#اتمنى_ان_افعلها

الحلقة_53

تمنيت لو ان الحياة عاقبتني بشيء اخر غيرك 🖤

.........

دفعو اثار و اجا واحد حط ايده على حلكي و يحجي و هو خازرني و كال :- راح نطلع لو سمعت نفس واحد ورانا لو صيحتي ، طلقة براس الطفلة و براس اخوج وينتهي امركم

- عمو والله احنا ما نعرف بشي، ابوي يجي ويجون وياه ناس منعرفهم ولا اخوي يعرفهم والله

- شنو شكلهم ذوله الناس

- ما مركزة بيهم اني بس يطلب مني اسوي جاي و اخوي طول الوقت يلعب بموبايله والله عمو

- اخذه

- ابوس ايدك لا ، ابوس ايديكم فدوة

دفعوني من عدهم ، ركضتلي اثار حضنتني، لميتها بحضني، و كمنا نبجي بصوت عالي، اسامة كام يدفع و يصيح بأديهم ضربوه على راسه و سحلوه

نزلنا وراهم اني و اثار، اخاف اصيح و يرجعولنا يكتلونا ، كمت بس اردد ( دخيلك الهي انقذنا ، رببببببببببي)

خلوا اسامة بالسيارة و طلعو، كعدنا بالكراج نصيح و نعيط بوحدنا، واصرخ ( وين اروح الهي وين ارررررروح منو النا و يحمينا، ليش ربي لييييييش والله تعبت تعبت تعبتتتتت)

باوع اثار الخوف بعينها و تصرخ من كل كلبها، كمت من مكاني حتى اطمنها و ابعد منها الخوف، طفلة بهالعمر شءنبها تعيش بهالخوف مسلحين يخلون سلاح براسها و يضربوها

حضنتها و كلت الها :- لا تبجين كافي، امشي كومي خل ناخذ ملابسنا و نروح

حجت و هي تشهك :- خل نرجع لبيت ماما هنا، ديار فدوة ديار

- خل نروح لبيت عمو كومي

اخذتها لبستها هواي ملابس لان بداو اخذت ملابس اليه و الها و غراضنا و كل احتياجاتنا و طلعت بالليل و هي بأيدي، صلاة الصبح بعدها ما صايرة

كمت امشي اني وياها و دموعي تجري، و اهمس بيني و بين نفسي :- وينك خالد والله احتاجك ، احتاج تسندني بالوقت ، تقويني
والله حيل ما ظل بيه

امشي بيها و الهوى عالي بارد كلش كص خشمي، نزلت كبوس الجاكيت مال اثار على راسها و قبطتها حيل، وكفت ع الشارع اريد سيارة تمر ماكو الشارع يصوصي

يا غربتي بذيج اللحظة
احس وحيدة بهذا العالم و ما الي احد
جانت امي و جان خالد منين ما اميل يسندون ظهري
هسه تعبت من الوكفة وحدي
البرد ذبحنا، حسيت اطرافي جمدت ما كمت احس بيهن

كل ربع ساعة يلا تمر سيارة و ما توكف، لساعة و اكثر يلا وكف شاب و نزل الجام :- هلا خوية وين توصلون

- للدورة

- بهالوكت

- مضطرة

- ب١٠

- ميخالف بس وصلنا
صعدت وياه و اني اوصفله كنطقة بيت عمي و شارعهم، مشى هو، الامانه لله جان خوش ولد
شغل النا تدفئة ، و كل شوية من يشوفني ابجي يكلي :- خوية اذا محتاجة شي كولي

- تسلم الله يخليك

اثار لازمة ايدي حيل، حطت راسها عليه و نامت ،اباوع الطريق ، الكلوبات الصفر و الشارع مضوي و فارغ، و السيارة تمشي بسرعة ، و الجام كل شوية يغوش من النفس و امسح بيدي
دموعي ما نشفت من عيني

وصلت لشارع بيت عمي، نزلت بيه طلعت من جيزداني ال١٠ الاف .. كال :- خليها خوية واصلة

- لا تسلم اخوية انت على باب الله

ما راد ياخذها حطيت العشرة يمه ع الكشن ، كعدت اثار و نزلتها وياي ، تمشينا لبيت عمي عماد، وكفت دكيت الباب محد يطلع
نزلت الجنط من ايدي و كمت ادك، محد يسمع .. نايمين
اديه جمدت و اثار تكلي :- ديار راح اموت من البرد

- غير يطلعون نايمين نومة اهل الكهف
بقيت ادك بالباب باثنين ادية بكل قوتي، سمعت صوت واحد يصيح :- اجينه اي اجينه

فتح الباب ولد شاب يطلع اكبر من اسامة،عرفته من الملامح ابن عمي اسمه ( محمد) باوعلي :- منو انت ؟

- اني ديار بنت اسماعيل
حجيتها و شلت الجنطة و فتت للبيت

- هااا انت ديار بت عمو اسماعيل ، انتظري اكعد ابوي

دخل للبيت، نزعت الحذاء اني و اثار ، طلع عمي :- ها ولج شعدج جايتنا بهالفجريات

- هجموا على بيتنا مسلحين فلشوا البيت و خطفوا اسامة
حجيتها و بجيت

هو صاح :- ااااخ ، اسماعيل وينه لعد ؟

- بالدوام ما نازل

- فوتي للبيت فوتي بس بالطلايب اشوفج .. دخلي يلا

فتت للبيت اني و اثار، نزلت مرت عمي، استغربت دخلتنا الفجر ، سألت :- شعدهن جايات ؟

عماد :- اسامة مخطوف خل اخابر على اسماعيل

هو مشى يخابر و هي تباوعلنا :- شلون خطفوه ؟

- هجمو علينا مسلحين ملثمين يسألون على ابوي

اجا عمي :- ما جاي احصل ابوج، شلون هسه تظلين عدي ؟

حجت مرت عمي:- لا عماد شتخليهن دا تكلك مسلحين هجموا عليهم شنو ما خايف على جهالك حتى تورطنا بعمايل اسماعيل و خلفته

ديار:- بس اليوم ابقى عدكم اني باجر اخابر المؤجر يطلع من البيت و نكعد بيه

عماد :- بيت شنو هذا

- بيت امي عافت ايجاره النا مصرف

- امج سافرت و عافتنا نتحمل اثامكم ، دفوتو جوا فوتو، نامو هسه و عود الصباح رباح

- شلون انام و اسامة مخطوف ع الاقل تحرك اسال عنه بلغ، سوي اي شي

- لا ادخل روحي ولا اجيب لعائلتي النظرة و تالي يراقبوني و توكع بينا، ما النا علاقة يجي ابوج ياخءكم و شتريدون تسوون سوو

مرته ما عجبها الكلام صعدت فوك، بقينا كاعدين اني و اثار وحدنا بالممر ، دموعي تجري ع الذلة الاني بيها
اجت مرت عمي جابتلنا بطانية و كالت : طبو نامو بالهول

دخلت اثار للهول و نومتها و غطيتها بس باردة تكتل مو مال بطانية وحدة ، حتى فراش ماكو نايمين ع البساط

:- ديار باردة !

- شسوي بيتنا و اجيبلج غطا و ادفيج، نامي و للصبح الله كريم

رجعت التفت بالبطانية حيل و اني كاعدة ملفلة روحي من الرد و دموعي تجري و حايرة وين اروح ووين انطي وجهي

عذراء طلبت مني اروح لبيتهم بس كلشي يصير اعرف بروحي فكر لا انوب مراقبينا و يأذونها و يأذون امها .. شلي بهالسالفة
بس وين اروح ووين راح الكا اخوي
باجر اطلع للمركز اشتكي و اسجل دعوة اختطاف
بيت ابوي بيه كاميرات برا اكيد الكاميرات شافت اللي دخلو ولو ملثمين بس بلكت يلكون شي

صفنت، اثار وين اخليها، هم اسحل بيها بهالبرد يا ربي
اوف يا امي، شجاج و عفتينا هسه ، جان اخذتي اثار وياج و عفتيني احير بروحي

هسه احير بمنو .. خالد وفقدانه
اسامة و اختطافة
روحي و غربتها
لو بأختي
شسوي يربي ، ساعدني دخيلك الهي لا تتركني

صار ضوا بالغرفة من ورا البردة، و بعدها اجا صوت قوي كلش هز البيت، كراكيع
مطرت قوي

كمت للشباك، فتحته و بقيت اباوع ، الرشك قوي حتى ع الشباك كاعد يجي المطر ، الفجر طلع بس الجو اظلم من الغيم

غمضت عيوني .. حاولت اطلع من هذا العالم كله
كمت اتذكر وجه خالد ملامحه، صوته صرت اسمعه
همساته احسها بأذني

- شبيج

- انت بيه

- تعبانة حبيبي

- كلشي بغيابك يتعبني

- ارتاحي

تقربت من عنده، حظنته بكل قوتي :- لا تعوفني ، خليك يمي لا تبتعد، خليني اتنفسك خلي كلبي يرتاح يمك

بسته .... حسيت على روحي و اني حاضنة المخدة و ابوسها و غاطسه راسي بيها، باوعت اني جنت واكفة يم الشباك شجابني هنا
دمعت عيوني لاي حال وصلت ..
كمت التقيه بخيالي و ما احس على روحي

بقيت كاتمة بجيتي و مخليه اديه على حلكي حتى لا يطلع مني صوت و ابجي بسكوت .. دخلت ويا اثار بالبطانية حضنتها حيل

بس ما نمت عيني ما خذت نوم، صارت الساعة ب٧ ونص، نزل عمي و ابنه يريد يروح للمدرسة بس المنطقة فايضة و غركانه من المطر واصل المي للركب

لبس عمي بسطال للركب و طلع بس ابنه رجع نام ما طلع للمدرسة، كمت بدلت اني ، و كلت لمرت عمي:- ديري بالج على اثار بس اروح و ارجع

- شرايحة تسوين

- بشغلة

- لا اطولين، اني صاعدة .. ارجع انام

عفتها و طلعت .. صفنت بالمنطقة المي مغرك الشارع كله، شلت هدومي ومشيت .. ملابسي كلها تبللت كوة طلعت الفرع

اباوع الشارع العام المي فوك من الركبة و هواي سيارات مجسية من المي و طافية .. و الناس محتارة و الدنيا بعدها مغيمة و الغيم اسود ، جن بيها بعد مطرة

ارجع للبيت احسنلي هيج ما راح اكدر اوصل ابد ، رجعت و طمست بطينة غميجة .. ارد اشيل رجلي من الطين لزكت

طلعت رجلي كوة و بقت تك حذائي شيدنكلي عليه و اخذه، مشيت شوية و هم لزكت رجلي الثانية ..
تالي كوة رجعت للبيت حافية .. زوج حذائي طمسن بالطينة

غسلت و فتت للبيت البرد كسر عظامي، اخذت ملابس و بدلت ، تعبت حيل و عيوني غوشن، رحت لاثار حضنتها ، خابرت على ابوي مغلق بعده
عساك متت و خلصت منك
حضنت اثار.. و التفينا ابعض و نمت

لهناك كعدوا بيت عمي و شغلوا صوبة شوية دفا الهول و كدرت انام براحة رغم الصوت

.. شوية و كعدتني مرت عمي :- كافي ما شبعتي نوم كومي طكت صفحتج

شلت راسي، باوعتلها، طلعت موبايلي .. شفته
وسام مخابر ٥ مرات و عذراء مرتين

كمت من مكاني غسلت و خابرت وسام، رد

- ها ديار

- شهااا
حجيت وبجيت

- خير يمعودة ليش تبجين صاير شي

- اسامة خطفوه

فز و صاح :- لاااااا، صدك تحجين

- والله

- و هسه ؟

- عد بيت عمي و مطر ما كدرت اسوي كل شي

- هو المطر كارثه حتى للجامعة ما كدرت اطلع خابرت الشلة كلهم ما مداومين

- شسوي وسام كلي اخوي وين الكاه

- الله كريم يم ربج ما يضيع شي بس كولي يا الله، والله لو اكو طريق جان اجيتج .. بس الطرق مسدده من المطر صايره فيضانات

- ما عندي حل اصبر لما ينتهي المطر لو يجي ابوي

- الله كريم .. اخذي راحتج ترا ما بيدي شي والله مجتف اذا تحتاجين شي امانة الله و رسوله تخابريني

- ما تقصر يالطيب الله كريم

قفلته من عنده و خابرت عذراء كامت تبجي وياي
نهيت الاتصال منها ، كعدت يم الصوبة و مدنكة افكر

حجت منتهى مرت عمي :- اذا كاعدة كومي طبخيلنا الفاصولية شو جسمي مكسر اريد اصعد انام

هويت راسي و كمت للطبخ، المواعين مكومة ع السنك كمت اغسل و اطبخ بنفس الوكت لان ما ارتاح ، اطبخ و السنك هوسة اتخرذل

كملت كلشي .. اجت اثار كعدت، صبيتلها ماعون تمن و حطيت الها مركة و كعدتها .. فاتت مرت عمي

- شنو جاي تاكلن ؟

- لا صبيتلها ما متريكة هي

- و ما تعرفين تستأذينين كبل لا تصبين ؟ امج شلون ربتج ولو ما عليج عتب اذا امج ميعاد

-شبيج عمة ترا كله يلا ماعون و اني طبخته

- جايه تعيريني انت ؟

شالت جدر المركة و التمن شمرتهن بالسنك و تكلي :- ما اريد منج شي، اخذي اختج و اطلعي من بيتي يلا

- اني بعمري ما اعتبرت عندي عم بس يا حيف الدنيا مالت بيه و شمرتني عنده و اول ما يخلص المطر اني اخذ اختي و اطلع لا تخافين ما اكعد عدج

- فوك شينج كواة عينج و السانج شطوله بت ميعاد اكيد اطلعين على امج لا تربية ولا اخلاق

- احترمي نفسج و اعرفي شلون تحجين عدل، امي ما تجيبيها على السانج افتهمتي

- دكومي طايحة الحظ ساقطة كومي اطلعي منا يلا

نزل محمد :- هاي شكو يمة

- طلعها منا ما اريد اشوف خلقتها نهائي يلا

ديار:- لو اكو طريق والله جان فضلت الشارع ولا بقيت عندج بس طريق ماكو مجبورة اتحملج الى ان يخلص المطر

- و اني ما اتحملج ولا دقيقة ابيتي يلاااا

محمد :- يمة على كيف ما تشوفين جاي تمطر وين تروح

- انجب انت و اصعد فوك يلا تدخل

محمد:- لا ما انجب و هي مو يومية جايتنه كلخا يومين .. عوفيها فوك مصيبتها و خطف اخوها انت دكافي حتى الله ما يرضاها

بقت تتعارك وياه ، اني كعدت بالهول ابجي بهضيمة ع الذلة الاني بيها.

