#الثور اذكياء يميلون للذكاء الحسابي واللغوي و الفلسفه.

‏⁧#الدلو⁩ "قضيت أيامًا دون أن يعلم أحد بما أشعر به، مرت سنين طوال ولم يلمح خرابي حتى أعز أصدقائي" 💖

‏ان كنت ذو شخصيه وقحه ، انانيه ، وتمتلك صوت عالي ومزعج فلا تفكر بتكوين علاقه مع ‎#الجدي !

#العذراء لو حب مليون شخص طبيعي ينساهم كلهم إلا الحب الاول والاخير..

‏#الاسد متناقض يخليك صعب تفهمه.

‏برج ‎#القوس يسمى ايضاً ببرج الحظ لانه من أجمل الأبراج النّارية وأكثرها حظاً.

‏#الحوت يكدر انه يسوي الي يريده بس مشكله ذابحه الكسل🙂.

#اتمنى_ان_افعلها


الحلقة_32

كنخلة شامخة بوجه السنين
اصابها ما اصابها من حر وبرد
عصف و ريح يدفع بها حيثما يشاء
فتظل صامدة، تسند نفسها بنفسها
وفي ليلة صافية قررت ان تسقط !!
من عصفورٍ صغيرٌ وقف على سعفها
لا احد يسأل عن تلك السنين التي صمدت بها
وما الذي دفعها الى السقوط ؟!
فهي سقطت اثر وقفة عصفور !
الا ان حنينها الى ارضها لا زال قائما
تذبل و تموت دونه كل يوم.

خالد:- ديااااااار

التفتت وراي اباوع و امجد واكف اباب الصالة، فات للبيت خالد باوع لأمجد .. ضحى واكفة

:- الف مبروك ان شاءالله اتمنالكم السعادة

امجد :- مشكور حبيبي ابو الوليد

خالد :- سويتولي واهس للزواج

امجد :- هههههه يلا توكل و فرحنا اول واحد يطير بهالخبر عمي

ضحى فرحت من يمها، اني انعصر گلبي اخذت نفس و تنهدت ردت اروح و هو يكول لامجد :- عندي صديقة سورية اعرفها من زمان كلش خوش بنية خطية الاحداث مو زينة بسوريا واريد اسافر هالايام

امجد :- لا تكلي تتزوج سورية !!

خالد :- لعد شعبالك، ما ادور عراقية بعد جزت

ضحك امجد وضرب على جتفه و هو يكله :- يمولعهم يولد

يقصد ضحى، اني بقيت واكفة متصنمة بمكاني !!
واني ضحيت بروحي و بسعادتي و ابتعدت عنه حتى يتزوج سورية !! زين وبناته ؟

ضحى ضاجت و طلعت من البيت كله

خالد :- طلعت وره ضحى و امجد فات جوا ... صحت : اسمعيييي

دارت وجها ، مشيت وكفت يمها :- اذا متوقعة بعد المذلة الافلام السويتيها و فرفرتج على هذا وذاك ارجعج فتكونين غلطانة، و اذا في يوم طك بمزاجي و قررت ارجعج فترجعين خدامة جوا رجلين بناتي بس مو قبل ما اتزوج اللي اني اختارها

ضحى :- اني شسويتلك و هيج ما تريدني

-لازم نسيتي شسويتي ؟
يحتاح اذكرج بسحورتج لو لا
لو لما شمرتي بناتج عليه و هن هلكدهن
لو انسى رسايلج و اللعب مالتج و انت على ذمة رجلج تتوقعين اكدر ارجعج لو اتقبلج ولج حسي على روحج والله كامت تلعب نفسي من ينذكر اسمج مو تمرين كبالي

لا عاد تمرين منا و هالمنطقة هاي ما توصليلها والا وحق الحق اروح لأبوج و اسولفله على كل سوالفج لخلية يكسر رجليج و يكعدج حسي على دمج ولا تمرين من كدامي، يلا

عفتها و دخلت بيت عمي، لكيت ديار كاعدة مدنكة بالهول و امجد ماكو :- ان شاءالله عجبتج الزفة البارحة

ديار :- ما رديت عليه بس هزيت راسي بمعنى (اي)

خالد :- لازم تفحيط البارحة اكل السانج

بقيت اباوع بعيونه بتركيز و هو يباوع، عيونه اليه مثل كتاب مفتوح اقراهم و اعرف هو شيعني، بسؤاله يريد يوصل و يستفسر عن شغلة معينة اذا تم لو لا ..
الواضح هالموضوع مسهره

اخذت نفس ونزلت عيني منه، هو ابتسم بمكر و دار وجهه عني، اجا امجد من المطبخ :- ديار تروحين لمها للمستشفى تبقين يمها لو ما بيج حيل ؟ ترا امي خطية من البارحة نايمة وياها

اسراء :- لا امجد خاف يجينا احد ماحود شنكلهم، هي عروس خليها تعدي هالاسبوع بالبيت و احنا نتعاون على مها و الله كريم

ديار :- ما عندي شي اذا تريد اروح

امجد :- لا لا اشوف اذا تروح يمها، اصعدي ارتاحي بغرفتج

اسراء :- الحلقة هاي امجد اشتراها الج ؟ اشوووف

اجت يمي تباوع بالحلقة، خالد داير وجهه للتلفزيون عاقد حواجبه و هو يباوع

اسراء :- بيييش ؟.

امجد :- ب٤٠٠

اسراء :- غالي ما يسوى ٤٠٠ هسه لو ثكيل جان زين

-غير هذا ارخص واحد لو تشوفين الباقيات

-جان رحت للكاظمية الاعظمية تشتري المنصور غالي بصياغته

-هاي بعد يمعودة اشترينا المهم تخلي حلقة بأيدها لان ما اشترت ذهب هي

-اي غير امها اخذت الحاظر مالتها

هم يحجون و اني اباوع بخالد، دار وجهه و هو يسأل :- ليش امها اخذت الحاظر ؟

اسراء :- تعالج جسمها بيه خوما تبقى مشوهة

اخذت نفس و كمت :- اني راح اصعد فوك

امجد :- روحي

صعدت و هو يكللها :- اسراء ليش تحجين هيج كبالها ..

-ما حجيت شي غير كلت تتعالج

فتحت غرفة مها على حالها محد لازمها :- وين الغرفة الخصصوها الية ؟
مشيت للغرفة الثانية مال احمد فتحتها لكيتها غرفة جديدة، غرفة اخشاب ماليزية لونها بيجي حلوة ما بيها شي

تمددت ع السرير
كلشي بداخلي بهت ..
حياتي الوانها ماتت
ايامي تمر بالابيض و الأسود
ما الي خلك السوالف ولا الي خلك الحجي

الهموم لو ثكلت تثكل اللسان
وكل سالفة تمر من يمك تكتفي بهزة راس تحجي بيها ردة فعلك بالرفض او بالقبول

دك الموبايل، كمت للجنطة طلعته، شفتها صديقتي عذراء، رديت :- الووو

عذراء:- الو هلو ديار شلونج

-هلو حبيبتي الحمدلله

-بالعافية و بالخير على زواجج اول البارحة جان مو

-الله يسلمج حبيبتي، لا والله البارحة

-يا واحنه عبالنه اول البارحة

-جان صح بس اجلناه

-خير ان شاءالله، نريد نجيكم هسه اني و ميسون و مهند و وسام و روئ نبارك الكم

-اي هلا بيكم بس خل انطي خبر و ارجعلج الجواب تعرفين بعدني جديدة

-اي اي هو اني خابرت حتى حتى انطي خبر خاف مموجودين او يصير احراج، يلا حبيبتي انتظر الجواب منج بسرعة لان الشباب منتظرين حتى نتفق

-حبيبتي هسه دقايق اسأل و اخابرج

نزلت جوا بسرعة بعدهم على كعدتهم ، مشيت يم امجد ودنكت احجيله :- زملائي بالجامعة جايين حتى يباركولي ويردون جواب حتى انطيهم

امجد :- اي هلا بيهم ، بس شنو يعني ولد ؟

- ٢ شباب و ٣ بنات

-ما دام ابوي مو هنا كليلهم خل يجون هسه

-يعني عمو عنده اشكال ؟!

-لا لا معليه اصلا ميدخل انت بذمتي مو بذمته بس خاف يتضايق لان شباب تعرفين اهلنا ما يتفهمون سوالف الجامعة و الزملاء

-يعني اكللهم يجون

-اي

خالد :- وسام وياهم

امجد :- منو وسام ؟

ديار :- اي وياهم

خالد:- زميلها المقرب

امجد :- هاا

لو بودي اذبحه على كلمته هاي ادري ربي ما راح يعوفني بحالي، واضح ان امجد خلا اباله هالشغلة و راح يتمعن بتصرفات وسام ووسام من غير شي يحب ياخذ ميانه بسرعة و يتشاقة ما يقصد شي

اتصلت كلت الها :- هلا بيكم حبيبتي احنا بأنتظاركم

سديت المكالمة، لزم بأيدي اسامة :- شلونج ديار

فتحت عيوني :- هلو حبيبي
حظنته :- يعمري مشتاقتلك

-رايد احجي وياج .

