#اتمني_أن_افعلها

الحلقة_16

خالد :- اخذت ضحى و البنات، طلعت من البيت الدنيا ليل قرابة الساعة ب١٠، هي تسأل :- وين راح نروح خالد

-اوديج لبيت اهلج

-وشراح يصير ؟
خالد اني مليت اسمع و اسكت امك يومية جاي تسمعني كلام مثل السم و ساكته لخاطرك، بس بعد ما اكدر اصبر اكثر
خالد ؟
مو احجي وياك وين بالك

-الله كريم اوديج و اشوف وين توصل

-يعني شراح تسوي نبقى هيج لو شلون ؟
شبيك خالد مو جاي احجي وياك

-ضحى كتلج ما ادري هسه روحي و الله كريم

- سمعت رافد يكول ابوي ناوي يقسم البيت طوابق

-اي يريد ينطيني الطابق الثالث

-خالد اذا تريد طابق ثالث اكعد ابيت اهلك و اني اكعد ابيت اهلي احسن، شفرق يعني درج هم تصعدلي امك و تسود عيشتي ، شوفلي مكان بعيد و بيت ارتاح بيه اني و بناتي كافي تحملت بما فيه الكفاية

تحسسني جاي احجي ويا صنم

-يا بشر ترا تعبان و راسي دايخ كافي كلت الج الله كريم

-خليها ابالك اذا بيت طابق ويا اهلك ما اريد

-بكيفج ضحى لا تردين، اذا ابوي راد طوابق ارضى ابيت طابق تردين ما تردين راجعلج ما كبرنا لهالعمر حتى يستند علينا تالي نعوفه و نمشي حتى نسوانا ما يسمعلهن حجاية ، طابق وحدج سدي بابج و اسكتي ما يعجبج براحتج ما مجبور اورط نفسي بالايجارات وبيت ابوي موجود ..

-اي طابق غرفتين غرفة و غرفة تزوجك بيها امك مو والله لو الدنيا تنكلب من جبت لهسه و اني ساكته و اكول خالد يتصرف

-استغفرك اللهي

-امك ما امنلها كلشي تسوي

-شفتيني فد يوم مشيت بشور امي لو طاوعتها ؟

-اي بس من يحجي وياك ابوك تقنع

-ليش هو ابوي فد يوم ضارج مسمعج حجاية

-الشاهد الله لا و اني احبه بس امك تكدر تفر راسه

-ضحى كافي ترا والله تعبان

-هسه وين راح تروح ؟

-اوديج و انام ابيت عمي

-وديار وينها ؟

-وشجاب ديار بالطاري ؟

- اي و ديار ابيت عمك و انت تروح تكابلها و تعوفني ابيت اهلي و تاخذ راحتك مو ؟

-ترا لو رايد اخذ راحتي لا انت و لا غيرج يمنعني، الف وحدة باليوم تمر للاستوديو و اشكال الوان البنات ما ادنيت لاحد ولا خنتج ويا وحده فكافي

-بس ديار تختلف انت متعب روحك بيها زيادة، ما شفتها اليوم تكلك ليش انسى وكفاتك .. شمسويلها حتى هيج تحجي

....وصلت نزلت من السيارة شلت بنتي سارة و الجنط و دكيت الباب، نزلت هي على كيفها و بيدها الطفلة

فتح ابوها الباب، تعجب بجيتنا فوتتهم للكراج و تعذرت ادخل كلت اله :- تسلم عمي غير مرة تعبان ورايد ارجع

انطيت لضحى مصرف و طلعت لبيت عمي بقيت عدهم

بقيت اسبوع و اني انام بأستقبال بيت عمي لو بالأستوديو ع التخم، المهم ما افوت للبيت، رغم امي اجت و حجت وياي و كالت :- ارجع بعد ما اغثك بحجاية
بس راسي ما برد حلفت ما ارجع و ما اكدر ارجع الا يفصلون البيت و يعزلون الي الطابق و الا اشوفلي بيت ايجار و نكعد بيه

جانت رافضة سالفة الطوابق، بس من شافتني معاند وراكب راسي تنازلت و كالت :- ارضى تعزلون بطوابق ولا اطلعون من البيت

خالد :- وكت التعزلون خابريني هسه ماكو رجعه، الكلمة الأكولها ما تنكسر حتى لو نفسي اني ما اسمح لنفسي اتراحع بكلمتي يا تفصلون يا اطلع ..

-شكد عنيد يا يمه كلت الك والله نفصل جيب مريتك و جهالك و ارجع و اتبرى مني لو رفضت تسوي طوابق

-العندي كلته يمه، ارجع و تتهاونون و بعدين من احجي اطلع اني الجاي افرقكم و ما رايد لمتكم .. قرروا هسه و فصلوا و انطوني جواب.

بعد ما ايست مني اتراجع .. عافوني
و من ثاني يوم ابوي و رافد جابو عمال بناء و كاموا يفصلون الطوابق ..

وره يومين خابرتني اختي بيداء، رفعت الخط :- الوو

خالد:- الو هلا خوية شلونج

-الحمدلله سألت امي عليك كالتلي بعده مطنكر ما يريد يرجع

-فهمتها لأمج شريد

-اي كالتلي بس ما خابرتك على هالموضوع ، عندي وياك موضوع مهم و سالفة كلش جبيرة

-شنو هي احجي ؟

-مو مال موبايل تجي لبيتي و نحجي

-شكو بيداء صاير شي ؟!

-تعال بسرعة و انت تفهم

طلعت من الأستوديو قفلت ورحت بسيارتي لبيت بيداء .. دخلت عليها :- شكو يربج قلقتيني ؟

-اكعد خوية و اسمع

-هاي كعدت احجي

-البارحة حماتي حجتلي سالفة انصدمت بيها ؟

-شنو هي ؟

-خوية حماتي عدها سوالف سحر و شعوذة و بالضحك كالتلي شفت مرت اخوج خالد هناك ، كلت الها نسوان اخوتي ما يطبن للسحارات .. حلفت و تكفرت شايفة ضحى هي و امها و حتى اكدت الي على السوته عمل شيطاني للطاعة و عقد اللسان

خالد:- ضحى ما عدها هاي السوالف مستحيل

-هذا السمعته خوية و البنية تحلف على ضحى و تكول سمعته تمها حجت تريد طاعة و عقد لسان لخالد ابن خالدية و انت بعد بكيفك

-و شنو اليثبت

-والله خوية ليش اظلم بختي ما عدي دليل بس اذا تريد نروح اني وياك لضحى و نحجي وياها و نشوف ردت فعلها

-كومي ع السريع

اخذت بيداء بسرعة و طلعت لبيت عمي، دخلنا الهم اجت ضحى تسلم، وجهي محمل عليها عرفتني مو على بعض سألتني:- شبيك خالد

التفتت لبيداء:- احجي العندج بيداء

بيداء:- البارحة حماتي نورا شايفتج انت و امج عد ام غسان

ضحى : يا منين هالحجي شوكت اني رايحة لأم غسان

خالد :- منو ام غسان

بيداء:- خوية هاي....... قاطعتها
:- اسكتي بيداء، جاوبي ضحى منو ام غسان و منين تعرفيها حتى بسرعة نكرتي انت ما رايحتلها .

ضحى:- هاي وحدة معروفه يعني هيج تشتغل سوالف ما ادري شنو

-سوالف شنو

-خيرة و هاي

بيداء:- ام غسان ما تشتغل بالخيرة احمواتي ٢٤ ساعة عدهن .. تشتغل بالسحورة

-شبيج بيداء قابل اسوي اسحورة

فاتت امها ، سلمت و ضحى كالتلها :- يمه شوف شجاي تحجي بيداء تكلي رايحة لأم غسان ام السحورة

بقت امها تترادد ويا بيداء و اني مراقب ردات فعل ضحى و تعابير وجهه، مو مال وحدة مصدومة لا شكله مال وحدة خايفة و الوجه انطعن اصفر

اندارت عليه :- خالد والله ما رايحة حتى ما اعرفها ابيش تريد احلفلك ... كامت تبجي

-جيبيلي قرأن

-خالد ما تصدكني
تحجي بنبرة بجي

-جيبي القرأن كلت

راحت جابت القرأن و امها بكل گباحة تهجمت على اختي غلط و عياط و تعيرها لو ما هي مدورة هالسوالف ما تندل بيهن و لا تعرفهن

واكف منتظر ضحى و عقلي تشوش اتمنى تطلع غلطانة اتمنى تطلع ضحى الأعرافها و ما عدها هالسوالف

جابت القرأن اخذته من ايدها ورفعته بوجها :- حطي ايدج عليه و اقسمي

العيون حمر، و تمها تتصايح وياي بس متجاهلها وكأنها ما موجوده، حاولت تسحب المصحف من ايدي سحبته ورجعت خليته بوجهه:- لو ما خليتي ايدج يا ضحى اندمج والله

حطت ايدها ع القرأن و كل جسمها يرجف، و كالت :-خالد

سحبت القران:- وصل الجواب ما يحتاج تحلفين
درت وجهي:- يلا بيداء

ع السريع هي نزلت يم رجلية لزمتني:- خالد والله اسفة و الله اعتذر والله بعد ما اعيدها

لو ما معترفة و مخليتني بشكوكي احسن، احس دمرتني من اعتذرت، سحبت رجلي من ايدها :- طلعي السويتي

-والله خالد........

-طلعي السويتيييييييييييه ضحى والا والله يا ضحى كل ابنية الج ما عندي احرمج حتى من ريحتهن امشيييييييي

بقت تبوس برجلي ، بعدت منها من رجلي و كلتلها :- طلعي السويتي ضحىىىىىىىىى

ركضت و امها راحت وراها ، و اسمعهن يتعاركن جوا و ضحى تصرخ

بيداء:- شفت السالفة طلعت صدك

-بيداء روحي للبيت كدامي

-انتظرك ابيت اهلي خوية

اجت ضحى جابتلي الشغل .. طلاسم و اعواد و قفل و صورتي و راسمة على وجهي وقافله قفل على صورتي وشخابيط
درت الصورة، بقيت ابحث بيهن ..

بالهامش جوا كاتبة عملين ب٤٠٠ الأول بأسم خالد ابن خالدية و الثاني خالدية بنت مدحه

باوعت بس صورتي :- اكو عمل ثاني

ضحى:- خالد و القرأن بعد ما اعيدها اشمرهنو ذبهن هنا ما اعيدها والله ابوس ايدك

-العمل الثاااااااني ضحى

دفعتني امها و كامت تحجي :- والكم عين تحجون بتي انفاس و امك ما خلت على حالها حال الله لا ينطيك و لا ينطي امك

وضحى تجر بيها و تصرخ عليها و تبجي

صحت :- اطلعولي بنااااااتي هسه

ضحى :- خالد والله ما اعيدها اني حيوانه اني طايحة حظ والله بعد ما اسويها ابوس ايدك خالد ابوس رجلك

لمتها من شعرها :- اطلعيلي العمل الثاني لو البنات اختااااااري

بقت تبجي بقوة و تصرخ و واكفة بمكانها، فات ابوها واخذ بنته و كام يصيح شكو و شصاير

خليت العمل بأيده و كلت اله :- اكو عمل ثاني اذا ما طلعته ضحى بتك طالق و بناتي تحلم تشوفهن

الأب ظل مصدوم فاتح عيونه و يباوع لبنته، ضربها راشدي و وكع عليها دك ..

سحبتها من ايده و كلت اله:- ضربك هذا ما يفيدني ولا يحركني اكو عمل لاخ بأسم امي اطلعونه لو هالبيت ينهد فوك عيالك

لزم مرته و كام يتعارك وياها و يضرب بيها و كام يصيح فقد لزم بته و كال الها :- العمل الثاني وين

وجرها من شعرها ... خفت يدستروها لو يستر على بته و هي مسوية سحر لأمي، فتحت الباب و فتت وراهم لكيتها موديته للكنتور و مادة ايدها بالملابس، اتجرات من بينهم بخفت ايد سحبت العلاكة من الكنتور

فتحتها ، شفت صورة امي و مكتوب عليه موت مرض فراق عقد لسان .. فركت وجهي ، و باوعت لأبوها شوفته العمل، و كلت اله :- بتك طالك بالثلاث

اخذت العمل خليته بجيبي، وطلعت بس العمل اللي بيه صورتي وطلعت بيداء ماكو ما موجودة، ركبت سيارتي و طلعت افتر بالشوارع
ارض الله بكبرها ضاكت بصدري احس اختنكت

كل شوية ارجع اباوع بيهن و اباوع بصورة امي شمسوية بيها، ردت اشلع القفل بس خفت لا تخرب و السحر يظل اشوفلي احد يفتهم بهالمواضيع احسن ما تتضر امي

صفنت، معقوله الأني بيه ؟
ضحى حب عمري طلكتها ؟
بناتي شراح يصير بيهن ؟
يبقن يمي لو يم امهن ؟
شلون راح اكمل حياتي بدون عائلتي
شلون راح اتحمل الدنيا بدون لمة بناتي
اخذهن ما اكدر اكعدلهن الوكت كله معناها يظلن خدامات لمرت رافد .. و يفقدن حنان امهن
اخليهن يم امهن ما اكدر بدونهن
منين اجتني هالسالفة
اتمنى اغمض ويطلع الصار كله كابوس و ينتهي

اخذت الأعمال خليتهن بالأستوديو و بقيت يومين ما لافي للبيت .. اهلي يخابرون عليه ما رديت على اي احد بيهم ..

رحت للمحكمة قدمت دعوة طلاك .. و طلكتها ووكلت المحامي يكمل الباقي

بس طلعت كلش منتهي مختنك الدنيا طالعة من عيني ، رجعت لبيت عمي، جان عمي مشغول باله عليه و كعد استلمني اسئلة ... ما جاوبت

بس كلت اله :- طلكت عمي نعسان بس خليني ارتاح

صرخ :- يتبه ولك شلون اطلكها مرتك ام بناتك شلون يابه

عفته حطيت مخدة و لفيت راسي و نمت، سمعت اهلي اجو و ابوي ندهني راد يكعدني ما رديت عليه و لا كلت ها ..

