يمه ما تقبلين بعمار والله خوش ولد ودره.. كتلها خاله شايله فكرة الزواج هسه مو ابالي مصار هواي من اطلكت اريد ارتاح..

كالت متعبيج جانو.. كتلها الله موجود ونجاني ووالحمدلله على كل حال.. كالت فدوه يمه اريدج لوليدي.. ابتسمت.. سمعت ماما تصيح ورحت .

ساعه وطلع مازن لان حنته ويه الشباب ابيت اهله.. بس اهله النسوان بقو ويانه مكملين الحفله

.. رجعت بدلت وكفت اني ونجوي نركص وهيه تكولي سمر متتوقعين شكد فرحانه..

ابتسمت.. بس دموعي اتجمعت.. كالت يعمري والله مو قصدي اضايقج.. كتلها عوبه انتي تضايقيني بس فراكج صعب..

الغرفه تاكلني بوحشتها بدونج. حظنتني وبقت تبجي. كتلها ها ها هسه تكولين فرحانه لتضوجين نفسج عمودي.. معليج بيه..

كملنه الحفله.. وبدلت وكمنه علبيت غسل.. احس انتهيت.. حيلي نهد صعدت ب11 هلكانه من التعب وكفه من الصبح وركص وصوت الديجي وهوسه متت

دا انام.. كلت خل اخابر بكر. اسمع صوته قبل ما انام.. جريت الموبايل ولكيت 34 مكالمه من بكر.

كمزت من مكاني. اسم الله شصاير وياه وهيج مخابر.. خابرته بساع رد..

-سمر شنو هل مهزله

-لحظه بكر لتصيح شكو..

-شلون تقبلين يصوروج وانتي بالحنه تحجين صددددددددك ..

- بس لتصيح ..محد صور والله كلت لامي ما تخلي احد يصور

-لج هاي بموبايل امي .. واكفه تركصين ومصورتج وتشوفه لعادل تكله شوف شصارت وراك يل اغم..

-بكر والله ما خليت احد يصور.. هاي عمتي شلون صورت.. صورنه بس بكاميرة العرس الخاص بنجوى..

-وبعدين تعاااي صدك اركان خاطبج..

-منيلك هلحجي مخطبني..

-سمر لتجننيني.. خالتج كايله لامي نريدها لاركان..

-ما عندي علم بهلموضوع..

-مشتريلج الفستان هوه موووو..

-اهووو بكر والله تعبانه وحيلي مابيه.. حتى مابيه ابرر مهدوده من التعب فدوه غير مره وافهم..

-انتي الج خلك وحيل للكل من توصلين يمي ما بيج حيل موو. اوك روحي

-لحظه لحظه.. بكر لتسده بس كولي شنو التريده..

-اريدج انتي بس ما اريد تهتمين بغيري لج موتينيييييي..

-مهتمه بمنو بكر الله يشهد بعيوني ما اشوف غيرك لا اركان ولا عشره منه

لتكعد تعددلي ناس مماخذين جزء من تفكيري..

-تردين تقنعيني بس اني شاغل تفكيرج.. سمر هيه مال كلاوات.. يوم كامل ما رفعتي خط وحاجيتيني واني كل فكري بيج وانتي مو يمي..

-بكر تقتنع او متقتنع .. براحتك.. هذا العندي ودا اكوله الك.. نمت علمخده.. وهوه يزفره. ابتسمت وكلت شلون عصبيه تخبلني..

ما حجه.. يمه من يزعل يقفل.. ما رد.. بكررررر

-همممم ..

-تعبانه

-حقج من الركص عيني.. ذابه لحم بالفيديو..

-هههههه مو عيب تشوفه.. متخجل..

-ما شفته بس سمعت امي تحجي ويه عادل وتكله تعال شوف سمر شلون تركص جريته من ايدها..

لمحتج بالفيديو تركصين.. مسحته بدون ما اشوفه.. وكتلها محرم عليها بعد متستحين تشوفيها

- اموت عليك..

-جذابه واكبر حياله

- تدري كل الاحتاجه هسه شنو..

-شنو.. ؟؟؟

-اخلي راسي على كتفك وانسى العالم وارتاح

-اجيج..

-ويييين.. 😱

-للبيت

-علمود يثرمونه.

-جبانه..

-اكول سؤال بروح اهلك.. انته عقلك عايش بالعراق لو وين.. تفكيرك مو عراقي ابد

-ههههههه دروحي يابه روحي ارتاحي.. وهاااا احسابج بعدين..

-امووت على احسابك ههههه باااي

-ام لسان صايره اويلي منج اخخخ

-راح انام..

-نامي منو لازمج..

-متقفل خط..

-ما عاجبني

-رصيدك حرامات..

-ام فليس ما ماخذ من راتبج

-هههههه يا راتب غير كون اشوفه لربع الشهر ميبقى

-ما بيج حظ غيير

-وشسوي.. ما الحك..

-دروحي نامي يابه صوتج كوه يطلع..

-تعبانه

-افتهمت والله..

-عاابت

-ههههه باي

-بايات. قفلت الخط.. وباوعت لرقمه.. ياربي حتى رقمه اعشقه..

نمت ثاني يوم الساعه ب7 سبعه كعدت.. كتلها ماما شنو عمتي مصورتني واني اركص..

كالت لااا يمكن رنا.. شكيت بيها.. وكتلها خاله لا تصورين.. كالت لا جاي اصور نفسي..

وانتي شمدريج مصوريج.. غلست سويت روحي ما سمعت.. ورحت للحمام ركض..

انوب تريكنه.. وكملنه ورحت ويه نجوى للصالون.. لبست فستان عندي وردي بدايته كرستال والباقي تور..

حلوو واسع ومستور لان زواجهم بقاعه ومختلط.. ما اكدر البس براحتي.. نجوى طلعت تجنن.. عيوني موكفن من البجي عليها..

بس ما بينلها.. بس واضح بعيوني.. صارن حمر.. بس اكولها من العدسات موالمن عيوني..

اجينه للبيت وصفكنه وضحكنه.. وكلتها شوي خاف تجوع وهيه عروس تستحي.. وكلتها شوي شوي علمود لتخرب حمرتها..

للساعه 3 اجت الزفه.. اخذولنه سياره اني وامي وخالاتي وبيبي ومرت اركان بقت بالبيت حامل متكدر ..

اخذونه للتصوير صورنه وياهم شوي.. واساعد بنجوى بوضعيات التصوير كملنه طلعنه..

ولا كأني متزوجه قبل كل هلخطوات والشغلات مسولياها بعرسي من عادل.. عرس اسود صار عليه..

واصلا بعمري وياه ما حسيت اني متزوجه.. لان الزوج يداري مرته يصرف عليها يغار عليها.. هوه كل هاي ما سواها وياي...

توصيلة جامعه جان يتعاجز ياخذني يكعد بكر من الصبح كل يوم ياخذي.. كل هلذكريات مرت واني بزفة عرس

نجوى..

