اخذت الصينية و رحت الهن حطييت الصينية كبالهن بعدهن على نفس الرنة وحدة تجر بالطول ووحدة تجر بالعرض

نزل امجد، سلم عليهن وراح سلم على ابوه و عمه، اني طلعت للمطبخ، اجا وراي :- بقى كعك ؟

-اي، تريد ؟

-صبيلي بماعون صغير و صعديلنا اني و احمد

فات خالد راد يحجي من شاف امجد، سكت، سلم على امجد ، سأل امجد :- شنو هذا الدفتر

خالد:- لا هيج مال سارة بتي مال رسم، شلونك انت

-على الله، صبينا ديار الجاي و الكعك النا اني و خالد و عمريلنا النركيلة خل نكعد بالباب

خالد :- مشكور رايد ارجع للمحل خليت مهيمن بيه اخذ راحتك

اندار باوعلي :- ديار خلي هذا الدفتر يمج عود من تجيج سارة بتي انطيهياه بس ديري بالج عليه كلش زين اذا ضاع تسويلنه مصيبة

بهالحجي امجد دار وجهه يطلع من المطبخ،كتله :- شكرا

ما حجه اندار يطلع، وكعت صوندت السنك بداخل الكاونتر سمعت صوت المي، عفت الدفر و دنكت للصوندة و صحت :- امجددددد

رجع خالد شال الدفتر خلاه جوا ايده، ودنك للسنك يعدل الصوندة و هو يهمس :- كلش اتضايق من تطلبين المساعدة من غيري

فات امجد :- شنو وكعت

خالد :- انكسرت، جيبي سطلة دا اخليها جوا بس يفرغ المي على ما تجيبون جديدة،

فاتت ضحى و شايلة بتها على جتفها سلمت ووكفت كالت :- ها شصاير هنا ؟

امجد :- دركضي جيبي سطل شبيج

ركضت للحمام و ضحى واكفة يم خالد حاطة ايدها ع الحوض حتى يوكف المي مينزل

ردت ادنك اخلي السطل سحبته ضحى مني و انطته لخالد هو خلاه و يحجي ويا امجد يدليه على واحد مفتح جديد يجيب منه و امجد يكلي

:- صعدي جيبيلي محفظتي من فوك

صعدت ركض جبتله المحفظة و اجيت، انطيته اله و هو يصيح على بته فطومه تجيبله سويج سيارة جدو

ضربني خالد بالدفتر على ايدي، و خزرني بمعنى ( اخذي ولا تشمرينه بعد ) ضحى واكفة كدامنا و تباوع

طلع خالد و اني رحت اجيب الوصلة حتى امسح الكاع

حجت :- سويلي جاي و كعك حيل مشتهيته و عود جيبي وراية رايحة اكعد

حجتها بنبرة متضايقة مني، اسلوب خالد كدامها ما جان لازم يسوي، يتصرف و كانوا هي مموجودة لما خزرني و هو يوصيني

حطيت الدفتر فوك الكاونتر،باوعت ما بقى كعك بس اللي طلبه امجد، عفت ما سويتلها بس صبيتلها جاي ووديته الها

فتت تعذرت منها :- اعذريني ما بقى كعك

حليمة:- وين العقد الكرستال الجبته الج البسي شوفيهم ذوقي شلونه والله جبته ب٢٥ الف

ابتسمتلها و كتلها :- اي هسه
طلعته ام امجد اخذته امي تباوع بيه و تكللها يخبل كلش راقي، عيوني هي الاختارت ابو رفودة تنسأل ع الذوق

شو تعاي خل البسجياه، دنكت الها لبستني وكمت اعدل بيه على صدري

ام رافد :- بالله اشوفج، مو حلو مال معدان

حليمة :- يا شمعرفج انت بالموديل وتحجين، يخبل بالعافية حبيبتي جبته ب٢٥ الف

ام رافد :- ام الذوق خية مانه عليها كلساع و كلتي جبته ب٢٥ الف ، غدي هذا الما شايف و شاف

ضحكت على سوالفهن، وحقها من جنت ويا سلمان محبس شبه ما طلع منها و هسه تجيبلي عقد ب٢٥ الف، سبحان المغير الاحوال

صاحتلي مها حتى اساعدها للحمام، رادت تكوم ما كدرت كالت خليني، بس تون متاذيه من جسمها حيل خطية

عفته و رحت للمطبخ اكمله
اجت ضحى وراي :- اي شلونج انت و امجد ان شاءالله زينين ؟

-الحمدلله

-خطية خالد لو تشوفين من رجعنا شكد مشتاقلي يكلي كل هاي السنوات اكابر حرت شسويت و شصاحبت بس حتى انساج و ما كدرت

-الله يهنيكم ان شاءالله

-يمه لو تشوفين شسوا بليلتها...... قاطعتها

-اسراركم هاي ضحى ما احب اسمعها

-ليش تتضايقين

-مو شغلة اتضايق بس من سألتيتي على حالي اني و امجد ما حجيتلج شي لان اسرارنا ما تخصج ولا اني يخصني شي باسراركم

عفته بأرادتي ما مجبورة و صارتلي كومة فرص انهي الزواج و ارجع و ما رجعت فلا تخافين ارجعله لو اريد جان رجعت من زمان، الله يهنيكم مع بعض ويهنيني اني ورجلي

درت عنها و هي تكلي :- اوكي عيني اوكي بس اعصابج شوية حسيتج تضايقتي شوية و تاكليني

اخذت نفس بقوة و تنهدت، عفت المطبخ و اخذت الدفتر من فوك الكاونتر و صعدت فوك

كعدت بغرفتي فركت وجهي، فتحت الدفتر كمت اقرأ بيه، اوووف وين رجعني ليا ذكريات لايام احلى ايام فاتت بعمري .. عمري كله ما انساهناصلا مجرد ما ذكرتهن خطرت ابالي اغنية

(يسمعني حين يراقصني كلمات ليست كالكلمات) جان يطيرني بكلامة و بخوفه عليه و حنيته، كمت اردد على الساني كلمات الاغنية و دموعي كامت تجري بهدوء كلبي اشتاق لذيج الايام احس جاي اشتم عطرهن

حسيت اكو رجلين جاية للغرفة، مسحت دموعي بسرعة و كمت اشكك بالدفتر

فات امجد :- جبتها الصوندة، هاي شبيج

-ماكو شي

-الدفتر مو وصاج عليه خالد مال بته ليش جاي تشككين بيه

-ااا نسيت ما ادري عود اني اني اشتري لبته غيره

كمت من مكاني اخذت الدفتر و نزلت جوا، حطيته ع الطباخ و حركته كله، نزل امجد وراي حتى يسوي السنك، من شاف الدفتر استغرب

:- ليش حركتي

- ااا شككته بعد ميفيد

-جان شمرتيه ليش تحركينه، شبيه الدفتر ديار

-هاي شبيك ما بيه شي دفتر عادي وحركته يعني ترا ااا ما بيها شي

امجد :- خالد ليش انطاجياه ؟

-مال بته و انطانياه

-مال بته متاكدة لو غير دفتر هددوج بيه قبل ؟

-شتقصد ؟

-كملي شغلج هسه و بعدين الله كريم

-رجعت تشك ؟

دنك :- شيلي السطل خل اثبت الصوندة

دنكت ويا كعد هو يثبت بالسنك و الحواجب متطابگة كلش مزعوج .. كمل غسل اديه و طلع من البيت

خفت بس لا شك بشي، بس هو مدام حركت الدفتر و خلصت من عنده هاهية خلصت ازمة حياتي بعد ما اهتم.

.......

امجد :- ها السلام عليكم

خالد :- وعليكم السلام بعدهم الاهل عدكم

امجد :- اي بعدهم

-زين رجعت لامور لمحاريها و تصافو ابوي و عمي

-اي، خالد اريد اسألك

-كول ؟

-شنو هذا الدفتر اللي انطيته لديار ؟

-ليش السؤال شبيه ؟

-هو اني جاي اسألك شبيه ؟

-دفتر اختها اثار و انطتهياه

-دفتر اثار لو بتك ؟

- اووو ما ادري ما متأكد هن اثنينهن يلعب ابيتنا وباقي الدفتر

-اثار صارلها فوك الشهر ويا ديار مسافرة شوكت لعبت

-تحقيق هو يا امجد دفتر عد بناتي جنت شايله و خليته عد ديار مو فد شي مهم

-اذا مو مهم ليش وصيتها عليه ؟

-اهاا تره صدك انت مو معقول، شبيك يا اخي جنت اتشاقى، صاير شي ؟

:- شفت ديار فوك جانت مثل التبجي و شككته ظن سألتها تكلي نسيت ما ادري اني اشتريلهم غيرة و نزلت حركته

- هممم
دنكت، اصفط بالحاجات اللي جوا بالميز الكزاز، رفعت راسي امجد مركز بيه :- شبيك شو تباوع بوجهي شاك بشي ؟

-ما اعرف اذا انت ضام عليه شي احجي

-شضام عليك جاي اكلك ما بيه شي

-قبل فترة وصلتني رسايل لموبايلي تخص تفتر مذكرات و هيج شي وكتها ديار كلش خافت من سمعت بهالموضوع

-اييي ؟

-شنو اي انت اكيد تعرف شي عن هاي المذكرات

-جاي اجذب عليك يعني ؟ الدفتر الانطيته لديار بيه رسم و اصبغ غير هيج ما بيه و اذا عدها مذكرات و ماضي انت ما الك خص بماضيها، اسألك عنها اليوم بيها شي وياك لا اذن خلك ليش تجيب المشاكل

-لأن بيها شي مو ما بيها حتى اقفل

-شكو ؟

-شغلات بيني و بينها

-اذا بينك و بينعا اني شكو مدخلني بالنص الدفتر اللي انطيته الديار كلشي ما بيه غير هالحجي ما عندي

سكت ما رد، طلع برا المحل صفن و رد رجع كعد، دخل مشتري يدور بالمحل و يسأل ع السعر، اجاوب و عقلي ويا امجد

بعت و باوعت لامجد :- اريد اكلك موضوع

امجد:- اي كول

خالد :- اني قررت اتزوج بالاردن

-تتزوج منو ؟

-بنية شامية احبها من زمان

-تحبها

-اي عندي علاقة بيها من زمان و هي تحبني بس رجعت ضحى خربت كلشي و انجبرت عليها و هسه رايد اطلع اتزوجها و حاير

-بشنو حاير

-يعني احس ورطت نفسي عائلة هنا و بنية احبها هناك شلون راح ترهم ما اعرف

-من شوكت عندك علاقة بوحدة سورية ؟

-من وكت الطلكت ضحى وطلعت للاردن كل هالفترة البنية متحملتني و خطية

امجد :- و شتريد تسوي ؟

خالد :- ما اعرف دايخ حجي براسي و ردت افضفضلك لا اكثر لان كل الوقت افكر بهالموضوع

امجد :- هاا، الله كريم شوف شلون ادبرها، اروح اخذ سيارتي ابدلها دهن من رخصتك

خالد :- هلا بيك
طلع، تنهدت : اخ ديار اخ ليمتى ابقى اسدسد وراج ما ادري، ادري خلصت الاماكن و تحركين كبال عينه هي ثوله.

............

مرت الأيام طبيعية هالفترة
بس مها كلش تعبت حالتها من الغيرة، حتى امجد كام ينام جوا من الجهال بس حتى ما تتأذى ولا تبجي

كم مرة تخربطت و اخذناها للمستشفى نحوللها دم
صحتها بالنازل كلش ضعفت كل ما جاي تصعب اكثر
وصلت بيها حالة بعد ما تكدر تكوم للحمام حتى لو نساعدها

جابلها امجد حفاظات مال كبار و كمت احفظها خطية حيل اتاذت و تبجي قهر من حالتها لان وصلت لهالحال
مرات تضايقني و مرات تبجيلي و توصيني على جهالها و تشهك بدموع وكوة تحجي

كلش تعبت على مودها حالتها تبجي الصخر

خلصت العطلة ورجعنا للدوام
اول يوم الدوام جنه احنا الطلاب كلش مشتاقين لبعص
واحد يسأل اللاخ على احواله و على اخباره

رزلتني عذراء لان موبايلي دوم جان طافي
كلت الها :- مو عطل و ما جبت غيره البارحة امجد جابلي موبايل جديد على مود الجامعة

بقوا يباركولي على زواجي لان هواي من الاصدقاء ميعرفون اني اتزوجت ..

