
اذا يريدون يأذوني بس بيج لان ماينتمون الي الجهال

رانيا.. انت دكول حيوانات يجوز يسووهه
ضرغام.. مايسون شي لجهالج اطمئني واساسا
تركت قضية صاحبهم استلمهه غير واحد وهسه يوصلهم
الحجي ويكفون عني

رانيا.. اخاف عليك ضرغام الوضع يخوف
لايصير بيك شي
ضرغام.. مايصير من داومت استخبارات لهذا اليوم
شابع تهديد احنه بلدنه البي حظ مايريدو يريدون
اليستر على قذارتهم وهاي ماتمشي عندي ...

رانيا.. خليت اديه حاوطت ركبته وكتله واني ماتفكر بيه؟؟
ضرغام.. هو شموكفني غيرج وشاعله عمامي
رانيا.. لعد فكر بيه اذا صار شي بيك شحالي؟!
ضرغام.. شحالج ؟

اريد اشوف حالج هسه صايره وكحه وسمنانه
رشقي شويه اريد اديه تلتقي بخصرج
رانيا.. ممممم
ضرغام.. لاتسديهن هيج شايفه شلون اراهق وياج
بويه خفي ماالحك حته استراح لان بحاله شوگ دائم

رانيا.. كام يبوس بيه بشراهه وهو يرجع ليوره قفل
الباب الورقه مال التهديد بيدي سحبهه ذبهه
وداس عليهه وهو يطبع ببوساته وره اذاني ...

مثل كل مره من حضنه واحجي وياه بأي موضوع
تنتخم واني على صدره اخذ النفس كوه بعد
جوله عارمه كلهه لهفه وشوك...

خله حراس اثنين بعد على البيت وماخذين حذر
حته بالطلعه وجهالي كمت مااوديهم للروضه
اخاف عليهم شيخلصني من وسام...

...

فجر ... اليوم اخر يوم امتحان طلعت شايله محفظتي
وادور على الخط ماجاي ظليت واكفه ويه صديقاتي
اسولف ووكفت سياره اواب اعرفهه دك هورن سلمت عليهن وصعدت

اواب.. شلونج
فجر.. زينه ليش اجيت انت
اواب.. ماادري مدرستج قريبه على المستشفى
وابوي خابرني كال السايق مالتج مسوي حادث مر هليهه حته عفت دوامي

فجر...جان خابغتو السبع
اواب.. يجوز مايدري لان السايق من قريتنه وابوي دره
شلونج بالامتحانات
فجر.. موزينه
اواب.. يعني ترسبين
فجر.. بالغياضيات مااطلع بجلاق

اواب.. الله عليج شنو هالمصطلح اسمج شكل وكلامج شكل
فجر.. ماسامع بالجلاق العفو دكتوغ
اواب.. انتي ماعندج بريك
فجر.. نسيته بالبيت

اواب.. جاي احجي وياج صدك
فجر..واني هم احجي صدك
اواب.. صحتج شلونهه
فجر.. بطني توجعني
اواب.. حجزتلج الجمعه انروح لاربيل يم ابو صديقي
فجر.. انت تاخذني ليش والسبع؟

اواب.. يجوز يروح بس اني لان اعرف الطبيب
ماتريدين اروح وياج
فجر.. بكيفك بس اني شبيه وتاخذوني
اواب.. نطمن احسن حته ينطوج علاج زين

اسألج سؤال؟
فجر.. شنو؟
اواب.. انتي احساسج عالي ماتحسين بشي يخص حياتج
فجر.. لااا حياتي مااحس بيهه قليل
اواب.. ماتحسيلي ؟!!

فجر.. ههههههه مااحس بس للانسان الي احبه
اواب.. هاااا هم موهينه انتي
فجر.. سكتنه بس كلبي يدك سريع جذب احس
بكلشي بي احس بي هسه مرتبك وكلبي بي شي
بس سويت نفسي ممهتمه....

وصلني للبيت نزلت بس كتله شكرا وطبيت
بدون ماالتفت بس وضعي مخربط من اشوفه
عقيق كالت هاي علامات الحب ...