مو احسدها بس اكول شبيه حظي مو مثل البنات.. ماكو فرحه الي كملت.. لازم يطلع شخص بحياتي ينغص عليه

وصلنه للقاعه.. الدنيا مكلوبه. جماعة مازن واقرباءه ..ودي جي وهوسه هوسه الشباب هوستهم مو مثل البنات

عياطهم هالي وصوتهم خشن يدوخ.. امي ما تحملت. شويه وتخربطت.. رجعوها هيه وبيبي بسياره.. كالت امي ابقي ويه نجوى لتعوفيها.. خالاتج يمج را يبقن

كتلها روحي هاهيه

وكفت اخر الحفله واصفك بمكاني. لان بنات نزلن يركصن وشباب .. وهوسه.. بس نجوى كل شوي.. وصاحتلي واروحلها..

وكفت يمها.. مره من اهل العريس. كالت اليشوفج البارحه ميكول اليوم هاي انتي. شنو صفكي اركصي..

كتلها هناك بيتي والعب بيه. ما اكدر اركص كدام الناس استحي.. بس عود يفك مني مازن..

مشغلين شعر شعر ويهز جتف ويكولي هزي سمرمر هزي ههههه.. بس اني اصفك ما هزيت.. كلها شباب لو اموووت .

لشوي اجه ولد عرفني عليه مازن.. كال هذا ابن خالتي عمار.. ابتسمتله.. ما اعرفه عشنو يعرفني بيه.

واكفه اضحك واصفك ومندمجه بالجو.. جان اسمع صوت من وراي..بأذني يهمس

-احس الفرح ضحكات مخلوقه بس لخدودج.. التفتت هههههه....يتبع

🌺🌺🌺🌺🌺🌺

#حكاية_سمر

؛؛؛؛؛؛؛؛؛؛؛؛؛؛؛؛؛؛ بقلم الكاتبه زينب ماجد؛؛؛؛؛؛؛؛؛؛؛؛؛؛؛؛

البارت_12

واكفه اضحك واصفك ومندمجه بالجو.. جان اسمع صوت من وراي..بأذني يهمس

-احس الفرح ضحكات مخلوقه بس لخدودج.. التفتت .. خليت اديه على حلكي وضحكت ههههههه بكر شجابك..

اجت يمي نجوى غمزتلي.. كتلها شنو القصه.. كالت والله شفتج حزينه وماما راحت.. كلت لمازن يخابره يعزمه اذا يكدر يجي..

متوقعته يجي بهلسرعه. ..

بكر.. ههههه مو بالحيف اجيت طاير..

سمر.. هههه فرحت بيك هوايه والله اخذ بأيدي.. نزلت ايدي من ايده.. كتله خالاتي موجودات.. عيب..

-احبج هواااي والله

-اموووت عليك.. اباوعله ومدمعه من الفرح بيه. يرب شكد ارتاح من اشوفه كبالي.. احس كلبي بأمان يمه.

الشباب تركص والدنيا ملتمه.. خابرت ماما.. الجو هوسه وصوت..كتلها هااا ماما.. كالت سمر شنو بقيتي هناك.

-اي غير انتي كلتيلي ابقي ويه نجوى اوصلها للشقه مالتهم واجي اني وخالاتي

-يمه يا خالاتج.. ذن خالاتج اجن..

-شنو اجن.. لعد عفتوني وحدي.. اني منو يوصلني..

-يمه ما تحملن صوت الغنا عالي وشباب تركص تعرفين خالاتج يستحرمن من هيج اجواء واجن لكيتهن كدامي ..

ادزلج احمد..

-شدزيه يووم راح نزف نجوى ومازن فد شوي.. يله عود اخلي بكر يوصلني..

-شنو بكر تعاااي هنا شجابه..

-شمدريني عازمه مازن..

-سمر لا تلعبين وياي..

-يوم شلعب تردين ادزين احمد دزيه.. قابل ويه منو جايه استغفر الله غريب هوه غير ابن عمتي..

-خل اشوف احمد هسه احاجيه اوكفي..

-صعدت وهيه وياي علاتصال..اجه بكر.. اشرلي بيده هااا .. اشرتله اوكف.. كالت احمد ماموجود..

اخابره وارجعلج خبر..

-اوك متانيتج.. سديته..

-شنو القصه

-خالاتي راجعات وعايفاتني وحدي هنا..

-اييييي هم زين

-😒😒

-شبيج عندي شغله اريد اشوفها الج.

-شنو هيه..

-من نكمل اخذج..

-وين..

-شعليج..

-هههه لتتأمل هواي احتمال يجيني احمد .. خابرت امي.. رديت هاااا ماما..

-اكولج احمد اخابره وميجاوب خابريه ..

-هسه اخابره.. سديته من ماما خابرت احمد ماكو.. باوعت لبكر بيئس..

-شنو لتهتمين اوصلج قابل شحيصير

-ماشي. خل ادخل اشوف نجوى..

-دخلنه اني وبكر.. مشغلين عبالي حبيبي .. ونجوى ومازن يغنون لبعض علستيج.. اني اباوعلها وهيه تغنيله

ليلة الالبسلك الابيض واصير ملكك والدنيا تشهدد

باوعت لبكر.. واخذت نفس.. شوكت البسلك الابيض واصير ملكك والدنيا تشهدلنه ...

-لتخافين.. يجي هليوم انشالله . وراح نكون اسعد اثنين بيومها

-ههه شوكت بكر مو متحمله بعدك..بعد.. اريدك يمي.. بدونك احس بنقص.. ما اكمل بدونك..

-يمرتي ويروحي انتي.. والله قريب بس ان شاء الله

- اخذ ايدي ويعصرها واني اباوعله مبتسم.. بعد المغرب نهينه الحفله.. وزفينه مازن و نجوى لشقتهم ..

دخلتها بأيدي.. بقت تبجي.. كتلها عشنو تبجين يروحي.. تكولي خايفه..

-من شنو خايفه حبيبتي.. ماكو شي. وهذا حب حياتج الكل عمرج تتحلمين تصيرين اله اليوم انتو سوه

لتخلين الخوف على بالج.. بوستها وحضنتها ابجي.. ما تحملت اعوفها.. بكر هم طب سلم عليها.. وانطاها هدية عرسها ورقه بضرف..

وطلعنه.. اخذني للسياره.. ابجي.. كال اوووف لو نتزوج .. ابتسمت..

كتله شتسوي..

- شسوي يمكن يوكف كلبي واموت من الفرحه ههههههه

-يحظي هيه بس هاي الناقصه ههههع شغل اغنية ناذر اذا رديتي بالحب والي حنيتي ازرعلج السجه ورد من بيتج لحد بيتي...

اسمع واضح.. كال تعاي اشوفج شمسويلج وشمحظر.. كتله شنو.. وكفنه اباب بيت.. وكال انزلي .

كتله وين. كال انزلي وانتي تفتهمين.. نزلنه فتح قفل البيت وكال فوتي.. كتله شنو القصه بكر..

كال خايفه مني. كتله لا مو هيج بس.. كال كل عمري ممفكر بيج غلط .. ولا راح افكر.. لتخافين تعاااي..

-دخلت بيت وحديقه صغيره..

-فتح قفل الباب الثاني.. ودخلت بيت.. خالي من الغراض.. دخلت مأثث اثاث بسيط.. لوحات ..ثريات..

كتله شنو هذا..

- سمر هذا بيت اشتريته النه.. هنا راح نقضي اجمل ايام حياتنه.. اني نويت اتقدملج.. ما اتحمل بعد.. شهر سنه.. لا الناس تتغير ولا الاهل يتغيرون..