-خير شكو شصاير ؟

-نصعد فوك و نحجي

-شفت امجد صعد فوك ، همست اله :- شغلة سرية لو عادية

-تخص امي

-صخام بوجهي اذا تخص امي، امشي نروح للأستقبال نحجي

فتت خالد كاعد متمدد، حجيت :- شلون يعني ما راح تفك ياخة مني عاد

خالد :- ما كاعد ابيت الخلفج

-هذا صار بيتج

-لا بالله مصدكة روحج صار عندج بيت

اسامة :- ديار امشي بس احجيلج

ديار :- روح اريد احجي اني و اخوي

خالد :- ما تحجون و منو لازمكم

-اسرارنا ترا

-على اساس شلون اسرار

-خالد ما كافي حولت العرس البارحة عزا و اعرفك كلش زين لو ما صحوة ضمير بلحظة جان موتتنا كلنا امشي لا تخلي صوتي يطلع

-اذا تريدين تسترين على نفسج لا تتقربين مني اتجفيني و شسوي ما تحجين

اسامة :- انت و اخوك اذا ما تبتعدون من عدنا وحق هذا الله الا اكول لابوي عليكم و هو يتصرف وياكم

خالد :- اخوي منو ؟

-رافد الحيوان

-شمسوي رافد ؟

ديار :- اسكت اسامة و امشي بسرعة

-تعاي لهنا، احجي وياج

-ما الك علاقة

-ديكول اسامة يعني الشغلة تتعلق بأخوي

-حشرت نفسك هواي

كام على حيله :- اذا احشر نفسي زايد اذيج

-خالد يرحم اهلك كافي والله كافي اني خاينة و حقير و كلشي تكوله صح بس عوفني.

-منتظر وسام

-انت مو عندك شغل ويومية تروح شعندك مكابلي ٢٤ ساعة

-بطلت و قررت اكبالح شرايدة

-اروح منك لا يروح احد يسمع و ابتلي

-رايد جواب

-جواب شنو

-تعرفين

- شي ميخصك عيب تسأل حتى

-تعرفين العيب !!

خزرته و اني اسحب بأسامة ، سألني :- شبيه خالد وياج ؟

-متعاركين اني وياه صاير كلش يدخل بحياتي عوفني منه احجيلي على امي

طلع برا بالكراج و طلعت وياه :- البارحة من رجعت للبيت

-اي ؟

-لكيت امي و رافد فوك

نشغت و خليت ايدي على حلكي :- شلكيت ؟

-ملابسها مخربطة و تلبس بيهم و هو بس بالبنطرون يكلولي احنا متزوجين صحيح هم متزوجين

-صفنت بوجهه و اني حاطة ايدي على حلكي مستغربة

اسامة:- اني ما صدكتها

-هالحجي شوكت ؟

-البارحة من رجعت من عندج، انت بس كليلي هي متزوجته صحيح لو لا

-والله ما اعرف اسامة هسة يلا دريت شمدريك يمكن متزوجته ما تتذكر سيد جعفر طلعت متزوجته و احنا ما ندري

-ديار اني اريد اروح لابوي اعيش يمة

-دنجب شتروح لابوي لا تفكر هالتفكير هذا ابد

-ويا اني ما اعيش

-ومن شوكت هي صارت امك من يوم يومك انت عندي، اني اتزوجت انت تعيش وياي هنا تجيب ملابسك افرغلك خانة بالكنتور بس الك و لغراضك

-اخاف ما يقبلون

-منو الما يقبل ؟

-يعني امجد او اي واحد بيهم

-اليطردك يطردني كبلك لا تخاف ما اعوفك ولا اخليك تبتعد مني
حظنته بست راسه و ضميته الصدري:- يا الله بس لا صدك متزوجة رافد شلون بأمي اني، شنو ذنبه الولد و يشوف سوالفها

بعدته :- تعال اصعد وياي بغرفتي اني راح ابدل و انت ابقى ارتاح بيها ماشي ؟.

-ماشي

صعدته وياي، فتنا اني وياه شغلت اله التلفزيون و كعد بس الستلايت جديد ما اعرف وين القنوات بقى هو يكلب و يدور بيه

خليته داير وجه وبدلت ملابسي لميت شعري رتبت نفسي بمكياج خفيف و لبست حجابي و عطر ، خابرتني عذراء كالتلي :- وصلنا فرعكم وين انت يا بيت

كلت الها :- هسه راح اطلع الكم اخوي يجيبكم

سديته وصحت بأسامة :-، كوم كوم كوم بسرعة اجوا زملائي منتظرين ع الشارع بسرعة امشي روح

-شسويلهم

-بس دليهم البيت
لبس نعاله و طكاها ركضة، اني رحت لامجد لغرفة مها ما لكيته، نزلت لكيته كاعد هو وخالد بالاستقبال، يطركاعة خالد المايفك مني

:- امجد كوم كوم اجو

-يلا منتظريهم ما عدنا شي

كام هو يرتب بنفسة و شعرة ، خالد يمسح بصلعيته

اندكت الباب، طلع امجد صاح :- تفضلو يا اهلا وسهلا

فات وسام كال :- يا الله، السلام عليكم

فات هو ووراه مهند يسلمون على امجد و اجن البنات فاتن يبوسن بيه و يسلمن علية ، وصل وسام الخالد جان يمد ايدة يسلم و يكله :- مبروك و شايفين الف خير يا ربي

روئ رادت تسلم علية من الخوفة دفعتها مني و اكلها :- دوخري تصخم راسي

روئ:- طيح الله حظج من وصلت يمج دفرتيني غير اريد اباركلج

-اسفة والله بس وسام سلم على خالد

مهند ورا وسام لزم خالد ووكعله بوس :- بالعافية و بالخير منك المال و منها الجهال

امجد واكف صافن، حجه خالد :- ترا انتم متوهمين مو اني العريس، هذا العريس كدامكم امجد

وسام :- امجد !! شنو الموضوع بس انت كتلي خطيبها

خالد :- فوتو هلا بيكم فوتو

فاتو وامجد يندس خالد :- شنو الموضوع ؟

خالد :- بعدين

فاتو سلموا عليه و هم مدنكين لان رجلي موجود، تعذروا لان ما يعرفون بالعريس عبالهم خالد

وسام من عرف ان هو جفص بالسالفة بدون ما يعرف تضايق شوية، كعدنا البنات على صفحة التمن يمي :- احجيلنا شنو السالفة غير خالد العريس

-لا امجد

صاحن :- ياااااا

باوعولهن الشباب:- درت وجهي منهم

عذراء:- شلون امجد مو جنتي انت و خالد تحبون بعض ومخطوبين

-ما جنا مخطوبين بس نحب بعض بس بعد صار و افترقنا

-ولج جان يتعنى الكلية على مودج شصار حتى هيج افترقتو و يا افترقتو شو هذا واكف كدامج شنو الموضوع

-عفته و اتزوجت ابن عمه

صرخت روئ :- يااااااا عززززا

مهند :- شلون يعني راح تخلصنها علينا عزززا و عزززا وتنعوص ، شلونج ديار شلون صحتج

-على الله الحمد لله

وسام :- وضعج شلون خابرتج مرتين و ما رديتي

-الله يسلمك جنت مشغولة

امجد :- انتم نفس القسم

مهند :- اي وحتى نفس القاعة ما ندري شوكت تخلص هالعطة و نرجع نداوم كلش اشتاقينا للشلة

عذراء :- اي والله اختنكنا كلش ضوجة بلا الكلية ولمة الشلة مالتنا

وسام :- ثامر ديقدم على غير جامعة

ديار :- صدك !!

- اي والله

خالد :- انت من بغداد

-لا والله من ديالى بس ابن عمي شيخ هنا ابغداد واجي يمة بس وكت الدراسة قسم داخلي لأن عنده عائلة

امجد :- يعني هاي جيتك من ديالى

وسام :- اي والله البارحة اجيت تواصلت ويا البنات كالن ديار تزوجت تفاجئت فكلت الهم خل نروح نشوفهم هل تجينا بس احنا اغلب شلتنا تعذروا ويسلمون على ديار هواي

ديار :- الله يسلمهم
باوعت لامجد متضايق من وسام ما استلطفه ، جرتني عذراء :- ولج انت هنا احجيلنا شلون هيج عفتي و اتزوجتي

-بعد صارت مكدرت اكمل وياه

-بس خيانة هاي شوفي خطية انوب مزين اكرع

روئ:- هو حلو بكل حالته بس صاير يشبه ذوله البالمافيا الله عليجن بس باعن نظرته شلون يباوع لوسام، لو بوده يكوم يكتله ما طايقة

رادن يندارن يندارن يباوعن عليه، ضربتهن :- مو هسه فضحتنا لا يكول شبيهن ذن باوعلي كلهن

ضحكن وقت وحدة ورة اللخ تباوه، هو انتبه باوعلهن كلهن دنكن راسهن :- لكفها النجر

ديار :- دعوفنه يمعودات هيج هيج طالعة روحي منه

-خانج لو شسوا ..

