#اتمنى_ان_افعلها

الحلقة_37

ليس بوسعي الا ان اكون لك جدار لا يشعر ولا يتألم، يسندك كلما ملت، ليس ذنبي بل ذنب قلبي الذي بقى معلقا بك 🖤

............

خالد :- صارت الساعة ١٠ الظهر خابرت على رائد يجي يوكف بمكاني حتى ارجع للبيت، فتت سمعت ام امجد كاعدة ويا رافد و امي بالاستقبال

صحت بتول حتى استفسر منها، سولفتلي عليمن جاية مرت عمي، تريكت و اني اسمع رافد يتحاجه ويا امي ع الدفتر ويهدد بالبيت اذا ما طلع اسوي ما اسوي و امي تتعارك وياه الى ان طلع

مدنك اتريك و بالي مشغول بهالموضوع
اجت امي يمي تلوم و تحجي و تغلط، قاطعتها و اني اكلها ، بيوم اللي تعاركتي انت و ابوي منو جان عد بيت ابو امجد ؟

ام رافد :- شتقصد

-اللي جانو بالبيت منو ؟

-اني و رافد و مرته اجو وراي و جهالهم و بيت ابو امجد و ديار جانت عد امها ميته ان شاءالله

هزيت راسي الها، و دنكت
اني انطيت الدفتر لأسامة يرجعه قبل لا كل ذوله يجون
الدفتر بغرفتها .. ومدام اسامة كدر يدخل لغرفتها و هي ما موجودة معناها الغرفة مفتوحة !

الدفتر لونه احمر و عليه رسم ورد واشكال ورد طالعة منه يجذب نظر الطفل، بس اللي اخذه مو طفل
احتمال كلش جبير طفل نزله من فوك و واحد من اللي جوه اخذه و قراه

.... كل الرسائل والتهديات اللي وصلت تثبت ان الي ماخذ الدفتر واحد من عدنا لأن مهددين ديار و امها
وبيت ابو امجد ما الهم علاقة بأم ديار ولا يريدون يخسرون ديار بهالفترة لأن كلش محتاجينها للبيت و الاطفال و مها المريضة

رافد مستحيل يسويها ولا حتى يفكر يفتح دفتر ويقرأ شنو بيه، اعرفه ما اله خلك لهالسالفة خصوصا جان ابوي و امي متعاركين يعني مو بمزاج يباوع هيج شي ابدا

امي كلش مو مصلحتها اطلك ديار تعرف اذا اطلكت اني اخذها، و هي اللي ما عولت ديار تتزوج و تبتعد عني تراسل امجد و ابو امجد و تطعن بديار مستحيل.

منى مرت رافد او مها ...
مها اعذرها يمكن غارت على رجلها او تندمت بس استبعدها اعرف مها و اعرف گلبها وطيبتها مستحيل تسوي هيج شي لو تهدد

مرت رافد ... احتمال كلش جبير تكون هي
شلت راسي و صحت على سارة بتي كلتلها :- صيحيلي جهال عمو رافد ع السريع

راحت هي ركض تصيح بيهم، دقايق و كلهم اجوني يركضون و بتول واكفة بالباب و امي كاعدة و تباوع ليش صحتلهم

حجيت :- اكعدو بالسرة مسطرة يلا ع السريع

ام رافد :- شرايد من الجهال

خالد :- يجيج الصافي
ردت وجهي منها، ايد مني ملفوفة ما اكدر احركها، بالايد الثانية طلعت ١٠ الاف من جيبي و حطيتها كدامهم، كلهم هجمو حتى ياخذوها

سحبتها :- لا ما انطيها هسه، راح اسأل سؤال و اللي يجاوبني هو الفايز و ياخذ العشرة الاف كلها اله

كلها كامت تصيح اي اي يلا عمو

سألت :- دفتر احمر بيه ورد حلو منو شايفه اللي شايفة او يعرف وينه اله هاي العشرة

مهيمن كام من مكان، صحت اكعد مهيمن
صاحت بت رافد الصغيرة :- اني عمو شايفته

-وينه

-ما ادري وينه بس اني شفت.......
جاي تحجي مهيمن سكت اخته و كاللها روحي لماما

صحت الها :- تعالي عمو
اجت و هي تباوع لاخوها خايفة ، شاورتها كتلها :- شاوريني بس اني وياج نعرف حتى انطيج هاي الفلوس الهواي كلها الج

باوعت بوجهي، انوب سحبت راسي الها :- عمو ماما ما قبلت نلعب بيه ما ادري وينه

شلت العشرة و خليتها بأيدها:- هاي هديتج يلا حبيبتي روحي العبي

جاي اتكوم كام مهيمن كدامي، صحت وراه ، تقرب مني لزمته من اذنه :- اسمع لك لعب ما تلعب ساكتلك هواي تاخء حجي و تودي لامك صايرلها مراسل صير رجال عمو لا والحق اشوي على اذاناتك بصل و كل سوالفك هاي احجيها لابوك اخلي يعلكك

الولد احتقن صار احمر بس يجر بأذنه من ايدي، دفعته و كلت اله :- يلا انكلع منا و لو سمعت عليك سالفة بعد محد يخلصك مني

امي من سمعت هيج و فهمت السالفة سبقتني و صعدت من برا لبيت رافد و بتول لحكتها، انداريت لسارة كلت الها :- بابا العبو هنا لا تخلين احد يصعد

طلعت برا صعدت لبيت رافد سمعت صياح امي و بتول ويا منى بالمطبخ، وكفت اسمع الحجي
امي بهذلتها و نزلت عليها غلط و مصايح و بتول تصيح :-طلعي الدفتر لا تهجمين بيوتنا حية

كحيت من برا حتى مرت رافد تنتبه لنفسها خاف ماخذه راحتها بالبيت، صحت :- يمه مو هيج الكلام تعالي يمي

صاحت بتول :- تعال خالد تعال

تقربت مرت رافد بجت بوجهي :- خوية والله ما عندي

خالد :- اسمعي خوية اني وياج و ما رايد اهجم بيتج و ضد زواج رافد من ميعاد تخلين ايدج بأيدي و نبعدها لو تكولين لا والله، ابلغ رافد باللي اعرفه و هو يتصرف
واخليها ابالج اقل شي يسوي رافد يطلكج و انت تعرفينه و تتهجول هالجهال ويصيرون تحت رحمة ميعاد

من الاخير ما الي خلك السوالف، تشيريني لو تخليني اتصرف ؟

منى :- خوية ولا على عيني و على راسي بس والله مو عندي الدفتر

ام رافد :- مسويتلج عصابة بت وينه * تردن تهجمن بيتي و اتضيعن ولدي

خالد :- مو هيج الحجي يمه من رخصتج شوية
الفتت الها :- وينه

-مو عندي هسه والله ما اكدر اكول عدمن بس هاليومين اخليه بأيدك والله وراس جهالي

كامت تتعارك وياها امي و بتول تصيح عليها ، عفتهن يخوفنها شوية بعدين صحت بيها و كلت الها :- هاليومين الدفتر يمي و لو طلع حرف من عنده والله ما تشوفين خير، انتظر و اشوف وين توصل وياج

عفتهن فوك و رحت لغرفتي انام ساعتين ارتاح، كعدت محد بالبيت بس امي و بتول كاعدات بالهول بدلت و طلع لكيت اسامه واكف براس الشارع صحتله و كلتله تروح لديار تبلغها باللي كلت الك بيه، راح اسامه و اني طلعت، ماكو دقايق و خابرني رائد

كال :- خالد انت بالبيت ؟

-لا طلعت

-عمي خابرني امي متخربطة يمعود الحك اني خارج الدورة

- شنو القصة هسه عفتهن بالبيت هي و بتول كاعدات يشربن جاي

-شعرفني يمعود الحكهم اني جايك

رجعت بطريقي كبل للبيت، لكيت ميعاد كاعدة بالكراج ع المرجوحة و حاطة رجل على رجل، تفاجئت !!

- انت شجاي تسوين هناااا امي وين ؟

ميعاد :- عزاااا متدري ؟ غير تخربطت و شالوها للمستشفى

-يا مستشفى انت ما تستحين شعدج كاعدة ابيتنا

-قصدك بيت زوجي

وكفت صافن بوجهه، كامت من مكانها و هي تكلي :- منا و جاي تحترم لأنو صرت مرت اخوك الجبير مفهوم خلوده

انداريت منها و اني متفاجئ معقوله رافد سواها و اتزوج، مشت من عندي و فاتت جوا للبيت، صحت وراها :- هييي هنا فوته الج لهالبيت ماكو مكانج الشارع يا بت الشوارع

ميعاد :- كد كلمتك هاي خلودة

ديار :- ماما شجاي تسوين هنا ؟

خالد :- ديار اخذي امج منا و اطلعوا

اسامة :- انت ما تستحين كافي حتى كرهناج

ميعاد:- انجب لك و روح منا يلا ناقصني البكدك يحاسبني

خالد :- دياااار ما سمعتي اتحركي عاد

ديار : سحبت امي و اني اتلفت اريد افهم شنو الموضوع

اسامه صار يصيح و طلع من البيت و امي سحبت ايدها مني و هي تكلي :- روحي لبيت رجلج و خليني اتصرف بمعرفتي

-معرفتيش شصاير فهميني
اباوع خالد فات جوا عصبي يسأل بالجهال على مرت رافد

:- عمة منى وين

سارة:- راحت بابا اجا اخوها وراحت

-شوكت هاي من جنت هنا

-لا قبلها و قبلها من جنت نايم

ديار :- امشي لخاطر ربج دمشي رايدة تفضحيني انت

- فضيحة شنو اني ورافد تزوجنا اليوم الصبح

-عزا العزاني صدك تحجين

-وليش عزا يا ستار شسويت زواج و على سنة الله و رسوله

-يا سنة يمه و احنه ما ندري ولا احد بينا عدنا خبر شنو احنا مو ابالج كو جاي يهددوني لو تزوجتي يفضحوني انت ما خايفة علية

صفت سارة امجد ، طلع خالد و هو يكلها :- انت شنو من طينة ولج جاي اكلج طلعي براااا

نزل امجد سريع :- هاي شكو يمعودين، ديار ليش انت هنا شصاير ؟

خالد :- اخذ مرتك و نسيبتك و طلعهم من البيت لا ارتكب جريمة هسه هنا والله

ميعاد :- منو هذا اللي يهدد احترم نفسك يا ولد
اجيت حتى تباركولي اووي حتى المباركة بعد ما اريدها

عافتنا و طلعت من بيناتنا ، صفت سيارة ابو رافد ووياه ام رافد سانديها بتول و ام امجد ، و ابو امجد صفت سيارته وراه

وكفت امي و تخصرتلهم و هي تباوع، نزلوا من السيارة، حجت :- الحمد لله على السلامة عيوني متشوفين شر ان شاءالله

ابو رافد :- امشي لبيتج ميعاد

ميعاد :- ولو مو وكتها بس ما باركتلك بزواجتك شايف الف خير عيوني

ام رافد جرت اديها بهمة من بتول و ام امجد و هي تصرخ :- ولكم عوفوني ابرد كلبي بيها هالسااااااقطة

سحبها خالد و ابو امجد و هم يكلولها : مو بالشارع فوتي

فوتها و هي تصيح و تتحسب على امي و علية

ميعاد:- اوووي تشترون اللطم و المصايح شراية عبالي تباركولي و افرح و ياكم ولا تسوون واهس اروح لبيتي احسنلي

امجد :- غير نفهم شكو

ابو امجد :- ابو امجد العلينا سويناه ما النا علاقة امشونا للبيت

ديار :- عمو بس اروح ورا امي افتهم شصاير اندار عقلي

ابو امجد :- امجد وصل مرتك

مشيت وراها للبيت و امجد يسأل ، وكفت وجاوبته :- امي تزوجت رافد

امجد :- اوووووو ، زين انت شنو علاقتج حتى الرسايل تهددج اذا تزوجت امج تنفضحين و ابيش تنفضحين

-مو وكته الحجي لما ارجع للبيت عود نحجي

وصلني للبيت و كال :- من تريدين ترجعين خابريني لا تجين وحدج

-ترا نفس الفرع احنا شنو السالفة ما يحتاج

-سمعتي شكلت ؟ و طلعت اليوم و الفرفرة الصبح ما ناسيها خليها ابالج

-ماشي، فتت البيت و كلت اله، دور على اسامه و شوفه و اذا بالبيت خابرني على رقم امي

اندار يمشي و ما رد ، دهلت و سديت الباب
فتت اتعارك ويا امي و اصيح و هي حاطة رجل على رجل و ايدها على خدها و تتفرج عليه شلون اصيح

-انت مو ابالج الكلام ؟

-لا

-منهمج

-اني كلت الكم سابقا اريد اتزوج شكلتولي ؟

-كلنالج لا ؟

-خلص ليش اعيد الموضوع

-و شسويتي انت

-مو انتم التتحكمون بحياتي ماما اني حرة بشنو اسوي ووين اروح و منو اتزوج، يرضيج ارجع للحرام لو اتزوج و استقر ابيتي احسن ؟

- مو معقولة ابد جاي اتعجب بتفكيرج ، يمة مو غلط تتزوجين الغلط الطريقة التزوجتي بيها، اهله ما رايدينج و هم كرايب رجلي انت شلون تسوين هيج ما خفتي عليه على سمعتي ؟

-و شسويت حتى اضر سمعتج يمه، تزوجنا حبيبتي ما هرمت وياه

-تزوجتي ومحد راضي بيج يمه كل ساعة و كل دقيقة يطعنون بيج و عيروني بيج وانت تزوجتيه بدون علم احد و رحتيلهم و خليتي امهم توكع و تتخربط وتكليلي شسويت !
شنو الما سويتي ؟ .