واني جاي اشتاقلج هواي. اتمناج يمي كل يوم.. اريدج سمر.. انتي مرتي الي واريدج حلالي

-ومحد يصيرلي غيرك حلالي .. حظنته من الفرحه.. شال وجهي باصبعه.. وباسني بكصتي..

-اخذت نفس.. واباوع لعيونها.. يربي والله اعشقج.. لج اريدج..

- هههه احبك.. اموووت عليك والله وخليت راسي بحظنه .. اسمع لدكات كلبه.. اتمني يوكف الزمن هنا..

اتمنى اقضي كل عمري واني هيج.. عطره بالنسبه اليه سحر ياخذني لغير عالم.. عالم مابيه غيرنه وحبنه.

ابتعد عني.. واخذ ابأيدي وكال تعاي اشوفج بقيت البيت.. اني ما اثثته.. كلت هوه بيتها. تأثثه بمزاجها..

شنو الموديل الديزاين اليعجبج.. كوليلي بيه واني اثثه.. لحد منخلصه اتقدملج ونتزوج ..

-احس الفرحه مو واسعتني واني اشوفه واباوع البيت.. اللي ممكن يلم حبنه فد يوم..

كتله يله بكر.. ما اكدر اتأخر اكثر.. كال يله.. مشى خطيه

بساع.. وصلت البيت.. ردت انزل.. التفتتله..ابتسملي..

بسته بخده.. وبقيت اباوع بعيونه.. ما اعرف حسيت عيوني بعد متشوف عيونه هيج... احساس تملكني للحظه .. ما اعرف ليش

ونزلت علشارع.. وهوه يبتسملي. .. عديت الفرع.. وصلت للباب هوه بعده واكف..لوحلي بأيده ورااح..

دخلت للبيت.. اتلكتني امي.. وصلج بكر مو . كتلها اي. وين جنتو.. وين يعني وصلنه نجوى لشقتها..

-سمر لا تلعبين وياي.. كطعي علاقتج ببكر..

-واكفه بالحديقه واحجي وياها.. كتلها يوووم من جنتي تحبين بابا وتحسين بيه مستحيل.. بقيتي تحبيه لو بطلتي..

-سمرررر

-ولله مو قصدي بشي.. بس ماما اني احبه لبكر مو بيدي.. ما اتخيل نفسي الغيره

تدرين مشتريلي بيت ويكولي اثثيه باللي يعجبج..

-سمر يمه بكر. نار.. والنار تحرك..لا تحركين روحج بعواطفج وادفنيها تره ما تصير..

-ماما اريده.. احبه والله اتمنى تفهميني.. هوه جان يريدني قبل عادل..بس عادل خطبني قبله..

-هذا ميغير حقيقة هوه اخو زوجج..

-اي زوج هذا ماما.. عادل بعمره ما كان زوج.. هذا كابوس وكعدت منه مو زوج..

-ادخلي هسه.. خالاتج كاعدات ادخلي يمه...

-اكولج ماما بس لا اركان هم هنا.. مابيه البس حجاب والله .

- بالاستقبال اركان مو هنا .

-اي زين .. دخلت وحجيت لعد احمد ليش ما اجاني وصلني..

-ما ادري شبيه ردت احجي وياه..بعدني ما فاكه حلكي كال يمه اتركيني مابيه حيل اريد انام..

-دخلت صحت هلاااااااااو.. صاح بابا هااا سمر اختج اشونها..

-كتله زينه بابا زينه.. واخذتله موبايلي اشوفه صورها.. حيل مقهور عليها بطلعتها.. يكول راح افتقدها..

كلت الخاله.. لعد اركان وحده بالاستقبال.. كال لا نايم.. كتلها اي زين.. لان احمد فوك.. عفتهم وصعدت..

جاي افوت.. جان اشوف احمد يشمر الموبايل فلشه ويغلط. ويفرك بوجها..

فتحت باب غرفته.. دخلت شبيك..

-ما بيه شي اطلعي..

-متزاعل..

-ويه منو..

-ويه اللي تحبها.

-لاااا

-لعد..

-اهلها كمشوها وكتلوها..

- كتلوها قتل لو شنو..

-لااا هيج تأديب..

-مديت ايدي على شعره.. يروحي وانته متأذي عمودها..

-وخر راسه مني. ودنك مخلي اديه على راسه..

-كتله تريد احجيلك وياها. بساع باوعلي

- شلوون تكدرين..

-اي اكدر.. اذا عندك رقم امها انطينياه اخابرها وتطمن عليها..

-اي اي يمكن حافظ رقم امها.. لحظه كام بسرعه لم جهازه وركبه وشغله.. وكعد يبحث بالارقام.. واني اباوعله وابتسم..

-هذا.. تكدرين..

-اي جيب. دكيت الرقم واتصل... انوب خليت ايدي عل سماعه وكتله هيه شسمها..

-مروه

-رجعت الجهاز.. ردت امها.. كتلها العفو خاله اني صديقة مروه وجهازها مغلق.. ضل بالي عليها..

اكدر احجي وياها .. كالت اي هسه اكلها.. شنو اكلها شسمج.. كتلها سمر احمد.. راحت للبنيه.. كالتلها مروه صديقتج.. كالت منو. ..سمر احمد..

حجيت هلو مروه..

-هلو حبي..

-لج ضل بالي عليج. . حتى صديقتنه الي تعرفيها موتتني عليج.. كالت اي. عرفت امها يمها..

كتلها حبيبتي من تفرغين خابريني او خابري صديقتنه ترا حيل ضل بالها عليج اني سمر ااحممممممد..

-كالت اي اي ماشي حبيبتي تسلمين.. اني زينه بس جهازي شوي عطل طمنيها كوليلها انشالله اشوفها الاحد

كتلها ماشي.. احجي واني فاتحه سبيكر. . كملت سديته.. كال الحمدلله مدام بخير ردت اموت عبالي سوو بيها شي..

-تخاف عليها..

-دنك راسه وما رد..

-احمد اذا رايدها اخطبها ليش تضل هيج تخليها تتختل وتخابرك..

-سمر متشوفين وضعنه كوه مدبرين العيشه يا زواج

-الرزق من الله. اذا تريد اخذ غرفتي واتزوج بيها والله جديده..

-هيه بس غرفه .. يراد كومه.

-ما عليها شي.. اخطبها وشوكت ميصير عندك اتزوجها سنه سنه ونص عادي.. ابدال متضل حب بالختله خليه بالحلال..

بلكت يطلع راتب بابا هلشهر ونفتك.. ونرتاح.. هز راسه. وما حجه.. مديت ايدي لشعره ولعبت بيه..

فديت اللي كاتله الحب يابه.. عبالي انته كرندايزر بس للمعارك غير قابل للحب... ابتسم..

عفته ورحت للغرفه.. عدلت الغرفه هوسه من ضجة العرس.. خابرت بكر شوي ونمت..

كعدت الصبح.. خالاتي مبدلات ويردن يروحن.. كتلهم لييييش مو كلتو 10 ايام.. كالت خالتي..زهراء تكول متوجعه.

كتلها سهله ان شاء لله خير... سلمت على اركان وعلى مرته كوه ترد.. ودعناهم وراحو..

حجت امي.. كالت خطبتج خالتج لاركان بس رفضت.. كتلها شعجب مو من عوايدج ترفضين..

