#خبايا_الاقدار
❤️♨️♨️

. البارت الحادي عشر...


لبابه.. شعور غريب وبنفس الوقت جميل
اديه محاوطه رگبته لاارادي
وهو يضغط اكثر على اظلاعي ...

سحبت نفسي من بين اديه واني
مدنكه راسي نفسي عالي واباوع
لصدره شلون يصعد وينزل ..

هدوء ماكو اي كلام مجرد لازم
اديه اثنينهم ومخلي ايده ع كتفي
ويحرك بأيده ...

سمعنه صوت حركه برا وصوت سياره
ونباح كلب كال يله ارجعي ادخلي
لايشوفج ضرغام..

ماحجيت ولاحته رفعت راسي
بسرعه افتريت ورجعت للمشتمل
باوعت من جهه القصر شفت
سياره ضرغام طلعت مدري وين راح
نص الليل...

رجعت لفراشي ركض كلبي يدك سريع
مبتسمه وحدي مخليه ايدي ع كلبي
والشعور الحلو مسيطر عليه..

شكد حاولت انام ماكدرت لحدمااذن الفجر
صليت يله نمت احس خدودي متشنجه
من كدما مبتسمه وحدي..

ثاني يوم كعدت حسب جدول المراجعه
بيتنه صار علي رجل ساعه خديجه
وساعه هيام والعجيب ماما تستقبلهن
وتصرفاتهه عاديه..

هوايه شغلات غريبه فجر ماالومهه لان طفله
رغم اذيتهه ع شهد ومرات الكاهه تبجي
بس الغريب بماما !!

عادي تحجي ويه جبار وويه هيام
الي مدت ايدهه عليهه جبار يجي
ويدخل بيتنه وماما تستقبله ودكله هله
بالشيخ...

كلمااريد احاجيهه واكلهه نسيتي شهد
اني من اكعد اقره اتذكرهه وتخنكني العبره
واكعد ابجي وماما ماشيه حياتهه طبيعي
لا شهد ولابابا تذكرهم..

ايناس يوميه تجينه مرات مااطلعلهه
لان اقره ومرات اكعد شويه يمهم
تحجي حجي مال كبار كله حجه فلان
شيخ وكال فلان عمام..

جراح ثاني يوم التحق يتواصل وياي
بكلام عادي وماذكرنه الليله الصارت
ابد..

جنت كاعده اقره واجت رانيا يمي
كالت هاي حياتهم هيج طلقات ومواجهه
وثاني يوم كلشي ماكو وحته مايدرون
منو المات ومنو عاش؟!

لبابه.. هم هيج وشوفي حته ماما
تعودت هي وفجر..

رانيا.. يعني كل العشائر هيج لو بس
الشيخ جبار من صارت الطلقات لسه
افز مرعوبه ومن اقل صوت افز...

لبابه.. يگولون حياتهم هيج دائما حراميه
ودائما تعاملهم بالسلاح وحته الدوله
متكدر للعشائر..

رانيا.. بهاي صدقتي اذا ابن عمتج يريد
يدليني الطريق يضرب فوك راسي
طلقه برأيج هذا صاحي؟

لبابه.. منو ضرغام؟
رانيا.. فوكاهه اسمه ضرغام لو مسمي
المسودن المستفز..

لبابه.. هو طبعه هيج لايغرج بروده
ماشايفته من يصير عصبي
رانيا.. الله لايشوفنياه هو بس حواجبه
مرفوعه ويخزر

لبابه.. بس انتي يخزرج هو صح عصبي
بس مايخزر
رانيا.. هم حظي !!
...

عقيق....

‏أنــا صاحبــة الحــظ العاثــر،
رُغمــاً عــن وجهــي الجميــل ...

هذا اليوم الثالث على التوالي
احنه بالبصره اني وبابا عدنه مراجعه
يم الطبيب..

حالتي استعصت على كل الاطباء راجع
بيه هوايه كل مكان اخذني وماكو جدوى
كل طبيب يكول مرض شكل..

من اجيت للدنيا بفتحتين ولاديه
مراجعين بيه هوايه وكالو تلتحم الفتحه
بمرور الايام بس صار العكس..

كمت كلما اكبر كلما تأثر عليه اكثر
حته جنت محرومه من اللعب ويه الاطفال
لأن اتعب هوايه..

بابا من عائله بسيطه عنده اخوان اثنين
واخت وحده اصغر من عنده يعني اطفالهم
اصغر من عندي بهوايه ...

ماما بحملهه الثاني جانت حامل ببنيه
وبشهر الثامن صار عدهه هبوط صفر
ضغطهه واتوفت وبابا ظل ماتزوج
بس يركض بيه يوميه بطبيب...

اخر شي وصفولنه طبيب كالو زين
بالبصره وهذا اليوم الثالث احنه هنااا
مانندل شي نمشي ع الوصف بالنهار
نفتر بالمستشفيات وبليل انروح للفندق..

لازم ايدي بابا ويعبرني الشارع
شكلي مومثل عمري ابد النمو عندي
بطيء هزيله الى درجه ..

حاليا عمري ١٧ بس اليقدرني يكول
عمرهه ١٢ سنه كلشي يمشي عكس
مااريد حته دراستي تركتهه لان موحمل
كلام جارح وتنمر...

جان الشارع اليم المستشفى بي اعمال
حفريات وتبليط واكو عماره بصف المستشفى
هم بيهه اعمال بناء والات هوايه واكفه تشتغل..

جان هذا اليوم مشؤؤم يمكن طول عمري
مااسامح نفسي بسبب هذا اليوم ابدال
مااتقدم خطوه بصحتي رجعت لنقطة البدايه..

واكفين ع الرصيف انريد نعبر وبابا يحجي وياي
ويكلي هسه تتعافين وتصيرين دكتوره
وتعالجين الناس ...

لاوا مره بابا يفلت ايدي من يعبر الشارع
اخاف من هوسه السيارات هو تقدم خطوه
والتفت عليه شافني واكفه..

رجع يريد يعبرني وسياره حمل بسرعتهه
ضربت بابا مثل العلاگه السوده وطارت بالهوه
من كدما ارتفع..

انشمر بعيد عني حيل بعيد !!
اشوف الناس تركض والتمت علي
واني ع نفس وكفتي!!

انقطع السير واني امشي بخطى ثقيله
ووكفت ع راس بابا ملامح وجهه مختفيه
من قوة الضربه..

دموع!!
الم اجتاح كل جوارحي
گلبي الضعيف !!!

روحي !!
وكلبي !!
وساعات حياتي كلهن اريد انطيهن لبابا
نذر بس يرجعلي..

شالو بابا للمستشفى بعد امتار
واني اركض وراهم واردد بابا
اكعد لاتعوفني كل ضني يسمعني...

بس شافوا كالو الرجال متوفي
جان الدكتور يحجي وياي ويكول وين اهلج
ماجنت اعرف وين اهلي!!!

اني مومنا اني من منطقه اسمهه التاجي
اطراف بغداد عمامي موزعين بالمناطق
حته مااعرف عنوانهم ...

فتحت عيني ع بابا عمري مالازمه تليفون
بيدي ولا اعرف اتصل باحد مامتواصله
حته ويه خالاتي جنت مكتفيه بابا ..

حته من يطلبون مني ازورهم مااروح
جانو عدهم بنات كلهه تصيحلي القزمه
والي يصيحلي النمشه لان اكو نقط نمش جوه
عيوني ونازل ع خدي..

انطيت اسمي الكامل واسم بابا والعشيره
انطيت عنوانه بس اعرف التاجي والمنطقه الساكنين
بيهه ماعندي رقم تليفون حته اتصل بعمامي..

كتلهم بابا عنده موبايل طلع اثناء ماضاربته
السياره واكع وبعز الموت وسرقوا تليفونه..

بديت استوعب الصار جنت بحاله صدمه
رغم ضعف گلبي بس صرخت هواي
كمت اضرب برجليه بالكاع واخذوني
للطوارىء ضربوني ابره..

فتحت عيني هوسه المرضى واكو واحد
بكد بابا ممرض كاعد كال هابنتي صحيتي
يريدج مدير المستشفى..

اخذني امشي بدون فكر وراي
طببني للمدير جان واحد كاعد يمه
حجوا وياي ويسألوني واجاوب ..

ظليت يومين ضبط بالمستشفى وبعدهه
الجثه استلمهه رجال خير ودفنهه لان
عجزوا عن التواصل ويه اهل بابا...

حته واحد مخبر المستشفى الي بالتاجي
وكايلهم بلكي تعرفون اهله ومحد عرفه
ماادري تركونه وحدنه لو فعلا ماوصلهم خبر!!

ظليت وحيده! مريضه! كلبي اجه يتعالج
بس رجع مكسور !!

اخر يوم بالمستشفى طلعتني الممرضه
وكالت اكعدي هنا هسه يجي الدكتور يحاجيج
لان اسره مزدحمه وماكو مجال وانتي مابيج شي..

كعدت بحديقه المستشفى يمكن ٤ ساعات
ناس تفوت وناس تطلع عيني ع الرايح
والجاي دموعي تحرك خدي مثل لهيب
الشمس...

محد اجاني مااعرف شمنتظره بس
اني مو انسانه بكامل قواي من كد العلاج
الي اخذته من عمري سنه حته راسي
وذاكرتي مرات تتخربط عندي..

احس نفسي انسانه ميته معدومه بيهه
الحياة ما بدر مني اي فعل سوى الاستسلام
وضعف البدن..

صارت دنيا الظهر وشمس حاره
ومااعرف وين اروح كمت دخلت للمستشفى
وحجيت لابو الاستعلامات عن حالتي وبابا
كال تعالي للمدير..

مومدير وزير فوك الساعه يله دخلت
عرفني وظل يحجي ميصير تبقين هنا
واكو مرضى احق منج هسه راح ادزج
لدار الايتام وخابر ع الاستعلامات
يجون ياخذوني.....

سلاحي الوحيد دموعي من زمان اني انسانه
فاشله وضعيفه حته من جانو الجهال يضحكون
عليه ماادافع عن نفسي واحجي اظل بس ابجي..

جنت انكتل من نسوان عمامي وعادي
ابلعهه واسكت حته مااحجي لبابا
ضعف موطبيعي بداخلي ..

كعدني المدير ع جهه اني مامحجبه
بس لابسه كلاوي براسي وشعري
ذيل حصان نازل وجنت لابسه بنطرون
وقميص طويل مقفل ...

صارلي اسبوع بملابسي حته لزمت بابا
واني ماسابحه ولامغسله غير بس اديه
اتمنيت الموته الي مو اله...

نص ساعه واجه ابو الاستعلامات
حجه ويه المدير بس كاله المقاول
راح يجي يتكفلهه !!

شويه ودخل نفس الشخص الشفته
بيوم المات بابا بس جنت مامنتبه
حجه ويه المدير وباوعلي بنظره سريعه..

