شوية و كالو يلا خل نزفهم .. اخذوني مشوني و مها وراي تشيل بالبدلة ،صعدوني بالسيارة و صعد سلمان جان لابس جديد وطالع حلو
كعد يمي و حجة :- طالعة حلوة
هزيت راسي و درت وجهي ، خالد يكول لامجد :- انت سوق اني راسي كام يوجعني

اخذ السويج امجد و الشباب كلها واكفة ما ردت ارفع راسي و اركز بس من شغل السيارة و حرك باوعت بعيون خالد شفته جان مركز بيه من باوعتله تنهد ...

دنكت اختنكت، ردت ابجي حجة ابو امجد :- ها ديور باباتي شلون الاوضاع ؟

هزيت راسي وبس احد يگلي (بز) انفجر
اخذونا زفة عرس و رقص وموسيقى و الشباب نازله من السيارات تركص .. جانت حلوة الاجواء بس نفسيتي جانت كلش تعبانه فما حسيت بحلاة العرس

سلمان كاعد و متشخص وما يحجي عود عريس و ثكيل ،نزلونا بالطريق اخذولنه صور ورجعنا صعدنا .. زفونا للبيت

كعدونا بالهول و امجد لعب جوله حتى هلاهل هلهل وركص هو و مها و بته بأيده يهز بيها ، ضحى جانت واكفة يمي و تصيح (شايف خير و مستاهلها ) و دكول :- هم يستاهلون بعض يا عيني

كاموا اخذوا سلمان برا و صوت الدي جي عالي و يتراكصون و احس الدنيا تخنك بيه كلش طلعت روحي اتمنى بس احد ينهي هالعرس و اخلص

ضحى اجت كعدت بمكان سلمان ع الكرسي مدت راسها تهمس :- تتذكرين من شلتي الموبايل ورديتي عليه من جهاز خالد حتى تقهريني ؟ شوفي شسوا بيج ؟ خلا خالد بأيده يزوجج ، هه والمن لسلمان حتى تعرفين مستواج و ما تندكين بيه بعد و اعرفي اني منو

ديار:- بالعافية عليكم اني اللي قررت ابتعد و ما اذيج مو لخاطرج بس لخاطر خالد لأن ما قصر بوكفته وياي ورغم شماتج هاي بس ما راح اذيج بس ادعي ان شاءالله الله يشوفني بيج يوم ما تلكين ذرة حب الج بگلب خالد تتوسلين حبه و ما يبادر

-مسكينة
حجت هالحجاية بس و كامت مني متضايقة، رجعت كعدت و كالت :- لا والله ان شاءالله هاي الدعوة عليج يا مشوهه اصلا هواي عليج سلمان خطية كلبه طيب بينما انت مسمومة

عافتني و كامت ..
نص ساعة و زفونا فوك لغرفة امجد و مها فارشين فراش جديد و امجد و عائلته مندار لغرفة ثانية مؤقت

صعدوني فوك ٥ دقايق ورجعوا صعدوا سلمان الية، اني مدنكة مختنكة الدموع بعيني

سلمان:- هلو

هزيت راسي

-ااااا جوعانة ؟

-لا

-محترة ؟

-لا

بقى يفتر يم راسي، رفعتله راسي :- شبيك عندك ولادة ؟

-شنوه ؟

-دكعد جنك وحدو تطلك

-عبالي مستحية الوصخة امداج

-امداك انت لا تغلط

-اسمعي منا وهيج اني الرجال و انت المرة من تحجين اكسر ظهرج

-اكلك شو ما تستحي اطلع منا يلا كوم ولي

-لا لا عيب يكولون علينا متعاركين اسكتي بعدين بعدين نتعارك

درت وجهي منه

-شني ما تبدلين ؟

-انت شرايد

شوية و اندكت الباب، وفات امجد و ابو ورافد اخو خالد و امي و وياهم شيخ

كعدونا و كعد الشيخ يعقد النا كلت اله انت وكيلي و هو تمم العقد، كمل ام رافد هلهلت و ام امجد طشت جكليت و يباركن لامي و باركولي

عمو ابو امجد باس راسي و انطاني بياض ١٠٠ الف هدية . و كال : مهنايين بنيتي صيري سباعية

واجن النسوان بوسني ، باوعت امي دموعها تصب ، تقربت يمي حظنتني و تكلي :- ايدي ورجلي انت حبيّبتي بنيتي يمه شلون راح تكضي ايامي بدونج
.فات اسامة شبكني و بجا :- ديار لا تعوفيني

حظنته و كمت ابجي حيل :- ماما اسامة لا تاخذينه خلي يمي هنا على ما اروح اشبع منه
.-هزت راسها وافقت

ودعوني كلهم و طلعو و بقى بس سلمان رافع ايده و يودع بيهم :- بيباي بيباي بيباي

سد الباب :- يلا

-شنو يلا ؟

-امجد يكلي صير سبع

-سكتت

-انزعج الملابس لو عيب

-وخر انت اني انزع

ماشي راح اضم راسي و انت بدلتي ، واحد اثنين تلاثة .. غطى راسه باللحاف و صاح يلاااااااااا نزعيييي

-وسم صوتك لا تشهرنا

كمت انزع بالبدلة و السحابة مشكلة

صاح :- هااااااا نزعتييييي

-خب شنيه اسكتتت

-ديلا شنيه اختنكت

-ومنو كالك ضم راسك

شال راسه :- يعني اباوع

-لااااا حيوان دور وجهك
رجع ضم وجهه باللحاف

كطعت السحابة من كد ما اجر بيها و ما تفتح، كوة لبست ملابس و هو شهرني :- يلا و يلا

كملت كتله شيل راسك ..

-شني جيت اموت

-كتلك دور وجهك مو تصير نعامة و ادفنه بالجرباية

-اكلج ديار هاي ليش جسمج هيجي ؟

حجه و هو يأشر على الحرك ما ادية و جسمي ..

-هو هيج جسمي محروك

-ايييع مو حلو يلعب النفس

اختنكت من كلمته، هزيت راسي و جريت المخدة و تمددت انام

سلمان :- زعلتي ؟

-لا

-لا زعلتي مو ؟

-كلت الك لا

كام بدل تراكسود و طلع لامجد يصيحة ، طلع شوي ورجع

-اااا هذا امجد انطاني حباية و رحت اله

-حباية مال شنو ؟

-ما ادري هو كالي اشربها و بلعتها

-اني راسي دايخ كلش نعست

-اروح اجيبلج منه حباية ؟

-لا لا عوفه نام

-لا ما انام منتظر الأكل مسوين النا كباب شوي ودجاج

-اكل انت اني راسي يوجعني نعست

-انت شبيج زعلتي ؟

-سلمان كتلك ما زعلت كافي لا تلح

- لا تكولين تلح ديار اني بعد رجلج يعني بعد لازم تحترمين حتى اني ما يصير بعد اكلج الوصخة لازم كله حبيبتي و حياااتي و هاااي

-ماشي

اندكت الباب مرت رافد جايبة العشا و كالت :فدوة الله يحفظكم مهنايين ان شاءالله

شكرناها و طلعت، كعدنا ناكل ، بس اني ما اشتهيت قليل ... كملنا

ورحت تمددت ع الجرباية .
جنت شايلة هم اليلة العرس اني بسبب المريت بيه هذا الموضوع كلش ما اتقبله و احس جسمي يكزبر من ينذكر هيج شي لأن اول تجربة مريت بيها جانت بشعة

سلمان جان فاهم بس بغباوة يعني شلون الفطير .. رغم اني جنت كلش متخوفة من الموضوع بس شفت الموضوع تأزم عندة و ما يكدر

اخر شي نام ... اللي اكتشفته بهذا اليوم
ان سلمان ما يكدر يقيم علاقة زوجية .. و هو معاق من هالناحية ..

الموضوع رغم ريحني ما احب هيج، بس كمت افكر بأمةر ابعد يعني حتى ما يصير عندي جهال ؟
ولا اكدر اعيش حياة مثل المزوجين

تجي افكار براسي لو اللي بمكان سلمان خالد جان شنو وضعي، ارجع اكول استغفر الله .. عمري ما اعيد اخطاء امي .. اللي جنت ما ارضاه على امي ما اسويه ويا سلمان حتى لو جان معاق .

نمنا ع الجرباية كل واحد بمكان مثل الأخوان

........

خالد :- خلصنا العرس و زفيناهم وطلعت افتر بسيارتي، المفروض افرح جمعت راسين بالحلال بس ما فرحت .. كلمتها (انت بيه ) ادك بأذني ابد ما راحت من بالي

بقيت طول الليل لازم الجكارة و ادخن ...
خفت انظلمت بسبب رغم اني جنت رايد سعادتها و جان ابالي اخليها تستقر بكربلاء و سلمان يشتغل و راتبه مال الرعاية و انقلها لمدرسة هناك و تعيش و تكون نفسها بجاله احسن ما باقية تحترك و تذبل بادين اهلها

وهي مراهقة خفت لا لحظة تزل و تسلك طريق امها ..
هذا كل الجنت افكر بيه ... بس احس ظلمتها هواي ما ادري ليش ملامحها و شكل دموعها شلون تجري من عيونها ما جاي يروح من خيالي

الله يسعدها
رجعت و تعبان كلش جن هموم الدنيا شايلها فوك راسي
تلكتني ضحى لابسه و متزينتلي ، عفتها و رحت تمددت يم بناتي

ضحى :- خالد شو هنا نمت تعال ع الجرباية

-ضحى تعبان عوفيني

-من شنو تعبان خالد ؟ شبيك

-ترا كتلج تعبان كافي كفي عني و خليني انطمر

-هاي شبيك هو مو صوجك صوج اللي تنتظرك

....بقيت نايم على وجهي يم بناتي بالكاع
رجعت تحجي:- لازم حبيبة الگلب اليوم تزوجت و مقهور عيني

شلت راسي:- ليش ما تنلصمين

-لعد اذا ما ضايج شبيك

-ترا عرس بحاله واكف عليه اني وامجد وكفنا بيه يعني مهدود حيلي و مو بحالج كلش فكي وكلمة لخ لو سمعت انزل جوا والله ما اكرب الغرفة

....سكتت
رجعت :- يعني مامقهور لأن ديار اتزوجت

.. من حجت كمت من مكاني وكفت على حيلي، لزمت ايدي:- بعد ما احجي والله نام

جريت ايدي و نزلت نمت بالصالة.. مجرد ما خليت راسي ع التخم نمت بلا ما ادري بدون مخده ولا غطا

كهدت الصبح على صوت امي لابسه عبايتها و ترزل بضحى :- ما تعرفين تجيبين مخدة لرجلج و غطا مخليته هيج بالبرد مكشكش الولد ليش ... ما عرفتي تتفكدين رجلج بالليل و تشوفينه شلونه

ضحى:- والله اسالي ابنج الجاي متأثر بزواج الخاتون شسويله هو نزل

خالد:- يممممة صوووت يمه نعساااان

ام رافد :- اني رايحة لبيت ابو امجد

خالد:- متحلمة بيهم شعندج

ضحى سمع ابيت ابو امجد صخى شوفي شوفي ابنج

ام رافد :- ما تسكتين انت ، يمه رايحة لام امجد كتلها الصبح اجيج نكعد العروس نشوف سلمان دبرها لو لا

خالد:- يمه بيا زمن عايشة انت عوفي الناس بحالها بعد وين احد يدور هالسوالف اكعدي خلي العرسان نايمين

ام رافد :- اني رايحة

خالد:- كعدت على حيلي اخذتلي صفنة الصبح شوية انداريت لضحى :- جيبيلي تراكسودي الاسود فوك

-وانت وين رايح

-لبيت ابو امجد

-وعلى شنو رايحلهم مو زوجتهم كافي اطلع منها

-تراااا لحيتي هواي ما ناقصني غير انت تتحكمين بيه، كومي جيبيلي الملابس

.............

ديار :- الصبح دكو الباب راد يكوم سلمان ، لزمت ايده :- اذا احد سألك كملت ؟ تمت او هيج شي لا تحجي كوله معليك او انجب لا ترد ماشي

-ليش

-مو احنه بعد صرنا متزوجين ما يصير نطلع اسرارنا برا عيب

-اي صح ، حتى لو ابو امجد مو ؟

-اي واحد غيري ممنوع

-ماشي

... سلمان طيب ما حبيت يمسونه بحجاية لو يباوعوله بالعين الصغيره او يستخفون بيه بسبب موضوع خاص مو بيده .. فضلت ان يظل الموضوع بيني و بينه ماكو داعي احد يعرف غيرنا

وفعلا لما طلع سلمان و اجت ام امجد و ام رافد عليه يسألن :- ها بشري تمت ؟

كلتلهم :- اي

هلهلن وهوسن .. بس ام رافد كالت :- وين العلامة

ديار :- سلمان ما قبل كال هاي اسرار بيناتنا ما يقبل احد يدخل بيها

ام رافد :- خية شوفي الفلك من هسه تنفخ بسلمان و ما يقبل و مسويته زلمة

ام امجد :- يا شبيج خيه قابل سلمان شناقصة و تكولين عليه مو زلمة هو شويه بسبب الحادث جزء من عقله تضرر الا ما بيه شي
وبقن يتراددن

شوية و اجت امي جايبة كيمر و كاهي خلته بالكاع و سلمت عليه باستني و كعدت يمي ، طلعن هن .. بلشت اسئلة

-بشري شصار بيناتكم ؟

-شصار يعني غير مثل كل اثنين متزوجين

-كون سألوج على علامة لو هيج شي

-ام رافد سألت و كتلها سلمان ما يقبل

-هو سلمان هم سأل على هيج موضوع لو ما يعرف ، الليل كلة ادعي لا تنفضحين

-لا تخافين سلمان خوش ولد البارحة كعد يوصيني ما نغلط على بعض ونحترم بعض و شما يصير بيناتنا ما نطلع اسرارنا برا

-الحمدلله رب العالمين الله يهدي عليج يا بنيتي

فاتت مها طلعتلي ملابس البسها بصبحية عرسي و كالت :- يلا تعاي اخذج للحمام

نيشان هم جامعين بيناتهم متبرعين الولد ع الروس و مشتريلنا النيشان ملابس الي اشكال الوان و مكياج و عطور و لسلمان هم .

