احنه هنا ناس تحكمنه العشاير والعادات
هسه اذا اكتل جبار راح تگاومني بالمية
عشيره لان يعتبر شيخ محد راح يكول
ظالم ...

جبار من گتل المرحومه شهد بحجة غسل
عار واحنه ماشفنه بعينه والبنات اخواتهه
حجن وهو حلف كال انهزمت ولگيتهه
نكدر بلحظتهه نگتله بس التالي شنو؟!

هاي انه كدامك صار اكثر من ٣٠ سنه
انه اريد ثار ابوي ومالگيته ماعندي
نفس تگتل انسان بريء اذا مااتاكد

واله انه اكدر هسه ابيد القريه
وماخلي زلمه بيهه بحجة ثار ابوي..

انت هنا معزز مكرم واذا صابك مكروه
وحك علي اكلب هاي القريه ع روسهم..

والسوته ام شهد هذا ثارهه ومحد يگدر
يلومهه لامن شيخ ولامن عامي
البنات عرضنه ومانسمح لاحد يمسهن
بشعره..

ابو رانيا... يعني شهد انقتلت وانتي عايشه
بنصهم واني اكل من خير ناس قتله

السبع.. لا حجي انت ماكل من خير ابوي
المرحوم ومن خير ابو شهد خير جبار
لأهلهه موالنه ...

دك صدره وكال انت بخيرنه وضيفنه
اعتبر الصار رد اعتبار لأختك واخذت
ثارهه

ابو رانيا.. موراح يشتكي عليهه وتالي اختي
تصير قاتله ؟

ضرغام.. حجي محد يشتكي هسه يبلعوهه
ويگومون اطمئن اختك ووانت بالحفظ والصون

ساهره... حجيت بكلمات مبعثره وترجف
السبع بناتي لاياخذهن مني!!

السبع.. اطمئني محد يوصلكم
وانه هنا كاعد اريد اشوف يا زلمه
يمسهن...

ام رانيا.. لازم نرجع لبغداد احنه اجينه نحمي
حالنه مو حته انعيش برعب يوميه

السبع.. حجيه ماسامعه بالعشائر والدگه
والسوالف مالتهم انتي هنا خطار محد يمسج
وبغداد طلعتي منهه لأنهه خطره ...

ساهره.. هسه يشتكي عليه وهو مامات
لازم يموت شلون ماقتلته زين؟!

ضرغام.. ام شهد انتي باستعجالج
هذا تيهتي المشيتين لا انتي كتلتي ومات
ولا انتي بعد تكدرين تحمين نفسج

الي عليج تلزمين نفسج وماتاخذج حجايه
وتردج والباقي علينه

ابو رانيا.. خلي اخذ اختي ونطلع ونكعد ابغداد
وحته اذا موبغداد نكعد بالبصره بس بعيد
عن الشيخ..

السبع.. ماترهم ياحجي لوترهم
جان امناهه عندك بس مرجع بناتهه النه

رانيا.. بابا خلي نرجع لبغداد هو عمر واحد
نعيشه برعب حته اطفالي تخبلوا يوميه
طلقات وهوسه..

جنت احجي ويه بابا بس الظاهر سمعني
ضرغام رفعلي حاجبه الايسر بوضع
ماعاجبه الحجي..

ابو رانيا.. بنتي مااكدر اعوف عمتج
هاي من زمان معروفه عند العشائر الي
يتوفى رجلهه لوتزوج حماهه لو تترك بناتهه

السبع.. يله نترخص احنه احسبوا
ماصاير شي اذا مات الشيخ الله يرحمه
واذا تشافه مايحجي اطمئنوا..

لبابه.. كاموا كلهم طلعوا وجراح اشرلي
اكوم ضرغام والسبع طلعوا وجراح وكف
اباب المشتمل اجيت يمه وسديت باب المطبخ

جراح.. لااطلعون اليوم ابد
لبابه.. ماشي بس خاف نسوان القصر
تجي علينه يتعاركن

جراح.. محد تجي السبع وصاهن
لبابه.. عمه زينب وين؟
جراح.. يم خالتي اليوم الصبح راحت
اذا احتاجيتي شي دگي عليه..

لبابه.. راح جراح واني رجعت ليجوه
انطيت مهدء لماما وخالو مخلي ايده
ع خده رانيا وامهه يريدن يرجعن لبغداد
وخالو مايكدر يعوف ماما ..

مر اليوم بالويل ماما ضغطهه مرتفع
هدوء بالقصر اي صوت ماكو لامن
زلم ولامن نسوان ...

ثاني يوم الصبح اجت عمه زينب هستوهه
سامعه الخبر حاولت تهدي ماما بكلامهه
زينب.. كولي يالله ياساهره محد يلومج
لان يعتبر ثار

ساهره.. وراح يعوفني بحالي راح ينتقم
مني ببناتي
زينب.. بناتج بالحفظ لبابه بيد جراح
وفجر بيد السبع خافي ع نفسج موعليهن...

لبابه...مرن يومين وطلع عامر من المستشفى
الضربه برجله ويمشي يعرج والعجيب
فات من يم ضرغام وماحجه وحته مااشتكه

اما الشيخ ظل ٤ ايام وطلع جدار المعده
متأذي ومحد حجه والوضع هادىء
التمر طلعوا ناس كملته واحنه كاعدين
بالبيت ...

...
عقيق..
‏أيام مملة ومستقبل مجهول ونوم غير منتظم
جسد مرهق وامنيات تترتب تحت
الوسائد والأيام تمر ولا شي جديد . .

ايام قليل عليهه اكول سوده
الي اسمه السبع نهائيا مااشوفه
غاب عن البيت بحدود ٤ ايام ورجع

ابرار يمي بليل نبات وحدنه
ومن اسألهه دكول جيران الشقه
صديق السبع وامان ماكو شي..

ماادري شيصير كل الي اعرفه
محتاجه سندي محتاجه بابا
وحالتي الصحيه ادهورت اكثر..

طلعت من الغرفه ابرار تقره بالصاله
كتلهه خابري ابن عمج اريد احجي وياه
ابرار.. كولي حبيبتي محتاجه شي؟

عقيق .. اي اريد احجي وياه
ابرار ... ادللي هسه اخابره يكمل
شغله ويجي تعالي اكعدي يمي ليش
كاعده وحدج خلينه انسولف..

عقيق... شنسولف؟
ابرار.. تعالي احجيلج عن حياتنه
بالقريه وشلون كلهه عايشه تحت ظلم
عمي الجبير الشيخ وكلهه تخاف منه

عقيق... حته السبع؟
ابرار.. لا هو يخاف من السبع بس هو ظلمه
ع النسوان مايكدر للزلم

عقيق.. مايموت؟
ابرار.. الاعمار بيد الله وبعده متباهي
بجبروته

عقيق.. انتي شلون درستي
ابرار.. اخويه جراح جان حاميني
ومن راد يزوجني الشيخ السبع كال ابرار
الي اني اريدهه واتكفلهه بعد ماكدر يحجي

وراهه اجاني السبع وكال لاتفكرين
وتتأملين بالسويته مجرد حمايه الج
بس تكملين سادس انطيج حريتج
واختاري المناسب الج..

السبع.. شكد حلو هو مبين يحب الخير
ابرار.. هوااايه افضال ماتنعد وماتنذكر
العام شفته بالجامعه مالتي وعبالي جاي
عليه بس شفته وكف ويه الحدقجي
مال الجامعه..

بعدين عرفت هو متكفل عائله ابن الحدقجي
الشهيد وبانيلهم بيت ويصرف عليهم
بس شي حلو بي محد يعرف بي..

تدرين حته الحدقجي وغيره من الي كافلهم
مايگلهم اني ادفع وهذا من عندي يكلهم
من شخص خير دزلكم ...

عقيق.. وهو هلكد عنده فلوس؟
ابرار.. اي متمكن عنده من المقاولات والانسان
الماياكل حرام الله يبارك برزقه وهو عنده اراضي
بابو الخصيب ومستغليهه للزراعه ..

عقيق.. متزوج؟
ابرار.. لاااا مامتزوج
عقيق.. جبير؟
ابرار.. اااي الله يريح گلبه ..

عقيق... ظليت كاعده يمهه وبعدهه
كمت للغرفه للعصر سمعت باب الشقه انفتح
كمت بسرعه طلعت لگيته كاعد وابرار
جابتله مي..

من شافني رفع راسه ورجع دنك ابد مايباوع
بوجهي مرات اكول خاف لبسي بي شي
بس اني البس تراك الجابتهم ابرار وعريضات حيل
حته موقياسي بس ماالبس حجاب..

تقدمت كلت السلام عليكم وكعدت
السبع.. وعليكم السلام
عقيق.. اريد احجي وياك بموضوع
السبع.. اسمعج!!

عقيق.. اني اريد اهلي اخذني للتاجي واني
ادليك ونسأل عليهم حتلو يصيحون بالسمعه
عليهم

السبع.. وبعد!!
عقيق.. اني ملتزمه بعلاج واجيت هنا اتعالج
وظل علاجي بالفندق وغراضنه وهاي اسبوعين
اني بدون علاج واحس گلبي بده يتعب..

السبع.. وبعد!!
عقيق.. هاهي!!

السبع.. اسمعي يابنت الناس انه ماتارك موضوع اهلج
رحت بنفسي وسألت عليهم عندج واحد من عمامج
ويه عصابه وورا وفاة ابوج طالعين عليهم
عمامج كلهم شايلين وواحد معتقلي..

المنطقه مالتكم ماانطتني اي عنوان ولا كلام
٣ ايام وانه ادور وساعدني ضابط مناك ورحت لمركز
الشرطه وحجيتلهم السالفه وكالو هاي المنطقه
اغلبهه عصابات ويوميه معتقلين واحد

انتي عندج عمام اثنين واحظ معتقلي وواحد
شايل وين الگا ردت عنوان اولاد عم ابوج
كلمن يكول مانندل ومحد انطاني جواب..

اما حالتج الصحيه باجر الصبح اخذج
للفحص وان شاء الله خير..

عقيق.. واني راح اظل هيج شلون اعيش
وحيده اخذني لدار الايتام!!

السبع.. مستحيل اخذج اسمه دار الايتام
بس بالحقيقه مودار ايتام مامناسب لعمرج

انتي انطيني حل ابالج
وانفذه الج!!

عقيق.. ماعندي حل ابرار كالت بس هاليومين
وترجع واني شلون اعيش وحدي خليت ايدي
ع وجهي وكمت ابجي

كلامه صحيح واحد من عمامي دائما تاخذه
الشرطه وانسان سافل حته ميحاجي بابا
ودائما بابا يكول هسه يوكعنه بمصيبه..

واصلا بهذاك الزمن ب٢٠٠٧ الذبح
بالجمله بالتاجي الجاي لبغداد يلزمو
بالبساتين وقتلوا صارت الجثث بالشوارع
وقت الطائفيه..

السبع.. لاتبجين انه هم اريد اسلمج لاهلج
بس ماعندي حل وين اوديج انتو اصلكم
مو من التاجي ماعدكم سجلات قديمه حته
يدورون عليكم..

عقيق.. ماادري مااعرف احد بابا مره سكن
بالطارميه ومره بالدجيل يوميه بمكان
وين مايلگه شغل ياخذني ونروح حته بيت
ملك ماعدنه ...

السبع..يمكن حياتي ماتناسبج بس الي
اكدر علي شغله وحده اخذج وياي للقريه
وتعيشين ويه بنات عمي وبكفالتي..

عقيق.. وشلون اعيش يم ناس غربه؟
السبع.. انتي مجبره مو مخيره!!

راح افتحلج الباب واطلعي ذاك الشارع
وين تعيشين ساعه وحده ماتكدرين
بهيج وضع وهيج نفوس .

عقيق.. وتظل ادور ع اهلي
السبع.. اكيد وهذا وعد لو بعد اسنين
لازم الكاهم هاي الشقه مأجرهه وبعد مااجي
هنا حسب شغلي مااكدر انقلج يوميه بمكان..

عقيق.. غمضت عيوني بأسى وكمت من يمه
بدون مااحجي طبيت للغرفه بجيت كمت احجي
ويه بابا ساعدني ادري بي يسمعني وماعافني وحدي..

خليت راسي ع المخده واشوف بابا بالحلم
نفس ملابسه وبعدهه بيهه تراب مال الحادث
وجان مستعجل لان ماما واكفه بعيد تنتظره!!

بس كال روحي وياه لاتخافين
اني وياج مااعوفج بس ابدل ملابسي
واجيج روحي بابا هذا اني دزيته الج!!!