سلمني لرجال غريب رفضت ولاول مره
اتجرأ واحجي بوسط رياجيل غربه..

... مااروح ويه واحد غريب وديني
لدار الايتام لو خلي الشرطي يوديني
للتاجي هناك عمامي..

المدير.. بابا دار الايتام مامناسب لعمرج
وبي شغلات موحلوه هذا الرجال مقاول
ومشتغل سابقا بالتاجي راح ياخذج
بكفالته وهو يدور عن اهلج لان انتي مالج مكان
هنا ...

عقيق.. رفعت راسي اباوعله شكله يخوف
مايضحك ولا اكو تعابير بوجهه حاجبه
بي اثر بشرته سمره لابس زي مال مقاولين..

هزيت راسي برفض وحسيت الم بگلبي
خليت ايدي ع مكان الالم وكمت افرك
بقوه احس الهوه شح عليه..

صاح المدير ارتاحي وكعدني وهذا المقاول
ماحجه ابد كعد ع الكرسي ويباوعلي..

ظل يحجي المدير هذا خوش انسان وبكفالتي
وراح اكتب تعهد علي اني لو مااعرفه مااسلمج
لغريب بابا احسنلج من دار الايتام

وراح اظل اتابع سالفه اهلج وبس احصل
نتيجه اتواصل وياه حته يرجعج
انتي بنيه وبعدج طفله والشارع مايرحم..

نفسه هذا الشخص تكفل بدفن والدج
وراح ياخذج لقبره شوفي ابوج خوش انسان
والله يحبه وماظل بالثلاجه وسخر اله هذا
الانسان صاحب اعمال خير دفن والدج وراح
يتكفل بحمايتج...

عقيق.. ماجان عندي حل حته ربع دينار
ماكو بيدي حته اكول اعيش بالشارع
حته محفظة بابا مالگوهه وماادري ياقذر
سرقهه من انسان روحه جاي تصعد للباري...

لامستمسكات ولا فلوس ولا حته ذاكرة
قويه استسلمت وكمت وكفت حته اروح
ويه هذا الشخص..

جنت اعرف شي واحد بابا انسان خير
والله دزله هذا حته يساعدني بعد وفاته
وحته روحه ترتاح...

سلم على المدير ووقع ع اوراق
وطلعنه امشي بمستواه جان
شعور خفيف بداخلي لان اشوفه جبير
موشاب حته اخاف منه

وصلنه لسياره حديثه فتحلي الباب
كال اصعدي اول كلام وجهه الي!!

عقيق.. وين ماخذني اني مااندل
... اصعدي لاتخافين كلنه عدنه اخوات
وعرضنه غالي..

عقيق.. صعدت وره وهو صعد شغل السياره نزل
جامه الصدر وصاح ع العمال اليشتغلون
استمروا ساعه وارجعلكم...

حرك السياره واني صافنه ماباوع ابد
ماشال عينه بالمرايه مثل سواق التكسي
حته ماحجه كلمه وحده ...

وكف كدام عماره وكال يله انزلي
نزلت واني ضايجه من وضعي ملابسي
مونظيفه حته ريحه طلعت بيهم
عيوني ماترضه توكف من البجي..

ساكت هو وصعدنه درج لطابق الثالث وكف
اباب شقه فتحهه وكال فوتي اشرلي
بيده..

ظليت واكفه وصافنه شجاي اسوي
شلون ادخل ويه شخص غريب
صح مامختلطه بالناس بس دائما بابا
يوصيني خاف بيوم اموت ابد لاتقين حته
بعمج...

رفضت ادخل وظليت واكفه ومدنكه راسي
افرك باديه واجر بقميصي حجه بصوت خشن
يابه دخلّي شدد اللام !!

دخلي وامني حالج من حال عرضي
وهاي اول مره اسويهه وادخل جنس
حوه لداري..

عقيق... لهجته غريبه وبنفس الوقت حلوه
روح بابا كدامي شفته بعيني والله شفته
حقيقي مو تخيل شفته واكف بنفس الهيئه
مالته ويكلي فوتي اني وياج!!!

تحركت رجليه وحدهن ودخلت وبابا لازم
ايدي كعدت بدون شعور ع القنفه وبابا مبتسم
بوجهي ويكلي اني وياج لاتخافين..

فززني صوته وهو يكول وياي انتي؟!

هزيت راسي مبتسمه عباله خبله ساعه
ابجي وساعه اضحك كتله شفت بابا
كال لاتخافين...

شبح ابتسامه انرسمت ع وجهه وكال
اي لاتخافين الشفتي حقيقي
ابوج وياج مايعوفج ..

اسمعي يبنت هاي الشقه الي
اني ماساكن هنا ساكن بابو الخصيب بس عندي شغل
واجرتهه صار شهر اخذي راحتج واطمئني ...

راح ارجع لشغلي يمج اكل
ويمج حمام وبليل ارجع
راح اقفل الباب عليج لاتخافين...

عقيق.. حجاهن وطلع بدون ماارد علي
قفل الباب عليه اني ركضت للحمام
انزع بملابسي وابجي واردد بابا انتظرني
برا لاتروح اخاف...

سبحت ورجعت ع نفس الملابس
رحت للمطبخ شربت مي اكو فواكه
واني جنت ع المغذيات دنت نفسي
على موزايه وبرتقاله اكلتهن...

ظليت كاعده وحدي اسمع صوت
الاذان ومااكدر اكوم اصلي ملابسي
وسخه وحته عليهن بقع دم من الحادث...

صارت الساعه ب٨ انفتح الباب كمت وكفت
ع حيلي ماانكر خوفي بهذيج اللحظه بس
المصبرني احس روح بابا وياي...

دخل نفسه ووياه بنيه شابه لابسه
نظارات شايله علاليك بيدهه
وكالت السبع بس خابر جراح وكله
ماانطيته خبر..

طلع هو واني صافنه ع الاسماء
السبع وجراح وهاي منو؟!

تقربت عليه كالت شلونج حبيبتي
اني اسمي ابرار بنت عم السبع ادرس
هنا يم بيت خالو وجابني يمج ...

عقيق... ظليت ساكته بس صافنه
حته مااعرف ارد

ابرار.. جبتلج ملابس وشغلات تحتاجيهه
اطمئني انتي بأمان السبع ابن عمي واني
تربيت ع ايده بمثابه بابا من ناحيته خليج
مأمنه...

هسه روحي بدلي واني اسويلج عشه
والبقيه بحياتج والله يعوضج ..

عقيق.. شكرا بس اني شلون اعيش
وحدي هناا...

ابرار.. لتخافين نلگه حل بس خليج مطمئنه
حالتج ماتسمح تنقهرين واني وياج احسبيني
اختج...

عقيق.. هزيت راسي وكمت سبحت مره ثانيه
وبدلت طلعت للغرفه بيهه سرير واحد نفر وكنتور
٣ ابواب وميز مرايه صغير

فتحت العلاليك ملابس جديده كلهه بالرقم
وكلهن اسود مقدره حالتي حته المشط وملابس
داخليه وعطر وشال..

مشطت شعري وطلعت لكيتهه مسويه عشه
نفسي مسدوده شكد لحت اكل بس ماكدر غير
اكل تمرايه وحده ..

كلما اخلي شي بحلكي اتذكر بابا وابجي
تركتني ابجي وكامت غسلت مواعين واجت
كعدت بصفي ولزمت ايدي..

ابرار.. شوفي حبيبه اني يتيمه مثلج بس
الله ماعافني وحدي صح ماما موجوده بس
ضعيفه حال ماتكدر كلشي تسوي ..

بس عندي اخويه اسمه جراح وعندي
السبع ابن عمي هو الرباني هو الحماني
ودافع عني بفضله وصلت لهاي المرحله
وهسه افتخر بنفسي كوني صيدلانيه..

اريدج تطمئنين لو تجتمع عشيره ع اذيتج
راح تلگينه يدافعلج مثل مايدافع لاخته ..

هوايه ناس ساعد هواي تكفل يتامى
المفروض مااحجي بس علمود تأمنين

هو راح يدور عن اهلج شوكت مايلكاهم
يرجعج وانتي معززه مكرمه اني وياج
وماراح اتركج ابد..

عقيق.. تظلين يمي هنااا
ابرار.. اني اداوم بين يوم ويوم بالمستشفى
ومااكدر اظل يمج حته محد يدري لان خالو
يشك والسبع مايقبل احد يعرف..

عقيق.. شلون اعيش وحدي؟
ابرار.. غرفتج وحدج والنهار وحدج وبليل
يجي تعبان ينام بالصاله وهو بس يخلص
المشروع يرجع..

عقيق.. واني وين اروح؟
ابرار.. الله كريم لتشيلين هم يجوز يلگي
اهلج انتي شكد عمرج؟

عقيق.. ١٧
ابرار.. صدك؟ مامبين عليج عبالي بالابتدائيه
ليش هلكد ناعمه وضعيفه

عقيق.. هو هيج عودي
ابرار.. ادرسين؟
عقيق.. لا ماادرس خلصت الاول متوسط
وبطلت

ابرار.. ليش الدراسه حلوه؟
عقيق.. ماكدرت ادرس شكد بابا حاول
وياي بس جانو يقلدون عليه وبطلت

ابرار.. زين ابوج الله يرحمه شنو يشتغل
عقيق.. مايشتغل عنده محل طالع من البيت
وعايشين بي
ابرار.. اسمج غريب؟

عقيق.. اي بابا يحب هذا الاسم يكول
نوع من انواع الاحجار..

ابرار.. ان شاء الله تلگين اهلج وترجعين
بسلامه كومي ارتاحي مبينه تعبانه..

عقيق.. كمت للغرفه نمت ع جربايه
عيني ع السكف المروحه تفتر نزلت دموعي
تذكرت بابا ادويتي ماكو ماجايبتهه ظلت
بالفندق ...

ماادري بيا مصير مجهول وعلى ياوساده
انام ماادري شصار وشلون وصلت لهنا
هيج الدنيا اذا دارت بين يوم وليله
تقلبنه رأسا ع عقب...
...

لبابه... بعد اسبوع عن امتحاناتي جراح
مختفي ومانازل بالدوام بليلتهه جنت اقره
وكالو الكل يجي للقصر...

طلعنه للقصر وظلت بس رانيا وخاله حته
خالو دزوا علي دخلنه للمضيف كلهه جانت كاعده
حته عماتي كعدت بصف ماما يله انتبهت
جراح وضرغام موجودين...

حجه جبار بالحكم والايات القرانيه
وكال قبل مده خطبنه لبابه لجراح وهسه
لازم نتمم الخطبه ونعقدلهم والشيخ جاي بالطريق..

