اسماعيل :- كرايبه شني ابني انا عايفة هنا وينه ؟

ديار :- اني لزمت السكوت ورا بابا هوم من ان ينطق اسم خالد

الحارس:- عمي والله كرايبه اجا اخذه حتى ابنك يعرفه كال امه ماتت و دزوني عليه

من سمعت هيج حصرتني الضحكة اموت امي هذا و ماخذه، خليت اديه على وجهي عود انصدمت

اسماعيل :- شنو امه توفت شنو هالحجي ابني اني خاله ابأمنتكم هسه اطلعولياه من جوا الكاع الا والله اهجم المدرسة عليكم

اجا المدير و المعلمين طلعو و ابوية يصيح و المدير يكول للحارس :- شسمه الولد الاجا اخذه

-لا والله ما كالي اسمه

-شلون ما كالك اسمه جنسيته ما اخذتها منه

- كالي ناسي الجنسية و لان كالي حالة وفاة عذرته، بس ابنكم عرفه و راح وياه

المدير اتخبل

ابويه تخبل كام يكفر و يغلط و يضرب بالمدرسة و يغلط ع المدير و اجو الحرس و لزمو ابوية

واني كعدت بالكاع مخليه وجهي بين رجليه و مسوية نفسي ابجي و اصيح:- اخويه اخوية

بس اللي شفته ابويه صدك انغاض على فقدان اسامة كام يصرخ و يبجي و عيونه صارن دم اللي افتهمته جانوا يهددوني بيه لان يعرفوني احبه بس مستحيل ابوية يفرط بأسامة لو يأذيه

خاصة و ابويه يفرق بين البنية و الولد ، الولد عنده اله مكانه خاصة يكول عليه هذا اليشيل اسمي هذا اليسندني

اما البنية يكوم يكعد يكول عنه عار

لما اجت الشرطة و انملى المكان تحقيق ابوية و الوياه باكوا هوى خافوا فالرجال اللي وياه همس له و سوو نفسهم اعصاب و انسحبوا

لدرجة حتى نسوني بالمدرسة

فكرت اطلع منا اروح للمحل مال خالد اطمن عليهم كلت: لا خاف واحد مراقبني ونروح بيها خليهم

رجعت مشي للبيت

الدنيا مخبوصة ابيت ابو امجد ابوي منخبص و عمو ابو امجد و ابو رافد و كلهم الولد واكفين بالشارع و انشاع الخبر طفلة انخطفت و ولد انخطف من المدرسة و الخاطف مو غريب منا و بينا لان الحارس كال ابنكم عرف الولد

هناك و اجت امي نزلت من السيارة تركض و تصيح :- جهالي وين وديتهم اسماعيل
و لزمت ابوية بهذلت احواله و خبصت الدنيا صياح و لطم و المسوان لازميها

اني كاعدة على صفحة مخليه راسي بين رجلية بحجة مقهورة و كل شوية رافع عيني اباوع عليهم و ارجع انصي

اجت مها كعدت يمي و دموعها عشرة عشره و خلتني بحظنها و تتعذر مني ، اتاثرت و دموعي كامت تجري

امي اخذ ابوية الكامت تفضح بيه و راح للبيت

اني ما قبلت اروح بس اللي عرفته بالييت متعاركين واحد يتهم اللاخ هو كاتلها و هي مخرمشته تخرمش مخليته يجري دم

اجت الشرطة و حققت ويا تحقيق الشرطة و فات خالد

بقت عيوني عليه، منفعل و يسال شكو و يحجون وياه وردات فعله تصدك بيهن

و واكف ويا الولد ما باوعلي ، سمعته يكول لامجد :- ولك هاي حتى تنحسب علينا لعد لسماعيل و مرته وينهم غير يجون هنا لا توكع بروسنا من بيت عمي انباكت طفله وتعال يا عم شيلنا

سطر امجد سطر بسوالفه خلاه يجي منا و يروح منا

باوعلي و بحركة خفيفة نزل راسة و حرك عيونه حسيت يكول بيها (لا تخافين بامان ) .

بذيج اللحظة شكد كبر بعيني ، اذا جنت معجبه بيه مره هسه انعجبت بيه اضعاف على هالمواقف السواها وياي

اخذت من جنطتي ورقة و قلم و كتبت بيها ( الولد اللي من زلم ابوية اخذ مني الموبايل دير بالك )

اخذت الورقة هو كاعد ع القنفه خليتها يمه و اني دا امشي بدون ما احد يحس

طلعت هناك شفته باوعها

طلعت كعدت يم برا بالگراج ، اجا هو وكف على راسي :- اخذي احتياطج و حظري غراضج و غراض اخوانج التحتاجينهم

-شوكت نطلع ؟

-مو اليوم ، اليوم ينتبهون .. خليهم هالفترة واحد مضروب باللخ امج و ابوج درس الهم عايفين جهالهم بالخوف و الرعب و مستمرين برذيلتهم هسه من انفقدوا حسوا .. خلي يحسون يطبهم مرض

-اخواني وينهم

-مأمنين لا تخافين عليهم

-لا احد يجي ويشوفك يمي و يشك

رفع صوته ( ولكم والله مصيبه هاي وين جانت النا ، نصه صوته لا تخافين محد يشك بينا اذا خلينا الامور طبيعية

اجا احمد اخو امجد

-ديار انت وين جنتي

-جنت بالمدرسة

-يعني ما تشكين باحد منو هذا كرايبنا اللي اخذ اسامة سالفة ما تخش بالعقل

خالد :- اي والله اني هم عقلي وكف من وضعهم وجاي احجي وياها انوب من بيت عمي انباكت الطفلة شكد عيب خطية عمي

احمد :- ابوي ميت قهر والله على ساعة يوكع، ديار انت شو ما مبين عليج اخوتج مخطوفين لا تبجين لا تكولين

خالد :- ولك خطية احمد لا تحجي وياها هيج ، هستوها سكتت يمعود

اني من حجه هيج خليت ايدي على وجهي عود استهضمت

احمد :- لا والله ما اريد ائذيها بس لين ساكته واحد من كثر الهم حتى السانه ينلصم ، لا تبجين يمعودة شنو ذكرناج ان شاءالله نلكاهم نلكاهم لا تخافين

عافني و مشى احمد حجه خالد :- عوبه مثلي عدل لا تكعدين تتفرجين بوجوه العالم و تجيبين الشبههة الروحج سوي روحج مواته و نامي مو تفترين

-ماشي

طب طب على جتفي و اني اكوم :- سهله يمعوده سهلة ان شالله لا تبجين

صار بوجهي امجد :- ديار لا تبجين ان شاءالله نلكاها

كال هيج لو اني انفجرت من البجي ، حظني امجد و هو يهدي بيا و مها وكفت اطبطب على ظهري و تبجي

كتلها :- مها اريد اروح اتمدد بغرفتج

-اي حبيبه ابطن عيني سوده عليه تعاي

اخذتني و هي تكول :- والله اني وجهي اسود كبالج و كبال خالي ضاعت الطفلة بسببي
وبجت

ما حجيت وياها سويت نفسي ما بيه ارد ..

حطيت مخدة بالكاع وتمددت و ما كلت باطل هو اصلي الليل كله افكر بهالموضوع و ما نمت و اصلا صارلي يومين ما نايمة عدل

فمجرد ما حطيت المخدة دخلت بخوش نومة

ما كعدت الا ب٢ على ايد امي و هي تمشيها عليه، باوعتها صدك متأذيه العيون منفوخة من البجي و الصوت منبح على كد ما صرخت و صيح

اخذتني بحظنها ورجعت تبجي ، و كابلتها ام رافد و ام امجد ومها و مرت رافد يبجن وياها

... لثاني يوم رجعت للبيت

قفلت باب غرفة امي حظرت غراضي اني و اثار و اسامة القليل القليل حتى محد يشك و خليتها جوا الجرباية

فتحت الباب ، ابويه و جماعته بالاستقبال تصنتت عليهم و هم يطمنون ابوية انو راح نلكى اسامه لا يضل ابالك

بس لازم نستعجل بخصوص المخبل سلمان

من سمعت السالفة بيها سلمان لزكت اذاني ع الباب

اسماعيل :- اني متحلف بيه ما ناسية بس سالفة ابني الطلعتلي صفح

-لازم نستعجل الحجي يريده انفذ العملية الجهادية باسرع وكت

بقو يحجون ابينهم العرفته مفكرين ياخذون سلمان لان نص عقل يكبسلوه و يلبسوه حزام ناسف و يخلونه بمنطقة و جهاز التفجير بأيدهم

لميت زبالة المطبخ و اخذت جنطة الهدوم من الغرفة و خليت جيس الزباله فوكاه و طلعت اركض

رحت على بيت سلمان

دكيت الباب طلعت الي رغد دفعتها :- فوتي

-شكو

-سلمان وين

-ما ادري برا

-عندج رصيد ؟

-اي ليش

- بس اخابر منج شوية

اي تعاي ادخلي جوا

فتت وياها سلمت على امها و فتنا بغرفتها ، دكيت رقم خالد حفظته من كتبه الي، استاذنتها تطلع عود حسستها جاي احجي ويا حبيب وهيج شي

خابرته و حجيتله تذمر و كام يغلط عليهم و يدعي و الله لا ينطيهم و نخلص من سالفة يطلعونا اللخ

-خالد سلمان خبر على ابوية بسبب اني كتله و اذا صار بيه شي بعمري ما اسامح نفسي ما اكدر اسكت

-ما ادري ديار ما ادري هسه كل فكر ما باقي براسي و اكلج هيج تصرفي اني اشوف نخبر الشرطة عليهم احسن

-حتى اذا خبرت الشرطة هم مو واحد و أثنين هم تكيد هواية و محد ما راح يعترف ع اللاخ و منو كال اذا بلغنا على عليهم ما غيرهم يجي يخطف سلمان ؟

-اووو دوختني ما اعرف ما اعرف اصبري هسه ما جاي يخطر اي تفكير بدماغي

نهيت الاتصال وياه، و اني دايخة شسوي
كمت من يمها و كلتا الها هاي ملابس اليه راح اخليهن يمج من احتاجهن ادز عليج

-ماشي

طلعت من بيتهم ردت ارجع للبيت سمعت امي و ابوي يتعلركون بعدهم واحد يتهم اللاخ .. و ابوية يهدد امي بيه اذا خبرت الشرطة اكتلج و اكتل ديار
وامي تغلط و تفشر عليه

زلم ابوي بالكراج كاعدين دخلت امي كاعدة بالكاع و تبجي و تلطم على اخوتي ، الشرطة بس البارحة حققوا و راحو ماكو و الناس و العالم اللي التمت البارحة نست اليوم و كلمن حار بنفسه

الصحيح ان امي و ابوي اثنينهم رغم كاعد يتكاتلون بس اثنينهم انسبوا على اختطاف اسامة و اثار

دخلت اني كمت اصيح على امي و على ابوية طلعت حركة قهري بسلمان كله عليهم و اني اكلهم كله منكم اخوتي ضاعو

اخوتي راحو ..

و فتت للغرفة ابجي ، فاتت امي وراي :- لازم نطلع منا بعد ما نضل

-وين نروح

-وين ما تروح المهم ابيت ابوج بعد ما ابقى ولا اأمن عليج تبقين هنا ، امشي اوديج يم بيت مها على ما الكا مكان و اجيبج

صدك لمت ملابسي و لمت ملابسها ردنا نطلع ابويه اعترض ما اطلعون ، تعاركت هي وياه مره لخ و طلعتني

تبعنا زلم ابويه شافونا دخلنا لبيت ابو امجد ما ندري بعد وين راحو

... بقيت يومين ابيت مها
خالد كال يومين بس مر اليومين لا هو ماخذنا ولا هو جاي و حاجي وياي

لا حصلت موبايل احجي وياه هو ما يتواجد
انفرد بيه كم مره ع الماشي ويكلي (اخوتج بخير والله لا تخافين عليهم بس انطي صبر )
ضل بالي على سلمان حيل ، كلت خل اروح لرغد اخابر خالد اسال على اخوتي بلكي يكدر يخليني احجي وياهم و اتفقد اوضاع سلمان شصار عليه

مشيت لبيت سلمان دكيت الباب ، طلعتلي حليمة

-هلا خالة شلونج

ام رغد :- هلا يمه

-رغد وين

-جوا فوتي خاله

فتنا جوا، و اني دا امشي حجت حليمة :- اكلج ديار سلمان ما شايفته ؟

-لا ؟

-صارله يومين ما مبين

كالت هيج لو احس واحد ضربني على راسي بقيت صافنه بوجهه وينه ؟

فتت جو رجليه كوة تشيلني جسمي باد ضيعت الحجي الف فكرة و فكرة بدماغي و راسي اشتعل

بس رغد و امها ما مهتمات ذاك الاهتمام الغياب سلمان
سلمت على رغد عادي عدها الموضوع تكولي :- ما ادري وين راح هذا المخبل يمعودة

فتت بغرفة رغد اخذت الموبايل و كتلها بس اطلعي شويه غدوة احجي

كالت ماشي راح اسوي نفسي كدام ماما اجيب عصير وبسكت ناكل

-شتسوين سوي روحي

لزمت الموبايل و خابرت ....