رحت ويا مها سبحت ورجعت للغرفة شسورتلي شعري و رادت تمكيجني امي ما قبلت كالت اني امكيجها ..

مكيجتني مكياج سحب خفت كل الاثار البوجهي و سوتلي تسريحة بشعري رفعته اليه و نزلت منه على ركبتي حتى لا تبين ولبستني عقد كرستال و تراجي و الحلقة ... حطتلي عدسات يصير لونهن جوزي على اصفر

غيرتلي شكلي بالكامل احلى من ام الصالون اللي سوتلي مكياج البارحة .. مكياج هسه ارتب و اقل .. مو هوسة و تكوم مثل العرس

باوعت لوجهي صرت غير ديار كمت اشوف نفسي حلوة ما بيه شي يعني عادي اشبه البنات بس ركبتي مبينه و امي ضمتها الية

مكيجت اثار وياي و هم سوتلها تسريحة مثلي و نزلتنا
ام امجد هلهلت .. جاي اريد اباوع عليها اجت عيني بخالد

ابتسمت .. هو ابتسم
كلهم باركولي و كالولي :- بالعافية

كعدت و سلمان يمي و خالد شوية عني ، حجه :- خبالات البارحة راحن

نزلت راسي مستحية

خالد :- ولا جنها هي النسوان بالمكياج يخلقن وجه ثاني

ميعاد :- لا مكياجها مال العرس البارحة ما عجبني هسه اني مكيجتها

كلهم كامو يكلولها هسه احسن و صدك هسه احلى

رجع حجه وياية :- مرتاحة ؟

-احسن من البارحة لا يضل بالك

-يا الله والله الليل ما نمته لوجه الفجر من كد ما انقهرت على وضعج البارحة خفت ليكون ظلمتج و ما ادري

-لا لتكول هيج هو الزواج قسمة و نصيب و الله كاتبلي نصيبي و انت واسطة

-عفية عليج اريدج قوية، امانة الله و رسوله شتحتاجين لا تترددين اعتبريني اخوج ابوج صديقج اللي يعجبج

-هزيت راسي

-طالعة حلوة يربج ولا جنج انت خررب

ابتسمت .. شوكت نروح لكربلاء ؟

-ما ادري بودي باسرع وقت لان ما اعرف شيصير بعدين ما اريد اتفاول بالشر بس ابوج ما يتامن

-اني اكول لو باجر نطلع

-ان شاءالله

-انت تاخذنا لو امجد

-ماكو فرق المهم نأجرلكم هناك و نامن عليكم و اذا الله خلانا سالمين كل شهر يمكم نشوفكم شمحتاجين ما محتاجين و الموبايل يمكم كربلاء شمرت عصى بسيارة خاصة ساعة ونص احنه يمكم

واذا ما تريدين تروحين لكربلاء كولي وفكري باللي يعجبج و انت براحتج

-لا هاي هي اللي تشوفه

ما اعرف ليش كمت احس بنظرات خالد تغيرت ..
مو حب بس ما كام يباوعلي مثل قبل بدون اهتمام هسه من ادور و ارجع الكاه صافن بوجهي و يفكر

بس ما ترددت و سألته :- شبيك

- انت بيه

-ضحكت

-هاي الكلمة ما جاي تروح من بالي ما ادري ليش

-كلتها بساعة ضعف هسه اني متزوجة و بديت حياة جديدة

-الله يوفقج ان شاءالله

كاعدين الصبح و ملتمين و صبوا صينية الريوك .. وسووها سفرة و لمة و الكل فرحان و نكات و ضحك

اندكت الباب ..... ما سمعنا دكت الباب
شوية و فات ابوية
اسماعيل :- ها السلام عليكم....يتبع

☆☆☆☆☆☆

#اتمنى_ان_افعلها



الحلقة_11

ثق بمقادير الله
فما اشقاك الا ليسعدك
وما ابكاك الا ليضحكك
وما اخذ منك الا ليعطيك
و ما حرمك الا ليتفضل عليك
وما ابتلاك الا ولأنه يحبك
فما احب الله عبدا الا وابتلاه ❤

....

دخل بابا كمنا على حيلنا كلنا، راد يسلم على ابو امجد ، ما مد ايده بس كال اله :- هلا ابو ديار

التفت الي:- مبروك يا بنتي ، اكو بنية تتزوج بدون ما يكون ابوها حاظر عرسها

ابو امجد :- اسماعيل اعتذر خوية اني مو عادتي اطرد احد ولا ابلغ على احد ابيتي ابد والله مو هاي ترباتنا بس بيتي يتعذرك بعد اعمالك السويتها

التفت :- شسويت ابو امجد ؟ تصدك بيهن

نزل اسامة يركض فرحان ابابا، ابوية فتح اله اديه وكمز اسامه لحضنه و هو يبوس، اشر لأثار تجي راحتله و باسها

ميعاد:- شرايد بعد اسماعيل عوف جهالي بحالهم و ديار اتزوجت عوفها لحال سبيلها

-ما اسمح لبنتي تتزوج بدون علمي

امجد :- بس تزوجت خالي البنية البارحة جانت ليلتها عقدنالهم و كلشي تم و الحمدلله

اسماعيل :- اني ابوها و الكلمة الية .. زواج ماكو
البنية ما تتزوج الا بشوري و اني ما موافق بسلمان
خطبها مني واحد و انطيتها

ديار :- ما كافي كل السويته بيه بعدك وراي ادور، بعمري يوم ما خليتني ارتاح ولا حسستني بيوم اني بتك تجي هسه تريد اطلكني و تزوجني لواحد من جماعتك

-ما عدي بت تفك حلكها و تحجي و البنية التطلع عن شور ابوها هاي عار و هنيال ابوها لو ذبحها و غسل عارها .. ماكو عقد يصح بدون شور الاب و العقد باطل شرعيا و قانونيا اذا نويتو تزوجونها قانوني

ميعاد :- شوف اسماعيل سكتت كل هالسنين على سوالفك لأن لا حول ولا قوة بس والله و تراب امي الماتت و ما شفتها يا سلمان اكلك بسنوني و ما اخليك تلزم شعره من شعرهم افتهمت

....باوع لاسامة :- يلا بابا روح البس نعالك تجي وياي

جرت امي اسامة :- اصعد اسامة فوك

وابو امجد جر اسماعيل وكام يتصايح وياه و امجد وكف بين ابوه و ابوي باوعت لخالد يأشرلي بمعنى (اصعدي فوك )

-يلا سلمان خل نصعد

-لا ما اصعد خل ابلغ الشرطة على ابوج اوكفلي اوكفلي اسماعيل الخايس

كمت اجر بيه :- اسكت انت دمشي
هم زين ابوي ما سمعه يتصايح ويا عمو ابو امجد، اجاه خالد.خزرة وكف ويا طوله ودفع :- اصعد يربك لا تبلينا

امي سحبتني من ايدي و صعدت بيه ، كعدنا بغرفتي و هي خابرت عصام كالت هسه يدزلنا حمايته و نروح للبيت

-وسلمان ؟

-يجي ويانا

-لا .. روحي انت و اخواني اني و سلمان نطلع منا احسن اذا راح اروح وياج راح يخلون الحجة بيه مزوجتها بدون علمنا .. ابعدي انت و اني اتحمل الباقي

-شتتحملين حيسووها عشائريا و العشاير ما تهد ع النسوان بس لو بقيتي ويا سلمان راح يهدون على سلمان وياخذونه بحجة متزوج بتنا بدون علمنا

-اول و تالي راح يعرفون مكان بيتج اذا رحت وياج خليني ابتعد منا و ابتعدوا مني

سمعنا صوت عمامي اجو ، طلعت امي كامت تلطم :- عزا العزاني ان شاءالله لو نورط بيت ابو امجد ويانا لو نضيع بيها

ديار:- لازم نطلع بيت ابو امجد من هاي السالفة والا هم يتورطون ويا العشاير و ويا الارهاب ..

ميعاد:- صخام الصخمني ان شاءالله شلون يربي موت الكرفك اسماعيل و خلصني منك

ديار :- اسمعي ... اني راح انزل

ميعاد :- ديار وين ولج ديااار تعاي عزا بعينج دياااار

نزلت ع الدرج .. اسماعيل واكف و كلهم سادين الدرج

كلت بس مكان ، التفت خالد جان واكف تقرب و همس :- اصعدي لا ابتلي بيج اصعدي

-اذا صعدت ما راح يكف ابوي وراح يتورط غيري ، شيريد يسويلي

خالد :- دياااار

-عوفني خالد

ام رافد لزمت ايد ابنها خالد :- اطلع منها يمة

سحب ايده بقوة بدون ما يباوعلها :- اصعدي لا اكفر بيج

امه كامت تجر بيه و هو واكف كبالي و مها تخز :- رجعي
و امي تسحب بيه من فوك

صعدت ليفوك و دمي نار و اني اسمع ابوي و عمامي يهددون بعمو ابو امجد شلون مزوجني خطية طلع بالوجه الأسود ، كمت الوب ارجع منا و اجي منا ..

ابوي دك رجل الا ديار تجي ويانا و عمامي كذلك
ابو امجد رفض وكال الهم:- المرة تزوجت و انتم جهال انخطفوا محد بين بيكم تريدون هسه تحجون

اسماعيل:- امهم الخطفتهم هاي ملاعيبها هي و الكوا*** مالها اللي بالحكومة عبالها يحميها مني لواء
لو تصاحبين رئيس الوزراء بنفسه يا ميعاد الومج و اتوبج

وابو امجد.بقى يتعارك وياه ويصيح وامجد و رافد و خالد و احمد و حتى رائد المصوب جيت وياهم يدافع بهذا ويجر بهذا

ما تحملت كل ذوله يتورطون بهالسالفة ناس ما يستاهلون .. نزلت و كمت اصيح بالوسط

الله لا ينطييييك باباااااا الله ينتقم منك كااااافي عوفني بحالي كااااافي ما كفاك مووووت اختي ما كفاااااك حرك جسمي و عاري الخليته على راسي كااافي خاااف الله بينا كااافي

اجا عمي عماد لزمني من شعري و جر بيه :- تتزوجين من ورانا كح..... اليوم ادفنج اليوم

لزموه الولد و يجرون بيه و عمامي البقية يتعاركون وياهم .... اخر شي سحبوني غصب عنهم و خلوني بالسيارة

سلمان طلع عصبي و كبت عنده الحالة و هو لازم حديدة ثخينة و طويلة و ضربها على راس ابوي من ورا وصاح :- اسماعيييييييييل الخااااايس
وجابها بنص هامته
خلا ابوي الدم يجري ...

صارت هوسه انخبص الجو عمامي هجمو عليه و والولد خلوه ورا ظهورهم و المنطقة كلها طلعت الناس النسوان والجهال و الزلم اجتت تفاكك

ما احس الا وايد امي لزمتني و سحبتني ، التفتت الها :- وين يمة سلمان راح يكتلوه

-امشي بسرعة ولج

-وسلمان عوفينيييي

-امشي اكلج

اخذتني و اثار على جتفها و اسامة لازم بثوبها و ايدها الثانية بأيدي وركضت بينا اول تكسي وكفته و صعدتنا بسرعة و صعدت

خابرت على عصام كالت اله :- اني متوجهه للبيت و اسماعيل و اهله عارضو زواج ديار و وكفوا بقسمتها وماخذتها ورايحة للبيت لأن لاحكيني اريد سيارة حماية بالباب توكفلي ..

كال الها :- يجرالج اطلعي و اني و حمايتي جايين

ديار:- سلمان بقى هناك ماما راح يكتلونه

-ما راح يكتلونه يالبومة بس اسكتي شوشتي عقلي

-شلون ما يكتلونه ما شفتي شلون ضرب بابا

-المنطقة كلها طلعت بنسوانها و زلمها وما راح يخلونه ياخذ سلمان لو يأذي منا لما يفاككوهم عود يشوفون طريقة يهزمون سلمان بيها

بس لو مبقيتكم جان كبرت السالفة ووكعت على راس بيت ابو امجد و مجبورة انطيج العمامج ... اما هسه بيت ابو امجد راح يكولون ميعاد شردت ابجهالها انتم و امهم ويكدرون يطلعون من السالفة ... وكتها الزلمة البيهم يوصل بابي الا اكبر شارب بيهم ازينة بقندرتي

-واذا ما ..........