اول مدخلت الكلية جنت كلش متجنبة الصداقات بس من بعد حادثة ثامر وياي و بجيت و اني الومه كلهم استخطوني و كامو يخبون يصيحولي بجمعاتهم حتى لا يحسسوني بشي و تتعقد نفسيتي

خاصة وسام جان كلبة كلب سمجة رغم هو حاد و قليل الكلام بس لما يرتاح بفد كعدة ينطلق يضحك

لاحظت مريم اديه طايبة ، فزت و هي تصرخ :- عالجتي اديج ؟

ابتسمت :- اي رحت اللبنان وتعالجت هناك

عذراء:- اي يابه لبنان و كذا مبين هالرجال ايدة كريمة

-اي خوش ولد الحمدلله

وسام :- هلووووووووو

كلها كامت ترحب بيه و يسلمون عليه و هو يسال على احوالهم و هم يسألون على احواله، رفع الهم ايده :- خاطب يابه ما اتحاجى خوما مثلكم سربتيه

كامو يصرخون و يصوفروله كمنا نباركله ، سألنا على الخطوبة كال :- والله من عمامنا خوش بنية و حلوة و صارت القسمة هي هم طالبة

مريم :- يعني مو هسه تتزوج

وسام :-، لا ما عدنا شي من نخلص جامعة نتزوج

مريم :- اي مبروك
حسيتها ضاجت، كامت من يمي، باوعت وراي، اترخصت منهم و رحت وراها

:- اكو شي ؟

-لا

-اعرف جنتي معجبة بيه

-اي بس هو ما انتبه ولا مرة

-الله كريم

دك الموبايل، اجا مسج فتحته خالد مكتوب ( اليوم بالكلية مو )

ما جاوبته سديت المبايل اجت عذراء و ميسون كعدن ويانا و يسألون ليش ابتعدنا كلنالهم :- نريد نسولف سوالف بنات مشتاقين البعض

عذراء :- اي اي كلش خلونا نطلع اليوم نفتر بالاسواق نشتري ملابس ما عندي هواية

مريم :- ما عندي فلوس بس الفين شايله

عذراء:- اني اداينج ٢٥ الف بعد بس خل نروح فدوة بنات

بقن يتفقن بيناتهم ع الطلعة، كلت الهم خل اخابر امجد اگله

مشيت على صفحة خابرت امجد :- الو

-هلو ديار

-اگلك اني راح اطلع ويا البنات نشتري شوية

-يا شارع و منو ذوله البنات

-صديقاتي

-وصديقاتج شعرف عنهن ديار

-هاي شبيك امجد دا اكولك صديقاتي وبعدين اني مو صغيرة يعني اعرف الصح من الغلط مو حلو هيج تخنكني

اخذ نفس و اتنهد :- يلا ماشي روحي و لا تتأخرين هواي، مصرف عندج ؟

-بجيزداني ١٧ الف ما احتاج شي بس ويا البنات

-تندلين ترجعين وحدج ؟ اني ما اكدر اوصلج بالدوام

-اي اي اندل

- لعد اخذي راحتج من توصلين للبيت خابريني

ماشي

... رحت ويا البنات افتر ، دخلت عذراء بمحل ملابس تقيس و احنا نكلها حلو لو لا، باوعت موبايلي رسالة ثانية جتية من خالد مكتوب بيها ( تتذكرين من جنت اوصلج )

دزيتله رساله ( اي الله يرحم ايام زمان )

دز بسرعة ( تشتاقيلهن ؟ اني كلش جاي اشتاق لذيج الايام )

طلعت عذراء :- وهذا شلونه اللبس ؟

مريم:- حلو عذراء بس امشن خل نرجع امي لو درت اني طالعة من الكلية والله تشوي على اذاني بصل

عذراء:- وهسه وين رايحة متكليلي ما صارلنا هواي من اجينا

ديار :- لا صدك بنات ترا صارلنا ٣ ساعات و احنا محاسين ع الوقت استعجلو

بقينا نلح على عذراء حتى نرجع بسرعة، وسام من شافني اني و عذراء ما عدنا خط كال اني اوصلكم

صعد مهند ويانا بالصدر و احنا ورا، وصلو عذراء و بعدين وصلوني، وصلت راس الفرع كلت اله :- هنا وسام لا تدخل الفرع، مشكور و يوم النخدمك بزواجك ان شاءالله

وسام :- انت بس تعاي لديالى انشيلج على راسنا والله

ضحكت :-، سالم راسكم ان شاءالله، مع السلامة

رفعت راسي، خالد واكف اباب المحل ، سلم عليه وسام و دار سيارته و راح ، حجه :- كلش خوش ولد وسام مو ؟

ابتسمت :- انت احسن منه

ضحك :- بنص هالحر فوتي انطيج شي بارد تشربيه

-لا يروح يشوفنا احد يمعود ما الي خلك

-هو شراب لا تخافين تعاي

دخلت للمحل :- يا يابه كلش بارد

-ارتاحي

-لا يمعود اروح للبيت

-ديار اخذي حذرج من امجد

-ليش

-اخذيها مني و بس خافي على روحج

- ان شاءالله، يلا مع السلامة وشكرا ع البيبسي

- الف عافية

رجعت للبيت بدلت ملابسي و نزلت حميتلهم الغدا و شوفت ام امجد الغراض الاشتريتهم من السوك
والتهيت بمها انظفلها و اداريها

اجا امجد صبيتله غدا تغدا و صعد نام، مها تضايقت من صعد فبقيت جوا يمها كاعدة حتى ما تضوج

ام امجد كالت رايحة لبيت ابو رافد اكعد عصرية ويا البنات، و ابو امجد طلع برا ، و مها نامت

رحت كعدت بالمطبخ مددت رجلية و اكلب بالموبايل ، شفت رسالة خالد ، ضحكت ( كتبتله اليوم شنو السالفة لازم وسام ضوجك )

دز ( شبيه وسام ليش اضوج منه )

( ما اعرف حسيتك ضجت من وصلني اليوم )

( لا ما ضجت بس اشتاق لذيج الايام )

ردت اكتب، سمعت صوت خالد برا ، عقدت حواجبي
طلعت برا فتحت الباب، خالد ديضحك ويا بناته بالباب

باوعلي، اشرلي :- ها ؟

اتعجبت ما شايل موبايل بيده و هو هسه دزلي رسالة، حجيت :- وين موبايلك ؟

:- هذا بجيبي ليش شكو

- رفعتله موبايله
تلفت منا و منا و اجا يمي:- شكو

-جاي اتراسلني و اتعجبت سمعت صوتك

-ما مراسلج

-شنو ما مراسلني ؟ هذا اسمك مكتوب و رقمك و الرسايل دا تجي منك

اخذ الموبايل :- هاي الرسايل مو اني كاتبها

- يعني شنو ؟

- يعني اكو واحد منتحل شخصيتي يريد يختبرج فوتي جوا بسرعة ....

☆☆☆☆☆☆

#اتمنى_ان_افعلها



الحلقة_39

اخذ الموبايل :- هاي الرسايل مو اني كاتبها

- يعني شنو ؟

- يعني اكو واحد منتحل شخصيتي يريد يختبرج فوتي جوا بسرعة

امجد :- ديار شجاي تسوين

التفتت وراي خالد ديطلع، وكف كبالي :- شعندج فاتحة الباب

-ما عندي شي بس سألني خالد على عمي كتله ما موجود

-ما موجود مو

ضربني راشدي قوي
لزمت خدي :- شبيك ليش تضربني ؟

لزم شعري بقوة :- واكسر راسج حيوااااانه، افتهمتييييييي، انت شنو جاي تلعبين عليه، هاااااا ، احجي ، طرطور كبالج و تجذبييييين

فات خالد للبيت على صوت الصياح شافه لازم بشعري دفعه من عندي و كاله :- شبيك تخبلت شلون تلزمها هيج

-مرتي اضربها اموتها انت اطلع برا

-احترم نفسك لا اشوه وجهك والله

امجد :- منو هذا التشوه وجه بالله

تلازموا من القمصان و يتصايحون، فزيت بيناتهم افاكك

امجد يغلط و خالد يصيح، امجد فشر على خالد
جابه بوكس على وجهه وكعه و هو يصرخ :- من تتعدى حدودك ادفنك والله ك****

كامله امجد تلازم وياه مرة لخ
محد بالبيت بس اني ومها نايمة و ذوله اثنينهم تلازموا و يتعاركون

الجهال سامعة الهوسة راكضة لبيت ابو رافد يكلولهم ، ام امجد و ام رافد اجن يصرخن و يفاككن بيهم

ام امجد جرت امجد و ام رافد سحبت خالد و اطلعه من البيت

خالد يهدد و يغلط و امجد يدفع بامه يريد يرجعله، و يغلط ، دفعت خالد برا و سديت الباب، اجا امجد
لزم شعري ووكعني للكاع

- شعندج ويااااه احجي اذا ما تحجين والله اجيب سلاحي افرغة براااااااااااسج

ام امجد :- يمه عز العزاك شجاك البنية راسها على كيفك

اني ابجي و اصيح بأيدي و اوخر بيه

رجع خالد يضرب بالباب و يصرخ :-زلممممممممة افتح الباب لا تستقووووي علييييييها

ام امجد دفعت امجد من عندي و خلتني ورا ظهرها و كامت تصيح على خالد :- روح الله لااااااا يوفقك عوفونااااااا بحالنا امشي مناااااااا

امجد عصبي و يصيح راد يفتح الباب و يطلع اله، ركضت ام امجد، لزمت الباب و هي تكله :- كافي عوفه كاااااافي عيب عليكم استحو الجوارين منا سمعت صوتنا تتعاركون جهال انتم

امجد :- روحي لهاي المشوووووهة روحي اءا ما تحجيلي هسه سعدها وياه والله العظيم السلاح افرغه براسها

ام امجد :- شصايرفهمني كلي شصاير

ام رافد تسحب بخالد و تصيح عليه ، اني فتت جوا ركضت للغرفة لميت ملابسي حطيتهن بعلاكة ، و ابجي
صعد امجد بهمة بس صوت الرجلين ع الدرج و امه تصيح عليه

فات للغرفة شافني اشيل بملابسي، سد الباب :- انت تعتقدين اخليج تروحين اذا ما حجيتيلي شعندج وياه

-اكلك انت شنو تهدد، صير سبع من صدك و فرغ اسلاحك لا تهددني و الا عوفني اروح و ابتعد

عني دفعني للكاع :- ولج تحجين شعندج وياه لوووووولا

-ما عندي مااااااا عندي شرايد مني بعد شرااااايد ، تضربني و تسحل بشعري مو حيوان عندك اني و تضربني افتهمتتتت

لزمني من ركبتي و هو يصرخ عليه :- تريدين توهميني دفتر الحركتي ما بيه سوالفج المكسرة

دفعته من عندي حيل:- عندي ما عندي انتهت وياك افتهمت

-اذبحج هنا والله و ما اخليج اطلعين

ام امجد تضرب بالباب قوي و تصيح بأمجد و خبصت الجو علينا، سحبني من جتفي حيل، ردت اوكع دفعته من عندي

كلت الك ما اكعد وخر من عندي

دفعته حيل و فتحت الباب و هو يغلط، فاتت امه تصيح :- بس كلي شصاير بس فهمني خل افتهم حتى انطيك حق لو لا

فتح الها الرسايل :- شوفي بعينج شوفي اراسلها بأسم خالد شوف شتكلي، خالد من صفحة ووسام من صفحة متزوجلي كح... وما ادري

ديار :- يعني انت الجنت تراسلني حتى تختبرني و توكعني بكلمة الحمدلله ربي ما عندي شي و اتحداك اطلع علية شي، بس بسيطة

نزلت و عفته بالغرفة، و جسمي يرجف و اسمع امه تگله :-، الرسايل ما بيها شي ما كاتبه شي اتوقع خالد ما عنده ي وياه شلون هيج ادزلها بأسم خالد مشتاق و ما مشتاق

امجد :- جابلها دفتر و كدام عيني انطاه الها و حركته و من اكللها مالمن تكلي مال بته و من اسأله مال منو هالدفتر يكلي ما اثار و اثنينهم يجذبون والله العظيم
الراسلني جان متاكد من كالي مرتك جاي تخونك ويا اقرب الناس الك ماكو غير خالد

... نزلت من عدهم ما اريد حتى اسمعهم
سمعت الباب تندك، و جهال امجد يبجون و صوت مها كوة يطلع دا تريد تعرف شصاير

عفتهم ورحت للباب، شفت من جو حذاء مرة مو رجال، رحت فتحت الباب، طلعت امي كبالي :- ها ولج خير شبيج تبجين

-فوتي

-خالد هجم عليه الباب كال روحي لبتج بسرعة محتاجتج، شصاير كليلي

-اجت رسالة على موبايل مكتوب خالد، ادخلي ذاك الموبايل و شوفي بنفسج
فاتت جوا، باوعت بالموبايل:- منو هذا ؟

-ما ادري يراسلني من الصبح بأسم خالد مكتوب بالجهاز اني عبالي خالد لما كعدت قبل شوية رديت عليه و اسمع صوت خالد برا طلع مو خالد امجد جاي يختبرني

نزلت ام امجد :- هلا ام ديار فوتي جوا

-ابنج شمسوي ابتي ضاربها مو ؟

ام امجد :- مرة و رجال لا تكبريها كولي يا الله فوتي

فاتت امي و ام امجد تخزرني افوت ، وكفت بالصالة و صاحت امي :- امجددددد لا تصيح فوك تعال و كابلني اذا بتي بيها غلط احجيلي

نزل هو الها :- ما تعرفين بتج

-اعرفها و تشرفك و تشرف راسك احجي وياي ابأدب لا تخليني ادوس بالحجي

ام امجد :- ميعاد عيب هالكلام ما يصير

ميعاد:- عرفي ابنج العيب و عود ارجعيلي
دارتلي :- ضاربج ؟ احجي متعدي عليج لا تسكتين
ازين شواربه والله اليتعده عليج

امجد :- اكسر راسها و ادفنها بكيفي اطلعي منا و لا تدخلين يلااا

ميعاد :- فدوة يكسر راسها تايهتلك بيك خير مد ايدك و شوف اذا ما خليتها تتعلك بركبتك، امشي انت اصعدي بدلي اخذج لبيتي

امجد :- ادفنها هنا كتلج و ماكو الها طلعة اذا ما تحجيلي الحقيقة كلها

ميعاد:- خليني محترمة البيت و ساكته ولا تخليني اطلعلك وجهي الثاني ابعد مني .