اجا محمد حجه :- شوفي امي عوفيها ولا تحجين وياها من يفك المطر وين ما تريدين تروحين روحي

ما رديت عليه، للعصر حوة اجا عمي، دخل و هو يسب بالوضع و بالسياسيين الما يعرفون يديرون البلد و فايض من زخة مطر

تلكته عمتي تصيح و تعربد .. اجا هو كام يحجي عليه و يغلط .. ما رديت عليه ولا بكلمة

لليل اجا كعد يمي ... كال ايجار بيت امج شكد

:- ٤٠٠

- اني مستعد اطيج غرفة من البيت و تطيني ٢٥٠

- مشكور عمو بس يخلص المطر اني اروح

- وين تروحين ؟

- كاع الله واسعة

- لازم صحبانج هواي مثل امج حتى مامنة تروحين

- عوفو امي بحالها لا ضرتكم و لا اجت يمكم كل شوية خايطيها بالسانكم ليش .. وبعدين الله ما ينسى عبده لا تخاف ... ما ابقى بهالذلة

- لا ابقي هنا .. انت وحيدة ووياج بت يروحون يطمعون بيجن و يستغلوجن

- اذا ع الاستغلال و التحرش اذا تقصد فانت تعرف حالتنا ما يحتاج غريب المنا و بينا و اللي طالعين من ظهره هو اللي مأذينا

- اسماعيل تاب و مو مثل اول .. اسمعيها مني و اكعد و خليني ائجرلج غرفة ب٢٥٠

- عمي لو حنين انت احسبنا مثل بناتك، مو قبل شوية تغلط عليه و اطرد بيه لخاطر مرتك و هسه تريدني و تريد فوكاي فلوس ، اعذرني عمي ..
ما ابقى بذلة احد
ما دام الله موجود ما ينساني

- طلعة من هنا ماكو افتهمتي

- الله كريم
سكتت عنه مو ما ارادده اكثر خل ينتهي المطر و لكل حادث حديث، بس عفية دنيا محد بيها يسوي زين لله كلها مصالح و ادور مصلحة .. حتى عمي اخو ابوي
ولو هو ابوي شلونه حتى اعتب على اخوه

ثاني يوم الصبح جان جمعة محد داوم .. عمي كاعد وولده وبناته يلعبون .. اباوعهم .. هو و ابوي اخوان
بس لام عاىلته و يشتغل و يكد
اخ يا اسماعيل الخنزير .. حتى اخوتك ما تشبهم

جان المفروض تنخلق خنزير يلوكلك هذا الصنف .. بس بعد ما ادري شنو حكمته و خلاك بشر

... اثار بيها طبع من تشوف جهال و ناس تلغي تلغي هواي .. لغت براس عمي هواي، شال المنفضة و ركعها و هو يكللها :- بت الخ*** بالعتلج مسجل دوختينا

هي ضاجت و اجت تبجي يمي، كمت اله :- تكدر تكللها عمو اسكتي ليش هيج ضربتها

- و اكسر راسها بعد افتهمتي عمها اني لو اذبحها ، حس ما اسمعلج امجن عافتجن و داحت باوربا تك***

-كلهن يومين كعدنا عدك و كل شوية معيرنا بيها

كومي اثار والله لو اعرف اسبح سبح فلا ابقى هنا .. كومي

كام من مكانه :- اطلعين ا***** مو فوتي لج يلا طايحة الحظ

- ما ابقى ولا خلف عليك وعلى استضافتك هاي لو حيوان و داخله عنده هم جان قدر و انكسر خاطرة

ضربني راشدي :- بت ال**** اني حيوووان

وكف محمد يدفع بيه و مرت عمي تغلط و تصيح :- عايقات على امهن .. تربية شوارع ما اتربن ببيوت ، عمج يدوس على راسج ما تحجين افتهمتي

سحبت نفسي منهم ، لميت غراضي لبست اختي، اخذت انعال من الباب و طلعت .. الدنيا تمطر يربي
وين اروح اموت اختي غير
شلون ربي بقت يمك حلها

طلع عمي يصيح .. فوتي

- ما اريد و بقية هنا ما ابقى ولا اتحمل كلمة ثانية تعيرونا بيها

- لزمني من راسي و جرني ليجوا و دفعني بالغرفة جوا :- ساقطة ما يهمها تبقى بالشارع متعودات انتن و امجن طايحات الحظ باب البيت لو عتبتيه اكسر رجلج

وهاي غرفة الج و لاختج و من وجاي تبقن بيها و نفس ما اسمع الجن ..

سحبت اختي بحظني و ابجي
و ادعي الله يفكني منها، .. امي ما عندي نت و اخابرها و اكللها ، عدهم نت بس محد ينطي الرمز كل الاكله يكلي ما اعرفه بس ابو الشبكة يعرفه

ولا الي احد اشكيله و يسمعني، خالد وراح منو الي بعد و افتحله كلبي .. بقيت ابجي و حاضنه اختي
شفت البجي ما منه فايدة ..
ما الي غير ربي اذا ما هو يسندني اضيع اني و اختي

محملة كتاب قران بالموبايل فتحت سورة يس ..و كمت اقرا بيها و مشيت .. بالساعة اقرا قران و ابجي

تعبت من التلوة ، سديت صفحة القران .. اتصل مهند

رديت ....الو

مهند :- هلو ديتر شلونج

- غركانه بنص الخير

- الله يعينج بالقران احترك دمي من سولفلي وسام احس النار اشتعلت براسي

- مهند تعبت تعبت

بجيت

- لا تبجين تخليني هسه اجيج ازحوف والله

- بقيت اشكيله على عمي و ضربه و منيته و مرته

كال :- ديار حضري روحج بعد ما اتحمل اني جاي

- وين تجي

- خايبة شبيج تبقين بذلته ليش شنو احنه مو اخوتج غمس اكصصنا لو خليناج هيج تشكيلنه و نسمعلج شنو نسوان، حضري روحج اني جاي

- ما اريد اورطك مهند

- شتورطيني اجرلج غرفة بفندق قابل راح انومج على كلبي، حضري روحج

- عمي ما يقبل اطلع و الطرق مسدده

- ما الج علاقة اني اجيج بتكسي ، و من تكسي لتكسي نوصل ما تضيج الا تفرج حضري روحج انت و اني من اوصل المنطقة اخابرج و اطلعيلي حتى لو بلا ما يدرون

- ماشي تعال

لبست ملابسي و كلت اله ربي لا تخيب ظني بيك اسندني وحيدة و ما الي غيرك، لزمت جنطتي و انتظرت اتصال من مهند

ساعتين الا ربع تقريبا خابرني و كال:- بيا منطقة هم

دليته . المنطقة و الشارع و اقرب نقطة دالة .. بالنص ساعة يلا خابرني، كال :- اني ع الشارع العام اطلعي

طلعت من الغرفة عمي متلفلف بالبطانية و نايم و مرت عمي كاعدة ع التلفزيون ، نزعت الحجاب حتى لا يحسون بيه خليته بالجنطة و طلعت الجنطة برا للكراج

رجعت لاثار كلت الها اطلعي كبالي و صيحلي كانما انت بالمرافق و ماكو مي ، هاي طلعت و نفذت الكلت الها عليه

طلعت اني لبست اثار حذائها و لبست انعال منهم و اخذت حجابي من الجنطة لفيته و طلعنا برا

كمت امشي ع الحافات حتى نطلع بلا ما نزلك بالطين
مطر خفيف كلش .. نقط بس ما تاثر بكد البرد الموجود
جن عايشين بمجمدة

زلكت رجل اثار و طمست بالطينة ، سحبتهة و طلعتها و كمت امشيها كبالي .. كوة طلعنا الفرع
الشارع ما بيه طينه بس متروس مي
علكت الجنطة على ظهري و فتت بالمي اني و اثار
شفت مهند كبالي هو اجان ركض النا

لزم ايد.اثار و عبرها و اني وراهم
شر البلية ما يضحك ، شكد هموم على كلبي ، خربت من الضحك على سوالف مهند ( بغداد لو مايج حلو جا جيتت بهدومي )
و طكن جيلات البرنو و الشارع فاض
ويصيح

- دسكت يمعود فضحتنا

- بلمكم طكنا يهل العمارة .. امشن .. بلمكم طك بلمنا يهل العمارة

فاتت سيارة و الشارع كله مي، و ماشي سريع .. طشر المي علينا صاح مهنا :- خايب هنااااا سبحتنا الله يسبح الخلفوك

وكفنا ع السايد البين الشارعين السايد عالي حيل، جنه واكفية على قمة .. يا سيارة تجي ياشرلها ماكو

و هو يغني ويا اثار ( انا البندوة الحمرة مزروعة بين الخضرة) و ذيج تغني و تكمز وياه .. لكانا تكسي وكفا و صعدنا

كاله:- بعد اخوك للغزالية

صعدنا وياه، بالساعتين يلا وصلنا من الفيضانات و الطرق المسدودة ، وصلنا لبيت كال :- يلا انزلو

- بيت منو هذا ؟

- بيت واحد صديقي خابرته و انطاني المفتاح فوتي

دخلت للبيت مأثث، كعدنا هو و انطاني المفاتيح و ما دخل للبيت،وكف بالكراج، كال :- اني راح اروح اتسوك الكم شتحتاجون .. عود من تخلص المطيرة ندورج بيت ايجار قريب على بيوتنا

- الله كريم ، ما اعرف شلون اجازيك والله ، الله يوفقك الشبابك ان شاءالله

- عيب هالحجي احنه اخوة ترا

- والنعم من هالخوة فدوة الكلبك

طلع هو .. دخلت للبيت اني و اثار
البيت ما بي اثاث قوي بس اكو غرفة نوم و تخم بالصالة .. لا اكو فراش ولا ابد حتى تلفزيون ماكو
و مطبخ صغير حيل بيه سنك و فوكاه كاونتر طلاقتين بس

بقيت افتر البيت بارد كلش، شوية و اجا مهند جايب صوبة كهربائية و اكل جاهز

بقيت اتشكره ، كام يرزلني لان اشكره، كال :- اني اروح هسه شتحتاجين خابريني

- تسلم

طلع هو ... كعدنا ع التخم اني و اثار و شغلت الصوبة و اتغطينا بالبطانيات ، كالت :- اريد تلفزيون

- هاج موبايلي العبي بيه

بقت تلعب بموبايلي و اني صافنه .. صفنة تجيبني و صفنة توديني .. خابرني بالليل مهند كال :- نسيت تكلج البيت ما بي سحب ، اطلع الاسواق كلش قريب عليكم اشتري شموع، ولو هي الكهرباء مستمرة لان شتا بس للاحتياط خاف تطفى و تبقون بالظلمة

اخذت اثار و طلعت .. خطية كلش فرحت من شافت اسواق .. باوعتل و هي تكلي :- صارلي ٣ ايام ما ماخذه مصرف اطلبج ٣ الاف

- اخذي اللي يعجبج اشتريه يلا

اخذت هي حلوياتها و اني اشتريت شموع
رجعنا للبيت هي بسطت حلوياتها و كعدت تاكل، اني قفلت البيت و غفيت ع القنفة
لهناك هي نعست و نامت يم رجلية

ثاني يوم اجا وسام ما قابل على تصرف مهند شلون جايبني لهنا و مرزله .. لأن تبين هذا البيت هو راجع لمجموعة شباب مشتركين بأيجاره لشغلاتهم الخاصة و مواعداتهم .

بس مهند حاجي ويا صاحبه و كايله اريد البيت منك فد ١٠ ايام .. كايله اخذه لان البيت هسه ما نحتاجه
و محذرة يرجع للبيت لان مكعد بيه صديقته اللي هي اني و كايله هاي بمثابة اختي ما تريد توصل للبيت

بس وسام ما راضي ..
كايل لا البيت مشبوه و يجيبلج شبه ، كومي وياي ولا تبقين

- وين اروح

- شوفي عندي ابن عمي عايش ابغداد الجديدة و عنده مشتمل ويا بيته .. صح ايجاره غالي بس اني راح احجيلج وياه و حتى لو هاي نجمعلج ع الروس و نكعدج لبين ما الله يفرجها

- علوا اذا ايجار .. اني عندي ايجار بيت ٤٠٠ اكدر اطلع المؤجر بس اذا كعدت بيه منين اصرف يعني لازم نموت جوع لان اني و اختي مدرسة و جامعة

- لا تخافين هسه اني اخابره و احجي وياه

خابره .. شوية ورجعلي

وفي هو هسه ما رد عليه بس اني متاكد ياجر البيت لان المأجر صار شهر من طلع .. و ايجارات ماكو بسبب الوضع فامشي بالطريق اخابره

اخذت غراضي و طلعنا الدنيا تمطر صعدت بسيارة وسام و اخذنا

- شسمه ابن عمك ؟

- صادق ، هو شيخ معمم بديوان الوقف ، خوش رجال، لا تخافين يتساهل ويانا ، هو حالته المادية زينة و ما اعتقد يوكفها ويانا ع الايجار يتساهل.