قاطعتني وهي تصيح :-كافي تنغطين دوختيني خليني بمصيبتي لا تشوشين بالي

سكتت واني كلبي نار على سلمان

..........

خالد :- سلمان ضرب اسماعيل ضربة قوية حديدة و جانت منبلة زرفت هامته كام الدم يطفر على ملابسه

اخوته نزلو هدوا على سلمان امجد سحب سلمان و خلاه ورنا ووكفنا ندفع بيهم .. سلمان ما يسكت شبعهم فشار و بعده لازم الحديدة و يريد يهد عليهم

لزمه احمد ابن عمي ابو امجد جراه جوا وبعده يهادد على الصوت طلعوا الجيران من بيوتهم
بس مو طلعه مالت الله
حتى الجهال طلعت انخبص الفرع كله علينا

حتى الحجي ابو عمر مختار المنطقة و يصير صاحب دكان براس الفرع اجا يركض هو وولده، و اسماعيل يهدد يكتل و يذبح

دفع ابو امجد كاله:- هسه اطلعلي بتي و ابني لا افجر بيتك

حجت ام امجد :- ميعاد اخذت جهالها و طلعت فكونا من غضب الله عليكم تجوزون الواحد يسوي الزين بهالدنيا يمه ابتلوا وليداتي يمااااااا االه اكبر عليكم

اسماعيل :- شردت لصاحبها هاي ال****** ال******* اني طلكتها اسمعو يا ناس اني طلكتها لهاي الكح***** لأن تك****** براسي و مو شريفة طلكتهااااا

صار يفشر و يشهر بميعاد لزمه ابو عمر كاله :- ويطبك هرش عساك طلكت ولك اسمااااعيل تشهر بنسوان المنطقة يا عاااار والله من تجيب طاريها امد جدمك و اكص راسك هتليييي

كامو اخوته يتصايحون ويا المختار و المنطقة تحجي وياهم ... المختار ابو عمر اشر لامجد كاله شردو سلمان من المنطقة وسلمان صوته بعده بالبيت يهادد ،

امي كل العركة و هي تجر بأيدي و بأيد رافد و تصيح :- ستروا عليه امشوا للبيت

جريت ايدي منها و صحت على رائد :- راااااااائد اخذ امي و فوتها جوا يلا اخووووي

فتنا اني و امجد و رافد، صحت بسلمان :- اششش سلمان اسكت وكافي تهدد امشي خل نطلع

سلمان:- الا اموته هذا الخايس احرررركه حرك احرررركه

-رحمة لجدك دمشي

امجد.:- خالد رافد اخذوا سلمان انتم و اطلعو لا نعوف ابوي وحده هنا بوجهم خليني ابقى وياه ، اااااحمد روح وياهم .. يلا يولد توكلوا

بعدنا نريد نطلع ، صارت ضجة التفتنا اسماعيل وكع تخربط الضربة جانت قوية بهامته و وكع نزف هواي

لزمنا سلمان السيارة و فلتنا ... و عفناهم بالمنطقة
وديناه لمكان جولة و ختله كل المنطقة تعرف هالمكان يسمونه ختلة العشاق شكو واحد يريد يختلي بحبيبته يجيبها بهالجوله

شلنا الجينكوا و دخلنا كعدنا ..

رافد :- يعني ابو ديار صدك ارهابي ؟ يهدد يفجر و يذبح

خالد :- الظاهر هيج
كعدت على بلوكة و بقيت اخابر بديار

رافد :- ولك طلع مطلك ميعاد

خالد:- وشرايد رافد ؟ اسكت لا تسمعك مرتك بالقران تشوي على اذانك بصل

احمد :- والله هي ميعاد تستاهل واحد يتحمل كلشي لخاطرها بنت المطي مو مرة جمارة شلون جانت راضية باسماعيل البغل ما اعرف

رافد :- انجب لك انحجزت

سلمان :- اليوم اكتله اكتله

رافد :- خايب ما تنجب انت لو ما جارينك من تحت اديهم الا و القران كصوا راسك احمدالله طلعت سلامات فگر خليتني اغير موضوع الحب ميعادو ولكم شفتوها لو لا جنها هي العروس مو بتها .. الفتحة مال تنورتها للركبة وجعب الرجل وردي يااااااابويه من خرب بيومها غير كرهتني بدين مرتي

خالد :- رافد اكول انجب و انجعم احسن ساحلتلها الاكبر و الاخطر منك

-لا بربك منو ؟ تعرف ؟

-هزيت راسي

-عليك بداعت امي كول

-امي لو درت بيكم تفكرون بميعاد الا تكطع روسكم

رافد:- دكول الله عليك

- لواء بالجيش كعدها بالمنصور ويريد يتزوجها

- لواء و المنصور مرة وحدة وزواج !

احمد :- خطيرة خطيرة

رافد :- تستحق الجهاد

ضحكنا و اني اخابر بديار ما ترد

رافد :- انت منيلك معلومات عنها

خالد:- مصادري الخاصة

رافد:- مصادرك صايره هواي ابو الوليد
ويغمز ... اي الله يكثر هالمصادر
بس كون بهالمصادر تفيد اخوك يعني وتنسقلي

-شتريد

-بالقران افتحلها بيت بس خل تأمر من باجر ائجرلها بيت ولك بس خل احظى بيها يحظي

خالد :- الوووو مرت رافد الحكي رجلج اتزحلك

رافد :- خب دكوم تخوفني انت ولك هاي ميعاد اعوف امي و ابوي لخاطرها

خالد:- لو ادري بيك هيج جان دزيتها عليك

رافد :- جايتك ؟!

-ضحكت

-دكول والقران ولك عار اخيك ظال بالضيم و انت الخير يمك

-عيب كافي لا يزعل سلمان هي صارت عمته بعد

رافد :- خرب لشتك سلمان على هيج عمة تكتل

سلمان :- انتم كواو******

طكيناها ضحكة عالية ...... وبقينا نسولف

.............

ديار:- وصلنا للبيت ، الحماية مال عصام بالباب، اخذتنا امي و فاتت جوا و انطت فلوس ابو التكسي و دخلت ورانا

لكينا عصام بالبيت ، كاعد منتظرنا ، شافنا
عصام:- شغلتي بالي حبيبي شصاير وياكم

باست راسه وكعدت يمة :- ما تتخيل شصار بيه عصام ردت اتخربط فد دور من ورا مصايب اسماعيل

عصام:- شكو ؟

ميعاد:- لك عيني اجا و جاب اخوته العار شلون تزوجون البنية بدون علمي الزواج باطل و اني ازوج ديار لواحد اعرفه

-لمنو يزوجها ؟.

-اكيد لواحد من سلاباته الارهابيه الوياه

اسامة يهمس:- ديار هذا شيصير من ماما

-زوجها الجديد

-ماما تزوجت ؟ شوكت شو اني ما جنت موجود

-لما جنت ابيت بتول اسمت اسامة مو هسة نحجي

عصام:- خلي واحد منهم يكرب يمج الا اخ***** ولد القندرة

ميعاد:- يبعد هلي و وكرايبي فدوة الطولك يبعد عمري انت زلمتي و تاج راسي والله افتخر بيك بس يرويحتي اني اخاف عليك مثل ما اخاف على جهالي ما اقبل تنضر بسببي

-منو يضرني غير انعل والديهم انت كعدي و يجيج الصافي

اخذت ايدة و باستها و باست خده :- الله يخليك خيمة عليه و على جهالي بس يبعد عمري لو انت طلعت راح انت تنضر و احنا .. هسه يكولون مكعده جهالها ابيت صاحبها و يفسدوني بالعشيرة وكتها العشيرة تفلسني من جهالي

بس لو خليتهم عليه ما بيهم اليكدر يدوس باب مرة و يدخل دارها ومحد ابيتها .. هم الينعابون لو سووها و الحق الي قانون و عشاير، مع هذا خلي حمايتك قريب من البيت حتى لو حاول احد بيهم يأذينا يصدون عنا ، يبعد بيتي انت من رحت فدوة لطولك

عصام:- يصير خير يابة يصير خير
لعد اني اكوم اروح اتوكل و الحماية راح اخليهم حوالي البيت شتحتاجين كوليلهم و لا تبتعدين عن جهازج من اخابرج بساع ردي طمنيني

-يبعد روحي انت هلي و طوايفي رحتلك فدوة لا تشغل بالك و لا تقهر نفسك اخاف عليك ترا

.....طلعت وراه و هي تحجي
خابر ابو امجد، صحت وراها :- ماما ابو امجد جاي يخابر اركضي

عافت عصام يطلع و اجت ع السريع ردت

ابو امجد :- ها ام ديار وينج خوية

-كفيتوا و وفيتوا خوية ما اريد اورطكم بعد

-لا خويه خاف يأذوكم ذوله ترا ما يتأمنون

-لا تخاف عليه بيتي مشتمل ويا بيت صديقتي و بلغتها وحماية رجلها لواء بالباب شحدة اليكرب

-يعني ما عليكم شي

-لا فدوة العينك ما قصرت ورايتك بيضة الله يكثر من امثالكم بس انتم لو احد اجاكم اطلعو منها اني ما ارضى تتأذون كولو ذيج امها و احجو وياها احنا طباب خير ردنا نجمع راسين بالحلال و السلام

-لا لا لتخافين ان شاءالله

-بس سلمان وينه

-والله يا خويه ما لمحتنه مدري وين ودوه الولد، بس هو الملعون والله ضربه ضربه السماعيل خلا دمه بطوله

-والله هالسلمان طلع زلمة حوك و ما يرضى احد يتدنه الديار كحل عيني بضربته ، امانة الله حجي توصي الولد يديرون بالهم عليه و يحمونه خطية

-لا لا لتخافين ما يخلون احد يگربه بس اسماعيل و اخوته لا ما كاومتهم و طلعتهم من العشيرة فلا اتسمى ابو امجد

-فدوة العينك خوية لا تتصادم وياه عندك وليدات وهذا ارهابي طايح حظه خل يولي

-اني تعلمه لا تخافين

امي تتصل بابو امجد و خالد يتصل بامي
تعذرت امي من ابو امجد وردت على خالد :- ها عيني خالد بشر شلونه سلمان

خالد :- لا تخافين عليه فضت و هذا هو كبالي كاعد ما بيه شي بس خابرت على ديار ماكو

رافد:- اخوك الجبير اني لك انطيني اني احجي

خالد :- اششش بعدته و طلعت برا

ميعاد :-يمكن ناسية موبايلها هناك

ديار :سألتني (مو)
جاوبتها :- موبايلي اي هناك اذا سلمان يمه خل ينطينياه

ميعاد:- تريد تحجي ويا رجلها انطيه الجهاز

خالد :- اي ان شاءالله، هاك سلمان هاي ديار وياك

ديار :- اخذت الموبايل و كلت :- الووو

سلمان :- وين اتي ؟

-اني ابيت امي

-ما اسمح اطلعين بدون علمي افتهمتي يلا تعااااي

-خب انجب غير رادو يعلسونا

-لا تغلطين الوصخة كتلج اني بعد رجلج ما اسمحلج تغلطين علي

-سلمان ترا مو وكتها انت شلونك ؟

-اني زين بس شفتي شلون خليت دم ابوج الخايس يجري

ضحكت:- دير بالك على نفسك ماشي

-لا مو ماشي تعاي اتي هنا يمي

-ما يصير هسه خل نشوف شلون تمشي

-ما تمشي تعاي يمي اكلج لا تخلين اصير عصبي و اضربج ضربه مثل ابوج الخايس

-دكوم الوصخ شنو انت تهدد

-لا حبيبتي اني بعد احميج شبيج

-وشلون تحميني

-هذا خالد يكول راح انطلعكم لكربله تعاي هنا حتى نطلع وبعد ما اخلي احد يوصلج

-انطيني خالد

-ما اقبل مرتي تحجي ويا الزلم

-خب ترا طوختها دنطيني مو وكتك

-راح افتح حتى اني اسمع

-افتح

-تعال خاااالد ، لا لا تلزم الموبايل بيدي ، يلا احجي

خالد:- شنو دا تسجل اعترافي انت دنطيني

-تريد تحجي ويا مرتي ساقط، احجي بيدي يلا

ديار :- اهووو شلون بهذا الينفخ على راسي

خالد:- ديار اني اكول لو اليوم اطلعون مو احسن ؟

- ما ادري اني جيت دا اسألك

-حتى لو كاعدة ابيت اللواء هذا ارهابي تجيبين الخطر لامج و للواء و لكل واحد يمج .. اطلعي و خلي امج تشيع انهزمتي .. و ما انهزمتي ويا غريب الكل يعرف انت عرسج البارحة و اللي انهزمتي ويا رجلج

-وشلون ؟

-راح يجيج رافد اخوي من يرمش عليكم نهاية رقمة 99 البسي عباية و حجاب و اطلعي يوكفلج يم المطعم صعدي وياه وتعاي

احنا راح ناخذ سلمان و نطلع للكراج ونلتقي هناك

-ماشي

معياد:- شنو شتفقتي شيكول خالد

...سولفتلها
كالت :- اخاف عليج يمة خاف ذوله يأذوج

-يوم اول و تالي ما راح يفكون من يمنا

....نص ساعة و اتصل رقم على امي شالته

رافد:- مرحبا ام ديار اني رافد

-هلا عيني هلا، هسه لحظات و اجيب بتي اصبرلي

التفتت عليه امي، فتحت اديها حضنتها ، دمعت عيوني :- ماما ادعيلي

رفعت راسها و كالت :- ربي بجاهك دعوة ام تودع قطعة من كلبها امانة عندك ديار ما اريد ظن بشر يعينها اريدك انت تحط ايدك عليها و تساندها وتحميعا من كل شر

دعت و الدموع جروا على خدودها حظنتني و كامت تبجي، اسامة من شاف امي هيج ودعتني تخبل كام يضرب بالباب و يصيح :- ما تروح ديار ما تروح

مشيت اله اريد احضنه دموعه صاروا مثل المطر و ما ينلزم ويكول :- ما تروحين و تعوفيني ما تروحين و الله ما اخليج تروحين

كمت ابجي بمكاني و هو يركع بالبيبان و يصرخ و اثار كامت تبجي، بست اثار ، ورحت لزمته كوه حضنته بسته كام يصرخ من كل كلبه

اخذتني امي و هو يريد يطلع ورانا.. قفلت الباب و سحبتني من ايدي .. دموعي تجري و كلبي دم شلون راح افركة ... من يوم الجابته امي ولليوم و هو على كلبي اني ربيته مو امي

تسحب بيه بالطريق و اني دموعي تجري، وصلنا لسيارة رافد اخو خالد ، حجة :- امانة ام ديار شتحتاجين اني بالخدمة رقمي صار يمج لا تترددين

-فدوة الگلبك لك عيني كلبي دم على بتي شلون راح افاركها دير بالك عليها الله عليك احرص عليها اكثر من روحك لا يكون احد يراقبك و يأذيها

-لا تخافين عليها ولا تقهرين نفسج .. اخليها بعيوني والله

-تسلملي عيونك ، يلا عيني اني اروح جهالي بقوا بالبيت ، ما اوصيك فدوة

-لا توصين حريص

صعد بالسيارة و طلعنا ....

