-طلعي كتبج يلا خل اقريج، هذا شنو الضميتي وراج

-ماكو شي

-طلعي كتبج يلا، كعدت يمها و مديت راسي لكيتها مطلعه دفتر مذكراتي، صرخت بيها :- ليييييش اطلعينه حيوانه يعني ماكو احد يكدر يكتب مذكراته براحته الا تكعدين تنكين عليه، جيبيييي واءا اخذتي بعد اكص ايدج

بقت تبجي و تريده الها، كلت الها :- والله هسه لو تموتين هم انطيجياه ولي يلا

طلعت من الغرفة تبجي، كعدت ردت اكتب، صراخها مال البيت، كمت من مكاني:- تعاي اقري اني اجيبلج غيره باجر

عاندت الا هذا و ادك ابرجلها، كلت الها :- خب دولي

عفتها و سديت الباب حتى ما اسمع صوتها
كعدت اكتب مذكراتي مال هاي الايام
من يوم اللي اعترفلي خالد و لليوم بس اخلص منه اتصاب اكعد اكتب شنو حجينا و شنو سولفنا بشكل مختصر بس اذا بالليل كتبت يعجبني اكتب خواطر

واشكال الخواطر .. مرات حزين او رومانسي جريئ بس لنفسي لان هذا الدفتر بيه قفل يعني بس الية، رغم هاي اللوكية اثار تعرف تفتح القفل بس اني ما اقبل الها تلزمه و دائما اخذه منها

فكعدت اكتب مذكرات الأيام المرينا بيها هاي الفترة اني و خالد، التهيت اكتب اندكت الباب

فزت على حيلي اخذت جيس الجكليت و ركضت للباب و اثار كبالي تحاول تفتح بيه، فتحته وشفته كبالي شايله رافد هلهلت و اني ابجي و اطش جكليت رغم ما اعرف اهلهل، هلهلولتي طلع بس صياح

فوته رافد و كعده ع التخم بس هو كلش ما بيه حيل، بس مبتسم حظنته و بجيت بس امي و رافد صاحوا بيه

ميعاد:- هي لطامة جرح الولد يا يا يا

:- لا لا لا تحضنينه مو زين على جرحه خلي خلي يرتاح

-شبيكم بس ردت اسلم عليه

ميعاد:- بس سلامج لطم دضحكي فرحي للولد خلصانه روحه دومج ويومج تلطمين بوجه الله

ابتعدت من عنده، اندكت البابؤ اجا ابو امجد :- ها الله يساعدهم

ميعاد:- هلا هلا بأبو امجد شلونك شلونك زين شلون صحتك مها شلونها والله كلوبنا يمها

ابو امجد :- بخير بخير، الحمدلله على سلامة الولد
تقدم باس راس اسامة :- شلونك وليدي

اسامه هز راسه، امي حجت :- ديار جاي لعمج ابو امجد

ابو امجد :- لا لا اكعدي متغدي و شارب جاي اجيت اشوف الولد و اتحمدلكم بالسلامة

ياله ما دام اطمنا عليه زيارة المريض لازم تكون خفيفة ، حط جوا راسه ٢٥ الف و كاله :- كرت عينج برجعته ام اسامه

-الله يخليك حجي بس جيتك كافية من فدوة رحتك، خلي الفلوس لجهال امجد خطية

-عدنا خير من الله هاي هديه لاسامه و اني بس يكوم بالسلامة اشتريله موبايل

تشكرت منه امي، مشى ابو امجد و اشر لرافد يطلع كدامه، كام رافد طلع و امي بقت تباوع عليهم

اني كعدت يم اسامه بست خده و لزمت ايده :- مصدكه اني رجعتلي بالسلامة والله ردت اموت بلايك

بقى يحجيلي كوة شصار بيه و شلون خطفوه، العرفناه ان الخاطفه هو من جماعة ابوي رايد يهدد ابوي بيه

ردت انطي حلاوة كالت امي: مو زين على عمليته ، لازم شوربات خفيفة نسويله

فخليت الحلاوة بصينية صغيرة و طلبت من اثار ادك البيبان و توزع الحلاوة

ردت انطي لامي كالت:- لا لا حلاة هواي مسوية دايت ما اريد، فايته انام عينج على اخوج

-روحي

هسه فاتت تنام، اجت ام خالد و بتول وياها، دنكن الباب :- ام اسااااامة هنا

صحت :- هلا خالة فوتي فوتي

سلمت عليه امه بس ما باستني، بس بتول بوستني
طلعت امي:- هلا هلا فوتن فوتن
وتلكتهن مباوسن و دك شلونج

كعدن و هن يطمنن على اسامة، قدمت الهن كعك جايبة امي و جاي وكعدت يمهن ، باوعتلي ام رافد و حجت ويا امي :- هاهي ام ديار اعتقد كفينا ووفينا ياريت بعد تخلين ولدي يشوفون شغلهم خطية كن يوم الضاع اسامه و هم تاركين شغلهم ووياجن

ميعاد:- يا شجاج ام رافد

ام رافد :- اني تعرفيني شكد احبج بس اني والده و هم حقي اخاف على ولدي من اسماعيل

ميعاد:- يعابي اللي يعابيح يمرافد محد كال انت على باطل بس لا اني ولا بتي دكينا بابكم ولا خابرنا على ولدج وكلنالهم اوكفولنا هم ولد حلال ووكفولنا شلون بالله نطردهم ؟

-لا بس هاي هي لهنا و اكطعي راس الحية

ميعاد:- ماكو حية ان شاءالله و ان جان اني او بتي محد بينا واصل يم احد من ولدج وتريدين الصدك وكفاتهم وكفت زلم فدوة الطولهم ما نعرف انجازيهم فأذا ابالح اطردهم اعذريني ما اطرد احد متفضل عليه، خايفه عليهم ولو هذا مو سبب لان كل المنطقة ما شاءالله ما قصروا قابل اسماعيل ما عده شغل و عمل ظال يلكط اليساعدنا بس مع ذلك اذا ما رايدتهم فأنت امهم و امنعيهم مني يمج، و اذا ما تكدرين لا تذبين عجزج ويا ولدج براسي اعذريني لان ابيتي بلعتها منج الحجاية و اخذتها برحابة صدر الا لو مو ابيتي جان الي غير كلام.

كامت ام رافد :- اني وصيتج و خليها ابالج حتى نصير صريحين من البداية اذا بتج مفكرة بخالد فكطنه و خل تشيلها من اذنها ما اقبل ابني يتزوج بتج ما تناسبه

ميعاد:- هههههههه والله يا ام رافد هاي بعدج شايفة ولدج ولد الامير اتشارلز وواحدهم الامير وليام ههههههههه

ترا بتي طالبة قانون وباجر عكبة تتخرج و تاخذ اليناسبها لا حاطة ابالها زواج ولا مخليه بعقلها تتزوج واحد اقل منها و ما مخلص جامعة

وبعدين ابنج شنو حتى يناسب بتي عمره حيخش بالاربعين و ما عنده شغل غير سايق عد بتي ومطلك و بناته بركبته ، اني خالد احبه بس كلمن ياخذ اليناسبة و اعذريني ابنج مو بمقام بتي

... كلش ضاجت ام رافد من كلامها، طلعت و هي تكللها :- سوي الزين و ذب بالشط صدك لو كالو عين ابنادم ما يغزر بيها غير التراب