لهناك اجت امي، باست راسي كامت تبجي و تبوس بخدي و تگلي:- خويلد يمه حبيب گلبي

فتحت عيني و باوعتلها :- شرايدة مني بعد يمه ؟

-لا تقهر نفسك وليدي اجيبلك اغاتها والله

-يمه رحمة لوالديج فكي ياخه عني

-ظال بالي عليك والله يايمة من يوم الطلعت من البيت و لليوم گلبي يحترك عليك باليوم الف مرة كافي ارحم گلبي يا زليدي ورد للبيت

-عوفيني يمه محد دمرني غيرج و غير تدخلج بيني و بين مرتي

-هسه راح تطلع كلها من وراي

-يمة تگومين لو اكوم اختاري

-رايحة يوليدي رايحة
كامت من حيلها باست راسي و مشت

كعد يمي الوالد يحجي وياي و يلوم عليه لأن طلكت و بناتك و شلون يرهمن، ما رديت لأن هم كل اعتقادهم هي مسويتلي بس عمل عقد لسان و طاعة ...

وهذه عدنا اللي تسويها وحدة من الأثنين لو تريد تخلي رجلها طلي بأيدها لو تريد تكو... عليه و ما تريده يحجي فتعقد لسانها
فصعبة على الرجال يتحملها ...
بس اللي قاهرني هو العمل السوته على امي

بقى الوالد يحج، و اجا رائد كعد هم يصبر علية، شوية و فات رافد، صاح:- هلا يابه اليوم بينت حيوان

وكعد يمي، ضرب على رجلي:- تهون ابو الوليد لا تخلي ابالك

ابو رافد :- و بناته يا ابني ؟

رافد:- يابه هسه هو مو بحال احد يكعد يلوم بيه ولا بمزاج احد يشير عليه، هو كد قراره و كل اللي يسوي احنا وياه بس ما نحب نشوفه ضايج و متكدر هيج فكها يا ولد

خالد:- ما بيه شي رافد شويه متضايق و على كولتك تهون

رافد:- عاشت ايدك يلا سبع شد حيلك وكوم و شتخير احنا بظهرك ما نعوفك

خالد:- الله يديمك يخوي

رافد:- ويديمك، يلا يابه عوفوه يرتاح لا تضغطون عليه
وينها مها، خوية بعد اخوج لا تقصرين وياه ، شوفي شيحتاج ما يحتاج

مها :- ابطن عيني قابل هو غريب

...ودع رافد و طلع و طلعو وياه الولد

بقيت اجيبها منها احطها هنا، اكتنكت كلش، اخذت باكيت جكايري و سويجي وموبايلي و طلعت كعدت برا بالسيارة

ورثت جكارة ، دفعت الدخان من حلكي، باوعت الموبايل، جنت محتاج احجي ويا احد بس مو من اهلي ويكعد يلوم لو ينصح، لا محتاج احجي ويا انسان غريب افض البداخلي بس يكون ثقة و مو اي احد..

ما لكيت غير رقم ديار كبابي، جانت الساعة متأخرة فدزيتلها رسالة خاف عيب نايمين، بمجرد ما وصل تقرير تم التسليم ... دك اتصال
باوعته هي ديار رديت عليه

بقت تحجي وياي بلهفة تريد تعرف شبيه ، الى ان كلت الها :- طلكت ضحى ديار

سكتت ... رجعت حجت بهدوء :- ليش ؟ شصاير

جنت متوقع ردة فعل قوية ، بس ردها كان هادئ و هذا جان احسن حتى تخف المشكلة عندي

-مو المهم شنو صاير ولا شصار .. المهم طلكت و انتهيت بس ما جاي ارتاح

ديار:- احجي اسمعك

خالد:- اسف متصل عليج بهالليل بس جنت محتاج احد احجي وياه

ديار:- لا عادي بس شغلت بالي شصاير حتى هيج وصلت الأمور

سكت ... ما رد بقى بس اسمعه يتنهد
كلت له :- يمكن مشكلة خاصة و حقك ما تحجي خصوصياتك، بس تذكر اني لما اختنكت انت الوحيد بهاي الدنيا حجيتلك كلشي بگلبي و اسرار ما احجيها لأي احد

-ليش حجيتلي ؟

-گلي بالأول شصاير وياك

-ديار عوفج من الصاير وياي اني اريد انسى تعبت ففتحي غير موضوع و احجي الله يخليج

سكتت ، اخذت جكارة .. سحبت نفس، تنهدت : اي گايلي حاب اعرف ليش حجيتيلي

- ما جنت شخص عادي و احجيها كدامك ، انت جنت شخص اعرفه بخيالي و كل يوم وكل ساعة و دقيقة اني عايشة وياك بالخيال فلما حجيت تصورت حجيت لواحد اعرفه كلش زين

-لحظة !! بخيالج شلون ؟ ما فهمت

-هو شي متصل بشي ما اعرف شلون اشرحلك مو وكتها

-كلش وكتها احجي، دا اكلج اريد انسى

سكتت ... ردت حجت:- ما ادري اذا شايفتك كبل او لا بس اعتبر اول شوفه الك لما اجيت من سوريا و استقريت هنا، جانت اول كلمة تطلع من السانك يا حلوة

وكتها ضحى تمسخرت و انت رديتها، بس شفتك شلون تتوسل بيها حتى ما تزعل، و شقاك وياها ووو ما اعرف .. يكولون لا اطلع تفاحتك كدام جوعان

اني جنت لا اب لا ام تحتوي .. فارغة كلش
فمن شفتك خيالي ضل يجرخ و يتخيل ان انت تعاملني هيج فصرت اعيش وياك بخيالي

هاي قبل الزواج طبعا

-لهذا لما بجيتي بعرسج و كتلج شبيج جاوبتيني انت بيه

-ما جنت متوقعه انو هيج تزوجني ، جنت عايشة بعالم الخيال و مبتعده عن الواقع حيل .. بس صحيتني ورجعتني للواقع بزواجي من سلمان

-جانت دوم تتضايق منج تكلي انت مهتم بيها زايد بس اني ما جنت اشوف هذا الشي، خل اكون واقعي ديار و ما اجذب عليج .. بعمري ما فكرت بيج ولا ولا اعتبرتج غير اخت او صديقة او بالاصح انسانه محتاجة مساندة ..

ماكو واحد عراقي تشكي يمه بنية ويكلها الله يساعدج ويمشي، لا معروفين بنخوتنا واحدنا راح يشد حزام ويحاول على اليكدر عليه يساعد بيه و هذا الصار وياج

بعدها صرتي بنية يهمني اسمع اخبارها ... التغير هو يوم زواجج من سلمان دموعج و وضعج خلوني احس نفسي ظلمتج و انت بهالعمر برجال مرض فأحس صرتي مسؤليتي ولازم اتحمل جزء من اللي حملتجياه ..

وضعج ويا سلمان مدرستج .. كل هاي جنت احس مسؤليتي ولازم اخليج تستقرين .. لحد ما رجعتج للمدرسة و اخر الكلام الصار بيناتنا ابيتج من كلتيلي مرتاحة و هيج فضل عليه .. وكتها يلا ارتاحيت و عفتج تتحملين حياتج بعد .. بس بقى يهمني اسمع اخبارج بحكم صارت بيناتنا مثل الصداقة

هذا بس الجنت احسه و لحد الأن احسه ..
بس الأهل كاموا يؤولون القصة بغير منحنى ..
وهذا الخلاني اعاند اكثر لأن ما احب احد يتحكم بيه او يكلي لا تروح او لا تسوي

ديار:- الله خلاك بطريقي حتى تنقذني من كل الجنت بيه

-اني نقذتج ؟

-ما تعرف انت شكد ساعدتني .. لهذا ابقى عايشة عمري ممنونتلك

-ديار اكو شغله بيج استغربها و هي هاي الحانت سبب بمساعدتي الج

-شنو ؟

-اصيلة ، عمرج صغير بس انت تكبر من عمرج بهواي المثلج و مثل حالتج مع هيج اب و هيج ام .. و لا رقيب ولا حسيب .... انحرفت من زماااان بس انت جنتي حريصة مو بس على نفسج و على اخوانج هم ..

بعمرج و معيشة اخوج بجالج و مخليته يدرس يمج

ديار :- ونجح الأول هم

ضحك :- مبروك وهذا اللي ثار اعجابي، يكولك دائما البنية تطلع على طبع امها بس انت فرق بينج وبين امج من السما للكاع .. اشوفج وردة بنص مستنقع

ديار:- كلشي جان يسوي ابوي وتسوي امي اكرهه لهذا كمت اسوي عكسهم لأن ما اريد اصير مثلهم يمكن لهيج اختلفت

وهسه تكلي شصار حتى طلكت

ضحك:- جنت متضايق حيل بس بالكلام شوي خف التوتر

-اي ؟

خالد :- سولفت الها على اللي صار

-حقك الموضوع كلش مو سهل و مهما يكون الام غالية امي اعرفها مو زينه بس انجن لو احد اذاها لو احد يجيب طاريها .. بس خالد وبناتك

-ديار لو مو بناتي لو الدنيا تنكلب ضحى بعد ما تصيرلي مرة، الفكرت و خطت خطوة حتى تقتل امي هاي متعدية كل حدود الأنسانية .. ولج امي امي تعرفين شنو امي .. شكبرني و وصلني لهالعمر غيرها ؟
حتى لو غلطت سوت مشاكل ما سوت هي امي .. شلون طاوعها تسوي هيج شي بأنسانه ربتني و تعبت عليه

-بس تدري خالد امك الصوج، ما احب ضحى و اكرهه هم بس لما زرناكم ذاك اليوم كلت الله يساعدها .. بالفيزيا ندرس ان الضغط يولد انفجار ... تمك هواي ضغطت على ضحى حتى خلتها توصل لهاي المرحلة

-وان يكن و اعرف امي السبب بس هذا مو مبرر لفعلها ابد ، القتل و اذية البشر ما له مبرر بتاتا

-الظروف تصنع الأنسان و تغير حتى معدنه

-جان تغيرتي انت رغم كل الصار وياج وشكد ابوج اذاج ما سويتي هيج

-لا سويت و اصلا ظروفي هي الصنعت مني انسانة عدائية .. كم مرة حاولت اقتل ابوي و هواي اذيت ناس جرحوني بكلام ..

-ديتر اني جنت اكول عليج مريضة نفسية و فعلا جنتي مريضة مو جذب ... المريتي بيه يختلف عن ضحى ..
اب يعتدي
ام تخون
جسم مشوه
ناس تضحك و تسخر
كل هاي الظروف طبيعي تخليج مريضة ..

بينما ضحى ما جان الها مبرر .. مو اول عمة امي تحاسب ولا اول عمة تستفز و تسمع حجي لو تهدد تزوج ابنها و اني وعدتها افصل الها طابق و ما تخلي احد يقربها وتعاركت ويا امي وطلعت زعلان لخاطرها بس حتى تصيرلي حجة انفصل عن اهلي و رغم كل هذا ما صار بعينها شي راحت لعبت من وراي حتى تسوي هالسواية

مجرد ما جاي اتخيل ضحى تسوي هيج اتخبل
تحاول تكتل امي !!
اني ويا منو جنت عايش معقوله جنت مخدوع بيها كل هالسنين .. نية القتل مو سهلة ديار شلون اجا ابالها تمرض امي و تكتلها

ديار:- شوف تريد الصدك اني ضحى اكرهه لأن من اول يوم هي تمسخرة على وضعي ما قدرت انو اني ما الي ذنب بوضعي او ممكن اتأذى من كلامها
وجان ابالي غير افكار انتقم منها ..
وخليت بعقلي اطلكها منك و جنت اكدر
بس بعد ما بديت بأول خطوة و اتصلت بيها .. انت جان ردك عليه يختلف رزاله بس باهتمام جنت تنصح امي بحركة دم و انت تكلها ديري بالج على بتج
فشتغل خيالي و اهتميت بموضوعك والتهيت عن انتقامي الها .. بعدها صارت كل الحوادث الصارت و انت ساعدتني .. قررت ما اذيها لخاطرك بس بيوم عرسي دعيت عليها هواي و سلمتها بيد الله لأن اذتني واني جنت بوضع صعب

اللي اريد اكلكياه خالد ... قلة الأنسانية مو شي جديد عد ضحى بس اليقهر هم بناتك اني عشت معانات هواي و اتمنى جنت الكى اب مثلك لما تعامل بناتك فحرام تحرمهم منك . او حتى تحرمهم من امهم

-هذا الكاسر ظهري ديار بس ما جاي اركز و لا افكر بأي شي غير ان ضحى انتهت طويتها بدون رجعة

-انت وين هسه ؟

-ويني يعني بالسيارة كاعد

- اللي جاي تفكر بيه تسوي شنو

-كل الجاي افكر بيه هسه الم غراضي و اطلع للأردن اعيش هناك يم صاحبي هيثم

-مقرر

-تقريبا، بس اريد احد يبطل هذا العمل ما ادري شلةن اتعامل وياه ولا اندل احد و لا سألت احد

-اذا تكدر تعال لكربلاء هنا اكو كومة يفتهمون بهاي السوالف

-تندلين ؟

-لا اگل للحجية هي تعرف اكيد ..

-يمكن صدك اجي لهناك منها ازور الأمام الحسين محتاج هيج شي

-يلا علوا تعال حتى ترجعنا لبغداد بطريقك

-صدك !! عندج جية لبغداد ؟

-اي غير مراجعة لسلمان خطية كاسر خاطري

-ما شفتي تحسن بوضعه ؟

-ما اعرف تقربيا بس اكثر شي لا

-اي زين لعد اني اجيكم باجر و عكب باجر نرجع سوا لبغداد

-ماشي

-اخذي راحتج تعبتج وياي و مشكورة حيل ما تعرفين شكد نفهتي عني

- لا تكول هيج هذا اقل واجب بحقك

نهيت الأتصال وياه و بقيت افكر بموضوعه ..
ما شغل بالي غير البنات كلش ما احب طفل يتأذى خاصة اذا ابنية مثل ما تأذيت الله اعلم شنو من خوال عدهن شنو من نفسيات

انتبهت لشغلة ... اذا حاولت انتقم من انسان الله يشل حالي و يصعبها عليه، و اذا تركت انسان اذاني و سلمته بيد الله .. الله يشوفني بيه يوم يستاهله

باوعت الساعة عابرة ال٣ ونص .. ما بقى لسلمان غير ساعة و يكعد رحت حظرتله ملابس الشغل و سويتله الريوك و خليتهم يمه ..

