#اتمنى_ان_افعلها

الحلقة_52

لحضة فقدانك كانت اصعب من ان اصدقها
احقا رحلت ؟
يمضي يومي لا اراك ولا اسمعك !!
اي ايام تلك ؟
الدقيقة بدهر
والساعة بألف سنة
والوقت لا يمر ..
... ان كنت تشعر بي وبحالي ، ارجوع عد 🖤

............

يعني شنو خالد وينه

- ولج امي راح تتخبل ديار اكلوبنا نار عليه .. خالد بلعته الكاع لا بسما ولا بكاع الله وين نلكا ما ندري اخوتي انعمت عيونهم و هم يدورون اثاره .. خالد اختفى راح امن ادينا ولج ديااار

- لا تكوليها لا، خالد ما بيه شي بتول ما بيه شي

- وين الله و انبيائة يسمع من حلكج ولج والله كلوبنا خلصت ولج متت كلبي اشتعل نار على اخوية
٨ ايام لا يوم و لا يومين حتى لو محجوز و ما كدر يطلع الانبار هم تصيرله ساعة تجيه شبكة و يخابرنا

خالد اختفى لا هو داخل الاردن ولا هو بالعراق
بلعته الكاع بلعته

تحجي بحركة دم، احس راسي ما كام يفسر ، اختنكت حيل .. الدموع انحبسن بعيوني، حسيت بداخلي مو كلب لا صار حجر ويوجعني كلش احسه يريد يطلع من صدري

لا.. هو كال ما اعوفج و ما اقهرج
لا خالد ميسويها ، ميعوفني هو وعدني

سديت الخط منها، خليت ايدي على صدري
الدنيا بكبرها ضاقت عليه
احاول ابجي البجي ما يطلع وياي ..
كلش تأذيت

فتحت محادثته ...
بقيت اراجع محادثته و كلماته و رسايله
كلها مواساة و هو يصبرني و يقويني
بحيت و طلع صوتي و اني اصيح :- منو هسه يقويني بفراك خااااالد
ودنك و حطيت الموبايل على وجهي و ابجي بحركة

باوعت للموبايل، كتبتله
:- فدوة لا تروح
فدوة لا تعوفني
والله ما اكدر بدونك والله اموت
خالد حبيبي فدوة خليني اشوفك متصل و اشوفك كاعد تكتب، ارجع اكتب وراسلني يلا لا تعوفني ابوس ايدك

كل الرسائل ما دا توصل .. بقيت اكتبله :- انت وعدتني ما تعوفني لا تخلف بوعدك والله حرام عليك منو يقويني بعد منو يسندني
كلهم عافوني والله لا تعوفني خالد

حبيبي ارجع والله احبك الله عليك

... ماكو
كمت افتر بالبيت و ابجي ، اجت يمي اثار :- ديور شبيج ؟

- خالد راح

- وين راح

- ماكو اختفى ما دا يبين

حضنتني ، اني حضنتها و بجيت

خلصت اليوم بس بجي و خوف عليه .. اديه بادت من كلشي ورجليه ما الهم حمل يمشون و يشتغلون

اجا اسامة سأل ( شبيج ) ما رديت عليه ، بقى كاعد يمي شوية وكام ،فرشت اثار لنفسها و نامت يمي
كل دقيقة تمر اباوع محادثته بلكت يصير صحين و توصل رسايلي و ينطيني امل ..

.. هذا الليل بطوله عيوني ما غمضن بس يجرن و يراجعن محادثاته، اكو رسائل اله صوتيات يحجي بيهن صوت من افتحهن و يحجي و اسمع نبرة صوته و ضحكته و كلامة، شعر راسي يوكف من القهر اكوم افور .. منين اجيبه هسه و ارجعه .

اكو جمر بداخلي احس نار و مشتعلة بكلبي ، حتى عيوني يوجهني من القهر و الهموم احسها جبال على كلبي
اريد اشكي اريد احجي اريد اصرخ ..
اريد اطلع كل البكلبي بس ما الي احد و اشكيله

ما الي غير الله اشكيله البداخلي
كمت توضيت خليت السجادة و صليت ركعتين و كعدت .. شحجي ويا ربي و شكله ؟
كل الكلام توقف بحلكي و كان الساني انعقد
انفجرت ابجي و دنكت سجدت ..
ما حجيت اي كلمة بس اصيح ( ربي)
صوت البجي مالتي جان كلش عالي ، نسيت نفسي و اني ساجدة و ابجي ، احس اني قريبه منه و يسمعني بس ما اكدر احجي البدتخلي هو يعرف اكتبيت بس اناديه (ربي )

قرابة الثلث ساعة و اني ساجدة و منهارة و ابجي بصوت عالي ،نسيت كل الحوالية، حسيت روحي بقاعة جبيرة و ظلمة و بس نور ربي كبالي و اني ساجدتله و اشكيله

.. حسيت اكو احد حط ايده على ظهري ، و اجاني صوت اسامة :- هاي شبيج ديار ليش تبجين

كمت من سجدتي الشهكة شاكة صدري ما اكدر احجي، بس اشهك ، اخذني بحضنه و هو يطبطب على ظهري وهو يكول :- شبيج حبيبتي منو وياج

بعدني و اخذ راسي :- اكو احد مأذيج احجي

- رجعت حضنته و ابجي بقوة ، اجتافي يهتزن على كد ما ابجي بقوة من كل كلبي، هو احتار بيه و بس يسأل
مسحت دموعي اخر شي و كلته :- روح نام حبيبي عوفني

ما قبل ينام بقى يمي كاعد، اني ابجي بهدوء
حجه :- غير اعرف شبيج

- خالد

- شبيه ؟.

- مفقود صارله ٨ ايام و اليوم التاسع

بقى يباوع بوجهي :- تحبينه ؟

سكتت و دنكت ، و الشهكة بصدري
ما حجه هو، كام من مكانه و بس ، بقيت بمكاني كاعدة مكابله الموبايل و منتظرة الصحين تصير ع الرسايل حتى اعرف وصلن
..كاعده ع التخم و مخلية الموبايل ع الحافة و راسي يمه ... نمت
كعدت على حركات اثار و هي تسحب الموايل من عندي، سحبت الموبايل من ايدها بقوة :- شراااايدة

- العب بموبايلج

صحيت على نفسي، باوعت محادثة خالد الرسايل لهسه ما وصلن، انطيتها الموبايل و كلت الها :- اكعدي هنا لا تاخذينه بعيد

- ماشي

اخذته من عندي وكعدت يم رجلية، بقيت صافنة بدنياي :- شلون لو ما رجع ؟
اكدر اعيش ؟
وشلون اعيش ؟
يمكن هو رايح لسوريا مو للاردن ؟
لا جان راسل حتى لو بسوريا و جان خابر مينا و اطمن على ابنه المريض اعرفه خالد ما يكدر يصبر و ابنه مريض.

بقيت على هاي الحالة بال١٥ يوم
لا خالد بين ولا رسايلي وصلت اسمي مكابلتهن و منتظرتهن، يوصلن ما مليت ولا كليت من الانتظار.

كل يوم اخابر بتول و اسألها و تكلي :- ماكو

صفحتي جانت اسمها (كتمان البحر ) فديت طلبات صداقة لرائد و رافد حتى بلكي اسمع اخبار خالد او ينشرون شي بلا ما يعرفون اني صاحبة الحساب

رائد بسرعة قبل الطلب، فتت لصفحته مشارك منشورات سياسية و عادي ما كانو اخوه مفقود

تعجبت معقوله يعني ما هامه الموضوع ؟

رافد قبل الطلب .. و هم دورت صفحته من الايام اللي انفقد بييهن خالد .. ما ناشر غير مرة وحدة مغير صورته الشخصيه و الناس تعلقله و هو يرد عليهم

معقوله ذوله اخوهم مفقود ؟
هو مفقود صدك لو شنو الموضوع
شكيت بالسالفة .. بيها انه

راسلت رافد كلت اله :- هلو

دز :- هلو وردة

- اسالك سؤال

- اي تفلي

-انت اخو خالد

-اي اخوه ليش

-هيج حبيت اسأل عليه

-مسافر والله ولهسه ما رجع

-مسافر يعني؟

-اي اذا تحتاجين شي كلنا خالد لا تترددين كولي

- لا شكرا

- العفو عيوني

بقيت صافنه، ليش ما كالي مفقود ؟
ليش ما حجالي عنه او عن اوضاعه معقوله اكو شي
معقوله خالد ما بيه شي و راد يبتعد عني حتى لا يمنني بالعلاقة و يخليني اشوف حياتي ؟