بتول بقت تتحاجه ويا امي و تكله :- خاله هالكلام ما مقبول منج

ميعاد:- يشهد الله يا خالة معزتج بكلبي من معزة ديار بس انت شفتي تصرف امج وشلون تقلل من بتي و شايفتها زايده على اخوج لا احترمت عتبت بيتي و لا احترمت شدتي و اني طالعة من مصيبة و هاي جيتي من المستشفى

بتول:- ميخالف خالة تعرفيها لامي تخاف على اخوتي ما عدها غير هالتلاثه

-والله خاله تخاف عليهم خل تجومهم و تگابلهم مو ما تكدرلهم و جايه تحاسبنا و تسمعنا كلام خشن و احنا بحالة مو مال نتحمل

بقت تتعذر بتول و طلعت، سدت الاباب امي و هي تهز بأيدها، حجيت :- ليش هيج حجيتي على خالد ما يستاهل هالكلام

-ادريه ما يستاهل بس امه تستاهل، شايفته علينا هارون الرشيد لا ينشاف ولا يتكابل و النسوان تتمايله

-شعليج بأمه هسه اذا سمع اني شگله ؟

-كليله امي تعتذر عن الكلام بس حجت هالحجي حتى ترد امك لان امك عيرتنا بوضعي

-بس هي ما عيرتنا

-ولج ما سمعتيها و هي تكول بتج ما تناسب ابني، اشو هو مطلك و جهاله عنده و انت ارمله يعني وضعج احسن منه بس هي تقصد وضعج بكلمة ما تناسب ابني ، كلابه الدنيا اي والله كملي جامعه لاخلي اكبر شارب جوه قندرتج

-اني لا اريد اشوارب ولا اريد تردسن على امه خليها شما تحجي تحجي، بس مرة ثانية لا تمسين خالد بحجاية

ميعاد:- ما تولين من كدامي دوليييي

عافتني ومشت نامت، وره شوية اجا خالد النا للبيت شايل علاليك فواكه و كعك النا و تحمدلي بالسلامة على رجعت اخوي و كومته بالسلامة، وضعه جان كلش طبيعي ارتاحيت من ما تأثر بحجاية امي

عاف العلاليك وراح، بقيت كاعدة يم اخوي
.......

بتول :- جانت امي منتظرة خالد على نار حتى يجي و تكله ميعاد هيح كالت عنك، ورنا بكم ساعه فات هو تعبان، حط المسواك بالمطبخ و صاح عليه

خالد :- بتووووول

-ها خوية

-هذا المسواك صفي و صبيلي غدا ميت جوع ما متغدي

ام رافد:- اكعد خالد رايدتك بحجاية

خالد :- يمه والله تعبان ما بيه خليها غير وكت

-كلت الك اكعد

-احجي على السريع شكو شصاير

-رحت لبست ام ديار اتحمدلها بالسلامة واكلها احنا كفينا ووفينا ابعدي عن ولدي تدري شجاوبتني

-يمه صدك جذب رايحه كايله للمرة هيج تره اذا مو اقاربنا هم جيرانا و اءا مو جيرانه فهاي انسانية شلون تروحين تكليلها هيج

-اسمع انت اسمع ابو الانسانية ، شايف شتكلي ؟ تكلي والله ابعدي ابنج خالد عن ابني ترا ما يناسب بتي هو خلك سايق لبتي و بتي طالبة قانون و هو واحد مطلك عايب بناته على حالة ما يناسبها لا تخلين ابنج يلعب بعقل بتي

خالد :- هويت راسي و كلت الها :- اكو شي ثاني لو هذا كل العندج ؟

رافد :- يبو قرار و انسانية مخلص ليلك نايم ابابها تحميها و هن شايفاتك خلك سايق عدها ولك هاين نفسك وياها لييييش

-بتول ماكو داعي بعد تسويلي غده، تزقنبت وشبعت

... عاف و طلع
بتول :- خالد خالد معليك بحجي امي، تعال هنا
يمه ارتاحيتي هيج من زقنبتي الولد و طلعتيه

ام رافد :- عوفي يتزقنب ولا يبتلي بالمشوهه و امه الدايحة

بتول:- اي ظلي زقنبي عود من يطك ويسافر ظلي نوحي و كابليني ظلي ...

............

ديار:- نومت اسامه بمكانه و رحت حتى انام، طلعت المذكرات و كتبت البداخلي كله عبرت عن الضيق اللي اتضايقته من كلام امي لان مست خالد

واني اكتب اشتاقيتله، رمشت عليه ما خابر
رمشتله مرة ثانية ماكو ، كلت خاف ما انتبه
رحت اخذت الموبايل من راس امي و طلعت للكراج خابرته مرتين يلا بنهاية الدكة جاوب

خالد : الو

-هلو حبيبي رمشتلك اكثر من مرة مجاوبت

-ما شفت

-وخابرت مرتين يلا رديت

-و هاي رديت ديار كولي

-شكول اشتاقيتلك و خابرت

-همم و غيرها

-غيرها !!! شنو ممكن يكون ؟

-ديار تعبان هسه، ما اريد يطلع من عندي كلام اتندم عليه بعدين فخليني هسه

-امك سمعتك الحجي يعني

-ولا يهمج لا يظل ابالج، يلا مع السلامة

-خالد اوكف اوكف

-كولي

-ترا والله ......... قاطعني

-ما اريد احجي بالموضوع

-بس اسمعني والله اني

-ديار لا تلحين بالموضوع و اقفلي

- الح !!!

تنهد :- كلت الج تعبان وما اريد يطلع مني كلام اتندم عليه، اني اهدئ و اخابرج وخاف تكولين زعلان مني لا ما زعلان و اني احبج و اموت عليج بعد ؟ بس قفلي الموضوع بداعتي و عوفيني هسه

-ماشي
حجيتها و اني خنكتني العبرة

حجه :- لا حول ولا قوة الا بالله ليش دا تبجين

-ما ادري
بجيت

تنهد:- ارتاحي و اخذي راحتج باي
قفله مني و هو مختنك ، كعدت ابجي، رحت لامي، حطيت الموبايل يمها بقوة، فزت :- اسم الله الستار شبيج فززتيني

-كلت الج خالد راح يتضايق من الموضوع

-وهاي مفززتني على مود خالد من طاح حظج، انوب سطرته للموبايل بس فلوسه بكدر راسج يالغبية

اخذت الموبايل تگلب بيه

عفتها و طلعت منها متنرفزة و دموعي بعيني، كعدت بغرفتي ابجي، لكيته مخابر عليه مرة، رجعت رمشت عليه ما خابر

انتظرته يخابر لحد ما نمت و هو ماكو..
ثاني يوم الصبح، هو بالعدة يمر عليه اول وحدة، بس اليوم جايب اللي بالفرع الثاني يلا جاي عليه مصعدني وفر على بقية البنات اخذهم بدون اي كلمة حتى صباح الخير ما گالها، تنرفزت من تصرفه بس ما حجيت بقيت ساكته طول الطريق

وصلنا للجامعة نزلت اني اول وحدة و منتظرته يحجي، انتبه هو بس بعد طنكورته كابه فما يتنازل و يبادر بالكلام

اخذنا محاضرتين و اتفقوا الشلة ان يطلعون يتغدون، فطلبوني اطلع وياهم، فوافقت اطلع اتغدا برا بمطعم

طلعنا برا الجامعة جان المفروض نطلع اني و مريم و صديقتي حوراء بسيارة وسام و غير بنات ويا حسام و مهند. بس الصار حوراء راحت ويا مهند و مريم كالت