كلشي سريع وجراح ماانطاني خبر
ظليت مدنگه وهم يسولفون ماما تسولف
وكل كلامهه يحز بنفسي شلون نست
بابا وشهد وهي عيونهه عمت عليهم..

شويه واجه الشيخ وكالوا كلهه تطلع
من ورا الباب عقدنه بس بدون اي مراسيم
حته بدشداشتي مااعرف افرح لو اضوج...

بس خلص عقد الشيخ طلعت برا كلبي
احس انقبض وصار نار مامرتاحه ابد
حسيت بذل ليش هيج حياتهم ليش هيج
حته مراسيم الفرح عدهم عكس الناس...

كعدت ع الطابوكه كل مره اكعد عليهه
شفت ضرغام طلع يخابر شافني ودار
وجهه وكمل طريقه...

دقايق وطلع جراح جاي عليه ومبين
ضرغام كاله لان حته اندل مكاني
وجانت ظلمه..

جراح.. ليش كاعده هنا
لبابه.. ليش ماكتلي شنو انخطب بهاي الطريقه
جراح.. ترى قبل ساعه اجيت من الحدود
ودوامي شايف الويل بي حته تغطيه ماكو...

لبابه.. بس تكدر ادزلي رساله بالطريق
اكو وحده تنخطب بدشداشتهه

جراح.. لبابه انتي ادورين تفاصيل وتعوفين
الموضوع الرئيسي يعني كل اجازه وكل روحه الزم
كلبي عليج منا لمن اجي خاف يأذوج ..

لبابه...شجاي يصير جراح حته ماما
فرحانه
جراح.. ليش ماتفرح غير امنت عليج لان
جنتي بخطر

لبابه.. وشهد الي انذبحت وبابا المات بدون
مانشوفه هيج بسرعه ينسونه

جراح... لبابه لاتصعبيهه انه طلبت نعقد
هسه لان تعبت من القلق عليج هسه اروح
وانه مطمئن محد يكدر يأذيج..

واذا ع الحفله ورا امتحاناتج اسويلج
حفله بس شرط اتنجحين ...

لبابه.. مااريد حفله بس ع الاقل عندي خبر
عدكم البنيه مستعبده مالهه حق لاترفض
ولاتقبل...

جراح.. حقج عليه والله انه طلبت وجبار
اصلا معترض وتعاركت ويه عامر لان معترض
مثل ابو اريد اخلص من الموضوع ..

يله شو كومي خلي نتمشه شويه
لبابه.. ماامشي اريد ارجع للبيت
جراح.. بطلي عناد كافي اكلهه المغرب اجيت
دكلي ليش ماادري ..

لبابه.. خليني ارتاح انت باجر موجود
ونحجي مدري شبيه الدمعه بطرف عيني
شهد بين عيوني شلون حياتي مشت وحياتهه
انتهت..

عفته ورجعت للمشتمل سولفت لرانيا
باركتلي بس كمت ابجي حاولت تهديني
وكالت طبيعي هذا الشعور ...

ضايجه من ماما حيل متغيره
تحجي ويه قاتل بتهه ومامهتمه
شعور تأنيب الضمير اموتني ...

ثاني يوم اندك باب المشتمل واشوف
جبار وماما استقبلته ودخل كعد بالصاله
وخالو موجود خالو مايدري بجبار قاتل شهد
عباله تمرضت وماتت...

جبار.. انه جاي حته انطيكم حصتكم من النخل
الكم هاي الجهه حصة المرحوم علي وهسه يجي
موسم گصاص تمر حته تگصيهن انتي واخيج

ساهره.. يعني حصتنه هاي ثابته
جبار.. اي حصتكم المرحوم ماله حصه بالكاع
من عهد ابوي الشيخ بس اله حصه بالنخل...

لبابه.. اسمع ومتفاجئه سبحان مغير الاحوال
هذا جبار هيج صاير حقاني ضميتهه بگلبي
وسكتت لاعاتبت ولاحجيت..

مشه الاسبوع سريع وباجر امتحاني
اجه جراح الصبح كال اخذج العصر انتي
وامي اخليهه يمج بين ماتكملين امتحاناتج...

ماما ماكدرت تعوف البيت وبيت خالو
ووكع الاختيار ع عمه زينب وطلعنه العصر
لبغداد ماوصلنه غيى لليل اخذنه للشقه
الكال عليهه ومن سألته امه كالهه شقه صديقي...

بدت الامتحانات وجراح مااشوفه غير بليل
يطلع مايجي ومن تسأله امه يكلهه يم
جماعتي بس يسألني شلونج بالامتحان...

خلصت امتحاناتي ورجعنه بنفس اليوم
عمه جانت بالصدر واني كاعده ورا
اجت عيني علي بالمرايه غمزلي بعينه

درت وجهي عنه زعلانه لان شفته
بهاي الايام شلون مامهتم ومايجي غير
بليل حته مايكعد ويحاجيني ...

وصلنه للبصره سلمت على الموجودين
جنت تعبانه غسلت ونمت من كعدت لكيت
رساله من عنده

كاتب زعلانه مني؟ علمودج ماردت بالج
يشتت بالامتحانات اقل تصرف تظلين
تفكرين بي...

ماجاوبته اصلا ماعندي رصيد
بس من طلعت ثاني يوم لكيته يغسل
بسياره وكفت يمه حجينه طبيعي

سولفتله ع قسمه جبار والنخل كال موهو
هذا السبع انطاكم حصه جبار ماينطي
بس استغل غياب السبع وكالكم اني

لبابه.. هو السبع صار هواي ماجاي
جراح.. عنده شغل بعد اسبوع ويجي
لبابه.. شيشتغل؟!

جراح.. السبع مخلص سادس وماكمل
كليه لان انطانه حصته انه وضرغام كملنه
وهو جان يشتغل حته نوصل بس الله عوضه
وكدر يثبت نفسه ويه مهندس وشويه
شويه صار مقاول ويوميه بمحافظه ويه مهندس
جبير معروف..

لبابه.. شكد مسويلكم افضال
جراح... اي هواي الله يعوضه اضعافهن...

لبابه.. راح افوت جوه
جراح.. باجر اخذج للعشار انتي
وامج نشتري حلقات حته ماتظل ايدج
فارغه..

لبابه.. ماشي.. دخلت جوه حجيت لماما هزت راسهه
بس تاخذهه صفنه واله اهزهه يله تنتبه

ثاني يوم رحنه اني وياه وماما اشترينه حلقات
وعافنه ع راحتنه حته مادخل ويانه والفلوس
انطاهن لماما من رجعنه لبسنياهه بس اني وياه
وباسني من كف ايدي..

بده موسم گصاص التمر مثل مايسموا
ماعدهم عمال كل واحد يگص الحصه مالته
اول مره نطلع جابو واحظ كص النخل
والتمر اطشر بالكاع ونكعد نجمع بي ونخلي
باكياس ويجي واحد ياخذهن...

اول يوم تبهذلنه ومانعرف طلعت ويانه
ايناس وخديجه ساعدنه ثاني يوم
طلعت رانيا وخاله ظلت تسوي غده عليهه البيت..

رغم التعب بس تونسنه نضحك ونسولف
وجهال رانيا من كدما اكلوا تمر تخربطوا
حته مايتغدون ..

جانت حصتنه قريبه ع القصر
اني ورانيا كعدنه جوه نخله نجمع بنجانه
ونخلي بالكيس..

رانيا اخذهه الواهس وكامت تغني فوك النخل
فوك يبه فوك النخل فوك !!

شفنه جراح وضرغام من بعيد يمشون
جايين للقصر ضرغام لابس دشداشه سوده
بس رافعهه من الصفحه ويمشي ويسولف
يأشر بيده ..

وصلوا قريب يمنه كال جراح الله يساعدكم
لبابه.. شكرا
جراح... ماطلعن البنات يساعدنكم هاي بعد اسبوع
ماتخلصوهن

لبابه.. ماكو عمال ؟
جراح.. عمال شنو؟ كل واحد يگص بستانه
بس يراد ادين هواي..

رانيا.. جراح يحجي ويه لبابه وضرغام
كلما ارفع راسي الكاه خازرني مدري شيشوف
بيه وليش هيج مغتاض مني..

ظليت مدنكه وهم يحجون ويه لبابه
سمعنه هورن مال سياره التفتوا
كالوا واخيرا بين السبع...

عافونه وراح للسياره نزل واحد منهه
صاحب بنيه ضخمه ونفس لبسهم وغتره
ع راسه سلموا علي ...

هو وضرغام تشاقو وضرب ضرغام بوكس
ببطنه ورجع حضنه ...

رانيا.. مواكلج مسودنين
لبابه.. هم علاقتهم هيج حته من يتشاقون
بالضرب..

لبابه... كملنه واخذنه استراحه صارت ب٣
رجعنه نشتغل ونمشي ع النخل بالسره
اباوع ماما ماكو من بعيد فجر وخالو

واني ورانيا بعيدين عنهم بس ماما اختفت
ماادري ليش كمت ادور عليهه وكلبي مامرتاح
عفت رانيا وحدهه وكمت..

رانيا.. لبابه جيبي مي وياج وشوفي
سيوفي ورضاوي خوما طالعين

ظليت وحدي كاعده اجمع بالتمر
اكو في جوه النخله بس صايره بالطريق
اسمع صوت سياره وراي
التفتت ضرغام..

اشرلي براسه معناتهه كومي بس ماكمت
رجعت دنكت اشتغل لان اكو طريق بصفي
شكو حشك روحه هنا اتذكرت وسام طليقي..

كلت هسه يدك هورن بس اسمع صوت السياره
والظاهر وكف واني مدنگه وهو وراي
التفتت اشوفه كاعد بعده ومخلي ايده ع
حلكه وصافن عليه..

عدلت كعدتي معقوله طالع شي مني
وهو بنفس وضعه ولا بدر شي منه ..

كمت من مكاني نفضت ملابسي
وشلت النجانه ومشيت حرك السياره
وفات من بصفي صارت بصفه
ع جهته من الصدر ..

كال ضمي رجلج يوميه مطلعتنه شبر
بديتي ويانه بالتداريج !!

رانيا.. ضوجني رجلي شويه طالع منهه
غير جاي اشتغل كتله وانت ماتعرف ادير
وجهك

ضرغام.. منو كالج اني يوسف حته
ادير وجهي ضمي رجلج انتي
ورحمه لابوج امشي عدل ترى رواحتنه خلصانه

رانيا.. صدك ماتستحي وهيج عينك علينه
واحنه خطار يمكم

ضرغام.. للللللج امشي ولتعلين صوتج
بطلي هالسوالف براسي يمكن كايلج
امشي تموعي كدامي..

رانيا.. هستوني اريد ارد علي واسمع
صوت لبابه وصوت نسوان يصيحن
التفتت ع جهه القصر وهو نزل من السياره..

واشوف عمه ساهره تركض حافيه
من اليسموا مضيف وبيدهه سجينه
كلهه دم وتصيح كتلته كتلته!!!!!