زين ليش يسوي هيج خو يكلي و اني ابتعد ..
لا ممعقوله خالد لو موجود ما يعوفني

بقيت افتر بالبيت و من الحيرة كل ساع افتح الثلاجة و اسدها و افكر .. معقوله حتى بتول تجذب عليه
ما اصدك لا .. اكيد هو مفقود
يصير هاي تمثيلية حتى يبعدوني من خالد و متفقين ويا خالد حتى يخلوني ابتعد و انساه

بقيت محتاره ... خابرت على بتول كلت الها :- الله عليج احلفج بالله و ملائكته و سماواته خالد وينه ؟ ما اريد شي والله بس كليلي هو زين يحرم عليه لو تقربتله طمنيني عنه ولو بكلمة وحدة بس

بتول :- شبيج ديار اهلي مسبيين و حالتنا حالة يعني شنو جاي اضحك عليج

- مو قصدي هيج بس اذا اكو شي كليلي الله عليج لا تضمين عليه

- ماكو شي غير اخوي مفقود و بس

- اني باوعت صفحات رافد و رائد كلشي ما بيها

- صفحاتيش ديار تره والله البينا كافينه لا مجذبين عليج ولا لاعبين عليج خالد راح يصيرله شهر و هو مفقود ، ما خلينا مستشفيات ولا مكان ما دورناه و ماكو فص ملح و ذاب ما اله اثر حتى سيارته ما عابره الحدود

- عائلته شلونهم ؟

- ضحى عد اهلها و رافد خابر على مينا تجي لهنا بطيارة هي و الطفل حتى يعتنون بيه و يودونه للطبيب و لهسه ما اجت

- من تسمعين خبر فدوة لا تنسيني

- هسه خل نعرف عنه شي و الله كريم
بقيت لا ليلي ليل و لا نهاري نهار ، كل ايامي انتظار
و اصعب اللحظات و اطولها هي ساعات الانتظار و اني بكل ساعة تمر اكول هسه يرد عليه

بقيت اراقب حساباتهم بلكت تطلع منهم كلمة او او الكف اي شي يوصلني لخالد ماكو ..

فوك ضيم ابوي ضيم خالد .. لا هديت و لا ارتاحلي بال
كل دقيقة تمر بغيابه احس بالانهيار
تعبت حيل ..
خيالي كام يتخيله هو راجع و اكعد احجي ويا روحي

- ليش عفتني

و هو يكلي :- ما عفتج اني يمج ولا راح اعوفج

- اني ادمرت بغيابك

- اسم الله على كلبج حبيبتي

- خالد لا تبتعد من عندي بعد اني اعيش يمك و اموت ابعد، انت و اني سمج و مي وجودك حياتة و بعدي منك مووت

- ما اعوفج

- بس انت عفتني و اني جاي اشتاقلك هوي، اسأل عن الليل اذا بغيابك نمته لو تهنيت بيه ، اسال عن الرسايل لو مرت ساعة و ما كلبتهن ..
اسأل ربي شكد دعيته حتى يرجعك اليه سالم
اني تعبت خالد تعبت

- ابتعدي عن كل اليتعبوج و اولهم اني

كمت اتذكر كلماته و صدى صوته ابالي كمت ابجي و اصيح :- ما اكدر ما اكدر والله ما اكدر

كمت ابجي بقوة .. انتبهت اني دا احجي و ابجي ويا نفسي، اثار خايفة مني رايحه صايحة اسامة ، اجا اسامة شافني ابحي و احجي ويا روحي

لزمني :- انت زينة

بقيت اباوع بوجوهم و مفتحة عيوني حيل و الدموع بيها، كمت من مكاني بسرعة و عفتهم، سمعت اثار وراي تكله

جانت تحجي و تصيح وحدها ويا نفسها، اسامة اخاف بيها وحش

طلعت للكراج كمت اغسل بوجهي حيل
دخلت للغرفة بدلت ملابسي و اخذت حجابي
حجه اسامة :- وين رايحة بهالليل ؟

- مختنكة حيل بس امشي بالفرع و ارجع اريد اشتم هوا برا

اثار :- اروح وياج اروح
ركضت كدامي و هي تلبس الچركز مالتها

اخذتها و طلعت من البيت، صدت عيني بسيارة واكفة شوية عن بابنا و بيها اثنين زلم باوعولي و دارو وجهم و شغلوا سيارتهم

اخذت اثار من ايدها و كمت امشي و اتنفس بقوة اريد اطلع الخنكة البداخلي، احس شي كاتم على انفاسي ، ما دا اكدر اعيش براحة .. همومي مثكلة على كلبي

وصلنا اسواق جبيرة ، اثار حجت :- خل اشتري

باوعت :- ما جايبه فلوس
تلمست جسمي خاف حاطة فلوس بصدري، تحسست اكو فلوس درت وجهي و مديت ايدي اطلع، لكيت الف وربع

كلت الها :- فوتي يلا

فاتت تركض كدامي ، بسرعة ركضت ع الاندومي ابو ال٥٠٠ اختارته و جابته ، اخذت بيبسي و جبس ليز لاسامة و رجعت

اباوع الطريق الوصلنا بيه بسيارته لما رجعنا من ابو نؤاس ، احس دينقبض اكثر من اتذكر
وين راح يربي ، خالد هيج يختفي

رجعت لكيت نفس السيارة التحركت راجعة نفس المكان ، بقيت اباوعلهم هم داروا وجهم من عندي و كاكو يحجون وياهم

اثنين زلم تطلع اعمارهم بال٣٠ اكثر .. هيج شي
ملتحين ،ووجهم ما ارتاحيتله و نظراتهم تجيب الشك رغم جاي يحسسوني اني هم ما متهميلي

ما اهتميت اعتبرتهم شباب فارغين و يباوعون للنسوان ، مشيت للبيت، اول ما جاي ادخل، طلع اسامة :- ها جنت انتظرجن خفت عليجن

- ماكو شي بس رحت اشتريت الها ، هاك هاي الك

اخذهن من ايدي و فتت، كلت اله :- سد الباب زين و اقفله بالقفل و المفتاح

- ليش شكو

- احسن .. بس احنا بالبيت مو صغرا بيك بس انت صغير و احنه اثنين بنات و الدنيا تخوف، ناخذ احتياطنا احسن

هو من سمع هيج زنجل الباب حيل و قفله و قوتنه جوه و هم قفل باب الهول و المطبخ

فتحت التلفزيون و كمت اتابع اخبار بلكي الكه اسماء مفقودين، او اي شي يطمن گلبي
ماكو غير نور المالكي و مظاهرات كايمة كاعدة
ما اعرف هالبلد شوكت يصفى و شبابه و اهله يرتاحون ما ندري ..

اثار كعدت على موبايلي، خابرت امي ، فتحت كاميرا ويانا .. اني حاجيتلها و كايلتلها مغقود بس هي ماخذه الامور ابساطة و كالت لا تخافين عليه يومين و يطلع راسه فبعد ما شكيتلها

اثار كعدت تحجي ويا امي و تسولف
طلبتني ، كعدت ويا اثار و حطينا الموبايل كدامنا

- عززززا هاي ليش هيج صاير بوجهج ديار

- من الخير

- يا خير عزا العزاج ولج عيونج صايرة باندة منو اليسوى و تسوين بروحج هيج

- كلشي بعينج ميسوى بس بعيني غير ، المفقود اغلى انسان على گلبي لا تسأليني ليش هيج حالي زين و عايشة بغيابه

- اي وسويتي بروحج هيج شنو راح يرجع

- ما مسويه بروحي هي روحي الكرهت كلشي حتى كرهت الحياة و لو ما الخوف من الله جان انتحرت و خلصت روحي من هالدنيا الما صفت وياي

- شكول و شحجي يا امي، مو هيج ادعيله اتفائلي، مو يكولون تفائلو بالخير تجدوه ، انت لاطمة و مسودة عيشتج ليش

- اي خير هذا كليلي اي خير، اشوف الخير بابوي، لو بأخوي اليتوعد لابوس و على ساعة اخسره لو كسرتي و حزني على خالد.

انتم بس تحجون ما تعرفون اني شنو اعاني و شنو احس و شلون اتأثر كلشي عدكم سهل لان ما مارين بيه ولا عايشن بيه .. الجرح ما يوجع بس صاحبه

.....غيرت هي الموضوع، حتى لا تحسسني بجروحي اكثر وبقت تحجيلي على اوضاعها هناك

خلصت .. منها فرشت لاثار و نومتها
كعدت ع اليوتيوب .. صدفت طلعت كدامي اغنية ( شلونك حبيبي ) لماجد المهندس
بقيت اباوع بيه جسمه هيئته و بروده يشبه خالد
بقيت استمع للكلمات ما حسيت بروحي الا اني ابجي من كل كلبي على كلماتها

يكول : شلونك حبيبي مشتاك الك مر عمري كله حبيبي و اني اتخيلك .. بعدك ملاني جروح و فكرة تجي و تروح
متكلي وين اروح لو احتاج الك ؟



بقيت اعيد بيها قرابة ال٣٠ مرة لحد تعبت من البجي و ثكلن عيوني وورمن و نمت ..