...امجد.بقى يترادد ويا امي و اني صعدت فوك حتى البس و انزل اروح لبيت امي، صعدت وراي ام امجد

كرصتني منززندي و تحجي بصوت ناصي :- شصاير و امجد هيج متخبل شمسوية

-كلشي مسويت رقم مكتوب عليه خالد بموبايلي يراسلني من الصبح حتى رديته اليوم شكو لان مستغربه خالد ميراسل ولا يحجي هيج كلام

-ام امجد :- يوم واحد اخذتي الموبايل صارت المصايب شلون بالله وياج ؟ الدفتر المنطيجياه خالد شنو ؟

-دفتر خواطر من زمان جان عنده انطانياه و اني حركته ظن شافني امجد احركه كام يشك

-و انت الا كباله تحركينه

-هسه جاي تلوميني كباله و ما كباله خالة اني تعبت خليني اروح و هاي هيه

-بهالسهولة تروحين ديار يمه اعقلي مو هيج الحياة ، اصبري يجي ابو امجد خابرته هسه راح يجي

-خالة الموضوع زاد عن حدة اني ما جاي ترهم وياي عيوني فاضحتني رغم والله ممسوية شي

-اذا انت لهسه تتهربين من حقوقه شلون ما يشك، شايفة مرة شهرين و ما تخلي رجلها يتقربلها شيسموها هاي ولج هو الصابر مو انت اكعدي و اسكتي

...سمعنا صووت امجد يصيح على امه
مها كايمة تبجي لأن ما رادين عليها

نزلت ام امجد تركض، و امي صعدتلي :- بس هذا الصاير احجيلي شنو سالفة الدفتر الما تخلص ؟

-انطانياه خالد و حركته و هو شاف لما حركت

-منين جابه خالد ؟ و عد منو جان

- ما ادري المهم جابه

-المهم جابه شنو ، اكو احد جان يهددنا و يدز رسايل و يفشر علينا و يطعن بينا هيج نمشيها بسهولة بس سكتوها للسالفة

-كافي يوم لخاطر ربج

-تمشين وياي لا تظلين

-ام امجد تكلي ابقي

-ضاربج و تبقين بعد يومين كل ما اجا على بالج و دمغ على راسج لان ضرب اول مرة و سكتي، معليج بامة خليني أأدبه هل بلا ادب

شصاير بينه وبين خالد هو ؟

-تمالخو كطعت روحي بس اريد افاككهم لحد ما اجت امهاتهم

-ليش؟

-يمه دنزلي خل اشوف شلون نحلها وياه

-يا فدوة نحلها شكو اخذج و غصبا عليه يبوس القنادر حتى يرجعج و اذا راد يطلك يطبه طوب لو بيه خير جان تمسك بيج .. خلصي منه

صاح ابو امجد من فوك :- ديااااااار

-اجيت عموووو

لزمتني امي :- اسمعي من يحجي وياج احجي بثقة ولا تخافين لا تحسسينهم عندج شي و خايفة خلي الحق عليهم و اغلب الحجي خليه عليه اني اتصداله، يلا انزلي

نزلت و هي شالت الجنطة مالتي وراي، و نزلت
فتت للهول ، جاي يحجي ويا امجد و امجد عصبي، من شافوني اثنينهم سكتوا، و امجد دار وجهه

ابو امجد :- شصاير ديار ؟.

ميعاد:- ابنك ما كالك شصاير يا ابو امجد يعني يراسلها بأسم ابن عمه و يكلها مشتاقلج و سوالف عيب تنحجي و فوك شينة يضربها

انطيني شسوت و ضربته

امجد :- اراسلها وواكفة ويا خالد بالباب

ديار :- لان من اندزت الرسالة صوت خالد برا اني سمعته فأستغربت ، خالد ما يدز هيج رسايل فطلعت ردت احجي وياه اجيت انت

ميعاد:- اسمع ابو امجد الشاهد الله اني احبكم و اودكم بس سوالف ابنك ما اكدر اتحملهن من يلزم بتي و يضربها و هاك شوفة عينك جارها من شعرها لو مضروب راسها و صاير بيها شي اني بيمن ربحي ؟

ابو امجد :- شنو سالفة الدفتر

ميعاد :-، عاد لا تحطون سالفة الدفتر حجة، دفتر و حركته و راح ولى لو يعز عليها و تريده ما حركته كافي عاد طوختوها طلعت من ماعونها ادورون بكل سالفة مطلعيلكم انه

ابو امجد :- ام ديار الحجي اخذ و عطا خل نسمع منهم اثنينهم

ميعاد:- شتحجي بعد العدها حجتها ابن غلطان ابو امجد ميستحي يراسل مرته بصفته ابن عمه

امجد :- احترمي نفسج مو اني التكليلي ما تستحي افتهمتي لو لااااا

ميعاد:- لا ما تستحي ولو تستحي ما تسويها تشك بيها طلكها ما واكفة عليك

ابو امجد :- راح يبقى الحجي مصايح و كلشي ما نفتهم ام ديار بس اهدي خل نعرف نتفاهم يا يابه

-شنتفاهم بعد ما جره لراس بتي و ضربها جاي نتفاهم، اني هم ادز عمامها يكتلونه و عود وراها اكلك خل نكعد نتفاهم تقبل ؟ لو تسووها عشاير و تكلبوها فوك روسنا، شو على بزركم كلشي ما تقبلون و على بتي واحدكم مسلط تسلط

امجد :- اي دكليلها بتج شعدها جايه ويا صاحبها

ابو امجد :- امجددددددد احترم نفسك

-يابه تجي ويا ولد و اني ما ادري

ديار:- انت الكتلي ارجعي وحدج اني ما اكدر اجيج، يعني لو صعدت ويا تكسي ورجال غريب عادي و من اصعد ويا ولد زميلي اعرفه و اعرف اخلاقه يوصلني و يوصل زميلاتي الباقيات ما يصير .

ميعاد :- ما هتمة الرجال الغريب يمه هو بس يريدله واحد يتهمج وياه ما خلا واحد وما كال ديار عدها علاقة ويا لو يعرف العيب ما تهم مرته و سوه هالسوالف هاي، كومي يلا

اخذت الجنطة و سحبتي امجد ظل يصيح و ابو امجد يبعد بيه و ام امجد تحجي ويا امي و تكلها :- لا تكبريها مرة و رجال كلشي يصير بيناتهم

ميعاد :- لو سوالف عادية ما تحجي مو يختبرها يريد وكعها و يتهمها بشرفها و يكتلها واسكت لا والله ما اسكت

ام امجد :- شلون ما تردينه يشك وبتج مانعته منها

ميعاد :- والله اسألي ابنج شايفتلج رجال شهرين مرة تعصى عليه و ما يكدر ياخذها

ام امجد :- يااا يعني طلع ابني المو رجال لأن ما يريد يجبرها و يأذيها

ميعاد:- ام امجد حبيبة الله شاهد اني احبكم بس بتي تعبت، على الله جاي تتحسن و انت كلش زين تعرفين حالتها النفسية شنو كافي عيوني كافي ما اعول بتي اطيب، امشي كبالي امشي يلا

اخذتني و طلعنا من بيت ابو امجد، رادت تفوت للبيت كالت :- لا تعاي نفوت لاسامة للفرن حتى ما يروح لبيت ابو امجد من يرجع

الفرن يصير بصف اسواق بيت ابو رافد، باوعت رائد كاعد بالمحل، مرينا منه و رحنا للفرن، طلعت الف و كالتله :- يحلو نريد بألف صمون

اسامة باوعلها هو ما يحجي وياها، ابتسم و هو حاول يخفي ابتسامته، جمع الها صمون خاله الها بالعلاكة انطته الالف كاللها :- ما اريد اني ادفع

ميعاد:- خليها بجيبك، اسمعني من ترجع من الشغل تعال البيتنا لا تروح لبيت ابو امجد

اسامة :- شصاير ديار شكو ؟

ديار :- تعاركنا اني و امجد

هز راسه وكال :- روحو منا صحباني عيب

ضحكت امي و اندارت تمشي، صعدت على دكات المحل تريد تفوت، كلت الها :- شعندج فايتتلهم ؟

-دتعاي خل ناخذ النا فد كم حلواية نسلس بيهن عصرونية طاكة ارواحنا

فاتت و اني وكفت اباب المحل مفتت، سألته على ابو رافد وينه كاللها :- طالع ما موجود بالبيت ، شصار ابيت عمي ؟

-كول لاخوك الا شوية جان اطلكت بتي من وراه

لمت الها فد علاكة حلويات وعصاير باردة و كالتله :-سجلهن على رافد عود، ما شايله وياي
طلعت من عنده و هو يهز بأيده

لفيينا ورجعنا للبيت، اول ما فتنا للبيت و اثار ناطة من البجي شلون امي عايفتها وحدة و سادة الباب مكسرة المواعين مال الغدا و شامرة الصينية بالزبالة و خابصة البيت خبص

امي فاتت باوعت ع البيت و هاي تكمز، لزمتها بالنعال وين اليوجعها و تصيح وراها :- تعاي النمرة تعاي اليوم اتغدى و اتعشى بيج

وذيج ما همها السانها شطوله حتى النعال ما فاد بيها، كمت نظفت البيت و لملمت و امي صاحت :-خليلنا الحلويات بصينية و جيبي النا ناكل و الا هالعايقة هاي ما انطيها عقاب وياها دشوف شلون تهجم البيت بعد من اطلع

سويت الجايبته بصينية حلويات تطلع فوك ال٧ الاف انواع و اشكال و عصاير باردة و جبتها ، اثار كعدت اول وحدة

ميعاد:- كومي انت العايقة كومي

اثار :- هليوووو والله انتم تكومون هذا كله الي

مدت امي طولها للنعال تلكته و نيشنته براسها، و هاي كامت تصرخ و تضرب بالباب خبصتنا، صحت بيها :- يمعودة دعوفيها والله دايخة و ما الي خلك، تعاي انت اتزقنبي وبلا صوت

اجت اثار تاكل ، و امي تخزر بيها، اندارتلي و هي تكلي:- وسام هذا منو ؟

-صديق وياي بالكلية

-شعنده وياج ؟

-كلشي ما عنده اصلا خاطب بس خالد يكرهه و شكك امجد بيه

-انت شنو رايدة تطلكين منه ؟

- لا ، ولا رايدة ابقى وياه .. خالد شكد ما اكول انساه ما جاي اكدر ، و ما اكدر اطلك و اعيش و خالد هنا ارجعله لا محالة و مستحيل ارضى ارجع لخالد و هو متزوج ما اتحمل

-كل كلامج خالد يعني سبب بقائج ويا امجد خالد ؟

-شي على شي يجمع، الصراحة امجد صح يشك بس حباب لا مقصر علية بمصرف ولا جابرني على اي شي ماكو رجال يتحمل كل هالمدة و يسكت بس هو سكت، غير ان اهله ناس طيبين محد بيهم يسمعني حجاية ولا احد يضوجني، غير حالة مها الما اكدر اعوفها ولا اعوف جهالها ما ينطيني كلبي، بس المشكلة اللي بحياتي خالد لا اكدر انساه ولا اكدر ارجعله ولهذا ما اعرف مترددة.

ميعاد:- الله كريم ارتاحي هنا وريحي بالج منهم

انفتح الباب و فات رافد للبيت، شافني كاعدة، حجه :- مرتاحة هيج من عالكة ناس بناس وكاعدة تاكلين هنا ديار ؟

ميعاد:- وليش عيوني ترد على بتي ؟

-من وراها علك امجد و خالد و هسه ابوي و عمي تحاجو من وراها ما ناوية تفكين من خالد انت

ديار :- انت معليك لا تدخل ولا تحاول تسويلي نفسك الأب النصوح و هالسوالف لأن ما اطيقك

رافد :- انت و النعال اطيقين لو لا اخوي ابتعدي منه عوفي لمرته و عائلته

-النعال يلوكلك افتهمت لا تتجاوز

ميعاد:- هاااا يمعوديييييين ، انجبي انت ادب سز لا تغلطين على الاكبر منج فوتي جوا يلا

هو كام يصيح و يغلط ردته اني و ظلت تصيح عليه حتى افوت جوا ، كمت من مكاني و كلت الها :- كليله الرجلج المحترم مرة لخ لا يدخل بيه ولا يطخ السانة وياي لاني ما احبه ولا احترمه

هد راد يكوملي هي كامت قبلي لزمته و ظلت تغلط عليه، فتت جوا و عفتهم :- شلون شكول شكد اكره طايح الحظ

كعدت اكلب بموبايلي و بالرسايل الدزهن امجد بأعتباره خالد، هسه يلا انتبهت فعلا صيغة الكلام تختلف ابد ما يشبه خالد شبيه اختلطت عندي

بعدين منين جاب رقم خالد و راسلني منه ؟
باوعت بالرقم اتأكدت منه مو رقم خالد هذا بس نهايته 66 مثله و مفتاح الخط اسياسيل و الارقام ٥ البقية ما تشبه رقم خالد ابد ، بس امجد كاتب عليه خالد و الرقم ما يطلع بالموبايل بس الاسم

شلون استغباني، هم زين الله ما طالع مني ولا حرف غلط لو فالته بكلمة جان رخت بيها من صدك

فاتت اثار، اتمددت و هي تفكر وضايجة، حجيت :- شبيج اثار ؟

-اريد اتزوج

صفنت بيها :- ولج انت ليش ما تستحين بس الله يستر من تكبرين شتسوين بينا، عيب هالكلام

-شنو عيب ماما من اتزوجت مو كالت اني ما مسويه عيب اتزوجت بس اني عيب

-ماما جبيرة انت صغيرة ادب سز مرة لخ لتعيدين هالكلام

كامت من مكانها و اجت يمي:- اكلج شي و ما تحجين ؟

-شنو ؟

شاورتني :- اني احب مهيمن

بعدت راسي منها و باوعتلها :- يا مهيمن

-ابن رافد زوج ماما

باوعتلها مستغربة :- ولج يمعزاية وينج وين الحب بعدج بكد فردة النعال شنو هالحجي

-مو هو اليوم من رحنا للمدرسة

- اييييي ؟

- انطاني هدية

-شنو ؟

-اجيبها الج ؟

-بالله شوفيني

راحت ركضت كدامي و اني صفنت وراها ، بعدين ضحكت من كل كلبي، دخلت بموجة ضحك وحدي، فاتت امي :- خير اللهم يجعله خير عليمن تضحكين

-على اثار تكلي احب مهيمن

-شفتي بالله النوب هاي اني شحطلها و تطيب

-ما جاي اضحك على اثار اني اتخيل شكل ام رافد من تعرف مهيمن يحب اثار و منطيها هدية

ميعاد:- حرام الا تستأجرلها ارهابي يفخخ روحه بنص بيتنا و تخلص من عدنا فد دور

ضحكت حيل، و هي كامت تضحك فاتت اثار انطتني مداليا قلب الحب بيها زئبق احمر و قلب الحب و لمع

:- دباعي هسه هاي البكد الفصمة وينها وين الحب ؟ اسمعي لج مرة لخ اذا مشيت وياه لو رحتي يمه تنكتلين

اثار :- ايوووو احنا نريد نتزوج

ميعاد:- انهجم راسج كون ولج يا زواج

اثار:- مثلج انت و رافودة

ديار:- انوب حتى اسم الدلع ماخذته منج، ماما لخاطر الله انتبهي لتصرفاتج تره هاي شتشوف منج تقلدج

