#اتمنى_ان_افعلها

الحلقة_60

وتشاء انت من البشائر قطرة
ويشاء ربك ان يغيثك بالمطر
وتشاء انت من الاماني نجمة
ويشاء ربك ان يناولك القمر

...........

-هيت لك

- شنو يعني ؟

- يعني متحظرلج صارلي عمر، يعني اكلب العب لعب اليوم

ابتسمت:- هيج تفسيرها صدك ؟

ضحك بصوت عالي :- لا حشا القران مو هيج تفسيرها ، هيت لك يعني اتهيأت لك ، متحظرلك .. هيج

- هاا

كعد ع الجرباية، و اخذ ايدي ، ردت اكعد يمه، حط ايده ورا ظهري و يكلي :- هنا تعاي
و اخذني على رجله كعدني

ارتبكت، بقى يلعب بشعري يبعده من اذاني :- ليش هيج شعرج گصير

- احب هذا الموديل

- اني احبه الشعر الطويل للمرة ، بس حبيت الكصير جي شعرج كصير

- ابتسمت بخجل ما رديت

مد ايده رفع وجهي :- فدوة لهالخلقة الأحبها

بقيت مبتسمه، باوعتله :- مجنت اتوقعك هيج

عقد حاجبه :- شلون يعني هيج ؟

- جنت اشوفك ثكيل و ملتزم و متدين

- و هسه طلعت ساقط ؟

- لا حشاك مو هيج
ضحك بصوت عالي :- جنت ملتزم لإن الله يحتم عليه الألتزام بحكم انت غريبه فلازم اخذ ثكل و التزم بس من صرتي حلالي والله راضي عليه وياج، بعد شنو اليمنعني عنج ؟

ملت راسي و باوعت عليه : شي كلش حبيته لما سمعتك تشكر ربك عليه، هالشي حسسني بأحساس حلو خلاني احس انو الي قيمة كلش جبيرة عندك

- هاي ليش هيج سوالفج تخبل

ابتسمت :- بالعكس يكولون عني بومة لطامة فكر هاي اكثر شي اسمعها بسبب سوالفي

- هذا منو يكول عنج هيج ؟

- هواي و اكثرهم امي

- تتشاقة وياج ، لا تخلين هالامور ابالج اسمعي الزين و الشين شمري من اذنج

سحب المخدة و خلاها ورا ظهره و انتجى و حط ايده ورى ظهري ، كمت من مكاني، ساعدته و هو يشيل رجله حتى يتمدد ، و كعدت طرف

- جان عمري ١٩ لما اتزوجت ام مرتضى، هي تصير بت ابن عم ابوي، جانت كل يوم يمي حتى اذا رادت تروح لهلها تروح الها يوم واحد و ترد .. ما جنت اتلهف لمرة يعني عادي عندي لان من اول ما شبيت وعيت على مرة .. لحد ما اطلكنا

تسأليني ما توقعتك هيج .. ٤ سنين تقريبا من اطلكنا و ٣ من عرفتج .. من لما شفتج و كعدتي و ما الج احد و اني ما الي وحدة بالبيت فكرت اخذج ، بس الصار يوم يوم تتغير مشاعري اتجاهج ، صرت اهتم و اشيل هم .. وين راحت وليش تسوي هيج و المفروض هيج
وشفت روحي مدخل حتى بخصوصياتج و اني ما ادري

صرت كل يوم بصلاة الليل احجي ويا ربي بيج ، اشكيله لهفتي الج و لشوفتج و انت يمي، و ادعي و اكله رايدها منك بالحلال

- من شوكت حبيتني ؟

- ما ادري الموضوع ما بدا من لحظة .. جان احساس تدريجي

-رقية راحت لأمها ؟

- اي البارحة من اجن عماتها

- حسيتها ما راضية بالخطبة

- طبيعي تريد امها

-شعجب و هي عاشت وياك عمر طلكتها و بعد ما تريدها ؟

-خيرتني بينها و بين امي، كلت الله بيت اهلج ينتظرج ، فترة ووديت عليها مشية شرطت اخلي امي عد اخوي يلا ترجع ، كلت الهم ما بلازم عوفوها ، طلكتها ورا و شلتها من راسي نهائي ما ردتها

- بس هي تحبك اتذكر اول ما الحجية عرضت عليه الخطوبة اجتني للبيت هدت عليه

- الحب مو حجي السان، الحب افعال و احترام و تقدير، امي هي امي اللي لولاها هي ما حبتني شلون تخيرني بيها ، هذا مو حب ، سمي احتياج ااي ..
بس اني ما مخليها محتاجة فوك ال٤٠٠ الف انطيها شهريا مصرف لجهالي العدها.. و بعد الله يوفقها و يوفقني ويا الردتها

اخذ ايدي بأيدها يفرك بيها و يبتسم .. ابتسمت
:- علاج اليوم ما اخذت، رجلي كامت تصل عليه

- اكوم اجيبه الك ؟

- لا اكوم اروح، عيب خاف النسوان تريد تاخذ راحتها

-ماشي
ساعدته يكوم من مكانه ، كال :- سويلي مجال

صحت ماما :- الشيخ صادق يريد يطلع

امي و خديجة صعدن فوك، مشى و هو يكلي :- شنو ما طلع التحليل بعده ؟

- لا والله بعده

- امج شكد مطوله هنا

- مو هواي، فد ١٠ ايام و تروح، ليش

- مو عبالي كم شهر حتى تحظر العرس خطية

- بس اني ما اريد العرس هسه

وكف :- ليش ؟

- لازم ننطي نفسنا مدة نتعرف بيها، لا اني ولا انت هذه اول تجربة فلازم نكون متأكدين من قرارنا و متعرفين على بعض اكثر حتى نتزوج، والا ميصير نعيد نفس التجربة

- اني بالنسبة الية ما عندي شي ، بس اذا انت يهمج هالموضوع و تريدين تتعرفين ما عندي اعتراض باللي ترتاحيله ما مستعجل، يمي و ابيتي و كبال عيني كافي عليه

- شكرا

مد راسه :- اروح فدوة للخلقة الأحبها
وباسني من خدي، ضحكت

ابتعد و طلع راح للبيت، فتت للبيت
يمكن هذا اول عقد زواج اني ما ابجي بيه
عرض بعيني خالد .. يا ترى هسه اني اعتبر خاينته ؟
معقولة هاهية يعني انتهى خالد و صار بحياتي شخص ثاني

تنهدت و فتت جوا، نزلت امي :- هاا

- عذراء وين ؟

- راحت هي و امها ، كليلي شحجيتو شسويتو

- ولا شي خلصها مغازل

- نظراته الج تكتل

- شلون يعني ؟

- من يباوعلج عيونه تلمع و الفرحة واضحة بيهن ، تحسه شكد يحبج

- اني ما توقعته هلكد يحبني

- ما تحسين روحج مرتاحه

- ما اعرف، بس ما متضايقة

- هذا مو سلمان و لا امجد ، ديار هذا رجال متمنيج و مشتريج لا تعيدين الغلطه نفسها ويا، صح مو سهل تنسين الماضي ، بس البداخلج بداخلج خليه ، و عيشي ولا تحرمينه من الكلمة الحلوة اليتمناها منج

- ان شاءالله

- لا تبدلين، امشي ناخذ صور ، حتى ابقيهم ذكرى عندي هناك

- هسه ؟

- لا باجر، اي مو دا اكولج بدلي يلا ..

لبست الكب مرة لخ، و هن بدلن كلهن، امي راحت دكت الباب عليهم .. كالت للبنات :- رايحين نصور تجن تكصن ويانا صورة ؟

حسناء :- يااا عزا العزاني مو غسلت وجهي من المكياج

ميعاد :- حلوات تخبلن جنجن الكمر ما تحتاجن المكياج

- فدوة العمرج شكد السانج حلو

اجت ... ها كملتن ؟

- دتبدل خديجة، انت المن عزمتيهن وين تكفي السيارة

- هي هاي ع الشارع حتى لو نمشي بس الحجية نصعدها بالسيارة، اكسبيهن بالكلمة الحلوة ماما لا تجفجفين وياهم

وصدك اخذتنا امي وراحت للصالون و الباقيات جابهن مرتضى بسيارة ابوه ، امي كصت الصور التريدهن ويانا و هن اخذن ويانا، و صور ويا امهن
ولقطات و ضحك وونسة

حسيت كلشي بهالزواج يختلف
يمكن الله مبارك بيه و هيج مرتاحة
رغم كل ما اصد يأنبني ضميري على اللي سويته، بس دا احاول اصير بلا مشاعر و اصم اذاني عن كلبي

و هن بالصالون اتفقت وياهن ماما باجر على سفرة تريد تستغل زيارتها هاي بكل تفاصيلها و تتونس بيها ، هن فرحن حتى الحجية كيفت و كالت اي اروح

رجعن ويانا للبيت ما راحن لبيت الشيخ، كلش حبن امي و سوالفها، ساعة يدكن و يركصن و ساعة يسولفن و يتضاحكن ..

اني شوية و مليت صعدت فوك حتى ارتاح تعبت من الصبح لهسه، دخلت لكيت ابوي يشخر قوي ، تقربت يمه ، حركته فتح عيونه .. عفته

وكعدت .. لكيت صادق دازلي ( حياج الله مرتي )

ضحكت ، هههههههههههه ... كتبت (الله محييك رجلي )

اتصل بسرعة ، رديت :- الو

- مرتي وبعيدة عليه ترا ما يصير هيج و العباس

- مو كلت الي بكيفج

- والله بكيفج و مو رجال لو رجعت عن احجايتي

- حشاك

شفت ابوي يباوعلي و مخلي عيونه بعيوني و يون ، خفت من نظرات عيونه اليه مدري ليش كمت

حجه صادق :- اخذتو صور

- اي ليش ما اجيت

- ما احب الصور

- اتفقن يروحن باجر سفرة

- خليهن خطية يتونسن، انت تروحين وياهن لو تبقين يمي

- انت شتكول ؟.

- اكول لو تكابليني كلبي احسن ، بس ما امنعج اذا تريدين تروحين من حقج

- خلص ابقى يمك

- وحدنا

- الشيخ الوكيح اكعد راحه

ضحك بصوت عالي :- بالحسين فد فرحان، اتصوري ما مرتاح بعمري بكثر ما مرتاح اليوم احس روحي خفيفة بخفة الريشة

- الله يديمها

- شلون لو تصيرين يمي

- الشيخ الوكيح ، اتأدب اليوم انطلقت هواي على لحظة احس راح تطفرلي من البيتونه

- عبالج ما اسويها بس رجلي بيها بلاتين اخاف ابقى مشلبه ع الحايط و تروح السمعة بالرجلين

ضحكت بصوت عالي من كل كلبي ، و هو يضحك على ضحكتي:- اتخيل الناس شتكول عنك

-يا يابه ، ثقي الا يصوروني و ينشرون عني بالفيسبوك قائد في الحشد الشعبي يسطو على احد البيوت في الانبار و يتعدى على حرمته، و يطلعوني فاسد تالي اعدام

كمت اضحك بقوة :- هيج الناس تتصيدلكم

- اووووو منطين دمنا و بس الحصو محصلينا يتمنون علينا الزلة بالقران حتى يطلعونا فسّاد و احنه المشوهين العراق

- هيج صارت ؟

- و اكثر ، مشيب راسنا من هالسوالف مرات اطك بعقولنا نلعن اليوم الحمت الغيرة بعروكنا و طلعنا، على الاشاعات اليطلعوها علينا و يتهمونا بيها
بس شنسوي .. انطينا عهد ما نرجع و لا نتراجع الا نحرر كل شبر من العراق من انجاس داعش و نطهر ارضنا منهم

-بس خل نكون منصفين مو كل اللي بالحشد هم تمام تمام

- وياج ، بس ديار ترا اللي اطوعنا للحشد تخطينا عدد ال٣ ملايين، ترا ٣ ملايين و اكثر تعداد دولة كامله اكيد بيهم الشين و بيهم الزين، بس الشين يمثل نفسه خوما يمثل فصيلة بكاملها ؟

- صحيح

- يعني نصادف مواقف بالقرأن تشيب الراس، واحدنا يخسر اعز صديق، تخيلي تحجين وياه و تضحكين وره شوية تكعدين تلمين ب اصابعه و راسه ورجليه ، و اليكتلك .. شيشاني لو افغاني كاتله الوصخ و على كاعك كاعد يكتل بيك ، شيصير بيج ؟

زين هذا من توصليله و تلزمينه شتسوين بيه ؟
مو كل الويانا ملائكة اكو بيهم من تكب الاعصاب عدهم ينسون الدنيا لو بودهم يمصون دم الداعشي .. فيكعدون ينتقمون من الجثث

نحجي ننصح حرام نمنعهم بس هي تبقى تصرفات فردية ما تمثل الحشد بكامله ، يروحون ينشرون باعو الحشد الشعبي يحرك باهالي السنة .. و يشعلك الطائفة و الفتنه ويخلي الناس تتكاتل ناس تغلط و تسب علينا و ناس تغلط و تسب باليتجاوز علينا

زين يابه اني عليش طالع و منطي دمي غير لاهلي و ناسي اللي بالغربية ، سني مسيحي ايزيدني كائن من يكون شايل جنسية عراقية هذا بركبتي

ننزلهم تصريح يابه هذوله مو اهالي ذوله دواعش وهاي تصرفات فردية و عاقبنا الفاعل .. محد يهتم للتصريح هم اخذوا اليفيدهم و خلو الشعب يتكاتل

يحترك دمج لو ما يحترك دمج ؟

- لا والله الله يساعدكم

-شنسوي هاي بعد .. هو الرسول ما خلص من السان المنافقين احنه نخلص ، نكول الله المعين
بس تدرين بالحسين هناك و بنص الهوسة ذيج من اتذكرج هيح اروح اتمدد بالبر و اسرح و اكله ربي طكت روحي اهديها و خليها توافق

- بالبر و اجاك داعشي شلون

- يخسي غير الزمه املص راسه، ترا لا يغروج و داعش و هيج اسماء ..اكبر جبانية و اكثر العمليات اللي انفذها و نهجم بيها نخلصها ضحك بالقران رغم الاعصاب المشدودة، ما بيهم الزلمة و يطلع يواجهك ، نطبلهم صدر بصدر لازمين البيكيسي و نرمي و هم يتشاردون ، نبقى نصيح وراهم و نحشش ، و من نلزلهم يكرم طاري الله نلكاهم مبولين اعلى ارواحهم

- شنو من مغامرات عايشينها

- بالقران غير لو عدنا دراما و تشرح بطولاتنا جان تصنف العراق بالمركز الاول بالشجاعة و البطولة على المواقف النمر بيها ، بس محد يسلط الضواءه علينا .. فالحين بهاي البرامج زرق ورق و غيرهن بحيث من اتباوعين على دراما العراق تفاهة بفشل ولا كأن عدنا كل هالبكولات و هالقصص الضخمة المحملة بالأنتصارات .