:اني راح اروح للبيت انتو روحو اتغدوا

وسام :- مريم لا تخربيها اصعدي و خلينا نتونس

مريم :- لا اعذروني والله بس اليوم بيت عمي عدنا و اني نبهتني لازم ارجع

-لج يابه بعد للدوام ساعتين و يخلص لا تعقديها اصعدي

ديار :- اصعدي قابل اروح لوحدي اصعدي

-لا والله ما اكدر امي خابرتني لازم اروح

اتعذرت من عدنا و مشت، حجه وسام :- اصعدي ديار

-بس

-لا بس ولا دبس لا تخربيها انت اللخ

-هو وينه المطعم

-يابه هيانه قريب اصعدي

صعدت وياه و رحنا للمطعم،طلبنا بيتزا و قواطي بيبسي و تحلية وافل

الصراحة رغم اني مو كلش اختلط وياهم بس كعدت الشباب حيل حلوة تحس روحهم طيبه و بلغتنا نكول عليهم حشاشين هواي ينكتون ويضحكون لدرجة كمنا نبجي من الضحك هاي واني انطوائية بس بسرعة اندمجت وياهم

و اني بالكعدة اتصل بيه امجد، كمت من يمهم و رديت :- الو

امجد :- هلو ديار وين انت

-بالجامعة ليش ؟

-كلش محتاجج مها تعبانه و امي اتخربطت و رجعت للبيت و محد يم مها هسه

-هسه اخذ سيارة و اجيك نص ساعة و اني يمك

امجد :- اي فدوة ما يقبلون اضل يمها لان الردهه بس نسوان و مها وحدها فدوة استعجلي

-ماشي ماشي

رجعت للطاولة، الشباب متفقين كل شاب يتحمل مصاريف اكل البنات اللي اجو وياه، فصاح وسام :- بس اني ربحان اجت وياي بس ديار

ديار:- اني لازم اروح كلش اعتذر بت عمتي بالمستشفى ماخذه جرعة كيمياوي ومحد يمها

صاحوا الشباب:- لااا مو كاعدين

وسام :- كملوا كعدتكم اني اني اوصلها

ديار:- لا كلش اشكرك اني اخذ تكسي

-مو عيب اجيتي بسيارتي و ترجعين بتكسي ؟ امشي امشي كل عذر ما مقبول

سلمنا عليهم و طلعت ويا وسام، صعدت وياه، كال :- بمدينة الطب مو ؟

-اي

اخذني لمدينة الطب وصلني للباب، سلمت عليه ورجع ، دخلت اني خطية امجد جان على نار ، من اجيت صاح :- اييي الله جابج يمعوده فدوة روحي يمها كلش خطية

ديار :- لا يظل بالك هسه اني اروح يمها

رحت يمها خطية لكيتها متقيئه و النسوان ماسحات الها بس ما مدلات الها، و هي دموعها بعينها

تقربت يمها ابتسمت:- ليش هالدموع ليش

مها :- اني تاليتي هيج يصير بيه ولج ديار

-مسحت دموعها و بست راسها هذا الانسان بكلشي يمل يوم مر و يوم حلو و هاي الدنيا خوما نريدها كلها ناخذها بحيل صدر

احجي وياها و اني ابدل الها، طلعت الها كلينكس مبلل مسحت الها و انطيتها خاولي نظيف تخلي جواها و رجعتها لنومتها حتى ترتاح

كعدت يمها الظاهر هي عرفت بيها سرطان من اللافتات اللي مكتوبة على حيطان الطابق خاص بالكيمياوي، ظلت تشكي و اني اصبر عليها و اكولها :- ترا دا تخسرين نفسج هيج اني اعرف هواي ناس تشافوا من هذا المرض لان جانوا اقوياء و تغلبوا عليه هذا المرض بالات يعتمد على الحالة النفسية اذا حالتج النفسية تعبت تسوء حالتج و هذا الما نريده صيري قوية و خلي القران و اقري حتى ترجعين لجهالج بخير و سلامة

بقت تهز راسها، كمت من يمها و كلت الها :- اني رايحة اغسل ذني الملابس و اكول لامجد يدبرلج قران حتى تقرين بيه

مها:- ياريت على الاقل تهدا اوجاعي بكلمات ربي

-ان شاءالله

......

خالد:- اجيت على البنات حتى اخذهم صعدوا كلهم بس ديار ماكو، خابرت عليها ٥ مرات ما جاوبت ، حجت دنيا

:- اني اعرف مهند زميلها بالقسم تريد اخابره حتى اعرف هم طلعوا او لا ؟

-خابريها ..
خابرت هي و اني خابرت امها خاف هاي لان اخذت بخاطرها الصبح طلعت وحده، كالتلي امها :- بعدها ما جايه للبيت

الفتت على دنيا و هي تحجي:- ها اوك اوك ماشي

خالد :- ها ؟

دنيا :- جانت طالعة هي و الشلة للمطعم مناك ماخذها وسام و رايحين يتونسون وحدهم

خالد:- منو هذا وسام ؟

دنيا:-هذا شبيك اللي ذاك اليوم تعارك على مودها، هو كل القسم يكولون يحبها و دافعلها و هسه عايفين الشلة بالمطعم و طلعو لوحيدهم......

☆☆☆☆☆☆

#اتمنى_ان_افعلها

الحلقة_25

ستدرك الشمعة يوما" بأنها إحتضنت خيطا" أهلكها...!

........

ديار:- غسلت ملابس مها و اجيت شفت الهم مكان و شريتهم، عدلت كعدت احجي وياها، لهناك اتذكرت اني ممخابره امي ولا خالد ولا مبلغتهم اني طلعت من الجامعة و اني هنا، ساعدت مها حتى تتمدد و تنام

رحت لجنطتي، لكيت ٣ مكالمات الخالد و مكالمة لأمي، خابرت خالد ما رد: هذا شنو بعده مطنكر ؟ زين اني شعلية امي غلطت اني ياهو مالتي، اخ يا امي اخ

رجعت خابرت امي و كلت الها اني بالمستشفى ويا مها

ميعاد:- و اخوج يمه منو اله ناس خطار يجون و البيت ما فارغ واختج هاي عدها املاء تعوفيني وحدي ؟

-يمه مها محتاجتني حيل خطية، اذا تريدين خابري على بتول تجي يمج هم تقري الجهال و هم تتونس وياج ما تكول تكيف

-لا بعد الحجته امها البارحة و اطلب منهم غدي، بس لا اني اعرف منو يدزلي احد يساعدني

-منو

-شيخ الشباب

-منو هذا شيخ الشباب

-روحي ابقي يم مها و معليج اني احلها

-ماشي

كعدت بمكاني اخابر عليه ما يجاوب

.......

خالد :- رجعت للبيت كلش متضايق الدنيا طالعة من عيني، فتت للاستقبال هدوء ماكو احد من الجهال، تمددت على بطني و حضنت الكوشة مال التخم و ضميت راسي بيها.