مرت حوالي ١٠ ايام ..
و هم خالد ما بين و اهله ما ادري عنهم شي بتول مرة ترد عليه و عشرة لا .. كمت احس روحي انذليت و اني ادور اخباره

ما اريد شي يا عالم والله ما اريد شي غير خبر واحد يس يطمني و يطفي النار البكلبي ، جاي احس بالموت كل ثانية ..

سمعت بابو رافد صابته جلطة بالدماغ بسبب القهر و الحزن على خالد ... جان دوم يكولها لخالد ( بطل سفر عوف السفر ، اكعد .. حتى فتح المحل حتى يعوف السفر و التصوير خارج البلد و يكعد بالمحل و يسترزق بس خالد عنودي ما يقبل غير بالحجي البراسه ، جان دائما يكله انت ما ترتاح الا تجلطني ، نهايتي جلطة على ايدك )

وبالفعل .. انجلط من القهر على خالد و من الحزن على غيابه .. مرتفع عنده الضغط كلش بالليل و واكع

كلش نقهرت عليه من كالتلي بتول
ردت اروح الهم و ترددت اعرفهم يطردوني لو وصلت لهناك

كلش ثكلت ايامي عليه بغيابه
كامت الايام تمشي ابطئ من السلحفاة

ابوي اجا اسبوع و بهذا الاسبوع جان كلش مشغول، ناس تفوت و ناس تطلع منعرفهم منو .. ولا نعرف شنو هم .. الصيت خطار ابوي

بس اشكالهم ما اطمن و مسلحين و ما مطمنة الهم و كلبي لاعب منهم، اخاف منهم على اسامة لا يتورطله بفد مشكلة وياهم

اسامة مراهق و دمه حار و ما يتحمل الحجاية بساع يتهور و هذا الاخاف منه ، حاولت ادور بس من صارت سالفة خالد نسيت روحي

اسامة دور كم بيت ما لكى اليناسبنا، فكعد من ابوي كام يطول و ما يجي للبيت

ا...تشكلت بالمطبخ اسوي جاي و عصير اسبوع كامل لحد ما افتكيت من ابوي وراح لدوامه

... اجا وكت الدوام ولازم نداوم ..
كنسلت اول يوم ما داومته و طلعت للتربية خلصت اوراق النقل مال اثار ، و هي وياي

ورحت لمدرستها القديمة حتى اكمل النقل، ما ادري ليش اخذتني رجليه و اني اركب و اروح لمنطقتنا القديمة

وكفت بالفرع لازمة ايد اثار عيوني كامت تهل ، بكل مكان بهذا الفرع الي ذكرى لخالد

هنا بات لما جان اسامة بالمستشفى ، و هنا وكفني و حجه وياي، و هنا عاد الا يصعد سيارة عرسي

باوعت لباب محلهم ، اوف يا المحل جنت كلما امر من الخط لازم ادور وجهي و اتفقد هو موجود لو لا .. و اذا شفته ورا الجام و لمحت شكله احس شفت العافية
هسه حتى عافية ما ظلت الي بغيابه

فتت للمحل اني و اثار ، مهيمن جان موجود .. بالمحل كاعد ، اثار فرحت بيه و كامت تحجي وياه
و اني اباوع بالمحل

هنا حجه، هنا انتجى ، هنا جنت اسمع ضحكته و اباوع نظراته ، اوف يالذكريات تكتل ابنادم لو جان حديد

باوعت لمهيمن انطى لاثار قوطية ببسي و كيكة و هي تطلع و تمسح، بشعرها، سألته :- عمو خالد ما اجا

- لا لهسه ماكو

- زين عمامك شكالو ابوك شسوه بغيابه

-بيبي يومية تبجي عليه و سارة بالليل تبجي تكول اريد ابوية

- ليش ضحى مو ابيت حليمة

- لا اجت عدنا، ابوي يريد يبيع بيته و بيت جدو و يشتري بيت جبير ونكعد كل احنه حتى حليمة لان جدو صار مريض و هي مريضة ما يكدر يعوفها وحدها

هزيت راسي و طلعت ، صحت اثار ما ردت عليه بقت تحجي ويا مهيمن

كعدت ع الرصيف و اني اباوع الشارع
وين رحت خالد ، ليش هيج تسوي بينا
ما تحس باوجاعي ، ما تحس باشتياقي، محتاجتك هواي والله ارجع

جنت حتى لو بكربلاء و احتاج تتعنى و الطاريق ما يوكف بوجهك، شصار هسه و عفتني ؟

حسيت اكو حركة كمت من مكاني بسرعة لكيت رافد وراي :- شعندج هنا ؟

- ولا شي اجيت اعيد ذكرياتي لا اكثر
حجيت و اني امسح بعيوني

- اخر مرة راسلج شوكت ؟

- قبل ليسافر بالليل

- امي كلش حالتها مدهورة عليه و على ابوي
حالنا يصعب ع الكافر ، بناته يكسرن الخاطر و ابنه مناك مريض و مرته مبتليه

- سافرت الهم

- اي ذاك اليوم رجعت منهم

هزيت راسي و صحت :- اثاار يلا

رافد :- امج شلونها ؟

- زينه بهولندا هي هسه
حجيتها و اني ادفع باثار حتى تمشي ، هو سكت
رجع حجه :- اخذت اللجوء

- لا بعدها، اذا عرفت اي خبر عن خالد كلي

- الله كريم، ولو عجزنا نلكاه

- بهالسهولة يروح ؟.

- شبيدنا؟ اكو مكان ممكن ندوره و ما دورنا .. الحدود بس الما رايد روحه يوصلها و صايره دم .. وين تروح ما خلينا لا مركز ولا غيره ما خبرنا

مشيت من عنده و اثار تصيح :- بااااي

رجعنا للبيت، ما بقى بس باجر اخذها على مدرستها الجديدة و نخلص

..... مرت ايام
وكلما جالة الوضع يصعب و ابوي ما ينعرف شغله شنو، كام يروح بحماية و يرجع بحماية و ايام يبقى ما يفرغ من الزيارات .

كمنا نسمع بأسم جديد طلع اسمه ( د١عش )
اسم غريب انتشر بالمناطق و كمنا نسمع هواي اخبار مو زينة ، وضع العراق تأزم بشكل
انفجارات كثرت
العصابات كثرت
و المظاهرات تسيست و صارت ارهاب
الوضع صار ما يتامن ابد

اني و اختي حدنا للمدرسة و نرجع للبيت اقفل الباب علينا و ما اخلي احد يطلع و اسامه كل وكته ع الموبايل يلعب كلاش

جنه بالليل كاعدة اني، اسمع اغنية اشلونك حبيبي و اتذكر خالد و اسامة فوك و اثار نايمة

و ما احس الا الرمي اشتعل على بيتنا كل قوي و الجام يتكسر ، اخذت اثار بحضني و هي تصرخ و اني اصيح :- اساااااااااااااامة

نزل هو يركض ، عفت اثار وركضت وراه ، سحبته :- وين رايح

- شنو هذااااااا

- ادخل جوا

- عووووفيني اشوف

- دفووووت جوا استر عليه ادخل
فوته للغرفه غصب وسديت الباب قفلته، العيون جمدت من الخوف و احنا نسمع صوت الرمي ع البيت ، اخذتهم و سحبتهم للزاوية و اسامة كوة اسيطر عليه

:- اصبر فدوة عندك اسلاح عندك اصخام و تطلع ما تخاف على روحك انت اكعد و استر عليه

- منو الجاي يرمي ولج راح يفوتون علينا

- اسكت بس اسكت و دنك ، الهي سترك ربي ما النا غيرك فدوة ساعدنا ، امن يجيب المضطر اذا دعاه و يكشف السوء ..

كمت اردد هالاية بخوف و كل جسمي يرجف واثار نطت من البجي من الخوف، و اسامة لازمها و حاضنها و اني لازمتهم اثنينهم و اقرأ

انضرب بيتنا بقوة، كعدنا ندكنا روسنا، ربي فدوة انقذنا ربي

شوسة و سمعت الرمي هدأ ، اسامة راد يطلع كلت اله:- اسكت خل ننطر تاليها اكعد.

