وسام.. رانيا كل انسان معرض للخطأ ماجنت
مقدر النعمه العندي واني هسه اطفالي كبروا
وبحاجتهم انتي ارجعي وافتحلج بيت ابغداد
واسجله باسمج والتريدي اني حاضر

رانيا.. من اجيت خطبتني نفس هاي الطريقه
كلت اسجل الشقه باسمج واني حاضر
واني البي كل طلباتج وماخيب ضنج

بس السويته شنو ؟! كل عقلك ارجعلك
لو يصبوك ذهب ما ارجع ساعه وحده وياك
لاعبالك تلوي ذراعي باطفالي
وروح بابا مستعده اكتل روحي ولا اعيش
يوم واحد يمك وبدون اطفالي..

ياسين.. اهدي بويه لاتعصبين هو حاس
بغلطه وجاي يعتذرلج يكول ابوي وامي
يريدون الجهال ومن حقهم يشوفوهم
موبعد محافظه عنهم

رانيا.. شيخنه وين جانو من اليوم الي اطلگت بي
لهذا اليوم امه وابو واخوته مارفعوا تليفون عليه
وكالو شلونهم الجهال اني ربيت وحدي
تمرضوا وتبهذلوا يوميه بمكان
ومحد كلف نفسه وسأل عليهم

وهو ابوهم اسأله وين جان هاي السنين
خلي يجاوبني وين تفقتنه هو مو اب
ماينكسر كلبه عليهم؟!

وسام.. جنت مأمن عليهم يم ابوج
شمدريني هيج يصير وعايشه بقريه
كلهه ثارات

رانيا.. هسه شتريد اني عايشه بامان هسه
وبحمايه الشيخ ياسين تريد ترفع دعوه
تاخذ الاطفال لو شنو بالضبط؟!

وسام.. تدرين بيه مااذيج هيج ولو اريد
اخذهم من اول يوم اني جايج بالحسنى
وردت ترجعين حته اطفالنه ماتصير الضحيه

رانيا... اني الماقبلت بالخيانه هسه
تريد ارجع ع ضره؟!!!!!

وسام... ماكو ضره اني طلگتهه رانيا
ارجعي معززه مكرمه وكدام المشيه اتعهدلج
ماتشوفين غلط مني

رانيا.. هااا جربت غيري وهسه جاي
لو هم خنتهه وانهزمت منك رجعه ماارجعلك
لو اموت لو ع كص ركبتي

ياسين.. ع كيفج بويه چااا هو جاي يتعارك
الرجال جاي يتفاهم
وسام... خليهه ام اواب معذوره هسه
اني اريد اخذ الاطفال وياي اسبوع
وارجعهم بيدي

رانيا.. هو كال هيج لو تخبلت كمزت اعلى منهم
وكتله مستحيل صرت مخبله حته عباتي وكعت
من راسي. اجر بيهم واضمهم بحضني ودموعي
مااسيطر عليهه...

تقرب وسام عليه واني ابجي واتوسل
لاتاخذهم الله عليك عوفهم اذيتني
هواي ...

وسام.. والله العظيم ارجعهم هاي كدام
الشيخ اوعدج امي وابوي مرضى اثنينهم
ويريدون يشوفوهم مااذيج بيهم ...

رانيا.. فرفحت روحي امي لازمتني
وهو لازمهم ويباوعولي ويبجون رضاوي
يضرب بي برجله ويكله هسه يجيك السبع
يموتك ...

ياسين مارده وانطاه اطفالي ويقنعون
بيه اسبوع ويجيبهم ولايوم نامو بعيد عني
ولج ماما اريدهم اروح وياهم ...

ساهره.. ولج انتي مريضه راح تموتين
ابوهم هو قابل ياكلهم يشوفوهم ويرجعوهم
عمه هدي حالج

رانيا.. شفتي جاي يرجعنه اكو سالفه ابراسه
اخذ اطفالي حته يجبرني بيهم انتن ماتعرفنه
بفلوسه ورتبته كلشي يسوي ...

يهدون بيه بس ملخت نفسي
شلون رضاوي يبجي ويصيح اريد ماما
تجي ويانه وشلون ابوهم رافع خشمه ومطلع
سلاحه مبين عود يخوفنه يدري بيه ضعيفه حال..

متت بيومهه لا اكل ولاشرب ماما تبجي
وياي واني بلعومي اتجرح من كدما
صرخت اني متاكده ماراح يرجعهم...

اجتني لبابه العصر كالت ضرغام
يريد يحاجيج متصل ع تليفون
عمه لان تليفوني شامرته مادري بي...

بس خليته ع اذني شهكت بصوت عالي
وكتله اخذوهم شيخ ياسين انطاهم
لوسام...

ضرغام... منو مبجيج ؟! اطفالج يرجعون
والبجاج ونزل دموعج اني اله!!

رانيا.. عنده فلوس ورتبه ويهددنه
كل مره من جنه بغداد حته دوريه جاب
لبيتنه واخذوا بابا للمركز ...

ضرغام.. رانياااااااا كافي يابه
لاتبجين خليني اسمع صوتج بوضوح
كتلج اني ارجعهم بيدي..

رانيا.. هسه تتصادم وياه ويكلك
منو انت وباي حق تحجي؟!
ضرغام.. انتي مكبره الموضوع هو ابوهم
ومن حقه ياخذهم ويشوفهم حته لو الحضانه
الج

رانيا.. مايرجعهم هو جاي يعرض عليه
ارجعله ومن سمع رفضي كال اريدهم اسبوع
لو صدك جاي عليهم جان كال من الاول

ضرغام.. شيرجع ؟!
رانيا.. ارجعله لبغداد
ضرغام... ااااااهااااااااااااا

يله لاتبجين ننتظره اسبوع لاتخافين
مايخلف بكلمته كدام الشيخ ؟!

اكلج هو شنو رتبته؟!
رانيا.. هسه صاير نقيب!!
صرغام.. دزيلي اسمه بالكامل ووين
داخليه لودفاع...

رانيا.. انطيته الاسم الكامل سالته ليش
ضرغام لاتسوي شي مالي حيل مشاكل
ضرغام... شسوووي !!؟؟!

يله روحي واهتمي بنفسج وجهالج يم
ابوهم ماعليهم شي لاتخافين
سده واني مخليه ايدي ع وجهي وابجي...

اسبوع لو سنه اخابرهم من ماما
يكلولي ماما انريد نرجع هناا مانعرفهم
ويسولفون مشتريلهم العاب هوايه ويوميه
ياخذهم لمكان...

ضرغام مانزل ابد صار اكثر من اسبوع
وماخابرني بعد خلص الاسبوع وبيومهه
افتر من التوتر والساعات خلصت واولادي
ماكو..

صار المغرب لو كمت الطم ع وجهي
عرفته وسام سواهه اخذهم كتلكم لاتنطوا
خابره ياسين ويكله والله اريد احرك الدعوه
من جديد وشيحكم القاضي بهيج وضع اخذهم...

تعارك وياه وكاله ماعندك كلمه
وعدتني اسبوع جيبهم وحرك الدعوه
ماقبل وكاله اولادي ماانطيهم تريد
خلي تجي هي ماتريد خلي تظل بالبصره...

مثل ايام وفاة بابا واكثر
احس الالم البكلبي ماينطاق اخذهم
فرك خشم وياريت اكول يستاهل
٥ سنوات ماسأل عليهم وهسه صار
يمثل دور الاب...

ثاني يوم اجه ضرغام قبلهه حاجاني السبع
وكال مانعوفج واحنه وياج وصدكي لو موقانون
ناخذهم غصب عنه هيج انسان ماعنده
كلمه كدام شيخ لاتترجين منه خير...

سمعت صوت ضرغام بالاستقبال
طلعت اركض فتحت الباب جان يخابر
اشرلي بيده اسكت شويه وسده..

بجيت بسرعه وينهم موكلتو نجيبهم
اخذهم ؟! وعمه هسه يساعده وهاهي راحو
واني اصفه كلشي ماكو..

ضرغام.. اذا تظلين تبجين مااساعدج
رانيا.. لابطلت ومسحت دموعي..

ضرغام.. تعاي اكعدي وشويه فتحيلي
عقلج!! اسمعيني زين هذا يرادله جرة اذن
لو فعلا اب ومحروك كلبه ع اطفاله نكول من حقه

بس امج حجتلي ٥ سنوات هو ماصارف
عليهم درهم ولاجايهم ليش هسه جاي
يداعي بيهم؟!

رانيا.. يريدني ارجع؟!
ضرغام.. وليش هسه وين جان؟!
رانيا.. يكول طلگت مرتي ماصاير عنده
اطفال

ضرغام.. ممممم هز راسه وكال جذاب
هذا اكو واحد ناقص من يمنه وصله
حجي ؟!

رانيا.. شوصله؟
ضرغام.. مادري المهم اريدج تسمعيني
هسه عليج تسكتين لاتخابرين بعد ولاتتوسلين
الهم هو يجي يتوسل غصبا ع راسه!!

رانيا.. مايتوسل انت ماتعرف وسام
مغرور وشايف نفسه برتبته ولاهمه
جهال ولامره اصلا متزوج فوك ال١٠ مرات
يتزوج شهر شهرين ويطلك

ضرغام.. عود نكسرله خشمه اذا مغرور
مروتج شغلي دماغج بيش فالحه كليلي
بس تبجين ؟!

رانيا... جهالي هذوله ضيعت عمري علمودهم
ضرغام.. وجهالج بحرب يم ابوهم بالهدوء تنحل
العصبيه ماتجيب حل احنه راح انروحله باجر
ونلتقي باهله وانشوف بلكي يتفاهم واذا
شفنه الحجي موخوش عود احنه هم نصير
وياه موخووش !!

كومي مسحي دموعج كافي يمعوده
فوك الضيم والقهر انوب تبجين ناويه
تموتيني وبعز شبابي !!

رانيا.. افتهمت قصده بسرعه تشكرت منه
وطلعت مسحت دموعي شويه طمئنيت
مدام السبع وضرغام وياسين لازم يحلوهه

لكيت فجر كاعده ع الدرج كتلهه ماتشوفيلي
يرجعون ؟!
فجر.. منو كالج اني كشافه
رانيا.. فجر شوفيلي؟!

فجر.. مااكدغ اشوف لو شايفه جان
كتلج تغى موبكيفي هي تجيني حاله
واحساس...

رانيا.. خليت ايدي ع خدي وحايره شسوي
ثاني يوم راحوا من الصبح وكلبي نار للعصر
يله اجو ركضت تلكيتهم بالباب...

احاجي بياسين وادور عليهم ماكو يعني
ماقبل ينطيهم باسف حجاهه كال اولادج
مايردون عنده ضلع قوي وحته القاضي
منطي رشوه...

سحبتني ماما ليجوه واني مصدومه
هاهي بعد مااشوفهم التعب التعبته
عليهم راح واخذهم ع الحاظر لاربه ولاسهر
ع مرضهم...

محد كدرت تسكتني من كدما بجيت
حته ام جراح نزلت ع صوتي
ومحد اكو من الزلم كلهم طلعوا وينك
بابا تعال شوف حالي ؟!!

ظليت لليل اني ع فد بجيه والاكل مايفوت
ابحلكي يمكن ب١٠ تقريبا دك تليفوني وسام
ركضت شلته اريد افرغ عصبيتي وقهري بي

جان يكلي هااا ولج رنيوه ماينگدرلج عرفتي
تلعبيهه صح حته تكسبين الحضانه
كليلي منو المقدم العندج والساندج ونقل
دوامي باخر الدنيا وبأخطر منطقه!!!


يتبع....

#خبايا_الاقدار
❤️♨️♨️

... البارت الثاني والثلاثون


بس ويـاك أخـضّر
وأنعشگ وأنشم
و أذبل ويه غيرك ماصرت بستـان
أصيرن طـين و أتلثـم...
....

رانيا... شنو قصدك وين انقلت؟!
وسام.. يهمج وين؟! تعرفيني زين عشتي وياي سنتين وتعرفين بشغلي شكد مخلص صح عندي مساوىء بس بشغلي وعملي ع اتم وجه ومايوم طلعت عليه حجايه وحده ...

رانيا.. مااعرف عليمن تحجي شنو علاقتي بنقلك؟!
وسام.. اكو مقدم اعلى رتبه من عندي وهو رافع اسمي
للآمر مالتي الظاهر عنده واسطه ونقلوني ومن سألت
يا ام اولادي العزيزه كالو واحد من اقرباء عمتج ساهره
مقدم بالاستخبارات معقوله الصار صدفه؟!

رانيا.. وسام انت ابو اولادي ومااقبل يصيبك مكروه
بس لاتتهمني اني مالي علاقه هم اجوك وحجوا وياك
وانت حته كلمه ماعندك وعدتني ترجعهم وتالي حته كدام
الشيخ ماعندك كلمه

وسام... تريدين الحضانه؟! ارجعيلي رانيا غلطت وجربت
غيرج وعرفت قيمتج شنو ارجعي واوفرلج اي شي
اطلبي وامج وياج واحسنلج من الضيم مال عيال عمتج

رانيا.. انته السويته ماينسي من ارجعلك موتريد زوجه
تريدني ارجع وانت كل التشوفهه تروح تزوجهه بفلوسك
وتشمرهه وره ظهرك لو اتذكر خيانتك ع فراشي
ليش تحلل لنفسك ماحرمه الله انت زاني وزنيت ابيتي
وبغرفة نومي وهسه دكول غلطان..