- صح

صاحت امي دياااار :- انزلي تعشي

- اي ماما اي

- روحي يرويحتي اتعشي

- انت منو يمك

- كلشي ما مشتهي راح الف راسي و انام تعبان

- اني هم تعبانة

-صدقة لوجهج الاحبة روحي يابه نوم العوافي

- يعافي كلبك

- ما اريد العافية الما بيها انت

- الشيخ الوكيح هههههه

- زودتها هواي مو

- بالعكس بس اخجل و ما اعرف ارد ع الكلام الحلو

- ضاملج بكلبي هواي الايام جايات و اسمعج شضاملج كلبي

- ماشي

- اخذي راحتج يابه مع السلامة

- باي

نزلت ، ناصبين سفرة، امي كالت :- عيني ام البيت و خطارج احنه ممكن تتفضلين تتعشين العشا السووه خطارج و انت كاعدة

- ها ماما عيرتيني

ضحكن ، حجت حسناء :- بعدها خالة بعدها وراها شغل هواي ابيت الشيخ و تغمز لامي

ضحكت امي :- اي لااا هذا الشغل كلش مهم ، ارتاحي ارتاحي لعد وراج شغل

ظليت اضحك على سوالفهن و اهز بأيدي

ثاني يوم ، كعدت امي الصبح .. تسولف هي و خديجة على الهجرة و توعدها ان تسحبها هناك يمها .. كأن امي متأكدة بدون تحليل هذه بتها

بدلن و اتفقن ويا خوات الشيخ ، كالتلي امي :- ما ترحين

- لا ابوي هنا محد يبقى يمه، و صادق مريض ، راح يجي لهنا ما اكدر اعوفه وحدة

- هاااااا ، كلتيلي صدوقه مرريض

- شكو ؟

- لا بس خليهم توم ماشي ؟

- شنو توم

- الجهال التسوونهم
خديجة كامت تضحك، حجيت

- لا بالله لو اريد نتزوج ليش باقية اتختل

- لعب الحرامية ماكو احلى منه
و تغمزلي .. بوسة بالختلة تسوى سنة زواج .. تمتعي و انسي

- انت ام بالله

- عابتلج فوك ما انصحج

- هاي نصايحج يا امي قانعه بيها

- اييي اللطامة اروح منج اشرفلي، التريدي سويه

ضحكت و هزيت ايدي، طلعو و خلى البيت ، مشيت لابوي نزلنا الصبح من فوك ورجعنا للصالة ، باوعته ، نايم

عفته و مشيت للمطبخ ..
مر على بالي خالد .. تنهدت .. كلما اتذكر احس كلبي ينعصر، مرتاحة بخطوبتي ويا صادق بس كلبي مو بأيدي من اتذكر خالد احس مغص يصيبني
احس ارجع لواقعي و اكول عود صدك راح اتخلى عن خالد و ابدله بغيره ؟

مفتحت موبايلي، رحت على صفحته
من شفت صورة .. حسيت اريد ابجي ، شلون هيج اعوفه .. بقيت اباوع بملامحه .. استغفرك اللهي و اتوب اليك، ربي كلي ما اريد بس يرجع سالم ، والله لا اوصله و لا الي علاقة بيه

اندكت الباب، كمت على حيلي، فتحته .. شفته الشيخ
فات للبيت ودنك راسه باسني بخدي و جو اذني و من ركبتي

- فوت جوا

- منو موجود ؟

- بس ابوي و نايم

- خلينا نكعد بالمطبخ لعد

لا اذا تريد ندخل بالغرفة جوا بيها مكيف باردة

- اي زين لعد .. يلا

دخل هو للبيت و كال :- البارحة جنت دا احجي ويا الحجية

- على شنو ؟

- هذا المشتمل اريد اعوفه لاسامة و مرتضى واحد غرفة فوك و اللاخ جوا .. و ابوج و ثار ننطيهم غرفة من البيت عود .. و افتح باب بين المشتمل و البيت

- خوب اجره الييت جبير و بيه غرف

-لا ما اريد مرتضى ابني يخش للبيت و انت موجودة حتى لو محرمة عليه بس مرة و ابيتج تريدين تلبسين تاخذين راحتج، هو شاب ما يصير يتخطف و لبسج مدلع ، فخليهم هم شباب المشتمل الهم و احنه النا البيت و انبهم من يردون يفوتون ينطون خبر حتى انت تاخذن احتياطجن

- براحتك

ديحجي، اندكت الباب، كمت من مكاني، كلت اله :- بس اشوف منو ع الباب

رحت فتحت ، طلعتلي مرته و جايبه رقية :-، عود عبالح تتهنين و انت ماخذته من ام جهالة و بيته و الله ما ترتاحين

-احترمي نفسج و لا تجين يمي، صارلج مطلكة منه ٤ سنوات ما رجعلج بهالسنين جاي تدعين عليه اني شعلية

لازمة الباب و احجي، و هي كبالي ، و رقية وياها واكفة ، و تكلي :- اصلا انت من البداية حطيتي عينج على بابا و كمت تعتنين ابيبي حتى يحبج

فتح هو الباب :- شدا يصير هنا

من شافنه ارتعدن ، بساع مرته دارت وجهه و مشت ، هو باوع لرقية و كال الها :- امشي للبيت بابا و عيب مرة ثانية تتجاوزين عليها هي صارت بمثابة امج ولو تجاوزتي عليها راح اعتبره عليه و ازعل منج

- اني رايحة للبيت

مشت هي و هو سد الباب، كلت اله :- اني شعلية و يتهجمن عليه عود ليس ميحجن وياك

يباوع لحلكي من احجي .. لا صدك والله عود.شنو معناهة

- يصير اكل هاللسان اليدردم

- كااافي

ابتسم و باس كصتي و حضني :- لا تهتمين لاحد و اني ما اخلي احد يأذيج

- اووو عاد اسمع هالحجي هواي و كل الكام اذاني

- سمعتيها مني ؟

- لا بس سامعتها من غيرك هواي و كلشي ما شفت

- شنو هالكلام ديار ترا ما ارضى تجيبين طاري غيري كدامي ولا ارضى تقارنين بغيري ، و لا اقبل تحكمين عليه و اطلعيني بلا كلمة و انت ما مجربتني
و الكلام لو انعاد مرة لخ .. مراح ابلعه

- هاي شبيك انهديت بيه ما قصدت شي ترا، لا تحلل بكيفك

- دخلي يم الوالد، اني راح ارجع للبيت

حجاها و طلع من البيت، عفته و رحت دخلت اخذت كتاب و كعدت اقرأ

بالليل هو بس دز ( تصبحين على خير ) لا اتصل ولا حجه ، مارديت ..
ثاني يوم داومت .. هو ما خابر ولا راسل
رجعت للبيت نمت و العصر كعدت .. توقعت مراسل بس ما داز شي
دزيتله رسالة ( مو على اساس تحبني و على مود كلمتين ضجت و زعلت حبيش هذا ؟)

دزلي ( مو بالاول تردين علية لما صبحت عليج بالليل و تحترمين )

خابرت علي، رد :- اني مو ما احترمك لا تكول هيج بس جنت نعسانة ، بس اشوف اخذتها حجة هاي عود تكول تحبني

- ديار

- لعد وينه حبك ؟

- كملتي ؟

- لا احجي

- اي احجي، بس احجيلي يابه انت كملتي ؟

- اي كملت

- ما دام كملتي، هاهيه سدي الموضوع و اعتبري ما صارى سالفة ما تسوى نحجي بيها و احنا اكبر منها

- بس

- مشتاقلج

- اكلك سؤال انت تحبني لو متلهف لمرة صارلك ٤ سنين ما متزوج و حرام اطخ الحرام و رايد حلال

.. سكت

- شو سكتت

- طريقة كلامج مو حلوة

- هاي طريقتي

- اذن غيريها حبيبتي

- حجيت شي غلط ؟

- تعبانة رويحتي ؟شو مزاجج صاير ذبانة يزنزن براسج ومخربطلج المود

- اعتبره تجاوز ؟

اخذ نفس :- الواضح ان ما راح نوصل لنتيجة بمواصلة الكلام ، افضل ننهي الإتصال و نحجي بغير وقت

- براحتك

- مع السلامة

قفلت الخط .. كال يحبني
هه .. لو شيسوي محد يجيب حب خالد الي

اجت امي :- شبيج جنتي عصبية بالاتصال

- لا بس هو ما يحبني مثل ما تتوقعين، جذب احد يحبني مثل خالد

- شنو هالحجي، ليش تحطينه بخانة المقارنة كل رجال و اله طريقته بالمعاملة

- اي صحيح

- لا تكعدين تستهزئين .. و احترمي نفسح عيب

- انت فهمتي المشكلة حتى تكليلي عيب ، ترا اني مو صغيرة

- شصار ؟

سولفت الها .. كامت تلوم بيه وتكلي :- حسدشا الصغير منج ، تصرفج حتى الجاهل ما يسوي ، حتى لو خطبج بس يبقى رجال و اكبر منج و اله شخصيته و مكانته شلون تحجين ويه هيج

- شخصيته وكيانه مو علية ، اني هم الي شخصيتي و كياني

-بالله ممكن تكليلي يا شخصية هاي و يا كيانة ، ترا بفضلة توضفتي و بفضلة انت هيج صرتي

- لازم هو درس و كافح بمكاني حتى وصلني لهيج

- ام الكفاح عيوني شهادات هندسة و حتى دكاترة ما كامو يعترفون بيها ولا احد مكلبهم، بالله كليلي دفعتج الوياج شخبارهم احد توضف احد قبله بدائره مثلج لو واكفين اباب المحاكم بلكي الله يلكون قضية

عيب و استحي الرجال خوش رجال لا اطفرينه بسوالفج

- سكتت
بقت تحجي على راسي الى ان عافتني و مشت، الجهال صوتهم عالي و البيت هوسة، صعدت فوك و ضربت الباب حيييل

كعدت افكر ويا روحي ..
الصدك هو ما حجه شي اني النفسيتي ما اعرف شبيها،
بقيت افكر ويا روحي، اخير شي فتحت الموبايل و كمت اكلب

ليومين لا اني راسلته ولا هو اتصل، ولا حتى دك الباب او اجا .. تضايقت حيل .. كمت اتذكر بخالد و اقارنه بيه

بالفيس بوك اكو هواية كروبات نسائية مشتركة بيها ، و هواي ينزلن مشاكل و البنات ينطوهم حلول

كتبت للادمن مشكلتي ( اني انخطبت قبل اسبوع تقريبا و هيج مرته تهجمت علية بس رده جان بارد و الصراحة اني شابعة وعود و تحاجينا اني وياه و صارله يومين ممراسل ولا حتى خابر للعلم هو يحبني و جان يتمناني بس ما اعرف شصار شتنصحوني اراسله و انهي الموضوع لو اسكت )

الردود جانت
- واضح يحبج هه هاي من البداية و هيج ورة الزواج يركعج بمية جلاق
- كرامتج وين اوووع عفية نسوان ساحله ارواحها ع الزلم
- اين الكرامة انا لا اراها ؟
- لو يحبج صدك جان لزم مرته ذيج وطيح حظها مو ساكتلها امداجن تبقن كاتلات ارواحجن ع للرياجيل
-فسخي الخطوبة و خلي يولي مبين ميحبج
- وبعدج وياه ؟ و تريدين تعتذرين منه هماتين
- مبين بايكته من مرته القديمة و يحبها لهذا ما ردها و انت واكفة بيناتهم حيل بيج يا ام دودة يا بواكات الزلم

بنات قليلات كاتبات .. ( حبيبتي هي المشكلة مشكلتج و انت العايشة وياه مو احنه و منعرف شنو الاسباب الحقيقية ولا نعرف انتم شنو فاللي يحل مشكلتج انت نفسج لان محد عايش مشكلتج غيرج ، تشوفينه يستاهل راسلي تشوفينه لا عوفي لما هو يجيج و اذا ما اجاج تصرفي )

اغلب الردود جانت تجاوز و استهزاء ..
بس فعلا اني كرامتي وين ؟ .. اني ما حجيت شي ولو هو يحب من صدك جان راسل، اني لازم اغير طبعي الى متى ابقى ادوس على روحي و اتحمل لخاطر فلان و علان ، مثل ما كالن البنات اذا يحبني صدك هو يراسلني ، معليه بيه .. بعد منا و جاي اهم شي نفسي ما اتم لاحد ولا اشيل هم احد .. لان تعبت

مرديت عليه ولا راسلته بعد ..

... رجل خديجة كام يخابر بخدية و يهدد بيها يريد الجهال، و امي تكللها :- خل يولي عوفي

طلع التحليل .. و طلع اكو تطابق ، يعني فعلا اختي
امي طارت من الفرح ، بس اني احساسي جان كلش بارد ... حتى هي تجنبتني حستني ما اريدها

امي كالت الها ، ال ٢٠٠ الجانت تستلمهن ديار من ايجار البيت مصرف الج، و هي انخطبت للشيخ يعني بعد ما ياخذ منها ايجار، الميتين الثانية مصرف البيت و اثار خاف تحتاجون شي

ما جان عندي اعتراض بالموضوغ، لإن هي جانت حيل محتاجة الفلوس .. فعفت الايجار الها هي و جهالها
الغرفة الفوك عزلتها الها و الجو الي اني و اثار و اسامة

البنية خوش بنية من اجت كمت لا اطبخ ولا انظف هي شايلة كلشي ارجع من الدوام حتى غده تصبلي، بس احساسي الفاشل مفشلني مو بيدي
الموضوع مدا يتاقلم وياي ، ولا ويا اسامة
يستحي منها ، و من هي جوا ما ياخذ راحته

... راحن خوات الشيخ، و رقية راحت ويا عماتها لإن عطلة مدارس، فسمح الها ، بقت الحجية .. لإن ظلت وحدها و صادق مريض .. راحت لبيت ابنها الصغير

بقى هو وحده بالبيت هيج وكت ، صفيت سيارتي من الشغل ، وكفت ، ردت افوت للبيت، بس اعرفه هو وحده بالبيت
، كلت خاف مريض محتاج ملبس شي ، خل ادخل اشوفه

دخلت .. لكيته كاعد بالاستقبال ع التلفزيون ، كلت :- مرحبا

- باوع :- مرحبتين ، هلا بيج

- بقيت اباوعله

حجه :- اذا جاية على مود الحجية مو هنا راحت، و اءا كلبج عليه خاف محتاج شي، فاني ما محتاج التخدمني ، و اذا جاية لخاطري

- اي ؟

- كلبي يشتاك لليريد خاطري

- و اذا كلبك مشتاك ليش متراسل ولا تخابر ولاوحتى مريت او سألت اذا محتاجين شي او لا

- المريض هو الينسأل عن حاله محتاج لو لا، مو ينتظرون منه ، ثانيا اني راسلتج مرة و ما رديتي، و تخابرنا و كتلج خل ننهي الموضوع ما رضيتي، عفتج لما تهدين تحلين الموضوع ، بس شسوي اذا مزاجح ما صفى ولا رديتي و نهيتي الموضوع

سكتت ، ابتسم و اشرلي
- اجيت اشوف شنو تحتاج

- هااا يعني مو لخاطري

- صادق يعني اذا مو خاطرك افكر و اكول شيحتاج ..