رجعت للغرفة لكيت خالد داز رسالة ( ديار الحجيته الج ما اريده يطلع) استغربت :- ليش شنو محد يدري هو مطلك ؟

دزيتله رساله استفسر، اتصل ...رديت

خالد:- مو محد يدري مطلك بس ما كايل لأحد مسوية عمل لأمي الكل يدري اليه طاعة و عقد السان

-وليش ما كلت الهم ؟

-مو لخاطرها لخاطر بناتي باجر عكبة يكبرن يصيبهن العار من امهن عاد شي اقل من شي .. سوالف الطاعة و عالأمور ممكن تمشي بس مثل السوته ما ينسي
فأنت خاف يعني تحجين ويا مها او اي احد كأنو ما تعرفين

-صار ادلل

-ما يدلل عليج عدو، يلا تصبحين على خير

-اجمعين

قفلت الموبايل و نمت على مخدتي
عاد خالد و خابرته اليوم شيخلصني من خيالي و احلامي ... كوه كوه جبرت روحي ع النومة

ما كعدت غير ب١ الظهر ...
عزلت بيتي و سويت اكل قبل لا يجي سلمان و كعدت ع التلفزيون .. تذكرت خالد كال اليوم اجي
دزيتله رساله (شوكت توصل)

دزلي (هسه كعدت من النوم )

ديت ( صح النوم احسب حسابك ع العشا يمنا لو ما تجي ؟)

رد ( لا هسه جاي البس جاي بس لا تعبين نفسج ما اتعشى عدكم )

رديت ( عيب هالحجي احسب حسابك عشاك يمنا )

دز ( ما تقصرين )

خابرت سلمان كلت اله اليوم خالد يجينا ع العشا يبات يمنا حتى نروح وياه باجر لبغداد .. خطية فرح لأن نروح لمنطقتنا هناك .. انطيته قائمة بالأحتاجه وكتله جيب وياك ..

لساعة طب هو واسامة وجايب وياه المسواك كمت اطبخ ، و خابرت على العلوية مرت السيد
هي مو علوية عامية بس الناس تسميها علوية لان ام للسادة و اكو ناس تسميها حجية
فخابرتها استفسر منها على يفك سحر و كلت العا اقربي عندة مشكله و يريديفك هالعمل
كالت سهلة يجي للسيد و هو ياخذه على واح معروف ومضبوط

اجا خالد المغرب استقبله سلمان و اسامه و فرحوا بيه سلمت عليه مو على بعضه صدك يضحك ويا سلمان و اسامه بس مبين تعبان داير مداير عيونه مليان سواد من التعب

شافني ركزت بشكله، ابتسم و حجه :- لا تحجين صاير تراب

-الله يعينك

صبيت العشا و كملنا و طلعنا كلنا وياه للأمام الحسين السيد جان هناك .. طلع العمل شوفه للسيد مدري ليش انقبض گلبي مدري شمشخبطين ع الصور و قفاله و سوالف ما شايفتها بحياتي

اخذ خالد و راح لواحد يعرفه، امي اني فزرت ورجعت اني و اسامة للبيت ، ساعة و رجع سلمان و خالد للبيت لكوني فارشتلهم بالأستقبال بسرعة ناموا

حتى اني نمت ..
ثاني يوم من الصبح طلعنا لبغداد ودانا لبيت عمه ابو امجد، من دخلنا اني و سلمان و اسامة ويا خالد استغربوا ما جانوا يعرفون ان خالد جان يمنا

امه شافتنه، بس ما حجت ولا سمعتني حجاية
بالعكس شفتها خايفه على ابنها و تقربت تسألني عليه و شسوا و شحاله

كلت الها :- كلشي ما بيه البارحة زار الأمام ومر علينا

الأم :- ما حجالج شي

-مثل شنو ؟

-على طلاكه

-اي كال طلكت

-وبعد ؟

-يعني شيكول بعد هاهي هي

-ما سولفلج الاسباب

-لا ما حجه

هذا الحجي استلمتني و اني واكفة بعدني ما كاعدة، دخلت كعدت بالصالة اسولف لأم امجد على حالة سلمان و ام رافد كاعدة

دخل خالد و تمدد على التخم و اخذ الريموت وكعد يكلب ... استغربوا فعله .. لأن الواضح ماخذ عليه لأن هم عادة الولد عدنا اذا اكو مرة غريبة او من الكرايب يتحذرون بكعدتهم .. بس شكله خالد ماخذ ما مستغربني

حجت مها :- جان بايت عدكم ؟

-اكول شكو شو هواي تسألون عليه ليش ؟

مها:- ولج غير صارله ايام مختفي بين كم ساعة بالليل اول البارحة ورجع اختفى تعجبنا هسه من فات و انت و سلمان وياه

-ما اعرف بس ما جان متضايق بس شوي تعبان

ام رافد كاعدة و صافنه على ابنها ... شكله ما يحجي وياها .. استفردت بمها سولفتلي عركته وياهم على مود ضحى

-شكد غبية ضيعت بيتها و رجلها بسوالف ما بيها خير .

مها:- اي والله بس تدرين اخر شي جنت اتوقعه ضحى يطلع من عدها هيج شي و تسوي هالسوالف ولو هي العالم ما تنحزر ، بس مو مال يطلكها خطية
هي خافت امه تزوجه رادت تسيطر عليه

-والله ما اعرف يا مها اللي اعرفه هذا مجتمعنا يدوس ابطن المرة و ويسوي اشكال الوان بيها و بس تنحرف كالو شوف انحرفت و مو اصيله

... بقيت صافنه ويا روحي
يعني حتى امي ضحية هالمجتمع .
لو من هي صغيرة لاكية احد يحتويها مو رجال سكير يضربها و يطردها حتى تشتغل ما جانت طلعت هيج
وضحى لو ما امه و سوالفها و تهديدها .. هم ما اتخذت هذا الطريق

ماكو مبرر لهالافعال ابد بس هالمجتمع ظالم يخلق من المرأة انسانة ثانية بسبب ظلمه و يرجع يعيبها

.... العصر بدلت و ردت اروح للطبيب ويا سلمان
خالد كال :- اني اوصلج .

ما قبلت و لحيت الا يكعد لان الكل انتبه على تصرفه وياي مو طبيعي ماخذ زايد ما حبيت ازيد النظرة و حتى ما اريد هو يتعود على هالشي

هو طلك .. وراح يحاول يملي فراغ بحياته
واني اصلا حياتي فارغة اذا خليته ياخذ شوية شوية اخاف توصل الأمور لمطبات ما احبها وبعدها ما اكدر اسير ع الأمور .. فكمت اتعذر منه

رحت للطبيب و حيل انغثيت و انقهرت من كال العلاج ما جايب نتيجة و زوجج يحتاج عملية

سألته عن سعر العملية

كال :- ٣الاف دولار

-ما فهمت دكتور يعني شكد اعذرني ما اعرف بالدولار

-يعني تقريبا ٣ ملايين و نص

ردت اتخربط من سمعت هيج مبلغ، اني مسوية سلفة ويا نسوان المنطقة بالشهر ١٠٠ و القبضة مليونين بس اسمي بالاخير، منين اجيب و اسويله

ما كدامي غير امي، خابرتها و حجيت وياها، كالت:- جوا ايدي بس مليون و نص

-احجيلي ويا عصام حتى لو يدايني و اني بس استلم انطيهياه

-هسه احجيلج وياه
صعدت للغرفه و فتحت الباب و كالتله :- عصومتي رجل ديار عنده عملية و محتاج مليونين ما عندك اداينها

و هو يردها :- ميعاد تعرفيني كا احب الدين

حجت :- خطية محتاجة ...... قاطعتها كلت الها عوقي ماما ما يحتاج تتوسليله حتى فلوسج منه ما اريدهن اني اشوف اشلون ادبرها

رجعت سألوني، سولفت الهم .. خطية كامو يفرون وياي حتى يلموهن .. خالد كال عندي جوا ايدي ٥٠٠ و اداينلج، امجد كال مني ٢٠٠ و اشوفلج اصدقائي
عمو ابو امجد كال مني ٣٠٠ رافد كال عندي ٢٥٠

و بقوا يلمولي فرحت بيهم حيل رغم هم مو اهلي بس وكفتهم وياي حلوة حتى احسن من وكفت امي .. ولو هي ما بيدها شي اني ما اريد من فلوس عصام
لو اموت اني و سلمان و لا اقبل منية احد

خابرت العلوية حتى اكول الها ادايني فلوس السلفة على ما تطلع اذا عدها ، كالت :- هسه اشوفلج

راحت نص ساعة و رجعت خابرتني و كالت :- يمه الحجي يكول خل تجيب اوراق سلمان و تجي خابر جماعته و معارفه حتى يلمون فلوس العملية لسلمان و اكوا احد بالعتبة العباسية تكفل مصاريف علاجه على حسابه و مو هنا بايران ..

غمضت عيوني و كلت :- الف الحمد و الشكر الك ربي
شكد ما احس نفسي يتيمة و ما الي احد .. يكرمني و يسخرلي ناس بحياتي يخلوني ما احتاج شي
ويحسسني بوجوده بقربي

من كد فرحتي ركضت بشرتهم و كلتلهم ما يحتاج تلمون و تداينون انحلت .. خطية هواي فرحولي و بقو يدعون للسد على وكفته وياي

رحت صليت صلاة شكر و سجدت ابجي و احجي ويا ربي وكأنه كبالي و اتشكر منه وادعيه يوكف ويا سلمان بشدته و يكومه بالسلامة......

☆☆☆☆☆☆

#اتمنى_ان_افعلها


الحلقة_17

لما گالتلي الحجية ان عملية سلمان راح تصير بأيران، قررت ارجع لكربلاء بسرعة، لميت غراضي و حضرت الجنط مالتي و افتر الملم.

خالد جان بالأستقبال متمدد هو و امجد، شافني صحت على اسامة كلت اله :- اسامة يلا كوم حضر حذائك

باوعلي وحجة :- شنو جاي تروحين ؟

-اي والله اروح هسه حتى باجر من الصبح ياخذونه

-مخبلة انت شبيج بابا اكو احد صاحي يطلع هسه ؟

-ليش

امجد :- ديار ترى الوضع خطر مو مال طلعه هسه

مها:- يا وانت دا تحظرين حتى هسه تروحين ؟

ديار:- اي مو الدكتور كال استعجلي بالأجرائات

خالد:- اي يا عيني اليوم لو باجر ميفرق، حظري هسه كلشي و خابري اللي تعرفيهم و اتفقي وياهم وباجر من الفجر اطلعي بالسبعة انت هناك ياخذونه، مو هسه تروحين

بقوا يحجون وياي، قنعت و كعدت
سلمان من سمع هيج لبس انعاله و كال :- اني اروح بيت اهلي

-ما تبات

-معليج

-سويج والله اذا بتت اموتك
عافني و مشى انوب هو عليه يا الله من سمع عملية و لهسه صار يرجف بودة يدورله ختله حتى يختل و ما يسوي، عباله من راح يسوي العملية راح يموت

وكفت ويا مها ع العشا، حطينة صينية بس اني و مها و الحجية الولد ما موجودين، و سوالف عادية.

شوية و فاتوا بيت ابو رافد، ام رافد و ابوه و بتهم بتول، بس ام رافد مبينة كلش حزانة على ابنها خالد و ام امجد تصبر بيها و تدعي لخالد

كمت اني للمطبخ اسوي الجاي،اجت بتول وراي، حجت :- هلا حبيبة شلونج ؟

-هلو حبيبتي

-عندي وياج سالفة

-اي گولي

-اني اعرف انت قريبة من خالد...... قاطعتها

-لا مو قريبة بس هو فترة ساعدني وبقى يسأل عليه كل فترة بس ما عندي شي وياه

-ادري هو حاجيلي عليج هواي

-شحاجيلج ؟

-هسه بعدين اكلج شحاجيلي عليج، رايدتج بسالفة و اني اختج

-كولي

-اريد تحجين ويا خالد على عائلته، ضحى غلطانه صح، بس بناته خطية وهذا طلاك مو شوية

-اني سمعت بسالفة طلاك، بس ليش اني احجي وياه ، شلي علاقة ليش مو انت ؟ .

-هو متضايق من عدنا كلنا لا جاي يحجي ويا اب ولا اخ ولا اخت .. معزل كلشي و سمعت هو بايت عدكم كلت بلكت تحجين وياه

-اعذريني ما اكدر ادخل بهيج مواضيع

-لخاطري...... قاطعتها

-خاطرج غالي بس اعذريني ما اكدر بتول، اني مرة متزوجة و من اريد تصيبني سمعة مو زينة اعفيني فدوة

...بقت تحاول وياي ما قبلت، هي بنت ام رافد و ام رافد ما تعول تلزم الها شغلة عليه مو ادور ادخل بسالفة طلاكة بعدين يطلعني اني الخاشة بعقلة و مطلكة مرته، اليوم هن وياي صلح الله يعلم باجر شنو

الوجوه الحقيقية ما تطلع الا ساعة العسرة

رجعت للصالة كعدت وياهم، فاتت اختي اثار تركض، كمت على حيلي تلكيتها، بستها:- شجابج

-ماما

كمت اريد اطلع فاتت امي سلمت عليه و بستها و سلمت ع الكاعدين و كعدت وياي تسأل على وضعي و على وضع سلمان .. من سولفت الها
شالت ١٠٠ الف و خلتها بأيدي، كالتلي :- هاي مصرف خليهن تحت ايدج

-ما احتاج عندي خير من الله

-لا تعاندين بنيتي ، ذن مو من عصام، ءني من راتبي خليهن جوا ايدج يفيدنج مصرف

من سمعت من فلوس راتبها قبلتهن، بقت يمي ساعة و سلمت و طلعت ..