فكري بينا فكري بأبنج الى متى اكلج فكري بينا لخاطررررر الله، خالد اللي كضيت حياتي اتمناه تخليت عنه لأجل هذا و ذاك ولان اهله ما راضيين بيه
و انت احنا جهالج ما جاي تضحين برافد لخاطرنا ليييييش

- اني اكول لو تروحين البيت رجلج و ما تدخلين بيه احسن

-اطرديني ؟

-اكوم منج لأن العيشة كبالج ما تنطاق
كامت مني و اني فرفحت روحي، شسوي ويا هالمرة يا الله شسوي والله تعبتني

اندكت الباب قوي رحت بسرعة فتحته، طلع رافد كبالي :- امج وين ؟

-شستفاديت بزواجتك هاي مو عندك عائلة ؟

-ما الج علاقة بالموضوع
فات للبيت :- ميعاد

طلعت امي:- عيون ميعاد ، هلا برجلي و ابو بيتي هلا بحسك

رافد :- خلينا من هالكلام هسه البسي حتى اخذج

-عززااا وين تاخذني ؟

-لبيت اهلي وين يعني، مو اني اليتحكمون بيه لو يجي احد و يكله تسوي و ما تسوي و غصبا ما عليهم يرضون بزواجنا

- رفودة اني اخاف من اهلك تعبوني هواية، كلما كاموا و طعنو بشرفي و بعرضي حرام عليهم اشافو عليه و هيج يطعنون بيه ؟

ديار :- اتفرج عليهم واحد انكس من اللاخ لعبت روحي منهم اثنينهم، خابرت امجد من موبايل امي كتله تعال اخذني كال :- هسه وديتج شنو تعال طلعت اني

-لعد راح ارجع وحدي

-انتظري ابيت اهلج اني اجيج

-تره طوختها انت كلش مو وكتك
سديت الخط منه، تالي وكت جاي ديتحكم بيه تروحين و ما تروحين و هو هذا البيت شمرة عصا

باوعت امي لبست ورافد محترك دمهة يروح و يرجع بالبيت

اخذ امي و طلع، كتلها:- انتظريني امشي وياج اروح للبيت

رافد :- يلا استعجلوا ترا ما فارغ اوصل هاي و اجيب هاي

ديار :- روح لا خلفت الله عليك جاي اطلب من امي انت شنو و تحجي شدخلك

رافد : انت ادب سز و قليلة تربية

ديار :- مثل تربيتك يا قليل التربية

رافد :- تعاي هنا لج عليمن تغلطين بت الكلب

تقرب مني وكفت امي :-اووو كافي عاد فضوها يلا خل نطلع، انت لبسي حجابج بساع يلا خلصيني

درت عنه و هو يصيح و هي تهدي بيه ، طلع من البيت عصبي و هي انتظرتني، طلعت و هو يمشي كبالنا

وصلتني للبيت و هو اخذ امي و فات لبيتهم

دخلت للبيت ام امجد تلكتني :- ها ؟

- هي امي بقت ها طلعت متزوجة هي ورافد

-مو غلط تتزوج بس ليش محد يدري ؟

-منو اليدري يعني كلنا ضد.هالزواج فسووه غصب عن الكل و اتزوجو و هسه حاطينه امام الامر الواقع تقبلون تقبلون، متقبلون ركعوا راسكم بالحايط

-ابو امجد عصبي جوا فوتي

-شبيه ؟

-مو ام رافد من اخذناها للمضمد كامت تلوص و حجت عليج و على خالد و شبهتج بأمج و هو من رجعنا لحد هسة يحجي يكلي جنتي تدرين و ضامة عليه

-عزا يعني عرف

ابو امجد :- ديااار

فزيت :- ها عمو ؟

-تعالي هنا احجي وياج

مشيت للهول صاحت مها :- ديااار

ابو امجد:- شوفي مها شتريد منج بالاول و تعاي عندي حجي وياج

رحت لمها رادتني اكومها للحمام وديتها و غسلت الها و رجعتها لفراشها و لململت الغرفة و هي بيها و اني طاير عقلي بشنو راح يحجي ابو امجد و شراح يكول عني

بعدين كلت هي خربانة خربانة شيريد يحجي خل يحجي قابل اني شمسوية و اخاف.

خلصت ورحت لغرفتهم كعدت حجه اني اثق بيج و انت عشتي عدي و اعرفج و من هالسوالف بداها

اخير شي ختمها :- شنو البينج و بين خالد

كلت اله :- سولفتلك عمتي شنو اللي تريدني اضيف ع الحجي

-ليش جذيتي من البداية ونكرتي

-محد يكول اني جان عندي ماضي، احنا ولد اليوم و اني لو غلطت وياكم و بحقكم الكم حق تحاسبوني بس عمو اني ما غلطت

يمكن انت تعرف، ابو رافد رافض امي و جان رافضني و مها بت عمتي بحاجتي و امه تكوم تكعد تكلي المشوهة و باوعي بوجهج بالمرايا و ابني كمر، كرهوني بروحي تركت كلشي و قررت اتزوج امجد بس حتى اعين مها و جهالها لما يكبرون، غلطت بشي ؟

-و الرسايل و التهديدات

-اني ما اعرف منو الجاي يدز رسايل و لا اعرفه منو بس الواضح واحد من بيت اخوك شوفت عينك التقربت ما عافوني بحال المشوهة و المشوهة و التزوجت يطعنون بشرفي و يدزون رسايل يدمرون حياتي شسويتلهم ما اعرف

-منو تتوقعين من بيت ابو رافد ؟

-ع الاكثر ام رافد

باوع لام امجد :- هءا الحجي ليش اني ما ادري بيه طرطور هنا و امشين الماي من جواي ؟

ام امجد :- حشاك ابو امجد بس اني هم مثلك تفاجئت و من تحققت من الموضوع شفت فعلا بتي ما الها ذنب و حتى خالد حجيت وياه تعهدلي ما يتقرب ديار بعد و حرمت عليه من صارت مرت بت عمه يعني السالفة انتهت ليش اشغل بالك و اخلق مشاكل بينك و بين بيت اخوك قابل نهجم البيوت يا عيني
ردنا نهديها بالعقل

ومثل ما كالت ماكو احد ما عنده ماضي وهاي هي و حذرتها لو شفت عليها اقل زلة ما ارحمها لأن وثقت بيها بعد كل الصار و اللي يخون الصقة ما يستاهل الرحمة

بقى يحجي هو و اني راح امنع بيت ابو رافد يفوتون لهنا و بقى ينبهني على تصرفاتي و على اسلوبي و نصحني عىى امجد و كال ما اريد يوصله خبر.

....

بتول :- انهجم بيتنا فوك روسنا بزواج رافد ، تخربطت امي و اخذناها للمضمد ورجعناها، اجا رافد و تحاجه خالد و رافد و امي انتهت بطلعت رافد من البيت

مرت رافد ما جانت موجودة الظهر كبل لا تجي ميعاد و بسبب عركة الصبح طلعت لبيت اهلها ط، نص ساعة و رافد جاب ميعاد و رجع النا و كال

:- ميعاد مرتي على سنة الله و رسوله و اني جاي ابلغكم بقراري

ام رافد :- تفو عليك يبن بطني يالطايح حظك يبو النسوان

ابو رافد :- اسكتي يا مرة و روحي جوا يلا

رافد :- محد اله حكم عليه و يحكمني و يكلي تتزوج لو لا، و اني جبتها و جيت حتى تباركولنا، تتباركون خير على خير ما تباركولي بكيفكم

ابو رافد :- بالعافية ابني اني ما رايد ادخل بقرارك و ان شاءالله تتهنون

ام رافد :- ياااااااااااع و تباركله على هالساقطة

-خاااااالدية احترمي نفسج لا والله ارفع يمين الطلاك عليج

-و اطلكني لخاطر هاي الساقطة

رافد :- يمة المرة صارت مرتي و اليحجي عليها يحجي علية، و كلمتج مردودة الج لو انعادت ما راح امشيها على خير

كامت تصرخ امي و تتهجم على ميعاد ابوي يتعارك ويا امي، اخر شي رافد كاله:- يابه اطلع اخذ راحتك اني احلها بيناتهم

ابوي طلع و مرت رافد اجت بسيارة هي و جهالها وصلها اخوها بس ما دخل بقى بالباب

فاتت تصرخ :- يمااااتتي رافد تتزوج عليه ؟

صرخ بيها رافد و صاح :- فوك صعدي لبيتج ع السريع

-والله ما اصعد لو اني لو هاي الساقطة اليوم هنا

رافد :- اني اتزوج ساقطة بت القندرة
هم يريد يكوم عليها و اني لازمة امي تصيح و تغلط عليه و تتحسب، وكفت كباله ميعاد :- لا هيج تحرك اعصابك رفودة عوفها خطية

منى :- ابو النسوااااااان سنين و اني متحمله زينك و شينك و ما شكيت تتزوج عليه

ميعاد :- كلهم هيج يعيوني ذوله الزلم خوانه يلا ميخالف انت ام عقل الجبير

منى :- وخري انت ام الزلم بايكة رجلي

-يااا رجال طول بعرض شبوك منه

رافد.:- صعدي فوك لا اكوملج والله

منى :- تتزوج عليه رااااافد ليش ولك ليش شقصرت وياك كلي والله احرك روحي اذا ما اطلكها، هسه هنا احرك روحي

ميعاد:- عليمن يثوله تحركين روحج منو يستاهل يدفنج و يجي يتمدد بحضني و انت الخسرانه يحظج، لا تصيرين غبيه

رافد :- ميعاااااد

-عيون ميعاد

ام رافد :- شوف شوف الب**** فوك ما هاجمة بيته و تحجي بكل صلافة عين يماااي

-جاي احاول اساعد زوجي و احل مشاكله ليش هيج يا عمتي يا حبيبتي

منى:- ما ابقالك لحظة وحدة هسه ترجعني لاهلي

ميعاد:- تخيلي تروحين لاهلج ادكين و تلطمين و هو يخلاله البيت لا جهال و لا هوسة و يكضيها احي وياي، يثوله ارضي يوم الج و يوم الي و لا تكبرينها

-انت بالذات ما تحجين دايحة

-عمي متنازله يله لعيونج ليلتين الج و ليلة وحدة يمي تعرفين مشاغلي هواي بس لا تزعلين يلا يحبيبة بس لا تزعلين فضيها

رافد:- ميعاااااااد لا تدخلين شبيييج

ام رافد :- مسويتك طلي يا طلي من طاح حظك و حظي وياك من يوم الخلفتك يالمابيك حظ

-مو جاي اقنعها يا حبيبي الحياة مشاركة و لازم نتشارك على الحلوة و المرة شبيكم يا عيوني

كعدت تبجي حيل :- ليش تخوني رافد لييييش

ميعاد :- يا باع هاي الفطيرة هههههههههههههي خايبة ولج يا زلمة ما يخون اذا ما يدور طك اصبع و كيف و شقق تلكينة لازم اسبيحة و يدور مثنى و ثلاث ورباع بالختلات ، استجني و اكعدي ولج

رافد :- ميعااااد

-عيون ميعاد

-كافي و روحي للبيت

-يا فوكاها، اروح لبنيتي احسنلي شو ما عاجبكم فوك ما اهدي اوضاعكم، خليك انت ويا مريتك قنعها

راحت و رجعت :- الا حبيبي صدك تقبل اطلع تعرف بعد اني مرة بذمة رجال و التطلع بدون اذن زوجها تلعنها الملائكة و اني ما اطلع اذا ما اكول لرفودتي حبيبي

فات خالد :- انت ما تستحي على روحك ولك و مرجعها لللبيييييييت

رافد :- انت ما تدخل بالموضوع خالد ادخل اليعجبني و اطلع اليعجبني

خالد :- مكو**** مو بيت حتى ادخل اشكولاتها عدنا طلعها من البيت و بالك ادخلها مرة ثانية روح كو**** بعيد

بتول :- تخبل رافد من كلمة خالد تلازم وياه بوكسيات خالد يغلط و رافد يغلط و نفاكك بيناتهم و الصوت وصل للظالين طلعوا بالكراج يتصايحون و امي بيناتهم صايرة

اخابر على ابوي اريده يجي ماكو ابوي ما يرد، اجا عمي ضربهم اثنينهم و طردهم برا و كام يغلط عليهم :- كواو**** شهرتونا كل ساعة عركة مو بيت كاولية وين ابوكم لاهي عنكم فضحتونا استحي على انفسكم عاااد

خالد يتوعد لرافد و رافد يهدد بخالد و اخوتي صاروا نار جن ابليس و فات بيناتهم انهجم البيت فوك روسنا

ميعاد ما ندري شوكت طلعت من البيت، انهرجنا لحد ما اجا ابوي و تعارك وياه عمي و هو يكله :- لا تظل لاهي بالسوالف الما بيها خير و ما داري عن عائلتك مليت بيت اخوي و محسوب علية يومية عرس بالمنطقة بسبب ولدك، اكعد و حاسبهم و صفي امورهم
واسمعها اكلك منا و جاي ممنوع واحد من ولدك يفوت بيتي افتهمت كافي المصايب الشفناها و عوف السوالف مجودرة لا نحجي بيها

بقى يتحاجون هو و ابوي و طلع ابو امجد من البيت و هو يصيح.

ديار :- سمعت صياح و عرك ابيت ابو رافد طلعنا برا شفناهم خالد و رافد يتذابحون بيناتهم ، اجت امي و فاتت يمنا

ام امجد :- شصاير و تذابحو هيج شجاهم

ميعاد:- هذا خالد عار و طايح حظة كام يفشر عليه كبال رافد و تحاجه ويا رافد كام يغلط خالد على رافد و تعاركوا

ام امجد :- شجاه هذا خالد تخبل شو صاير كلش زايحها و ماكو لا تربية ولا اخلاق

ميعاد :- شعلينا بيهم يمعوده خلونا نفوت جوا هسه ابو امجد يحلها معدل اعرفه، ديار سويلي استكان جاي راسي كلش اذاني

ام امجد :- ميعاد لا تزعلين عليه زواجج من رافد واكف ما راهم

ميعاد :- ام امجد يا الكايم و لاطخ بسمعتي و كايل عني كذا و كذا مو من حقي اسكت حلوك العالم و اتزوج ؟ انتظرته صار اشهور يرضون بهالزواج ومحد قابل انجبر نتزوج و نكللهم عاد ابو رافد استقبل الا خالدية و ابنها واكفين بالبلعوم

ام امجد :- بيت ابو رافد ما كايم يجي من وراهم غير الاذية دفوتي فوتي

ميعاد:- ولو اني زعلانة عليج يا ام امجد لان قبل كم يوم سمعتيني كم حجاية خشنات بس يلا اني احبج و اعرف بكلبج طيب

ام امجد :- عاد قصرتي انت بلسانج دفوتي هي مصارين البطن تتعارك يا خية

ميعاد :- هم صدك ، وين صرتي ديااار راسي اءاني بنيتي

اتصل رافد
ميعاد :- يا عزا بعيني خابر رافد اكوم اشوف شبيه

ديار :- و الجاي ؟

-شربي انت و عمتج

طلعت ...وره دقيقتين فات عمي

:- ميعاد شعدها هنا ؟

ام امجد :- شافتنا واكفين بالباب نتفرج و اجت يمنا

ابو امجد :- ما اريد احد بعد يفوت للبيت فكونا من المشاكل

ام امجد :- ماكو مشاكل غير من بيت ابو رافد اخوك راجع مراهق و كارص يم مرته الثانية و ابنه يتزوج و محد يدري عنه و اللاخ طايح حظه و بس يتعارك وراجع على ميعاد