ميعاد:- هي طايحة الحظ غير رجلي و ادلعه لا مخليتها يمنا و لا جايه يمها

-هي وين تنام ؟

-جوا هنا و احنه فوك

-ما تخاف وحدها

-لا انومها و اصعد

-هاي شيطانه جاي تنتبه كل تحركاتج، مو مثلي من جنت اشوف عمايلج لو عمايل الخنزير ابوي اكش و اتضايق و ابجي

ميعاد"- اححح راح تكعد تعيرنا

-فكرج سهل انسى كل الشفته و اني صغيرة تدؤون سببتولي عقدة

-شكد تحبين تكلبين بالماضي اوووي اكوم رفودة احسنلي

-بعدة هنا

-اي تمدد يلعب بالموبايل اكوم يمه

كامت من يمي و اني كعدت اباوع بكتب اثار هي داومت قبلي بيومين لأن مدرسة ، مستلمة كل الكتب بس ما مجلدتهن

كلت الها كومي نروح اني وياج نشتري جلادات
و هم نتمشى صار دنيا المغرب و الناس دخلت للبيوت ماكو هوسة

اثار :- اييي واخيرا راح افتر بالشارع

ضحكت :- دكومي كومي

لبست ملابسها و اني لبست و صحت على امي كلت الها:- راح نتمشى اني واثار نجيب جلادات

ما سمعت، اخذت اثار و طلعنا، ما رحت لمحل بيت ابو رافد ما اريدهم ما عايزني مشاكل، التفيت و حتى ما باوعت وراي منو موجود بالمحل

طلعنا نتمشا براس الشارع مناك هم اكو محل، فتمشينا الفرع كله، سيارة خالد ما جانت موجودة بالباب، كملت مشي فتنا اشترينا الاختارتهن و طلعنا

طلعت سيارة امجد كبالي، شافني و نزل ، اجا :- توقعتج هسه ابيت امج ميته من البجي لان ضاربج و طاعن بيج

-الشفته بحياتي هواي اكثر و اصعب من مشكلتي هاي، فما كامت تضوجني و تاخذ من وقتي هواي و اكعد اتاثر و ابجي تعبت

-شعندج طالعة ؟ بعدج على ذمتي ما اقبل اطلعين بكيفج

اثار :- لا رحنا اني وياها نجيب جلادات هواي حتى تجلدلي كتبي

ديار :- جاوبتك

باوعلها، رجع حجه وياي بأستهزاء:- المحل بصفج جان اشتريتي منه

-ما اريدهم و لا اريد اشتري منهم ما عايزة مشاكل

-تريدين تبينيلي انت ما عندج شي ؟

-امجد تصدك بكيفك ما تصدك هم بكيفك مع السلامة

عفته و رجعت للبيت دخلت الغرفة و كعدت اجلد بكتب اثار و ادرسها الواجب ...

لليل اجا اسامة ب١٢ اني فارشة و اثار نايمة و راافد و امي فوك نايمين ، دك الباب طلعت فتحت اله، انطاني علاكة صمون اليزود يوزعونه بيناتهم

حجه :- امي وينها ؟

-فوك نايمة

-هذا يمها

-اي

-لعد خل ارجع انام بالفرن احسن

-وين وين اسامة دفوت

-ما اتحملهم خل اروح ديار

-اسامه لا تكبرها هو رجلها بالشرع و القانون مو غريب و كاعد بالبيت، بالعكس مدامها متزوجة محد راح يعيرنا بيها ولا يحجي بس من هي مطلكة و تفتر يوميه كدام الرايح و الجاي بسيارتها يكوم يا اليجي و لاطخ بينا كلمة و يسمعنا

-شنو تريديني اقنع بزواجهم

-اسامة اتادب عاد و فوت القنعت و الما قنعت هم اتزوجو و انتهت

طنكر الا يطلع، غصب عنه دخلته جوا ، هو تعبان و شاف الغرفة باردة تمدد بفراشه كبل

دنكت بست و اني امرغله جسمه :- تعبان حبيبي

-اي و باجر وراي مدرسة

-ممجبور هيج تتعبتطلع من ال٧ للدوام تروح للفرن ما ترجع الا ب١٢ بالليل

-لا مجبور

-شكو شعندك ترا اني وياك

كام وكعد على حيله:- بيت ابو امجد و بيت امي اثنينهن كمت احس بيهن بالذل من ابقى بيهن

-ليش هناك شناقصك

-ما ناقصني شي هم خوش ناس بس اني ما احب
حتى من عشت وياج بكربلاء جنت اطلع اشتغل ويا سلمان حتى لا يعيرني
ومن كالي خالد ع الشغل نبهني و كيفت اتعب ولا اكعد حمل على غيري

-خالد شعليه

-هو الكالي اشتغل و لا تكعد بمنية احد

-هاي شوكت

-من فتحوا الفرن ابو الفرن صاحبه و كالي راح احجيلك وياه و اشتغل

-خالد

-كالي اشتغل و اصرف على نفسك و على اختك و ارفع راسك و راس اختك احسن مما كاعد و هي تصرف عليك و الناس تشوفك بالعين الصغيرة
اختك ما الها سند غيرك خليها تفتخر بيك
مو تطلب من الناس حتى تنطيك

ابتسمت تقربت منه و حضنته، ابتعد مني :- ديار شلون اذا اطلكتي ؟ اني ما اكعد عد امي

-الله كريم

- ناجر بيت اني وياج ونعيش

-شناجر ولك كل يوميتك ١٠ يعني شهريتك ٣٠٠ الف وين تكفينا

-لو اعيش بالشارع و ما اعيش ويا امي

-هسه انت متحزم من هسه دكول يا الله، نام ارتاح نام

تمدد بالفراش سألته :- تريد عشا

هز راسه و هو نايم بمعنى (لا )

... نمت يمهم و اني افكر بحياتي
منين ما اجيبها ما ترهم وياي، كلت اتزوج حتى انسا خالد و اخلي يشوف حياته، تزوجت و هو رجع مرته ولا اني الناسيته ولا هو الشايف حياته شكد ما نكول نبتعد نلكى نفسنا كبال بعض

ما اعرف شلون اخلص من هالموضوع كلش تعبت منه
دزلي خالد رسالة ( شصار وياج بالي يمج ) ما رديت
لازم اخذ قرار .. يا اعوف امجد و اشوف حياتي يا ابقى وياه و ابتعد عن خالد ابتعاد كلي

ثاني يوم اخذتني امي بسيارتها حتى توصلني
شافت رائد بالطريق، حجت وياه :- خالة ليش ما تلزم كلية ديار خط ؟ ما دامك اشتريتلك كيا و الله وفقك

رائد:- هلا ام ديار، والله جاي اخذ ابتدائية

ميعاد :- صارلك يومين اخذتهن ؟ الكلية احسن الك ترا كل طالبة ٧٥ الف احسن من دوخت الجهال و جيب وودي

بقى صافن الولد بوجهه و كاللها :- اي احسن صح بس بعد لزمت خط و التمو الطلاب راح يكتمل العدد

ميعاد:- اعتذر منهم انت شاب و على وجه زواج مو مال مستحى

رائد :- ارجعلج جواب ان شاءالله

سلمت عليه و فاتت بسيارتها :- ما اريد رائد ماما عوفيني اني الكا اشتراك

ما ردت عليه، وصلتني للكلية و طلعت لدوامها
مهند و حسام شافوني نزلت من سيارة امي، انتبهو، من فتت للكلية، اجو ورايا كالو :- منو النزلتي من سيارتها، اختج ؟

-لا امي ليش

مهند :- دكولي والله ؟

-اي والله شبيكم

-كولي غيرها مبينه اصغر منج

-هي تحب تعتني بنفسها هواي

-شتشتغل و هيج عدها سيارة عالية ؟

- بالمالية

حسام:- متزوجة لو لا

-اي متزوجة و زوجها يصير ابن عم زوجي و تحبه حيل بعد اكو سؤال لخ لو اروح ؟

ضحكوا :- مو قصدنا شي والله بس هيج حبينا نستفسر الله يخليها الج مبينه مثقفة

كلت الهم :- شكرا
ومشيت منهم، اصغر مني اشافوني عجوز و يكلولي مبينه اصغر مني، شبيه يعني اني شناقصني حتى التشوه عالجته يعني شبيه

رحت للحمامات ما تحملت اباوع بوجهي تعبان وهالات سودا جوا عيني فضيعة من قلة النوم و القهر
لا بعمري حطيت خيار على وجهي مثلها و لا كريمات
الله ينطي الصابونه التمر على وجهي يومية تغسله الا لو ما الصابونه هم ما اغسله

لازم اعتني بنفسي شنو مبينه امي اصغر مني

رحت حضرت جميع محاضرات اليوم ولا فوتت وحدة وولا وحدة منتبهتله يا افكر بمشاكلي يا بأسامة لو تمر على بالي العرمة اثار و اضحك لو اتذكر كلام مهند و حسام على امي و ابقى افكر شلون اعتني بروحي

رجعت للبيت اثار هسه جاية تريد غديتها و كعدنا سوا جوا نقرأ، اجت امي من الدوام و رافد هم اجا و صعدوا فوك ..

هو يوم يم مرته الاولى و يوم يم امي بس من يجي من الدوام يجي لبيت امي لأن ماكو هوسة بس لثار و ما عدها احد تلعب وياه اغلب الاوقات لو تروح تلعب وتقرأ ويا بنات خالد لو تلعب وحدها او تكمل واجباتها لو ع التلفزيون يعني البيت كلش هدوء فيجي هتا يرتاح للعصر يروح لبيته

تقريبا الساعة ٤ اني متمددة و اثار يمي تباوع على سبيستون، اندكت الباب، كلت الها :- اثار اكلعي شوفي منو ما بيه اكوم

راحت و اجتي، كعدت ع التلفزيون :-، منو ؟

-خالد

-فزيت من مكاني :- خالد !!! شعنده جاي و شلون يجي، المن ؟

-ما ادري

ملتهيه تباوع ريمي ما مركزة وياي، كمت من يمها بسرعة طلعت للهول، صدك خالد :- هاي شعندك هنا

خالد :- و عليكم للسلام ورحمة الله و بركاته

ابتسمت:- لا صدك شعندك هنا لا يروح احد يشوفك

-ويشوف ما فايت ابيت غريب، بيت اخوي و هو الجاي يدفع ايجاره و اخوي موجود فوك ما داخل بغيابه حتى احد يحجي

-لا بالله

- زين احوالي شكرا على سؤالج

-المن اجيت

-لا شكرا ما اريد غدة لا تكلفين نفسج

ضحكت :- هاي شبيك

باوعلي :- البيه انت ، ابو ابويه احترك البارحة بس اريد اعرف اخبارج ماكو و من ادزلج رسالة ما تكلفين روحج و اطمنيني

- ما بيج حيل مشاكل و من توكعين بالمشكلة فدوة خالد ساعدني

-تعيرني ؟

- لا بس اسلوبج وياي كلش صاير يغث

-انت مو رجعت مرتك لو تروح الها احسن

- هالموضوع لا تدخلين بيه

-اي لعد انت هم لا تدخل بحياتي

-هيج صارت ؟

- اي

-كام من مكانه :-ابوي و امي و رافد الفوك و عمي و كل اهلي و عمامي يتعاركون وياي حتى ابتعد و اني كل الهامني اعرف انت شلونج ومحد مأذيج، ولج من صدك اني هاين روحي وياج و انت ما يغزر بعينج شي

سكتت ، حجه :- عايفلي مرة تتوسل مني الكلمة و جاي تابع وحدة تستحسف ترد عليه بكلمة و تجاوبني من صدك اني غبي

-حشاك بس ابتعد مني خالد خليني....

قاطعني :- خليني اعيش خالد، خليني ارتاح خااالد، ابتعد خالد روح خالد، ولي خااااالد
هذا بس اليطلع منج مووووو ؟

نزل رافد :- هاي شكو خالد

خالد :- من انعل اليوم الصار بيه خالد و تورط بهيج انسانه حقيرة

نزلت امي :- هم زين اجيت اريد احجي وياك

خالد :-، انت بالذات ما اريد اشوفج

راد يطلع وكفت كباله :- لا عيوني خلودة مو على كيفك منين اخذت الدفتر و منو جان يهددنا

-رافد ابعدها من طريقي

رافد :- انت بيك شي ترا مو صاحي انت

ميعاد:- انتظر جوابك يلا منو الاخذ الدفتر ؟

وخر من جانبها ، صاحت وراه :- بتي اتزوجت حس على روحك و ابتعد منها

صاح :- تتهنى ويا

وضرب الباب وراه
اخذت نفس تنهدت و فتت للغرفة ابجي
شكد صعب الاتمناه ابعده بنفسي
يحترك و يحاجيني بعتب و ما اكدر انطق و اخليه يتأمل .. ياربي ساعدني انساه

لليل .. اجا احمد جاب جهال امجد يمنا لأن مها تخرطت كلش و نقلوها للمستشفى و ام امجد وياها و محد بالبيت ويا الجهال فجابوهم يمي

وكلتهم و بدلت الهم وكعدو يلعبون ويا اثار شوية و نومتهم خابرت عمتي حتى اطمن على مها كالت كلش حالتها بالنازل درنالها دم لان دمها موشل

بقت هي تحجيلي حالتها و اني ابجي
كالتلي :- اذا تكدرين تعاي بدالي باجر هنا البيت فارغ و اني رجليه ما يساعدني على وكفت المستشفى

كلت الها :- بعيني باجر اخلص دوامي واجيج

حجت :- اداومين و الجهال ؟

-ما ادري بس لازم اداوم عندي محاضرة كلش مهمة

-يلا عود عوفيهم يم عمج لبين ما ارجع

-ما اطول اني اول محاضرة و اجيج

-ان شاءالله بنيتي ديري بالج ع الجهال

-بعيني

خليتهم يمي و ثاني يوم وديتهم لعمي و طلعت للكلية، اول محاضرة و تعذرت رحت للمستشفى تبادلت ويا ام امجد

امجد جان بالدوام، للمغرب يلا اجا، ما يحجي وياي داير وجهه عني ما اهتميتله ، حاول يحجي ويا مها راد
مها فاقدة ما حاسة بأي احد

جاب النا صندوك مي و نفر كباب و صمون وراح بالانتظار كعد خاف نحتاج شي
ما اشتهيت شي لان قبل شوية وحدة من اللي بالردهة انطتني بسكت و باكيت عصير جزت نفسي بعد

نايمة بمكاني تقريبا الساعة ٣ ومر مثل الطيف كبالي
كأنو مها كامة على حيلها و مرت من كدام عيوني تمشي و تباوعلي

فزيت من نومي بسرعة باوعتها هي كبالي، تشهك بقوة و مفتحه عيونها حيل كمت يمها مفزوعه و ما حاسة على روحي

لزمت ايدها :- مهاوي حبيبتي
كامت تشهك بقوة و تباوعلي، لزمتني عصرت ايدي حيل حسيت ايدي راح تتكسر بأيدها على قوة القبضة و هي تشهك بقوة

تحاول تنطق و اني اقرأ الفاتحة و القران و اهدي بيها و ارفع بصوتي حتى اللي بالردهة يكعدن، كعدت كم وحدة كامن يلبسن حتى يطلعن يشوفن ممرض

نطقت و هي شاهكة عيونها حيل و تجالع، نطقت كلمة وحدة بس ( جهالي ) حجتها و ايدها رخت من ايدي

صرخت من كل كلبي :- مهااااااااا لا مهاااااا اكعدي مهااااا

اباوعها عيونها وكفن و هن مفتحات على حيلهن
ماتت
اخذتها بحضني حيل و صرخت من كل كلبي :- مهاااااااااااااا ...