بيت امجد صعدو و عمو و عمة هم راحوا لغرفهم، فرشتلي مها بالأستقبال و راحت، بقيت اني متمدده بفراشي والعب بالموبايل وانتظر سلمان شوكت يرجع : هاي عود اني كتله لا تبات بس عود يسمع ؟

سمعت باب الهول انفتحت، كمت من فراشي حسبالي سلمان ، فتت بكفشتي ع الهول، و الكا خالد كبالي جاي ينزع بحزامه

تراجعت بسرعة :- اعتذر اعتذر عبالي سلمان والله

ضحك، شوية و صاح:- تعاي دياار، شنو ردتي ؟

اجيت:- لا عبالي سلمان

-ليش وينه سلمان حتى لهسة مجاي ؟

-راح لأهله

-خطية

-يا خطية صار ساعة ادك عليه مغلس، ومتظرته و ما اجه

-شرايدة منه خل يبات يم اهله ؟

- غير الفجر نطلع

-اي مري عليه و اخذي هاي وينهم هم ، مو فد قصة، روحي نامي ولا تنتظرين

-انت شنو تبات هنا ؟

-ليش السؤال ؟

-لا مو استغربت جاي بهالليل و بدلت هنا

-اي مو هنا مستقر هالفترة

-ليش و بيت اهلك ؟

-تعاركت ويا اهلي و طلعت، مو كلت الج ؟

-لا ما اتذكر كلت الي

-اكعدي ليش واگفة

-اريد اروح انام، بس اكلك خالد

-كولي .

-اختك بتول اليوم اجت و حجت وياي

-على شنو

-سولفت اله

خالد:- اختي بتول لا تخافين منها مو مثل الباقيات هي الامنت اخوتج يمها، بس ليش تخافين شكو

-خالد ام رافد تتضايق مني يعني مو غريبة بعد يومين مرتك ما رجعت ادخلني بالسالفة

-شنو القضية ترا امي مو هيج !

-مو قصدي اعيب امك بس اني ما اثق واخاف، ما الي خلگ مشاكل

-طمني بالج محد مراح يجيب سيرتج بشي

-خالد صح اني معليه وما اريد ادخل بس راح اكول اللي عندي حتى اريح ضميري

...رفع عينه باوعلي :- شنو ؟

-صح مرتك غلطت و غلطها جبير، بس ماكو انسان ما يغلط و كل انسان يستحق فرصة ثانية ولو عادها بالثانية يستحق اليجراله

-شأنتظر تموت امي بالمرة الثانية ؟

-بعد الصار ما اتصور تعيدها

-امها طبعها هشكل و ابو الطبع اسأل عن سلامتة و مدام امها وراها ضحى ما تنصلح ..

-انطي فرصة لخاطر بناتك، ما اكلك هسه، لا روح سافر انت مو تريد تسافر للاردن .. سافر و ريح بالك و ارتاح وبهاي سويتلها درس ما تعيد اغلاطها ورجعها لخاطر بناتك مو لخاطر احد

تنهد ... :- الله كريم

-اروح انام تحتاج شي ؟

-اكلاص جاي اذا ما بيها زحمة

-لا ادلل
رحت خدرت الجاي اله و جبته، حطيتله الجاي

-اي رحم الله والديج
اخذ الجاي وكعد على حيله
باوعت هو نايم ع القنة، مشيت جبت اله فراش سلمان و غطاه، و فرشتله بالكاع

باوع :- اي والله عاشت ايدج، بس فراش منو هذا خاف تحتاجونه

-لا افراش سلمان عود اذا اجا اني انام ويا اسامه بفراشة ولو ما اتوقع بعد يجي

-مشكورة يابه

ابتسمتله، ورحت لفراشي نمت وسلمان ما اجا
لساعة سبعة الصبح كمت بدلت ، اخذت اسامة و طلعت، باوعت خالد متلفلف بفراشه
..رحت لبيت سلمان دكيت الباب طلعتلي حليمة :- شرايده

-صيحيلي سلمان

-نايم

-كعدي

فاتت شوية و رجعت:- ما يقبل يكعد

-هو بكيفة
فتت للبيت ، لكيته نايم بالصالة، شلته من هدومه :- يلا كووم

ظل يصرخ ويلفلف بروحه ما يقبل ، ادفر بيه احجي اريد ماكو، وصيت اسامه يروح يجيبلنا تكسي على ما اسحله ، ركص اسامه و اني لزمت سلمان سحل من هدومه

وهو يغلط ويصيح ما يريد يروح
واني اسحل بيه و اصيح :- غصبا عليك تروح لا تخليني اشمرك للجلاب

كوه طلعته بالباب، اجا اسامه و وياه تكسي ، دفعته وكعدته بالتكسي كوه، و صعدنا اني واسامه ورا

وصلنا الكراج، صعدنا كية .. سلمان صعد بالصدر و احتا ورا اخر شي عود زعلان ما يريد يحجي وياي

وصلنا كربلاء، رحت بوجهي كبل لبيت السادة ، دكيت الباب ودخلت ، سولفت للسيد شلون سلمان ما يريد العملسة و شسوا بينا

كال:- لا لا سيد سلمان بطل و ما يخاف انت جايه تجذبين مو هيج سلمان ؟

نفخ نفسه سويج وكال :- اي اني ما اخاف بس هاي الوصخة تخوفني

السيد:- لا سيد ما مرجية منك ما يصير تغلط على مرتك

-لا اني ما اغلط عليها بس هي ماتسبح

-يا طايح الحظ هذا منو المايسبح اني لو انت احجي عدل لا تعرف شسوي بيك

الحجي ظل يضحك و هو يكول :-الظاهر هذا احترامكم لبعضكم، يلا كوم سلمان وياي خل نروح

اخذ سلمان للمستشفى،و اني اخذت اسامه ورجعت للبيت، وبقيت وياهم ع الاتصال، رايخين للدكتور و كايل الهم نفس الكلام اللي كايل الي الدكتور اللي ابغداد

سو اوراقه و وفحوصاته كامله و جابه السيد كال:- عكب باجر يطلعون بيه لطهران و ابني سيد حيدر راح يروح وياه، حضري اله جنطة سفر و خليله الاشياء اليحتاجهن

-يعني ما اروح وياه ؟

-ما تفيدينه، هو هناك عملية و يحتاج زلم تشيله تغسله انت شتسوين، خليج بالبيت هنا و احنا يمج

...سلمان جان كلش خايف رغم يمثل كدام السيد ان هو ما يخاف، اجيته بالليل لكيته غاص بالبجي، حضزته وبقيت اصبر بيه و اشرحله ان القضية ما تخوف

والصراحة يمكن اني خايفة اكثر منه عليه، جاي اتخيل امور كلش مو زينه و من اتخيل اكوم ابجي
افكر من دون سلمان وين اروح ؟
ارجع لعصام و سوالفه السخيفة ويا امي و منيته عليه .. ما اتحمل ولا اكدر اعيش هالعيشة ...
بقيت ادعي الله يكومه النا بالسلامة و يخليه خيمة على راسي

بيوم الطلع سلمان جان كلش حالته النفسية تعبانه ، عيونه مغوركة و اني اصبر نفسي ما ابجي كباله

هو طلع منا و اني طلعت للامام الحسين ،كعدت ابجي من كل گلبي و ادعي الله يةكف وياه بعمليته و يرجعه سالم .

بهذه الفترة السيد ما يقبل اكعد ابيتي وحدي، يومية الصبح جاي عليه ماخذني لبيته، يكلي :- مو زين تظلين وحدج اكعدي ويا بناتنا و تونسي وياهن

وبالليل يرجعني للبيت و يوصيني اقفل الباب كلش زين

بكعدتي ابيت السادة، الحجية كامت تعلم بيه
شافتني ما اعرف اخبز كامت كل ما تشوف وحدة من جناينهن علكت التنور تريد تخبز توكفتي وياهن

تكلي:- هاي دنيا ما تتأمن يبنيتي الواحد لازم كلشي يعرف و يتعلم حتى لو مالت بيه الدنيا ما يوكع و يسند روحه بروحه

توكفني ع التنور و حتى لو اخرب وحدة تكلي :- ميخالف كلنا هيج بالبداية يلا بتي تعلمي

وتعزلي خمس شنكات و تخليني اخبز بيهن و تحجي :- المرة المعدله تنعرف من خبزتها ، البيت ما بيه بركة لا ما بيه مرة توكل العيال خبزة حارة و طيبة من اديها

وتلقني بهالكلام و اني اخبز لحد ما صدك كنت اكدر اطرك الخبزة ، بس اخاف اخليها بالنار .. بس هي تجبرني و من المستحى كمت اتجرأ و احط

ومشت وياي ...
رجعت علمتني الخياطة
عدها عادة العصر تلم جناينها و يكعدن وحدة تعلم اللخ .. يفتكن هدوم و يخيطن .. يسون اشكال انواع الطبخ و يجربن .. غير الحفافة و صبغ الشعر هم وحدة تتعلم باللخ .. لحد ما صار يعرفن

بس هم يكعدن العصر هاي التخيط و هلي تحف و هاي شوف شتسوي للبست من اكل و متفاهمين على هالسالفة ..
بيتهم حلوة الأجواء بيه ..
و الحجيات بهيج عمر يصيرن نعمة بالبيت خاصة اذا جانت طيبة و مصافية الگلوب ..

علمتني اخيط ، شفت الشغلة حلوة كمت اجرب وياهن اكصكص و اتعلم .. لحد ما سويتلي ثوب مو بالمستوى المطلوب بس يا فرحتي بيه حسيت مسوية انجاز

وبقيت كل يوم اتعلم ويا الحجية و جناينها حاجة ..

سلمان سوا العملية و طلع سلامات بس الدكتور طالب راحة ٢٠ يوم ما يتحرك لا يسارة و لا طيارة . الا تستقر عمليته فبقوا هناك

النتائج طلعت .. جنت ناجحة بقرار واكعة بالفيزياء ماخذة 46 و شاملني القرار و نجحت .

خالد سمعت من مها طلع للأردن سافر .. عايف اهله و طالع .. امه نار وراه ظاله بس تبجي و تلوم على نفسها هي الضيعته ..

رجع سلمان و فرحتي بيه ما تنوصف .. طشيت عليه جكليت و هوست و سويتله حفله بالبيت و اشتريتله كيكة و عصير و زينه خليت بالاستقبال

بس خطية صاير شضعفه ..
جانت رجله كلش توجعه وصوني عليه هواي و غلموني شلون اتعامل وياه و شلون اساعده

بقيت اني وياه اخذه للحمام اكعد اكومه ، شيريد اني و اسامه وياه ..

فترة ٣ اشهر صحى و صار زين يمشي على رجله ورجع يشتغل هو و اسامه .. بس صارو حتى اسامه يحسبوله يومية
١٠ باليوم و سلمان ٢٥ .. نعمة
صارت امورنا الحمدلله تمام
كمت اسوي سلف و اضم عد الحجية خاف يميل بينا الوكت عاد ما اكوم ادك بالبيبان (رحم الله والديه ياهو الينطيني) على الاقل عندي ..

شهر محرم بكربلاء يختلف عن بقية الشهور
هذا الشهر يستقبله اهل كربلاء بالسواد و الحزن
من اول ليلة مراسيم تبديل الرايات مال قبة الأمام الحسين و الأمام العباس

وتبدأ اناشيد الحزن تترتل بكل بيت كربلائي
من كل مكان يطلع صوت الملا (باسم الكربلائي)
و هو يقرأ (اخاف من اعوفك ) لو ( كلي يا الميمون)

صوت هذا المنشد او الرادود مرتبط بشهر محرم الحرام
ما تمشي خطوتين بكربلاء اذا ما تسمعله

اجواء يخيم عليها الحزن، نساء و رجال لابسين الأسود
والمواكب بكل مكان تطبخ انواع اشكال الاكل و اهم هذا الطبخ هي (القيمة ) اكله خاصة بثواب الأمام الحسين

السيد جان عنده موكب جبير يخدمون بيه ولده ، و فاتح بيوته لزوار الأمام الحسين ..
الرجال جانو قليلين اليجون للبيت اكثرهم يباتون بالموكب بس ابنسوان يستضيفوهن بالبيت

الحجية و جناينها و بناتها كايمات بواجب الضيافة للزوار ... اني بهالفترة بقيت يم الحجين اساعد البنات بالشغل

شفت اشياء عجيبة بهذه المدينة
الزايرة التجي تعبانه يتوسلون بيها حتى يصبولها اكل، لو يفركولها رجليها.. لو يسألون شنو يحتاجون
و الضيافة مستمرة جاي و كعك و جاي نومي بصرة ولفات كباب او كص و مشروبات غازية بأنواعها

ويومية العصر تجي ملا او يسموها ملاية تنعى الامام الحسين و النسوان تبجي و يستذكرون مصيبة الطف

اليوم السابع من محرم من نصيب الأمام العباس
كل البيوت يخبزون خبز احنه نسمي خبز عروك بس هنا بكربلاء معروف (خبز العباس)
خبز باللحم

اما يوم الثامن فالطقوس تختلف، يختارون بنية و يلبسوها ملابس عروس و يغطون وجهه و يخلوها كبال صينية اشكال الوان الحلويات بيها غير الحنة و البخور .. يسموها صينية القاسم
ويقيمون الشعائر مثل الحنة العادية بس بطقوس حزن و نعي .. هاي بالنسبة للنسوان

اما للرجال فموكب طويل شباب يشيلون شموع و شاب راكب فرس و سيف و يصيح ( ان تنكروني فانا نجل الحسن سبط النبي المصطفى و المؤتمن ) و تشابيه على حادثة مقتله

اما يوم العاشر من محرم فهو يوم المصيبة
الليلة يسموها الحجة ... سهرة بنعي الأمام الحسين واولاده و اهل بيته و طقوس و شعائر بمختلف الأنواع تجي من كل البلدان لمرقد الامام الحسين ..

و اجمل هاي الشعائر هي ( ركضة طويريج) ينقطع الطريق و ينفتح بس لليركضون من منطقة طويريج الى مرقد الامام الحسين و هم يصيحون ( لبيك يا حسين )

تعجبت بهذه الشغلة و سألت الحجية ( هم ليش يكولون لبيك يا حسين، مو حرام ؟ الشعار يشبه شعار الحج ( لبيك اللهم لبيك )

الحجية:- ماكو تشابه بنيتي .. باللغة العربية كل اللي ينادي يجيه الجواب بكلمة لبيك

بالخليج من الاب يصيح على ابنه .. يرده الابن ( لبيه يبه ) يعني باللغة العربية (لبيك يا ابي)
نفس الشي هنا .. لما انقتلوا كل اصحاب الحسين و ولده و بقى وحدة سمعته السيدة زينب و هو يصيح بوسط المعركة ( الا من ناصرا ينصرني ؟)

فهاي الركضة تلبية لنداء الأمام الحسين ان احنا اجينا لنصرتك .. نصرته مو بالمعركة و انما نصرة قضيته و رفع اسمه للعالم ان في مثل هذا اليوم اسشهد رجل اسمه الحسين بن علي

وبهذا النداء ارتفع اسم الامام الحسين للعالمية
واحنا بكل سنه مستمرين برفع اسم الامام الحسين .. بالشعائر الحسينية، تعلمناها من اجدادنا و نعلمها لاجيالنا ان شاءالله.