- غير نطلع نعرف منو الرمانا

-و عرفنا شراح نحصل ؟ يمكن تلكاهم كبالك و يكتلونك

خابرت على ابوي ما احصله يكلي ( ان الرقم المطلوب خارج نطاق الخدمة )

كعدت بالكاع، حيلي باد ، يمكن ما بقيت سورة بالقران و ما قريت من الخوف حتى الله يستر علينا و على اخوي

ما اتجرات اطلع ولا قبلت اسامة يطلع رغم مرت ساعة و اثار حاضنته حيل، الى ان تعبت من البجي حيل ورجعت نامت، بحضنه و اني كاعدة و متجية راسي على جتفه
التعب هد حيلي
و الهموم فاقت عمري
والله اني مو كد كل هذا
تعبت

راسي على اسامة و هو كاعد يمنا،حسيته راد يكوم فزيت وياه ، نوم اثار بمكانها وكمنا، يمشي و اني لازمة ظهرة .. خفت عليه لا يطلع واحد بالبيت و يضربه ، مشيت كباله ، فتحنا الباب صوت برا

لزمته :- لا تطلع

- خل نشوف شنو الموضوع

-عوف لا تشوف ابقى يمي

- ديار بس عوفيني وخري
فتح الياب وطلع ...تبعته، اهل المنطقة جانو موجودين ، فات رجالو هو يكول :- ها يابه منو ذوله

- والله ما ندري بس اني و خواتي بالبيت ما عدنا احد ولا عدنا عداوة ويا احد

- واجهت البيت كلها فلشوها

سمعنا صوت دورية الشرطة صفت بالباب ،دخلوا الشرطة يحققون ويانا
اني بس الدموع تجري

كاموا يحققون ويا اسامة ، اباوع الجام و الحجار ملى الكراج و المطبخ و الهول

وين روح هسه و عد منو نشرد ؟
لا اهل و لا عدنا احد ننتجي عليه
كملوا تحقيق وراحوا

بقيت اني انظف بالبيت و كل شوية اخابر على ابوي و ما جاي احصله ، وديت اصار لمدرستها و رحت اني لكيتي

حجيت الصار لاصدقائي تخبلوا، عذراء كالت :- تعاي جيبي اخوج و اكعدي عدنا الى ان ادبريها

- لا مشكورة

- لا مشكورة ولا مدهورة اكلج تعاي بس اني و امي بالبيت نعتبر اسامة اخونا اكعديلج كم يوم لبين ما ادبرين امورج و تستقرين

مهند :- ترا دا تحجي صحيح خطر عليج تبقين بالبيت ما تعرفين شراح يصير بعدين اخذي اخوج و اطلعي

وسام :- منو كالج ما يرجعون اليوم

- عفية لا تخوفوني من غير شي جسمي لهسه يرجف و اخوي عايفته وحدة بالبيت و حايرة والله تعبت من المسؤلية تعبت

وسام :- اذا تريدين اجرلج غرفة بفندق لما تكملين وضعج ترا خطر عايفه اخوج وحدة بالبيت و هو مراهق صغير

- لا تسلمولي اذا اضطريت كلش اروح لبيت عمي عماد لحد ما الكه مكان امن اخوتي و نشيل

وسام :- براحتج بس اني اكول ارجعي للبيت هسه ولا تبقين

- اي

ودعتهم ورجعت للبيت دخلت، اسامة، راسي دايخ كلش
ليل ما نايمته و هبطى و تعب الجامعة، احس حيلي تنهد

وينك خالد لو انت موجود هم احتار جان لكيتلي حل و جان هسه طولك ويا طولي واكف و ساندني اني و اخوتي .. اخ خالد اخ

اندكت الباب طلعت مرة تسأل ع الصار البارحة، شافت اجوبتي الها كوة من التعب تعذرت وراحت

نمت بغرفة اسامة، ما حسيت من التعب، اجت اثار كن المدرسة بهدومها، تمددت بصفي و تاكل لفة جبن و تباوع بموبايلي

.. درت عنها و نمت ..
كعدت المغرب راسي دايخ حيل ما اكدر افسر
باجر اعطل اثار من مدرستها و اروح لبيت عمي عماد

المصيبة اندل بيته بس ما عندي رقمه و ابلغه بالصار بينا .. اوف ياربي كلما اكول خلصت تطلعلي بلوة تخرب حياتي و تالي ربي شلون راح تصفى الدنيا وياي

فكرت .. مو مال نبقى اليوم هنا
خل اكعد اسامة و نكوم نروح لبيت عمي هسه ناخذ تكسي و نروح .. حتى لو ليل شعلينا هي سيارة

كعدت اسامة .. كعدت بس توانا ما كام وياي
بقيت اكوم بيه و اكله كوم نروح لبيت عمي و هو يكلي عوفيها باجر نروح

:- اسامة هم تسهر بالليل و تنام بالنهار و تتعطل، غير ما ندري يالليل شراح يصير بينا خل نروح حبيبي

- قفلنا البيبان لا تخافين

- يا بيبان ما اشوف الجام كله مكسر مال البيت

- عوفيها اليوم ما بيه حيل

- دكوم يا اسامة كوم

ما قبل و اثار نامت ، كلت ربي بس اليوم و باجر نطلع سلامات ... كعدنا بغرفة اسامة صعدت كل الاكل و المي و النحتاجه و حبستهم بغرفة فوك.

ب٢ بالليل سمعت اكو صوت جوة، اسامة كاعد يمي، دفرته برجلي و فزيت للباب قفلته بسرعة

كام اسامة من مكانه يريد يطلع و احنا نسمع احد جوا و رجلين يفترن بالبيت ، لزمته و اكله و اني صاكة على اسنوني :- اكعد استر عليه كلت الك خل نطلع خرب بية بساعة الطاوعتك و كعدت جان المفروض اجركم من روسكم و اطلع

اندكت الباب فزيت ، اسامة عيونه وكفن بالطول و هو يباوعلي ، خليت ايدي على حلكة و اني اكول :- منو

اندفر الباب بسرعة و جفتوا ٣ املثمين و الاسلحة بايدهم . سحبوا اسامة من ايدي ، كمت اصرخ :- لاااااااا الله عليكم لااا عوفوه هو ما اله علاقة بكلشي لاااااااا

و هو يصرخ :- عوفوني كو*** عوفوني ، وخروا

ضربوا بالشاجرو على راسه وكعوه للكاع و داسو عليه اثار كامت تبجي وتصيح ، لزمها واحد

اني كمت الطم، تقرب من يمي واحد بس عيونه مبينه، لزمني و جتفني من ادية

واللي لازم اسامة يصيح عليه :- ابوك وينه ؟

اسامة :- والله ما اعرف والله العظيم ما ادري

ديار :- عوفو اخوي الله عليكم ابوي ما النا علاقة بيه والله شتريدون تسوون بيه سوو احنا معلينا والله عمو

جرني اللي لازمني من ورا و حجه :- تعرفين اللي يجون لهنا ؟

- والله العظيم ما اعرفهم

- ابوج وين يشتغل احجييي

- ما ادري والله كلشي ما ادري

- اكو وحدة ما تدري ابوها وين يشتغل

اثار كامت تبجي حيل و تضرب بيهم تريد تفلت من اديهم، ضربوها راشدي وكعوها للكاع كمت اصرخ :-، طفلة الله لا ينطيكم لاااااااا

و اسامة يصيح :- عوفوها خوات ال**** اخذوني اني و عوفونهن وخرو عنهننننن

حجا اللي دايس عليه و يحقق وياه :- اذا ما حجيت وين يشتغل ابوك و تنطينا الاسماء وويا منو يتعاون ، راح نغتصب خواتك وحدة وحدة كبال عينك

كام يصرخ :- والله العظيم نا اعرف اكتلوني و عوفوهن ما ادري عن ابوي اي شي عوفونا رحمة الوالديكممممم

ديار :- عوفونا فدو ابوس اديكم و رجليكم عمو بس اتركونا الله عليكم

حجه واحد :- خل ناخذ هذا و نحقق وياه اكيد يعرف شي عن ابوه

حجه اللخ :- و البنات ؟

- اتركوهن لا تجي الشرطة لو يسمع احد من الناس، خل نمشي بسرعة يلا

شالو اسامة و عافونا كمت اصرخ :- اخوي لا الله عليكم اخووووي ، اساااااااامة لا تعوفنااااا اسامة

دفعو اثار و اجا واحد حط ايده على حلكي و يحجي و هو خازرني و كال :- راح نطلع لو سمعت نفس واحد ورانا لو صيحتي ، طلقة براس الطفلة و براس اخوج وينتهي امركم......

☆☆☆☆☆☆

#اتمنى_ان_افعلها

الحلقة_53

تمنيت لو ان الحياة عاقبتني بشيء اخر غيرك 🖤

.........