فزيت من نومي عركانه شعور مريح
بداخلي بابا هو يعرف الزين والموزين
وهو كالي روحي ..

طلعت من الغرفه جان دنيا المغرب
صار كدامي يصلي وصوته من
يكول الله اكبر عالي..

رحت للمطبخ يم ابرار تسوي عشه
من كمل رجعتله كتله اني موافقه!!

السبع.. شفتي ابوج؟
عقيق.. شمدريك؟

السبع.. شعور اليتيم واحد بس اگلج
شغله وحده ابوج راح يظل وياج
لمن تكبرين وهم مايعوفج..

انه ابوي بكل خطوه وياي مااسوي
شغله اذا مااخذ شوره وانتي
هم خليج مؤمنه بوجود ابوج بجانبج..

عقيق.. رمشت عيوني واني اباوعله
شكد حلو كلامه بس شكله عكس كلامه
شكله مال واحد عصبي وغاضب
وعيونه تخوف وبشرته سمرته وضخم ...

راح لابرار للمطبخ مدري شحجه وياهه
وراح تعيشنه وحدنه كالت الصبح
نروح للطبيب حته تسوين فحوصات..

ثاني يوم ب٩ اجه اخذنه اباوع للشارع
غريبه اني! هذا مو مكاني! ولا مدينتي
شلون اجيت هنا ولشوكت اظل هنا!!؟

ابرار ويايه ماعافتني ابد هو مادخل
لحد ال١ يله كملت فحوصات صادفت جمعه
انطوني علاج وتعليمات كون ماانقهر
وحالتي النفسيه تكون زينه...

من صعدنه سألني تعرفين اسم الفندق
انطيته اسمه واخذني اله حاجه ابو الاستعلامات
وانطيته رقم الغرفه صعدت جبت
الجنطه مالتنه وعلاجي ونزلت ...

خليت الجنطه بحضني واشتم عطر طيب
حيل عرفته هذا العطر من ملابس بابا
اريد اوكف دموعي مااكدر كمت اشهك
بالسياره...

التفتت عليه ابرار تسكت بيه وتحاجيني
وهو مركز بالطريق مارفع راسه..

رجعنه للشقه اخذت ملابسي
الباقيه وابرار نزلهه يم بيت كالت
بيت خالو واني مشيت وياه للمجهول...

طول الطريق هدوء كلساع ارطب
شفايفي احسهن يجفن بس اي
كلام ماكو...

قريب مانوصل حجه كال راح الكل
يسألج منو انتي؟ لاتحجين حياتج
اليسألج كليلهم اسألو السبع!!

اتمنى اتفهميني انه راح اكول
عاقد عليهه حته محد يحجي
بس بيني وبينج ماكو شي حاولي
تلتزمين بلي اكوله..

عقيق.. شنو عاقد عليه انت غريب
السبع.. ادري غريب بس باي حق ادخلج
القصر وانه ابن شيوخ وعيبه اجيب
غريبه مايربطني بيهه شي..

عقيق اسمعي الكلام ومجرد اتفاق
لا اكثر قابل صدك انتي ع ذمتي
هاي علمودج راح تكلفني هواي هاي المجازفه
بس الله خلاني بطريقج وواجبي احميج..

عقيق.. مااعرف شحجي وشكول
شنو الي اسوي ابدي افتح باب
السياره وانهزم بس ماباليد حيله

لا اعرف اناقش ولا اعرف اسولف
كل الي اعرفه اسأل وهو يجاوبني

وصلنه لمنطقه زراعيه وبساتين واشجار
عاليه ووكفت السياره اباب قصر جبير حيل
ونزل وكال انزلي..
...

لبابه... وره طلعت الشيخ محد فتح موضوع
رجعنه لحياتنه الطبيعيه ماما ماتطلع ابد بس اني
وفجر انروح للحجيه انشوفهه وعمه زينب
بس محد يحجي ويانه

الشيخ وعامر رجعوا لحياتهم الطبيعيه
ويتملق لخالوا واسلوبه متعدل ومستخدم
اسلوب نفس اسلوب ماما من استخدمه
وخلته يطمئن من ناحيتهه...

طلعنه عصريه بالحديقه البرا رانيا
وجهالهه واني وفجر جراح ملتحق
وضرغام هم بالدوام..

كاعدين انسولف واجت ايناس يمنه
كعدت بس ماحجت شي لحد الان
مانعرف انذمهه لو نأمن الهه

شفنه سياره اجت من بعيد
كالت خلن انطب خاف خطار
بس من تقربت السياره عرفناهه للسبع..

وكفت اباب القصر واحنه بالجانب كاعدين
نزل ونزلت ابنيه وياه كلنه وكفنه مصدومين
البنيه لافه شال مخربط ع راسهه
تطلع بكد فجر...

مبينه خايفه وتمشي بصف السبع
لزك لازمه جنطه بيدهه ورجليهه
ماتساعدهه تتقدم..

تقدم السبع علينه وهي وياه كال
السلام عليكم ردينه السلام

السبع.. لبابه اخذي البنيه يمكم
بين مااسلم ع الحجيه وادزهه الكم

فجر... هاااا منو هاي؟
السبع.. خطاري هاي ديربالكم عليهه

لبابه... اباوع لفجر عيونهه غورگت
بالدموع وبس تباوع على البنيه...

ايناس ازيد من حالة فجر وعيونهه
صارن بگصتهه تلافيت الموضوع
ورحبت بالبنيه ودخلتهه جوه والسبع راح
للقصر..

تلكتنه ماما تسال منو هاي؟
لبابه.. السبع كال خلوهه يمكم هسه يجي
اجت وياه

ساهره.. اهلا وسهلا بنتي منو انتي
عقيق.. اني عقيق
ساهره.. وين تعرفين السبع
عقيق.. اسألي هو ماادري..

لبابه.. شفايفهه صارن زرگ ايدهه ترجف
رجلهه تهز بيهه من التوتر

جهال رانيا فشلونه يجرون بجنطتهه
لان بيهه مداليه مال دب ويتعاركون
عليهه. .

عقيق... كوه حابسه دموعي ياربي
ناس غربه كلهه تسأل منو اني
وماعندي جواب ..

عيني ع الساعه مرت فوك النص ساعه
اندك الباب ودخلت حجيه جبيره كلهه كامت
وكفت وتبوس ايدهه

وحده يكلولهه ام جراح عرفتهه ام ابرار
هاي ووراهه دخل السبع من شفته
يله ارتاحيت ...

سلمت عليه الحجيه وتباوعلي
باستغراب وام جراح طبيعيه
ومبتسمه...

كعد السبع وكال اعرفكم عليهه
اسمهه عقيق بنت صديقي توفه
وماعدهه احد وقبل لايموت امني
عليهه ..

فجر... وشنو غاح تعيش يمنه!
السبع.. اي فجر يمكم
فجر.. ماعدنه مكان بيت خالو هوايه!!

السبع... بنظره حاده باوعلهه وكالهه
ميخالف يومين بين ماارتب غرفتي
وتعيش بيهه واني انتقل يم ضرغام

عقيق.. الي اسمهه فجر مثل الزعلت بسرعه
ركضت للغرفه ماعرفتهه شتصير منهم
وليش ماحبتني ..

عافني وطلع وحده اسمهه لبابه
اخذتني للغرفه بدلت وكعدت
ماتحركت ابد اسمع اصواتهم بره
...

رانيا.. والله انتم اغرب من الخيال
النسوان عدكم مطشره وشوكت مايعجبه
الواحد يجيب وحده ويعقد

لبابه.. والله ماادري يارانيا حجيت لجراح
يكول شكو بيهه السبع موصغير حته انعلمه
شيتصرف اكيد تصرفه صحيح

رانيا... بس هي صغيره وعبالك مريضه
ايدهه تكسر رجلهه من الضعف

لبابه.. فجر ماحبتهه وضايجه منهه
رانيا.. فجر متعلقه بالسبع وتريده بس الهه
عينج ع اختج لاتخليهه تحب الانسان الخطأ

شفت بعين فجر غيره ع السبع
رغم هو ينظرلهه نظرة اخت بس هي
نظرتهه بمرور الايام راح تولد مشاعر عدهه..

لبابه.. مااكدر احاجيهه انتي حاجيهه
لان ماراح تسولفلي تدري جراح شيكول؟!

يكول ضرغام متعارك ويه السبع البارحه
ومتضاربين بالبستان ورغم قوة السبع
وهالمره العركه قويه...

منفعل ضرغام ومخلي خشم السبع
ينزف يكول ماكدرت حته افكهم بالنص ساعه
هم متلازمين حته سحبت اسلاحهم
خاف لحظه شيطانيه ..

رانيا.. عاد هم مخابيل بس عليمن؟

لبابه.. ضرغام ماقابل بهاي البنيه
يتخبل من القاصرات يكلهم مال احطكم
واشعل النار بيكم..

يكله شلون تدني نفسكم ع مزعطه
وراجع ع جراح هم متعارك
عنده زواج القاصرات موضوع مايتناقش
بي...

رانيا... هو مبين متعصب صارله مده مختفي
مدري وينه ؟!
لبابه.. يظل ببغداد مايجي جراح كال
عدهم شقه ويكعد بيهه ..

خلي اكوم اشوف فجر بلكي
اكدر احجي وياهه واذا ماكدرت
ادزج عليهه ..

رانيا.. كامت لبابه واني يمي سيوفي
يلعب ورضاوي يم ماما...

سيوفي شاف بزونه ركض وراهه خليته
يلعب كاعده واباوعله واشوفه يركض بالبستان بس
كدام عيني..

دنكت ع تليفوني ثواني بس رفعت راسي
سيوفي ماكو بسرعه ركضت اشوفه
ماكو اختفى ..

اصيح سيوفي ماما ماكو وين راح
ابني كلبي لزمني وشعور موحلو اجاني..

كمت اركض بالبستان ويه اتجاه اللعب
مالته فقدت ع ابني ركضت للبيت اصرخ
الحگلي بابا سيوفي ضاع..

كلهن طلعت ادور كل واحد لزم اتجاه
بس گلب الام دليلهه جان يدليني
ع الاتجاه بس ماالكاه...

طلع جراح وانخبص ويانه
يحاولون يهدوني بس فقدت
كمت اضرب ع وجهي شعور موحلو
سيطر عليه..

كمت اركض بالاتجاه اليدليني
كلبي صوته باذاني وضحكته
وكلبي يكلي اركضي بعد !!

امشي واتعثر وصلت قريب ع الشط
واني فاقده بدون شعور هي ثواني
مستحيل وصل لهنا ...

تلكاني ضرغام يمشي من بعيد
ركضت بلا وعي علي لحدماوصلت يمه
وكعت يم رجليه واصيح ابني..

هو مستغرب بس كال خير
ياستار شجاب ابنج هناا!!

رانيا.. الله عليك ساعدني ابني ضاع
جان يلعب كدامي
كلبي يكلي هيج راح واشر
ع الشط..

ضرغام.. واحنه نمشي ورا كلبج؟!

طفل شيوصله لهنا ومايندل طريق امشي
لمكانه العب بي انتي واصله الشط
الجبير يتيه بي..

رانيا.. مشيت كدامه بسرعه وكلما التفت
علي اشوفه شلون يمشي بهدوء واستفزاز
واني روحي رايحه وجكارته بحلكه..

نزعت نعالي وركضت بكل سرعتي
بدون حته ماالتفت علي وصلت لمكان
العب بي ومشيت امتار بغير اتجاهه

واشوف بحيره موجبيره حيل بس
ممليه مي وبالطول مثل النهر..
روحي وكالت ابنج هناااا!!

صرخت بعلو صوتي سييييف؛!
ساعدوني !!!

صرت مثل الحمامه وتحوم داير مداير
عشهه وادور ع ابنهه الراح!!

فقدت بدون وعي كلهه ادور بغير مكان
محد وصل لهنا لان بغير اتجاه مااحس
ع نفسي غير كامزه بالبحيره ومااعرف اسبح
كمت اغط وارفع راسي اصيح ساعدوني..

ماخفت ابد ع روحي
ولا خفت من الموت بس ابني
مستعده اضحي بكلشي بس اشوفه
سالم...

التموا ع صوتي واني لاحول ولاقوه
اغط واختنك واطلع راسي اهمش
اريد هوه وبديت اغرگ من صدك...

كلهه وكفت ع الحافه والي يصرخ
والي يصيح انقذوهه راح تغرگ
واني اصيح ابني هنااا...

شفت جراح دنه بابا وراد يكمز
بالمي ينقذني بس وكفته ايد ضرغام
ومنعته!!

