#اتمنى_ان_افعلها

الحلقه_56

بينما انت حبيس الظلام، لعل النور على بعد خطوات للأمام، ساعد نفسك بالتقدم فلولا إصرار الليل على المضي، لما رأى الشمس.

......

- اني مفكر بوحدة

- منو هي ؟

- ديار

- خوش بنية بس مطلكة هي

- الطلاك حلال مو حرام حتى ينحسب عليها عيب، و اذا عيب فاني هم عيب لإن مطلك بمقياس الدين ماكو فرق بين المرة و الرجل

-انت متأكد من اختيارك

- والله يمه احنا البنية عايشناها صار اشهور تفوت و تطلع ع البيت ، و حتى بيتها ويا بيتنا طبك لا فد يوم سمعنا الها صوت عالي لا فد يوم طلع منها العيب بنية تجي بطريقها و تروح بطريقها

صح اني ما قانع بشي واحد و هي احتكاكها بأصدقاء شباب و الطلعة وياهم بس هذا مو مقياس اقيسها بيه لأن وسام هواي يمدح باخلاقها و يمكن تقاليد اهلها تختلف مو مثلنا.

- جنك مخلي عينك عليها يصويدق

ابتسم :- لا هي مو هيج بس البنية زينة و منو الما يتمناله بنية حلال تلمه و تلم بيته

- ها يعني تلمك مو لخاطري جيف وحيدة

- انت بيتي يمة شعندي غيرج صدك جذب

-اح نشوف، إذا راضي و قانع بيها ييمة ما عندي مانع، احجي وياها و اشوف ردها

- ان شاءالله
.............

ديار :- دخلت للبيت تمددت على جرباية اسامة اباوع يوتيوب و اتعلم بالخياطة اريد اشتريلي مكينة بس بيش تصير ..

دورت بأسعار المكاين .. ناس نصحتني بالبرذر و ناس بالفراشة ... اتذكر شفت مكينة عد بيت الشيخ ماكلها التراب خل استأذن من الحجية و اخيط بيها حتى لو اخيط اول ثوب الها .. تجربة ليش اشتري و اتورط

ثاني يوم رحت الهم .. اول ما دخلت عيني نيشنت المكينة بس كون تقبل و اخذها ..

طبيت ع الحجية سلمت صاحت :- جيتي و الله جابج

- خير

- جاينج خطابة

- يا ستار خطابة شنو

- ليش ولج يا ستار هو زواج يمه و الزواج ستر و غطى للمرة

- يعني بدونه مفضوحه حجية ؟

- لا بس هو الزواج ستر

- اي زين، سولفي

- اكو احد رايدج على سنة الله ورسولة ؟

- منو ؟.

- انت راضية تتزوجين

- غير اعرف بالاول منو ؟

- الشيخ رايدج

صفنت بوجها :- الشيخ ؟

- اي الظاهر عاجبته
وغمزتلي ... و يكول خوش بنية و ما شفنا منها العيب فد يوم

اخذت نفس :- خالة اني مو اللي تشوفوها كدامكم ... اني متزوجة اثنين واحد مات و الاخر طلكني .. غير جسمي مشوه من جوا و لهسه ما صارتلي فرصة اطلع و اعالج نفسي

- شلون يعني ؟.

- اني اذا تباوعين جسمي مو صافي كلش .. جنت محتركة و تعالجت بس جسمي الجوا بعده، غير هاي خالة اني شايلة فكرة الزواج من راسي، اول واحد ما جان زواج جنه اخوة بعقد ورق .. بس جربت الزواج ويا زوجي الثاني ما كدرت .. ما اكدر اكلج اي و اني لا .. هواي اكو امو بداخلي خلتني اشيل هالفكرة من راسي نهائي، ابقى بدون زواج طول عمري و لا اتزوج

- شو اني ما ادري بالحرك مالج

- اكره احجي بيه، الكلام عنه يعدني لذكريات يخليني اتأذة

- زين و اذا الشيخ رضى و تكفل علاجج اذا كدر

- حجية الزواج فكرة و شايلتها من بالي تجربة عشتها و فشلت بيها ما اكدر اكررها، اختي بمثابة بتي و اخوي هو سندي و عندي بيت و الحمدلله الزواج مو كلشي

- لا شني اختج تتزوج و اخوج يتزوج و تصفين وحدج محد الج

- الله موجود

- و النعم بالله بس الوحدانية بس لله البشر ما يتحملها اليوم بحيلج باجر تعضين الاصابع ندم مو كل فرصة تنعاد مرتين

- الله كريم، عوفينا من الزواج هسه المكينة الجوا الدرج المن

- مالتنا غير

- اريد اجرب بيها و اخيط حتى اذا شفت خياطها حلو اشتريلي وحدة

- اي اخذيها كدامج و جربي بيها بس خيطيلي وياج دشداشة

ضحكت :- على بالي والله كلت اول وحدة اخيط الها انت

ساعدتني رقية بشيلة المكينة للباب هي و الميز .. و اخذتها .. رحت للسوك العصر جبت اقمشة رخيصة، ويا ما جاي ادخل لليت تلاكيت ويا الشيخ

- مرحبا ابو مرتضى

- اهلا اختي العزيزة

من كال هيج عرفت ان هو عرف اني رفضت طلب امنه من زواجي اله، سألني :- جنتي بالسوك

- اي والله رحت اجيب اقمشة اريد اخيط و اتعلم مهنة الخياطة

- حقوقية و خريجة قانون و خياطة
ابتسم .... شلون هيج ؟

- هاي بعد شنسوي هذا الحال

- عندي جماعة اعرفهم مهمين بالدولة تريدين احجيلج وياهم بلكت يلكولج وضيفة

- شلون و هي حتى الموضفين ما عدهم رواتب هسه

- الوضع مؤقت ان شاءالله

- والله يا ريت اكون ممنونتلك طول عمري

- ان شاءالله
يحجي و هو عينه ميخليها بعيني، هاي عادته بالكلام ميباوع بالوجه.

سلمت عليه و دخلت للبيت
جربت القماش و ع التعليمات باليوتيوب و اني قبل ام جعفر الله يذكرها بالخير جانت تعلمني .. فسويت طلع الثوب رايح عوج كأنما ضاربه شرجي

بس ما ايست .. كمت اشتغل اكثر و اكثر
الشغلة اللي تخرب بأيدي اعيدها اكثر من مرة الى ان انجح .. وهيج مشيت

بالليل تمددت .. و كالعادة خالد متربع بخيالي
بس اليوم متخيلت اني وياه .. بقيت افكر باللي عرضته عليه ام الشيخ ، مستحيل اكدر
جربت و ما كدرت .. مستحيل اكدر
خالد كلشي بيه
الحلو و المو حلو بحياتي هو
الزين و المو زين
مرات اليحب .. يحب ايجابيات حبيبه ويتضايق من السلبي .. بينما اني السلبي و الايجابي حبيتهم من عنده
هم يجي يوم و اكدر اطلعه من بالي
مرت سنة على فقدانه .. لا لكيناله اثر و لا گلبي مل من انتظاره .

شلونك هسه حبيبي
زين ؟ نايم .. كاعد ؟ .. ميت عدل ؟
لا ميت و ازور كبرك و اريح كلبي يمك
و لا انت عدل و مكحلة عيني بشوفتك
ليش تسوي بيه هيج خالد ليش

غفيت و اني افكر بيه ، بالطيف كأنما مر .... خياله مو هو .. شي مثل الضل ممبين منه شي .. اسود بس هو هءا خالد هيئته طوله ذبت شعره
كأنما اجاني صوت يكلي ( ديار ... ديار )

بقيت اركض ورا هواااي اريد الزمه ما اكدر كلما اقترب يبتعد .. و بس كلمة وحدة يكولها ( ديار )
و اصرخ بالحلم (خااااااااااااالد ) بكل علو صوتي
بس احس مخنوك .. كلش اختنكت

الى ان فزيت من النوم مرعوبة ، اثار خايفة مني حيل و اني اصيح و كايمة عليه متوليتني ضرب بالمخدة حتى اصحى و هي تبجي

فزيت مرعوبة ، اتنفس بقوة، جسمي سابح بالعرك و كلمة خالد جاي تتردد ابالي ( لو متت لا تنسيني )

حطيت راسي بين رجلية و كمت ابجي بقوة، اثار شردت من الغرفة راحت تصيح اسامة

اني فقدت كمت ابجي بهستيريا .. للحظة ما جنت واعية على كل اللي اني بيه، بعدني بين الحلم و الواقع

فات اسامة و اثار وراه .. لزمني :- ديار شبيج دياار ..دياااار

حضنته و اني ابجي بقوة ، كام يمسح على راسي بهدوء الى ان هدئت و حسيت على نفسي .. ابتعدت منه

- شبيج

- كابوس

كمت من مكاني بسرعة و رحت للمغسلة اغسل وجهي ، باوعت عيوني حمر حيل .. فتحت شعري و لميته عدل و عدلت نفسي ورجعت للغرفة
اثار خايفة و كاعدة، اخذتها بحضني و اني اهدي بيها و اكلها :- لا تخافين حبيبتي ما بيه شي

ثاني يوم الصبح .. خابرتني عذراء
فتحت كاميرا وياها و اني واكفة بالمطبخ اطبخ
سلمت و هي فرحانة .. كلت الها :- خير شكو ؟

- راح نتزوج راح نتزووووج

- يا الله يا الله ، منو ؟

- ابن خالتي الاحبه كلش كلش احبه

- صددددددك ؟

- اي واااااااااااالله

- الف الف مبروك كلش فرحتلج

- و مو بس هاي .. اكو بعد خطبة لخ

- منو بعد ؟

- مهند

- اي ؟

- خطب .. مو خطية خطبة بس قروا فاتحته

- فدددددوة، مع الاسف خان اختي ، ولج اااااااااثار

- بقيتي انت و ووسام و مريم يمتى تتزوجون و نفرح بيكم

- اني ايسي .. وسام ما اعتقد بيه زواج و مريم ان شاءالله ياربي

- ديار .. وسام يحب منو الله عليج كولي

- كولي انت

- يحبني مو

- وشلون عرفتي هيج

- اهتمامه و نظراته ما اعرف جنت اشك بيهن بس اكول لا و ابعد الشك من عندي لأن هو اعتبره مثل اخوية

- اي لعد اعتبري اخوج

- حقيرة لا تظلين تضمين عليه شو جامعة و خلصنا بعد شكو

- ما اريدج تفكرين بالموضوع ولا اخلي ابالج، ادعيله الله يوفقه

- ان شاءالله يا رب

ثاني يوم .. خابرتني امي سلمت عليه بالبداية ، حسيت عدها موضوع .. كلت الها :- اكو شي احس بحلكج حجي ما جاي يطلع

- صح انت بتي بس تالي صرتي اعز صديقة عندي

ابتسمت :- الله يحفظج النا يارب، اي كولي

- اكو هيج مشروع زواج

- اووو ماما هماتين تتزوجين ؟

- يرضيج ابقى وحيدة كل عمري ؟

- مو راح تكملين و نجي يمج

- لا بنفسي اطلع لإستراليا ما اريد ابقى بأوربا

- هاي بعد النووووب ؟

- هسة عوفي اللجوء و الاقامة خلينا بموضوعي

- الخامس امي ؟

-ما دام بالحلال ليش لا ؟ ممسوية شي غلط و بعدين الرجال خوش رجال و حالته المادية ممتازة

- وين تعرفتي عليه ؟

- رجل اعمال مغربي الأصل

- مغربي؟ بس لهجته يحتاجلج سنتين تفهميها شلون راح تتفاهمين وياه

ضحكت :- جاي اتعلم على لهجته ، بس كلت الج الوارد مالته ممتاز

- مو كلشي فلوس امي، التفاهم المحبة اهم

- الله كريم يمعودة ذني بعدين يجن

- اذا انت مقتنعة بيه وواثقة بيه هذا قرارج بعد، بس اذا اتزوجتي اعذريني لا اني ولا اسامة نجي نعيش وياج

- ليش ؟

- انت حرة بقراراتج بس اني ما احب اشوف احد ياخذج من عدنا، اكرهم الياخذوج .. و اسامة مثلي

- هيج راح تخلوني بحيرة اني طالعة على مودكم

- لا توكفين حياتج على مودنا لو ردتي احد تقضين وياه وحدتج ، اتزوجي احسن ما طريق الحرام بعدين ياخذج

- خل ادزلج صورته ..
دزتلي صورته باوعت بيه خمسيني بس مو خمسيني، عود مصل الخمسينيين العدنا الواحدهم كاوي البنطرون من النص .. ستايل شنو، كاريزما شنو

دزيت الها ( كلش خوش اب )

ضحكت و خابرتني، بقت تحجيلي عليه و شلون تعرفت عليه و هو شمسويلها و شجايبلها هدايه و كالتلي:- من يجي اخليج تتعرفين عليه

- لا تكليلي عايشة وياه ؟

- لا يعني مو عايشة وياه بس نلتقي، احنا بنفس العمارة

ما قنعت بسالفتها ولا اقتنعت بزواجها كلها، بس هي تحب اليهتم بيها و تحب تكون ويا رجال فليش تاخذ درب الحرام .. ماشيتها بزواجها

هالايام الزواجات و الخطب تتناثر
اللهم كثرهن يا رب

عندي ام بي ثري صوته هالي، كعدت بالطرمة و اني اطرز ثوب بالخرز .. و استمع لأغنية ( عليكم جذب )



حاطة نص القماش بين عضلة رجلي، ودمنكة اطرز و استمع للكلمات و اتذكر خالد .. اتذكر من اول مرة كال احبج .. شلون جان ذاك اليوم حلو
جنت طايرة من الفرح ، هسه عافني صدك طايرة لا اني لسما ولا اني لكاع معلعلة بفقدانه

اجاااني صوت قطع افكاري .. من بيت الشيخ
و هو ينشد بصوت حلو :- اتعبتني يا قلب في دنيااا هواك تيها ولا ادري متى تلقى مناك



تركت التطريز من ايدي و اني استمع .. اول مرة اعرف الشيخ صادق عنده هيج صوت حلو ، طفيت الاغاني و بقيت استمعله .. ما اعرف ليش حسيت هو انشد.حتى اطفي الاغاني الفاتحتها

اني اسمعه لما يأذن او يقرأ قران .. صوته حلو بس مو مثل الإنشاد .. بحة صوته تقشعر ..

