ساكته.. ومتجرعه المر من وراك

وتستكثر عليه لو طلعت واشتغلت بره وتناسيت اهاتي واوجاعي اللي انته سببهن ..

بقيت احجي وابجي واصيح.. الى ان كعدت بالكاع وخليت راسي بين رجليه وابجي.. اجه دنك عليه.. كال اسف والله.. احبج لج والله شبيج

كتله وخر لخاطر الله كافي جذب.. كال تره حته لو لعبت ويه هاي وذيج.. تاليتي ارجع للبيت ومقري ومستقري حظنج وحظن بنتي

كتله اريد اشتغل.. كال براحتج اذا هلشي يحسن نفسيتج.. ما عندي اي اشكال.. كتله اريد اروح للسوك

كال بعيني كومي بدلي.. كمت بدلت واخذني للسوك.. رحت لمحله اخذت اشكال والوان الملابس يمكن صفيته علي ايدي هههه

اباوعله ما حجه.. كتله اريد غير مستلزمات من السوك.. كال اي يله امشي.. كتله ابقى انته هنا وخلي يمك مريومه واني اروح اشتري وارجع بساع

كال ٱפگـيہ يله روحي.. رحت خربتها اكسسوارات وجنط ومكياج وعدسات واحذيه ما بقيت شي بنفسي ..من كأابتي كمت اطلع ضيمي بهشغلات

رجعت ضحك كال الله يساعدج.. شكو شكد مشتريه.. كتله عاجبني.. كال عمي بكيفج.. مدام عاجبج

رجعنه للبيت.. نمت بالكاع تقرب يمي كال تعالي نامي يمي.. كتله ما اريد.. كال خلاص والله بعد ما اسوي شي يضوجج..

تره ميصير هيج.. اشوفج تتمشين كدامي بالثوب الخفيف لو البرموده واباوع واتحسر انتي مرتي والي حق عليج

كتله انته كل همك حاجتك.. كال اي.. كتله تعترف.. كال اي اني رجال شهواني اريد مو بيدي

ما منعته وكمت يمه.. وتقريبا رجعت علاقتي بيه شويه.. رغم اشوف مراسلاته ويه مرت التاجر وحتى يروح لبيتها ينام وياها

لكن صبرت وتحملت شسوي اخاف من خطوة الطلاق واني ما الي احد.. ومدام يجي للبيت وتصرفاته حلوه وياي ويغازلني ويدور رضاي

حاولت اقتنع بيه.. كمت اداوم بالروضه وكولش مرتاحت بالشغل.. يوديني هوه ويرجعني هوه

اداوم ب8 وارجع ب1 احس نفسيتي تحسنت احسن من اول.. ما افكر بخيانته هواي.. اجي تعبانه من هوسة الاطفال انام.. وهوه زين وياي وصاير يدور رضاي

فد يوم وصلني يحيى للروضه وجنت ناسيه جنطتي بالبيت

وما تذكرتها غير بالحظانه وملابس وحفاظات مريم بيها و وموبايلي.. حاولت اخابر يحيى يجيبلياهن.. لكيته خارج النطاق جهازه..

بقيت ساعه واخذت اذن من المديره ورجعت للبيت.. فتحت الباب واسمع صوت ضحكه واهات مال وحده استغفر الله ساقطه..

تكول كاعده بفلم اباحي مو بيت من الضحك والصريخ.. اعتقدت صوت التلفزيون

دخلت الصاله ماكو التلفزيون مطفي.. الصوت اسمعه من غرفتي فتحته واشوف يحيى ويه مرت التاجر وعلى سريري

وثنينهم عريانين.. وهيه صايره فوكاه.. بقيت واكفه مصدومه.. كمزو من شافوني صرخت يا حقيييييييير
يا كلللللللللللب

لبس ملابسه بساع واجاني يسد بحلكي واني كمت اصرخ واعيط بعلو صوتي.. نزعت حذائي وعلى وجها ضربته..

راد يضربيني دفعته بكل قوتي كومته بالكاع ولزمت هاي الساقطه من شعرها بكل حركة كلب يمكن نص شعرها اجه بأيدي

ما اعرف منين اجتني هلقوه بحيث يريد يخلصها من ايدي ما يكدر دميت وجها خراميش..