بقيت وياهم اخدم هذه الفترة و حتى البيت سلمان فتحه للزوار بيوم العاشر و حتى بيوم الاربعين

ايام محرم و صفر كلها يمكن ما وكفت و طبخت، اكعد من الصبح الكاه سلمان اشكال و الوان الاكل جايب بجدورة

لحد ما خلصت الشهرين، رحت اجازة لبغداد جانت عطلة نصف السنة رابع عام ، طلعت من كربلاء اني و سلمان و اسامه لبغداد ..

ردت اصعد للمنصور ما قبل سلمان الا للدورة حتى يبقى يم اهله .. وسيت مثل ما راد و طلعنا للدورة

وصلنا هناك هو عافني و راح لبيت اهله و اني و اسامه رحت لبيت ابو امجد .. دخلت استقبلوني و رحبوا بيه

الصراحة استفقدت خالد جان بعده مسافر ..
كل مره من اجي هو يستقبلني و يسألني عن احوالي و اخباري .. من سافر حتى بعد ما خابر ولا اجا خبر عنه
كل العرفته ديشتغل بالاردن

... بس بسفره و ابتعاده خلصت من الخيال
ما عدت اتحلم بيه هوايه، جان كلما يخابر او يسأل عني او اشوفه ، اروح لعالم خيالي اتخيل نفسي ما متزوجه و هو حبيبي و اكعد اخترعلي فد دراما اعيشها لوحدي

مو بيدي هو عقلي هيج يروح يتخيل وحده
بس من ابتعد .. انسى و عقلي يلتهي عنه فما اكوم اتخيله ..

...شفت مها بطنها كبرانه، كمت اضحك وياها و سألها بيا شهر هي و تجاوبني .. رغم هي من حبلت بفطومه اني جبيرة لأن بتها صغيرة و هي حبلت . يمكن سنة

بس احس كبرت عقلي اختلف افكاري اختلفت .. من تزوجت و ابتعدت .. من جنت اشوفها حامل عادي ما افكر .. هسه كمت اتسائلت :- اني الى منى ابقى هيج بلا طفل

صح سلمان خوش ولد و مدللني بس ماكو بنية ما تحلم تصير ام او ان تعيش كزوجة .. ويا سلمان اني مو متزوجة عادي اي شعور ما يجمعني حياتي فارغة كلش ..

فكرت اخذه للطبيب الى متى يبقى هيج، بس يا طبيب اخذه ؟ و شسأل ؟ حتى عيب و ما اريد اكشف هيج شي كدام احد و اقلل من سلمان خطية مو بيده

بس قررت اخذ سلمان و اروح للحارثية هناك اطباء هواية اسأل و اشوف

وصدك ثاني يوم كلت الهم رايحه اراجع على رجله ..
و اخذته و رحت للدكتور .. حتى استحي احجي لو اكوله شنو علته ..

دخلت الدكتور هو يسالني و اني صافنه بسلمان ، كتله احجي، هو يردني :- لا اتي احجي

حجيت ويا الدكتور، كلت اله :- ان احنا متزوجين بس هو من ليلة الزواج يعني ما يكدر

هو فهمه و بقى يسأل سلمان، عرفه ان هو عقله مو تمام، سالني عن حالته شرحتله ان هو ضحايا حرب

اخذ سلمان للفحص، وكالي انتظري برا .. شوي و صاحلي و كال:- زوجج حالته ما الها علاج

بقيت صافنه بوجهه

حرك وجهه و كال :- اعضائه التناسلية للتبول فقط للأسف اعضائه متضرره الى حد كبير و من زمن طويل لدرجة ما اله اي علاج

هزيت راسي اله و كلت اله :- شكرا دكتور

-لحظة .. لازم اخضع زوجج للسونار

-ليش ؟

-اجرائات للتأكد

تمدد سلمان ع السونار، و بقى الدكتور يفحص بيه .. كمل و كال:- مثل ما توقعت

-شنو ؟

-وحده من كلياته متضررة، هو ياخذ ادوية او علاج ؟

-اي ادوية كتبوها اله بأيران

-اكدر اشوفهن ؟

-عفتهن بالبيت

-الواضح ان هذه الادوية كانت قوية عليه الى درجة ان اضعفت عمل الكلى عنده ..

-يعني شلون دكتور

-يعني الكلى مالته اذا بقت بهالشكل احتمال يصير عنده فشل كليوي ... و هذا شي خطر جدا ، لازم تتوقف العلاجات الخاصة برجله و ننطي علاج خاص بالكلى

بقى يسألني عن اذا جان يشكي من كلياته او يكول هو تعبانه .. كلت اله :- دكتور هو حتى اءا يتوجع ميكول لاحد يخاف احد يضربه ابره او يسويله عملية

رجع يسأل بيه :- ابني انت هنا الكلى توجعك

سلمان بردة فعل سريعة :- لا لا لا ما توجعني ما توجعني معليك

-ما راح اضربك ابره ولا اسويلك سي بس انطي حبوب تشربه حتى تصير زين ، انت توجعك ؟

سلمان:- اي بس شوية شوية مو هواي

-وين ؟

سلمان:- هنا
و اشر على مكان الكلى

كتبلي علاج اله و كال لازم يلتزم بهالعلاج، شهر و ارجعيلي نشوف الكلى متحسن ادائها او لا حتى نعالجه

... اخذت سلمان ورجعت للبيت، رحت بعلة رجعت بعلتين ، شسد و شداوي بيه حرت وياه
حظه مدري حظي و الله ما ادري

لكيت امي بالبيت، اخذتنا بسيارتها ودتنا لبيتها ..
ما ارتاحيت لعصام و هو موجود ، ثاني يوم من الصبح طلعت للكراج من الكراج لكربلاء .

بقيت شهر ملتزمة بالعلاج بس امتحانات و ما اكدر ارجع لبغداد اجدد العلاج، اخذته هنا للمستشفى ، كتبولنا علاج ثاني غير ذاك الدكتور يمشي عليه

بس رجعت رجله تأذي، و هم رجعت للدكتور كتبله علاج لرجله .. و بقيت وياه متعلعله بين رجله و بين الكلى مالته ..

من بعد سنه و نص على عيشتي بكربلاء
بليلة نايمين، سمعنا صوت بجي و صوت عالي بالمنطقة ..
طلع سلمان و اني وراه مديت راسي من الباب اريد اشوف شكو ..

وجان يكولون (توفى سيد حسين)
بيها كلش تأذيت ، لبست عباتي ورحت اركض لبيته، ولده ملثنين بلثام اسود و الحجية تصرخ و النسوان تلطم .. كابلتهن و كمت ابجي بكل حيلي

رجال اعتبرته هو ابوي، وكف وياي وكفة اب .. ابوية ما واكفها .. جابو الجنازة للبيت و امة الثقلين انكلبت ع البيت .. شيوخ و سادة وناس معروفين

البيت ما بقى بيه محط رجل .. كلها تبجي عليه
الزلم كبل النسوان كامت تشمر ارواحها ع التابوت و تبجي، ولده بناته يبجون الصخر

بقيت هاي الفترة عدهم اخدم ويا النسوان بس حيل تأذيت بوفاته ، طول ال٣ ايام مال الفاتحة عيوني ما نشفن من البجي عليه ..

بوفاته اني حيل انكسرت صح بقوا ولده و لو نخيتهم ما يقصرون بس مو مثله، هو جان يحس بينا قبل لا نطلب، وكت التسوء حالة سلمان جان من يمه يدك الباب و يحطلنا انواع المسواك غير المصرف بالبيت و كلمته الما انساها :- صيري سباعيه بنيتي

ما انسى شكله المحبوب لو عكاله الاسود و مشيته للرزنه من اتذكره اغص بجي على كد ما حبيته و اعتبرته اب

حالة سلمان تسوء يوم ورا يوم .. مرت ٦ اشهر كعد بعد ما كام يشتغل .. صار بس نايم بالفراش ..
واسامة بيوم العطلة يشتغل و بيوم الدوام يكعد ..

سيد جعفر حسب النا شهرية ١٥٠ الف كل شهر
بس كوة تمشي مصاريف بيت و دراسه اني و اسامة و علاج سلمان .. ردت اروح اخذ راتب الرعاية مال سلمان عاد تعيلنا .. سلمان يطنكر كلما جبت سيرتها ..

بقيت اصرف بفلوس السلف الجمعتهن بذيج الايام .. كلما احتاجيت ورحت للحجية كلت الها اريد ..

بيوم جان جمعة اندكت الباب و احنا نايمين ، فتحتها .. لكيتها امي و اثار:- هلا يوم شلون شنو هالمفاجئة اليوم من الصبح ذاكرتني

-اخابر عليج يا امي صار اسبوع و انت ماكو ؟.

-ما ادري عن موبايلي امتحانات و ملتهية ، شلونج لنت

-شلوني، اطلكت

-ياااااا ليش ؟

-اوووي ما بيه احجي هسه، جيبيلي مي

رحت ركضت جبت مي و اجيت:- شنو السالفة ليش اطلكتو ؟

-زوجته درت بزواجه

-اي ؟

-شأيه .. خيرته يا اني يا هي

-و اختارها هي

-فدوة و انتظر احد يكلي روحي، اني كتله طلكني وارجع لعائلتك

-وليش طلبتي منه، يمكن يلكه حل

-لا يمه مرته رادت ورقة طلاكي ، لو ينطيها وركة طلاكها، و المثلي يا يمه ما رايدته رجال دوم .. ماخذته حبا بفلوسه فليش اهجم بيته و هو عنده جهال ،كتله انطيني مهري يا رجال و طلكني و ارجع لمريتك و جهالك

- ههههه هم زين

-لعد شعبالج يا امي، صح اني مرة ها و ها بس مو هجامة بيوت ولا حقيرة ضمير

ضحكت:- و هسه وين راح تروحين ؟

- اأجر بيت اليه و لاثار .. بس اريد فترة ارتاح بيها ، هالاخذت اجازة انطيت نص الراتب و كعدت شهر كامل

-راح تكعدين هنا ؟

-لازم مستثگلتني ولج ؟

-لا بالعكس والله افرح بجيتج يمه ، خاصه اثار حيل اشتاقلها و اشتاق العباتها .. فوتي ارتاحي جوا

دخلت يم سلمان سلمت عليه، دار وجهه من عدها، حجت :- ولج هذا هم حظي رجلج ما يودني

-عاد شلون عصام جان يحبني حب اخ يا يابه

ظلت تضحك:- اروح انام بغرفتج احسن، عود العصر كعديني

مشت نامت بغرفتي و سلمان ع السرير نايم بالأستقبال .. للعصر كعدت امي، سبحت و عطرت و نثرت شعرها و كعدت

كلت الها :- ها وين ؟

- هيج نتمتع نفسنا خوما اظل مغبره روحي

-الله ينطيني ربع خلكج

بالليل بقيت اسامه بالبيت يم سلمان و رحنا تمشينا اني وياها و اثار للامام .. زرنا ورجعنا
بطريق الرجعة بشارع الامام، صادفنا سيد جعفر يمشي، سلم علينه وكفته امي

:- هلا ومرحبا عيوني شلونك شلون صحتك شلون عافيتك

السيد:- والله الحمد لله ماشية، انتم شلونكم يابه

ميعاد:- والله بتي ما بطلت حجي بيك تكول شلون زلمه معدل فدوة الطوله ما عافني و لا خلاني احتاج شي الله يرحم والدك صدك الكال الخلف ما مات و الحجي عايش بوجودكم

ديار:- اكرص بيها اريدها تسكت ماكو ... يمه كاااافي يمممه

جعفر:- رحم الله والديج ، لا ديار مثل بتي و انا حاظر شتحتاج و شتطلب

-من اروحلك فدوة يبعد عمري الله ينطيك ان شاءالله و يزيد خيرك و يرحم اهلك يبن الطيبين

السيد:- الله يسلمج مشكورة ام ديار ، زورونا باجر خل نضيفكم

ردت اتعذر منه، سبقتني امي:- لا لا ان شاءالله ياجر نخسركم غدا حيل مشتاقه للحجية طاك كلبي عليها اريظ اشوفها

-والله هي هم تفرح بيكم ان شاءالله باجر غداكم يمنا ننتظريكم

-ان شاءالله ما تقصر يالطيب

سلم عليها و فات و اني اجر بيها:- يمه شجاج تحجين صدك غير خجلتيني كدام الرجال

ميعاد:- شلون رجال يمه نعست و اني اباوع بوجهه ، شلون هيبه شلون وقار لا لا اني قرؤت اتوب

-دمشي يا امي امشي انت ما تبطلين سوالفج

-الا صدك اگلچ هو بعد شكد للعدة مالتي ؟

-يا عدة

-مال طلاكي

-شتريدين يمه

-ترضين هالمعدل يظل بنفس امج

-اي غير وكتيله مدح يالمعدل و يطيب مدري شلون فاتتج و ما كلتيله تتزوجني

-اي و شبيها غير الزواج ستر

-يمه انت فاهمه الستر بالمكلوب والله مو هيج

-اوووي دنشي امشي سبع لطامات بوجهج ما تساعدين ع الحياة

مشت كدامي، و رجعنا للبيت، لبست سلمان و كملته و دخلت انام يمها ع الجرباية ، شفتها صافنه:- بشنو تفكرين ماما

-سيد جعفر اكبر اخوته مو ؟

-يبووووو يسيد جعفر يطلابة سيد جعفر يمه ما نخلص بربج

-هاي شبيج بنتي ما تتمنين امج تجي يمج و تكابلج و هو لا متزوج ولا عده مره

-لا يمه ما اتمنى اكعدي و اسكتي ناس خوشاوادم لا تفشليني وياهم

-و شبيه يمه و تتفشلين مني

-ناس لا مثل طبعج ولا مثل طبايعج عوفيهم

-المشكلة هذا متدين واني مو بالعادة اتعامل ويا المتدينين .. لازم اشوف طريقة

بقيت صافنه بوجهه ، باوعتلي :- اتحنك

-شنو

-باجر اتحنك و اروح بعباية و محنكه

-يمه

-و غمه نامي

هزيت ايدي و درت عنها نمت و بقت هي بحساباتها
لثاني يوم الصبح، لبست ستريج اسود و وياه تيشيرت اصفر فاتح و تحنكت و لبست العباية و كالتلي :- يمه مو تكشقين الحبايه هزاك تحنطي بيها ترا عيب يستنقدون

-دا تعلميني انت امشي ماما امشي

مشيت و اني اكول :- شدعي عليك عصاك، عساك ٢٢ طفل توم يسطرونك و ما يخلونك تشوف دربك على هالسواية السويتها من طلكتها و خليتها براسي

-طايحة الحظ امشييي

-اجيت اجيت

رحنا اني وياها ضيفونا على غدا، بس شلون نضربت بوري، لأن سيد جعفر ما طلع عدهم عيب يكعدون ويا النسوان ، فأستقبلتنا الحجية هي و جناينها

بقت عدنا شهر .. وراحت لبغداد
اجرت بيت و بقت هي و اثار هناك
هي صارت بمكان زين نقلها عصام من جانت على ذمته و راتبها صعد ..و ظروفها تغيرت بس تبقى امي هي هي .