- اروح صدقة لهالوجه الاحبه ،محتاج شوفتج يرويحتي، شو تعاي

تقربت يمه، ردت اكعد، رجع كعدني على رجله :- ليش هيج تحرميني منج

- جنت اتوقعك زعلان

- اكو احد يزعل من روحه ؟

- اسفة

-ابوسج لو اطلع ما شايف ؟

- ابتسمت :- وكيح

- سحبني لحضنه و حط راسه على جتفي

- اكوم لو رجلك تتاذى

- ما كاعدة على الرجل المكسورة ، مرتاح ابقي بمكانج

- ليش خليت رقية تروح منو الك هنا

- جنت ادري راح تجين و منتظرج

- اي والله

ضحكت

دنك يبوس بركبتي و يكول : لو التحقت وين راح الكى هيج ركبة اتنفس بيها

- شوكت تلتحق

- يومين ان شاءالله

-بس انت موصوب

- راح نبلش تحرير الموصل لازم اتواجد حتى لو بالقيادة ما اوكف على الساتر

- بس رجلك مطيبانه

-خايفة عليه يرويحتي ؟

- اي طبعا شلون ما اخاف عليك و انت مريض

- ابوس الخلقه الأحبها

تقرب يبوس بخدي ، و مخمض عيونه و يشتم بيه ، همس :- لو بقيتي دقيقة لخ اتوازة ويا ابليس

ردت اكو، :- خليج

- تروح زايد

- حلالي

- بعد عليمن خطوبة خو نتزوج

- اسألي نفسج اني بالنسبة الية ما مصدك يمتى يجي هاليوم

- جوعان متغدي ، اكوم اسويلك
كمت من مكاني حتى اتهرب منه

رجع كعدني:- غديني

- شتريد اسويلك ؟

- احجي ؟

- شيخ مو صرتي وكيح زايد

- و انت مو جففتيها علي ترا والعباس رجلج

- لما نتزوج

- احنه كبال الله متزوجين طز بالناس

- لا لا انت وصلت مرحلة خطية، هنا لازم ندخل و نكول استوب

ضحك، فتح اديه، وكومني من رجله ، كال :- روحي جيبيلي علاجي

كمت من مكاني، انسطرت، انثولت ، رحت للمطبخ ادور بالثلاجة ع الدوة و هو بغرفة امه

اجا هو وراي .. حضني من ورا :- الدوا مو هنا

- اي اتذكرت بغرفة امك

دارني اله ، و انهوس و هو يبوسني و يتنفس قوي، سمع الباب انضربت ، ابتعد بسرعة ، اني طلعت من المطبخ كله، دخل ابنه.

اسمعه و هو يكوله :- ها بابا ؟

مرتضى :- رجعت خاف تحتاج شي

- لا ديار موجودة اجت تسويلي غدا و تنطيني علاجي

- ها لعد اذا هيج، اني ارجع للمحل

- براحتك

طلع ابنه، و هو اجاني للغرفة :- لازم اروح للبيت

- عوفي البيت

- مو امي موجودة لازم اروح

- بعدين تكليلها، لا تشغلين بالج ترا ما رايد شي، مجرد رايدج يمي لإن مشتاقلج

- كل اثنين ثالثهم الشيطان

- اعوذ بالله مجتمعين بالحرام حتى يصير ثالثنا ليش هيج تحجين ؟

سحب ايدي و تمدد على جرباية امه، و اخذني يمه، حاولت اروح قفل الا اتمدد يمه
والله عبالي شيخ معقد ما عنده هيج سوالف تالي طلع افسد واحد عرفته .. سابقهم كلهم

مددني و خلاني على صدرة :- تنلچم

- عافيتي انت ما تلجميني تشافيني

رجعت راسي، بقى يمس على راسي و يدعي الله ان ما يفرقنا و يبعد و المشاكل من عدنا و يهدينا لبعض
كمل دعائه باس راسي و ورجع راسه للمخده نام

غط بالنوم، ما اعرف ليش محبيت اكوم و بقيت بمكاني لحد ما نمت ..

بقينا لل٩ ونص بالليل يلا كعد هو على صوت ابنه و هو يصعد فوك، تحرك جسمه، كعدت

- اجا مرتضى ؟

- اي شفته صعد

-والله عيب هسه شيكول علينا

- ما دخل لهنا،و ماكو شي عيب هو جبير و فاهم و احنا ما سوينا شي نستحي منه

كمت من مكاني، كعد هو .. :- اقسم بالله يمكن بعمري ما مرتاح هيج راحة بنومتي

ابتسمت .. كمت و رحت سويتله عشى و هو كاعد يمي بالمطبخ ، كملت اله العشا و خليته و رجعت للبيت

دخلت امي استلمتني سين وجيم
حجيت وياها .. بس شفت ابوي كام يرجف، فزيت اله بساع

رفعت السرير حول عيونه ، كمت ادك عليه :- يابه يابه

ميعاد :- من الصبح و هو هاي حالته

- خاف لا يموت

- و موتتهم شنسويله خفتا و راحة

خديجة :- اصلا قليل بحقه الموت اني لو بيدي اثرمه و اشمره للجلاب السيابة ما تخلي قطعة ابجسمه

باوعتلها - مسويتله شي ؟

- اني ؟ شسويتله ..

- اعترف

- لا ممسويتله شي

- ترا لو شما كان ظالم هو هسه انسان عاجز حرام عليكم شمسووووين بيه، ما جان هيج

ميعاد :- ليش تصيحين شمدرينا بيه

خابرت اسامة و كلت اله :- تعال للبيت ابوي كلش حالته مو زينة

بقيت افرك بصدره ، كام يذب من حلكه مادة بيضة
دقايق و اجا اسامة ، كلت اله :- شيله وياي

- وين نودي ؟

- للمستشفى وين يعني ؟

- خاف يكشفونه

- شيكشفووون ؟

- هو داعشي

- و هي العراق بيه الية كشف الاسم بساع، دكوم يا عيني هم الارهاب مشرين بيناتنا امشي

شلنا اني و اسامة و نقلناه للمستشفى، طلع صادق من البيت :- هاااا

- تخربط مدا يتنفس
احجي و اني اركض واصيح :- اثااار الموبايل ااااااثار

امي و خديجة واكفات يباوعن، انطتني اثار الجنطة، لكيت الشيخ صاعد كدام ..
:- ابو مرتضى رجلك متكدر

- اصعدي بسررررعة

- ركبت بسرعة و اباوع لأبوي عيونه تشكلن فوك ، ما اعرف ليش كامن يجرن دموعي رغم هو اكثر انسان اكرهه على هاي الكرة الارضية

تخربط .. كمت اصيح :- استعجلوووووووو فدوة

كام يدوس الها الشيخ .. وصلنا للمستشفى .. اول ما نزلنا .. اتلاكفوا من ايدنا .. اخذوا ركضو بيه، وكفوا يدكون بصدرة ..
يعصرون على كلبه .. اوكسجين ركضو جابو حطو بخشمه و يدوسون ..

اني ابجي و اسامة واكف لازم راسه ، و الشيخ واكف فوك راسهم .. كالوله :- مات

اسامة :- لاااااااااا يااااااااابه

كعدت كباله كمت ابحي و جسمي كله يهتز، طوله امدد كبالي ، مدري ليش كمت ابجي عليه ، جنت اتمنى يصيرلي اب اتمناه يحتويني يعاملني مثل اي بنية
مات و حتى الرحمة افعاله تخليني انطقها

كابلته و كمت ابجي بصوت عالي و صادق يسحب بيه .......

☆☆☆☆☆

#اتمنى_ان_افعلها


الحلقة_61

لم تكن الا اب ظالم، فلا اتمنى لك، غير ان تحق عادلة السماء عليك.🖤

.........

سحبني صادق و اني ابجي، شالو الجثة، و اسامة داير وجهه و حاط ايده ع الحايط و متجي راسه و يبجي

صادق :- اترحميله، انتقل لرحمته كولي يا الله

حجيت واني ابجي:- غير لو يستحق الرحمة، الزرعه بينا ما يخلينا حتى ننطق الله يرحمه

- لا تكولين هيج، ابري الذمة الله يرحمه

- ما اكدر، جروحي و جروح خواتي كلها منه

- كولي يالله

ابتعدت من صادق، رحت لاسامة، حطيت ايدي على ظهره، بسرعة حضني و كام يبجي بصوت عالي

مرتضى لحكنا للمستشفى، وصل كال لابوه :- ها بشر ؟

صادق :- مات

- لااااا

اني و اسامة متحاضنين نبجي، مرتضى سحب اسامة ..
كمت امسح بدموعي، مرتضى كام يواسي اسامة
صادق حط ايده على ظهري :- شدي حيلج يلا يابه

... خابرت امي ، ابجي، ردت :- الووو ها ديار، شبيج ولج تبجين ؟ ... مات ؟

- مات

- كلللللللللللللللللللللللوش

- انت شنو من كلب عندج

- شايلتله كلب اسود من الليل ، بشر القاتل بالقتل .. كافي موتت اختج و جروحج انت و خواتج و العذاب الشوفنياه من جنت عايشة وياه

- قتل ! .. ماما احلفج بالله .. ابوي مقتول

- ما ادري بس تكحلت عيوني بموته

- ماكو انسان يفرح بموت انسان انت ليش هيج كلبج قاسي

- وما يرفلي جفن عليه، سحبي اخوج و اطلعي من المستشفى بسرعة

- خل ينطونه الجثه ندفنها عود نرجع

- ما الج علاقة عساه لا اندفن لا تورطين روحج و تورطين اخوج بيه خل يولي عوفوه و تعاي

- اذا مقتول كولي ؟ ليش نتورط

- ديار اسمعي الكلمة و ارجعي خافي على اخوج، هو داعشي و هسه من مات راح يبحثون بهويته و يعرفون هو ضابط ... ويعرفونه داعشي

- كلامج مو مقنع ماكو احد مكتوب بجنسيته ارهابي، الا اذا مكتول و خايفة علينا منه

- اوووووو ، غببببببية

قفلت الخط بوجهي، صفنت .. تذكرته اخر ايام جنت كلما اكعد يمه يون و يباوعلي، معقوله جانو يأذوه و هو يحاول يكلي و اني ما افتهمت .

عيونه جان يخزرهن و هو يون .. يعني جان متعذب
وما يكدر يحجي .. معقوله كاتلاته ؟

فركت وجهي .. اخ اسماعيل اخ .. جنت تعذبنا و ما نكدر نحجي شكول اتشمت بيك والله حرام
شسويت بينا حتى صعبة الرحمة عليك بلساناتنه

بس خاف صدك مكتول و يبين بالتشريح سبب الوفاة !! ، اجا يمي صادق، لزمت ايده .. :- صادق اني خايفة

- من شنو يابه ؟

- اني اشك خديجة مسوية شي لأبوي و اخاف يشرحونه و يبين و تصير مصيبة

- ليش تكولين هيج، ما معقوله تكتله حتى لو غلط بحقها

- اخر ايام جان يحاول يكلي شي، و لما نقلنا للمستسفى جان يطلع من حلكة شي ابيض

بقى يباوع بوجهي :- يا ستار ياربي، معقولة يصير هيج

- خايفة نتورط

- شعليج انت و تتورطين

- خلينا ناخذه و ندفنه

-ما يصير غير لازم يتشرح حتى يعرفون سبب الوفاة

- كومي روحي للبيت يابة الوكت اتأخر مو مال تبقين هنا .. اعتقد للصبح يلا ينطون الجثة

-و التحليل ؟

- غير يشرحونه عود بعدين بنتيجة التحليل ينعرف شنو سبب الوفاة مو هسة، لا تشغلين بالج بهالموضوع، انت كومي روحي ارتاحي

اسامة :- عمي انت هم روح ارتاح، اني خابرت على عمي هو جاي ، احنه راح نتولى دفنته و مرتضى ويانا، انت مريض اذا تريد اخذ راحتك

صادق:- اذا هيج، لعد اني اخذ المرة و اروح، يلا يابه كومي

... كمت وياه، اخذني من ايدي و مشينا، جنت دايخة كلش و حيل قلقانة لا تطلع حادثة متعمدة لو يكتشفون شي ..

صعدت بالسيارة وياه، جانت الساعة تقريبا ٢ ونص هيجي، اخذ ايدي :- لا تفكرين يابه لا اتعبين فكرج

- صادق اني ما دا اتقبلها لخديجة ، ما جاي احس هي اختي .. و خايفة مسوية شي لأبوي و تورطنا

- ان بعض الظن اثم، لا تظنين نبيها ظن السوء تالي تطلع بريئة، بعدين هو ابوج جان مريض، و بكل الاحواى هذه اختج في حال تقبلتيها او لا .. لا تقطعين صلة الرحم .. حاولي ويا نفسج و تقبليها

- اخت تدخل علينا من تالي ! ما نعرف شي عنها ولا عن طبعها

- غير تتقربين منها و تعرفين، بعدين تكولين من تالي قابل هي متعمدة .. لو ما هي جانت تتمنى تلكاكم

- ما ادري ، احساسي كلش واكف وياها، و احس هي الها ايد بسالفة و خايفة نتورط

- سؤال ديار

-كول

- ابوج مو ضابط جيش ؟

- اي

- شلون تصوب هيج و محد داري عنه؟ زين رواتبه وين ؟

- ضابط دمج هو

- يعني مو ضابط اكاديمي ؟

- لا

- يشتغل ويا حزب لو شنو ؟

-ليش تسأل

- لا بس هيج كم سؤال ابالي و ردت استفسر منج، هو وين جان واجبه من اتصوب، شغلته تحير

- ما ادري وين جان، هو ما درينا عنه غير لما تصوب

- اتذكر لما كعدتي بالبيت اخوج جان خطوف

- اي

باوعلي، ورجع يركز بطريقة .. ما سألني بعد بس بقى يباوع كدامه ، وصلني للبيت ، حجه :- تعاي يمي بالبيت ابقي، لا ادخلين البيت هسه خاف تتأذين

- لا لازم احجي وياهن

- الوكت متأخر خليها لباجر
عفته و دخلت للبيت، امي جانت نايمة جوا و خديجة و جهالها فوك، بس اثار كاعدة تنتظرني ، اول ما دخلت حجت :- صدك بابا مات
بجت

- اي
حضنتني تبجي، بست راسها و كمت ابجي، دخلت الهول، اباوع مكانه .. اختنكت صدري كام يوجعني
صعبه انسان كبل ساعات جان نايم بمكان و ترد و تعرف هو مات و بعد ما يرجع ..