ضرغام طلع مسدسه من حزامه وانطاه
لجراح وبعدوا بابا وصاح بيهم
وخرواا عليمن تتفرجون وخرهم جررااااح!!!

وكمز وراي بالمي سحلني من ايدي
واني اخذ الهوه كوه واصيح ابني
طلع قبلي وسحبني بس جان مغطي عليه
ملابسي لزكت ع جسمي..

ايناس انطته جادر جبير مال سياره
هو خلاه ع اكتافه وعينه بعيني
وكال الزمي من يم ركبتي ...

ركضت عليه ماما وخاله واني اكح
واحس رئاتي انملت مي وعيوني
مااشوف بيهه !!

وضرغام رجع للبحيره يدور ع ابني
وماهي الا لحظات صرخت ايناس
هذا غرگان!!!!


يتبببببببع....

#خبايا_الاقدار
❤️♨️♨️

... البارت الثالث عشر


رانيا.. من سمعت صوت ايناس وهي تصيح
غرگان تخبلت جنت كاعده بالكاع بالتراب
ومنا مبلله صرت طين اديه ورجليه متروسات..

مفزوعه!!
فزعة ام على ابنهه الي التهت عنه
ثواني !!

شايله جراح من رجليه ويدك بي ع ظهره
وابني بدون نفس صرخت صوت يمكن وصل
لراس الشارع وحسيت اوتاري اتگطعت..

ماجنت اشوف الداير مدايري
ماجنت اشوف مواقفهم منو اليجبي
ومنو هذا الي يهدي بيه

ردت اسحبه من جراح بس ضرغام منعني
جراح يسعف بي وخلا بالكاع ويسويله
اسعافات يعرف..

بابا فقد اكثر مني روحه من الدنيا سيوفي
يكول مارزقني ولد بس رزقني باطفالج
هم ولدي..

لزمتني عمه ساهره كمت اشوف الكل
بحالة دوران حته اشجار البستان
شفتهه مگلوبي...

ماحسيت غير يضربون بخدي راشديات
وظهري ع الشجره بس فتحت عيني
استوعبت اني جنت فاقده الوعي
وابني وينه؟!

ساهره.. ياعمه راح تموتين كولي يالله
ابنج حي وركضوا بي للمستشفى
انتي گلب والده ادعيله

رانيا.. اجذبون عليه وينه ابني
اذا عدل ليش اخذوا ؟!

ساهره.. والله بي نفس وكام يطلع المي
من حلكه بس احسن يتلاحكوا للمستشفى
وانتي لا ايد ولا رجلج ابوج راح يتخبل..

لبابه.. كومي رانيا تعالي فجر ساعديني
خلي ناخذهه للبيت امج تخربطت
وابوج راح وياهم..

رانيا.. لبابه كولي وروح شهد؟
لبابه.. وروح بابا وشهد عدل بس احسن
ياخذوا كومي شوفي الطين الي عليج

رانيا.. كمت امشي بألم وخوف من فقدان
ابني محد اكو من الرياجيل بس النسوان
مجتمعات وتتفرج ..

دخلت للبيت غسلت وذبيت ملابسي
ودموعي تصب مااكدر حته ادعي
احس من هول الصدمه مااعرف شلون
ارتب الكلمات..

رضاوي يبجي يم ماما اصلا مفزوع من
الصوت وماما متخربطه خليته بحضني
وهو يسألني سيوف مات؟!

اسم الله حبيبي هسه يجي
شرب مي هواي موزين علي!!

لبابه... فجر كومي شوفي البنيه عقيق
مالهه صوت من اجت لسه
فجر.. شسويلهه اكعد اغكصلهه!!

لبابه.. موعيب هالكلام شبيج وياهه
هسه اكول لماما عليج تعرف شلون
تحاجيج

فجر.. غوحي شوفيهه انتي !!
لبابه.. فجر والله اكول لماما شو متستحين
ع الاقل الخاطر السبع الحامينه وحاميج
انتي بالذات..

فجر.. مااحبهه
لبابه.. وليش متحبيهه اشفتي عليهه
فجر.. مااحبهه بكيفي!

لبابه.. غريبه فجر مااعرف افسر تصرفاتهه
كمت اشوف البنيه من البارحه من اجتي لسه
ماطلعت ولا شفناهه

فتحت باب الغرفه جانت كاعده
بالكاع ومخليه راسهه ع الحايط
ومغمضه عيونهه مثل النايمه

تقربت عليهه كتلهه عقيق !!
كررت سؤالي ماكو جواب!!
هزيتهه من رجلهه وكعت وهي ع وضعيتهه

فزيت من منظرهه فتحت الباب وطلعت اركض
واصيح ماما البنيه مدري شبيهه!!

عفت ماما ركضتلهه واني رحت ادور
ع السبع وادعي كون مارايح وياهم!!

تلگتني ايناس سألتهه كالت السبع ماموجود
حته مايدري بابن رانيا يمكن ع الشط!!

رجعت للبيت اركض ادور ع تليفوني
وماما تذب مي ع البنيه ولا ايد ولا رجل

طلعت رقم السبع دگيت واني
اصيح يله رد رد جاوبني بس كال
الو كتله الحك السبع البنيه عقيق
يمكن ماتت !!

شمرت التليفون وركضت للغرفه خاله ام رانيا
تشمم بيهه عطر وماما تفرك بايديهه
وتصيح شوفن اظافيرهه شلون زرگ...

كامت تفتح عينهه ببطء وتسدهه
وايدهه ع كلبهه وشفايفهه زرگه
نفسهه بطيء كأنو تاخذ استراحه ..

عشر دقايق ونسمع صوت السبع
يصيح ام شهد كمت تلگيته واحجيله
حالتهه ..

فجر جانت واكفه اباب الغرفه بس
تباوع وهو كعد يم راسهه ولزم ايدهه
قاس نبضهه...

طلع تليفونه دك ع ضرغام بس كاله
وين انت ؟! مدري شكاله بسرعه
سده ودك ع سعود كاله حضر السياره
بسرعه!!

خله ايده جوه راسهه وشالهه
وكال لبابه جيبي حجاب من عندج
وانتي ام شهد تعالي وياي!!

عصريه سوده منا ابن رانيا ومنا هاي
البنيه من الاموات مانعرف شنسوي..

اخذهه وراحت وياه ماما سديت الباب
وراهن اجتني رانيا تتوسل اخابر جراح
لان خالو مماخذ تليفونه..

دكيت ع جراح مايرد دكتين كاملات
وماجاوب طلعت رقم ضرغام
واتصلت علي رد عليه!!

سألته ها ضرغام سيوفي شلونه
امه راح تموت من البجي!!

ضرغام.. زين سووله اسعافات
وراح يسحبون المي كليلهه زين!!

رانيا.. جان صوته عالي من التليفون
مااعرف شلون احجي وشلون اشكر
رب العالمين ..

اخذت التليفون من لبابه مامصدگه
واكله كول والله زين!!
ضرغام.. والله!!

رانيا.. عليك الله مابي شي
خومايبجي وخايف..

ضرغام.. لأاأا مابي شي انتي
يرادلج طبيب لان خايفه

رانيا.. انطيت التليفون لبابه وكعدت بالكاع
ابجي شكر لرب العالمين ركضت ع ماما احضن
بيهه واكلهه سيوفي زين..

ظلت عيني ع الباب شوكت يجون
طولوا هوايه واسمع صوت سياره
وطلعت اركض حافيه ليبرا..

نزل بابا شايله بس روحه ذايبه
بس شافني مد ايده وصاح ماما!!

اخذته من بابا احضن بي وابوسه
فقدت ماادري بالواكفين هيج اشمه
من ركبته وصوت البوس عالي ..

لحدما نبهني صوت ضرغام وهو يحاجي
لبابه ويسألهه ع السبع!!

تقدمت واني شايله ابني كتله مااعرف
شلون اشكرك هاي ثالث مره تنقذني
وتساعدني!!

ضرغام.. لاتشكريني هذا واجبي
رانيا.. الله يوفقك بحياتك ويرحم عائلتك
ضرغام.. ويرحم والديج..

رانيا.. دنك راسه ومشه بس شفت
وجهه شاحب مو نفسه المستفز
مبين علي تأثر بالصار وتذكر ابنه..

لبابه.. موادك عليك ماتجاوب
جراح...تليفوني بالغرفه ظل لان طلعت
ع الصوت ورحت ويه ضرغام حته السبع
متصل..

لبابه.. تخربطت هاي البنيه الجابهه
جراح.. دنك راسه وفركه والله يالبابه
صايره هوسه منا جبار وندري بي مايسكت
واكيد يخطط لشي

ومنا السبع تكفل هاي البنيه والى متى وشلون
وشراح يصير؟!

وضرغام الي مايشارك احد ويحجي
تخيلي يكول صار ٣ ايام مانايم مثل الذيب
عينه ماتغمض

لبابه.. ليش شبي؟
جراح... مو اكلج ماادري محد بيهم
يسولف حته السبع مدري شبي..

لبابه.. حياتنه مخربطه شنو الحل؟!
جراح.. تعالي هناا بصفي وطبطبلي ع المكان
صرت بصفه لزك ومو مرتجي ع الحايط
ومدد رجليه بالحديقه..

شوفي لبابه راح اشاركج بافكاري
بس ممنوع تحجين تسمعين وتسكتين!!

انه راح اشتري من جبار قطعه ارض
وابني بيهه اني وامي حته اختي تجي
يمنه عائلتنه متشتته!!

لبابه.. يعني تبني بصف القصر؟!
جراح... لا شوفي الكاع الورا الشارع
العام هم لجبار راح اخذ قطعه ع راس الشارع
حته ابتعد عن القصر

لبابه.. وهي هاي الكاع كلهه لجبار
جراح.. ااي محد اله شبر هنا بس البستان
القديم هذا مال السبع..

لبابه... واني ودراستي؟
جراح.. اذا كملت بناء نتزوج واكو مدارس وخطوط
اسحلج بيهه واذا تأخر البناء ماادري وين اوديج
لازم اجر برا القريه حته ادرسين..

لبابه... احنه ليش مانطلع خالو يأجر ونكعد
وياه
جراح..منو يخليكم جبار لو ابنه عامر اتعس منه
مايحسبوا خالكم من تخلفهم يحسبوا غريب..

لبابه.. ظلينه انسولف شويه ورجعت
للمشتمل وهو ظل برا كال انتظر ضرغام يجي!!

رجعت للمشتمل هدوء بعد ماجانت كلهه
مخبوصه رانيا فرشت بالكاع هي وجهالهه
ونيمتهم ونامت !!

خاله تسوي عشه وفجر مختفيه
دورت عليهه لگيتهه كاعده ورا المشتمل
وبيدهه عوده ترسم بيهه بالتراب..

كعدت بصفهه حاولت الطف الجو
لان مبينه مغثوثه!!
فجوره شبيج اني مواختج احجيلي؟!

فجر.. مابيه شي
لبابه.. لابيج شي من اجت البنيه من البارحه
وانتي موطبيعيه

فجر... اخذت السبع!!
لبابه.. وانتي شعليج ؟
فجر.. شلون شعليه منو يحميني بعد
لبابه.. يظل هو يحميج يعني اذا تزوج راح يبطل
مثلا..

فجر.. السبع مثل بابا واني ابد مااخاف
هنا حته من جباغ مااخاف بس خاف هاي
عقيق بعد متخلي يحمينه ويسوي بيه
جباغ مثل نوغ..

لبابه.. قصدج تغارين علي لان اجت هاي
وعبالج بعد مايهتم بيج ويحميج

فجر.. اااي اني احب السبع مثل بابا
وهو كال انتي مثل اختي المتوفيه كلما
اشوفج اشوفهه بس هاي هسه ماتخلي..

لبابه.. لا السبع رجال موتأثر علي وحده
ابعدي الافكار عنج وخطيه البنيه
يمكن مريضه ..

فجر.. الباغحه بليل شفتهه تبجي
ومانامت ابد
لبابه.. شفتي خطيه ماعدهه لا ام ولا اب
احنه عدنه ماما وتأذينه لاتصيرين انانينه
انتي فجوره الورده..

فجر.. السبع كال هاي السنه اخليج
اداومين بالمدغسه بس من اجت هاي
خاف مايقبل..

لبابه... لا يخليج بس صيري طيبه
وتحبين الخير للكل هسه انتي انانينه
والله يحاسبج انتي مودكولين السبع اخوج
الجبير وبمثابه ابوج المفروض تفرحين
اعتبريهه زوجة اخوج...