.
.
.
يتبع....

#خبايا_الاقدار
♨️❤️

... البارت الثاني عشر


رانيا... منظر عمه وهي تركض وبيدهه
سجين متروس دم ظليت مصطكه بمكاني
ضرغام نزل من السياره بس ماراح واكف
ويباوع مثل حالتي..

صوت صياح وصوت زلم يصيحون الزموهه
التفتت علي بعصبيه كتله الحك عمه راح
يقتلوهه!!

تحركت ردت اركضلهه مابيدي شي
بس اريد احميهه حسيتهه راح تتخبل
تركض بالبستان وتصيح بصوت عالي
كتلته!!

لزمني من ايدي حيل وسحبني صرت بصفه
يباوع ليكدام وكال لاتتحركين !!

فجر ولبابه مفزوعات ويركضن ورا امهن
الماترضه توكف ابن جبار عامر طلع شايل
اسلاحه ويركض ويصيح اليوم اكتلهه !!

بسرعه ضرغام خله ايده ع مسدسه
وعامر شايل سلاحه وركض ع عمه وبناتهه
وموجه السلاح عليهه وعاصم اخو يصيح ورا

الهبطه الي اكلتهه ماانساهه ضرغام سحب
مسدسه وبلحظه مدري شلون نيشن
على عامر وجاب الطلقه برجله وكع بالكاع
ويصيح يابويه!!

سديت اذاني ودرت وجهي مااتحمل
المنظر احس نفسي بعالم الاجرام
بكل برود ضربه وخله الرجال ممدد
بطوله وهو رجع مسدسه لخصره..

التفت عليه وكال ارجعي للمشتمل
رانيا.. الله يخليك لاتقتلون عمه !!
ضرغام.. شطيحت حظنه غير عمه !!

رانيا ..عافني ومشه كدامي يمشي
بهدوء بوسط هذا الاعصار ..

ركضت للمشتمل شفت جبار
الشيخ شايلي اثنين زلم وصعدوا بالسياره
لابس دشداشه بيضه صايره حمره من النزف..

صوت نسوانهم والغلط ع عمه بابا لازم جهالي
مايكدر يعوفهم انطانياهم وركض ع عمه
للبستان...

لبابه... گلبي ممرتاح لماما وتصرفاتهه من شفتهه
ماموجوده كمت ادور عليهه رحت للمشتمل
مالكيتهه طبيت للقصر جان الكل طالع بالتمر..

بس سمعت صوت ماما تعيط ودكله عبالك
اقبل مووو!! عبالك انسه دم بنتي ورجلي
المات من خوفه وهو بريء

تريدني اصيرلك مره وتجدد شبابك ياظالم
تريد ساهره ادللك وانت قاتل بتهه الجبيره!!

هيهات نجوم السمه اقربلك والله ياجبار
اقتلك ومايرفلي جفن بس تحاول تلعب
وياي وتمد ايدك عليه وع بناتي..

جبار.. لادوخيني غصبا عليج اعقد عليج
اليوم انطيتج مجال زايد لو اعقد عليج
لو احرمج من بناتج للموت!!

لبابه.. ماسمعت صوت ماما بس سمعت
صوت جبار وهو يصيح ويغلط
على ماما وفشر بكلمات موحلوه !!

صااح بصوت عالي اااااخ ولك عاااامر
وماما طلعت تركض حته ماشافتني
من فزعتهه لازمه السجين بيدهه
وتصيح كتلته!!

اركض وراهه اريد الحك بيهه
مثل الهايم بصحراء ماتعرف وين تروح
تركض بالارجاء وتصيح مات!!

لزمناهه اني وفجر وهي ترجف
اول مره اشوف ماما بهذا الضعف
ترجف كلهه وجهه شاحب وعيونهه
حمر دم...

عامر يركض عليهه بس اجته طلقه مدري
منين خلته بالكاع يرفس ولازم رجله
ويصيح الحكولي..

اخذوا جبار واحنه بالبستان اجه خالو على ماما
يريد يكومهه كام يبجي وياهه خالو مصدوم
حسيته راح يوكع ويتخربط...

جراح والسبع ماكو اختفوا
بس ضرغام اجه علينه وكوم خالو
وكاله ارجع حجي احنه يمهه لاتخاف!!!

... يقتلون اختي !؟ شيخكم مايرحمهه
خلوني اطلع منا كلشي مااريد

ضرغام.. اذكر الله حجي محد يمسهه
هي ماسوت شي اخذت بثارهه واحنه حكم
عشاير الثار حق ماله حق يحجي لاجبار ولاغيره..

كوموا رجعوا للمشتمل وانتي ام لبابه
اخذي بناتج وسدي الباب الصار صار
محد يوصلج..

لبابه.. كومنه ماما وفجر لازمه ايد
خالو واني لازمتهه اكود بيهه
ولا واحد اجانه لامن الحمايه ولامن نسوان
القصر بس نسمع صريخ وبجي بداخل القصر...

من تعدينه ضرغام سمعته يخابر
وكاله وينكم عوفوا الصيد وتعالو
جبار اتصوب...

وصلنه للمشتمل خاله اخذت ماما هي ورانيا
للحمام وبدلن ملابسهه خالوا ركضت انطيته
علاجه..

اباوع لنفسي مابجيت!!
ولا عيطت !! بعدني بمقتبل العمر
واشوف جريمه قتل كدامي ومااتاثر!!

شهد شلون تحملتي السجين الحاد
الي حزو وريدج بي وهو رجال بقوته
مااتحمل ضربه سجين ببطنه وصاح اااخ...

اغسل بوجهي وامسح بركبتي
وفجر حاضنه ماما بس بنفس
ردة فعلي محد بينه بجت
محد بينه خافت ظاهريا خوفنه جان
داخل گلوبنه...

اندك باب المشتمل ركضت فتحته
جان جراح والسبع جراح لزم ايدي وسحبني
ع جهه والسبع صاح يالله ودخل...

جراح... لاتخافين ليش هيج وجهج مابي
قطرة دم!!
لبابه.. يمكن مات!!

جراح.. مايموت من ضربة مره متعود
هذا بس انتي اهدي شوفي حالج شلونه؟

لبابه.. عامر يمكن مات؟
جراح.. محد يموت بس تعالي غسلي
واخذني للسنك فتح المي وشال بيده
ومسح وجهي ..

جراح.. تعالي فوتي ولاتخافين ابد
لبابه... اندك الباب ضرغام باوعلنه
ونزل راسه ودخل رحنه وراهم
كلهه كاعده...

حجه خالو بتوسل الله يرضى عليكم
خلونه نطلع منا احنه ناس فقره موحمل
ثارات وقتل..

السبع.. حجي اذا ماشالتك الكاع نخليك
ع راسنه احسبهه عليه وامسحهه بوجهي
هاي الخوفه ..

احتمال انت ماتدري اكو ثار بين ام شهد
وبين جبار وهو طالبهه للزواج صار هواي
وهي بنت اصول واخذت بثار بتهه

احنه هنا ناس تحكمنه العشاير والعادات
هسه اذا اكتل جبار راح تگاومني بالمية
عشيره لان يعتبر شيخ محد راح يكول
ظالم ...

جبار من گتل المرحومه شهد بحجة غسل
عار واحنه ماشفنه بعينه والبنات اخواتهه
حجن وهو حلف كال انهزمت ولگيتهه
نكدر بلحظتهه نگتله بس التالي شنو؟!

هاي انه كدامك صار اكثر من ٣٠ سنه
انه اريد ثار ابوي ومالگيته ماعندي
نفس تگتل انسان بريء اذا مااتاكد

واله انه اكدر هسه ابيد القريه
وماخلي زلمه بيهه بحجة ثار ابوي..

انت هنا معزز مكرم واذا صابك مكروه
وحك علي اكلب هاي القريه ع روسهم..

والسوته ام شهد هذا ثارهه ومحد يگدر
يلومهه لامن شيخ ولامن عامي
البنات عرضنه ومانسمح لاحد يمسهن
بشعره..

ابو رانيا... يعني شهد انقتلت وانتي عايشه
بنصهم واني اكل من خير ناس قتله

السبع.. لا حجي انت ماكل من خير ابوي
المرحوم ومن خير ابو شهد خير جبار
لأهلهه موالنه ...

دك صدره وكال انت بخيرنه وضيفنه
اعتبر الصار رد اعتبار لأختك واخذت
ثارهه

ابو رانيا.. موراح يشتكي عليهه وتالي اختي
تصير قاتله ؟

ضرغام.. حجي محد يشتكي هسه يبلعوهه
ويگومون اطمئن اختك ووانت بالحفظ والصون

ساهره... حجيت بكلمات مبعثره وترجف
السبع بناتي لاياخذهن مني!!

السبع.. اطمئني محد يوصلكم
وانه هنا كاعد اريد اشوف يا زلمه
يمسهن...

ام رانيا.. لازم نرجع لبغداد احنه اجينه نحمي
حالنه مو حته انعيش برعب يوميه

السبع.. حجيه ماسامعه بالعشائر والدگه
والسوالف مالتهم انتي هنا خطار محد يمسج
وبغداد طلعتي منهه لأنهه خطره ...

ساهره.. هسه يشتكي عليه وهو مامات
لازم يموت شلون ماقتلته زين؟!

ضرغام.. ام شهد انتي باستعجالج
هذا تيهتي المشيتين لا انتي كتلتي ومات
ولا انتي بعد تكدرين تحمين نفسج

الي عليج تلزمين نفسج وماتاخذج حجايه
وتردج والباقي علينه

ابو رانيا.. خلي اخذ اختي ونطلع ونكعد ابغداد
وحته اذا موبغداد نكعد بالبصره بس بعيد
عن الشيخ..

السبع.. ماترهم ياحجي لوترهم
جان امناهه عندك بس مرجع بناتهه النه

رانيا.. بابا خلي نرجع لبغداد هو عمر واحد
نعيشه برعب حته اطفالي تخبلوا يوميه
طلقات وهوسه..

جنت احجي ويه بابا بس الظاهر سمعني
ضرغام رفعلي حاجبه الايسر بوضع
ماعاجبه الحجي..

ابو رانيا.. بنتي مااكدر اعوف عمتج
هاي من زمان معروفه عند العشائر الي
يتوفى رجلهه لوتزوج حماهه لو تترك بناتهه

السبع.. يله نترخص احنه احسبوا
ماصاير شي اذا مات الشيخ الله يرحمه
واذا تشافه مايحجي اطمئنوا..

لبابه.. كاموا كلهم طلعوا وجراح اشرلي
اكوم ضرغام والسبع طلعوا وجراح وكف
اباب المشتمل اجيت يمه وسديت باب المطبخ

جراح.. لااطلعون اليوم ابد
لبابه.. ماشي بس خاف نسوان القصر
تجي علينه يتعاركن

جراح.. محد تجي السبع وصاهن
لبابه.. عمه زينب وين؟
جراح.. يم خالتي اليوم الصبح راحت
اذا احتاجيتي شي دگي عليه..