ام امجد :- صبيحة ادافعيلها انت

ام امجد :- الله فوك الراس حجي ما شفنا منها مشاكل بكد ما شفنا من بيت ابو رافد ليش نحرمها من الجية و بتها هنا ما يصير

... فات امجد للبيت

ابو امجد :- وين جنت ؟

امجد :- افتر ويا جماعتي

ابو امجد :- الوضع مو زين يا يابه ما جاي تشوف الانفجارات بكل مكان استر علينا و اكعد

امجد :- بالمنطقة يابه ما رايحين بعيد كعدنا كهوة ، يمه كومي شوية رايدج

كامت ام امجد للمطبخ، شوية ورجعت صاحتلي رحت يمها كالتلي:- رجلج يريدج

-شيريد

-يكول اريد اطلع وياها افتر نحجي شوية بس خايف مها تعرف و تنقهر فراح اكعد يمها و انت اطلعي احجي وياه و اتفاهمو بيناتكم

و اذا كعدت و سألتني عنج اكللها(ديار راحت يم امها و امجد ما ادري عنه

ماشي، صعدت بدلت ملابس الية، فات اسامة :- ها ديار

-وين جنت حيوان

-واكف ويا جماعتي براس الركن ، اشصار ويا امي ؟

-اتزوجت من رافد و خلصنا بعد مو من حقنا نحاسبها

-يعني هي ما جانت متزوجة ؟

-هي اليوم اعلنت زواجها ما ندري جانت ما جانت انت لا تكوم تتشاطر براسي اكعد بالبيت و اسكت تعبت ترا

-البيتها ما ارجع

-ولا ترجع اكعد هنا لا تبقى بس دايح برا و من تطلع تكلي كافي هاليام كايم اديح هواي

- انت وين رايحة ؟

-ويا امجد ساعة و اجي

-و عشاي ؟

- من ارجع اسويلك
طلعت .. ركبت بسيارة امجد، لاف من راس الفرع خالد جان واكف، دار وجهه بعصبية من شافنا سوا و فات للمحل

حجه امجد :- ديار اني كلت لامي نطلع وحدنا حتى نحجي و نتفاهم لان كلش متضايق من هالوضع

-على شنو نتفاهم ؟

-ديار دخت و الكعبة دخت ارد من الدوام ارجع مها مريضة جهالي بلايا ام يكسرون الخاطر و انت مو ابالج ابد غير التهديدات و الرسايل و اللي صار كله شلون نبقى هيج

-اني شنو بيدي ؟

-بنت الناس والله اني ما رايد اظلم اكدر هسه اطلكج و اجيب بمكانج وحدة ترا مو صعب بس من اطلكج شكول لله شنو ذنبها و طلكتها ؟

اني من يوم الاخذتج قررت اخليج مرة شرعية الية الج كامل الحقوق مهر و غرفة و نيشان و احترامج محفوظ بس بالمقابل هم الي حق و لا تكليلي مها هذا قرارها هي ما كلت الها اريد اتزوج ولا شكيت

ديار :- انت اللي كشيت مني

-يعني تريدين تقنعين كبالها انت جنتي رايدتني ؟

سكتت، رد حجه :- اتريدين تطلكين كليلي ننهي كبل لا تبدي ما تريدين خلينا نرسي على بر و نصلح حياتنا كافي مشاكل والله ما احب المشاكل اني هموم عائلتي كافي عليه

-اني ما شاكية منك انت الكلتلي ما اعتبرج زوجة

-عمي اتراجع بكلمتي بس خل نفضها و نعيش مثل كل اثنين متزوجين ، خر*** بالفراش ما اريد بس تفاهم كلمة حلوة البيت متوتر بسببنا

-ما عندي مانع بس قبل هاي اني حابة اروح اتعالج

-حقج بس تشوفين الوكت مناسب ؟

-شوكت اروح لعد ؟ مها حالتها ما جاي تتغير
و مو قليلة عليه تكش مني و تبتعد اني هم انسانة اتضايق و اتأثر اريد اتعالج تعبت من كلمة مشوهة

امجد :- عمي موافق بس خل نكف المشاكل و شك ما اريد اشك بيج بعد حتى لو تجيني الف رسالة راح اكذبها بس الاهم ما اريد تشككيني بيج بتصرفاتج

سكتت، وكف يم محل مال موطة جابلنا موطة و انطاني وحدة ووحدة بقت اله، بقينا نحجي بموضوع امي و من هالسوالف

.... بعدها حجيت ويا امي حتى نسافر و نتعالج .. كالتلي انطيني فرصة حتى بس اخذ اجازة و نسافر

وره اسبوع ..
خالد من بعد عركته ويا رافد سافر للاردن و دز بناته لضحى تشوفهم على ما يأمن نفسه هناك و يطلع اخته و بناته.

عركات بيت ابو رافد هدئت غصبا عنهم تقبلوا زواج امي، منى ٣ ايام زعلت عد اهلها بقت و ابوها رجعها و كايل الها :- الرجال يتزوج اثنين و ٣ و اربعه مو من حق المرة تعترض الا اذا جان مقصر بحقها، ابمرة الزينة تكابل رجلها و تصونه

فرجعت للبيت و امي ما تابت كل يومين فايته عليهم حاركة اعصابهم و طالعة و مدري شلون مسكته رافد و ما يحجي ويا يحاسبها العرفته يحبها حيل و هي هم كامت تحبه

تكول كل التزوجتهم كسروني لخاطر زوجاتهم و اهلهم و عافوني، بس رافد واجه الكل على مودي و بقى وياي
ما عافني كل يوم حبي اله يزيد و يكبر بعيني

شوية شوية كمنا نتقبل زواجهم بس اني ورافد ما نتكابل هو يموت مني و اني اشوف ابليس ولا اشوفه

جاي احاول اتأقلم ويا امجد على كد ما اكدر
هو هم خوش ولد هم ديحاول وياي يضحك يبتسملي يحجي وياي بأسلوب حلو
امه تنصحني و ابوه ينصح بيه
ويحاولون يصلحون بيناتنا

خاصة ان ابو رافد زعل ويا عمي وكامو ولدة ما يفوتولنا للبيت .. ارتاحينا شويه
على طول احسهم مراقبين تصرفاتي اسلوبي
و اني احاول ما ازل اعيش و اعوف البگلبي مضموم احتفظ بيه لنفسي

الليل صعب عليه
و اكذب لو اكول انسى
كل ليلة ذكرياتي ويا خالد تمر كبالي
ضحكنا و اغانينا و سوالفنا وليالي السهر السهرناها و احنا نحجي بالموبايل .. صعب انسى بس جاي احاول ما اخلي عاطفتي تغلب على كلبي و اهدم البنيته


اخذت امي اجازة .. وطلعنا لبيروت اني و هي و اثار اسامة ما قبل يجي ويانا ما يحجي ويا امي فأم امجد كالت :- خلوه يمنا ما عليه شي اني ادير بالي عليه بالعكس يساعدني هواي بالجهال يطلعهم يكعد وياهم

فعفناه و سافرنا
اخذتني امي لاحسن المراكز هناك شافو جسمي و اخذوا كشف كالو تحتاج عملية تجميل ليزرية تمحي اثار الحروق

بيش ؟ كل جسمي رادوه فوك ال٣٠ الف دولار
كل العدنا ١٠ ملايين !! عود امي جملت من يمها ٥ ملايين صارن ١٥

كالت نشوف غيره بس اكثر الناس نصحتنا بهذا المركز صح غالي بس نتيجته مضبوطة غير مراكز ياخذون فلوس و نتيجة بطيئة

قررت امي تسويلي نص من جسمي على اللي عدنا و من يصير عدنا بعد، سويت ادية و ركبتي و نص من رجلية .. كم جلسة

اللي بأيدي و ركبتي تحسن بشكل عجيب
كلش حبيت العلاج و شفت عليه اثار عجيبه حتى حبيت روحي من كمت اشوف ادية تعالجو و بعد ما بيهم حروك و اتخيل بعد اللي يشوفني ما ينتبه لأدية و اشوف علامات الاشمئزاز بملامحه

حيل فرحت .. بس رجلية مو كلش

رجعنا من السفر وره فترة
وصلنا الباب طلع امجد يستقبلنا، اتفاجئت سيارة خالد بالباب يعني راجع من السفر

دخلنا جوة و امجد و امه و ابوه مستقبلينا بلهفة امي طلعت للبيت بسرعة لان متفقة ويا رافد تشوفه مشتاقتله

كعدنا هوسة كلها تسال و تباوع بادية و ركبتي و يكولون كلش زين العلاج ان شاءالله بس يصير عد امجد كم فلس تكملين الباقي و تتعالجين نهائي

شوية و فاتت ضحى و بناتها للبيت سلمت علينا، اني مستغربة ما اعرف عن الاخبار هنا اي شي .. و امي ما كايلتلي بشي

تقربت مني تباوسني و تسلم :- شلونج عيوني حبيبتي اخبارج الحمدلله ع السلامة

ماكو اي ردة فعل مني، حجت :- البارحة خالد سألني عليج اذا عالجتي التشوهات البجسمج لو لا

ابتسمت الها ، حضنتني و هي تكلي :- فرحانتلج من اتعالجتي يممممه، همست بأذني رجعنا اني و خلودي و ان شاءالله بعد ماكو احد يفرقنا......

☆☆☆☆☆☆

#اتمنى_ان_افعلها

الحلقة_38

من قال له اني افتقده باللحظة التي افارقه ؟
او انني اتقلب في فراشي لأفكر به ليلا ؟
او انني اسهر باكية اكلم به ربي سرا ؟
... انا لا افكر به حتما
و هو لا يشغل تفكيري
لا يراود عقلي ماذا اكل و ما شرب
متى نام و على من أصبح
خرج او عاد لبيته سالما
... انا لا أفكر به حتما
و هو لا يهمني

حتى و ان رأيته متصلاً
اؤكد لكم ان قلبي لا تتسارع نبضاته
و جسمي لا ترتفع حرارته
و عقلي لا تتضارب افكاره
.. انا لا افكر به ابدا
و هو لا يهمني
ولا اشغل نفسي بما يتكلم و مع من ؟
يضحك او لا ..
يتذكرني ام لا ..

لا ابالي حتى و ان كلم احداهن
حتى و أن دموعي لا تتسارع لوجنتي
ولا أسرع لضم وجهي بين يدي
ولا قلبي يعتصر الما
فهو لا يعنيني صدقا
من قال انني افتقده ؟
...انا لا افكر به ابدا ..🖤

...........

خالد :- دكيت الباب طلعتلي ام ضحى ، كلت الها :السلام عليكم

-هلا عيني شرايد ؟

- ذوله البنات مشتاقات لامهم خليهم فترة يمها و ان شاءالله ابوي كل اسبوع يجيب المصرف الكم لحد ما ارجع

-ووين راح تروح

-يلا اودعناكم

-اوكف لحظة عيني اني ما الي دخل بهالموضوع تطلعلك ضحى و اتفاهم وياها

-وكفت و هي راحت تصيح ضحى، تأخرت ردت امشي،طلعتلي :- ها هلا خالد شلون

-هلا بيج، البنات جبتهن الج تشوفيهن

-وين راح تسافر ؟

-ديري بالج عليهن
التفتت حتى اروح ، صاحت وراي :- خالد بس اوكف احجي وياك شوية

باوعتلها :- شتريدين

-اصبر لحظة
فاتت جوا ، تنفخت ، وكفت منتجي ع السيارة انتدر، طلعت و طلعتلي دفتر مذكرات ديار بأديها

-شجابه يمج هذا الدفتر ؟

-منى انطتنياه رادتني افضح ديار و امها اذا رافد تزوج عليها بس اني ما سويتها ديار طيبة و ما تستاهل

-انت الجنتي الدزين الرسايل الهم ؟

-اني لو رايدة اسوي محد يدري بس اني تغيرت خالد واريد اغير حياتي و هاي جاي ارجعلك الدفتر

اخذت الدفتر منها و ردت التفت امشي كالت :- شسويت وهيج تقسي كلبك عليه مو حتى الله بكبره يسامح و انت لهسة ما سامحتني

-اني ما شايل عليج شي حتى اسامح !! بس انت ما كمتي تعنيلي شي حتى ارجعج، انت التزوجتي و عفتي بناتج ليش رايدتني بعد

-غلطت والله تعرفني غبية و اغلط وهاي تغيرت خلي نبدي صفحة جديدة و نرجع فدوة لا اطولها هواي

ابتسمت:- اني ما مطولها بس اني مسافر حتى اتزوج مو ابالي ارجع للماضي ولا اكلبه

-تتزوج منو ؟

- وحدة صديقتي سورية مستقرة بعمان حاليا

-راضية حتى لو تخليني بس على راس بناتي تتزوج شما تريد تسوي سوي والله ما احجي بعد ولا افك حلكي
بجت كبالي و هي تكلي :- والله انذليت فراك ابني من جهة و فراكك انت و بناتي من جهة و مجملني ضيم ابوي، ناخيتك والله ما الي غيرك لا تردني

-ديري بالج ع البنات، ابوي راح يوصللنهن مصرفهن كل اسبوع وصيته، مع السلامة

-خالد فدوة بس احجي وياك اوكف

صعدت سيارتي شمرت دفتر مذكرات ديار ع الكشن و مشيت ما التفتت وراي، اخذت نفس و اتنهدت
تعبت من الفات كله رايد ابدي حياة جديدة بس ما جاي اعرف منين ابدي، الاعرفه لازم اسافر حاليا و ابتعد من كلشي من ديار من اهلي من كل المشاكل الجاي تصير

وصلت بيت اهلي، دخلت صعدت لغرفتي، سديت الباب و دفتر ديار بأيدي، بقيت اگلب بيه
رجعتني المذكرات لذيج الايام الباردة
الجنت اخذها و ارجعها بأيدي
حبها الي و كلماتها و غزلها
خواطر صاغتها بحروف عربية اقرب للخيال
جنت اشوف نفسي من اقرأ خواطرها احس اني اعز شي عدها حتى اغلى من عائلتها و من كلشي
الجانت تكتب المذكرات هاي مستحيل هي نفسها ديار الوافقت على الزواج بدون ما ادري و كالتلي الخبر و خلتني وراها كل همها بس ابتعد عنها و اعوفها بحيتها

البنية الجانت تحلم بيه دخلتني لاحلامها و خلتني احلم وياها تالي شمرتني للواقع و كسرتني و ما دارتلي

كل ما كامت و كالت (ابتعد خالد خليني اعيش) الجانت تعيش بيه هسه تختنك لو مريت من يمها

بالعقل و بالجنون حاولت وياها وما رجعت
بالطيبة و بالحقارة و ما التفتت
تمر من يمي بسيارة زوجها و هو يمها و نظراتها ما بيها كل انكسار، معقوله هي نفسها الكتبت كل هذه الخواطر و المشاعر اللي بالدفتر ؟!