...........

خالد :- طلعت من الصبح اني و امي و اخذت بناتي و رحت لبيت عمي اجيب ضحى صارلها هواي مو بالبيت البيت وحشة بلاياها و بناتي ضالات فاخذت امي ورحنا كعدنا شربنا جاي

وحجينا بموضوع الشك و ما اريده ينعاد و مشيناها

اقتنعت وتصافت الگلوب و كلنا يا الله خل نرجع بالسلامة ..

صعدنا بالسيارة امي ما قبلت تصعد

-يلا يا يمة صعدي

-لا والله يمه اخذ مريتك وروح انه اريد امرن على اختك اشوفها

-اي اخذج بطريقي امشي

-امشي انت و مرتك اليوم جبتها طلعها مشيها زعلانه عليك راضيها عوفني اني اروح لاختك يلا اودعناكم

ضحكت :- هاي براحتج بعد

اخذت ضحى و صعدتها بسيارتي و بناتي ويانا ، بقيت افر بيهم شويه و حجينا اني وضحى و ضحكنا

متونسين و دا نضحك و اجا اتصال
رديت :- الووو ؟

ديار :- الو خالد

-هلا ديار

ضحى:- هاي عود تصالحنا مو

خالد :- خزرتها واشرتلها تسكت
:- ها ديار

-خالد سلمان ماكو

-شلون يعني سلمان ماكو

-ما ادري هسه اجيت لبيت اهله ماكو، انت مو كلتلي اني اشوف طريقة

-ولج ما ادري اني هاي جيتي رحت جبت مرتي و اجيت لا ادري بسلمان ولا ادري باحد

ديار :- اويلي يمه يعني سلمان صار بيد ابويه و جماعته ......يتبع

☆☆☆☆☆☆

#اتمنى_ان_افعلها

///// بقلم الكاتبه ❤️/////

الحلقة_7

ديار :- اويلي يمه يعني سلمان صار بيد ابويه و جماعته
سمعت مرته يمه كامت تحجي قفلت الخط ما اريد ازيد بينهم بعد الولد كفى و وفى وياي و وكفلي وكفة زلم ما اريد اخرب حياته

كمت من مكاني لشتي كلها ترجف ، اديه ما تستقر
سلمان ضاع بسببي
اي لو مو اني الدخلته بهالمشكلة و كلت اله اتصل ما جان ابوي ركز عليه ولا جان فكر بيه

بقيت كاعدة افكر .. لا اكو شي !
ابوية من بعد ما بلغت عليه و كلت حرامي صار حرامي فعلاً ... يعني ابوي هم من وراي صار بسببي و البنية انخطفت بسببي و كم واحد راح بسببي

كعدت ابجي واضرب على راسي :- موتي موتي اللة ينتقم مني اني الخربت الدنيا بحقدي و مرضي

فاتت رغد و هي شافتني اضرب على راسي و ابجي ، تقربت يمي بسرعة :- ها ها ديار كولي يا الله شبيج حبيبتي

-اني حيوانه اني نذلة

-شكو ولج شصاير

-اكوم اروح احركه و الله اليوم ابلغ عليه و ما اسكت والله

-ولج وين ديار هو منو اللي تبلغين عليه

.. عفتها و طلعت

-ولج ديار شكو

حليمة :- شبيها

-ما ادري تخبلت

... فتحت الباب و طلعت من البيت مال رغد كلت اليوم اروح لابو السيطرة اللي ع الشارع و ابلغهم على ابويه بعد ما بيها كل مجان

امشي بهمه و حركة دم، فتت من بيتنا باوعت بحقد بس ما ناويه اطب، تفاجئت قطعة بالباب (دار للبيع )

انصدمت ، اتوقفت بمكاني، ابويه راح يبيع البيت !
توجهت للبيت مشيت ، شفته مزنجل
دكيت الباب
مرة مرتين تلاثة ...ماكو !

لا يالله بس لا شردوا
خليت المكان و ركضت للشارع لابو السيطرة
اثنين عسكر و لابسين درع و واكفين
تقربت منهم ، رجل وره و رجل كدام و الخوف بدا يرجعني من صارت صدك

من اجا ابالي سلمان و اتذكر اني السبب بيه لا يزيد اصاراري و اتقرب بس معدتي تمغصني و گلبي دكاته سريعة من التوتر

حجيت و كلت :- عمو
و بداخلي اسأل نفسي (صدك راح احجي و ابلغ، اغير الموضوع و افلت ؟ )

اندارو عليه :- نعم تفضلي ؟

بقيت اباوع عليهم وما احجي

-شتريدين يبنية ؟

-ااا شسمة

-شنو

-اريد هذا ااا شسمة

-كولي شتريدين

-ابوي ارهابي

اثنينهم وكفوا :- شبيج يبنية بيج شي ؟

-عمو اني اريد ابلغ على ابوي ارهابي هو وياه جماعة

واحد ضل يباوع بعين اللاخ

:- ولك لا مفخخة افحصها

دا اريد ارفع ايدي واگله لا ، شو هذا صاح :- مكانج استقري ولا حركة

كام يدوس بهذا الجهاز البيدة و يصيح :- نداء من فوج الخامس كيف تسمعني اجب حالة طائة ابلاغ عن ارهابي حالة طارئة

ردو عليه :- نعم اسمعك نوع الحالة

-فتاة تبلغ من العمر
شكد عمرج ؟

-١٦ بس عمو اني.... صاح الثاني .....مكانج ولا حركة

-عزااا ورطت روحي

و ذوله بالجهاز يصيحون (قادمون)

بقوا يركزون بالحرك مال ادية و يدققون بوجهي

-شلون عرفتي ابوج ارهابي ؟

-خطف بنية و جابها للبيت و هددني اذا ما اشتغل وياهم يكتلون اخوي و اخذوني للمخزن مالتهم لكيت هناك ٣ ميتين هوفوني و هسه اختطفوا هذا السويج سلمان اليسمونه ابو الرعاويص

-انتظري بمكانج اي حركة لا تتحركين ، شايله شي وياج ؟

-لا ، بس عمو مو اني والله ابوي،
تحركت من مكاني شوية بساع سحبوا اقسام و وجهوا اسلحتهم عليه و صاحوا

-لا تحركين

-يااا يحظي بس لا اني اكلها و اتورط بيها
خلال خمس دقايق وصلت دورية وياهم جهاز فحص مشوه علية ما اشر الجهاز ما عندي شي

كالللهم :- نظيفة

تقدم واحد طويل عندة شوارب يخوف كعد يستجوبني بس ارتبكت حيل بحيث ما كمت اعرف اكول الكلمة و انسى و ما اعرف شحجي

اخر شي حطوني بالسيارة و كالو :- دلينا بيتكم

اخذتهم للبيت كسروا الزنجيل و فاتوا نفشوا البيت نفش كلشي ماكو البيت طبييييعي

خابروا على رقم اللي حاطة ابوي على الدار للبيع
رد عليهم ابوي، و حجو وياه بطريقة ما بينوله ان هم شرطة

و ابوية ما كال لا .. كاللهم هسه اجي

المنطقة كلها اتفطنت .. الشرطة انتشرت بالفرع و كاموا يسألون على ابويه

يكلوله :- والله هو صح الرجال سكير بس طيب و خوش رجال صارلهم عمر كاعدين ويانا بهالمنطقة ما يوم شفنا منهم الاذية ناس مستورين بس خطية ابنهم و ابنهم قبل ٣ ايام انخطفوا و لهسه ما يعرفون وين

بقوا يتناقشون وياهم .. ويحققون و يرجعون عليه رايحين الجيران امبلغين بيت امجد (الشرطة لازمين ديار ) واجو يركضون

اني صفصفت و امجد و ابوه يلومون عليه شلون مسويه هيج .. هم يعرفون بيه من احد يأذيني انتقم منه فعبالهم لان انخطف اخوية و اختي ردت انتقم من ابويه و ابلغ عليه

وكعد امجد و ابوه يحلفون للضابط و الشرطة انو الرجال خوش رجال و ما بيه شي بس بنته مريضة

شوية و اجت امي تركض و فاحطة و تصيح ( ولج ديار علعلتيني يومية مصيبة گلب ما ضل عندي ديار )

راد تتقرب مني الضابط وكفها و بقى يحقق وياها
امي جذبت كل اقوالي و حتى كالتله ان هي مبلغة عليه قبل مرة و طلع، بتي محتركة و هي صغيرة و صارت بيها حالة نفسية و مريضة

اني كمت ابجي و اصرخ عليها :ليش تجذبين الله لا ينطيج ابوي مو هددنا اني وياج مو نريد نشرد ليش تنكرين احجي

ضربتني راشدي كبالهم وبقت تغلط عليه

شويه و اجا ابوية سلم ع الشرطي و وجهه ضاحك و كاله (سيدي اني من ايدك هاي لايدك هاي تحقق وياي اني حاظر يكلك حرامي لا تصير من القاضي لا تخاف انا اعرف بروحي بس بعد الله بلاني بهل البنية المريضة شنسوي )

كمت اصيح و اغلط عليه كدامهم و اكله (سلمان وين وديته احجيييييييي ارهابي اني سمعتك بهاي اذني تريد تستغله بعملية جهادية )

المصيبة محد ينتبه شحجي الينتبهوله اني وحدة ما مترباية اتجاوز على امي و ابوية

الضاابط كام يحجي عليه و يغلط و يصيح على امي و يرزل شلون ما حاطيني بمصح عقلي و امرهم ياخذوني و ياخذون ابوي للمركز يكملون تحقيق و يسجلون استجوابهم و يطلعون ..

اخذونا بالدورية
وامي و بيت امجد لحگونه بسيارتهم

اخذو ابوية بمكان يحققون وياه و اني اخذوني لمكان لاخ ..

كعد الضابط كدامي واني ابجي و اكوله :- عمو والله اللي دا احجي حقيقة و الولد سلمان مخطوف اسأل عنه شوف والله العظيم اني احجي الصدك

-و اني مصدكج بتي

انصدمت من جوابه وكفت بجي و حجي و صفنت بوجهه بأستغراب

المحقق :- دزيت واحد من الشرطة يسال عن اللي اسمه سلمان لما جنا واكفين بالبيت سال اهله و اللي تبين الولد فعلا غايب عن البيت صار يومين

ابوج مرتين متبلغ عنه بارهابي بس دليل ماكو و ما نكدر ندينه بدون دليل .. اللي اريده منج هسه تكليلي شنو شفتي و شنو سمعتي

:- سولفتله من البداية ان هو سكير و تعارك ويا ماما و غاب عنه ٣ اسابيع و رجع جايبلي موبايلي و كذا بقيت اشرحله عن البنت الخطفوها بالليل و لما اخذوني هددوني و شوفوني ٣ جثث مكتوله

-تكدرين توصفيلي المكان

-ما اعرف اسمه بس هو جول و بيه حديد مال سيارات هواية و تايرات و وسخ . ما ركزت بعد بيه زين لان جان ليل و حتى لما طلعني فجر يا دوب السما بيها ضوا

-زين ما سمعتي اسمائهم اوصفيلنا اشكالهم

-واحد هو هذا اللي هددني و خطفني يسمونه سعد لحية اسمر اجلح هيج و ضعيف و عيونه بيهن صفار

-وبعد

-الثاني اسمه مروان يصيحوله ابو ولاء
وصفت شكله

-سمعتي اسماء شنو يحجون شنو يكولون

-ما ادري يحجون هواية بس اتذكر بس الأتذكره اسم يحجون بيه هواي

-شسمه

-مو اسم بس يحجون بالحجي و الحجي

-طلبوا منج تنفذين شي ؟

-اي كالولي روحي على بيت رحتله و وصوني احفظ معلومات بس كلت لاهل البيت و بالكوة غافوني اطلع و انطيتهم معلومات مزغلطة

بقو يحجون بيناتهم و يداورون ..