☆☆☆☆☆☆☆☆

#اتمنى_ان_افعلها

الحلقة_40

لا تثق كثيرا بدموعهم ..
دع الايام تخبرك من هم !!🖤

.........

انسان يموت و أيده بأيدي
روحه طلعت من بين ادية
و كأني اشوف بنظرات عيونها الشاهكة روحها و هي دا تطلع، و لما طلعت جمد كلشي بيها و انتهى توقفت بيها الحياة

هاي اللي ذاك اليوم تغار لو زوجها اجا يمي
وتبجي لو محد رد عليها، و تقهر من تشوف حالها
انتهت !

ارتاحت صح
بس الميت من يموت ياخذ جزء من روح الحي اللي يحبه، لما جنت اجوع التجئ الها، و لما اخاف من ابوي البد عدها و لما ابرد ادور شي عدها يدفيني
وياما ياما حشدت عيالها حتى يوكفولي و يساندوني
ضحكتها سوالفها نصيحتها ... شنسى منها

سحبوني منها و اني اصرخ بكل صوتي
صاحو لامجد و بلغوه زوجتك توفت
اجا هو يركض حظنتها و يصرخ يبجي
خبصنا الطابق بصياحنا، كل اللي بالردهات طلعو
يباوعون و يبجون

شالوها و نزلوها
شلت الموبايل خابرت على ام امجد ابجي
هي بس سمعتني ابجي صرخت بالتليفون وكامت تبجي، فز عمي و اخذ الموبايل و هو يصيح حتى يتأكد من الخبر و يكول :- ماتت احجي ماتت لو شصاير ديااار

صرخت بكلمة :- ماتت عمووو ماتت

- انا لله وانا اليه راجعون

قفلت الخط و كعدت بمكاني ابجي
بيت ابو رافد عارفين بموتت مها مخابرين رافد، رافد يم امي، امي من عرفت و اني بالمستشفى ويا مها ودت اثار ابيت ابو امجد و اجتني طايرة بسيارتها

عيالي وصلو وره ربع ساعة من لما بلغتهم
اجت ام امجد تبجي و تصيح :- يا حظج يا بيبي يا فطومة تيتمتي و انت بت خمس سنوات اشفتي من امج يبيبي

اجا امجد حضن امه و بجا
ابوه كام يصبر بيه
اجا ابو رافد و ام رافد للمستشفى
صارت هوسة و اني كاعدة بزاوية مخلية راسي بين رجلية و ابجي، اجت امي مشت يمهم عزتهم و كالتلهم

:- ديار بتي وين

اندارت ولكتني وراها اجت اخذتني بحضنها ، كمت ابجي بقوة و هي تبجي وياي:- كافي ماما كافي الله يرحمها ارتاحت راحت يم رب ارحم مني و منج

-ماتت بين اديه ماما جانت لازمة ايدي و ماتت

رجعتني لصدرها و هي تبجي :- الله يرحمها امي الله يرحمها كومي يلا

كومتني مشتني للسيارة، اجا رافد :- ها امجد و عمي وين

-جوا

فات جوا ... كملوا الاجرائات الطبية
الدنيا انكلبت عمامهم كلها اجو للمستشفى هوسة صارة، اخذنا الجنازة رجعوها للبيت كلنا التمينا نبجي عليها

جهالها فطومة و التوم حسوني و حساني

التوم يبجون بس ميعرفون شنو، بس فطومة افتهمت ان امها ماتت كامت تبجي و تصرخ :- اريد ماما جيبولي ماما

اخذتها بحضني و كمت ابجي، دنك امجد اخذها من اديه يبوس بيها و يسكتها ، شوية ورجعها، كال :-، خليها يمج و ديري بالج عليهم اروح للدفن و ارجع الهم

هزيت راسي، شالو الجنازة من البيت كلها كامت تصرخ
اخوتها اجو و عمامي و عماتي اجن ولا كان يعرفوني
اقاربي صح بس ابد ما نتواصل وياهم
يكرهون امي من زمان

من طلعت الجنازة بقيت قرابة الساعة كاعدة بالبيت و ابحي، لحد ما كالتلي ماما :كومي نروح للبيت هم تسبحين لان لزمتيها و هم ترتاحين شوية و الجهال ناخذهم ويانه

كمت وياها، ام امجد و عمتي اخت ابوي راحن ويا الجنازة ع الغسل، و خوات امجد بقن بالبيتما يحتاج وجودي

رحت للبيت تعليت و سبحت و كعدت بالغرفة
منظر عيونها و هي شاهكة ما جاي يروح من عيوني
اتمددت و شكد حاولت انام حتى انسى ما جاي انام ولا جاي انسى

مرجعت بعد لبيت ابو امجد بقيت ابيتنا
لا ابجي ولا يطلع مني صوت بس ساكتة و صافنة كبالي ، الجهال يمي جاي تلعبهم اثار

لليل اجا امجد، دك الباب طلعتله امي

:- هلا ام ديار

-هلا خالة البقية بحياتك ان شاءالله

-حياتج الباقية الله يحفظكم

شافته مستحي يدخل، فحجت امي :- خالة الصار ولى و احنا ولد اليوم وماكو انسان ما يغلط ، لا تستحي فوت انت مثل ابني ما اشيل عليك

هز راسه و دخل اتشكرها و كال :- وين ديار و الجهال ؟

ميعاد :-، جوا فوت

دخل للغرفة الجهال تلكوه شالهم بوسهم ، اني متمددة و كعدت، دنك باس راسي :- دعاء كالتلي جنتي تعبانة اجيت اشوفج

هزيت راسي ، هو مدنك تعبان و مقهور حيل كوة يحجي، باوعلي:- حضرتيها من ماتت

-اي

-حجت وصت شكالت

-ما نطقت بس كلمة جهالي
سولفتله الصار، هو داير وجهه يباوع الجهالة و يسمع
مسح دموعه من عينه و كال :- الله يرحمها تعبت هواي

سكت ... رجع حجه :- ديار نطوي كل الفات و نبدي صفحة جديدة، هالمرة مو زوجة ثانية ، انما زوجتي الشرعية امن بيتي و جهالي عندج و بمسؤليتج
اني مستعد انسى و اغض نظر عن كل الصار
اذا مستعدة تكملين وياي و تنفذين وصيتها كولي
واءا ما تكدرين و ما تتقبلين هم كولي اكيد حياتج و انت حرة بيهم

هزيت راسي بدون جواب
هو سكت شوية و كام كال :- اني اروح و خلي الجهال يمج و اذا تعبوج خابريني

-ان شاءالله

فتح محفظته انطاني ٢٥ الف و كال :- هاي مصرف اذا تحتاجين شي الج او للجهال

فاتت امي سألته ع الدفن و ع المكان و كامت تسولف وياه، انوب هو كاللها :- خالة يا ريت تاخذين ديار لبيتنا و تكعد هناك احسن

ميعاد:-، اي على بالي باجر ان شاءالله اليوم جبتها ترتاح مو شوية ميته باديها

امجد :- اترخص اني ديرو بالكم ع الجهال

ميعاد :- هلا بيك

طلع و الجهال بقوا يمي، فطومة كدرت انومها و حسوني نام قبلهم بس حساني احتارت بيه امي اتجيبه منا و ترد بيه منا ما ينام، خابرت على امجد يجي
اجا ب٣ بالليل خلاه على ايده و تمدد نام

حاولت انام اجيبها منا اوديها منا ما جاي انام اتوسل النوم توسل وماكو .. صابني ارق فضيع و الوجع براسي ذبحني

كعدت على حيلي، امجد نايم بالبنطرون و القميص و حساني بحضنة، كمت جبت جرجف و غطيته
باوعتلهم .. رجال و ٣ اطفال صارو بذمتي
مسؤليتي و مسؤله عن كلشي يخصهم
اكدر لو ما اكدر ؟

طلعت برا التفكير و صورة عيونها كلش اذوني
ثاني منظر ما انساه بحياتي بعد منظر اختي انهار لما احتركت و اسمعها تصرخ من كل كلبها و تلف بالبيت تريد اطفي روحها

راسي كام يوجعني شكمت اتذكر وين ماكو ذكرة سيئة بحياتي كامت تتراولي و نوم منايمة ، ذبحني وجع راسي كمت ابجي بدموع

نزل رافد حس اكو صوت جوا، باوعلي انقهر عليه
راح دور بالثلاجة براسيتول و جابلي هو وكلاص مي و صعد لامي كعدها

نزلت امي اليه :- ها شبيج

-راسي راح اموت انقذيني ولج يمممة

راحت جابتلي حبايتين فاليوم و كالتلي اشربيهن حتى تنجبرين تنامسن راسج كام يوجعج من التعب

شربتهن و اني الوب، سحبتني وكعدت بالكاع مدت رجليها و خلت راسي على رجليها و كامت تفرك براسي و هي تقرأ اية الكرسي عليه حتى ارتاح

رغم الوجع بس من خلتني على رجليها و شميت ريحتها شوية ارتاحيت، ما اعرف هو الانسان من يشم عطر امه يرتاح
لو شما كانت و شما سوت تبقى هي ام و حضنتها ما يتعوض بالدنيا

غفيت على رجلها ما دريت بعد
لهناك سمعت صوت رافد و هو يكللها :- ما راح تنامين

ميعاد :- بس جيبلي مخدة و غطا من جوا
راح جاب و اجا و هو يسألها

:- امجد شوكت اجا و نايم هنا

كامت سحبت نفسها على كيف حط المخدة و رجعت راسي غطتني و صعدت و هي تجاوبه
نمت بعدها ما حسيت على شي ابد

ب١١ الصبح جانوا الجهال مموجودين امجد من عرف من امي اني مريضة ماخذهم و كال خواتي اداريهم على ما تكوم ديار

سبحت و لبست لسود و رحت حظرت العزا مالتها
اجو عزوني و اخذوا من خاطري، موبايلي دك رقم ابوي خابرني
رديت عليه :- كال حيل انقهرت عليها ما تستاهل صيري سباعية و داري جهالها و باريها وشتحتاجين خابريني

كلت اله :- مشكور
وسديت الخط منه

اجت ضحى كعدت يمي :- خطية وصتج على جهالها بعد ما تكدرين تطلكين مو ؟

ما رديت عليها ، جاوبت نفسها :- تعبانة مبينة الله يساعدج هم حمل هذا على كلبج بس شتسوين هذا قدر الله بعد

هم ما رديت عليها
هو صدك عزا و الناس لابسه اسود بس كأنما كعدة نسوان الحجي كله ( قال و قيل ) ماكو كل حزن
الحزن اندفن ويا الميت و خلص

خلص اليوم شلون ما جان و انتهت
ثاني يوم هم جانت هواي ناس تجي تعزي بس اني جنت مضطرة اروح للكلية اطلب اجازة يتراكم عليه الغياب مو زين

بلغت امجد اني راح اروح و خليت امي توصلني
دخلت للكلية اجتمعوا عليه اصدقائي :- خير شو اسود ضل بالنا عليج صارلج يومين ما مداومة

-بت عمتي ماتت

عذراء :- الله يرحمها هاي المريضة خطية

-اي

مهند :- الله يرحمها ارتاحت خطية صار سنة و انت تكولين يا اروح للمستشفى يا جيت من المستشفى

وسام :- الله يرحمها الميت لو شما تعب اهله يبقى غالي وموته صعبه الله يصبركم

-شكرا ، اترخص منكم لازم ادخل اخذ اجازة و اطلع

-شتترخصين نروح وياج يابه
راحو وياي للعمادة انطيتهم شهادة الوفاة، ما قبلو ينطوني اجازة يكلولي :- بت عمتج يعني صلة القرابة مو كلش حتى تاخذين تجازة

شرحتله الحالة و طب مهند ووسام لبكو الحجي كدامي لحد ما اخذولي اجازة يومين ، طلعت و اني اتشكر منهم

وسام :- هسه انت راجعة وحدج

- اي والله

-خليني اوصلج

- لا تسلم ما يحتلج والله هواي تعبتك

-اسكتي يمعودة

-لا وسام لخاطري والله اني ارجع ناس ملتمة و يصير حجي

-ها اني اسف لعد امشي ناخذلج تكسي اذا هيج

خطية ما عافوني ابد، طلعت برا لكيت خالد واكف بسيارته، من شافني اجا :- البقية بحياتج

ديار :- حياتك الباقية

وسام :- اذن نترخص احنا اذا تكدر توصلها

خالد :- مرخوص الله وياك

اشرلي امشي، مشيت للسيارة و كتله :- خالد من غير هيج الناس حاطة عيونها ما بيه مشاكل

-ما عندي شي وياج ، نحجي شوية و ترجعين لا تخافين اصعدي

-صعدت وياه

باوعلي :- تعبانة ؟

هزيت راسي :- اي

-شوفي عندي وياج موضوع هو صدك مو وكته كلش بس كلت خاف ما اكدر احجي وياج بعد او احصلج فكلت فرصة اعزيج و احجي وياج