كعدت كبال سريره ، بقيت استرجع كل ايامه و ذكرياتي وياه ، انهار و صوت الحرك مالتها، لو ايده الجان يصم بيها حلكي و هو يتحارش
لو الضرب و السكر و القهر الذل الشوفنياه
لما سمح لواحد نكس ياخذني و يهددني بس اشتغل وياهم .. لو خوفي منه و شردتي اني و سلمان بشوارع كربلاء خوف من انو ياخذنا .
شتذكر ؟ ليش هو بقى ذكرة حلوة و نتذكرة !

صعدت للغرفة فوك، فتحت ااباب، لكيت الجهال نايمين بس خديجة كاعدة على موبايلها ، من شافتني كعدت :- ها البقية بحياتج

- تكدرين تكعدين ؟

- اكو شي ؟

- ما راح اكلج شي غير قسما بالله لو عرفت ابوي متسمم و انت المسممته، وكتها راح ارجعج غريبة مثل ما جنتي كبل و اطلعين من بيتي و تشوفيلج بيت يم غيري، ما مستعدة اتورط اني و اخوي بسبب فعل انت سويتي

- ليش تعامليني هيج من يوم الاجيت و لليوم شفتي عليه شي مو زين، انت اللي متحسسه من عندي وحدج

- لا تلوفين الموضوع و احجي متورطة بابوي

فاتت امي:- ديتر مو جنج زودتيها، شنو من تالي كبت عندج المحنة على ابوج لو ما حرك انهار و شرد هالمسكينه و حركج

- لجنهم و بئس المصير ، اخوي هنااااك يمة لو عرفوا تسمم ما ننفضح ما نروح بالرجليييين

- مو اول حالة تسمم ترا

- وشلون عرفتيها حالة تسمم بالله ، لهسه ما طلع اي تقرير يثبت هو متسمم

- الظاهر شغل القانون اثر عليج ، كومي اخذي اختج و انزلي جوا نامي و عوفينا من طاري التيس ابوج

- مات هو

- و مووووتتهم كااافي لا ادوخين راسنا، ومرة لخ ما اسمح تعاملين اختج بهالطريقة افتهمتي لو شما كان هي اختج

- مو انت التفرضين عليه ، و خليها ابالج لو اكتشفت ادنى شي بهاي القضية ما راح اسكت ، لإن بفعلتكم هاي انتم ما تفرقون عنه بشي .

عفتهن و نزلت جوا، نزلت اثار وراي :- ديار

- شرايدة انت الثانية عوفوني بهمي

- سحبت ايدي و طلعت للكراج

- اكلج شي و ما تكولين لاحد

- شنو ؟

- امي هي السوت ابابا هيج

- و شلون عرفتي ؟

- سمعتها هايه خديجة و امي يحجن، و من كعدت يمهن امي صاحت بيه و كالتلي "كومي منا"

- متأكدة

- والله اني سمعتهن

بقيت افرك بوجهي :- عرفتي شنو الدوا المشرباته اله ؟

- لا

شحجي بالله و شكول معقولة امي تسويها هي من جانت وياه ما سوتها ليش هسه تسويها ، اختنكت حيل
كعدت ابجي و اثار يمي لازمة ايدي

منين ما اجيبها ما ترهم ..حتى ما اكدر احجي تروح امي تتورط ، اني متأكدة مو امي ولا هاي اطباع امي .. احتمال امي كاعد تسدسدلها
يمكن .. هي جانت تسدسدلي بكلشي و حتى لو اني على باطل اطلعني على حق و ما تخلي احد يحجي
معقولة دا تسوي المثل ؟

خابرت على اسامة، حجيت وياه :- الو

- ها ديار

- اسامة ترا ابوي ما مات موت الله، اخذ حذرك ادفنه و اطلع منها لا تروح تتورط لا عليك بتقرير ولا ابد

- ترا ديكولون حالة تسمم و سألوني اذا منطينه دوا اعشاب ، و كلت الهم ما ادري هو ادويته هواي

- لا تروح تتورط

- لا تخافين ، بس كليلي منو اليسويها خديجة مو

- ليش تكول هيج

- لان امي ما تسويها و اني وياج و اثار عايشين وياه صارلنا شهور ما فد يوم اذينا ، عمي هنا و كاعد يحققون بالسالفة

- اكلك كون يندلون مكان بيتنا ؟

- ما ادري

-اسامة كلش خايفة

- روحي نامي، احنا راح ناخذه الصبح ندفنه و ارجع بعد معلية

... مر هذا اليوم بالقدرة من كثر التفكير لا نمت ولا كدرت ارتاح ، رغم اكرهه بس حيل اتضايقت من عرفت هو حالة تسمم و امي و خديجة مسمماته

.. عمي و اسامة متعاركين بسبب هالموضوع، عمي صاير شريف و متضايق على ابوي، و اسامة رادة " انت الشمرته و انت التبريت منه جاي هسه تتهمني اني مسممه لو ما رايده جان شمرتاه ووما بقيناه ليش نورط نفسنا بموته "

كوة دافنينه ، و اسامة عايفهم و طالع، ما جان اكو نقطة تحقيق حقيقية بالموضوع لأن الواضح هو متسمم من طب اعشاب و طب عرب ..
جان اكو تهاون بالتحقيق و هذا جان بصالحنااسامة غلس على السالفة كلها

امي و خديجة حيل اتضايقت من وجودهن، حجيت ويا امي و كلت الها :- الإيجار ما احتاجه اجريلها بيت و خليها تكعد هي و جهالها

- هي اختج ديار

- و اني ما طاردتها، بس افهميني اني جنت عايشة اني و اخواني بهدوء لا هوسة ولا مشاكل، حتى من جبت ابوي تناوبنا على مداراتنا ما ضرنا ولا صارتلنا مشكلة بيه، بس هسه المشاكل تعبتني .. غير البيت ٢٤ ساعة هوسة و مصايح جهال

زين بعد.يومين اني متزوجة شلون ؟
ما طاردتها بس الأحسن الها و الي تأجريلها بيت هي و جهالها

...هي سامعتني من اني حاجيه هيج ويا امي، باقية تبجي .. انقهرت عليها .. اعترف جنت ظالمة بمشاعري ويا هالبنية .. مو بس اني اسامة و اثار جانو نفس الشي .. اثار رغم تلعب ويا الجهال بس كلش تضايقت منهم لأن يلعبون بغراضها ولعاباتها و كتبها

ولو تستاهل ياما شوفتني المر من ورا لعبها بغراضي

الشيخ .. التحق لدوامه رغم جنت اگله انت مريض و ارتاح ، بس هو طاير عقله ع الساتر

يراسلني كل يوم، و يفعل نت هناك على الخط حتى يفتح وياي كاميرا و يشوفني .. كمت احس هو شكد يحبني .. و صرت اتقبله على كثر ما جاي اشوف منه حب و حنية و إهتمام

راح عشرة ايام .. خلال هالفترة امي رجعت لأستراليا، ووصتني هواي على خديجة و كالتلي من تلكيلها بيت مناسب قريب من عندج ، شيلي بيها
ودعناها وراحت
بقينا كاعدين بالبيت لعل الكى بيت الها قريب

اندكت الباب .. جان يوم جمعة اني عطلة و عادة اذا عندي ليلة جمعة اسهر للصبح اقرأ، و انام متأخر فكعدتي تصير كلش متأخرة

سمعت الباب يندك الصبح، كعدتني خديجة :- ديار خطيبج الشيخ ع الباب

- الشيخ ؟ .. مو بالموصل هو ؟

- شمدريني كومي بسرعة اجا

كمت بسرعة بدلت ملابسي ، لميت شعري و طلعتله بسرعة .. :- هلو صادق

- صباح الخير

-صباح النور، البارحة جنه دنحجي ما كلتلي انت حتجي اليوم

- اجيت بعد، راح تخليني واكف ؟

- لا فوت
دهل و اني احس اباله شي لإن هو بأتصال و يشبعني غزل مو جاي من دوامة و هيج يحجي بحدية و جدية

دخل كعد بالهول، كال :- نايمين ؟

- اي بس خديجة كاعدة ويا ابنها فوك

- رايد احجي وياج

- مبين عندك حجي مهم

- ابوج ارهابي ؟

باوعتله .. انكر الوصها اعترف صعبة .. شكول ، سكتت

- جاوبيني

- اي ارهابي بس اني والله ما الي دخل بيه لا اني ولا احد من اخواني

- ليش ضميتي عليه هالموضوع

- هو شمروه عمامي علينا من اتصوب اضطريت اخلي عندي و اداري وما كلت لأحد خاف لا نتورط بيه ، عفته هو وربه

دنك و كام يفرك براسه .. كمت من مكاني كعدت يمه :- والله ما الي علاقة بيه

كام من مكانة و حجه بصوت عالي :- بس خليتي ابيتي، و خليتي المي يجري من جواي و اني ما ادري، بفعلتج هاي جان ممكن تسيئيلي و تسيئين للكل و نطله حواضن للدواعش و انومهم ابيتنا .. تدرين لو واصل خبر للإعلام لو احد عارف بالموضوع جان شصار بيه و بسمعتي ؟

تحطيني بهالموقف ليش و انت تعرفين موقعي حساس

- سكتت بس اختنكت حيل و دموعي غرغروا بعيوني

- السويتي مو هين يا ديار جان رحت بيها اني و عائلتي

-والله ما جنت اعرف هي خطرة بس هو جان ما اله احد

-لج بابا شنو ما اله احد، تعرفين هذا سبب باستشهاد كم شاب ؟ فاجع كم ام، مرمل كم مرة، ميتم كم طفل، تدرين ؟ .. ذوله الدواعش الرحمة عليهم حراااام

-شسوي والله منطاني كلبي اشمره بالشارع ولا اكدر اتورط بيه و اخليه بدار اخاف

كعد على التخم و هو يتأفأف و عصبي ، بقيت كاعدة كباله و ما احجي، كمت يمه :- صادق

- باوعلي

- اسفة والله
مد ايده على خدي:- والله ادري انت مو بقصدج حبيبي بس الموضوع جان هددني و هدد سمعتي

- لو صاير بيك شي جان مسامحت روحي ابد

ابتسم :- شو تعاي

- خوفتني عليك والله
اخذني كعدني بحضنه .. الله مررها سلاماتو ان شاءالله تمر ، لا تشيلين على كلبج
حط راسه على جتفي و هو يكول :- مشتاقلج

-شلون عرفت ابوي ؟

- بحثت على اسمه و طلعت الموقع الجان يشتغل بيه و عرفته ، اسمعي .. اريد اطلع لأيران على رجلي .. تريدين اطلعين وياي ؟

- و شغلي؟.

- اخذي اجازة عشرة ايام

- و نروح سوا ؟

- ليش شكو عيب ؟

- شيكولون عليه ، شبع بيها كبل لا ياخذها

- اشك حلك اليجيبج على السانه، اسمح لاحد يجيب عرضي ويحجي بخصوصياتي، شبيج مخبلة انت ؟

- الناس لو حجت ما تكدر تمنعها

- لا امنع ، وبعدين مو عندج علاج .. روحي وياي و فضيها

-شوكت راح تروح ؟

- عكب باجر

- شوكت اخذ اجازة لعد خليها الثنين

- براحتج الأثنين الأثنين

حطيت راسي على راسه ، هو كام يتأوه .. ابتسمت :- اكوم مو ؟

- صارلي ١٠ ايام محروم منج بالعباس حرام عليج

- هههههههه مو راح نسافر سوا

- حتى لو ..

- حررتو الموصل ؟

- ما احررها كبلج
ضحكت ... دا اسألك وكيح

- اي هو هسه وكت سؤال يا عيني، مو الدنيا مشتعلة عندي اتذكر الموصل وين صايرة حتى تسأليني

- ههههههه اكوم اسويلك ريوك

كمت للمطبخ اجا وراي.. حجه :- خااالد

التفتت بسرعة ، حجيت بلهفة :- شنو ؟

- شبيج جفلتيني

- منين تعرف خالد

- مكتوب ع الثلاجه و قريته بصوت عالي، ليش هو منو خالد ؟

- ولا احد

- مو تكليلي منين تعرفه

- واحد من اقاربنا احتمال اثار كاتبه اسمه

- هااا
حجاها و هو يحضن بيه، بس كلش تضايقت ، بعز لحظاتي وياه، من انذكر خالد ، انعصر كلبي .. هيج معقوله اروح لغيره اعوف خالد
يعني ينتهي ؟
غير لو اكدر انساه
سولة بكلبي هالاسم كأنو محفور ما جاي يطلع من داخلي ابد ..

التهيت و انشغل بالي بالتفكير بخالد ، عن صادق
حتى البيض حركته بلا ماادري ، رضى ياكل بس جبن ما قبل ارجع اطبخ

... قررنا نسافر بس لما ردت اسافر للعلاج و احسبها اني كل العندي بس مليون و نص كوة مجمعتهن لأن عندي قسط مال سيارة، فترددت اروح .. من حجيت وياه ، كام يضحك و هو يكلي :- ليش رايحة وياي وتصرفين على روحج لعد اني ماخذتني شنو فزاعة ، فلوسج الج و علاجج بركبتي

... الأعرفه هو مو كلش عنده هالفترة، لأن الفترة الفاتت جان دك علاج وصرف و اجازة و راتبه نصه مكطوع .. فما عنده هواي
بس رفض اني اصرف من عندي .. فاخذتهن وياي احتياط

تالي عرفت هو مداين ١٠ ملايين من اخوه على مود علاجي و علاجه .. ما رضيت عليه و كمت الوم بيه، كال :- السانج الحلو ضميه عني ترا اكله من يكوم يدردم

ما اعرف .. ما اكدر اكول نسيت خالد .. كلش صعب
بس هذا الرجال يختلف .. اسلوبه حياته تعامله كلشي بيه جان يختلف .. مرات على المشاكل المريت بيها و العذاب اللي دا اعيشه كل يوم بالليل و اني ادور اخبار خالد .. تمنيت لو من اول حياتي متعرفه على صادق
وما متقربه من خالد

مرات اقيس لو صادق يعرفني كبل من جنت بعذابي ويا ابوي كبل لا اتزوج سلمان، جان خلصني من كل العذاب الشفته بحياتي
لا عانيت ويا سلمان ولا ضكت المر بحب خالد و لا تعلعلت بزواج امجد ..
بس السؤال ، لو جان شايفني كبل بذاك شكلي و اهمالي و التشوه البيه جان حبني ؟

حب خالد اليه جان فطرة لا لشكل ولا اي شي ، حبني بدون مقابل .