اتذكرت شغله، حجيت :- عمو صدك خاف ما تصدكني اصلا اعرف اللي خطفوها صديقة ويانا بالمدرسة اهلها زناكيل

-شنو اسمها ؟

-هيلين احمد سعيد

التفت عليه اليمه:- سيدي هذه المخطوفة اهلها قدموا بلاغ قبل اسبوع او اقل تقريبا البنت جانت بالمدرسة و انفقدت و لحد الان غايب اثرها

-هذا دليل كافي حتى تدين ادانته و يحتجز
هو يعرف انت تعرفين البنت المخطوفه

-ما ادري بس هو يعرف ان هي من مدرستي و شوفنياها يعني لابد عنده علم ان شايفتها بمدرستي

-حادثة خطف اخوانج شنو

-ما اعرف صار ٣ ايام مختفين وما ادري بيهم وين ابويه يتهم امي و امي تتهم ابوية

-ابوج ليش يتهم امج ؟ امح متورطه وياهم

-لا مو هي ابالها تاخذنا و تشرد و نبتعد من ابوي بدون مشاكل فمن غاب تهمها هي ماخذتهم و ما تكله و هي تتهمه هو ماخذهم

-رغم خطف اولادها ما بلغت على ابوج !!برايج ليش ؟

- هددها بيه، امي ما تحب المشاكل تحب تعيش حياتها براحة فتريد تاخذنا بدون مشاكل و تعيش وهو يتجازة بأعماله

-بس هذا السبب ؟

-ما اعتقد اكو سبب لاخ

-هاا

-شوكت لاحظتي على ابوج التغيير

- قبل اسبوع تقريبا بعد ما غاب عنا ٣ اسابيع

-اكو شي لحد هسه ما ذكرتي ؟ تذكري

-لا سيدي كله هذا

-متاكدة ما اخفيتي جزء من الحقيقة

بقى مركز بعيني ارتبكت ما اريد اجيب اسم خالد و اورطه ابد .. فكتله :- لا سيدي كل الاعرفه كلته

اليمه كال :- صدكتها ؟

-خذ الحقيقة من افواه المجانين، اقوالها تتطابق مع الحقائق العدنا و مجبورين ع التصديق مع التحقيق الجاري

ديار :- صح اني مشوهه و خلقتي مو صافيه بس مو مريضة ولا مجنونه او مسودنه مثل ما تكولون

ابتسموا و كال :-شوفي ابوج راح نبقيه يمنا بس الكلام اللي راح ينكال للاهل :- تحقيق كم يوم اجرائات روتينية

راح نراقبج و نراقب الوضع منو يجي يسال عنه مو يتقرب منج منو يحاول يجرج حتى يعرف معلومات

راح نحطج تحت المراقبة .. الاريدة منج حرف ما تنطقي كدام اي احد ... اقبلي باللي راح يغلطون عليج و اللي راح يضربوج و خليهم يصدكون ان هو بريئ لان اذا انكشف الامر الخطة تخرب

وهالقضية مو يمي راح تنرفع لجهاز مكافحة الارهاب و استخبارات حتى تحقق بالموضوع لان ذكرتي اسم الحجي

و المخابرات عدهم اسمين يحتوي على لقب الحجي
الحجي صلاح و الحجي محمود
ارهابيين مطلوبين للعدالة و البحث عنهم جاري

...فلازم تساعدينا بهالموضوع

هزيت راسي بس خفت حسيت ورطت نفسي بموضوع اكبر شرطة تراقبني و ارهابيين يركضون وراي شلون راح اسلم منها

كمت من يمهم و الضابط كام يصيح عليه و طلع كال الامي :- هذه بتج المفروض تنحط بمصح عقلي ما فارغين احنا للمرضى و سوالف الزعاطيط

ميعاد:- اعتذر سيدي فدوة اروحلك اني ائدبها بعد ما تسوي هالسوالف، امشي

كام امجد و ابوه يحجون ويا الضابط و فهمهم ان اجرائات روتينية بالكثير يومين و يطلعونه

.. اجا ورانا ابو امجد و امجد .. العرفته حتى هم محققين وياهم خاصة امي محققين وياها بس كلشي ممعترفه ناكرة ..

طلعنا بسيارة ابو امجد الطريق كلة امي ترزل و تكفخ بيه و تصيح :- حيوانه جلبة تريدين تورطيني تريدين تهجمين بياي ولج اخذوج كتلوج اني شسوي شصخم

ابو امجد كال الها :- ام اسامة صاير شي

ميعاد :- خوية هاي البنية ما عدت اسيطر عليها ذيج المرة متفقة ويا سلمان تبلغ على ابوها و هالمره هم بلغت يا خوية اروح ابتلي اني فوك بلواي ما كافي افر بالشوارع و ادور جهالي ماكو محد بحالي حتى اخوتي اخابرهم محد يوكف وياي وين اروح و شصاير اني كلولي

بقى ابو امجد يرزل بيه ويحرض امي تادبني و تبسطني و يكول :- هاي لو عدي احط ظهرها علوة نصة و اكسرة بت تبلغ على ابوها و تسجنه شنو هالصلافة

رجعنا للبيت ابو امجد و كلهم استلموني غلط و مصايح لا اكدر اردهم و ادافع عن نفسي و لا اكدر اتحمل كلامهم و هم كل ساع واحد بيهم جايبني كفخة

امي كضتها مناحة تبجي على اخواني و تلوم عليه و تكول :- شلون بيه ديار شلون بيه احجيلي وين احطج و اشرد بيج وييين

لما كلهم خلو و بقينا اني وياها ظليت الوم بيها :- ليش نكرتي ليش ما اعترفتي وياي

-ولج تدرين هو خابرني وكال اذا ما تنكرين و تلزمين بتج اذبحجن اثنينجن اجيتج طايرة يمعزاية ولج يمه احنه مو كدهم ذوله ما نكدر

صرت مثل بلاعت الموس لا اكدر اخذج و ابتعد و اخوتج ضايعين ولا اكدر ابقى و الخطر يدور مدايرج

حطت راسها و كامت تبجي من كل حيلها بقوة
لاول مرة بحياتي امي تكسر كلبي و احسها خايفة علينا من صدك و متأذاية

ردت اگلها اخواني يم خالد بس خفت تروحلهم و يراقبوها و يكتشفون تالي الكل يروح بيها

.............

بتول :- خالد جاب جهال خال مها بت عمي وخلاهم عندي و حجالي قصتهم متت قهر عليهم بس من ناحية هم متت خوف كتله شمورطنه بهالسالفة

كال :- لا تخافين كم يوم على ما الكيلهم بيت و نطلع منها الوضع شوي صعب

منا و منا قنعني كدرت اخليهم ابيتي، رجلي عسكري ١٥ يوم يداوم و ١٥ يوم اجازة و ما صارله ٣ ايام من التحق فكلت اخليهم يمي و الله يسترها

بعد ٣ ايام كاعدة بالمطبخ اوكل بيهم و بجهال ، اندك الباب ، طلعت ... يا عزا العزاني هاي امي شجابها بهالوكت و من الصبح شني متحلمة بيه

كلت الها :- هلا بيج يمه هلا شجابج اليوم شو من الصبح

-والله يمه رحت لبيداء اخيتج مريضة و كلت امر عليج زلمتج ما هو اشوفج محتاجة شي لاله

-بخير الحمدلله يمه محتاجة شوفتج يالحبيبة تعاي تعاي فوتي للاستقبال

-شو بالأستقبال ليش هنا

:- هسه اجيبلج مي كعدي يمة اكعدي

-يا ولج قابل اني غريبة و تكعديني هنا امشينا للمطبخ نكعد

-لا يمة هوسة جهالي شلج بيها هسه دقايق و جايتج

رحت للمطبخ و ما احس الا و هي وراي :- شبيج يا يمه هو اني جايه اشوفج و اشوف فريخاتج....... هاي الطفله منو.....هاي مو اثار

-اااا اكعدي يمه اكعدي

طلع اسامة ...

ام رافد :- ولك انت شتسوي هنا ولج ابتيله ذوله شجابهم هنا و الدنيا مگلوبه عليهم

-يمه افهمج

-شتفهميني ولج امهم تبجي عليهم دم خل اخابرها

-لا لا يمه بروح ابوج لا تخابرين احد خل افهمج و انت افهمي الموضوع

-شني ولج بتول هديتي حيلي متورطه بشي يمه احجيلي

بتول :- سولفت لامي كل الصار و الجرى لطنت على خدها على صدرها فرفحت و هي تكلي :- صخام الصخم راسك خالد يمه يريد يهجم بيتي يمة يريد يكتل روحه و يكتل اخوته

لا لا يمة هسه تخابرين اخوج هنا يجي والا والله اروح اشهرهم شهيرة

-يمه ستري علينا و لا تورطينا

-ورطتيش اكثر من هاي يبتيله ، من يوم السافر لسوريا هذا خويلد و اني ما مرتاحتله كلبي حاس يسوينا مكسورة

ادورة اكله رجع مرتك راكب راسه ما يرجع مدري شلون اليوم الله هداه و كال اي نروح نجيبها
خويلد ما يرتاح اذا ما يجيبلي الجلطة

يمه راح ينهجم بيتي، يمه تصخم راسي
عزا العزاك خويلد ادور عليه هالمشوهة و اهلها يمه

.. خابرت على خالد كالتله هسه تجي يمضروب الجلوة هسه اريدك و خبصت الدنيا عليه هسه تجي

اشرت لأسامة ياخذ اخته و يفوت جوا

خابرني خالد اخذت الموبايل و فتت جوا، رديت عليه :- الو ها خالد

-شنو امي اجتج ولج كالتلي رايحه لبيداء مو الج

-اي و مارة عليه بطريقها الحك يمعود خبصت الدنيا
جاي احجي و سحبت الجهاز من ايدي :- و تتخابر من وراي اكلك تعال هسه اذا ما اجيت اروح لهاي المشوهة اكتلها هي و امها و اطردهن والله تريد تورطنا انت

-شالقضية يمة جاي بس لا تكبريها

مرت الساعة و الساعتين و خالد ماكو اخابرة يكلي رجعت ضحى و الجهال للبيت و ديار ماخذيها للمركز لازم اشوف شنو الموضوع

امي سمعت هيج لبست عباتها و كالت :- اليوم ما اسكت و اني الج يالمشوهة خايطة بشارب ابني تريد تورطة .. والله لا اربيها رايحتلها

لبست عبايتها و راحت ......يتبع

☆☆☆☆☆☆

#اتمنى_ان_افعلها

//// بقلم الكاتبه ////

الحلقة_ 7 (تكملة )

بتول :- الو خالد

خالد:- ها بتول يمعودة مو كلت جاي شبيكمما طاير بالقران

-ولك خالد امي راحت للبيت تريد تتعارك ويا ميعاد و ديار الحك

-خرب يومكم اذا صدك ، يعني ما كدرتي تلزميها على نا اوصل يلا يلا هسه اخابرها

سديت الموبايل واني طاگة روحي، طلعت رقم امي و خابرت ما ترد ، مرتين تلاثة و ماكو

ركبت سيارتي وطلعت لبيتنا، صفيت السيارة و نزلت لكين ضحى و مرت رافد :- ها الله يساعدكم

ضحى :- هلو حبيبي ترتاح احظرلك ملابس للحمام

خالد:- امي وين ؟

- ما اجت هو من كالت الك اني رايحة لاختك و لهسه عدها

زفرت بأستنفار رفعت الجهاز اخابر عليها هم ما ترد :- ردي رحمة لربج دردي

ضحى:- شكو شرايد منها

-هيج شغله اني طالع

-ما تتغدى ؟

-لا لا تغدوا ما اريد

طلعت رحت لبيت مها ، سلمت بس مهى بالبيت :- هلا خوية شلونج

-هلا خالد هلا خوية

-شصار على ديار ما هابرتي امجد

-والله جاي اخابرهم كل شوية ، ماخذيها بغرفة الضابط للتحقيق و بعدهم لهسه ما جايين

-ظل بالي عليها خطية

-هي الخطية لو خالي هاي ديار هم مدري شبيها ويا مبلغة عليه شجاها تخبلت ما ادري

-مها اني رايح اذا اجو عود خابريني طمنيني عليهم

-ان شاءالله ان شاءالله روح خوية

.... هسه جاي اطلع من بيت عمي فاتت امي

خالد :- هاي وين صرتي يا يمة تحجين صدك ردي على جهازج صار ساعة اخابر

-والك عين يخويلد و تحجي ولك يمه تريد تزين راسي انت ؟ تريد تصخم وجهي مو عندك مرة و بنيات شجاك يمة