الانسان اليغلط يتعلم من غلطه مو يكرره وره ماطلگتني
شسويت مورحت تزوجت وراهه ظليت تزوج بسر
وتشبع رغباتك وتعوفهه اني مااستاهل اعيش هيج
حياة ويه انسان مثلك كل همه رغبته ..

وسام.. هسه ماترجعين؟!
رانيا.. ابو طبع اسأل عن سلامته ماارجع ابد لتحاول
تلزمني باطفالي اني وياك وحقك وهم كبرو وبحاجه اب
بس اسألك وين جنت عنهم طول هاي السنوات

لو اني عايفتهم ورايحه متزوجه وراجعه عليهم
اطالب بيهم جان شكلت عني موكلت موكد المسؤؤليه
ومااستاهل اكون ام ؟!

هسه اني اكلك انت مو كد المسوؤليه وماتستاهل
تكون اب بس لان رجال بمجتمع مثل مجتمعنه يحللون
الكم ويحرمون للنساء...

وسام.. ايبااا رانيا صايره خوش تحجين
جنتي كلمتين ماتجمعين معقوله طلاگج قواج
وصرتي قويه؟

رانيا... لو ضعيفه جان ظليت قابل بخيانتك واشوف
واسمع واسكت مالك مكان ابگلبي ياوسام خليك
ابو اولادي وخلي الامور طيبه بيناتنه ورجعهم الي

وسام.. تحلمين اني كلبي طاك عليج صايره صاكه
جنتي زغيرونه هسه مره معدله ترجعين الي
تشوفين اولادج ماترجعين ظلي بالبصره وبالاحلام
ماتشوفيهم لاقاضي ولامحكمه توكف بوجهي..

رانيا.. تحجي صدك شوكت تصير ادمي عبالي
صدك انتبهت ع حالك طلعت راجع ازيد من بشاعه
قبل...

وسام.. يله يحلوه كدامج اسبوع فكري زين ورجعيلي
خبر لان الدعوه حركتهه وتعرفيني بين يوم وليله
اكسب الحضانه

رانيا.. سد التليفون بوجهي واني افور وانطفي
طلعت ابجي لماما ماعدهه حل عمه بس تهدي بيه
محد عنده حل وكلبي مفرفح ع اولادي..

خلصت هاي الليله بوسط دموعي وتشتت عقلي
بلحظه اضعف واكول من باجر ارجع علمود اولادي
ماعندي سند غيرهم ومن اسمع صوتهم يكولون
ضايجين نار وتشتعل بصدري...

ثاني يوم الظهر جنت اقره قران واجتي لبابه
كالت شيخ ياسين يصيحج لبست عبايه اسلاميه
ولفيت شالي وطلعت جانت ام اواب موجوده
وضرغام والسبع ...

سلمت وكعدت ماما تحجي نيابة عني وتناقش
واني الدمعه بطرف عيني بس يذكرون اسمهم
ابجي...

ياسين.. چاااا هسه الحل شنهي ياخذهم بالقانون
وبالعشاير مرجع الولد لأبوهم..

ام رانيا.. شيخ هو تركهم من طلبت الطلاق
رانيا هو كال مااريد الاطفال لان زغار ومااريد
مرت ابوهم تربيهم وهاي ٥ سنوات رغم هو خير
من الله مادفع ربع عليهم ...

هذا رضاوي تمرض بزغره وهي تجيب راتبهه
وتركض بي للاطباء ومن رفعنه دعوه علي
نداعي بالنفقه شسوه؟! دز دوريه شرطه ع المرحوم
واخذو للمركز يتفاهم وياه مااجانه للبيت مثل الناس..

گلبنه ملجوم من عنده وهسه يريد يرجعهه
هي موصغيره القرار الهه اذا تشوفه صح
خلي ترجع وتلم اطفالهه...

السبع.. حجيه هو كاسب الحضانه ترى من راح
يقارن القاضي بين حياتهه وحياة الاب ماعنده
نقص دوامه ببغداد وبيت ويكدر يوفرلهم حته مربيه...

رانيا.. ماارجع بس خلي يأجرلي قريب من اهله
واكعد هناك ويرجعهم الي وهم يجون يشوفوهم
رجعه ماارجعله ...

كلهه تحجي كل العنده رأي طرحه وضرغام
ساكت اخر شي شفت السبع التفت علي
راده يحجي وهو ساكت حرف واحد ماحجه ...

عفتهم وكمت افتر بالغرفه مااعرف شسوي
ارجع واذل نفسي واتحمل خيانته وبشاعته
لو اكعد واسكت وتصير شوفة اطفالي حسره
عليه ؟!

سمعت عقيق تحجي ويه عمه ساهره
وكالتلهه باجر انروح لبغداد رحت ع ماما كتلهه
خلي انروح هالاسبوع لبغداد بين ماتنحل المشكله
ع الاقل اولادي يمي

ماما ماقبلت بس شافت حالتي سكتت
راحت ماما حجت ويه السبع كالهه شلون
تظلون وحدكم رجعت عليه ماقابله وخايفه...

رحت للتليفون طلعت رقم وسام اول دكتين جاوب
كتله اريد اجي لبغداد اكعد وتنطيني الاولاد منا لمن
يحكم القاضي القرار الاخير

وسام.. تعالي منو لازمج؟!
رانيا.. تعرف بيتنه متروك صار هواي والوضع
بمنطقتنه موتمام انطيني الشقه اليم اهلك قريبه
اكعد بيهه مؤقتا بين ماتنحل..

وسام.. يعني ماترجعين ؟!
رانيا.. لاا من احلامك هاي انسه هاي السالفه
اولادي مااكدر اتركهم هاي الفتره خليهم يمي
وقريبين ع اهلك منا لمن تنحل...

وسام.. هاهي اجي اخذج باجر الشقه مالتي
فارغه تعالي اكعدي بيهه انتي وامج واهلي قريبين عليج
رانيا.. لاتجي مايحتاج اني اجي اني وامي...

سديته من عنده ورحت لماما شرحتلهه ماقبلت
على تصرفي بس مجبوره كلبي طاك ع اولادي
وماامن عليهم يم نسوان عمامهم وهن حته ماعرفهن
اتزوجن وره طلاقي...

ثاني يوم طلعنه ويه السبع ضرغام هدوء
حته ماشفته ولاخابر ولا سأل عن وضعنه
وصلنه السبع لحد وسام واخذنه للشقه
بس دخلت اختنكت شقة مرته الطلگهه بس
مجبوره اتحمل...

نص ساعه وجابلي اولادي احضن وابوس
بيهم عبالك صار سنه ماشايفتهم وهم يحجولي
شلون طلعوا ومشترين العاب هواي...

قفلنه الباب علينه وهو جابلنه مسواك كامل
وكال اذا احتاجيتوا شي انطوني خبر
المهم شفت اولادي والباقي ع الله...

عقيق... الشقه نفسهه كال مشتريهه من زمان
بمجمع سكني هو وضرغام وجراح جانو يجون
بيهه يظلون بس من صارت المشاكل بعد ماكدروا
يتركون القصر...

وصلنه الساعه ب٢ كال اسبحي وارتاحي فد ساعه
واجي حجزتلج عن الطبيب وهم نتعشه بره
بس نامي حته متعبين..

الطريق متعب سبحت ونمت ب٥ فتحت عيوني
ماكو السبع ماجاي سحبت التليفون خابرته كال
تحضري جاييج بالطريق ..

جانت سنه ٢٠٠٨ تقريبا شهر التاسع
الجو بي بروده لبست بنطرون وفوكا
شي لركبه بهاري خاف ابرد ولفيت الشال وكعدت
انتظره..

انفتح باب الشقه تلگيته ظل يباوع ع لبسي
مابي شي حته عريض لمس خدي بحنيه وكال
روحي البسي شي ينفتح بي دكم لان يسوولج
تخيط !!

رحت غيرته ولبست قميص طويل
ولبست جنطتي صفح وطلعنه
اول شي اخذني لطبيب نفس هوسه الفحوصات

الطبيب.. للأسف المراجعه السابقه حالتهه احسن
هنا مدهوره حالتهه وراجعه لنقطة الصفر
ليش هيج بابا ليش انتكست حالتهه؟!

باوعت ع السبع هو حجه بمكاني كاله
تعرضت للضروف صعبه اثرت ع حالتهه
النفسيه وحاولنه الالتزام بالعلاج

الطبيب.. راجع طبيب النمو شوف شيكول احتمال
يقلل العلاج الهه لان يأثر ع قلبهه علاج المقويات
اما علاجنه مال القلب راح اغيره الهه وتلتزمون بي..

العلاج غالي وموبكل الصيدليات موجود
حاول تاخذ كميه كافيه مده شهر حته خاف
متلكا ماتتاثر

السبع.. زين دكتور الى متى تظل ع العلاج
ماترهم عمليه او حته اذا علاج بالخارج

الطبيب.. احنه هسه لازم نقوي قلبهه حته
يكون مؤهل للعمليه اذا رجعت مثل قبل اشهر
من استجابت للعلاج نكدر نسويلهه عمليه
واكيد موبالعراق بالخارج ..

دنگ يكتب بالوصفه ويحجي رفع راسه وكال
ممنوع منعا باتا تتقربلهه حالتهه متسمح لاي جهد
اخذ حذر لا جماع ولا حمل لان اذا صار حمل اعتبر
خسرتهه...

السبع.. ان شاء الله بس هاي السنه قدمتلهه مدرسه
هم تاثر عليهه الدراسه لان جهد لو عادي..

الطبيب.. حاول تقلل جهد خلي وقت دراستهه بساعات
متفرقه وتاخذ استراحه خلي تبتعد عن التوتر مال
الامتحانات والخوف من المدرسات اشرح حالتهه
للمديره وتقاريرهه موجوده لازم تكون حاله استثنائيه..

عقيق.. تشكرنه منه وطلعنه اخذ العلاج ورجع
شوفه لطبيب علمنه ع الاوقات واكو علاجات وقت
الحاجه وكتبلي علاج لتوتر والقلق ومنوم بوقت
الحزن حته مااظل افكر..

صعدنه بالسياره كال وهسه وين انروح؟!
عقيق.. بكيفك
السبع.. انروح للمطعم نتعشه ونرجع للشقه
حته متعبين وباجر اطلعج نفتر...

عقيق.. رحنه للمطعم تعشينه وكعدنه شويه
سوالفنه عاديه ورجعنه للشقه دخل للحمام سبح
وطلع يصلي واني دخلت سحبت وصليت..

كاعده اضفر بشعري كدام الميز وهو
مدد ع الجربايه يتصفح بتليفونه
كملت وطلعت شريت الخاولي بره
ورجعت...

اشرلي سدي الباب وتعالي سديته ومشيت
بخطوات خجوله فتحلي ايده صرت بحضنه
حجه وهو يباوع بعيوني شعرج رطب
والجو بارد لاتتمرضين..

عقيق.. هسه اجففه ضفرته ماعبالي انام
السبع.. مانام تعبان من الطريق اريد امدد
عقيق..شكد راح انظل هنااا؟؟؟
السبع.. اسبوع ونرجع حته اسجلج بمدرسه اهليه

عقيق.. وحدي؟!
السبع..اي وحدج
عقيق.. والبنات لبابه وفجر
السبع.. يبقون بمدرستهم لان مدرستج متوسطه
ولبابه بالسادس ماترهم تبقه وحدهه

عقيق.. ويصير اداوم واني خارجي
السبع.. يصير بفلوسج هم المستفادين
عقيق.. خاف ماانجح
السبع.. ليش ماتنجحين صيري سباعيه
يمج البنات ورانيا وراح تتعرفين ع صديقات
وتحبين الدراسه..

عقيق.. ماكو خبر عن عمامي
السبع... اكووووو
عقيق... صدك؟! شنو وليش مكتلي؟!

السبع.. عمامج اثنين واحد بالسجن وواحد مسافر بسوريا
بس عمتج اخت ابوج بنفس منطقتكم واني موصي
هناك وجابو عنوانهه ومارحت لسه الهه ..

عقيق.. عمتي سميره هاي تحبني حيل وتحب
بابا جمره خاف تاخذني منك،؟!

السبع.. شتاخذ انتي مرتي شنو هي تايهه
اني اريد تلگيهم حته يكونون الج ذخر
بيوم الماموجود بي اني ماتظلين وحيده

عقيق.. وين تروح؟! انت موكلت مااعوفج
السبع.. طبعا مااعوفج بس امور دنيا محد ضامن
عمره لباجر وهمي الوحيد انتي..

عقيق.. شوكت نسوي عرس
السبع.. قصدج شوكت نلبس قاط حته
كلشي يصير مباح

عقيق.. موهسه اكو ناس ماتدري انت متزوج
السبع.. بعطله نصف السنه نعلن الزواج
بس مانسوي عرس اخذج ونروح لاربيل مواحسن
من هوستهم..