.. عفت اخواني بالبيت و امنتهم عد خديجة و طلعت ويا صادق لايران، رحنا سيارة مو طيارة، كال: بالرجعة نرجع طيارة ، استمتعي بالمناظر الطبيعية

صعدت وياه ، كعدني يم الشباك و هو يمي لازم ايدي، جانت الجبال و المناظر الطبيعية حيل حلوة و هو يحجيلي و يدليني

بس الطريق جان حيل طويل و ملينا من الكعدة، ما نزلنا غير مرة للصلاة و بس، هو اشترالي كرزات و حلويات و علكها بالكرسي الكدامي و كال :- اكلي
كلت شوية

تالي نعست حيل و نمت على جتفة .. خطية هو مخلي ايده وره ظهري و ساندني اله و مخليني نايمة

وصلنا طهران .. قررنا اني وياه نكمل علاجنا هنا و نخلص كلشي و عود بأخر يومين نزور مشهد و قم، و عود منها نتسوك لاحبابنا هدايا

... نزلنا بفندق بطهران، اخذ غرفة نفرين بسرير واحد .. صعبت علية بس ما حجيت لان هو اتفق بعد ويا صاحب الفندق ، انطانا المفاتيح و طلعنا للغرفة

كلت اله :- راح انام سوا بغرفة وحدة ؟

- لعد شلون ، شتريدين غرفة لوحدج

- مو بعدنا ما متزوجين

- اذا مضايقج الموضوع ارجع احجي ويا و ناخذ غرفتين

- لا لا يله
ابتسم، فتح باب الغرفة و دخلنا، هو تمدد على الفراش بسرعة ، حطيت الجنطة بالكنتور

حجيت :- خل نسوي اتفاق

- اتفاقيش ؟

- ما تصير وكيح هاي الفترة ، تكدر ؟

- ابتسم .. اطمني يابه والله ما اكربج

-لا اني عاجبني اسوي التحدي

- و اذا فزت شتنطيني

- شتريد ؟

- نتزوج بسرعة

- سكتت

ضحك، شال نفسه، سحب ايدي و مددني يمه :- لا تتوقعين اجبرج على شي انت ما رايدته فاخذي راحتج ولا تتقيدين بالكعدة وياي بهالغرفة و اذا تضايقتي كليلي حتى اعزلها

- ماشي

دار وجهه و نام ..
مرت الفترة .. و هو يحاول ما يتغزل بيه حتى لا نوصل لنقطة ما نكدر نقاومها .. احترم رغبتي

اخذني لمركز خاص بالتجميل .. انواع اشكال العمليات يسوون ، اني اجيت حتى اعالج الحروق البجسمي، استقر ابالي اسوي عملية لخشمي
لأن العمليات الجاي اشوفها كبالي تكتل كل خشم صاير قلم

كلت اله :- اكلك اسوي عملية لخشمي ؟

- و شبيه خشمج يا يابه ، والله حلو

- لا الله عليك والله هيج يصير مثل البنات حلو

- ليش تخربين روحج بالعمليات شكلج ما بيه شي

- عفية والله حابة اسوي، فدوة

- زين خليها غير مرة لإن و الحسين ما شايل فلوس العماية العندي مقدرهن على علاجج و على علاجي

- اني شايله مليون و نص و سألت، العملية بمليون وربع الله عليك خل اسويها

-دضمي فليساتج عندج يا عمري و اني وعد بالقران جم شهر و اجيبج تسوين خشيمج

...ركبت راسي الا اسوي خشمي مثل الخشوم الاشوفها ، نمت براسه الا يوافق .. لحد ما طكت حوصلته مني ووافق

اتفق ويا الدكتور على العملية و انطاه فلوس العملية د، و رحت سويتها .. بس يمه الوجع يمه .. و الفتايل بخشمي و وجهي مضبوب و احس وجهي بيه عبوة ناسفة على ساعة اطك

طلعوني من العملية و اني اصيح :- ولكم خشمييييييي يا ناس خشمي راح ينفجرررررر جيبولي خشمييييي

هو يضحك :- شكال البهلول مو كتلج عوفي يا عيوني يا كلبي انت احسلج هالوجع هذا هسه

- ولك الحكلي راح اموت خشميييي

- تموتين من ورا خشم افا الا انعل والد والديه ، جيبو خشمهااا يااااااله، منو باك خشم مرتي

بنفس اليوم طلعت للفندق بس ميته من الألم ، نفس ما اتنفس بس من حلكي ، صار بيه فلم .. تالي سخنت و اتمرضت و ابتلى بيه علاج و كمادات

وهو يصيح :- ابتلينا بهالخشم اللهي افرجها دخيلك
الليل كله سهران خايف لا اتخربط من صخونتي ، لا نام ولا غمضله جفن ..

كوة كوة يلا نمت الفجر، هو خطية نام يم راسي
تالي الصبح لا هو راح على علاجه ولا اني رحت عالجت جسمي ، نمنا من التعب

لثالث يوم يلا سحبوا الفتايل من خشمي ، باوعته .. يمه عزا العزاني صاير مو خشم يخوف مورم ..
باوعت لصادق، شو هذا اختلس فتح عيونه حيل و يكلي :- ها اي اي زين زين

حسيته الا شوية يشرد، بس بلعها حتى ما يخليني اضوج و اتندم على السويته ، بس كام يحجي بالطريق

- خشيم و ما بي شي تجين و تكصكصين ليش شمسويلج فوك ما عايشة براسه صارلج اسنين هيج تسوين بيه ؟

- يعني مو حلو

- لا حلو يعني هو زين بس والله جان حلو، توازيتي يا يابه شفتي خشومت العالم و طيرتي خشيمج ليش

- مو بعده ما يبين هسه بعدين، انت ارفع معنوياتي شنو ترا خوفتني

- لا لا هو حلو حلو

- اي اي مبين اصبغ

ظل يضحك

.. خمس ايام بقت ... هاي الأيام سويت بيها جلستين بس على الحروق البجسمي .. ما اكدر تحكم هسه بس نسبيا اكو فرق

هو اخذ علاج على رجله ، اخر يوم جان عدنا، زرنا مشهد و دخلنا بصحن الإمام الرضا عليه السلام .. جان المكان مهيب يجنن ، شكد ما الامام الحسين واسع ، هنا اوسع اوسع بعد .. و المكان يفتح النفس ، و مو ضيق و لا تدافع .. ما اعرف هو هيج ، ما ادري الوكت الرحنا بيه ما جان وكت زيارة .. بس من صدك جان راحة
الريحة و البرودة و الهدوء اللي بالمكان يخلي الگلب يسكن .. زيارة كانت من العمر

كملنا زيارة، ما لحكنا نطلع لقم كال :- خليها غير مرة لازم نرجع لبغداد بعد يومين وراي دوام ما اكدر ابقى

و بالفعل، اخذنا طيارة ورجعنا لبغداد
اول ما نزلنا مطار بغداد جان يكول :- هااا فزت بالتحدي ووعد الحر دين

- يا وعد ؟

- اتذكري

ضحكت :- تريد نتزوج ؟

- اتمناج اليوم كبل باجر، ارحميني بالعباس كوة صابر عليج

- ليش ؟

- ليش شنو ، اريدج

- من اخلص علاج جسمي نتزوج

- اني راضي ما الج علاقة عود من يصير عدي و اوفي الدين نرجع هم نزور و هم تتعالجين

- ماشي

- ابوسها الخلقة الأحبها

ضحكت ، اخذ ايدي و رجعنا فرحانين و متصافين ...
الطريق كله يحجيلي شلون راح يحضر للعرس
ما ادري القرار الاخذته صح لو غلط
بس من اني وياه احس اني بين ادين امينه
رجال من صدك احسه يحبني و يشتري راحتي
اهله يحبوني و يحترموني و هو مقدرني و حاطني فوك راسه

صح من داخلي تبقى امنيتي الابدية .. اللي خلصت عمري اتمناه .. بس "ليس كل ما يتمناه المرئ يدركه"
.. كلبي يحن لخالد
بس عقلي عكسه .. احس صادق فرصة لو ضعيتها اندم عليها .. صح احب خالد بس متاكدة مثل ما اني شايفة روحي .. ما راح انسعد وارتاح ويا خالد مثل ما ويا صادق

رجال بس الي .. ماكو وحدة تشاركني بيه
عنده خير من الله ما اتعلعل وياه بأيجار
اهله و امه و اقاربه عدهم مكانتي من مكانته ماكو احد يجيب اسمي ولا احد يطخني بكلمة، الصيت " مرت الشيخ صادق"

كلشي بيه يناسبي
فكمت اصم اذاني عن كلبي و احاول ما اسمعله
مرت ٤ سنوات من المستحيل يرجع خالد و لو رجع راح تكون فرحتي الجبيرة بس وكتها راح ابتعد عنه و اعوفه لعائلته

يمكن راح ينجرح مره لخ مني
و يمكن راح يتضايق و يحاول يضرني
بس بالنهاية راح يستوعب احنا مو لبعض و لازم ننتهي

... قررنا نتزوج بعد ما يلتحق صادق، عود بالاجازة الجاية نحضر كلشي و نتزوج

بس هو طول حيل .. حتى اكثر الأحيان ما نحصله و يضل بالنا عليه ، بس هو باقرب فرصة اله يخابر امه و يخابرني ويخابر ابنه ويطمنا على صحته
بس لان الشبكة مو كلش تتحصل و المعارك جانت كلش حامية بتحرير الموصل

يمر الشهر و هو ما ينزل من عنده يوم .. اخابره .. اراسله .. كلش ما احصلة

الا مرة يمكن مر ١٦ يوم هو لا متصل ولا مخابر ، كلش قلقنا عليه ، نايمة و دك الموبايل تقريبا ب٣ بالليل
جانت الدنيا باردة شهر ال١ بسنة ٢٠١٧

خابرني .. فزيت من نومي ، رديت :- الو.

- هلا بگلبي هلا برويحتي هلا بمريتي المشتاقلها

- صدك جذب يمعود والله ظل بالنا عليك عبالنا صار بيك شي

- لا والله بس المعارك هنا حامية فما اكدر ، روسنا ما نلحك نحكها و الشبكة زفت

- شوكت اعلان النصر

- بعد كدامنا هواي، بس السرسرية جاي يأذونا من يخلون الاهالي دروع بشرية ، ربطوا ادينا لا نكدر نكتل ولا نكدر نتقدم ..

- و هسه شنو ؟

- هسه هاليومين صافية ان شاءالله ، بعدين نهجم لهذا رجعت شوية لمنطقة بيها شبكة حتى افعل انترنت و اخابرج، امشي شلونها الاهل شلونهم

- كلهم بخير يدعولك ترجع بالسلامة

- الله يحفظكم ان شالله، مشتاقلج، شو افتحي كاميرا والله مشتاق لوجهج

- شفتح يمعود هسه كاعدة من النوم وجهي طاكة بيه عبوة ، الكوشة بكد بغداد

- اموت عليها، معليج افتحي

فتحت و الضوا مطفي، حجه :- شنو ولج ادور عليج بلايت دفتحي ضوا

كمت من مكاني و فتحت الضوا ، ابتسم وجهه و كال :- ابوسها للخلقة

- شتبوس صايرة جني ساسوكي

- اموت على ساسوكي

ضحكت و اني اهز براسي و اكوله :- قم ضع يدك بيدي

- افدي روحي لهالوجه تركصين حبيبي اليوم

- حرام ما راكصة ، بس هسه فرحت باتصالك و حميت كم اهز ركبة

ظل يضحك و هو كاعد على كرسي و موكف الموبايل كدامة و مدنك يركز بملامحي بالموبايل و مبتسم :- اخ لو احضى بيج وعلي سنة ما اهدج

ابتسمت .. حجه :- ولج خشمج صاير حلو

- صدك ؟

- اي بالقران صاير قلم ، خرب وعلي من سويتي العملية فد هبطت كلت لا يمحمد خربت المرة، هسه هاي اذا اريد اركع خشمها و اصلح و هم يكصون منه شيظل بيها ؟

- ههههههههههههههههههههههه تحجي صدك

- اي والعباس، اكعد بالليل اباوع بخشمج اكوم اصيح ادخيلك يابو فاضل احضرها و عدل خشمها بجاهك

- يا هههههههههههههههههههههههههههههههه ، اخ يمة بطني راح اموت هههههههههههه

- اروح فدوة لهالضحكة

- يفداك عداك

- روحي انت، شكو ماكو

- كلشي اكو و الماكو انت

- ان شاءالله بس تصيرلي فرصة اجي لبغداد اجازة

-زين ليش ما ينطونك اجازة ترا ميصير هيج شهور و انت ماكو

- يروحي مو جيش اني ولا شرطة، اني مجاهد طالع بفتوى جهاد، شغلتي اقود الساتر و اللي على الساتر، لهذا اني اللي ما اريد انزل لان الوضع مو مال نزول المعارك حامية

- الله ينصركم ان شاءالله، والله كلوبنا وياكم و بكل صلاة دندعيلكم بالنصر

- دعوات مستجابة بحيل الله واهل البيت النصر حليفنا بأذن الله

- وين انت هسه

- ما تصدكين اذا اكلج بهيمة

- الله عليك

- اي والله بيت بيه ضوا هنا حررناها المنطقة قبل ايام و زين اكو نت و شبكة بس بالليل تقوى بالنعار حشاج زبالة

- زين خاف على روحك لا يجيك احد و يغدرك

- لا امنه ان شاءالله، و بكل الأحوال هذا البيكيسي يمي ، ولو انغدرنا بعد هذا الله كاتبه

- يمه اسم الله ترا خوفتني

- تخافين عليه يروحي

- ابتسمت و غمضت عيوني و كلت اله :- لا ليش اخاف عليك تموت منا يلاكنك حور العين احسن مني بعد