-يمه اني لو انت اللي شجاج شبيج اهدي و مو هنا الصياح امشي للبيت ترا اذا فضحتيها تخربيها و احنه ما عايزين

-شتفهمني ولك خاطف ولد اسماعيل و تريد تفهمني

-اششش امشي اني افهمج ابيتنا

.. رادت تحجي لزمتها و اخذتها كوة للبيت، فات و نزعت العباية و الفوطة و تلطم على وجها و تصرخ و تصيح:- راح يهجم بيتي ادور ويا الارهابييين يمااااااااي

-يمة رحمة لمحمد مو هيج فضحتينا

-ولكم وينها ضحى وينهااااا تعاي تعاي والزمي رجلج يضحيوة راح يروح ابني

-اري اهديها اريد افهمها ما تفتهم ، فاتت ضحى تريد تفهم شكو صحت بيها كلت الها اطلعي هناك ما اريد احد يمي

فات رافد وحاول يفتهم بالف يا الله كعدناها و سولفت الها و للرافد .. اثنينهم ما قبلوا :- و شعليك و شنو تساعد و اكفينا الشر يخالد

خالد:- انتم اطلعو منها و ما تخرب محد يدري بيه اني جاي اساعدها

رافد :-شتساعد منها خالد انت شعليك

خالد:- اني جاي امشي خطواتي صح كفوني الفضيحة ما محتاج احد يدليني

-يمه من صغرك راكب راسك يالعنييييييد ردت للاردن سافرت ردت تركيا رحت سنة ، قررت تاخذ عاىلتك و تعيش بسوريا و عاندت الا تروح لا سمت اب ولا خذت راي ام .. شرايد يخويلد بعد وين تودينا

-يمه متضايقة مني و من كعدتي وياكم بالبيت من باجر اني الم غراضي و اطلع تره ما صايره هاي كافي فكوني ، تالي عمري جايين تحكموني انتم سوي و ما تسوي
اللي اشوفه صح لا انتم و لا غيركم يردعني عنه
والبنية احتاجتني و ناقص غيرة و شرف لو عفتها

الام:- ذاك اليوم اكلنك و شربنك من حجيت ويه دياره هسه جاي تساعدها

-ذاك يوم و هذا يوم والله ما بين يوم و اللاخ يغير الحال ما عليكم مني لحد يدخل باموري و بس
ولو حاول احد بيكم يحجي و يتعدى من باجر اطلع و يحرم عليه هذا البيته

عفتهم و كمت بس امي ما رضت بقت تدعي على ديار و على اهلها، طلعت شفت سيارة عمي ابو امجد

مشيت للبيت، طلع احمد :- ها احمد شنو الاخبار شصاير ابيت اسماعيل

-بته دياري مشتكية عليه على اساس ارهابي و موقفينه خطية

-شنو هاي

-اي والله هاي ديار بالنازل كلما جاي تكبر كلما جاي تزيد عدائيتها للبشر تكره الناس

-هاا الله يشفيها ان شاءالله، زين هي ما سوولها شي ؟

-لا هاي جوا جاي ييرزل بيها ابوي

-الحمدلله ما دام مرت على خير و ما بيها شي

-يا خير خالد اسماعيل موقوف

-يطلع لا تخاف عليه ذيج المرة هم دخل و طلعوه

-الله يسمع من حلكك

- يلا اني رايح للاستوديو اخذ راحتك

-هلا بيك

... عفت سيارتي و تمشيت بالمنطقة .. دخلت للمخزن

-هلا عباس شلونك

عباس :- هلا خالد

-شلونه الوضع ؟

-كلش عال ؟

-كون احد حس

-ولا واحد

-هههه عفية عليك يلا فوت
دخلنا جوا :- ها سلمان اليوم تشريب دجاج اضرررب

سلمان:-هييي طيب

-بالعافية

سلمان:- شوكت اروح لاهلي

خالد:- يا اهل سلمان حليمة العمصة لو رغودة ؟

سلمان :- لا تجيب طاريهن لا ازين شواربك

خالد:- هههههههههههههه اكول اكل اكل اشبع بطنك تراه وراك ضيم هواي يا سلمان

......... دا احجي ويا سلمان دك موبايلي

رقم غريب، بس اتذكر شايفه، رديت :- الو نعم

ديار:- هلو خالد اني ديار

-شمصخمة اليوم شمسوية ليش هيج ديار

-ما تحملت خالد بعد ما اصبر عليه

-كلش غلط جان المفروض نلكى مكان نأمنكم يلا، هيج انت و امج بوجه المدفع

-ميهمني بعد لو شما يسوي المهم حبسته النكس

-مو كالو اجرائات روتينية ؟

-هيج كالو كبالهم بس هاي خطة

-خطة !! خطة شنو ؟

-هو الضابط گالي لا تكولين لان حقق وياي و عرف اني احجي الحقيقة

-والله يا ديار شلون ما اشوف جاي تلعبين باعدادات حياتج و جاي ادخلين نفسج بأمور اكبر منج و كل ما جاي دا تتورطين اكثر و اكثر

-بعد ما يهمني كلشي خالد المثلي ما عندي شي يخسره حتى يخاف عليه بس اخوتي و اخوتي بعدتهم، الا اني اتمنى من الله الموت

اشفت من حياتي حتى اخاف و ابقى عايشة
من اهلي و وضعهم لو وضعي و جسمي لو وضع الناس كل ما كامو وكالولي المشوهة و كانو اني الشوهت روحي

امي هاي امي من تصير عصبية و تريد تغلط عليه تكلي المشوهة بايرة على كلبي محد يباوعج محد ياخذج ، شتأمل و اطلب اعيش ؟ هي عيشة هاي

-لا تكولين هيج عمر الجمال ما جان بالملامح و حق ربج اعرف كومة ناس قمة الملامح الجميلة و افعالهم نگسة و من اشوفهم بودي اتفل بنص خلقتهم على كد ما تلعب روحي منهم

و اكو ناس ملحين جلحين و على كدهم وكلوبهم نظيفة و يلاكوك بالهلا كلبك ينشرح من تكعد وياهم

خلي املج بالله قوي و الاهم من هذا لا تستهينين بحياتج ، روحج عندج مو غةلية ما تدرين بغلاتها عد الله، هي روحه وامنها امانه عندج حرام هيج ما تعرفين القدر شضاملج

-ان شاءالله، كلش قاهرني موضوع سلمان جاي اموت كل دقيقة عليه جاي احس نفسي اني السبب باللي صار وياه

- مو تحسين بل حقيقية انت السبب بكل اللي صار و الراح يصير بسلمان، افعالج لازم تلاكيها ديار الدنيا زغيرة و الارض مدورة شما تسوين عليها ادور و ترجعه عليج

تسوين غير ترجعلج خير
تسوين شر تدور الشر عليج
وهذا كل اللي يصير سبب استهانتج بهيج مواضيع زعططة رحتي بلغتي و ضيعتي الولد

- كمت ابجي و هو يحجي

-اني ما اريد ابجيج انما اوعيج على اغلاطج مو كلشي ناخذه بحيل صدر اكو امور لازم نتركها لالله هو ياخذ حقنا بيها مضاعف .

-هسه وين الكاه عفية

-ما ادري

-تتوقع اخذوه ؟

-ممكن ، الا گليلي منين جاي تخابرين و وين ما تخافين احد يسمعج

-لا هذا موبايل امي اخذته وكعدت فوك السطح مال بيت عمك مليت طكت روحي على كثر ما رزلو بيه و كفخوا براسي

- ههههههههههه يلا روحي

-دور على سلمان بطريقك فدوة خالد اني كمت اخاف اطلع

-ان شاءالله ان شاءالله يصير خير

.......ديار :- غلقت الجهاز من خالد و كعدت العب و ابحوش بموبايل امي

شفت الها رسايل ويا واحد مسميته (الباشا ) هو يدزلها رسايل حب و هي مشتغلته ناعم غزل بمستحى كأنها جاي اتطبقة

صعدت بالرسايل شفتها دا تسأله عن شقة للأيجار يساعدها تلكى و انو هي بعد ما تكدر تبقى ويا رجلها لان اعتدى على بنتي و هو مستغرب و يغلط على ابوية

اطراف حديث متفتهم منه شي يا دوب، دخلت ع المكالمات لكيتها مدة المكالمات بالساعة و الساعتين

اخر مكالمة اليوم بعد مكالمة ابوي اعتقد لما جنا بالمركز ، جاي اگلب و دك هو

مدري الفضول لزمني و فتحت خط :- الو

عصام:- الو منو انت ؟

-انت المخابر منو ؟

-هذا مو رقم الست ميعاد

-اي رقم ماما

-انت بنتها ديار صح ؟

-انت منو

-اني اسمي عصام شلونج بابا

- هلو بيك بس انت مو ابوية

-اني اعرف بقصتج مع والدج لكن استغرب انو رغم هذا ترفضين احد ياخذ مكان ابوج بحياة امج

- شوف اني لا تهمني امي ولا ابوي ولا انت نفسك و نازله انطي الموبايل لامي و عود احجي وياها

-لا لا اريد احجي وياج ابقي

-شرايد ؟

- اذا راح تگليلي ان عافوني اطلع هيج وبلا ما يحققون وياي فمراح اصدكج لان هالامور اني اكثر واحد اعرف بيها الكدامج لواء بالجيش العراقي و عندي اطلاع تام على هاي الامور و التحقيقات

-ما عندي شي احجي

-اني وياج بنتي مو ويا غيرج واريد اساعدج

-و اني مو بنتك

-الواضح ان التفاهم وياج صعب شوي، ماكو مشكلة تكدرين تنطين الجهاز لامج احجي وياها

-وليش جاي تساعد امي شرايد منها

-كل خير

-صداقة لو مفهمت

-تفهمين بعدين هسه نحل المشكلة و الله كريم

... عفت النقاش وياه و نزلت لأمي صحتها و كلت الها :- مامااااا

باوعتلي ، واشرتلي بمعنى ( شتريدين ؟)

- صديقتج تريدج ع الموبايل

سمعته اللي اسمه عصام ضحك من جذبت هيج، ضحكته جنها ضحكة صدام حسين ، اخذت الموبايل مني و تأشرلي :- منو ؟

-اخذيه و شوفي منو

.. فاتت بغرفة احمد وكعدت تحجي وياه
صفنت امي شجاي تسوي، ساحلتلها راس ضابط و مو بس ضابط لا لواء و بالجيش العراقي ..
تريد تورطنا لو شنو ؟

كعدت يمها هي تحجي وياه بنعومة و تترنح و تتنعوص بصوتها و هي تشكيله و تبجيله و هو يهدي بيها

كبالنه مرايا اباوع لشكلي و اباوع لامي كأني اني امها مو هي امي ، ناعمة بس طويله و حلوة و شعر اسود طويل و ثخين و عيون وساع نرجسيات ٢٤ ساعه مكحلات و المسكارة ما توكع من رموشها و الحجل لازك برجلها و الملابس تركص عليها تشبه راقصة اسمها ملايين

و اني كوشتي تلعب النفس ما عندي غير الكباية تسريحة و وجهي طافي كل روح ما بيه و حواجبي اليكول تيب و لاطشته بوجهي ما شايله من حاجبي شعراية وملابسي بنطرون كابوي ازرك تقليدي و القميص بني سادة بحيث كالب على وجهي مسويني زرگة

كل معالم الانوثة ما بيه
بعمري ما اهتميت بنفسي لو عدلت بروحي
كل ايامي خلصتها خوف و حرمان بسبب ابوية
اخاف لا يغتر بيه و تدنى نفسه حتى من انام اقفل الغرفة

ساعتها كرهت روحي ردت ابجي الدمعة وكفت على طرف عيني :- عود ليش اني مو مثل البنات ولا بيه ملامح بنات

اشوف البنات بشرتهن حلوة اعتنائهن بنفسهن بملابسهن اني كل ذوله ما على بالي

بقيت صافنة بهالامور لحد ما كملت محادثة، باوعتلها

ديار :- منو هذا ؟

- شخص اعرفه

-ومنين تعرفينه

- منين يعني بالدوام تصادفنا و تعرفنا ، مو هنا الحجي .. الرجال جاي يساعدني و يوكف وياي و يدور جهالي ما معقوله يعني مخطوفين هسه لو مخطوفين غير احد يخابرنا يساومنا ابوج و متخبل ما يدري عن اسامة و اني ما ادري عنها راح ينفجر راسي وين الكاهم ولج لا ليلي ليل ولا نهاري نهار