فات رافد كعد يكلب بالموبايل، و اني اتكلب بمكاني و افكر :- معقوله ديار تسويها تطلع ويا واحد ما تعرفه، و ليش لا ما جانت تطلع وياي و محد يدري بيها اصلا لا حسيب و لا رقيب اشلون ما تطلع براحتها

بس المفروض اتكلي ليش ما خابرتني گبل لا تطلع حتى ما فكرت تنطيني خبر حتى ما ابقى اوكف الخط و انتظر

جاي افكر، حجه رافد :- خااااالد

رفعت راسي :- ها

-بيك شي محتاج شي

-لا بس تعبان

-من شنو تعبان

-هسه اجيت من الخط و شوية اريد ارتاح

-صاير شي بينك و بين ديار اذا على امي لا تحطها ابالك، قرر و احنا وياك

-البارحة امي سمعتني حجي وكف ابلعومي

-و اللي هو ؟

- سولفت اله

-خاف حجاية بس رادت تغث امي بيها لان هيج حاجتها وبعدين سوالف نسوان يا اخي تشيللها هم

-مو هذا اللي شايله هم

-لعد شنو

-قبل يومين ديار متحاجية ويا واحد بالقسم و اكو زميل الها مدافعلها، حسب كلام البنات الوياي بالخط يكولن يحبها، اليوم لما رحت لديار للجامعة حتى اجيبهم خط ، عرفت هي طالعة وياه

-شنو القصة

-لا كايلتلي ولا منطيتني خبر

-تشك بيها

-ما اشك بحب ديار بذرة بس تصرفها كلش ضايقني

-هي كالتلك اني طلعت

-لا اخابرها ما ترد وحدة بالخط خابرت و كالت طالعة وياه ، درت السيارة ورجعت

-ما رجعت خابرتها ما فهمت منها

- لا اخابر ولا اريد افهم اللي عافتني وراها وما سألت، عليش ادور وراها ؟

-يجوز صار فد ظرف يا خالد لا توكفها ع الحافة، موبايلك جاي يدك تره

-هي و ما اريد ارد

-درد و شوفها وين

-خليها هسه لما ارتاح اني اخابرها

-استلم .. امها خابرتني

-انت شعندك ويا امها بس لا ناويها صدك ؟

-اششش، الووو هلا ام ديار شلونج يابه والله الحمدلله، خير ؟ ليش ديار وينها

خالد:- سمعت كال ديار شلت راسي و باوعتله

حجه و هو يرفع حواجبه و يهز راسه :- هاا ديار بالمستشفى اييي... ويا مها ؟ خطية متخربطة ، الله ينطيها ، سهلة سهلة هسه اني اني احاجي بتول
بكيفك اذا ما تريدين دزي اثار و اني اخلي بتول تقريها، ان شاءالله، لا لا اطمني

سد الخط:- شفت يالناقص البنية رايحة لمها متخربطة يمكن موصلها الولد ترا ما بيها شي ؟

هزيت راسي ورجعته للمخدة، حجه :- رد على ديار

خالد :- خليها هسة نشوف وين تصفى

جاي نحجي و صرخت بتول و صرخت بتي سارة وياه، فزيت من مكاني ركضت الهن، سارة بتي رايدة تحمي مي حتى تسبح السخان عاطل و بدل ما كيله العمتع هي محمية بنفسها و من جارته واكع على جسمها

فزعت بتول تنزع بيها جريت جرجف لفيت بتي و هي تصرخ خليتها بالسيارة و وصعدت بتول و رافد وياي شغلتها و طلعت لأقرب مستشفى، حرگت گلبي تلوع و تبجي من الألم و تصرخ

:- بابا راح اموت بابا

اني اسمعها و اسوق بكل سرعتي و الدم فار بجسمي، طلع واحد كبالي صرخ رافد : على كيييييييفك خاااالد

دست بريك اختضت السيارة بينا ردت ادعمهم كلهم، حركت كام يصيح رافد :- انزل اني اسوق مخبل جان دعمتنا انزل

نزلت بسرعه و كلت اله حول، اخذت سارة من حضن بتول و خليتها بحضني و اني اهدي بيها و ابوس بأديها و امسح على شعرها و احجي:- وصلنا باباتي والله وصلنا

وكف اباب المستشفى نزلت شلتها و ركضت بيها جوا، دلوني الولد منين افوت اخليها، مشيت كال الممرض تعال جيبها هنا، حطيتها ع السديه و هو كام يعقم بالمكان و يفحصها

جان الحرك خفيف بس حمار صاير بيها، بس منطقة البطن شوية متأذية مسلوخ الجلد منها ، ما اتحملت اشوفها و هي بهالحالة و تصرخ من كل گلبها

طلعت برا و بتول و رافد لازميها، بقت تصيح :- ولك بابا تعااال بابا حبيبي

ما تحملت رجعت الها و دموعي تغرغر بعيوني، حطيت راسها بصدري حنتها و هم يعقمون بيها، خلص كال :- راح تنام انطيتها مسكن لا تخاف عليها

شكرته، شلتها و طلعنا هي كامت تون خفيف، بقيت ابوس براسها و اكولها :- شتريدين اشتريلج كولي و هسه اني اجيبه الج

سارة:- اريد ماما
وبجت حيل

دمعت عيوني عليها، بست كصتها و كلت الها :- هاج احجي وياها
دكيت رقم ضحى، دكة دكتين ردت، خليت الموبايل بأذن سارة

بقت تحجي وياها و سارة تبجي و ذيج تخبلت شلون بتها تبجي، كامت تصيح :- شبيها بتي خالد شصاير وياها

سارة لازمة الموبايل و تبجي، حجيت من مكاني:- احتركت بالمي بس زينة هسه ما بيها شي

كامت تصرخ و سارة تصرخ وياها تريدها، اخت الموبايل من سارة، قفلته و كلت الها :- كافي بابا كافي حبيبتي هسه ترتاحين
بقت لازمه الموبايل و حاضنتني و بدت تهدأ و تسكن

و رافد يهد و يكول :- ما بيها شي لا تخاف بسيطة يومين و اطيب

بتول :- والله يا خوية شلعن كلبي عنيدات منين ما اجيبهن ما يهدن

خالد:- شجابها على المي حار

بتول:- رادت تسبح كلت الها عمة السخان هاطل و الجو بارد بالليل احمي مي و اسبحكم كلكم و تنامون حتى باجر جمعة يجونا خطار انتم نظيفين و دفيانين

ما ردت مني تعرفها عنيدة رايحة مطلعة الجدر تارسته مي و مخلية الكرسي و حاطته ع النار

-محد شافها منكم شنو القضية

-شفت الجدر بس عبالي امي حاطته من طبيت للمطبخ شفتها خالة الكرسي و تريد تشيله ويا ما صحت ديري بالج وخري انكلب عليها هم زين بس حامي مو فاير جان جسمها انعدم ربك ستر على هالبنية

رافد:- ابوي و امي حركوا الموبايل اتصالات خطية كلت الهم ابلغكم بس نطلع، هاك خالد اخذ احجي ويا امي طمنها

سحبت الموبايل من عنده ، طلع ابوي :- هاي يابه

ابو رافد :- ولك شصار وياكم البنية شلون حالها

-زينة يابه زينة هسه احنا جايين بالطريق

-شكالولكم عليها شلون الحرك من اجيت و امك حجتلي احتركت بكاعي ما اعرف انتم وين و الحگکم شلونها البنية

-ما بيها شي شوية البطن متأذاية بس ان شاءالله بالعلاج اطيب

احجي ويا ابويه و اشوف الموبايل يدك بأسم ضحى بس جنت خاله صامت لأن ديار ترد، بس هم ما رديت على ضحى كلت اوصل للبيت و احجي وياها

... وصلنا للبيت صعدت سارة فوك نومتها بفراشي و العائلة كلها ملتمة تريد تعرف شبيها، نورة لزمت برجلية كامت تبجي،غطست سارة و شلت نورة و كلت الهم