دفعو اثار و اجا واحد حط ايده على حلكي و يحجي و هو خازرني و كال :- راح نطلع لو سمعت نفس واحد ورانا لو صيحتي ، طلقة براس الطفلة و براس اخوج وينتهي امركم

- عمو والله احنا ما نعرف بشي، ابوي يجي ويجون وياه ناس منعرفهم ولا اخوي يعرفهم والله

- شنو شكلهم ذوله الناس

- ما مركزة بيهم اني بس يطلب مني اسوي جاي و اخوي طول الوقت يلعب بموبايله والله عمو

- اخذه

- ابوس ايدك لا ، ابوس ايديكم فدوة

دفعوني من عدهم ، ركضتلي اثار حضنتني، لميتها بحضني، و كمنا نبجي بصوت عالي، اسامة كام يدفع و يصيح بأديهم ضربوه على راسه و سحلوه

نزلنا وراهم اني و اثار، اخاف اصيح و يرجعولنا يكتلونا ، كمت بس اردد ( دخيلك الهي انقذنا ، رببببببببببي)

خلوا اسامة بالسيارة و طلعو، كعدنا بالكراج نصيح و نعيط بوحدنا، واصرخ ( وين اروح الهي وين ارررررروح منو النا و يحمينا، ليش ربي لييييييش والله تعبت تعبت تعبتتتتت)

باوع اثار الخوف بعينها و تصرخ من كل كلبها، كمت من مكاني حتى اطمنها و ابعد منها الخوف، طفلة بهالعمر شءنبها تعيش بهالخوف مسلحين يخلون سلاح براسها و يضربوها

حضنتها و كلت الها :- لا تبجين كافي، امشي كومي خل ناخذ ملابسنا و نروح

حجت و هي تشهك :- خل نرجع لبيت ماما هنا، ديار فدوة ديار

- خل نروح لبيت عمو كومي

اخذتها لبستها هواي ملابس لان بداو اخذت ملابس اليه و الها و غراضنا و كل احتياجاتنا و طلعت بالليل و هي بأيدي، صلاة الصبح بعدها ما صايرة

كمت امشي اني وياها و دموعي تجري، و اهمس بيني و بين نفسي :- وينك خالد والله احتاجك ، احتاج تسندني بالوقت ، تقويني
والله حيل ما ظل بيه

امشي بيها و الهوى عالي بارد كلش كص خشمي، نزلت كبوس الجاكيت مال اثار على راسها و قبطتها حيل، وكفت ع الشارع اريد سيارة تمر ماكو الشارع يصوصي

يا غربتي بذيج اللحظة
احس وحيدة بهذا العالم و ما الي احد
جانت امي و جان خالد منين ما اميل يسندون ظهري
هسه تعبت من الوكفة وحدي
البرد ذبحنا، حسيت اطرافي جمدت ما كمت احس بيهن

كل ربع ساعة يلا تمر سيارة و ما توكف، لساعة و اكثر يلا وكف شاب و نزل الجام :- هلا خوية وين توصلون

- للدورة

- بهالوكت

- مضطرة

- ب١٠

- ميخالف بس وصلنا
صعدت وياه و اني اوصفله كنطقة بيت عمي و شارعهم، مشى هو، الامانه لله جان خوش ولد
شغل النا تدفئة ، و كل شوية من يشوفني ابجي يكلي :- خوية اذا محتاجة شي كولي

- تسلم الله يخليك

اثار لازمة ايدي حيل، حطت راسها عليه و نامت ،اباوع الطريق ، الكلوبات الصفر و الشارع مضوي و فارغ، و السيارة تمشي بسرعة ، و الجام كل شوية يغوش من النفس و امسح بيدي
دموعي ما نشفت من عيني

وصلت لشارع بيت عمي، نزلت بيه طلعت من جيزداني ال١٠ الاف .. كال :- خليها خوية واصلة

- لا تسلم اخوية انت على باب الله

ما راد ياخذها حطيت العشرة يمه ع الكشن ، كعدت اثار و نزلتها وياي ، تمشينا لبيت عمي عماد، وكفت دكيت الباب محد يطلع
نزلت الجنط من ايدي و كمت ادك، محد يسمع .. نايمين
اديه جمدت و اثار تكلي :- ديار راح اموت من البرد

- غير يطلعون نايمين نومة اهل الكهف
بقيت ادك بالباب باثنين ادية بكل قوتي، سمعت صوت واحد يصيح :- اجينه اي اجينه

فتح الباب ولد شاب يطلع اكبر من اسامة،عرفته من الملامح ابن عمي اسمه ( محمد) باوعلي :- منو انت ؟

- اني ديار بنت اسماعيل
حجيتها و شلت الجنطة و فتت للبيت

- هااا انت ديار بت عمو اسماعيل ، انتظري اكعد ابوي

دخل للبيت، نزعت الحذاء اني و اثار ، طلع عمي :- ها ولج شعدج جايتنا بهالفجريات

- هجموا على بيتنا مسلحين فلشوا البيت و خطفوا اسامة
حجيتها و بجيت

هو صاح :- ااااخ ، اسماعيل وينه لعد ؟

- بالدوام ما نازل

- فوتي للبيت فوتي بس بالطلايب اشوفج .. دخلي يلا

فتت للبيت اني و اثار، نزلت مرت عمي، استغربت دخلتنا الفجر ، سألت :- شعدهن جايات ؟

عماد :- اسامة مخطوف خل اخابر على اسماعيل

هو مشى يخابر و هي تباوعلنا :- شلون خطفوه ؟

- هجمو علينا مسلحين ملثمين يسألون على ابوي

اجا عمي :- ما جاي احصل ابوج، شلون هسه تظلين عدي ؟

حجت مرت عمي:- لا عماد شتخليهن دا تكلك مسلحين هجموا عليهم شنو ما خايف على جهالك حتى تورطنا بعمايل اسماعيل و خلفته

ديار:- بس اليوم ابقى عدكم اني باجر اخابر المؤجر يطلع من البيت و نكعد بيه

عماد :- بيت شنو هذا

- بيت امي عافت ايجاره النا مصرف

- امج سافرت و عافتنا نتحمل اثامكم ، دفوتو جوا فوتو، نامو هسه و عود الصباح رباح

- شلون انام و اسامة مخطوف ع الاقل تحرك اسال عنه بلغ، سوي اي شي

- لا ادخل روحي ولا اجيب لعائلتي النظرة و تالي يراقبوني و توكع بينا، ما النا علاقة يجي ابوج ياخءكم و شتريدون تسوون سوو

مرته ما عجبها الكلام صعدت فوك، بقينا كاعدين اني و اثار وحدنا بالممر ، دموعي تجري ع الذلة الاني بيها
اجت مرت عمي جابتلنا بطانية و كالت : طبو نامو بالهول

دخلت اثار للهول و نومتها و غطيتها بس باردة تكتل مو مال بطانية وحدة ، حتى فراش ماكو نايمين ع البساط

:- ديار باردة !

- شسوي بيتنا و اجيبلج غطا و ادفيج، نامي و للصبح الله كريم

رجعت التفت بالبطانية حيل و اني كاعدة ملفلة روحي من الرد و دموعي تجري و حايرة وين اروح ووين انطي وجهي

عذراء طلبت مني اروح لبيتهم بس كلشي يصير اعرف بروحي فكر لا انوب مراقبينا و يأذونها و يأذون امها .. شلي بهالسالفة
بس وين اروح ووين راح الكا اخوي
باجر اطلع للمركز اشتكي و اسجل دعوة اختطاف
بيت ابوي بيه كاميرات برا اكيد الكاميرات شافت اللي دخلو ولو ملثمين بس بلكت يلكون شي

صفنت، اثار وين اخليها، هم اسحل بيها بهالبرد يا ربي
اوف يا امي، شجاج و عفتينا هسه ، جان اخذتي اثار وياج و عفتيني احير بروحي

هسه احير بمنو .. خالد وفقدانه
اسامة و اختطافة
روحي و غربتها
لو بأختي
شسوي يربي ، ساعدني دخيلك الهي لا تتركني

صار ضوا بالغرفة من ورا البردة، و بعدها اجا صوت قوي كلش هز البيت، كراكيع
مطرت قوي

كمت للشباك، فتحته و بقيت اباوع ، الرشك قوي حتى ع الشباك كاعد يجي المطر ، الفجر طلع بس الجو اظلم من الغيم

غمضت عيوني .. حاولت اطلع من هذا العالم كله
كمت اتذكر وجه خالد ملامحه، صوته صرت اسمعه
همساته احسها بأذني

- شبيج

- انت بيه

- تعبانة حبيبي

- كلشي بغيابك يتعبني

- ارتاحي

تقربت من عنده، حظنته بكل قوتي :- لا تعوفني ، خليك يمي لا تبتعد، خليني اتنفسك خلي كلبي يرتاح يمك

بسته .... حسيت على روحي و اني حاضنة المخدة و ابوسها و غاطسه راسي بيها، باوعت اني جنت واكفة يم الشباك شجابني هنا
دمعت عيوني لاي حال وصلت ..
كمت التقيه بخيالي و ما احس على روحي