-يمه اني صدك اريدج تتزوجين وتنسعدي بس مو اشمرج.. بيت اركان عاداتهم ما تتحمليها..

شفتيها مرت اركان مبوشه.. تصيرين عده هم تتبوشين.. وعاداتهم وقوانينهم انتي ما تكدريلها..

وشكو شامرتج بالنجف.. ما رايدتج.. وانوب مرته مره وانتي فقيره مو بكدها هاي السان ما تنكدر..

كتلها هم زين فكرتي بيه هلمره.. كالت دنجبي قابل اني مفكره بروحي. هاي تزوجت نجوى قبضت شي اني.. غير اريد سعادتجن..

بست راسها.. وكتلها الله يخليج النه ماما.. مرت ايام واني مطالعه الباب كله بالبيت..

ونجوى وزوجها باربيل طالعين يتونسون. واحمد من الشغل لغرفته

من غرفته للشغل ما يختلط ويانه.

وبكر بس اتصالات بيناتنا. بديت دوام.. وكمت اشتغل.. مازن عرض عليه خط.. كال ابن خالتي يريد بنات يشتغللهم خط..

شوفي بالمدرسه. كتله بعيني. سألت بالمدرسه منو يريد خط.. طلعت طالبتين ومدرسه وياي..

خابرت مازن.. كتله خل يبلش ويانه.. كتله بيش الخط.. كال 75 الف. كتله اي هاهيه.. خل يجي يوم الاحد..

صباح يوم الاحد..دك الخط بالباب. اجه.. صعدت وره..كال ست سمر.. لو تكعدين كدام.. كتله هيج مرتاحه..

انوب حجيت وياه.. شايفتك بس ما اتذكر وين..

- اني عمار ابن خالة مازن عرفني عليج بالعرس.

-اهاااا اتذكرتك اييي.. اتشرفنه

-الي الشرف..

-ما اطمنت وياه.. كل شوي يباوعلي بالمرايا. وصلني للمدرسه.. بالرجعه الطالبات والمدرسات وياي..

هوه كعدهم وره.. ويكلي تعاي كعدي كدام.. ما ارتاحيت لتصرفاته ابد.. انوب يكولي ست سمر السيديات كلها يمج بالجكمجه..

طلعي اللي يعجبج وخليه.. فتحتها كلها كاظم الساهر. مو هلكد احب اغانيه كلها فصحى..

اختاريت البوم بيه اغنية بغداد لا تتألمي.. كال ما لكيتي غيرها.. كتله بس هاي احبها اله واغنية ها حبيبي ماكو ملكيتها..

ضحك.. وكال باجر اشتريها.. المدرسه الوراي وكعت وياه دك سوالف. وهوه ابد ميحب يسولف...

لحد ما وصلني راسي صاير هلكبره بكد ما حجه... كام يوميه ياخذني ويجيبني بالخط.. بس احس بنضراته بيها شي..

مر اكثر من 3 اشهر وهوه يتقربللي. لحد ما فد يوم وصل الكل وخلاني بالاخير وهوه بالعاده اني ثالث وحده يوصلها. .

كال ست سمر اريد احجي وياج ممكن..

-انته دتحجي اصلا كمل..

-ست سمر اني هواي احترمج واعزج وصار 3 اشهر اراقبج لا عندج غلط لا فد شي مو زين ومازن يمدح بيج..

اريد اتقدملج على سنة الله ورسوله تقبلين..

- باوع عمار. انيي......قاطعني..

-لااا ما اريد جوابج هسه.. اليوم خميس.. اريد جوابج للاحد وشنو يكون اني اقبل بيه..

-ردت احجي.. كال فكري لخاطري. سكتت.. رجعت للبيت.. ضحكت والله يا الله خرررب شعدهم وياي..

خابرت بكر.. كتله هيج وهيج كالي عمار.. حجيتها بضحك.. بس هوه تخبل..

كال بعد ما اتحمل من باجر اني اجي اخطبج.. كتله مو وكتها بكر.. كال لااا سمر هوه ليوم باجر نفس الشي..

كافي تمنعيني.. خلينه نخطي هلخطوه وشيصير خل يصير..

-بكيفك بعد..سديته من عنده بليل.. ونمت.. كعدت الصبح جان يوم جمعه.. نزلت اسوي ريوك اليه ولامي وابويه..

هستوني خليت الصينيه دناكل. واندكت الباب حيل يا ستاااار شكو.. كامت امي فتحت الباب.. طلعت عمتي ساميه و مرت بكر..

نهاية حملها ايامها لاخيره وبطنها واصله لخشمها.. طبت عمتي تهلهل بلبيت وتصيح فرحاااان خوويه الحكلي فرحاااااان..

اني وكفت صافنه.. ابوي كالها خير ام بكر شبيج..

-وك خويه بتك تريد تهجم بيتي.. وك خويه تريد تفضحنه

يخويه صايره دايره مره تطلك و تتزوج حماها.. سمر تريد بكر فرحاااان.. مشيشته عليه من الصبح

يكول لو هيه لو اكلب الدنيا واخذها.. وك خويه فرحان انته قابل بسوايات بتك احجيييي..

اني واكفه وابوي يصرخ شنو سمر شنو هلحجي.. امي تجر بيه وتكولي طبي جوه.. جرتني مرت بكر...

ولزمتني.. احلفج بعزيز كلبج.. احلفج بلله لا تاخذين بكر من عدنه.. جاينه طفل حرام عليج والله لو شافج بعد ما ينتبهلنه اني وابني

سمر ابوس ايدج عوفي بكر.. بقيت اجر بأيدي وهيه تتوسل وتبوس بيدي واني مصدومه. وابجي..

عمتي ما خلت حجي وما حجت.. ثواني ودخل بكر.. جر مرته وصرخ بيها للسياره بسااااع.. ووخر امه..

وكعد كبال ابوي وكاله.. خالي اني رايد سمر واحبها من هيه عمرها 14 واتمناها..

انخطبت لعادل واتحملت ودست على كلبي. وما خربتها كل ضني اخوي يحبها .. بس من سلمنياها ليلة عرسها وتبره منها..

واتحملت مسؤليتها بالكامل. حبيتها اكثر وما كدرت امنع روحي.. وهوه ما فد يوم اعتبرها مره وهيه شاهده.. ومحمد خالي ما لمست منها طرف..

كل حبي الها جان مشاعر.. وانته تعرف يمكن مار بشبابك بهلمشاعر... خالي اني جاي اطلبها منك على سنة الله ورسوله..

لا مسوي عيب ولا حرام.. لو عادل جان معتبرها مره و زوجه اله جان والله عيني ما خليتها عليها ولا ادنيت يمها..

بس كافي صار 10 اسنين اضم هلحب بكلبي مو من حق احد يمنعنه..

حجه وياه ابويه.. وكاله كوم اطلع بره.. كاله خالي اني احترمت واجيت من الباب وما تعديتك..

صرخ بيه ابوي كوم اطلع براااا كوووم.. كال بكر يصير خير. العليه سويته فلا تلومني لو سويت كولشي...

ويكولون ثلثين الولد علخال وفهمك كفايه.. حجاها وكام.. خله ابوي يشيل روحه ويركعه ويغلط ويصيح..