لبابه.. راح جراح واني رجعت ليجوه
انطيت مهدء لماما وخالو مخلي ايده
ع خده رانيا وامهه يريدن يرجعن لبغداد
وخالو مايكدر يعوف ماما ..

مر اليوم بالويل ماما ضغطهه مرتفع
هدوء بالقصر اي صوت ماكو لامن
زلم ولامن نسوان ...

ثاني يوم الصبح اجت عمه زينب هستوهه
سامعه الخبر حاولت تهدي ماما بكلامهه
زينب.. كولي يالله ياساهره محد يلومج
لان يعتبر ثار

ساهره.. وراح يعوفني بحالي راح ينتقم
مني ببناتي
زينب.. بناتج بالحفظ لبابه بيد جراح
وفجر بيد السبع خافي ع نفسج موعليهن...

لبابه...مرن يومين وطلع عامر من المستشفى
الضربه برجله ويمشي يعرج والعجيب
فات من يم ضرغام وماحجه وحته مااشتكه

اما الشيخ ظل ٤ ايام وطلع جدار المعده
متأذي ومحد حجه والوضع هادىء
التمر طلعوا ناس كملته واحنه كاعدين
بالبيت ...

...
عقيق..
‏أيام مملة ومستقبل مجهول ونوم غير منتظم
جسد مرهق وامنيات تترتب تحت
الوسائد والأيام تمر ولا شي جديد . .

ايام قليل عليهه اكول سوده
الي اسمه السبع نهائيا مااشوفه
غاب عن البيت بحدود ٤ ايام ورجع

ابرار يمي بليل نبات وحدنه
ومن اسألهه دكول جيران الشقه
صديق السبع وامان ماكو شي..

ماادري شيصير كل الي اعرفه
محتاجه سندي محتاجه بابا
وحالتي الصحيه ادهورت اكثر..

طلعت من الغرفه ابرار تقره بالصاله
كتلهه خابري ابن عمج اريد احجي وياه
ابرار.. كولي حبيبتي محتاجه شي؟

عقيق .. اي اريد احجي وياه
ابرار ... ادللي هسه اخابره يكمل
شغله ويجي تعالي اكعدي يمي ليش
كاعده وحدج خلينه انسولف..

عقيق... شنسولف؟
ابرار.. تعالي احجيلج عن حياتنه
بالقريه وشلون كلهه عايشه تحت ظلم
عمي الجبير الشيخ وكلهه تخاف منه

عقيق... حته السبع؟
ابرار.. لا هو يخاف من السبع بس هو ظلمه
ع النسوان مايكدر للزلم

عقيق.. مايموت؟
ابرار.. الاعمار بيد الله وبعده متباهي
بجبروته

عقيق.. انتي شلون درستي
ابرار.. اخويه جراح جان حاميني
ومن راد يزوجني الشيخ السبع كال ابرار
الي اني اريدهه واتكفلهه بعد ماكدر يحجي

وراهه اجاني السبع وكال لاتفكرين
وتتأملين بالسويته مجرد حمايه الج
بس تكملين سادس انطيج حريتج
واختاري المناسب الج..

السبع.. شكد حلو هو مبين يحب الخير
ابرار.. هوااايه افضال ماتنعد وماتنذكر
العام شفته بالجامعه مالتي وعبالي جاي
عليه بس شفته وكف ويه الحدقجي
مال الجامعه..

بعدين عرفت هو متكفل عائله ابن الحدقجي
الشهيد وبانيلهم بيت ويصرف عليهم
بس شي حلو بي محد يعرف بي..

تدرين حته الحدقجي وغيره من الي كافلهم
مايگلهم اني ادفع وهذا من عندي يكلهم
من شخص خير دزلكم ...

عقيق.. وهو هلكد عنده فلوس؟
ابرار.. اي متمكن عنده من المقاولات والانسان
الماياكل حرام الله يبارك برزقه وهو عنده اراضي
بابو الخصيب ومستغليهه للزراعه ..

عقيق.. متزوج؟
ابرار.. لاااا مامتزوج
عقيق.. جبير؟
ابرار.. اااي الله يريح گلبه ..

عقيق... ظليت كاعده يمهه وبعدهه
كمت للغرفه للعصر سمعت باب الشقه انفتح
كمت بسرعه طلعت لگيته كاعد وابرار
جابتله مي..

من شافني رفع راسه ورجع دنك ابد مايباوع
بوجهي مرات اكول خاف لبسي بي شي
بس اني البس تراك الجابتهم ابرار وعريضات حيل
حته موقياسي بس ماالبس حجاب..

تقدمت كلت السلام عليكم وكعدت
السبع.. وعليكم السلام
عقيق.. اريد احجي وياك بموضوع
السبع.. اسمعج!!

عقيق.. اني اريد اهلي اخذني للتاجي واني
ادليك ونسأل عليهم حتلو يصيحون بالسمعه
عليهم

السبع.. وبعد!!
عقيق.. اني ملتزمه بعلاج واجيت هنا اتعالج
وظل علاجي بالفندق وغراضنه وهاي اسبوعين
اني بدون علاج واحس گلبي بده يتعب..

السبع.. وبعد!!
عقيق.. هاهي!!

السبع.. اسمعي يابنت الناس انه ماتارك موضوع اهلج
رحت بنفسي وسألت عليهم عندج واحد من عمامج
ويه عصابه وورا وفاة ابوج طالعين عليهم
عمامج كلهم شايلين وواحد معتقلي..

المنطقه مالتكم ماانطتني اي عنوان ولا كلام
٣ ايام وانه ادور وساعدني ضابط مناك ورحت لمركز
الشرطه وحجيتلهم السالفه وكالو هاي المنطقه
اغلبهه عصابات ويوميه معتقلين واحد

انتي عندج عمام اثنين واحظ معتقلي وواحد
شايل وين الگا ردت عنوان اولاد عم ابوج
كلمن يكول مانندل ومحد انطاني جواب..

اما حالتج الصحيه باجر الصبح اخذج
للفحص وان شاء الله خير..

عقيق.. واني راح اظل هيج شلون اعيش
وحيده اخذني لدار الايتام!!

السبع.. مستحيل اخذج اسمه دار الايتام
بس بالحقيقه مودار ايتام مامناسب لعمرج

انتي انطيني حل ابالج
وانفذه الج!!

عقيق.. ماعندي حل ابرار كالت بس هاليومين
وترجع واني شلون اعيش وحدي خليت ايدي
ع وجهي وكمت ابجي

كلامه صحيح واحد من عمامي دائما تاخذه
الشرطه وانسان سافل حته ميحاجي بابا
ودائما بابا يكول هسه يوكعنه بمصيبه..

واصلا بهذاك الزمن ب٢٠٠٧ الذبح
بالجمله بالتاجي الجاي لبغداد يلزمو
بالبساتين وقتلوا صارت الجثث بالشوارع
وقت الطائفيه..

السبع.. لاتبجين انه هم اريد اسلمج لاهلج
بس ماعندي حل وين اوديج انتو اصلكم
مو من التاجي ماعدكم سجلات قديمه حته
يدورون عليكم..

عقيق.. ماادري مااعرف احد بابا مره سكن
بالطارميه ومره بالدجيل يوميه بمكان
وين مايلگه شغل ياخذني ونروح حته بيت
ملك ماعدنه ...

السبع..يمكن حياتي ماتناسبج بس الي
اكدر علي شغله وحده اخذج وياي للقريه
وتعيشين ويه بنات عمي وبكفالتي..

عقيق.. وشلون اعيش يم ناس غربه؟
السبع.. انتي مجبره مو مخيره!!

راح افتحلج الباب واطلعي ذاك الشارع
وين تعيشين ساعه وحده ماتكدرين
بهيج وضع وهيج نفوس .

عقيق.. وتظل ادور ع اهلي
السبع.. اكيد وهذا وعد لو بعد اسنين
لازم الكاهم هاي الشقه مأجرهه وبعد مااجي
هنا حسب شغلي مااكدر انقلج يوميه بمكان..

عقيق.. غمضت عيوني بأسى وكمت من يمه
بدون مااحجي طبيت للغرفه بجيت كمت احجي
ويه بابا ساعدني ادري بي يسمعني وماعافني وحدي..

خليت راسي ع المخده واشوف بابا بالحلم
نفس ملابسه وبعدهه بيهه تراب مال الحادث
وجان مستعجل لان ماما واكفه بعيد تنتظره!!

بس كال روحي وياه لاتخافين
اني وياج مااعوفج بس ابدل ملابسي
واجيج روحي بابا هذا اني دزيته الج!!!

فزيت من نومي عركانه شعور مريح
بداخلي بابا هو يعرف الزين والموزين
وهو كالي روحي ..

طلعت من الغرفه جان دنيا المغرب
صار كدامي يصلي وصوته من
يكول الله اكبر عالي..

رحت للمطبخ يم ابرار تسوي عشه
من كمل رجعتله كتله اني موافقه!!

السبع.. شفتي ابوج؟
عقيق.. شمدريك؟

السبع.. شعور اليتيم واحد بس اگلج
شغله وحده ابوج راح يظل وياج
لمن تكبرين وهم مايعوفج..

انه ابوي بكل خطوه وياي مااسوي
شغله اذا مااخذ شوره وانتي
هم خليج مؤمنه بوجود ابوج بجانبج..

عقيق.. رمشت عيوني واني اباوعله
شكد حلو كلامه بس شكله عكس كلامه
شكله مال واحد عصبي وغاضب
وعيونه تخوف وبشرته سمرته وضخم ...

راح لابرار للمطبخ مدري شحجه وياهه
وراح تعيشنه وحدنه كالت الصبح
نروح للطبيب حته تسوين فحوصات..

ثاني يوم ب٩ اجه اخذنه اباوع للشارع
غريبه اني! هذا مو مكاني! ولا مدينتي
شلون اجيت هنا ولشوكت اظل هنا!!؟

ابرار ويايه ماعافتني ابد هو مادخل
لحد ال١ يله كملت فحوصات صادفت جمعه
انطوني علاج وتعليمات كون ماانقهر
وحالتي النفسيه تكون زينه...

من صعدنه سألني تعرفين اسم الفندق
انطيته اسمه واخذني اله حاجه ابو الاستعلامات
وانطيته رقم الغرفه صعدت جبت
الجنطه مالتنه وعلاجي ونزلت ...

خليت الجنطه بحضني واشتم عطر طيب
حيل عرفته هذا العطر من ملابس بابا
اريد اوكف دموعي مااكدر كمت اشهك
بالسياره...