.......

خالد:- دزيت رافد على ديار و انطيته العنوان و اني تركت سلمان يم احمد و رجعت للبيت

عمي جان مرتفع عده الضغط و امجد و ابوي و رائد كاعدين يمة، بقيت اسأل و اطمن على صحته
اشرت لمها تجي

مها :- ها خوية

خالد:- لميلي غراض لسلمان و لديار اليحتاجونهم مو كلها عود بعدين نودي الباقي ، لمي الضروريات بجنطة قماش و انطينياهم بعد اخوج

ابو امجد :- سلمان وين خالد

-بخير عمي لا تشغل بالك عليه

-وين راح تاخذهم

-والله عمي يروحون لكربلاء احسن

-شماخذهم لكربلاء و منو الهم هناك

-عمي هنا هم منضرين و احنا منضرين .. كربلاء امان و الشغل بيها زين ناجرلهم هناك و نكعدها و سلمان يفتحلة بسطية بشارع الامام يعيشون و مو بعيدين ساعة و شوية نوصلهم

ام رافد :- انت شمصخم وجهك ورايح مورط روحك بديار و رجلها استر علية و اكعد

ابو رافد :- اسكتي يا مرة الناس للناس خوما تكاطعت العالم و ديار ابنيتنا وربت بيناتنا

ام رافد :- ما كافي شمروا ارواحهم بعركة اخوك و تريد تورطهم م ويا بت اسماعيل لا ماكو واحد من ولدي يطلع لو على جثتي

بقوا امي و ابوي يتراددون و اني واكف منتظر الجنطة ، جابتها الي ، اخذتها و امي تصيح وراي، حطيتها بسيارتي و رحت لبيتنا صعدت لغرفتي و صحت ضحى

ضحى:- شنو هاي العركة الصارت ابيت عمك شكو

-عوفيني هسه من العركة ، مليون و نص يمج مو ؟

-شرايد منهم

-٣٠٠ الف

-المن

-دنطيني و اني بعدين اكلج

-و ولادتي خالد غير ضامتهن لجيبوبتي

-يربج جبتي و اني ما خليت بيدج لو ما اخذتج ، دجيبي محتاج

-المن تنطيها ؟

-تحاسبيني انت دطلعيليااااهن

فاتت امي :- خالد ما تروح لكربلاء ويا ديار ، والله لذا رحت وخليت روحك انسى عندك ام

-يمه رحمة لاهلج فكي عن طريقي مستعجل

-ولكم راح تخبلوني انتم شدخلكم رحت انت وذاك اخوك السكط رافد شمرتوا ارواحكم بنص العركة شعدكم

خالد:- العركة ابيت عمي و تريدينا نسكت و نتجبجب شنو مخانيث احنا شو ميلي من كدامي يمه رحمة لموتاج، طلعيلي الفلووووووس

ضحى :- فلوس ولادتي توديهن لديار فدوة لله .. خالد ما انطي

دفعتها من طريقي كمت ادور بغراض الكنتور و اطلع، لحد ما لكيتهن بملابسها ، اخذت ٣٠٠ و طلعت

امي تصيح و ضحى تبجي و تلزم بيه ... عفتهن و طلعت اخذت سلمان للكراج و انتظرت رافد

شوية و وصل رافد و وياه ديار تبجي و دموعها بخدها :- شكو احد تعرضلكم

رافد :- لا على اهلها كلي هسه انت تروح وياهم لو اني

-بكيفك تريد تروح

-لا والله كلش تعبان يمعود وامي حركت الموبايل عليه ، اطلع انت
فتح محفظته طلع ٢٥ الف من جيبة خلاها بجيب سلمان
رافد :- يلا يا بطل خليك كدها و دير بالك على مرتك ، وهاي خليها بجيبك مصرف الك شتحتاج احنا اخوتك لا تستحي ولا تتردد

ما وصيج ديار صيري سباعية و ساندي رجلج ، خالد جبت موبايلها

خالد:- هاي الجنطة كاملة كل غراضهم بيها

رافد :- اي زين عفية، شوفي ديار الله يشهد من انت و صغيرة و اني احبج و مثل اختي بتي بكيفج احنا اهلج ولا اديرين بال ولا تشيلين هم بس تحتاجين اتصال واحد احنا يمج افتهمتي

ديار مسحت عيوني و هزيت راسي ، طبطب على ظهري :- يلا عفية سباعية ، توكلو

خالد:- راح اخذهم فورتات سيارتي اوراقها ما كاملة اخاف يوكفونه سيطرة

-بس شلون سيارتك وين راح تحطها

-بالكراج و ادفع كراجية مبيت يوم واحد

-انطيني سويجها اني راح امنها هنا ساعه اودي سيارتي وارجع اخذها

خالد :- بعد احسن

ديار :- انطاه السويج وصعدنا كيا كعدنا بالأخير اني من الشباك و سلمان بالنص و خالد يمه و تحركت السيارة

صاح واحد :- افلح من صلى على محمد وال محمد

كلهم صلوا ع النبي و اهل بيته ... و مشت السيارة بيه لحياة ثانية .. لمحافظة ما اعرفهه ولا بعمري داخلتها

تنهدت .. اول شي ودعت منطقتي و رحت للمنصور ..
و انوب ودعت اهلي و تزوجت .. و هسه ودعت بغداد كلها و طالعة لمدينة ما داخلتها و لا اعرف بيها احد
اني و رجال بنص عقل و الواجب علية اتحمل المسؤلية و اشيل الحمل

نزلو دموعي ، الطريق كله اسامه بنص عيوني ما فاركني شلون راح اتحمل فراگه

وكفونا بالطريق .. سيطرة وكالو انزلو
نزلنا طلبوا جناسينا خالد جان شايل الجناسي قدمهن كالوله للتفتيش

ردت امشي ورا سلمان و خالد، صاح ولد
:- يبنية منا تفتيش النساء

خالد :- ادخلي و تلكينا كبالج

هزيت راسي وفتت ممر كاعة حصو .. وبنهايتة اكو غرفة صغيرة ماعدات بيها اثنين نسوان مبردة كبالهن و يفتشن

فتشت جسمي وحدة منهن وكالت :- فوتي

طلعت لكيت سلمان واكف و خالد ماكو

رحت يمه :- لعد خالد وين ؟

سلمان :- كاعد يحجون وياه جوه

-ليش

سوالي حركة بوجهه بمعنى (ما ادري )

صاح السايق :- يا ولد اخذ مرتك خوية واصعدوا بالسيارة على ما يجي كرايبكم

رحنا كعدنا بالسيارة انتظرنا قرابة النص ساعة و خالد جوا بالسيطرة ... السايق جاب جنسيتي و جنسية سلمان و كال :- الولد جوا جاي يستفسرون منه

صاح واحد بيهم :- خوية بعد اخوك اتأخرنا كلش ورانا صلاة

وهذا صاح وراي مريض و كلهم يكلوله امشي

باوعلنا السايق :- شلون بعد اخوك تنزلون لو اطلع

سلمان ما حجه كام يباوع بوجهي ، كتله :- لا ما نكدر خلي ننزل ننتظر خالد

السايق :- ترا قريب الأمام ما يتيه خل اوصلكم هناك وهو يلحگكم ويخابركم هناك التقوا بيه بالامام
ها نطلع

كلها تكله اطلع ، سلمان كاله :-
واني اكرص بسلمان :- خلي ننزل ننتظره

-معليج معليج

-شنو معلية سلمان خالد هناك

السايق:- خوية مو على شي بس جنسيته مو شيعي لهذا وكفوا يحققون وياه تعرفين كربله مهددة بالخطر

ما افهمت الموضوع شنو .. شنو مو شيعي شنو خطر كلش خفت بس اللي جان هو ان احنا ٢٠٠٨ نهاية الحرب الطائفية

بعد تفجير الامام العسكري بسامراء شددوا الحراسة على كربلاء و النجف و الكاظمية كلش ما تدخل الا ينبحث بجنسيتك للحفاظ على سلامة هذه المدن المقدسة من الخطر

فسلمان جان من عشيرة الحسيني فوتوه گبل
اني لأن مرت سلمان ما وكفوا على جنسيتي عبروها اما خالد فجان من عشيرة المشاهدة وكفوه يحققون وياه

وهذا جان اقسى شي مر ع العراق
وهي الحرب الطائفية .. مناطق الشيعة تخاف من السني و مناطق السنة تخاف من الشيعي ويبحثون ع الجناسي ... بعد ما صار اقتتال طائفي بين الطائفتين راحوا بيها الألاف الضحايا الابرياء .. بأسم الطائفية

.....وصلت السيارة قريب من مرقد الامام الحسين
نزلنا و كال :- هذا حدي

كلنا نزلنا ... نباوع منعرف وين نمشي
لزمت ايد سلمان :- هسه وين نروح ؟

سلمان :- امشي وراي

... كام سلمان يتبع الناس التمشي وبيدة الجنطة و اني امشي ورا سلمان ، لحد ما وصلنا للمرقد

انشلع كلبنا بالتفتيش .. نمشي خطوتين وكالو امشي منا تفتيش النساء .. يمكن فرع واحد بيه ٣ وحدات تفتيش

سلمان بسرعة يطلع وتفتيش الزلم شكبرة بس النسوان هوااي كلش طكت روحي واني ما ادري خالد وين و بمدينة ما اعرفها ..

لحد ما دخلنا .. مرقد الأمام العباس على اليمنى و مرقد الأمام الحسين ع اليسرى وبينهم مسافة طويلة يسموها (الطريق ما بين الحرمين )

كلت السلمان امشي نكعد كبال اذيج المروحة ننتظر خالد .. كعدنا و فتحت الجنطة اطلع موبايلي .. مغلق طافي شحن

-سلمان وين موبايلك ؟

-هذا

-خابر على خالد

- ما عندي رقمه

-جيب اكتبه .. دكيت رقم خالد اتصلت ما عنده رصيد

ديار :- ما عندك رصيد هسه شلون بس لا ضعنا

سلمان :- لا تخافين حبيبتي اني وياج

بقيت اباوع بوجهه :- هسه شلون

-باعي الناس مو تدخل خل احنا هم نزور

-شنزور يمعود وخالد ؟

-اني معليه رايح ازور

-انتظر اجي وياك

كام يمشي و اني امشي وراه، اشرله واحد يفوت من التفتيش

رحت وراه للتفتيش الولد كال :- خوية منا التفتيش مال النساء

-اوووو
فتت للتفتيش فتحت عيوني السرة شطووووله و ٤ سروات .. وحدة ادفع باللخ و ضكه و خنكه .. دفعوني بالممر مال تفتيش بعد لا بيه اطلع ولا ابقى بمكاني تحاصرت حيل و كلما تتفتش وحدة اندفع ليكدام

طلعت روحي لحد ما كملت تفتيش، وكفتني امسح المكياج باقي بوجهي

تذكرت خرب حظي باقية بمكياج امي و العدسات اللي خلتلياه حتى ناسية امسح وجهي لو انزع .. بقيت امسح شلون ما كان بس اريد اطلع

حجت المفتشة :- حبيبتي ممنوع ادخلين للامام الا تمسحين كل المكياج البوجهج انت ما جاية حفلة و تخلين كل هالمكياج و العدسات

-ما جاي ينمسح والله

اخذي منا كلينكس مبلل وامسحي كله يلا كله

بقيت امسح لحد ما كالت :- يلا فوتي

طلعت من التفتيش كوة، اباوع سلمان ماكو .. بكل التفتيشات المرينا بيها الكاه واكفلي ينتظر ، هسه ماكو
بقيت ابجي حسيت نفسي خلص تيهت و بعد محد يلكاني .. لا اني ابغداد ولا اندل احد والموبايل و الجنطة عد سلمان

مشيت كبالي درج و الناس تبوس بالباب و تنزل ..
نزلت الدرج ... مكان كلش جبير و بيه اضوية هواي و بارد و الناس حييييل هواي

امشي وخطوة كدام و خطوة ورا ، دموعي بعيني
لا اعرف لا اندل و بعمري ما داخله هيج مكانات دينية او زيارات ضخمة

شفت ناس تدخل باب جوا، رحت وياهم مشيت و دموعي بعيني واكف رجاله كال :- زايرة منا باب النساء هذا الباب للرجال

مشيت للباب دخلت ... نسوان هوايه بعمري ما داخله بهيج ازدحام حتى بالسوك مو هيج

المكان بارد و العطر كلش طيب ..وكلما تتقرب يكثر العطر وكأنه عطر ورد جوري، وكفت كدام شباك شايفته بالتلفزيون هو هذا قبر الأمام الحسين

اخذتني روجة النسوان دفع دفع للشباك انعصرت ويا الشباك، جان ملزمة بارد ومشدشد بيه كومة قمايش خضر ..