-لا بس مها بت عمتي تريدني لرجلها تعرفنها تريد تموت و مرت خالد من ذاك اليوم لازكة ابابي تريد ترجع لرجلها ، عاد عفته و تزوجتج

ميسون :- وهيج واحد ينعاف يعوبه عزا بعينج صحالها رجل و كالت اعور

-بنات فدوة لحد تلوم وحدي متدمرة نفسيا السبب الحقيقي الخلاني اوافق شنو ما ادري لحظة غباء كلت اي وبعدها ما كدرت انطق لا وراها

عذراء :- لا والله انطق واكول لا، يعني لو ما يحبج ما جاي بصباحية عرسج مكابلج انوب ابن عمه اويلي يمه اني راح ابجي

-متعرفون شسوا بيه ولا كانه خالد ذاك الحبني

-لا المفروض يصفكلج و يكلج احسنتي شيسوي حقه

- السواه حقارة مو حق

-اعذريني والله سوايتج احقر يعني بربج عفتي هيج بلا سبب والله طليقته تريده غير بالنعال الزكها لو تقربت منه مو اعوفها اله

اندك الباب علينا، صاحت دعاء اخت امجد :- امجد

كام بسرعة الهم جابت العصير انطته اله، هو فات دخله الهم رجعت صاحته طلع و سد الباب وراه، لم رجليه مهند و اندار لخالد :- من رخصتك خوييي ، ولك يا اهل الرحم جابلوني والطكو وياي

وسام :- اسكت شكد عيب من الولد

مهند :- ولجن الزم بأبن عمه امطك و اكله مبروك تالي رجلها كبالي ماكو حفرة منا منا راسي بيها

البنات خربن من الضحك ووسام مدنك يضحك :- غير جفصتها كبالة شكد عيب حتى بعد ما عرفت شحجي ضيعت الكلام كله

خالد :- لا تشيلون هم هاهيه عدت

مهند :- لا تصيرلها مشكلة ونحرجها ديار خوما اكو اشكال حتى نبرر يمعودة

خالد :- معودة ع المشاكل ميهم

وسام :- بس انت سابقا كلتلي اني خطيبها على هذا الاساس توقعت تزوجتو لان جنا نشوفك لما تجي للجامعة و تفتر وياها

خالد :- قسمة و نصيب بعد

عذراء :- غير الخاتونه عايفته و متزوجه ابن عمه

مهند:- تحجي صدك

ديار :- ظروف

مهند :- ظروفيش هاي واكفة

خالد :- تخذوا راحتكم شباب

وسام ما رد عليه، كال :- يمكن الصار احسن الافضل ما ندخل الله يسعدها ويا اللي اختارته

وكف خالد باوعله، كام وسام على حيله :- يلا شباب هم يلا نروح

مهند :- يلا

عذراء :- ولجن باعن والله راح ابجي اوف ديار مال احطج و اكتلج و ابرد كلبي بيج والله حركتي دم بهالزواج

ديار :- قسمتي بعد

غمتني و بوستني و كلعت و هن هم باوسن انطني صندوك جبير بيه مجموعة هدايا من عدهم، طلعوا هم وخالد ع الباب يسلم، طلع امجد سلم عليهم

راحوا سدوا الباب ردنا ندخل، صاح امجد :- خالد بس تعال شوية هنا، ديار تعاي

مشى خالد كبالي ، فتنا للاستقبال، كعد خالد و اني واكفة اباوع لأمجد :- ليش اعتبروك انت خطيب ديار وسلموا عليك شنو الموضوع

خالد :- مو اني من زمان كايل لوسام هذا الولد ابو عضلة شفته

-اي ما ارتاحيتله

- نفسك، فد واحد سخيف و طايح حظه فكلت اله خطيبتي حتى ما يتقرب منها لان العرفته عنه بالجامعه ما خال بنية الا ومتقربلها فما ردت يمسها

ديار :- ليش هيج تحجي عليه والله خوش ولد حرام عليك، امجد لا تصدك والله ماكو هيج شي هو زميلي صار سنه لا عنده سوالف بنات ولا ابد

خالد :- اجذب يعني ؟

-اي جاي اتجذب

-والله ما مصادقة حتى اجذب و اخذ غيبته، بنات الخط الجنت اصعدهن وياج هن كاللي هيج و الصراحة ما ارتاحلة فقبل كلت اله هيج حتى ما اخليه يستطمع بيج

امجد :- اني هم كلش ما ارتاحيتله واصلا كلهم مو تمام ذاك الصاني خفيف و البنات صوت الضح و العزا مالتهن ولا كان كاعدين ولد وياهن

ديار :- ترا هم طلاب جامعة احنا متعودين بالجامعة نوكف ونحجي عادي لا بنية ولا ولد كلنا اصدقاء

-لكلشي حدود ديار و ذن البنات ما ارتاحيتلهن

درت وجهي لخالد :- هسه شستفاديت من خليته يكره زملائي؟

امجد :- احترمي نفسج ديار ترا مو بكدج و تحاجينه بهالطريقة

خالد :- اني اروح للبيت امجد اخذ راحتك

-هلا بيك حبيبي

طلع خالد، و فات امجد، فتت للبيت طلع ابو امجد و احمد و ام امجد جايبين مها و جايبن للبيت، سلمو عليه و باركولي
رحت المها لفراشها بستها و سلمت عليها

سلامها جان ثگيل وياي، كعدت يمها، حجه ابو امجد :- منو ذوله الخطار الجانت ديار كاعدة يمهم ؟

امجد :- زملاء يابه

-ولد

-اي ولد و بنات

-ويجون للبيت !!

امجد :- يابه اجوا بوجودي مو وراي و هي طلبت اذني اسمحلها لو لا و اني الكلتلها خل يتفضلون

هز راسه ابو امجد و دار وجهه بس اتضايق
حس امجد على ابوه انزعج، كام و كال :- اني راح اصعد انام انتم ارتاحوا

مها :- وين تنام

امجد :- بغرفتي يعني وين ؟

- يا غرفة منهن

تنهد امجد :- اصعد ارتاح

صعد هو و لتفتتلي :- شصار وياكم

-شمو يعني ؟

-تقربلج مو ؟

-لا

-جاي تضحكين عليه ديار

-هاي شبيج مها والله ما الي خلك

-لا بلا

كمت من يمها :- تحتاجين شي

-وين رايحة ؟

-مدام البنات هنا ادخل ارتاح ساعة انام

مها :- اي حقج عروس و تريدين ترتاحين بحضن رجلج

ديار :- رجلي شنو مو انت التوسلتيني حتى اتزوجه شرايدة مني بعد

-روحي ارتاحي حبيبتي بحضنه روحي و عوفوني هنا مثل الجلبة ممدودة

ام امجد اشرتلي اعوفها، عفتها ما رديت، صعدت لغرفتي اسامة كاعد، طفيت الضوء و تمددت انام شوية

شوية و فات امجد، شاف اسامة موجود، حجه :- حبيبي روح لغرفة احمد بس احجي ويا ديار شوية

كام اسامة من يمي، طلع، شلت راسي و كلت اله :- ها امجد تحتاج شي

-وسام هذا منو ؟

-مو كلت الك زميلي

-ما ارتاحيتله

-يعني هسه شسوي اني

-تبتعدين منه ما اريدج تتواصلين وياه

-ما متواصلة

-يلعب ع البنات و يعوفهن
هز راسه و هو يحجي ، طلع

كمت للباب قفلت الباب و خابرت خالد، رد :- يعني انت شوكت افتك منك فهمني والله حرام عليك الجاي تسويه بيه

-و شسويت ؟

-خليت امجد يشك بوسام

-جان المفروض يشك بيه لان وسام كاله انت كلتلي خطيبة شأكله غير هيج

-ولو انت ما موجود ما يصر هيج من الاساس خالد كافي ابوس ايدك كافي خليني اعيش

-ومنو لازمج

-انت، خانكني وين ما اطلع كبالي

-رب الجان غزلج كله بطولي ولو شفتيني يدك كلبج هسه تختنكين من تشوفيني

-فك ياخة عني الله يخليك والله تعبت، ما اذيتك بشي ليش هيج جاي تحقر وياي

-ما اذيتي !! هه

-اي ما اذيتك كل الردته ترجع مرتك الكتلت روحها عليك و ينسعدون بناتك ما ردت احرمهن منها

-ومتوقهة هسه ارجعلي وحدة ام سحورة جانت تخون رجلها وياي و اطلكت منه و تفت ع الناس حتى ارجعها !! لا توكف عليج ولا عليها اني اتزوج ان شاءالله قريب

-اتزوج التعجبك بس فك مني الله يخليك

اندكت الباب، قفلت الخط بسرعة، صاح امجد :- ديار

مسحت المكالمة بسرعة و حطيت الموبايل ع الميز مسحت دموعي و فتحت الباب ، باوعلي مستغرب

:- ويا منو جنتي تحجين ؟

-ولا احد

-بس اني سمعتج بنفسي تحجين

-تلفزيون
باوعت التلفزيون مطفي، بلعت ريكي

-الكهرباء مطفية صارلها خمس دقايق !!
حجاها و هو يتقدم للموبايل اخذه، كلب بيه :- مكالمة منو ماسحتها ؟

-ما ماسحة ولا مكالمة

-مدة اخر مكالمة بالاحصائيات دقيقة و ٥٠ ثانية و انت اخر مكالمة الج بالسجل هنا ٢٠ ثانية ويا عذراء، مكالمة منوووووو ماسحتها ديار .