التفتت عليه ابرار تسكت بيه وتحاجيني
وهو مركز بالطريق مارفع راسه..

رجعنه للشقه اخذت ملابسي
الباقيه وابرار نزلهه يم بيت كالت
بيت خالو واني مشيت وياه للمجهول...

طول الطريق هدوء كلساع ارطب
شفايفي احسهن يجفن بس اي
كلام ماكو...

قريب مانوصل حجه كال راح الكل
يسألج منو انتي؟ لاتحجين حياتج
اليسألج كليلهم اسألو السبع!!

اتمنى اتفهميني انه راح اكول
عاقد عليهه حته محد يحجي
بس بيني وبينج ماكو شي حاولي
تلتزمين بلي اكوله..

عقيق.. شنو عاقد عليه انت غريب
السبع.. ادري غريب بس باي حق ادخلج
القصر وانه ابن شيوخ وعيبه اجيب
غريبه مايربطني بيهه شي..

عقيق اسمعي الكلام ومجرد اتفاق
لا اكثر قابل صدك انتي ع ذمتي
هاي علمودج راح تكلفني هواي هاي المجازفه
بس الله خلاني بطريقج وواجبي احميج..

عقيق.. مااعرف شحجي وشكول
شنو الي اسوي ابدي افتح باب
السياره وانهزم بس ماباليد حيله

لا اعرف اناقش ولا اعرف اسولف
كل الي اعرفه اسأل وهو يجاوبني

وصلنه لمنطقه زراعيه وبساتين واشجار
عاليه ووكفت السياره اباب قصر جبير حيل
ونزل وكال انزلي..
...

لبابه... وره طلعت الشيخ محد فتح موضوع
رجعنه لحياتنه الطبيعيه ماما ماتطلع ابد بس اني
وفجر انروح للحجيه انشوفهه وعمه زينب
بس محد يحجي ويانه

الشيخ وعامر رجعوا لحياتهم الطبيعيه
ويتملق لخالوا واسلوبه متعدل ومستخدم
اسلوب نفس اسلوب ماما من استخدمه
وخلته يطمئن من ناحيتهه...

طلعنه عصريه بالحديقه البرا رانيا
وجهالهه واني وفجر جراح ملتحق
وضرغام هم بالدوام..

كاعدين انسولف واجت ايناس يمنه
كعدت بس ماحجت شي لحد الان
مانعرف انذمهه لو نأمن الهه

شفنه سياره اجت من بعيد
كالت خلن انطب خاف خطار
بس من تقربت السياره عرفناهه للسبع..

وكفت اباب القصر واحنه بالجانب كاعدين
نزل ونزلت ابنيه وياه كلنه وكفنه مصدومين
البنيه لافه شال مخربط ع راسهه
تطلع بكد فجر...

مبينه خايفه وتمشي بصف السبع
لزك لازمه جنطه بيدهه ورجليهه
ماتساعدهه تتقدم..

تقدم السبع علينه وهي وياه كال
السلام عليكم ردينه السلام

السبع.. لبابه اخذي البنيه يمكم
بين مااسلم ع الحجيه وادزهه الكم

فجر... هاااا منو هاي؟
السبع.. خطاري هاي ديربالكم عليهه

لبابه... اباوع لفجر عيونهه غورگت
بالدموع وبس تباوع على البنيه...

ايناس ازيد من حالة فجر وعيونهه
صارن بگصتهه تلافيت الموضوع
ورحبت بالبنيه ودخلتهه جوه والسبع راح
للقصر..

تلكتنه ماما تسال منو هاي؟
لبابه.. السبع كال خلوهه يمكم هسه يجي
اجت وياه

ساهره.. اهلا وسهلا بنتي منو انتي
عقيق.. اني عقيق
ساهره.. وين تعرفين السبع
عقيق.. اسألي هو ماادري..

لبابه.. شفايفهه صارن زرگ ايدهه ترجف
رجلهه تهز بيهه من التوتر

جهال رانيا فشلونه يجرون بجنطتهه
لان بيهه مداليه مال دب ويتعاركون
عليهه. .

عقيق... كوه حابسه دموعي ياربي
ناس غربه كلهه تسأل منو اني
وماعندي جواب ..

عيني ع الساعه مرت فوك النص ساعه
اندك الباب ودخلت حجيه جبيره كلهه كامت
وكفت وتبوس ايدهه

وحده يكلولهه ام جراح عرفتهه ام ابرار
هاي ووراهه دخل السبع من شفته
يله ارتاحيت ...

سلمت عليه الحجيه وتباوعلي
باستغراب وام جراح طبيعيه
ومبتسمه...

كعد السبع وكال اعرفكم عليهه
اسمهه عقيق بنت صديقي توفه
وماعدهه احد وقبل لايموت امني
عليهه ..

فجر... وشنو غاح تعيش يمنه!
السبع.. اي فجر يمكم
فجر.. ماعدنه مكان بيت خالو هوايه!!

السبع... بنظره حاده باوعلهه وكالهه
ميخالف يومين بين ماارتب غرفتي
وتعيش بيهه واني انتقل يم ضرغام

عقيق.. الي اسمهه فجر مثل الزعلت بسرعه
ركضت للغرفه ماعرفتهه شتصير منهم
وليش ماحبتني ..

عافني وطلع وحده اسمهه لبابه
اخذتني للغرفه بدلت وكعدت
ماتحركت ابد اسمع اصواتهم بره
...

رانيا.. والله انتم اغرب من الخيال
النسوان عدكم مطشره وشوكت مايعجبه
الواحد يجيب وحده ويعقد

لبابه.. والله ماادري يارانيا حجيت لجراح
يكول شكو بيهه السبع موصغير حته انعلمه
شيتصرف اكيد تصرفه صحيح

رانيا... بس هي صغيره وعبالك مريضه
ايدهه تكسر رجلهه من الضعف

لبابه.. فجر ماحبتهه وضايجه منهه
رانيا.. فجر متعلقه بالسبع وتريده بس الهه
عينج ع اختج لاتخليهه تحب الانسان الخطأ

شفت بعين فجر غيره ع السبع
رغم هو ينظرلهه نظرة اخت بس هي
نظرتهه بمرور الايام راح تولد مشاعر عدهه..

لبابه.. مااكدر احاجيهه انتي حاجيهه
لان ماراح تسولفلي تدري جراح شيكول؟!

يكول ضرغام متعارك ويه السبع البارحه
ومتضاربين بالبستان ورغم قوة السبع
وهالمره العركه قويه...

منفعل ضرغام ومخلي خشم السبع
ينزف يكول ماكدرت حته افكهم بالنص ساعه
هم متلازمين حته سحبت اسلاحهم
خاف لحظه شيطانيه ..

رانيا.. عاد هم مخابيل بس عليمن؟

لبابه.. ضرغام ماقابل بهاي البنيه
يتخبل من القاصرات يكلهم مال احطكم
واشعل النار بيكم..

يكله شلون تدني نفسكم ع مزعطه
وراجع ع جراح هم متعارك
عنده زواج القاصرات موضوع مايتناقش
بي...

رانيا... هو مبين متعصب صارله مده مختفي
مدري وينه ؟!
لبابه.. يظل ببغداد مايجي جراح كال
عدهم شقه ويكعد بيهه ..

خلي اكوم اشوف فجر بلكي
اكدر احجي وياهه واذا ماكدرت
ادزج عليهه ..

رانيا.. كامت لبابه واني يمي سيوفي
يلعب ورضاوي يم ماما...

سيوفي شاف بزونه ركض وراهه خليته
يلعب كاعده واباوعله واشوفه يركض بالبستان بس
كدام عيني..

دنكت ع تليفوني ثواني بس رفعت راسي
سيوفي ماكو بسرعه ركضت اشوفه
ماكو اختفى ..

اصيح سيوفي ماما ماكو وين راح
ابني كلبي لزمني وشعور موحلو اجاني..

كمت اركض بالبستان ويه اتجاه اللعب
مالته فقدت ع ابني ركضت للبيت اصرخ
الحگلي بابا سيوفي ضاع..

كلهن طلعت ادور كل واحد لزم اتجاه
بس گلب الام دليلهه جان يدليني
ع الاتجاه بس ماالكاه...

طلع جراح وانخبص ويانه
يحاولون يهدوني بس فقدت
كمت اضرب ع وجهي شعور موحلو
سيطر عليه..

كمت اركض بالاتجاه اليدليني
كلبي صوته باذاني وضحكته
وكلبي يكلي اركضي بعد !!

امشي واتعثر وصلت قريب ع الشط
واني فاقده بدون شعور هي ثواني
مستحيل وصل لهنا ...

تلكاني ضرغام يمشي من بعيد
ركضت بلا وعي علي لحدماوصلت يمه
وكعت يم رجليه واصيح ابني..

هو مستغرب بس كال خير
ياستار شجاب ابنج هناا!!

رانيا.. الله عليك ساعدني ابني ضاع
جان يلعب كدامي
كلبي يكلي هيج راح واشر
ع الشط..

ضرغام.. واحنه نمشي ورا كلبج؟!

طفل شيوصله لهنا ومايندل طريق امشي
لمكانه العب بي انتي واصله الشط
الجبير يتيه بي..

رانيا.. مشيت كدامه بسرعه وكلما التفت
علي اشوفه شلون يمشي بهدوء واستفزاز
واني روحي رايحه وجكارته بحلكه..

نزعت نعالي وركضت بكل سرعتي
بدون حته ماالتفت علي وصلت لمكان
العب بي ومشيت امتار بغير اتجاهه

واشوف بحيره موجبيره حيل بس
ممليه مي وبالطول مثل النهر..
روحي وكالت ابنج هناااا!!

صرخت بعلو صوتي سييييف؛!
ساعدوني !!!

صرت مثل الحمامه وتحوم داير مداير
عشهه وادور ع ابنهه الراح!!

فقدت بدون وعي كلهه ادور بغير مكان
محد وصل لهنا لان بغير اتجاه مااحس
ع نفسي غير كامزه بالبحيره ومااعرف اسبح
كمت اغط وارفع راسي اصيح ساعدوني..

ماخفت ابد ع روحي
ولا خفت من الموت بس ابني
مستعده اضحي بكلشي بس اشوفه
سالم...

التموا ع صوتي واني لاحول ولاقوه
اغط واختنك واطلع راسي اهمش
اريد هوه وبديت اغرگ من صدك...

كلهه وكفت ع الحافه والي يصرخ
والي يصيح انقذوهه راح تغرگ
واني اصيح ابني هنااا...

شفت جراح دنه بابا وراد يكمز
بالمي ينقذني بس وكفته ايد ضرغام
ومنعته!!

ضرغام طلع مسدسه من حزامه وانطاه
لجراح وبعدوا بابا وصاح بيهم
وخرواا عليمن تتفرجون وخرهم جررااااح!!!