خليت دفترها بالجنطة مال السفر مالتي
وخليت ملابسي و نزلت بلغت ابوي اني باجر طالع من الصبح للأردن، كال :- تحتاج شي مصرف ؟

كلت اله :- لا تسلم يابه عندي خير من الله

-رايح هناك تتونس يابه لو شنو موضوعك ؟

-رايد استقر هناك

-ليش يابة و اهلك ؟

-راح اخذ بتول وياي

-سألت عيالها يرضون لو لا ؟ تره جهالها ٦ و بناتك ٣ ... ٩ انت مستعد تتحمل ١٠ نفرات بركبتك و بالاردن ؟.

- ان شاءالله ما عندي شي هناك الشغل احسن ما رايد ابقى هنا الوضع كلش تعبني، كافي خسرت ايدي
و اشرتله على ايدي المصوبة
ما اريد اتهور اكثر و تخسرني كلي

- البنية راحت لحال سبيلها

-و اني هم رايد اشوف حياتي بعيد عنكم

-الله كريم روح سافر و امن وضعك و عود الله كريم لبعدين

سلمت عليه وكمت خاف باجر اطلع من غبشة
كعدت من الصبح امي ودعتني و طلعت للأردن

طول الفترة اللي اني بعمان مذكرات ديار جانت وياي
كل يوم بالليل اكلب بيهن ليلية و اقرأ
ساعات ابتسم و ساعات انقهر و اسد الدفتر و انام
بس ارجع انطي الدفتر الديار و اخلص

جنت اعرف صديقة هنا سورية تعرفت عليها بالشام ب٢٠٠٧ وبقينا على تواصل من ذاك اليوم لهذا اليوم، ابوها مات بسبب احداث سوريا بقت هي و امها بس عايشات

اني ما فاتح موضوع الزواج بس اعرفها لو فاتحتها ما راح ترفض لان شغلها ما جاي يكفي لأن امها مريضة

تأنيت بموضوع الخطبة ما حجيت بيه كلت ما اريد استعجل احسب اموري من كل النواحي و عود اقرر.

خابرني ابوي يكلي خابرت عيال بتول على السفر و ما يقبلون، جهال ابنهم ما يردونهم يسافرون و يكولون اذا تريد تسافر خل تنطينا جهالنا و تروح الله وياها
وبتول مستحيل تقبل تنطي جهالها

احتاريت .. حتى لو اتزوجت السورية فهي موضفة و امها مريضة و اني هم اشتغل ، بناتي صغار منو الهن ؟
وحالتي المادية ما تسمح اجيب مربية !

تخربطت كل افكاري
ابالي اتزوج البنية لأن كلش محتاجة احد يساعدها بحياتها و امها مريضة وهم خوش بنية و حبابة، بس ما اكدر ابقي بناتي هنا
ولا بناتي هناك و هي هنا
شفت الموضوع كله ما راهم .. اجلته لما الله يحلها شوف شلون.

٣ اسابيع و رجعت للعراق
سولفت لأبوي كل السالفة كال :- شموازيك تتزوح سورية خلينا نخطبلك وحدة منا و استقر يا وليدي

-لا ما اريد عوفني هيج هالفترة و عود الله كريم

-زين ليش ما ترجع ضحى ؟

- ضحى ما الها رجعة الية

-هسه انت مو تريد تتزوج و حاير ابناتك وين توديهن ؟ رجع ضحى و غرفتها موجودة و بناتك عدنا ومصرفهن طالع من المحل ما عليهن شي

-و اني اظل هيج معلك ناس هنا و ناس هناك ؟ شلي بيها عوفها ؟

- اي شعندك هو شغلك تصوير تروح فترة تشتغل و ترجع و ضحى و بناتك هنا

-ضحى شايلها من بالي ما اريدها

-ليش العناد يا يابه شوف مصلحتك و مصلحة بناتك براسها مو هي الراضية ترجع بس البناتها رجعها و انت شوف حياتك وكتها ما يظل بالك على بناتك
توسلت هواي و تعذرت هواي اكلب صفحة ورجعها كافي

-كشت روحي منها بعد ما اريدها، عوفها

ابوي نامت براسه سالفة ضحى حتى امي و بتول كامن يقنعني حتى ارجعها .. شفت الاحسن الي و لبناتي ارجع امهن هي توكف عليهن
و اني اشوف حياتي بالاردن اتزوج و اشتغل هناك و كل فترة ارجع للعراق، لان شغل التصوير بالاردن هناك احسن ووارد افضل

خابرت ضحى و كلت الها ان اني مرجعج بس على مود البنات ورايد بنية هناك بالاردن اتزوج و كل فترة اجي للعراق

وافقت و كالت :- بس رجعني لبناتي و كلشي ما اريد منك

عقدت عليها شيخ ورجعتها للبيت.

..........

ديار :- صعدت فوك للغرفة احوالي كلها تخربطت
اني اتزوجت و عفته حتى يرجع لعائلته، نتضايقه مختنكة ليش ؟
عندي رغبة ابجي بس الوكت مو وكته و لو بجيت اكيد الكل راح يستغرب ليش ابجي و اني راجعة من سفر و متعالجة، بس اختنكت كلش لدرجة ما كدرت ابقى جوة

كعدت بالغرفة اضرب صفنات و اتنهد
فات امجد :- شو اشووف، كلش زين ركبتج كلش متعالجة حتى اديج ما توقعت النتيجة هيج

-اي

-شبيج ؟

-مبيه شي

-شو احسج متضايقة صاير شي

-لا

كعد يمي ، حط ايده على جتفي و جرني لحضنه :- لا تنقهرين العافية درجات و ان شاءالله بس يصير عندي اكمل الفلوس و اخليج تعالجين جسمج البقية بيهن

هزيت راسي :- ان شاءالله

-شو كلش مو على بعضج ليش ؟

-دايخة منايمة لازم ارتاح

-هاا، اي ارتاحي اني راح ابقى جوه يم الجهال

-ماشي

عافني و طلع حطيت المخدة نزلو دموعي و اني اسأل نفسي ( ليش ابجي مو هذا الردته ؟ مو ردته يشوف حياته و يبتعد عني !! شبية )

لساعتين و اني بهالحال، رجع امجد فات لغرفة
سويت نفسي نايمة ما تحركت، كعد ع السرير تقرب مني، شعري جنت لافتة كعكة سحب الكماشة من شعري و نزل شعري يلعب بيه

جسمي عصى صار خشبة من كد ما توترت
تقرب يبوس من يم ركبتي، كعدت، باوعلي :- شبيج ؟

-تعبانة ؟

-اي تعبانة ارجعي نامي

-لا خل انزل اشوف اسامة ما شفته

-ما بيه شي اسامة عوفي، ارجعي

عفته و كمت ، اتضايق هو بس ما حجه شي مشاها
حقه و اني مو حقي، بس احس كلشي مو بيدي
من تزوجت و عفت وراي كلشي شجنت متوقعة ؟
ماكو رجال يطالبني بحقة
لو عبالي كل الرياجيل مثل سلمان
لو شنو ؟

ما جاي الكى تبرير لنفسي، مشيت لغرفة احمد دكيت الباب، صاح:- فوتي

:- هلاو شلونك احمد

-هلا يابه الحمدلله ع السلامة كالو تعالجتي بالله اشوف

ابتسمتله و مديتله ايدي، حجه :- اي اي كلش زين مبروك

-الله يبارك بيك، اسامة وين ؟

-بالشغل غير !

-يا شغل هذا ؟

-مو اشتغل بالفرن عامل

-صدك !! شو ما ادري ؟

-ما اعرف هو كايللكم لو لا بس جاي يشتغل يومية من الساعة ٤ للساعة ١٢ بالليل

-حيييل شجابره ؟

-بعد هاي هو راد يشتغل

نزلت جوا، مها ضايجة كلش طالعة روحها
بالبداية فرحتلي لان تعالجت بس من شافت فرحت امجد بيه و شلون يسألني بلهفة تضايقت

سألتني :- امجد فوك ؟

-ما ادري ما شفته
ما ردت اقهرها و اكللها بغرفتي لو فوك و تكوم تتخيله بغرفتي و تنقهر فنكرت

كعدت يمها و بقيت اسولف وياها و احجيلها على سفرتنا و على لبنان ، و بعدين سألتها :- يمتى خالد رجع ضحى ؟

-صار اسبوع تقريبا

-الله يهنيهم

-بس اعتقد ما رايدها

-ليش ؟

-قبل يومين اجت ام رافد عدنا تحجي تكول يومية نلكاه نايم بالاستقبال ما راضي بيها مرجعها بس على مود بناته

-هسه ما متقبلها بعد يومين تتصلح اوضاعهم

- واوضاعج ويا امجد بعد ما تعالجتي ؟

-شبيها ؟

-راح يطلبج اكيد

-هذا اكثر شي متخوفه منه

-ليش ؟

-ما اعرف ما احب هالموضوع

-اذا هاي عادي تعاي نامي هنا يم الجهال و يمي و ابتعدي منه

باوعتلها :- ان شاءالله

ام امجد :- اجا ابو رافد و مرته حليمة كومي ديار سويلهم عصير جايين عليج يشوفونج

-اي كايمة
رحت للمطبخ خليت ٣ برتقالات بالخلاط و ثلج و سويت عصير طبيعي الهم ووديته، دخلت اتفاجئت بحليمة شلون صايرة

جارة التاتو اسود مسويته و لابسه لون بصلي و الحجاب اسود مزرف، هاي العجوز الجنت ادفعها بالعربانة وكربستها بالفرع لو غيرها ؟

سلمت عليها و باوستها و سلمت على ابو رافد و تحمدلي بالسلامة و جايبتلي حليمة هدية، عقد كرستال هو و السوار و المحبس و التراجي و كالت :- ما دام تعالجتي جبته الج تحطينة بركبتج اشتريته ب٢٥ الف والله

-مشكورة خالة رغد شلونها ؟

-زينة

-ما تزوجت ؟

-لا والله تخلص جامعة و تلحك ع الزواج

-ان شاءالله

كعدت يمي عمتي، ندستها :- هي مو جانت مريضة و نا تكوم من الفراش ؟

-الزواج بعد خوما مثلج يالعوبة

ضحكت والله هالعجايز كل البلا بيهن، فاتت ام رافد
الظاهر وصلها خبر جدو ومرته عد بيت ابو امجد
فاتت و هي تنفخ ، مرت سلمت
اجت يمي جرت ايدي :- بالله اي زين بس بعدهن مو صافيات كلش

-مو لازم تعدي فترة حتى يصفن مو هسه

-بالعافية، امج رجعت مو من هاي الطلي ابني من الصبح غابش ما شفناه لهسه الاغم

ابتسمت، ضحكت هي و راحت كعدت
بقن يسولفن و كل سالفة تحجيها حليمة تقاطعها ام رافد

و اني و عمتي شبعنا ضحك عليهن، اخر شي كالتلهن عمتي خل نفوت جوا خطية مرت امجد وحدها كاعدة

كمنا يم مها كعدنا و ذن بدال ما يسولفن ويانه كعدن يتناكرن بيناتهن هاي ووحدة واكفة على خلك اللخ شتحجي هاي ما يعجبها و تقاطعها بسالفة ثانية

اني و عمتي لازمين ابطونه من الضحك و مها تهز بمكانها و تكول :- والله ما بيه حيل اضحك

فاتت امي :- يا صلاواااااات الحبايب هنااااا ناقصجن بس اني

ام رافد :- غدي لا هلا اجا الشر

حليمة :- هلا بام ديار هلا بام الخير كله

ميعاد :- يااا هلا بيج يخية عزا شصاير بيج رادة شباب لازم ابو رافد مرجع الحيل كله

حليمة :- هو اكو احلى من ابو رافد

ام امجد كاعدة بمكانها تريد تكوم من الضحك على سوالفهن دنكت امي و هي تضحك سلمت عليها، عمتي استندت و كامت سلمت عليها

ام رافد :- اجتمعن البرابي*** من كل صوب

ميعاد :- اووي خل افل شعري ينشف متت خلصتها بس سبح اليوم

حليمة :- لعلى ابوه ما يكعد راحة

ميعاد :- هههههههي الشبل من الظهر الاسد خية

ام رافد :- ثنينهم طليان لو ما طليان ما ياخذون برابي** مثلجن

ضربتني ام امجد :- تعلمي منهن يحظي مو نازلتنا وجهج يبجي

ميعاد :- عاد ديار حطيها على يمناج باللطم، ميسبستها ع الرجال يثوله اهمداج

غصت ام امجد من الضحك و اني اريد اكوم اجيبلها مي فحطت على سوالفهن، كمت جبتلهن مي، كالت امي:- شنو ناشفة اليوم بس مي جيبيلنا عصرونية نتونس بيها

ام امجد :- دزي واحد على المحل يجيبلنا كعك ابو الدهن و سويلنا جاي

كمت للمطبخ كتبت بورقة صغيرة و انطيتها لفطومة كتلها روحي اشتريلنا من المحل

راحت واني وكفت اسوي الجاي، شوية و فاتت فطومة صحت :- وين الكعك ولج

خالد :- هذا، لا ادزيها بعد

التفتت اله، ابتسم :- الحمدلله ع السلامة برجعتكم و مبروك ع المعالجة

ابتسمت و عفت اللي بأيدي و كلت اله :- الله يسلمك يبارك بيك ان شاءالله، اجت ضحى الصبح باركتلي
متهنايين برجعتكم

خالد :- من كل گلبچ ؟

لمعت عيوني كباله :- ابو امجد و ابوك بالاستقبال

هز راسه (اي) و كال :- دفتر مذكراتج عندي ضامة من قبل لا اسافر جان يمي و نسيت انطيجياه دزيلي اسامة يجيبلجياه و ديري بالج هالمرة يضيع ما بينا حيل عبطات و مشاكل من وراه

-جان حركته من يمك

-لو اكدر اسويتها بس ما اكدر احرك نفسي و اني موجود بكل حرف بيه

- اسامة ميجي ل١٢ بالليل دزه هسه بأيد

-راح اروح اجيبه و ارجعلج ابقي هنا لبين ما اجيبلجياه

... هزيت راسي اله، باوعته و هو يمشي بطوله كبالي بالكراج ، اخذت نفس و اتنهدت ، انداريت طفيت الجاي فار زايد هسه امي ترزلني تكلي محروك