تعمدت احجي هيج علمتني رانيا حته
ماتحبه صح عمري صغير بس الاهتمام يولد
الحب مثل ماحبيت جراح والسبع وفجر
ممتوالمين...

كمنه دخلنه جوه السبع بعده ماراجع
اذن الاذان وصلينه وننتظر بماما
تأخروا يله اجوا

دخلوا وعقيق ساندتهه ماما تعبانه
حيل كعدناهه بالغرفه وكالت ماما سون مجال
السبع يفوت لمينه الفراشات مال جهال رانيا
ودخل...

جانت مدده وبيدهه كانيوله كعد يم راسهه
ومدري شحجه وياهه وفجر ركضت جابت
كلاص عصير وقدمته الهه..

رفع راسه ابتسم لفجر وطبطبلهه بمكان
بصفه انطت العصير لعقيق وكعدت بصفه
حاجاهه ضحكت وكالتله كول والله
ابتسم بوجهه وكالهه والله !!

شويه وطلع ووصه ماما ع علاجهه
فجر طفله بريئه كلمه تاخذهه وكلمه
ترجعهه بسرعه غيرت طريقتهه وصارت تهتم
بعقيق...

حته اخذتهه للمغسله غسلتلهه وكالتلهه اني
الم شعرج وكعدت مشطتلهه بس عقيق
تعبانه حيل حته عيونهه گوه تفتحهن...

رانيا... مرن يومين بديت استعيد
نفسي من الهبطه بس صرت ماانام بليل
كلساع افز اتاكد موجودين اطفالي..

اختنكت الساعه ب١ بليل لبابه كاعده تشوف
تلفزيون كتلهه كومي وياي مختنكه..

طلعنه للحديقه مال القصر امينه لان صايره بين
المشتمل وبين القصر اضويه عاليه والكل نايم
سولفنه شويه واشتميت هوه احس
نفسي ارتاحيت...

انفتح باب المضيف طلع منهه جراح
هذا بس يشوف لبابه يجي عليهه
وهي بس شافته كامت !!

ظليت كاعده اباوع للسما شكد صافيه
والليل شلون موحش ويخوف..

هم عدهم ابواب هواي للقصر احنه كاعدين
بجهه المشتمل والشارع بس اشجار عاليه محد
يشوفنه اله يجي باتجاهنه..

سمعت باب انفتح ظليت كاعده بس حركه
وصوت وشوشه وشي يطكطك
صار عندي فضول اشوف كمت وكفت وصرت ورا
الشجره..

شفت بعيني واتمنيت مااشوف
حته لا احمل حمل الشهاده
الثقيل!!

شفت عامر ابن جبار وجبار
وواحد وياهم مااعرفه شايلين اسلاحهم
ومثل اليتختلون حته محد يشوفهم..

اجت حجايه جبار بأذاني
وهو يگله تاكدتوا مات خاف بي روح!!

رد علي عامر لا بويه سويناه منخل
والجماعه كتلهم ذبوا بالشط حته
يضيع اثره ..

جبار.. كفوا منك ديربالكم ووصي الازلام
لايوصل الحجي لشيخ ياسين وهذيج
الساعه يصير عدنه سبع ثاني..

عامر.. شغلنه امين محد يدري
حته ذبينا بصوبهم مويمنه..

رانيا... اسمع ومخليه ايدي ع حلگي
اكو روح انقتلت هسه ؟!
اكو روح بريئه غادرت لربهه مظلومه ع ايدهم..

جراح ولبابه اختفوا واني لا اكدر اطلع
ولااكدر ابقه خاف يشوفوني
هم طلعوا من الباب الثاني ع البستان
بس الخوف اخذني خاف يشوفني بس اطلع
ساترتني الشجره..

مشوار واني واكفه وكلبي يدك براسي
طفت الكهرباء ع حظي كمت مااشوف كلشي
ماعدهم مولدات لو يفتحون مولد مال بيت
لو يظلون للصبح بدون ضوه..

طلع واحد فتح المولد بس ضواهه
ضعيف كام يطفي بالاضويه الزايده
واني رجليه نزل الدم بيهن مااكدر
اطلع واعبر من القصر للمشتمل...

مااحس غير شي قوي حيل
انغرس بعظمه كتفي وصوت هادىء
كدرت اميزه وهو يكول لاتتحرك!!

عباله حرامي لان خاتله ورا الشجره
وظلمه محد يكدر يميز!!

رغم عرفت صوته بس المسدس
بكتفي خلاني من الخوف ردت
اوكع من طولي...

باوع بعيوني واني ارجف رجع مسدسه
بحزامه وكال شتسوين؟ وليش خاتله
تراقبين منو؟ حجاهه وهو يحرك راسه
باستغراب..

رانيا.. اأأأ أني أأأأأأ...
ضرغام.. سبحان الله انبلع السانج
شو فتحي حلگج خلي نطلعه

رانيا.. بس الله يدري بالخوف بذاك الوقت
عمري ماانسه شلون اديه ورجليه
ترجف عبالك حلم وجاي امثل فلم رعب...

ضرغام.. مو وياج انه شجابج للقصر
بالنص الليل!!

رانيا.. اأأجيت ويه لبابه راحت ويه جراح
ضرغام.. وانتي شنو ناطور الهم
وشعندج خاتله وتراقبين!!

رانيا.. الله عليك مااعرف بس طفت
الكهرباء خليني ارجع

ضرغام.. خله رجله كدامي ومنعني
امشي اوكفي احجي الصدك شعندج هنااا
اشفتي ؟!

رانيا.. هو كال اشفتي حسيته وياهم
لو هم شايفهم كمت اأتأت وارطب بشفايفي
وكلبي يدك بأذاني عبالك ماطور..

ضرغام.. لاتختبرين صبري احجي
شعندج شبيج خايفه اشفتي؟!

رانيا.. ماشفت شي عليك الله خليني
ارجع والتوبه اذا طلعت..

بعدني احجي ورجعوا نفسهم
الزلم وصوت جبار وهو يكح
باوعلي ضرغام وعبالك افتهم الخايفه منه..

موزلم وشيوخ عبالك ذيابه صاح جبار
منو هنااا ؟!

بسرعه ردت اوكع واشوف رجلين عامر
تقترب ع الحديقه وضرغام واكف وگانو
يفسر اليصير براسه..

بسرعه سحبني من ايدي وابتعدنه متر
صرنه ورا شجره السدر عاليه حيل
بصف المضيف وخلاني ع الحايط

هستوني اريد احجي كتله ضرغام
حط ايده ع حلگي ومنعني!!

اني واكفه ع صبه عاليه وهو اقل
مني بدرجايه رجله ثانيهه
وطابگه بالحايط والرجل الثانيه بالكاع...

عامر يدور ويصيح منو هنا
ويحاجي بجبار ماكو شي يابه هاي
بزونه حركت الشجره..

نسمع صوتهم وهم يبتعدون واني
ماينوصف حالي گلبي راح يوكف
ورجليه ارتخت بعد ماتساعدني

ايد ضرغام ضاغطه ع حلگي بقوه
بس مايباوع بوجهي جان داير وجهه
ع جهه صوت عامر...

من ابتعدوا وبعد مالهم صوت
باوع عليه اجت عيني بعينه
عيوني امتلت دموع ظلمه مايبين
شي ...

خله رجله الي بالكاع ع الصبه
وصعد صار اطول مني بهواي
وقريب عليه بشكل دنك راسه على اذني
...

وكال راح اشيل ايدي لااطلعين
صوت !!!

هزيت راسي رفع ايده ومن رفعهه
بأصبعه الجبير تعمد يطخ شفايفي
بضغطه قويه...

ابتعد عني نزل من الصبه واني الهث
كلبي احسه يصيح ارحميني ساعه
السوده الطلعت اشتم بيهه هوه وكتلج
مختنك...

كعدت بالكاع مكرفصه وهو واكف
كال هم نفسهم شفتيهم!!

بدون وعي بس اريد اخلص منه
هزيت راسي اااي

ضرغام.. شسمعتي؟
رانيا.. ماسمعت؟!
من كلت هيج فتح اللايت بوجهي
وشفت ملامحه شلون مبين الغضب عليهه..

حجيت كلشي حته بدون مااخذ نفس
احجي وارجف وختمتهه الله عليك
لاتورطني!!

ضرغام.. اني اورطج؟! يمكن كايلج
تختلي بنصاص الليالي..

كومي يبلوه مدري منين الله
ذبج بطريقي خاف عوزني
سلبان راحه!!

رانيا.. كمت وياه باوع ماكو احد وصلني للمشتمل
قبل لا ادخل كال ديربالج تحجين لاحد
اعتبري نفسج ماسامعه شي !!

رديت علي بخوف ميخالف وبعد مااطلع
والله..

ضرغام.. خلي انشوف تثگلين باجر
الكاج كاعده بالمضيف ماتوبين!!

رانيا.. عافني ومشه واني طبيت الهث
جوه هاي الحقيره لبابه اليوم اشلع
شعرهه وين ولت هم بيهه بله...

طبيت ادور عليهه ماكو معقوله لسه
مارجعت اخاف اطلع انوب
شويه وانفتح الباب هي وفجر

صحت بيهن وجريت لبابه من شعرهه
لبابه.. والله هنا كاعدين بالحديقه
وحته فجر ويانه انتي مالگيناج
عبالي رجعتي..

ركضت لفراشي حسيت نفسي
طفله ام عشر سنوات ومحتاجه امان
والله يمكن منا لمن اطلع من البصره
بوجهي للمجانيين

لبابه... مر اسبوع كامل منطلع من المشتمل
البنيه عقيق زينه احسن من قبل
اهتمام السبع بيهه موطبيعي باليوم
مرتين يجي يشوفهه...

فجر تقبلتهه بس هي متطلع من الغرفه
حدهه للحمام وللمطبخ وترجع لفراشهه..

بيومهه اجه السبع كال راح اخذ عقيق
لغرفتي رتبتهه الهه وتشكر منه واخذت
ملابسهه وطلعت من يمنه...

ورا يومين ماسمعنه اخبارهه
ماما انطتني دولكه عصير
وكعك كالت اخذي الهه خطيه
خاف تستحي من اهل القصر تطلب..

اخذتهن ورحت بدون ماامر ع المطبخ
مال القصر بوجهي لغرفه السبع
فتحت باب الغرفه بدون ماادگه
عبالي وحدهه..

وانصدم بالمنظر اشوف السبع كاعد
بالكاع ومرجع ظهرهه ع الحايط
وهي نايمه ع رجله ومخلي ايده
ع شعرهه!!!!

.
.
.
يتبع......

#خبايا_الاقدار
❤️♨️.
.. البارت الرابع عشر


لبابه... هي بحكم خطيبته وجابهه وخلاهه
بوسط العائله مابيهه شي بس اني اشوف
السبع شي جبير ماعنده هيج سوالف..

بسرعه سديت الباب والتفتت اريد
ارجع مهزومه كلت خلي امر ع المطبخ
انطيهم الكعك وارجع بس احس
نفسي صخنت من الموقف لان مااستأذنت...

وصلت باب المطبخ وصاح عليه
لبابه!!! التفتت واني مدنكه اشوف رجليه
تتقرب واني خجلانه مااعرف الاصول ولازم
ادك الباب..

لبابه.. اسفه مادگيت الباب
السبع .. ماصار شي محتاجه شي،؟!
لبابه.. ماما دزت هذني لعقيق كالت
خاف تستحي
السبع.. مشكوره خليهن بالمطبخ

لبابه.. خليتهم بالمطبخ وطلعت اركض
شلون سالفه هاي هو ولامتهتم واني مستحيه
من يمي..

جراح التحق دائما يشكي من دوامه
يكول متعب وع الحدود وتغطيه ماعنده
لحدمايجي يله نتخابر..

ضرغام التحق لبغداد وبس السبع
موجود وعقيق ماتطلع ابد وحته
بنات القصر محد جابت طاريهه والكل
ساكت من ناحيتهه!!

بعد مرور اسبوع الحجيه بركات ذبحت
ذبيحه لوجه الله ناذره كل سنه بهيج وقت تسوي
اذا اجاهه ولد وجايهه عمي فاضل
ابو السبع..

عزمتنه على العشه للمغرب ورحنه
كلهه موجوده عماتي عشيره وبناتهن
والجنايين وولد جبار وبناته صايره
هوسه..

ماما ماتحركت ابد جانت قبل تشتغل
وتختلط هسه ابد ماكامت هي وخاله
ام رانيا كعدن ومااشتغلت ولاحته
حجت ويه عماتي..