وكمز وراي بالمي سحلني من ايدي
واني اخذ الهوه كوه واصيح ابني
طلع قبلي وسحبني بس جان مغطي عليه
ملابسي لزكت ع جسمي..

ايناس انطته جادر جبير مال سياره
هو خلاه ع اكتافه وعينه بعيني
وكال الزمي من يم ركبتي ...

ركضت عليه ماما وخاله واني اكح
واحس رئاتي انملت مي وعيوني
مااشوف بيهه !!

وضرغام رجع للبحيره يدور ع ابني
وماهي الا لحظات صرخت ايناس
هذا غرگان!!!!


يتبببببببع....

#خبايا_الاقدار
❤️♨️♨️

... البارت الثالث عشر


رانيا.. من سمعت صوت ايناس وهي تصيح
غرگان تخبلت جنت كاعده بالكاع بالتراب
ومنا مبلله صرت طين اديه ورجليه متروسات..

مفزوعه!!
فزعة ام على ابنهه الي التهت عنه
ثواني !!

شايله جراح من رجليه ويدك بي ع ظهره
وابني بدون نفس صرخت صوت يمكن وصل
لراس الشارع وحسيت اوتاري اتگطعت..

ماجنت اشوف الداير مدايري
ماجنت اشوف مواقفهم منو اليجبي
ومنو هذا الي يهدي بيه

ردت اسحبه من جراح بس ضرغام منعني
جراح يسعف بي وخلا بالكاع ويسويله
اسعافات يعرف..

بابا فقد اكثر مني روحه من الدنيا سيوفي
يكول مارزقني ولد بس رزقني باطفالج
هم ولدي..

لزمتني عمه ساهره كمت اشوف الكل
بحالة دوران حته اشجار البستان
شفتهه مگلوبي...

ماحسيت غير يضربون بخدي راشديات
وظهري ع الشجره بس فتحت عيني
استوعبت اني جنت فاقده الوعي
وابني وينه؟!

ساهره.. ياعمه راح تموتين كولي يالله
ابنج حي وركضوا بي للمستشفى
انتي گلب والده ادعيله

رانيا.. اجذبون عليه وينه ابني
اذا عدل ليش اخذوا ؟!

ساهره.. والله بي نفس وكام يطلع المي
من حلكه بس احسن يتلاحكوا للمستشفى
وانتي لا ايد ولا رجلج ابوج راح يتخبل..

لبابه.. كومي رانيا تعالي فجر ساعديني
خلي ناخذهه للبيت امج تخربطت
وابوج راح وياهم..

رانيا.. لبابه كولي وروح شهد؟
لبابه.. وروح بابا وشهد عدل بس احسن
ياخذوا كومي شوفي الطين الي عليج

رانيا.. كمت امشي بألم وخوف من فقدان
ابني محد اكو من الرياجيل بس النسوان
مجتمعات وتتفرج ..

دخلت للبيت غسلت وذبيت ملابسي
ودموعي تصب مااكدر حته ادعي
احس من هول الصدمه مااعرف شلون
ارتب الكلمات..

رضاوي يبجي يم ماما اصلا مفزوع من
الصوت وماما متخربطه خليته بحضني
وهو يسألني سيوف مات؟!

اسم الله حبيبي هسه يجي
شرب مي هواي موزين علي!!

لبابه... فجر كومي شوفي البنيه عقيق
مالهه صوت من اجت لسه
فجر.. شسويلهه اكعد اغكصلهه!!

لبابه.. موعيب هالكلام شبيج وياهه
هسه اكول لماما عليج تعرف شلون
تحاجيج

فجر.. غوحي شوفيهه انتي !!
لبابه.. فجر والله اكول لماما شو متستحين
ع الاقل الخاطر السبع الحامينه وحاميج
انتي بالذات..

فجر.. مااحبهه
لبابه.. وليش متحبيهه اشفتي عليهه
فجر.. مااحبهه بكيفي!

لبابه.. غريبه فجر مااعرف افسر تصرفاتهه
كمت اشوف البنيه من البارحه من اجتي لسه
ماطلعت ولا شفناهه

فتحت باب الغرفه جانت كاعده
بالكاع ومخليه راسهه ع الحايط
ومغمضه عيونهه مثل النايمه

تقربت عليهه كتلهه عقيق !!
كررت سؤالي ماكو جواب!!
هزيتهه من رجلهه وكعت وهي ع وضعيتهه

فزيت من منظرهه فتحت الباب وطلعت اركض
واصيح ماما البنيه مدري شبيهه!!

عفت ماما ركضتلهه واني رحت ادور
ع السبع وادعي كون مارايح وياهم!!

تلگتني ايناس سألتهه كالت السبع ماموجود
حته مايدري بابن رانيا يمكن ع الشط!!

رجعت للبيت اركض ادور ع تليفوني
وماما تذب مي ع البنيه ولا ايد ولا رجل

طلعت رقم السبع دگيت واني
اصيح يله رد رد جاوبني بس كال
الو كتله الحك السبع البنيه عقيق
يمكن ماتت !!

شمرت التليفون وركضت للغرفه خاله ام رانيا
تشمم بيهه عطر وماما تفرك بايديهه
وتصيح شوفن اظافيرهه شلون زرگ...

كامت تفتح عينهه ببطء وتسدهه
وايدهه ع كلبهه وشفايفهه زرگه
نفسهه بطيء كأنو تاخذ استراحه ..

عشر دقايق ونسمع صوت السبع
يصيح ام شهد كمت تلگيته واحجيله
حالتهه ..

فجر جانت واكفه اباب الغرفه بس
تباوع وهو كعد يم راسهه ولزم ايدهه
قاس نبضهه...

طلع تليفونه دك ع ضرغام بس كاله
وين انت ؟! مدري شكاله بسرعه
سده ودك ع سعود كاله حضر السياره
بسرعه!!

خله ايده جوه راسهه وشالهه
وكال لبابه جيبي حجاب من عندج
وانتي ام شهد تعالي وياي!!

عصريه سوده منا ابن رانيا ومنا هاي
البنيه من الاموات مانعرف شنسوي..

اخذهه وراحت وياه ماما سديت الباب
وراهن اجتني رانيا تتوسل اخابر جراح
لان خالو مماخذ تليفونه..

دكيت ع جراح مايرد دكتين كاملات
وماجاوب طلعت رقم ضرغام
واتصلت علي رد عليه!!

سألته ها ضرغام سيوفي شلونه
امه راح تموت من البجي!!

ضرغام.. زين سووله اسعافات
وراح يسحبون المي كليلهه زين!!

رانيا.. جان صوته عالي من التليفون
مااعرف شلون احجي وشلون اشكر
رب العالمين ..

اخذت التليفون من لبابه مامصدگه
واكله كول والله زين!!
ضرغام.. والله!!

رانيا.. عليك الله مابي شي
خومايبجي وخايف..

ضرغام.. لأاأا مابي شي انتي
يرادلج طبيب لان خايفه

رانيا.. انطيت التليفون لبابه وكعدت بالكاع
ابجي شكر لرب العالمين ركضت ع ماما احضن
بيهه واكلهه سيوفي زين..

ظلت عيني ع الباب شوكت يجون
طولوا هوايه واسمع صوت سياره
وطلعت اركض حافيه ليبرا..

نزل بابا شايله بس روحه ذايبه
بس شافني مد ايده وصاح ماما!!

اخذته من بابا احضن بي وابوسه
فقدت ماادري بالواكفين هيج اشمه
من ركبته وصوت البوس عالي ..

لحدما نبهني صوت ضرغام وهو يحاجي
لبابه ويسألهه ع السبع!!

تقدمت واني شايله ابني كتله مااعرف
شلون اشكرك هاي ثالث مره تنقذني
وتساعدني!!

ضرغام.. لاتشكريني هذا واجبي
رانيا.. الله يوفقك بحياتك ويرحم عائلتك
ضرغام.. ويرحم والديج..

رانيا.. دنك راسه ومشه بس شفت
وجهه شاحب مو نفسه المستفز
مبين علي تأثر بالصار وتذكر ابنه..

لبابه.. موادك عليك ماتجاوب
جراح...تليفوني بالغرفه ظل لان طلعت
ع الصوت ورحت ويه ضرغام حته السبع
متصل..

لبابه.. تخربطت هاي البنيه الجابهه
جراح.. دنك راسه وفركه والله يالبابه
صايره هوسه منا جبار وندري بي مايسكت
واكيد يخطط لشي

ومنا السبع تكفل هاي البنيه والى متى وشلون
وشراح يصير؟!

وضرغام الي مايشارك احد ويحجي
تخيلي يكول صار ٣ ايام مانايم مثل الذيب
عينه ماتغمض

لبابه.. ليش شبي؟
جراح... مو اكلج ماادري محد بيهم
يسولف حته السبع مدري شبي..

لبابه.. حياتنه مخربطه شنو الحل؟!
جراح.. تعالي هناا بصفي وطبطبلي ع المكان
صرت بصفه لزك ومو مرتجي ع الحايط
ومدد رجليه بالحديقه..

شوفي لبابه راح اشاركج بافكاري
بس ممنوع تحجين تسمعين وتسكتين!!

انه راح اشتري من جبار قطعه ارض
وابني بيهه اني وامي حته اختي تجي
يمنه عائلتنه متشتته!!

لبابه.. يعني تبني بصف القصر؟!
جراح... لا شوفي الكاع الورا الشارع
العام هم لجبار راح اخذ قطعه ع راس الشارع
حته ابتعد عن القصر

لبابه.. وهي هاي الكاع كلهه لجبار
جراح.. ااي محد اله شبر هنا بس البستان
القديم هذا مال السبع..

لبابه... واني ودراستي؟
جراح.. اذا كملت بناء نتزوج واكو مدارس وخطوط
اسحلج بيهه واذا تأخر البناء ماادري وين اوديج
لازم اجر برا القريه حته ادرسين..

لبابه... احنه ليش مانطلع خالو يأجر ونكعد
وياه
جراح..منو يخليكم جبار لو ابنه عامر اتعس منه
مايحسبوا خالكم من تخلفهم يحسبوا غريب..

لبابه.. ظلينه انسولف شويه ورجعت
للمشتمل وهو ظل برا كال انتظر ضرغام يجي!!

رجعت للمشتمل هدوء بعد ماجانت كلهه
مخبوصه رانيا فرشت بالكاع هي وجهالهه
ونيمتهم ونامت !!

خاله تسوي عشه وفجر مختفيه
دورت عليهه لگيتهه كاعده ورا المشتمل
وبيدهه عوده ترسم بيهه بالتراب..

كعدت بصفهه حاولت الطف الجو
لان مبينه مغثوثه!!
فجوره شبيج اني مواختج احجيلي؟!