حسيت المغرب جاي ينزل ، دخلت للبيت
راح الشيخ صادق رجع للساتر ، كمت ارجع للحجية اداريها

يومين و اجتني مرة دكت الباب ، فتحته الها شو هاي طبت للبيت بسرعة و حجت :- الشيخ صادق ما تتقربين عليه و لو تقربتي والله الدنيا اطلعها من عينج

- اوكفي اوكفي لحظة منو انت و تهدديني بنص بيتي

رادت تطلع جريتها و سديت الباب:- مو انت التهدديني و تمشين، تحجين منو انت لو اخوي هسه براس الشارع بمخابرة وحدة اخليهم يلزمونج و يسلمونج وللشرطة

- دكوووومي لج تخوفيني انت، اني ام مرتضى زوجته الاولى ولا تعتقدين اخلي الج اخذه من عيونج

- اكلج شوفي هنا حبيبتي ، الشيخ رفضته و مو ابالي اتزوجه اصلا ، رايدة ترجعين ما ترجعين شي خاص بيكم اني ما الي دخل و هالمرة اعديها خاف تكولين اروح اخرب عليج يمه بس ثقي والله لو انعادت .. اذا هو ما ردج .. الي تصرف قانوني وياج

- ولي عني انت والقانون مالتج اشو ولي

دفعتني و هي تطلع حجيت وراها :- حقه الشيخ يطلك الا اسلوبج و اخلاقج ما تناسبه الرجال محترم

رجعت :- شلوووون ولج ؟

- خلصت افلوسج يلا بيباي، يلا

دفعت الباب و هي كامت تدافع .. حطت رجلها ع الباب حتى ما اسده و اني ادفع .. كامت تصيح و تدفع بالباب حيل واني ادفع وتصيح :-اذااااا بيج خير افتحي الخوااافة

فتحت الباب بسرعة الها، وكعت للكاع و تكومت ، كلت الها :- كومي يلا وشوفيني عرض اجتافج ....يلااا

كامتلي و تلازمت وياي بعدها تهم عليه، ما تحس الا اثار لازمتلها عودة الماسحة و تضرب بيها و اني ادفع بيها .. كامت تصيح علينا :- عايقاااات

دفعتها برا و اني اصيح :- دطلعي من البيت .. اطلعيييي

دفعتها و قفلت الباب ، هالله فوكاها ... هم نزل و هم يدبچ ع السطح، باوعت لاثار تكللها :- حيووووانة بواااكة اطبين بيتنا

اتنفس بسرعة من الهوسة ، بعز هوستي ضحكت :- والله توليتيها بالعودة

- اموووتها بس اطب بيتنا

ضحكت و اخذت اثار و طببتها جوة، ما كلت البيت الشيخ هي متعدية عليه، بس رقية شايفة امها و موكفتها .. و الحجية عرفت ان طليقة ابنها اتهجمت عليه .. من رحت الهم .. سألتني و كلتلها :- اي اجت تحذرني ما اوصل الشيخ، اذا هي تحب الشيخ ليش مطلكها ؟

- يمه لحد ذاك اليوم رايحين ناس على ابوها تكللهم ارجع بس اني ما اتحمل مسؤلية امه ، و هو معاند لا يريدها ولا يريد رجعتها و تريدين الصدك اني هم ما اريدها

باوعت رقية تباوع صفح لبيبيتها ، سكتت عنهم
لما ردت اطلع، لزمتني رقية :- بيبي جذابة اصلا هي التبجي و تتمسكن يم بابا حتى ما تخليها ترجع لين امي تضوج منها ، بيبي حقيرة

- اول شي عيب تحجين على بيبي هيج، ثانيا امج هم مو فقيرة التدفع باب و تهدد و تحجي .. مو فقيرة ابد
و اخير شي اني معلية بيكم ما عندي شي ويا احد
اليربطني الحجية و لخاطر ابوج لأن متفضل علينا كاعد اخدم امه

حجيتها و طلعت ..
ناقصة مشاكل اني و ابتلي بمشاكلهم

مرت ٣ شهور تقريبا كلشي بيها جان هادئ
امي اتزوجت .. عذراء انخطبت
وسام كلش تضايق و بعد ما لفى لبغداد ولا اجا اصلا
اسامة بشغله ..
اني ملتهية بالخياطة مالتي ، كلش حبيت هالفن و اقضي كل وقتي بيه

فد يوم جنت عد بيت الشيخ، هو جان موجود مو بالساتر ، فات وسام للبيت .. كلش مشتاقتله جنت، طلعت اسلم عليه ، سلم عليه ابرود :- هلا ديار

- خير شبيك ؟

- بجى و خلا راسه ع الحايط و كام يبجي

- شبيك وسام شصاير

- مهند

- شبيه

- استشهد اليوم الصبح

شهكت بقوة :- يااااااا ، ولج يمه ، تحجي صدك انت ؟

- مهند ماااات ديار مااااااات

كعدت و كمت اصرخ بقوة و ابجي و حاطة ادية على راسي و اكله :- ما اصدك لاااااا فدوة كول جذب

كعد هو و ظهره للحايط يبجي و يصيح :- كلت الك لااااا تروح مهند لا ترووووح ، ليش هيج خوية عفتنا مهند

هو يحجي و اني ابجي من كل كلبي، كمت دخلت للبيت، خابرت عذراء اشهك من البجي، ردت عليه ، سمعتني ابجي كامت تصيح :- شبييييج شكو

- مهند استشهد

صرخت :- لااااااااا الله عليج

كامت تصرخ و تبجي وياي .. يمكن هذا اليوم ما غمصت عيوني للصبح بس ابجي ، اتذكر سوالفه طلعته طبته ضحكته ، يوكف كلبي من البجي ما اصدك ذاك ذاك ابو الضحكة الحلوة راح و استشهد

شكد جنه نعقل بيه نحجي وياه، حتى شهادته ما قبل ياخذها، راح يركض على منيته ، لا اعتراض على حكمتك ربي بس تاخذ الزين و تبقي امثال ابوي على كلوبنا، مو والله كلوبنا خلصت ربي

خابرتني عذراء الصبح، كالتلي: اليوم يجيبون الجثمان مالته خل ناخذ امي و نروح لفاتحته نودعه

- علوا ولج كلبي من البارحة مشتعل نار مدا اصدك ابو الضحكة الحلوة راح وبقت بس ذكرياته

- حضري روحج البسي اسود ساعة و اني يمج

- ماشي

اخذت من رقية جبه سودة و حجاب اسود ، بدلت لاثار و بلغت اسامة و انتظرت عذراء تجي ..
ربع ساعة و خابرتني كالتلي اطلعي
اخذنا تكسي و طلعنا .. بيتهم جان بمدينة الصدر بشارع الفلاح .. خابرنا على وسام دلانه ع البيت بالضبط .. رحنا

وصلنا بيتهم جانوا هسه دا يصعدون الجنازة للسيارة، نسوان هواي لابسات اسود كامن يبجن .. نزلن الجنازة للكاع مرة لخ و التمن عليها
وكفنا احنا نباوع .. كمت ابجي من كل كلبي عليه
الصياح يطلع من عدنا بلا وعي، اذاك الجان طوله ويانا يمشي اليوم جنازة كبالنا !

بعدو النسوان ووكف اخوته و يصرخون :- عفتنا مهند ليييييش ، لييييش خوية لييييييش

وسام ذب روحه على التابوت و يصرخ :- مهند كووووم مهنننننند

اشتغل الطبل على جنازته .. بعدوا الكل من جنازته و شالوها و النسوان كامت تهلهل و تبجي

ابوه يصيح :- ما مات ابني عرييييس ابني عرررريس تزفه الملائكة اليوم عريس
وكام يدك على راسه و يصيح :- يا بوية يا مهند كسرت ظهري يا بوية

حطوا الجنازة على السيارة .. ملفوفة بالعلم العراقي ، الفرع كله ملتم ع الجنازة ، وسام تسلق السيارة و صعد هو و اخو مهند للسيارة

حط راسه ع التابوت و كام يصيح :- ولك يا خوووووووية

اخوه وكف بطوله على ع السيارة و يصيح :- هلهلن هلهلن استشهد الببطل ، ولج يمممممممه لا تحزنين يممممممه اخوووي استشهد ما مات استشهد ، اخوي رفع راسج يممممممه انطه روحه و انطى كاعة

كامو الشباب يهوسون ( يحسين ولدك وفاية ) و الطبل يدك وصوت بجي و هلاهيل و نعي و صراخ .. شي يقشعر الجلد .. يدمي الگلب .. الدموع و الصراخ وحدهم يطلعون ..

شالو صورته كدام السيارة جان مكتوب بيها اسمه ( مهند كاظم محمد ) و جوا اسمه مكتوب ( الموت لنا عادة و كرامتنا من الله الشهادة ) ،مشت الجنازة و الطبل يدك و الناس تشيعه ( لا اله الا الله، محمد رسول الله)

كمت ابجي وراه و اكوله ( مبري الذمة هنودي مودع بالله يالغالي والله فراكك مو هين علينا ) امشي و احجي ويا جنازته

اباوع عذراء انتهت و هي تبجي عليه .. الفرع نسوان و زلم مشت ورى جنازته .. من الشارع العام طلعوا بجنازته

رحنا للفاتحة مالته ، دخلنا جانت كاعدة ملاية تنعي بس نعاويها تشك الكلب ظلينا نبجي من كلبنا
وياها

لحد ما ام عذراء كالت النا :- يلا ماما كومن خل نرجع للبيت ..
اخذنا من هاطر امه ولو هي صايرة تراب ما تحس على احد .. طلعنا من البيت

وصلوني للشارع و طلعو كبل للبيت
.. بقيت ٣ ايام ما اكدر اشيل راسي من القهر على مهند تمرضت فد مرة من اتذكر سوالفه و فزعته اليه و شهامته من عرف بيه مهيونه ابيت عمي .. ما انساله كل موقف اله وياي القريب ما وكفلي مثله . جان اخ و صدك اخ و خسرته ..

وسام طبكت عليه وفاة مهند و خطوبة عذراء ، لزم جوازه و طلع تهريب ويا الهوسة الطلعت ب٢٠١٥
كال بعد العراق ما ابقى بيه ، شعند باقي ؟ اتأمل وضيفة؟ لو اتأمل حبيبة لو اتأمل اخو .. انخذلت بكلشي
ودعنا بالموبايل و كال ابروني الذمة هذا طريق بر و الدنيا تخوف ..

هم هلكد بجيت بسفرة .. احس شلتنا الحلو و صداقتنا ذيج ادمرت و انتهت كلمن راح لدربه المات و السافر و اللي راح تتزوج .. هلكد بجيت عليهم

.... اكو شي صرت احسه هذه الفترة ..
صادق صار يهتم لتفاصيلي، اكثر من مرة يخابر باليوم بحجة يطمن على امه بس بالحقيقة اشوفه يسأل عن اخباري اكثر ...

لا تحزنين ، و الدنيا ما تسوى
و انت قوية و صيري سباعية
و مرات اتفاجئ بيه من يكول :- اتضايق من اشوفج زعلانه ، ام اثار اءا تريدين شي او ابالج شي لا تترددين

و اني اشكر و اختصر الكلام وياه، لأن حسيت بيه يحبني، و كل حب غير خالد ما اتقبله

هو ترفع صار قيادي بالحشد الشعبي ، اغلب ايامه مو بالبيت .. بالشهر هو ع الساتر ، من معركة لمعركة ، و نسمع بأنتصاراتهم

المناطق بدت ترجع على اديهم .. بدل ما كان العراق يسقط منطقة منطقة .. صار الامر عكسي بفضلهم صار العراق يسترجع منطقة منطقة للعراق

الرجال الصراحة كلش محترم و متدين و اخلاقه عالية و ادري بيه طالبني على سنة الله ورسوله بس اني ما رايدته ولا اريد اعيد تجربة امجد وياه .. مستحيل
فكلشي يصدر منه او اشوفه صار يتعدى خطوة للامام .. اصده و اتعامل وياه برسمية و ابتعد

احس اني من حق وبس ما اعيد الكرة و اخونه مرة لخ .. ما اسويها بعد .. انتظره

مرة من المرات .. جنت دا اطلع .. فهو جان موجود بوكتها ،واكف و منتجي على سيارته، شافني، حجه :- ها يابه وين ؟

- رايحة للسوك

ابتسم و حك لحيته :- مو البارحة رحتي، اذا محتاجة شي لا اتعبين نفسج اني اروح اجيب و اجي

-و اليوم هم عاجبني ، و اشكرك شيخ ما احتاج احد يروحلي وياريت ما تدخل بيه

انصدم من جوابي :- اذا سؤالي الج و تقديمي المساعدة يتسمى تدخل فأني جدا اعتر على التدخل، و اتمنى هم تعذريني على التدخل السويته .. لإن توسطتلج يم واحد اعرفه و طلبتها منه يوضفج و كالي بس خل تجيب اوراقها و اعتبرها توضفت . اذا هذا هم تدخل تحسبينه فأعذريني يا بت الناس الظاهر طيبتنا و اخلاقنا صارت حشرية و تدخل

حجاها و دار وجهه و عقد حواجبه و فات جوا، صفنت ويا روحي، الرجال ما كال شي اني شبيه انهديت بيه ؟

دخلت جوا .. حتى ما رحت للسوك
كمت احوص بالبيت ، والله عيب شبيه هيج رديته فوكاها متوسطلي و موضفني .. اي بس اني اعرف نيته و مساعدته حب و اني ما رايده و اتضايق من هالشي

يلا .. شسويله .. شيريد يسوي خل يسوي

اليوم الثاني دزلي مرتضى ابنه و رقم الرجال اللي راح يوضفني ، و كاله :- خل تخابر و تروح باجر تقدم اوراقها و تكله اني من طرف الشيخ صادق حتى يعرفها

ما كلت لا .. اخذت الباج مالتي و اوراقي و كل مستمسكاتي ورحت ، جانت دائرة حكومية .. بس دخلت ع المدير كال :- اهلا و سهلا بيج اختي الشيخ صادق عزيز علينا و نتشرف بيج

شكرته .. و بالفعل عيّني قانونية بالدائرة
بنفس اليوم جنت اتعرف على شغلي .. الشيخ اجا للدائرة بزي عسكري مال الحشد الشعبي و الشماغ لافه على ركبته .. سلاحه وياه
من دخل هواي ناس تحترمه
ويمدحون بيه و املنا بيكم، و انتم امل العراق و ابطاله و احنا خدام الكم .. و بقى المدير يرحب بيه

طلبوني للغرفة .. كاله :- الست تخصني و من اقاربي وكلش عزيزة عليه اوصيك بيها هواي

كاله :- تلتزم بوضيفتهاونحطها بعيونا هي و الشيخ
شكره، و كام و اسلحته بيده، حط المسدس بالحزام و الرشاشة على ظهره

واترخص .. طلع و اني طلعت وياه
سلمت عليه جان يكلي :- تدخل مو

- ابتسمت :- اسفة جدا

- انت الوحيدة المعذورة على كل اغلاطج

دنكت ، غير الموضوع بسرعه و كال :- ادعيلي ارجع بالسلامة رايح طريق موت و للساتر .. بس ان شاءالله لو رجعت ما راح ادخل بعد

- لا تحجي هيج تخجلني

-ابتسم و كال :- يلا ديري بالج على نفسج وما اوصيج بالحجية

- احطها بعيوني لا تشيل هم

- سالمة عيونج ان شاءالله، اودعناكم

- توصل بالسلامة

بقيت اباوع وراه، شكله هيبه و ملفت بالدائرة بسبب لبسه و اسلحته و الوقار اللي واضع حلى شكله و هيئته ..