- ان شاءالله يا ربي

اخذني لبغداد الجديدة ، البيت يصير كبال سوك بغداد الجديدة .. لان بعدني اباوع ع المولات هو فات بفرع و كال وصلنا

كلت اي ربي.. الله اأجر بيت يم السوك . و كلشي احتاج السوك قريب شفايتلي

نزلنا من السيارة .. دك الباب هو .. طلع ولد يطلع عمره بعمر اسامة ، كاله :- ابوك هنا

- اي فوك

- لعد ليش ما يرد على اتصالي ؟

- نايم

- دصيحه كله وياي خطار

نزلت اني و دخلني للكراج اني و اثار و الجنطة بالسيارة، شوية نزل رجال لابس دشداشة و العركجينة على راسه، ملتحي ، شكله بيه وقار

كال :- يا هلا بوسام تفضل هلا بيك خوية

- هلا بيك ابو مرتضى، وياي خطار

باوع و دنك عينه للكاع:- اهلا بيج اختي فوتو

- جايينك بشغلة

- ما يجوز الحجي ع الباب، تفضل و اعتبر شغلتك مكضية

ردت افوت للاستقبال، صاح :- بابا رقية تعالي استقبلي الاخت

اجت بته صغيرة يطلع عمرها ١٥ سنة ، ابتسمتلي و رحبت بيه من باب المطبخ .. دخلت اني و اثار من باب المطبخ للهول

كعدت، البنية خجولة ما نطقت ولا كلمة بس راحت جابتلي مي، و سوت جاي لابوها و وسام

سمعت حجيه صاحت :- منو اجا ولج رقية

- بيبي عمو وسام و بنية وياه
باوعتلي و ابتسمت :- بيبي مشلوله ما تكدر تكوم

كمت من مكاني :- نروح يمها

- اي عادي

اخذت اثار و فتت للغرفة كلت الها :- السلام عليكم

- هلا و مرحبا وعليكم السلام عيوني

كعدت ، سالتني :- شتصيرين من وسام

- ما اصير بس محتاجة ايجار و كال ابن عمي يريد ياجر مشتمل

- ها خير ان شاءالله

فات للبيت الرجال و صاح :- بابا رقية وسام راح يدخل

اني كمت على حيلي وكفت، دخل وسام و الرجال و كال :- اني عندي بيت ايجار ، الله شاهد جنت مأجره ب٥٥٠ الف

وسام :- البنية سولفتلك عليها ، ابوها بالجيش و اخوها خاطفينه و امها مسافرة و ما الها احد غير هالطفلة، اني جاي عليك و اعرفك و البنية محتاجة ووحيدة

- لا ان شاءالله احنا اهل ، شكد تريد الايجار

- ٢٠٠

ابتسم منحرج، حجه وسام :- اذا كدرت ولكت شغل تزيد .. انت بس ساعدها هالفترة و مشيها

- هاي هي ولا يهمك

- ابو مرتضى امانة الله ورسولة البنية عندك و تعرف بس هي و اختها، و الدنيا مو زينة

- لا اختي ان شاءالله و لو احتاجت البيت موجود ادك الباب وكت ما عجبها و نا نقصر وياها ان شاءالله، بس هاي كدام وسام احجيها و اكون صريح

يحجي و لازم سبحته و يباوع لامة و اني على صفحة ، كال :- اديرين بالج كلش زين

- يعني شلون

- اني سمعتي بالمنطقة طيبة و كلها تعرفني و تحترمني، فما اريد تطلع من عندج تصرفات تسيئ لسمعة بيتي، اديرين بالج من الخطار و تاخذين حذرج و تصونين البيت و حرمته.

- ان شاءالله

- اني لخاطر وسام راح اقبل والا والله البيت طلبوه مني ب٤٠٠ و ما اجرته، ان شاءالله ما اتندم و اتمنى تكونين عند الثقة النطيته

- اطمن و مشكورة منك هواية

- هلا بيج ، بابا رقية البسي وروحي ويا الاخت حتى تشوف البيت

- اي بابا

صعدت البنية لبست جبه و حجاب و نزلت ، رحت وياها للبيت .. صدك البيت نظيف حيل حمام غربي و شرقي و الكاع مرمر و الحيطان سيراميك

فرحت و حسيت الله فعلا وكف وياي و ما قصر و سهلي الامور و راح اكعد ابيت اني و اختي و ارتاح

بقيت امشي بالبيت، رغم كل الهم على كلبي مبتسمة و اباوع البيت .. اندكت الباب، فات الرجال ووسام

كال :- يا الله ، باباتي

رقية :- ها بابا

- شافت البيت اختج يابه

- اي شافته

ديار :- عجبني الله ينطيك الصحة و العافية

- للجميع ان شاءالله ، اسمعي يابه ايجار هذا الشهر اني ما اريده اكعدي و استقري انت و اختج ولو احتاجيتو شي بابي موجود

بس اسألج اخوج شلون نخطف

- دخلوا علينا ناس مسلحين بالليل و اخذوه و قبل يوم رموا البيت

- اهل عمام ما الج ؟

- الي بس من رحت العمي يريد يأجرلي الغرفة ب٢٠٠ غير المنية و المعاير و الضرب و الغلط و الشتيمة

- لا حول ولا قوة الا بالله، احنا اهلج ان شاءالله و اذا عايشناح و شفناج مرة و سباعية ما راح نخليج تحتاجين لاحد

- تسلم

وسام :- ابو مرتضى اذا تكدر انت عندك معارف بالدولة هواي اسأل و حقق على اخوها هي تريد ترفع قضية بس الظروف عكست وياها

- ان شاءالله عندي صديق بالداخلية راح احاجيه، ايوج ما خابر ما عرف ابنه مفقود

- مبايله مغلص و هو ما ينزل كل ١٥ يوم و اكثر

- لو رجع و ما لكاكم ما يحجي ؟

- جنت كاعدة عد عمي فاكيد لو رجع يعرف احنا وين، بس هسه استقر و انطي خبر لجيرانه حتى اذا رجع ابوي يعرف مكانه

- ان شاءالله ، يلا اخذوا راحتكم

طلع و هو يأشر لوسام يطلع كدامه وبقوا يسولفون برا

كلت للبنية :- كل غراض ما عندي شلون راح نكعد

- راح اجيبلج فراشات من بيتنا و صوبة

- اي فدوة حبيبتي الله يخليج، عدكم نت اريد اخابر امي

- هسه اكول لاخوي و ينطيجياه

طلعت البنية و اني بقيت افتر بالبين، وسام سلم عليه و بقى يوصي بيه و راح

اجت البنية جابتلي فراشات و صوبة نفطية مليانة نفط و كالت اذا احتاجيتي شي دكي علينا الباب

- تسلمين

فرشت الفراش و خليت الموبايل ع الشحن و كعدت، اندكت الباب ، لبست حجابي و طلعت

طلع الشيخ صادق، بيدة علاكة اكل ، حجه و هو داير وجهه عن الباب و كال :- هاي جبت الكم عشا اعذرونا جان المفروض نطبخلكم بس الوالدة مشلولة و البنية صغيرة ، جبت الكم جاهز

- تسلم ما تقصر الله يحفظكم ان شاءالله

- يحفظ الجميع، يلا قفلي الباب يابه وديري بالج على نفسج......

☆☆☆☆☆☆

#اتمنى_ان_افعلها

الحلقة_54

اشتقت لشخص كان يوصيني بإن انتبه لنفسي كثيراً، ليتني استطيع ان اخبره، اني قد فقدت نفسي عندما غاب 🖤

.......

على رغم حزني على خالد و على اسامة، الا ان من اشوف البيت اللي اجرته و كعدت بيه و افكر ان هاي هي خلصت من ابوي ومن مضايقته لاختي و اكدر احميها منه ابيت النا بعيد عنه.

بس اتذكر اسامة و ينعصر گلبي، المطر مستمر ما وكف، و الشوارع اغلبها مقطعة، عادة المطر خير الا ع العراق يوكع نقمة بسبب شوارعه اللي تفيض

ثاني يوم هم جان مطر .. لا اكدر اروح اسأل عن اسامة، و حتى ع الاقل ارجع لبيت ابوي اخذلي كم غرض للبيت ظالين بس الفراشات و الصوبة.

للشيخ جابلنا دجاجة مشوية و ماعون كص لحم ومقبلاتهم و صمون و بيبسي، خلينا على صفحة يومين نطلع و ناكل، ولإن الجو بارد ما خرب.

يومين اني و اثار مطالعين من البيت ابد، نتناوب ع الموبايل نلعب بيه، و اكثر الاوقات بيدها و اني سارحة افكر و اتخيل خالد وياي بالبيت و اشطح بخيالي لغير عالم و كأن كل هذا ما صاير، شنو اتمناه بحياتي اتخيله بخيالي و اعيشه
و يمكن هالشي السبب اللي يخليني لهسه صابرة و ما منهارة رغم كل اللي دا امر بيه.

خابرت بتول حتى اسأل على خالد ، ردت :- الو

- الو هلو ديار

- بشريني فدوة ما سمعتي فد خبر عن خالد ما لكيتوله اثر ؟

- لا والله يا ديار حالنا يبجي الكافر اخوتي عجزو وين يدورون ما خلو مكان و ما سألو عنه، مراكز مستشفيات، حتى بالموتى دورو و ماكو

- وين راح يا الله والله كلبي راح يموت من القهر عليه

-ولج ديار حال جهاله يكسرون الخاطر ، ابنه معلعل و امه بين امها و ابنها اثنينهم مرضى، و ضحى و بناتها يكسرون الخاطر بلياه والله، صدك ما كلت الج

- شنو ؟

- احمد رجع رغد

- صدك ؟

- اي والله صارلهم اسبوع من رجعو

- هو يحبها هواية ما يكدر يعوفها

- اي ابوي انجلط و ام رغد مشلولة و بقوا محد بحالهم بخلاف ابوي، عود رافد يتفقدهم، عاد هي متراسلة وياه وراجعين البعض

- و جهال مها شلونهم

- على حالهم ام امجد تريد تزوج امجد

جاي تحجي اندك الباب، تعذرت من بتول و كمت من فراشي طلعت للكراج ، صحت (منووو ؟)بدون ما افتح الباب

صادق:- يابه السلام عليكم

فتحت الباب و بقيت وراه كلت اله :- و عليكم السلام هلا بيك شيخ.

-صيحيني ابو مرتضى، والله يابه جيت اسأل عليكم ابن عمي وصاني بيكم، بس صار يومين لا شفت منكم احد ولا سمعت الكم حس، حتى البيت ما مأثث

- تسلم مشكور ما تقصر ، منتظرة المطر يكف حتى اروح انقل الغراض من بيت ابوي

- وشلون مدبرين اموركم يابه ؟

- على الله، جبت النا اكل قبل يومين ، اليوم يلا خلص و عود مقررة شوية اطلع اجيب

- كهرباء عدكم ، ترا سحب ما بيه البيت

- الوطنية مستمرة تنقطع دقايق و ترجع

- زين يابه اني رايح و ان احتاجيتو شي لا تسكتين، اعتبريني اخوج اعتبريني ابوج ولا تستحين من اطلبين ، الله اوصى بالجار و احنا جيران.

- و النعم منك تسلم ما تقصر

ترخص و راح، سديت الباب، شوية و اجا ورجعت الباب اندكت، طلعت رقية جايبتلنا صينية بيها مركة كبة جريش و زلاطة.

فاتت هي و صينيتها جوا، كلت الها :- عفية بالشاطرة انت طابخة ؟

- لا بابا طبخ النا غده و كال ودو للبنات خطية و جبتلجن

- مشكورين حبيبتي، ماما وين لعد ؟

- عد بيت جدو

- ها و اني عبالي لا سامح الله بيها شي

- لا مطلكين هي وبابا صارلهم سنة

- الله يصلح بيناتهم، شكريلي ابوج هواي، بس وصيتج ع الرمز

- ياا نسييييت، هسه اگل لمرتضى و اجيبه الكم

راحت و اني و اثار كعدنا ناكل لان المركة بعدها حارة، رجعت رقية فاتت علينا سوت النا النت و مشت

سوت النت لو اجا العيد عد اثار ، عافت الاكل و كامت للموبايل، رادت تتصل بأمي، امي ما جانت موجودة، ما ردت، طلعت سبونج بوب، صحتلها اباوع وياها و ناكل.

للمغرب اثار غفت بمكانها و الموبايل ع الشحن، و الجو برا مغيم بس ماكو مطر و الكاع مبللة .. الجو كلش حلو و الشارع اللي كاعدة بيه مبلط و بيوته حلوة فما بيه فيضانات هواية

اخذت حجابي و طلعت اشم هوى ، مشيت ع الشارع مولات و محلات اشكال الوان، بقيت اباوع و امشي
مليت رجعت امشي للبيت.

ريحت المطر تخلي الواحد يحن غصبا ما عليه، اخذت نفس قوي و كمت احاجي نفسي :- دشوف خالد ؟ وين وصلت ووين صرت ، لو انت وياي هسه ؟ جان احتاجيت لشي ؟ فكرت بشي، جان كعدت تفكر انت بمكاني و تحل مشاكلي
جاي اشتاقلك هواي و كلما يزيد غيابه كلما يكبر الشوك، جذب الكال نسيت والله معايشني بكل لحظة بحياتي اتخيلك و احجي

....صوت سيارة، طوووووووووووووووووووووووووط

جفلت من كل حيلي، احس كلبي كمز بيدي، باوعته طلع الشيخ صادق، عطت بيه :-، اي شجااااااك متكلي شجاااااك هو هيييييييج

حجيت وبجيت من الهبطة والله عبالي اندعمت، نزل من السيارة :- اني جدا اسف اختي العزيزة مو قصدي افززج

ابجي و اكله :- روح روح
باوعتله، شو هذا خانكته الضحكة، دنكت منه و اني اهز ايدي ..