بقيت كاتمة بجيتي و مخليه اديه على حلكي حتى لا يطلع مني صوت و ابجي بسكوت .. دخلت ويا اثار بالبطانية حضنتها حيل

بس ما نمت عيني ما خذت نوم، صارت الساعة ب٧ ونص، نزل عمي و ابنه يريد يروح للمدرسة بس المنطقة فايضة و غركانه من المطر واصل المي للركب

لبس عمي بسطال للركب و طلع بس ابنه رجع نام ما طلع للمدرسة، كمت بدلت اني ، و كلت لمرت عمي:- ديري بالج على اثار بس اروح و ارجع

- شرايحة تسوين

- بشغلة

- لا اطولين، اني صاعدة .. ارجع انام

عفتها و طلعت .. صفنت بالمنطقة المي مغرك الشارع كله، شلت هدومي ومشيت .. ملابسي كلها تبللت كوة طلعت الفرع

اباوع الشارع العام المي فوك من الركبة و هواي سيارات مجسية من المي و طافية .. و الناس محتارة و الدنيا بعدها مغيمة و الغيم اسود ، جن بيها بعد مطرة

ارجع للبيت احسنلي هيج ما راح اكدر اوصل ابد ، رجعت و طمست بطينة غميجة .. ارد اشيل رجلي من الطين لزكت

طلعت رجلي كوة و بقت تك حذائي شيدنكلي عليه و اخذه، مشيت شوية و هم لزكت رجلي الثانية ..
تالي كوة رجعت للبيت حافية .. زوج حذائي طمسن بالطينة

غسلت و فتت للبيت البرد كسر عظامي، اخذت ملابس و بدلت ، تعبت حيل و عيوني غوشن، رحت لاثار حضنتها ، خابرت على ابوي مغلق بعده
عساك متت و خلصت منك
حضنت اثار.. و التفينا ابعض و نمت

لهناك كعدوا بيت عمي و شغلوا صوبة شوية دفا الهول و كدرت انام براحة رغم الصوت

.. شوية و كعدتني مرت عمي :- كافي ما شبعتي نوم كومي طكت صفحتج

شلت راسي، باوعتلها، طلعت موبايلي .. شفته
وسام مخابر ٥ مرات و عذراء مرتين

كمت من مكاني غسلت و خابرت وسام، رد

- ها ديار

- شهااا
حجيت وبجيت

- خير يمعودة ليش تبجين صاير شي

- اسامة خطفوه

فز و صاح :- لاااااا، صدك تحجين

- والله

- و هسه ؟

- عد بيت عمي و مطر ما كدرت اسوي كل شي

- هو المطر كارثه حتى للجامعة ما كدرت اطلع خابرت الشلة كلهم ما مداومين

- شسوي وسام كلي اخوي وين الكاه

- الله كريم يم ربج ما يضيع شي بس كولي يا الله، والله لو اكو طريق جان اجيتج .. بس الطرق مسدده من المطر صايره فيضانات

- ما عندي حل اصبر لما ينتهي المطر لو يجي ابوي

- الله كريم .. اخذي راحتج ترا ما بيدي شي والله مجتف اذا تحتاجين شي امانة الله و رسوله تخابريني

- ما تقصر يالطيب الله كريم

قفلته من عنده و خابرت عذراء كامت تبجي وياي
نهيت الاتصال منها ، كعدت يم الصوبة و مدنكة افكر

حجت منتهى مرت عمي :- اذا كاعدة كومي طبخيلنا الفاصولية شو جسمي مكسر اريد اصعد انام

هويت راسي و كمت للطبخ، المواعين مكومة ع السنك كمت اغسل و اطبخ بنفس الوكت لان ما ارتاح ، اطبخ و السنك هوسة اتخرذل

كملت كلشي .. اجت اثار كعدت، صبيتلها ماعون تمن و حطيت الها مركة و كعدتها .. فاتت مرت عمي

- شنو جاي تاكلن ؟

- لا صبيتلها ما متريكة هي

- و ما تعرفين تستأذينين كبل لا تصبين ؟ امج شلون ربتج ولو ما عليج عتب اذا امج ميعاد

-شبيج عمة ترا كله يلا ماعون و اني طبخته

- جايه تعيريني انت ؟

شالت جدر المركة و التمن شمرتهن بالسنك و تكلي :- ما اريد منج شي، اخذي اختج و اطلعي من بيتي يلا

- اني بعمري ما اعتبرت عندي عم بس يا حيف الدنيا مالت بيه و شمرتني عنده و اول ما يخلص المطر اني اخذ اختي و اطلع لا تخافين ما اكعد عدج

- فوك شينج كواة عينج و السانج شطوله بت ميعاد اكيد اطلعين على امج لا تربية ولا اخلاق

- احترمي نفسج و اعرفي شلون تحجين عدل، امي ما تجيبيها على السانج افتهمتي

- دكومي طايحة الحظ ساقطة كومي اطلعي منا يلا

نزل محمد :- هاي شكو يمة

- طلعها منا ما اريد اشوف خلقتها نهائي يلا

ديار:- لو اكو طريق والله جان فضلت الشارع ولا بقيت عندج بس طريق ماكو مجبورة اتحملج الى ان يخلص المطر

- و اني ما اتحملج ولا دقيقة ابيتي يلاااا

محمد :- يمة على كيف ما تشوفين جاي تمطر وين تروح

- انجب انت و اصعد فوك يلا تدخل

محمد:- لا ما انجب و هي مو يومية جايتنه كلخا يومين .. عوفيها فوك مصيبتها و خطف اخوها انت دكافي حتى الله ما يرضاها

بقت تتعارك وياه ، اني كعدت بالهول ابجي بهضيمة ع الذلة الاني بيها.

اجا محمد حجه :- شوفي امي عوفيها ولا تحجين وياها من يفك المطر وين ما تريدين تروحين روحي

ما رديت عليه، للعصر حوة اجا عمي، دخل و هو يسب بالوضع و بالسياسيين الما يعرفون يديرون البلد و فايض من زخة مطر

تلكته عمتي تصيح و تعربد .. اجا هو كام يحجي عليه و يغلط .. ما رديت عليه ولا بكلمة

لليل اجا كعد يمي ... كال ايجار بيت امج شكد

:- ٤٠٠

- اني مستعد اطيج غرفة من البيت و تطيني ٢٥٠

- مشكور عمو بس يخلص المطر اني اروح

- وين تروحين ؟

- كاع الله واسعة

- لازم صحبانج هواي مثل امج حتى مامنة تروحين

- عوفو امي بحالها لا ضرتكم و لا اجت يمكم كل شوية خايطيها بالسانكم ليش .. وبعدين الله ما ينسى عبده لا تخاف ... ما ابقى بهالذلة

- لا ابقي هنا .. انت وحيدة ووياج بت يروحون يطمعون بيجن و يستغلوجن

- اذا ع الاستغلال و التحرش اذا تقصد فانت تعرف حالتنا ما يحتاج غريب المنا و بينا و اللي طالعين من ظهره هو اللي مأذينا

- اسماعيل تاب و مو مثل اول .. اسمعيها مني و اكعد و خليني ائجرلج غرفة ب٢٥٠

- عمي لو حنين انت احسبنا مثل بناتك، مو قبل شوية تغلط عليه و اطرد بيه لخاطر مرتك و هسه تريدني و تريد فوكاي فلوس ، اعذرني عمي ..
ما ابقى بذلة احد
ما دام الله موجود ما ينساني

- طلعة من هنا ماكو افتهمتي

- الله كريم
سكتت عنه مو ما ارادده اكثر خل ينتهي المطر و لكل حادث حديث، بس عفية دنيا محد بيها يسوي زين لله كلها مصالح و ادور مصلحة .. حتى عمي اخو ابوي
ولو هو ابوي شلونه حتى اعتب على اخوه

ثاني يوم الصبح جان جمعة محد داوم .. عمي كاعد وولده وبناته يلعبون .. اباوعهم .. هو و ابوي اخوان
بس لام عاىلته و يشتغل و يكد
اخ يا اسماعيل الخنزير .. حتى اخوتك ما تشبهم

جان المفروض تنخلق خنزير يلوكلك هذا الصنف .. بس بعد ما ادري شنو حكمته و خلاك بشر

... اثار بيها طبع من تشوف جهال و ناس تلغي تلغي هواي .. لغت براس عمي هواي، شال المنفضة و ركعها و هو يكللها :- بت الخ*** بالعتلج مسجل دوختينا