اندكت الباب فات اسامة :- ديار امي اجت

امجد :- روح بعدين تجيى

اسامة :- لا مو اريدها بشغله بسرعة

التفت اله :- اسامة كلت الك بعدييييييين تجي

-ليش تصيح على اخوي

-انعل ابوج لابو اخوج، احجي بساااع يلاااا

-امجد اذا ناوي تعيش حياتك وياي بهشكل عوفني

اجا لزمني من فكي :- اسمعي لج كلت الج عندج شي احجي بس اذا لاحظت عليج شي والله سلاحي يتصرف

-اي اكتل لعد و خلصني

-عايفج يعني

-منو

-الزمال الاجا اليوم

-وسام زميل لا اكثر والله ما عندي شي وياه

-اسمعي ديار تحجين لا و حق النزل القران هنا تنكتلين

-خالد

-جاي تذبيها براس خالد

-والله العظيم جنت احجي ويا خالد

-واذا خالد ليش حاذفة المكالمة ؟

:- ولا شي والله بس انت ما قبلت من حجيت وياه و لمته، فخابرته احجي عليه من سمعتك خفت و حذفت المكالمة

انطاني الموبايل :- خابري خالد كبالي بسرعة و افتحي سبيكر

- اتصلت اول ما رد طلعت موضفة الشركة ( رصيدك لا يكفي الرجاء قم بتعبئة الرصيد )

-ادايني

-ما اعرف

-لا تثوليها و ادايني ٣٠٠ من الشركة

-اريد اتذكر شكد الرمز كمت ابجي، اتصل خالد رديت و فتحت سبيكر، حجه :- شرايده بعد

حجيت و اني ابجي:- خالد اتصلت بيك قبل شوية

-هاي ليش تبجين منو وياج

-بس احجي مو اني اتصلت بيك

-جايج دقايق

-بس كول بس كول انت لو انت

-اي اني بس ليش تبجين

-كله من وراك
قفلت الخط و كعدت ابجي :- ما تريدني طلكني ما مجبور تعي وياي هالشك

-المشكلة ما جاي ارتاح احساسي يكلي اكو شي غلط

-اي طلكني لعد

-لعب جهال هو

-اي لعد لا تسوي هيج كافي تعبت والله تعبت منكم الله ياخذني و يخلصني منكم

-منكم منو تقصدين

-انت ما تهتم لو متت كل همك الشك البكلبك اني نازله و رايحة ويا امي ما ابقى بعد

جر ايدي :- مشاكلنا تبقى بالغرفة ما اقبل جنس مخلوق يعرف بيها افتهمتي ؟

اندكت الباب، جان مفتوح، طول خالد سد الباب :- شبيها ديار ليش تبجي

امجد :- ولا شي مشكلة و انحلت

ديار :- لا اكو شي من البارحة و لليوم و هو يشك بيه ما مخليني اتهنى لحظة وحدة بكد ما يشك وكله من وراك

امجد :- دياااااار

خالد :- شبيك امجد ليش تصيح

-هاي فوكاها ؟ شبيك خالد اني ما ارضاها ترفع صوتها وياك

-ترا ديار صديقتي من سنين اني زوجتها سلمان على ايدي و اني العيشتها بكربلاء هناك واني الجبته و حتى كليتها جنت اني اوديها يعني مو غريبة عليه حتى اخذ عليها لو اتضايق، و ما اقبلك تأذيها ترا

-مهما يكن تصرفها هيج ما اقبل بيه

-من كلت الك وسام مو زين ما كلت الك هي جانت عدها علاقة وياه، جيب القران و اقسملك عليه ما عدها كل علاقة وياه غير السلام و زميل بشلتها بس لان ما ارتاحيتله ردت ابعده عنها من خوفي عليها

- واني هم ما ارتاحيتله

-اي لا ترتاحلها بس لا تكعد تشكك بيها

-لا طبعا ما اشك بيها هي مرتي و اعرفها من زمان بس شغلة حذف المكالمة ضايقتني

- لا تزعلها مرة لخ لان وكتها ما راح اسكت

حجاها و طلع باوع امجد وراه :- ها شحاسب نفسه

ديار :-، ياريت تنزل يم مها و تعوفني بحالي لأن حيل تعبت منك بهاليومين

-مرة لخ مكالمة لا تحذفين و اي شي لا تضمين كلتلح كلشي بكلبج صارحيني مو تسوين من وراي ....... فاتت امي

ميعاد :- صار ساعة انتظر جوا هسه تجي بنيتي هسه تجي ولا اجت، يماااا شبيج ولج ليش هيج العيون محومرة ؟

امجد :- اني نازل اسبح

ميعاد :- تعال تعال شتسبح بتي شبيها

-ما بيها شي

- و هالدموع منين اجن

-اسأليها

طلع امجد و هي كعدت يمي :- شبيج ولج شصاير وياج

-عوفيني بحالي و امشي مني

-تخبلت البنية و النبي شبيج يمه؟.

-كمت قفلت الباب و انداريت الها :- الشايفة اسامة شنو ؟

-اشايف ؟

-تغشمين نفسج

-اءا هو كايلج اشايف اتسألين بعد ليش

-يمه و تالي وياج راح تصخمين راسي

-وشسويت ؟

-متزوجين

-نريد نتزوج

-تريدين يعني الشافه حرام، يمه كافي و القران تعبت ربيييييي اخء روحي وخلصني يا ناس والله تعبببببببت

-ما تريدين تكليلي شبيج

-عوفج مني اني احل مشاكلي بوحدي و حلي الموضوع و لمي الفضيحة السويتيها كدام اسامة

-اي قريب نتزوج يا بنيتي شبيج لا تكبريها

- شوكت

-ع الاكثر باجر و الا اكلج شو جاي على بالي اليوم

-اكوم منج اشرفلي

-لا لا تعاي شوفيني غرفتج تعاي

-شوفيها ابحدج

نزلت للبيت مها نايمة و امجد كاعد يمها و هي لازمة ايده، مشيت للمطبخ كعدت، الدنيا كلها ضايكة بعيني مختنكة كلش رايدة اصرخ ابجي بكل قوتي اريد ارتاح احس مثل الصخرة على گلبي

جنت مرتاحة حيل تزوجت و علعلت روحي ليش
كعدت ابجي، حسيت احد يدنك على راسي يبوسني، رفعت راسي، شفته امجد :- لا تبجين

-كلش متضايقة

-هذا حجي وحدة اليوم اول يوم عرسها

-ما اعرف شكلك بس والله متضايقه كلش

-متضايقة مني ؟

-لا احس اكو ضغط جاي يصير عليه كلش اذاني

-لو ما مها هنا جان هسه طلعتج افرج شوية بس اخاف تتضايق، راح احجي ويا امج هسه على موضوع سفرج لبيروت

-شوكت

-هاي الايام

دنكت ، فاتو بنات خالد للبيت لان اثار اجت ويا امي يلعبن وياها

كمت ويا البنات شتغلت شوية و صعدت لغرفتي سديتها عليه و كعدت، هناك و اتصل خالد

فتحت خط دا اكوله :- شتريد مني بعد

اسمع صوت امجد يمه يحجي و كأن هم وياه بالسيارة، يكله :- خالد ما ادري اني ما مرتاح

خالد.:- ليش ؟

-ديار صح اعرفها من زمان ولأن اعرفها فاحسها مو طبيعية

-ما عدها شي بس ديار حساسة

-اكلك صح زواجنا انفرض و صار بساع بساع بس مو هيج، اي فرحة ما بداخلها كل ما التفت منها تبجي بسكوت

ليلة عرسها كضتها بس بجي ورفضت اي شي

خالد :- يعني ما صارت زوجتك

-انت اخوي بس اني اجيت احجيلك لان انت صديق الها من زمان لابد تعرف عنها شي

-الاعرفه عاشت ظروف كلش قاسية بحياتها و بيها حالة نفسية

-لا تقنعني الجاي اشوفه بديار مو حالة نفسية لو ما جانت عدنا ٢٤ ساعة خالد

-يعني حتى لو اكو شي بداخلها شراح تسوي ؟ هي اتزوجتك حتى تربي جهالك مو حتى تحبك
وضحت بكلشي ووافقت بزواجك لخاطر مها