هو لا ضعيف ولا سمين .. و طوله ما اعرف من اوكف وياه راسي شوية انزل عن اذنه .. صعد سيارته و التحق

دعيت الله يحميه و يحفظه .. خطية يستاهل
رجعت للمكان اللي اني بيه، علموني شنو شغلي و شنو اليترتب عليه و من هالامور
بقيت احجي ويا روحي و اني احاجي خالد
- دتشوف خالد ؟ اللي تتمنى جاي احصله .. جنت تكلي اجتهدي و اوصلي و فوتي بعيون اليتشمتون بيج
وصلت و تعينت و صار الي راتب !
كله بفضلك خالد .. لو ما انت اللي جنت تحثني و تقويني ع الدراسة ما جان وصلت

عدا شهر كامل و اني جنت كلش مرتاحة لأن اشتغلت
فرحة اول راتب اليه بعمري ما انساها، جنت من صدك طايرة من الفرح

بوجهي رحت ع السوك ما خليت شي لاخواني محتاجينه ما اشتريت، تراكسود و حذاء لاسامة ملابس راقية و اكسسوارات لاثار .. و اشتريت لنفسي انواع الملابس
حتى اخواني جانو فرحانين وياي .. لأن صار عندي راتب .. ما اعرف ليش خطر على بالي سلمان تذكرت فرحته لما اشتغل و صار يجيبلنا من يوميته و اشوف فرحته بعيونه و ضحكته الشاكة حلكة و يحس ان احنا عايشين بجاله و يجيب بزوده

هيج صار وياي من شفت فرحة اخواني، حسيت بنفس الفرحة الجنت اشوفها بسلمان .. عاد سويت ثواب اله من الراتب ووزعت للمنطقة كلها بثوابه ، كثل ما جان يتعب و يجيب النا .. هسه اوفي و اسوي بثوابه من راتبي.

رجعت من الدوام ، شفت سيارة صادق صفت بالباب ، ابتسمت و سلمت عليه :- السلام عليكم

- اهلاااا بالأستاذة الحقوقية شلونج يابه ؟

- الحمد لله نزلت اليوم

- اي والله ورحت اجيب صمون للبيت ، جاي مشي شنو

- لا والله لهسه ما لكيت خط فاروح و ارجع كيات و تكاسي

- لا مو زين عليج ، الوضع مو زين

- شسوي حتى تعب والله

- ليش ما تخليني اقدملج على سيارة و على كفالتي

- شلون يعني

- من الشركة تشتريها قسط ..

- مو تحتاج مقدمة

- لا اعرف شركة تبيع بدون مقدمة ، اخذيلج سيارة و استقلي بيها ولا ذلة التكسيات و هوسة السواق

- امنية حياتي تصيرلي سيارة بس اخاف القسط هواي

- التقسيط مريح ، احجيلج العصر ويا صاحبي و ارجعلج الجواب

- اكون ممنونه

- لا يابه صدك جذب انت عزيزة علينا ترا

- اشكرك

-هلا بيج

دخلت للبيت .. تصير عندي سيارة ؟
و اطلع و اسوق بنفسي و سويجي بيدي ؟
اوف ياربي كون صدك و تتحقق امنيتي

وبالفعل حققها .. قدملي على سيارة بيضة صغيرة دخلت دورة سياقة ١٥ يوم تقريبا و استلمت سيارتي

هذه الفرحة جانت اكبر .. ما اعرف شلون اجازي ربي
معقوله اني هيج .. كن اتذكر ماضيي و الخوف و الذل الجنت عايشة بيه و اليوم اني بيتي وحدي و وضيفتي و سيارتي و اخواني عايشين بجالي

فرحتي ما تنوصف . تحس الايام من صدك فرحتلي
حبيت نفسي هواي كمت اعتني بنفسي بشكلي بلبسي
شعري كصيته قصير لحد الركبة وصفحة قصيرة و صفحة مذايله طويلة و معالج و مسرح ..
صرت غير شكل .. من صدك حبيت نفسي
على الرغم اكو تشوه داخلي
بس فرحتي ما تنوصف بنفسي
احس صرت انسانة ثانية مو البنية الهاملة روحها و الكل تريدها للخدمة .. هسه اني الحقوقية ديار
وصلت ... و اوصل بعد ان شاءالله

من صدك عطايا ربي تخجل ..

.. جنت كاعدة مشغلة تدفئة و كوب كهوة يمي ولازمة كتاب قواعد العشق الاربعون و منسجمة اقرأ
اثار بالغرفة مال اسامة تقرأ امتحاناتها و اسامة برا يشتغل ..

دخل للبيت بهمة
من حركة رجليه عرفت اكو شي مهم ، رفعت راسي:- ها حبيبي ؟

- ديار عمي خابرني

- على شنو

- ابوي متعرض لانفجار و مضروب بظهره و صايبه شلل برجليه

- يا الله

- و هسه هو عد بيت عمي

- اي شيريد ؟

- صارله فترة عد عمي و عمي خابرني كال تعالو اخذو ابوكم اني ما اتحمله و ما عندي اليخدمه

- اليخدمه شنو ليش منتظر احنا نخدمه ؟

- ما اعرف هسه خل نمشي و نشوفه وااله كريم

كمت من مكاني لبست ملابسي و لفيت حجابي و طلعت وياه، ووصيت اثار تروح لبيت صادق

كالت :- ما اروح عندي امتحان

عفتها و طلعنا اني و اسامة بسيارتي لبيت عمي، ابوي مثل الجلب مشمور بالاستقبال بهذا البرد مخليله بطانية اخف من الريشة

باوعناله .. ما ادري انقهر مدري اتشمت و اتشفى بيه ما ادري

حجه عمي :- هذا ابوكم وواجب عليكم تتحملون المن رباكم و المن تعب عليكم

اسامة :- شلون صار بيه هيج

- ناس وصلوه النا متعرض لحادث و متصوب

اسامة كعده .. كعده ابوي ما يكعد
طلع متخربط و محد حاس بيه ، شلناه اني و اسامة و اخذنا للمستشفى ، بس خفنا يعرفون بيه داعشي و نتورط

كلت اله اسامه خل نطلعه، حتى لو يفطس يطبه مرض ولا نتورط بسببه كوم امشي

طلعنا من المستشفى، بطريق الرجعة هو نايم ورا و اني اسوق و اسامة يمي .. كلت اله :- اسامة اني ما اتحمل ابوي ما الي علاقة بيه

- ولا اني

- نروح نتورط بيه نوكع بمشكله بسببه .. عليمن .. شنو رأيك نشمره بدار العجزة ؟

- والله احسن خلي نخلص منه ، هو بعمره ما صار النا اب ، نعتبره اب و نتحمله ليش ؟

-خل نرجع للبيت اليوم و باجر نشوف النا دار و نخلي اباب الدار و نطلع من عدها

رجعنا للبيت .. خليتله فراش و بطانيتين و التدفئه كباله، كعد و كام يون .. الليل كله يون علينا
السانه جان ثكيل ما ادري شنو ..

جنت رافضة تماما انو اخدمه .. كلش كارهه لأن هو مستحيل اسمي ابوي .. فدار العجزة جان اكثر شي نسويه اله الا هو يستحق الزباله

قررنا اني و اسامة لا نقدم اوراق ولا نتورط باسمه و لا نكون مسؤلينا عليه، انخلي اباب الدار و نفلت

من وصلنا هناك و ردنا انزله، كام يبجي
مهتميناله .. حطينا ع الرصيف .. كام يباوع علينا و دموعه تجري ورانا......

☆☆☆☆☆

#اتمنى_ان_افعلها



الحلقة_57

‏لقد هدمتني الحياة مرارًا و حطمتني بعض الظروف و كسرتني بعض المواقف و ألحق بي بعض البشر الأذى و الخراب ، لكن في كُل مرة كان الله يبنيني من جديد.

........

صعدنا بالسيارة و عفناه و هو يبجي، جان الوكت بارد .. وصبح البرد يكص كص، شغلت سيارتي ، اسامة طلع موبايله

كام يون بصوت عالي يريدنا نجي، عفت السويج من ايدي و كمت افرك بوجهي، بعدت اديه اخذت نفس طويل و باوعتله

اسامة :- تحركي

- و نعوفه

- شعلينا بيه صارله سنتين حتى ما تفقدنا ولا كال شنو محتاجين و اني انفقدت بسبب ما دارلنا بال، خيولي عوفي.

اباوعله .. انتجى ع الحايط و كام يباوع للسما و يبجي ، فتحت السيارة و نزلت :- الك عين تباوع لله فوك و تطلب منه بعد كل السويته بينا
ليش وعلى اي اساس اداريك، من جنت ابيتك داريتني ؟ صرتلي اب حتى اعتبرك ابوي و ينكسر خاطري عليك و اخذك

لا تحاول ما نريدك .. من يزرع يحصد و هذا انت الزرعته بينا حقد و كره و انانية .. لا تتوقع نريدك
كل شيطانك و طغيانك يفيدوك

عفته ورجعت صعدت للسيارة بس كمت ابجي
شغلت السيارة مرة لخ، و مشيت

على شنو اخذه، عساه يموت ع الرصيف و نخلص منه
الله عالم كم ام كسر كلبها، كم شاب حطم شباب، كم طفله استغل ضعفها و اعتدى عليها
كم و كم و كم .. ليش حتى ارحمه و هو ما راحم احد

اسامة ما طلع منه اي صوت، امشي و شي بداخلي يكلي رجعي، صوت بداخلي مدا يخليني ارتاح، تسممت

وكفت السيارة، حجه اسامة :- راح ترجعين

- الله يرفع الأنسان وينعم عليه بعز نعمته يختبره يستحق هذه النعمة لو لا

- ابوي ما يستحقها

- اعرف، بس لازم ارجع ليش وشلون لا تسألني
درت السيارة و هو يكلي :- و اذا جابلنا مشاكل

درت السيارة بسرعة ورجعت يمه ، نزلت ووكفت كباله :- والله مو لخاطرك و الا انت ما تستحق اخليك ع الرصيف، اشمرك بالزبالة مثل ما شمرتني و اني صغير

بس لوجه الله ، عندي ذنوب هواي و طالبه رحمته ، و ارحمك لله بس .. الا والله انت ما تستحق

باوعت على اسامة :- انزل

اسامة :- ديار اذا عرفوا ابوي داعشي والله نتورط خاصة الشيخ بالحشد الشعبي

- الله يعرف احنا ما متورطين بشي و الله كافي، شيل

شال وياي و هو ما راضي، رجعنا للسيارة و التفيت ورجعت للبيت ، ويا صفت السيارة طلع مرتضى ابن صادق

كلت لاسامه حاول انت و مرتضى تنزلونه، اني خل اسويلكم طريق و انظف فراشه ، نزلت كبالهم الفراش مخربط .. عدلته

جابوه نوموه، ما جنت راضية بكل الاسوية جنت اتمنى لو صدك اشمره بس صوت البداخلي ضوجني يبقى ضميري يأنبني يبقى انسان عاجز لو مهما بلغت حقارته

رحت للغرفة اكمل نومتي بس ما اجا النوم لعيني، كمت من مكاني دا اطلع للمطبخ اندكت الباب، حطيت الحجاب على راسي و صحت ....منو ؟

صادق :- اني يابه

فتحته :- هلا ابو مرتضى الحمدلله على سلامتك نازل

- الله يسلمج اي والله اليوم نزلت، مرتضى كال ابوج مصوب، صحيح ؟

- اي والله خابرني عمي كال تعالو اخذوه و جبناه

- يحتاج نودي مستشفى ؟

- لا ما يحتاج نايم و الله كريم مشكور

- اكو وقف يأجرون اسرة كراسي مال مرضى مجاني بثواب الإمام الحسين تريدين

- اذا اكو سرير هذا اليرفع و ينزل ،اشتري

- لا لعد خليها عليها اني ادبرلج منهم سرير، و بالعافية عليج خدمة الوالد بالرغم هو هاملكم صار سنين

- الله موجود

- و النعم بالله، عفية عليج، يلا يابه اني اروح و اذا احتاجيتي شي اعتمدي على روحج
حجاها و ابتسم

ضحكت :- هو ماكو غير حل مشكور

- اتشاقى، وكت ما تحتاجين عليج الحسين لا تترددين

- ما تقصر ابو مرتضى الله يخليك

سلم و راح، دخلت للبيت، اثار نايمة فوك ولا يمها الموضوع، جمعة و متبله نوم، دخلت كعدت ، ابوي يباوع للسكف

تعلعب روحي كلما اباوعله، حجيت وياه :- هيج احسنلك اسماعيل ؟ من جان بيك الحيل ما عفت احد بحاله، تقتل و تعتدي و لا حاسب حساب لالله

شفت الله شلون ذلك و شمرك عد اللي شمرتها بالزبالة، مو اني الما ردتني ، رجعتني امي حتى المك من الشارع
ابنك الجنت تفديه بروحك ما باوعلك ولا رف عليك
واني الشوفتني انواع العذاب ما تحملت اشمرك

ما ابريك الذمة و شكولة ذمتك عد الله حقي و حق خواتي الراحو بسببك و حتى حق امي .. كلهم بذمتك و ما ابريك

احجي و هو ساكت ما طلع من عنده اي حس ..
عفته و كمت نرفزني

بقيت اعتني بيه وكت الاني اكون بالبيت ووكت الاني بالدوام يبقى ، اسامة كل وكته لو بالمحل لو بغرفته ع الموبايل... اثار اشتريتلها ايباد و هم وكتها لو تدرس لو ع الايباد

صادق دبرلي سرير هم فادني بيه ..
خابرت امي و كلت الها على ابوي .. كالت لو شامرته شعندج جايبه هوسة الراس الج، طلع ملاحق، طلع مطلوب شلون غير تفكرين

كلت الها:- على الله ، اني سويتها لله و هو يتكفل الباقي

مرة جنت كاعدة بالهول ، مشترية صوبة بيها منظر مثل الحطب و يشتغل .. شكلها كلش حلو و ادفي، مخليتها بالهول و حاطة كرسي و كوب نسكافيه وبسكت ، ولازمة كتاب اقرأ

كلش طابت روحي للكتب، كل يومين اختملي كتاب و اكثر شي احبه كتب الدكتور علي الوردي ، عالم ثاني يفتح بعقلي افاق تختلف .. يغير فكرك للامور بشكل مو معقول.