اخذت الصينية و رحت الهن حطييت الصينية كبالهن بعدهن على نفس الرنة وحدة تجر بالطول ووحدة تجر بالعرض

نزل امجد، سلم عليهن وراح سلم على ابوه و عمه، اني طلعت للمطبخ، اجا وراي :- بقى كعك ؟

-اي، تريد ؟

-صبيلي بماعون صغير و صعديلنا اني و احمد

فات خالد راد يحجي من شاف امجد، سكت، سلم على امجد ، سأل امجد :- شنو هذا الدفتر

خالد:- لا هيج مال سارة بتي مال رسم، شلونك انت

-على الله، صبينا ديار الجاي و الكعك النا اني و خالد و عمريلنا النركيلة خل نكعد بالباب

خالد :- مشكور رايد ارجع للمحل خليت مهيمن بيه اخذ راحتك

اندار باوعلي :- ديار خلي هذا الدفتر يمج عود من تجيج سارة بتي انطيهياه بس ديري بالج عليه كلش زين اذا ضاع تسويلنه مصيبة

بهالحجي امجد دار وجهه يطلع من المطبخ،كتله :- شكرا

ما حجه اندار يطلع، وكعت صوندت السنك بداخل الكاونتر سمعت صوت المي، عفت الدفر و دنكت للصوندة و صحت :- امجددددد

رجع خالد شال الدفتر خلاه جوا ايده، ودنك للسنك يعدل الصوندة و هو يهمس :- كلش اتضايق من تطلبين المساعدة من غيري

فات امجد :- شنو وكعت

خالد :- انكسرت، جيبي سطلة دا اخليها جوا بس يفرغ المي على ما تجيبون جديدة،

فاتت ضحى و شايلة بتها على جتفها سلمت ووكفت كالت :- ها شصاير هنا ؟

امجد :- دركضي جيبي سطل شبيج

ركضت للحمام و ضحى واكفة يم خالد حاطة ايدها ع الحوض حتى يوكف المي مينزل

ردت ادنك اخلي السطل سحبته ضحى مني و انطته لخالد هو خلاه و يحجي ويا امجد يدليه على واحد مفتح جديد يجيب منه و امجد يكلي

:- صعدي جيبيلي محفظتي من فوك

صعدت ركض جبتله المحفظة و اجيت، انطيته اله و هو يصيح على بته فطومه تجيبله سويج سيارة جدو

ضربني خالد بالدفتر على ايدي، و خزرني بمعنى ( اخذي ولا تشمرينه بعد ) ضحى واكفة كدامنا و تباوع

طلع خالد و اني رحت اجيب الوصلة حتى امسح الكاع

حجت :- سويلي جاي و كعك حيل مشتهيته و عود جيبي وراية رايحة اكعد

حجتها بنبرة متضايقة مني، اسلوب خالد كدامها ما جان لازم يسوي، يتصرف و كانوا هي مموجودة لما خزرني و هو يوصيني

حطيت الدفتر فوك الكاونتر،باوعت ما بقى كعك بس اللي طلبه امجد، عفت ما سويتلها بس صبيتلها جاي ووديته الها

فتت تعذرت منها :- اعذريني ما بقى كعك

حليمة:- وين العقد الكرستال الجبته الج البسي شوفيهم ذوقي شلونه والله جبته ب٢٥ الف

ابتسمتلها و كتلها :- اي هسه
طلعته ام امجد اخذته امي تباوع بيه و تكللها يخبل كلش راقي، عيوني هي الاختارت ابو رفودة تنسأل ع الذوق

شو تعاي خل البسجياه، دنكت الها لبستني وكمت اعدل بيه على صدري

ام رافد :- بالله اشوفج، مو حلو مال معدان

حليمة :- يا شمعرفج انت بالموديل وتحجين، يخبل بالعافية حبيبتي جبته ب٢٥ الف

ام رافد :- ام الذوق خية مانه عليها كلساع و كلتي جبته ب٢٥ الف ، غدي هذا الما شايف و شاف

ضحكت على سوالفهن، وحقها من جنت ويا سلمان محبس شبه ما طلع منها و هسه تجيبلي عقد ب٢٥ الف، سبحان المغير الاحوال

صاحتلي مها حتى اساعدها للحمام، رادت تكوم ما كدرت كالت خليني، بس تون متاذيه من جسمها حيل خطية

عفته و رحت للمطبخ اكمله
اجت ضحى وراي :- اي شلونج انت و امجد ان شاءالله زينين ؟

-الحمدلله

-خطية خالد لو تشوفين من رجعنا شكد مشتاقلي يكلي كل هاي السنوات اكابر حرت شسويت و شصاحبت بس حتى انساج و ما كدرت

-الله يهنيكم ان شاءالله

-يمه لو تشوفين شسوا بليلتها...... قاطعتها

-اسراركم هاي ضحى ما احب اسمعها

-ليش تتضايقين

-مو شغلة اتضايق بس من سألتيتي على حالي اني و امجد ما حجيتلج شي لان اسرارنا ما تخصج ولا اني يخصني شي باسراركم

عفته بأرادتي ما مجبورة و صارتلي كومة فرص انهي الزواج و ارجع و ما رجعت فلا تخافين ارجعله لو اريد جان رجعت من زمان، الله يهنيكم مع بعض ويهنيني اني ورجلي

درت عنها و هي تكلي :- اوكي عيني اوكي بس اعصابج شوية حسيتج تضايقتي شوية و تاكليني

اخذت نفس بقوة و تنهدت، عفت المطبخ و اخذت الدفتر من فوك الكاونتر و صعدت فوك

كعدت بغرفتي فركت وجهي، فتحت الدفتر كمت اقرأ بيه، اوووف وين رجعني ليا ذكريات لايام احلى ايام فاتت بعمري .. عمري كله ما انساهناصلا مجرد ما ذكرتهن خطرت ابالي اغنية

(يسمعني حين يراقصني كلمات ليست كالكلمات) جان يطيرني بكلامة و بخوفه عليه و حنيته، كمت اردد على الساني كلمات الاغنية و دموعي كامت تجري بهدوء كلبي اشتاق لذيج الايام احس جاي اشتم عطرهن

حسيت اكو رجلين جاية للغرفة، مسحت دموعي بسرعة و كمت اشكك بالدفتر

فات امجد :- جبتها الصوندة، هاي شبيج

-ماكو شي

-الدفتر مو وصاج عليه خالد مال بته ليش جاي تشككين بيه

-ااا نسيت ما ادري عود اني اني اشتري لبته غيره

كمت من مكاني اخذت الدفتر و نزلت جوا، حطيته ع الطباخ و حركته كله، نزل امجد وراي حتى يسوي السنك، من شاف الدفتر استغرب

:- ليش حركتي

- ااا شككته بعد ميفيد

-جان شمرتيه ليش تحركينه، شبيه الدفتر ديار

-هاي شبيك ما بيه شي دفتر عادي وحركته يعني ترا ااا ما بيها شي

امجد :- خالد ليش انطاجياه ؟

-مال بته و انطانياه

-مال بته متاكدة لو غير دفتر هددوج بيه قبل ؟

-شتقصد ؟

-كملي شغلج هسه و بعدين الله كريم

-رجعت تشك ؟

دنك :- شيلي السطل خل اثبت الصوندة

دنكت ويا كعد هو يثبت بالسنك و الحواجب متطابگة كلش مزعوج .. كمل غسل اديه و طلع من البيت

خفت بس لا شك بشي، بس هو مدام حركت الدفتر و خلصت من عنده هاهية خلصت ازمة حياتي بعد ما اهتم.

.......

امجد :- ها السلام عليكم

خالد :- وعليكم السلام بعدهم الاهل عدكم

امجد :- اي بعدهم

-زين رجعت لامور لمحاريها و تصافو ابوي و عمي

-اي، خالد اريد اسألك

-كول ؟

-شنو هذا الدفتر اللي انطيته لديار ؟

-ليش السؤال شبيه ؟

-هو اني جاي اسألك شبيه ؟

-دفتر اختها اثار و انطتهياه

-دفتر اثار لو بتك ؟

- اووو ما ادري ما متأكد هن اثنينهن يلعب ابيتنا وباقي الدفتر

-اثار صارلها فوك الشهر ويا ديار مسافرة شوكت لعبت

-تحقيق هو يا امجد دفتر عد بناتي جنت شايله و خليته عد ديار مو فد شي مهم

-اذا مو مهم ليش وصيتها عليه ؟

-اهاا تره صدك انت مو معقول، شبيك يا اخي جنت اتشاقى، صاير شي ؟

:- شفت ديار فوك جانت مثل التبجي و شككته ظن سألتها تكلي نسيت ما ادري اني اشتريلهم غيرة و نزلت حركته

- هممم
دنكت، اصفط بالحاجات اللي جوا بالميز الكزاز، رفعت راسي امجد مركز بيه :- شبيك شو تباوع بوجهي شاك بشي ؟

-ما اعرف اذا انت ضام عليه شي احجي

-شضام عليك جاي اكلك ما بيه شي

-قبل فترة وصلتني رسايل لموبايلي تخص تفتر مذكرات و هيج شي وكتها ديار كلش خافت من سمعت بهالموضوع

-اييي ؟

-شنو اي انت اكيد تعرف شي عن هاي المذكرات

-جاي اجذب عليك يعني ؟ الدفتر الانطيته لديار بيه رسم و اصبغ غير هيج ما بيه و اذا عدها مذكرات و ماضي انت ما الك خص بماضيها، اسألك عنها اليوم بيها شي وياك لا اذن خلك ليش تجيب المشاكل

-لأن بيها شي مو ما بيها حتى اقفل

-شكو ؟

-شغلات بيني و بينها

-اذا بينك و بينعا اني شكو مدخلني بالنص الدفتر اللي انطيته الديار كلشي ما بيه غير هالحجي ما عندي

سكت ما رد، طلع برا المحل صفن و رد رجع كعد، دخل مشتري يدور بالمحل و يسأل ع السعر، اجاوب و عقلي ويا امجد

بعت و باوعت لامجد :- اريد اكلك موضوع

امجد:- اي كول

خالد :- اني قررت اتزوج بالاردن

-تتزوج منو ؟

-بنية شامية احبها من زمان

-تحبها

-اي عندي علاقة بيها من زمان و هي تحبني بس رجعت ضحى خربت كلشي و انجبرت عليها و هسه رايد اطلع اتزوجها و حاير

-بشنو حاير

-يعني احس ورطت نفسي عائلة هنا و بنية احبها هناك شلون راح ترهم ما اعرف

-من شوكت عندك علاقة بوحدة سورية ؟

-من وكت الطلكت ضحى وطلعت للاردن كل هالفترة البنية متحملتني و خطية

امجد :- و شتريد تسوي ؟

خالد :- ما اعرف دايخ حجي براسي و ردت افضفضلك لا اكثر لان كل الوقت افكر بهالموضوع

امجد :- هاا، الله كريم شوف شلون ادبرها، اروح اخذ سيارتي ابدلها دهن من رخصتك

خالد :- هلا بيك
طلع، تنهدت : اخ ديار اخ ليمتى ابقى اسدسد وراج ما ادري، ادري خلصت الاماكن و تحركين كبال عينه هي ثوله.

............

مرت الأيام طبيعية هالفترة
بس مها كلش تعبت حالتها من الغيرة، حتى امجد كام ينام جوا من الجهال بس حتى ما تتأذى ولا تبجي

كم مرة تخربطت و اخذناها للمستشفى نحوللها دم
صحتها بالنازل كلش ضعفت كل ما جاي تصعب اكثر
وصلت بيها حالة بعد ما تكدر تكوم للحمام حتى لو نساعدها

جابلها امجد حفاظات مال كبار و كمت احفظها خطية حيل اتاذت و تبجي قهر من حالتها لان وصلت لهالحال
مرات تضايقني و مرات تبجيلي و توصيني على جهالها و تشهك بدموع وكوة تحجي

كلش تعبت على مودها حالتها تبجي الصخر

خلصت العطلة ورجعنا للدوام
اول يوم الدوام جنه احنا الطلاب كلش مشتاقين لبعص
واحد يسأل اللاخ على احواله و على اخباره

رزلتني عذراء لان موبايلي دوم جان طافي
كلت الها :- مو عطل و ما جبت غيره البارحة امجد جابلي موبايل جديد على مود الجامعة

بقوا يباركولي على زواجي لان هواي من الاصدقاء ميعرفون اني اتزوجت ..