-شنو الموضوع ؟

-هو اني اكلج مو وكته بس اكتشفت اكو علاقة بين احمد و رغد

عقدت حواجبي مستغربة :- شعليه بيهم اني ؟

-لما تباوعيلها من جانبج راح تكولين شعلية بس لو فكرتيلها مثلي تربحين

-شلون يعني

-يعني اذا حطيتي سالفة زواج رغد من احمد ابال عمتي ام امجد هنا تكدرين تستفادين

-هم ما فهمت

-لما تتزوج رغد احمد راح تجي لبيتكم وراح تتقربين من بيت سلمان لا تنسين انت الج حق بهذا البيت في حال رغد طلعت منه خليمة مجبورة تبيعة و تقسمه

-بس هي لاعبة بالاوراق كلها و موقعته

- هي تلعب و احنا نلعب و تشوف منو الياخذ ؟

- خالد دخت ما دا افهم الموضوع كله

-الموضوع و ما بيه اريدج تاخذين حقج من بيت سلمان، هو اله حصة كلش جبيرة بيه و حرام تروح لرغد و امها، انت التعبتي بسلمان و هن الما كلفن نفسهن باتصال يخابرن لما توفى ياخذن حصته على اي اساس ؟

-وشلون اكدر اخذها سلمان مات و الله يرحمه و الاوراق هي متلاعبة بيهن

-انت نفذي وياي خطوة بخطوة و يجيج حقج ، اذا صدك و اتقسمت الحصة بالقليل تحصلين ٤٠ مليون ديار فكري بيها لا تنذرين عمرج لهذا وذاك و مضحية بكلشي .. امجد ما يتأمن بيه و امج حايط رمل و ابوج من الاساس ما داري عنج ما الج غير اخوج

تدرين بيه صارله يومين يبات بالفرن تدرين لو لا ؟

-لا التهيت بجهال امجد و ما دريت عنه صدك

-اي والله، اني شفته وربطت سالفة حب احمد و رغد و فكرت بيها

-هو سلمان و ما اخذ حقه تريدني اني اخذ حقي

-وليش ما تاخذينه ؟ الج حق ما متعديه عليهم هم المعتدين ، اخوج السند الوحيد الالج بهاي الدنيا قوي اخوج و اوكفي بظهرة اخذي حقج و اشتري بيت و كعدي .. لو شما تميل الدنيا ما تحتاحين احد عندج بيت الج يحويج واخوج وياج و ساندج و انت ساندته

- اي بس شلون ؟

-اذا طلعت رغد من البيت راح تبقى بيه حليمة وحدها
هنا بأي حق حليمة تكعد ابيت ابو سلمان هي ورجلها ؟

-ومنو راح يطلع الها لو يواجهه

-امج

-امي

-امج تبوك الكحلة من العين شلون لو السالفة صارت بيها ملايين و حق بتها ؟ يربج تخشلهم بالف زاغور وتلعب عليهم لعب حية و تاخذه من عيونهم والله

-يعني هسه اللي لازم اسويه شنو

-البي لازم هسه نشتغل على طلعت رغد من البيت اذا طلعت صدك .. كلشي يسهل

-يعني ابلغ امي ؟

-اي بلغيها و احجيلها الكلته الجياه اني العليا اخش براس ابوي و اقنعه بالموضوع ابوي ما ياكل حق احد و هم راح يساعدج بالضغط على حليمة
الباقي يمج انت و امج تكدرين تاخذين حقج لو لا ..

اعرفي اطلعي من كل لعبة تمرين بيها ربحانه
بهاي الدنيا محد الج اذا ما تضمنين مستقبلج وتبنيلج اساس يجي يوم يصير مصيرج الشارع ومحد الج

مماخذة حق احد
سلمان انت الجعتي ووكلتي انت السهرتي و داريتي انت اللي لاخر لحظة بحياته ما عفتيه رغم هو ما جان الج زوج حقيقي بس انت انت صرتيله سند حقيقي و داريتي ووكفتي وياه فمحد غيرج يستاهل حقه

-بقى يحجي براسي طير شكو سالفة جانت براسي

وصلني شوية عن الشارع كال:- انزلي و اتمشي و فكري بالموضوع كلش زين لا تظلين بس حزنان و مضعضة روحج الحزن لا يفيد احد ولا يرجع احد استقوي وكومي على حيلج و فكريلها عدل، خوووش ؟

-ماشي، مع السلامة

-الله وياج

حرك السيارة و مشيت للبيت دخلت، حجت اسراء :-، عزا عدنا مو لعب حتى عايفته و طالعة ديار غير انت ام البيت

-رحت اخذت اجازة

-بحال اجازة يمعودة يلا حطي ايدج ويانه

- الجهال وين ؟

-عوفيهم تعاي ساعديني

-تعبانه ارتاح شوية و انزل

بقت تحجي وراي عفتها و صعدت للغرفة تمددت ارتاح، صعدتلي ام امجد تطمن عليه و تشوفني شلوني كعدت حجت وياي شوية و توصيني
و اني بس (اي ) جوابي
ما الي كل خلك لان نوم ما حاي انام الا بمنوم يلا اناملي كم ساعة و اكعد .. تعبت كلش

شوية و فاتت امي :- ها ديار شلون صرتي

هزيت راسي :- اي

- اخذتي اجازة ؟

-اي

-رجعتي تكسي لو فورتات ؟

-خالد رجعني

-بالله هذا ما يفك منج شيريد بعد

كعدت من مكاني:- راد يحجي وياي بموضوع و شغل بالي بموضوع

-شنو هو ؟

-سولفت الها الكاله الي

صفنت بوجهي :- شكد شيطان هذا شلون فكر شوصله لهالفكرة من صدك رايحة من بالي ، اني شلون ما مفكرتلها

-يكول اول شي لازم نبعد رغد من البيت و نزوجها

-وهذا الصح، ملج علاقة خليها على امج اني احلها و اخذ حقج من عيون حليمة العمص

-ماما اسامة وين اني مريضة انت ليش ما منتبهتله

- والله رحتله للفرن و كلتله يجي و هو معاند شسويله قنعي انت اليوم و جيبي

-هذا حيل صاير صعب و كاعد يتعبني

-الله كريم خل امخمخلجياها الهسالفة ٤٠ مليون يا صلاوت على النبي لو احرك اسماعيل سبعتالاف مرة ما يطلع منه مليون واحد

كومي انزلي ماما حتى لو ما بيج حيل نامي بالاستقبال خل يكولون خطية ولا يكولون صاعدة فوك وعايفة البيت و شايفة روحها وتبقى وين المابيها حظ تحجي عليج.

حمواتج ما مقصرات بالحجي بابوجه مرايا و بالكفا سلاية هسه يلا عرفت معدنهن جنت ما اشوف منهن غير الكلمة الحلوة

كمت وياها نزلت، نسوان هواية كاعدة بالهول
حجت امي :- تعاي ماما تعاي سودة عليه من ساعة الشافت مها تموت كبالها و لهسة نوم ما يجيها ماتت من القهر بنيتي

كامن يحجن هن خطية و الله يساعدها و هاي تصيح تعاي تمددي هنا ارتاحي، تمددت اني بالكاع ام رافد جانت شوية عن راسي

حجت امي :- اليوم اريد اكعد يم عمتي شوية، مشتاقتلها

ام رافد : اححح من زود المحبة

ميعاد :- يا شعندي غيرج ام رفودة

-رفيد لا تغيرن اسمه

-اكلج عمتي انت ما ناوية تحطين صلح و نسوي هدنه

-هدنه ويا البرابي*** ما تجوز

-لعد ظلي خلي العمصة تاخذ الجواج و الوراج و انت باقية مكابلتني وتحجين عليه

-ذيج هم برب**** مثلج

-ع الاقل اني اخذت ابنج ما صرت شريجتج، شرايج لة تحطين ايدج بأيدي و اخليج تخلين ابو رافد بالجيب ، بالله مو حسافة انت ام الولد و التعبتي وياه سنين تجي العمصة تاخذه منج

-حظ البرابي*** بعد

-يحظج وما تصيرين برب*** لرجلج و تكسبي شناقصج

-ناقصني حظ لو عندي حظ ما اصير هذا حالي

-ام رافد المرة تكبر من الهم، بس الرجل شما يصير بيه هم يدور اليرجعه شباب ما يحب يكبر، و انت مكبرة نفسج

الا بشنو احسن منج حليمة صابغة و مرجعه روحها و مخلية الرجال لافي يمها ٢٤ ساعة، المثلج ملكة مو مشلوعة كلب ولا حاضية بولدج ولا برجلج

-شسوي هذا حظي بعد فات العمر واني مشلوع گلبي

- العمر رقم لا يجيب ولا يودي احنا النكبر ارواحنا
ليش ما تخليني افيدج ؟

-شتسويلي ؟

-بيني و بينج الحجي اني من اليوم حرب ويا العمصة الي يمها حك و انت الج يمها حك حطي ايدج بايدي حتى لا تاخذ الورانا و الكدامنا

-و شنسوي

-التسوينه هسه نخلص العزا و تروحين وياي ارتبج

-يا شتسويلي تخلين عمبة براسي و تلمطخيتي تالي هالعمر

- يا عمبة ام رافد العالم وين وصلت، تريديني اساعدج لو لا ؟

-ليش لا اذا ابعد هالعمصة مني بكلشي راضية

- احسبيها اتزحلكت

-يا وشلون ؟

-الشلون خليها عليه خية الا اطلعج هيفاء وهبي بعز زمانها و اخلي ابو رافد يمشي ويسلج وراج

ام رافد :- يااا هيههيهيهي صدك عود ؟

-اي والله شبيج باوعيني ما مخلية رافد دوم ابيتي ما اله خلك يشوف غيري، خليني افيدج يمعودة

-ولو بربو** وبايكة ابني بس امشي وراج و اشوفج شتسوين

- امشي و ما تخسرين ، بس اخ يم رافد كاسر خاطري هالبنية هاي تعلعلت سودة عليه كاتله روحها من الحزن تطلع من مصيبة اتخش بمصيبة لخ عمت عيني عليها بيوم الاجت للدنيا ابوها شالها و شمرها بالزبالة الله ياخذه و من يومها ما شافت الحظ و الراحة

-لا تسويها فقيرة لو ما قبل يومين علكت راس براس وخلت امجد و خالد يتطابخون

-غير بسبب ابنج منطيها دفتر مذكرتها كبال رجلها ما صبرت الا كباله و خله رجلها يشك

ام رافد :- وهي منى شوكت انطته الدفتر حتى اخءه خالد و انطاه للديار

- ليش هو جان عد منى ؟

- اي و تعاؤكت وياها ذيج العركة ما خلصانه منج و من بتج انوب تطلعلي منى تريد تهجم بيتي

-هااا يعني هي الجانت تهدد بيه و ابتي ، هنا الحجي

ام امجد :- ها شلون صارت ديار ؟

-نفس حالها تكسر الخاطر سودة عليه

-ليش ما بقت ترتاح فوك

-خية ما شفتي فلانة و علانة يسألن وينها ووينها خليها هنا نايمة كبال عيونهم حتى ينلصمون

-ما الها علاقة خليها ترتاح

-خليها هنا ما عليها شي
كعدت ام امجد تسولف ، نبيتها :- خية انت ما ناوية تزوجين ابنج ؟

-غير كون الكا التناسبه اذا هو ما يكف من هالسم اليشربه يا مرة تقبل بيه

-و التالكالج مرة ؟

-الله وايدج شايفتلي هيج و ازوجه عمره حيخش بال٣٠ و ما متزوج،بس مني هي التلكينها

-وحدة بعدين اكلج بيها و متأكدة راح تعجبج، و اني سمعت هي معجبة بيه بعد ما ادري

-ياهي هاي ؟

- بعدين اكلج

-راح تخليها تحوص بكلبي

-اي خليها تحوص حتى تفكرين بالموضوع الولد شيب و انت ساكته عنه و ما مزوجته همي نفسج حتى كم شهر يمر على وفاة المرحومة و نفرح بيه

هم تجي التعاون بتي بالبيت و هم انت تفرحين بابنج

-شفايتلي يوم السعد الازوج بيه احمد

ديار متمدده يمهن بس مغمضة عيوني و اسمع لكل سوالفهن وافكر :- شوف افكار خالد وين وصلت حطيتها على ايد امي نفذت بسرعة وهيجت الدنيا على حليمة هاي لو باقية عليه سنة ما اعرف ادخل و اكول لام امجد زوجي احمد لرغد خاف تعرف بكلبي غاية

.... من بعد هالعزاء
مرت سبعة ايام على وفاة مها
مرت الأيام طبيعي، العرفته خالد صار ينام بغرفته و تقبل رجوع ضحى كزوجة و مشت حياته طبيعي.

الا اني وضعي جان هو هو .. من الكلية للجهال
مشايفة امجد و لا ادري عنه و موت مها لهسه بداخلي
نوم كمت الا على المهدئات يلا انام

ابو امجد يريد ياخذني شيخ لان شارح حالتي ولاحد صاحبه و كاله هاي متأذيه بطلعان روح المرحومة لازم تقرا عليها الرقية الشرعية حتى تستعيد حياتها الطبيعية و تكدر تنام براحه و الا تبقى تتأذى

بس لهسة ما رحت
كلما يكلي اكله مو هسه تعبانة

امي عرفت ان منى هي الهددتني فتحلفت الها بس كالت مو هسه خل الامور تهدئ يلا احاجيها

فبعد مرور وقت كالت :- اروحلها اليوم بس حظري روحج ارجعلج بالليل تحضرين غرفتج و تحضرين روحج لرجلج كل عذر بعد ما اقبل منج عيب من الرجال تحمل هواي كافي

-اخاف

-لا تخافين ولا ابد استحي على روحج شوي و اضغطي عليها شنو ذنبه الرجال متحمل كل هالمدة
اروح ارجع الكاج محضرة الغرفة كلها افتهمتي ؟

طلعت من عندي و اني بقيت اقنع بروحي ان خلص لازم اعيش حياتي طبيعي و اكون الي عائله و اكون كد المسؤلية الصارت عليه

......