ابوي نايم و الغرفة دافية و اثار بغرفة اسامة فوك، و الجو هدوء .. اندكت الباب، طبكت الكتاب، و طلعت ، طلعت رقية ، اطكطك بأديها

- ها رقاوي اكو شي

- اريد احجي وياج

- اي فوتي جوا

دخلت وياي، ما بقت بالهول فاتت للغرفة الجوا، كلت الها :- اكو شي

- اني بورطة

- شكو ولج احجي ورطتيش

- اتعرفت على واحد بالانستكرام

- اي ؟

- وحبيته ووعدني يتزوجني والله هو حلفلي

- كلهم يحلفون و حتى بأمهاتهم و اعراضهم، تالي عافج مو

- لا

- لعد شنو ؟

- صورتي بلا حجاب يمه

- عزا العزاج كون ، شلون تأمنين و ادزيله صورج ؟

- والاه جان يحبني يموت عليه اصلا حتى خلاني احجي ويا امه و هي كالتلي كلها كم شهر و نخطبح

- اي و تالي

- صارله يومين يكلي محتاج مليونين و انت اذا تحبيني لازم ادبريلي ، و اذا ما دبرتيلي يعني ما تحبيني و اني الما تحبني و تلعب عليه اأذيها

- ايباااااه شلون فارها ، صورج عنده شلونها ؟

- بس بالتراك مو صور مو زينة بس اذا فضحني و عرف بابا يذبحني والله، الله عليج ساعديني شسوي

- شوفيني المحادثة

انطتني إياها ، اني اقرا و هي تفتر تبجي
تتوسل بيه تكوله ( والله ما عندي منين اجيب ) يكلها ( ابوج عنده روحي لخانته و اخذي منه و جيبيلي )

تكله ( اخاف ما اكدر )
راد عليها ( اءا ما تكدرين معناها احسبي احسابح الصور توصل يم ابوج و افضحج و حتى اخلي صورج على مقاطع جنسية و اخلي ابوج يكتلج

ترد تكله ( انت مو تحبني ليش تسوي بيه هيج)

يكللها ( و انت همين لو تحبيني جان ساعدتيني بس انت ما تحبيني )

وباقي يلف عليها منين ما مالت ، كلت الها : راسلي

- شكله ؟

- كليله باجر اجيك ونتفاهم

- ما اكدر اروحله ديار والله بابا يكتلني يموتني غير

- من سويتي هيج ليش مفكرتي ابابا هسه دا تفكرين و تخافين ، حيل بيج حتى مرة لخ ميلعب بعقلج واحد مثل هذا و امثاله هواي ، هسه راسلي و كليله مثل ما كتلج

راسلته و كالتله (التقيك ) و بقيت القنها الكلام و هي ادزله، لحد ما وافق يلتقيها، كلت الها :- روحي هسه و باجر اني امر عليج للدوام و اخذج و نتصرف

- شراح تسوين

- ما الج علاقة

راحت بس الخوف ما كلها ، الله يلعنه و يلعن امثاله من يجرجرون البنية بالكلمة الحلوة و بعدين هناك لو يكلب عليها لو يهددها

اخذت زمنية من الدوام و مريت عليها للبيت جانت ما مداومه، و رحنا سوا ...وصلنا للمكان اللي هو حدده الها

شافنا سوية، الموبايل مقفول بس سحبت الكاميرا و ضغطت فيديو و نزلت و الموبايل لازمته بيدي اعتيادي منزلته ما كأن اصور

كلت اله :- السلام عليكم

- منو انت؟

- صديقتها

- شرايده

- اني رايده افهم شنو اللي تريده من البنية ؟

- الردته كلته الها وما عندي حجي وياج يلا منا

- الفلوس تاخذهم مني

سكت .. :- مو محتاج فلوس ؟

- ومنو يضمنلي ؟

- اني اللي اسألك هالسؤال منو يضمنلي اذا انطيتك الفلوس ما تفضح البنية بعد و ما تمسح الصورة

- استلم الفلوس و الصورة تنمسح كبالج

-موافقة بس تنتظرني استلم راتبي و انطي لأن هسه ما عندي المبلغ المطلوب، انت شكد رايد ؟

- خمس ملايين

- مو جانن مليونين

- كلما تزيد المدة كلما يزيد المبلغ

- زين انت مو على اساس تحبها و امنت بيك ليش هيج تسوي بيها

- بكيفي

شلت الموبايل بحجة حدلت الشال من يم صدري ورفعته لراسي اعدل بشالي ليورا، و نزلته ايدي، صوته بالفيديو كامل و اني اكله :- حرام عليك هي بنية و تحبك ليش هيج وياها

- لا اطولين حجييييي ادفعيلي لو افضحها

- لا فدوتك تفضحها شنو راح نحاول خلال هاليومين نجمعلك الفلوس بس انطيني صبر لأن المبلغ و الله ما متوفر عدنا هسه

- كدامكم يومين بس

- ما الحك

- معليه اني تنطوني امسح ما تنطوني افضح

- ماشي راح احاول كل جهدي بس الله عليك تساهل ويانا ترا والله هي خطية

- ماكو احد خطية ، و اسمعي لو حاولتي تحجين لاحد لو تسوين عليه افلام الصور تلكيهن بالفيسبوك بكروبات الكحا***

هي بقت تبجي و تكله :- والله حرام عليك ليش هيج تسوي بيه ، اني ثقيت بيك و انت كلتلي تحبني وراح تخطبني و حتى امك حجت وياي ليش هيج تسوي بيه

خليتها تحجي و هو يصيح عليها و يردها، سجلت القضية كلها، حتى اذا اروح للمحكمة و ارفع قضيه و ادينه الادله كلها بأيدي من الطقطقة للسلام عليكم

اخذتها و كلت الها :- يلا امشي الحجي ميفيد ننطي الفلوس و عود يتهنى بيهن

اخءتها بالسيارة و هي تبجي و تسألني شراح نسوي، ما كلت الها اني سجلته، اخاف تتراسل وياه و تزلك الها بكلمة و نتورط، فعفتها خايفة و خليتها بخوفها درس الها ما ينعاد.

رجعتها للبيت، و رجعت لدوامي، لإن جنت ماخذة زمنية، كملت دوامي، خابرت عذراء حجيتلها ع السالفة
وتناقشت وياها شلون اتصرف ويا الموقف بلا ما يدري الشيخ صادق و تصير مشكلة بينه و بين بنته

ثاني يوم اخذت اجازة و طلعت حتى امشي بالقضية
... رقية اني ما بلغتها، هي من الخوف طالبة تروح لامها و حاجيتلها

امها مخابرة على الشيخ صادق

- الوو

- اهلا ام مرتضى تفضلي

- ديار منو هاي و شلون تسمحلها تدخل للبيت و تلعب بجهالنا

- ما فهمت .. شتقصدين

- ديارة مسوية بلوة و مورطة بتك تدري لو لا، تعرفها هاي منو و خليتها تدخل بيتك و اداري امك و تختلط ويا ولدنا و تخربهم

- اني بالدوام و مو وكت كلام، كم يوم ارجع و نحجي

- بتك راح تنفضح و انت تكلي كم يووووم

- فضيحة شنو هاي احجي شنووو الموضوع

- ديار معرفة رقية على واحد طايح حظه ماخذتها وياها حتى تخلي يلتقي بيها و تعرفهم على بعض، و هسه هذا الولد يهدد برقية اذا ما تنطي فلوس يفضحها و ينشر صورها، صور بتي منين جابها و يهددها ؟

مو هاي ديار الواثق بيها ، اذا ما تردها هسه و اطلعلي حق بتي منها الا والله يا صادق اشهركم و اخزيكم انت و هاي التفوتها للبيت و تخليها تلتقي بولدي

.... الشيخ صادق متخبل من سامع هيج، ما مخابر، لاا... راكب سيارته و من صلاح الدين راجع لبغداد كبل ..

خابرني :- الوو

- هلا ابو مرتضى

- انت مو بالدائرة وينج ؟

- عندي قضية واخذت اجازة و طلعت، ليش انت بالدائرة

- وين انت هسه كليلي حتى اجيج

- ابو مرتضى اكو شي ؟

- كلت الججججج انطيني عنوااانج خل اجيج

انطيته اسم المحكمة، يمكن ربع ساعة و هو اجا، كال:- اصعدي

- سيارتي بالكراج

.- عوفيني من السياااارة اصعدي بسرعة

- استغربت عصبيته، ادري هو مو جان بالدوام ، شوكت نزل، انوب بهدوم العسكر ، صعدت وياه، داس بالسيارة

حجه :- رقية ماخذتها معرفتها على واحد صحيح ؟

- شنو

- ديار ارجوج و لا تخليني ابوس راسج حتى تحجيلي الصدك، ريحيني و كليلي شنو الموضوع

- غير افتهم شنو واصلك حتى احجيلك واكولك شنو الموضوع يا ابو مرتضى

- اكو واحد انت معرفة رقية عليه و هذا الواحد جاي يهدد ابتي، صحيح هالحجي و منو هذا دياااار

- الكلام مو صحيح سبحان الله خيرا تعمل شرا تلقى، انوب افترت عليه

- شقصدج

- قصدي يا ابو مرتضى الكالك هيج رايد يخرب سمعتي و اني لا الي ناقة ولا جمل بهالموضوع ولا الي دخل اساسا

اخاف احجي و اطلع اني دا اسوي فضيحة لو اشهر بالبنية و اني والله ما رايدتلها الفضيحة بس ربك اني سجلت كلشي لا جان اني وكعت بيها

باوعلي :- شمسجله

- انطيته الفيديو باوعه كله

دار وصرخ :- انت ماخذتها من وراي تتفقين وياه ليييييش اني شنو طرطووووور ، مو بعينج ااااني

- حشاك بس اليوم احد التجئلك و خايف مني، تفضحه يمي لو تحلها بدون ما تضره و تضرني ؟ .. اني سجلت الفيديو و هياني دا ارفع قضية و اريد اكمش الولد كبل لا يضرها لبنتك

اروح اني اطلع معرفتها عليه ، والله لا اعرفه ولا الي معرفهوبيه بس البنية ٠انت خايفة انت تعرف و التجئتلي تتوسل اساعدها .. و حاولت

... بقى يستغفر الله و يضرب بالستيرن و يتحلف برقية و امها، العرفته امها اللي كالبه الموضوع عليه و مطلعها بتها حتى لا تنضر بتها و بنفس الوقت تبعدني

ترخصت منه، كال لا .. دزيلي الفيديو اريده ،
دزيته اله ... و نزلت من عنده

هو رايح ماخذ الموبايل من بته، ومدور حسب جماعته و معرفته .. بالاستخبارات .. محددين موقع الولد
لحد ما كامشي .. وكتها لازمينه مزوعينه العافية
خلوه هو و الميت سوا و رايد يسجنه بس ابو رجال خير داخل عند الشيخ و كايله

:تريدون فصل تريدون فلوس اني حاضر بس ابني طايش والله و بعد ما يعيدها رايدها منك
وباقي متوسل، عايفين الولد بعد ما شوهو خريطة وجهه

.. راجع متعارك هو ويا ام رقية و كايل الها :- بدال ما تكليلي بسوالف بتج اتضمضميلها و تذبينها براس غيرها ، ما تخافين الله انت ما تستحين ما تخجلين
بتي اليوم ترجع لا والله اسحب جهالي منج كلهم و احرمج حتى من النفقة

متعاركين ايام، لحد ما ساحب رقية من امها، العرفته حابسها بالبيت و مبطلها من دوامها و هي هاي اخر سنه الها سادس .. وتدخل كلية

انقهرت عليها حيل رغم هي حقير انطت بيه، بس اني اكثر وحظة اعرف قيمة الدراسة و شنو اهميتها للبنية

..خابرني هو .. رديت :- الو

- الو هلا ام اثار شلونج ؟

- الحمدلله على الله

- اني رايد اعتذر منج ع الموقف ذاك اليوم صار الصياح بوجهج

- لا ولا يهمك المهم انتهت

- الحمدلله، و اللي شمرها براسج ما راح اعديها اله

- الله موجود ابو مرتضى ، اعرف منو و اني اكولك عديها ما تسوى

- والله هي الصدك ما تسوى

- اني طالبتك ابو مرتضى

- انت بس امريني و يجرالج والله

- ما يأمر عليك ظالم ان شاءالله تسلملي، رايده منك بس رقية .. من حقك تسحب منها الموبايل و من حقك تحبسها و السوته مو صحيح بس سبحانه الما يغلط كلنا غلطنا

- غلط عن غلط يختلف ام اثار، هاي مو بس غلطت لا و ضمت غلطتها و خلتها براس غيرها

- صغيرة و غيرها لعب براسها، اني مو علمودها والله بس انقهر هاي سادس معدل و ما تكمل حرامات ، خوفها هددها بس لا تبطلها الله عليك

- ان شالله، ايام نشوف والله كريم، ام اثار انت غالية و زادت غلاتج بتصرفج الاخير

- الله يخليك و يحفظك

- الله يسلمج، ديار اني ما رايد اخرج عن شرعية الكلام، بس رايد اعيد الموضوع مرة ثانية و هالمرة على الساني، اني رايدج زوجة على سنة الله و رسوله

والشاهد الله لا تعتقدين اني رايدج لخدمة امي لو للبيت لو لا لا ابدا، اني افتخر بكل الأنت بيه و اني مستعد حتى افتحلج مكتب محاماة زايد على وضيفتج و ترتفعين اكثر ويرتفع اسمج، اني رايدج لأن اني اعزج و انت الج محبة بكلبي

- فاجئتني بالموضوع، اني ما مفكرة بال....... قاطعني

- اعرف و اني انطيج مهلة تفكرين شكد ما تريدين يومين شهرين، حتى لو سنتين و الله راضي.