بس مبين ممرغوب بينه وعيونهم
تريد تفترسلنه كلنه...

ابرار جانت موجوده اجت كعدت
يمنه سولفت شويه وع دراستهه
وسألتني جراح شلونه وياج وكامت!!

صار العشه وكالو افرشو السفره
هم يسموهه سماط انتبهت عقيق
ماموجوده بنص هذا التجمع..

فجر بصفي حاجيتهه فجوره
شو عقيق مموجوده؟!
فجر.. مااعغف من اجينه سألت
نوغ كالت متجي ابد للقصغ
وماتطلع من غفتهه!!

لبابه.. خلي انروحلهه انشوفهه
فجر.. اكعدي صايره خفيفه هو السبع
يجيبهه

لبابه.. ولج ام السان اني خفيفه
غير اكول خطيه وحدهه
فجر.. متشوفين شلون يباوعن علينه
عبالك جايين من القمغ..

لبابه.. رفعت راسي صدك اكو وحده
كاعده ع الدرج اول مره اشوفهه
تنطي شبه لجبار نفس الضخامه

جابو امواعين الاكل وكلهه هبيط
لحم والريحه ترست خشمي
اكلنه هواي حسيت نفسي انتخمت..

كمت غسلت ورانيا هم تغسل لجهالهه
وهاي الماعرفهه تباوع بغيض
ومبينه من وجهه نسخة جبار الثانيه..

رجعنه كعدنه وفاتت نور صحتهه
كعدت يمنه حامل شكلهه ناعم وصغيره
وبطنهه شكبرهه؟.

لبابه.. نور منو هاي لاتلتفتين لاتشوفنه؟!
نور.. بسرعه التفتت هاي وسن عمتي بنت
الشيخ جبار الجبيره..

لبابه.. شو اول مره اشوفهه ماتجي يمكم
نور.. هاي سالفتهه طويله عريضه ولجن
تعالن يمي مشتاكه اسولف وياجن

لبابه.. هسه نكول لماما نصعد بغرفتج
نور.. لا ورا مااكمل مواعين واجيجن نكعد
بالحديقه..

لبابه.. شفتي عقيق شو مااجت
نور.. هاي عقيق خلت الشيخ يسودن
لوتشوفين جدي الشيخ سوه بيومهه بس
عاقد عليهه بعد مايكدر يسوي شي

رحتلهه اصيحهه ع العشه كالت مااريد
وتلكاني السبع كال يخلص العشه واجيبهه
تسلم ع الحجيات..

لبابه.. كامت نور تكمل شغلهه واحنه كاعدين
هوسه نسوان وسوالف وقال وقيل
وجهال رانيا گوه مكعديهم شبعتهم امهم تگرص..

شويه واجت عمه زينب وهي تصيح
دخلي بنيتي هذني البنات هنا لاتستحين
اباوعلهه عقيق!!

لابسه دشداشه طويله وحلوه مرتبه
ولابسه بس مال حجاب الاميره
بدون كب تمشي مدنكه ومستحيه..

رحبت بيهه الحجيه وهي ماتعرف
شتسوي تأشرلهه سلمي ع هاي
تسلم ورجعي بوسي فلان حجيه..

اخير شي كعدت بصفنه حاجتهه ماما
شلونج بنتي؟! جاوبتهه كلمه وحده زينه
وسكتت..

بيدهه مفتاح الغرفه بس ايدهه فارغه
مابيهه حلقه حاجيتهه ليش مااجيتي
للعشه؟!

عقيق.. مااحب الهوسه ومااعرفهم واستحي
وجانو يطبخون برا ماكدرت اطلع

لبابه.. تعشيتي؟!
عقيق.. لا بعدني
لبابه.. اگلهم يصبولج عشه
عقيق.. لا شكرا اني مااكل لحوم..

فجر.. انتي ليش ماتجين يمنه
وين تخلصين اليوم؟
عقيق.. اخذ علاج وعلاجي بي منوم
واظل نايمه..

لبابه..ماتحجي سؤال وجواب بس عيونهن
عليهه وكلهن مبينات ماعاجبتهن ويضحكن
بالخفيه..

اجت هاي الي اسمهه وسن صاحت ماتكومن
هذني الحديثات المواعين مكومه چااا انتن
مو بنات الگصر ..

الحجيه.. عوفيهن ياوسن هذني ترفات
وانتن عشيره غسلنهن.

وسن.. يا شيخه يتعلمن هي الهوسه
والمناسبات تعلمهن چاات مويظلن
فاهيات..

ساهره.. كومن ماما ساعدن نور وايناس
وشويه وانروح
لبابه.. باوعت لرانيا ماتگومين؟!
رانيا.. لاعيوني هاي كعدتي مابيه
حيل سالفه جديده...

لبابه.. طلعنه برا وفجر سحلت عقيق
كالتلهه بس اوكفي باوعي ليش وحدج...

مواعين كومه وفاتحين الصونده
بالطرمه وهوايه بنات مااعرفهن
بنات بنات فلان وعلان ..

عقيق وكفت باب ع جهه واحنه نغسل
وياهن فات ضرغام لابس الدشداشه السوده
ورافعهه من جهه وجكارته بحلكه وصاح
نور جاااي..

راح للمضيف ونور راحت تسوي
جاي شويه واجه السبع يمشي ويه
رجل عمتي نوفه ويسولف كمل سوالف
وتقدم علينه وراح وكف يم عقيق..

السبع.. تعشيتي؟!
عقيق.. لااا..
السبع.. ليش موعندج علاج؟!
عقيق.. مااكل لحم ماحبه وممنوع عليه

السبع.. انه مامتعشي هسه اخلي
خديجه تسويلنه صينيه واكلي وياي

عقيق.. لبابه كالت تعالي يمنه يكعدن
بالحديقه بليل
السبع.. اي تعشي وروحي سلمتي ع
الحجيه..

عقيق.. ااي وهواي حجيات بوستهم
بس مدري شلون يباوعولي
السبع.. عوفج منهن هن ماعدهن غير
الگشم بالاعراض..

تعالي اكعدي ع هذا الكرسي لاتظلين واكفه
ومن يكمل العشه تعالي بالغرفه..

عقيق.. اهتمامه بيه يذكرني بابا
مع العلم ماشفت شي منه حته مايباوع
بعيني من يحجي ...

من تخربطت واخذوني للمستشفى
كعد يمي وكال ليش هيج حالتج
ومماكله ؟!

انفجرت بالبجي واني احجيله وجودي
غير مرحب بي اصلا هم التهوا ونسوني
واني استحي اكوم واطلع ادور ع اكل ...

سكت بوقتهه ورا ماصرت زينه اجاني للمشتمل
وكال لازم نعقد حته اخليج بغرفتي مااكدر
احميج وانتي مو ع ذمتي بس بعدين عرفت
هذا الشيخ جبار متعارك وياه ...

من اجاني وكال جهزتلج الغرفه
اول مادخلت بيهه جانت الحجيه موجوده
وره شويه جاب شيخ وجراح وضرغام
وعقدنه..

جانت حالتي ماتسمح حته احجي شكد
حجت الحجيه وتوصيني بس جنت مااكدر
افتح عيوني من التعب..

بديت اتحسن شويه وكمت انتبه
الغرفه كامله خشب جديد بس الجربايه
نفر وجبيره الغرفه بيهه قنفه مال تخم
وطبله مرتبه...

من افتح باب الغرفه تصير الطرمه وباب
المطبخ كدامي وبالجانب صحيات كامله
ومرتبه بناء جديد...

اخلص وقتي كله بالغرفه السبع
يجي يمي يسالني شلونج وشمحتاجه
ويروح ومرات تجي الحجيه ..
يبات يم ضرغام بس يجي ياخذ
ملابسه ويطلع...

كملت العشه نور صينيه بيهه لحوم نوعين
دجاج ولحم بقر وتمن وتشريب واخذتهه
للغرفه وصاحتني...

رحت كعدت وشويه واجه السبع
اول مره اكعد وياه واكل مرات من
انام اكعد الكه نفسي مغطيني حته كمت
البس ستريج بالحر وانام خاف ترفع ملابسي

ام جراح ماخلت شي مااشترته الي
حته احسن من ملابسي الجنت
يم بابا...

اكلت شي قليل اني اكل بخاشوكه
وهو مدري شلون ياكل بيده سوالي لفه
بيهه لحم دجاج وانطانياهه..

عقيق.. مااريد مااحب اللحم
السبع.. اكلي شنو ماتريدين هذا لحم
ابيض مايأثر اكلي بويه عودج ضعيف..؟.

عقيق.. اخذتهه منه كوه اكلتهه ابد مااحب
اللحم لا دجاج ولا لحم بقر بس نبات
اكل..

كمل وكال الحمدلله كام غسل واني
لميت الصينيه مااكدر اشيلهه صحت
ع نور اخذتهه

تلكاني كال ليش صحتيهه اني
اشيلهه ؟! يله غسلي وروحي يم
البنات بالحديقه البرا واني اجي
ارجعج دنيا دليل لاترجعين وحدج..

غسلت وقفلت الغرفه ورحت ويه نور للحديقه
البرا فجر ولبابه كاعدات ويمهن عصير
والجو حلو ...

شويه احس نفسيتي ارتاحت ع الاقل
البنات حبابات بس كلساع تجي لمحه
ابالي واتذكر السبع !!

عندي تساؤؤلات هوايه علي ليش مايضحك؟
ليش وجهه كئيب دائما؟ ليش عصبي؟
ليش الكل يخاف منه حته الشيخ ويحسبوله
حساب!!!؟؟

هوايه اسئله مالگيتلهه جواب
وظالات ابالي !!
فززني صوت نور وهي تذكر اسمه..

هاي وسن عمتي يعني بنت الشيخ
جبار بس امهه ميته الشيخ متزوج وحده
گبل هيام وجايبه وسن وميته

وسن زوجهه الشيخ لابن عمه
موغريب ولابعيده بس هي
شيخانيه والكل يهابهه لنهه مره
زلاميه..

امي دكول هي بعمر السبع وجانت
تريد السبع چاتله روحهه علي
والشيخ كأيله اتزوجهه واسجل الكاع بأسمك
والسبع ماقابل

وظاله تنتطر شوكت يحن السبع
وياخذهه وكبرت ومااخذهه وتالي
اتزوجت بالصوب الثاني ولد
عم الشيخ..

هاي الشيخ يحبهه حيل وياخذ الشور
منهه حته جانت تشحنه ع حبوبتي هيام
ويجي يطگهه ...

ومن عرست كلهه كيفت نسوان الگصر
خلصن منهه ظالمه وجانت حته العجين
تضمه بالبوفيه..

لبابه.. شنو من نفسيه اكول تباوعلنه
بغيض
نور.. چاااا غير من سمعت بعقيق
سوت اكوان وكالت لابوهه اطرد السبع
من الگصر خلي يروح ابستان ابوو

والسبع مايدري لو سامعهه جان
فرگ حلكهه بس الشيخ ردهه وكالهه
مالنه خلگ اخبال السبع بتوالي الليل

عقيق.. شنو توالي الليل شبي؟
نور.. جنت صغيره انه وامي تسولف
دكول من يعيلون بي يسكت لحدما
ينفجر عليهم مايتعامل غير بسلاحه

وكله نص الليل يسوي البستان
جبهه عليهم ودومه عمي عامر مكتول
منه مره متعاركين ورايد يشمر عمي
من السطح ومتلاحگي..

چااا ماتشوفن كلهه تسكت عنه
لأنه اذا انفجر يحرك اخضر ويابس
مالنه خلك السوادين

عقيق.. هو يضرب بالسلاح
نور.. چااا ماحاجيلج ينام بسلاحه
خيه غير السبع عنده ثار مال ابو
حته مايتزوج خاف يموت

فجر.. اسم الله عليه نوغ ماتسولفين
بس بالدم والسلاح مثل جدج الشيخ

نور.. جدي الشيخ بطل محد يصير
مثله زلمه!!

فجر.. مو زوجج غصب عنج وكمتي تبجين
وانتي دكولين بطل لعد اذا موبطل شيسوي
بعد..

لبابه ... كاعدين انسولف والمواضيع
شيقه ودك تليفوني جراح عفتهن وكمت
جاوبته

لبابه.. الو..
... هلاااا
.. شلونك
... زين اذا انتي زينه

.. شوكت تجي
... نازل انه بالطريق متشوفين
اكو تغطيه بس ابات ببغداد والصبح اجيكم
لان الدولي بليل تلزمه السلابه

... اليوم تذكرتك كلهه موجوده ع العشه
بس انت ماكو
... شسوي اذا شامريني بنهايه العراق
ع الحدود السوريه تطلع روحي يله
تخلص الايام..