- بمثل شنو ضحت

-ليش مصر تعرف ؟ ما دامها صاينتك خلي البكلبها بكلبها ما ضارتك بشي

-خالد ما متقبلتني ما رايدتني تفهم ، اني بس رايد افهم شبيها، انت تعرف شي ؟

-اني مو بنية حتى تحجيلي هيج اسرار هي جانت تشكيلي مشاكلها و اني اساعدها

-اني اشكانت تعرف بكلشي عنها و ما تحجيلي

-يعني اذا هي مأمنة بيه تريدني انطي بيها ؟

-يعني اكو شي

-اكلك ترا دوختني اكو شي و اكو شي، شكو يعني جانت حابة واحد و انجبرت بيك عوفها و اذا ما عفتها اتحمل .. لا اطوخها

-قابل الطلاك سهل البارحة تزوجنا خالد

- ديار ما تفيدك

-ليش

قطع الخط .... شلون يربي اتصل واسمع شيحجون انوب يكله ديار ما تفيدك هسه شسوي اني يا ربي

بقيت اروح و ارجع بمكاني، اجا اسامة راد مني عشا اله و لاحمد نزلت سويتلهم نواشف جاي اصعد ، صاحتلي مها

كلت الها:- بس اخذ العشا

-المن هذا الأمجد ؟

-امجد مموجود هءا لاحمد و لأسامة

-روحي ودي و تعاليلي

صعدت خليت الهم العشا و نزلت يمها:- كولي

- سولفيلي على ليلتكم البارحة

-ما صار اي شي مها اني متزوجته حتى اساعدج و اعين اطفالج ما متزوجته حتى اصيرله زوجه

-بس هو راد مو

-ماكو رجال ما يريد هو مو نبي و انت والكلتيله اتزوج

-لا اني كلت اله روح الها اجاني خطية

-اذا انت كلتيلة ليش متضايقة هالامور مو زين عليج حالتج النفسية مهمة اذا ضعفتي تنتهين

-ديار اني ردتج و مشكورة و ما قصرتي وياي، بس امجد رجلي صارله ٩ سنوات مو سهلة عليه انطي لو اشاركة، بس يكلك شجابرك ع المر غير الامر منه

هو رجال ما يتحمل بس اموت يدورله مرة و حقة اني من يوم الوكعت راح يصير سنه و لليوم ما موفيته حقه لا فد يوم شكا ولا كال تعبت و اني الكتله اخذها و خلي زواجك منها كامل و ارتاح بس الكلب شيريحة

-لا تخافين هو كلبه يمج والله البارحة من سمع بيج مريضة عافني وحدي بالفندق و اجاج ركض

-اتحمليني حبيبة

-بعيوني اخليج والله

فات امجد :- ها الله يساعدكم

مها :- هلا حبيبي

امجد :- جبت الكم بقلاوة

-وليش بقلاوة بالذات عود

-غير تحلون

-لازم رايد طاقة

امجد :- هاي شبيج مها

-انت لا تاكل

بقى صافن بيها ويضحك هز راسه و كاللها :- اكلت نص كيلو كبل لا اجي و جبتلكم وياي

-اليوم تنام هنا، جوا يمي

امجد :- لا ما ارتاح هوسة وراي دوام باجر

-امجد اطك و اموت هنا والله

-هاي شبيج مها

-عود شنو معناها تاكل بقلاوة

-بقلاوة يعني بقلاوة الله اكبر لازم الها معنى يعني بس هو مو صوجكم صوجي اني الحايب وياي لو متسمم و ما ذاكركم جان اشرفلي

فاتت امه تضحك و هي تسمعه حجت :- هذا اليتزوج اثنين يمه شعبالك لعب جعاب

-هسه لو اثنين صدك جان زين دخليني ساكت يايمة ليش تحجيني، اصعد انام وراي دوام اشرفلي

مها :- تنام بغرفتي

ام امجد :- ولج مها شلون وياج مو انت الردتي يتزوجها و ياخءها شو هسه نايمة بخوانيكة

-اي غير يعدل ليلة الها و ليلة الي و هو البارحة يمها

ديار :-، اخذي كله فدوة والله ما اريد اروح انام

مها :- وين راح تنامين ؟.

-ياااا

ام امجد :- ولج طوختيها

مها :-، اريد اصعد انام فوك بغرفتي

ام امجد :- يا ولج اكعدي لا توكعين و نبتلي

كامت تبجي :- ادري اني صرت ثكيلة عليكم و بعد محد يتحملني

نزل امجد عصبي و هي تبجي، شالها بهمة و صعد لغرفته فوك و هو يكلها :- انومج على گلبي بس اسكتي رحمة لاهلج

ابتسمنا اني و ام امجد ، حجت :- روحي يمه نامي نوم العافية ان شاءالله

-تسلمين خالة، ااا بس ردت اكلج شغلة

-كولي خالة

-اسامة راح يبقى وياي هنا ما اريده يعيش ويا امي

-ليش

-خالة انت تعرفيني من اني صغيرة شايله اسامة بركبتي حت من عشت بكربلاء ما خليته لامي و اخءته عيشته وياي و ما اريد افترق عنه

-اي خاله بيتنا خير و بركه و هو بيتج ان شاءالله ووين ما يرد نحطه بعيونه

-سالمة عيونج
رحت الها بست راسها، باستني بخدي و كالتلي :- صيري سباعية و احتوي امجد تراه خطية تعبان

-ماكو مرة ما تغار بس هو يعرف ان شاءالله شلون يعدل و ما يخليجن تختلفن بس هو اله حق عليج اني سمعت البارحة ما كادرة، لا تقصرين وياه بنيتي

سكتت ما حجيت

راحت هي لغرفتها نامت و اني صعدت فوك، مشيت على اسامة اطمنت عليه و فرشتله ورحت للغرفة، طفيت الضوا سويتها ظلمة

ورحت نمت ... باللييييل نايمة حسيت الباب انفتح
انعصر گلبي، شكد كرهت الليل وياه، لازم اتقبله و اني لاعبة روحي من نفسي و لو ما احرام انتحر

بقيت دايرة وجهي ما اتحركت
انقفل الباب ..
وتقرب من السرير

بقيت بمكاني متجمدة، اكو شي حسيته غريب ما ارتاحيت ، مديت ايدي اتحسس الموبايل، كلبي كام يدك

جريت الموبايل دست دكمة حت يطلع ضوا الشاشة، انداريت اباوع و الكا خالد مبتسم كدامي
ظلمة و هو اصلع

صرخت حيل حط ايده على حلكي كمت ادفر بيه و اتراجع ع السرير

خالد :- اششش اجيت بس احجي وياج

-وخر مني كووووم

عافني و كام ظلمة و بس الضوا جوا الباب اشوفه مشيت للضوا اشغله هو واكف و راي فتحته انداريتله

هو متكتف وراي :-شرايد مني ؟

-ما متقبلته ولا راضية بيه عايشة وياه ليش

-انت معليك اطلع من عندي بسرعة

- راح اطلعيني بسكوت و تحاولين تخفيني عنه مثل ما جانت تسوي امج بوجود ابوج مو

-خالد لا يجي احد فدوة استر عليه

-بأمكانج تروحين تكولين لامجد اني جنت احب خالد و اليوم ما اريده واريد اعيش وياك و اصونك، وتعرفين راح يتفهم وراح يبعدني بس انت ما رايدة هيج

انت تنتظريني كل دقيقة و تسوين نفسج تريدين تخلصين مني يس اني فاهمج

خالد

-دمرررررتي خالد كاااااافي

-والله جاي اسمع صوت جوا روح الله عليك

-خايفة منهم يعرفون و لو ما هم راح تخليني مو

-خاااالد كااافي الله عليك كافي، ما شفت احد مثلك ما عنده كرامة لازكلي شتريد فك عن

-هذا الماعنده كرامة من سمعج تبجين فز من حيله و اجاج ركض، الما عنده كرامه هذا عجز ينسى

-لا اني ام جسم الحلو ولا اني التطير عقول حتى هيج ما تعوفني خلي المشوهة بحالها و عوفها تعيش عليك الله اطلع

-اني وحدي الشايفج صح ذوله كلهم مصالح
وكت التقصرين وياهم محد راح يرحمج

-خالد اطلع لا تفضحني

-اطلعي وياي

-خالد روووح

-تروحين كدامي و تحجين لامجد كلشي

-خاااالد

-كلت الج امشييي

-انت شنو شارب شبيك اصحى

-امشي كليلة اني احب غيرك و رايدته كافي تخدعين نفسج انت الي و حتى ما تجرئتي يتقربلج لان انت الي ما ارضى يعالجج ولا ارضى احد غيري يساعدج

-خااالد روووح......