انحرجت شكوله بعد، كلت اله :- الله كريم ، اترخص هسه مع السلامة الله وياج

قفلت الخط من عنده .. و بقيت افكر ويا نفسي ، شي مستحيل افكر بغير خالد .. ابد

بس ما اعرف الموضوع اخذ من تفكيري ..
اني بالفترة الاخيرة تغير وضعي تغير شكلي لبسي
الناس الها الظاهر .. جان كل اليخطبني اعوج و يريدني اكمله العنده مريض لو الناقصه شي ..

الموضوع اختلف، هسه الواحد كام يشوفني بعين المظهر، بنية عدها بيت و سيارة و وضيفة وشكل و ترتيب .. كثروا اللي يتقدمولي .. بس ارفض دائما ارفض رفض تام و شايله هالموضوع من بالي
لأن ولا ليلة تمر باليوم و اني ناسية خالد
ولا يوم يمر و ما اتخيله ..
خالد بالنسبة اليه كلشي و غيره لا شيء
فلهذا ما اكدر اقبل اي مشروع زواج

لما تقدملي الشيخ، رحت حجيت ويا عذراء
اني وياها متعودين نفتح كاميرا و نكعد نسولف بالساعات

فمن طرحت عليها الموضوع كالت :- اي و ما توافقين و شبيه ، شو رجال بيت و مكانة و قيادي و مساندج و يحبج و رجال و هيبه شتريدين اكثر من هيج

- اريد خالد

- خالد صارله ٣ سنين وينه ؟

- كلبي يكلي فد يوم يرجع

- ديار احجي لو تزعلين ؟

- احجي

- الصراحة والله ما شفت وحدة غبيه و ما تفتهم مثلج

- اشكرج

- لا جديات والله ، اذا تريديني وحدة ما تهتملج و ما تهتم المصلحتج ما خسرانه شي اكلج ارفضي و خلي يولي

بس اكو فرص تتوفر اليوم ما تتوفر باجر.. متعرفين باجر شيصير .. تخسرين هيج رجال ليش ؟

- من كل عقلج و اعوف خالد

- خالد ما موجود اصحي ديار و ثقي بالله العظيم لو خالد موجود و يريدج جان كلتلج عوفي و اخذي الشيخ

ولج انت غبية .. شنو البخالد ينراد ؟ .. لنفترض رجع
تتزوجين واحد متزوج اثنين .. و ما عنده وضيفة ولا شهادة ولا بيت ، و مو بس هاي ، طليقج ابن عمه .. لا و مو بس هاي، امج طليقة اخوه ...و مو بس هااااااي .. اهله يعتبرونج عااار ديار

ديار خالد جان يحب ضحى و قاتل عليها مقاتل ما قاتله عليج، و اخءها .. و انت كالج عوفيها للزمن يحلها

يعني قيسي شكد جان يحب ضحى و تقاتل عليها و اخذها و خلف منها و المفروض يزيد حبه .. شسوا ؟
بأول موقف من ضحى شالها من باله و حطج بمكانها
صح لو لا ؟

شنو نسيتي اغتصابه الج ؟
نسيتي شلون بس لمجرد انت ضحيتي حتى يرجع لعائلته كام يعيرج بأمج و اغتصبج بدون ما يهتزله جفن لأن يشوفج مثل امج

وكت اليحبج انت شريفة ووكت اللي تضري .. انت بت امج ... هذا خالد ديار ؟

لا تثقين اكو احد يحب ويأذي
اكو بشر يأذون اليحبونهم بس مجبورين، يمكن تجبره الظروف على شي يتأذى حبيبه منه، فرق عن اللي يأذون بحقارة .. اللي سواه وياج خالد حقارة و عن قصد ديار
و انت بكل غباء نسيتي كل اغتصابه و سوالفه والله شنو احبه ، انعل ابو الحب اليذلني

من حبيتي خالد ولليوم شجنيتي ؟
زوجج اول مرة لواحد مختل لأن يشوفه يناسبج .. ما فكر بمشاعرج .. بعدها لان كلبه لان .. حبج
و من عفتي .. ما تردد بأذيتج
خلاج كل يوم تعيشين شعور الخيانة ويا رجلج
خلاج لا انت لرجلج ولا انت لروحج ولا انت اله
لحد ما اطلكتي شصار . من خيروه لو تبقى بالعشيرة لو تتزوجها .. كنسل موضوعج و كال خليها على الله
هذا خالد

- ليش تشوهين صورته كبالي هو ما جان هيج

- لا جان بس انت اللي حبج عاميج عن كل عيوبه، ديار رحمة لاهلج اصحي، من يوم الطلعتي من بؤرتهم سمعتي احد انتقص من شرفج . احد عيّرج ؟
بؤرة اطين حظج بيها تحنين الها ليش .. والله احب ؟

الحب وحده مو كفاية بعدين ليش تصيرين انانية، الشيخ هم يحبج و صارله سنتين من خطبج و ما دور غيرج ولا حاول يخطب و هو وياج ع الصغيرة و الجبيرة

اذا جان خالد بموبايل يمشيج و يكلج سوي هيج و حطي هيج .. هذا يختلف ، هذا يسعالج برجليه و يرفعج

ترا الرجال هم كصة ، يطلعلج واحد تشوفين على كصته كل الفكر و يطلعلج لاخ تشوفين على وجهه كل الخير ، و صادق رجال شهم متدين صائم مصلي يخاف الله و مجاهد بعد و مو بس مجاهد .. قائد هم تعرفين يعني شلون مكانته حلوة و ما يتقارن بغيره ابد

وكل اللي انت بيه هسه بزوده .. هاي اني وياج مو تخرجت الله وكيج من يطكني الافلاس لو ابقى اجدي من امي و خطيبي لو اروح اطلع للمحكمة بلكت احصل دعوة و اكسب بيها .. و انت بلا حسد اللهم صل على النبي وضيفة و سيارة و ... خايبة حتى معيشج ابيت يطك بالكاع بفلوس ايجار هن و التراب وما فد يوم حجه ولا جاب سيرة فد يوم وواكفلج وواكف لاخوج

- يعني هسه انت شنو جاي تقنعيني، لا تحاولين ما اكد ، جربت مرة وفشلت

- طبيعي تفشلين حبيبتي اذا مكابله خالد وجه بوجه منين ما افتريتي لكيتي شلون تنسي و شلون تعيشين ، طبعا ما تنسي و طبيعي تصير مشاكل

هسه الامور تختلف ديار .. خالد صارله ٣ سنوات غايب الله يرجعه بالسلامة .. رجع تتأملي ؟
و ترجعلج ضحى و رغد ويييييي شهالملا القذرة
الله يرفع بيج و انت تحنسن للقذارة تف عليج

- لا عذراء والله ما اكدر انسى خالد

- ما رجع شلون ؟ ليش تضيعين عمرج على اطلاله ..
الله ديكتبلج حياة افضل عيشيها .. يصير عندج اطفال تستقرين يصيرلج سند ، يلفيلج تلفيله
جذب المرة ما تحتاج رجال، نعم ما تحتاج ذكر
بس هنيالها التلكي رجال و لا تكولين ما احتاج رجال
ترا احنا بشر .. بالليل ما تحسين ما تحنين من فلك الفلكج شنو ثلاجة مجمدة بت الاوادم

- الاحتاجه خالد .. لا تكليلي غيره صعب والله

-يبوووووووووووو اشك هدومي صار ساعة الغي تالي تكول اريد خالد ، يربي ماكو حفرة اطم روحي بيها

ضحكت. . لا جديات والله ما اكدر انسى

-ولج والله بحضن حضنين من صدوقي تنسين خالد و اهله ولا تكولين جان نسيت، ذاك الوكت يختلف و الظروف تختلف احنا ولد اليوم

- عوفي ما اريد

- براحتج بس بداعتي اختلي ويا روحج وفكري زين ولج كافي ضحيتي بروحج وتفوتين سنين عمرج تالي تنعض الاصابع ندم، اكعدي ويا نفسج وفكري

قفلت الخط منها ... حجيها ظل يدك براسي
لا .. خالد ما جان هيج، هو جان احلى شي بحياتي
جنت من اشوفه اطير من الفرح ، هو الإنسان الجان ساندني بكل موقف .. هو مو هيج

مستحيل اكدر اوافق .. لا .. ولا ارد جواب اغلس احسن

غلست ع الموضوع و بكل فترة احس بتلميحاته اليه، وما ادير بال ، غلقت قلبي بوجهه ما انطيت مجال ابد

... الا ما بيوم فات اسامة ملهوف
كال :- سمعتي ؟

- خير ؟

- ابو مرتضى

- شبيه

- تصوب ع الساتر و حالته خطرة و ناقلينه لكربلاء للعلاج

- لاااااا

- اي والله كلش انقهرت عليه

- شلووووون هيج ؟

- بمعركة الفلوجة هو ع الصد الامامي بالمعركة بمواجهة داعش .. و متصوب اصابات قوية، كومي روحي لاهله ترا خطية الحجية و مرتضى ورقية كاعد يبجون

كمت من مكاني، كلت لاثار ديري بالح على ابوي خل اروحلهم، لبست بسرعة و كلبت عدهم .. الحجية مفرفحة تبجي و تصيح :- يمة ابني راح يممممة شمعة بيتي يا يمة

بعدني، هسه فتت ، فات سلام اخوه الجبير و عائلته وياه ، انوب اختهم .. وواحد وره اللاخ التمو و الحجية تبحي و تصيح

مرتضى يبجي ، رقية ...
الحجية تصيح اريد اروحله .. كاللولها :- انت رجليج ما تعينج وين تروحين اكعدي هنا احنا راح نروحله

بقت تبجي و تصيح بس محد اخذها
كعدوا بناتها يمه، و اني كابلتهم، نعت نعي يشك الگلب على ابنها ، بقينا نصبر عليها و نبجي وياها

كرابتهم اجو و نسوان كومة صار البيت هوسة
و الرياجيل كلها تعنت اله لكربلاء .. الدنيا انكلبت عليه هناك .. لا وكفهم طريق ولا شي .. سلام خابر اخته يحجيلها يكللها المستشفى ما فرغت الناس انكلبت علينا

العرفناه هو بغيبوبة .. و العتبة الحسينية متكفلة علاجه بأفضل كادر طبي ..

بقى بالنا مشغول عليه .. مسويله عملية ..و بعده ما كاعد .. كمت اخلص شغلي بالدائرة و ارجع للبيت اشوف ابوي شيحتاج و اروح لبيت الشيخ

الصراحة وكتها كلش خفت عليه
رجال كلش ما يستحق يتعرض لإي مكروه ، المنطقة كلها تحبه و تحترمه ، كلمته طيبة ويا كل الناس، وواكف للجبير و الصغير

٦ ايام يلا كاعد بالمستشفى ..
بكعدته تعدى مرحلة الخطر .. عاد بشير هنا .. ذبح ٣ خرفان جراية دم عنه، ووزع اللحم.

ورا ٢٢ يوم يلا طلعوا من المستشفى الحمدلله مستقرة حالته ، بس يحتاجله راحة تامة

جان وكتها رمضان لما طلع ، خواته و اخوته جانو موجودين، اني تعذرت ابقى رغم اخته دزت عليه بس عيب هم لمة عائلية عود باجر و امر اتحمدلهم بالسلامة

بقيت مكابلة ابوي و اثار و اسمع الصوت و الهلاهيل و الفرحة بطبته ، و هم ذبحوا على رجله بطبته للبيت سالم ..ووزعولنه لحم و دزولنا فطور

اني و اسامة و اثار صايمين ، بس ابوي لا .. ولو ابوي ماكو لا حركة ولا نفس .. ارفع اوكله، انزله انومه
ووكت تشطيفه اسامة يدخل وياه
تلعب روحي منه، و اصلا اسامة ميقبل احنا ندخل وياه

ثاني يوم الظهر رحت لبيت الشيخ صادق ، جان نايم هو، باركت للحجية و بست راسها ، خطية فرحانة

قبل الفطور بشوية، كمت من مكاني حتى اروح للبيت
طلعت للكراج، صادق صار كبالي لازم جرحه وكوة يمشي ، حجيت :- الحمدلله ع السلامة ان شاءالله تنذكر و ما تنعاد

- هلا بيج عيوني شلونج شلون اخبارج

- والله بالنا يمك كلش قهرنا خبر اصابتك

- الحمدلله على كل حال، وين رايحه ؟

- للبيت

- عيب وكت فطور فوتي

- لا تسلم ابوي مناكه محد اله تعرف

- اخذي فطورج وياج ، علياااااا

صاحت :- ها خوية ها

- فطور لام اثار لا تخليها تروح هيج

بقيت ارفض منهم و اكلهم ما احتاج بس هم اصروا، سوولي صينية و مرتضى وصلي إياها للبيت

بعد ٣ ايام، الخوات كل وحدة راحت لبيت رجلها و فضى البيت مالتهم ، اخوانه يجونه عصريات
رقية امتحانات سادس بعز رمضان .. و ملتهيه بالقراية فوك ما تنزل

مريت عليهم ورى الظهر كلت اسلم عليهم و اشوفهم اذا محتاجين شي او فطور، فتت للبيت، باب الإستقبال جان موجود

شفت الشيخ لازم صدره و مدنكة متوجع ، دكيت الباب :- مرحبا ، تحتاج شي ؟

اشرلي تعاي، اجيت يمه ، انطاني ايده و حجه بوجه :- بس كوميني

تقربت من عنده و سندته ، جان يكول:-لا لا وخري ميجوز حرمة شرعية

ابتعدت من عنده، صاح :- اااااااااااااااااااخ

لزمته :- شيخ بس اكعد، ارجع اكعد

- اديج يمعودة خربتيهااا

-اي بس اكعد

- الكعدة اذتني، اريد اكوم

كومته و هو يصيح حرمة شرعية ، نفرت منه :- اي دخيل بختك يا شيخ متغزله بيك اني و طرشتني بحرمة شرعية غير اساعدك

ابتسم، كومته، رجله جانت كلش مأذيته ، و الكعدة مأذيته، و يلوب لا يكدر يكعد و لا يكدر ينام ، كال :- ولو اتعبج بس جيبيلي علاجي

جبتله علاجه و انطيته المسكنات، رجع كعد، كلت :- هسه متأذي ؟

- اني من زمان متأذي، ما الي مرة الداريني بالله بربج هاي حالة

- ابتسمت

ابتسم هو و يكول :- اي اضحكي يابه اشعليج انت

- اروح اشوف الحجية ، لإن اذا طولت اكثر تكبر الحرمة الشرعية.