عقيق.. ايناس كالتلي السبع مايتزوجج
بس يلگه اهلج يعوفج
السبع.. خلي تولي ياسبع كدام عقيق
انسه منو انه كدام هاي الحلوه

عقيق.. رانيا كالتلي السبع يحبج
السبع... ااي وبعد
عقيق.. كالت اهتمي بي لان يحبج وانتي
مرته بالحلال

السبع.. الله ينطيهه رانيا ماكالتلج بعد شي
عقيق... كالت لاتخافين منه وهو ابد مايتخلى عنج
السبع.. من نرجع كليلهه رانيا اريد ادخل خصوصي
يمج عن الحياة الزوجيه يوميه اخذي محاضره يمهه

عقيق.. هي كالتلي السبع غريب شلون حبج
وانتي هيج حالتج ؟!
السبع.. ياحلوتي!!!! حبيت روحج
مو شكلج ووضعج...

اليوم الشفتج بي شفت فجر كدامي يتيمه
وحيده مالي نيه بسوء بكد الشعره
وعشتي شهر يمي بالشقه اساسا ماتجين ع بالي
ولا اركز بشكلج ...

بس كلشي عند رب العالمين بي صالح والله
يجازي العبد ع كد تعبه ويرزقه من حيث
لايحتسب خليني اسولفلج شلون اتيقنت
انتي هديه وتعويض رب العالمين ...

رفعني لصدره اكثر واباوعله وهو يحجي
ايدي ع كلبه دكاته منتظمه واني مركزه بكل
حرف يطلع من عنده...

السبع... هذا المشروع الجنت لازمه يم المستشفى
ويه وفاة ابوج خسرت خساره جبيره بي لاول مره
اشتغل ويه هذا المهندس لان السابق صديقي
مسافر ودزني ع هذا...

سحب الفلوس من المصرف يصير باسمي بحكم
عندي هويه مقاول وانه اسدد واتفق ويه المهندس
وانفذ سوه من سلمته الفلوس وع اساس مثل السابق
نكمل الشغل ع اتم وجه شسوه هو اخذ الفلوس
وماشفت شكله بعد هو وعماله...

تدرين الخساره جبيره بيومهه ضغطي
علك وسددت مني وبعت قطعه ارض يله
كدرت اكمل المشروع والمهندس فلت وضاع
طاريه...

من سولفلي واحد من العمال وكال هيج حادث
صار وبنته ظلت كال صغيره انه جنت ناوي اخذج
لمكان امين بيت بي ايتام بس من شفتج وحجالي
الطبيب انتي جبيره بس عدج خلل بالنمو ماكدرت
باعتبارج مراهقه...

تركت الموضوع ورجعت لشقه حته موبالي انتي
بس قهري ع الفلوس والخساره اول مره اتعرضلهه
استغفرت ربي وكلت العوض ع الله عوضني
ابدالهن عمل خير ...

غفيت بيومهه واشوف اختي الصغيره التوأم مالتي
تمشي ويه بنيه صغيره موانتي بس هيج نفس
الهيئه هم صغيره وتتوسلي اخذهه واني اكلهه
ماعندي مكان ..

طلعت من جيبهه خرزه جبيره لونهه براق بس
من كعدت ماتذكره شنو وانطتهه الي وكالت
هاي هديتك ابمكان افلوسك ..

كلشي بيد رب العالمين نسمع هواي عن حكمه
الله وعن تدبير اموره بس من نجرب النه تصير
طعم خاص جنت مسير كعدت من النوم ورجليه
وحدهن اخذني للمستشفى وطلبت اخذج وجنت
حته مامفكر وين اخليج وشلون اخذج للقصر...

من سألت ع اسمج حسيت واحد نزع كلبي
من مكانه عقيق!!!!! والخزره الي انطتهه الي
لونهه جان حلو حيل وفرحان بيهه بس ماتذكر
يالون...

اخذتج وحميتج واني مامفكر بالعواقب
ظليت ليالي اصلي وادعي الله يرسيني
ع بر ويدليني بحل اتخذه وياج..

ثقي بالله ياعقيق مافكرت وياج ابد لافكرت
شلون ارتبط بيج ؟ وشنو مصيرنه؟! مجرد
شتجي فكره براسي انفذهه ..

لان مخلي اموري ع الله واليسلم امره لرب
العباد مايخيب من يوم وفاة اهلي اني موكل
اموري لله وهو خير وكيل...

بمرور الايام كمت اشوفج تعويض عن خسارتي
موشرط التعويض يكون فلوس احتمال التعويض
ع هيئه بشر ونزرعت بذرة حبج بكلبي وبدت تكبر
يوم عن يوم...

مامجرب الحب ابد ولامتغزل بمره جنت غالق
ع نفسي بسبب ثاري اخاف احب ويلوون اذراعي
بيهه وصدك كدروا يلوون اذراعي بيج ..

عقيق.. احس كلامه لامس اصغر خليه احساس
بداخلي كل جوارحي بهتت وعيوني ظلت مركزه
ع كلامه ..

انتبه ع نظراتي سكت وظلت عينه تتنقل من عين
لعين ويبلع ريگه حسيت بدگات كلبه زادت اكثر
وهو ع نفس النظره ...

حجه بهدوء وهو ينزل جفوني بيده
ع عيوني وخلاني اغمض كال القرب
من عندج جهاد...

جاي اجاهد حته اكبح شهوات نفسي
وحته احافظ ع الهديه باتم وجه باليوم
الي اثبت زواجي بيج كون اسمع دكات كلبج
من الفرح مومن المرض...

ظليت مغمضه عيوني واسمع بكلامه
نزل نفسه وحضني اكثر ع كلامه
اليبعث الراحه بداخلي غفيت واني تاركه
كل الم وكل غصه عشتهه من صغري لحد
احتوائه الي...

ماادري شلون نمت هيج نومه ع جهه وحده
حته ممتحركه شعور مريح امان واطمئنان
لاتفكير ولاقلق مجرد ماافتح عيني واشوفه
كدامي...

ثاني يوم العصر هم طلعنه اتعشينه بالمطعم
وكال كومي نفتر شويه اني مااندل هو يمشي
ويندل محلات واني وراه ...

جان موسم مدارس كال اشتري اليعجبج
اخذت صدريتين وقميص عدد ٣ وجنطه
وبقيه الملابس مال بيت ورجعنه...

ظلينه اسبوع وباخر طلعه اشتريت
لفجر ولبابه كل وحده زي كامل ورجعنه
للبصره احس حالتي متحسنه اكثر رغم
يجي ابالي الصار بس اظل احجي ويه السبع
وانشغل بكلامه...

رانيا... خلصت الفتره ووسام بعده مصر
ع الحضانه ورفع دعوه وحدنه بالشقه اني
وماما وماشفت واحد من اهله اجه علينه
هو يجي من الباب ياخذ الاولاد ويروح...

بيومهه جنت ابجي وماما مخليه ايدهه
ع خدهه وصافنه اندك الباب كامت ماما صاحت
منو كال وسام اني والحجي فتحتله الباب ودخلو
صار هواي ماشايفه ابو سلمت وكعدت كارهه الساعه
الشفتهم بيهه..

كام يحجي بنفس المنوال وارجعي واني اتعهدلج
بي ردت اكله وين جنت من اجيت شكيتلج عمو
وسام يخوني كلت رجال والله محلله اربعه ماعاجبج
روحي لاهلج هسه صار ارجعي بس ماعندي
طاقه احجي..

جاوبته عمو سالفه الرجوع لاتحجون بيهه
ماارجع ابد وراح اشوف القاضي شيقرر
هاهي بس لواموت ماارجع لوسام الخان
مومره مرات وبعده ماتاب...

طلعوا وهم نفس تهديدهم ثاني يوم
التحق وسام وع نزلته المحكمه وظليت
بناري طول هاي المده...

وره ٥ ايام تقريبا اتصل وسام
بس فتحت خط كال اجيج من الاخير
المقدم اسمه ابو ليث تعرفي اكيد خلي يرجعني
لمكاني وانطيج الاولاد...

رانيا... شنووو ابو ليث ناقلك
وسام.. لازم ماتدرين اي عيني ابو ليث شامرني
يم الشمس كلشي ولا شغلي ورتبتي يا ام سيف..

رانيا... سديته منه وخابرت ضرغام مرتين ومارد
وره نص ساعه اتصل بس سأل شلونكم كتله
انت ناقل وسام؟!

ضرغام.. ليش اني وزير وماادري
رانيا.. ضرغااام كول الحقيقه انت مووو؟!
ضرغام.. شتردين؟!

رانيا.. بغض النظر عن كلشي يبقه ابو اطفالي
ومرجعهم اله بيوم من الايام مااريد انسان يتأذى
بسببي

ضرغام.. حنيتي؟!
رانيا... عصبت من كلامه شتحجي انت شنو حنيت
وبصفتك شنو حتلو اريد ارجع انفعلت حيل
منا اعصابي تلفانه وكلمته زرفت كلبي..

سمعته اخذ نفس وطگه الجداحه وكال هسه شتردين
لاتدخلين بشغلي اصلا اني داخليه وهو دفاع
شعليه وانقله ..

رانيا.. هدئت وكتله هسه خابرني كال اتنازل عن الاطفال
بس ارجع لمكاني لان عنده ترقيه والمكان خطر

ضرغام.. وشعليه اني قابلي الوزير وشرحيله
حالتج خلي يرجعه
رانيا... ابو ليث ؟!!

ضرغام.. لا ابو صخام ولاهم يحزنون
تريدين تردين تريدين تبقين انتي حره ومثل ماتفضلتي
اني بصفتي شنو وادخل..

رانيا.. موهيج الحجي انت الك ايد بنقلته
رجعه حته يرجعلي اطفالي انت منا وهو منا
كاااافي اني شنو ذنبي ياخذون اولادي مني ..

ضرغام.. الله كريم خلي يرجعهم واخذي
تعهد علي ويصير خير..

رانيا... سديته من عنده واني امسح بدموعي
من نزل وسام وره اسبوع صارت كعده بيت اهله
والشيخ ياسين والسبع موجود واتفقوا يتنازل
عنهم وسحب الدعوه لان بالحالتين يخسر الحضانه
لان اني قبلت اعيش ببغداد وهو دوامه خطر وراح
القاضي ياخذه بعين الاعتبار...

رجعنه لبغداد ويه الشيخ ياسين
واولادي ويايه شويه اخذت نفس
وارتاحيت بس ضرغام مايجي حته من يصير
موعد نزوله يظل ببغداد...

حاجيت السبع ع سالفه نقل وسام وكال
اني اخابر ضرغام وبعد ماادري شصار
سمعت عمه ساهره تساله ليش مايجي؟!

كالهه طالعه الدنيا من عينه حته يلزم
واجب بمكان جماعته مااكول بس خطيه
المجرمين الواكعه بيده..

جانت عقيق كاعده كالت اكو مجرمات
ويحقق وياهن ضرغام سألتهه شمدريج
كالت السبع سولفلي كال حته نسوان عليهن
تهم هو يحقق وياهن ...

اجه ابالي معقوله ضرغام ابو نسوان
ويظل ابغداد عنده شقه ويجيب بنات
تعوذت من الشيطان وكمت صاير كل تفكيري
بي ...

بليل اجه ياسين وجبار واواب وبعد زلم
مانعرفهم ومنا السبع وجراح وخاله
اباوع لبابه كاعده ع الدرج وقلقه ماتعرف
شتسوي..

نزلت ام جراح كالت راح ينحسم الموضوع
هسه السبع مصر ع جراح وراح دز عليهم
وجراح مايدري هسه تفاجئ ماعباله راح
يخلي امام الامر الواقع..

كدام هاي الناس ووجوه العشيره يحجي
لو يفسخ خطبته من بنت عمه ويتزوج نوال
لو ينطي كلمه لخاله هو راح ياخذ بنت عمه
ونوال تشوف حياتهه..

لزمت كتف لبابه وايدهه جانت ثلج
متوتره وخايفه حيل كلساع تغمض عيونهه
ودكول راح يختار بنت خاله ماكو داعي
للمشيه لايهين كرامتي كدام الكل ويكول
ماريدهه...

حاجيتهه اهدي لبابه لاتخافين جاوبتني
ودمعتهه وكعت ع خدهه ماخايفه بس
مااريد انصدم مااريد انهان كدام الزلم اني
موسلعه ويختارني لو يختار بنت خاله

لبابه.. اصواتهم عاليه ونقاش حاد
وخاله يصيح ضحكتوا عليه بنتي
الف واحد يتمناهه ماعدكم كلمه انتم
شيوخ لو شنو...

صوت السبع عالي وسكتهم كالهم
هو موصغير هو يحدد بنت عمه عقد عليهه
لحمايتهه بوقت انت رفضت تنطي بنتك
وجبار راح خطبهه بدون علمه يعني مو الذنب
منه منك انت شلون تنطي بدون متحجي وياه
وشنو التغير وقبلت تنطيهه وهو سنتين يخطبهه
منك وماتقبل؟!

صارت هوسه هذا يحجي وذاك يكول
فلان غلط بس اجت كلمات السبع بأذاني
حسيت راح تصير عندي حالة اغماء وهو يكله
حدد موقفك جراح لو اطلگ بنت عمك
لو تزوجهه بهذا الشهر؟! والكل سكت ينتظر
جواب جراح!!!!

.
.
.

يتبع....

#خبايا_الاقدار
♨️♨️♨️

... البارت الثالث والثلاثون



لبابه.. ماحبيت الموقف ابد احساس بشع حيل
مسيطر عليه اني موسلعه وتنعرض ويختارني
لو يختار بنت خاله ؟!

اني مارحتله ولادكيت بابه وطلبت منه يخطبني
هو دگ صدره حاله من حال السبع من حمه اخته ابرار
بس الفرق اكو انسان حقاني بكلشي واكو ماتهمه غير
نفسه وسعادته..