حجه :- اسف والله ما جنت متوقع ردة فعلج هيج تصير قوية كل الجان ابالي اسألج خاف تحتاجين شي لان شفتج وحدج تمشين و الشارع فارغ

مسحت بدموعي :- مشكور طلعت بس اشم هوا

- طلعة بالليل زحمة، ما يصير

- اكلك شيخ شنو حكمتنا لو كعدتنا ابيتك، من كعدت و لهسه توصي و تنبه شكالولك علينا و اشفت من عدنا؟

تضايق من حجايتي، :- اني اسف اختي العزيزة الظاهر اخذت مسؤليتكم على محمل الجد، اترخص.

حجاها وراح للسيارة، مشيت اني كملت، هو داس السيارة و سبقني للبيت، لما وصلت، لكيت مدخل سيارته و دا يقفل بالباب، ما باوع ولا التفت.

صورة الدنيا، ركضت للبيت كبل لا ترعد، اشتغلت الكراكيع و المطر رجع قوي:- شلون يربي ما يخلص هالمطر والله انشلع گلبنا لا نكدر نمشي ولا نكدر نتحرك

قررت باجر لو شما يصير عسى ما اغرك لازم اروح لبيت ابوي و اسال اسامة و انطي رقمي و العنوان لجيرانه حتى لو رجع تنطي ويجينا.

دخلت للبيت، احس البيت ابرد من البرد كلش باردة، اثار بعدها نايمة، اخذت الموبايل من يم راسها ، لكيت امي مخابرة مرتين

خابرتها، و فتحت وياها كاميرا :- هلو ماما ديار شلونج

- شلوني يعني شلون انطاج كلبج تعوفينا ويا اسماعيل و تمشين

- خير يا ستار شصاير

- صارلنا كم يوم ما مخابريج ما عرفتي شصاير بينا

- خابرت عليكم كم مرة و ناكو ظل بالي عليكم هواي ،بس انتم ما جاوبتوني، سصاير اخوج اسامة وينه

- انخطف

شهكت بقوة - عزا العزاني، شنو ولج انخطف منو اخذوه احجيييي

- عصابة مدري شنو يدورون ع الخنزير ابوي رمونا باليوم الاول و ثاني يوم دخلو علينا و اخذوا اسامة و الشفية ابوي لحد هسه ما مبين
بقيت اسولف الها كلشي و ابجي

كالت :- اقرب وقت راح ارجع الكم

- شترجعينا و شتسوين ؟ ووين تلكين ؟ بعد كل هالملايين الشمرتيها تعوفين و ترجعين ، لو اجيتي ما تسوين شي ع الاقل كملي الاقامة

- وشلون تبقين انت واختج وحدج

- بيدي غير حل ؟ وجودج ما راح يأثر بشي، لكيت ايجار وكعدت

- انوب حتى لو ارحع وضيفتي خسرتها اول و تالي، اطخ البالي اعوف كلشي لان تعبت حيل الحياة هنا اصعب من العراق بألف مرة.

وهي تحجي، طفت الكهرباء، راح النت و انقطع الاتصال، شغلت اللايت مال موبايلي وكعدت
شحن الموبايل ٥٧ ومن الايت دينزل الشحن اكثر
طولت الكهرباء ما اجت بسبب المطر
طلعت بلكي اكدر اشتري شموع، المطر قوي حيل بساع سديت الباب

الصوبا طفت و البيت فارغ بلا فراش عزامنا كامت اطكطك، لحظتها من البرد كلت ( هم يجي الصيف و اضوك الحر ) احس راح اتجمد و اموت بمكاني من البرد
والبيت كله سيراميك و مرمر يصل برودة.

ل١١ بليل و الكرباء ماكو، اثار كامت تبجي من البرد البطانيات ما جاي ادفينا،الموبايل نزل الشحن مالته ١٠
البيت اظلم فد مرة بس الهول لأن مشغلة بيه اللايت

اندكت الباب، كمت من مكاني كوة ادية ورجلية يتراجفن، فتحته، لكيته ابن الشيخ مرتضى والشمسية على راسه، حجه :- بيبي تكول عدكم ضوه ؟

- لا ضوة ولا صوبة ولا اي شي جاي نموت من البرد فدوة

راح ركض للبيت، شوية ورجع النا، كال :- تكول بيبي جيبي اختج و تعاي الشيخ فوك و ما عدنا احد غريب

ما كدرت اكول لا، لان اذا بقينا على هالبرد للصبح احتمال نتجمد و نموت، اخذت اثار و الغراض النحتاجها و ركضنا ويا مرتضى لبيتهم

دخلت ، مشغلين مولدة منزلية، فتت للبيت ... البيت دافي .. الله حسيت روحي بالجنة بودي انام على هذا الدفو

فتت للحجية :- مرحبا حجية

- هلا يمة ضكريني شسمج

- ديار

- اي ، ابقي عدنا الليل ليما يخلص المطر اليوم و باجر امشي لبيتج

- مشكورة حجية

كعدت .. الحجية من حجياتنا اللي يلبسن فوطة سودة وثوب لونه اسود و الدك بحنجها و باديها وتحب تسولف اول ما كعدت بقت تحجي على روحها من جانت بذاك الزمان و شلون جانت ابرد كبل .. تكول :- هسه ماكو برد جان المي يجمد من البرد

وبقيت اني و اثار مجفجفين يم الصوبة و نستمع الها، كامت تتذكر الحجي زوجها و بقت تضحك و هي تحجي، رقية كاعدة ويانا بقينا نسأل و هي تجاوب و تتذكر ايامها

وتمدح بحسنها هواي، الا شوي جان شبختها بهيفاء وهبي بالعصر القديم من كد ما مدحت بروحها وشلون الحجي يحبها.

وصلت لولدها تحجي دمعت عيونها و سكتت
حجيت :- ها حجية خير

- الكبر ذلة ييمة و جذب احد يتحملك، تحس روحك ثكيل حتى اعلى بزرك.

- الله يساعدج حجية، كم ولد عندج

- ٤ ولد ، جبيري سلام سافر من التسعين خارج العراق و الثاني بشير مرته تعاركت وياي وتكلي ما اريدج ابيتي حرمت بيته عليه و ما دخلته بعد ، بقولي بس صادق و بهاء، بهاء بيته صغير هول غرفة ومطبخ الغرفة الهم هو و مرته اني من اروحلهم انام بالهول بس ما ارتاح تلوب روحي من الهوسة عنده ٤ جهال
هالبقيت عد صادق ولو ما راضية

- ليش

- هم تعارك هو و مرته تكله عندك اخوة شنو بس اني مبتلية بأمك تعارك هو وياها و كالتله يا اني يا امك بالبيت ، كال الها بيت اهلج ينتظرج و طلكها

- مو خوش

- اي والله ييمة مو خوش بس شسوي مو اكلج الكبر ذلة اني الگضيت عمري كله اربيهم تالي انشمر من بيت لبيت

-ما عندج بنات حجية ؟

- عندي ٣ بنات بس متزوجات و البنية مو ملك اهلها بيد رجالها عود من يجن خطار يدارني.

-تعاي عيشي وياي والله اخليج بعيوني

- سالمة عيونج يبعد روحي الله يحفظج يبمه ، ابني موجود و عايشة عليه

- الله يحفظه ويخي الج

الحجية :-، ولج رقيوة بيبي ما سويتي عشا لخياتج خطية خاف ما متعشيات

رقية :- اي كايمة بيبي، اءا تريدين تعاي وياي ديار ترا محد موجود

كمت وياها اول ما دخلت المطبخ كالتلي :- لا تصدكين بيبي ترا مو فقيرة

ابتسمت :- ليش ؟

- تسوي مشاكل هواي جانت النهار كله تحجي على ماما

- البيوت اسرار لو شما تسمع عنها ما تعرف سرها، الله يهديكم حبيبتي.

سويت ويا رقية عشا خفايف، العرفته هي عدها اخت وحدة و اثنين اخوان، بس مرتضى باقي هنا و هي و اخوانها البقية حيدر و فاطمة ويا امهم باقين لأن صغار.

ونما بغرفة الحجية، للصبح اني اكلب بصور خالد و اباوعله .. ساعة ابجي بسكوت و ساعة اتحسر على طولة و ما مصدكة فقدته.

الصبح و الحمدلله طلعت الشمس و انتهى الظلام و المطر .. كلش كيفت ، وربك صارت ويا مشكلتنا و المدارس و الجامعات كلها معطلة من ورا المطر

عفت اثار عد بيت الشيخ و طلعت لحي الجامعة البيت ابوي، سألت الجيران على اسامة كالو والله ما نعرف شي، انطيت عنواني لمرة اعرفها جيرانه و امنتها لو اجا اسامة تنطينا عنوانه .. لغيره لا تنطين

كامت تدعيلي المرة و تواسيني على فقداني لاخوي، رحت لمركز الشرطة اللي قريب على بيتنا ، بلغت على خطف اخوي ..

شو يكلي :- لو مكملة نومتج مو احسن، مخطوف صارله ايام و هسه ياله جاية تشتكين وين اكو هيج

- ما جنت العب و الدنيا جانت مطر و الطرق مسدده

- و المطر نساج اخوج

- اخي انت جاي اتحاسبني

- هز ايده و سجل دعوة
عفتهم و طلعت، من نظرته كلشي ما يسوي ولا يحقق اني بعد بالية نفسي بيهم ليش، حتى لو دروا اني مبلغة احتمال يأذون اسامة

شو هو بلد و تايه للعصابات و الشرطة ما الها كلمة ع العصابجي، كل واحد حزبه و كتلته بظهره.

سألت رجال ابو محل :- منين اكدر اأجر سيارة حمل اريد انقل غراض

خابرلي واحد صاحبه، كال :- هسه ربع ساعة و هو هنا
بقيت كاعدة انتظر فوك النص ساعة يلا اجا
سألني ع المكان كلت اله بغداد الجديدة ، جان يكولي :- ١٠٠ الف

- شدعوة يمعود كول غيرها

- ما اروح اذا بغيرها

كل الشايلته وياي ١٢٥الف، قبلت، اخذته ورحت للبيت .. جان يكول :- والله اختي اني سايق ما اشيل غراض ظهري يوجعني اذا تريدين اخابرلج جماعتي

كلت اله :- خابر يله

باوعت .. واحد واكف يباوع علينه، من باوعتله دار وجهه ليغاد

دخلت للبيت لميت ملابسنا غراضنا كلها ابطانيات احط و اشد ابطانية .. فراشات زوالي غرفة النوم مالت اسامة و نص من التخم الفوك و السنك اخذته ..الكاونتر جبير ما يكفي للبيت، اخذت الثلاجة و الغسالة و طباخ و دبة غاز
وكلشي احتاجة من بيت الخنزير

كلهن دفعتهن و حظرتهن حتى الولد يجون و يشيلون، رادو كل واحد ١٥ و هم ٢ .. كلت الهم ما عندي بس ٢٠ بقن

كوة كوة يلا قبلو وكوة يشيلون وواحدهم يتمطى تمطي .. شلعوا كلبي و السيارة كوة كفت فوكه فوكة ..

هم صعدوا ويا ابو السيارة و اني صعدت بتكسي ، مشيت و هم ورا السيارة و لازكة كلبي ،افكر خاف يغشوني ولن ماخذين الغراض كلها وفالتين بيها
عاد اني بايكتها من ابوي ويجون هم يبوكوها مني .. لا صدك وكتها اتيقن حظي نايم بأكبر خيسة

بس الحمدلله عدت سلامات ووصلوهن وياي للبيت، وكفت اباب البيت، مرتضى جان واكف بالباب، ساعدهم بالتنزيل

بقيت اني واكفة و ادليهم يطبون، طلع الشيخ وكف ، استحيت منه بقيت جوا، اجان مرتضى كال :- يكول بابا خل تفوت جوا يم الحجية و الشباب ينزلون الغراض عود من يكملون تجي هي

شفتها احسن لأن كلهم غربة و بس اني واكفة وياهم، طلعت من البيت دخلت ابيت الشيخ ، اثار تلكتني :- ليش عايفتني ورايحة ؟

- غير رحت اجيب الغراض

- وليش ما عفتيلي موبايلج

-هاج بس فوتي والله تعبانة، دخلتني رقية ورحت لغرفة الحجية ، تلكتني :- ها

- سولفت الها

شو شهكت و هي تكلي :- يااا رحتي لوحدج

- قابل منو يروح وياي يا خالة

- وجيتي ويا الزلم

- شسوي جبت الغراض للبيت

- لا خالة مو زين عليج

بقت تحجي عليه هواية، عدها صفة من ابنها هم تحسب نفسها حاكمة و تحكمنا .. شو استلمتني اكس مربع ما يصير و ما يصير .