فات مني بكر.. كأنه يعاتبني لان ما قبلت بالزواج منه قبل لا يتقدم.. اني جاوبته بس بدموع.. عافني وجر امه اللي تصيح وطلع..

ابوي كام يصيح عليه ويغلط.. اني عفتهم ورحت لغرفتي..

بقيت بس ابجي.. حتى خط مرفعت على بكر.. بقيت اتذكر شكل مرته وهيه تتوسل بيه وبطنها عاليه..

نزلت بليل.. بعد ما انهاريت بالبجي.. جاي افوت واسمع امي تحاجي ابوي.. تكله خايفه من سكوت سمر

وهدوئها يا خوفي اطاوعه وتروح وياه فرحان شلون بينه

دخلت عليها والدموع بعيني.. وكتلهم بس لحظه فكرو بيه مو بغيري بس لحظه .. من جنتو بكدي حللتو لنفسكم حبكم الممنوع..

وهسه جاي تمنعوني لييش شنو سويت.. لا حرام ولا خالفت قانون.. كل ذنبي انطيت كلبي.. فدوه افهموني ولو مره والله اني بتكم مو غريبه الله عليكم فكرو بيه

يا عالم والله اني بشر واحس. عوفوني اخذ نصيبي مثل ما اخذتو ليش تصيرون انانيين وياي حرام عليكم والله...

امي كامت تبجي وهيه تشوفني كاعده كبالهم على ركبي واتوسل بيهم.. صاح بابا تعاي سمر.. كتله بابا فدوه..

كال تعاي بنتي بس احجي وياج كلمتين الله شاهد ما اذيج.. اتقربت يمه وكعدت.. كال باعي بويه..

اني ابوج التعبت وربيت وهاي امج السهرت وربت وتحملت علموكم هواي..

والله بويه من اتزوجنه بدون رضا اهلنه ما انسعدنه. وهاي امج واسئليها شفنه الويل بحياتنه ولليوم جاي ندفع الثمن بيكم

بويه هاي شيباتي وتعب سنيني مخليهن بأديج.. يا بويه لو اللي بكلبج اعز من شيباتي وتعبي عليج روحي بويه..

بس ثقي بلله يا سمر.. وراج راح ينزل راسي واموت مثل ما مات جدج وهذا دين.. يا سمر لو متت انتي السبب بموتي وما مبريه الذمه منا اليوم الدين..

اذا هيبة اخوج وراس ابوج تخليه بالطين وتاخذي الترديه وترحين.. روحي عساج لا تشوفين الخير بيه

وخليني اني احط راسي بالكاع واشوف مثل ما شاف جدج واموت.. وانتي السبب.. يحجي هيج واني دموعي تجري بحركه..واباوعله بصدمه

خلاني بين نارين..لا اكدر اعوفه واختار بكر ولا اكدر اختار ابويه واترك بكر .. جوابي بس دموع عيني

يربي باوع لحالي كافي تعبت والله اريد ارتاح تعبببيبت..دخلت لغرفتي طبت امي.. اخذت اديه وتكلي يمه والله حاسه بيج..

بس الضرف صعب وحالة ابوج صعبه.. يمه والله لو صار شي يموت ما يتحمل والله..

-يوم ليش اني الدائما اضحي..

-يمه هذا حكنه عليكم.. لا تصيرين مثلي يوميه اغم كصتي واعيش النار على موتت ابوي.

يمه تأنيب الضمير صعب ما تتحمليه يهد الحيل.. والله ييمه اروح يم كبر ابوي واكله اطلك واعوف جهالي وبيتي بس ارجع.

وج يمه الاب ماكو مثله ما يتعوض.. الرجال يمكن تلكين غيره بس لو مات ابوج منين تجيبين اب. والمصيبه لو جان موته بسببج

يوميه تعيشين الاه ويوميه تتعذبين. بموته

-يمه صعب والله صعب اعوف بكر ما اكدر اموووت فهميني شلون دبريني لا اكدر انطي بابوي ولا اكدر انطي ابكر

-اختاري ابوج يمه ورفعي راسه والله والزمن كفيل ينسوج البكلبج.

-دنكت راسي ابجي بحركه بصرخه طالعه من كل كلبي بكل قهري وعذابي ولج اخخخخ يا دنيا متت كافي والله متت كافي مني تعبت

بكر يتصللللل بس شجاوب .. شختار الموت لو النار ثنينهم عذاب..

بقيت يومين عايشه بالويل.. لا اكل لا شرب احس روحي صرت ميته.. نجوى تجيني ساعات تصبر عليه وتروح..

ما داومت يوم الاحد.. بقيت بالبيت.. بليل خابرت عمتي على امي.. تكلها باركيلي بكر صار عنده ولد مثل الكمر..

انهاريت صدك.. شألكاه فرحان بأبنه لو لا.. بقيت اتذكر مرته وهيه تتوسل.. وانطحن بالزايد

داومت يوم الاثنين بس شنو حالي.. اني والميت سوه.. وكف كبالي عمار.. كال ست سمر..كتله نعم

ست سمر اتفهم وضعج..بس اريد جواب.. عقدت حاجبي..كال بخصوص طلب ايدج للزواج.. صفنت بوجها..

وكتله موافقه.......يتبع

🌺🌺🌺🌺🌺

يمكن اصعب موقف.. موقف سمر. 😔

#حكاية_سمر

،،،،،،،،،،،،،،،بقلم الكاتبه زينب ماجد،،،،،،،،،،،،،،،

البارت_13

ست سمر اتفهم وضعج..بس اريد جواب.. عقدت حاجبي..كال بخصوص طلب ايدج للزواج.. صفنت بوجها..

وكتله موافقه.. بس بشرط..

-امري ست سمر

-وافقت على الزواج مضطره خل يكون بعلمك.. لان عندي ضروف بالبيت كولش متعبتني..

وحابه اتزوج واخلص.. وياريت تكدر تكون الرجل الاكدر استند عليه.. وتعيني بحياتي..

-انشالله اشيلج بعيوني والله.. شنو الشرط..

-نتزوج خلال اسبوعين.. يتم كولشي

-اي عادي اني مجهز كولشي.. لان اصلا مقرر اتزوج من زمان.. ما عندي اشكال نتزوج وكت متردين..

-هزيت راسي منه ومشيت دخلت للمدرسه اريد اتنفس ما اكدر.. احس اكو نار تسعر جواي..

معقوله اني اكدر اعوفه لبكر.. يربي اخخخخخ والله ما اكدر ليش هيج.. ربي امتحانك صعب..

دخلت للمدرسه.. ادرس كوه واوكف على حيلي.. كل شوي الطالبات يكولون ست عيدي ما فتهمنه..

اخذت نفس واعتذرت منهم.. كتلهم ع باجر اشرح الموضوع.. راجعو الموضوع السابق اليوم.. واعتذرت وطلعت بالساحه.

اجت يمي المدرسه اللي وياي بالخط.. ست نرمين ..شبيج..كتلها لااا شوي دايخه.. كالت شراد منج عمار ابو الخط..

- شراد..

-شفته صاح وراج..

-هاااا تقدم لخطبتي وراد ايدي للزواج

-اي

-شنو اي وافقت..

-هااا اي باالعافيه عليكم.. انتي خوش بنيه وعمار ورده مال الله.. الله يوفقكم..