رانيا تحجي ويايه وتهدي بيه تريدني مااهتم وماما
متملكهه اليأس مخليه ايدهه ع خدهه وصافنه عليه
اعرف تفكيرهه تتمنى لوتكدر تدخل بنصهم ودكلهم
ماانطي بنتي بس تخاف من العواقب...

دنگت راسي واني اسمع صوت جراح وهو يحجي
بتعب كال الحب موحرام وكل انسان بداخله فطره
انه حبيت بنت خالي وطلبتهه ع سنة الله ورسوله
انت خالي شاهد شكم مره دكيت بابك وطردتني؟

كلما ادز امي ودزيت الشيخ جبار وحته وسطت
غير ناس ماقبلت كلت بنتي تدرس وماازوجهه
وحته اذا فكرت ازوجهه ماانطيهه الك لان حياتكم
مامناسبه الهه..

اجيتك بنفسي وكدامك وكدام امهه وكتلك خالي
بنتك من هاللحظه راح تكون مثل ابرار اني صح حبيتهه
بس قسمه ماكو بيناتنه حاولت وياك بالف طريق
وماقبلت وجنت كل مره تطردني وحته امي طردتهه
من بيتك وظلت اشهر تتوسل بيك لان ماعدهه اخ
غيرك..

انه بديت حياة ثانيه صح عقدت ع بنت عمي
لحمايتهه وماردت اشغل بالهه بامور زواج لان
صغيره بس حالي حال كل رجال خطب وحب
خطيبته ويفكر يكون عائله وياهه..

انه كدام الكل اكول الخطبه مال بنت خالي غلط
صارت بدون علمي واني ناهي كلشي وياهه ويه
اهلهه انت انطيتهه بدون ماتسالني رايدهه بعدني لولا؟!

ماافضل وحده ع وحده بس قسمه بيني
وبين بنت خالي ماكو وانه قبل لا يصير
الحادث وياي بنيت البيت وناوي اتزوج بنت عمي
واستقر..

ابو نوال.. شتحجي انت عندك بنات العالم لعبه ذبحت
روحك ع بنتي وهسه تكسر بختهه وتعوفهه

جراح.. حجه بعصبيه لادكول كسرت بختهه انت سبب خطيتهه
انه طلبتهه منك وماقبلت وكتلك خالي هذا الموضوع
سده لان راح اخطب واستقر كتلي الله وياك

من اجاك الشيخ وخطبهه ماكلت هو خاطب بنت
عمه شلون تقبلهه تنطي لواحد خاطب هو لعب
لو هسه صار جراح خوش ولد وتريد تنطي

ابو نوال.. لاتعلي صوتك عليه موحطيتلك نجمه
وشخت براسي سنين اختك تاكل من خيري
وانت شلون جازيتني بكسران بخت بنتي

جراح.. كام وكف بصياح لاخلفة الله عليك
اختي تاكل وتشرب من فلوسي حته مسواك
تشاركك بالشهر عيرتهه بيمن بلگمة الخبز لو بكلاص
المي ؟!

السبع.. جراح ع كيفك جاي نتفاهم مونتعارك
جراح.. ماعندي تفاهم وياه موخالي انه مااريده ماعندي
خال ولا عندي عم لاشيخ ولا غيره عوفوني
بحالي اقرر حياتي باليعجبني اتزوج الي اريدهه
مو اليجبرني عليهه فلان وفلتان..

بنتك حبيتهه وماانطيتهه مشكلتك روح دبر
نسيب غيري الشيخ يتحمل المسوؤليه هو طلبهه
منك وخدعك اعناد بيه انت وياه تجازون

الشيخ.. والله وصارلك السان يجراح وكمت
تشمر بحجيك بدون ماتوازنه وعليمن ع الشيخ
جبار وع خالك الوحيد احزام ظهرك

جراح... كتلك ماعندي احزام اذا عندي فهو السبع
وضرغام اما انت عثره بطريقي وخالي سبب
دماري ودمار امي !!

مره مااريد من خالي لا عاقد عليهه ولا مواعدهه
جيبهه هنا وسألهه اتحداهه تحجي كلمه وحده
ودكول اني مواعدهه مثل ابوهه جذبت الجذبه وصدكتهه

من الاساس كتلهه مابيناتنه زواج زواجي بس من
بنت عمي وهي تروح ويه ابوهه مو قبل كالت
امري بيد ابوي هاهي يدبرلهه نسيب يليق بمقامه..

ياسين.. جراح انت الهادىء رغم صغر عمرك وانكول
احسنهم وموعصبي شجاك يابويه جايين نحلهه
لو نأزمهه ع كيفك اعصابك

جراح.. شيخ ياسين ماعندي كلام اعيده
بنت خالي ماخطبتهه خطبهه عمي وبدون علمي
ماضحكت عليهه ولالعبت بمشاعرهه اجيتهه من الباب
وطلبتهه هواي وابوهه يعيرني بوضعي ويطردني
وهم ارجع مره ثانيه ..

انه من يوم الرفض ابوهه اخر مره نهيت كلشي
وياهه ويه عائلتهه حته بيتهم ماوصلتله وتدري
هي انه رايد بنت عمي وحاب استقر واكون عائله
وهي تروح بحال سبيلهه..

ابو نوال.. كام وكف وحجه بعصبيه راح تدفع الثمن
غالي يجراح اذا ماخليك تبوس ادين حته ارضه
عليك هاي شواربي موعليه .

جراح.. اطلعوا من بيتي خالي وعمي الشيخ
مااريد اشوف وجوهكم طكت روحي منكم
طلعوا احسن ما ابتلي بيكم بهالليل..

فقد اعصابه جراح دفعه السبع طلعه من الاستقبال
والخطار ينتقد ويحجي وهو بعصبيه لاول مره
انشوفه بيهه يريد يتعارك ويريد يفرغ البداخله..

طلعوا كلهم وظل الشيخ ياسين انباوعله
من الشباك يهدي بجراح وهو نار ومشتعل
متغير حيل موذاك الانسان الهادىء اليتعامل
بهدوئه وعقله هسه بس عصبيته غالبه علي..

لبابه ...راح الشيخ ياسين وظل بس هو والسبع بره
اني ع وضعي وع كعدتي مااعرف اختارني ليش
ومعقوله مايحبهه والشفته بعينه وهو يحضنهه؟!

سكتت ماانطيت اي ردة فعل رغم كلهه تحجي
وهو صعد فوك بس اني اكتفيت بالصمت
لا حجيت ويه ماما ولا ويه رانيا منتظره
يكعدون واحجي...

ثاني يوم العصر اجه ضرغام الوحيد ضرغام يروح
للقصر لان ملابسه وغراضه هناك حته يسبح ويجي
ماعنده غرفه يمنه من يجي ينام بالاستقبال..

بيومهه تعشينه من وقت ماما كالت يريدون يكعدون
نتفاهم بموضوعج اجه الشيخ ياسين وام اواب
وكلنه كعدنه بالاستقبال من طبيت اجه جراح بوجهي...

كاعد بتوتر يهز برجله وايده يفتح ويسد بيهه
عبالك كاعد ع اعصابه هاي العصبيه والنرفزه
منيله ابد ماجان هيج..

حجه ياسين بايات قرانيه وبنصائح وحكم
وفتح موضوعنه وكال موضوع نوال انتهى انريد
نعالج موضوع لبابه ..

جراح.. شبي موضوع لبابه اجهز الغرفه وقبل المدارس
نتزوج ماكو داعي نحجي بي..

السبع.. شبيك انت تخبلت انطينه فكه
نحجي نتفاهم هوالحجي بس الك

جراح... شتحجون مسويهه سالفه موعاقدين
احنه مواتفقنه اذا اختاريت لبابه شهر ونتزوج
هاهي شهر واتزوج بعد عليمن هالحجي

ضرغام.. وشنو الحجي ناخذه من شور راسك
لو لان رجال لازم تقرر وعليهه تنفذ اسمع ولك
جراح اضبط اعصابك وخلي نفتهم موقف البنيه
ماتريدك شلون نجبرهه والله حضرت جنابك رايد؟

جراح.. شنو ماتريد نلعب احنه تريد وغصبا عليهه
ضرغام.. ماكو غصبآ عليهه انت تسمع وتنفذ غصبا
عليك عدهه ام ولي امرهه وهي تقرر حياتهه ..

السبع.. لزم رجل جراح ويطبطب عليهه يريده
يهدء موطبيعي هالانسان حته مايرفع عينه
بوجه احد عيونه مشتته من العصبيه..

ساهره.. ابني جراح والنعم منك ماقصرت بكلشي
حميتهه وخليتهه تكمل دراستهه واني قبل حجيت
وياك وكتلك احارب وانضرب وانذل علمودهن هي وفجر
ماعندي بس هن بهاي الدنيا

كل ام تطمح لبتهه بحياة سعيده قبل نهيت كلشي
وكتلك بنتي ماتنزل ع ضره وهسه هم اعيدهه كدام
الكاعدين اذا بيوم مفكر ترجع لبنت خالك اختصر
هالطريق وخليهه تكمل حياتهه مااقبل بكسران بنتي ..

ام جراح.. خيه شوفي شلون عصبي موضوع نوال
انتهه وهسه بنتج هي بنيتنه وجنتي وفرحة
ابني لاتصعبوهه علينه..

لبابه.. اسمع نقاشهم اريد احجي بس محد
منطيني مجال رفعت راسي ع ضرغام
شفته يباوعلي اشرتله اريد احجي هز راسه
بين ماكملت كلامهه ام جراح كال لبابه احجي
انطينه رأيج..

لبابه.. قويت حالي بعد تفكير ليله كامله ماغمضت عيني
منظره وهو يحضنهه مايروح من بالي قارنت بينه وبين
السبع هواي ايناس هم تحب السبع وماينطيهه مجال ابد
وجراح بحجه مااكسر خاطرهه ضمهه لصدره..

لبابه.. عليت صوتي وكلت اني مااريد اتزوج
ويه حجايتي رفع راسه عليه بخزره مااهتميت خليت
عيني ع ضرغام الوحيد احسه يفهمني ويساعدني..

ياسين.. ليش بويه چااا مو خطيبته ومتفقين ع عرس
شتغير هسه؟!
لبابه.. اني مااقبل اكون مجرد بديل وقت الحاجه
جراح يحب بنت خاله اني مسامحته خلي يتزوجهه
اني اريد اكمل دراستي ..

جراح.. سدي حلكج !!! مالي خلك حجي زايد
شهر كدامج ويصير الزواج عجبج ماعجبج مجبره
تنفذين كلامي..

لبابه.. وسط ذهول الكل كلهه صافنه حته امه والسبع
ع طريقه كلامه يشمر بكلامه تشمر ومايحسب احساب
لاحد..

ضرغام.. لابروح ابوك؟! تحجي صدك انت منو كالك
ماعدهه ظهر جاينه متخبل وفوكاهه تأمر وعلينه
انفذ محد كالك دخل بروحك بهيج سالفه عوجه
مثلك..

جراح.. انت لاتتدخل....
ضرغام.. ادخل وغصبا عليك ماعجبك اركع راسك بحايط
متنرفز حضرت جنابك ع بنت خالك روح انگلع
اتزوجهه وخلصنه كل العنده سالفه يفرغهه براس هالبنات

السبع.. والله العظيم اذا ماسكتوا ابتلي بيكم
اثنينكم واحد متحمل ع الثاني عدكم عداوه
انت جراح شنو هالحجي الماصخ شنو جبر شنو غصب

لبابه من مسوؤليتي تخطبهه مني وانت الممنون
شبيك بويه تسودنت نكلك الزم اعصابك لو فرغهه
بينه ...

جراح.. ماسمعتهه شتحجي وضرغام واكف بصفهه
السبع.. موبس ضرغام حته انه اوكف لان انت مدري
شبيك البنيه تكلك مااقبل غير نفتهم اسبابهه ..

لبابه.. اسبابي واضحه هاي كدامك شلون اعيش وياه
وهو حته احترام ماعنده ابدال ميسمعني يجبرني
موعبالك يتيمه وماعندي احد ولازم اتزوج ابن عمي
والله مستعده اسوي الماتتوقعه وماتجبرني ع شي..

جراح.. چااا خوش كدام الشيخ ياسين وكدامك
يالسبع مدامك ولي امرهه صرت انه ناهي ع لبابه
واليوصل يمهه لوبعد عشر اسنين اكسر رجليه

ضرغام.. اني راح اكوم اكسر راسك ارعن
شو كوم ودفعه ليبره وطلعه والسبع يفرك
بوجهه وياسين صافن علينه..

ياسين.. انطوا عذره ترى نفسيته تعبانه ع كيفكم
جراح كلنه نعرفه صاحب مواقف وهذا كلامه مومن
كلبه ابد بس عصبي ومتأذي من خاله..

السبع.. لبابه احجي وياي انتي ماتحبين
جراح لو شنو السالفه
لبابه.. مااريده!!
السبع.. السبب!!؟
لبابه.. متشوفه شلون يتهجم شلون اكمل عمر كامل
وياه وهو هيج ..

السبع.. يله ابو اواب وكام وكف خلونه نحجي ونتفاهم
وياه وبعدين نسولف لبابه فكري زين جراح
رايدج ولورايد بنت خاله محد كدر يمنعه..