باوعت بنص هذا الشباك .. جان اكو مثل التابوت ضخم عليه قماش اخضر وداير ما دايرة فلوس والناس تذب فلوس

معصورة ويا الشباك و بنية يمي لازمة بالشباك و تبجي حيل و تصيح :- دخيلك يا ابا عبدالله لا تردني جايتك من مكان بعيد

كتلها :- عفية يبنية بس خل افوووت
كسرت خاطري بس خنكتني يدفعون بيها عليه واني وجهي راد يفوت بالشباك تكسر، صرت شوربه بنصهن

كوة بألف يا الله طلعت من الازدحام
وكفت بالباب اباوع للشباك ، نزلت ادموعي ، رفعت راسي لله و حجيت :- ربي وحيدة بقبر ابن بنت نبيك لا معين ولا سند .. ما الي غيرك بهاي الدنيا كلش خايفة وما عندي غيرك يساعدني

كمت ابجي بقوة و اني اكول (يا سند من لا سند له )

طلعت من القبر ، شفت اكو نسوان هواي واكفات يصلن
ردت اصلي بس اني حتى ما متوضية، سالت وحدة :- يبنية اذا اريد اصلي وين اتوضى ؟

-حييييل الحمامات خارج مرقد الامام الحسين لازم تطلعين كلش تتوضين هناك يلا ادخلين

-وهم يفتشونا ؟

-اي طبعا

عفتها وطلعت ادور على سلمان افتر بالامام وادعي الله و جملة (يا سند من لا سند له ) ما فاركت الساني

نزل الليل و عدت ساعات واني سلمان ما لاكيته ...

باوعت اكو ساعة جبيرة ... الوقت ب٩ بالليل
ضليت اروح منا وارجع منا ما لكيت احد

كعدت ابجي تيقنت انو اني ضعت من خالد ومن سلمان وبعد محد مراح يلكاني ... ابجي و اسمع بالندائات

(ديار اسماعيل طاهر من بغداد من اهالي الدورة يرجى التوجه الى قسم الندائات زوجكِ في الأنتظار )

شلت راسي معقولة هذا جاي يصيح اسمي ؟!!

رجع عاد الكلام .. فزيت من مكان اي والله اسمي الكامل و من الدورة اكيد اني

لزمت بنية لابسة جرجف كلت الها :- عفية هذا اليصيح وين الكاه ؟

شو هاي كامت تخشخش بوجهي :- شنو ؟

بقت تخشخش وتكلي :- تيهران تيهران
واني مستمرة لازمتها و اسأل ، ندستني وحدة وكالت

:- حبيبتي البنية جاي تكلج اني من طهران .. ايرانيه ما تعرف لهجتنا اسأليني عمري شرايدة

-بس هذا اليصيح بسماعة منو ؟

-هذا ابو الندائات مضيعة زوجج ؟

-اي

-ماما علي كوم وصلها للندائات خطية خاف ما تندل

اخذني ولد صغير عمره يطلع بكد اسامة ..
وصلني للمكان و كاله :- عمو هاي الجنتو تصيحون بأسمها

حجه الولد :- انت ديار اسماعيل من الدورة بغداد

-اي اي

-ذاك رجلج روحيلة ، التفتت ولكيت سلمان كاعد يم حجي، تقربت يمه :- هاي وين جنت سلمان مو كتلك لا تفوت هيج احسن طايح الحظ وكمت ابجي

-غير جنت انتظرج وينج اتي

الحجي:- لا تغلطين بنيتي ، خطية جان يصيح بنص الزوار (يا ناس يا عالم مرتي ديار ضاااعت ) وجبناه للندائات

-الجنطة وينها؟

الحجي:- بس على كيفج يابه الجنطة جوا يم الولد ..

رحت للجنطة طلعت الموبايل و كلت اله :- عفية يا ولد ما عدكم نقطة مال كهرباء بس اشحن موبايلي

-اي خويه روحي هناك كعدي و اشحني

رحت كعدت وخليت الموبايل ع الشحن و شحنته، وسلمان واكف فوك راسي ، فتحت الموبايل بسرعة
وخابرت على خالد من اول رنة رد عليه

خالد :- تحجين صدك جذب يا ديار الو ابوية استلك ليش هيج اخابر عليج على سلمان ماكو وين رحتو
من ذاك الوكت لهذا الوكت ما خليت مكان بالمرقد ما دورت حتى صحت بالندائات وماكو وين رحتو

-هو احنا بالأمام بس جنت مضيعة سلمان و موبايلي طافي

-مبايلج طافي و موبايل سلمان اتصل عليكم ومحد يرد

-ما ادري ، سلمان موبايلك وين

-ما ادري

-بس لا ضايع موبايله

-نعلعلا شليتو حالي بالقران غير تنتظروني بالسيطرة عفتوني اخذ تكسي و اجي للامام

-مو كالو تتأخر و السايق ما قبل الا نمشي كال عود يلحگكم

-شلحك غير تكرمت رجلية بالله العظيم

-هسه انت وين ؟

-راجع لبغداد خابروني اهلي ضحى متخربطة وناقليناها للمستشفى ، انتظروا بالامام ديار و موبايلج مفتوح باجر من الفجر امجد يمكم

-اني اخاف خالد

-ديار دورت عليكم والله لحد ما مليت ، شلون يعني هسه ارجعلج ؟ لحظة خل اشوف يمكن اوكف السيارة و ارجع ابقوا بمكانكم

-لا لا اذا ضحى مريضة ارجع وخلي امجد يجينا باجر اني و سلمان راح نبقى هنا لباجر

-ماشي، اسمعي ديري بالج على نفسج و ٣٠٠ راح ادزهن باجر بايد امجد خليهن الج مصرف

اما فلوس الايجار و غرفة النوم لا تشيلين همها احنا شلناهن ع الروس

-مشكور ما قصرت ما اعرف شلون اجازيج

-دكعدي و استقري و عيشي بخير وهذا يكفيني

-ماشي

-يلا ديري بالج على نفسج و على سلمان، كم يوم و اني اجيج اطمن على وضعج

-ماشي

قفلا الخط منه ، اتصلت بأمي ، هم من اول دكتين ردت

- ها ديار يمه حبيبتي شلونج

-هلو ماما اني زينة، شكو صوتج مو تمام اكو شي

-مصيبة يا امي و وكعت على راسي

-شنو ؟

-اسامة ما لكيته بالبيت من رجعت منج، الحماية اللي بالباب يكول كام يبجي وظل يعض بينا و شرد من عدنا

-وهسه وينه اسامة ؟

-من ذاك الوكت و لهذا الوكت واني ادور ولج ماما راح اموت اخوج ما جاي الكاع شلون فهميني

-ولج ماما بس لا بابا اخذه اسااااامة وين.......يتبع

☆☆☆☆☆☆

#اتمنى_ان_افعلها


الحلقة_12

ديار:- يعني بابا اخذ اسامة ماما فهميني وين اسامة

ميعاد:- ولج ماما والله دخت من الظهر و لهسة اني ادور رجلية وكعن

-ماما اريد اجي ما اكدر ابقى هنا اسامة اكيد عد ابوي

-وين تجين يمعزاية اكعدي بمكانج لما اشوف وين توصل اني اخابرج

-ماما اسامة عد بابا ما اكدر اكعد لازم اجي

-منو يجيبج ؟ دنيا ليل و جايه مناك لهنا و الطريق يخوف استري عليه وكعدي بمكانج

بقيت الوب بمكاني و التلفت احس نار اشتعلت بداخلي :- ما اكدر اظل والله اموت ....بجيت

هي هم كامت تبجي وياي و تصبرني، سلمان كاعد يمي ويكلي :- شنوه شنوه شبيج

اشرتله اوكف اسكت
بقى يلح نهيت الاتصال ويا امي ، حجة :- شبيج تبجين

ديار:- اسامة ضايع و يمكن بابا ماخذه
بقيت اباوع ع الزوار و ابجي :- يا ربي دخيلك لا تضيع اخوي والله اموت، اني صوجي شلون عفته كل عمري ما تاركته لوحده شلون هيج تزوجت و ما فكرت

سلمان:- ديار اني نعست

-انت تفكر بس بالنوم اكلك اخوي ضايع ضايع تفتهم انت لو لا

-جوعان

-اهووووو دوخر مني
عفته وكمت امشي و ابجي و سلمان يمشي وراي ، فكرت اخابر خالد اذا قريب يرجع ياخذني لبغداد ما اريد ابقى هنا

اتصلت بيه ، رن اول رنتين جاوب :- الو ها ديار

جاوبته بنبرة بجي :- خالد تكدر ترجع

-ليش شكو ؟

-اسامه ضايع

-شنو اسامة ضايع وين ضاع

-طالع من بيتنا وما لاكينه

- وانت شتريدين هسه ؟

-ما اكدر ارجع بهالليل اخاف

-وين راجعه يربج تحجين صدك ؟

-خالد ما اكدر ابقى هنا گلبي نار على اخوي ما اكدر عفية تعال

-ديار اسكتي اهدئي و اسمعي كل رجعه الج لبغداد ماكو، تبقين بمكانج باجر يجيج امجد و اخوج احنا ندوره و نلكاه لا تخافين

-ما اكدر عفية والله راح اموت ما اريد هنا
بجيت ...

خالد:- لا يربج ديار تحجين صدك انت و هاي اكول عنج قوية و ما ينخاف عليج هيج تبجين، كولي يا الله يمعودة لا تخافين والله نلكاه اطمني

-زين اذا سمعت اي شي خابرني مو تنسى الله عليك

-بعيني والله هسه اروح اشوف ضحى و مناك اطلع لأمج اشوف شبيها ادللي

-ضحى شصاير وياها ؟

-والله ما ادري، امي تكول نزفت دم و نقلناها للمستشفى و اختي تكول تخربطت لهسه ما اعرف شنو الفلم هل رايح الهم و اشوف شبيها

-عدها العافية

-الله يسلمج، صيري سباعية ديار صح هالأيام صعبة بس ما تشتد الا تفرج وربج قوي نفسج و ان شاءالله تعدي

-ان شاءالله اهم شي عدي هسه الكاه اخوي حتى لو اموت ميخالف المهم الكى اخوي

-لا تخافين عليه ينلكي ديري بالج على نفسج و على سلمان

-ماشي

...سلمت عليه و ضميت الموبايل مبقى بيه شحن كلش قليل

سلمان : لا تبجين ديار اني يمج

-جاي ابجي على اخوي سلمان

-هااا يلا ابجي لعد

درت وجهي منه و اني ادعي الله يحفظ اخوي، كمنا نمشي اني و سلمان و نفتر بالأمام

سلمان:- والله اني جوعان

-المحفظة مالتك و الموبايل وينهن مو جان عندك فلوس

-ما ادري بيهن

-وين ضيعتهم

-اكلج ما ادري هسه اني جوعان جوعان حيل ما اكدر افكر

-مو بحالك سلمان اني هسه بالي يم اخوي اسكت

سلمان:- اني راح اكعد و انت امشي

-وين اروح ؟

-اكلج جوعاااان جوعااان تفتهمين لو لا

- اوووه ...
راح كعد هو، بقيت واكفة اخاف امشي و ارجع اضيعة و النار البداخلي ما تخليني اكعد بودي هسه اصير طير و اروح لبغداد و ادور اخوي
بقيت واكفة دموعي تنزل و عيوني رافعتهم للسما ادعي الله من قلة حيلتي، ايست رحت كعدت يم سلمان، هو حط اديه جوا راسه وتمدد نام
انتجيت ع الجنطة تنهدت و بقيت ادعي :- ربي اذا الي يمك حوبة لا تضيع اخوي فدوة ربي اخذني ولا تأذي

جاي ادعي مستمرة، شفت ولد صغير كدامي قميصه يشبه قميص اسامة ، حتى دورت الراس تشبهه، ظليت ازغر بعيوني حتى اركز بالولد اكثر ... يندار و يطلع صدك اسامة كبالي