اخر شي جرها من ايدي بصعوبه.. هيه اخذت ملابسها وركضت.. كتله انته النعال هواي عليك اضربك بيه اطلع من بيتي.. كال بس افتهمي

كتله اطللللللللللللللللللللع.. كال ابوس ايدج حبيبي والله غلطه كتله امشييييي ما اريد اسمع صوتك اطلع

طلعته من البيت وشمرت غراضه وراه.. وسديت الباب.. وبقيت ابجي ابجي بحركه ولازمه كلبي من الوجع ..

اخذت جنطتي ورحت كبل للمحكمه قدمت دعوة طلاق.. جانت الساعه 10 الصبح

رجعت الحظانه كملت اليوم بكل وجع ما كلت لاحد هيج صار بيه.. اجت امه وره يومين. واصلهم طلب الطلاق

توسلت.. كتلها يمه انتي غاليه عليه.. لا تتوسلين.. الله ما خلقني مره علمود يكسرني رجال.. ولا اعيش علرجال

كادره اعيش الوحدي واربي بنتي احسن تربيه.. كالت خطيه وبنتج.. كتلها بنتي اذا تضل تحت هيج اب شتطلع

ما اريد ارجع خلص يحيى انتهى من حياتي.. راحت وره يومين بليل نايمه تقريبا الساعه 11

ودخل يحيى.. كمت اصيح واضرب بيه واكله اطلع من بيتي.. كال اريدج والله ما الكه مثلج.. كتله ولا راح تلكه.. لان الله كالها الخبيثون للخبيثات

وانته رجل خبيث وصخ وضيع.. مترهملي رجال.. ولو اشك انته رجل لان الرجال افعال مو ذكور

حتى الحمار ذكر وانته حالك حال الحيوان متهمك غير غريزتك.. بقى يتوسل ويبجي ابد ما نزلت دمعه من عيني كباله واحجي بكل تعجرف

خليت ينزل لرجلي يتوسل وما رديت وطردته بره وطلعته.. حظرت جلسة الطلاق وقدمت المحادثات مالته والخيانه للقاضي وطلقني منه

جنت احس بفرح ممزوج بغصه.. هذا اللي دمرت حياتي علموده.. هذا اللي خسرت امي من وراه..

هذا اللي اتحملت انواع الاهانات بسبب.. تركته بس اكو غصه ووجع مجاي يروح لليوم منضره وهوه عريان وياها يدك بعقلي

احس مكتفيت بالطلاق ما طفى ناري .. رحت بحثت على اسم التاجر اليشتغل عنده وحصلت رقمه

خابرته.. كال الو منو وياي.. كتله حي الله بنت كسرها الزمن والسبب من وراكم.. كال شبيج بابا مخرفه

كتله لا اني

ممخرفه.. بس انته نايم ورجليك بالشمس.. كال شنو قصدج.. كتله التقيك باجر بكذا مكان واكولك شنو قصدي

كال ماشي التقيج واشوف شلون نايم ورجليه بالشمس.. سديته منه.. ورحت نمت

ثاني يوم جانت يوم جمعه عطله.. بدلت ورحت.. كاعده بالمطعم خابرته كال متوجه للمكان اللي انتي بيه بس شنو لابسه

كتله بنطرون ابيض وقميص اصفر.. كال ٱפگـيہ كعدت اوكل بمريم.. دقايق ووكف على راسي رجال

تقريبا عمره ب40 انيق شكله وهيبه وشعره شوي بيه شيب.. لكن مصفط وبكامل اناقته ونضاراته

كال اني جعفر انتي صاحبة الاتصال كتله اي اهلا تفضل.. كال بسرعه اذا ممكن وقتي ثمين.. كتله لو سمعت الكلام اللي راح اكوله

محتحس عندك وقت.. كال لا تزيدين بالكلام دا اسمعج.. كولي.. كتله بشرط تسمعني للاخير

كال انشالله.. طلعتله صوره بموبايلي.. كتله هذي مرتك.. عقد حاجبه.. كال شتسوي صورها عندج..

كتله مو عندي.. هذا حساب زوجي وهاك استلم محادثاتها وياه.. قراها وجها صار احمر دم من الغضب

محادثات وهيه تحجي وياه صوت ويمارسون عبر الجهاز بصمه وهيه تفشر وتتماوع بكلامها.

باوعلي.. وعيونه نار.. راد يكوم.. كتله انته وعدتني تسمعني للاخير.. هذا ولا شي كدام اللي راح اكوله الك هست

كال احجي بسرعه.. وهوه يتنفس حيل.. كتله يمكن اجتك قبل كم اسبوع وجها بيه خراميش ومدمه..

هذي كانت خراميشي لكيتها ويه زوجي علي فراشي عريانين وفهمك كفايه..