-شكرا حبيبتي.. ست نرمين هم مطلقه.. قبل 3 اسنين..كتلها يوم الالج انشالله ونفرح بيج..

- تسلمين حبيبتي ياريت مليت من بيت اهلي.. والله وتعرفين وضع المطلقه بمجتمعنه شلونها..

-الله موجود.. يسعدج يارب.. كمت من يمها اني كلبي خلصان اواسيها لو اواسي روحي..

دخلت للممرات مال الصفوف.. شفت امنه بوجهي. صارت صف سادس علمي..مو طالبه عندي..

كتلها هااا امونه شلونج..

-زينه ست بفضلج..

- بفضل الله حبيبتي..شنو وضعج..

-بخير..

-شصار مصار .. النقيب كمال هم يتواصل وياج..

-اي راح يتقدم لخطبتي ونتزوج بس اخلص السادس..

-الله يسعدكم.. بس هااا امنه.. نسرين امنه بركبتج..

شغلة تاخذين كمال لجانبج وتلعبين وياها لعبة شرايج..

والله مثل ما دخلتج براس كمال وعرفتج عليه.. اتفق ويه نسرين وانطلعج من حياته .. فديري بالج بنيتي..

-لاا ست والله اني حتى زوجته احبها.. ما عدنه شي .

-اني دا احذرج لمصلحتج.. لا تعتبريها شي ثاني.. مثل ما انتي عزيزه عليه..نسرين هم صديقتي واحبها وما انطي بيها ..

-انشالله ست..

-يله حبيبتي رجعي لصفج.. عفتها ومشيت.. كملنه اليوم طلعنه لكيت عمار. واكفلنه بالخط.. وبكر واكف بعيد عنه..

اشرلي بعيونه.. اخذت نفس.. واحس العبره خنكتني.. على شنو اروحله.. انطي امل بيه وهوه كل امل ماكو بحياتنه ..

ركبت بالسياره ويه عمار وتحرك مشى. وبكر يباوعلي بأستغراب.. احس نضراته تكتلني يربي شلون راح اعوفه..

عمار مشغل تغمض عيوني شوكت وارتاح منك من عذابك من عذاب الليل والتفكير بيك..

احس مو الاغنيه تغني. احس بكر يحاجيني بيها..

تغمض عيونك تريد بدوني. زين واني.. اني شلون اغمض عيوني ..

وبكل مكان ابيتي الك بيه ذكريات. شما ردت انساك ميخلوني..

انطيت ضهري الك.. مره وردت اروح وحبك والشوك الك ردوني..

ومره ردت احلم حبيبي اني بسواك.. طيوفك بعز الحلم لحكوني..

وياما كتلك.. اني احبك. ولو اكو بالدنيا حب اكبر احبك..

وياما جنت اتمنى امووت حتى اعيش بدنية حبك..

استمع.. ودموعي.. تجري بدون وعي.. ما احس الا عمار كال.. ست سمر..

انتبهت.. ومسحت دموعي.. وكتله نعم..

-خير بيج شي..

-لااا مجرد ضيق بصدي. سبق وكتلك ضروف عندي..

-انشالله خير. لا تضوجين كلشي سهل يم ربج.. اني اليوم ادز امي عليكم..

-هزيت راسي وصلت للبيت.. دخلت لكيت امي كدامي..

-هاا الله يساعدج..

-متكليلي شوكت يساعدني لخاطر الله يمه تعبت.. ونفجرت بالبجي..

كعدتني علكرسي.. وهيه تكولي كولي يا الله بنيتي..بقيت مدنكه و ابجي.. وهيه تمسح على راسي..رفعت عيني الها.. كتلها عمار ابن خالة مازن..

-شبيه..

-طلب ايدي للزواج..

-اي وشكلتي

-وافقت.. ودنكت ابجي..

-احسن قرار يمه.. هم تنسين البكلبج وياه.. وهم تخلين ابن عمتج يأيس منه ويشوف عائلته.. وانتي تشوفين حياتج..

هزيت راسي.. شلت جنطتي وكمت.. كلت اليوم راح تجينه امه العصر.

حجيت وصعدت.. دخلت الغرفه ومرت ابالي.. الكلمات.. بكل مكان ابيتي الك بيه ذكريات شما ردت انساك ميخلوني .

اباوع للغرفه.. هنا هيج حجيت وياه.. اهنا هيج كلتله.. هنا كال احبج.. هنا كتله ما اعيش بدونك..

بقو بس الهنا وهوه ماكو.. يربي ليش والله احبه ما اكدر اعيش بدونه ارحمني واخذ امانتك اتخبل لو غيره يصير بمكانه..

بدون ما ابدل.. نمت علسرير.. ابجي ابجي.. لحد ما نمت.. العصر كعدت على صوت نجوى.. اجت فتحت الضوه وكعدتني..

بوستني اني اي كلام ما حجيت. كالت سمر صدك وافقتي على عمار.. هزيت راسي..

-زين وبكر.. سمر يموت والله..

-اخذت النفس.. نجوى انتي كوليلي شنو الحل.. ابقى متعلكه ب

خيط امل من وهم..

اقضي حياتي وياه بحب تحت ستر الليل.. واني ادري ما راح يطلع علينه النهار..

لا مجتمعنه يتغير ولا عقول اهلنه تتبدل.. لو اضل 100 سنه ابقى طليقة عادل اخو بكر. متتغير هاي الحقيقه

ونضل نوهم بنفسنه.. بكلمة بلكت يجي يوم يتقبلون حبنه. واحنه نعرف كل الزين ما يجي هذا اليوم

الحل الوحيد كدامنه.. اتزوج بكر بالسر واخلي اهلي امام الامر الواقع.. ومستحيل اكدر اسوي هيج شي بابويه..

وهوه شكل عليه الذمه منا اليوم الدين. اخاف اختار بكر ويوكف كلب ابويه ويموت بسببي..

نجوى راح اموووت شسوي. كوليلي.. لا اكدر انطي ابكر ولا اكدر انطي بابويه تعبت والله..

طبت امي علينه.. كالت وج ييمه كافي والله مردتي كلبي عيونج راحت..

-يمه ليش ما تخلوها تتزوج تره والله مو حرام انصفوها واوكفو وياها مره.. حرام هيج حالتها.

-يمه بيدي اني.. هذا عار شيكولون علينه لو قبلنه بهلزواج.. صعب يمه.. ناسنه ما ترحم..

خليها هيج.. تتزوج.. هوه هم يوم يومين يطربك تاليته مرجعه لعائلته.. خطيه صار عنده ولد خل يشوف ابنه..

-اخذت نفس.. اي خليه يشوف ابنه.. بالعافيه.. باوعت لامي وكتلها امداني بيوم النصحتيني منه وتجاهلت نصيحتج..

كتيلي يا سمر هاي نار لا تشمرين روحج بيها.. وعاندت وحبيته وحركت روحي بناره..

شجاني وطاوعت كلبي شجاني.. بقيت اضرب على وجهي.. وامي ونجوى يلزموني ويهدون بيه..

-ييمه اني من انصحجن قابل اكرهجن.. هاي من كتيلي نجوى تحب مازن وكفت بوجها. لا.. ليش لان ما حسيت بيه غلط. وحسيتها ترتاح وياه.. لهيج ساندتها.

بس انتي منعتج ييمه من خوفي عليج والله. خفت اشوفج بهلوضع هذا كدامي تتمحركين وما بيدي عليج شي...