ابتسم و هو يكول :- استغفرك اللهي و اتوب اليك

رحت للحجية سلمت عليها ، و شفتها شتحتاج، وكفت بالمطبخ ، طلعت دجاجة كصصتها و خليتها ع النار و سويت الهم تمن و الشوربة خليتها تفور

اجا الشيخ يتمشى :- لا اتعبين نفسج ام اثار هسه اني ادز مرتضى يجيب اكل من برا

- لا حطيته ع النار وراح اوصي رقية عليه

- شوكت تتكرمين و اديرين هذا البيت وراعي البيت

- الاكل تقريبا استوى ، راح اصعد لرقية اوصيها تنزل يمك و تكمل الباقي

عفته و طلعت و هو يتنهد وراي

وصيت رقية و طلعت من البيت، بقيت افكر بيه و بتصرفاته و ردات فعله .. وارجع اهز راسي ..
لا .. ربي ابعد هالافكار عني
غير خالد كلبي لا يهوى و لا يريد ما اكدر

بالليل .. اجا مرتضى و جايب النا ماعون بقلاوة و كال :-هاي ابوي دزها و يكول اقروا الفاتحة بثواب الإمام علي

- كلت اله مشكور

شويه و دزلي رسالة :- وصلتكم البقلاوة ؟

- اي

- بنت الناس رديلي جواب، متت و عدلت و اني الكلمة ما سامعها منج

- جواب شنو

- اني كلت الج سابقا رايدج و ما رايد اتمناج بالحرام ، حرام عليه رايدج حلال

- اني ما ارهم اصير زوجة

- شنو البيج ما يرهم شو بنية و ما شالله عليج

-ما ارهم

- اعتبره هذا جواب ؟

ما جاوبته .. عفته
ليش ما اعرف، ما جاوبته وبس

ثاني يوم العصر .. اندكت الباب
كمت من مكاني .. فتحت الباب ، جان تطلع امي كبالي

ميعاد :- هلووووووو اني اجيييت.....

☆☆☆☆☆☆☆

#اتمنى_ان_افعلها

الحلقة_58

السند ( رب )
و كل من على الأرض وحوش 🖤

..........

... عودة في الزمن ...
... بغداد_الدورة_عام 1990 ...

مكان نفايات و زبالة يطلع منها صوت طفل يبجي بقوة، ليل و ظلمة ومحد بالشارع و الدنيا جانت اواخر شهر اذار، الجو بالليل بارد و الطفل يبجي بصوت واضح

... مر رجال جان شبه سكران، جان راجع من أحدى المقاهي و النوادي الليلية و راجع بالليل للبيت
...سمع صوت الطفل

وكف يستمع :- اكو طفل لو اني كمت اخربط
ركز ..... اي والله صوت طفل
تقرب من الزبالة ، جانت اكو طفل يبجي بقوة

بعدت من عنده الورق اللي مطاير عليه و الزبالة، شلته و هو غاص بالبجي، باوعت يمنى يسرة محد بالشارع
ردت اروح اقدمه للشرطة، بس اخاف من الحزبية ياخذوني، فراري و شارد من الجيش و اتختل ليلية اطلع حتى ما يكمشوني.

ردت اشمره للطفل و اشرد، بس الوكت متأخر و بارد و هذا طفل .. خطية احتمال لو يبقى بهذا الجو يموت ، شلت الطفل و اخذته للبيت

دخلت البيت كله نايم، العائلة بس امي و ابوي و اخوي الجبير و مرته و اني، على صوت الطفل كعدت امي :- شنو هذا ولك

- طفل لكيته بالزبالة مشمور خطية

- صخام الصخم راسك و احنا شعلينا بيه شنو تريد تبلينا ولك، منين ما جبته ترجع

- وين ارجعه والله الجو بارد بره، اخذي هاج شوفي شتسوين بيه سوي

- ولك ماهر وين رايح تعال .. ماهر ، عزا العزاك كون .. بالله منين اجتنا هاي المصيبة ، اش حبيبي اشش انوب مصخن ياربي

نزلت مرت ابني :- شنو هذا الطفل اليبجي عمة ؟

- اندري منين جابه النا ماهر، خطية مصخن انوب جيسي حرارته شوفي

- اي خطية مصخن، عندي علاج مال خافض حرارة جيبي اشربه

- اخذي و اني الصبح اودي للشرطة و نبلغ عنه

اخذت الطفل كلش صغير عمره مال يوم واحد يومين هيج شي، يمكن نغل و امه شمرته حتى ما تبتلي بيه، الله لا ينطيهن طفل هلكدة و يشمرنه.

بدلت الطفل .. طلعت بنية مو ولد .. خطية شكد وشمروج شجابج لهالدنيا ما تكليلي ..

لفينا الطفلة و رضعناها حليب ممة من مالت ابني و نامت، عود باجر للصبح نشوف شلون نتخلص من المصيبة الجابها ماهر

....ثاني يوم .. بنت هاي العائلة اجتهم من الصبح مسيرة، طالع رجلها للجيش و هي اجت يم اهلها
.. هذه البنية ما يصير عدها اطفال .. ورجلها يريد يتزوج عليها لإن ما تخلف، و هي مقررة لو تزوج تطلك من عنده ولا تظل بذلة الضرة و تشوف الضرة و جهالها، وهي بوحدها محد الها

دخلت لبيت اهلها .. حتى تشكي لامها همومها .. تفاجئت اكو طفلة ابيت اهلها

- يمه مني هاي الطفلة ؟

- مصيبة و جابها على راسنا ماهر

- منين جابها

- من الزباله منين يعني

- صخام بوجه ياهو هذا الشامر ضناه بالزبالة، ناس تتحسر ع الطفل و ناس تشمر

- تلكينها بت وحدة بت ليل حبلانة و ما تريد تتورط بطفل و شنرتها هن ذن دين مدينة وحتى يخافن ربهن بطفلة

- يمة شو تعلق كلبي بهالطفلة

- لا تعلق ولا تعلقتي خليني اخذها واوديها للزبالة

- ما راح يكلولج منين جبتيها ؟

- اكلهم من الزبالة

- و شلون لو كالولج دلينا

- عزا و صخام براسك يماهر، كومي كعدي اخوج خل يدليني وين لكاها حتى ارجعها

- يمة خليني اخذها الي، اذا هي مشمورة لو اهلها يردونها ما شمروها، يمكن الله دزها الي

- شدزها الج انت هاي ورطة و مسؤلية استري علينا

- عليج الله يمة انت مو ما تريديني اطلك من هادي، اخذ الطفلة التهي بيها و خلي يتزوج ما الزمه

- انت صاحية

- اذا وديتيها راح يشمروها بالميتم، خليها الية يمه الله عليج

- انوب انت منين طلعتيلي

- اني اداريها والله

...اصريت الا اخذ الطفلة، هي طفل ما الها ذنب بذنوب اهلها، اخذها عندي و اربيها على اديه
من الفرحة لبست عباتي و طلعت للسوك اشتريتلها هدوم و حليب وممه ع الاكدر عليه و رجعت للبيت
وتشكلت بركبة اهل الا توافقون اخذها

وافقوا بشرط رجلي يقبل، انتظرت رجلي لما نزل من الجيش وكلتله على الطفلة، اول بداية ما رضى و كام يحجي ولا تجيبيلنا بلوة و ما النا علاقة

كمت ابجي و اكله :- انت حقك ما يهمك تريد تتزوج و تخلف ويصيرولك جهال و تفرح بيهم، ما تفكر لو تزوجت اني شنو حالي شظل لا طفل ولا ونيس على الاقل خلي هاي الطفلة تونسني و انت تزوج ما امنعك

هو من سمع هيج ووافقت على زواجه، لان .. ايام و اتقبل الموضوع و خلاها عندي .. سميتها (خديجة ) حبيبتها و اعتنيت بيها و صارت بعز روحي
كل دلالي الها وروحي بيها

تزوج هو و صار عنده جهال، بس يحبها لخديجة لأن هي اول طفل جانت النا بالبيت، و هي فرهه تضحك للهوى ، و هو صار عنده ٢ ولد .. و البنية حيالة مو مثل الولد، صح ولده يحبهم اكثر، بس هاي الطفله دوم يضحك الها

كبرت و هي بغرفتي و بين ادية، مشينا بمعاملتها و سجلناها بأسمنا، و دخلت مدرسة و جنت كلشي عدي الها، اهتميت بيها اهتمام ما صاير
كبرت الطفلة .. و صار عمرها ١٢ سنة
و هي ما تعرف حقيقتها .. كله تصيحلي ماما و تصيح لرجلي بابا

الى ان اجا اليوم لللي اتمرضت بيه !

خديجة :- جنت اني اكثر وحدة مدلله بالعائلة، ابوي متزوج و عنده خمس جهال ٣ ولد و اثنين بنات من مرته الثانية، و بس اني لأمي، اخواني ما مدللين بكدي، لأن هم هواي ، و اني وحيدة امي المدلله ، المحد يطخني الما تقبل احد يصيح عليه او يضوجني و شريد مدلله

.. مرت ابوي جانت تكرهني حيل و ما جنت اعرف ليش جانت تسميني ( اللقيطة النغلة ) و هواي جانت تفشر عليه بس امي تردها

لحد ما تمرضت امي صار عدها سل رئوي و اكتشفته متأخر جانت تكح و تاخذ شراب مال كحة كل ضنها عدها كحة الى ان راحت للدكتور و صار يلومها لإن ممراجعة على حالتها

صارت حالة امي تسوء يوم بعد يوم ، الى ان صحيت بيوم على صوت الصراخ، .. العرفته ماتت امي
حيل انقهرت وبجيت و انعزلت و حتى حاولت اموت بس ما متت .. كلش كرهت الحياة من بعد امي

بقيت عايشة ابيت ابوي، بس مرت ابوي كلش ما تحبني و اخوتي كبل جان يغارون مني لإن مدللة اليوم كلهم يكرهوني، و ما عدت مدلله ، ولا الي ام بعد و ادافعلي و تردهم عني

بطلتني مرت ابوي من المدرسة و اني ما مخلصة صف سادس ابتدائي و بقتني لشغل البيت و قنعت ابوي و هي تكله ( العرج دساس ما تعرف اهلها منو وتخليها تكمل و تروح تجيبلك مصيبة استر عليها و كعدها بالبيت)

ما جنت اعرف شتقصد اهلها منو و من اسمعها ادوخ ، و ما اعرف احل السالفة .. امي ماتت شنو ما تعرف اهلي

.. الى ان وعيت ع الحقيقة و عرفت اللي ماتت مو امي، و انما وحدة ربتني، و اني لكاني خالي ماهر الله يرحمه بالشارع مشمورة و جابني لبيت جدي

خالي توفى بحرب الكويت ..
و بيبي توفت، بقى جدي و بيت خالي كطعوا علاقتهم بيه لما ماتت امي، الظاهر جانو يتقبلوني على مود امي من ماتت نكروني

بقيت جوا ايد مرت ابوي، شفت على ايدها انواع العذاب .. شغل و تركيب كله مشكل براسي، حتى لو اجا احد و خطبني ما تنطيني، تريدني لخدمتها

حبيت واحد جيرانه اسمه (مروان) جان دوم من اصعد ارش السطح و انام اشوفه على سطحهم ، كم مرة دربلي رسالة و جنت اطير من الفرح لو وصلني شي منه

وراها كام جابلي مبايل صغير و خلاه عندي و كمت اخابره بليل بدون ما احد يدري، جان وكتها توه نازل المبايل يمكن ٢٠٠٤

جان عجبه عدي المبايل و كلش فرحانه بية بس اضمه بصدري و الشاحنه ماته اضمها بين الغراض الهوسة الفوك حتى محد ينتبه الها وبالنهار بحجة اصعد انظف اشحنه ليما يقبط اشيل الشاحنة اضمها و ارجع الموبايل بصدري

لحد ما اكتشفتني مرت ابوي فد يوم ..
جانت هاي فرصتها، ما وفرت فرصة بسرعة صاحت لابوي و كالتله (تعال شوف هاي الملفيها ابيتك )

بيومها ابوي كتلني و اذاني وحلف اول واحد يجي يخطبني ينطيني اله و يخلص مني

ايامها جانت اصعب ايام تمر عليه، اتمنيت بس الزم مبايل و اخابر مروان و اكله اهلي عرفوا تعال اخطبني

.. كدرت احصل مبايل ابوي بالليل، رحت للتواليت ب٣ بليل، خابرته و كعدت اهمس .. و حجيت ويا وكتله ( اهلي عرفوا تعال اخطبني )

كال (بس اني هسه ما اكدر، ما عندي شغل و اهلي ما عدهم مكان يزوجوني )

- بس انت كلتلي اتزوجج ووعدتني ؟

- اي بس مو هسه فد سنة سنتين ياله

- ما اكدر اهلي يريدون يزوجوني

- انت تستاهلين الأحسن مني، اذا اجاج واحد زين اتزوجي اني ما اوكف بطريقج، اهم شي عدي سعادتج حتى لو عفتيني.