ميعاد :- دكيت الباب

- منو ؟

-اني امك حبيبي

مهيمن :- فتح الباب انت مو امي

-ماكو فرق حياااتي فدوة لهالعيون الزركة مو حقها الجلحة من الصغر تذوب بيهن

-بابا مو هنا

-امك وين ؟

-جوا

-كلش زين، ابتعد من طريقي لعد و خليني افوت اسلم على ضرتي

منى :- منو مهيمن

ميعاد:- اني لا تخافين رفودة طالع شغل ميجي هسه

-شعندج جايتني

-رايدة ورقة طلاكج

-دمشي بابا امشي ما بقت عليه بس الساقطات يطلكني

-و اذا حجيت لرفودة ؟

-شتحجيله ؟

-اسمعي لج اجيت هنا حتى ما الف و ادور وياج عبالج من تتهددين بالدفتر و ادزين رسايل لرجل بتي تفلتين منها ؟

مو ساكته عنج و ما متعدية عليج ليش تخليني ادوسج مثل الخشرة و اوخرج من كبالي

-الدفتر مو عندي يلا اطلعي برا

-بس خالد وعمتج يكولون عندج و رافد لو عرف هالفعل طالع من عندج ويا شوية بهارات و ملح عندي تدرين وين تصفى روحج، وكتها اذا بيج خير وكفيه دقيقة حتى يسمعج

منى :- والله مو عندي الدفتر ولا اني الهددت اني اخذته صح بس ما هددت احد ولا تعديت على احد كل هالحجي من جوا راس ضحيوه انطت الدفتر الخالد و سوت نفسها هي البريئة و خلتني بوجه المدفع

-يعني ضحى الهددت

-اي والله اني من اخذت الدفتر خابرتها و هي جانت ضايجة من ديار لان ما عافت خالد بحاله فكالت الا اخلي رجلها يربيها

- شنو مصلحة مضحى ادز هيج رسايل جان على ساعة تطلك ديار و هي تخسر

- ما يهمها لان جانت ناوية تتزوج و تعوف خالد اييست خالد يرجع

-تتزوج منو ؟

- اني مرة عندي جهال ما اريد اوكع بخطيتها بس هي سوت السالفة و طلعت من عدها

-اذا ما حجيتيلي كلشي راح اعتبرج انت المسؤله و اخلي رافد يتصرف، احجيلي على اللي جانت رايدته

- اني ما الي علاقة حماة اختي تصير مرت اخوها سمعت من عدها ان ضحى واحد رايدها و تريد تتزوج و حتى سمعت عدها علاقة وياه وراح تتزوج لان خالد معاند ما يرجعها شعدها كاعدة ابيت ابوها

من حجيت وياها ما كالتلي عدي علاقة ما حجت بس جانت تتحلف لديار لان بسببها خالد ما يريدها بعده لاحكها كلت الها عليج و كلت الها على المذكرات كالتلي انطينياهن و خليهن عليه ولا تجيبين سيرة لاحد اني اشهرهن و ما اخلي رافد يتزوج ميعاد

تالي رافد تزوج ثاني يوم و هي رجعت الدفتر الخالد و سوت نفسها هي البريئة و رجعت تزوجته براسي و اني ياهو اليكوم يهدد بيه

ميعاد:- لانج غبية و تثقين بغيرج، المرة التعتمد على غيرها بحل مشاكلها عمرها ما راح يصير براسها خير و راح تصير دوسة يدوسون عليج و يوهمونج ان هم جاي يساعدونج بس بالاساس هم يردون ينزلونج حتى هم يصعدون عليج

خدميني بشغلة وكليلي ويا منو جانت عدها علاقة حتى اخذلج حقج منها و اكشفها الج بدون ما اجيب اسمج ولا اخلي احد يدنالج لان هي بالاساس ما كايلتلج علاقتها فاحجيلي ما راح تشك بيج

-واحد من كرايبهم اسمه عمار بس العرفته هي كسرت السيمكارت و عافته و رجعت الخالد يعني واحد يحجي لالله ما اتوقع هي دا تتواصل وياه و هي على ذمة خالد هذا السمعته

-سهلة

-اني ما الي خلك مشاكل تره لا ادخليني بالموضوع

-انت مشتركة وياها لان اخذتي مذكرات بتي و ردتي تفضحيها و تفضحيني بس راح اعديلجياها لخاطر هالجهال، مع السلامة

... طلعت من بيت رافد نزلت لبيت ام رافد، لكيت ام رافد و بتول كاعدات بالهول :- هلا مساء الخير عيوني

ام رافد :- شرايدة

بتول:- هههه مساء النور

ميعاد :- ما تصيرلج جارة و عود اني الجاية عليج اتفق حتى اخذج باجر وياي

- وين تاخذيني ؟

-اول شي ام رافد انت عندج نقص انوثه حاولي من تشوفي ابو رافد تتراجفين

-حيل البرابي*** ما اعرفلهن

-اتعلميهن احسن ما ظاله هذا حالج و حضري نفسج ياجر نروح اني وياج للصالون

-تالي عمري اروح للصالون

- اطمني لا اصبغ شعرج عمبة ولا الطخ بوجهج شي
اكو مراكز هسه تشتغل تجاعيد الوجه اخذج جلسة ليش وجهج مجنفص من القهر خليني اعدله الج و ارجعج شباب منها اوديج لصالون اصبغلج لون غامق يناسب عمرج و يوخر الشيب من راسج

وكلما اروح اخذج وياي الا اطلعج كوادا لوبي و ابو رافد يفتر وراج

بتول :- اي والله يمه عليمن كاتله روحج بالقهر من نسوان اخوتي و ابوي لافي عد مرته روحي شوفي نفسج

ميعاد :- شفتي حتى بتج تشوف هيج عادمة روحج عليمن ياما صيحتي و صرختي يبوو حتى لا اخذ رافد تالي اخذته و انت كاتله روحج شمستفادة خليني اخذج اغيرج

ام رافد :- شافوني ولدي شيكولون امي تخبلت

-ما اهليهم يحسون قابل راح اصبغلج اصفر شوية شوية كل فترة نزرك اني وياج نعدل ارواحنا و نجي لا من شاف ولا من دره و طز بابو الدنيا

بقت تفكر :- فكري ورديلي خبر صاعدة الضحى رايده منها الكاوية

صعدت الضحى و عفت بتول تقنع بامها، دكيت الباب و اني اسمعها هي و خالد يتراددون فتحت الباب :- مساء الخيييير

خالد :- شرايدة

-رايدة اشكرك على فكرتك الديورة كلش بمكانها و اني جاي امشي بيها بس احتاج مساعدتك، بس اني هسه ما جاية عليك جايه على مرتك

ضحى :- شكو

-الاكو ام غسان و الماكو انت يعيوني

ضحى :- خالة عيب هالحجي م........قاطعتها

-اسمعي اسمعي هذا رجلج يسمع وياج العيب مو انت التعلمينياه، من تروحين تراسلين رجل ديار و اطعنين بشرفي و بشرفها لان ضمنتيلج زوج بجيبج و بعد ما اجا الزوج اللاخ اللي هو رجلج هذا .. اطلعين روحج بريئة هالحجي ما يمشي يمي سمعتي لو لا

خالد :- احجي عدل و كولي شنو الموضوع

- الموضوع مرتك لاعبة ع الحبلين بس خليها ابالج اذا انت بارقام مدستره و ما معروفه منين و من جوا الجوا اتفضحين ابتي فاني هنا اجي كدام عينج وكبال رجلج و بنص بيتج افضحج

ولج طبيتي بيتي و اترجيتيني كسرتي كلبي اتحملت دموع بنيتي و كسرة كلبها على اللي اتحبه في سبيل ترجعين البناتج و كلت الام ام لو تصير كح... ام سحورة لو شما تصير تبقى ام و بعدها من رجلج حتى يرجعج تالي هيج تسوين بيها من حطيتيلج واحد بجيبج ؟

خالد :- باوعيلي هنا و احجيلي شنو الواحد و شسوت لديار

-الرسايل الجانت تندز لابو امجد و امجد هي الدازتهن لان جانت عدها علاقة بواحد و تريد تتزوجه من شافت ما وراك رجه و تترجاك بس من شافت بيك امل باعت بعقلك حلاوة و لعبت عليك و سوت روحها المسكين التخاف على ديار و سلمتك الدفتر حتى ترجعها

ترضاها يا ابو الوليد؟
ادريك ما ترضاها .. لهيج اني ما راح اسوي شي اعوفها الك و اكول ... حسبي الله ونعم الوكيل

باوعتلها وهي كامت تبجي و تترجى خالد و تجذبني :-، من تندكين مرة لخ، اندكي ويا البكدج يروحي موووواح سلااام

طلعت و كبت نارهم وراي .....

☆☆☆☆

#اتمنى_ان_افعلها


الحلقة_41

عشت مرسآل يم عميآن
محد يعرف شبيه
والسآعي الـ خذاني بعيد
اخرس مآقره الـ بيه.🖤

.......

ميعاد :- نزلت جوا ، باوعت على ام رافد : ها يعني باجر نروح ؟

ام رافد :- بيش الساعة تجين ؟

-وره الظهر

بتول :- شبيهم خالد و ضحى ليش يصيحون ؟.

ام رافد :- شجاهم

نزل خالد عصبي ، وكف كبال امه :- خابري واحد من اهلها خل يجي ياخذها و طفل واحد ما تاخذ وياها

ام رافد :- يا يمة شجاك شصاير

عافهم و طلع ، كلت الهن :- اني اترخص منكم ارجع لبنيتي اشوفها شسوت هاي اذا ما اكعد على راسها الكاها مخربطة الدنيا

نزلت ضحى تبجي :- الله لا ينطيج ان شاءالله حية خاربتينا اني ورجلي و طالعة منها الله يطلع حبوتي منج يا نذله

ام رافد :- شبيج شجاكم شبيه خالد

ميعاد :- بتي ابتعدت من رجلج و كل ما يجيها تبعده و ما تريده و عافته الج، تفضحينها يم رجلها و تريدين تخربين حياتها ليش، لو من تفضحينها حلال و من تنفضحين حرام و نصير انذال، ان جان بيتج امن گزاز لا تشامرين الناس حجار

ضحى:- والله انت و بتج ساقطات و اسقط خلك الله، الله ياخذجن و يخلصني من شرجن

ام رافد دفعت ضحى و هي تگلها :- شمسوية و خالد يطردج كولي

ميعاد :- هي كالوها كح... ملهى ولا كح.. بيت ،
خل اكملها الج ما دام السانج بعده طويل وياي، و حتى ام رفوده تعرف السالفة ، اكولج بيها عيوني كل السالفة ضحى جانت رايدة تتزوج واحد ومواعدته بالزواج و من شافت خالد رضى ضربت ذاك بوري ورجعت لخالد .. الامانة لله هي ما مسوية شي غلط
بس بتي هم ما سوت شعدها ادور وراها ؟

وهاي انت الدكيتي الباب و اني رديتلج الجواب
ومع السلامة ..

طلعت منهم و عفتهم ينضربون ابعضهم ، دخلت لبيت ام امجد، لكيت ام امجد حاطة حساني ابن امجد و تنوم بيه :- ها وينهم لعد

-الجهال يم ديار فوك

-ام امجد لريدج تساعديني عيوني

-على شنو

-نحل قضية امجد و ديار، صارلهم فوك للشهرين متزوجين نكول لخاطر مها، بس المرحومة راحت و نامت بكبرها الله يرحمها و ذوله ما تصير بيناتهم مودة ورحمة لا ما يتم زواجهم كامل

-والله على بالي الموضوع بس هي تعبانة و هو سودة عليه مقهور هم مو سهلة مريته و حبيبته ماتت و جهاله تيتمو، يجي من الدوام لا سالفة ولا رواية على وجهه چفي ينام لو يكابل هالجهال

-وشلون نظل نتفرج عليهم، انت احجي ويا ابنج اليوم و اني اعلم بتي

-الله كريم هسه يجي و احجي وياه، حجيتيلي على وحدة لاحمد ما كتيلي مني هي ؟

ميعاد :- بت حليمة اخت سلمان هم بنية حليوة و طالبة و مثقفة و السمعته ابنج هم هاويها

ام امجد :- ولا جاية على بالي بس والله خوش بنية على اقل نعرفها

-خيه و الحجي بيني و بينج البنية بس هي بقت ابيت ابوها يعني لو خذاها ابنج هم يستفاد و يعيشون مرتاحين

-يا ليش ما تدرين حليمة مسجلة البيت بأسمها

-بأسمها ؟!!!