هي ضاجت و اجت تبجي يمي، كمت اله :- تكدر تكللها عمو اسكتي ليش هيج ضربتها

- و اكسر راسها بعد افتهمتي عمها اني لو اذبحها ، حس ما اسمعلج امجن عافتجن و داحت باوربا تك***

-كلهن يومين كعدنا عدك و كل شوية معيرنا بيها

كومي اثار والله لو اعرف اسبح سبح فلا ابقى هنا .. كومي

كام من مكانه :- اطلعين ا***** مو فوتي لج يلا طايحة الحظ

- ما ابقى ولا خلف عليك وعلى استضافتك هاي لو حيوان و داخله عنده هم جان قدر و انكسر خاطرة

ضربني راشدي :- بت ال**** اني حيوووان

وكف محمد يدفع بيه و مرت عمي تغلط و تصيح :- عايقات على امهن .. تربية شوارع ما اتربن ببيوت ، عمج يدوس على راسج ما تحجين افتهمتي

سحبت نفسي منهم ، لميت غراضي لبست اختي، اخذت انعال من الباب و طلعت .. الدنيا تمطر يربي
وين اروح اموت اختي غير
شلون ربي بقت يمك حلها

طلع عمي يصيح .. فوتي

- ما اريد و بقية هنا ما ابقى ولا اتحمل كلمة ثانية تعيرونا بيها

- لزمني من راسي و جرني ليجوا و دفعني بالغرفة جوا :- ساقطة ما يهمها تبقى بالشارع متعودات انتن و امجن طايحات الحظ باب البيت لو عتبتيه اكسر رجلج

وهاي غرفة الج و لاختج و من وجاي تبقن بيها و نفس ما اسمع الجن ..

سحبت اختي بحظني و ابجي
و ادعي الله يفكني منها، .. امي ما عندي نت و اخابرها و اكللها ، عدهم نت بس محد ينطي الرمز كل الاكله يكلي ما اعرفه بس ابو الشبكة يعرفه

ولا الي احد اشكيله و يسمعني، خالد وراح منو الي بعد و افتحله كلبي .. بقيت ابجي و حاضنه اختي
شفت البجي ما منه فايدة ..
ما الي غير ربي اذا ما هو يسندني اضيع اني و اختي

محملة كتاب قران بالموبايل فتحت سورة يس ..و كمت اقرا بيها و مشيت .. بالساعة اقرا قران و ابجي

تعبت من التلوة ، سديت صفحة القران .. اتصل مهند

رديت ....الو

مهند :- هلو ديتر شلونج

- غركانه بنص الخير

- الله يعينج بالقران احترك دمي من سولفلي وسام احس النار اشتعلت براسي

- مهند تعبت تعبت

بجيت

- لا تبجين تخليني هسه اجيج ازحوف والله

- بقيت اشكيله على عمي و ضربه و منيته و مرته

كال :- ديار حضري روحج بعد ما اتحمل اني جاي

- وين تجي

- خايبة شبيج تبقين بذلته ليش شنو احنه مو اخوتج غمس اكصصنا لو خليناج هيج تشكيلنه و نسمعلج شنو نسوان، حضري روحج اني جاي

- ما اريد اورطك مهند

- شتورطيني اجرلج غرفة بفندق قابل راح انومج على كلبي، حضري روحج

- عمي ما يقبل اطلع و الطرق مسدده

- ما الج علاقة اني اجيج بتكسي ، و من تكسي لتكسي نوصل ما تضيج الا تفرج حضري روحج انت و اني من اوصل المنطقة اخابرج و اطلعيلي حتى لو بلا ما يدرون

- ماشي تعال

لبست ملابسي و كلت اله ربي لا تخيب ظني بيك اسندني وحيدة و ما الي غيرك، لزمت جنطتي و انتظرت اتصال من مهند

ساعتين الا ربع تقريبا خابرني و كال:- بيا منطقة هم

دليته . المنطقة و الشارع و اقرب نقطة دالة .. بالنص ساعة يلا خابرني، كال :- اني ع الشارع العام اطلعي

طلعت من الغرفة عمي متلفلف بالبطانية و نايم و مرت عمي كاعدة ع التلفزيون ، نزعت الحجاب حتى لا يحسون بيه خليته بالجنطة و طلعت الجنطة برا للكراج

رجعت لاثار كلت الها اطلعي كبالي و صيحلي كانما انت بالمرافق و ماكو مي ، هاي طلعت و نفذت الكلت الها عليه

طلعت اني لبست اثار حذائها و لبست انعال منهم و اخذت حجابي من الجنطة لفيته و طلعنا برا

كمت امشي ع الحافات حتى نطلع بلا ما نزلك بالطين
مطر خفيف كلش .. نقط بس ما تاثر بكد البرد الموجود
جن عايشين بمجمدة

زلكت رجل اثار و طمست بالطينة ، سحبتهة و طلعتها و كمت امشيها كبالي .. كوة طلعنا الفرع
الشارع ما بيه طينه بس متروس مي
علكت الجنطة على ظهري و فتت بالمي اني و اثار
شفت مهند كبالي هو اجان ركض النا

لزم ايد.اثار و عبرها و اني وراهم
شر البلية ما يضحك ، شكد هموم على كلبي ، خربت من الضحك على سوالف مهند ( بغداد لو مايج حلو جا جيتت بهدومي )
و طكن جيلات البرنو و الشارع فاض
ويصيح

- دسكت يمعود فضحتنا

- بلمكم طكنا يهل العمارة .. امشن .. بلمكم طك بلمنا يهل العمارة

فاتت سيارة و الشارع كله مي، و ماشي سريع .. طشر المي علينا صاح مهنا :- خايب هنااااا سبحتنا الله يسبح الخلفوك

وكفنا ع السايد البين الشارعين السايد عالي حيل، جنه واكفية على قمة .. يا سيارة تجي ياشرلها ماكو

و هو يغني ويا اثار ( انا البندوة الحمرة مزروعة بين الخضرة) و ذيج تغني و تكمز وياه .. لكانا تكسي وكفا و صعدنا

كاله:- بعد اخوك للغزالية

صعدنا وياه، بالساعتين يلا وصلنا من الفيضانات و الطرق المسدودة ، وصلنا لبيت كال :- يلا انزلو

- بيت منو هذا ؟

- بيت واحد صديقي خابرته و انطاني المفتاح فوتي

دخلت للبيت مأثث، كعدنا هو و انطاني المفاتيح و ما دخل للبيت،وكف بالكراج، كال :- اني راح اروح اتسوك الكم شتحتاجون .. عود من تخلص المطيرة ندورج بيت ايجار قريب على بيوتنا

- الله كريم ، ما اعرف شلون اجازيك والله ، الله يوفقك الشبابك ان شاءالله

- عيب هالحجي احنه اخوة ترا

- والنعم من هالخوة فدوة الكلبك

طلع هو .. دخلت للبيت اني و اثار
البيت ما بي اثاث قوي بس اكو غرفة نوم و تخم بالصالة .. لا اكو فراش ولا ابد حتى تلفزيون ماكو
و مطبخ صغير حيل بيه سنك و فوكاه كاونتر طلاقتين بس

بقيت افتر البيت بارد كلش، شوية و اجا مهند جايب صوبة كهربائية و اكل جاهز

بقيت اتشكره ، كام يرزلني لان اشكره، كال :- اني اروح هسه شتحتاجين خابريني

- تسلم

طلع هو ... كعدنا ع التخم اني و اثار و شغلت الصوبة و اتغطينا بالبطانيات ، كالت :- اريد تلفزيون

- هاج موبايلي العبي بيه

بقت تلعب بموبايلي و اني صافنه .. صفنة تجيبني و صفنة توديني .. خابرني بالليل مهند كال :- نسيت تكلج البيت ما بي سحب ، اطلع الاسواق كلش قريب عليكم اشتري شموع، ولو هي الكهرباء مستمرة لان شتا بس للاحتياط خاف تطفى و تبقون بالظلمة

اخذت اثار و طلعت .. خطية كلش فرحت من شافت اسواق .. باوعتل و هي تكلي :- صارلي ٣ ايام ما ماخذه مصرف اطلبج ٣ الاف

- اخذي اللي يعجبج اشتريه يلا

اخذت هي حلوياتها و اني اشتريت شموع
رجعنا للبيت هي بسطت حلوياتها و كعدت تاكل، اني قفلت البيت و غفيت ع القنفة
لهناك هي نعست و نامت يم رجلية

ثاني يوم اجا وسام ما قابل على تصرف مهند شلون جايبني لهنا و مرزله .. لأن تبين هذا البيت هو راجع لمجموعة شباب مشتركين بأيجاره لشغلاتهم الخاصة و مواعداتهم .