مرت سنه او اكثر ..
اتصل عليه رقم، اني عادي ما تهمني ارقام غريبة عادي ارد، فانطيت رد و كلت :- الووو

اجاني صوت خالد :- هلا يابه شلونج

-خالد !! شلوووونك شخبااارك

-والله الحمدلله

-الرقم اسيا عراقي، بالعراق انت ؟

-اي ابغداد و ناوي اجي كربلاء ازور و تذكرتج شلونج شلون الدنيا وياج

-ماشي على الله

-كلش قهروني على حالة سلمان ما تحسن شوية ؟

-لا والله هو هو ؟

-و شلون امشيتها و هو كاعد ؟

-اهل الرحم هواي

-الحمد لله الله كريم

-انت شلونك شلون وضعك، شعجب رجعت

-والله علمود بناتي

-شبيهن بناتك

-ضحى تزوجت و دزت خبر على اهلي يجون ياخذون البنات لان التزوجته ما يرضى بطفل وياه و خابروني اهلي و هاي رجعت

-عفيه هاي شلون گلب وعافت بناتها على مود الزواج

-هو مو هذا اليقهر، اليقهرني اني الرجال المرت سنة ونص على طلاكنا لا الي نفس بمرة ولا فكرت اتزوج، ما نسيت كل عشرتي وياها و هي نست و مو بس نست شمرت حتى بناتي وراحت عاشت حياتها

تنهد ... شكول الله يوفقها

-تزوجت منو ؟

-واحد حالته المادية زينة ، متزوج و زوجته مكعدها ابيت و رايد مره اله ابيت اهله يكعدها لاهذا ما راد طفل وياها . و حتى لو هو ما رايد اني اقبل بناتي يربن عد غريب

-وهاي هي سوت ما سوت حتى تخلص من العيال، راحت شمرت بناتها و رجعت لعيشة العيال، صاحية هاي ؟

-هاي بعد شنسوي

-هسه سولفلي شنو وضعك بناتك

-عد اهلي و بناتي وياي

-مفكر تتزوج

-لا ليش ؟

- لعد شلون يظلن بناتك

-اختي بتول يمهن

-قابل تكابلهن وتكعد هم عدها بيتها جهالها

-غير رجلها مات

-ياااا

-شكلج ما سامعه اخبارنا

-والله من ورا سلمان كلشي ما ادري ملتهيه بيه

-الله يساعدج

-ويساعدك

-شغلك هنا شنو

-لكيت شغل وياه قناة عقدت وياهم على شغل مصور

-اي زين و محلك

-مفتحه صديقي راح ارجع وياه

-الله كريم

-سولفيلي وين وصلتي بالدراسة

-خامس ادبي

-صدك!!!

-اي والله

-الله يوفقج عفية بيج ما تركتي رغم مرض سلمان

-شسوي كوة مدبرتها حتى المدرسين يعرفون بوضعي اذا ما عندي شي يكلولي روحي

-خطية ، ان شاءالله يومين و اني يمكم .. اجي ازور و لشوفكم

-هلا بيك شوكت ما تجي

..... نعيت الاتصال وياه بس وين رجعني
اووو رجعت اتخيل و اتحلم و اعشم بروحي
مدري من حقي مدري ما الي حق

خالد امنيتي الأستحي اطلبها من الله

وره يومين اجانا و كعد عدنا يوم، السفر ما زايده بس جمال، صاير احلى من گبل بألف مرة
شنو الطول الهيبة الكلام الرزانة .. كلشي بيه يدوخني

يضحك وياي و يسألني و اني عقلي يجرخ بعيد
بقى يوم و اليوم الثاني راح بس بقى على تواصل وياي كل فترة يخابرني و يسأل

مرت فترة سنة و نص تقريبا
و سلمان وضعه بالنازل ..
جنت امتحانات سادس نهائي، و اسامة سادس بكلوريا وكلش مشغولين وكع سلمان عندي و تخربط، بس اسامه يمي ركضت بيه اني وياه للمستشفى

دخلوه انعاش فورا ..
سيد جعفر جان مسافر ما موجود ..
الحجية مريضة مو مال اتصل بيها
خابرت امي، جانت بالدوام كالتلي هسه اشوف ينطوني اجازة حتى اجيج

روحي تعلكت بخالد، رد عليه بسرعة
كال الو

اني انهديت بجي، هو تشوش بقى بس يسألتي :- شبيج يربج احجي، ولج عليتي كلبي شبيج ليش هيج تبجين

-خالد اني بالمستشفى و سلمان جاي يموت

-مات !!

-لا بس دخلوه حالته كلش صعبه

-منو وياج بالمستشفى ؟

-بس اسامه

-بيا مستشفى

كلت اله اسم المستشفى، كال :- مسافة الطريق واني يمج ..

عفت الموبايل و كعدت ابجي و ادعي ربي يكوم سلمان بالسلامة .. بمكاني افتر و ابجي و اندعي ..

ماكو ساعتين و خالد فوك راسي :- ها ديار شبيه سلمان

بقيت صافنه :- هذا شوكت لحك يجي بهالسرعة

شاف دموعي ينزلن، طلع كلنكس من جيب و انطاني و كعد يمي، و يصبر بيه و يسأل بأسامه على حالة سلمان ..

بعدنا كاعدين ابجي و هم يسكتون بيه ، طلع الممرض، صاح بأسم سلمان، كمنا كلنا ، كاله خالد :- خوية ابشر اشلونه المريض

-البقية بحياتكم المريض انتقل الى رحمة الله.....

☆☆▪︎▪︎☆☆

#اتمنى_ان_افعلها


الحلقة_18

ثم قالت (قلبي يزدحم بالالام، انقذني يا الله ) 🤎

...........

-البقية بحياتكم المريض انتقل الى رحمة الله

صرخت :- لاااااااااا سلماااااان
كمت اصرخ بكل صوتي بدون وهي، و اسامه يصرخ يمي و يبجي

خالد:- انا لله و انا اليه راجعون

التمو عليه نسوان بالمستشفى و اني اصرخ و اسامه يضرب براسه بالحايط و يبجي عليه حيل، و خالد كمبص وحط ايده على وجهه ... بجى ..

كعدت بالكاع اضرب على رجليه و اصيح :- يخاف يموت هو يخاااف كلما يتوجع ما يقبل اخذه للمستفى خاف يموت

واحجي و ابجي كل قوتي، و نسوان وياي تصبر بيه:- صيري قوية كولي يا الله هذا مصيرنا كلنا هو السابق و نحن اللاحقون

خالد مسح دموعه و تقرب :- ديار شدي حيلج و صيري قوية، اني رايح اكضي الاجرائات مالته

دك على جتف اسامه و كاله :- خليك يم اختك اني راجع

بقيت بمكاني ابجي ، كابلتني مرية مبينه جنوبية
كعدت و حطت شيلتها على وجهه و صارت تنعي بس نعاويها و صوتها يبجي الحجر، حتى الزلم الجانو واكفين حطو اديهم على وجوهم و بجوا



بقيت بمكابلتها و ابجي من كل گلبي
صح ما جان الي زوج بس جان الي سند
بعمري ما شفت الراحة الشفتها ويا سلمان
كمت انام و ما على گلبي هم ..
انام و ما اخاف ابوي يجي لو يأذيني
انام و اني مأمنه اكو احد يشيل عني و يساعدني
نتعارك هواي و ما نحترم بعض بس جان يتخبل لو زعلت، و اني ما اتحمل اشوفه ضايج.

جنت اتعارك وياه من اشوفه يدوس على رجله و تأذي و يشتغل، اكله عوف الشغل لا تروح .. ما يسمع مني اللحظة و الثانية الكاه طالع ما يرجع الا العصر يخلي الفلوس بأيدي وينام.

لا فد يوم كال وين فلوسي، اشتري اليه و لأخوي ابد ما حاسبني جان يفرح من يشوفني اشتري و البس و يكعد يسوي سوالف المنية و هو يكلي هاي بفلوسي و يعيرني
بس ما جان يعيرني بحقارة، جانت سوالفه طيبة.

جنت مستعده اتحمله كل عمري و هو مريض لا فد يوم شكيت منه و لا كلت تعبت .. بس ابد ما تمنيته يموت، جنت اتمنى يطيب و يرجع النا

حتى اسامه شكد جان يتناكر وياه بس حيل جان يحبه، يضمله لفة الكص بجيبة بعلاكة و يجيبها اله مخصوص لان يعرف اسامه يحب الكص و من يكعد ياكل، يبقى يعيره و يطلعها من خشمه و يبقون يتناكرون

شكد شفت اسامه يبجي، بس مثل اليوم ما شفت، وكف كبالي و يصرخ بلا وعي :- مات سلمان ديار مااات لا لا لا شوفيهم شوفيهم خاااااف يجذبون

رجع خالد، حضن اسامه و يهدي بيه، و اهل المستسفى اعتذروا من عدنا لان بالمستشفى مرضى نايمين، ولان صارت لمة نسوان و نعاوي ما قبلوا .. كومونا

كمت من مكاني و اني ابجي و احس انبح صوتي
اني جزت مخابره على سيد جعفر كلت اله سلمان بالمستشفى، ويا ما جاي نطلع، فات سيد جعفر و سيد حيدر

شافوني كوه امشي ، وكفني سيد جعفر :- هاااا

صحت مات سلماااان

صاح :- لاااااااا

بقى خالد يحجي وياه، و مشوا جوا،كعدني برا جابلي مي و كمبص كبالي:- ما راح امنعج تبجين، ابجي و طلعي كل الحزن البداخلج و ارتاحي، بس اريدج تصيرين قوية وراج طريق طويل ، وهسه اخذي هذا المي اشربي انبح صوتج

-خالد ما راح اكدر بدونه مات سلمان راح

-الله يرحمه لا تحجين هيج، اترحميله و خلي روحه تطلع بأمان المسكين جان رغم عقله يشيل همكم فلا تزيدين همه خلي يرتاح ، خلص من هالدنيا الكضاها بس تعب و الم شحصل

اسامه:- ديار هسه هو خايف مو جان يخاف يموت
بجى

خالد:- هاي انت الاكول عليك رجال تبجي، حبيبي راح يم الارحم مني و منك بالعكس ما خايف هسه تلكاه ارتاح، شد حيلك بطل

رفعت عيني:- مو لازم نخبر اهله

-خابرت على امجد و كلت اله يبلغ اهله عمام، اليوم الدفن خاف يريدون يحظرون .

طلع سيد حيدر يحجي ويا خالد على موضوع استلام الجثة، و خالد كاله:- ساعة و يسلمونه الجثه

سيد حيدر :- راح اخابر الدفان يحظرله كبر بصف والدي بكاعنا حتى ندفنه بيها

خالد:- اتصرف بعد انت اعرف بهالامور

طلع سيد جعفر، وكفو يحجون، خابرتني امي، رديت عليها كوة و اني ابجي، صاحت :- هاااا ولج مات

ما جاوبت بس ارتفع صوتي بالبجي

كامت تهدي بيه و تترحمله و هي تبجي، وكالت:- بس انطيني اسم المستشفى اني وصلت كربلاء

انطيتها، حوالي ربع ساعة و اجت اخذتني بحضنها تبجي و اني ابجي، و اثار يمي حاضنه رجلية و تبجي
مدت ايدها لأسامه و هو يبجي و اخذته بحضنها و كامت تهدي بينا

اجا خالد سلم على امي، مسحت دموعها و كالتله :- هلا خالد شجابك هنا شلون اجيت

خالد:- خابرتني خطية تبجي ما شفت كبالي غير طريق كربلاء و اني جاي، حتى ما شايل وياي غير محفظتي بس

ميعاد:- الله ينطيك عيوني من يوم يومك غيور و صاحب نخوة

خالد:- لا ديار مثل اختي ما يحتاج احد يشكرني عليها

اجا سيد جعفر، سلم على امي و كال :- احنا راح نطلع بالجنازة لمرقد الامام الحسين ندور بيه و نروح للامام العباس، ومنها ناخذه لمگبرتنا، ارجعوا انتم اني بلغت الاهل هم بانتظاركم

حجيت وياه:- سيد بس اشوفه

جعفر:- والله جان بعيني بس مستعجلين لما ندور بيه الامامين لما نغسله و ندفنه صاير الليل و ما يصير نسوان تحضر الدفن، اتوكلي بالله بنيتي وروحي للبيت

راح خالد و سيد جعفر و سيد حيدر يكملون الجنازة حتى يستلموها ..

ما قبلت امشي ردت بس اشوف جنازته، ماما ما قبلت،

ميعاد:- شتشوفين يا بنتي هو راح و الله يرحمه لا تفجعين كلبج بمنظر جنازته هيج مناظر ما اروح من بال الواحد، كومي امشي

جبرتني اروح، حطتنا بالسيارة و رحنا لبيتنا، تجت الحجية و جناينها و المنطقة كلها انكلبت علينا

خالد راح ويا الجنازة يشيعها للدفن ..
من وصلوا مرقد الامام الحسين هواي يعرفون سلمان شالو النعش و شيعوه بمرقد الامام الحسين و العباس

رغم وحيد هو بهاي الدنيا بس سبحان الله شلون زرع محبته بكلوب هاي الناس، هواي حيل هواي اجوا لتشييعه.