اول مدخلت الكلية جنت كلش متجنبة الصداقات بس من بعد حادثة ثامر وياي و بجيت و اني الومه كلهم استخطوني و كامو يخبون يصيحولي بجمعاتهم حتى لا يحسسوني بشي و تتعقد نفسيتي

خاصة وسام جان كلبة كلب سمجة رغم هو حاد و قليل الكلام بس لما يرتاح بفد كعدة ينطلق يضحك

لاحظت مريم اديه طايبة ، فزت و هي تصرخ :- عالجتي اديج ؟

ابتسمت :- اي رحت اللبنان وتعالجت هناك

عذراء:- اي يابه لبنان و كذا مبين هالرجال ايدة كريمة

-اي خوش ولد الحمدلله

وسام :- هلووووووووو

كلها كامت ترحب بيه و يسلمون عليه و هو يسال على احوالهم و هم يسألون على احواله، رفع الهم ايده :- خاطب يابه ما اتحاجى خوما مثلكم سربتيه

كامو يصرخون و يصوفروله كمنا نباركله ، سألنا على الخطوبة كال :- والله من عمامنا خوش بنية و حلوة و صارت القسمة هي هم طالبة

مريم :- يعني مو هسه تتزوج

وسام :-، لا ما عدنا شي من نخلص جامعة نتزوج

مريم :- اي مبروك
حسيتها ضاجت، كامت من يمي، باوعت وراي، اترخصت منهم و رحت وراها

:- اكو شي ؟

-لا

-اعرف جنتي معجبة بيه

-اي بس هو ما انتبه ولا مرة

-الله كريم

دك الموبايل، اجا مسج فتحته خالد مكتوب ( اليوم بالكلية مو )

ما جاوبته سديت المبايل اجت عذراء و ميسون كعدن ويانا و يسألون ليش ابتعدنا كلنالهم :- نريد نسولف سوالف بنات مشتاقين البعض

عذراء :- اي اي كلش خلونا نطلع اليوم نفتر بالاسواق نشتري ملابس ما عندي هواية

مريم :- ما عندي فلوس بس الفين شايله

عذراء:- اني اداينج ٢٥ الف بعد بس خل نروح فدوة بنات

بقن يتفقن بيناتهم ع الطلعة، كلت الهم خل اخابر امجد اگله

مشيت على صفحة خابرت امجد :- الو

-هلو ديار

-اگلك اني راح اطلع ويا البنات نشتري شوية

-يا شارع و منو ذوله البنات

-صديقاتي

-وصديقاتج شعرف عنهن ديار

-هاي شبيك امجد دا اكولك صديقاتي وبعدين اني مو صغيرة يعني اعرف الصح من الغلط مو حلو هيج تخنكني

اخذ نفس و اتنهد :- يلا ماشي روحي و لا تتأخرين هواي، مصرف عندج ؟

-بجيزداني ١٧ الف ما احتاج شي بس ويا البنات

-تندلين ترجعين وحدج ؟ اني ما اكدر اوصلج بالدوام

-اي اي اندل

- لعد اخذي راحتج من توصلين للبيت خابريني

ماشي

... رحت ويا البنات افتر ، دخلت عذراء بمحل ملابس تقيس و احنا نكلها حلو لو لا، باوعت موبايلي رسالة ثانية جتية من خالد مكتوب بيها ( تتذكرين من جنت اوصلج )

دزيتله رساله ( اي الله يرحم ايام زمان )

دز بسرعة ( تشتاقيلهن ؟ اني كلش جاي اشتاق لذيج الايام )

طلعت عذراء :- وهذا شلونه اللبس ؟

مريم:- حلو عذراء بس امشن خل نرجع امي لو درت اني طالعة من الكلية والله تشوي على اذاني بصل

عذراء:- وهسه وين رايحة متكليلي ما صارلنا هواي من اجينا

ديار :- لا صدك بنات ترا صارلنا ٣ ساعات و احنا محاسين ع الوقت استعجلو

بقينا نلح على عذراء حتى نرجع بسرعة، وسام من شافني اني و عذراء ما عدنا خط كال اني اوصلكم

صعد مهند ويانا بالصدر و احنا ورا، وصلو عذراء و بعدين وصلوني، وصلت راس الفرع كلت اله :- هنا وسام لا تدخل الفرع، مشكور و يوم النخدمك بزواجك ان شاءالله

وسام :- انت بس تعاي لديالى انشيلج على راسنا والله

ضحكت :-، سالم راسكم ان شاءالله، مع السلامة

رفعت راسي، خالد واكف اباب المحل ، سلم عليه وسام و دار سيارته و راح ، حجه :- كلش خوش ولد وسام مو ؟

ابتسمت :- انت احسن منه

ضحك :- بنص هالحر فوتي انطيج شي بارد تشربيه

-لا يروح يشوفنا احد يمعود ما الي خلك

-هو شراب لا تخافين تعاي

دخلت للمحل :- يا يابه كلش بارد

-ارتاحي

-لا يمعود اروح للبيت

-ديار اخذي حذرج من امجد

-ليش

-اخذيها مني و بس خافي على روحج

- ان شاءالله، يلا مع السلامة وشكرا ع البيبسي

- الف عافية

رجعت للبيت بدلت ملابسي و نزلت حميتلهم الغدا و شوفت ام امجد الغراض الاشتريتهم من السوك
والتهيت بمها انظفلها و اداريها

اجا امجد صبيتله غدا تغدا و صعد نام، مها تضايقت من صعد فبقيت جوا يمها كاعدة حتى ما تضوج

ام امجد كالت رايحة لبيت ابو رافد اكعد عصرية ويا البنات، و ابو امجد طلع برا ، و مها نامت

رحت كعدت بالمطبخ مددت رجلية و اكلب بالموبايل ، شفت رسالة خالد ، ضحكت ( كتبتله اليوم شنو السالفة لازم وسام ضوجك )

دز ( شبيه وسام ليش اضوج منه )

( ما اعرف حسيتك ضجت من وصلني اليوم )

( لا ما ضجت بس اشتاق لذيج الايام )

ردت اكتب، سمعت صوت خالد برا ، عقدت حواجبي
طلعت برا فتحت الباب، خالد ديضحك ويا بناته بالباب

باوعلي، اشرلي :- ها ؟

اتعجبت ما شايل موبايل بيده و هو هسه دزلي رسالة، حجيت :- وين موبايلك ؟

:- هذا بجيبي ليش شكو

- رفعتله موبايله
تلفت منا و منا و اجا يمي:- شكو

-جاي اتراسلني و اتعجبت سمعت صوتك

-ما مراسلج

-شنو ما مراسلني ؟ هذا اسمك مكتوب و رقمك و الرسايل دا تجي منك

اخذ الموبايل :- هاي الرسايل مو اني كاتبها

- يعني شنو ؟

- يعني اكو واحد منتحل شخصيتي يريد يختبرج فوتي جوا بسرعة ....

☆☆☆☆☆☆

#اتمنى_ان_افعلها



الحلقة_39

اخذ الموبايل :- هاي الرسايل مو اني كاتبها

- يعني شنو ؟

- يعني اكو واحد منتحل شخصيتي يريد يختبرج فوتي جوا بسرعة

امجد :- ديار شجاي تسوين

التفتت وراي خالد ديطلع، وكف كبالي :- شعندج فاتحة الباب

-ما عندي شي بس سألني خالد على عمي كتله ما موجود

-ما موجود مو

ضربني راشدي قوي
لزمت خدي :- شبيك ليش تضربني ؟

لزم شعري بقوة :- واكسر راسج حيوااااانه، افتهمتييييييي، انت شنو جاي تلعبين عليه، هاااااا ، احجي ، طرطور كبالج و تجذبييييين

فات خالد للبيت على صوت الصياح شافه لازم بشعري دفعه من عندي و كاله :- شبيك تخبلت شلون تلزمها هيج

-مرتي اضربها اموتها انت اطلع برا

-احترم نفسك لا اشوه وجهك والله

امجد :- منو هذا التشوه وجه بالله

تلازموا من القمصان و يتصايحون، فزيت بيناتهم افاكك

امجد يغلط و خالد يصيح، امجد فشر على خالد
جابه بوكس على وجهه وكعه و هو يصرخ :- من تتعدى حدودك ادفنك والله ك****

كامله امجد تلازم وياه مرة لخ
محد بالبيت بس اني ومها نايمة و ذوله اثنينهم تلازموا و يتعاركون

الجهال سامعة الهوسة راكضة لبيت ابو رافد يكلولهم ، ام امجد و ام رافد اجن يصرخن و يفاككن بيهم

ام امجد جرت امجد و ام رافد سحبت خالد و اطلعه من البيت

خالد يهدد و يغلط و امجد يدفع بامه يريد يرجعله، و يغلط ، دفعت خالد برا و سديت الباب، اجا امجد
لزم شعري ووكعني للكاع

- شعندج ويااااه احجي اذا ما تحجين والله اجيب سلاحي افرغة براااااااااااسج

ام امجد :- يمه عز العزاك شجاك البنية راسها على كيفك

اني ابجي و اصيح بأيدي و اوخر بيه

رجع خالد يضرب بالباب و يصرخ :-زلممممممممة افتح الباب لا تستقووووي علييييييها

ام امجد دفعت امجد من عندي و خلتني ورا ظهرها و كامت تصيح على خالد :- روح الله لااااااا يوفقك عوفونااااااا بحالنا امشي مناااااااا

امجد عصبي و يصيح راد يفتح الباب و يطلع اله، ركضت ام امجد، لزمت الباب و هي تكله :- كافي عوفه كاااااافي عيب عليكم استحو الجوارين منا سمعت صوتنا تتعاركون جهال انتم

امجد :- روحي لهاي المشوووووهة روحي اءا ما تحجيلي هسه سعدها وياه والله العظيم السلاح افرغه براسها

ام امجد :- شصايرفهمني كلي شصاير

ام رافد تسحب بخالد و تصيح عليه ، اني فتت جوا ركضت للغرفة لميت ملابسي حطيتهن بعلاكة ، و ابجي
صعد امجد بهمة بس صوت الرجلين ع الدرج و امه تصيح عليه

فات للغرفة شافني اشيل بملابسي، سد الباب :- انت تعتقدين اخليج تروحين اذا ما حجيتيلي شعندج وياه

-اكلك انت شنو تهدد، صير سبع من صدك و فرغ اسلاحك لا تهددني و الا عوفني اروح و ابتعد

عني دفعني للكاع :- ولج تحجين شعندج وياه لوووووولا

-ما عندي مااااااا عندي شرايد مني بعد شرااااايد ، تضربني و تسحل بشعري مو حيوان عندك اني و تضربني افتهمتتتت

لزمني من ركبتي و هو يصرخ عليه :- تريدين توهميني دفتر الحركتي ما بيه سوالفج المكسرة

دفعته من عندي حيل:- عندي ما عندي انتهت وياك افتهمت

-اذبحج هنا والله و ما اخليج اطلعين

ام امجد تضرب بالباب قوي و تصيح بأمجد و خبصت الجو علينا، سحبني من جتفي حيل، ردت اوكع دفعته من عندي

كلت الك ما اكعد وخر من عندي

دفعته حيل و فتحت الباب و هو يغلط، فاتت امه تصيح :- بس كلي شصاير بس فهمني خل افتهم حتى انطيك حق لو لا

فتح الها الرسايل :- شوفي بعينج شوفي اراسلها بأسم خالد شوف شتكلي، خالد من صفحة ووسام من صفحة متزوجلي كح... وما ادري

ديار :- يعني انت الجنت تراسلني حتى تختبرني و توكعني بكلمة الحمدلله ربي ما عندي شي و اتحداك اطلع علية شي، بس بسيطة

نزلت و عفته بالغرفة، و جسمي يرجف و اسمع امه تگله :-، الرسايل ما بيها شي ما كاتبه شي اتوقع خالد ما عنده ي وياه شلون هيج ادزلها بأسم خالد مشتاق و ما مشتاق

امجد :- جابلها دفتر و كدام عيني انطاه الها و حركته و من اكللها مالمن تكلي مال بته و من اسأله مال منو هالدفتر يكلي ما اثار و اثنينهم يجذبون والله العظيم
الراسلني جان متاكد من كالي مرتك جاي تخونك ويا اقرب الناس الك ماكو غير خالد

... نزلت من عدهم ما اريد حتى اسمعهم
سمعت الباب تندك، و جهال امجد يبجون و صوت مها كوة يطلع دا تريد تعرف شصاير

عفتهم ورحت للباب، شفت من جو حذاء مرة مو رجال، رحت فتحت الباب، طلعت امي كبالي :- ها ولج خير شبيج تبجين

-فوتي

-خالد هجم عليه الباب كال روحي لبتج بسرعة محتاجتج، شصاير كليلي

-اجت رسالة على موبايل مكتوب خالد، ادخلي ذاك الموبايل و شوفي بنفسج
فاتت جوا، باوعت بالموبايل:- منو هذا ؟

-ما ادري يراسلني من الصبح بأسم خالد مكتوب بالجهاز اني عبالي خالد لما كعدت قبل شوية رديت عليه و اسمع صوت خالد برا طلع مو خالد امجد جاي يختبرني

نزلت ام امجد :- هلا ام ديار فوتي جوا

-ابنج شمسوي ابتي ضاربها مو ؟

ام امجد :- مرة و رجال لا تكبريها كولي يا الله فوتي

فاتت امي و ام امجد تخزرني افوت ، وكفت بالصالة و صاحت امي :- امجددددد لا تصيح فوك تعال و كابلني اذا بتي بيها غلط احجيلي

نزل هو الها :- ما تعرفين بتج

-اعرفها و تشرفك و تشرف راسك احجي وياي ابأدب لا تخليني ادوس بالحجي

ام امجد :- ميعاد عيب هالكلام ما يصير

ميعاد:- عرفي ابنج العيب و عود ارجعيلي
دارتلي :- ضاربج ؟ احجي متعدي عليج لا تسكتين
ازين شواربه والله اليتعده عليج

امجد :- اكسر راسها و ادفنها بكيفي اطلعي منا و لا تدخلين يلااا

ميعاد :- فدوة يكسر راسها تايهتلك بيك خير مد ايدك و شوف اذا ما خليتها تتعلك بركبتك، امشي انت اصعدي بدلي اخذج لبيتي

امجد :- ادفنها هنا كتلج و ماكو الها طلعة اذا ما تحجيلي الحقيقة كلها

ميعاد:- خليني محترمة البيت و ساكته ولا تخليني اطلعلك وجهي الثاني ابعد مني .

...امجد.بقى يترادد ويا امي و اني صعدت فوك حتى البس و انزل اروح لبيت امي، صعدت وراي ام امجد

كرصتني منززندي و تحجي بصوت ناصي :- شصاير و امجد هيج متخبل شمسوية

-كلشي مسويت رقم مكتوب عليه خالد بموبايلي يراسلني من الصبح حتى رديته اليوم شكو لان مستغربه خالد ميراسل ولا يحجي هيج كلام

-ام امجد :- يوم واحد اخذتي الموبايل صارت المصايب شلون بالله وياج ؟ الدفتر المنطيجياه خالد شنو ؟

-دفتر خواطر من زمان جان عنده انطانياه و اني حركته ظن شافني امجد احركه كام يشك

-و انت الا كباله تحركينه

-هسه جاي تلوميني كباله و ما كباله خالة اني تعبت خليني اروح و هاي هيه

-بهالسهولة تروحين ديار يمه اعقلي مو هيج الحياة ، اصبري يجي ابو امجد خابرته هسه راح يجي

-خالة الموضوع زاد عن حدة اني ما جاي ترهم وياي عيوني فاضحتني رغم والله ممسوية شي

-اذا انت لهسه تتهربين من حقوقه شلون ما يشك، شايفة مرة شهرين و ما تخلي رجلها يتقربلها شيسموها هاي ولج هو الصابر مو انت اكعدي و اسكتي

...سمعنا صووت امجد يصيح على امه
مها كايمة تبجي لأن ما رادين عليها

نزلت ام امجد تركض، و امي صعدتلي :- بس هذا الصاير احجيلي شنو سالفة الدفتر الما تخلص ؟

-انطانياه خالد و حركته و هو شاف لما حركت

-منين جابه خالد ؟ و عد منو جان

- ما ادري المهم جابه

-المهم جابه شنو ، اكو احد جان يهددنا و يدز رسايل و يفشر علينا و يطعن بينا هيج نمشيها بسهولة بس سكتوها للسالفة

-كافي يوم لخاطر ربج

-تمشين وياي لا تظلين

-ام امجد تكلي ابقي

-ضاربج و تبقين بعد يومين كل ما اجا على بالج و دمغ على راسج لان ضرب اول مرة و سكتي، معليج بامة خليني أأدبه هل بلا ادب

شصاير بينه وبين خالد هو ؟

-تمالخو كطعت روحي بس اريد افاككهم لحد ما اجت امهاتهم

-ليش؟

-يمه دنزلي خل اشوف شلون نحلها وياه

-يا فدوة نحلها شكو اخذج و غصبا عليه يبوس القنادر حتى يرجعج و اذا راد يطلك يطبه طوب لو بيه خير جان تمسك بيج .. خلصي منه

صاح ابو امجد من فوك :- ديااااااار

-اجيت عموووو

لزمتني امي :- اسمعي من يحجي وياج احجي بثقة ولا تخافين لا تحسسينهم عندج شي و خايفة خلي الحق عليهم و اغلب الحجي خليه عليه اني اتصداله، يلا انزلي

نزلت و هي شالت الجنطة مالتي وراي، و نزلت
فتت للهول ، جاي يحجي ويا امجد و امجد عصبي، من شافوني اثنينهم سكتوا، و امجد دار وجهه

ابو امجد :- شصاير ديار ؟.