لبابه.. كلهم طلعوا وصار اللوم عليه منا عمه زينب
ومنا ماما بس اني مااقبل بهيج موضوع ماجاي
انسه شلون حضنهه مال واحد مشتاق ومتلهف عليهه..

مددت بفراشي واني راسي مشوش من التفكير
السنه اني سادس واحس مستقبلي راح يضيع
لان مااكدر حته افكر بمستقبلي وبدراستي من كدما
مفكره بجراح ومصيري وياه..

رانيا مخليه ابنهه بحضنهه تنوم بي كعدت ع حيلي
كتلهه ليش مانايمه ابنج غفه؟!
رانيا.. كل واحد همه لون يالبابه لا الصغير المرتاح
ولا الجبير مرتاح شوفي عمرج شكده وتفكرين
وسالبه راحتج اذا ابدايه عمرج وهيج بعد شكم
سنه شلون بيج؟!

لبابه.. املي بالله جبير هو مايضيعني ويدليني
ع الدرب الصحيح احجيلي شبيج مهمومه ويوميه
ماتنامين..

رانيا.. افكر ارجع لوسام!!
لبابه.. عززه ليش مو ماتريدي
رانيا.. مااكدر افارك اولادي وبنفس الوقت مااكدر
اربيهم وحدي كبروا واني ماعندي لابيت ولاسند
من يكبرون منو الهم؟!

لبابه.. احجي وياج بصراحه اذا خطبج ضرغام
توافقين؟!
رانيا.. جريت حسره شكبرهه وكتلهه لاااا..

لبابه.. ليش اني حاسه بيج عندج مشاعر اتجاهه
رانيا.. بس اقبل بي ياخذون اولادي صح راح يخلوني
اشوفهم يجوز كل اسبوع بس مااكدر افاركهم
مااكدر ابني سعادتي ع تشتتهم ..

وسام موكد المسوؤليه صح كريم ويصرف
وماراح يخليهم بحاجه شي بس ماراح يربي
راح ينطيهم لاهله لو يجيبلهم مرت ابو وشلون
تغمض عيني واني سعيده وهم من ايد لايد..

لبابه.. لاتيأسين احتمال ماياخذهم منج
رانيا.. مااريد افكر بشي لان تعبت حيل
حته صرت اكره الليل من كدما افكر ...

لبابه.. غطت نفسهه هي واولادهه ونامت
شكد موجع الليل كل الذكريات والافكار تتراكم
وتلزم سره بي ونبدي بيهن فكره فكره لحدما
نتعب ومانوصل لنتيجه...

عقيق.. شبيك ضايج ع جراح؟
السبع.. جراح حالته النفسيه زفت وجيب اليفتهمه
هذا راح تعكس ع حياته الشخصيه

عقيق.. لبابه مقهوره؟
السبع.. حقهه عدهه تشتت بافكارهه المفروض
يحتويهه مو يعصب عليهه..

عقيق.. جنت واكفه يم الميز وهو مدد
خليت مرطب لاديه واجيت مددت بصفه
خله ايده جوه راسي وسحبني لصدره
حاوطت خصره باديه...

السبع.. اخذتي دواج؟
عقيق.. اي
السبع.. الاثار ماخفت ؟
عقيق.. هزيت راسي لااا
السبع.. تروح تروح!!

عقيق.. شوكت تسجلني بالمدرسه؟
السبع..باجر اخذ ام شهد ونروح نشرح حالتج
ونشوف شلون مالون
عقيق.. ليش متجيب غراضك هنا بعد شكو بالقصر؟

السبع.. جنت منتظر ضرغام يقرر وهذا ماتحصل
منه قرار اشترينه القطعه البصفنه هاي وراح نبدي
من هالاسبوع نبني مشتملات واحد الي واحد لضرغام
وجراح هذا البيت..

عقيق.. اني مااريد اكعد وحدي اريد يم فجر
السبع.. هو نهارج كله يم فجر وراح نبقه بالاكل سوه
بس انريد نرتاح ومحد يتقيد ضرغام متبهذل

عقيق.. هو ليش مايتزوج؟
السبع.. شمدريني حجينه ومافاد شمنتظر ماادري
بهاي الاشهر لاحظته هواي كل اسبوع هو بالنجف
يبات ويجي ماجاي ينسه بحاله صراع بين گلبه
وبين عقله...

عقيق.. محد مرتاح كلهه مهمومه حته انت
مامرتاح
السبع.. راحتي وياج من افوت هاي الغرفه كلشي
اعوفه بره اريد اختلي بيج

عقيق.. اني بالنهار اظل افكر شسوي من تجي كومه
حجي يصير عندي بس من تجي انساه كله

السبع... وين مسولفه مخلصتهه تحقيق وياي
سؤال جواب احجي البداخلج مثل مامتفقين
عقيق.. اني مااضم شي عليك بس انسه السالفه
افرح من اشوفك..

اندار عليه وضمني لحضنه حيل وباسني من خدودي
ومد ايده طفه الضوه كال تعبان اريد انام وانتي
هم لاتتحركين خلي انام ...

بسرعه غفه واني ظليت اباوعله اشوف ملامحه
باهته عاكس الضوه من جوه البابه شويه يبين
مااعرف اوصفه بكلمات بس كل الي اكدر اكوله
هو امي وابوي وعائلتي الفقدتهه وحته صحتي
الي اداري بيهه...

كعدت الصبح ماموجود هو يطلع من وقت لميت
شعري وكمت غسلت لكيت البنات بالمطبخ
خاله ساهره رايحه للمدرسه ويه السبع
صبيت حليب وكعدت اشرب..

فجر.. اني ضايجه
لبابه.. كلنه ضايجين
فجر.. ماياخذونه سفغه( سفره)
لبابه.. منو ميت علينه؟!

فجر.. غانيا غوحي لضغغام كليله
ضايجه وهو ياخذنه
رانيا.. بلسانج المكسور وليش اني
ماتولين انتي..

فجر.. منو يسمعني انتي غاليه والطلب
غخيص ..
رانيا.. الصمي تردين انتي روحي
فجر.. هسه يجي السبع واكله وانتن ظلن
نوحن

اجه السبع العصر تلكته من الباب بطلباتهه
ضايجين وانريد نطلع قبل المدارس كال
الشيخ ياسين عنده منطقه قريبه ع الشط مساحتهه
صغيره من البستان معتني بيهه حيل حلوه
اخذكم الهه...

لبابه.. حددنه موعد وخابرتنه ام اواب كالت
راح نروح قبلكم اخذنه ويانه شغلات بسيطه
لان هناك كالو نشوي سمج ودجاج ...

هاي اول طلعه النه داخل القريه ونفتر براحتنه
السبع اخذنه ولگينه ام اواب والحجيه ام ياسين
وذبنه وراح كال بعدين اجيكم..

جراح ماشفته صار شكم يوم كالو ببغداد
يراجع ع دوامه الشيخ ياسين هو وام اواب
شعلوا نار وعدهم منقله وماما تساعدهم
وريحه الشوي انتشرت بالجو ..

المنطقه حيل حلوه كلهه عشب اخضر واشجارهه
حلوه مرتبه رغم عاليه بس مرتبيهه اكو نهر صغير
يسمو الساگيه كلساع نغسل وحده تشمر مي ع الثانيه..

من صار موعد الغده ظلينه ننتظر والشيخ يخابر
عليهم اجو السبع واواب وضرغام وفرشنه سفره
جبيره هاي اول مره كلهه تجتمع بكعده وحده..

ناكل ونسولف ومانحس غير رانيا شهكت
وغصت بعظم سمج اندك ع ظهرهه مختنكه
عيونهه حمر وماتكدر تتنفس..

كامت تركض للمي تغسل وخاله تضرب ع ظهرهه
فايت ابلعومهه بالعرض تالي الحجيه صاحت ميلن عنهه
لزمتهه من فكهه ومدت اصبعهه وطلعته

ماادري شلون التفتت شفت ضرغام يباوع عليهه
وتارك الاكل ماكمل وهي ماكملت كعدت بعيد
عنه ..

كملنه صبينه جاي ولمينه السفره والمواعين
فارشين افراش وكل واحد اخذله جهه
السبع جان طابگ المخده ومرتجي يحجي
ويه ياسين..

وضرغام كام لجهه الشط يمشي وايده ليوره
بس نار جكارته يدل ع نار كلبه..

اثناء الحديث ذكرت ام اواب راح يسوون عشه
بمناسبه عياده اواب الجديده سألتهه ماما هو تخرج
موكلتي يدرس؟!

ام اواب.. صار سنتين من اتخرج بس درس مدري
شيسموهه وهسه خلص والعياده مشتركه هو وصديقه
لان متخرج قبله يكول احسن ماانتظر عاد امارس
عملي..

ساهره.. وين هنا لو بغداد؟
ام اواب.. لاهنا يفتح طگ كلبي كافي بغداد
حته دوامه هنا هذني السنتين وخلصن

ساهره.. يله زوجي يرادلج جنه وياج
ام اواب.. يوم عيد كلما افتح موضوع يسده
يكول موهسه مدري شلون قرر يتزوج وهسه بطل..

لبابه..عفناهن يسولفن وكمنه نتمشه ونشتم هوه
نقي وصلنه قريب الشط جان ضرغام واكف وصافن
بالفراغ شكد يفكر وهاي الجكاره ماتوكع ابد..

التفت علينه سمع صوت ابن رانيا
كال لاتتقربن لايوكع واحد من الجهال بس عينه
ع رانيا سحبتنه فجر وهي تصيح تعالن نشوف هاي الجهه

التفتت شفتهم واكفين وواحد يباوع لثاني
رانيا كلساع ادنك وترجع ترفع راسهه بخجل..

ضرغام.. شلونه بلعومج؟
رانيا.. زين
ضرغام.. مبينه مامرتاحه ولونج مخطوف
رانيا.. الصار موشويه
ضرغام.. موخلصت؟

رانيا.. شخلص هم مده ويرجع من جديد
رجع لشغله لو بعدك مارجعته؟!
ضرغام.. محسستني اني الوزير بويه شبليتيني

رانيا...يعني تقنعني مالك علاقه بنقله
ضرغام.. اعرف الآمر مالته شو بس كتله نقله
هو يريد حجه علي اني مااطب طبت شر

رانيا.. شكرا ع مواقفك والله ماانساهن ابد
ضرغام.. شسويت ؟! واجبي هذا بس !!!!!!

رانيا.. بس شنو؟
ضرغام.. تكدرين نتمشه شويه اريد احجي
وياج
رانيا.. ليش احجي هنا
ضرغام.. كدامي ياسين فشله تعالي هنا وابتعد شويه
وكفنه يم شجره ..

شوفي رانيااااا اني مااعرف اصبغ بالحجي
ولا اعرف شلون اعبر المهم اني اريد اتقدملج
توافقين؟؟؟؟

رانيا... ارمش بعيونه معدتي مغصتني
كلبي احسه انزع مني عيوني تريد تطلع من
مكانهه .. اذاني مامستوعبه السمعته..

ضرغام.. لاترمشين ولاتفتحين حلكج
هيج ..

رانيا.. اريد اكله فاجأتني اريد ابيع ثكل
بس كتله انت وغصيت ولزمتني الكحه واكح
واكح دايره وجهي وايدي ع حلكي واكح

يريد يمد ايده يطبطب ع ظهري ويبطل
يكورهه ويرجعهه ليوره يحجي وياي
واني لزكت الكحه..

راح جابلي بطل مي اخذت نفس اريد استوعب
كلامه هو هيج اليحجي كتهن كت لااذاني ولا عقلي
استوعب...

اخذت البطل شربت واني دايره وجهي
لومافشله اشيلهه ركضه للشارع
سديت البطل وظليت مدنگه ..

ضرغام.. يمعوده بعدني بسطرين ماحجينه
وغصيتي لعد لو متغزل بيج شسوين؟

رانيا.. مارديت احس خدودي جمر
كتله ابو ليث تعرف بضروفي ماكو
داعي اشرحلك

ضرغام.. جاي احجي وياج تقبلين لولا
عوفيني من ضروفج عود نحلهه

رانيا.. شنو هالاحراج غير ينطيني وقت
خوما اكله اي موافقه ساد الطريق عليه
واني مدنگه حجيت بصوت خافت خليني افوت

ضرغام.. سوالي طريق فوتي بس ماكو داعي
تفكرين ترى الكدامج مو ابن اليوم حسمي الموضوع
وبليل اريد جوابج

رانيا.. ماكدرت احجي ابد الساني انبلع
درت وجهي وامشي سريع رجعت يم ماما
واحس كلبي يدك باذاني اريد ارفع راسي
احس كلهه درت ..

لبابه... رانيا يمكن رجعت جهالهه ويانه
واني وفجر وعقيق نتمشه الشط حلو
حيل فجر ماتكعد راحه كلساع تتقرب ودكول
كون انزل..

حافه الشط تصير رطبه حيل وبيهه طين حته
خفت اوصلهه لازمه الجهال وواكفه وفجر
تكمز كلساع اصيح عليهه ماتكعد..

مانحسهه غير تزلگ رجلهه والله ستر ماوكعت
بالشط وكعت بالطين ملابسهه واديهه انترست
ورجعت ذبت الصوج بينه وتتعارك..