فزيت من مكاني اصرخ :- اساااااااامة

باوعلي دموعه بعينه وفتحلي اديه يركض ، ركضتله اخذته بين ادية و هو يشبكني حيل :- الحمد لله و الشكر ربي الف الحمد و الشكر الهي

باوعتله :- شجابك هنا

-اخذت فلوس من جيزدان امي و اجيت

-ولك شلون اجيت شلون اندليت

-ركبت واجيت

-ولك شلون اجيت ما وكفوك ما خفت

-اني عرفت بيكم جايين للامام الحسين صعدت بكية كتله للكراج بس هو ما قبل يوصلني يكلي اهلك وين اني كتله راحو للامام الحسين وعافوني بعدين وداني للكراج و كاللهم اهله بالامام اخذتني حجية و كالت اني اوصله للامام

-وينها الحجية ؟

-ما ادري ناس هواي وضاعت مني

-حيوان ما خفت تضيع ما خفت اتيه وبعد محد يلكاك تدري امي شلون نار عليك عبالها بابا اخذك

-ديار اني اريد ابقى وياج ما ابقى ويا امي

-اني ما عايفتك اسامة كلت بس استقر اني و سلمان ابيت ادز عليك

-معليه ما اروح اريد ابقى وياج
دمعت عيونه

-وين تبقى ولك نايمة بالشارع باجر يجي امجد و ارجع وياه

-تنامين بالشارع اني اني انام وياج ما اريد ارجع ما اريد

حضنته و اني احمد الله و اشكره من وصله لهنا سالم و ما صاير بي شي ، رجعت باوعتله :- شلون اجيت شجابك خرب بغيرتك ردت اموت عليك والله

رجع حضني ويضحك، وخرته :- شكد عندك فلوس ؟

-بس ١٥ الف

-كوم خل نجيب لفات و ناكل خطية هذا سلمان كلش جوعان

اسامة- يلا

مشيت السلمان ندهته :- سلمان سلمان احنه رايحين نجيب اكل تجي ويانا ؟

بقى يدفر نايم ما يريد احد يكعده:- هاك كوم خلي الجنطة جوا راسك لا احد يبوكها

كوه شلت راسه و خليت الجنطة جنه حصان يزاكط ما يرضى احد يكعده ، عفته ورحنا اني و اسامة اشترينا لفات فلافل و رجعنا لسلمان كعدنا ردنا ياكل ويانا غاط بنومته و يشخر و ما يكعد ..

اكلنا وكملنا و ضميناله لفة اله من يكعد ياكل :- اسامة اكعد هنا يم سلمان اني راح اروح للحمام اغسل و ارجع مو تتحرك ماشي؟

اسامة:- ماشي

كمت من مكاني واني فرحانه .. كلش ارتاحيت من اجا اسامة وياي احس اني مو وحدي هو كل اهلي و اكدر اعتمد عليه و ارتاح بوجوده .. من هو مو وياي احس اني وحيدة بهذا العالم

رحت للحمامات شصايرة حل وشد و نسوان كومة و ريحة ، خليت الحجاب مالتي على خشمي و شديته على وجهي منا و منا ..

لازم تجاهد يلا تفوت شلون مشكلة كل مجموعة لازمتلها باب، وحدة صاحت :- يبنات اكو حمام لاخ شويه ليغاد ليش كلكم مكومين هنا

حجيت وياها :- وين صاير

-بس اطلعي منا و امشي مسافة تلكينه كبالج مكتوب عليه

اخذت العباية وطلعت، وفعلا مشيت لكيت حمامات نظيفة وسيراميك و فارغة غسلت على راحتي ورجعت ، كعدت يم اسامة نسولف بس كاعدين واحد لازك باللاخ الجو كلش برد و احنه ما لابسين لبس ثخين غطيت اسامة وياي بالعباية لا يبرد وبقينا كاعدين

اجا واحد يشتغل بالمرقد كال :- زايرة هذا الولد خطية صارله ساعة كاش بالبرد ونايم ، اخذي جنسيتج وروحي سلميها للامانات خل ينطوج بطانية و غطي خطية ترا الجو برد حيل
ويتمرض بس يبقى هيج

كمت من اسامة شلت راس سلمان من الجنطة دار وجهه ليغاد و ضم رجليه واديه من البرد مكشكش ، اخذت الجنسير ورحت جبت بيها ٣ بطانيات الي ولاسامة ولسلمان

خليت الجنطة ونومت اسامة على ايدي وخليته بالنص بيني وبين سلمان حتى لا يبرد، طبكت ال٣ بطانيات سوا و تغطينا بيهم ونمنا لازكين ابعض و ادفينا ..

ما حسينه الا الفجر بسبب الهوسة و الرجلين يم راسنا اروح و ترجع، شلت راسي، صوت ضجة ناس و صلاة و الصبح طالع ، باوعت سلمان كاعد و قاعد حواجبة

شلت جسمي من الكاع متكسرة تكسر :- ها صباح الخير

.. ما رد، حجيت :- هاي شبيك الوصخ كالب خلقتك

-جوعان

-مو كعدناك بالليل و ما كعدت جنك مطي و ترافس

-اتي المطي ولي يلا ما اريد اشوفج

-لا تغلط الوصخ

-لا تغلطين ترا اذبحج والله

-خب درووح ما الي خلكك
فتحت الجنطة على كيف حتى لا يكعد اسامة ادور اللفة ماكو
كعد اسامة :- وينها هاي اللفة البقيناها السلمان

- بالعلاكة هنا
الفت :- وينها هنا جانت

:-كوم يمكن شايلينها ، خل نشتري ريوك خطية حيل جوعان

كمنا ولمينا البطانيات ورجعناها و استلمت الجنسية ورجعت السلمان كاعد ويا ناس صايحيله حتى ياكل ..

-سلمان كوم راح اشتري ريوك

حجه الرجال :- الاكل خير من الله اختي تفضلوا

-لا شكرا

....انتظرنا يكمل اكل و طلعنا ، سألت اسامة اذا جوعان، كال :- لا الفلافل لحد الان ابطني حتى توجعني

-حتى اني نفخت بطني

بقينا نفتر بالامام نجي منا و نروح منا .. ورحنا للامام العباس هم زرناه و مشينا بالفروع مال كربلاء ما خلينا فرع يعتب علينا و احنا نمشي سوا ، اخر شي قررنا نرجع للامام .. الظهر تقريبا ب١٢

جان نمشي بالفرع مال الامام و كبالنا القبة الشريفة ، باوعنا واحد واكف اباب مطعم يصيح :- كباب دجاج كص تفضل يزاير

مشا سلمان اله :- خلي اشتغل وياكم

الولد :- والله اني عامل هنا ذاك الحجي و احجي وياه

راح للحجي كاعد ع الكرسي و يشرب جاي :- حجي شغلني وياك

-روح منا ابني

-شبيك شبيك الله عليك الله عليك

-روح باباتي ما نحتاج

-بس اني محتاج اريد شغل جربني جربني

-ابوية تفهم انت لو لا ؟ جاي نكلك ما نحتاج

-مشى سلمان و غم ابو المطعم، صاح عليه :- تعال تعال لك هاي عليمن

سلمان :- شيل ايدك دشيل

ديار:- عمو ما يقصد فدوة عوفه

ابو المطعم :- شايف اذا بعد تعيدها الا اثرمك ثرم يلا منا

سلمان ما كعد راحة ، دفع الطبلة مالته و كاله :- دروووح الوصخ

والتموا عليه لزموه و اني لازمه بالحجي :- عمو عليك الله والله هو مو صاحي مريض عليك الله عوفه والىه بعد ما اخليه يجي يمك

كام يوخر بيه و يكلهم ادبوا، فات حجي جبير بالعمر لابس عكال اسود:- ها يابه خير خير شكو كولو يا الله ؟

هم ابتعدو وابو المطعم وكف كاله :- هلا مولاي والله هذا واحد طايح حظه فات من عدنا راد يشتغل كلناله ما نحتاج و تجاوز و كسر الغراض

الحجي :- خير خير ان شاءالله ، يلا ما صار شي عدوها

ابو المطعم :- و هاي لخاطر سيد حسين نعديها الك و ما نحاجيك بس لو مريت منا بعد و حجيت الا نكتلك

الحجي:- ما صار شي لا تحجي هيج ابو رحمن المسامح كريم و هو بعد ما يعيدها

انتم منين بوية ؟

ديار:- من بغداد عمو والله بعد ما يعيدها و بعد ما نجي منا

-انت شتصيرين منه ؟

-مرته

-رجلج شبيه ؟ جنه مو بوعيه

-لا عمو ما بيه شي والله بس هو عنده خيط

-خيط !! شلون يعني ؟

-بضربة بوش الأولى وكع البيت عليهم امه ماتت و هو عاش بس هيج عاش بيه خيوط بعقله

-هاا ضحايا حرب ، ما صار شي بنيتي اخذي زلمتج و كملو زيارة انتم منين ؟

-من بغداد

-منين من بغداد

-من الدورة

-يا هلا و مية هلا

حجه واحد من العمال :- شهلا سيد تدري بالدورة شكد كتلو بينا

الحجي :- عيب هالحجي اليكتل ماهو منا شيعي جان او سني كلنا اخوان .. هذا الحجي ما اريده ينعاد ، ابو رحمن علم عمالك ما يسمعون الناس حجي عيب

عافنا و مشا و احنا مشينا للامام ، و اني ارزل بسلمان :- طايح الحظ صرت علينا رامبو و كاعد تتعارك هو احنا نعرف احد هنا ؟ لو لازمينك و كاتلينك شنسوي

سلمان:- اسكتي الوصخة اني غير ردت اذبحهم بس ما خلوني

-دنجب غير لو ما هذا الحجي يجي جان سووك طلي مشوي

بقى يعيب عليه بوجه ويسوي : ننننننننن
غميته و مشيت اشترينا اكل و كعدنا نتغدى ورحنا بالأمام تمددنا ...

للعصر انتظرنا احد يجي ماكو، خالد كال امجد من الفجر يجي، وهسه صارت ٥ العصر ومحد بيهم بين ..

رحت اشحن الموبايل و خابرت مها
ديار :- الووو هلو مها

مها:- هلو حبيبتي ديوره شلونج

-الحمدلله بس خالد كال امجد يجي الصبح و ما اجا

-اي والله عمري على اساس يجيج بس عمامج اجو علينا و وياهم ناس من عشيرتهم و ما كدر يجي التهى ويا ابوه بلكي ان شاءالله باجر يجيج صبري عمري

-شصبر انام بالشارع لو مبقيني عد امي احسن خلي نرجع

-ولج هي امج جايتنه هسه خابرت بالطريق النا .. لأن عمامج يردون جهالهم و هي تاهمتهم ماخذين اسامة و تكول جاية بالطريق الا ازين شواربهم

...صفنت ويا روحي اني حاى نسيت اگل لامي اسامة يمي، غلست ما حجيت و كلت :- خالد وينه ؟ هو كال اذا ماكو احد اجاج اني اجيج

مها:- ولج هم خطية خالد البارحة عركته هو و امه و مرته للظالين

-ليش شكو

-هو على اساس يبقى هناك يمج يأمنلج بيت ويرجع، مخابرته امه كايلتله مرتك نزفت و نقلناها للمستشفى راح تسقط هسه تجي ، ليش ما يجي ويلكاهن بالبيت كلشي ما بيهم

-يعني ضحى ما بيها شي ؟

-لا ما بيها بس ما يردنه يتورط بسالفتكم يگلله اطلع

-لا خطية لعد بعد ليجي

-ما تعرفين طبع خالد عناده ماكو مثله يموت ولا يقبل احد يفرض عليه

-يلا لعد روحي و اسأليلي امجد شوكت يجيني

مها:- ان شاءالله عمري ديري بالج على روحج وصيري سباعية

-ان شاءالله

.................

خالد : من خابرت عليه امي و اختي بيداء بالأمام و اني ادور على ديار ايست الكاها حتى بالندائات صحت و ماكو، خابرت امجد كتله :- خوية هذا الحال شسوي ؟

امجد :- ارجع و اني باجر من الصبح اغبش الهم

-وشلون يبقون بالشارع الليلة ؟

-ينامون بالامام ما عليهم شي ارجع لمرتك و من الصبح اطلع

خالد:- ان شاءالله

... رجعت بالطريق خابرتني ديار خايفة قهرتني حيل ردت ارجعلها كالتلي لا ارجع لمرتك مريضة .

فرجعت الطريق اخابر امي اسألها يا مستشفى انتو لا امي ولا ضحى ولا اختي يردن .. ضجت كلش و طفرت روحي

فتت للبيت والكاهن كاعدات بالاستقبال ملمومات و يسولفن و يضحكن ، تفاجئت :- يمه مو خابرتيني گتيلي مرتك نزفت و بالمستشفى ؟!!