ميعاد:- ابنك ما كالك شصاير يا ابو امجد يعني يراسلها بأسم ابن عمه و يكلها مشتاقلج و سوالف عيب تنحجي و فوك شينة يضربها

انطيني شسوت و ضربته

امجد :- اراسلها وواكفة ويا خالد بالباب

ديار :- لان من اندزت الرسالة صوت خالد برا اني سمعته فأستغربت ، خالد ما يدز هيج رسايل فطلعت ردت احجي وياه اجيت انت

ميعاد:- اسمع ابو امجد الشاهد الله اني احبكم و اودكم بس سوالف ابنك ما اكدر اتحملهن من يلزم بتي و يضربها و هاك شوفة عينك جارها من شعرها لو مضروب راسها و صاير بيها شي اني بيمن ربحي ؟

ابو امجد :- شنو سالفة الدفتر

ميعاد :-، عاد لا تحطون سالفة الدفتر حجة، دفتر و حركته و راح ولى لو يعز عليها و تريده ما حركته كافي عاد طوختوها طلعت من ماعونها ادورون بكل سالفة مطلعيلكم انه

ابو امجد :- ام ديار الحجي اخذ و عطا خل نسمع منهم اثنينهم

ميعاد:- شتحجي بعد العدها حجتها ابن غلطان ابو امجد ميستحي يراسل مرته بصفته ابن عمه

امجد :- احترمي نفسج مو اني التكليلي ما تستحي افتهمتي لو لااااا

ميعاد:- لا ما تستحي ولو تستحي ما تسويها تشك بيها طلكها ما واكفة عليك

ابو امجد :- راح يبقى الحجي مصايح و كلشي ما نفتهم ام ديار بس اهدي خل نعرف نتفاهم يا يابه

-شنتفاهم بعد ما جره لراس بتي و ضربها جاي نتفاهم، اني هم ادز عمامها يكتلونه و عود وراها اكلك خل نكعد نتفاهم تقبل ؟ لو تسووها عشاير و تكلبوها فوك روسنا، شو على بزركم كلشي ما تقبلون و على بتي واحدكم مسلط تسلط

امجد :- اي دكليلها بتج شعدها جايه ويا صاحبها

ابو امجد :- امجددددددد احترم نفسك

-يابه تجي ويا ولد و اني ما ادري

ديار:- انت الكتلي ارجعي وحدج اني ما اكدر اجيج، يعني لو صعدت ويا تكسي ورجال غريب عادي و من اصعد ويا ولد زميلي اعرفه و اعرف اخلاقه يوصلني و يوصل زميلاتي الباقيات ما يصير .

ميعاد :- ما هتمة الرجال الغريب يمه هو بس يريدله واحد يتهمج وياه ما خلا واحد وما كال ديار عدها علاقة ويا لو يعرف العيب ما تهم مرته و سوه هالسوالف هاي، كومي يلا

اخذت الجنطة و سحبتي امجد ظل يصيح و ابو امجد يبعد بيه و ام امجد تحجي ويا امي و تكلها :- لا تكبريها مرة و رجال كلشي يصير بيناتهم

ميعاد :- لو سوالف عادية ما تحجي مو يختبرها يريد وكعها و يتهمها بشرفها و يكتلها واسكت لا والله ما اسكت

ام امجد :- شلون ما تردينه يشك وبتج مانعته منها

ميعاد :- والله اسألي ابنج شايفتلج رجال شهرين مرة تعصى عليه و ما يكدر ياخذها

ام امجد :- يااا يعني طلع ابني المو رجال لأن ما يريد يجبرها و يأذيها

ميعاد:- ام امجد حبيبة الله شاهد اني احبكم بس بتي تعبت، على الله جاي تتحسن و انت كلش زين تعرفين حالتها النفسية شنو كافي عيوني كافي ما اعول بتي اطيب، امشي كبالي امشي يلا

اخذتني و طلعنا من بيت ابو امجد، رادت تفوت للبيت كالت :- لا تعاي نفوت لاسامة للفرن حتى ما يروح لبيت ابو امجد من يرجع

الفرن يصير بصف اسواق بيت ابو رافد، باوعت رائد كاعد بالمحل، مرينا منه و رحنا للفرن، طلعت الف و كالتله :- يحلو نريد بألف صمون

اسامة باوعلها هو ما يحجي وياها، ابتسم و هو حاول يخفي ابتسامته، جمع الها صمون خاله الها بالعلاكة انطته الالف كاللها :- ما اريد اني ادفع

ميعاد:- خليها بجيبك، اسمعني من ترجع من الشغل تعال البيتنا لا تروح لبيت ابو امجد

اسامة :- شصاير ديار شكو ؟

ديار :- تعاركنا اني و امجد

هز راسه وكال :- روحو منا صحباني عيب

ضحكت امي و اندارت تمشي، صعدت على دكات المحل تريد تفوت، كلت الها :- شعندج فايتتلهم ؟

-دتعاي خل ناخذ النا فد كم حلواية نسلس بيهن عصرونية طاكة ارواحنا

فاتت و اني وكفت اباب المحل مفتت، سألته على ابو رافد وينه كاللها :- طالع ما موجود بالبيت ، شصار ابيت عمي ؟

-كول لاخوك الا شوية جان اطلكت بتي من وراه

لمت الها فد علاكة حلويات وعصاير باردة و كالتله :-سجلهن على رافد عود، ما شايله وياي
طلعت من عنده و هو يهز بأيده

لفيينا ورجعنا للبيت، اول ما فتنا للبيت و اثار ناطة من البجي شلون امي عايفتها وحدة و سادة الباب مكسرة المواعين مال الغدا و شامرة الصينية بالزبالة و خابصة البيت خبص

امي فاتت باوعت ع البيت و هاي تكمز، لزمتها بالنعال وين اليوجعها و تصيح وراها :- تعاي النمرة تعاي اليوم اتغدى و اتعشى بيج

وذيج ما همها السانها شطوله حتى النعال ما فاد بيها، كمت نظفت البيت و لملمت و امي صاحت :-خليلنا الحلويات بصينية و جيبي النا ناكل و الا هالعايقة هاي ما انطيها عقاب وياها دشوف شلون تهجم البيت بعد من اطلع

سويت الجايبته بصينية حلويات تطلع فوك ال٧ الاف انواع و اشكال و عصاير باردة و جبتها ، اثار كعدت اول وحدة

ميعاد:- كومي انت العايقة كومي

اثار :- هليوووو والله انتم تكومون هذا كله الي

مدت امي طولها للنعال تلكته و نيشنته براسها، و هاي كامت تصرخ و تضرب بالباب خبصتنا، صحت بيها :- يمعودة دعوفيها والله دايخة و ما الي خلك، تعاي انت اتزقنبي وبلا صوت

اجت اثار تاكل ، و امي تخزر بيها، اندارتلي و هي تكلي:- وسام هذا منو ؟

-صديق وياي بالكلية

-شعنده وياج ؟

-كلشي ما عنده اصلا خاطب بس خالد يكرهه و شكك امجد بيه

-انت شنو رايدة تطلكين منه ؟

- لا ، ولا رايدة ابقى وياه .. خالد شكد ما اكول انساه ما جاي اكدر ، و ما اكدر اطلك و اعيش و خالد هنا ارجعله لا محالة و مستحيل ارضى ارجع لخالد و هو متزوج ما اتحمل

-كل كلامج خالد يعني سبب بقائج ويا امجد خالد ؟

-شي على شي يجمع، الصراحة امجد صح يشك بس حباب لا مقصر علية بمصرف ولا جابرني على اي شي ماكو رجال يتحمل كل هالمدة و يسكت بس هو سكت، غير ان اهله ناس طيبين محد بيهم يسمعني حجاية ولا احد يضوجني، غير حالة مها الما اكدر اعوفها ولا اعوف جهالها ما ينطيني كلبي، بس المشكلة اللي بحياتي خالد لا اكدر انساه ولا اكدر ارجعله ولهذا ما اعرف مترددة.

ميعاد:- الله كريم ارتاحي هنا وريحي بالج منهم

انفتح الباب و فات رافد للبيت، شافني كاعدة، حجه :- مرتاحة هيج من عالكة ناس بناس وكاعدة تاكلين هنا ديار ؟

ميعاد:- وليش عيوني ترد على بتي ؟

-من وراها علك امجد و خالد و هسه ابوي و عمي تحاجو من وراها ما ناوية تفكين من خالد انت

ديار :- انت معليك لا تدخل ولا تحاول تسويلي نفسك الأب النصوح و هالسوالف لأن ما اطيقك

رافد :- انت و النعال اطيقين لو لا اخوي ابتعدي منه عوفي لمرته و عائلته

-النعال يلوكلك افتهمت لا تتجاوز

ميعاد:- هاااا يمعوديييييين ، انجبي انت ادب سز لا تغلطين على الاكبر منج فوتي جوا يلا

هو كام يصيح و يغلط ردته اني و ظلت تصيح عليه حتى افوت جوا ، كمت من مكاني و كلت الها :- كليله الرجلج المحترم مرة لخ لا يدخل بيه ولا يطخ السانة وياي لاني ما احبه ولا احترمه

هد راد يكوملي هي كامت قبلي لزمته و ظلت تغلط عليه، فتت جوا و عفتهم :- شلون شكول شكد اكره طايح الحظ

كعدت اكلب بموبايلي و بالرسايل الدزهن امجد بأعتباره خالد، هسه يلا انتبهت فعلا صيغة الكلام تختلف ابد ما يشبه خالد شبيه اختلطت عندي

بعدين منين جاب رقم خالد و راسلني منه ؟
باوعت بالرقم اتأكدت منه مو رقم خالد هذا بس نهايته 66 مثله و مفتاح الخط اسياسيل و الارقام ٥ البقية ما تشبه رقم خالد ابد ، بس امجد كاتب عليه خالد و الرقم ما يطلع بالموبايل بس الاسم

شلون استغباني، هم زين الله ما طالع مني ولا حرف غلط لو فالته بكلمة جان رخت بيها من صدك

فاتت اثار، اتمددت و هي تفكر وضايجة، حجيت :- شبيج اثار ؟

-اريد اتزوج

صفنت بيها :- ولج انت ليش ما تستحين بس الله يستر من تكبرين شتسوين بينا، عيب هالكلام

-شنو عيب ماما من اتزوجت مو كالت اني ما مسويه عيب اتزوجت بس اني عيب

-ماما جبيرة انت صغيرة ادب سز مرة لخ لتعيدين هالكلام

كامت من مكانها و اجت يمي:- اكلج شي و ما تحجين ؟

-شنو ؟

شاورتني :- اني احب مهيمن

بعدت راسي منها و باوعتلها :- يا مهيمن

-ابن رافد زوج ماما

باوعتلها مستغربة :- ولج يمعزاية وينج وين الحب بعدج بكد فردة النعال شنو هالحجي

-مو هو اليوم من رحنا للمدرسة

- اييييي ؟

- انطاني هدية

-شنو ؟

-اجيبها الج ؟

-بالله شوفيني

راحت ركضت كدامي و اني صفنت وراها ، بعدين ضحكت من كل كلبي، دخلت بموجة ضحك وحدي، فاتت امي :- خير اللهم يجعله خير عليمن تضحكين

-على اثار تكلي احب مهيمن

-شفتي بالله النوب هاي اني شحطلها و تطيب

-ما جاي اضحك على اثار اني اتخيل شكل ام رافد من تعرف مهيمن يحب اثار و منطيها هدية

ميعاد:- حرام الا تستأجرلها ارهابي يفخخ روحه بنص بيتنا و تخلص من عدنا فد دور

ضحكت حيل، و هي كامت تضحك فاتت اثار انطتني مداليا قلب الحب بيها زئبق احمر و قلب الحب و لمع

:- دباعي هسه هاي البكد الفصمة وينها وين الحب ؟ اسمعي لج مرة لخ اذا مشيت وياه لو رحتي يمه تنكتلين

اثار :- ايوووو احنا نريد نتزوج

ميعاد:- انهجم راسج كون ولج يا زواج

اثار:- مثلج انت و رافودة

ديار:- انوب حتى اسم الدلع ماخذته منج، ماما لخاطر الله انتبهي لتصرفاتج تره هاي شتشوف منج تقلدج

ميعاد:- هي طايحة الحظ غير رجلي و ادلعه لا مخليتها يمنا و لا جايه يمها

-هي وين تنام ؟

-جوا هنا و احنه فوك

-ما تخاف وحدها

-لا انومها و اصعد

-هاي شيطانه جاي تنتبه كل تحركاتج، مو مثلي من جنت اشوف عمايلج لو عمايل الخنزير ابوي اكش و اتضايق و ابجي

ميعاد"- اححح راح تكعد تعيرنا

-فكرج سهل انسى كل الشفته و اني صغيرة تدؤون سببتولي عقدة

-شكد تحبين تكلبين بالماضي اوووي اكوم رفودة احسنلي

-بعدة هنا

-اي تمدد يلعب بالموبايل اكوم يمه

كامت من يمي و اني كعدت اباوع بكتب اثار هي داومت قبلي بيومين لأن مدرسة ، مستلمة كل الكتب بس ما مجلدتهن

كلت الها كومي نروح اني وياج نشتري جلادات
و هم نتمشى صار دنيا المغرب و الناس دخلت للبيوت ماكو هوسة

اثار :- اييي واخيرا راح افتر بالشارع

ضحكت :- دكومي كومي

لبست ملابسها و اني لبست و صحت على امي كلت الها:- راح نتمشى اني واثار نجيب جلادات

ما سمعت، اخذت اثار و طلعنا، ما رحت لمحل بيت ابو رافد ما اريدهم ما عايزني مشاكل، التفيت و حتى ما باوعت وراي منو موجود بالمحل

طلعنا نتمشا براس الشارع مناك هم اكو محل، فتمشينا الفرع كله، سيارة خالد ما جانت موجودة بالباب، كملت مشي فتنا اشترينا الاختارتهن و طلعنا

طلعت سيارة امجد كبالي، شافني و نزل ، اجا :- توقعتج هسه ابيت امج ميته من البجي لان ضاربج و طاعن بيج

-الشفته بحياتي هواي اكثر و اصعب من مشكلتي هاي، فما كامت تضوجني و تاخذ من وقتي هواي و اكعد اتاثر و ابجي تعبت

-شعندج طالعة ؟ بعدج على ذمتي ما اقبل اطلعين بكيفج

اثار :- لا رحنا اني وياها نجيب جلادات هواي حتى تجلدلي كتبي

ديار :- جاوبتك

باوعلها، رجع حجه وياي بأستهزاء:- المحل بصفج جان اشتريتي منه

-ما اريدهم و لا اريد اشتري منهم ما عايزة مشاكل

-تريدين تبينيلي انت ما عندج شي ؟

-امجد تصدك بكيفك ما تصدك هم بكيفك مع السلامة

عفته و رجعت للبيت دخلت الغرفة و كعدت اجلد بكتب اثار و ادرسها الواجب ...