لما كملوا، طلعت اني، شفت الشيخ ما سألني و لا حجه اي شي، محتاجه او شي، حسيته تضايق من كلمة البارحة

دنكت راسي و كلت اله :- شيخ اني اعتذر اذا حجيت وياك بقلة ادب البارحة بس والله من الفزعة ما عرفت شحجي

باوع :- ما صار شي بنتي ، فوتي شوفي شنو تحتاجين و مرتضى وياج

دخلت للبيت كلت اله :- تكدر تجيب نجار ينصب الغرفة

راح لابوه .. كاله ، طلع الشيخ جاره نجار و هو متفضل عليه طلب منه يجي يسوي الغرفة، فما قبل ياخذ اي فلوس من عدنا لان الشيخ هو الطلب

دخل الرجال، صاح الشيخ :- ام اثار اتفضلي هناك اذا تكدرين خلي يدخل الولد

دخل الولد هو و مرتضى ينصبون بالغرفة اني طلعت برا، اجا الشيخ .. سألني :- ام اثار سؤال

- اني اسمي ديار و اثار اختي

- اعرف بس احنا ما نصيح المرة بأسمها اكرام المرأة بالامومة لهذا نكرم كل كرة بكلمة ام

- مشكور

- ردت اسألج معقولة عندج اب و لهسه ما سأل عنكم رحتي جبتي غراض من بيته و ما درى ولا خابر و ابنه مخطوف شو ما جاي تخش بعقلي هالسالفة

- ابويه مو مثل كل الاباء، بالاسم اب، الغريب احسن من عنده بألف مرة، شيخ اعتبرني يتيمة

- لا حول ولا قوة الا بالله ، بنية بعمرج تروح تلف بغداد وهي عدها اب كارثة هاي بالله العظيم

- هذا نصيبنا شسوي، لو عندي الاستند عليه شعندي بهالتعب و الاخذ والعطا .. جان هسه اني كل همي دروسي و بس مو احير شلون اعيش روحي واعيش اختي

- احنا يمج ان شاءالله لا تعتبرينا غرب

- الله يديمك ويخليك

- روحي للبيت من يخلصون اني ادز مرتضى يبلغكم

شكرته ورحت و اني اتحمد الله لان يوكف وياي بكل محنة و يساعدني ، انتظرتهم لما كملو ..

اجينا اني ورقية و اثار نشتغل لليل يلا كوة خلصت الشغل، فرشنا البيت ، بس ناقصنا كومة غراض
مواعين و جدورة و كل هاي السوالف ماكو
رحت ثاني يوم من الصبح .. اشتريت من السوك الاكدر عليه ورجعت

بس ما بقى عندي هواي.. اليبقى من الايجار مال بيت امي ٢٠٠ مصرف الي ..
لازم انقل اثار لهنا و احطلها خط .. ٣٠
و اني لازم ادورلي خط يطلع ب١٠٠ الف .. مصرفي اني اثار مسواك سحب .. منين ما كمت اجيبها تلخبطت براسي و كومة احتياجات للبيت لازم اجيب

الليل كله كضيته افكر شلون احلها ..
حتى فكرت اترك الجامعة هالسنة و اكعد بالبيت ع الاقل تخف المصاريف ، عود اذا الله فرجها للسنة الجاية
بس من افكرلها و صدك ابطل و اترك و اني ما باقيلي بس هالسنة و اتخرج .. و اترك دفعتي
انقهر حيل .. ما بقى لنص السنة هواي لازم اجاهد حتى اكدر اخذ شهادتي .. ما لازم ايئس

كعدت الصبح اخذت اثار و رحت لمدرستها، عرفت هي راح تنقل لو كامت تلطم و تصيح ( اريد ابطل ما اريد المدرسة بعد) عنطزت عليه بنص الشارع و كوة اقنع بيها

تالي بضربتين على راسها مشيتها كبالي و هددتها :- لو بجيتي اشمرج بين السيارات و اخلص منج

بقت تبجي بسكوت، انقهرت عليها رجعت حضنتها و كلت الها :- لا تبجين بس شسوي احسن ادازمين هنا و يرجعون ذولاكه الوحوش يضربونه و يعتدون علينا

عاد قنعت.. مشيت بأجرائات النقل لحد ما تيبست رجلية من التعب و خشمي انكص من البرد يلا رجعنا عود على باجر اكملها و اخذ اثار

امي تخابرني على اسامة كل شوية و بالها مشغول ، واكله :- والله تعبت ما ادري المن اصير بدنياي ادور على اخوي لو اداري اختي لو اجتهد لنفسي و هاي سنة تخرجي ..والله تعبت حيل ما بقى عندي
غير غياب خالد الكاسر ظهري و هاد حيلي كله
المن اصير

ابقى اشيكلها و ابجي و هي تصبر عليه

ثاني يوم، وديت اثار للمدرسة كملت اجرائات النقل مالها و طلعت لجامعتي ، هم زين ربك جان عندي امتحان، لو غايبته كل درجة ما الي .. بس بالغش من اصدقائي جاوبت.

طلعت لزمتني مريم و هي تكلي :- تقدملي ابن عم ابوية و خوش رجال و عنده فلوس

- اي و تريدين توافقين ؟

- لعد ابقى انتظر وسام بلكي يحس

- وسام مو يحس، وسام يحب غيرج مريم افهميها، ركزي على هالنقطة و قنعي نفسج بيها

- يحب منو

- مو مهم منو يحب المهم هو كلبه مو يمج، بعدين لا تعيدين غلطتي و تتزوجين حتى تنسين
والله ما تنسين و تبقين عمرج معلكة كلبج عد اللي تحبيه و جسمج عند اللي اتزوجتي و بعمرج ما تنسعدين

لا تاخذين قرار بهيج لحظة لما تحسمين امرج من وسام و تتأكدين ان انت نسيتي .. ذيج اللحظة قرري البي يعجبج

بقيت احجي وياها ، اجت عذراء شاركتنا، و اجو الشباب يسألوني على وضعي .. تشكرت من مهند و وسام هواي وكفتهم اليه ما تنسي ابد .. وكفة زلم و اخوة ينشد بيهم الظهر

رجعت للبيت .. اثار ما موجودة ..
استغربت .. رحت لبيت الشيخ ، سألت رقية :- اثار ما اجتكم

- لا والله ما اجت

- عمى بعيني اختي وين راحت

طلعت بوجهي لمدرستها ..لكيت حارس المدرسة كاعد و مبلش الشفت الظهري ، سألته و اني ارجف :- عفية يا ولد بنية صغيرة طالبة اليوم داومت ما شفتها ؟

- لا والله ، شسمها ؟

- اثار

- دوامها صبحي

- اي

-اهل الصبحي كلهم طلعو ما بقى ولا واحد

- عزا بعيني اختي وين

بقيت امشي بالشوارع و ادورها و ابجي، مشيت للجامع القريب من المدرسة .. كالو :- لا والله ما واصلنا خبر ضياع طفلة ولا شفنا بهيج مواصفات

كعدت ع الرصيف ابجي بكل قوتي :- دخيلك ربي والله تعبتتتتتتتت مو كد هذا الحمل والله اخءني وريحني شنو ذنبي اتحمل كل هذا

.. الشيخ دره من بنته اختي ما راجعة و طلعت ادورها، فلاحكني هو ابنه للمدرسة، ما لاكين باقي يفتر بالسيارة .. شافني واني كاعدة اباب الجامع ابجي

صفت سيارته يمي ،فزيت باوعتلهم ، صحت:- فدوة ساعدني اختي ماكو الله عليك ساعدني

- وين راحت

- عفتها بالمدرسة وماكو طالعة و ما راجعة

- هي تندل طريق البيت

صفنت :- لا اني شلون نسيت اني وصلتها بس هي ما تندل البيت بالضبط، يااااربي ضيعت كل اخوتي يالله

كمت ابجي بقوة ، حجه :- كولي يا الله طفلة هي تلكي امشي

صعدت وياهم بالسيارة و اني اشهك و ابجي و الوم بنفسي، بلغ الجامع و انطاهم رقمه، وراح بلغ الشرطة ..
كلها كامت اله و تأمر شيخ و تدلل شيخ
واني من رحت واحدهم يحاجيني من وره خشمه
هي الدنيا مقامات

اخذ شرطي ورجع للمدرسة يحقق ويا المدرسة، لما وصلنا للمدرسة اول ما شافني الحارس ، صاحت :' انت الاختج ضايعة مو ؟

هميتله بسرعة :- اي وينها

- لكيتهم عند الفراش الساكن بالمدرسة باجيه و ماخذها يمه لان ما تندل ولا احد جاي عليه

صاح على اسم الفراش، طلعتلي اثار من ورا المدرسة ،ركضتي ركضة خوف، حضنتني بكل قوتها و كامت تبجي بصوت عالي و اني على نفسي البحي مالتها

اجو يمنا و الشيخ يكول :- يلا يابه هاي هي الحمدلله على سلامتها من لكيتيها و ما متأذية، اني راح اوصي واحد اعرفه يسجلها ويا خط .. كومو

اخذت ايد اختي ورجعت .. لكيت سيارة ابوي بالباب
حجه الشيخ ويا ابنه :- هاي السيارة المن اللي ابابنا ؟

دنكت راسي ، يالله بشارة ولا مصيبة دخيلك ربي والله بعد ما بيه حيل هبطات .. نزلت و ايد اثار بأيدي

نزل من السيارة ابوي ، سبقني الشيخ و هو يكله :- السلام عليكم

اسماعيل :- و عليكم السلام منو انت و صاعد ويا بناتي

الشيخ :-، الحمد الله البنات طلع الهن ابن اني جنت اعتقدهن يتيمات ما معقولة اثنين بنات بهالعمر مذبوبات بالشارع و الهن اب

- جاي تستهزئ حضرتك

- لا استغفر الله بس الحجي مو ع الباب، خلينا نكرمك و نحجي

- ما الي حجي وياك، جاي على بتي

- من حقك ، اخذوا راحتكم يابه، يلا بابا منتظر فوت جوا ، سوينا العلينا لوجه الكريم ما يضيع شي بوجه .

اخذت اثار و دخلت للبيت، فات هو ورانا :- التفتت اله:- اسامة وين ؟

- جاي ادوره ، شلون تعوفين بيت عمج و تشردين ولج

- عميش هءا هم حاسبة عليه عم، صربني و ضرب اختي و فوكاها يريد ٢٥٠ مقابل يخلينا نعيش ابيته و الغريب كعدنا ابيت كامل ب٢٠٠ و تكلي عم

ضربني راشدي:- صايرتلي مثل امح ولج تكو**** بالشوارع

- تطلع من البيت يلا ما اريدك هناااا

لزمني من راسي :- وتعانديني ولج ولجن والله اليوم اصلخجن كحااا** دخلنا للبيت و لزم الجفجير و كرمعنا تكرمع من الضرب و احنا بس نتصارخ و نبجي

من ادفع بيه هو اقوى مني يرجع يضربني اضعاف و ياذيني، ركضت اثار من بيناتنا و شردت لبيت الشيخ

و ابوي يصيح :- اليوم اطلع سوتلف امج من عيونج تريدين تصيرين مثلها سااااااقطة

لميت نفسي بين الحايط و التخم و ابجي .. و يصيح ويضرب :- تبوكين غراض بيتي و تشردييييبن ولج

اندفع الباب و فات مرتضى لزمه، و يدفع بيه، طلعه برا اسمع صوت ابوي يتصايح برا وياهم و يهدد بالشيخ
لحد ما راح من البيت

كعدت ابجي، اجت اصار حضنتني، لا الشيخ. لا ابنه دخلو، دزو رقية تسأل على حالنا .. شوية وراحت

قفلت الباب .. و بيومها صدك انهاريت .. ضغطي هبط و راسي يوجعني .. تمرضت حيل نمت بالفراش لزمتني صخونه و فلاونزة و البجي ما فاركني
احس بروحي فكر وين ما اروح المشاكل وراي

بقيت يومين بالفراش كوة اداري اثار، حتى الشيخ بعد ما اجا ولا شافنا مدري شسمعه ابوي و كف من عدنا

مرت هالايام ثكال على كلبي .. خالد ماكو ، اسامة ماكو ، وحيدة لا اب لا اخ لا سند اني و طفلة بس
كلش تعبت من المسؤلية وحدي
تعبت نفسيتي حيل

فلوس تقريبا خلصت ما بقى عندي غير ٢٥ الف و الايجار بعدله ١٤ يوم يلا استلم .. شتكفي و شسوي ومنين اجيب

اضطريت اطلع للسوك و ادور بلكي احد يقبل اشتغل وياه، افتريت محل محل، محد يحتاج عاملة حتى لو باليوم ٥ هم ارضى بس خل امشي اموري

افتريت لما تعبت.. لكيت محل خياطة، سألته :- يولد تحتاح عاملة

باوعلي :- شتعرفين

- اعرف شوية و انت علمني و شيطلع من ايدك راضية

- انطيج يومية ٣ الاف ..