الام:- لا مو بالمستشفى ردنا ناخذها بالمستشفى بس هو نزيف بسيط و وكف

-اذا بسيط و ما بيها شي خابرتيني و جبتيني مناك لهنا عليمن ؟

-والله يمه ما اريدك تتورط بسوالف ديار ابوها ارهابي اچفينا شرهم

-يعني جذب ؟

-كتلك يمه اچفينا الشر

اني سمعت هيج و تخبلت كمت اشيل و اكسر فوك روسهم ، كلهن هجن لغرفهن وكفت اتعارك ويا امي ورجعت صعدت لضحى بهذلتها تبهذل، و طردتها من الغرفة و كلتلهم:- انعل والديه اليوصل يمي و اريد اشوف يا كو**** ابن **** يتحكم بيه

... قفلت الغرفة و نمت الصبح كعدت على صوت بيداء :- خالد خاااالد

فتحت الباب :- ها بيداء شكو ؟

-ام ضحى جوا و جايه تاخذ بتها

-و على اي اساس تاخذها ؟

-ما ادري انزل انت و تصرف

-انزلي هسه اني جاي وراج
غسلت و لبست و نزلت جوا لأمها واكفة بالباب:- شنو عمه احد طاردج و لازمة الباب

-البيت اليطرد بتي طاردني

-ومنو طارد بتج ؟

-ما طردتها من غرفتها

-طردتها بالشارع لو كلت الها روحي كابلي امي و ما اريد اشوف خلقتج ؟

-بتي مو فصلية عدكم حتى تطردها من غرفتها و تخليها تنام جوا

-عمه من الأخير انطيني ترا ما لي خلگ، شرايدة ؟

-بتي تروح وياي

-اي الله وياج و وياها درب السلامة

ضحى وهي تبجي :- مع الأسف عليك خالد حسافة كل الحب الجان بيني و بينك هسه جاي تضيعه

-من سوالفج شيجي من ايدج الله يزيدج و احمدي ربج و اشكريه ما سويت شي كلت حامل و اكتفيت بطلعتج من الغرفة

ضحى:- والله خالد اني ما اقبل تروح لديار لو اني لو ديار

-مو اني التحكمني مرة لو توذنين وحق ربج ما تحركيلي شعره

-شعدك وياها ؟ طلعت روحي ديار ديار ديار

-ولج بت الاوادم مو زوجتها و راحت ويا رجلها شعديييييييي بعد بس والله انت فلا ادمية جان المفروض هنا اجيبها و اتزوجها واخليج تبوسين الايدين و الرجلين حتى اباوعلج بذاك الوكت تصيرين ادمية و توعين على روحج بس من محترمج و مقدرج ما يرضيج

ضحى:- اي بالعافية عليك و عليها اني اريد اروح لبيت اهلي ما ابقى عندك

خالد: كمت من مكاني اشرت عليها بأصبعي و حجيت:- باب البيت لو طلعتيه قسما بالله العظيم يا ضحى ما الج رجعه منه ..

كمت و امها كامت تتصايح ، اخذت باكيت جكايري و محفظتي و سويج سيارتي و طلعت للاستوديو كعدت اشتغل
مشيت صور معاملات و شغل ع الحاسبة و اظهر تصوير عرسان ، ضحى ما سكتت مخابرات انطيت الجهاز صامت ما رديت وعفته على صفحة

فرغت شوية العصر قفلت الاستوديو و كلت خل ارجع لبيت عمي اشوف شكو ماكو، وصلت لهناك و الكى امجد كبالي :- ها امجد شو هنا ؟

-والله ما كدرت اروح ذوله اخوة اسماعيل و عمامه جايين يطالبونه بولدهم و شلون نزوج بتهم بدون علمهم

-ولك وديار هناك وحدها يعني

-شسوي والله ما كدرت

-من خرب بيومك غير تحجي تكول
جاي ارفع الجهاز اتصل، فاتت ام ديار وبتها الصغيرة على ايدها
التفتت لأحمد :- هم عمام اسماعيل مو اجو الصبح ؟

احمد : كالو نرجع العصر و هل منتظرينهم

كعدت ميعاد تشكي و تبجي على اسامة ابنها ماكو و تشكي لابو امجد ، ندسني رافد :- خايب شوف القهر شلون تبجي يا بوية مال الفها بحضني و اسكتها

-رافد رحمة لدين محمد ترا كلش مو وكتك

رافد:- خب دروح انت ملتهيلي بالبنتاية و عايف الاماية

خالد:- البنتاية شنو شبيك رافد احجي عدل

رافد:- لا تفرها خوية ترا اذا مرتك و امي مشت عليهن احنه اخوة و زلم بيناتنا نفهم بعض

-شتقصد ؟

-غمز الي :- ترا البنية متزوجه

-ما حجينا شي بس اهتمامك بيها كلش زايد عن اللزوم ، هاي امها هنا كاعدة تبجي على ابنها و ما مهتمة لبتها هناك شبيها و شحالها ، انت الوحيد المحارك بيناتنا ، يلا يخوي الحب ما يعرف مسميات ولا اله احدود

-حبيش انت خليني محترمك و كوم مني، لا اشو اني اكوم منك

.. كمت منه و اني اسأل نفسي:- الكل منتبه الي اني مهتم بديار اكثر من اللازم حتى اكثر من امها ، امي تضايقت مرتي غارت اخوي يبسمرني .. رغم البنية زوجتها بأيدي و هيج حجيهم .. الخلل بيهم لو بيه ؟

اني بالنسبة الية اشوف هي بنية مسكينة لا حول ولا قوة التجئت الي ساندتها و عاونتها .. زحمة بنية تفتح كلبها الك و تبقى بس تستمع ..

بس هم شكوكية من الحباية يسوون كباية شعندي قابل وياها، البنية تزوجت وراحت بحال سبيلها الله يوفقها

... و اني دا افكر واحجي بهالسالفة، دكيت رقم ديار بلا وعي و اتصلت ، تسائلت ويا روحي :- حتى رقمها حافظه هه
هزيت ايدي ... ردت

ديار :- الو خالد

-ها ديار هسه شفت امجد هنا والله تخبلت شلون ما جايج ، انت وينج كون محتاجة شي شصاير وياج ؟

-لا زينه كاعدين بالامام ما علينا شي، بس خالد اگلك شغلة

-شنو هي كولي

-اسامة اجا لكربلاء يمي محد يدري حتى امي ما كلت الها

-شجابه يمج هذا شلون اجا الدنيا مكلوبه عليه هنانه امه هاي كدامي جاي تبجي

-ما ادري اني نسيت اخابر امجدي احجيلها بس من كالتلي مها عمامي جايين ما حجيت على اسامة خفت احد منهم يكول هو رايح لكربلاء ويتبعونه

-لا شيجيبهم لكربلاء، هو دخول كربلاء سهل غير گلبوني على البطانة يلا دخلوني السيطرة مو انوب اسماعيل و جماعته

-ما ادري اذا هيج كول لماما اسامه يمي لا تبجي وخل تخابرني من ترجع للبيت

-انت محتاجة شي خايفة ؟

-لا خالد اني ما اريد اثكل عليك سمعت انت و امك و مرتك متعاركين بسببي اني ما اعرف اجازيك مو ازيد عليك

-تؤ ملج علاقة لا تشيلين هم لهالحجي اني الكتلج تروحين كربلاء و اني اتحمل اثار حجايتي ما اعوفج وحدج لا تخافين
بس اتحملي باجر اذا صدك ما اجاج امجد اني الظهر يمج

-ماشي

-ديري بالج على نفسج و اذا احتاجيتي شي لا تترددين اتصلي و ما الج علاقة عسى ما ب٣ بالليل اخذ سيارة رافد واجيج

-مشكور وما قصرت والله ما اعرف شلون اجازيك امي وابوي ما وكفولي بعمري بكدك

-لا تحجين هيج الناس لبعضها قابل شكو ، يلا ديري بالج على نفسج

-ماشي مع السلامة

-الله وياج
قفلت الخط منها، صفنت: حتى هي منتبهه عليه مهتم بيها اكثر من امها مو بس رافد

ميعاد :- والله گلبي خلص يا ناس ابني ما هو وين الكاه

رافد :- ام ديار ما بلغتي عليه ؟

ميعاد :- لك عيني بلغت البارحة يكلولي لازم تمر ٢٤ ساعة يلا يعتبر مفقود

رافد :- بس هسه مرت ٢٤ ساعة على غيابه اخذج نبلغ الشرطة و ندورة

-لا يا عيني اتعبك هسه يجون عمامه الا ازين شواربهم بالقندرة والله ماكو غيرهم ماخذين ابني

رافد:- لا ام ديار لا تظلمين بختج ترا الناس احنا ضدهم مو وياهم بس اجو الصبح و كامو يهددون يردون ابنهم يعني لو عدهم ما جان حجو و ذوله ولد عشاير الجايين مو هيج

ميعاد:- يمه عزا العزاني ابني لعد وينه ؟
ودنكت تبجي و تشكي و بتها يمها تبجي مثلها

رافد :- كومي يابه كومي ندورة بسيارتي نفر على نقاط الشرطة لابد مار عليهم

خالد:- اكعد بمكانك الولد بخير يطلعون عمامه و اكلها بمكانه

رافد:- اذا حجيت ادوس ابطنك و القران خليني استفاد

خالد:- طلعها من عقلك رافد المرة بعقلها واحد لاخ

رافد:- انجب و خليني اشوف رزقي ، كومي ام ديار اني منتظرج بالسيارة اليوم ما اخلي نقطة ابغداد ما ادورها ولا يهمج

ميعاد:- والله انتم ما اعرف شلون اجازيكم اخوك خالد الما عاف بتي لو بيت ابو امجد الما تركونا لو انت بالعافية عليكم هالنفس الطيبة اي والله

رافد:- شدعوة ترا احنا اهل

ابو امجد :- هسه انت وين ماخذ المرة ؟

رافد:- عمي ندور خوما نكعد هيج و الولد ضايع، واحسن لا يجون عمام اسماعيل و تتصادم وياهم ما بينا حيل مشاكل ذوله يدورولهم حجة اذا نعرفهم مو هم الماخذين الولد نزيد المشاكل ليش

ابو امجد :- بس دير بالك ابني

رافد:- لا توصي حريص ابني

ام رافد:- رافد يمة بس تعال شويه

رافد :- رايح يمه محتاجة شي ؟

ام رافد :- اي يمه گبل لا تطلع بس تعال مرتك تريدك

خالد: شفته راح ضحكت :- روح بيها رافد انغسلت

كمت من مكاني ورحت وراه لكيت امي تتعارك وياه شلون يروح وياها و تگله :- انت و اخوك ربيتولي علة راح تسوون بيه جلطة ولكم جوزو من هالعاىلة فكونا ما بيه حيل اخسرلي واحد منكم و يتصخم راسي

باوعلي رافد و ضحك، ابتسمت :- رافد ترا صدك زايدة منك تروح وياها جاي اكلك مكان الولد اعرفه هسه اگللها وفضت

ام رافد :- يمه عزا العزاني يممممه الصخام الصحمني انوب خاطف الولد يمة ، راح يجلطوني ذوله

وكعدت بالكاع تلطم على راسه :- شقصتج يمه والله ما خاطفة الولد يم اخته

رافد :- اسمع لك اموتك دك بالنعال لو حجيت تلصم و تسكت لحدما ارجع

ام رافد :- انوب مخلي عينك ع المرة عزا العزاني كون يمه يما يرتاحون ذوله اذا ما يجلطوني ولك قااااااااسم تعال شوف ولدك شووووف

رافد :- يمه بس لا اطيرين رزقنا دكااافي رايح افر شوية وارجع

ام رافد :- والله اكول لمرتك واسويها سودة مصخمة عليك ولك انوب ادور وحدة بكد امك

-اكلج ذيج مرتي تريدين تروحين تحجين احجي مو اني النخوفني مرة، و من ثم اني وياها نفس العمر منين سويتيها بكدج حجية تريدين تصغرين بروحج بس بروح ابوج تسويلي فضل لو خليتي مرتي اطير لاهلها حتى اتزوج ميعاد بمكانها

خالد:- مو هيج الحجي رافد احجي عدل هاي شبيك

رافد :- طير انت ، باااي ادعولي بالتوفيق و الرفاه والبنين و الولد الصالح

رائد:- هذا وين رايح

خالد:-اسكت رحمة لدينك و كابلني نرضي الحجية ترا اذا بقت هيج والقران اطك و تموت من ورانا

دنكنا على امي وهي تلطم و ادك على راسعا و ادعي عليهن، بست راسها :- هاي شبيج يمه تحجين صدك

رائد:-غير افتهم حتى اعرف امي الحلوة شبيها

كعد وتمدد بحضن امي :- شصاير يمه

كعدت يم امي لفيت ايدي على جتفها و حضنتها و حجيت:- رافد اخذ ميعاد يفتر وياها شوية مضيعة ابنها

رائد:- رووووح رافد ايدك بالدهن يااااابه

نكثتنا من حظنها وكامت على حيلها :- من انعل ابوكم لابو ميعاد وياكم كواو****

وطشرتنا ... كمت من يمها اضحك، باوعت ضحى بالمطبخ ، غمزت الها .. عافتني ومشت زعلانه
هزيت ايدي ومشيت لبيت عمي

.............

ديار :- مر اليوم بكاملة بملل نمشي منا و نروح منا
بس الحلو بالموضوع انو نفتر ما خلينا مكان يعتب علينه تعرفت على مدينة ما جنت اعرفها غير بالجغرافية لما نعدد محافظات العراق ..