عبالج سهله عليه.. من اشوف دموعج تجري كبالي والله ييمه تيزاب على كلبي دموعج بس شسوي .

الضرف الي احنه بيه صعب.. وما نكدر نمشي وياج علخطأ..

-دنحجي وطب محمد.. صاح يمه نسوان اجن بالباب يكولن كول لامك اني ام عمار .

-ياااا ولج والله نسيت.. كومي يمه نجوى وياي بساع.. حظري عصاير..

نزلت امي وكامت..ضربت على رجلي نجوى كومي كومي غسلي وجهج.. خاف يردن يشوفنج.

-اي قابل مشايفيني.. ما الي خلك..

-دكوووووومي لخاطري..

-كمت وياها نزلت.. غسلت وجهي بصابون ونشفت بخاولي..

-عيني سمر ام كحيله.. النعرفه حتى من تنامين تتكحلين.. ليش عيونج بيض..

-ما الي خلك والله عوفيني.

-لج عيونج حمر مورمات بس كحل خفيف امحي اثار البجي..

-ما اريد امحي شي عوفيني.. عفتها وجاي امشي.. كالت تعاي قدمي العصير..

-نجوى فدوه لعينج تركيني كوه متحمله روحي.. لا تخليني اصرخ واطلع القهر البكلبي..

-ماشي حبيبتي فوتي واني راح اجيب العصير..

-عفتها ومشيت للصاله.. سلمت وكعدت.. كالت المره شبيهن عيونج..

-جاوبتها امي.. سهر وقلة نوم.. تعرفين شباب هلوكت يموتون علسهر.. تضل خطيه الليل كله تصحح دفاتر عيونها راحت مو تدريس غضب..

-كالت امه. اي الله يساعده.. باعي ام احمد ابني رجال مطلك.. وعنده 3 جهال.. 2 ولد وبنيه..

وامهم شامرتهم علينه متريدهم.. خاف تكولون ما كنالكم..

حجت امي- خيه ما عدنه اشكال مطلك مرمل هيه قسمه. بس جهال.. سمر ما تتحمل لان هيه مدرسه وما ناويه تترك شغلها وتكابل جهال رجلها..

احجيها حتى اكون صريحه وياج..

-لا خيه انه ما كلت اداريهم.. احنه نداريهم.. علينه .. وشغلها عمار ما عنده اشكال بيه.. ما بيها شي يتساعدون علعيشه..

انوب كالتلها امي.. شوفي خيه احنه مو من عوايدنه نشرط ونخلي شروط.. بس نريد كلمه اذا تزوجت سمر ابنكم..

ماكو رجعه لمرته الاولى.. مو من تتزوج.. سمر ويجبرها تهتم باطفاله.. ومن تقصر وياهم يكولها ارجع الاولى..

-يااااا خيه شنهل حجي.. هوه مو طايق مرته الاولى. فد وحده رعنه مرعبله شجابها على ست سمر..

-خيه اني من احجي حتى ما نخفي شي قبل الزواج الا هيه والله اشكال الوان تقدمولها.. نقيب توسل بيها وما قبلت. وغيره وغيره بس احنه لان نعرفكم..

ونعرف بيت ابو مازن وعلى معرفتهم و سمعتهم الطيبه احنه نوافق عليكم..

-يا بعد كلبي يا خيه عساج سالمه.. نخليها بعيونه انشالله.. باجر يجون الرياجيل ويتفقون ويعقدولهم.. لان عمار مستعجل علعرس مدري شبيه..

-كل الهلا بيكم خيه..

-طلعو.. وامي كالت.. انتي راضيه بعمار..باوعتلها بيئس وما جاوبت.. طبطبت على كتفي وكالت انشالله يارب يكتب اللي بيه الخير..

صعدت لغرفتي.. بعد ما راحت نجوى .. دخلت احس هموم الدنيا شايلتها فوك راسي.. اخذت الفون..

لكيت بكر داز 3 رسايل واتساب.. سمر شبيج.. عيونج ليش هيج يائسه.. سمر بالي يمج شبيج جاوبيني اريد اسمع صوتج.. سمر شنو القصه اكو شي صار وراي احجيلي ليش ما تجاوبين

خليت ايدي حلكي وكمت ابجي فسخت الموبايل وطلعت السيمكارت منه..والبطاريه وشمرتهم

.. ثاني يوم رحت للمدرسه اخذت اجازه 3 اسابيع ودفعت نص راتبي ..

اجيت لامي.. كتلها يوووم.. خابري عمتي ساميه وكوليلها سمر راح تتزوج هاي الايام..

اي خبر ما اريد يوصلون لبكر.. اعرفه لو عرف يهجم

الدنيا فوك روسنه وياخذني غصب وتصير دم..

وهوه ما عده شي يخاف عليه. بس اني اخاف على ابويه.. خل يمر هلعرس الاسود بدون مشاكل..

تره اذا دره واجه بكر وكال تعاي.. لا تضمنوني.. يمكن ينفجر كلبي واطاوعه وامشي خلوني صابره وساكته.. وبالعته كوه

كليلها لحد يوصله خبر.. كالت امي.. هاهيه اني اخابرها.. رحت صعدت لغرفتي خلصتها بواجي..

لحد الليل كالو اجو اهل عمار وعمار وياهم.. والله لو كايلين اجى عزرائيل يقبض بروحج.. افرح بكد الدنيا ولا جية عمار..

بقيت ابجي بحركه.. شلون اكدر اترك بكر ما اكدر يربي ما اكدر.. اني ينعقد قراني على غيره.. واصير حلال لغير بكر..

يربي موتني هسه فدوه اخذ روحي... اجت امي.. كالت يردوج جوه.. لبست حجاب ونزلت...

ونزلت مثل الجثه الهامده تمشي بيه امي.. كالت اكعدي بهاي الغرفه.. راح يجون يعقدولكم..

طب عمار وابوي واحمد والشيخ.. وكعدو كبالي. واني خلت حجاب جبير على راسي ونزلته على وجهي..

ودموعي تجري.. صاح الشيخ.. هل تقبلبن الزواج من عمار ابن كاظم .. غمضت عيوني ودموعي تجري..

كال بنتي تسمعيني..وعاد.. هل تقبلين.. كلت نعم اقبل.. واحس روحي اختنكت يربي هواك.. اريد اشتم الهوى..

ما اكدر.. كمل الشيخ.. احس راد يغمى عليه.. متت ضليت امسح على ركبتي.. بس اريد الهوى..

كمل الشيخ طلع.. عمار شال الحجاب مني. وخرت ايده وكمت بساع للمطبخ اشهك.. اخ يا كلبي ولكم ارحموني تعبت ارحمووووني ياعااااالم..

سأل شبيها.. كالتله امي.. تخجل..بعدهاا ما متعوده.. عفتهم وصعدت.. لفوك اباوع للغرفه اخ يا نار كلبي..

شيصير بيه لو يسمع.. هذا الجنت عايشه بخيره اليوم طعنته وصرت لغيره.. كمت ادك على راسي واصرخ..

قفلت الباب عليه.. وواصرخ بكل علو صوتي ارحمني ياااااااااااا الله ارحمنييييييي.. اباوع للاخشاب هوه الجابها لان عجبني التصميم..