-اي غير موقعتها على تنازل ومسجله البيت بأسمها ما سمعتي الحجي ذاك اليوم

-لا والله، شكالت ؟

-كالت خليت رغد تتنازلي من زمان من كبل اتزوج ابو رافد ، تكول شمدريني منو بتي تتزوج و منو يلعب بعقلها تالي انشمر بدار المسنين و اطلع منها بلاش سجلته ابأسمي و هي تكعد عندي هو اول و تالي راجع الها

-برضات بتها لو غصب عنها

-والله يا اختي بعد ما اعرف

-زين حصة سلمان شنو اكلتها ؟

-سلمان مات بعد يا حصة

-اي غير جان متزوج ديار

-والله ما اعرف بس ما اعتقد الها لان هي اتزوجت، و بكل الاحوال ما الها لان هسه اببيت كله بأسم حليمة

ديار :- ها ماما اجيتي

ميعاد :- اي ، نامو الجهال ؟

-بس فطومة كاعدة

-تعاي وياي

ديار :- صعدت وياها ، سألتها :- شسويتي لمنى ؟

-مو منى كولي ضحى

-ضحى شنو ! شعليها ؟

-طلعت هي الماخذه الدفتر من منى مسويه كل هالعمايل وبعد نا مخلصة بايعه مسكنة براس الزوج الجنت تحبينه و راجعة

-صدك عود ؟

-اي والله

-وشسويتي؟

-سويت اللي هي سوته وياج رحت كبال رجلها و حجيت ، الشفته خالد ما قبل نزل كال لامه حتى ياخذونها، عوفينه منها نارها تاكل حطبها، خليني وياج ، ما دام الجهال نامو كعدي حتى ارتبج

...اخذت نفس تنهدت .. باوعتلها محجيت

- لا تبقين تشمرين حسرات خالد الجان رايدج شاف حياته انت موكفة حياتج ليش

-مو خالد

-شنو لعد

-ما اعرف هالموضوع من اتذكره احس اريد استفرغ ابقى اتذكر ذيج الايام

-ذيج الايام راحت وولت لازم تصيرين قوية و تتعديها، الحياة مثل الكتاب ما تكدرين تمشين بيها لا ما تطوين الصفحة المضيتي بيها .. اطوي صفحة الماضي و قوي نفسج رجلج خوش ولد اكسبي ولج شرايد منج الله الاحد هي شغيله وحدة، و تمشي حياتج كلها يا بتي

... هزيت راسي محجيت، نظفتني و رتبتني و اني كلشي بيه مشوش عقلي ما اعرف شصابه ، احس مغص يصيبني كل ما اتذكر العليا

كلش تشوشت لدرجة ردت ابجي، كملتني هي و بقت تنصح بيه بأمور زوجية كلت الها :- كافي امشي راح تخليني ازوع

ميعاد:- اسمعي ولج لطامة مو وجهج هذا تكابلي للرجال لو هسه شما بيج من يدخل ابتسمي، مو بفلوس والله يا عالم الابتسامة مو بفلوس ما تخسرين شي لو ابتسمتيله خلي الرجال يحس انت رايدته مو لاطمة بوجهه و محسيته مجبورة عليه

-ماشي ماشي بس روحي

-فوكها، عمي يلا رايحين بس مشيها يفلك الله طكت ارواحنا

مشت للكنتور باوعت ملابس النوم، طلعت واحد و خلته ع الجرباية ورادت تطلع

- البس هذا ؟!!

-لا يابه تلبسين هذا شنو نزلي جيبي بجامة عمج و دشداشته و فوطة عمتج لبسيهن و تكبعي للرجال و كعدي انتظري بلكي الله يخترع ويهج فد مرة

ولج يمة انت راح تربيلي علة امجد مو سلمااان كافي اعرفي شلون تفكرين و تعيشين حياتج مثل باقي النسوان، يلا اروح ما اوصيج

بقيت اباوع عليه وهي راحت :- البسه لا .. هو حتى جسمي من جوا متشوه لا لا ما البسه ، ضميته و طلعت ثوب نوم شوية عن الركبة و ربع ردن ومكياج و شعري مشسور، احسن من الطلعته امي

بقيت كاعدة بمكاني بس بطني تمغصني كانما عندي امتحان، و هو هم ما قصر ساعتين و هو ما مبين، هدور لا نزلت ولا شفت البيت شمحتاجين

فاتت ام امجد للغرفة ابتسمت من شافتني باستني من راسي وكالتي صيري سباعية و داري رجلج ما الج غيره بعد و هم ما اله غيرج
بقت تنصح بيه و اني دخت كلش بعد ما افسر كلمة عن كلمة، العرفته هو جوا متمدد ويا فطومة

نزلت ام امجد كالتله اصعد يم مرتك عوف الجهال اني راح انام يمهم ، هو عايفهم و صاعد

اني مطفية الضوة بس ضوا التلفزيون، فات هو ، احس كلشي بجسمي كام يلويني، حجه :- شلونج

كوة طلعت مني :- زينة

خله كدامي علاكة كرزات و اخذ الريموت دارها على فلم عربي (دكان شحاته) اني كاعدة بمكاني ما تحركت، حجه :- كومي خلي الكرزات بكاسة حتى نباوع الفلم و ناكل براحتنا

-اي
كمت من مكاني الثوب قصير شينزلني جوا ولا اكدر ابدله، انتبه هو ، كال :- اذا ما تكدرين تنزلين عوفيه بعلاكته

كعد ع الجرباية و كال :- جيبي
تقربت انطي العلاكة ، لزم ايدي و كال :- كعدي يمي
كعدت بس جسمي احس الدم يفور بيه من التوتر و ادية ترجف

ما جبرني اتقرب منه اكثر، كعد يشرحلي على بداية الفلم ولو ما انتبهت على كل كلامة بس هو اندمج بالفلم، فاني نسيت التوتر و بقيت اباوع وياه ع الفلم، شال من العلاكة كرزات و حطها بيدي، بقيت استنكي الفستق و اكل و اباوع و نسيت السالفة تقربت اشمر بالمنفضة اليمة ، و اباوع

طلعت لقطة سخيفة بالفلم درت وجهي خجلت كلش كمت اباوع بالسكف، ابتسم هو و كال:- هاج كومي شمري الكشور بالزبالة
كمت بسرعة حتى اداري الخجل، طفى التلفزيون من الريموت صارت الغرفة ظلمة حيل عفت المنفظة ع الميز حسيت بخطواته، مد اديه من ورايه على خصري و همس :- طفيت كلشي حتى لا تتوترين اكثر

بلعت ريكي، اتصنمت بمكاني، همس:- ما رايد اجبرج على شي انت راضية ؟

طلعت صوت ( امممم) بدون ما انطق اي حرف

اخذني بحظنه وجان حذر حيل حتى ما يتعنف او يضايقني، بس جنت كلش متوترة جسمي كله يرجف
كل اللي يجي على بالي هي الايام اللي عشت بيها ويا ابوي بخوف عقلي كام يقارن مقارنات سخيفة بس امجد جان يختلف .. ما جان يشد حيل مثل كل حالة مريت بيها قبل .. جان متخوف اكثر مني انو يأذيني او اخاف فلهذا حتى ايده ما جانت تشدني بقوة
وهالشي ساعد عقلي يفرق ان اكو اختلاف بالموضوع .. و هان علية هواي بخوفي و توتري

.... ابتعد مني بدل و نزل
بقيت بمكاني ما اعرف حسيته تضايق بعدين
بس ما راد يحجي و نزل، هو تضايق لو اني يتخيلي هيج، ليش طلع بسرعة ؟

رحت للحمام سبحت، رجعت لكيته بالغرفة فاتح ضوا و تلفزيون و كاعد، ما حجيت بقيت انشف بشعري

امجد:- ديار تعاي هنا اريد احجي وياج

التفتت اله، بقيت اباوع بوجهه، شكله جدي مو مثل قبل شوي مرتاح و يتعامل وياي بلطف، تقربت وكعدت كباله ع الجرباية

امجد :- انت مو كلتيلي سلمان جان عاجز و زواجنا جان مو حقيقي

-اي

-بس انت مو بنية

-يعني شلون مفهمت

-اكيد دارسة و تعرفين موضوع غشاء او هيج شي ؟

-افتهمت

- اي ؟

- اني كلت الك ان اني صارت بيه حالة نفسية لان تعرضت للتحرش

-كلتيلي للتحرش مو للاغتصاب وفرق جبير بين الاثنين

-هو نفسه

-امج كالت هي اخذت نفسها و انت تكليلي تحرش صيري بمكاني اصدك منو بيكم انت لو امج ؟

-امي كالتلك هذا الشي قبل لا اني احجيلك الحقيقة اكيد ما راح تكلك بتي هيج صار وياها

-اغتصاب و اخذ عذرية بعمر صغير مو شي هين ، تريدين تقنعيني ان فقدتي عذريتج و انت طفلة

-منو كالك المريت بيه شي هين ؟ لو هو هين جان هان عليه ما سببلي عقدة و حالة نفسية

-باوعي بعيوني و كليلي ماكو شي ثاني ؟

-جيب القران و اقسملك ان ما مارست الحرام ويا اي بشر و كل التحرشات اللي تعرضتلها جانت غصب عني وبسببها تأذيت هواي و حتى انت جنت صعب عليه

بقى ساكت ما حجه اي شي، ردت اكوم اجيب القران حتى اكد اله كام و طلع برا :- شلون ما اجيبها بحياتي ما جاي ترهم شلون ما ادري

باوعت موبايله يمي، خابرت امي منه، سولفتلها، كالتلي:- لا تفكرين ولا تجيبين ولا تودين .. من راح تخافين و تشيليله هم راح تشككي، سوي روحج ما مهتمة و اتصرفي وياه عادي و اذا حسيتي بي زاد بالموضوع كليلي عود ساعتها اني ادخل

التسوينه هسه نامي و شبعي نوم ، والف مبروك بنيتي يارب يفتحها بوجهج و يمشي وياج مثل المي و يسندج و يدللج بجاه كلمن عنده جاه

.. نهيت وياها الاتصال و مثل ما كالتلي حاولت ما اتأثر بالموضوع، بقيت لازمة موبايله و اباوع بيه ، موبايله جان لمس و كومة العاب بيه منزل و مقاطع و فيديوهات .. بقيت ناسية روحي و اني العب و اكلب بيه

فات هو ، شافني العب بالموبايل ما حجه، الساعة جانت ٢ و نص، طفى كلشي و اجا نام و انطاني ظهره

سألته :- الجهال كلهم نايمين

جاوب بكلمة وحدة :- اي

- يم عمتي ؟

ما رد بعد .. عفته و بقيت اكمل اللعب، محسيت على روحي الا الصبح طالع و الجهاز طافي خليته ع الشحن و نمت

كعدت ب١١ الظهر هو كاعد يباوع على قناة على اخبار رياضية، كلت :- صباح الخير

حجه :- صباح النور
بدون ما يباوعلي

-اكو شي ؟

-ليش

-ما اعرف حسيتك متضايق مني

-سكت و دار وجهه
عفتهو نزلت لكيتهم بعدهم بفراشاتهم ما كاعدين لأن جمعة و عطلة فماخذين راحتهم، باركتلي ام امجد و بقت توصي بيه و عفية بنيتي و سباعية و ديري بالج

للعصر جان تفوت امي و ام رافد .. حافتلها الوجه و صابغتلها شعرها لون جكليتي و كاصته الها .. ام رافد عيونها صفر حيل و امي حاطتلها كحل مبينات لون عيونها كلش قوي

بقينا فاكين حلوكنا و ام رافد فرحانه بروحها، عمتي تكول لامي :- والله سويتلي واهس اصبغ شعري ليش باقي مشيب

و امي تسويلها واهس و تحمسها، شو لبست عبايتها عمتي و كامت ، ام رافد و امي اشتغلنها ضحك
اخذنها وراحن رجعن للصالون

اجت بتول :- امي وين لعد ؟ كالت سارة اجت لهنا

-رجعن ويا عمتي تريد تكص و تصبغ

-دشوفي بالله امج كببت علينا العجايز

ضحكت :- يمعودة خل يشوفن نفسهن شنسويلهن

-و احنا الشابات وجوهنا شلونها

-ما عندنا خلكهن

-اي والله ، اني اروح

-وين اكعدي

-لا والله جهال خالد مناك وحدهم

- ليش ضحى وينها

-مو البارحة امج حاجيه كبال خالد و خالد متخبل ، عاف البيت و طلع و امي خابرت اهلها اجو اخذوها

-على سالفة الدفتر

-لا مو بس هاي غير طلع جانت عدها علاقة ويا واحد ومن رجعت لخالد عافته

صفنت :- هاي من شوكت

- كبل لا يرجعها

-اذا كبل لا يرجعها ما بيها شي منو ما عنده ماضي

-اي حبيبه ماضي بس مو تتوسل خالد و هي واحد ، من ايست من خالد جلبت بذاك و من رجع خالد عافت ذاك، هءا لعب شلون تريدينه يثق بيها بعد ما جانت تجي تبجي دموع حتى ترجعله وهي بعلاقة ويا غيره ؟

-مدام ما طالع من عدها شي يكفي مو لخاطرها لان هي تبينت وحدة حقيرة بس لخاطر البنات

-الى متى يسكتلها لخاطر البنات، والله معليه لا ادخل ولا احجي شيريد يسويلها خل يسويلها ، اني راوح عيوني مع السلامة

الله وياج .....

... بعد هالفترة مرت الايام بهدوء
امجد تحسس كم يوم و اني اخذت الامور طبيعية .. رجع فك ومشت الامور .. شوية شوية كام تزيد العلاقة بيناتنا

صار لما يستلم راتب يجيبه يخلي عندي ومن يحتاج يكلي انطيني، جان مديون ١٠ ملايين لأبوه ع المهر و على علاج مها .. و قبل لا يتزوجني جان كل اكل البيت من برا ما عدهم اليطبخلهم بس ام امجد و يا دوبها جانت للجهال .. لهذا صرف جان قوي فيداين متراكم عليه صاير ١٠ ملايين

طلبت من عمتي تشوفلي اللي بالمنطقة منو تسوي سلفة حتى اجبره يقتصد من راتبه ويوفي دينه ..
سالت عمتي و لكت سلفة ويا ام الحصة ٢٠ اسم بشهرية ٥٠٠ بس بادية صارلها شهرين .. كلت الها ميخالف اشترك .. اشتركت بالسلفة
حجيتله، كال :- خليها الج عالجي باقي جسمج بيه والله كريم ع الدين ينحل

كلت اله:-، بالاول فك دينك و خل نخلص من الدين و الله كريم الزمن كدامنا و عود اسوي سلفة لخ و اتعالج ..

وهاي جانت غلطة من غلطاتي لما فكرت اقدم شي على نفسي ، ما اعرف يمكن الدنيا هيج صارت ما تحب الزين تحب الاناني و اليدور بس مصلحته .

اما سالفة خالد .. ورى اسبوع ابو ضحى مرجع ضحى وكاعد ويا خالد و ابو رافد ومعتذر منهم و كايل الهم ان هو الجان رايد الزواج و هو راد يفرضه عليها لان كاعدة بلا زواج .. بس من قررت ترجع لرجلها عفنا ذيج للسالفة

حجي النسوان يختلف عن حجي ابوها .. القال و القيل كثرت ان هي لا جانت عدها علاقة بهذاك و حتى مفاتح ابوها بالموضوع بس من خالد موافق على رجعتها عافت ذاك ورجعت لخالد
ضاعت الحقيقة وين بس بالحالتين هي ما غلطانه بشي من حقها تتزوج جهالها و ماخذيهم منها المن باقية ابيت ابوها، وحقها ترجع لخالد لان بناتها عنده