... يله انتبه ع الطريق وديربالك
ع نفسك
.. انتي هم من اوصل اخابرج..

لبابه.. سديته من عنده ورجعت للبنات
بس كعدت اجه السبع اخذ عقيق
صارت بيه حاله كلما اشوفهه اتذكر
شلون نايمه ويلعب بشعرهه...

طلعت رانيا يمنه نيمت جهالهه
دنيا صيف وحاره نصعد ع السطح
انام لو يحن ضرغام ويفتح المولده

نور.. بيوم الضرغام بالمضيف يفتحهه
لان ماينام يظل كاعد وبيوم اليروح للدوام
لو للبستان يكتلنه الحر نصعد ع السطح

لبابه.. وهو ضرغام شعجب مايتزوج
نور.. ملوا من عنده شكد حجوا چااا غير
يحب مرته مايكدر ينساهه...

لبابه... مندمجين بالسوالف وصوت صريخ
اجه من جهه البستان الثاني يعني جيرانهم
صوت عياط موطبيعي نسوان ع زلم
عبالك مكبرات صوت...

كمنه مفزوعين وكلهه طلعن تركض ع الصوت
جبار يلبس بعگاله ويركض وعامر وراه
ويصيحون يابويه شصار يم شيخ ياسين...

السبع طلع وياهم بس ضرغام
وكف بمكانه المعتاد وارتجه ع الحايط
والجكاره بيده...

رانيا.. السمعته نسيته مثل ماكال ضرغام
مافكرت ولاظل ابالي تأكدت حياتهم هم
هيج قتل واسلاح...

بس من صار العياط وكلهه طلعت تركض
واحنه بره شفت ضرغام يم السياره واكف
يدخن ويباوع ع جهه البستان...

يمكن دقايق مواكثر واجت الاخبار
تركض كالوا اخو الشيخ ياسين
لگوا مكتول وبالشط...

هنااا احس واحد ونزع روحي
بدون وعي ركضت ع ضرغام الواكف
وكتله الله عليك لادكول اني سمعت...

جان لابس تشيرت ربع ردن زنده
كله طالع واسود والضوه عاكس
ع عگده حاجبه المرفوع...

اتلفت منا ومنا وكال ارجعي
موكتلج انسي السمعتي!!

رانيا.. شلون انسه خاف يصير
شي مو هذا لگو واني شاهد
اعتبر خاف الله يعاقبني..

ضرغام.. روحي اشهدي منو لازمج؟!

رانيا.. شلون اشهد حته اروح بيهه
ويقتلوني..

ضرغام.. چااا شحجي انه اكلج هيج
تردين هيج انسي الموضوع راح للرحمه
وهذا الشيخ ياسين مايترك السالفه

رانيا.. هو منو الشيخ ياسين انتم
شكم شيخ عدكم ؟!

ضرغام.. حته انه شيخ ترى بس بطور
التكوين!!

يابه شكد فضوليه وحاشره خشمج
بكل سالفه وتاليتهه توكعين وتعالو
يمعودين لموني!!

رانيا.. تكدر تجاوب بدون هالاستفزاز
احد كايلك انت مستفز؟

ضرغام.. اي المثلج كاللي وبعدين
منين ماالتفت الكاهن!!

رانيا.. شتقصد؟!
ضرغام... انتي جميله بس بنفس
الوقت غبيه

رانيا.. احترم نفسك اتجاوزت هوايه
ضرغام... امششجي لللجججج
جايتني بنص الليل وتعال نبي الله يوسف
اسكت ...

رانيا.. انت صدك متستحي اني من احاجيك
بمثابه اخ لان معروف بشيمكم ومن كدما مدحوا
بيكم بس مومعناتهه اني من النوع الي ابالك؟!

ضرغام.. تعرفين النوع البالي؟!
نوعج عندي مفضل !!

رانيا.. والله متستحي. والصوج موبيك
بيه اني امنت بيك وحجيت ..

ضرغام.. لاتامنين الحمدلله من عرفتي
غلط تثقين وتبيعين ميانه ويه الماتعرفي

وهسه تكسحي من يمي قبل ما اطلع
السانج واحطه بيدج ع اسلوبج هذا!!

رانيا.. احس الحراره صعدت براسي
منا صوت العياط والصريخ
ومنا اسلوب هذا المستفز الميستحي..

طبيت من الباب شفت سواده واكفه
ورا الحايط هيئه بشر تحرك
بالضبط ورا الحايط الواكف
يمه ضرغام!!

معقوله احد سمعنه بس ظلمه وماكو ضوه
وخفت اتقرب بس شجر ومتسلق عالي
بسرعه رحت للمشتمل...

بيومهه اخذت عهد ع نفسي
مااطلع بعد لو اختنك لو اموت
بس قراري اجه متأخر...

ماعرفت منو الشيخ ياسين ومبين
مهم بحيث صار الركض ومطافر
واليكتل جبار مهتم ويصيح ياخويه
الماجابته امي

سألت لبابه هم مطفيه دكول شمدريني
هم نسوان وزلم شيوخ كلساع طالع
واحد

رانيا .. دخابري جراح وكليله وشوفي
ردة فعله جنت احجي هيج بس حته
اعرف منو وليش قتلوا ؟!

دكت لبابه ع جراح وطلعت حجت وياه واجتني
كالت ولج هذا جراح تخبل من سمع ؟!

رانيا... ليش منو المات؟!
لبابه.. يكول شيخ ياسين ابن عم جبار واساسا
الشيخه جانت عند ابو ياسين وصايره مشاكل
وبينهن عداوه

وقبل فتره كايل الشيخ ياسين اذا واحد
من عائلتي اجته حمه تايهه ابلي جبار
وهسه يكول هذا اكيد راح يعادي جبار
اكثر...

رانيا.. بگلبي كلت لعد لوتدرين هو القاتل
بس گلبي نار ماكدر احجي بلعتهه وسكتت

لبابه.. السبع كال جيبوا عقيق يمكم
لان السبع وشيخ ياسين اصدقاء واكيد
راح يروح وياه للدفنه..

رانيا.. لاتروحين اكعدي هذا ضرغام
برا كليله يجيبهه!!

لبابه.. طلعت للحديقه صحت ابو ليث
جاوبني هااااااااااا بس بجره ومال واحد
بزعانه روحه

كتله السبع كال جيبوا عقيق يمكم
مااكدر اروح للقصر اخاف
ضرغام هسه اجيبهه فوتن جوه لاطلعن ابد

لبابه.. جراح جاي بالطريق وكال
اذا ضرغام موجود خلي عينه ع القصر

ضرغام.. وشبي القصر ورث الدامرجي
ادخلي جوه ..

لبابه.. يحجي ع اعصابه متنرفز مدري
شبي ولو هو منو صاحي بيهم!!

شويه واجت عقيق يمنه وظلينه لنص
الليل نسمع الهوسه والصياح واللطم
وكل نسوان القصر راحت حته نور ...

ثاني يوم للعصر يله اجه السبع وجراح
لان جراح مناك ورايح وياهم للدفنه
السبع صاح ع عقيق حجه وياهه ووصه
ماما كالهه خلوهه يمكم

واني وكفت يم جراح برا تعبان حيل
ومتغير كتله شبيك؟!
جراح.. مابيه شي مانايم ابد لان رحت وياهم

لبابه.. هو شكبره الميت؟!
جراح.. ب٣٠ عمره وعنده ٥ اطفال خطيه
مجرمين مزرفي الزرف ماكو مكان فارغ

لبابه.. خطيه وماعرفوا القاتل؟
جراح.. ماسوو فاتحه اله ياخذون ثاره؟!
لبابه.. يعني شنو؟!

جراح.. من العادات من يموت واحد غدر
مايسووله فاتحه اهلهه اله ياخذون بثاره
يله يسووله ولو بعد عشر اسنين

لبابه.. يعني ابو السبع ماسويتوله؟!
جراح.. جدي الشيخ مامسويله وظل ثاره
لسه وعود من ياخذه السبع يسووله عزاء
ع روحه

لبابه.. وهذا الشيخ ياسين مبين مهم
شوف السيارات وين وصلت اول مره
اشوف هيج

جراح.. انسان بسيط كل اليجي يتسمى شيخ
وياسين شيخ رغم صغر عمره بس ينحلف
براسه من الغيره والشهامه العنده..

لبابه.. شكبره؟
جراح.. بكد السبع جان هو والسبع ينامون
بالبستان من كدما يحبه !!

خلي اروح اسبح وانام ولااطلعين
القصر فارغ كلهه يمهم ..

لبابه.. ماشي ارتاح ... حجيت هيج وباوعتله
دنك عليه باسني من خدي وراح...

ماصاير شي بيناتنه ابد بس هذيج الليله
من حضني وهاي اول مره يبوسني
من خدي..

ابتسمت ودخلت جوه الوضع مكركب
كلهه ممرتاحه رانيا متطلع ابد
وبس تحجي ودكول عمي تهديد بغداد
ولا خبال بيت جريان تقصد علينه...

رانيا.... ٤ ايام ضبط اني باب المطبخ
مااشوفه حجيت ويه بابا حته نرجع
واقتنع كال خلي يهدء الوضع ونرجع
نأجر بغير مكان...

بيومهه جنت كاعده اشوف تلفزيون
وسيوفي جاب تليفوني كال ماما اجت
رساله...

فتحتهه وهاي اول مره اشوف رقمه
وحروفه حته مخازنه الرقم بس عرفته
من اسلوبه!!

كاتب" لا اطلعين ابد ثگلي واكعدي
بالبيت وجهالج لاطلعيهم "

ماجاوبته بس ماارتاحيت للرساله
وعبالك صاير شي وفعلا ماطلعت
ولافكرت اطلع!!

ثاني يوم اجت الي اسمهه وسن
واني ماجنت موجوده بيومهه من حجت نور
عليهه بعدين اجيت لذلك مااعرف هي
من يا مله؟!

كعدت سولفت ويانه وسوالف
نسوان كبار وجايبه وياهه
كيك وتحجي ع الفاتحه وشلون
مرته متخبله ع رجلهه...

من طلعت كالت بلكي تنطيني
رقمج ارتاحيتلج والله وانه وحدي
عاد اسولف وياج;!!

الصراحه انحرجت حيل مااعرف شكول
اني حته ماحجيت وتعمقت وياهه بس
فشلت لان ام جراح كاعده كمت وانطيتهه
الرقم...

اخذته وطلعت مااتصلت بيه بس ورا اسبوع
بابا حجالنه كال هذا شيخ ياسين كايل
ماارضه بس بكتال اخوي اله ادمر السوه هيج..

بابا يحجي وكلبي يلعب المشكله
بابا كلساع وجايب خبر وعبالك صارت
بي حاله مال قال وقيل...

دك تليفوني رساله وهم من رقم غريب
فتحتهه مكتوب تعالي يم البحيره
اني ضرغام عندي حجي وياج!!!

مايلام من كالي انتي غبيه وفعلا
غبيه وطايشه ترددت وخفت شعنده
بس كلت اكيد ع هذا الموضوع وهو يحميني

البحيره موبعيده وامينه حيل والبستان مفتوح
يعني موشي يخوف اومكان مشبوه..

طلعت بحجه اشتم هوه سيوفي ركض
وراي ورجعته الهبطه لسه بيه
تمشيت للبحيره وصلتلهه ماكو احد

هي حته سيارة ضرغام مو هنا
يعني وين موكفهه مثلا ظليت انتظر
واتلفت والموبايل بيدي طلعته اريد
ادك ...

ومااحس غير ضربه ع راسي بشي
ثگيل خلتني افقد الوعي نهائيا
حته مااتذكر وين واكفه وشلون؟!

فتحت عيني بألم احس جزء من راسي
طاير افتح عيني واسدهه والالم ممتد
لااذاني ...

شويه شويه بديت استوعب
واركز ع حالتي اني بغرفه
طين قديمه واديه مربوطه لرجليه
بحبل ومحكم وكاعده بوضع مقرفصه!!!

المشكله ياريت بس محددين اديه
ولو كاتليني اهون!!!

جنت مجرده من ملابسي ومخليني
بس بملابس داخليه ورابطين شعري
بحبل للحايط ومثبت بمسمار
بحيث مااكدر احرك راسي

يتبببببببع ....