-خليها ٥

- من اشوف شغلج يلا ازيد

- ماشي بس اني عندي كلية يعني اجيك ورا الظهر

ما قبل، بقيت اتوسل بيه و لحيت يلا رضى ..
اتفقت وياه من باجر ابلش

رجعت للبيت .. نظفت البيت بالليل و طبخت الاكل لباجر حتى اثار تاكل و كملت كلشي و نمت، ثاني يوم كملت جامعة، رجعت للبيت بس تغديت .. ومشيت للسوك

الولد يطلع عمره ب٣٠ سنة، جسمه ضخم ، و عنده طبره بحاجبه ، بالمحل اكو عبايات و كلابيات مخيطة ومكينة جبيرة مخليها بالمحل ..وجوا اكو غرفة صغيرة للخياطة بيها مكاين ثانية تختلف، المكان يسع ل ٣ اشخاص و تقبط

وكف هو علمني ع الادوات، بس ما اعرف ليش كلبي خايف و ما مطمنة احس متوترة يمكن لأن المكان صغير و بس اني وياه

سويت اول قطعة مثل ما علمني هو، كال :- ممتاز

كملي على هالنبط و سوي اللي كلت الج عليه، كعدت اشتغل و هو طلع برا ، كملت الشغل الكالي عليه ل٨ بالليل يلا رجعت للبيت وياي ٣ الاف بس
احسن من ماكو

اثار عد بيت الشيخ لزكت برقية ، ورقية ابتلت بهاللغوية الله يساعدها يمكن ساطرة راسها من كد الحجي اخذت اثار ورجعت للبيت

لثاني يوم .. نفس النمط .. كملت ورحت للشغل
وكف هو يعلمني شلون اكص .. بقى يرتب القماش ع الميز .. بس ما ارتاحيت .
احسه كلما يتحرك يطخ بيه عمدا

كلت يمكن ميدري، وكف و كال :- يلا جربي تكصين
وكفت و هو وراي، ملت ع الميز و اني اكص، احس الولد حشك روحه وياي صار قريب مني حيل

باوعتله و كلت اله :- بس العفو ابتعد ما جاي اعرف اكص

- اها يلا اخذي راحتج مو اني لمصلحتج

بقيت اكص، حجه :- لا لا مو هيج
ورجع حشك روحه على جسمي و عود يدنك بس لطش جسمه وياي حيل
دفعته من عندي حيل :- ترا عيب هاي الحركات واني مثل اختك و امنت بيك و اشتغلت عندك

- شسويت على كيفج عمي اعصابج ، شسوينا

- تعرف كلش زين شسويت وخر منا

- كملي ويزيد اجرج

- لا والله ما خمنت اني مو مثل اختك حتى ابيع نفسي على مود فلوس

بس حجيت هاي الكلمة دفعني ع الميز و لزم ركبتي حيل و هو ذاب نفسه عليه و يكول :- اختي مو شريفة مو

- اذا انت ما تقبلها على اختك تقبلها عليه ليييش وخر منيييي

- متخيله تكدرين اطلعين و انت مفشرة عليه، لا يحلوة لا تضنين

- وخررررر منيييييي دفعته .. اندفع ع الباب ابتسم بحقارة و قفل الباب.....

☆☆☆☆☆

#اتمنى_ان_افعلها


الحلقة_55

" ‏وليس الذي يجري من العين ماؤها
ولكنها نفسٌ تذوبُ وتقطرُ".

..........

- شوف اذا ما فتحت الباب و خليتني اروح، الا والله اصرخ و الم العالم عليك

- انت التشتهرين، صيري عاقلة و تربحين

تقربلي دفعته :- ما تهمني الشهيرة ما الي محل بالسوك حتى انشهر و اخسر، بمجرد ما اطلع منك تنتهي فضيحتي، افتح الباب ، لا تخليني اخزيييييك

دفعني للميز يحاول وياي، كمت اصرخ :- يااااااااااااااااااا نااااااااااااس الحكووووووووووولي ياااااااا ناااااااااااس

كام يسد بحلكي ، دفعته من عندي حيل و كمت، الباب اندك، ولد كام يصيح :- نور صاير شي شنو هالصوت

كمت اصيح :- الحكووووووولي

اريد افتح الباب و هو يجر بيه و يحط ايده على حلكي بس يريد.يسكتني، كمت ادافع و اضرب بالباب برجلية، صوت الحركات و الحس المخنوك سمعه الولد
كام يدك بالباب حيل

هو يسحب مني، كدرت احط ايدي ع السركي، بعدني هو جريت السركي بأيدي بحركة سريعة .. انفتح الباب، الولد دفع الباب و كال :- شدا يصير نور معقولة انت

- اخوية الحكلي والله هذا يريد يعتدي عليه الحكلي فدوة

وطلعت من المكان بسرعة ابجي، و ابو المحل شمرها براسي يكله :- جذابه هي لأن ما زودت الها اليومية دا تسوي هالسالفة عليه حتى تسقطني

- ما اكول بس حسبي الله و نعم الوكيل عليك
حجيتها و الولد كام يتصايح وياه، عفت المحل و طلعت ابجي

رجعت للبيت كلش متضايقة، اثار يم رقية ما جبتها عفتها، دخلت البيت، كعدت صفنت ويا روحي
شجاي يصير بيه ؟ كالتلي امي اخذي حقج من امجد و ما قبلت اطلكني الا تاخذ حقي و اني الوكفت و كلتلها اني مو سلعة و رفضت اخذ شي عفته براحته هو الينطيني تالي كلشي ما حصلت غير الهم

خابرت امي و اني ابجي، هم زين موجودة و ردت عليه، اول ما فتحت كاميرا، باوعتلي ابجي :- خير يلطامة هم تبجين شكو

- هو شنو الاكو حتى افرح و ما ابجي طلعت روحي والله

- من شنو ؟

- من كلشي
سولفت الها الحادث
كامت ترزل بيه و هي تكلي :- ولج يغبية فلوس اسامة مو عندج ؟ وينهن ، ليش تشتغلين و فلوس اخوج يمج

- اروح اصرف فلوسه و اخلي، اني مأمنتهم يم دعار ما الزمهن

- لعد احسن هيج ذالة روحج لزبالة الشوارع على مود كم الف ولج انت راح اتجلطيني يمة ، فلوس اخوج يمج استخدميهن ، هو لو درى صاير بيج هيج يتخبل عليج لان مشتغله بدل ما صارفة فلوسه

- هو وينه راح اجن صارله اكثر من ١٠ ايام ما مبين والله عقل ما ظل براسي وين اروح و المن اشتكي

- ابوج مو كال اني راح ادور عليه ؟ ما خابرتي

- من خ*** بابوي، يا ابوي انت، ابوي صف ويا الارهابيه و كل اللي جاي يصير ويانا بسببه

- اني لازم ارجع ما اكدر اعوف اسامة لازم ارد و ادوره

- ولو رديتي وين تلكي، تعرفين احد يساعدني انطيني رقم لو دليني على احد ترى والله ما بقى عندي حيل

- اعرف وين و ادليج بالي كله يمكم، كومة ملايين صرفت هنا، اخاف ارجع و اخسر كلشي و كعدة هنا و انتم هناك بعد ما اصبر عليها

- كملي و طلعينا منا خلينا نعيش والله مليت الحياة هنا ويا ابوي و امثاله، بس اوووف ما اكدر اتحرك و اخوي مفقود .. جذب ما اكدر اخطي اي خطوة

بقينا نحجي و نشكي نص ساعة و سديته منها، رمشت ع الحجية، شوية و اجت اثار تركض، دكت الباب ، كمت فتحته الها، و شغلت صوبة و كعدتها.

بال٥ ملايين ضامة عد عذراء فلوس اسامة ابالي اشتريله سيارة، بس هو ماكو و استحيف اصرف منهن احس جاي اكل حقه و تعبه، بس ما عندي غير حل ، قررت اسخب منهن كلما احتاج فخابرت عذراء و كلت الها :- حضريلي ١٠٠ باجر اخذهن وياي

كالت :- ماشي اجيبهن وياي

اخذتهن و بقيتهن عندي اصرف منهن شوية شوية، الشيخ بعد صياحه ويا ابوي احس تجنبنا ما يريد يدخل روحه بمشاكل عائلية خصوصا ابوي رفض تدخله بينا، هو احترم كلام ابوي.

كل باله ادمي ما يدري بيه خنزير نكس
لا والله حتى الخنزير ما يسوي مثل سواياته، مرات نهين الحيوانات من انشبهن ببعض البشر ، لأن حشا مو بشر شياطين.

من بعد خمسة ايام من هاي الاحداث، جنت بالكلية، دك موبايلي بالمحاضرة، مخليته سايلنت ، ما رديت
الاتصال انعاد مرة و اثنين و اتلاثة .. ٦ مرات
انقلقت .. ممعقوله احد غريب يتصل هلكد

الا واحد غريب، كمت احوص، معقوله خالد ؟
لو خبر من اسامة ؟ .. اباوع للدكتور يشرح و هذا الدكتور نحس بس احد يخالفه يعاقبه و اني ما ناقصة

بقيت كاعدة على اعصابي .. اجت رسالة ( ديار افتحي خط اني اسامة )

نشغت بنص القاعة ، بساع خابرته ، كل الطلاب انتبهو، و اني اكول لعذراء ، اسامة هذاااا اساااامة
دموعي كامت تجري من الفرح

الدكتور يصيح :- هدووووء

وسام :- العفو استاذ اخوها مخطوف صارله فترة وكلش ادهورت امورها بسبب اختطافة و الظاهر خابرها

رد... :- الووو

كمت من مكاني :- الو حبيبي
اريد احجي من البجي ما اكدر بعد ، هو كام يبجي وياي ، القاعة التمت علية، الدكتور اتقرب يمي و كام يمسح على راسي ويكلي

:- الحمدلله على سلامته بابا، اخذي راحتج وروحي شوفي اخوج، حتى اكمل المحاظرة مع زملائج

كمت من مكاني، عذراء تعذرت و طلعت وياي، تبعها مهند وراها وسام .. و اجت مريم

وكفت احجي وياي:- بس كلي انت وين ؟

- اني ابيت عمي، كالي اجت لهنا و شردت ، رقمج حافظة و خابرتج من رقم محمد .. انت وين

- اني بالجامعة ابقى مكانك راح اجيك

- لا تجين اني راح اجيج

قفلت الخط منه و اني اصيح من الفرح حضنوني عذراء و مريم و هن يبجن وياي و يباركولي وسام بمكانه واكف يصفك من الفرحة و مهند يضحك

باوع الوسام كاله :- انت شكو تصفك عرست امك

كمنا نضحك بصوت قوي، طلعنا بالسنتر و مهند يهوس بوحدة

للزين تنعنى و نهد
وحزام كلنا ويا نشد
واعداك نمردهم مرد
.... وصاح ها ولكم هااااااااا
اليوم نغيم و نمطر حالوبه
اليوم نغيب ونمطر حالوبه

والشباب على حس الطبل خفن يرجليه كامو يدبجون وياها و يصيحوون هوووووووووووو اييييييي
ويدبجون برجلهم ع الكاع حيل سووها ترابه

شكد فرحت بهذا اليوم يا الله

طلعت برا انتظر اسامة، و اباوع بلكي اشوفه، من بعيد لمحت طوله و هو يمشي باتجاه الجامعة ، طارت بفرحتي .. ما احس امشي لا الهوى شايلني و اني امشيله بكل فرح

اخذته بحضني مو كن لميت اخوي، لا ابني ولكيته ، دموعي ما سكتن من الفرحة و هو يبوس براسي و بكصتي و مشتاقلي حيل

طلعلي وسام :- اصعدوا يلا خل اوصلكم

عذراء:- اني وياكم

مهند :- جا شني امي كملتها بكعة و ما تاخذوني وياكم ؟ سرسرية

ضحكنا، مهند صعد ليكدام و اني و اسامة و عذراء صعدنا ليورا، كعدت بالنص، مريم خطية بقت بس تودع بينا ما تكدر تطلع ويانا اهلها ميقبلون.

بقوا يسألون اسامة و يحجون ويا بالسيارة و اني اسئلة، نغزت اسامة .. ان لا تحجي
لان هم صدك اصدقائي و ما اضم عليهم شي بس ما كايله لاحد ابوي ويا ارهابي لو يشتغل ويا الارهابية دتصير السمعة علينا مو على ابوي، و تصير الناس كلها تتجنبنا.

فهو جاوبهم اجوبة مختصرة، من عرفوه تعبان سكتو، صف وسام على مطعم ، نزل مهند . ما فات ع المطعم راح يمنى واحد يبيع سمج مسكوف اخذ النا ٣ سمجات سلفنهن و صعدهن بصندوك السيارة

صعد و هو يكول :- ترستهن دبس رمان اليوم اثرد بالخمسه اليوم
ضحكنا ، و تشكرت من عنده

ومشينا ووسام مشغل اغنية ( ها ها يم الولد ) و هو يهز السيارة يجيبها منا و يردها و احنا كأنما جلي نتهزهز وياه



ومهند خلصها يطك اصبح و يهز جتف و يغني و عذراء تصفك وياه و تغني ، و اني بس اصفك

اسامة مبتسم وهو يباوعهم، اخذت ايده عصرتها و اني اكوله :- تكحلت عيوني بشوفتك والله هسه ارتاح كلبي

-مشتاقلج والله ، وين كاعدة انت؟

-اجرت ابغداد الجديدة يم بيت ابن عم وسام، غرفتك فوك محجوزة ما لازمتها منتظرتك تجي و تضوي البيت

-فدوة الج حبيبتي

وصلنا للبيت، وسام ومهند وكفو بالباب و اني و اسامة دخلنا، عذراء دخلت وراي، دكوا الباب على بيت الشيخ ، طلع الهم مرتضى الشيخ ما موجود

جابة مرتضى و اجو للمشتمل مالتنا، وكف الهم اسامة و رحب بيهم، سويت طماطة و بصل زلاطة اني و عذراء وودينا للهول كلنا كنا كعدنا ناكل

جاي ناكل وصف الخط مال اثار، دخلت للبيت ، هي شافت اسامة و هي صرخت :- اااااااااساااااامة

كام الها حضنته حيل وتبوس بيه و تصيح :- مشتاااقتلك مشتاااقتلك هوااااااي هواي

صحت الها كعدت يمي كمت افلس الها سمج و اخلي كبالها و ناكل، كعدة سوالف و ضحكنا واصل لاخر الشارع من ورا سوالف مهند

كملوا و كامو ، كالو :- والله كعدة حلوة لو نعيدها

عذراء :- اي على راس السنة مبقاله هواية نطلع فد مكان و نتونس والله اتفقولنا على طلعة

وسام :- شكد بقى على الكريسمس ؟

مهند :- يمكن ٦ ايام مو ؟

ديار :- اي

عذراء:- زين لعد اتفقنا بكرسمس نروح للكورنيش شرايكم ؟

وسام :- اني مستعد

اثار :- اني اروح ترااااااااا

ضحكوا ، دنك عليها مهند و كمبص يمها :- اذا خطيبتي متروح منو يروح لعد ديار العوبة ؟

ضحكت و عدلت شعرها :- انت تحبني ؟

ضحكنا كل احنا، ووسام يكول :- هاي تطلع خطيرة

مهند :- غير اموت عليج منتظر شوكت تخلصين مدرسة حتى نتزوج

اثار كامت تتموع بمكانها و تكله بصوت ناعم :- يعني راح تجيبلي هدية بكرسمس

مهند :- بدينا بالسالفة المو زينة، جا ولج مو من هسه مصيتي دمي انطينا صاول

ضحكنا، و اسامة صاح بيها :-، هيييي فوتي جوا يلا

سلموا علينا و طلعو، سمعت الشيخ تلاكا وياهم ع الباب، سديت الباب و دخلنا :- اي اسامة سولفلي شصار وياك

دخلنا و هو يكلي :- حبسوني كل هالمدة بمكان مهجور اجوني كم مرة ضربوني حتى اعترف بشغل ابوي و اصدقائه ..بس ما اعترفت .. عذبوني كم يوم وبعدها نسوني ، البارحة شالوني بسيارة و شمروني بالشارع
رحت للبيت مقفول ، رحت لبيت عمي .......اندك الباب

طلع هو للباب، سلم عليه الشيخ و تحمدله بالسلامة، و بقى يسأله هلى اللي اختطفوه و شحجو وياه و شرادو ..