ضرب الطاوله بكل غضب وكام.. راد يمشي.. فرت الدنيا بيه وكع وتخربط.. شالوه ثنين ولد ونقلوه للمستشفى

تبعته للمستشفى خطيه جلطت الرجال.. الدكتور كال ارتفاع بالضغط وانهيار عصبي..

لساعتين كعد.. كتله صحتك اهم منها لا تخسر صحتك عشانها.. كام ومهتملي..

عفته ورجعت للبيت.. خابرت ام يحيى ما اعرف ليش خفت على هلكلب.. بس يكولون العشره متهون على بن الحلال وما هانلي يموت بسببي

.. كتلها يوم تره زوج البنت اللي خاني وياها يحيى صار عنده علم بخيانتهم.. بقت تلطم وتصيح.. هزا بعينك يحيى.. قفلت الخط

ما اعرف بعد ما سمعت اخبارهم.. التهيت بحالي وبنتي بس كلما اباوع البيت واتذكره ابجي

بعدين عرفت الرجال هاد على بيت اهل يحيى وهوه طالع واهله متبرين منه .. وكايليله طلع تهريب لالمانيا

مهتميت عسى نارهم تاكل حطبهم..

مرت اسبوعين.. تقريبا كدرت امحي شي اسمه يحيى من حياتي.. متمدده علموبايل الساعه 11 بليل

واجاني اتصال.. باوعت مكتوب التاجر جعفر.. مسيفته قبل عندي رقمه وبقى بجهازي نسيت احذفه

فتحت.. خط وكلت الو.. كال تعبت.. حبيتها هواي وخانتني ..سكتت بقيت بس اسمع.. بقى يحجي ومهموم ومختنك

كال مو من ديني.. من غير ديانه.. عاندت اهلي واتزوجتها.. وامي ماتت وهيه غاضبه عليه لان اخذتها

جانت تتمنه تاخذلي بنت على كولتها منا وبينا.. بس اني عاندت لو هيه لو ما اريد.. واخذتها وعزلت عن اهلي بنيتلها بيت مثل القصر

انطيتها شنو املك.. جنت اعشقها.. حتى ما كانت ما تخلف و افتريت الدنيا بيها على علاجها لان كالولي اكو امل تحمل.. جنت اتمنى يصير عندي طفل منها

تحملت كل هذا وكل حجي الناس من حبي الها فهميني ليش خانتني..

كتله لان مو مستواك.. كال شنو غلطي.. كتله الزانية لا ينكحها الا زاني.. وهمه يلوكون لبعض

كال كتلتها بأيدي وباوعت بعيني شلون الدم جره من راسها وبدي اكلها.. بس ما احس براحه ..روحي دتحترك

كتله متستاهل.. تحرك روحك على شخص جان يهين باسمك وبشرفك.. هيج ناس ما تستحق الرحمه

كال شلون كدرتي تتحملين.. اني راح اتخبل.. ضحكت هههههه.. كتله.. تعودت خاني هواااي وصارت خيانته تاكل وتشرب ويايه كل يوم

كال ليش تحملتي.. كتله لان بكل بساطه يتيمه ومقطوعه من شجره.. عندي اخت وحده حتى من سمعت بطلاقي ما اجتني ولا كلفت نفسها

كال الضاهر ما حبيتيه وكدرتي تنسيه..

ضحكت.. هههههه لو بس اكولك شنو سوه بيه كال شسوه

كتله حبيته بكل برائه وجان رايدني لغريزته.. وهمني انو يحبني وصدكته..

حاول يتقربلي بس خوفي من الله منعني اخليه يتقربلي.. خطبني.. واخذ اللي يريده مني جبر لكن بالحلال..

وتركني بعد ما اخذ مني اعز ما املك.. وكال بعد ما اريدج.. وراد يفصخ الخطوبه واني حامل منه

من سمعت امي باللي سواه ماتت اثر سكته قلبيه.. واني يتيمة اب.. صرت اتوسل بيه بس كون يسترني

وما رد عليه.. لحد ما فد يوم الله كسر خاطره عليه وخلاه يستر عليه.. رجعت حبيته وسامحته بكل برائه

جان يغلط واني اسامح جان يخون واني اسكت .. فقدني الثقه بنفسي.. كمت اشوف نفسي مو حلوه مثل البنات وصرت احس بنقص

طلع النقص مو بيه النقص منه لان هوه ذكر مو رجل فقط تهمه متعة نفسه.. الي ان لكيته ويه زوجتك

ساعتها انتفضت وشمرت حذائي بنص وجها وشمرت حبه ويه شمرت الحذاء طردته واطلقت منه وكدرت اخذ منه كامل حقوقي بالقانون

وهاي اني اليوم عايشه.. اني وبنتي بهدوء وراحة بال..