:- اطلعوا من يمها خلوها ترتاح

طلعت وضحى تخابر، رديت عليها :- الو ها ضحى

-بتي شلونها خالد الله عليك بس كلي

-زينة نايمة هسه ما عليها شي لا يظل بالج

-اريد اشوفها كلبي فرفح عليها فدوة رحتلك بس اشوفها

-تعاي شوفيها محد لازمج

-جيبيلياها للبيت

-البنية تعبانة ولازم اخليها تحت العلاج

-خالد مشتاقة لبناتي فدوة

-كلت الج تكدرين تشوفيهن

-اني تعذبت بعدك هواي والله ما مرتاحة ، حتى لو تخليني خدامة لامك راضية والله بس رجعني

-ضحى هالموضوع انسيه، انت مرة متزوجه و عندج طفل،و اني مو خالد الاول بنت الناس موعدها بعرس و منتظرتني اكون نفسي حتى نتزوج

-ما اتحمل والله اذبح روحي خالد انت تعرفني شكد احبك

- شتحبين يربج روحي كابلي رجلج مو مليان فلوس و احسن مني مو هذا كلامج الي لما انطيتني البنات و كلتي اخذت الاحسن منك

-والله ما حلى رجال بعيني غيرك ولا حبيت، ورجلي هذا جاي امشي بأجرائات الطلاك ، خالد والله احبك

- اذا متأملة تطلكين و ارجعج فاخذيها مني لا تتاملين بهالموضوع نهائي، و تعرفيني اذا كلت كلمة ما ارد بيها، حطي عقلج براسج ولا تضحين بابنج مثل ما ضحيتي ابناتج، و هسه روحي لان عندي شغل مع السلامة

سديت الموبايل كبل، باوعته ٧ مكالمات لديار، ردت اخابرها، بس كلت لا بعدين مو هسه، جاي اضمه رج بأيدي، اتصلت ديار، رديت

خالد :- الوو

ديار:- يراد اذبحلك ذبيحة يوم الرديت

-شنو شرايدة ؟

-شرايدة !!!

تنهدت:- ديار

ديار :- لا هاي هي خلص بيباي خالد

-مو وك...... قطعت الخط
استفزني تصرفها، رجعت خابرت عليها، ردت ، كبل لا تحجي صحت :- تصرفج عدل و اعرفي منو اللي اتقفلين الخط ابوجهه

-ضايقك تصرفي بس اني ما لازم اتضايق منك لأن متغير عليه بسبب كلمة تمي كالتها اني ما الي ذنب بيها، و استفزك سدة الموبايل بس لما اني اتصل بيك ب٢٠ مرة عادي ما لازم اتضايق مو ؟
خالد لا تكون اناني

-اني اناني يعني!!

-عفت الكلام و الجريدة السردتها الك كلها و شكلت على اخر كلمة، كافي خالد

-هسه المطلوب مني شنو

-اعرف من شنو متضايق

-والله ياريت تسألين نفسج طرطور اني اجي للكلية و الكاج طالعة مدري وين و ما الي خبر ولا مخابرتني ولا كايلتلي و مخليتني واكف اتنطرج بالخط

-اعترف نسيت و اني اسفة

-مو بس هاي

-شنو بعد ؟

-اسألي نفسج

-خالد كافي تعبت

-و اني المرتاح مو؟

-الظاهر انت هسه عصبي من تهدئ خابرني

-مو عصبي

-لا عصبي

-جاي اكلج موووو عصبي

-واضح واضح ، هسه شسوي ؟ الاحجي تتضايق و اذا سديته تتنرفز لازم اصف بالاتصال مو ؟

-بالضبط هيج تظلين لا تحجين و تعاتبين و متقفلين الخط

-و تالي ؟

-الله العالي

ضحكت:- تدري انت مخبل !! احد كايلك هالمعلومة كبلي لو لا ؟

-لا

-اي لعد اعرفها مني مخبل والله

-مو عيب تغلطين على واحد اكبر منج

-مالتي و بكيفي عندك اعتراض ؟

-زين انت تدرين كلما تكبرين السانج يصير يشبه امج، احد كايلج هالمعلومة قبلي لو لا ؟

-لا ووو ما اريد.

-بس صدك صايرة تشبهينها من تتغازلين

-بعد ما اغزل توبة

-اني كلت الج تشبيها مو لا تتغازلين، اكو احلى من السان امج ؟

-ذم لو مدح مفتهمت

-بكيفج شلون ما تفهميها

-بعدك مطنكر و حاب تغث اروح اشوفها ما شتريد و من تهدئ عود خابرني

-الخط لو انقفل تتندمين

-و هسه شلون كلماتك تغث و ما تقبل اسد الخط شسوي !!؟

-ما عندج شي ضامته عليه ؟

-مثل شنو ؟

-تذكري

-لا والله ماكو شي !

- زين لعد مع السلامة

-كبل لتروح غازلني حتى اتاكد انت ما زعلان

-ما اغازلج بس اني مو زعلان

-اخ ربي راح تجلطني بعنادك و طنكورتك هسه شلووون

-احبج

-هسه ارتاح گلبي واندليت دربي ، لو بيدي اهلهل ولك

ضحك :- يخبله انت يخبله اموت عليج

-احبك كلش كلش كلش هواية

ضحك و اني ضحك و نهينا الاتصال بضحكة، اخ يهالرجال بلحظة يخليني اسعد وحدة و بلحظة ثاني يكرهني بروحي اكوم ما اطيق احد لأن هو مطنگر

بقيت لليل يم مها، هنا بالمستشفى، الساعة ٩ الكل يهدأ و تنسد بيبان الرده و كل المريضات و المرافقات يتمددن بمكانهن و لو ينامن لو يسولفن

اني كعدت اقرأ بالكتاب الجايبته وياي استغل وكت بما انو مها نامت و اني ما جايني نوم، دك موبايلي

باوعته خالد، رفعت الخط اجاني صوت بنية هافت و هي تكول :- الووو

-منو انت ؟

-اني الگبل اسنين سويتي بيها نفس الموقف هسه الجاي اسويه وياج

-ضحى !!

-ايه ضحى تعرفين تالية كل رجال لبيته و عياله و انت بره

- يا رجال تقصدين بيه، رجلج لو خالد، حدديلي بللضبط منو هو ؟

-قصدج طليقي السابق

-طلكتي يعني

-اعتبريني اطلكت و مرجعي لبيتي و رجلي و خلي يكون هالشي بعلمج

-اذا كدرتي تاخذينه بالعافية عليج و هسه اترخص نعسانه، و ياريت ترجعين الموبايل لخالد متعودة ما انام الا يغازلني رغم هو غازلني الظهر بس تعرفين مغازل الليل يختلف

ضحى :- دصبري عليه و شوفي شراح اسوي والله لاخليج تتمنين اسم خالد و ما تلكينه

-بيباي سلميلي عليه هوايه اذا شفتي

سديت الخط منها و كوة لازمة اعصابي منها: شوصلها الخالد؟ ومنين كدرت تاخذ موبايله

عفت كتبي و حطيت المخدة و تمددت، بس كمت اكلب بفراشي جني وحدة متزوهرة :- معقوله اطلكت صدك !! حتى لو اطلكت اعرف خالد كلش زين مستحيل يقبل بيها

كمت من مكاني، رمشت عليه
ما رد ، بقيت انتظره لليل ماكو ما جاوب
كوة للصبح عيني يلا غفت الساعة ٥، ب٦ فتحوا الباب المنظفات و كعدن بينا حتى نكوم يغسلن الكاع و يعقمن الردهة

ميته من النعاس كوة مفتحة عيوني، كعدت يم رجلين مها، اجن الدكتورات فرن ع المريضات، كتبت الها علاج و مسكنات و كالت:- هذا تاخذوه هسه من المستشفى و بهاي الورقة علاج من برا، و ب٩ الصبح روحي انزلي كمليلها طبلة الخروج