لليل اجا اسامة ب١٢ اني فارشة و اثار نايمة و راافد و امي فوك نايمين ، دك الباب طلعت فتحت اله، انطاني علاكة صمون اليزود يوزعونه بيناتهم

حجه :- امي وينها ؟

-فوك نايمة

-هذا يمها

-اي

-لعد خل ارجع انام بالفرن احسن

-وين وين اسامة دفوت

-ما اتحملهم خل اروح ديار

-اسامه لا تكبرها هو رجلها بالشرع و القانون مو غريب و كاعد بالبيت، بالعكس مدامها متزوجة محد راح يعيرنا بيها ولا يحجي بس من هي مطلكة و تفتر يوميه كدام الرايح و الجاي بسيارتها يكوم يا اليجي و لاطخ بينا كلمة و يسمعنا

-شنو تريديني اقنع بزواجهم

-اسامة اتادب عاد و فوت القنعت و الما قنعت هم اتزوجو و انتهت

طنكر الا يطلع، غصب عنه دخلته جوا ، هو تعبان و شاف الغرفة باردة تمدد بفراشه كبل

دنكت بست و اني امرغله جسمه :- تعبان حبيبي

-اي و باجر وراي مدرسة

-ممجبور هيج تتعبتطلع من ال٧ للدوام تروح للفرن ما ترجع الا ب١٢ بالليل

-لا مجبور

-شكو شعندك ترا اني وياك

كام وكعد على حيله:- بيت ابو امجد و بيت امي اثنينهن كمت احس بيهن بالذل من ابقى بيهن

-ليش هناك شناقصك

-ما ناقصني شي هم خوش ناس بس اني ما احب
حتى من عشت وياج بكربلاء جنت اطلع اشتغل ويا سلمان حتى لا يعيرني
ومن كالي خالد ع الشغل نبهني و كيفت اتعب ولا اكعد حمل على غيري

-خالد شعليه

-هو الكالي اشتغل و لا تكعد بمنية احد

-هاي شوكت

-من فتحوا الفرن ابو الفرن صاحبه و كالي راح احجيلك وياه و اشتغل

-خالد

-كالي اشتغل و اصرف على نفسك و على اختك و ارفع راسك و راس اختك احسن مما كاعد و هي تصرف عليك و الناس تشوفك بالعين الصغيرة
اختك ما الها سند غيرك خليها تفتخر بيك
مو تطلب من الناس حتى تنطيك

ابتسمت تقربت منه و حضنته، ابتعد مني :- ديار شلون اذا اطلكتي ؟ اني ما اكعد عد امي

-الله كريم

- ناجر بيت اني وياج ونعيش

-شناجر ولك كل يوميتك ١٠ يعني شهريتك ٣٠٠ الف وين تكفينا

-لو اعيش بالشارع و ما اعيش ويا امي

-هسه انت متحزم من هسه دكول يا الله، نام ارتاح نام

تمدد بالفراش سألته :- تريد عشا

هز راسه و هو نايم بمعنى (لا )

... نمت يمهم و اني افكر بحياتي
منين ما اجيبها ما ترهم وياي، كلت اتزوج حتى انسا خالد و اخلي يشوف حياته، تزوجت و هو رجع مرته ولا اني الناسيته ولا هو الشايف حياته شكد ما نكول نبتعد نلكى نفسنا كبال بعض

ما اعرف شلون اخلص من هالموضوع كلش تعبت منه
دزلي خالد رسالة ( شصار وياج بالي يمج ) ما رديت
لازم اخذ قرار .. يا اعوف امجد و اشوف حياتي يا ابقى وياه و ابتعد عن خالد ابتعاد كلي

ثاني يوم اخذتني امي بسيارتها حتى توصلني
شافت رائد بالطريق، حجت وياه :- خالة ليش ما تلزم كلية ديار خط ؟ ما دامك اشتريتلك كيا و الله وفقك

رائد:- هلا ام ديار، والله جاي اخذ ابتدائية

ميعاد :- صارلك يومين اخذتهن ؟ الكلية احسن الك ترا كل طالبة ٧٥ الف احسن من دوخت الجهال و جيب وودي

بقى صافن الولد بوجهه و كاللها :- اي احسن صح بس بعد لزمت خط و التمو الطلاب راح يكتمل العدد

ميعاد:- اعتذر منهم انت شاب و على وجه زواج مو مال مستحى

رائد :- ارجعلج جواب ان شاءالله

سلمت عليه و فاتت بسيارتها :- ما اريد رائد ماما عوفيني اني الكا اشتراك

ما ردت عليه، وصلتني للكلية و طلعت لدوامها
مهند و حسام شافوني نزلت من سيارة امي، انتبهو، من فتت للكلية، اجو ورايا كالو :- منو النزلتي من سيارتها، اختج ؟

-لا امي ليش

مهند :- دكولي والله ؟

-اي والله شبيكم

-كولي غيرها مبينه اصغر منج

-هي تحب تعتني بنفسها هواي

-شتشتغل و هيج عدها سيارة عالية ؟

- بالمالية

حسام:- متزوجة لو لا

-اي متزوجة و زوجها يصير ابن عم زوجي و تحبه حيل بعد اكو سؤال لخ لو اروح ؟

ضحكوا :- مو قصدنا شي والله بس هيج حبينا نستفسر الله يخليها الج مبينه مثقفة

كلت الهم :- شكرا
ومشيت منهم، اصغر مني اشافوني عجوز و يكلولي مبينه اصغر مني، شبيه يعني اني شناقصني حتى التشوه عالجته يعني شبيه

رحت للحمامات ما تحملت اباوع بوجهي تعبان وهالات سودا جوا عيني فضيعة من قلة النوم و القهر
لا بعمري حطيت خيار على وجهي مثلها و لا كريمات
الله ينطي الصابونه التمر على وجهي يومية تغسله الا لو ما الصابونه هم ما اغسله

لازم اعتني بنفسي شنو مبينه امي اصغر مني

رحت حضرت جميع محاضرات اليوم ولا فوتت وحدة وولا وحدة منتبهتله يا افكر بمشاكلي يا بأسامة لو تمر على بالي العرمة اثار و اضحك لو اتذكر كلام مهند و حسام على امي و ابقى افكر شلون اعتني بروحي

رجعت للبيت اثار هسه جاية تريد غديتها و كعدنا سوا جوا نقرأ، اجت امي من الدوام و رافد هم اجا و صعدوا فوك ..

هو يوم يم مرته الاولى و يوم يم امي بس من يجي من الدوام يجي لبيت امي لأن ماكو هوسة بس لثار و ما عدها احد تلعب وياه اغلب الاوقات لو تروح تلعب وتقرأ ويا بنات خالد لو تلعب وحدها او تكمل واجباتها لو ع التلفزيون يعني البيت كلش هدوء فيجي هتا يرتاح للعصر يروح لبيته

تقريبا الساعة ٤ اني متمددة و اثار يمي تباوع على سبيستون، اندكت الباب، كلت الها :- اثار اكلعي شوفي منو ما بيه اكوم

راحت و اجتي، كعدت ع التلفزيون :-، منو ؟

-خالد

-فزيت من مكاني :- خالد !!! شعنده جاي و شلون يجي، المن ؟

-ما ادري

ملتهيه تباوع ريمي ما مركزة وياي، كمت من يمها بسرعة طلعت للهول، صدك خالد :- هاي شعندك هنا

خالد :- و عليكم للسلام ورحمة الله و بركاته

ابتسمت:- لا صدك شعندك هنا لا يروح احد يشوفك

-ويشوف ما فايت ابيت غريب، بيت اخوي و هو الجاي يدفع ايجاره و اخوي موجود فوك ما داخل بغيابه حتى احد يحجي

-لا بالله

- زين احوالي شكرا على سؤالج

-المن اجيت

-لا شكرا ما اريد غدة لا تكلفين نفسج

ضحكت :- هاي شبيك

باوعلي :- البيه انت ، ابو ابويه احترك البارحة بس اريد اعرف اخبارج ماكو و من ادزلج رسالة ما تكلفين روحج و اطمنيني

- ما بيج حيل مشاكل و من توكعين بالمشكلة فدوة خالد ساعدني

-تعيرني ؟

- لا بس اسلوبج وياي كلش صاير يغث

-انت مو رجعت مرتك لو تروح الها احسن

- هالموضوع لا تدخلين بيه

-اي لعد انت هم لا تدخل بحياتي

-هيج صارت ؟

- اي

-كام من مكانه :-ابوي و امي و رافد الفوك و عمي و كل اهلي و عمامي يتعاركون وياي حتى ابتعد و اني كل الهامني اعرف انت شلونج ومحد مأذيج، ولج من صدك اني هاين روحي وياج و انت ما يغزر بعينج شي

سكتت ، حجه :- عايفلي مرة تتوسل مني الكلمة و جاي تابع وحدة تستحسف ترد عليه بكلمة و تجاوبني من صدك اني غبي

-حشاك بس ابتعد مني خالد خليني....

قاطعني :- خليني اعيش خالد، خليني ارتاح خااالد، ابتعد خالد روح خالد، ولي خااااالد
هذا بس اليطلع منج مووووو ؟

نزل رافد :- هاي شكو خالد

خالد :- من انعل اليوم الصار بيه خالد و تورط بهيج انسانه حقيرة

نزلت امي :- هم زين اجيت اريد احجي وياك

خالد :-، انت بالذات ما اريد اشوفج

راد يطلع وكفت كباله :- لا عيوني خلودة مو على كيفك منين اخذت الدفتر و منو جان يهددنا

-رافد ابعدها من طريقي

رافد :- انت بيك شي ترا مو صاحي انت

ميعاد:- انتظر جوابك يلا منو الاخذ الدفتر ؟

وخر من جانبها ، صاحت وراه :- بتي اتزوجت حس على روحك و ابتعد منها

صاح :- تتهنى ويا

وضرب الباب وراه
اخذت نفس تنهدت و فتت للغرفة ابجي
شكد صعب الاتمناه ابعده بنفسي
يحترك و يحاجيني بعتب و ما اكدر انطق و اخليه يتأمل .. ياربي ساعدني انساه

لليل .. اجا احمد جاب جهال امجد يمنا لأن مها تخرطت كلش و نقلوها للمستشفى و ام امجد وياها و محد بالبيت ويا الجهال فجابوهم يمي

وكلتهم و بدلت الهم وكعدو يلعبون ويا اثار شوية و نومتهم خابرت عمتي حتى اطمن على مها كالت كلش حالتها بالنازل درنالها دم لان دمها موشل

بقت هي تحجيلي حالتها و اني ابجي
كالتلي :- اذا تكدرين تعاي بدالي باجر هنا البيت فارغ و اني رجليه ما يساعدني على وكفت المستشفى

كلت الها :- بعيني باجر اخلص دوامي واجيج

حجت :- اداومين و الجهال ؟

-ما ادري بس لازم اداوم عندي محاضرة كلش مهمة

-يلا عود عوفيهم يم عمج لبين ما ارجع

-ما اطول اني اول محاضرة و اجيج

-ان شاءالله بنيتي ديري بالج ع الجهال

-بعيني

خليتهم يمي و ثاني يوم وديتهم لعمي و طلعت للكلية، اول محاضرة و تعذرت رحت للمستشفى تبادلت ويا ام امجد

امجد جان بالدوام، للمغرب يلا اجا، ما يحجي وياي داير وجهه عني ما اهتميتله ، حاول يحجي ويا مها راد
مها فاقدة ما حاسة بأي احد

جاب النا صندوك مي و نفر كباب و صمون وراح بالانتظار كعد خاف نحتاج شي
ما اشتهيت شي لان قبل شوية وحدة من اللي بالردهة انطتني بسكت و باكيت عصير جزت نفسي بعد

نايمة بمكاني تقريبا الساعة ٣ ومر مثل الطيف كبالي
كأنو مها كامة على حيلها و مرت من كدام عيوني تمشي و تباوعلي

فزيت من نومي بسرعة باوعتها هي كبالي، تشهك بقوة و مفتحه عيونها حيل كمت يمها مفزوعه و ما حاسة على روحي

لزمت ايدها :- مهاوي حبيبتي
كامت تشهك بقوة و تباوعلي، لزمتني عصرت ايدي حيل حسيت ايدي راح تتكسر بأيدها على قوة القبضة و هي تشهك بقوة

تحاول تنطق و اني اقرأ الفاتحة و القران و اهدي بيها و ارفع بصوتي حتى اللي بالردهة يكعدن، كعدت كم وحدة كامن يلبسن حتى يطلعن يشوفن ممرض

نطقت و هي شاهكة عيونها حيل و تجالع، نطقت كلمة وحدة بس ( جهالي ) حجتها و ايدها رخت من ايدي

صرخت من كل كلبي :- مهااااااااا لا مهاااااا اكعدي مهااااا

اباوعها عيونها وكفن و هن مفتحات على حيلهن
ماتت
اخذتها بحضني حيل و صرخت من كل كلبي :- مهاااااااااااااا ...

☆☆☆☆☆☆☆☆