-هاا من هاي اشوفج تتنعوصين و تبجين بنعومة كدامه

-طايحة الحظ لا تحجين هيج نلكي اخوانج و عود الله كريم

-و هذا شنو يمه كافي نخلص من واحد تفوتيلنا بسالفة غيرها

-اكلج ليش ما تسكتين ؟ انخى منو يوكف وياي اخوتي العار الكل واحد بيهم لاف مرته بحظنه و محد سائل عني سنين شاكلت اشربت لو الغريب البالشارع

ولج هذا راس جبير بالدولة خليني اكل براسه حلاوة و اخليه يعيشني و يعيشكم و يحمينا

-يا دوله هاي دولة البطيخ ما تشوفين العراق صاير شوربة لا دوله ولا قانون كلهم حرامية و ينخاف منهم

-حرامي ولا ارهابي نكون نفسنا براسه و نعيش و هو شيسوي خل يسوي شعلينا بيه

-اي و تشتغليله كح.......
ضربتني راشدي

-الكلمة لو عدتيها راسج اكصه حيوانه و ما الج علاقة شنو اسوي و شنو اريد لا تدخلين
حظري روحج نروح نشوف البيت الاجرلنياه

ديار:- ما اروح روحي انت

ميعاد:- لا تروحين و رجلج فوك راسج افتهمتي يلا گومي

كامت هي رتبت نفسها ، و اني غسلت وجهي و مشطت شعري، باوعتلها لبسه نفنوف ابيض ستريس من الصدر و ربع ردن .. و ضيك على جسمها و الشحاطة ام الكعب و الساعة سودة بأيدها و الموبايل بيه مدالية قلب الحب .
الوجه يلمع و مكحلة و الحمرة بناتية خفيفة و عطرها يكفخ ..
حطت العباية على راسها و كل ملامح لبسها مبين ، لزمت العباية لزمة بغدادية و الموبايل تفر بيه و كالت :- يلا

-اخواني مخطوفين و انت بهالشكل ؟ عاد لفي العباية زين

-بس هنا البس عباية بس نطلع اشمرها، طالعين للمنصور خوما تريدين افتر بعباتي

-شنسوي بالمنصور

-ديكولي اجرتلج مشتمل هناك الي و الج خوما نبقى كاعدين عد بيت ابو امجد هم خلف الله عليهم الناس تحملونه هواي و صاحبك حلو لا تاكله كله لازم نحس على ارواحنا و نفارك

-وايجار المشتمل منو راح يدفعه انت لو هو ؟

-ديكول اجره ب٨٠٠ الف من وين الي اني ٨٠٠ الف و اجر هي مكموعه كل راتبي ٣٥٠ شحط بكارتي و شطعم جارتي طبعا عليه

-مامجبورين نكعد بالمنصور

- وين تريدين نكعد وره السدة دمشي امي امشي عود من تلفيلج واحد بيه خير خل يعيشج العيشة التريديها امشي و اسكتي

-شوكت الله يخلصني منكم

-بومة من يوم الخلفتج بس نغطين

ما رديت عليها ضجت كلش و الصراحة كمت كل ما اشوفها اقارن بروحي و انقهر اكثر من شفت بالمرايا والله مبينه اني امها مو هي ..

هسه طلعنا دا نمشي ام رافد واكفة بالباب جارة صوندة و ترش عتبة بابها

ميعاد:-شلونج خية ام رافد

دارت وجهه و ما ردت، وكفت امي :- ها خالة ماكلين عشاج بايكين حلالج شو اليوم الوجه مثگل

ام رافد :- لزمي بتج و ربيها و منعيها من ابني و اني وجهي ما يثكل

عقدت حاجبها امي :- خير اللهم يجعله خير شكو بتي شبيها

-يا ام اسامة مالنا خلك مشاكل خلي عشرتنا طيبة و بعدي بتج

-ام رافد اني هسه طالعة بشغلة ضرورية من نرجع يصير خير ولو بتي غلطانه بحقكم تاخذين عيونها الأثنين

.. لانت و كالتلها
ام رافد :- والله يا خالة احبج حتى بنيتج احبها بس الدنيا ما تتأمن و انا ما عندي غير هلوليدات اخاف عليهم من الهوى

.. سلمت عليها و طلعت
ديار :- ما فهمت اني السالفة شنو اكتفيت بالسكوت بس عبالي لان خابرت خالد و ضحى كاعدة فكرت ان صايرة مشكلة بينهم بس هللد ما بينلي هيج شي ولا كال .. ليش ؟

افكر و امي تسأل بيه و ما منتبهه ..
ميعاد:- مو وياج ؟

-شكو

-شعندج ويا خالد النوب

-ماكو شي كم مره خابرني و بس

-ليش يخابرج

-هيج نسولف

-من اكلج حاطة عينج عليه تگليلي لا

-متزوج شسوي بيه

-وشبيه المتزوج يمه تره الرجال من حقه وحدة و اثنين و تلاثة و اربعه هم

-ترضين هالاتلاثة ياخذهن عليج

-والله رجال وبراسه حظ و يصرف عليه و مدللني و مدلعني و مرضيني عسى ما يتزوج ٧ شريد منه ؟

سكتت ما جاوبت عليها

اخذت تكسي و كعدنا ورا اثنينه، و السايق ما شال عينه من اميو مشغل نصرت البدر (بوسه لروحك و گلبگ) بس هي دايرة وجهه منه وصافنة بالشارع

دمعت عيونها حطيت ايدي على رجلها :- شبيج

-لج ماما كلبي نار اخوتج ما هم راح يوكف عقلي وين الكاهم
حجت و دموعها كامن يكتن و هي تشكيلي البگلبها على اخوتي .. انقهرت عليها بقيت لازمة ايدها

السايق :- خير ست ليش هالبجي ما تسوى

ميعاد :- دام ما تسوى حط عينك بطريقك و ما الك علاقة ما بيه حيل حادث اني و بتي من ورا حنيتك الزايدة

السايق:- على كيفج ست اعصابج شفنا هالعيون الحلوة بجت و انفطر گلبي

-من ينفطر گلبك بجص و اسمنه و البخة ورجعه عدل يااا ابو كلب المفطور وكف عندك نازل

طلعت كروة من جيزدانها و شمرتها ع الكشن و كالت:- نزلي

نزلنا اني وياها ، اتصلت بالرجال اللي متواعدة وياه كال الها :- دقايق و اني يمكم

بقينا واكفين و هي حطت العباية بعلاكة مال دعايات
....ابوع الشارع يجنن معقوله هاي بالعراق لعد احنا وين عايشين ..

اني صح ٢٤ ساعة افر بمنطقتنا بس ما طالعة منطقتنا ابد كل طلعتي بالمنطقة من شفت الشوارع و المحلات بقت عيني شايهة

وكفت كدامنا سيارة بيضة عالية و رفع ايده لامي

ميعاد :- اي هذا تعاي
صعدت يمه بالصدر و اني ورا
باوع علاكة امي كال :
عصام :- وياكم غراض

بنعومة :- لا شوية تسوقنا اني و بنتي ع الماشي

-بيها الخير ان شاءالله

دقايق كلش قصيرة و وكفنا اباب بيت بابه صغير فوتنا طرمة صغيرة و دهلنا المشتمل حيل نظيف الكاع مرمر حايط الحمام و المطبخ سيراميك
غرفة و صالة و مطبخ و حمام جوا و غرفة و حمام فوك وحدهم .

بس بيت يصفن من النظافة مو مثل بيتنا القديم الماكلته الرطوبة و الحيطان تخرخر ...

بس ضجت حيل ..
راح نكعد هنا و يصير البيت ملهى معروفة الصالة لكعدتهم و الغرفة الفوك و الحمام لامي و احنا الغرفة الصغيرة الجوا ...

بقيت عاقجة وجهي وهو يشوفها بالبيت ، رجال طويل صاحب جتاف عريضة عنده كرش بس نظيف حيل الحذاء جلد اسود تلمع ما كأن ماشي بيها بحياته

و يتضاحكون هو و امي ، انوب وكفت تشكيلة على اخوتي و بجت وهو بقى يهدي بيها و طلع الها جفيته و انطاها الها و يسكت بيها و باوعلي

:- انت هم ديري بالج على امج لا انت و الدنيا عليها

درت وجهي منه لان اذا ابقى اكثر احتمال انفجر بيهم

حط ايده على ظهرها و تقرب منها زايد، عفتهم و طلعت و كمت اشيل بروحي و اركعها برا .. لو اعرف الدنيا تنكلب ما اعيش ويا امي هنا

كملت الدراما مالتها و طلعنا ..
بقى يحاول يحجي وياي ابد ما انطيت وياه رافعة وجهي عنه ..

جان تكوله :- هي شوية ااا

عصام :- اي اي افهم

من كال هيج صدك طكت روحي و ردت ابجي

كال :- باجر تنتقلون هنا لمو غراضكم و العدكم و خابريني اجي اخذكم

ميعاد:- ان شاءالله والله هو اني ما عندي غراض كل فراضي اخذهن هالأرهابي و بقن بالبيت شسوي

عصام:- لا تشيلين هم ام اسامة انت بس أمري

-عساك سالم الله لا يحرمنا منك

وضلو يباوعون لبعض بأبتسامات ..
يابوية شلون طكت روحي

رجعنا للبيت لبست العباية براس الفرع و مشينا، فاتت امي لبيت ام رافد و كالتلي:- فوتي يم مها هسه اجيج

فتت وبقت مها تسولفلي و وين لكيتو بيت و ما اعرف شنو

كلت الها :- بقت تفر بيه منا و تجيب منا ما فهمت شي

-يعني ما لكيتو بيت ؟

ما اعرف

شوية و فاتت امي من الكراج تصيح :- ديااار، دياااار

طلعت الها اركض

:-شكو

ميعاد :- كومي امشي وياي بسرعة

-شصاير ؟
جرتني من ملابسي حيل و طلعتني برا

:- اخوتج انت و خالد هذا العار ماخذينهم و ما تكليلي

-منو كالج ؟

-ام رافد هسه حجت وياي صايرة ادسترين من وراي و ما ادري ولج تشوفيني بالضيم يا خالي و ما تحجين

بقت تضرب بيه واني لا خذيت ولا انطيت

:-هسه تاخذيني لاخوتج يلا و اني حسابي ويا خالد ..

:- ما اندل هم وين

-عشتوووو مأمنها اخوتها ما تدري وين يا طايحة الحظ تفلت عليه ورجعت ، جابت العنوان من ام رافد و جرتني وراها و طلعت ..

بعدنا جاي نمشي بالفرع، دك موبايلها

ردت ع الموبايل :- الو

اسماعيل :- هاي اني طلعت و اكبر واحد ما يكدر يسجني كولي لبتج الزمها الزمها ......يتبع

☆☆☆☆☆

#اتمنى_ان_افعلها

//// بقلم الكاتبه ////

الحلقة_8

كالصبار هي
هشة من الداخل
قاسية من الخارج
تؤذي من يتقرب اليها
تحب من يتعامل معها بلطف و حذر
متشوهة المظهر .. يزينها صبرها
فهي صامدة بوجه اقسى الظروف

...............

" بقت يم اللّٰــه بعد "
هـكذا يختم المتعبون آحاديثهم المقهورة ♥️

............