-يعني كتبتيلها خروج دكتورة ؟

-اي ماما خروج

-شكرا
فؤحت كلش من كالو خروج، خابرت على امجد بلغته، كال :- نص ساعة و اني يمكم

جابو ريوك عبارة عن بيضة سلك و قطعتين جبن مثلث و كلاص سفري جاي حار، اخذت بس كلاص الجاي حتى اصحصح بلكي يجي امجد حتى يسوي طبلة الخروج و اروح للبيت انام

فوك الساعة يلا اجا امجد كام يتعذر يكول ازدحام كوة فتت ، انطيته الطبلة و اني بقيت الملم الغراض
كملها ورجع النا خلينا مها بالكرسي و طلعنا خارج المستشفى صعدنا السيارة و رحنا للبيت

وصلنا وصعدتها ويا امجد للغرفة ، لكيت غرفتها هوسه خطية نظفتها و اخذت الملابس الوصخة خليتهن بالغسالة على ما نظفت نشفن، شريتهن و اترخصت منهم ارجع للبيت، جان الجو بيومها مغيم جزئي و الجو كلش بارد

طلعت من البيت لكيت رافد كبالي كاعد يشتغل بسيارته، رفعت ايدي و اني اكوله :- السلام عليكم

رافد:- هلا ديور شلونج

-الحمدلله ، خالد وينه ؟

-جوا نايم ليش ؟

-موبايله خابرتني منه ضحى و استغربت

-مو بته احتركت ...

-يااااا منو بيهن

-سارة والله

-اشلون احتركت

-ما كالج ؟

-لا والله جنت بالمستشفى ، وين سارة هسه

-اجت ضحى البارحة حتى تشوف بتها و توسلت بخالد تاخذها يمها و اخذهن خالد وصلهن هي وبناتها لبيت اهلها و بقى البنات يمهن وموبايله ناسي ابأيد بته

-خطية والله ولا ادري شوكت هالحجي

- البارحة الظهر تقريبا

-العصر جنت احجي وياه بس ما كالي

-ديار اني ما اريد ادخل بيناتكم بس خالد متضايق من روحتج ويا زميلج اللي بالجامعة

-زميلي! حتى مو على بالي ولا كايله لخالد على هالموضوع منين عرف

-ماكو شي ينضم خاصة هو يشتغل خط لبنات كليتج، حاولي تبرريله الموثف تراما راح يكلج احجيلي و اذا ما حجيتيله يضمها الج بگلبه

-مشكور ياريت تكله يجيب موبايله حتى يطمني عليه

-ان شاءالله

مشيت للبيت و اني كلش مقهورة على بته، بس صفنت هو منين درى اني رايحة ويا زميلي، حتى رافد اكد زميلي مو طالعة مطعم ، عود يرجع موبايله و احجي وياه

رجعت للبيت ، سلمت على امي و بست اسامة و كعدت يمه اسأل عنه و اسولف وياه، حجيت ويا امي على اثار :- قريتيها املاء يمه ؟

ميعاد:- طلعت جمعة ما درت الها بال انوب بت المكرود خالد محتركة سمعتي

-اي هسه كالي رافد

-وين شفتي رائد ؟

-اباب بيتهم جاي يشتغل بسيارته

-ها

-رايحة انام لحد يكعدني اليوم كله ما شفت النوم، رحت للغرفة نمت ما كعدت غير على صوت اثار تتنغوص يم راسي، رفعت راسي :- شبيج

-اريد ربع

رفعت راسي حتى اكعد، انصدمت الساعة ب١١ وربع باليل :- كل هالوكت هذا نايمة ياااا يابه

كعدت اتثائبو طلعت يم امي، حاطة رجل على رجل بالمطبخ و تخابر، شافتني نزلت الموبايل :- هم زين كعدتي ست ، ابقي هنا اني صاعدة لغرفتي انام ديري بالج على اسامة

رحت كعدت يم اسامة :- ها شلونك

-ضايج كلش

-ليش ؟

-اجا ابوي قبل شويه

-شجابه ؟

-كام يهدد امي يريدني اعيش يمه و راح يرفع قضية وياخذني يمه

-خل يولي لا تخاف ما يكدر ياخذك انت بعدك عمرك ١٣ سنة ما اله حق يسحبك من امي لما تصير عمرك ١٥ القانون يخيرك انت وين تريد تعيش ويا امك لو ابوك

-بس ابوي تعرفينه ديار

-تعاركو هو و امي ؟

-مو عركة جبيرة بس هددها اذا ما ترجع تتزوجه ياخذني منها و امي تضحك عليه و تطرد بيه بس ما تعاركوا

-لا تشغل بالك نام انت هسه و الله كريم

نومته و ذيج العرمة بعدها تتنغوص تريد ربع بهالليل ، مشيت يمها:- تكومين تنامين لو احمي السجينة و اجويج ؟

كامت تباوعلي بطرف عينها و سكتت بس برطمت، رحت لحافظتي بلكت بيها ربع شفت اكو بيه بس خردة خمسمية و الف، شلت الخمسمية و كلت الها :- هاج بس صمي حلكج و كومي نام

كامت تصرخ :-ما اريد هذا اريد ررررررررررربع

-خب كومي لا ادفرج والله هاج اخذي باجر اشتري و انطمري بفراشج والله اذا سمعتلج صوت الا اخيط حلكج بمخيط لوگية

طمت روحها بالفراش و تتنغوص

عفتها و طلعت بالصالة رمشت على خالد مرتين تلاثة ما اتصل :- بالله هذا اشلون وياه كمت احصله بالحصالة

ظليت الليل ع التفلزيون افلام، وبين العب بالموبايل لحد ما نعست مرة لخ ورجعت نمت

ثاني يوم الظهر اندكت الباب، طلعت اني للباب حتى افتحه، طلعت ضحى كبالي:- شلونج عيني

-هلو ضحى شجايبج عليه ؟

اجت امي :- منو بالباب ديار
اجت :- هلو ضحاوي خالة شلونج عاش من شافج

ضحى:- هلو خالة الحمدلله

-فوتي ليش بالباب

-لا والله اجيت انطي هذا القلم لديار لكيته بسيارة خلودي كلت يمكن الها

-يا واخيرا خالد رضى يباوعلج اتذكرة يكش من اسمج

-المحبين كلشي يصير بيناتهم يتزاعلون و يتصالحون عادي اهم شي ما يدخل بيناتهم الشيطان

-يا بالعافية يعني اتصالحتو اي بالخير ، بس على كاري الشيطان خالة شلون اتصالحتو على حب الله لو نفسه الشيطان الدلاج على ام غسان سطرته بسحر و رحعته الج ؟ اعذريني خالة بس اني فضولية و فضولي يكتلني اذا ما اعرف

- هاي الشغلات انت ما الج دخل بيهن امنعي بتج من خالد و محد اله علاقة بينا

ديار :- بأي حق جاي تكليلي ابتعد من خالد و بصفتج شنو ؟

-هو جان رجلي

-جان و الجان راحت و ولت و احنا ولد اليوم، انصحج لا اطلعين ابطريقي بعد

ضحى:- تهددين انت

ميعاد :- خالة هسه لا ضيفناج و دخلتي ولا انت الهويتي الباب و شوفتينا كفاج الرايدته شنو على هالقلم مشكورة ورحم الله والديج ولو ما يحتاج سودة عليه خلودة ما عايفنا ينكل بهالمسواك و بهال مخضر