ولا جني اني هنا، حجاب و عباية و متخرذله تخرذل ما اعرف البس الحجاب مو انوب الحجاب و العباية بس هم هنا ما يقبلون وحدة سافر، كلش كلش لابسات عباية اسلامة جبه

بس ما عندي اشتري منها و امشي براحتي باقية انحثل بالعباية ... بالليل جعنا ردت اجيب اكل بالفلوس الظلت
ادور جيبي ماكو
سألت اسامة دور ... ماكو
سلمان ما عده

لعد هسه شلون راح نشتري اكل ؟

اسامة:- اروح اطلب منهم ؟

-منين ؟

-من ذوله
يقصد الحاشية اللي تشتغل بالامام

... لا يمعود ما ينطون اكل

-لعد شلون نضل جوعانين

طلعت جيسين فستق اشتريته من بسطية كتلهم خلي ناكله و انام شنسوي لحد ما باجر

اكلناه و ردنا انام ، سلمان عاقد وجهه عوزه بس يبجي ، سألته :- شبيك سلمان ؟

-اني اريد ارجع لأهلي ما اريد ابقى هنا

-وين نرجع ما شفت بابا يهدد بينا

-معليه اني اريد ارجع ما ابقى
باوعتله شو هذا بجى

-هاي شبيك سلمان قابل طفل انت

-معليج اتي الوصخة اني اريد اهلي

-يا اهلك حليمة العمصة الدك على راسك لو رغيدة المسويتك خادم عدها ؟

-انجبي اتي معليج لا تحجين عليهن يلا

باوعت هذا تخبل عليه بهالليل بلا وين اروح بيه، عفته يبجي جبت بطانيات و نمنا اني و اسامة هو بقى يون بمكانه لحد ما نام ، غطيته ورجعت نمت بصف اسامة ..

ثاني يوم كعدنا، بطونا ميته جوع، خابرت امجد يدك الموبايل ومحد يشيله .. لا عندي فلوس وارجع ولا اكدر اتحمل بعد كلش ضاكت الدنيا بعيني و سلمان بعده مطنكر

كتلهم كومو خلي نمشي نسأل اي احد بلكي يوزع ثواب
مشيت لاواحد كاعد اباب السياج مال الحرمين

حجيت وياه :- هلو

التفت اليه :- مرحبا اختي تفضلي

-بس اريد اسأل اكو احد يوزع ثواب هنانه شي

-محتاجة شي ؟

-ضاعت فلوسنا و ما نكدر نشتري و جوعانين

-انتم منين

-من بغداد

-يعني قصدج ما عدكم فلوس كروة ترجعون ؟

-لا اكل هذا مريض خطية جوعان

-جايين هنا شنو اقامة لو زيارة لو شنو مفتهمت ؟

-جايين نعيش هنا

-تعيشون هنا شلون و ازتم حتى فلوس اكل ما عدكم؟ على العموم خوية كومي وياي نضيفج بمضيف الامام الحسين و ان شاءالله الله يحلها

اخذنا الرجال و ودانا لمكان يوزعون بيه اكل، جابلنا ٣ صواني صغار كل صينية بيها صمونه و جبن مثلثات ٢ و بيضة سلك حطاه، كال :- خوية تريدون جاي ؟

سلمان :- اي اي جيب عمي جيب

راح الولد جابلنا كلاصين جاي حار و خلاه كبالنا و كال :- الف عافية ثواب ابو عبدالله من تكملون اقروا الفاتحة

سلمان:- شكرا عمي شكرا

بقينا ناكل بس الولد كام يحجي ويا البصفه ويسأل و يباوعون علينه، خلونا نكمل ريوك و اجو يمنا حجو :- خوية انتم جايين هنا المن

سلمان :- هذا ابوها ارهابي و يريد يكتلنا و اجينا هنا

ندست سلمان و خزرته :- لا عمو مو هيج بس احنا اليوم يجي ابن عمي و ياخذنا

تقرب الولد :- خوية احجيلي الصراحة مال تندسين الولد بعد حجايته الكالها ما مقبوله

ديار :- لا والله عمو ماكو شي احنا منتظرين ابن عمي يجي ويروح

-انت قبل شوية كلتي نريد نعيش هنا ، هسه دكولين اروح و هذا الولد حجه حجاية جبيرة ، انتم منين خوية ؟

-كتلك من بغداد والله ما عدنا شي

-منين من بغداد ؟

-من الدورة

بقى واحد يباوع بوجه اللاخ ، حجه واحد بيهم :- كاظم اني ما مرتاح لهالسالفة خل نبلغ الامن يجون يتصرفون وياهم

ديار :- لا عمو والله هسه نروح بس لا تبلغ والله ما عدنا شي

-اختي ما تروحين هاي انسيها ، احنا كاعدين هزا يا تحجين سالفتج النا يا مضطرين نبلغ الأمن يتصرفون وياكم

جاي نحجي و فات الحجي اللي البارحة خلصنا من المطعم ، من شافنه عرفنا تقرب

سيد حسين :- ها هالمرة شمسوين ؟

حجه الولد :- سيد تعرفهم ؟

السيد :- لا والله بس البارحة تعارك هذا الولد ويا ابو رحمن ابو المطعم و مبين الولد مو تمام طلع ضحايا حرب خطية ليش شصاير

- سيد البنية كالت احنه نريد نعيش هنا و الولد هذا كال ابوها ارهابي و شاردين منه، و هي نكرت كال لا ابن عمي راح يجي وياخذنا

السيد :- شسالفتكم بوية البارحة الولد تعارك ويا الحجي ابو رحمن يريد شغل انتم زوار لو جايين بسالفة احجولنا

اني بقت دموعي تجري خفت حيل و سلمان يخربط بالحجي وياهم ، كالو :- مضطرين نسلمكم لامن العتبة لأن هذا خطر ع العتبة و العتبتين الحسينية و العباسية مهددات بالتفجير و اعذرونا سالفتكم ما ارتاحينالها

اني حجه هيج كمت اتوسل بيه و دموعي تجري و اسامه من شافني هيج كام يبجي ... حط ايده السيد على راسي و كال :- اتهدي بالله بوية و اذكري الله انتم بحمايتي محد يكضكم

بس كعدي ، وينهم ولدنا بطلين ماي على السريع يلا

جابولنا مي و كال :- تهدي بوية اذا جايه شاردة و وراج سالفة احنا خدام ابو عبدالله و حاشى نطرد احد لابد بسده

اني وياج و اعتبريني ابوج و احجيلي بنيتي السالفة كلها حتى اساعدج ..

اطمنت للحجي شوية و جنت مضطرة احجي حتى ابري نفسي و ابري سلمان لان شكوا بينا خاصة لما عرفوا بينا من الدورة ، لان هاي المنطقة هواي راحو بيها ضحايا الطائفية

حجيت السالفة للحجي كلها ...
بدون ما يشوف جناسينا ولا يعرفنا .. جان يباوع لسلمان و كال :- انت سيد بوية مو ؟

بقيت صافنة هذا منين عرف سلمان سيد ؟.....

☆☆☆☆☆

#اتمنى_ان_افعلها

الحلقة_13

لابد ان يشرق الضوء في اخر النفق 💙

........

(ومن يتق الله يجعل له مخرجا و يرزقه من حيث لا يحتسب ومن يتوكل على الله فهو حسبه ان الله بالغ امره قد جعل لكل شيءٍ قدرا )

الثقة بالله ما هي الا حبل نجاة ممدود من السماء الى الارض فتمسكوا بذلك الحبل جيدا ❤

...........

سيد حسين :- اسمعوا بوية چفيلكم العباس اخو زينب انا ذوله الناس لا اعرفهم و لا شايفهم بحياتي
واشر علينا ...
غير مرة وحدة شفتهم بمطعم ابو رحمن يتعاركون وياه و فاككت بيناتهم.

التفت علينا : انا اسمي سيد حسين ابن السيد صادق ابن السيد حسين، اهل كربلة يعرفوني نذرت عمري من ٦٠ سنة لخدمة الأمام الحسين.

(قل لا اسألكم عليه اجرا إلا المودة في القربى ) و الرسول يگول حسينا مني و انا من حسين احب الله من احب الحسين )

وانا حبا و اجرا لرسول الله حبيت ابن بنت نبيه ، شعر راسي شاب بحب الحسين ... ما يوم ملت عن طريقة ولا يوم مليت من خدمته ، وسام شرف اليه بالدنيا و الاخرة خادم للحسين.

البارحة و اني بالطيف، جن جدي حسين اجاني مغضب و اسمعه يصيح (انهض يا سيد حسين ) شلت راسي واذا بجدي حسين جدامي

تريدون الصدك جدي ميت كبل ٩٠ سنة و انا ما ملحك عليه ولا شايفة بس بالطيف جن هو جدي هاذ الكبالي

جن مغضب و متضايك مني وكال : انا شايل بخاطري عليك سيد

كتله : ليش جدي شصاير ؟

كال :- ابني يجي دخيل عدي و ليلتين يبات بيهن ابيتي و هو جوعان و متكدر ليش هيج سيد ما رضيتها اعليك

كتله : وجدي محمد ما ادري عنه

كال :- لا، انت شفته وحجيت ويا وما عاونته وانا شايل بخاطري اعليك.

فزيت من النوم ويا صلاة الفجر ، سألت المرة و كلت الها : يا مره احد جاي لبيتي وما مضيفينا

كالت :- لا والله سيد محد جاي

كتلها :- جا منهو هاذ الجدي يكول عليه ابني و جاي دخيل ونام جوعان ...

تريدون الصدك اني اجيت هنا صليت الفجر جماعة بالامام و نسيت الطيف، هسه من حجتلي هالمرة هاي قصة هاذ الرجال المريض وكالت عنه البارحة بجا يريد اهله و نام جوعان اتذكرت الطيف

التفت عليه :- رجلج سيد بويه مو ؟

ديار :- ما اعرف بس هو عشيرته بالجنسية قريتها حسيني

بعدني هسه حجيت شو ذوله كلهم صاحوا ( اللهم صل على محمد وال محمد ) دخيلك يا ابو عبدالله
وهذا البجا و هذا الشال اديه للكبه و يصرخ :- يا ابو علي دخيلك انا يا ابووووو علي

وناس التمت و ناس تحجي لناس و صارت عيونهم تبجي بجي مو طبيعي ، اباوعلهم :- ذوله شبيهم ؟

واحد منهم كعد بالكاع يبجي من كل گلبه، ومرة كامت تمسح بقميص سلمان و تبجي و تكول :- من بختك سيد

اني صافنه مستغربة ممصدكه كل اللي جاي يصير ، طيف شنو اجاني بالحلم شنو ، بس الصدك والله حصرتني الضحكة وكوة ضامتها بگلبي لان عيب الناس تبجي و اني اضحك ما يصير بس الموقف غريب و هاي العالم لازمه بسلمان و تبوس بيه ..

الرجال يطلع عمرة ب٨٠ سنة وجهه مجعد و لابس عكال و غترة سودة او اهل كربله يسموها (شطفة ) سودة ، حط ايده على جتفي و كال :- ما مصدكه بتي ؟

-لا عمو مصدگه والله

-اسمعي بنيتي زلمتج زلمة مبخوت الله انتشله من الارهابيين الرادو يخلونه انتحاري و جابه هنا و صدكي و ثقي و تذكري حجايتي راح تشوفين وياه خير بعمرج ما راح تشوفين مثله ديري بالج عليه و انا شفتج البارحة تغلطين عليه و ترزلين بيه ما يجوز

ديار:- لا عمو بيناتنا احنه متعودين نغلط هيج هو بالمنطقة احنا نسمي سويج

-يعابيه الله كلمن يعابيه ليش بويه هيج وياه خطية تراه سيد و بخيت و من اهل الله ما يجوز ... بئس الاسم الفسوق بعد الأيمان .. من تنعتين احد بغير اسمه استهزاء هاي بأعتبار طلعتي من الدين كله و صرتي فاسقة لا بوية حرام ما يجوز

-لا حجي والله يعني مو قصد هيج

-لا بتي ما يصير السيد ينغلط عليه ولو هو مو كل سيد سيد بس اكو سادة من اهل الله و بختهم شكبره و اكو الله يهديهم ما نكول غيرها .. بس ما يصير يا بنيتي

هزيت راسي و اني بعدني ما مستوعبه كل الموضوع

رجع حجا وياي رجال واكف هم جبير بالعمر :- بتي هسه انتم ما الكم احد هنا يعني تستقرون ؟

ديار :- عمو هو هددونا و شردنا هنا على اساس ولد عمي يجون بس تأخروا و صارلنا يومين انام بين الحرمين

سيد حسين :- احجيلي البارحة ليش نمتوا جوعانين مو اكو مضيف و ثواب نوزع يومية بثواب الامام الحسين ليش ما اخذتوا

-ما اعرف ما اندل اني بعمري ما زايرة الامام هاي اول مرة

-هلا بيج و كل الهلا ، هو وين اهله ؟

-عموا ابو مات صار سنين و جان عايش ويا مرت ابوه اخذت حقه بالبيت و يومية جانت تكتله بس هو البارحة يبجي عليهم يكول اهلي اريد ارجع

هز راسه الرجال انقهر و اثنين زلم حاظنين سلمان و عيونهم مدمعة .. كام من مكانه و اخذ سلمان لزم ايده و كال :- تشوف ذيج الگبة هذا ابوك الحسين، و هاي الكبة يصير عمك العباس و هذا بيتك و احنا اهلك بوية