اجو بيت ابو امجد، مها وياهم هي و جهالها فطوم و التوم الجديد حسن و حسين ..
مرت ابو سلمان و اخته ما اجن بس خابرن على رقمي ما مجاوبتهن الموبايل ما جان يمي وحتى لو جان يمي ما اجاوبهن و حيل حقدت عليهن من دزن عذر بيد بيت ابو امجد

شكد ما يكون الانسان جاحد و ما يوصل صلة رحمه بس الموت مو شي هين حتى بموته ما حضرن، حرامات كل حبه الهن و هن ما يستاهلن .
حتى عمه ما حضر ابد، مو اقارب الغربة احسن منهم.

بالليل اجو من الدفنه، خالد جان وياهم، سمعته اجا بس ما طلعتله، بقى كاعد ويا الولد بالأستقبال

كالولي لازم تلزمين عدة ..
بس كل التجي تكلي بسوالف ما سامعتها
وحدة تكلي لا تباوعين بالبريج لان ذكر
اللخ تكلي اذا ملابسج الداخليه مو سود تبطل العدة

وهاي التكول ما يصير تحفين لو تنتفين شعر وجهج او جسمج تبطل العدة و لازم تتبوشين وما احد يشوفج بس اخوج

وكل وحده تحجي شكل كلت اخلص العزا و اروح اسأل عن الموضوع شنو اذا ابقى عليهن عوزهن بس ينطني حبل و يكوللي خنكي روحج و موتي وراه .

الفاتحه جانت عزاء الزلم بالحسينية و النسوان بالبيت، و بس العصر يجون .. يقرون الفاتحه و يمشون.

خلصت و فضت الناس، و بيت ابو امجد الله ينطيهم مقصروا وكفاتهم وياي ما تنسي، خلا بأيدي عمو ٥٠ و امجد ٢٥ الف.

وباسو راسي و توكلوا، خالد اجا حط بأيدي ٥٠ الف و كال:- امانة الله ورسوله شتحتاجين لا تستحين الطريق ما يلزمنا عنج ترا

-ما اعرف شلون ارد جمايلك ، وكفاتك وياي ما تتجازه بيوم موت سلمان بقيت صافنه من اجيت ما توقعت تجي بهالسرعة

-غير طك راسي من خابرتي و انت تبجين ما حسيت الا و اني بكربله، صيري قوية و شتحتاجين اني خادم

ميعاد:- خادم ربك ان شاءالله وكفاتك من صدك ما تنسي تعبناك هوايه خاص بالدفن

-لا تكولين هيج ام ديار تره سلمان ابن المحله مو غريب

ميعاد:- طيب و معدل و ابن اجاويد فدوة الطولك الله ينطيك و يزيد من امثالك

-هلا بيكم اني اترخص ارجع لبغداد، شتحتاجون رقمي يمكم

-ما تقصر

سلم و طلع ، الكل طش، سدينا الباب و دخلنا.

وحشة الميت ما تبين الا لما الكل يروح و يخلى البيت، تبقى تتخيل وكفاته بكل مكان، صوت ضحكته، عصبيته وصدى كلماته و كل ذكرياته.

تصيبك غصة تذبح و تسأل نفسك (معقوله بعد ما اشوفه؟ هاي هي يعني راح بعد ما يرجع ، انتهى كلشي وياه و صار ماضي! ما اضحك وياه ولا اسولف، ما اهتم ولا اداري
شلون راح تمشي الايام بدونه ؟

كعدت بالاستقبال بمكان سريره حطيت اديه على راسي وكعدت ابجي بصوت عالي من كل گلبي

امي كابلتني و تبجي و اثار بحظنها، اسامه كاعد بالزاوية يبجي وياي، اندكت الباب

كامت امي فتحت الباب، طلع سيد جعفر و الحجية وياه، كمت فتت للغرفة بساع، اجت الحجية وراي، و السيد فات للاستقبال ويا اسامه

لبست حجابي و فاتت الحجية :- ها دويره يمه شلونج يحبّيبتي

-شلوني خاله شتتوقعين لوني

-الله يرحمه و يجعل مئواه الجنة يمه، ارتاح خطية تعذب هواي شله بهالدنيا هاي العلعلت كلبه المسكين، و انت صيري قوية اريدج سباعية تتذكرين الحجي من جان يكلج صيري سباعية بنيتي، هسه اريدج صدك اطلعين سباعيتج و تقرين و تنجحين

-خاله ما ظل الي واهس اقرأ تعبت نفسيتي

-لا ما اقبل بهالحجي، اني يمج و و ولدي اخوتج شتحتاجين و شتامرين كولي ، اريدج تنجحين و تفتخرين بنفسج الحزن لو يفيد يا بنيتي جان كلنا حزنه .. ولو يرجع الراح نحزن كل عمرنه
بس ما يفيد والله يا يمه

صيري قوية، و حطي كتابج و اقري

.. فاتت امي خلت كبال الحجية ستكان جاي و صاحت على اسامة يودي الجاي لسيد جعفر، اسامه ما سمع راحت هي .

صحت وراها، ماما .. باوعتلي اشرتلها فهمتني بس غلست ، باوعت للحجية ما تشرب الجاي:- ما شربتي خاله ؟

-الشكر هواي بنيتي

-اكوم اجيبلج

-اكعدي ما جايه اشرب جاي، شلونج انت سوفيلي وضعج البنات ميتات قهر عليج بالعباس رادن يجن وياي كتلهن باجر روحلها خلها ترتاح اليوم

-خطية ما قصرن هن نظفن البيت و شالن ٣ ايام العزا بالخدمة و الضيافة ما ادري شلون اجازيهن

-خواتج هن يمه

-اكلج حجية فدوة العدة مال الارملة شلونها النسوان بالعزا كل وحده تحجي شكل خبلني

-يمه العدة هي ٤ اشهر و عشرة ايام خلال هاي المدة ما يجوز عليج الزواج، و يحرم اظهار الزينة يعني تلبسين ذهب لو الوان فاتحه

-يعني بس اسود

-مو شرط اسود، المهم يكون لو غامج ما يجذب نظر ما تلبسينه و تحتاطين بالكلام ويا الغريب

-يعني ما يصير احجي ويا ولد

-لا مو ما يصير ، تحجين العندج و تسألين بس الكلام الما اله داعي ما يجوز .

العدة الله خلاها للمراة طهارة يا بنيتي، على المرة المتزوجة اللي زوجها داخل بيها دخول شرعي

-شلون يعني دخول شرعي

-يعني متقارب وياها مرة و رجال

-بس اذا متقاربين يعني ؟

-اي طبعا اءا ما متقاربين ما تعتبر مرته و ما عليها عده ولا شي

-ليش ؟

-الزواج شنو يبنيتي؟ يعني تزاوج بين الرجال و المرة اذا هم ما متزاوجين شلون تتسمى مرته ؟
ما تتسمى مرته ولا عليها عدة ولا اي شي من اللي ينص ع المتزوجات، اساس الزواج هو النكاح الشرعي لهذا عقد الزواج يتسمى عقد النكاح

...صفنت ويا روحي : يعني اني مو زوجة سلمان !!
لعد شتسمى ؟

بقت تحجي وياي ع العدة و شلون اتصرف وياه، بس عقلي ما كام يجمع وياها، بقيت افكر بسالفة اني مو زوجته ..

الى ان ترخصت مني و كامت، حطت بيدي ١٥٠ الف وبقت توصي بيه و تقويني.

الحجية افضالها وياي هواي، اكثر وحدة تعلمت منها بهاي الدنيا هي الحجية، علمتني احف و اخيط و اخبز و اضرب ابر ..

جان عدها علاج لازم تضربه كل يوم، تقسنلي المنطقة اربع اقسام و تكلي ضربي هنا يلا سباعية لا تخافين

و من اگلها:- حجية خاف اضرب غلط و يصير بيج شي

تجاوبني:- ضربي بنيتي ما يصير كولي يا الله و كوي كلبج
لحد ما خلتني اتجرأ اضرب ابر و اشكل كانونه، غير نصايحها المستمرة اليه، المرة المعدله هيج تسوي و المرة المعدله هيج تمشي ..

من اجيت لكربلاء جان عمري ١٦ هسه عمري ١٩ ..
صغيرة اجيت عدها شتعلمني اخذ منها ..
على كد ما جنت افتقد التعلوم عند امي، فتحت عقلي ويا الحجية و كمت اتعلم منها كلشي

امي ما جانت تعلمني غير بدروبها و بتجاربها، بس الحجية جانت تختلف عن امي تماما، خلتني التزم بصلاتي بصومي

جنت ما اصوم عد اهلي، كامت تخليني اصوم رجب و شعبان قضاء و كل يوم بالليل تاخذنا للامام نسوي اعمال الليالي نخلصهن و نجي

العيشه هنا بكربلاء حيل تختلف عن العيشة الجنت عايشتها ويا اهلي . غيرتني هواي و غيرت من طبعي حيل .. جنت اكره ربي و هواي جنت اكفر بيه لأن ما اشوفه واكف وياي بس بعد جيتي لكربلاء تغيرت، صرت احس بوجوده

كلمة ( يا سند من لا سند له ) ما صارت تفاركني
وما مرة رددتها و الا بالفعل الله يسندني و يخلصني من المشكلة لو العوز الاني بيه .

الحجية احسها نعمة بحياتي الله دزها اليه تعلمني بدال اهلي الما علموني.

فعلا الله يهدي من يشاء
مرات افكر انو امي هيج و ابوي هيج اني شلون ما مشيت هيج، اشوف الله حط ناس بطريقي حتى ما يخليني اتجه للطريق اللي اتجهتله امي او ابوي.

طلعت الحجية، و السيد حجه واكف بالباب :- يابه هاي ٥ كواني طحين و ٣ كواني تمن و صناديك مواد غذتئية وصلت بيها الناس، انتم تصرفو بيهن تبيعونهن تخلوهن الكم باللي يعجبكم

ميعاد:- ما تقصر سيد بوجودكم بنيتي ما محتاجة شي

-لا احنا اهلها ان شاءالله و ما ننساها

-عساك سالم يا ربي يزيد خيرك و يوفقك

-مشكورين يابه

سلم و طلعوا، و فاتت امي للغرفة، كلت الها :- كون دخلتي ع السيد يمه

ميعاد :- ديار شوكت تستحين ترا اني مو جاهله يمج و توصين طلعت روحي منج يا امي من يوم الاجيت و لليوم توصين

يعني و اذا طبعهم يختلف عن طبعنا، لازم نصير نشبههم حتى يرضون بينا ؟

-مو يرضون بيج بس سمعه عليه

-كلمن يشيل اخلاقه لا سمعه ولا ابد، لا تدخلين بتصرفاتي لان مصختيها، و بعدين تعاي شنو انت ناويه تبقين هنا ؟

-لعد وين اروح

-مدرسه وراح تتخرجين ، اسامه وراح يطلع السادس كعدتكم هنا شنو بعد ؟

-ارجع لبغداد شسوي ، اسامه كبر ماما ما بقى صغير و تعبرين عليه السوالف، جنت بس اني افتهم و على ذمة ابوي و ما تحملت تصرفاتج، هسه وياه شلون ؟

-و شبيها تصرفاتي يمه ؟

-ما بيج شي ماما، راتبج خير من الله خصصيلي اني و اسامه ٢٠٠ بالشهر و اني اسوي مال رعاية اجتماعية و اطلع مال ارمله و اعيش اني و اخوي هنا

وهنا الناس اهل رحم يحبون يستفقدون و يتبرعون و بيت السيد يمي كلشي ما احتاج

-براحتكم

-نعسانه حيل اكوم انام

-ارتاحي يمامه تعبتي هوايه سوده عليه

نمت و ثاني يوم بقن نسوان المحله يجن يوصلن، اني مواصلتهن كلهن الحجية عرفتني عليهن و كلما يصير شي ادز عليه اروح وياها و احط ١٠ بأيدهن

فمن صار عندي حالة وفاة كلهن وصلني بيهن الجابن قطع قماش اسود و اكثرهن يخلن فلوس

جمعت الفلوس ضميتها ، و الاقمشة لكيت امي فارشتهن و تباوع بيهن :- اذا عجبج اخذي اني اخيطلي كم وحدة

-اي هو اني دا اباوعهن، باعي هاي تصير شلون نفنوف يكطع ، خصوصا اذا سويته قصير وبلا ردن يصير يملخ ع الجسم

هزيت ايدي:- اليعجبج اخذي ماما

ميعاد:- ثانكيو بنيتي

ابتسمت :- ادور انكليزي صرتي تحجين

-هاي الدنيا ماما كلشي يرهم بيها، اسألج صدك خالد شجابه للمستشفى استغربت وجوده

-اني خابرته

-ليش خابرتي ؟

-ما اعرف من حلاة روحي، تعلكت بخالد ما عرفت المن اكول و اشكي

-بس اجا من بغداد بسرعه حتى وصل قبلي و تعب كلش هواي بالدفنه خطية، بس هو ما خربها غير من كال ديار بحسبة اختي هي مكموع شوكت صرت اخوها مخلفتك اني جايبتك هازه كاروك امك حتى بتي تصير اختك.

-خالد صاحب نخوة ما يرد احد ينخاه

-مو بس هو يمه ابو رافد و ولده كلهم هيج حتى بيت ابو امجد هم ناس طيبين الله يحفظهم، ولدهم وردة مال الله و عساج بس تنخينهم

-اي والله وكفاتهم وياي هواي بالخصوص خالد

-تلحلحي و كوشي عليه لا يفلت الرجال

عقدت حاجبي :- شلون يعني ؟

-الرجال مطلع و المكموعه مرته انكلعت اتزوجت و خالي مختلي املي الفراغ بحياته وصيري انت كلشي

-ما شفتي يكول اختي، عوفيني بحالي يمه ما الي خلك هالسوالف

-اللسان غير الگلب يبنيتي، الرجال بس املي حياته و عودي يتعود على وجودج بس ديري بالج تخنكينه، الرجال لو بيده يعبد المره عباده خاصه على شهواته بس لو نكت و بقت تخنك بيه هنا يدور الف حجة و الف لوفه حتى يشرد منها.

ابتسمت و حطيت ايدي على خدي و كلتلها :- اكلج يوووم انت صارلج هنا ٤ ايام دوامج شلون

-غير ماخذه اجازة

-اجازتج شكد

-باقية يمج شهر

-منو ينطي اجازة شهر

-بكيفهم ما ينطوني غير ازين شواربهم بالقندرة، وداعتج كل زلم الدائرة مخليتهم بجيبي شحده اليفك حلكة

-كلهم مصادقتهم ؟

-لا غدي شلي بيهم ما ادورهم، بس اعرف شلون امشي اموري وياهم.