ضحى:- رايده احجي ويا ديار بسالفة خالة ما جاية اكعد و احجي وياج

ديار:- يوم ادخلي اني راح اشوفها شتريد

ميعاد:- اي ادخل، عود سلميلنا على ام غسان اذا رحتيلها مرة لخ

وفاتت:- شرايدة ضحى ؟

-تبتعدين عن طريق خالد

-وليش جاية اطلبين مني ليش مو من عنده ؟

- انت الواكفة كبالي و لاعبة بعقله ما مصدكة احد مباوع بوجهج لازكتله لزكة

-اني اللي لازكة ! هه
تركته الج و تركت حتى بغداد و طلعت و تزوجت و ابتعدت منكم و انت اللي ضيعتي من ايدج بسوالفج بقى سنين يشكي يمي من فراكج ويكلي اشتاقلها و رجعتي مرة لخ موتي حتى الشوك البكلبه الج و تزوجتي و هسه جاي تكليلي ابتعدي ؟

ليش من ابتعدت انت شنو سويتي غير انو خسرتي بعمايلج و على فكرة اعرف عنج اللي الكل ما يعرفه اذا هو طمطمها الج و كال بس سوت طاعة و هالسوالف ، يمي ما ضم و فتحلي كلبه و شكالي منج و اعرف بكلشي و ما استغرب قلة انسانيتج

اللي تعيرني بوضعي
مو غريبة عليج تسوين اعمال تموتين بيها بشر ولا غريبة عليج تشمرين جهالج و اطلعين و هسه بعد كل هذا رايدة ابتعد حتى ترجعين ادورين مكان الج بكلب خالد ؟

-انت شعليج السويت و الما سويت انت ما الج شغل، لا ادخلين نفسج بشغلات ما تخصج ؟

-لعد المن جاية وواكفة على بابي اذا ميخصني، ذاك هو بابه و روحي كوليله اللي تريديه و اذا اتقبلج و رادج وعد مني والله ما اتقرب منه ولا ادخل بيناتكم بعد و اتصل حتى بالعافية عليكم

-كلت الج ابتعدي منه و بس ما الج دخل بالباقي اني احجي وياه

-والله زمن يا ضحى تتذكرين يوم عرسي لو لا ؟
تتذكرين شماتتج و كلامج الي ؟
تتذكرين اذيتج ؟
دعيت عليج و جانت دعوة مظلومة و يا ويل الظالم من دعوة المظلوم لا احترمتي حزني ولا موقفي ذاك و دعيت الله ما يبقى الح محبة بكلب خالد اللي جاية تتشمتين بيه لان زوجني بيدة .. هسه جاية ادوريلج مكان بكلب خالد و تكليلي ابتعدي
ههه

انصحج لا تتقربين بعد ولا تجين لهنا ما يمكن اترك خالد ابد الا في حالة هو قرر يرجعلج كلت الج اوعدج ما اطلع بحياتكم بعد

ضحى:- لانج وحدة ما شايفة و دايحة و ساقطة انت و امج وخليها ابالج انت و خالد ما اخليكم تستمرون لو على كص ركبتي و خالد يرجعلي يرجعلي

-اللي يطلع بأيدج لا تقصرين بي، باي
طبكت الباب بوجهه، دخلت جوا ، اخذت الموبايل و دكيت عليه مرة مرتين ما يرد

اتنرفزت، ضربت الجهاز بالكاع :- هم ما يرد يا الله هم ما يرد

كتبتله رسالة ( الظاهر انت انت شاك بيه شايفه غيرك، رغم اني اشوف اشكال الوان النسوان يحجن وياك و يتقربن منك ما فد يوم شكيت بيك ولا حجيت بس اذا طلعت هيج مع الاسف عليك و حسافة كل الايام الضاعت وياك و انت ما تثق بيه )

بقيت افتر بالبيت و اروح منا و اجي منا ، فاتت امي :- ها شبيه حارس المدرسة يفتر ؟

-يمه ما الي هلكج اصلا كله من وراج من يوم السمعتي امه هالحجايتن و هو مثكل وياي

-يا فدوة لازم نسمع من المصونه امه و ننلصم حتى مشاعر خلوده خلدلد ما تتأثر و مشاعرنا طز بالمشمش ما تتأثر مو ؟

متولين من وجهي انت
راحت و رجعت:- هو شنو زعلان عليج ؟

-لا اول البارحة حجينا العصر و فك بس بعد ما حصلته

-الالج يرجعلج لا تخافين اكعد و حطي رجل على رجل اذا افتريتي على راسي مثل الخفاش ما راح يدك الباب والله

-ماما عوفيني رحمة لاهلج

-هو شمنتظر اذا يحبج ليش ما ياخذج

-مقرر يكون نفسه و نطلع يعيش بالاردن هناك عنده شغل

-وليش بالاردن

-يكول ما اريد نبقى هنا ابوج و امي ما تعوفنا وشغلي هنا بالنازل

-يلا شفايتلج تعيشين بالاردن ولا تكابليني و تلطمين

بقيت لليل اني على نار، دز رسالة ( هاي شبيج مخبلة انت شنو هالرسالة الما بيها خير شجابرني استمر وياج اذا شاك بيج بس خطار رايحين جايين علينا و موبايلي ٢٤ ساعة بأيد بتي )

دزيتله ( كلفت نفسك بهالرسالة )

دز (العالم يمي بعدين احجي وياج، مشتاقلج حيل ترا بس والله مشغول )

ارتاح كلبي بهالرسالة و هدئت اعصابي، اخذت نفس وتنهدت، و كتبت ( اسفه حبيبي دا اجن لان صاير يومين محاجية وياك مشتاقتلك الحمدلله على سلامة بنتك )

دز ( احبج )

انتظرته يخابر بس صار الليل و هم ما خابر لثاني يوم، اجاني هو على مود الخط، صعدت وياه :- صباح الخير

-صباح الانوار عمري انت

-مشتاقتلك

-والله مو بكدي بس بتي مجلبه بهالموبايل وعايفه بأيدها حتى تلعب و تسكت و الناس تروح و تجي من اقاربنا لان مها طلعت من المستشفى و بتي محتركة ضالة الناس منوبيت عمي يجونه و ما تخلص

-المهم انتو بخير عمري، بنتك شلونها كلش انقهرت عليها

-الحمدلله احسن

-بخصوص زميلي اللي اسمه وسام طلعنا كلنا للمطعم و استحيت اردهم و من خابرني امجد يريدني و اضطريت اعوفهم كال اني اوصلج و ما قبل اروح وحدي

هز راسه، باوعتله :- بس اني هم لازم تنطيني تبرير

- على شنو ؟

-مرة خابرتني ضحى و البارحة اجتني للبيت جايبتلي قلم من سيارتك لو هو مو قلمي

-تتوقعين عندي شي وياها ؟

-لا

-اذن انتهى الموضوع ما يستاهل نحجي بيه

-احسك تعبان

-كلش

-سودة عليه

-اسم الله عليج، بس ديار كلش تعبت نفسيتي على بتي وضعي هيج طكت روحي منه رايد اخذج باقرب وقت و نعزل بيت لوحدنا وانظم وقتنا و نهتم بالبنات

-ان شاءالله

-حجيت ويا رافد يدايني فد ٦ ملايين ٣ اطلعج بيهم تتعالجين و ٣ ندبر نفسنا بيهم شلون ما جان