بس مهند حاجي ويا صاحبه و كايله اريد البيت منك فد ١٠ ايام .. كايله اخذه لان البيت هسه ما نحتاجه
و محذرة يرجع للبيت لان مكعد بيه صديقته اللي هي اني و كايله هاي بمثابة اختي ما تريد توصل للبيت

بس وسام ما راضي ..
كايل لا البيت مشبوه و يجيبلج شبه ، كومي وياي ولا تبقين

- وين اروح

- شوفي عندي ابن عمي عايش ابغداد الجديدة و عنده مشتمل ويا بيته .. صح ايجاره غالي بس اني راح احجيلج وياه و حتى لو هاي نجمعلج ع الروس و نكعدج لبين ما الله يفرجها

- علوا اذا ايجار .. اني عندي ايجار بيت ٤٠٠ اكدر اطلع المؤجر بس اذا كعدت بيه منين اصرف يعني لازم نموت جوع لان اني و اختي مدرسة و جامعة

- لا تخافين هسه اني اخابره و احجي وياه

خابره .. شوية ورجعلي

وفي هو هسه ما رد عليه بس اني متاكد ياجر البيت لان المأجر صار شهر من طلع .. و ايجارات ماكو بسبب الوضع فامشي بالطريق اخابره

اخذت غراضي و طلعنا الدنيا تمطر صعدت بسيارة وسام و اخذنا

- شسمه ابن عمك ؟

- صادق ، هو شيخ معمم بديوان الوقف ، خوش رجال، لا تخافين يتساهل ويانا ، هو حالته المادية زينة و ما اعتقد يوكفها ويانا ع الايجار يتساهل.

- ان شاءالله يا ربي

اخذني لبغداد الجديدة ، البيت يصير كبال سوك بغداد الجديدة .. لان بعدني اباوع ع المولات هو فات بفرع و كال وصلنا

كلت اي ربي.. الله اأجر بيت يم السوك . و كلشي احتاج السوك قريب شفايتلي

نزلنا من السيارة .. دك الباب هو .. طلع ولد يطلع عمره بعمر اسامة ، كاله :- ابوك هنا

- اي فوك

- لعد ليش ما يرد على اتصالي ؟

- نايم

- دصيحه كله وياي خطار

نزلت اني و دخلني للكراج اني و اثار و الجنطة بالسيارة، شوية نزل رجال لابس دشداشة و العركجينة على راسه، ملتحي ، شكله بيه وقار

كال :- يا هلا بوسام تفضل هلا بيك خوية

- هلا بيك ابو مرتضى، وياي خطار

باوع و دنك عينه للكاع:- اهلا بيج اختي فوتو

- جايينك بشغلة

- ما يجوز الحجي ع الباب، تفضل و اعتبر شغلتك مكضية

ردت افوت للاستقبال، صاح :- بابا رقية تعالي استقبلي الاخت

اجت بته صغيرة يطلع عمرها ١٥ سنة ، ابتسمتلي و رحبت بيه من باب المطبخ .. دخلت اني و اثار من باب المطبخ للهول

كعدت، البنية خجولة ما نطقت ولا كلمة بس راحت جابتلي مي، و سوت جاي لابوها و وسام

سمعت حجيه صاحت :- منو اجا ولج رقية

- بيبي عمو وسام و بنية وياه
باوعتلي و ابتسمت :- بيبي مشلوله ما تكدر تكوم

كمت من مكاني :- نروح يمها

- اي عادي

اخذت اثار و فتت للغرفة كلت الها :- السلام عليكم

- هلا و مرحبا وعليكم السلام عيوني

كعدت ، سالتني :- شتصيرين من وسام

- ما اصير بس محتاجة ايجار و كال ابن عمي يريد ياجر مشتمل

- ها خير ان شاءالله

فات للبيت الرجال و صاح :- بابا رقية وسام راح يدخل

اني كمت على حيلي وكفت، دخل وسام و الرجال و كال :- اني عندي بيت ايجار ، الله شاهد جنت مأجره ب٥٥٠ الف

وسام :- البنية سولفتلك عليها ، ابوها بالجيش و اخوها خاطفينه و امها مسافرة و ما الها احد غير هالطفلة، اني جاي عليك و اعرفك و البنية محتاجة ووحيدة

- لا ان شاءالله احنا اهل ، شكد تريد الايجار

- ٢٠٠

ابتسم منحرج، حجه وسام :- اذا كدرت ولكت شغل تزيد .. انت بس ساعدها هالفترة و مشيها

- هاي هي ولا يهمك

- ابو مرتضى امانة الله ورسولة البنية عندك و تعرف بس هي و اختها، و الدنيا مو زينة

- لا اختي ان شاءالله و لو احتاجت البيت موجود ادك الباب وكت ما عجبها و نا نقصر وياها ان شاءالله، بس هاي كدام وسام احجيها و اكون صريح

يحجي و لازم سبحته و يباوع لامة و اني على صفحة ، كال :- اديرين بالج كلش زين

- يعني شلون

- اني سمعتي بالمنطقة طيبة و كلها تعرفني و تحترمني، فما اريد تطلع من عندج تصرفات تسيئ لسمعة بيتي، اديرين بالج من الخطار و تاخذين حذرج و تصونين البيت و حرمته.

- ان شاءالله

- اني لخاطر وسام راح اقبل والا والله البيت طلبوه مني ب٤٠٠ و ما اجرته، ان شاءالله ما اتندم و اتمنى تكونين عند الثقة النطيته

- اطمن و مشكورة منك هواية

- هلا بيج ، بابا رقية البسي وروحي ويا الاخت حتى تشوف البيت

- اي بابا

صعدت البنية لبست جبه و حجاب و نزلت ، رحت وياها للبيت .. صدك البيت نظيف حيل حمام غربي و شرقي و الكاع مرمر و الحيطان سيراميك

فرحت و حسيت الله فعلا وكف وياي و ما قصر و سهلي الامور و راح اكعد ابيت اني و اختي و ارتاح

بقيت امشي بالبيت، رغم كل الهم على كلبي مبتسمة و اباوع البيت .. اندكت الباب، فات الرجال ووسام

كال :- يا الله ، باباتي

رقية :- ها بابا

- شافت البيت اختج يابه

- اي شافته

ديار :- عجبني الله ينطيك الصحة و العافية

- للجميع ان شاءالله ، اسمعي يابه ايجار هذا الشهر اني ما اريده اكعدي و استقري انت و اختج ولو احتاجيتو شي بابي موجود

بس اسألج اخوج شلون نخطف

- دخلوا علينا ناس مسلحين بالليل و اخذوه و قبل يوم رموا البيت

- اهل عمام ما الج ؟

- الي بس من رحت العمي يريد يأجرلي الغرفة ب٢٠٠ غير المنية و المعاير و الضرب و الغلط و الشتيمة

- لا حول ولا قوة الا بالله، احنا اهلج ان شاءالله و اذا عايشناح و شفناج مرة و سباعية ما راح نخليج تحتاجين لاحد

- تسلم

وسام :- ابو مرتضى اذا تكدر انت عندك معارف بالدولة هواي اسأل و حقق على اخوها هي تريد ترفع قضية بس الظروف عكست وياها

- ان شاءالله عندي صديق بالداخلية راح احاجيه، ايوج ما خابر ما عرف ابنه مفقود

- مبايله مغلص و هو ما ينزل كل ١٥ يوم و اكثر

- لو رجع و ما لكاكم ما يحجي ؟

- جنت كاعدة عد عمي فاكيد لو رجع يعرف احنا وين، بس هسه استقر و انطي خبر لجيرانه حتى اذا رجع ابوي يعرف مكانه

- ان شاءالله ، يلا اخذوا راحتكم

طلع و هو يأشر لوسام يطلع كدامه وبقوا يسولفون برا

كلت للبنية :- كل غراض ما عندي شلون راح نكعد

- راح اجيبلج فراشات من بيتنا و صوبة

- اي فدوة حبيبتي الله يخليج، عدكم نت اريد اخابر امي

- هسه اكول لاخوي و ينطيجياه

طلعت البنية و اني بقيت افتر بالبين، وسام سلم عليه و بقى يوصي بيه و راح

اجت البنية جابتلي فراشات و صوبة نفطية مليانة نفط و كالت اذا احتاجيتي شي دكي علينا الباب

- تسلمين

فرشت الفراش و خليت الموبايل ع الشحن و كعدت، اندكت الباب ، لبست حجابي و طلعت

طلع الشيخ صادق، بيدة علاكة اكل ، حجه و هو داير وجهه عن الباب و كال :- هاي جبت الكم عشا اعذرونا جان المفروض نطبخلكم بس الوالدة مشلولة و البنية صغيرة ، جبت الكم جاهز

- تسلم ما تقصر الله يحفظكم ان شاءالله

- يحفظ الجميع، يلا قفلي الباب يابه وديري بالج على نفسج......

☆☆☆☆☆☆