☆☆☆☆☆

#اتمنى_ان_افعلها


الحلقة_33

آراك و اتمناك و لا استطيع الوصول اليك..
تناديني و اسمعك و ارفض تلبية مناداتك ..
افأختار الحرام ام نحن وسط الحرام !!..
ام نحن الحرام بعينه ؟!
ايجوز لي النظر لعينك ؟
أيجوز لي مسك يديك ؟
أيجوز لقلبي ان يعشقك ؟
أيجوز لي ان اسرقك ؟
من اهلك
من بيتك
من عالمك
و من كل مانت فيه !
أيجوز لي ؟

............

ديار :- خالد روووح

-كلت الج روحي كبالي

-طوختها كلش اطلللللللع
كمت ادفع بيه و هو يرجع

-تجذبين على روحج لما تبعديني عنج تعرفين كلش زين اني شاغل كل تفكيرج ومستحيل احد يجي يملي مكاني

دفعته مني و ضربته راشدي :- كافي لطشت هواي لعبت روحي منك تفتهم لو لا تصيحلي مو شريفة و انت اللي تتعدى علية ولي منا

لزم فكي :- كد هذا الراشدي انت ؟

دفعته :- كدها و نص وشتريد تسوي سوي، تفضحني !! روح افضح .. تهديدك ما يهمني بعد روح منا

-لا اخليج تتندمين والله

دفعته للباب دروووح، كام يكح قوي ، انرعبت حطيت ايدي على حلكة :- ولك اطلع راح تفضحني والله حرام عليك

كام يكح قوي بعدته من الباب و شردت نزلت ع الاقل اذا طلع احد ما يلكاني وياه بالغرفة، وصوت الكحة مالتة قوية طالعة بس الكل نايم

نزلت جوا سمعت صوت بالأستقبال، فتحت الباب احمد و رائد حاطين شرب و مشغلين اغاني و نركيلتين كدامهم و مسلطنين

باوعلي احمد :- ها ديار ؟

-لا ماكو شي
رديت الباب رائد صار كبالي كمت اشرله ما جاي ينتبه، نزل خالد ع الدرج و هو يگح قوي ، فتحت الباب عليهم كلت :- رائد هذا خالد جاي يكح قوي كوم شوفه

كام رائد و احمد متمدد بمكانه يشرب جكارة ويغني ويدندن ويه الاغنية، سديت الباب عليه و كلت الرائد

:- اخذه منا فدوة ترا والله ما بيه حيل لمشاكله

مشى رائد كبالي بس ما متوازن جسمه يروح منا ويجي منا، لزم الدرج يريد يسيطر

:- يااا رافد شجاك

-ما بيه شي عوفيني

كام خالد من مكانه و نزل :- امشي رائد امشي والله لخليها تحلم تشوف يوم ابيض بحياتها

مد ايده خالد جاي يسحب رائد، وكع رائد للكاع و خالد تعثر بيه:- دكوم يمعود شجاااك

رائد :- حبيب امك متقبل من احاجييييك روحي معلكة بيك

خالد ضحك ضحكة مسموعة و هو يكله :- كوم يا ولد كوووم

كام خالد و هو يكوم برائد كلش سكران
صاروا كدام الدرج اريد اصعد و رائد يغني و خالد يجر بيه و يضحك عليه، طلع ابو امجد :- هاي شنو عمو فوتو جوا ترا ميصير هيج بالليل صوت الضحك ضاج بالبيت

التفت عليه واكفة :- ديار عمو شعندج نازلة

-ااا عمو سمعت الصوت و نزلت عبالي اكو شي

خالد :- دكوووم يا رائد متكلي شبيك

ابو امجد :- اصعدي لغرفتج بسرعة و بليل لا تنزلين

اريد افوت و هم كبالي، خالد رجع يكح من كل صدره
و رائد ديحاول يكوم بس كلش مثكل، سحبه ابو امجد و دخله للاستقبال و خالد طلع برا

اسمع ابو امجد كعد يرزل باحمد و رائد ويكلهم :- ما يصير هيج كافي استحوا على ارواحكم عيب

صعدت ع الدرج، لكيت امجد كبالي بالفانيلة الداخلية و للشورت :- شكو شبيه ابوي

-رائد و احمد سكرانين و جاي يرزل بيهم

-قابل غريبة عليهم، بس تعاي فوتي لمها محتاجتج

-شتريد ؟

-بس تساعدينها يمعودة الليل كله بس تون ما خلتني اعرف طعم النوم، رايح اني للغرفة الثانية انام ما بقالي ساعتين واروح للدوام ابقي يمها انت

-ماشي روح نام

مشيت و اني افكر بالله لو خالد جاي و امجد موجود جان شسويت ؟ شلون اخلص من خالد وحقارته وياي والله تعبت.

فتت لمها كاعد تبجي، تقربت منها :- ها شبيج

-جسمي ديار متت بس فرجيلي

كعدت افرجلها ، طلعت ما ماخذة الدوا مالتها مال الليل، انطيتها الدوم و بقيت افرج فوك الساعة و نص اني بس افرك بجسمها كلش تعبانه
لحد ما نامت، كعد حسوني ابنها
شلته من عدها حتى اخليها تنام ردت اروح لغرفتي خطية امجد وراه دوام

نزلت جوا و اني افتر بالطفل واسكت بيه
طلع عمي :- ليش تنزلين بالليل يا بنتي ابقي بغرفتج

-عمو غرفتي امجد نايم و مها نايمة بغرفتها و الطفل يبجي يعني شسوي وين اروح

-مو ذوله يشربون يا عمو، اخاف عليج والله

حجاها و كام فات عليهم مرة ثانية لكا احمد و رائد نايمين غاطين بنومهم سد عليهم الباب و كال :- جاي يتعبج هذا

-شلع كلبي عمو ما جاي ينام بس يبجي

-جيبي بنيتي وروحي نامي

اخذه من عندي و هو يكله :- اها اها جدو حبيبي ليش تبجي

الطفل قنع بجده، اخذه و فوته جوه يمه هو و عمتي، رحت صعدت فوك لغرفتي، شغلت الضوا فز امجد :- بيش الساعة ؟

- بالستة

-نص ساعة و كعديني فدوة بس خل انام

حط المخدة جواه حظنها ورجع نام :- دخيلك يا الله هالليلة شيخلصها نعست متت بس اريد انام

بس ابقى بالغرفة اغفى، اخذت الموبايل و رحت لغرفة مها، طلعت ملابسه و حذائه و جواريبه، حطيت الجاي ع النار و سويتله ريوك

نزل هو :- صباح الخير

-هلو صباح النور

-حسوني مو بفراشه وينه

-بجى وما قبل بيه نام يم عمي و عمتي، ملابسك حضرتهم فوك و الريوك كملته الك

تقرب اخذ راسي و باسني من كصتي :- مشكورة، تعبتي ويا مها و الجهال، لا اتعبين نفسج بيه اني ادبر اموري روحي ارتاحي.

-لا يمعود فدوة قابل شسويت

-روحي اصعدي و اني راح اوصي امي ما تكعدج الصبح البنات يعوضن

هزيت راسي ورحت للغرفة، قفلت الباب و تمددت ع السرير، امجد طيب و خوش ولد ما يستاهل كل اللي ديصير، لازم ابتعد من خالد كل البعد اذا بقيت هيج لا خالد راح يشوف حياته وينسى ولا اني راح انساه و ارتاح .

بقيت بأفكاري اجيب و اودي للساعة ٩ واني اتكلب بفراشي لحد ما نمت.

خلال نومي اندكت الباب اكثر من مرة و كعدوني بس اني جنت كلش نعسانه و من النعاس نسيت اني متزوجة كل ظني اني ابيت امي و هي ادك الباب بمغلسة ما اريد اكوم

اندكت الباب و اسمع، امجد :- ديار

كمت من مكاني فزيت للباب فتحته بساع، فات هو :- بعدج نايمة ؟

-بيش الساعة ؟

-٤ الا ربع

-اوو واني ما كاعدة والله ما ادري ما نمت بالليل اخذتني نومة
احجي و اني ادور بالغرفة مدري على شنو دايخة كلش، حجه :- ارتاحي اذا بعدج ما شابعة نوم كملي نومتج

-لا يمعود هسه شيكولون عليه

تمدد هو عل الجرباية بحذائة، مشطت شعري اريد انزل
حجيت :- هم اجو خطار

-اي ومكعدينج و ما فاتحتلهم البارحة

-يا الله شكد عيب هسه بيا وجه اطلع الهم .