- كمت ابجي و اكله بس اخطبني و حتى لو نبقى سنين بس اخطب ..

ما قبل ، ما طولت بالاتصال اخاف اهلي يكعدون
بس بقيت الليل كله ابجي ، خابرته ثاني يوم ما رد عليه

ظليت مكفخة لمرت ابوي و اخواني و حتى ابوي اذا جان شوية يحبني كام كلش ما يحبني، لحد ما زوجوني لواحد يشتغل عامل بالمولدة

جان مو كل ايام الله عنده سوه، يوم عدل و عشرة ايام يمطر فوك راسي، عشت وياه على الحلوة و المرة و خلفت منه ٣ جهال و كطعت ..
جنت انضرب و انطرد و ارجع اله على مود جهال
و شايله بيت اهله على راسي
هو يعرف من مرت ابوي اني لقيطة فما يحترمني
حتى على فراشي جان يجيب نسوان و اسكت لان ما الي مكان اروحله حتى اخلص منه

حتى ما يقبل يحط بيدي مبايل لأن سمع من مرت ابوي جنت مصاحبة ولد
من اطلب مبايل يكلي (شتسوين بيت حتى ما عدج اهل و تخابرينهم لو رايده ترجعين لصاحبج تخابرينه )
حتى لو تكله اني اجمع و اشتري ما يقبل

الى ان وبعد عشرة ١٢ سنة وياه ع الحلوة و المرة تعرف على بنية و حباها ، البنية حلوة و ما متزوجة و اهلها حالتهم زينة بس ما تقبل بيه لأن متزوج ، شرطت عليه يطلكني يلا ياخذها

بقيت اتوسل بيه .. حتى لو يتزوج موافقة
بس هي شرطت ما تريدني ، حتى بيها توسلت، تكول (اني احبه ما اكدر اشوفج مشاركتني بيه ما اقبل لو اعوفه الج لو تعوفينه الي ) و هو مختارها و يريدها

اضطريت اروح اخذ جهالي و اروح لبيت ابوي، بس مرت ابوي ما رضت بجيتي، و رجلي اتزوج و ذبني اني و جهاله ، احتاريت شلون اسد لكمتي و لكمت جهالي

لا الي اهل و اروح الهم ولا عندي بخت و احضالي برجال زين يلمني ، كمت اشتغل ابيع كلنكس بالشارع حتى اعيش جهالي ابيت ابوي لأن محد ينطيني ، و حتى لو ابوي حن مرة و خلى الف بيد واحد من جهالي من يطلع مرت ابوي تاخذها منهم

ضاكت الدنيا بيا، كل اليتقدم و يعرف عدي ٣ جهال يشرد مني و ما يقبل و جهالي بعز روحي ما اكدر انطيهم لابوهم و اخليهم يشوفون قسوة مرت الاب اللي اني شفتها

قسمت على روحي عسى ما انام بالشارع و اموت اني وياهم ما اعوفهم

يوم على يوم الدنيا تصعب و العيشة تضيك
الى ان بيوم حماي اخو طليقي ، شافني اني و ابني وياي نبيع كلنكس على السيارات ..

تخبل اخذ الجهال من اديه و صعدهم وياه بالسيارة
كمت اتصايح وياه اعيط ما رضى يبقيهم عندي
كتله لو تاخذني وياهم لو ما تاخذهم
اخذهم و ما قبل ياخذهم
بجيت ملخت روحي ما فاد

وبعدين قنعت روحي بروحي و كلت خل اتحمل هالفترة على فراكهم الى ان اكدر اأمن الهم مكان حتى لو اشتري من ابوي غرفة و اعزلها و اعيش اني وياهم
كلشي ما عندي ولا فلس بس جنت اتأمل رحمة الله يساعدني و الكالي شغله و اكدر ارجع جهالي بعدها

بس ايامي تزيد عليه ما تنقص
وفراك جهالي كسر ظهري، كل ما التفت اسمع اصواتهم ، مرات و اني كاعدة اصيح ( اكعد ولك ) و انتبه هم مو يمي .. و ابقى ابجي و اندب بروحي لحد ما افحط

كسر ظهري فراكهم .. كعدت ويا روحي و كمت الوم على امي الخلفتني و اكول :- ما تريديني ليش جبتيني ؟ ليش خليتيني اكبر ابطنج ؟ جان و اني طفلة و موتيني

بقيت الوم بيها و ابجي و احجي ويا روحي
الى ان صفنت ويا روحي و كلت :- اني منو كال امي شامرتني و منو كال امي هرمت بيه و ذبتني يمكن عداوة يمكن بايكيني منها ، يمكن عدي اهل ؟

ما ادري ليش انخلقلي امل رغم اني اعرف ما الي كل امل .. و هالموضوع عقيم .. مرت ٢٦ سنة على الحادثة وين الكاهم ؟

بس كلت بروحي ما خسرانه شي، كل انسان يحن لاصله حتى لو اعرف اصلي منين كافي ، رجعت لبيت جدي و توسلت حدي و خالي يدلوني ع المكان اللي لكاني بيه خالي ماهر

و بالفعل دلوني على المكان، بس هالمكان ما عاد زبالة، شارع عام و منظف .. بقيت اباوع بالشارع وين الكاهم اني مخبل و افكر الكا اهلي ، وين الكاهم

مر رجال حجي جبير كال ( رايده شي بنيتي )
سولفتله سالفتي، شو هءا هم صفن وياي، و خطية حيل انقهر عليه، و كال خل اخذج لمختار المحلة و نسأله
اسمه (ابو عمر ) يمكن اهلج راجعيله يمكن احد جاي يمه و سائله عليه بوكتها .. او يعرف احد

كلتله : حجي السالفة صارلها ٢٦ سنة وين الكاهم بعد

كال :- الأمل باللة بنيتي ان صعبت عل. ابنادم ما تصعب على ربج ادعي و الله كريم

اخذني ووداني للمختار .. حجالة سالفتي ، المختار كاله :-والله يابه كلي شتغديت البارحة اكلك نسيت تريدني اتذكر حادثة فقدان طفلة قبل ٢٦ سنة

اني كعدت ابيت المختار من لا جارة بقيت ابجي و اشكيله حالي و الصار بيه .. حيل انقهر عليه

كال :- روحي و خلي رقمج يمي و اني كل اليمر عليه اكله على سالفتج بلكت الله و يطلع احد مضيع بنية ولو يا بنيتي السالفة قديمة حيل بس اني لخاطرج عسى ولعل حتى لو بس نعرف اصلج

بقى هذا المختار كل ما تصير لمة و ناس تلتم يمه يسولفلهم هاي السالفه بلكي الله و يطلعولي اهل

.......

رافد :- السلام عليكم ابو عمر

- اهلا وعليكم السلام ابو مهيمن شلونك شلون الصحة

- نحمده و نشكره

- الوالد شلونه ؟

- والله على وضعه

- اخوك ما لكيتوله اثر

- لا والله يا ابو عمر جن الكاع انشكت وبلعته احتارينه وين ندور و نلكاه

- يكولون اكو سجون لداعش سرية بالمناطق الجاي يحررونها

- نتأمل لليوم ندور والله وماكو

- ان شاءالله خير

ابو سيف:- اي ابو عمر كمل سالفة هاي البنية

ابو عمر :- مرت ابوها مو زينه وياها و اني جاي ادورلي رجال نشمي يتزوجها لأن هي ما الها احد

رافد :- منو هاي

- والله يا ابو مهيمن هاي سالفتها سالفة كاسرة خاطري جنت اسولف لعمك ابو سيف، اهلها من المستحيل نلكاهم بس اني رايدلها رجال اليتزوجها

- ليش اهلها وين

- اهلها شامرينها بالزبالة من ال٩٠ و ماخذيها ناس مربينها

- هاي وين ؟

- السالفة قديمة اكلك من التسعين بمنطقتنا مشمورة بالزبالة ولاكينها ناس

- بمنطقتنا يعني ؟

- اي

.... ها ابو مهيمن شو صفنت ؟

- والله جني اعرف هيج حادثة ، يعني هم قديمة بس بيا سنة ما اعرف

- شنو هي ؟

- تعرف اسماعيل السكران الجان بالفرع البيه سلمان المرعوص

- ابو اسامة البعدين كالو عنه صار ويا القاعدة ..

- اي اي هو

- شبيه ؟

- عنده بنية شامرها بالزبلة ، من جابت مرته و هو سكران و يريد ولد و خلفتها بنية شمرها بالزبالة
الأم .. جانت زوجتي السابقة هسه هي عايشة بأستراليا

- تحجي صدك

- بالله العظيم، بس ما ادري بيا سنة

- هيج وربك يسويها ؟

ابو سيف :- سبحان الله

- زين تعرف وينهم ؟

- لا والله ، الادري بتها عايشة هنا بس ما اندلها وين ، بس امها ادري بيها بأستراليا ، اعرف صفحتها على الانستكرام احاجيها

- ياريت والله بجاه النبي الاعظم يا ربي كون تطلع هي و ترجع البنية لاهلها لأن من صدك تكسر الخاطر

- لا نتأمل ولا تخابرها، خلي بالاول نحجي ويا الام نشوف الموضوع و نتاكد منه و الله كريم

بقينا نحجي بموضوعها و يحجيلي عنها،
رجعت للبيت ، فتحت انستكرام راسلت ميعاد

( هلو ميعاد اني رافد ، عندي موضوع وياج مهم ولازم تجاوبيني )

لساعتين ردت ( ما بيناتنا شي مهم لا تبقى تحاول رافد تزوجت و خلصنا )

- مو هيج الموضوع، جاي اسألج على طفلة انشمرت بالزبالة بمنطقتنا

- شنو تسألني ؟ مفتهمت

- مو اتذكر عدج بت شامرها اسماعيل ؟

- اي

- شمرها بيا سنة

- ب٩٠

- بيا شهر ؟

- ٢٧/٣ .. اذار .. اكو شي رافد

- اكو بنية بهيج مواصفات اجت للمختار تسأل عن اهلها

- وينها هاي البنية

- البنية حالها بس الله يعلم بيه و من شلت حالها اضطرت ادور اهلها عسى ولعل تلكه عدها اهل

- انت تحجي صدك لو جاي توهمني؟

- والله العظيم ما جاي اجذب

- حيلي كله ديرجف رافد، شسويت بيه معقوله الكا بتي بعد كل هالسنين

- ما متأكد .. بس نكول يارب

- اني هاليومين لازم اجي بغداد، لازم اجي و اعرف الموضوع بنفسي

- تعاي بس لا تتأملين بالموضوع هواي، هو مجرد تخمين لا اكثر

- وين الله بجاه النبي تطلع بني و ترجعلي ، دخيلك ربي صدك عود بعد كل هالسنوات تستجابلي و ترجعها اليه ما اصدك

.... طار كلبي لما عرفت اكو بنية هيج مواصفاتها و ادور على اهلها .. رافد مراسل المختار و سائل عن الموضوع ، البنية طلعت مشمورة بشهر الثالث يعني احتمال جبير هي

ما كلت لديار اني راح اجي ..
سويتها الها مفاجئة هي و اثار اعرفهم مشتاقيلي هواي صار ٣ سنوات من افترقنا و سافرت .. من يشوفوني اكيد راح يطيرون بفرحتهم

خلال ايام سافرت للعراق، عفت سليم رجلي و رجعت لبغداد ، وصلت المنطقة بغداد الجديدة، اني ادري ديار كايلتي على اقرب نقطة دالة .. دوم تحجيلي على مول تروحله

من وصلت للمول، دورت اسم محل موبايلات اسامة اسمه ( الملكي) كمت ادور بالأسماء كلت اذا ما لكيت وكتها اخابر ديار، بس لازم اسعى حتى اسويلهن المفاجئة

دورت بألاسماء والله ولكيت محل مكتوب جوه بالهامش اسامة اسماعيل و مرتضى صادق، هو هذا المحل مالت ابني

.. باوعته المحل معزل ، سألت الولد ابو الاسواق كلت اله :- صاحب هالمحل تندل بيته ؟

- اي ابن الشيخ يصيرون بذاك الفرع مو الاول الثاني، بس دخلي و اسألي وين بيت الشيخ بساع يدلونج ، ابن الشيخ و صديقه يشتغلون بيه

- اشكرك

مشيت الدنيا ظهر حارة يربي صار ٣ سنوات ما شايفة هيج حر اب يكتل حر .. دخلت الفرع ولا احد طالع، شنو فرع لو مال موته .. ولا نفر
ولو حقهم الجو يكتل

مر واحد صف اباب بيت، سألته :- بيت الشيخ صادق وين ؟

- تشوفين ذاك البيت ابو العمدان المذهبه ؟

- اي

- هو هذا بيته، مصوب هو هسه موجود بالبيت البترحة اني يمه

- اشكرك جدا، المشتمل مالته وينه ؟

- هذا اللي على ايدج اليسرى

- اوووكي ، ثانكيو

مشيت للبيت فرحانه، دكيت باب المشتمل، فتحتلي ديتر كلت الها :- هلووووووووو اني اجيت

- مااااااااااااامااا

- حبيبت ماما انت

حضنتني بسرعة بجت، دموعي نزلو وياها :- يروحي انت يروحي فدوة اروح لريحتج حبيبتي، شصايرة يعيني تخبلين اووووف اشوووو

- مشتاقتلج هواي
حجتها وبجت

- حبيبتي

اثار :- مااااااااااما

ديار :- ابتعدت امسح بدموعي و اشيل من ايدها الجنطة، كمزت اثار الحضنها ما تحجي بس تبجي بصوت عالي عفت الجنطة و حضنتهم

نزل اسامة على الصوت، باوعها ابتسم، راح سلم عليها ، حضنته :- صاير اطول مني يبعد عمري ، صار رجال ابني

ديار :- فوتي فوتي حارة

- حارة شنو كولي معت، يااااايمة فلك مو حر ، بس اني ابالي اروح لشيك لمفتي لازم

- ليش ؟

- اكله اهل العراق هم يخشون النار ، اذا الله مسلوعهم بهالحر بالدنيا انوب يدخلون جهنم ، اووو يحظهم