- شسوي بيهن و انت ماكو

- و انت من تشوفهن تتذكرني

- اشوفهن شسوي يعني

-الوكاحة المعتادة

- اكلج حياتي ما تحسين عقلج مليان تمن و بيض سلك ؟

- حشا نعمة الله اييع

- اي لعد شنو وكاحة

- اي غير اجر المجاهد حور العين

- لج بابا هاي سوالف دواعش منين تجيبيها ، ليش هن حور العين انخلقن حتى الرجال ياخذهن

- لعد المن

-يعني انت تعتقدين الرجال يدخل الجنة يتزاوج ويا حور العين ؟

- غير هذا المنطق اللي سامعينه

- لا غلطانة، حاشى لله يوعد انسان بجنس هذا تشويه لصورة الإسلام

- ترا المعروف يعني شنو الغلطانة من تموتون و بالجنة الحوريات تلتم عليكم

- اذا الحجي هيج و الحوريات للجنس فالله ما ذكر بس الحور انما حور وولدان مخلدون .. يعني المؤمن ياخذ حورية و المؤمنه تاخذلها شاب معدل من الجنة

- ضحكت

- لا صدك تعتقدين هيج ؟ يعني اني و زوجتي داخلين للجنة اني اخذلي حورية تخدمني و تخدم شهواتي و مرتي تروح ويا الولدان يخدمها و يخدم شهواتها .. شنو طاب جنه لو طاب اشدلي كرون

- ههههههههههههههههههههههههه

- ماكو هيج منطق بابا حاشى لله و لرسوله ان يوعدون المؤمنين بجنس ، و الا الجنس تاتي من شهوة و نهاية كل شهوة قذارة تخيلي كم مؤمن بالجنة و كل مؤمن ماخذله حورية وتخيلي الوضعية
الله ورسوله يوعدون بهيج وضع ؟ .. حاشى الله اسمى و اعلى من هيج وعود .. حور العين مفهومها يختلف عن اللي الواضح و الدارج .. هاي سوالف الارهابية مال اموت و احصلي حورية لل... ، هذا مو منطق اسلام هذا تشويه

منو كال اكو شهوة و اكو هيج امور بالجنة ؟ يعني اني اعيش بالجنة مثل حالي من اني لما عايش بالدنيا همي مرة احبها و اختلي بيها .. طبعا لا .. تلكي عالم مختلف تماما

- شلون يعني

- اضربلج مثال .. انت بالدنيا تعيشين عالمين مختلفين .. ابطن امج تعيشين ع المي و تاكلين و تشربين من صرتج، بمجرد ما اطلعين من بطن امج يتغير العالم كله، تختلف المفاهيم و اسلوب هذا العالم الطلعتيله، تصيرين تتنفسين اوكسجين و تتغذين عن طريق الفم .. بينما لو ابقي الحب السري تتغذين منه خارج بطن امج تموتين، لو اطلعج و اخليج بمي تموتين رغم انت جنت قبل لحظات عايشة و تتنفسين بالمي .. بلحظة وحدة تغيرت كل مفاهيم العالم ليش لان انتقلتي من عالم الاجنه الى عالم الدنيا .. مفاهيم هذا العالم ما تتناسب مع العالم اللي انتقلتي اله و هو عالم الدنيا

اذن شلون تريدين نفس ما اني بالدنيا بشهوة و جنس اللي خصص بيها الحيوان تصير صفاتي بالجنة .. حاشى .. المفاهيم كلها تتغير عالم غير عالم حواس غير الحواس اللي هسه بيها، عقل غير العقل اللي انت بيه هسه .. و الدليل انت هسه حواليج الف جني و ملك تشوفينهم ؟ لا .. ليش ؟

لان عيونج اللي انت بيها هاي خاصة بعالم الدنيا
بينما لو متي و انتقلتي لعالم البرزخ راح يتغير نظرج شيكول الله بالقران ( فبصرك اليوم حديد )
اذن ؟ .. بمجرد انتقلتي لعالم اخر نظرج تغير
فهل من المعقول اتصور الاخرة بتصور الدنيا ؟ و ان الله يوعد المؤمن بجنس و شهوة االي منطيهياه بالدنيا ؟
اذن الموضوع مختلف
و هذه النضرية نضرية تشويه

- احب هيج مواضيع ، وين تقراها عفية

- هذه بحوث علمية حياتي عندي كتب قيامة و بحوث كثيرة بخصوص العوالم و هالامور ، ذكريني من ارجع اطلعلجياهم و اقريهم

- كلش احب اقرأ .. حاليا اقرا فلسفة ، تنمية بس ما احب هيج مواضيع مال كل عالم و صفاته و هيج شي

- من ارجع ان شاءالله

- انت مخلص حوزة عليمة مو

- لا درست شريعة اسلامية و العلوم اسلامية جامعة بغداد بعدها تخصصت بمذهبي و دخلت حوزة علمية بالنجف و تخرجت شيخ ، بعدها الله وفقني و استغلت بالوقف، ارتفعت و صرت احد شيوخ ديوان الوقف

- تالي ؟

- التالي ابو محمد رضا انطى الجهاد و خلاني اعوف الكدامي و الوراي و اترك الوضيفة و اجي على عمى عيوني للساتر .. لحد ما هذا حالي كاعد بهيمة و مرتي كبالي اتمناها و الحمدلله على كل حال

- ترجع بالسلامة ان شالله محمل بالنصر

- بعون الله ، ابوس عيونج حبيبي ، روحي اخذي راحتج خل اشوف امي بلكت كاعده وكت صلاة حتى احجي وياها وارجع للجماعة

- ماشي عيوني، تصبح على خير

- اجمعين

.. قفلت الخط .. حاولت انام ما اجاني نوم .. رحت مديت سجادتي و كعدت اقرأ قرأن لحد ما صارت صلاة الصبح صليت و رحت لفراشي

... لبعد ٧ ايام .. اندكت الباب فتحته ، صادق كبالي بزي العسكري، ضحكت و هو فتحلي اديه ، رحت حضنته

- اويلي يا يابه شكد مشتاق بووووووية

- ههههههه ، مطول لو ايام و تروح

- ايام واروح شنو راجع اتزوج اني

ضحكت ، رجع حضني ورفعني من الكاع :- لو تدرين شكد مشتاقلج

- شكد ؟

- بكد رحمة الله

- نزلني لا يروح احد يشوفنا

- ما انزل كبل لا احصل بوستي

- عيب لا يطلع واحد

- لا تخليني اصيحلهم و اكلهم ما تنطيني بوستي

- لا لا ما اريدهم يغيرون نظرتهم عنك خليهم شايفينك بهالنظرة

- اموت بسوالفج اموووووت
نزلني .. كال : تغديني لو اروح لبيت امي اتغده

- لا فوت مسوية تشريب دجاج

- اوف و اخيرا راح اكل اكل بيت

- شتاكلون هناك

- حشا نعمة الله مو اكل تعذيب ، لو باقين ع القوافل مال العتبة اللي ادزلنا بيها اكل هواي اشرفلنا ، تمر ايام حليب و بسكت ينطونا اليكول عبالك جاهل مفطوم مو مجاهد و عدوي كبالي و احتاج طاقة

- شهالتعذيب ؟

- الله معين ، ما بقى شي و تتحرر ان شاءالله ، بس خطية الاهالي القصف فوك البيوت دمرهم .. الموصل انسحكت سحك

- اوووي خطية

- اي بالله من نحرر و ندخل للبيوت ما مصدكين احنا قوات عراقية و دخلنا عليهم و طلعناهم من السراديب بخير، يكومون يبوسون و يبجون من الفرحة

- خطية الله يعينهم

- من صدك الله يعينهم

.. صبيتله .. كعد بالكاع ابسطالة ما نزع، حجه :- حضري نفسج الاسبوع الجاي عرسنا

- بهالسرعة

- ياريت لو بعد يومين

- شلحك

- كلشي نلحك نسوي بعدين والله وعد شتريدين ااشتريلجياه بس خل نفضها

- بس غرفة اخشاب

- لا تشيلين هم هاي سهلة

- نيشان و و ملابس و هالامور لا تشيل همها اني اشتريهن

- مهرج يابه حلال حرام ما يصير

- لا تخاف بعدين اخذه منك

- بالعافية عليج

- راح تداين مو

- لا تشغلين فكرج بهالامور اللي تريدينه كولي بيه و يجرالج لا تحطين على بالج فلوس الله يدبرها يمعودة

- ترا زوجتك اني يعني نتشارك بالراتب

- حلال حرام نتشارك، العندج حقج و العندي من حقي و حقج ، غير هالكلام اكوم اكله للسانج لو دردم

لو دردم ... ضحكت . صاحت خديجة :- ديااار

- رحت الها :- هااا

- الشيخ مطول ؟

- ليش ؟

- عبوسي يبجي اريد اسويله حلاوة

صادق :- ديااار

- ها
- اني اروح يابه اخذو راحتكم

- كمل غداك

-ما اكدر والله شبعت، دايمة ان شالله
كام طلع، ورجعت احجي ويا خديجة على تحصيرات العرس، هي تسولفلي بالاكل و اني اسولف الها بالملابس و المكياج

رحنا اني وياهم لسوك بغداد الجديدة مبقيت شي و مجبته حتى اله اشتريت داخليات و تراكسودات شتوية ٣ .. صرفت تقريبا ٨٠٠ الف تممت النيشان كله

هو اشترى غرفة تركية بيضة فخمة تجنن ... اخذني اشترينا فراش و سجاد تحفيات مزهريات

نصبوا الغرفة و خواته اجو نظفوا كلشي و اجوا وياي هنا ساعدوني، جنه مستعجلين . خلينها هو حنة هو عرس

بيومها عذراء جانت وياي بالصالون ، صورت كل لحظة من لحظات مكياجي و لبسي و كلشي و ادز لامي ، خلصناها فاتحين كاميرا و هي ويانا بكل لحظة

اجا هو اخذنا بالسيارة ، كعدت ورا و هو كدامي .. بنفس الموقف المروا قبل من جان خالد كبالي
... حاولت اضحك الأبتسامة اختفت و صعبت عليه
صرت اتخيل خالد كبالي

درت وجهي .. هو ما غازل كبال عذراء بنفس ثكلة بس نظراته تحجي .. نزلنا على استوديوا تصوير .. اخذنا لقطات

هو حس اني مو على طبيعتي اكو شي ، سألني :- بيج شي عمري

هزيت راسي ، حجه :-لعد شبيج ؟

- ولا شي

اخذ ايدي ورجعني للسيارة، رجعنا للبيت .. دخلت بالبدلة البيضة نفش جديدة تلمع .. مكياج و عدسات و رموش و كعب ابيض .
خلصت هاي هيه ؟
صار ماضي و هو وراي ؟
اللي خلصت عمري اكتب خواطر بأسمه .. عفته ؟
جانت كلمته " لو متت لا تنسيني ديار " ترن بأذني حيل اذتني .. حاولت هواي حاولت بس التهي عن هالصوت ما كدرت

زفوني من البيت ، اخذ ايدي و مشى، الفرحة ما واسعته .. كلها تصفك و تهاهل و ديجي صفكات بصوت عالي كلش ، صعدني بالسيارة كلشي بيه مغطى من فوك ليجوا ..

الهلاهل و الجكليت مطر ع السيارة .. كعدني يمه بالصدر ، و مشى ساق ..
تنصت عليه ما ادري ليش
مو بيدي احس كل جسمي صار يمغصني

هو لازم ايدي و يبوس بيها ..
يختلف . هذا مو امجد و لا سلمان ..
هذا انسان حيل هواي يحبني

ما يستحق شعوري هذا .. ربي ساعدني
هو حس اني متضايقة فبعد ما ضغط عليه، شوية و كمل الزفة ورجع للبيت

كعدوني بالبيت و هو طلع برا .. اثار و خديجة يمي .. اسامة حيل تضايق بطلعتي من البيت لدرجة ما بقى ابد ، بقن بس خواتي ملازمتني و جهال خديجة و مفرشين بدلتي و شحده اليتقرب من الجهال

لهناك و كالو خل نزف العرسان ..
اخذوني صعدوني فوك، و الرياجيل زفوا بهوسات و دبجات هزت البيت هز ( زفيناه بصاية حيدر )

فات للغرفة .. سد الباب
وكفت مدنكة، تقرب من عندي :- روحي و عمري و النفس اليصعد و ينزل

- باوعتله

- اروح فدوة لهالخلقة و لهالعيون

- احس راح اتخربط

- ليش

جسمي ديجف

- شو تعاي ، كعدني على الجرباية ، كعد يمي و اخذني بحضنه :- وعد دموعج ما انزلها، كلبج ما اقهره ، و اصيرلج سند و ظهر و بس امه الداعية عليه اليتقرب منج و يمسج بحجاية

صار يبوس بخدي، و يهمس : انت امي .. انت ابوية
نزل الركبتي .. انت مرتي و بتي و اختي و كلشي خلقه ربي

ابتعد .. :- مستعدة تصلين ؟

.- ما متوضية

- زين لعد ، ابقي وراي راح اصلي و انت ادعي

هزيت راسي، كام من مكانه ، اذن (ان الله و ملائكته يصلون على النبي يا ايها الذين امنوا صلوا عليه و سلموا تسليما)

صليت على الرسول محمد .. ارتفع الأذان انوب اقام الصلاة و صلاة المغرب و العشاء .. و ركعتين شكر

رفع اديه للدعاء (اللهم جنبنا الشيطان و جنب الشيطان ما رزقتنا برحمتك يا ارحم الراحمين )

- امين

لم السجادة و كام ، دار وجهه :- بعدج متضايقة رويحتي ؟

- لا زين

- كومي بدلي

هزيت راسي و بقيت بمكاني، هو دار وجهه عني ، بدل، اني درت وجهي منه ، كمت احاول افتح القيطان مال البدلة .. تقرب هو .. همس :- خليج اني اني اساعدج

وكفت تصنمت صرت خشبة، فكه و سحب القيطان من البدلة، ظهري كله انفتح .. مد ايده على خصري و قربني منه ، همس بأذني :- تكدرين يرويحتي لو تعبانة

... سكتت
هو فسر السكوت علامة رضى .. و اخذ راحته
.........