الله ذب الضحك علينه ع منظرهه كلهه
طين وماتعرف شلون تغسل وشلون ترجع
بهذا وضعهه رجعنه بنفس طريقنه نضحك
وجهال رانيا مسويهه زفه..

قريب مانوصل تلكانه اواب جان يخابر من شافنه
ظل واكف وصافن ع فجر منظرهه فضيع
اديهه ورجليهه وملابسهه متروسه طين..

فتنه من يمه وجهال رانيا يگرگون حجي
عمو خطيه فجر وكعت .. عمو كلهه طين
وفجر عيونهه بگصتهه..

بطبيعته اواب هادىء حجه ع كيفه تعالي
غسلي هنا واشرلهه ع الساگيه ساكته فجر راحت
دنكت تغسل واحنه وياهه وهو واكف يباوع علينه

خففت من الطين ورجعنه رزلتهه ماما وهي
ساكته عبالك السانهه انبلع حسيتهه موطبيعيه
مثل الحركه التجيهه ماادري عيونهه مو ويانه
بس تسمعنه...

للمغرب اجو السبع وضرغام ورجعنه حيل تونسنه
بيومهه وفجر اذا الحايط حجه هي حجت
قبل لانوصل لاواب جانت ترزل بينه بس من وصلنه
سكتت ولاحرف ظلت يومين هي ساكته...

اما موضوعي ويه جراح محد فتحه السبع بلش
بناء والكل ملتهي وجراح ابغداد وعمه زينب
ماتروح لاخوهه لان زعل ...

بده العام الدراسي اني صف سادس وفجر
ثالث ورانيا ويانه اماعقيق بمدرسه اهليه
يوصلهه السبع ومرات تروح ويانه..

نطلع كلنه من البيت بدوام واحد كله صباحي
نرجع كل وحده ع دراستهه اني المواد صعبه
وقليل دورات تقويه وبعيده عليهم مرات اخلي
الكتاب واكوم ابجي...

رانيا.. مارجعت جواب لضرغام سولفت لماما
جانت مرحبه بالموضوع بس اولادي ماكدرت
بسببهم وخاصه بهيج وضع طالعه من مشكله جديده

هو مافتح موضوع كال اريد جواب بليل بس
ماتصل مانتصادم ابد اني وياه كل اوقاتهم ويه العمال
واحنه دوام حياتنه روتين وماشيه...

عقيق.. يوميه ارجع اقره وحدي الي اعرفه
والماعرفه رانيا تساعدني لو لبابه كل وقتي
بالغرفه ويمي فجر نقره سوه ونحل تمارين
لو تسمعني واسمعلهه..

دخل السبع كامت فجر طلعت واني فارشه
الكتب ع الجربايه شمر نفسه بصفي رجليه
بالكاع وراسه بصفي كال شتسوي الحلوه؟!

عقيق.. اقره عندي امتحان وفجر هم عدهه
وقرينه سوه
السبع.. كملتي؟!
عقيق.. بعدلي شويه
السبع.. راح اسبح بين ماتكملين

عقيق.. راح للحمام واني كملت قرايه وجمعت
كتبي ورتبت الجربايه ومددت اجه يفرك بشعره
ويدندن بكلمات مافهمت منهه شي بس اتذكر
ياذيب ليش تعوي حالك مثل حالي بس بصوت
ناصي ...

شافني اباوعله ابتسم بالمرايه اجه يمي
رفع الغطه واخذني بحضنه سألني مثل كل
يوم اخذتي دواج؟ جوعانه؟ خليتي دهن؟
خوماتعبانه؟

مايدري بشوفته كل تعبي يروح
واحس نفسي انسانه طبيعيه مابيه
اي مرض..

دك المنبه ب٧ هو نايم اليوم ماعنده شغل
كمت غسلت ورجعت لكيته كاعد كتله صباح
الخير رد عليه وهو مرتجي ع الجربايه ..

ع السريع طلعت ملابسي ركضت بدلت بالحمام
ورجعت لابسه صدريه رصاصي وقميص ابيض
زي المدرسه هيج

مدنگه ع الجنطه مخليتهه ع الميز وما احس
غير اديه التفت ع خصري وباسني من رگبتي
بحنيه قشعر جسمي من لحيته ميلت راسي
باسني بعد اكثر ..

دفعته لااا السبع شدتسوي بس وضعي
احسه بده يستجيب لمساته مااريده يوخر
مشدد اديه ع خصري اكثر ومايوخر راسه
عبالك غفه ع ركبتي..

ابتعد وهو يفرني كدامه كرصني من خدي
وطلع لان خاله ساهره صاحته علمود العمال
كملت كلشي واجه الخط طلعنه تلكاني بالباب
انطاني مصروفي وراح...

يوميه من اكمل دوام اظل انتظر البنات
يجن عليه بالخط هن ورانيا صعدت
ونتناقش اني وفجر بالحل عندي اخطاء
محد يحاسبني لان خارجي بس اريد اكون
حالي حال البنات...

وصلنه للباب من نزلنه ضرغام واكف
اشر فوتن جوه ام سيف اوكفي
دخلنه وظلت رانيا واكفه تباوع علي..

رانيا.. كلبي لزمني مدري ليش ونظره ضرغام
تخوف حجيت مرتبكه صاير شي؟!

ماحجه ظل صافن بوجهي رمش عيونه
وكال امسحي حلكج!!

خجلت مااعرف شبي حلكي بس اكيد حمرتي
ضاربه صفح من التعب بعدين انتبهت عليهه
طلعت كلينس مسحتهه واني منصيه راسي

حسيته قريب كلش وترني قربه وعطره
ملاني رفعت راسي علي شكد صايره احب
عيونه وهاي حواجبه المرفوعه

صار ليلي حلو من كدما افكر بي وشاغل
تفكيري كلشي بي حلو هو شكله عادي
حاله حال الالف العراقين بس احس كلشي
بي مميز..

طلع جكاره من الباكيت وهو يسولف بهدوء
وعبالك وره هذا الهدوء ثوره ...

ضرغام.. اكو شخص اجه من الصبح وذاك
كاعد بالاستقبال يكول اني اخو رانيااا
ابوج متزوج اثنين وطلع عندج ااااخ من تالي...

.

يتبع........

#خبايا_الاقدار
♨️♨️♨️

... البارت الرابع والثلاثون


‏في بعض الأحيان قد تمر بك أقدار صعبة ، مؤلمة ، وقد تكون طويلة ، قد تبكي أو تتألم أو تشعر باختناق ، تيقن أنك إن رضيت عوضك الله..
كلما يتعثر حظك سوف تكتشف إنه خير لك ..
وكلما أصابتك الخيبه وفقدت أشياء مهمه .. ستجد أروع منها..
ليست صدفة ، ولكن هذة رحمة من الله عندما يجبر خواطرنا
••••••

رانيا... ماكو اصعب من شعور الخيبة وخاصه
بعد هذا العمر ماما بجت بحرقه مثل ام فاقده ولدهه
كلهم بحرب ومارجعوا بس بالعلم

جانت تبجي ودكول اني ماابجي ع احد ابجي
ع نفسي عشت هاي السنين واني منطيته كل
الثقه ومات وره سنه يطلع متزوج وعنده خلفه..

رمشت بعيوني واني مصدومه من شقه ضرغام
كتله شنووو اخوج منيلي اخ جاي تشاقه وياي؟!

ضرغام.. اكو واحد يتشاقه بهيج موضوع
اخوج موجود وامج تخربطت ويمكن هسه صارت
زينه..

رانيا.. اني منيلي اخ شبيك ضرغام هي اخت وبالخارج
شنو تلعبون عليه
ضرغام.. ياعزيزتي اني متبلي عليج ذاك اخوج وخالج
وابن خالج من الصبح صرعوا راسنه

رانيا.. فززني صوت عمه تحاجيني ودكلي
تعالي امج متخربطه طبيت اركض للغرفه واشوف
ماما بوفاه بابا موهيج عيونهه حمر بش شافتني
حجت بأسى ولج رانيا ابوج طلع متزوج ومخلف..

بعدني ممصدگه وممستوعبه الصار كعدت يمهه
خليت راسهه ع راسهه وبجيت يكولون البنيه
تاخذ حظ امهه وهاي اني مشلوعه گلب عليهه..

شلون يابابا هي تجازيهه بخيانه وشوكت
تطلع بعد وفاتك شلون نمت بهذيج الحفره
وانت ماتباريت الذمه وياهه ..

فوك النص ساعه هي تبجي واني ابجي
ماتكدر تحجي اي كلمه بس مصدومه
وتصيح يم ربك نتحاسب ماردتهه تدعي
الميت ماتجوز علي غير الرحمه...

كمت وكفت عدلت حجابي مسحت دموعي
واخذت نفس عالي راح التقي باخويه العمري
ماشايفته اريد اعرف بابا شوكت اتزوج وليش؟!

راحت وياي عمه ساهره دخلت للاستقبال
السبع وضرغام وياسين موجودين كلت السلام عليكم
وكعدت رفعت راسي اجت عيني ع خالي اسمه بهاء

عشر سنوات ضبط ماشايفه خالي اخو امي
الوحيد عدهه وعايش بكركوك تليفون مايرفع
ويسأل عليهه حته من توفه بابا وره شهر اخذ
من خاطرهه وهذاك يوم وهذا يوم..

اباوع لزلم اثنين كاعدين بصفه منو بيهم اخويه
عشت عمري ادور ع سند وشكد جنت اتمنى عندي
اخ ويدافع عني بس هسه كدامي كاعد ومااعرفه
وينه...

حجه خالي شلونج بنيتي رانيا ؟! رديت علي
الحمدلله وينه اخويه ؟!
بهاء.. هذا اخوج واشر ع البصفه بعمر جراح او اكبر
ضعيف حيل عيونه كبار وجاحظه عنده صلع من الجوانب
بشرته حنطيه ماينطي شبه النه ابد...

رانيا.. عندي اخ؟! عمري هسه ٢٧ سنه وسهاد ٣٠
يعني ٣٠ سنه وماندري عدنه اخ ؟! زين الاخو ماسأل
عن اخواته ماهزه حنين وكال شلون عايشات..

بهاء.. شلونج رانيا حقج بأي كلام تحجي بس
اني صار ٤ اشهر من رجعت للعراق جنت عايش
بلبنان واول مااجيت سألت عليكم وكالو ابوك ميت..

رانيا.. ابوك؟! قبل مااسمع منكم وشنو مناسبه
جيتكم اريد افتهم بابا شلون تزوج ع ماما؟
شلون ضم ابنه علينه وهو طول عمره يتمنى الولد..

بهاء.. اني احجي ابوج المرحوم تزوج اخت زوجتي
بعد زواجه من امكم ب٥ سنوات وشنو الاسباب الدفعته
للزواج ماندري

اتزوجهه مده سنه وطلبوا اهلهه لو يعلن زواجه
لو يطلگهه وهو اختار امج وطلگهه وبعد ماوصل
كركوك وكلشي انتهه ..

بس وره طلاكهه بشهرين طلعت حامل واخوهه
كال من اتجيب نشمر الولد علي ويرجع يطلگهه
لان طلاكهه باطل يعتبر بس من جابت ولد واني
جان ماعندي ولد اخذته ربيته وكتلهه ماكو داعي
تحجين وتعالي يمنه اكعدي..

ربيته اخوج هذا الماتعرفين حته اسمه حسام
وره حسام صار عندي اثنين ولد وربه حسام وياهم
ومايعرف شي عن ابو لحدما كبر وحجيتله وخيرته
يسافر لو يرجع لابو واختار يسافر وطلعته للخارج

هسه يابنتي من سمع بابو توفه وامه توفت من جان
عمره ١٧ سنه كال اريد اشوف اخواتي وخاصه
التقينه بطليقج وسام وكال الوضع العايشه
بي رانيا موامان..

رانيا.. يعني بابا مات ومايدري عنده ولد؟؟
بهاء .. للأسف اي لان ربيته وماكدرت افرط بي
وخاف ياخذه مني وهو سافر ماردت يخرب مستقبله..

رانيا.. بعين وقحه وكاعد يمنه وتحجي هيج
انت خالي الي المفروض ينكسر كلبك ع اختك
لو تروح تزوجه لاخت مرتك وجاي تحجي بطولاتك

بياعين جاي وتكلي عندج اخ كلولي شنو من بشر
انتم ماخفت من الله حرمته من الولد وتدرون بي
ماعنده سند بغض النظر عن سوايته الماتنغفر

بهاء.. شنو هالاحترام العندج تحجين ويه
خالج واخوج هيج
رانيا.. خالي!!! الماعنده مخافه الله وحرم ابويه
من ابنه مايتسمى حته بشر وعنده انسانيه

واخويه شعنده شكد عمره مودكولون
٢٩ سنه هسه متذكر عنده اخوات ؟!

حسام.. احجي اي شي حقج اني جايج اخذج
مااقبل تعيشين يم ناس غرب

ياسين.. يابويه ثمن حجيك ماينگال علينه
غرب واحنه اكلنه بفرد ماعون موهيج
الحجي بالدوواين..

كومي يا ام شهد بلا امر عليج صيحي
ام رانيا تجي تشوف اخوهه ندري
الموقف صعب عليهه بس مثل ماتعلمنه
انتن قويات بالف رجال.

رانيا.. الدم بعروقي يغلي من العصبيه
ابدي اكوم افترس خالي الكاعد ويحجي بزوده
واني اتذكر عملة بابا وانوب محروم ٢٩ سنه
من الولد وهسه عنده ابن ومتزوج وفوكاهه..