كال عفيه عليج.. بنت رجال.. كتله مو بنت رجل اني مرأه بنت مرأه قويه.. تحملت وفاة زوجها وكدرت تربينه لوحدها بدون حاجه لاحد

كال اريد

اصير مثلج.. ما اهتم ما افكر.. كتله انسى عندك قلب.. فقط خلي عقلك يسوقك

كال اشكرج فعلا ارتاحيت بأتصالج.. كتله ادلل

كال مع السلامه.. كتله الله وياك..

بعدها صار يدزلي ااشعار حزينه تعبر عن حالته.. وصرنه ندردش هوايه سوه

صارت بيناتنا صداقه.. يشاركني يومه وبالشغل وبالسفر يصور لحضاته ويدزلياها.. واني اشاركه يومي بالحظانه وبلحظاتي مع بنتي

مرت على صداقتنه 5 شهور كال براء اريدج اطيبيلي جروحي.. كتله يعني شنو.. كال تتزوجيني

انصدمت صراحه لان مجنت شايلتله اي مشاعر فقط صداقه.. نسيت اتعامل بكلبي مع احد من بعد يحيى قفلت كلبي ونسيت عندي كلب اصلا

كتله ما اعرف فاجئتني.. اني اعتبرك صديق.. كال اجمل حب لما يبدأ بصداقه.. كال والله اخليج اسعد انسانه بالحياة

كتله انطيني وقت افكر.. كال كل الوقت الج..

بقيت اسبوع افكر استشاريت صديقاتي اللي بالحظانه عليه.. ايدني اتزوجه..

باوعت اني مرأه وبالعراق وعندي بنت وما الي سند وان كنت قويه لكن ما اكدر اخلص حياتي لوحدي .. ما اخلص من حجي الناس

واني لا ام لا اب لا اخ لا اهل .. قررت انطي فرصه النفسي.. واقبل.. لاني اطلعت على حياته بالصغيره والجبيره

وكنه نلتقي.. ويعزمني على غداء بمكان عام.. فتعرفت علي حياته زين.. قررت اوافق عليه.. ودزيتله الموافقه..

وره اسبوع تقدم الخطبتي.. من خوالي اللي اصلا ولا سألو عليه ابد.. كالو مطلقه منتحمل مسؤليتج

ما اهتميتلهم.. خطبني منهم.. وسوينه حفله جنت طايره من الفرح وهوه يغازلني ونركص سوه ونوكل. كيك لبعض..

ونزلت صوره علفيس.. اني وياها بس مخليه ايدي على وجهي وراسي على كتفه..

خابرني يحيى.. يبجي كال ما اتحمل تصيرين لغيري.. كتله صرت وخلاص.. ولتخابر بعد..

كال اخذ بنتي.. كتله جرب طلع راسك هوه شلون متحلفلك.. وهاااا شكرا لأن خنتني ويه زوجته .. لو ما انته اني ما اتعرف على شخص راقي ومحترم مثل جعفر

بقى يصيح ويبجي.. سديت الخط.. وكسرته.. وغيرت خطي.. وسويتله بلوك من كل برامجي

اتزوجت جعفر وطلعنه اني وياها شهر عسل.. حسسني بأنوثتي.. هوه اكبر مني ومن دلعه اليه حسيت اني طفله بين اديه

حبيته واحترمته مثل ما هوه محترمني.. فعلا خلاني اسعد انسانه بالكون.. وجان شنو بنفسي يكولى تأمرين ملاكي.. هذا اسم دلعي بلسانه.. (ملاكي)

يعتبرني الملاك اللي خلصته من همومه وميعرف هوه الملاك اللي عوضني عن كل الامي واوجاعي وغربتي..

عشت اجمل لحظات حياتي معاه صح هوايه يسافر.. واموت من الاشتياق اله.. ولو كال اليوم اجي اطير من الفرح واتحظرله مثل العروس

واترس الدنيا ورد وشموع علمود اتلكاه وهوه جاي ومن يجي اكمز لحظنه مثل طفله تشوف ابوها..