ابتعد .. باس راسي و نام على ظهره، تغطيت و انكلبت ، باوعتله مغمض عيونه ويتنفس بعمق
... فتح ، شال راسه شافني اباوعله ، ابتسم و فتحلي حضنه .. تقربت و رفعت عليه، خلاني على صدرة و حط ايده بطني

( اللهم يكتبلنا الذرية الصالحة اللي تقر عيني و عينج و تخلفنا بخير )

- امين

- جوعانة ؟

لا

- نعسانة ؟

هزيت راسي بمعنى ( اي) رجع راسي لصدره ، بقى يمسح على شعري و يبعد خصلات كذلتي من وجهي و يمسح عليه بهدوووء .. غفيت

لشوية دكو الباب .. جايبين العشا، ابتعد هو ، اني درت وهي نمت و هو طلع للباب دخل صينية العشا

سألته اخته حسناء :- ها وينها ديورة

- نايمة

- زواجة الخير ان شاءالله بالرفاه و البنين

- مشكورة خوية هلا بيج
سد الباب وراها، تقرب للسرير، فتح الغطا و تمدد يمي :- مريتي تتعشى لو نعسانه

-اريد انام

- حط راسه على راسي و هدئ .. سكنا اثنينا
ما اريد افكر .. اريد ابعد الأفكار كلها من راسي
اريد افكر بنفسي و بحياتي الجديدة بس
ما اريد ارجع للماضي
مشوهة
عار
ساقطة
خاينة
بنت العاهرة
و القاب و نعوت ما اريد اسمعهم بعد ... رايده اعيش هاي الحياة ووبس ، رايدة انسى كلشي ..
رايدة اليوم افتح ورقة بيضة و اكتب بيها حياتي الجديدة
رايدة احرك ماضيي مثل ما حركت مذكراتي
رايدة ابدي من الصفر
اريد انعاد بالعداد و ارجع ..

" لو بيدي ارجع ساعتي
وين ارجع .. ليا صدفة
والله ابقى افر بيها لما ترجع بشر ما اعرفه "

......

حاولت انسى و حاولت اطوي كل صفحة كتبتها بالماضي و عشتها .. حاولت اتأقلم ويا حياتي الجديدة و اصير زوجة يستحقها ..

انكتبلي منه بذرة تنزرع بأحشائي تشيل اسمه ..
زوجة و زوجي بنص الحرب و اني و جنيني انتظره

كلي امل يرجعلي و هو منتصر .. و افتخر بيه و اكول "ابو ابني "

بيتي و امه برعايتي، و بنته اختي
و خواتي يمي .. عائلتي كلها حوالية
وما محتاجة اي شي ثاني

فتحت الفيسبوك .. صفحة بتول گبالي
ناشرة شعر و صورة .. دخلت للتعليقات حتى اكتبلها (روعة )
اتفاجئ تعليق كدامي .. وحدة تسألها ( ولج شخبار اخوج صدك لكيتو اثره ؟ )

.............

رسالة توصل لصادق ... ( انت تعرف منو هاي التزوجتها ؟ تعرف ابوها مغتصبها ؟ تعرف امها جانت بت ليل و تجيب زلم للبيت ؟ ، تعرف جانت تخون رجلها بس يطلع ويا واحد اسمه خالد و يصير ابن عم رجلها تجيبه للبيت و على فراش رجلها تعرف ؟، اسألها عن اثار الحرك ليش حركج رجلج ؟ ليش حاول يغسل عارج منه ؟ .. بسرعة صدكتها و اخذتلك و حدة لا من ثوبك ولا من اصلك .. و اذا جذبت كلامي روح اسأل عليها و على امها بالمنطقة القديمة و شوف شيكلولك عنها ومبروك عليك الكرون الشدتلكياهم بزواجك منها)

.......

☆☆☆☆☆☆

#اتمنى_ان_افعلها


الحلقة_62 والأخيرة

الحياة رواية جميلة، عليك قراءتها حتى النهاية ..
لا تتوقف ابدا عن سطر حزين، فقد يكون السطر الذي بعده جميل، و تكون النهاية اجمل. ❤

........

فتحت الفيسبوك .. صفحة بتول گبالي
ناشرة شعر و صورة .. دخلت للتعليقات حتى اكتبلها (روعة )

اتفاجئ تعليق كدامي .. وحدة تسألها ( ولج شخبار اخوج صدك لكيتو اثره ؟

مدري شصار بيه، احس الدم حمى بشرايين جسمي، كمت من مكاني بسرعة، كمت افتر و بتوتر و ايد ترجف ادور على رقم بتول، خابرتها مرة مرتين
ما ترد
.. معقولة لكوه ؟
هيج و يرجع خالد ياااربي
اي دردي يا بتول ردي احترك دمي والله

صادق مو هنا ملتحق .. و بس اني بالغرفة .. افتر و انتظرها ترد .. ماكو

كعدت .. معقوله رجع بعد كل عالسنين لو لكوه شي يدليهم عليه ؟ .. رجع !!
شراح يسوي لو عرف اني متزوجة ؟
و حامل ؟
و ناهية كلشي و بادية حياة جديدة
هم راح ينكسر ؟
هم راح يدمر مثل ما دمرته بزواجي من امجد

كل هذا مو مهم ياربي المهم يرجع ويشتمى الهوى كافي عليه حتى لو شنا يسوي، وعد ربي ما اتقرب منه ولا اكابله ولا اتواصل وياه و ما الي علاقة بيه ابد ..
بس يرجع سالم

... خابرت بتول
:- الو

- شألو مو صار ساعة اخابرج

- جنت بالحمام والله، كولي ؟

- صحيح خالد لكيتوه ؟

- لا

- شفت وحدة معلقتلح و كايلتج صحيح لكيتو اثره

- اي لكينا الرقم مال سيارته ويا مجموعة ارقام ابيت بالأنبار

- اي ؟

- هالبيت جانو كاعدين بيه امراء دواعش و البيت مقصوف نصه و من محررين المنطقة و امشطيها لاكين الارقام .. و اختمال ان سيارته مستعملة بتفجير ارهابي لهسه يحققون

- عوفي هذا كله هو وين ؟

- هذا المحيرنا، سيارته و الرقم بالانبار ، زين هو وين ؟ كاتلينه و دافنينه، ساجنينة ما نعرف .. والله ما نريد شي حتى لو ميت على الاقل بس نلكه جثته

- كمت ابجي .. و هي تحجي

- شلونج ويا الشيخ

- زينة

-فرحتلج هواي والله ، الله يسعدكم ان شاءالله

- تسلمين ، بتول من ذاك اليوم ولهذا اليوم ما كاعد اكدر اطلع خالد من بالي ، اتزوجت و اني بكل يوم ادعي ربي يرجعه بالسلامة ما جاي انسى

- حتى لو رجع ما يفيدج حبيبتي ما دام الشيخ زين وياج انسعدي وياه ، الحب مو كلشي

- بتول اني ما رايده شي و الشيخ زين وياي و ما الكه مثله ، بس اتمنى كلبي ينسى و ما يتذكر من احط راسي ع المخدة ذكرى ذكرى تنعرض كبالي من الماضي ساعة ابحي و ساعة اضحك و ساعة ادعي ربي بس يرجعه بالسلامة ما اريد شي ثاني

- ان شاءالله ياربي ، صدك ما كتلج ، الخميس الجاي زواجي

- صدك ، الف مبروك ان شاءالله ، من منو ؟

- حماي، هو متزوج و الصراحة ما رايدته بس تعبت ديار اهلي يضغطون عليه و هم يضغطون، يعني اذا ابني وكع بالمدرسة هددوني يسحبون جهالي ، فقبلت بس ما راضية

- اذا ما راضية، لا تتورطين

- رافد جاي يلح .. من سافر رائد و لليوم تشكلت المسؤلية كلها براسه ابوي مريض، و ضحى و بناتها و اني و جهالي و امي و عائلته ، يكول حسو. بيه و خل كل واحد يخفف عني .. شسوي حسيت روحي ثكيله عليهم و اني و جهالي ٦ .. اخذ حماي و هو عمهم و انجب يمه و اسكت مليت و اني بروحي ثكيلة عد اهلي رغم والله ما دافعين عليه لو على جهالي ربع

- الله يكون بعونج حبيبتي، بلكي الله كاتبلج الاحسن

- ان شاءالله، الله يسمع من حلكج

.... نهيت الاتصال وياها و نزلت جوا
مريت على غرفة اثار ، كاعد تقرأ ، عفتها ورحت لغرفة الحجية ، فاتحة قناة دينية و تستمع محاظرة .. عفتها و رحت للمطبخ .. افكر

المشتمل بعد ما اتزوجت بقى لاسامة و خديجة و جهالها، بس اثار انطيتها غرفة بالبيت يمي مو هناك ..
مرتضى ورقية ويانا بالبيت ..
منتظرين امي تكمل اجرائات سفر خديجة ..
رغم زوجها دوم يهدد يريد جهاله، تالي حس عنده جهال .. و يطالب بيهم بس ما يندل البيت و يجي.

... وره يومين الظهر جنت راجعة من الدوام ، سحبت الباب حتى ادخل سيارتي، شفت سيارة صادق موجودة، عرفت هو هنا جاي من الموصل.

قفلت ورجعت الباب، و دخلت للبيت، لكيته كاعد بالإستقبال، البلازمة مشتغله و هو ابسطاله داخل و صافن بيها .. حجيت :- هلا ابو رضاوي الله يساعدك

- هلا بيج

- شوكت اجيت

- باوعلي، اخذ نفس و دار وجهه و كال :- قبل شوية

حسيته مو على بعضه، يمكن متعرض الظروف قوية بالجبهه احتمال متأذين او صديق اله مستشهد .. كلت اله :- راح اخلي الاكل ع النار احمي ، و اصعد اسبح و ارجع اصبلك غدا ما اطول

- عوفي السبح و الأكل، اكعدي

- شكو ؟

- رايد احجي وياج بموضوع

تقربت ردت اكعد كباله ع القنفة و اني احجي:- شصاير

- هاج اخذي هذا الموبايل و اقري و انت تعرفين شصاير

- مشيت عنده، اخذت الموبايل من ايده و رجعت للقنفة كعدت و باوعت ، رسالة ع الماسنجر مكتوب بيها

( انت تعرف منو هاي التزوجتها ؟ تعرف ابوها مغتصبها ؟ تعرف امها جانت بت ليل و تجيب زلم للبيت ؟ ، تعرف جانت تخون رجلها بس يطلع، ويا واحد اسمه خالد و يصير ابن عم رجلها تجيبه للبيت و على فراش رجلها تعرف ؟، اسألها عن اثار الحرك ليش حركج رجلج ؟ ليش حاول يغسل عارج منه ؟ .. بسرعة صدكتها و اخذتلك و حدة لا من ثوبك ولا من اصلك .. و اذا جذبت كلامي روح اسأل عليها و على امها بالمنطقة القديمة و شوف شيكلولك عنها ومبروك عليك الكرون الشدتلكياهم بزواجك منها )

انقبض كلبي، و انمغصتني بطني، و احس الدم صعد لراسي و اني اقرأ، نزلت بالمحادثة هو كايل ( منو انت ؟)

راد (فاعل خير )

مجاوب صادق ( هذا مو خير هذا هجمان بيوت، عندك دليل على كلامك جيبه غير هيج اطلعك من جوا الكاع و املص راسك و العباس )

راد ( انت دور وراها و اسأل بمنطقتهم القديمة و اذا لكيت كلامي غلط اني مستعد لكلشي، دور الحقيقة بنفسك المتزوجها كح** و نامت براسها هي و اخوتها )

... باوعتله بتوتر بخوف ، برجفة :- منو هذا

- عوفج منو هذا، اني بطريقتي اعرف منو هذا، انت احجيلي على الكاله

- ما اعرف منو داز هذا الكلام و شقصده هيج يسوي
دنكت للموبايل ابحث بالحساب كال

- كلت الج عوفيه، و ردي عليه

- انت مصدك هذا الكلام ؟

- لو بمكاني شراح تسوين ؟

- راح اسمع منك و افهم الموضوع و اشوف منو هذا الساقط اللي جاي يطعن بسمعتي

- وهذا اللي جاي اسوية
متجي ايده على الجانب و يمسح على لحيته، و يباوعلي :- اني ما رايد ادور وراج تالي الكا شي اني ما اعرف بيها وكتها الأمور توصل مواصيل ما تعجب، اذا عندج شي كليلياه لا تخليني ادور عليه

- انت شاك بيه ؟

- كلت الج ما شاك بيج، احجيييي فضيها

فركت وجهي و دنكت محتارة شأكول ، و شنو احجي و بأيش ادافع عن روحي .. احجيله حقيقتي لو انكرها ؟
نكرانها يعني هلاكي .

صادق :- هلكد الجواب صعب

رفعت راسي، الدموع تجمعت بعيني لا ارادي، كلت اله :- اوعدك راح احجيلك كلشي بس والله تعبانة من الطريق خليني ابدل و اسبح ووعد كلشي احجي، وكتها شتريد تسوي سوي ما اكول

- كلامج و خوفج يأكد الموضوع

- لا والله بس هسه متوترة لأن هم كالبين الحجي كله ضدي، اريد بس اوزن عقلي حتى احجيلك

- بدون جذب

- عساني اهلك اني واللي ابطني لو جذبت عليك بحرف والله.

هز راسه و تنهد :- روحي

كمت من مكاني الدموع تجري، دخلت للغرفة اخذت ملابس، و مشيت للحمام .. على الاقل اعرف شحجي و ارتب صيغة الكلام بعقلي كبل لا احجي ، ادري بروحي اذا حجيت و اني متوترة راح اخربها على روحي .

سبحت و طلعت من الحمام، ما اشوف شي كبالي، راسي عبارة عن حجي، دخلت للغرفة هو كاعد على السرير و مدنك مثبت ادية على ركب رجليه لازم راسه.