بالربع ساعة اسامة بالباب، خلص دخل للبيت ، كال :- هءا الشيخ منو ؟

- صارلك ساعة تحجي وياه و ما عرفته ؟

- لا والله

- ابن عم وسام اللي اجرلنا البيت

- صدك بيش اجرتي بيت

- ب٢٠٠

- بس كلش زين البيت يخبل

- هو تساهللنا ايجاره ٥٥٠

اجت اثار حضنت اسامة من خصره :- يبعد عمري يبعد عمري مشتااااااقتلك

ضحك هو و باسها ، كلت الها :- ميعاد عيوني اكعدي راحة

رفع راسه اسامة:- شحدها ، والله اذبحها ع القبله لو صارت مثل امي

ديار :- شنو هالاسلوب شو صاير حجيك بالذبح ؟

- كافي علينا امي

- حجيتها بضحك حبيبي روح ارتاح

فات للغرفة و نام ما كعد بعد ..
احس كلبي طمأن برجوعه، هم و انزاع عن گلبي، اخوي بالغرفه نايم سالم و ما بيه شي .. يا فرحتي

ااااخ يا فرحتي الجبيرة بخالد
شوكت يرجعلي، والله ما اريد منه شي غير سلامته
خشمه يشتم الهوى كافي علية.

اشتاقيتله .. بقيت اكلب برسايله
يمكن من غاب لليوم اني بالاف مرة مراجعتهن
باليوم اكثر من مرة اعيدهن .. حفظت كل كلمة بيهن
و كل فويس اله اعيد بيه هواي و من اسمع كلامه و نبرة صوته اكوم اتخبل و احن و اريده هسه وما الكاه

.... مرت ٥ ايام
اتفقنا اني و الشلة نطلع بيوم كرسمس نحتفل، خاصة على مود اثار طفلة تعقدت من المشاكل و المصايب اريد اطلعها اونسها تنسيها كل المرينا بيه حتى تفرح

وكعدت احظرلها بهالايام .. قراصاتها ولبسها و الطوك و كلما اكعد امشطلها و اخلي راسها على ركبتي تبقى تسألني شحنسوي و شحنسوي
واني اسولف وياها و امننا .. واشتريلج هيج و اركبج هيج... و هي فرحانه

اللوكية روحي و اعزمي رقية بت الشيخ و كعدت تسولف الها .. هيج ديار راح تجيبلي و هيج راح توديني

اجت رقية للبيت مالتنا، كالتلي :- اءا اقنع بابا اكدر اروح وياج بكرسمس ؟

صفنت بوجهه :- اي هلا بيج حبيبتي تعاي

راحت متوسله بأبوها وواكعة بركبته الا توافق، اخير شي كال الها :- تاخذين مرتضى وياكم غير هيج ماكو روحة

اجت تخبرني ، بقيت بموقف محرج .. هو احنا طلعة اصدقاء وكوة دحست اثار ويانا ، اروح اجيبلي جيش جرار وراي ؟

خابرت عذراء حجيتلها .. كالت :- و شكو بيها قابل راح نشيلهم فوك اجتافنا خليهم يتونسون بالكورنيش ونحدد مكان نلتقي بيه كلنا .. وموبايلاتنا ويانا اليضيع نخابره.، عشنو منحرجة بعد

ومن ثم هم يصيرون اقارب وسام يعني بركبة وسام مو بركبج

- اي هم صدك

- يعني بهالحالة العشا على وسام لأن اقربائه اجو ويانا مو ؟

- اي اكيد قابل شعلينا باقربائه

- بقى مهند شلون نقفص عليه ؟

- يشتريلنا عصاير كل احنا

- اي صح حتى اذا باردة يشترينا جبس بتيته مو صحيح؟

- كلش صح

- و احنه ؟

- اني اسوي جدر دولمة

- كلش زين و اني اسوي كب كيك الدبر بيدي و نجح جايبتلكمياه و جايه و الما نجح عادي غلسوا ولا تسألوني شطبختي

- ها هيجي يعني كولتج ؟

- اي غصبا عليج ، بس ها داري الدولمة زين حتى اذا فكس الكب كيك مالتي اكوم اتباها بالدولمة مالتج عليهم بما انو احنا اثنينا بنات

- يعني قصدج الكرعة تتباها براس اختها ؟

- طبعا

- زين واذا اني بعرتها و فكست الدولمة بيدي شسوي؟

طكيناها ضحكة اثنينا، كالت :- الحرمة بشارب الخير مجبورين بينا، بعد شنسوي هذا اللي الله كتبه عليهم

كمنا نضحك بقوة

طلعت للسوك مرتاحة فلوس الايجار مستلمته ..
اكبر متعه للانسان من يحصل الفلوس بجيبه و يحس عنده بعد ما جان بضيق .. صدق رب العالمين لما كال ( المال و البنون زينة الحياة الدنيا ) شكد ما الاطفال مهمين بالحياة بس الله قدم المال لحب الانسان للمال اكثر من الاطفال .

اشتريت كل مواد الدولمة .. وسويتها و دعيت الله تطلع طيبة .. كملتها و ضنيتها بالثلاجة ..

ثاني يوم كعدنا .. 31/12/2013 .. يوم الاحتفال
اتفقنا بالجامعة قبل يوم .. انو هاليوم منجي وكلنا غبنا
بس اثار راحت للمدرسة
اقترحت على اسامة يروح ويانا وكوة يلا قنع
اريده يطلع من الحالة الهو بيها كل الوكت صافن ما ادري اشاف و شعذبوه حتى هيج صاير

حولت لبيت الشيخ حتى اشوف رقية اذا مكملة ، الشيخ ما جان موجود .. فدخلت الهم عادي لكيت خوات الشيخ ملتمات يم امهن براس السنة
سلمت عليهن و تعارفنا و دخلني جوا

فتت ع الحجية سلمت عليها ، لكيت رقية تتوسل :- بيبي الله عليج الله عليج والله ما اكول لبابا

الحجية :- ولج استري علينا ارقيوه لا يسمع ابوج غير يهججنا والله، الا يذبحنا

ديار :- شبيها

- تريد تلبس بنطرون و فوكاه جبه و هناك تنزعها

- اي واذا شبيها، ترا هو احتفال و هي صغيرة ، مو اني محجبة و لبسي بنطرون و قميص شبيها ؟

- ابوها ما يقبل يمة ، مو زين و قبل تلبس جبة الا رادها عباية يكول المرة الزينة تقتدي ببنت الرسول و حشمتها، مو بالتركيات و البنات المعرايات البتلفزيون.

- بعد بكيفكم

بقت تتوسل ، بيها صفة مثل اثار لو رادت شي تكعد تلح ما تفك الا و هي ماخذه التريده، بيبيتها وافقت
كالتلها

:-البسي لبس مستور مو ضيك و حجابج عدل لا كذله طالعة و لا من الصدر صاعد والبسي جبة فوكاهن و اخذيلج علاكة حلوة مال دعاية وياج من توصلين هناك نزعي الجبة و ضميها و من اطلعين لبسيها

وافقت و كامت توصيني عليها هواي ، عمتها ما قبلت كالت الها :- شلج بهالسالفة يمه لو درة صادق والله يكلب الدنيا فوك روسنا

حجية :- شسوي يا يمة ما تشوفيها لزكت براسي هم بنية خطية حالها حال هالبنات تلبس كلهن لابسات هالبنطرون و هي اصغرهن متكمطة بجبه .. هم خطية

رقية كامت تبوس بعمتها و تقنعها و عمتها توصي بيها

الا ان وافقن .. اجا الشيخ كال ( اني اوصلكم للكونيش ) كلت بكلبي بعد احسن يوفر علينا كروة التكسي

اخذت اثار و اسامة و جدر الدولمة و طلعنا، مرتضى و اسامة انحصرو ليكدام كعدوا ..و اني و رقية و اثار ليورا ..

هلكد حجه ، الطريق كله جابه يحجو ( منين تجيبون هالسوالف و شنو احتفال سنة و اندارت شنو ابتلت على عمرها من اندارت تخبصون الدنيا بهال طكطاك)

جاوبته :- بابا هم نريد نفرح شوية اذا دورة السنة مالتنا نلبس اسود و نجيب ملايا شوكت نفرح يا بابا

جاوبها :- ولج بابا عندج عيد الاضحى ٤ ايام و الفطر ٣ و عيد الغدير و افراح شعبان كلها ما كفتكم الا بهاي و طلعتكم بعز البرد .. شموازيكم

رقية :- عاد كلش بابا اليسمعك هسه يكول مشبعنا طلعات بالاعياد لو ما يمر العيد و احنا ما نشوفك .. خلينا نفرح يا بابا

كام يهز براسه ما قابل، ندستها :- اسكتي هسه الا تجاوبينا خلينا بس نوصل

سكتت عاد هو كلبها ع الصور المعلكة .. و ع السياسة و اسامة و مرتضى يناقشوه ، و هم واحدهم صاير بعيجي مجعوص

كوة بألف يا الله وصلنا و تحررنا من سيارة الشيخ الحمدلله كلت ما راح اوصل سالمة الا يطك عقلي و انتحر من الشباك على كد ما حجه ولام بالوضعية

نزلنا .. للكورنيش و هو يوصي، فتنا للمتنزه
رقية نزعت الجبة ..اخوها ما رضى ، قنعته اني و كلت اله شوف لبسنا خطية عوفها. عاد قنع و سكت

خابرت على الشلة ... عذراء كالت اني وصلت
ووسام و مهند بالطريق ، دخلت الي عذراء تباوسنا

طلعت الي العلاكة و شوفتني الكب كيك مسويته زين ينطلع بيه مرهمته بالكريمة و m&m اللي مزينته بيها

عذراء :- وانت وين الدولمة مالتج سويتيها

- اي سويتها..... ويا ما حجيت اتذكرت نسيت الجدر بالسيارة مال الشيخ ، صحت :- عزاااااااا ولج نسيتها

- لا من صدك بعرتيها

ضحكت ، بس ضجت .. لا والله شلون سويتها خرررب

- دمشي امشي
مشينا، التقينا وسام و مهند .. التمينا كلنا كعدنا نسولفو نضحك ، اسامه استلطف مرتضى هواي و حبو بعض ، رقية صفت ويانا اني و عذراء
واثار ايد بأيد ويا مهند و كله يصيحها ( مرتي ) ما بقى عصير جبس بتيته، عرنوص مشوي .. حتى دبدوب اشترالها

وهي فرحانه وياه، ردت امنعها بس شفتها صغيرة كلت خل اعوفها ، خاصة مهند اعرفه شنو هو و شنو طينته

نزلنا نلعب بالالعاب .. صعدنا و تونسنا .. غير ننزل من سفينة نوح و الكا الشيخ كبالي لاكي الجدر و راجع جايب النا ياه

راد يغمى عليه من الصدمة، بعمري ما تحذرت من رجال هيج و رقية وراي ردت اتخربط .. شكول و شحجي، وين اضمها

هي ما تدري تحجي ويا عذراء و تحجي باوعلها و خزر، صاح :- ررررررقية

خطية من شافته خرطت العافية، كامت تتلزم بيه ، اخذتها و نزلنا من الجهة الثانية

كال الها :- كبالي بالعجل

وكفت :- شيخ الله عليك لا تحجي وياها والله من شافتنا كلنا هيج لابسين رادت مثلنا، و هنا يلا نزعت

- امشي بنتي

عذراء :- خير شكو

وسام :- هلا ابو مرتضى

الشيخ :- جان المفروض انت لو اخوها ما تقبلون ، بتي تمشي بالبنطرون بنص هالعالم شلوووون ترضاها ؟

بقى يخزر بيها و بمرتضى، وسام تصداله و بقى يحجي وياه و ما قبل يطلعون كاله :- ازعل لو خذتهم والله، هسه تلبس بس لا تفكس فرحة البنية خطية

لبست جبتها و هو يكول :- ام اثار جان المفروض تمعيها لان وصيتج بس مع الاسف عليج

- وشسوت شيخ اذا تعتبر هذا اللبس مال بنات مو زينات فمعناها احنه مو زينات لان احنه مثل لبسها

- و ترديني بعد ، مو صوجج صوجي اني الامنت بتي وياج

- ليش شكالولك عليه شسويت بيها حتى صوجي ، ميصير هالكلام ترا

بقى وسام يهدي بيها ، و هو يكله :- اني لو ادري تلقون هيج جمعات و اصدقاء و هالسوالف جان ما قبلت

كاله وسام :- محد غريب ابو مرتضى بس مهند و مهند خوش ولد اني اضمن الك اخلاقه

كوة قنعه يلا راح، بس راح و هو داير وجهه عني .. ضاج من كلامي وياه.