فجر.. مابيه شي
لبابه.. لابيج شي من اجت البنيه من البارحه
وانتي موطبيعيه

فجر... اخذت السبع!!
لبابه.. وانتي شعليج ؟
فجر.. شلون شعليه منو يحميني بعد
لبابه.. يظل هو يحميج يعني اذا تزوج راح يبطل
مثلا..

فجر.. السبع مثل بابا واني ابد مااخاف
هنا حته من جباغ مااخاف بس خاف هاي
عقيق بعد متخلي يحمينه ويسوي بيه
جباغ مثل نوغ..

لبابه.. قصدج تغارين علي لان اجت هاي
وعبالج بعد مايهتم بيج ويحميج

فجر.. اااي اني احب السبع مثل بابا
وهو كال انتي مثل اختي المتوفيه كلما
اشوفج اشوفهه بس هاي هسه ماتخلي..

لبابه.. لا السبع رجال موتأثر علي وحده
ابعدي الافكار عنج وخطيه البنيه
يمكن مريضه ..

فجر.. الباغحه بليل شفتهه تبجي
ومانامت ابد
لبابه.. شفتي خطيه ماعدهه لا ام ولا اب
احنه عدنه ماما وتأذينه لاتصيرين انانينه
انتي فجوره الورده..

فجر.. السبع كال هاي السنه اخليج
اداومين بالمدغسه بس من اجت هاي
خاف مايقبل..

لبابه... لا يخليج بس صيري طيبه
وتحبين الخير للكل هسه انتي انانينه
والله يحاسبج انتي مودكولين السبع اخوج
الجبير وبمثابه ابوج المفروض تفرحين
اعتبريهه زوجة اخوج...

تعمدت احجي هيج علمتني رانيا حته
ماتحبه صح عمري صغير بس الاهتمام يولد
الحب مثل ماحبيت جراح والسبع وفجر
ممتوالمين...

كمنه دخلنه جوه السبع بعده ماراجع
اذن الاذان وصلينه وننتظر بماما
تأخروا يله اجوا

دخلوا وعقيق ساندتهه ماما تعبانه
حيل كعدناهه بالغرفه وكالت ماما سون مجال
السبع يفوت لمينه الفراشات مال جهال رانيا
ودخل...

جانت مدده وبيدهه كانيوله كعد يم راسهه
ومدري شحجه وياهه وفجر ركضت جابت
كلاص عصير وقدمته الهه..

رفع راسه ابتسم لفجر وطبطبلهه بمكان
بصفه انطت العصير لعقيق وكعدت بصفه
حاجاهه ضحكت وكالتله كول والله
ابتسم بوجهه وكالهه والله !!

شويه وطلع ووصه ماما ع علاجهه
فجر طفله بريئه كلمه تاخذهه وكلمه
ترجعهه بسرعه غيرت طريقتهه وصارت تهتم
بعقيق...

حته اخذتهه للمغسله غسلتلهه وكالتلهه اني
الم شعرج وكعدت مشطتلهه بس عقيق
تعبانه حيل حته عيونهه گوه تفتحهن...

رانيا... مرن يومين بديت استعيد
نفسي من الهبطه بس صرت ماانام بليل
كلساع افز اتاكد موجودين اطفالي..

اختنكت الساعه ب١ بليل لبابه كاعده تشوف
تلفزيون كتلهه كومي وياي مختنكه..

طلعنه للحديقه مال القصر امينه لان صايره بين
المشتمل وبين القصر اضويه عاليه والكل نايم
سولفنه شويه واشتميت هوه احس
نفسي ارتاحيت...

انفتح باب المضيف طلع منهه جراح
هذا بس يشوف لبابه يجي عليهه
وهي بس شافته كامت !!

ظليت كاعده اباوع للسما شكد صافيه
والليل شلون موحش ويخوف..

هم عدهم ابواب هواي للقصر احنه كاعدين
بجهه المشتمل والشارع بس اشجار عاليه محد
يشوفنه اله يجي باتجاهنه..

سمعت باب انفتح ظليت كاعده بس حركه
وصوت وشوشه وشي يطكطك
صار عندي فضول اشوف كمت وكفت وصرت ورا
الشجره..

شفت بعيني واتمنيت مااشوف
حته لا احمل حمل الشهاده
الثقيل!!

شفت عامر ابن جبار وجبار
وواحد وياهم مااعرفه شايلين اسلاحهم
ومثل اليتختلون حته محد يشوفهم..

اجت حجايه جبار بأذاني
وهو يگله تاكدتوا مات خاف بي روح!!

رد علي عامر لا بويه سويناه منخل
والجماعه كتلهم ذبوا بالشط حته
يضيع اثره ..

جبار.. كفوا منك ديربالكم ووصي الازلام
لايوصل الحجي لشيخ ياسين وهذيج
الساعه يصير عدنه سبع ثاني..

عامر.. شغلنه امين محد يدري
حته ذبينا بصوبهم مويمنه..

رانيا... اسمع ومخليه ايدي ع حلگي
اكو روح انقتلت هسه ؟!
اكو روح بريئه غادرت لربهه مظلومه ع ايدهم..

جراح ولبابه اختفوا واني لا اكدر اطلع
ولااكدر ابقه خاف يشوفوني
هم طلعوا من الباب الثاني ع البستان
بس الخوف اخذني خاف يشوفني بس اطلع
ساترتني الشجره..

مشوار واني واكفه وكلبي يدك براسي
طفت الكهرباء ع حظي كمت مااشوف كلشي
ماعدهم مولدات لو يفتحون مولد مال بيت
لو يظلون للصبح بدون ضوه..

طلع واحد فتح المولد بس ضواهه
ضعيف كام يطفي بالاضويه الزايده
واني رجليه نزل الدم بيهن مااكدر
اطلع واعبر من القصر للمشتمل...

مااحس غير شي قوي حيل
انغرس بعظمه كتفي وصوت هادىء
كدرت اميزه وهو يكول لاتتحرك!!

عباله حرامي لان خاتله ورا الشجره
وظلمه محد يكدر يميز!!

رغم عرفت صوته بس المسدس
بكتفي خلاني من الخوف ردت
اوكع من طولي...

باوع بعيوني واني ارجف رجع مسدسه
بحزامه وكال شتسوين؟ وليش خاتله
تراقبين منو؟ حجاهه وهو يحرك راسه
باستغراب..

رانيا.. اأأأ أني أأأأأأ...
ضرغام.. سبحان الله انبلع السانج
شو فتحي حلگج خلي نطلعه

رانيا.. بس الله يدري بالخوف بذاك الوقت
عمري ماانسه شلون اديه ورجليه
ترجف عبالك حلم وجاي امثل فلم رعب...

ضرغام.. مو وياج انه شجابج للقصر
بالنص الليل!!

رانيا.. اأأجيت ويه لبابه راحت ويه جراح
ضرغام.. وانتي شنو ناطور الهم
وشعندج خاتله وتراقبين!!

رانيا.. الله عليك مااعرف بس طفت
الكهرباء خليني ارجع

ضرغام.. خله رجله كدامي ومنعني
امشي اوكفي احجي الصدك شعندج هنااا
اشفتي ؟!

رانيا.. هو كال اشفتي حسيته وياهم
لو هم شايفهم كمت اأتأت وارطب بشفايفي
وكلبي يدك بأذاني عبالك ماطور..

ضرغام.. لاتختبرين صبري احجي
شعندج شبيج خايفه اشفتي؟!

رانيا.. ماشفت شي عليك الله خليني
ارجع والتوبه اذا طلعت..

بعدني احجي ورجعوا نفسهم
الزلم وصوت جبار وهو يكح
باوعلي ضرغام وعبالك افتهم الخايفه منه..

موزلم وشيوخ عبالك ذيابه صاح جبار
منو هنااا ؟!

بسرعه ردت اوكع واشوف رجلين عامر
تقترب ع الحديقه وضرغام واكف وگانو
يفسر اليصير براسه..

بسرعه سحبني من ايدي وابتعدنه متر
صرنه ورا شجره السدر عاليه حيل
بصف المضيف وخلاني ع الحايط

هستوني اريد احجي كتله ضرغام
حط ايده ع حلگي ومنعني!!

اني واكفه ع صبه عاليه وهو اقل
مني بدرجايه رجله ثانيهه
وطابگه بالحايط والرجل الثانيه بالكاع...

عامر يدور ويصيح منو هنا
ويحاجي بجبار ماكو شي يابه هاي
بزونه حركت الشجره..

نسمع صوتهم وهم يبتعدون واني
ماينوصف حالي گلبي راح يوكف
ورجليه ارتخت بعد ماتساعدني

ايد ضرغام ضاغطه ع حلگي بقوه
بس مايباوع بوجهي جان داير وجهه
ع جهه صوت عامر...

من ابتعدوا وبعد مالهم صوت
باوع عليه اجت عيني بعينه
عيوني امتلت دموع ظلمه مايبين
شي ...

خله رجله الي بالكاع ع الصبه
وصعد صار اطول مني بهواي
وقريب عليه بشكل دنك راسه على اذني
...

وكال راح اشيل ايدي لااطلعين
صوت !!!

هزيت راسي رفع ايده ومن رفعهه
بأصبعه الجبير تعمد يطخ شفايفي
بضغطه قويه...

ابتعد عني نزل من الصبه واني الهث
كلبي احسه يصيح ارحميني ساعه
السوده الطلعت اشتم بيهه هوه وكتلج
مختنك...

كعدت بالكاع مكرفصه وهو واكف
كال هم نفسهم شفتيهم!!

بدون وعي بس اريد اخلص منه
هزيت راسي اااي

ضرغام.. شسمعتي؟
رانيا.. ماسمعت؟!
من كلت هيج فتح اللايت بوجهي
وشفت ملامحه شلون مبين الغضب عليهه..

حجيت كلشي حته بدون مااخذ نفس
احجي وارجف وختمتهه الله عليك
لاتورطني!!

ضرغام.. اني اورطج؟! يمكن كايلج
تختلي بنصاص الليالي..

كومي يبلوه مدري منين الله
ذبج بطريقي خاف عوزني
سلبان راحه!!

رانيا.. كمت وياه باوع ماكو احد وصلني للمشتمل
قبل لا ادخل كال ديربالج تحجين لاحد
اعتبري نفسج ماسامعه شي !!

رديت علي بخوف ميخالف وبعد مااطلع
والله..

ضرغام.. خلي انشوف تثگلين باجر
الكاج كاعده بالمضيف ماتوبين!!

رانيا.. عافني ومشه واني طبيت الهث
جوه هاي الحقيره لبابه اليوم اشلع
شعرهه وين ولت هم بيهه بله...

طبيت ادور عليهه ماكو معقوله لسه
مارجعت اخاف اطلع انوب
شويه وانفتح الباب هي وفجر

صحت بيهن وجريت لبابه من شعرهه
لبابه.. والله هنا كاعدين بالحديقه
وحته فجر ويانه انتي مالگيناج
عبالي رجعتي..