-عيب امنين شبيج انت لا تشيلين هم لاحد، واذا واحد حجه وياج بس كليلي

باوعتله، يحي و هو متمدد على ظهره و مغمض عيونه :- ليش ما اخذت اجازة ليش داومت

-اجازتيش يمعودة كلهم حرامية انطينا ٢٠٠ الف و ننطيك اجازة ١٠ ايام

مشيت يمه حتى انزعه حذائه ما قبل، كال :-، عوفي لا لا انزلي اني انزع

عفته و نزلت

اسراء :- يمة شنو معليج عروس و نايمة لحد هسه وين صايرة

ام امجد :- من تسهر الليل على مرت اخوج و ابنه و اداري بيهم ما كلتي عروس عيب خل اكوم بمكانها من نامت صحتي عروس، على كيفج ويا البنية هم بنيتنا هي مو غريبة

ام رافد :- المن اخذتوها لعد غير تخدم ابنج و مرته

ام امجد :- هي مرته مو خدامتهم و اني كلت اله الما تقبله على مها لا تقبله على ديار وتعدل بيناتهم و تنصفها ما اقبل هذا الحجي ترا

اسراء :- راح تخلينه يعبدها مثل ما جان عابد مها

ام امجد :-والله ما دامه ما مقصر ويانه خل شيسوي يسويلها رجال و مرته شعلينا

ام رافد :- ديار و امها ما يتأمنن يا ام امجد ديري بالج منهن

ديار :- مساء الخير

ام امجد :- هلا بنيتي كعدتي

-كلش اعتذر خالة بس ما نمت غير ب٩ الصبح و ما دريت بنفسي بعد

ام امجد :- البيت بيتج يمه و المرة ما تتعذر ابيتها، هاج اخذي الوليد غسليله دمر روحه

هزيت راسي و اخذت حساني من ايدها و رحت غسلتله، اجت اسراء حجت :- شكد دكينا الباب عليج يمعودة ناس اجونا حتى عيب

باوعتلها و نزلت عيني منها اغسل ما رديت عليها، هزت ايدها و مشت ، غسلت الطفل و رحت يم مها :- تغديتي

مها :- اكعدي ديار

كعدت :- اوصيج وصية و اني اختج على فراش الموت

-اسم الله عليج

-ام امجد صادقيها و صيري زينة وياها و اهم سي لا تاخذين حجي بناتها و تودينه لامجد هي زينه وخوش مرة بس ما تقبل الفتنة بين ولدها هي تحل المشاكل

-اني ما حجيت ويا احد وبعدين حقهم يحجون اني صدك متاخرة بكعدتي

-لا تكولين حق احد انت ما سهرتي تلعبين لا تخلينهم يدوسون عليج، اذا سمعتي حجاية اشكيها لام امجد لا تشكين لامجد.

جاي نحجي اني وياها فاتت امي و اثار وياها :- مرحبا

كامن ام امجد و البنات يسلمن عليها، كعدت و هي تكول لام رافد :- بشرينا الامير وليام ما تزوج

ام رافد :- ازوجه احلى وحدة ان شاءالله

ميعاد :- ان شاءالله، شفته البارحة بالمحل خطية يكسر الخاطر مشغل اغاني و صافن جنه مركوع بوري

ام رافد :- لا ما بيه شي بس تعبانين بالبضاعة مال الاسواق

ميعاد :- الله يوفقهم ان شاءالله، ابو رافد شلون ان شاءالله مرتاح بحياته الجديدة

ام امجد حجت بسرعة :- هسه عوفونا من ابو رافد، ام اسامة شلون كاعدة وحدج و اسامة و ديار هنا هم استاحشتي

ام رافد :- شتقصدين

ميعاد :- اي والله يا ام امجد هالطايح حظة اسامة لازك بهالبنية ما يقبل يعوفها و اني باقية وحدي، بس الله كريم ما تضل الامور هيج تتغير قريب

مها :- امج و ام رافد متعاركات ؟.

ديار :- ما اعرف

- بعده رافد يريدها ؟

-ما اعرف عن هالموضوع

-زين اكلج صدك خالد جان يحبج الاتذكره بس انت جنت تحبيه و تكولين ما يحس بيه و ما يريدني يعتبرني صديقته

-ولهسه يعتبرني صديقته

-مو عمتي ذاك اليوم تكول ام رافد جانت تكول خالد يحب ديار كتلها عمة هو معتبرها صديقته لوما زوجها على ايده

تحجي وياي همس، تقربت اكثر و كالت :- زين احجيلي الصدك انت جانت عندج علاقة ويا احد بالجامعة

-فترة و انتهت

-عافج لو انت عفتيه

-تعاوفنا اثنينا

-لعد على شنو حبيتو بعض

-جان يتمر عليه هواية فتعاركنا بسبب هالموضوع و تركنا

-هاا، اي احسنلج

كمت للمطبخ و صحت على امي :- ماماااااا تعاي شوفي هاي اثار شمسوية

اجت هي بسرعة، لزمتها بالكراج و كلت الها :- عوفي بيت ابو رافد بحالهم لا تتحرشين بيهم ولا يوصلون يمج فكيني

-واخلي ابنهم هالساقط يفلت بفعلته و جن ما مسوي شي ؟.

-عندج غير حل ؟ شتسوين مثلا تعبت اني تعبت

-اطيح حظهم والله لسوي ليلهم نهار و نهارهم ليل

-عوفيهم رحمة لاهلج فكيهم

- لا والله ما اعوفهم اريد شويه يمشي على زواجج لا ما العب بحالهم لعب فلا اتسمى ميعاد

-يمه تريدين تفضحيني انت عوفيهم، زين مو تريدين رافد شلون تفضحيهم

- كلهم جوا قندرتي

-واذا جوا قندرتج شعندج متزوجته

-بعدين تعرفين

-راح يأذوني نسيتي هم بيت عم امجد

-وشيسوون درو بيج جنتي تحبين خالد و يصربهم وجع غصبا عليهم يرضون و المارضو هم طبهم وجع ناخذ الغايب و يا دار ما دخلج شر نشيل منا و نروح بغير مكان

-كلشي عندج بهالسهولة

-لا ياب لاوم نكعد ندك و نلطم على ناس استحسف اخليهم قنادر برجلي مو اهتم الهم

-يمه ما تهتمين انت عوفيهم اني اهتم سمعتي مو رخيصة هيج حتى ميهمني شيصير عوفيهم بحالهم لا اريد تنتقمين من خالد ولا من احد،من غير شي هو متخبل وما عايفني بحالي

- شسوالج ؟

- كولي شنو الما سواه، ليلة عرسي كلبها عزا و عيشني بخوف بس الله يعلم بي و البارحة خلاه يشك بوسام زميلي يحبني و عدنا علاقة و بليل فات لغرفتي لا حسب امجد يمكن يمي لو احد يشوفه متخبل ما مهتم لاي احد

-وتكليلي عوفيه لهالكلب شلون فات عليج ما كلتي لامجد

-شكول فهميني شكول طردته يكلي بيت عمي، سهران ويا رائد و احمد و صاعد لغرفتي هسه اني شسويله فهميني

-اني اتصرف وياه

-شتتصرفين يمه بس خليه يفك مني

-يغبيه صارلج شكد ساكته فك ؟ خليني اتصرف انت ليش هيج تتراجفين و اليكول احد حاط اسلاحة فوك راسج

-امجد هددني لو صار شي يكتلني

-يا فدوة مو تايهتله غير هو واكبر راس يطلع وراه اسحك راسه بالقندره، يهدد، يعني امجد يومين صارلج وياه وهددج شوكت هاي انت شو ما تحجيلي طايحة الحظ باقية تلطمين وحدج شبيج

-ماكو شي هو بيوم الشك بيه حذرني و كال لو لاحظت شي استخدم سلاحي

-تصرفه وياج شلونه اسلوبه

-اسلوبه حلو و ما بيه شي بس وجود خالد موتر الجو مخلي شاك ٢٤ ساعة

-خلي خالد علية وما الج علاقة

اندكت الباب فتت جوا صحت عمي، طلعوا عيال دعاء اخت امجد جايين يوصلون بيت ابو امجد وياخذون جنتهم وياهم

كعدوا شوية راد عمي يوكفهم على عشا ما قبلوا كالو جايين بس نسلم و نروح، كال عمي :- اصعدي كعدي امجد

صعدت لامجد كعدته و نزلت كعدوا شوية و حطت امهم ٢٥ بأيدي و اخذوا دعاء وراحوا، شوي البيت فرغ من هوسة الجهال لان عدها ٤ جهال صغار

بقت بس اسراء وبتها بالليل اجا رجلها اخذها وراح، انمها نايمة جوا بالغرفة الصغيرة وعمتي بغرفتها فاتت، اني وكفت اسوي جاي و جبن لاسامه حتى اعشيه و انام

سمعت ابو امجد و امجد طلعوا من الغرفة يكله :- نبه ديار ما تنزل بالليل اذا اخوك وولد عمك سهرانين بالبيت

-ليش شكو

-طلعت البارحة الفجر و الكا رائد واكع و خالد يضحك وهي واكفة تتفرج ما يصير

-يابه لازم تحط حد لاحمد الى متى هالشرب هذا تالي الليل هو ورائد مو حتى لعبت ارواحنا والله