راح بس بعديش، بعد ما فكسها للطلعة كلها خرب كل مودنا .. رقية تضايقت و مرتضى ضاج لان عرف ابوه عصب عليه ، و اني كلبت وجهي

وكف مهند :- استااااااااااااااااااااااعد

باوعناله :- الى الورااااااااااااااااء دررررر

وسام :- اجته الحالة عوفوه

كومنا ووكفنا بالسرة .. ووكف كبالنا و صاح :- تقدممممممم

طم ططن طم ططن طم ططن ويحرك بأيده مثل الجيش و احنا وراه نضحك

مهند :- هاااااااا خوتي هاااااااا

صحنا - هاااااه

- اوجعاه امشو كلبتو وجوهكم جنكم وحدة متعسرة عدها الولادة

ضحكنا ووسام يكله :- لازم ميجيب نسوان انته حتى شايف وجوهن ساعة الولادة

- لا جاي اتخيل وجوهن مثل وجوهكم

ضحكنا بصوت عالي ، ومشينا وياه ، رحنا ع الكورنيش لمينا كلنا و صعدنا باليخت .. و صوتوالاغنية كلش عالي باغنية ( بالدم نفديها )



الاغنية حماسية و عالية واحدنا من كيفه يهز براسه ، و اثار لعبت لعب بالركص ، اسامة يصيح بيها و هي ولا جنها .. كابلتها طفلة لخ ..و كامت تركص وياها
شباب و بنات ورانا ضربو صعادات بالجو
كلنا بقينا نباوع و نصفك و الالوان ما الصعادات تتناثر كلش حلوة

باوعت اسامة مبتسم و متحمس هو و مرتضى و يصيحون و يصوفرون، شكد افرح من اشوفه فرحان

طلعت اغنية كردية، وكف مهند ووسام وشباب دبكة يدكون دبكة كردية و كلها شاركت .. محد بيهم يعرف الدبكة الحقيقة بس متجاتفين ويتحركون
مرتضى و اسامة شاركوهم

جانت الاجواء كلش حلوة ، بنص فرحتي تذكرت خالد، اخذت نفس و باوعت للمي :- وينك انت هسه ؟ عايش ؟ تشتم الهوى ؟ ناسيني ذاكرني ؟
بعز لحظاتي ما انساك و بكل مكان تتراولي و اشوف طولك .. بيا مكان هسه انت
اتمنى تنبتلي اجناحات ما اخلي مكان و ما ادرك بيهن

ساعة و خابرنا الشيخ كال :- يلا كافي اني بالباب تعبت اريد انام

اضطرينا نطلع و نودع الجماعة
صعدنا وياه .. ما حجه ولا كلمة بس مبين عليه عصبي و الحواجب متطابكات و انوب مشغل النا قران ولازم محد.يحجي .. المفروض ننصت و نستمع

صارت السيارة هدوووء بس صوت عبد الباسط عبد الصمد بالسيارة ، والله حسيت روحي بفاتحة كاعدة، خليت ايدي على خدي وبقيت اباوع للشارع

شطح خيالي كمت اسوي افلام براسي و عود زعلانه على خالد و طالعة بالسيارة و متضايقة لا و عود اني اسوق و ابجي .. و عايشة دور التركيات البلمسلسلات

انتبهت الروحي صافنة بالمرايا، المرايا بس عيون الشيخ بيهن، هو باوع اني مركزة بيه، نزل عينه، درت وجهي بسرعة

ديلا .. بس لا عباله اني معجبه بيه و اباوع
يربي هذا هم حظي

وصلنا الباب، شكرته و كلت اله :-شيخ اعتذر لو حجيت وياك بحدة و كل عام و انت بخير

هز راسه و ما رد .. دخلنا اني واخواني للبيت
وبقينا منتظرين الساعة ١٢ شوكت اتصير و طالعين بالسطح

دكت ساعة الصفر و انكلب التقويم .. دخلنا سنة ٢٠١٤
نباوع الصعادات اشتعل الجو كل البيوت شعلت
باركت لاخواني و اتمنيت الهم سنة سعيدة
غمضت و دعيت الله يرجعلي خالد و يرجعه بالسلامة
فتحت عيني المنظر كله الوان يجنن

دعيت ( يا رب تكون سنة خير على العراقيين )

للاسف دعائي ما كان مستجاب،و هاي يمكن كانت من اقسى السنوات على العراقيين .. انتكس بيها العراق و انحنى ظهره على ولده خيرة شبابه الراحو على ادين ناس مجرمين يدعون الدين و الدين بريئ منهم و من امثالهم

مرت الشهور بدايتها هادئة نوعا ما
فتحت محل موبايلات و حاسبات لاسامة تشارك بيه هو ومرتضى يتناوبون عليه و الشيخ ساعدهم

مرتضى طالب، تمنيت اسامة يرجع بس قافل ما يحب المدرسة ما يريد يرجع

امي بس نتخابر وياها كل يومية تقريبا
ابوي ما مر علينا ولا شافنا ابد جان ملتهي ويا جماعته عنا، و العرفنا .. هو من الضباط اللي تخاذلو و سلمو المناطق لداعش .. هو من الاساس جان وياهم ويمثل الوطنية

مرات يخابر اسامة .. بس من سمعته صار ويا الباعو المناطق الغربية كلت لاسامة: احظره حتى من السيمكارت، شنعرف مراقب لا ، نروح نتورط ويا و على ابو احنا نتواصل وياه، بيا وكت هو فادنا نروح نتورط بيه خل يولي

بالفعل .. حظره و بعد ما عرفنا اخباره

اقسى يوم جان .. هو يوم مجزرة سبايكر
ابن سلام اخو الشيخ جان طالب بالقوة الجوية بقاعدة سبايكر ، ما اجا الخبر ان طلاب قاعدة سبايكر صارو بين ادين الدواعش .. تخبلنا
و الفيديوهات انتشرت شلون يكتلون بالشباب و يذبحوهم .. مجزرة حقيقية حانت

ذاك اليوم ما انسى شكل اخو الشيخ و هو فاقد و يدك على راسه ويصيح:- يهالعالم ابني رااااح راااح

ما اعرف ليش تخيلت خالد وياهم و هذا زاد الامر عندي، صرت اتخيل خالد هيح سوو بيه و اكتل روحي بالبجي و اباوع الفيديوهات النتشرت و عيوني انعمت من البجي

جان يوم الله وحده يعلم شلون مر ع العراقيين و على عوائل الشهداء و المفقودين .. امهات تصرخ و انين نساء مكسورات و حزن اطفال يتامى يباوعون بعيون اهلهم و يدورون اخبار ابوهم

١٧٠٠ بيت انهجم بذاك اليوم ، بركبة منو ؟

القادة كل واحد بيهم يتهم اللاخ، ووجوهم اقذر ما خلق الله.

منظر العوائل و هي تنزح يزلزل القلوب
بصحاري نساء تسحل بجنطها و رجال شايلين اطفال
متجهين لمستقبل مجهول .. بعد ما تهجروا ببيوتهم بأسم الدين

الأسلام .. رمز السلام
حولوه الى رمز للارهاب بأفعال الله ورسوله ابرياء منها،
يقتلون الشيعي و المسيحي بدم بارد بحجة كفرة و يهجرون السني و يقتلوه لو ما رضى بأفعالهم بحجة هم مرتدين .. وبكيفهم و على مزاجهم يصنفون الناس بطائفية و عنصرية مقيته

اقبح وجه للاسلام كان يتمثل بيهم
لا عذرا .. الاسلام بريئ منهم

... اتقربت الدواعش و صارت تجتاح الاراضي
و الجيش و القوات الامنية في تراجع .. الى ان وصلوا لحد اطراف بغداد

انشوداتهم كانت ترعب النفوس و هم يصيحون ( قادمون يا بغداد ) و ( احنا تنظيم اسمنا القاعدة نكطع الراس و نجيم الحدود )

طوقوا بغداد من ٤ جهات .. جان الخوف يتملك العراقيين اجمعين

في يوم الجمعة .. صدح صوت من مرقد الامام الحسين يدعو الناس للجهاد ..

الجوامع و المساجد و الحسينيات كلها كبرت للجهاد
صار الشعار يتردد بالجوامع ( حي على الجهاد )

الناس ما جانت تملك شي تخسره، الارهاب ع الابواب لو سكتو .. كدامهم ياما ينذبحون و تسبى نسائهم و اطفالهم او يتهجرون و تتهجول عوائلهم.

بيومها الظهر اشتعل الشارع العام ، الاصوات تتعالى ب ( لبيك يا عراق ) طلعوا ارجال العراق من كل مكان
الشيعي و السني و المسيحي كلهم توحدوا ضد عدو واحد وهو (داعش )

اصحاب الجوامع صاروا يدكون الباب على البيوت .. يسألهم منو يطلع

الشيخ بنفس اليوم التحق ، ترك وضيفته و طلع قدم للجهاد ، و مهند ايضا ،رغم لما بلغنا ما قبلناله لان ما بقاله غير بس الفاينل و نتخرج و نصير محاميين قانونيين

بس هو ما سمع من عدنا .. عاف الامتحان و قدم على مراكز التقديم للجهاد و راح للتدريب

مرتضى راد يطلع ابوه ما قبل لان جان صغير
اسامة راد يطلع ما قبلت اله .. لان محد الي غيره
و اخاف عليه

اشتدت الظروف بذيج الفترة، كلش ضاقت ع العراقيين
خزينة الدولة فارغة ، و الحكام في خصام ، و العراق خسر غربيته، و خيرة الشباب دا تستشهد و تروح بسبب حماقة الحكام و جشعهم.

صار حتى الموضف ما يملك المال يوكل عائلته لان ماكو رواتب ..

كوة كملت الفاينل و تخرجت .. حتى حفلة تخرجنا جانت وطنية كلها ع الجيش و الحشد .. و ما اتهنينا بتخرجنا لان جانت الظروف كلش قاسية

كلت اله يربي حتى بهاي اني فكر بتخرجي انسبى العراق و تخربطت اوضاعه و فلس ، حتى اذا جان الي امل اتوضف لو اتعين .. من شفت الموضفين اكلهم الضيم شلتها الفكرة من راسي كلش

صرت اباوع فيديوهات خياطة .. اصير خياطة و اكسب بهالمهنة احسن من شهادتي العلكتها ع الحايط

جبت روحي اجاهد حتى اتخرج تالي علكت الشهادة
لا وفوك كل هذا وسام يكلي خل نقدم ماجستير
و هو عذراء قانعين بهالموضوع

كلت اله :- والله هسه لو نطلع دكاتره فلا احد يكلبنه

وسام :- احنا العلينا نجتهد و على الله التوفيق و الرزق يمعودة

بهاي الفترة ام الشيخ بقت وحيدة، راحت لابنها الصغير اسبوع و ما اتحملت رجعت، بقوا مرتضى ورقية وياها

الشيح بعدها وصاني عليها هواي، و يكلي :- حتى لو انطيج راتب الاريده منج يوميه الصبح تروحين لامي تنظفينها و ادارينها طالبها منج

كلت اله :- بعيني صدك جذب هي مثل امي

بقى يتشكر مني هواي

بهالفترة حيل اندمجنا ابيت الشيخ اني و اثار نخلص يومنا يمهم و مرتضى و اسامة صاروا واحد روح بالروح بسبب شغلهم سوية و هم نفس الاعمار

الحجية تحبني و تستلطفني بس حقها جناينها يتعاركن وياها ليل نهاري وياها .. و من يخابرها الشيخ تبجي و تكله اني وحيدة و ما الي احد

وكتها احس بروحي دنكة ما الي نفع .. بس اكول خطية يمكن تحسبني غريبة و حقها عدها ٤ ولد و ٣ بنات و حملها عليه اني الغريبة اداريها
كام حقها تستهضم

وكت لما يجي الشيخ اجازة اني ارجع للبيت و ما اجيهم قلة على كد الحاجة اللي اسويها الهم لان هم عيب هو ما ياخذ راحته اذا احد بالبيت

فمن اجا .. اني جنت موجودة
دخل بزية العسكري و البسطال ، هلكان من التعب و الحر ، سلم علينا بتعد و تمدد بالاستقبال بلا مخدة ولا فراش .. على برودة الكاشي
مبين حيل تعبان

عفتهم ورجعت للبيت بس وصيت رقية توديله مي و تنزع البسطال منه و تشغله المكيف.

..............

صادق :- هاا يمة الله يساعدج

الحجية :- هلا ييمة هلا شلونك يوليدي ؟

- شلوني يا يمة كلبنا خلصان من القهر اعز اصدقاىنا جاي يموتون كبال عينا و بس الله الحافظ
ارواحنا كرهناها

- الله يعينكم ييمه ما تضيج الا تفرج و ان شاءالله بحيل الله يكتبلكم الفرج بجاه الرسول و اهل بيته اليحفظ هاي الكاع و يحفظ اهلها

- ان شاءالله يمة ان شاءالله، شلونج شنو اوضاع

- حال الضيم حالي يا وليدي على الله و على هالبنية الله ينطيها التجيني كل يوم و تكوم بواجبي هم مشكورة الا ولدي و بناتي يمرون مرت الخطار عليه

- يمه افكر بيج و هالوضع ما لازم يبقى هيج

- شني البالك كوله

- اني رايد اتزوج حتى تخليلي مرة اداريج و اداري بيتج

- يوم الهنا ييمة و تتزوج و ترتاح ، تريدني ادورلك اقاربنا و اشوفلك وحدة تناسبك

- لا يمة اني مفكر بوحدة

- مني هي ؟

- ديار ......

☆☆☆☆☆☆☆