-اذا هلكد تعرفين بالرياجيل شيحبون و شيكرهون ليش ما حاولتي تصلحين ابوي و تعدلينه

-اكو زلم يمه مثل حاوية الزباله لو تشمرين بيها سطل مي ورد ما تطلع منها غير الريحة الجايفة و هذا حال ابوج

لا جان يهمه مره ولا احد، كل همه اروح اطلع اشتغل و اجيب اله فلوس مشروب، رغم جان يعرف اني شنو و ما يهمه كل اليهمه اجيبله فلوس

-ليش ما اطلكتي ؟

-الطلاك مو شوية كل مرة جنت افكر اطلك بس وين اخذكم ؟ راتبي جان على كدي ما انصلحت احوالي ترا الا لما اتزوجت عصام

-اكوم افتح كتابي و اقرأ احسنلي من هالسوالف

-اي والله احسن كومي، انطيني الريموت من يمج خل اشغل التلفزيون صارلي ٤ ايام ما شايفة العشق الممنوع حتى ما ادري هسه شصار بسنر شسوت المكروده

-يمه ترا عدنا حالة وفاة مو مال تفتحين تلفزيون

-افكارج هاي منين متعلمتها ما اتذكر اني معلمتج على هيج سوالف، اصحي بنيتي الحزن ما ينقاس بتلفزيون

عفتها براحتها و فتت لغرفتي اقرأ ، و صحت اسامه يمي حتى اقريه بدل العرايك هو و اثار
كعدت ادرسه و ادرس اني هم.

اسامه جانت امتحاناته قبل امتحانتي، صادفت ورا وفاة سلمان بأسبوع، جنت اقريه و يروح للامتحان بكلوريا و يرجع اجوبته اكثرها صح

ركزت على دراستي هواي، رغم حزني و الناس تروح و تجي و و نفسيتي صفر بس جنت اجبر نفسي على القراية .. مخليه لكل كتاب ٤ ايام اخلصه و ليل مع نهار اقرأ، بحيث تعقدت كلش، توصل بيه حالات اكوم ابجي حيل .. ما ادري من حزني على سلمان و فقداني اله ما ادري من ضغط الدراسة

كامت امي تاخذني و تاخذ كتبي و نروح للامام الحسين، اكعد بالسرداب هم بارد و هم هدوء و هم ناس تروح و تجي تغير نفسيتي .. خصوصا صوت القرأن و الادعية مريح للاعصاب شويه يساعدني اغير نفسيتي

بس المشكله هنا الناس ما ترحم المرة الما عدها رجال، يترقبونها و يتبعون الزلة عليها حتى يحجون بيها

هواي يعرفون سلمان و يعرفوني مرته، من يشوفوني افتر ويا امي بالحجاب، يبقى الكلام :- يا تفتر و رجلها ميت

لو يشوفوني ادرس:- هي بحال دراسة غير رجلها ميت شو جنها ما مهتمه

يترقبون حتى حركات الوجه اذا ابتسمت بالغلط تنحسب علية و ديره صغيره هناك ناس تعرف ناس و ما تظل حجاية مضمومه، شفنا مرت المرحوم سلمان هيج و هيج

امي تكلي :- شعليج بيهم طز اليحجي و الما يحجي شيقدمون و شيأخرون عيشي باليعجبج و عوفي اليرضة و الما يرضى يركع راسه بالحايط المهم انت راضية عن نفسج

بس الحجية جانت تصبرني و و تنصحني اتنقب هاي الفترة حتى محد يحجي عليه، دكول :- اكل اليعجبك والبس اليعجب الناس، صح كلام الناس لا يجيب ولا يودي بس يا بنيتي الناس للناس وذوله اليحجون تحتاجين وكفتهم فد يوم ، من تكولين الناس ما تهمني و الناس مو ابالي و اسوي اليعجبني بس وكت التوكعين بشدة تظلين وحدج ومحد يعين صح الله ما يترك عبده ، بس عونة ابنادم لابد منها يبنيتي

انت وحيده و محد الج لا تخسرين احد بسوالف ما تسوى خليهم يباوعولج بالعين الحلوة، تنكبي هالفترة و اطلعي منو يدري عنج و منو يحاسبج ؟ ركزي بأمتحاناتج و عوفي الناس و حجيهم.

جنت اشوف كلام الحجية صح
لأن من وفاة سلمان و لليوم المنطقة ما عايفته، هذا الشايل عنا فلوس السحب و هذا اليدك الباب و يجيب مسواك و هاي التمر تسأل شلونج خاله و شلون صحتج

هم صح ناس تحجي على ناس بس بنفس الوكت ناس شايله ناس، و فايديني و شايلين عني هواي فنا ردت اغير صورتي بالمنطقة و يستنقدوني على شغلات ما تسوى

صح امي غير طبعي و تطلع و ما ادير بال عباية تكشفت، كذله طالعة .. يعرفوها بغدادية و بعقلهم ان ابغداد حرية اكثر من كربلاء حتى لو جانوا هواي بغداديات ملتزمات بس هم هيج ماخذين نظرة على بغداد فري مو مثل هنا مدينة دينية.

مشت فترة دراستي كوة ويا حجي الناس لان بالعدة و اداوم، ما كعدت بس جنت احاول اغض نظري عن هالامور .. و اركز بدراستي احسن
لأن هاي الفترة بالذات تحدد مصير مستقبلي بالكامل لو اجيب معدل زين لو يتفين حظي بمعدل ما بيه وجه.

بس اصعب شي جان الاربعين مال سلمان ويا امتحاناتي، بس الحمدلله جان بين امتحانين، يوم عطلة فأخذت الكتاب وياي و بالسيارة اقرأ، و من كعدت بالمطعم و اني اردد ويا نفسي التعاريف و احفظ
جانت فترة كلش صعبة عليه.

خالد جان كل فترة يخابرني بس ما اطول وياه يعرفني امتحانات فبس يسأل عني و يغلقه، بس يكلي توعديني من تكملين امتحانات ، تخابريني مخابرة طويله تحجيلي بيها عنج و عن كل اخبارج احب اسمع

الصراحة شفته مو بس يسمع اخباري، انما هو يفضفض من احجي وياه يكوم يحجيلي المشاكل اليمر بيها ، بس ما اكدر اطول وياه لهذا يطلبني اتصال

امي رجعت لبيتها و بقيت بس اني و اسامه بالبيت، هو بالبيت و اني اداوم ، لحد كوة بطلعان الروح خلصت السادس.

رجعت بيومها يا يابه بكد فرحة الثالث عشر اضعاف لدرجة بيت من الفرحة لأن خلصت مدرسة و امتحانات.

دخلت للحمام ساعه اسبح و اشمر على روحي مي حتى ارتاح و ينفك ضغط الدراسه عني، طلعت لبست ملابس خفيفه و مشطت شعري و تمددت على الجرباية بطولها ونمت

اخ يالراحة الحسيت بيها جن انولدت من جديد.
نمت نومه طويلة، اجاني سلمان بالحلم يضحك و فرحان ما حجه بس ضحكته المعتادة الشاكه حلكه طلاقتين نفسها اجا بيها، و كان هو وياي و فرحان بيه لأن ارتاحيت.

كعدت العصر الشمس تريد تغرب، ابتسمت و اني اتذكر سلمان بالحلم، كمت من مكاني رحت سويت جدر محلبي مهيل و دزيت اسامه يجيبلي جلي اخلي عليه

جان يحب هالاكله هواي من اسويها ياكل اكثر من ٦ امواعين و اذا خليتها بالليل اكعد الصبح الثلاجه فارغه كلهن ياكلهن واكعد اتعارك وياه وواكله شنو عايش ويا عميان احزا هم نريد ناكل، كمت ابتسم و اني اتذكر هاي الأيام و وويا الابتسامة دموعي تنزل و اني اخوط بالمحلبي

لحضات عادية جانت، بس ذكريات حلوة و تبجي صارت ...
فسويت بثوابه ٢٥ ماعون خليت بصينية و اسامه وزعهن بالمنطقة.

كملهن دخلته سويتله عشا و كعدت نتعشا اني وياه، اباوعله ، ابتسمت ، شافني اباوعله كال:- ها شبيج ؟

-اذا الي دعوة مستجابة يم الله ادعيه بحق كل ملك بسماواته يحفظك اليه و ما يبعدك عني

ابتسم :- اني ما اعوفج ديار، انت امي مو اللي ابغداد

لزمت ايده:- و انت كل اهلي

بقينا نسولف مع بعض، كملنا عشا انطيته فلوس راح اشترالنا نمنمات و كرزات و كعدنا نباوع فلم و ناكل، بنص الفلم تذكرت خالد

جريت موبايلي و رمشت عليه، دقيقة و رجع اتصل بيه، كلت لاسامه:- اني راح اكوم انام انت ابقى باوع تلفزيون

كمت للغرفة رديت على خالد:- الو

خالد :- بشري وكولي خلصت

-اي خلصت

-صلوات على محمد و اخيرا خلصتي

-الحمدلله حمل و انزاح عن ظهري

-شتتوقعين نجاح لو اكمل لو شنو

-حسب اجاباتي التأكدت منهن ناجحه و تبقى يم الله لان المصححين ما يرحمون بالتصحيح هواي يظلمون

خالد:- ان شالله تحصلين النتيجة التستاهليها و اكثر

-ان شاءالله يا رب

-شناويه تقدمين على يا كلية ؟

-بنفسي قانون

-القانون يحتاجله وحده جريئه ، لو امج يلوكلها

-اي تاكل و تشرب الكدامها

ضحكنا ... كلت :- لو الله ينطيني شوية من السان امي جان اني بخير

- هم زين يمعوده ما طلعتي عليه

-خالد امي صفاتها حلوه لو ما سوالفها شوية ، بس هي كلبها طيب و صاحبة ملگه

-صح

-سولفلي شخبارك امورك

-نفس الوضع

-ضحى ما خابرت على بناتها ما رادت تشوفهن كلش عافتهن ؟

-لا طلبتهن مرتين راحن الها و شافتهن عد اهلها

-اذا هيج گلبها ماناسيها ليش عافتهن

-ضحى غيورة ديار، من سافرت للاردن حاولت تتصل بيه هواي و جانت تتوسل ابتول حتى اقنع ارجعها بس اني جنت كاشه روحي منها كلش من اتذكر مسوية سحر حتى تكتل امي بودي اكتلها مو ارجعها

فهي ابالها اني طالع مسافر متونس ويا النسوان و هي مبتليه بالبنات، فحتى تقهرني و تخليني اعوف السفر، تزوجت و عافتلي البنات حتى ابتلي بيهن

- صاحية ؟

-لا ضحى غيورة تغار و بسبب غيرتها تتخبط بحياتها بدون تفكير

-بعدك تحبها ؟

-انكر اذا كلت لا، صح كاش منها و كلش طالعه روحي منها بس احبها و هواي ايام جنت احن الها، بس اكول لا التسوي مرة تسوي مرتين

-جان انطيت فرصة

-جنت ناوي بس ردت اخذ كفايتي بالوكت و انطيها درس عدل ليكن سنتين طلاك حتى اتوب، بس هي سبقتني بخطوة و اتزوجت

-الله ما كاتبها الك، يمكن الحياة فاتحتلك ابواب ثانية

-ما اريد يمعودة خليني هيج خالي مختلي كل همي بناتي اشرفلي، احجيلي انت شنو وضعج

-لا اطلع ولا اطب متقيدة هنا كلش الناس ما ترحم النا عدها رجال

-و شجابرج ليش ما ترجعين لبغداد

-خالد هنا الناس واكفة وياي، لو رجعت لبغداد منو الي ؟

-افا عليج لعد احنا وين نروح

-انت ما تتجازى ولا بيت ابو امجد، بس احجيلك واقع، اذا رجعت لبغداد مجبورة اعيش ويا امي
خالد اسامه كبر و فهم و امي سوالفها هي هي ما تجوز صعب اعيش اخوي ويا امي و هي هيج، وحدة من الاثنين يا يصير مكرن و يتعود على سوالفها و يصير مثل ابوي لو يعيش معلعل بسوالفها عمره صار ١٣ سنه ودخل عمر المراهقة واخاف منه

-يوم عن يوم جاي تفاجئيني بتفكيرج ديار، حيل كبرانه عن الاول

-الضربة الما تموتك تقويك و اني من كثر المريت بيه قويت و تعلمت هواي، خاصه من عشت هنا وحدانية و براس رجال مريض اقل غلطه تنحسب عليه فجنت قبل كل خطوة افكر الف مرة و استشير الافهم مني و تعلمت اعيش ...

-بس عفية عليج سباعية

-مو سباعية ولا اني من حديد لهسه من اشوف احد يشمئز من ادية لو الحرك البركبتي انقهر و انفرد بنفسي و ابجي ، من اتأذى اضعف و انكسر و ما الكى غير نفسي استند .. مجبورة اوكف على حيلي و اتحمل كلام الناس

-يعني بعد ما تنتقمين من احد يأذيج

-لا والله مرات يطخ بعقلي انتقم من اللي يدوسون ابطني، و بعدين استغفر الله و اتحسب ربي عليهم

-خليج هيج انت صح

بقينا نسولف اني وياه للصبح يلا نمت ..

ومرت هاي الفترة اعتيادية، بس اليضايقني هي نظرة الناس، ما اخطي خطوة لو اطلع و كالو وين راحت وين اجت، اكيد صاحبت واحد ، لو اتزوجت متعه

العيشة هنا بدون رجال مأسات ، رغم هم يحللون زواج المتعة و يعيبونه بنفس الوقت، عدهم التتزوج متعه هاي مو خوش وعليها علامة اكس.

فجنت كلش اعاني من هالوضع، فحدي لبيت السادة و بس وما اطلع الا اسامه وياي حتى اتفاده كلام الناس

جنت اشكي للحجية بس و هي تصبر بيه و تعلمني

وبمرة من المرات و هي تصبر عليه، فاجئتني بكلمة و هي تكول:- اصبري ابنيتي بس هالفترة بس تخلص ايامج اخلي سيد جعفر يعقد عليج واخليج ابيتي جنه......

☆☆☆☆☆☆