#خبايا_الاقدار
♨️❤️
... البارت الخامس عشر


رانيا... لحظات الغباء والتسرع ندفعهه
ثمنهه طول عمرنه ومرات تكون لحظه
غباء تنقلك لمنعطفات جديده ماتكدر
تتعداهه..

دموعي نزلت حاره مثل الجمر
تحرك خدي !! احس اعظامي متكسرات
مااكدر اتحرك راسي بعده دايخ والم
فضيع مسيطر عليه..

اريد ادنگ مااكدر شعري مربوط بمسمار
احسهه ينشلع من جذوره !!
حلگي شادي بالشال مالتي وفايت الشال
بين اسناني ونفسي تلعب كامت...

صوت ماكو ؟ يمكن اني
باخر الدنيا الغرفه ظلمه بس
بيهه فتحه صغيره يجي منهه بصيص
ضوه ..

اطفالي صاروا بعيوني كمت ابجي بحرقه
واحس بلعومي شحط شلون اطلع منا
وشلون بهيج وضع حته ملابسي ماخذيهه

لبابه.. بهذا اليوم المشؤؤم مايروح من ذاكرتنه
جانت الساعه ٤ ونص نهاية الشهر الثامن
بسنه ٢٠٠٧ طلعت رانيا كالت هنا بالحديقه ..

تأخرت وخاله كلساع تسأل عليهه
نتصل عليهه يطلع مغلق دورنه الحديقه
والقصر ووره المشتمل ماكو...

ركضت لعقيق دكيت الباب حيل
كلت بلكي الكه السبع موجود
لان لاجراح ولا ضرغام موجودين..

طلعت عقيق وحدهه وكالت السبع
هسه راح للحجيه يشوفهه طبيت للقصر
اصيح السبع تلكاني عاصم صاح بيه

لكيت السبع والحجيه كاعدين
سديت الباب وحجيت واني الهث
السبع رانيا بنت خالي صار ساعه من
طلعت كالت بالحديقه وماكو..

السبع.. وين راحت؟
لبابه.. ماادري حته اخذت تليفونهه كالت
هنا بالحديقه اكعد وهسه خالو تخبل نتصل
عليهه مغلق

الحجيه.. سترك ربي وين راحت البت
شنه‍ي زغيره وتضيع

السبع.. هسه اشوفهه كومي وياي لبابه
... كمت وياه طلعنه من القصر تلگانه
خالو بالباب يلوب ويصيح انخطفت
وين بنتي!!

السبع.. منو يخطفهه حجي هي قريه
قابل بغداد هسه نلكاهه خاف تيهت
بالبستان الثاني المايندل يتيهه!!

ابو رانيا.. ليش تليفونهه مغلق خاف
صار بيهه شي واكلهه الذيب

السبع... هدي حالك حجي الذيب
بليل مو بالنهار تعال اكعد هنا وجر كرسي
كعده وكاله هسه نلكاهه..

ظليت واكفه يم السبع خابر ع جراح
وكاله انت وضرغام تعالو بس كاله
ضرغام بالعشار بس اني بالشط هسه اجي..

هذا الحجي كله صارت الساعه ب٦ وماكو
احد بس جراح والسبع والقصر هدوء

مايعرفون شيسوون جراح مرتين افتر
بالبستان ماكو اي ذكر
هنااا خالو بده ينهار تخربط وضغطه
ماينزل ومنا خالتي ازيد منه

ورا شويه انتشر الخبر جبار واولاده
وازواج عماتي كلهه تفتر وادور
النسوان اجن يمنه وكل وحده تحجي
شكل..

جهالهه بس يبجون لان يشوفون خاله
تبجي ويدورون ع امهم ويكولون
ماما ضاعت..

طلعت برا صحت جراااح سمعني
واجه جان واكف ويه عاصم!!
سألته ماكو اخبار؟!

جراح... ماكو البستان مرتين رحتله
وين اختفت شلون تطلع هي صغيره
والمكان موالهه !!؟

لبابه.. ماتطلع هي ابد وحته من اكلهه
خلي نطلع ماتقبل بس مدري شلون
طلعت؟!

جراح.. ماادري شي مايشبه شي
وفوكاهه البنيه غريبه وتعتبر امانه
عدنه..

لبابه... واكفه ويه جراح واجه عامر يصيح
عرفت مكانهه وين اتبعت الاثر عرفتهه
البنيه ساحليهه بالطين..

السبع.. وين هالحجي وين مكانهه
وشعندك واكف اذا تندلهه؟!

عامر .. السالفه جايده يبن عمي
البت ببستان ياسين واجاني واحد
شهدلي بالسر وخاف اجيبه بطاري

السبع.. ياسين!!!!!!!!!!! لك عامر
لاتلعب وياي حجاهه ونظره استغراب
بينت علي..

لبابه.. جراح صاح بيه فوتي وخالو
طلع وياهم نسمع الصياح مال الزلم
وهوسه وحجايه منا وحجايه منا
صارت هوسه ..

صوت السبع وجراح اختفى وبس صوت
جبار والحمايه يمكن هي لحظات عن روحة
السبع وطلعت هاي الزلم كلهه والحمايه
واولاد جبار مسلحه

خالو يدك ع راسه ويصيح ابوس اديكم
موهيج اني مو حمل دگات عشائر
اريد بنتي واطلع من البصره وماتشوفوني

جبار.. لااا يحجي اليرشگنه بمي
نرشگه بنار احنه بيت جريان تنخطف بت
خطار عدنه واحنه نسكت!!

هذا ياسين عداوته وياي وماكدر يسوي
شي وسوه هيج حته ينزل راسي
لان انتو خطاري وانداست كاعي
واخذوهه...

لبابه.. لحظات مانتمناهه للعدو من التوتر
والخوف كلنه دموعنه تجري شجابنه
وشلون وصلنه لهيج بيئه

الف رحمه ع روحك بابا تعال شوف
حالتنه وشصار بينه!!

بس النسوان يمنه وقفلوا باب القصر
علينه والزلم مدري منين اجت هواي
عددهم مسلحين وداير مداير القصر

وبس سحب الاقسام وجراح والسبع
ماكو ولاضرغام !!

وسن تحشد بالنسوان ودكلهن كل وحده
تشيل سلاح لو سجينه نفزع ويه
زلمنه ..

حسيت نفسي راح اوكع فجر تبجي
وخاله والجهال ميتين خوف خالو
كلساع يتخربط ومخلي بالغرفه
ويبجي دموعه تنزل ع خده ..

شويه وصار الرمي متواصل
مواجهه ناس تضرب ع ناس هاي اتذكرهه
ب٢٠٠٣ بالسقوط هم سمعنه هيج طلقات
وفجأه كالوا دخل المحتل..

هسه نفس الحاله جنت اتابع مسلسلات
هنديه واجنبيه وشلون مواجهه تصير
وهسه كمت اشوفهه صوت وصوره..

شلون الزلم تركض بالبستان واليقهر
اكو شباب صغار ومااعرف منين طلعوا
بس المهم امرهم الشيخ جبار..

شيخ ياسين وارجاله يردون عليهم
وهذوله بدون رحمه ولاكالوا خاف اكو
طفل لو اكو نساء...

عقيق.. صوت الطلقات رعبتني شويه
شويه وصارت اقوى اسمعهه قبل بالتاجي
هم هيج تصير باقل عركه

ابتعدت عن الشباك وكعدت بصف الكنتور
لاتجيني طلقه اتذكرت نور من كالت السبع
عنده ثار معقوله هو ؟!

جربت المشاعر كلهه خوف ع قلق
ع حب ورهبه حسيت كلبي ضاق
واريد السبع مثل مااحتاج بابا واخاف
علي من يتخربط..

انفتح الباب اني قافلته من جوه
اندك ع السريع صوته وهو يكول
افتحي بسرعه!!

كمزت بسرعه فتحت البال التفت
وراه وسحب ايدي وطب وسد الباب..

يحجي وياي وفاتح الكنتور نسه وجودي
جان لابس دشداشه نزعهه وظل بفانيله
داخليه وسروال طلع من الكنتور شي
جبير ولبسه..!!

احجي ومايسمعني صوت
الطلقات طاغيه ع مسامعنه
خليت ايدي ع ظهره وكتله السبع حاجيني..

سحب قميص مقفل لبسه والتفت عليه
وهو يدكم بي وكال لاتخافين اطلعي وياي
للمشتمل القصر فارغ. وخاف يصير شي
وانتي وحدج..

عقيق..شلون مااخاف السبع انت شلابس
شنو هذا الرمي ؟! لاتروح الله عليك
لاتعوفني وحدي!

اول مره يتجرأ ويمد ايده ع خدي
واول مره اتقبل وجود احد بحياتي
وميلت راسي ع ايده وغمضت عيوني!!

السبع.. مااعوفج لاتخافين هدي نفسج
وماكو شي ..

عقيق.. فتحت عيني جان يباوعلي
ماكدرت اباوع ع عيونه دنگت بسرعه
صار رمي قوي انتبه ع نفسه بسرعه سحب
ايده..

اخذ سلاحه وطلعنه وداني للمشتمل واسمعه
صاح جرااااح خلي نلحك بين مايوصل
ضرغام !!

لبابه.. بعد محد يتحمل كلشي انهار بينه
ماما تصرخ وخاله تلطم ع وجهه
صوت الرمي ورانيا مختفيه واحنه
محبوسين هنااا!!

وسن تحشد بيهن والحجيه تصيح
بيهه بس ماتسمع عمتي نوفه تهوس
وماافتهم عليهه كلمات غريبه ..

عمه زينب تبجي وتدعي وكلساع
تجي تحضني ودكلي غسلي لاتنهبطين...

شباك الغرفه مالتنه ع البرا رفعت البرده
اباوع دنيا المغرب وزلم هواي واكفه بالسره
وكلهه مستعده باسلاحهه..

سياره تمشي سرعه بحيث ماتبين بس
العجاج وتريد تنگلب من السرعه..

وصل للقصر حته گوه سيطر يوكفهه
الگدامه كلهم ابتعدوا ونزل منهه ضرغام
لابس ملابس طلعه كلهه اسود
دفع واحد كدامه وطب يركض للقصر..

دقايق وطلع مبدل لابس تشيرت اسود
نص ردن وشايل بيده مسدسين
وركض بجهه البستان مال الشيخ ياسين..

اذن الاذان واسم الله اكبر ارتفع
بالمساجد وجبار وظلمه يبطش
ويجور بالدنيا ..

محد كال الله مايقبل وحرام ؟
محد كال اكو مرضى واكو نساء واطفال
وهسه انفزعوا ؟!
لا ااا مواجهه وكلما جالهم تزداد اكثر ...

لاحكومه ولادوله بيهه خير
وين الشرطه وين الجيش محد يسمع
هذا الرمي ؟ بس بعدين عرفت هاي يسموهه
دگه عشائريه وحته الشرطه ماتتدخل اله تفض
ويحاسبهم القانون...

ليله مأساويه بحد ذاتهه كلبي ع رانيا
وع جراح خالو روحه تفرفح ع بنته
جهالهه كوه ناموا ويفزون مرعوبين!!

يوكف الرمي نص ساعه ويرجعون بنفس
القوه واكثر وناس ترد ع ناس لو بهاي
الطلقات محررين العراق هم تحرر...

اباوع لعقيق من اجت ولحظ هاللحظه القران
بيدهه وتقره وتدعي جانت تدعي وتقره بخشوع
كل جوارحهه واحساسهه بكتاب الله...

صارت الساعه ب١٢ بليل واسمع
عمه زينب تصيح جراح لاتروح ابوس
راسك يمه لاتروح..

ركضت ليبرا حته حافيه رغم اكو زلم
غريبه تحمي القصر بس شافني
صاح اوكفي ابمكانج!!!

اجه عليه فتح ايد وحده والثانيه بيهه
المسدس مالته دخلت جوه ايده وحضني
حيل وباسني من راسي!!

جراح.. لا اطلعين الله عليج لا انتي ولا اختج
هذا الباب لاتوصلي لحدما تفض..

لبابه ... جراح اني خايفه؟! رانيا مالگيتوهه
جراح.. شنلگه يالبابه هو اصلا ماكدرنه نعبر
الحد البينه وبين الشيخ ياسين

ياسين متخبل علينه والسبع يا لبابه اختفه
ماشارك ابد دورت البستان كله ومالگيته!!

وضرغام مدري شبي مثل المسودن عاف
الدنيا كلهه وتعارك ويه عامر يريد يكتله...

لبابه.. وهاي لشوكت تخلص لا رانيا ولا
سكتوا شلون نظل هيج؟!