- بروفا ماما بروفاا ديسويلنا حتى لا ننصدم بجهنم

- اذا هيج زين، اووووع شنو هالخنزير ، او لا هلا .. ها اسماعيل دودة تاليتك هناك .. ولدي يتلطفون عليك، ولا استخطيك يالنذل

- عوفي ماما ، اكعدي ارتاحي

- شلونكم شخباركم

- عال العال ، بس كليلي شلون وصلتي لبيتنا شلون اندليتي

- اكو شي يصعب على امج ؟

-لا والله

اسامة :- متغدية

- اني من اشوف طولك اشبع ييمه شوكت هيج صرت شاب حلو و تخبل

ابتسم .. باوعتلها :- ما صايمة انت مو ؟

- لا صايمة لأن زيارتي اكثر من ١٠ ايام فلازم اصوم

- الله وملتزمة صوم و صلاة ااااالعب

- كبرنا خوما نكضي العمر بس لعب، طلابة و هو شهر هم رجيم و هم صحة بس شنو متت تعب ، دليني الحمام

كمت وديتها الحمام و كلت الها :- اسبحي و راح اطلعلج ثوب خفيف من يمي

سبحت و نامت للفطور سويت اشكال و انواع و طلعت صينية لبيت الشيخ بثواب سلمان
سبحتن الله مها شكد عزيزة علية ووكت لما اريد اطلع ثواب من جدري و انطي ما يجي ابالي غير سلمان كلها تغيب من راسي .. مرات اذكر مها و مهند بس جذب مثل سلمان بكل ثواب ذاكرته
اكول يمكن لأن ما اله اهل يثوبوله الله حاطه براسي و اثوبله .. الله اعلم

كعدت امي المغرب ع الفطور مسوية سفرة شكبرها .. طلعت و ثوبها قصير و احمر و شعرها على اجتافها، عفت من ايدي و حضنتها
شكد مشتاقة لريحتها لنعومة جسمها لحضنها ..
باستني .. باوعتله

:- اكلج ماما صدك ترا ابويه محرم عليج يعني ميصير تلبسين كدامه هيج و انت صايمة

- ليش هو ابوج ينحسب ع الزلم و يتحرم عليه، كلاب الدنيا اي والله، صبييي متت من الجوع

كعدت ع السفرة، و اني رفعت ابوي من السرير كعدته، خليت بأيدي الشوربه و كمت اوكله ، ايده يكدر يرفع و يشيل بيها بس ترجف لما ياكل يدمر روحه لا يبقى وجه لا فراش لا ملابس ما يدمرها فاني اوكله

امي باوعتله :- حطيله سم مو توكلينه

- الله يجازي امي

دك المدفع .. اكلنا
وره شوية كملت امي طلعت للكراج جاي تغسل .. وسمعنا صوت الشيخ صادق ( ان الله و ملائكته يصلون على النبي يا ايها الذين امنوا صلوا عليه و سلموا تسليما )

ميعاد :- منو هذا ؟

- الشيخ صادق اذن

- هذا الخطبج

- اي

- صوته حلو

- اي هو دائما يأذن من هو موجود حتى لو اكو جامع، يكسب اجر الاذان

- الله ينطي العافية ان شاءالله

- اجيتي زيارة لو شغل ؟

- اجيت على مود شغلة مهمة

- شنو هي

دخلت اني وياها وكفنا نغسل و هي تسولفلي ، على سالفة البنية اللي لاكيها رافد

- معقوله يعني هيج و تطلع اختي الشمرها ابوي ؟

- وين الله وصدك

- وشلون يتأكدون

- غير اشوفها اول و نسوي تحليل ياله

- جان كلتيلي منا اني اروح اشوفها و ابوي موجود و احنا موجودين و نسوي تحليل حمض نووي و نشوف

- واصبر غير من عرفت طار كلبي، بس ما اريد اكبر الموضوع لازم اتاكد منه يله

- هيج و تطلع هي يا ربي

- ان شاءالله ربي

- نروحلها باجر ؟

- ان شاءالله

.. كعدنا ثاني يوم اخذت امي ورحنا اني وياها لبيت الشيخ، جانت امي متفقة ويا رافد، من وصلنا هو ورانا بخمس دقايق وصل النا

من شفته دمعت عيوني .. صار قرابة السنتين ما شايفته بس كل يوم اباوع بصور خالد كبل لا انام، من شفت رافد كمت اشوف خالد بوجهه
كمت ادور ملامحه بملامح اخوه
الدم .. دورة الوجه الشعر الطول
كلهم خالد

دنكت و بجيت بسرعة ما تحملت ، هو يسلم على امي و استغربني لما بجيت ، حجه :- اكو شي ؟

باوعته، ادور خالد بوجه ، حتى الصوت بيه من خالد
ابو عمر وكف، يسأل .. امي حجت :- رافد بيه شبه من المفقود خالد يمكن شبهت و اتذكرت

بقوا يباوعون ما حجو، ابو عمر استقبل امي بالبيت، دخلت وياها و اني عيني برافد .. احس روحي اشتعلت ووصلت لركبتي تريد تطلع .. اختنكت حيل
من اشوف رافد يشتعل كل ذاك الحب و الاشتياق المضموم بداخلي لخالد

بقوا يحجون ابو عمر و امي، و اني ضاع عقلي كله التهى بخالد .. كل جرح فز بيه هسه بشوفة اخوه

رغم جنت اشوفه قبل بس من ابتعدت اسنين ورجعت صرت اشوفه يختلف ، نسخه من اخوه خالد ، الفرق رافد اشكر خالد شعره و لحيته اسود مو اشكر بس ابيض

كاموا، ابو عمر يندل المنطقة البيها بيت البنية، كال خل اخذكم الها ، تشوفونها و تشوفكم ، اذا اكو صلة قرابة لابد يطلع شبه ، صوت ملامح .. واذا ماكو نقدم على تحليل DNA مال الحمض النووي الجيني

رحنا، ابو عمر ورافد بسيارة و اني و امي بسيارتنا، وصلنا هناك، خابر هو ، دلوه البيت بالضبط

نزلنا، البنية جانت واكفة بالباب تنتظر ، بس صفت سيارتنا، كامت تباوع بوجهنا و تبجي ، امي نزلت بسرعة من السيارة

طفيت و نزلت، سبحان الله اسامه ولابس حجاب، امي مدت الها اديها ، ذيج اجت حضنتها و كامت تبجي بصوت عالي

وكفت ، بأيدي مفاتيح سيارتي، ومتجنبه ما تقربت بس اباوعها ، معقولة يعني ، هي ؟ حتى ما بجيت، لأن خلصت ادموعي سلفنا على خالد، و التساؤل بداخلي جان اكبر من انو ابجي .. ما معقوله بعد كل هالسنوات .. هيج بهالسهولة ترجع ؟

ابتعدت امي، حجه رافد :- البنية تشبه ديار و اسامة حيل تنطيهم شبه

ميعاد :- بتي ، كلبي يكلي هي هاي بتي ، والله هي

خديجة :- يعني انت امي الحقيقية ؟
حجتها و هي كوة تنطق و هي تشهك

ابو عمر :- نسوي التحليل اول، يلا نتاكد

باوعتلي هي ، حجه رافد :- ديار تصير بنت ميعاد اللي هي ان شاءالله امج، وديار اختج

طلعت مرة من البيت كالت الها :- ابوج من يجي و يعرف بته واكفه ويا الزلم بالباب يكسر ظهرج فوتي جوا يلا

ميعاد :- ما الها فوته جوا البنية تروح وياي

- و انت منو

- ميخصج ، خليج بحنيتج حبيبتي، يلا عيني البسي حتى تروحين ويانا

ديار :- مو نتأكد الاول ؟ يعني مو كال هي ؟

ميعاد :- هي .. البسي و تعاي ويانا

حجت مرت الاب:- ما الها طلعة ابو ما يقبل

ميعاد :- ابوها ذاك مطمور بالبيت ، و العندج خلي الج

حجت :- خديجة لو طلعتي غراضج تتشمر بالشارع

سكتت هي، امي حجت :- و شمرتهم عايزة بيتج اني ، بيتي بأستراليا يسواج و يسوى بيتج

خديجة :- يعني صدك اني مو بحلم، انت امي ؟

ميعاد :- ان شاءالله ، يلا اخذي البي تحتاجي و تعالي وياي

ديار :- ما ادري ليش جان ردة فعلي باردة لدرجة البنت خطية حست انو اني ما رايدتها، بس بالحقيقة انو ما اريدعا، ما مصدكة الموضوع حقيقي، شنو بين ليلة ويوم تطلع بنية ما اعرفها و تكول اني اختج
معقوله بهالسهولة تنلكي اختي اللي ضاعت قبل ٢٦ سنة

.. هي اكبر مني اني مواليد 1992
اخذت الها علاكة و لبست عبايتها و صعدت ويانا بالسيارة ورا، امي سلمت على ابو عمر و غلست على رافد .. و صعدت

اني اباوع البنية من الجام ، شبه بينها و بين اسامة قوي، يربي معقولة هي صدك ؟ العقل ما ديشيلها

كلت الها :- جهالج وين ؟

-عد بيت عمهم

ميعاد :- تريدين نمر ناخذهم

بجت بساع و هي تكللها :- اطبين الجنة بس تشوفيني جهالي والله انكسر ظهري على فراكهم

ميعاد :- تندلين البيت ؟

- اي اندل

- امشي ديار

حركت السيارة، و مشيت دلتني المنطقة، و البيت ..وصلنا فتحت السيارة بلهفة و الدموع مخلوطة بفرحة وجهه و هي ادك الباب، انكسر خاطري عليها

طلع رجال ، نزلت امي، حجت اللي اسمها خديجة :- بس اريد جهالي اشوفهم

باوع لامي :- منو هاي المرة

ميعاد :- تكدر تعتبرني خالتها وراح اخذها ابيتي و الجهال راح يكونون بأمان وياي، مثل مدا تشوف حالتنا زينة و ما راح اخلي الاطفال بالشارع مثل مشفتهم حضرتك

هذا الرجال ابتسم لامي و هو يكللها :- نتشرف بيج ست، تفضلوا جوا

ميعاد :- اشكرك لازم ارجع للبيت ، بغير وقت ان شاءالله

- اي متشرف احنا نتشرف

فات للبيت يصيح الجهال، و خديجة فرحانه و تحضن بأمي، اتراكضولها جهالها ٣ ولد ، اكبرهم عمره ١٠ سنوات اقل من اثار .. بقت تبوس بيهم و تبجي و هم يبجون بحضنها
امي شالت الصغير و خديجة كادت الاثنين ، بقيت افكر ، لمجرد شبه تيقنت امي هاي اختي و جابتهم كلهن ..زين اني ليش ما متقبله الموضوع ؟ بكل الاحوال البنية محتاجة و ما الها احد

اخذتهم ورجعتهم للبيت، ويا ما صفيت السيارة، الشيخ جان بالباب، نزلت امي ، هو حجه :- ها السلام عليكم

ديار :- و عليكم السلام هلا ابو مرتضى

ميعاد :- هلا ومرحبا عيوني، انت الشيخ مو ؟

صادق :- نعم اني، انت امها ان شاءالله، كالي مرتضى البترحة ان الوالدة اجت من استراليا، الحمدلله على سلامتكم يابه

ميعاد :- الله يسلمك عيوني الله يحفظك والله هواي يمدحولي بيك و بعائلتك، من ابنك مرتضى ويا ابني و لحد وكفتكم ووكفة الحجية ويا بنتي .. ما اعرف شلون اشكرك بس تكولك ممنونة منك جدا

- ما يحتاج شكر ديار و اسامة من اهل البيت، و الهم معزة خاصة

ميعاد :- الله يديمها عيوني

ديار :- شلون صار جرحك ؟

- والله للاسوء نتحمل والله كريم ، اذا تكدرين فد شوية تمرين ع الحجية اكون ممنون لأن محتاجتج

- اي هسه امرلها

اشرت لامي يدخلون جوا، و اني طلعت لبيت الشيخ، هو دهل وراي :- ولو ما الي حق اسأل بس البنية الثانية هي و الجهال منو ؟

- والله يا صادق لو احجيلك ما تصدك، شي اغرب من الخيال

- جانبا عن الخيال، اسمي و انت تلفظينه حيل ينحب ياريت بعد تجرديني من الالقاب لما تصيحيني

ابتسمت، و هو ابتسم :- اروح اشوف الوالدة

فتت للحجية، سلمت عليها ، رقية جان عدها امتحان انكليزي و سادس علمي، فما نازله جوا ابد و الحجية خطية باقية

ساعدتها و كومتها للحمام و نظفتلها فراشها و طلعت الها ملابس، غسلت الها و بدلت الها، رفعت اديها و كامت تدعي ( بجاه هذا شهر رمضان يوفقج و ينور دربج يا ربي )

بست راسها (مشكورة حجية انت بمثابة امي )

- الله يحفظج بنيتي

انطيتها العلاج وانطيتها، لكيت الشيخ مخلي لحم ع النار ، حجيت :- انت تطبخ

- اختي راح تجي اليوم بالليل خابرتها

- اخذ راحتك شيخ هسه اني اطبخ ابيتي و ادزلكم ما عندي شي

- لا لا ما يحتاج لا اتعبين نفسج، بس اذا تكدرين ناوشيني الكرسي حتى اكعد

- جرحك مو لازمه طبيب

- سلام راح يجي فد شوية

- اذا تريد اخذك تره ما عندي مانع

- صايرة اطلعين هواي بالسيارة اني مقاربة

- حكت، هو ضحك و بقى يهز راسه ، من انت مراقبني :- وين شفتني اروح ؟

- رحتي السوك الصبح

- مو تسوكت للبيت

- اسامة و مرتضى موجودين

- ميعرفون الاحتاجة بكدي، اني ام البيت

- كولي مليت و اريد اطلع

- شييخ

- اي مو كلتيها صادق ترجعيها شيخ ليش

ضحكت :- زين تكدر تكوم تروح للاستقبال حتى اني اطبخ تعرف حرمة شرعية و هيج امور

- اي حقج يابه، بس تعاي عينيني خل اكوم

- مو هم حرمة شرعية

- دروحي بوية اني ادز من برا شهالطلابه

- ضحكت و كمت ، مديتله ايدي ، خلاها بأيدها، لزمها حيل و كام، لزمت ظهره

- استغفر الله ربي واتوب اليه

- حرمة شرعية مو