اسماعيل :- هاي اني طلعت و اكبر واحد ما يكدر يسجني و كولي لبتج الزمها الزمها

ميعاد:- شوف اسماعيل والله من تتقرب لبتي اكلك بسنوني و ما اشبع منك

اسماعيل:- نشوف يا ميعاد نشوف
قفل الخط

-عزا العزاني ولج هذا جاي يتوعدلج شلون بيج و بمشاكلج اني ديار خاطفة اخوتج و مبلغة على ابوج عزا براسج ان شاءالله

ديار -اوكفي اوكفي ابوي شطلعه ؟ شلون هيج عافوه

-ما تعرفين يعني ما عليه دليل و طلعوه

-لا كالو ما يطلع و اكدو هو ارهابي، ماما شوفي ماما عوفي اخواني الله عليج لا تروحيلهم هسه عوفيهم

-شلون اعوفهم امشي يلا

-ما عليهم شي اوكفي احتمال بابا مراقبنا لو واحد من جماعته و يندلهم و يأذيهم عوفيهم الله عليج ما عليهم شي

-انت تسودنتي امشي وياي خل نجيبهم

-جبناهم شنكول ؟ جانوا عد بتول اخت خالد هم الناس ينضرون بسببنا

-جان فكرتي من البداية هالتفكير يا حيوانه ارجعي لبيت امجد اجيب اخوتج و اجي

-ماما بس افهمي ياااااالله بس افهمي عوفي اخوووتي لا تجيبينهم راح يلاحكونه و يلزمون اخواوني و يهددونا بيهم

-يهدد منو شحده يلزم شعره من راسكم

-لزمو و اتعدوا و انت مو على بالج ، اني شفتهم كاتلين ٣ جثث بدون ما يرفلهم جفن ما عدهم مانع واحنا نا بيدنا شي خابري خالد

-خو هذا الك***** مالتج صاير كل مصايبج وياه امشي

احجي وياج بس انطيني الموبايل، اني اخلي يجيبهم بلا ما تروحين

-ولج وين راح تودينا بلعبج هذا شلون وياج

تحجي واني اخذت الموبايل دكيت على هالد و هي واكفتلي متخصرة
رن رن رن .... رد
خالد:- الو

-هلو خالد اني ديار

-هلو ديار

....اخذت امي الجهاز :- طلعت انت الخاطف جهالي يا عار ما استحيت على نفسك و انت تاخذهم هيج و تحرمني منهم والله اليوم فلا اسكتلك

-ام ديار اني ما خاطف احد و الجهال بالحفظ و الصون اني حميتهم منكم بس، شوكت ما تأمنين بيت الكم و ما عليكم خطر الجهال موجودين تاخذيهم

-اني عرفت مكان الجهال و هسه رايحة اخذهم و الا العب بيك جوله جزاة تدخلك هذا اللي ما اله اي مبرر

ديار : جريت الموبايل منها :- وين ناخذهم اوكفي بس اصبري
كامت تدفع بيه تريد الموبايل حجيت وياو:- خالد بابا طلع و جاي يتوعدلي

خالد:- وين انتم ديار شصاير ؟

-امك حجت لامي على سالفة اخواني و تگلها خلي بتج تبتعد من ابني

-نعلعلا اذا صدك و هاي عود وصيتها اني اتصرف ارجعوا للبيت و اني اجي و احجي وياكم
بس انطيني امج

واكفة يم راسي تروح و تحجي و ترزل
ديار:- هاج يريد يحجي وياج

-جيبي، جهالي اخذهم من عيونك

-ام ديار اني ما بايكهم احترمي الفاظج من تحجين رجاءا ، جهالج اليوم يمج و انتهت هسه رايح متوجه اجيبهم و اجي ويا دار ما دخلج شر ما يحتاج تكبرين الموضوع

-محد طالب منك

-لا خول ولا قوة الا بالله العلي العظيم هسه اني شدخلني بهالمعمعة

قفل الخط بوجهه

بقيت اني وياها نتعارك و كلت الها خلي نرجع للبيت
هي ما سمعت مني، اخذت التليفون و خابرت هذا عصام صاحبها ..

ميعاد :- الووو عصام لك عيني الحكني دخيلك

-كولي ام اسامة شكو

-لكيت جهالي

-اي عالخير بس وين لكيتيهم و من ماخذهم

-طلعت بتي المصونه متفقتلها ويا واحد ياخذهم و يبعدهم عني

-تصرفها صحيح و ذكي و بمحلة كلنا ما شكينا هي الماخذتهم

-يا ذكي لك عيني خابرني اسماعيل ديهدد ابتي

-طلع !! معقوله المفروض حتى لو اجرائات و تحقيقات عادية هم مو بيوم يطلع لازم يبقى حتى يتأكدون من يمة

-ما اعرف طلع بعد

-هذا وراه جهه متنفذة قوية لدرجة هربوه بسرعة قبل لا يعترف عليهم لو يزيدون بالتحقيق وياه ، اني راح ارجعلكم ام ديار حظرو غراضكم اليوم تكعدون بالبيت و نشوف شلون ندبرها عود اخليلكم حماية بالبيت

....قفلت الخط و كالت :- عصام راح يرجع علينا

-هسه نرجع للبيت لو نضل كاعدين بالشارع هنا حتى عيب نرجع شنكوللهم

- لا خل نروح نلم غراضنا

-اليوم ننتقل ؟ ..

-عصام كال اي دبروا نفسكم اليوم و نشوف شلون نحلها باجر يلا امشي،

جاي اندار و شفت سعد لحية مر من الفرع الكدامنا، اجلح ووصخ ويباوع طرف عيونه جنه وجه جني .. متت خوف بمكاني لزمت ايد امي :- يمه هذا الرجال اليشتغل ويا ابوية كدامنا

-وينه ؟

-لا تباوعين كدامنا مر من الفرع

-امشي على السريع
مشينا شبه الركض لبيت ابو امجد، فتنا و كلوبنا تهتز من الخوف و القلق يقرأ الف و التركيز صفر وجوهنا مصفصفة

همه استغربوا من وضعنا، يجون ويا امي و هي ما منتبهه تخابر يرجعون يسألوني و اكلوها :- ها شنو .. شنوه

ما جاي اركز بشي ابد .. كعدت بالاستقبال و اني يمها خابرت على عصام :- الو ابو نور ولو تعبتك باتصالاتي

-تشلعين عيوني الاثنين ام اسامة لا تحجين هيج

-بعد كلبي ، اسماعيل هددني بديار و كبل شوية شفت زلمته يفتر بالمنطقة و كلبي صاير نار على بتي و هذا خابد راح يجيبلي جعالي و خايفة خيل ما اعرف شتصرف

-خالد منو ؟

-هذا المتفق ويا ديار و ضام الجهال

-انطيني رقمه

-ليش

-انطيني و ما الج علاقة

اخذ رقم خالد .. و خابر عليه

..........
دك اتصال ، رفعته
خالد :- الوو

-انت خالد ؟

- نعم اني تفضل

-وياك الواء عصام محمد شلال ضابط جيش ، الاطفال اثار و اسامة وياك حاليا

-مفهمت الغاية من الاتصال شنو و اني شنو دوري حتى تتصل عليه

-اني صديق العائلة و حاب اساعدهم

-عفوا اخي اني ما اعرف شي عن الموضوع اعتذر منك ..

-اسمعني اجرتلهم بيت بالمنصور و راح اشتغل على حمايتهم اذا ما حاب تتأذى او احد يمسك سلمني الاطفال و اطلع منها ..

-وشلون اكدر اامن بيك ؟

-تكدر تسأل ام اسامة

خالد:- اذن تمهلني لحضات و ارجع اتصل بيك ..

-لا تتاخر

... قفلت الخط خابرت ام ديار كالتلي هذا رجال اثق بيه و سلمه جهالي

ما ترددت خابرت الرجال و كلت اله :- وين نلتقي ؟

حددلي مكان ... رحت جبت اسامة و اثار من بيت اختي و اخذتهم للمكان المحدد لكيته هو و سيارتين حماية واكفين

ما ارتاحيتله بس ما بيدي حيلة كلما جاي الخطر جاي يتقرب مني و هالشي مو بمصلحتي عندي اخوة و عائلة و اهل اذا ما اريد اخاف على نفسي اخاف عليهم

كلت اخلص من هالموضوع واسلم الاطفال و اطلع منها .. سلمت عليه و انطيته الجهال اسامة ظل يبجي و هو يكلي :- اخذني لديار

- لا تخاف حبيبي هو راح ياخذكم لديار

باوعت للرجال:- امانة الله تسلمهم لأمهم

عصام :-انت شتقربهم

-مو شغلك تعرف، شغلتك توصل الامانة ، يلا فيمالا

عفته و مشيت و اثار و و اسامة يبجون
ابتسمت بوجهم و طلعت ، اول ما حركت خابرت ام ديار :- الجهال صارو عد هذا اللي تعرفي بس اسألج يا ام ديار هذا ثاقة بيه ؟

-اي اي ثاقة نعم الله عليك

-ام ديار شكله مو راحه ديري بالج على الجهال

-عشتو يوصيني

قفلت الجهاز منها و كلت هسه اني شعليه بيهم و يضربهم وجع متعب گلبي بمشاكلهم شعدي

بفيت اسوق .. بس بالي ما راضي يقنع كلبي دم على ديار و هالجهال ذوله الي حظهم وكعهم بأيد هيج اب ارهابي و ام مو شريفة .. حكمتك يا ربي بهالقضية شنو ما اعرف

لفت السيارة و رجعت للبيت، صحت :- يمممممه

ضحى :- ها خاااالد شنو

-امي وين ؟

-كاعد تصلي

.. مشيت لغرفتها :- شنو هالتصرف يمه ؟

-اني سويت الصح ما اريدك تتورط

-طفل اني و تروحين تكولين لام ديار ابعدي بتج عن ابني ، شنو ما اعرف ابتعد ؟

-اني خفت عليك ..

-ومنو طالب منج تخافين علي تدرين انت الا شوي جان كلبتيها فوك راسي كلت الج لا تدخلين لو لا . رادت تحجي صرخت حجييييييييييييت لو لااااا

-لا تصرخ

-لا تدخلين بيا اسوي اللي اسوي محد لله علاقة و عناد بيكم الا ادخل اريد اشوف اليمنعني منوووووو

شربت الكرسي كبالي و طلعت ...

..........

ديار :- خالد سلم اخواني لعصام ومنتظرين صاحب امي يخابرنا .. ل٩ بالليل يلا خابر عصام كال

اني براس الفرع تعاي انت و البنية

امي سلمت على بيت عمي استغربوا طلعتها بس هي ما بررت الهم بس كالت الهم :- لازم اروح والله

امجد :- عوفي ديار يمنا لا تاخذيها من تأمنين حالج و ترتبين وضعج تعاي عليها ما عدنا شي

ميعاد:- عساك سالم يبعد عمري لا والله لازم اخذها بعد ما اامن عليها

ابو امجد :-ام ديار وضعكم ما يطمن صاير شي خوية ؟ اني ما رايد اضوجكم بكلمة و فتحت الكم بيتي و يبقى بيتكم و كت ما تجون هلا بيكم بس بصراحة يا ام ديار نشوفج انت و بتج تتلامزون اكو كلام تحجوه عن اسماعيل و بعدين تنكروه

هو شنو الصاير

-والله يا خوية انت ما قصرت و ضيفتنا و طالت الضيافة و فضلك فوك على راسي و ما انسالكياه طول العمر، ابو ديار اتورط صدك بشغل الارهاب و نخاف نحجي و نتأذى و اني ما اريد ازيدها عليكم و تتأذون هالاريد اطلع

-يعني ديار ما جذبت و احنا سگنا عليها و جذبناها

-لا والله خوية ما جذبت بس احنا مو حمل مشاكل و اني اخاف عليها و ما اريدها تتأذه جاي تشوف وضع العراق شلونه ديار منو و توكف بوجهم

-لا اله الا الله ابو ديار شسالفته رجال معدل وخوش ولد شغيره ؟

-حظنا بعد

-زين و الجهال ما خابروج عليهم ما عرفتي شي ما معقوله نسكت عليهم ؟

-عد اسماعيل و كال راح يجيبهم الي

-عده معقوله !! مو هو هنا سوا هوسه و خبصنا و يدور على جهالة

-والله يا ابو امجد قابل اني هينة عليه بهالعمر اطلك من ابو ديار لو ما سوالفه ، لو ضال ع العرك اشرفلنا
بس بهد ما اطيق العيشة وياه هددني ما اعترف عليه واجذب ديار و يرجعلي جهالي

واني جذبتها و هاي رايحة اخذهم و اشوفلي ديرة و ابتعد

-وين تروحين

-صديقة وياي زوجها لواء و اخذنا المشتمل مال بيتها و هالرايحة اله و بعد ما ادري شلون تدبر

-وين هذا البيت شلون راح تكعدون و انتم كل اثاث ما عدكم شكد ايجاره

- هي صديقتي و متنازله وياي عود لما يصير عدي الله كريم اشوف شلون تصفى

-انتظريني خوية دقايق

راح صعد الحجي ابو امجد دقايق و نزل بيده ٣٠٠ الف :- هاج خوية هاي خليها تحت ايدج جيبي التكدرين عليه من غراض طباخ دبة غاز دبروا اموركم و امانة الله و رسوله شتحتاجون تخابرون لو مالت بيكم الدنيا لا تترددين بيتي مفتوح الكم

-عساك سالم يالمعدل صاحب واجب و تعرف الاصول خجلتنا حيل بمواقفك و واكفاتك ويانا ما اعرف اشلون اجازيك والله بس ادعي الله يحفظك و يحفظ اهل بيتك من كل شر، استل ما شفت منا و مبري الذمة و علوا على عشرتكم يالطيبين