جراح.. عامر متاكد رانيا ببستان الشيخ
ياسين وهذوله يرمون عليهم شلون يفوتون
حته تفاوض ماكو وخابروا ع شيوخ من الناصريه
تجي تدخل..

لبابه.. انت موضابط وضرغام رائد ماعدكم
سلطه عليهم وتخابرون الشرطه!!

جراح... ردت اخابر وضرغام منعني كال
خلي نلگه البنيه ونتصرف بس السبع وين
شلون هيج عافنه وحدنه!!!

دخلي جوه حبابه وديربالج ع امي ترى
سكرهه مرتفع وماحاسه ع نفسهه

لبابه.. ديربالك ع نفسك خوما احد مات
جراح... اثنين تصوبوا من ازلام القصر
ويكولون من الشيخ ياسين واحد متوفي...

لبابه.. شنو ذنبهم الله لايوفقهم
جراح.. هاي بعد العتب ع الدوله الي انطت
اسلاح بيد العشائر ..

لبابه.. سلمت علي ورجع وعمه زينب
متخربطه والساعات بطيئه وكلساع
نفز من رمي متواصل...

( الاحداث داخل البستان منقوله
من الابطال عن طريق لبابه)...

جراح... عامر نزل سلاحك عاد هاي السويتو
شنو لا البت طلعناهه ولاحفظنه مي وجهنه!!

عامر.. امانه عدنه البت وتنداس كاعنه ويخطفهه
ياسين وتريدنه نسكت !!

جراح.. من العصر لسه وينهه بطولتك
اشمر اسلاحك وروح لياسين طلع البت
الجهال شنو ذنبهه وهسه الساعه ب٣ بليل..

جبار.. جراح چنك نسيت عاداتنه وصرت
تحجي مثل الغربه ماتريد ارجع خلينه
ناخذ حگنه..

جراح.. جنت مدنگ اعبي المخزن
وصوت جبار وهو يصيح لا يالسبع
موهيج يا ابن اخوي...

رفعت راسي واشوف السبع عابر من
بستان ابو القديم ووحده وبيده السلاح
يرمي علينه ...

جان مسيطر حيل بحيث الطلقه تطلع ليفوك
الزلم الورا جبار كلهه انهزمت لان صار الموت
قريب حته عاصم انهزم..

وكفت اشوفه شلون يتقرب وموجه اسلاحه
ع جبار لحدماوصل لجبار فتحه السلاح
خلاهه بصدره...

السبع.. ٥ دقايق الك اذا مالميت هاي
الزلم الضحيت بيهه هنااا ارميك
واسلمك بيدي لياسين...

جبار.. تهددني وترفع اسلاحك بوجهي
ياناكر الاصول..

السبع.. اهددك وانفذ واهينك وانعل
ابو اليطلع وراك ولا ابو الشيخه
الي استلمتهه...

جبار.. اااااافه
السبع.. راح تخلص ال٥ دقايق وانت تبيع
مثاليات براسي سويتهه مره واسويهه عشره
وروح ابوي اكتلك واسلمك لياسين بيدي..

... بسرعه جبار نزل سلاحه واشر لولده
وللزلم الوراه وكالهم خلونه نرجع..

جراح... وين جنت؟
السبع.. انت رميت ع ياسين؟
جراح.. مارميت طلقه وحده جنت ارمي
بالجو لان ضرغام كال لهي جبار ...

السبع.. ضرغام فات لبستان ياسين
جذب ماكو البنيه لامخطوفه يمهم ولا
اكو اثر الهه

جراح.. شلون فات ضرغام بهذا الرمي
هذا مخبل !!

السبع.. من جهه الشط فاتلهم ومحاجي ياسين
واساسا ياسين مايدري عليمن الرمي
وميت واحد من ازلامه فوگ كتلت اخو..

جراح... وهسه شنسوي البنيه اهلهه
منهارين ومن العصر لسه رمي متواصل
وانت اختفيت وين رحت!!

السبع.. ٣٠ سنه ياجراح واني عايش
بثاري اشوف قاتل ابوي كدامي ومااكدر
اسوي شي!

٣٠ سنه وانه انام وافز مرعوب ع منظر
اختي شلون ركبتهه مشكله مثل اللعابه
واصبعهه مكصوص ومشمور يمهه...

محد بيكم يعرف السبع لسه
العرفتوا شي قليل بس البداخلي شي
جبير ومحد بيكم راح يسمعه

بس صبرت طول هاي السنين حته
انتقامي يكون حار واخذ بحيفي
ومحد يكول ولك غلطت بس يمكن
راح استعجل بقراري اذا ماضرغام
سواهه قبلي...

جراح.. شتحجي انت شبيكم انت وضرغام
تخبلتوا انت ثار ابوك وضرغام شعنده
ويسويهن قبلك...

السبع.. امشي خلي انروحله للشط مشينه
شويه وحجه السبع ياجراح ضرغام طلع
من قفصه والظاهر علي كام يحب!!

جراح... نفسهه رانيا؟! نفس ماجنت
شاگ وحجينه وياه تذكر وماانطه
كلام ...

السبع.. من يحب يتسودن اذا مالگينه
البنت هذا يحرك القريه ع راس جبار

جراح.. جبار اله ايد بيهه واكو شي
مضموم وشمعنى هاي البنيه بالذات
لازم اكو شي..

... وصلنه للشط ضرغام واكف ع الجرف
ماكدرنه نحاجي كعدنه ع جهه ونباوعله
شلون صاير نار ..

التفت علينه وكال السبع تندل المكان
الحبسوا بي ابو شهد ؟!

السبع.. ااااي قصدك هناك؟!
ضرغام.. مدام وراهه جبار ماعنده غير هذا المكان
امشوا وياي..

... مشينه للكاع فوك الشارع العام
بالجهه الثانيه يصير الشارع العام
فاصل بينهه وبين القصر والبستان...

هذا المكان محد رايحله بس السبع
لان صارت بي جريمه قتل قبل ٢٠
سنه وانتركت وصار مسؤؤل عنهه
سعود يجي يفتح المي على الزرع بين كل اسبوع...

انه وضرغام من زمان ماداخلين هنا بس مانندل
الغرفه بالضبط بس السبع يندلهه...

رانيا... صوت زقزقة العصافير وعيني
ع الفتحه اشوف الجو اتكشف ريحه
طيبه اجتني مبين صار الفجر..

من البارحه العصر وللفجر هسه اني
بهذا الوضع اعظامي مااحس بيهم
وحلگي يابس واللعاب يسيل من حلكي
من كدما الشال فات بين اسناني...

سمعت صوت طگطگه وحركه مثل الواحد
يدوس ع عشب يابس كمت اتشاهد بگلبي
واردد ايات يارب ارحمني ارحم ضعفي
وقلة حيلتي...

سمعت صوت سحب اقسام احس روحي
تلتجأ بكل ركن بالغرفه تريد تختبي
لا احد يشوفهه..

هيج احسهه صارت خفيفه مثل
خيط غزل كلما نقسي علي ونبرمه
اكثر ينقطع...

اضرب الباب حيل ماكدر ارفع راسي
ولاكدرت ادنك لان راسي بوضع
مستقيم بس ماردت احد يشوفني
بهاي وضعيتي...

بس صوته سمعته بكل قوته وبكل
مايملك من احساس صوت رجولي
قوي هزني هزز وضرب فد شي
وهو يصيح لااااااااااااااااا....

ثواني وانسدت الباب واني مغمضه
رغم الخوف بس روحي التجأت اله
وامنت جسمي عرگ ومااعرف منين
هلكد العرك ينزل من الخجل والفشله...

حجه من بين اسنانه وهو صاك عليهن
لاتتحركين ظلي ع وضعج!!

ايده حاوطت راسي يفتح بشال
هنااا فتحت عيني بأسى وياريت
مافتحتهن اخر شخص اتمنى يشوفني
بهيج وضع هو ضرغام...

فتح الشال ومسح حلكي الرطب
وشمره ع جهه جان مكرفص كدامي
ويفتح بي..

كام وكف فتح الخيط المربوط بشعري
ماكدرت احرك راسي ابد من كدما اتشنج..

ماجان يباوع ابد
عيوني ليفوك لو يغمضهن
فتح شعري وحلكي وطلع ورجع..

نزع تشيرته لان لابس تشيرت موقميص
ودنك عليه فتح اديه وفتح الحبل كله
وكال لاتكومين هاج هذا التشيرت
بين مايجي جراح...

دار وجهه وطلع ظل صدره عاري
ولابس التشيرت ع جلده مالابس شي
جوا...

ابجي وگوه احرك اديه من الالم
ومن الفشله والتوتر والموقف الوكعت بي..

لبست تشيرته وظليت ع كعدتي افرك
بأيدي الحبل طابع عليهه شويه وفتح الباب
جايبلي دشداشه طويله مالتي مبين جراح
جابهه من لبابه ...

شمرهه ودار وجهه كال البسي
بسرعه وكومي...

لبستهه واني اشهك من البجي گوه
واكفه ع رجليه احسهن مايشيلني
مثل الخيوط الخفيفه..

كمت وكفت وحجيت من نص دموعي
كملت !! التفت عليه شفت الغضب
والعصبيه بوجهه..

حجه بنبره قويه وقريبه للصياح
سووووولج شي؟!

هزيت راسي بالرفض كتله لااا
غمض عيونه وفتحهن وعبالك اخذ
جرعه وانتبه...

ضرغام.. شعندج طلعتي؟ وشلون وصلتي
لهنا؟!

رانيا.. حجيتله كلشي وعبالي هو
ومادري بعد الصار بعدني ممكمله كلامي
ومااحس الراشدي بقوة ايده سطر خدي
سطر..

ضرغام.. منو اني ؟ حته تتواعدين وياي
واذا دزيتلج رساله من صدك مافكرتي
ماكلتي بأي حق التقي بي بمكان فارغ..

عقل مابراسج رعنه صلفه حالج حال
المزعطه عندج جهال اثنين ودكليلي
اجتني رساله منك تريدني اجيك؟!

رانيا... صرخت بصوت واني ابجي
اني غبيه صحيح بس والله عبالي
علمود هاي السالفه ماادري هيج يصير

فرك وجهه بقلة حيله انتبهت علي لابس
تشيرت اسود بس علامه صح كدام ...

فتح الباب وكال امشي كدامي
مشيت واني كلما اخلي رجلي ع الكاع
تشوغ روحي...

اكو نهر صغير يسمو ساگيه بي مي
لزم ايدي ودنگ راسي وكال غسلي
يله ..

كمت اشيل مي واغسل بوجهي
ودموعي ماتوكف ...

كملت ومشينه طلع مسدسه ضرب
طلقه وحده بالجو فزيت كتله هاي ليش
رد عليه هاي اشاره للسبع.؟

ماكو شي امشي واسكتي
مره وحده سدي حلكج...
...

عقيق... من كدما قريت قران ع نفس
الكعده غفيت وماادري بروحي
كلساع افز ع صوت طلقات لحدما هدء الوضع...

اذن اذان الفجر وطلعت الشمس
اجتي لبابه كالت كومي السبع يريدج..

كمزت من مكاني وركضت ليبرا
لكيت باب الغرفه مفتوح يعني
داخل الغرفه طبيت وسديت الباب...

قابلته بابتسامه واحجي باهتمام
وشلونك وخلصت وذب هذا السلاح
من ايدك...

اول مره يبتسم بوجهي وكال مابيه شي
هاي كدامج اني..

عقيق.. بعد ماتروح ولاتسوون هيج
هم يخافون منك ليش ماتمنعهم ..

السبع... عيونج هاي رجعتني

عقيق.. هاااااا شنووو
السبع.. تعالي نتريك واخذج وياي
لبغداد عندي مشروع هناك...

عقيق.. اباوعله ومبتسمه طلع هو
واني ركضت ع المرايه اباوع لعيوني
صغار هن وجواهن نمش ليش كال عيونج
معقوله حلوات!!!؟؟

رانيا... قريب مانوصل القصر
طلع تليفونه واحنه ساكتين وكف يخابر
واني بصفه ..

حجه ويه واحد وكاله انطوا امر القاء
القبض منا للعصر اريدهم بالسجن
العنوان عدكم قريه...... قضاء ابو الخصيب!!!


#يتبع......

حبي أي مسمن من مسمنات..كلهن مضرات😕💔 يمكن فوك سبعطش مسج حاجيه عنهن

فاذا تريدين تسمنين بس ضلي عل اكل..لمن تسمنين
كلشي اكلي من جوز وراشي ودبس وعسل وتمن ومعجنات

فااشويه اشويه يتخزن بالجسم وتسمنين

#ملوكه