باوعت ع ضرغام ساكت نظرته غريبه
فرك وجهه وونزل ايده ع ركبته فركهه
وعينه عليه..

اجت ماما كعدت ماخلت عينهه بعين خالي
شهكتهه بنص الزلم اكبر دليل ع كسرتهه
لايمهه وتعاتبه ولا تكدر تعاتب اخوهه لان
المثل خالي مايتعاتب ..

حجوا حجوا وماما ماعدهه جواب كلما كالولهه
شدكولين ام رانيا ردت عليهم حسبي الله ونعم
الوكيل بكل ظالم وطاغي مسلمتكم بيد الله..

ياسين.. ام رانيا تعلمنه عليج بهاي السنه انتي مره
والنعم منج بغداديه اصيله وهاي الكاع موكاعج وثبتي
انتي من العراقيات امهاتنه الاصيلات لاتدعين
ع المرحوم ماتجوز علي غير الرحمه..

ام رانيا.. يا شيخ ياسين ماادعي علي مايوم خلاني
بحاجه احد ولايوم خلاني اطخ راس وادللت بنت
ال١٤ وياه بس اتحسب ع اخوي الحرمه من ابنه
وموبس هاي طعن اخته بظهرهه اني والمرحوم نتقابل
يم رب العالمين وياخذ حقي بس بالدنيا اتحسب
ع العدل...

اني مااريد اخ ولا اريد احد اني عايشه بحمايتك
شيخ ويم حماتي ومحد مقصر وياي اخوي
منين مااجه خلي يرد..

حسام.. ماكو هيج حجي انتي ظلي يم حماتج
اختي تروح وياي شنو عايشه بنص زلم
غربه..

ضرغام.. انت شبليتنه غربه وغربه جاي قبل ساعتين
وتشمر بحجيك
حسام.. انت محد..... قطع كلامه ضرغام
ضرغام... وتاليتهه وياك جاي تتعارك..

ياسين.. من رخصتكم كلامي ويه خال ام سيف
انه اطلب ايد بتكم لابنه وابن عمي ضرغام
ع سنة الله ورسوله..

رانيا.. خاف جنت عصبيه مثل النار وشمروا
عليهه مي وخمدت راسي صار بالكاع
صرت مااعرف شحجي كمت افكر شلون انطي موافقتي
واني خايفه من وسام..

حساام.. مستحيل اختي تزوج بالقريه تعذرنه
شيخ راح اخذ اختي واروح وخلي امهه تظل هنا
مومشكلتي..

السبع.. عمرك موقاصر ماتعرف تسولف شنهي
هالحجي لا اصول لاغيره عندك شنو تظل امهه
ليوين تريد توصل بالتمشخط مالتك

اسمعني انت بالذات الموافقه راح ناخذهه من اختك
واذا وافقت هسه الدرب الجابك يردك وهاااا احنه
بوكت موخوش شنو اليضمن كلامك صدك
وانت اخوهه وجاي تبيع بطولات علينه..

بهاء.. اكو تحاليل وتكدر تثبت اخوهه هم حقكم
محد يصدك بس البنيه من حقنه نزوجهه الي يعجبنه

رانيا.. باوعت لضرغام رفعلي حاجبه وميل راسه عود
ردي عليهم شرد واني مصدومه اقبل اخاف من وسام
ارفض الي اسمه اخوي وخالي يشيخون براسي..

شاورتني ماما اكسري الشوكه واقبلي محد يحمينه
من هالحيوانات هاي اله الواصل شوفي خالج
اخته وتبره منهه ..

اتخذت قرار سريع بدون حته تفكير بعواقب
كلت اني موافقه ومناقشه هذا الشي ويه ماما
وموافقه ..

حسام.. عاط بصوت عالي موبكيفج منو انتي
وتحجين بوجوهنه موافقه وتنطين رأيج احنه شنو هنا
كاعدين؟

ام رانيا.. انت منو ؟ خاف مصدك نفسك اخوهه بناتي
وحيدات ماعدهن اخ اخواتك بنات هذا واشرت ع خالي
اطلع من هذا البيت لا تشوف شي مايعجبك تشوفني
مره كاعده كدامك بس اذا رفعت صوتك وتأمرت ع بنتي
اسوي الماسوته الزلم..

شيخ ياسين اني ماعندي اخ اي واحد يجيك
لا اخ ولا ابن عمي اطردهم اني ماعندي بالدنيا غير
بنات اثنين ووين مااكو ارض واسعه تلمنه ..

بهاء.. اهدي اختي اعصابج محد يلومج بس خلينه
نتفاهم البنيه كعدتهه هنا بوسط بيت متروس
شباب اكبر غلط

السبع.. ماسمعت شحجينه موخطبناهه من عندك
والبنيه موافقه تريد تنتظر بين مانجيب الشيخ
كدامك العقد او تريد تفكر ودكول هي جبيره
وحكيمه نفسهه ماله داعي حته رأيك لان انت
مو ولي امرهه ..

رانيا.. من كل مكان الحجي ياسين من جهه السبع
من جهه والي اسمه اخويه وخالي من جهه
كمت اشوفهم يفترون كدامي دخت حيل كمت
طلعت للصاله واني راسي يريد ينفجر..

طلعوا بعد صياح وعياط وتهديد من السبع
وضرغام اي كلمه اي تحرش من حسام اوخالي
مايلومون غير نفسهم ...

طلعوا واني ضغطي هبط رافعه رجليه
وماما يم راسي اسمع بس شهكتهه مثل
طفله وانباگت لعابته...

مابيدي شي غير اكعد وابجي وياهه
كل الكلمات ماتواسيهه شريد احجي
شريد اكول لاتنقهرين ماخانج؟ لو شنو
المبرر والدافع لخيانته وضمه عنهه كل هاي
السنين...

كمت لازمه الحايط لان دايخه نزعت ملابسي
وغسلت اجت عمه جايبه عصير انطتني كلاص
وجهي اصفر شاحب ياربي شوكت ارتاح يايوم
وياساعه ...

الشيخ ياسين راح وبليل بس السبع اجه ضرغام
ملتحق ماما ظلت تحجي براسي وافقي
ولاتفكرين بفلان وفلتان فكري بنفسج وشبابج..

كعدت وياهه هي وعمه وكتلهن فهمني قبلت
بضرغام ووسام اذا سمع شلون؟ مصير اطفالي
شنو ذنبهم يتشتتون بين الادين ..

ساهره.. رانيا يمه اقبلي هسه وانخطبي حالج
حال البنات منا لمن يوصل الحجي لوسام الف
عمامه التنگلب وبعدين ليش نسبق الاحداث
يجوز مايوصل الحجي ؟ ويجوز يوصل وماراح
يحجي شي..

رانيا انتي دمرتي نفسج وكعدتي هاي السنين
وضرغام مبين شاريج وشفتي مواقفهم
شكد حلوه وصاحبين نخوه راح يحميج ويحمي
اطفالج...

ولاتنسين هوه هم اب وفاقدهم يعني راح
يتمسك بيهم اكثر وراح يحارب علمود سعادتج
صار سنين معتكف عن الزواج وهسه من شافج
قرر معناتهه شاريج يابنتي..

رانيا.. الحيره البيهه بس الله يعلم بيهه
كمت توضيت وصليت صلاه الاستخاره
وتوكلت ع الله بكل اموري..

٤ ايام ضبط اني بحاله صراع بين كلبي
وبين عقلي دخت راسي صدع حته
دوام ماداومت امشي خطوتين يهبط ضغطي
الاكل احسه بدون طعم بحلكي من شدة التوتر
والتفكير ...

اجه ضرغام وبيومهه ماما لحت تاخذ الجواب
ماقبلت اظل اماطل وراحت كالتله موافقه وبليل
اعقد وياريت جبار مايجي...

العصر اجت ام اواب والحجيه ام ياسين
والسبع جاب نور والحجيه بركات رغم الفرحه
البداخلي راح اصير اله بس بنفس الوقت الخوف
وكلساع يتخيلي وسام يجي ياخذهم مني...

عندي فستان اشتريته ماصار هوايه لونه
اسود لان جنت بعدني حزينه على بابا ماصار
سنه وماقبلت انزعه لان هي خطبه وبدون حفله..

ماما ماقبلت البسه وكالت ع الاقل بس بالعقد البسي
ابيض لبست ثوب ابيض والشال ع راسي جابته الحجيه
وياهه كالت من مكه هذا وصاحوني وره الباب
عقدلنه الشيخ...

محد هلهل بس صلوات وجكليت ودموع ماما
ابد ماوكفت واني مدنگه وامسح بدموعي
مشتاقتلك بابا الله يغفرلك ويرحمك تمنيت
تشوفني اختار الانسان المناسب وشكد جان
تلح حته اتزوج ...

صاحت ام اواب عيني ترى كلبتوهه مناحه عليمن
هسه نفرحلهه وتطلع سنة ابوهه وندك ونركص الهم
ضرغام فرحته جبيره سنين نتمنه يتزوج وهسه قبل
واختار التعجبه..

كومي ياحلوه بدلي والبسي فستان حلو
وادخلي البسوا الحلقات اني اشتريتهن
حالف الشيخ ياسين حلقات ضرغام علي اذا
قبل يتزوج مرمر گلوبنه..

رانيا.. صحت لبابه تجي وياي فتحت الكنتور مااعرف
شلبس مامشتريه ملابس من اجينه للبصره
ومن كمت اشتري كله اشتري اسود من توفه بابا

من طلعت ويه البنات اشترن للمدارس بوقتهه
عجبني فستان طويل اسود مخصر من فوك ومن جوه
شويه نفش وكصته تفاحه وربع ردن بس
تنزل ع الكتف...

لبسته ردت انزعه مامستور من الصدر ونص الظهر
طالع فتحت شعري طويل لحد الورك بس ماكعد
وياه رجعت لميته ولبابه سوته كعكعه من وره
خليت رشيت عطر وخليت شال ع اكتافي
وطلعت...

من شافتني ام اواب كالت من رخصتكم ماتحمل بعد
وكامت تهلهل دكوا الباب عليهم كالولهم خلي يجي
يلبسهه الحلقه ...

شعور حيل حلو اباوع بالوجوه اشوفهه كلهه
فرحانه حته ماما المكسوره مخليه رضاوي
بحضنهه يصفك ويكول ماما عروس..

كلبي مااسيطر ع دكاته احسه راح يوكف
من سرعته رغم الجو بي بروده بس اديه
قطعة جمر...

كلساع اغطي نفسي بالشال ماجاي اتخيل
ضرغام اني وياه هسه ع سنه الله ورسوله
واني صرت بأسمه ...

اسمع اصواتهن كالن دخل وعقيق ادور ع حجابهه
وترتني دكلي كومي كعدتي علي واني عوزي
اكعد بحضن الحجيه من كدما خبصتني...

كمت وكفت من دخل ابد مارفعت راسي
ولاكدرت حته اشوف ملامحه وشلابس
بس اشتم بعطره وام اواب تشاقه وياه..

طلعتله الحلقات سحب ايدي لبسني
الحلقه بس بطيء اسحب بايدي اريده
يتركهه وهو متعمد يلبس ع كيف ...

اريد البس حلقته ايدي ترجف عبالك
اول تجربه اليه من شافني هيج اخذهه
هو لبسهه وكعدنه ...

باركتله الحجيه واجت باستني جانت التليفونات
الكاميرا موهذيج الراقيه حيل بوقتهه جانت الدمعه
والدب رادت نور تاخذ صور ومنعهه ماخلاهه...

ام اواب.. كومو بالاستقبال محد اكو خلي يشوف
خطيبته ياسين والسبع طلعوا
رانيا.. اشر بايده هسه دقايق لان تليفونه دك
وطلع يخابر بره واني اخذتني ام اواب للاستقبال
انتظره...

رجليه صايرات مثل خيوط العنكبوت
ماكدرت. اوكف كعدت ع القنفه وعيني ع الباب
ايدي ع كلبي اهدي بروحي شجاج رانيا قابل
ليله عرسج...

سمعته يكح قريب ع الباب صدره مقبط
فدمره من الجكاير ظل يكح هواي يله
فتح الباب ودخل...

كمت وكفت باوعتله لابس بنطرون اسود
وقميص اسود الاستقبال طويل اني بنهايته
واكفه من جهه الصاله وهو بدايته يمشي
بخطوات بطيئه وعينه عليه...

وصل يمي صار مايفصل بيناتنه غير
اميال قصيره مخليه الشال ع كتفي
بخيث ماطالع شي من عندي مد ايده
برهاوه وسحبه بحركه سريعه بدون حته
ماانتبه وشمره بالكاع..

خليت ايدي ع زندي وكتله لاا ضرغام
موهيج بعدني مامكمله الحجايه وايده
حاوطت خصري بقوه وانرفعت رجليه
من الكاع وانطبعت بوسه قليل وصف
عميقه بحقهه..

احس كلبي يتراقص ويه حركة شفايفه
اريد اسيطر ع حالي مااكدر لمسه ايده
ع خصري حاسه بيهه وبوسته بعد اشد
احساس بكل حركه وبكل لمسه جنت
بكامل قواي مندمجه وياه..

مااكدر اكول ثواني لا دقايق مرت وهو متقن
الحركه من شدة هول المشاعر العندي ماحسيت
ع نفسي شلون ايدي محاوطه رگبته وابادله
بنفس احساسه...