-هلا بيج ام اسامة بيتج و احنا اهلج كل الهلا بيج بكل وكت

.... سلمنا عليهم و مها تبجي حظنتني حيل و كالت:- لا تكطعين ولج والله ما ادري شلون راح افاركج و بعد ما تجيني عمت عيني

من كالت هيج حظنتها و بجيت حيل، اجا ابو امجد باس راسي :- بتي الحبابة لا تزعلين اليوم رزلتج هواي بس والله من خوفي عليك

حظنته وكمت ابجي ، امجد يضحك و يضرب على ظهري :- لا تبجين ولج، باعي ديار هذا موبايل عدي قديم خلي يمج و بيه سيمكارت و بيه يمكن دولار شوكت ما تضوجين رمشي على مها و احجن

هزيت راسي .. كلهم ودعتهم و طلعت الدموع ما فاركت خدي احس ابتعدت عن ناس من صدك جنت استند عليهم

ما يوم جعت اذا ما رحتلهم ولا يوم خفت اذا ما ضميت روحي يمهم بزايدتي و ناقصتي عدهم و اغلب ايام طفولتي جانت يمهم

طلعنا ع الشارع، ذاك الفرع مالتنا و هنا منا جبنا مرت ابو سلمان و شلون ولد المنطقة كلهم وياي و ساعدوني بشيلتها .. ضحكاتنا و صرخاتنا
هنا جنت اكعد ابجي و هنا جنت اكعد انتظر ..
هنا اتذكر من جنت طفلة وكعت و هنا تعاركت

امشي و اباوع على منطقتي شبر شبر و الدموع تجري بعيني ، جنت اامن بمنطقتي اكثر من بيتنا
ما فد.يوم ولد المنطقة تحرشوا ولا فد يوم استغلوني ..
جنت لما اكون بداخل بيتنا ميته من الخوف و من اطلع باب بيتنا اامن و افرح افتر بالشارع و اغير جو البيت الكاعد بيه ابوي

وكفتها :- ماما خل نروح نسلم على بيت اهل سلمان نسأل عنه و اودع رغد

-امشي مو وكت سوالفج

.. مشيت وراها و الدموع زادت و اني اتذكر سلمان المرعوص مدري عسه هو بيا حال بسببي

وصلنا ٣ سيارات .. سياارته و ٢ حماية
نزل لامي ضحك فتح الها الباب
اني صعدت ورا .. صعد ، گتله :- اخوتي وين ؟

-سبقوكم بالبيت

... درت وجهي عنه و بقى هو و امي يحجون

ديار :- باوعت للطريق و حجيت ويا روحي :- اي روحي شمنتظرج بعد و شراح تشوفين
هاي اني متوجهه ويا امي لحياة لا اعرفها و منطقة ما اندل بيها ولا اعرف احد يمي ..

زين لو طلع الاخس من ابوي وين اروح ؟
كبل جنت افتح باب البيت و اركض لعيال مها
بالجاي وين راح اروح ؟

... وصلنا البيت، نزلت من السيارة بسرعة ركضت للبيت فتحت الباب شفت اسامة كاعد بالطرمة و اثار يمه
فتحت الهم ادية واجو ركض اليه حظنتهم اثنينهم و كعدت بالكاع ابجي ما ادري من شوقي الهم من خوفي من الحال اللي صرنا بيه

باوعت اسامة لزمت وجهه و بقيت ابوس بيه بكصته بعيونه بحلكه بخدمه و احظن بيه :- مشتاقتلك حيل

-بعد لا تعوفيني ديار

-لا ما اعوفك وعد

فاتت امي ركضت لاثار حضنتها و دموعها جرو و تبوس بيها و فتحت ايدها لاسامة و هي شايلة اثار ،راح الها .. دنكت باسته و حظنته و ترجع تحظن بديار

بقينا قرابة الربع ساعة متحاضنين و نسأل بعض و نتباوس حجت ماما:- يلا يلا فوتو حتى نشوف البيت

... دخلنا اسامة يركض بالبيت ويباوع اثار صعدت الدرج و ما طول اسامه يصيح اااااالله حلو

اللوكية اثار وراه جنها ببغاء (ااااااالله هيلو ) .

اسامة :- ماما اني غرفتي هاي الجوا

الأم :- كلكم بيها

-لااا اريدها وحدي

ميعاد :- عوف الغرف تعال احجيلي منو اذاك منو حجه وياك

اسامة:- محد عمه بتول تحبنا يومية تجيبلنا حلويات و تسويلنا كاستر وكيكة

... بقت تحجي وياه و تتفقد حالة

ديار:- ماما كلش جوعانة

اسامة :- حتى اني ماما

اثار :- اني ماما اني

ديار:- اسكتي اللوگية لا تصرخين البيت فارغ

ميعاد :- لا هيج ويا اختج ديار اكعدو هنا خلي اطلع اشوف اكو محل مفتح ولو هسه الساعة ب١١ ونص

... اخذت ديار و طلعت من البيت تجيلنا اكل و اني و اسامة بقينا بالبيت ننتظرها

شوية و انفتح الباب عبالنا ماما، طلع ولد غريب

-انت منو

-جبت الكم غطا

-و منو انت ؟ وليش هيج تطب للبيت بلا ما ادك الباب

-اني السايق مال السيد اللواء

-ديلا روح و بعد لا تدخل بكيفك فهمت

نظراته ما ارتاحيتلها يحجي بأبتسامة مو حلوة

شوية و اجت ماما جايبه النا لفات فلافل
ميعاد:- جبتلكم فلافل اكلو و نامو حتى باجر نكوم نغسل البيت و نشتريله غراض
وهسه منو يريد صاص و منو يريد عمبة ؟

....... اكلنا غسلنا فرشت النا، و نمنا .. اني بقيت صافنة بالسكف و افكر اجيبها منا و احطها هنا ..

باوعت امي و اخواني كلهم نامو ، انسحبت من فراشي على كيف اخذت موبايلي و طلعت، كعدت بالكراج و رمشت على خالد

مرتين تلث ترميشات ماكو .. عفت بعد ما رمشت

.....
خالد:- اول يوم مرجع بيه ضحى، وصعدت من امي تعبان ، هي بدلت و جملت و كعدت يمي تنوم بالبنات واني اشرب جكاير تالي عفت من ايدي و كلت خل اكسر الزعل و نرجع اني و مرتي

متمدد اشرب جكاير هي تباوعلي، طفيت الجكارة ابتسمتلها و غمزت ، هي اجتني ...
بعدني وياها .. الموبايل كل شويه يرمش
ضحى تضايقت .. نامت بصفي :- منو هاية اللي كل شوية ترمش

اني مغمض عيوني ، فتحت الها تك عين :- شو هايه ؟ شمدريج بيها بنية ليش ما ولد

-يا ولد هذا اليتصل بهالليل

-انت بعدج تشكين

-رقم غريب ب١ ونص بالليل كل شويه يرمش على موبايل زوجي و ما تريد الفار يلعب بعبي

-نامي و عوفي الموبايل

-ما تريدني اشك خابر و افتح سبيكر كبالي

-هسه تصالحنا

-يكول حرامي لا تصير من القاضي لا تخاف هسه انت مو ما عندك شي ليش رافض تعرف منوو

.. شلت راسي بتنرفز من كلامها سحبت الجهاز بعصبية و هاي راح اتصل حتى تتاكدين ، خابرت .. دك اول دكه اجا الرد :- الوو

خالد :- سمعتها صوت بنية ضحى كامت من الفراش بسرعة ضاجت ، كملت :- منو ؟

-ديار هذا رقمي الجديد

-ها ديار كولي

-نايم مو اسفه والله بعد ما اتصل
قفلت الخط باوعت :- شأسفة هو انت خبطتيها فوك جوه

كمت من فراشي اخذت ملابسي، وحجيت وياها :- مستمرة بالشك ؟

-لا تذبحني انت كل الزين تعرف ديار مخليه عينها عليك والا شنو معناها اتصالها هذا بنصاص اليالي ؟

-مو كل بنية احجي وياها معناها احبها

-بس هي تحبك و النسوان حيالة الف حيلة و حيلة يفوتن بيها ع الرياجيل ويغيرن حاله و يخلنه يحبهن و انتم شلون گلوب عليكم فنادق

-اني نازل اشرب جكارة جوة

-ليش ما تكول نازل اكمل اتصالي جوة

-اي زين فهمتيها و سهلتيها عليه، نامي لا تنتظريني

طلعت برا البيت كعدت بسيارتي و خابرت على ديار ، ردت :- الو

:- هلا ديار شلونج

-هلو خالد كعدتك من النوم صحيح ؟

-لا هو اصلا كاعدين

-اووو نسيت انت رجعت مرتك اني اسفه والله نسيت ارجع ارجع باجر نحجي

-هي خربت بعد، عوفج .. احجيلي بالي مشغةل كلش هذا الضابط المدري شنو كلش ما ارتاحيتله اليوم

- ولا اني

-شنو قضيته

-يحب امي

-عفية امج ما توفر احد ......سكتت حسيتها خجلت من امها لان حجيت عيج غيرت الموضوع

-ابوج شلون طلع

-عصام يكول لازم وراه قوة متنفذة هربته قبل لا الشرطة تحقق وياه

-بس مو هيج تسجنه الظهر يطلع العصر حتى بالافلام ما صايرة عفيه بلد صاير تفصيخ، وين كعدتوا هسه انتو

-بالمنصور

-العب ومنيلها امج بيت بالمنصور ... قبل لا تحجي سبقتها .. الضابط مو ؟

-اي

-ايجار البيت شكد

-٨٠٠

-شوية لازم صغير البيت

-اي كلش صغير بس نظيف حيل وكال الهم هماتين باجر اجيب غراض للبيت و يأثثه الها

-ماكو رجال ينطي هيج الا و رايد مقابل هذا شرايد من امج بيوم واحد يدفع ايجار ٨٠٠ و اثاث الله اعلم بيش .. خليها ابالج هذا ابراسه شغله و اذا ما مشيتو مثل ما يحب يحطكم بالباب، و ساعتها انتو و الشارع

-ما ادري

-اخوانج شلونهم ..

-زينين

-يومية اروحلهم و اكعد وياهم تعودت عليهم

-من يكعدون اخليهم يحجون وياك

-انت وين

-جوا كاعد بسيارتي

-ومرتك

-بالغرفة

-اني راح اروح انام

-لا تنسين طمنيني عليج كل فترة ماشي

-اني استحي كل مرة اخابرك خاف اسببلك مشاكل

-ما دام ما عندي شي وياج هاهيه تبقى اليصدكني و ما يصدكني مشكلته يلا روحي نامي هل اصعد اصالحها لا انكتل اليوم

-هههههههه تكتلك

-بالجفجير وين اليوجعني بس شسوي متحمل على مود جهالي اخاف اطلكني و اضيع

-ههههههههههه

-روحي نامي لا تضحكين يلا

... قفلت الخط منه ... و الضحكة على شفافي بسببه
رحت لفراشي غمضت و اني اتخيل روحي وياه بأحلى عالم، يمكن ما نمت الا وجه الصبح

ثاني يوم امي كوة تشيل بيه من الفراش لحد ما دفرتني و نكثتني من فراشي وخلتني بالكاع و جابت الصوندة تغسل الغرفة و اني بنصها انجبرت اكوم

غسلت البيت وياها ل١١ اجا عليها السايق مال الضابط وراحت طلبت اثاث للبيت .

تخم لااستقبال و شاشة جبيرة وزولية و غرفة نوم بيضه الها و كنتور و سريرين النا .. و فراشات و كاومتر و طباخ و عمال كومة اجو يكعدون الغراض ابكانها ..