-زين ليش تأجر و تخسر ، خلينا نكعد ويا امي هالفترة لبين ما تكون نفسك

-مستحيل امج ما اكعد وياه

-ليش ؟

-الي اسبابي

سكتت لما طلعت البنية من بيهتم و ركبت و لم البنات و وصلني للجامعة و طلع ، نزلنا نمشي ، تقربت من عندي دنيا :- شلونه وسام ؟

-شنو ؟

-مو كالو هالايام انت دهن و دبس انت وياه فكلت اسألج عنه، بس ترا زين انت بهالحالة و باوعلج صدك لو كالو حظ الكبايح بالسما لايح

-دنيا ترا ما الي خلكج والله امشي مني لا ابتلي بيج

-والله هم عوبه و هم تفتر ع الزلم تلكط بيهم انوب وينه و وينه

عفتها تحجي و دخلت للجامعة هي قانون مرحلة ثانية و اني اولى

دخلت للقسم حضرت محاضرتين، و طلعنا صاحتلي حوراء اوكف ويا الشلة بس لان بيها شباب مو كلش احب استحي، بس اصرت اجي اوكف وياهم

وكفت و هم يضحكون و ينكتون، سألني وسام :- شصار على بت خالج المريضة

-طلعت الحمدلله وندعي الله دكوم بالسلامة

-ان شاءالله

دك موبايله، جاوب، حجه شوية و كال :- شباب ابن عمي جاي للجامعة هو شيخ و عنده شغلة ويا العميد رايح شوية و اجي

كالوله روح، بقيت اباوع وراه راح دخل ابن عمه رجال طويل هيبه يطلع عمرة ب٤٠ هيج لا هو شاب ولا هو شايب ملامحة عادية بس لحيته و هيئته منطيته وقار

تقرب علينا سلم على الولد واحد واحد سلام ايد، وصل يمنا البنات دنك راسه و كال :- السلام عليكم شلونجن يابه

سلمنا عليه و اخذه وسام و راح للعميد
بقينا كاعدين نص ساعة و قررنا ندخل محاضرة، مشينا طلع وسام و ابن عمه سلم علينا و طلع دخلنا القاعة شوية ورجع وسام دخل و دخل الدكتور و بلشنا المحاظرة و شلون محاظرة خلصتها اتثاوب على كد ما مملة

كملت طلعنا من الجامعة ورجعت ويا خالد للبيت
لكيت سيارة ابوي بالباب، و سيارات غيرها

خالد:- هاي شكو

-ما اعرف ادخل اشوف

-اني راح ابقى هنا

-لا روح ماكو شي لا تعرض نفسك لخطر خالد روح لخاطري

-فوتي ولا تحجين

-خالد

-كلت فوتي

-دخلت ابوية و عمامي كاعدين ويا امي ، دخلت كالو :- هاي اجت شيريها و القرار الج

-شنو ؟

اسماعيل:- واحد صاحبي طالب مني بنية للزواج لو توافقين و تجين وياي لو اخذ اسامة منكم بالغصب و ما تشوفونه بعد والقرار الج و هاي اني كاعد احجي وياكم بالهداوة ولهسه ما مستخدم غير اساليب وياكم ، شكلتي ؟ .....

☆☆☆☆☆☆

حبيبتي هاي تصبغات☹️💔بيها نوعين:

★مرات تكون من خربطات هرمونية بالجسم..فتطلع كسواد او احمارر يم الفم
وهاي تكون مؤقتة..يعني تجي وتروح حسب هرمونات الجسم
★ومرات تكون من جفاف البشرة وكثرة افراز صبغة الميلانين

فانتي تكدرين بالماسكات تخفيفن اللون. مثل ماسك التمن وماسك بياض البيض وماسك الخيار واللبن او ماسك النشة...وي الاستمرار اشويه رح يخف من اللون..
واهم شي رطبيها يوميا حته لاتسمر بالزايد🥺


#ملوكه

عيوني ماكو شي زين🤦‍♀ من الكريمات ودهونات تبيض الايدين
فاذا تريدين تفتحين درجة او درجتين ويصير بيها نضارة ونعومة..فبالعناية اليومية

★اول شي يوميا بليل قبل لاتنامين رطبي الايدين بأي مرطب يعجبج مثلا جليسرين او حته فازلين فعادي
ثانيا..مثل متسوون عناية للبشرة خصصن يومين بالاسبوع للعناية بالايدين

يعني مثلا يوم الاحد تجيبين ليمون وملح..ودلكين الايد والاصابع لمدة 8دقايق وتغسلي..
ثاني يوم تجيبين ثوم وزيت زيتون ..ودلكين الاظافر زين حته يقوي ويمنع من الكسر فد 8دقايق وتغسلي

وثالث يوم استراحة
رابع يوم تسوين اي ماسك يعجبج مثلا ماسك تمن او ماسك النشة او ماسك بياض بيض..وتخلي عل الايد فد 10 دقايق وتغسلي وهكذا

واهم شي لاتنسين الترطيب..فاذا تلتزمين بهالعناية رح تحسين نضارة ونعومة بالايدين🙈❤️

#ملوكه

ميرسي☺️....اهواي اسئلة تجيني لزيادة متابعين انستا
حبايب اهم شي..انو طريقة نشر المنشورات يكون متناسق ومرتب وتخلون جوة كل منشور هاشتاكات ..ونزلت قبل عنه هسه اوجه🌚🌸

وثاني شي تخلون بايو ..يمثل صفاتكم من عمر واسم ومحافظه والتحصيل الدراسي وفد اقتباس..
وتخلون فد خلفية مرتبة وهايلات اللي يعجبكم

بعده تبدون تضيفون..باليوم فد 20 شخص..بس بفتره متقطعه حته لاتنحظرون
واكو خطوة جنت قبل دايما اسويها..انو اتابع همين فد 10 مشاهير..مثلا علي عذاب ، اليسا ، هيفاء وهبي..الخ
فهالخطوة رح تجيلي اضافات كومه..عود بعد ساعتين الغي اللي تابعتهم من المشاهير..وثاني يوم هم ارجع اتابعهم ..فهاي طريقة هم تفيدكم🥰✨

#ملوكه

طرق لترتيب منشورات الانستا👆🏻😇

عادي حبيبتي من عيوني هسه اوجهلج كل الاحتياجات الخاصه بالعروس

★•واذا تريد غسول فحسب بشرتها
اذا بشرتها دهنية فتاخذ غسول نتروجينا او غسول بشجرة الشاي او هيملايا
•واذا بشرتها مختلطة فتاخذ غسول كلين كلير او سيرافي
•واذا بشرتها جافة فتاخذ ستافيل🙃🌸

★•و المرطب حسب بشرتها..اذا بشرتها دهنية فتاخذ مرطب نتروجينا ؛أفين
•واذا بشرتها مختلطة عندج جونسن ؛سيتافيل ؛clinique ؛نيفيا سوفت
هذيني احسن مرطبات للبشرة المختلطة
•واذا بشرتها جافة فتاخذ سيرافي
-واذا للبشرة الحساسة لاروش بوزيه او مرطب افين

وللمسكارات .اشكال اكو🙃
من اسنيس وميبلين ولوريال؛ وفلومار ؛وفاكتور فالس ؛ nyx,

فالفرق يصير بالفرشة مالتها..كل مسكارة شكل اكو تكثف الرموش واكو تطول الرموش واكو تقوسه ..فتاخذ حسب اللي يعجبها

#ملوكه

منا البدايه👆🏻..الاهتمامات الخاصه بالعروس🙈❤️

احتياجات العروس👆🏻
بالتفصيل 😎✨الممل..ههه

الجزء الثاني من تجيهزات 😍💓العروس