-شسوي منعته فترة كام يبات عند جماعته زين اعرف جماعته شنو منين يا ابني عدهم مخدرات بنات يروحون يورطونه و نبتلي خلي يسكر بالبيت و ينهمد ينام ولا يروح بغير بيت

-جانت بس مها يابه هسه مها وديار زحمة يسكرون بالبيت

-انت حذر مريتك وليدي ولو اني والله لو ما مها واكفة و رايدة هذا الزواج فلا اقبل بس بعد هي ديار ووافقت ما كدرت امنع

-ليش اكو شي ؟

-مو كل الينعرف ينكال انت دير بالك والله كريم

-قلقتني اكو شي تعرفه يعني

-اني اعرف ديار من زمان و اعرف طينتها بس هاه هم جاي تميل لامها

-شلون يعني ؟

-اقرب مثال البارحة وين اكو زملاء يجون لبيت وحدة زميلتهم ؟!! والبنات الوياهم شتعرف عنهن مو عدنا يا يابع بنات و جانن كلية و هن بالكلية ما يطلعن مو عطلة و يتواعدن ويا زملائهن والله رايحة لبيت صديقتي

البيت الطلعن منه ما سألهن منو ذوله الطالعات وياهم وين رايحات وين جايات ما سال لا كال ؟ لو ما بنات منفلتات !! وما وراهن اليسأل

امجد :- كالتلي زملائها و بوجودي كلت ما بيها شي بس ما حسبتها هيج

ابو امجد :- لا احسبها و معن بيها زين امجد ..ديار مو مها، ديار امها ميعاد و ميعاد تعرفها شنو

-لا يابه ديار مو مثل امها، لو ما رابيه عدنا

-اخذ الوريدة و شمها تطلع البنية على ذويل امها، يعني بهاي شلتها لو تتفق وياهم و تريد تطلع ميعاد تمنعها ؟ لا جان طلعت والله يعلم وين تطلع و امها ما تحاسب، ما اكلك ديار مو زينه بابا بس عمرها ٢٠ ويحتاجلها متابعة و تعلوم و هي بعد مريتك صارت، انت على كيفك وياها بالهداوة علمها و دليها الصح

شنو هاي ريحة جاي يحترك ؟

جنت كاعدة بالمطبخ ع الكرسي و استمع اجا امجد :- هاي انت هنا ؟ الجاي احترك
مشى طفاه

كمت من مكاني ردت اطلع، صاح :- ديار شبيج ؟

هزيت راسي بمعنى (ما بيه شي ) و هميت التفت حتى اطلع وكف كبالي ابو امجد :- شكو

امجد :- الظاهر سمعتك، ترا ابوي ما جان يقصد.

ابو امجد :- اني لو اعرفها مو زينة جان ما قبلت اخذها لابني، و من زمان تعرفيني شكد احبج و اعزج

هزيت راسي بمعنى (اي)

-كل واحد بينا يابه يحتاج اليتابعة و يدقق وراه، هذا احمد و هو ولد خوف من اصدقاء السوء اقبل يشرب ابيتي ولا يطلع و من يطلع ازرف اذنه بالتحقيق وين رحت وويامن كعدت وانت صرتي بنيتنا و جاي اوصي بامجد عليه

-اني اروح اصعد

عفتهم و صعدت بس خنكتني العبرة هذا الكلام الما تهتمله امي و اني اهتم، رغم محد عابني بس صعبة اسمعهم يحجون على امي رغم الهم كل الحق

ما ادري ليش امي من دون الامهات هيج هواها ادور هذا و تعوف هذا، ابد ما شفتها فد.يوم صلت لو علمتني على الصلاة كل تعلومها زيني شوارب الزلم

لو شكد ما احجي وياها ما ترد
والكلمة التجيها تمسني لو شما تكون ، انجرح و انطحن طحن بس هي ما تحس ، كعدت بغرفتي، مدنكة و ابجي بسكوت، فات امجد

-صدك تحجين بجيتي من كلام ابوي

-ما كال شي غلط !

-ادري بس من خوفه عليج يكلي صونها و دير بالك عليها

هزيت راسي (اي)

-كافي لا تبجين يلا مسحي دموعج
دك الباب اسامة :- ديار جوعان

امجد :- جايب لفتين يم مها روح اخذلك وحدة و اتعشى

ديار :- لا اكوم اسويله عشا

اسامة :- شبيج تبجين ؟

-ماكو شي حبيبي
نزلت جوا و نزل امجد و اسامة وراي
امجد :- هسه شلون راح تبقين تبجين

-روح اصعد نام لا تشغل بالك وياي ما بيه شي

امجد :- زين لعد رايح اصعد انام، كملي العشا و تعاي انتظرج

-اخذت نفس و تنهد هزيت راسي (اي)
راح صعد تقربلي اسامة :- منو وياج ديار

-جاي ابجي من امي

-شبيها

-ابو امجد يحجي عليها ما اعرف ليوين راح نبقى نتعير بأمنا، ذاك ابوي ماكو سواية طايح حظها ما مسويها و محد يجيبه بالطاري و عايبينا بأمنا و امي ما مقصرة مخليتنا علج بحلك الناس

اسامة :- بس خل اكدر والله العظيم الا اكتلها

-لا تحجي هيج

-لا احجي لان امنا ساقطة ليش نضوج من الناس و احنا الضايجين منها ؟

-اسامة بعدك صغير على هالسوالف اسكت

-هو اني منتظر اكبر والله اكطع راسها

-كافي اسامة امشي

سويتله العشا وكعدته بالمطبخ ياكل، صاحت مها :- ديار امجد وين ؟

-نايم فوك

-وين فوك ؟

-ما ادري !هسه اصعد و اشوفه ليش

-بغرفتج مو ؟

-كلت الج والله ما ادري

-زين تكدرين تنامين هنا يم الجهال خاف يبجون بالليل

-اذا بجو بس خابريلي ع الموبايل انزل

-شعندج فوك انت ؟

-شبيج مها غير اصعد انام ترا دا تضايقيني بشكج لو ما انت الجبرتيني عليه

-ما كلت الج شي حبيبتي بس تكدرين تساعدين اصعد انام اني و جهالي فوك بغرفتي

-صعدتي البارحة و الليل منمتيه، دكعدي ارتاحي يا عيني

-كولي ما ترديني اصعد ورايدة تاخذين راحتج

-تصبحين على خير

صعدت لغرفتي، لكيت امجد متمدد ع الجرباية و متغطي لحد صدره و فاتح كلوب صفر و جاي باوع فلم

تقربت :- امجد لو تنزل يم مها احسن ترا كلش دا تتضايق من صعدتك هنا

-ديار وراي دوام والله البارحة ما نمت هي تون و كل شوية واحد من الجهال كاعد الليل ما نمته رحت للدوام اغفي

....ما حجيت هم حقه يريد ينام ، بس شلون افاتحه و اكله روح نام بغرفتك مو يمي، هو حجه :- شبيج ليش واكفة تعاي اكعدي

-ااا اروح اشوف اسامة

-هسه اجيتي من اسامة، تعالي باوعي هذا الفلم حلو

بقيت مترددة، باوعلي :- شبيج ديار ترة اني رجلج !!

-بس مها

-لا تتحججين بمها هي الزوجتني و حطت بحظني مرة و كالت اعتبرها زوجتك لا بيوم شكيت ولا كلت الها اريد اتزوج فلا تظلين تتحججين بيها

-مو تنقهر

-كلت الج لا تتحججين بمها ما اضايقج تعاي نامي وما راح اضغط عليج بشي

تقربت من السرير كعدت ع الحافة، هو رجع ركز ع الفلم، كمت، حجه :- ويين

-بس اجيب موبايلي احطهوع الشحن

-يلا

-رحت جبته جايني رسالتين من رقم غريب، كاتبلي ( هذا رقمي الجديد يروحي احفظي يمج مثل ما حافظة ابني ابطنج) و بالرسالة الثانية كاتب ( هو صح الشعور بالقذارة صعب بس هذا بعد اختيارج اني بس حبيت اذكرج كبل لا تنامين يروحي )

بلعت ريكي، حذفت المسج (يا ربي دخيلك سمم حياتي وايامي كلها، انسان جنت اذا اخاف الجئ اله هسه ما اخاف من غيره شلون بيه )

كمت افرك بوجهي اختنكت، تقرب امجد ، حظني من ورا :- شبيج حياتي

حسيت بجسمه طخني كشت روحي بساع عقجت جسمي:- ما راح اضايقج بس تعالي نامي على ايدي

-اريد انزل جوا

-اشش بلا تهرب و تعالي يمي ما اضايقج

بلعت ريكي و هو يسحبني يمه، خلاني بحضنه و هو بس بالشورت وجسمه قريب مني، جسمي كله كزبر كمت ارجف

همس:- لا تخافين ترا ما اذيج والله
حجاها و هو يتقرب من ركبتي، وخر مني بسرعة

بعدني من حضنه و اندار نام، جان كلوب صفر وما مدقق بجسمي بس من تقرب حس بالتشوه و ما استقبلني