لليل البيت تام ما ناقص اي شي ..
شي جديد و بيت نظيف و راقي بس خايفة حيل حاسه هذا كله راح ندفع ثمنا احنا و شنو الثمن الله اعلم

امي فرحانة و منطلقة حتى طلعت تجيبلنا عشا دجاج مشوي من المطعم بمناسبة هالبيت و جابت بسبسي وياه و مقبلات .. وكعدنا نتعشى

دك موبايلها ، باوع :- عشتو هذا عمج متصل هسه

-شرايد ؟

-شمدريني خل ارد و اشوف

ميعاد :-الوو

عماد :- الو شلونج ميعاد

ميعاد :- هلا عماد بعد وكت لو مأجل مخابرتك لفد اسبوع مو احسن

-تونا درينا بالسالفة نشم كفا ايدنا ما خابرتي

-اخوك طلكني اخابركم ليش ، بس انتو عمام الجهال المفروض منكم تبادرون لو مو غريبه عليكم

-احجيلنا بالمفيد، صدك ديار مبلغة على اسماعيل ؟

-هذا الهامكم ما هامكم اخوكم شنو و شسوا بينا ؟

-والله ما عمى على اخوي الا انت و بتج المشوهه بس صوج اسماعيل الما ذبحها شني البت و تفك حلكها و تروح مراكز و تشتكي على ابوها ومحد يحاجيها هه بعد.شيصير بينا

-والله اليزرع يحصد و هذا الزرعه سماعيل بجهاله خلصها وياهم خوف بكتل برعب ما فد يوم كعد وياهم وحجى مصاحب بطل العرك و عشتو هسه عاف العرك لزم سبحة و صار ارهابي

عماد :- اسمعييي لا اطولين حجي ما دامج اطلكتي وليداتنا ترد النا و انت الله وياج

-وليداتكم منو جهالي، هه شايف نجوم السما ؟ اقربلكم من جهالي

-احنا نحظر عمامنا و نشوف ياهو اليخليهم عندج

-والله انت و عمامك قندرة بصف قندرة ما تحركون شعره من راسي كوم لك والله وعماد كام يطلع اله صوت ويهدد ولي يلا...

قفلت الخط
ديار :- شرايد هذا ؟

-رايدكم فوك شينة كوات عينه ؟فوك ما نكلبت الدنيا و محد بيهم بين ، جاي هسه يكول زين ما ذبحها شني البت و تفك حلكها هالمخلف لا ويريدكم

من جنت اشتغل و اخوه يسكر و ينام يكولون شبيها ما بيها شي مرة تساعد رجلها ، و من اتعارك و اعيره يحدون سنونهم عليه و شيخلصني منهم و كل ما جبت بنية كالو جابت كليعة خطية اخونا ما جابتله غير العار
هسه حنين ورايد ولد اخوه هالعار ابن العار

ديار :- هم من يومهم هيج مو جديدة حتى نضوج لو نتحسف عليهم هو ابوي شلونه حتى اهله ما ادري انت وين لكيتي هالملة و اتزوجتي ابوي

-وين لكيته يمعوده عمري ١٣ سنة من زوجني اخوي الجبير اله، جان صاحبة و سكير مثله ، واني ما افتهم ابوي ميت و امي فقيرة لا تهش ولا تنش ..

-زين خالتي سعاد ليش ما تجيج لا فد يوم سألت عليج لا انت تروحيلها ولا كأنو عندج اخت

-خالتج رجلها جان ساقط كعيدي ويا اهلي و من اروح لاهلي ابات .. يكوم يدور ختلات و يتغمز ..

- شسوا ؟

-جنت نايمة عد اهلي جانت وكتها عدي بس انهار و اجي على مود امي ، و هذا ما يوفرله فرصة .. كام يتحارش و اني ابعد بيه فاتت علينا و شهرتنا اختي تتحارش برجلي و هو يكلهم :- اني اكلها عيب و ما يصير و انت مثل اختي

-و صدكوها ؟

-اختي جانت تشتغل و عدها فلوس و اخوتي مستفادين بيها هي و رجلها و هي ما تريد تخسر رجلها .. كسرت بيه و صدكوها و صدكوه .. كلت الهم بالعافية عليكم لا انتم اهلي ولا اني بتكم و تبريت منهم

ما شفتهم بس بفاتحة امي الله يرحمها و من يومهة محد سأل عني و لا كالو شمحتاجة

دنحجي متمددين بفراشاتنا و هي تسولف ويانه ، سمعت الباب تندك :- ابقوا هنا لا اطلعون نامو يلا

... اخواني كل واحد بسريره، اثار تنام بسريري ..
ما اطمنت كعدت، فتحت الباب و طلعت

شفت الضابط اجا ، طلعت :- ها ماما

-فوتي جوا حبيبتي

-شعنده عمو جاي

-ما الج علاقة فوتي

-لو هذا بيتك و هاي زوجتك تقبل يفوت عليهم واحد مثلك بهالوقت ؟

ميعاد:- ديااااار اتادبي و فوتي جوا

-لا ما افوت هذا مو ملهى و غصبا عنه يحترم وكت اللي يتزوج عود يجي ويكعد هنا ما عدنا مانع

ميعاد:- فوتي جوا جاي اكلج سحبتني

ما قبلت ، صحت :- ناقص غيرة و عرض لو بيك حظ ما تدخل على بيوت العالم بهيح وقت يا عااار

هو كام من مكانه اني وكفت كباله :- لخاطري تعرفها شنو حالتها لا تاخذ على خاطرك

-ما اسويلها شي بس عوفيني احجي وياها
تقربلي ، وكفت بوجهه:- اني اكول لو نصير اصحاب افضل

-ما اصاحب عار شتريد

- اني اشوف تروحين يم ابوج افضل لان اني وياج ما تفاهمنا

-و انت شنو و جاي تتفاهم

ميعاد :- ديار كافي فوتي جوا

-ما افوت الا يطلع

سحبتني امي حيل من ملابسي ودخلتني بالغرفة و دخلت وياي وسدت الباب :- والله اذا سمعتج تحجين وياه بعد الا اعدمج

-راضية بعيشته وبذلته ليش اصلا هذا البيت و هالأثاث كله ما خاش بعقلي جاي تقبلين منه و تسلميله اركابنا ليش ؟

-ما الج علاقة انت مثل ما جنتي تسكتين ابيت ابوج هنا نفس الحالة تشوفين و تسكتين حلكج ما تفكي افتهمتي وهسه طالعة قسما يا ديار لو طلعتي والله ابتلي بيج

... طلعت و خلتني الوب بالغرفة
اسامة و اثار وكفوا يمي يريدون يعرفون شكو
طفيت الضوا و كلت الهم نامو يلا ارجعو لاسرتكم بسرعة

فتحت الباب اريد اطلع تراجعت لما شفته كاعد على التخم و هي كاعدة بنص رجليه و تفتح بقميصه و تمشي اديها على صدره و تكوله

-لتخلي ابالك ولا تضوج نفسك

-ولج اني من اشوفج انسى نفسي

-هههههههههههههههي

-بعد ما اتحمل

بمياعة :- لا ميصير لازم نتزوج

عصام:- ما يصير نتزوج الا تخلصين عدة و اني ما اكدر انتظر كل هاي المدة، افهميني جاي اتعذب
دنك يشم بصدرها ويمشي ايده على جسمها
سديت الباب عنهم لعبت نفسي ومدري شصار بيه ..

جسمي صخن وعقلي تشوش ، رجعت اباوع عليهم ..

ميعاد :- مو هنا امشي نصعد فوك ادلعك لا يجي احد من الجهال

-وكت الاجي هنا جهالج اريدج تقفلين الباب عليهم ، ما اريد اتقيد اجرت هذا البيت حتى اخذ راحتي بيج بكل قطعة بيه ، فهمتي
يحجي و يبوس بزندها و اديه تمشي على جسمها
ما تحملت اني سديت الباب و قفلته علينه .. وبقيت يم اخواني اخاف احد منهم يطلع ويشوف امي ...

بقيت ادور بالغرفة و احس اختنكت ..
بيت من ذهب احسه حبس على انفاسي لو باقية على ابوي يمكن احسن ..

اخذت الموبايل ردت اخابر مها ، بس شحجيلها ما اكدر افضفض و احجي هيج موضوع .. دكيت رقم خالد ..
ردت اخابر و تراجعت حتى خالد ما اخابره

اروح اسويله مشاكل كافي السواه وياي ما ازيد عليه ، بقيت بمكاني حاطة ادية بين رجلية و افكاري ادور بيه

اخر شي ما تحملت ، فتحت الباب و طلعت لكيتهم ماكو، مشيت ع الدرج سمعتهم اصواتهم تقزز
كزبر جسمي

كعدت على الدرج كمت ابجي :- ربي شذنبي اني و اتحمل كل ذوله ربي ساعدني فدوة ما اعرف وين اروح ولا اندل و اطلع .. انت ساعدني

نزلت جوا .. محفظته و الموبايل و السلاح مالته ، باوعت محفظته ، مليانه ورق دولار و فلوس عراقية حمر و خضر .. عفتها

اخذت موبايله ، بحوشت بيه العرفته العائلة هي زوجته لأن دازتله رساله ( من تجي جيب النا وياك بقلاوة)
ورسائل هواية توضح ان هي هاية زوجته

اتصلت بيها اول دكتين ردت :- هلا عصام

ديار:- عصام نايم ويا صاحبته فوك لو بيج خير تفتحين عيونج على رجلج مو نايمة ورجليج بالشمس

-منو انت ؟ احجي الوووو

سديت الخط، قفلته، رجعت اتصلت و الرنة عالية ما اعرف منين اسكته نطيتها الغاء، ردت تتصل .. خليت الموبايل جوا المخدة مال التخم صار ناصي

اخذت السلاح مالته و المحفظة احتاريت وين اوديهم طلعت للكراج خليتهم جوا المغسلة و شغلت المي
ودخلت جوا ... يم اخواني قفلت الباب

باوعت موبايلي طلع خالد مخابر عليه مرة وحدة ..
رمشتله .. خابرني

ديار:- هلو خالد

-هلو ديار شلونج

-زينة

-شصار ما صار بشريني باول يوم الكم بالبيت

-عسى لا كعدنا بيه

-خير

-انت وين

-هم رجعت كالتلي انت وين ادري امي ابوية تساليني عن مكاني

-لا مو اخاف يم زوجتك و تصيرلك مشاكل

- لا تخافين و احجيلي شكو ؟

- مثل متوقعت مسوي البيت اله فالتو .. وهسه هم فوك

-وشسويتي

-شسويت يعني ؟ شبيدي .. بس خابرت زوجته و كتلها رجلج نايم هسه يم صاحبته

-لا يربج

-اي والله هرتني مكالمات خليت الموبايل جوا التخم

-نعلعلا غيرتج هاي سواية هههههههه

-مو بس هاي

-بعد مصايب ههههههههههههههههههه كولي

-سلاحه و المحفظة خليتهم جوا المغسله جاي تجري عليهم هسه

ضحك ضحكة طويله يريد يطلع الكلمة ما يكدر اختنك:- راح انفضح من وراج ههههههههههه
طلع برا و هو بالربع ساعة ميت ضحك و يكول :- روح بيها سيادة اللواء شابع ماح و السلاح راح هههههههه

-هسه عوف الضحك كلي شسوي

- ولج كولي شنو الماسويتي كرعتي راس الرجال خربتي بيته وسلاحه و ضيعتي فلوسه بعد بس شغله ما سويتيها

-شنو هي ؟

-ما حجزتيله مكان بالمكبرة
وطكها ضحكة

ضحكت :- احجي صدك شبيك والله

-والله يا ديار اني ابالي احجي و اخاف تاخذيها بغير قصد

-شنو ؟

-اني مستعد اخلصج من امج و ابوج و من كل هذا العايشة بيه لو اطاوعيني

-شلون ؟

دا احجي و سمعت صياح عصام :- ميعاااااااااااااد

خالد:- شنو هذا الصوت ؟

- كعد البغل بس لا اكتشف ؟

-ولج انت مشغله المي حتى لو ما يدور صوت المي يصيحله

-اندكت الباب علينا حيل و هو يصرخ

بفشار :- بنت *** اليوم اصلبج اطلعي
وكفت امي كباله تهدي بيه و هو صار اعصاب نار عفت خالد ع الخط و استمع للباب

طبوا الحماية مالته كال الهم قلعوا الباب و طلعوها الية ، اني وكفت يم الباب و ادفع بيه خاف احد يفوت اثار تبجي ، اسامه كاعد من النوم مرعوب ولازم الباب وياي

مدري شلون شالو الباب و حطو على صفحة ، و واحد من حمايته لزمني من شعري و امي لزمتني و جرتني وراها و صارت بيني و بين الحماية

وتكوله (ابوس ايدك ابوس رجلك دخيلك والله مريضة )

:- لا تتوسلين بيه خلي يولي هذاااا العار لا تتوسلييين

لزمني من ركبتي :- توكفين بوجهي ولج

جرتني امي من عنده و تصرخ و اسامة و اثار يبجون ولازمين بامي ، جرته من عندي و كالتله :- اني خسارة كلشي بس لا تأذيها ابوس ايدك

كام من مكانه اشر للحماية مالته يطلعون .. وكال الها :- كدامج ١٢ ساعة بالضبط لو تودين هذه المريضة لابوها لو تاخذين جهالج واطلعين من البيت فورا ......يتبع

☆☆☆☆☆