لگيتهه بالحديقه تسگي بالزرع صحت عقيق
العوبه
عقيق.. امشي ولي مااحاجيج
فجر..خلي ابدل واجي ارضيج

ركضت جوه بدلت على السريع عقيق زعلانه عليه
لان البارحه ورطتهه بفلم رعب وخطيه تريدتطلع
لتواليت ومااطلع وياهه وكامت تبجي تصيح راح اسويهه
على نفسي وخابرت السبع دكله الحگلي

والسبع بالشارع ويه جراح اجه يركض عباله بيهه
شي دكله تعال وياي لتواليت وراحت تركض
وهو واكف بالحديقه من طلعت اسمعه يرزل
بيهه اذا عدتيهه مره ثانيه املص اذانج يوميه
مبهطتني وتطلع شغله تافهه ..

وهي دكله فجر ورطتني ويكلهه طاحظج وحظ فجر
صغيرونات انتي ولج صغيره دازه عليه من الشارع
حته تروحين لتواليت خطيه تورطت هذيج الورطه
وهي تركض وره السبع دكله المهم ماسويتهه على نفسي
يله قابله بالرزاله...

طلعت اركض ادغدغ بيهه وهي تركض وتصيح
والله ارش مي عليج بعدني اركض وراهه
واسمع الباب تكسر ركضت اشوفه منو
صحت منووو مايرضه يكول اني بس يدك

بعدني اريد اوصل للباب واسمع صوت عاصم
يصيح ماتفتحون افتح الباب وانصدم
ايناس وامهه جايات وناويات يباتن زعلانات
من خديجه وجبار...

طبن جوه بس گلبي لاعب منهن اخذلهن نص ساعه
ورجع اندك الباب راحت عقيق فتحته وهالمره
جمعيه خيريه للعقارب والثعابين طبت نوال وامهه
مسيرات

بس ماتعبر عليه هذني متفقات والله عاجبني
العب عليهن ناويات على اختي وعقيق وحده
للسبع ووحده لجراح اريد اشوف تخبثن
اذا مااخبلهن واطلعلهن كرون فلا اسمه فجر...

رانيا... جنه نايمين بس مرات اكعد نص الليل
اشوف جهالي اطمن عليهم هاي عاده عندي من زمان
نزلت شفتهم نايمين غطيتهم وطلعت من الغرفه
سمعت حركه بره ظليت واكفه بمكاني عبالي يتخيلي...

تقربت خطوتين البرده شويه متحركه لمحت خيال
زلم اثنين هي ركضه هي صعده لضرغام واكوم
واوكع بس صحت ضرغام حراميه بسرعه فز
والمسدس بيده نزلني وياه لغرفه ماما وقفل الباب علينه..

اسمع صوت طلقات وصوت بوكسيات
ولا انسه ذاك الخوف جمدنه بدمنه وجهالي
فزو يبجون شويه واسمع صوته يفشر ويغلط
على واحد ويضربه بوكس صوته يوصل يمي...

فتحت الباب شويه لان سمعت صوت ضرغام
طمئنيت واتفاجىء بالكدامي واحد دايس على راسه
برجله والثاني مخربط وجهه بس الصدمه
موهنا الصدمه بالي شفته معقوله الطعن والتهديد
من المنك وبيك؟!!!!!!!

.
يتبع......

عيوني اذا حاطة هدف ببالج فطبعا تحققي بس ينرادلج اصرار وتنظمين وقتج
فحتلو تدريس الكتروني لاتهملين نفسج واقري زين حته تطلعين من الاوائل وهو مابقى بس هالشهرين وبعدهن يحددون موعد الامتحانات وبالتوفيق🥰✨

وهاي البايو👇🏻

#ملوكه

🦋💞

«قاتݪي من اجݪ احݪامڪ وݪاتخشي اݪفشݪ»

⠀⠀⠀⠀⠀ ⠀- ⤵️....

ᵂᴱᴸᶜᴼᴹ ᵀᴼ ᴹᵞ ᴾᴿᴼᶠᴵᴸᴱ ؛