ابتعد وخله راسه ع راسي ناخذ النفس
والهوه مشترك بيناتنه صدره يصعد وينزل
وايدي المحاوطه ركبته احسهه عركت
من حراره جسمه ...

شدد قبضته ع خصري اكثر وحضني
وهو يشم بنفس طووووووويل حيل
وگانو غرگان وهسه اشتم الهوه...

الصمت سيد الموقف اي تبادل حديث
بهاي اللحظات ماكو ولا هذا ضرغام المستفز
البارد شفت انسان قمة الرومانسيه..

كعدنه ع القنفه واني مدنگه رفع راسي بيده
وكال شو خلي انشوف ابداع الخالق..

ابتسمت رفعت راسه ظلت عيونه
هي التحجي واترجم الماگدرت الگلوب
دكوله بهاي اللحظات..

قرب نفسه يم اذاني وكال شلون كدرتي
تكسرين كل هالحواجز وخليتيني ماتغمض
عيني اذا مارانيااااااا براسي..

وباسني من وره اذني قشعر جسمي
ابتعدت بسرعه واني العب بالحلقه
ماعندي كلام اكوله اصلا يوم ولادتي
اعتبرته هيج مشاعر ماعشتهه ابد مشاعر
حقيقيه نابعه من اصغر خليه بجسمي..

اصابيعه لامست فتحه الفستان من المقدمه
وهو يرفعه لان من اكعد ينزل خليت ايدي
ع ايده كال احنه انريد نستر لان مااضمن
الباقي ...

كمت وكفت كتله خلي اروح فشله كلهه
بالصاله ؟! رد عليه روحي ودنك ع الشال
خلاه ع اكتافي وباسني من زندي ...

طلعت واني اداري بخدودي الجمر
حته بدون ماالتفت علي ركضت للغرفه
رجعت مراهقه او اقل من هذا الوصف
اتلمس المكان الي انطبعت لمساته علي
وابتسامه فرح مرسومه ع وجهي..

بدلت بسرعه واني كلساع اصفن ع وجهي
بالمرايه خاف اكو اثر بس الظاهر خبره
ويعرف شلون يتعامل...

طلعت يم الخطار لحد المغرب الكل راح وبقينه
وحدنه ضرغام كالو راح للقصر هاي الليله نمتهه
بسعاده حته التفكير تلاشه عندي وكلما اغمض
عيني تجي حركاته كدامي...

لبابه.. ثاني يوم كعدنه الصبح يوم جمعه
نظفنه البيت من هوسة البارحه ورانيا ماكعدناهه
نايمه والسبع راح لبغداد كال عندي شغل شكم يوم
واجي..

جراح مااشوفه صار هواي اكتم بداخلي
وساكته ومراعيه حالته النفسيه بس
صورته وهو ونوال ماتروح من بالي...

بيومهه دك باب الاستقبال فتحته
فجر وكالهه صيحي لبابه ماما كالت اكعدي
وياه وافتهمي منه هو طيب موهيج عصبي
اعذري ...

طبيت سلمت وكعدت بصفه نفس توتره وهزة
رجله كتله ليش تهز رجلك ماجنت هيج؟

وكفهه بسرعه وكال شلونج شلونج بالمدرسه؟
لبابه.. زينه شويه صعوبه بالمواد بس رانيا
ادرسني
جراح.. اني هنا وابرار اذا عندج شي تعالي
اساعدج تريدين انقلج بمدرسه اهليه؟

لبابه.. لا فجر مااكدر اعوفهه ومدرسة عقيق
بس متوسطه والثانويه يكولون بعيده حيل
عليمن اقره وحدي وانتو ساعدوني..

جراح.. زعلانه مني
لبابه.. انت شدكول؟
جراح.. حقج تزعلين بس اعذريني ع عصبيتي
لبابه تعرضت لايام حته باحلامي اشوفهه
انطيني العذر بين ماتتحسن حالتي النفسيه..

لبابه.. جراح احجيلي الحقيقه عندك مشاعر
ماخلاني اكمل كلامي خله اصبعه ع حلكي
وكال اااااشششششش

وروح ابوي وروح ابوي ماعندي مشاعر بس الج
ومن خطبتج ماخنتج ولا واعدتهه بشي
لبابه.. اني سمعتكم بالنجف وحجيتله بوقتهه
السمعته بالتفصيل

جراح.. والله العظيم مامنطيهه امل تعرفيني
زين مومن شيمنه نلعب ع اثنين بس هي تأملت
بسبب خطبه جبار وفهمتهه اكثر من مره وانتي تعرفيني
قبل لامن النوع العصبي ولا اغلط بسرعه ولاحته اجرح
بالكلام وجنت افهمهه بكل هدوء بس شسويلهه..

وسالفه الحضن غلطه لان هي اجت تركض وذبت
نفسهه ماادري بهذيج اللحظه يمكن لو فجر حاضنتني
هم مااوخرهه اني مشتاق للكل بوقتهه..

اني احجيلج مواريد اقنعج بس ثقي بالله
مااعوفج اظل انتظرج اسنين لحدما تقبلين
بارادتج بس اني هسه اريد احجيلج شغله
وقرري!!!

اني حالتي النفسيه دون الصفر تعرضت لتعذيب
ماينحجي ومواقف ذبح واغتصاب كدامي
مستحيل ارجع بين يوم وليله جراح القديم
لازم اتعالج ولازم تساعديني لان احتاجج بكل وقت..

لبابه اريد نتزوج هاي الفتره مال عطله نصف السنه
وبفتره المراجعه نروح نكعد ببغداد وحدنه اريد ارتاح
حته من الوجوه الموجوده هنا ...

لبابه.. اني سادس راح اتأثر خلينه نرتاح اثنينه
احسن للطرفين
جراح.. اريدج وياي صدكي تساعديني احس روحي
ضايع لج ليلي ماانامه من الكوابيس والمناظر الكدامي
واحس جسمي يتألم من جديد..

لبابه انطيني جوابج هسه وخلينه نتزوج
لاتفكرين بيوم اخذلج واخونج لو اموت
بس ساعديني اخلص من الازمه البيهه وحدي
مااكدر اتجاوزهه...

لبابه.. بدون وعي! بدون تفكير! بدون مااخذ
رأي ماما هزيتله راسي موافقه نتزوج
بالعطله ومااعرف المضموم شنو بس كلي الي اعرفه
جانت تفكير سريع بالموافقه

.
يتبع.........

#خبايا_الاقدار
❤️♨️♨️

... البارت الخامس والثلاثون


لبابه.. كعدت حجيت لماما كل كلامه ظلت صافنه
بوجهي ماانطت ردت فعل كملت كلامي وسكتت
لزمت ايدي وحجت بحنان..

ساهره.. شوفي يابنتي جراح جربناه باكثر من موقف
مومن شيمهم الخيانه يريد يتزوج عليج باجر عكبه
محد يگله لا لان عدهم رجال ومحلل اربعه

بس بنفس الوقت مانريد انظلمه بكلامنه
احتمال هو فعلا حابج ويريدج زوجه واني ام
واشوفج صغيره صح راح ادخلين ب١٩ بس تبقين
صغيره ومو حمل زواج..

خلينه انسولف اذا خلصتي السادس
تتوقعين ادرسين بأمان بهيج وضع وطريق
بعيد للجامعه وجبار ورانه ؟! لازم هم نطلع من مشكله
انفوت بأكبر منهه

وهم من نجي لجانب الثاني خايفه تخسرين بزواجج
ياماما خطبتج صارت بيهه عراقيل هوايه واني
خايفه خاف ماتتوفقين ...

من اجي اباوع لعقيق شحلاتهه ويه السبع رغم
انتي اوعى منهه بس كادره تخلي هذا الجبل
يهتز بس كدامهه..

وهذا ضرغام هم حمه رانيا رغم ماتقربله
شي بس يحبهه واحتمال راح يواجه صعوبات
بزواجهم بس يبقه يحارب لأجلهه..

يعني اني اريد زواجج من جراح ع محبه الله
لاهو يفكر مجرد تكوين اسره ولا انتي تفكرين
بشغله الحمايه وتحسي مجرد امان ..

احجيلي لبابه تحبي؟ لو اعجاب؟ لو مشاعر
طفيفه احجيلي جراح بالنسبه الج شنو

لبابه.. دنگت راسي خجلانه من ماما رغم هي صديقتنه
بس مااتجرأت واكلهه اي احبه ومشاعري كلهه اله
ظليت مدنگه

هي افتهمت باستني من خدي وكالت احنه مغلوب ع امرنه
لو نحارب وحدنه ونواجه هاي الوحوش لو نرمي
حملنه ع رجال يتكفلنه ؟

ساهره..راح احجي ويه جراح واحجي ويه امه
زواج ماكو ابد منا لمن تاخذين شهاده السادس
يتحمل وخلي يكون تحمله علمودج زواج قبل
النجاح ماكو..

لبابه.. تركت الحجي ع ماما وهي راحتلهم فوك
وتفاهمت وياهم واتفقوا ماكو زواج اله بعد
السادس وهو بالاول معترض بعدين موافق

رجعت لدراستي بهمه ونشاط رجع جراح القديم
جابلي جهاز جديد ونفس خطي خليته ويوميه
يطمن عليه رغم ماينزل دائما معتكف..

جان عندي امتحان فيزياء وعصت مسئلتين عليه
حاولت رانيا تفهمني وماعرفتلهن خلصانهه ضحك
نحل ومايطلع الناتج..

فجر.. شبيچن خبصتنه انغيد نقغه
لبابه.. منو يمج متقرين جاي نقره هم
فجر.. منين من صوتكم وهاي غانيا حلكهه شكبغه
صايغ من انخطبت

رانيا.. ام السان المكسور تروحين وترجعين عليه
فجر.. ضغغام خطب وتوغط بعد مااجه صاغله
يومين

رانيا.. شقصدج ولج هلكدوتج وكل حجايه اكبر
من حجمج
فجر.. وينه مايجي غيغ مخطوبه وهو يحبج
شو انهزم..

عقيق.. لا مو انهزم السبع كال خابرو عدهم انذار
مدري شنو وبمكان بعيد اسمه طرَبيل وحته تغطيه
ماكو..

رانيا.. هاي شوكت؟ شوماكال
فجر.. اسم الله بعدكم جدد قابل يستأذن منج
رانيا.. راح اكوملج اشك حلكج واطلع السانج المكسور

عقيق.. بليل بيوم الخطوبه مخابري ورايح الفجر
يجوز مالحك ينطيج خبر
رانيا.. هو هم هيج ظليت ساكته اجاني رضاوي
واكع بالتراب كمت غسلتله وجاي ابدله دك تليفوني

كمت شفته مكتوب ابو ليث رضاوي طلع
يلعب واني كلبي يدك بقوه فتحت خط
كلت بصوت هادىء الووو

ضرغام.. هله اوكفي دقيقه!!
رانيا.. سكتت وصوت هوه عالي

واسمعه يحجي ويه الجنود
وواحد يكله سيدي اذا مانزلت باجر اشمر روحي من
هاي الرافعه صار شهر كلبي طك فدوه سيدي
خلينه ننزل وهو يضحك يكله ولك چااا اني وحد
مااريد انزل..

رجع حاجاني شلونج ؟ جاوبته الحمدلله وانت
ضرغام.. بخير اعذريني صار انذار مفاجىء
وماردت اقلقكم بالليل واليوم يله فرغت..

رانيا.. لاعادي سمعت من عقيق السبع
حاجيلهه
ضرغام.. اااي شلونج انتي اشتاگيت!
رانيا.. افتر بالغرفه ومبتسمه كتله اني هم

ضرغام.. هم شنو؟
رانيا... مشتاقتلك
ضرغام... هالمره اتأخر وبنص الجول ابو ابوي
مسموط الليل كله ماانام

رانيا.. ديربالك ع نفسك السبع هم ماموجود عنده شغل
والعمال جراح وياهم
ضرغام.. هااا زين لازم يستعجلون يجوز حته بليل
يشتغلون لان السبع مستعجل

رانيا.. ليش؟
ضرغام.. موبس السبع حته اني رجال مرتبط
وماعندي مكان اكعد بي
رانيا.. يعني يكمل البناء بهاي الدوام

ضرغام.. موكتلج السبع مستعجل واذا قرر
هاهي لازم يكمل لان صاير حجي موحلو بخصوص
عقيق

رانيا..شصاير؟
ضرغام.. جبار من مايلگه طلابه يستخدم سوالف
النسوان قال وقيل وهسه ماعنده شغل وعمل غير
يركض وره السبع

وكايم يحجي بكل مكان لان هو وعقيق بمكان واحد
وماكو دك وركص ماترهم بنظره وقرر السبع يعلن
زواجهم هاي الفتره بس يكمل البناء

رانيا.. بس عقيق مريضه
ضرغام وهو راح يكرب عليهه يمسح حلكه
بالحايط كلشي ماكو بس حته يسد حلوك الناس

رانيا.. ضرغام خايفه من شي
ضرغام.. من ابو سيف؟ ادري راح يوصله الحجي
وراح يجي ونتعارك عود تنحل لاتشغلين بالج

هسه اني لازم اروح من يصير مجال
اخابرج ديربالج ع نفسج
رانيا.. ماشي انت هم ديربالك
ضرغام.. ماتنطيني مسكن