فد مره جنه كاعدين بليل دنسولف لبعض وسألني على احلامي وامنياتي.. كتله جان حلمي واني زغيره اشوف باريس

ضحك كال بس.. كتله اي 😁 ضحك كال من عيوني بس هلاسبوعين اخلص الشغل البيدي وتدللين.. حبيبت كلبي تتمنى واني ما احققها.. شلووون

وفعلا اخذني لامنية حياتي باريس😍 واخذني جوه برج ايفل.. جنت طايره من الفرح بأيده وكل شوي ابوسه وهوه حاظني وعبالك راح اطير منه

همست بأذنه حياتي اني حامل.. ضحك وصرخ احببببببببببببج.. صارت الصرخه بوجه واحد انكليزي كالو وات باوعناله وضحكنه هههههههههه

وهاي اني اليوم عليه 8 اشهر من الحمل ومو كارهه نفسي.. بلعكس حابه بطني ومنتضره طفلي بفارغ الصبر

واباوع لنفسي بالمرايا واضحك وهوه يجي يحظني ويبوس ابطني.. جنت اختنك وابقى اسابيع ما اتقرب يمه.. واكول خطيه يسافر ويرجع واني تاركته

اتحظرله والبس واتقرب يمه واعتذر.. وهوه يكولي صدك تحجين.. اطلب حاجتي ليش.. لج اني لو بيدي اخذ الطفل من بطنج واشيل الحمل عنج اروح اصير ثقل فوك ثقل الحمل عليج

ياخذني الحضنه ويكولي حبيبي كولشي ما اريد بس ارتاحي وكوميلي بسلامه هذا يكفيني.. اباوعله واشكر ربي عليه

مريومه كبرت وصار عمرها سنتين ونص وجعفر طاير بيها وبجمالها وهيه تحبه وتكوله با با.. كل اسبوع تاخذها ام يحيى تبات عدهم يوم

علمود يخابر كامرا ويشوفها.. عمتي تكول بس يبجي من الغربه بالمانيا وخسارته لبنته واليه.. من يشوفها تفرفح روحه عليها.. بس هيه متعرفه وهذا الشي حيل اذاه

كالولي حامل بولد.. وجعفر طار من الفرح.. وقررنه نسمي.. احمد.. ادعولي اكوم بسلامه .. وادعو ربي لا يفرقنه عن بعض

ولهنا حبايبي تنتهي قصتي ب اهات الم من وجع ادم
..الرجال ممكن يكون شيء.. لكن ليس كل شيء .. اعقد محاج اكول العبره اكثر لان انتو فهمتوها و متأكده وصلتكم.. ياريت الكل ياخذ عبره منها ومن اخطائها.. وايضا الامهات تكون اكثر حرص على بناتهم من ما يسمى ب(الانترنت) ويراقبوهم لحتى يكدرون يحصنون حياتهم وتوجهون بناتكم بالطريق الصحيح..

اتمنى تكونوا استفدتو م̷ـــِْن القصه بكد ما استمتعتو بيها

حبي كله جذب 🤦‍♀💔
ومنتجات بوما شلع قلع موزينه واي وحده استعملتهن اشتكت منه
فماانصحج بي

#ملوكه

يي عيوني عادي..ان كان مغلق او مفتوح وشحنتي فماكو فرق🙃✨

#ملوكه

حبي كون تلتزمين بالغسول اليومي
واستعملي بالاسبوع مرتين اي خلطة من الخلطات اللي ناشرتهن واللي تناسب لبشرتج

واذا تخلين ميك-اب..فكون تثبتي بباودر او لوس باودر🌚🌺

#ملوكه

حبيبتي اني ادري بهالشي عادي يعني حتلو مصار تطابق بالدم او اختلاف
فهالشي ميمنع تكملون حياتكم
وكومة اعرف ناس..عدهم اختلافات بالدم و عادي اتزوجو وعايشين حياة سعيدة 🥰💜

بس الفرق اللي يصير انو قبل الحمل كون تضربون ابره..حته تحبلين ولاياثر عل الطفل وهاي حسب استشارة الطبيب

#ملوكه

عمري اني اعرف جماعة هم يعانون نفس الحالة تعرق زايد
فهاي سببه خربطه هرمونات🤦‍♀💔 اللي يفرز زيادة..
كون تراجعين دكتور مضبوط ويطيج ادوية لتنظيم هرمونات

#ملوكه

حبي اني منزله هالكيبورد كتنسيق وي خلفية 😅☺️ولونه هادئ

فانتي نزلي برنامج ..emoji keborad cute
ومنه نزلي الوان وثيمات كيبورات

#ملوكه