من حس بيه دخلت، شال راسه ، تقربت من عنده ، كعدت على طرف السرير، عيوني دم من كثر البجي البجيته جوا المي

صادق :- خايف من الكلام الراح تنطقيه

- ما سويت شي والله

- احجيلي كلشي ما تضمين عليه حرف، لأن بعد ما شفت عيونج و خوفج اكيد راح ابحث و اعرفها بطريقتي ، فرايد اسمع منج

- جنت صغيرة بعمر ال١٦ سنة ، مشوهة الناس كلها تتمنمر على شكلي و حتى محد يمشي وياي، جان يكشون من منظر ادية
ابوية سكير و من يسكر يفقد.و يصير يتحرش ابناته، انهار اختي حركت نفسها لنفس السبب، و اني احتركت وياها بس تشوهي ما منعه من التحرش لما يسكر
امي اتزوجها و هي عمر ١٣ سنة جان يكتلها و يطردها بالشارع حتى تجيبله فلوس .. شنو تشتغل شتسوي ميهمه المهم تجيبله فلوس حتى يشتري شرب بيهن
.. امي جانت طول اليوم مو ويانا تطلع الصبح ترجع المغرب .. ابويه اكثر انسان اخاف من عنده ، ما عندي غير اخ و اخت صغار
جنت احتاج احد يسمعني كلمة حلوة
احتاج انسان يحسسني اني انسان مو شي يشمئزون منه
مراهقة بنص بيت لا ام حاويتها ولا اب يعتنيلها .. ضايعة و بنفسها اللي يحتويها ..
اعترف كل هالامور خلتني احب شخص مو الي
و حتى زوجته لما تنمرت عليه بررت لنفسي اذيتها و حاولت ابعدها منه .. بس بعد ظروف اضطريت اتزوج انسان جان عاجز و عقله على كده .. مسولفتلك عليه (سلمان ) ما جان زوج كامل يحتويني من الداخل، جان اني وياه اخوة و بالفعل اخوه لان هو ما صارلي زوج ابد

وره ٣ سنوات مات ورجعت لبغداد بس لما رجعت اللي جنت معجبه بيه مطلك .. جان هو يوكف ويايه بالجبيرة و الصغيرة، جان يستعطفني و يستعطف حالتي ، شفت بيه الشي الاحتاجه و هو الاهتمام
.. بفترة صار هو سايق الخط مالتي عرف بمشاعري و راد يتزوجني
انسان ما جان همه شكلي و ظروفي و كلشي اني مريت بيه، اتعلقت بيه وحسيته هو هذا الامل اللي راح يخلصني من اللي بداخلي .. هو اللي راح يحتويني

بس اهله ما قبلوا و عارضوا الزواج لاني مشوهة و لان عرفوا ابوي جان يتحرش بينا من مذكرات اني كاتبتها و اختي ضيعتها يمهم

بوكتها جانت بت عمتي مريضة و توصيني على جهالها و تطلب مني اتزوج رجلها، و اهله معارضين الزواح، و مرته كل يومية ادك الباب مالتنا و تبجي حتى ترجع الرجلها .. حسيته مو من حقي
عفته ووافقت .. بس غلطي جان الوافقت عليه هو ابن عمه ، و بيتهم كبال بعض ، هو من عرف اني عفت الزواج من عنده اتحلفلي و جان يكلي ( الا اخليج تعيشين شعور الخيانة كل يوم ) شكد ما احاول ابتعد الكاه كبالي حتى امي صارت مرت اخوه يعني لو شما ابتعد هو قريب ، بس والله ما حاولت ولو لمرة اقسم بالجنين اللي ابطني ما فكرت اخون و اني على ذمة رجلي ، بس هو جان مكابلي يصدف يسألني او يحجي وياي بس والله ولا مرة حاولت اخون جان اكثر كلمة يسمعها منها ( ابتعد و خليني اعيش)
اللي اتزوجته هو جان مجبور بيه و اني مجبوره بيه بظروف كلش غلط حاولنا نتفاهم .. ما صار تفاهم ،
هواي جانوا يتمنولي الشر ووصلت رسالة مثل اللي وصلتلك . تكول لرجلي ان مرتك عدها علاقة ويا ابن عمك و تحبه و تصيحه و من هالامور .. هو انجن وكتها بدون ما يسمع مني عذبني و حرك اديه بعدين يلا عرف الحقيقة و ان الرسالة اجت من مرة اخوه جانت حاقدة عليه، اخوه طلك مرته. و اني اطلكت من عنده

صادق :- و ذاك ؟

- اللي جنت متزوجته ابن عمه يعني يا يختارني يا يختار عشيرته اءا اتزوجني يشمرونه من العشيرة، اختار اهله و عشيرته .. و بقيت لحد ما انفقد هو
صارله هاي السنة الخامسة مفقود

- و من ايستي منه اتزوجتيني مو ؟

-مو هيج ، اني جنت رافضه اتزوج نهائي بس امي و صديقتي و الكل جان يكلي شوفي حياتج هو من جان موجود اختار اهله و انفقد انت موكفة حياتج ليش
انسي الفات كله و اتزوجي

- و اتزوجتيني حتى تنسينه

- مو هيج ، اني ما ردت اظلمك وياي و طلبت منك مهلة طويله للزواج حتى اتاكد اني اني الفات نسيته و اكدر اكمل وياك

- و النتيجة

- دوم اكول لروحي اتمنى لو انت الطالعلي بأول حياتي ، جان ما مريت بكل اللي مريت بيه ، و هسه لو خيروني منو اختارك انت ، لان وياك حسيت بقيتي بقدري محد يشك بيه ولا يطعن بيه انسان محترمني و مقدرني ، مو لان اريد اكسب عواطفك بس صدكني والله العظيم وياك قررت انهي الفات و اعتبر حياتي بدت وياك وبس . و هذا اللي جاي اسويه و ما اعرف منو اللي يريد ينتقم مني و يوكعني

- شلون اتأكد الكلام الكلتيه كله حقيقة

- ما عندي شاهد غير الله، و اني راضية بكل اللي راح تسوي لان اني حجيتلك الحقيقة بقت تتقبلها ما تتقبلها يمك .

كام من من مكانه و طلع ، دنكت افرك بوجهي :- اللعي ساعدني دخيلك ، لما اجيت دا ارتب حياتي يخربطوها الية كلها الله ينتقم من الي يريد يدمرني

نزلت جوا، اثار تلكتني :- ديار قريني رياضيات

- صادق وين ؟

- طلع

- روحي هسه من عندي ما الي خلك بعدين

..لليل اجت اخت صادق حسناء و حجت للحجية، نفس الرسالة الواصلة الصادق واصله لخواته و خواته كايلات لامه .. و اكيد نسوان اخوته و اقاربه راح يعرفون

.. منو هذا اللي يريد يفضحني و ليش يسوي هيج، اخابر صادق لو اعوفه ، هو صدكني لو لا .. هو وينه
عقلي كلش تشوش ما كاعد افسر شي
الأمور كلها تلخبطت

اخر شي قررت اخابر صادق، دكيت عليه مرة مرتين .. تلاثة ما رد .. معناها ما صدكني

رحت للمشتمل، كعدت ويا خديجة اسولف الها و اشكيلها .. و هي تواسيني :- لا تخافين والله مدامج طيبة و كلبج طيب الله يوكف وياج و الله ويا المظلوم ع الظالم، حطي عينج بعين الله و كولي حسبي الله و نعم الوكيل

- و الطفل ، اذا يطلكي يبقى بيني و بين ابوه ، ما ادري قراري غلط لما اتزوجت لو شنو ما دا افتهم

- لا غلط ولا شي ترا الشيخ خوش رجال، و هو لو مو زين ما كعد.يحجي وياج بهدوء جان لزمج من شعرج وووو شسوا بس هو تصرفه عقلاني و سمع منج و ان شاءالله يصدكج

دا تحجي، دك الموبايل، باوعته ( صادق ) فزيت من مكاني و كاتلها :- خابر
طلعت برا بسرعة و رديت :- الو

- مخابرة عليه ؟

- اي ٣ مرات و ما رديت

- جوا جنت ازور

- وين انت ؟

- بالنجف، اجيت ازور الإمام علي

- صادق ما اعرف انت مصدكني لو لا، بس اللي دزلك الرسالة دزها لخواتك ولامك و حجو وياي و نكرت كلشي كبالهم، لتكلي ليش نكرتي ما اتجرأ احجي حقيقتي لأي واحد

- يعني الرسالة الوصلتني وصلت اهلي ؟ شوكت هاي ؟

- اليوم العصر اجت حسناء للبيت، اني هسه بالمشتمل، و حق الله ما الي ذنب بشي ولا اعرف منو هذا الجاي يشهر بيه

- روحي هسه روحي خل اشوف الموضوع

قفلت الخط منه ، و دخلت لغرفة اسامة ، خديجة و جهالها يمي كاعدين، هوسة و دوخة و فكري و عقلي بهوسة اكبر من الهوسة اللي بالغرفة

مدنكة و احطة ايدي على كصتي و منين ما اجيبها فضيحة، راح اكدر استمر ويا صادق و هو يعرف جنت احب واحد غيره و عائلتي هيج، و اهله شلون راح اواجهم .. و شراح يطلعون عليه من كلام
شراح اكول و شراح ابرر
ولو اني صبرت .. صادق يصبر على هيج سمعة ؟
راح يتحمل يسمع كل هالكلام لو يعوفني ؟.

دخل اسامة :- هلو ديور

- هلو حبيبي شلونك

- شبيج مريضة ؟

- لا مبية شي

- شو مو على بعضج ؟

- شوية ظروف اني و صادق تنحل ان شاءالله

- اريد احجي وياج بموضوع

-اللي هو ؟

كعد :- بيت ابوي راح يكوش عليه عمي و نروح مفلسين

- و يكوش هو كله بيت حرام

- ديار ابوي جان عنده بيت و باعه و اشترى اكبر منه

- منين غير بفلوس الحرام

- حرام عليه مو علينا احنا مجرد ورثه، و بعدين ابوي ما شفنا منه شي خير على الاقل نستارثه و نشوف الخير بورثه

- عمي شنو موضوعه

-ابن عم ابوي خابرني و كالي على عمي عماد، الا ابوي صارله شهور من مات ما اجا بيته على بالي ولا اتذكرته

- ولا اني ابالي ، انت شوف عمي عماد شبيه و شنو موضوعه و عود اني اخذ قسام شرعي و اخلي يقسم البيت و نمشي الامور بشكل قانوني

- ماشي

... بتت بغرفة اسامة و مرحت للبيت، الصبح طلعت لدوامي، الظهر رجعت للبيت، حجت حسناء :- شو لا انتو ولا رجلج تردون على هالموضوع شنو سالفتكم هيج سهل عدكم منو هذا الجاي يطعن بيج و الحجي صدك، عيالي لو سمعوا انفضح

- تنفضحين ليش اني كلت الج الكلام مو حقيقي

- و شنو اليثبت ؟

- و شنو اليثبت الرسالة صحيحة ليش مصدكة الرسالة و ما مصدكتني، دا اكلج اتهام و اني باقرب وقت احاول اعرف الفاعل و اقاضي قانونيا
غير هالكلام ارجوج كافي .. عيب بحقي لا اني اذيتكم ولا بيوم شفتو من عندي شي
فخلص كافي ..

حجيت و صعدت، لكيت صادق متمدد على الجرباية، بس ما نايم، بدلت و خلصت و هو ما مباوع، تقربت يمه

-وين راح ذاك الحب

باوعلي :- شنو

- الرجال الجان يحبني ويغازلني بكل لحظة ، ولو اجا من دوامة ميخليني افارك احضانه، معقولة كلشي راح

- لو راح انت هم تروحين وياه، بس هاي انت كدامي

-رايد اطلكني

سكت شوية، رد حجه :- للحظة اللي سمعت بيها الكلتي، اجا ابالي اطلك ، استغفرت ربي و طلعت بوجهي لامير المؤمنين دخلت عنده و كلتله اوكفلي يا علي .. لا اكدر استوعب الموضوع ولا اكدر اطلكها و جاه ابطنها ابيناتنا

- اذا لخاطر الجاهل و بطلت تحبني ..عوفني

- ام مرتضى عندي منها ٤ ، و الاربعة ما وكفوني من قررت

من حجه هيج، اتجرأت و فتحت ايده و خليت راسي على صدره و تمددت يمه ، تنهد هو، حجيت :- ما رايدني مو ؟

- بالامام و صفنت .. هو اليدز هيج رسالة شيريد ؟ و على شنو ناوي ؟

- يريد يفضحني و ما يخليني ارتاح وياك

-الواضح هيج، زين اني مرة كابلتها ٣ سنين ما شفت عليها شي غلط رغم اني مركز بطلعتج و طبتج ما فد يوم لاحظت انت عدج شي .. حتى علاقات ويا الجيران ما عدج ، تروحين بطريقج و تجين بطريقج، و اتزوجتج و موبايلج مفتوح كبالي وكت ما اجي ما شفتج فد يوم ضميتي لو سررتي شي من وراي
اصدك واحد غريب و انفذ طموحه و غاياته على حساب انسانة اني حبيتها

.... شلت راسي من صدره ، ابتسمتله :- يعني مصدكني

- الصدكتج و الما صدكتج اني حبيتج ورا كل الصار و انت وياي ما غلطتي ، لو غلطانه وياي ولو حاس عندج شي وانت على ذمتي ما اكتفي بطلاكج ، بس انت وياي ما غلطتي

حضنته .. الحمدلله رب العالمين .. والله العظيم ما عندي شي

حط ايده عليه :- بس منو هذا اللي هيج جاي يسوي ؟
كعد من مكانه :- اهلي عرفوا و حتى اخوتي وصلهم الخبر يعني القصة بعدها ما خلصت

- شراح تسوي

- تشكين بمنو ؟

-اخاف احجي و تفهمني غلط بس اني اشك بطليقتك ، لإن الاعرفهم و يكرهوني ما يعرفون اقرباءك وما اعتقد يهمهم اقربائك ..

- بس بنفس الوقت ام مرتضى ما تعرفج ولا تعرف مكانج اللي بالدورة فمنين عرفت ابوج هيج وضعه لو انت هيج جنت بماضيج و حورتها ؟

- معقوله متعرفين على بعض ؟

- على كل حال، اني طلبت تحديد موقع على صاحب الحساب، حتى اعرف هو من وين فاتح حسابه
من ينطوني الموقع سهل اعرف منو الراسلني و راد يسوي هيج

- تكدر تحدد موقعهم

- اي، عندي جماعة شغلتهم .. و طلبت منهم

وكتها نزل لاخته و نكر كل الكلام و كال الها :- اني ساكت لان اريد اوصل لهذا اللي يدز هيج وكتها احط راسها جوا رجلي و اسحك و اطلع منه حقي

... ثاني يوم .. خابر واحد صديقه مهندس و طلع مكان الحساب من الدورة انطاه الموقع و انطاه نوعية الجهاز اللي انفتح منه الحساب

ركب سيارته هو و طلع الهم

... اندكت الباب .. طلعت ام رافد

صادق :- السلام عليكم يابه

- و عليكم السلام ، تفضل منو

-البيت بيه زلمة حجية لو حجيي ويا النسوان ؟

- خير يمه شنو الموضوع

- و الله الحجية الموضوع ما وراه خير ، اذا اكور رجال بالبيت خل يطلع حتى احجي وياه

- هسه بس خل اخابر ابني

- شوية و طلعت الحجية :- هاك يمه احجي ويا ابني بالدوام

- الو السلام عليكم

- و عليكم السلام، منو انت

- اني واحد معيول اعلى عرضة ، اسمع خوية الموقع و الحساب راح اخليهن عد الحجية ، صدك و ثق بالله العظيم خلال يومين اذا ما طلعتولي الحساب التجاوز عليه و طعن بعائلتي، بيناتنا العباس ابو فاضل لا احط الساتر هنا و انتم عدوي و اسوي بيكم الما تسوى بداعش نفسه.

- اخي لحظة بس خل افتهم شصاير