ولكم هذا الجان يحرك روحه علمود يسعدني اليوم حركته.. اشترالي غرفه علمود لا انقهر على عادل..

ولكم كل عمره واكفلي سيف .. واني شلت السيف وخليته بكلبه الله ياخذييييييي.. شلت ال الكرسي مال ميز تواليت..

وكسرت بيه المرايا.. واصرخ ارييييييييد اموووت يا الله موتنيييييييي كمت علكزاز والمكياج علميز شمرت بأيد وحده..

اديه كلها تجرحت.. اطلعوووو من حياتي اطلعوووو يلعنكن ويلعن مجتمعكم دمرتونييييييييييي..

اصرخ واحمد وامي يدكون بالباب.. طلعت الملابس.. هاي جبتها من فلوسه. واشك بالمملابس بحركه

واضرب علمرايا مال الكنتور اديه صارت كلها دم تنزف.. كسر الباب احمد ودخل.. انتي شبيج تخبلتي..

لزمته من قميصه.. كتله انته كل عمرك تريد تكتلني وتكول اذبحج.. ابوس ايدك اذبحني احمد فدوه ارحمني وموتني..

اخذني لحظنه ويكلي بس كااافي وج كافي. واني اضرب بيه واكوله موتني الله عليك موتني.. جااااااي اموووت ارحمني..

بقيت اضرب على صدره واصرخ.. لحد ما وكعت بيده وما حسيت على شي.. غير اني بالمستشفى..معلكيلي مغذي...

ما بودي اكعد اريد اموووت.. جاي اجر الكانونه من ايدي لزمتني امي.. كالت حرام عليج كافي.. كتلها اريد امووت..

كالت كلنه نموت بيومنه.. هذا اختبار من الله لصبرنه.. صرخت ما اريد صبر ولا اريد دين ولا اريد كولشي عوفوني بحالي دمرتوني..

كمت اصرخ وابجي.. اجو الممرضات انطوني مهدئ.. بقيت ابجي علساكت ما نمت.. صاير عندي ضعف عام لان صار ايام لا اكل ولا اشرب..

ونزفت دم.. لهيج وكعت.. كملو المغذي. ساعدني احمد وشالني للبيت.. خلاني بغرفته نايمه.. لان غرفتي كلها دم وكزاز..

لزمت ايده.. كتله جاي اموت احمد وبجيت..

-سمر انتي قويه اتحملي..

-اي قوه هاي احمد فعلا حابه اموت..

-محد يموت وره احد ازمه وتعدي المهم رفعي راس ابوي.. تعب علينه هواي يستاهل تضحيتج..

لو مختاره كلبج جان هسه جنازة ابوي بالبيت وانتي تخيلي منو اصعب..

-شيصير لو قبلو.. جاي احجي كال اششششش لا تحجين هيج حجي كبالي احترمي

وثقي بلله لو مخالفه ابوي وطالعه وتاركتنه وراج.. لا ومحمد لو ترحين للصين اجيبج واذبحج انتي والوياج..

عبالج اني مثل خوالي اطم العار واسكت.. لا والله اغسله بأيدي وما يرفلي جفن.. فاحترمي مقامنه وخلينه بعيونج.. اتحملي..

-دنكت راسي ابجي بحركه.. مر اسبوع واني نفس حالتي بس ابجي.. ما هدئ بالي.. وبكر يتصل بنجوى..

تكوله ما بيها شي.. بس تريد تبعد شويه وموبايلها عافته.. لان احمد وابويه اتحلفولها.. بس تصير زينه تخابرك..

هوه يكلها كلبي ما مطمن مو من عادت سمر يمر اسبوع ونص بهيج ضرف وما تخابرني اطمني..

كالتله لتخاف بس تصير زينه تخابرك هسه الوضع متكهرب من وره امك ومرتك ابوي حيل متضايق منها..

كايللها كون احد اذاها.. كايلتله لااا.. اني اسمعها هيج تحجي واتخبل بالزايد.. شيصير بي لو عرف عقد عليه رجال ثاني.. الله يعين كلبه وكلبي..

اجه عمار وكال لامي بس اريد احجي ويه سمر شي قبل الزواج.. بعد جبر من امي واحمد قبلت اكعد وياه..

كعد كبالي وكال شبيج سمر شو تعبانه.. كتله لا مريضه ما الي خلك..

- شبيها اديج..

-

انجرحت ..

-سمر اريد احجي وياج شي قبل مندخل بالزواج

-كوول

-سمر يمكن عرفتي اني عندي 3 طفال..

-هزيت راسي اي

-ابني الجبير عبدلله خبل

-يعني شنو

-يعني مجنون

-بس

-اييي مجنون يعني فاقد عقله رسمي.. ومن جبناه هوه هيج مو عاقل..

-خوما تريدني اعتني بيه

-لااال مو هيج ابد.. بس ردت انطيج علم بهلشي خاف تشوفيه وتكولين ليش مكتلي بيه..

-زين امه ليش اطلكت وعافت ابنها المجنون

-هبه بمجرد ما قدمت على وضيفه وكالو قبلوها.. شمرت الاطفال عليه وكالت جهالك انته تحملهم اريد اشوف نفسي..

عبالها من توضفت راح اكعد واخليها تصرف عليه وعلى اطفالي.. لان بوكتها جنت متخرج جديد.. لهيج عافتني

-وهسه

-ماكو هسه اني لعبت نفسي منها.. كالولي رجعها لان بعد اطلكت سبحان الله طلعت معاملة التعبين مزوره وما انقبلت ولليوم هيه بدون تعيين

هواي ناس ادخلت ورادت تصلح بينه.. بس اني جزت روحي منها

-عمار خل اكون صريحه وياك.. اني تربية اطفال ما اتحمل.. وشغلي ما اعوفه.. تقبل بوضعي؟؟

-ست سمر اني اتقدمتلج وانتي مدرسه يعني طبعا قابل

-ياريت تكول سمر.. تبطل كلمة ست

-هههه ادللي يجرالج يابه بس خل اشوف ضحكه شنو جنت منجن برصعاتج من تضحكين شو اني اخذتج وضحكتج راحت شوفينياها..

تره انتي حلالي هسه.. من كال هاي الكلمه.. بودي اكوم اكتله واصرخ اني مو حلالك.. بس الواقع هوه المصبرني ..

كمت من يمه وكتله تلحك تشوف ضحكتي .. عندك شي بعد عمار لان تعبانه واريد انام

-لااا اخذي راحتج..

-اشوفك بخير.. عفته وطلعت.. ياربي اختنك منه شلون راح اعيش وياه شورطت نفسي بشغله اني مو كدها.

مرت الايام بين الحزن والبجي.. ما قبلت يسون حفله او عرس ضخم.. على كد الزفه..

رحت للصالون جن ديحظروني لموتي مو لعرسي ام الصالون تخلي مكياج ودموعي يجرن.. وكل ساع تتذمر وتصيح وتكول ميصير هيج

حاجوها اريد اكمل.. كوه صبرت كملت المكياج.. والبدله.. حتى ما باوعت لروحي وشفت نفسي حلوه لو لا..

احس لابسه كفن كو بدلة عرس بيضه.. اجه احمد اخذني امي ونجوى للبيت.. خالاتي جانن موجودات..

وعماتي واليكتلني بكل عين صلفه عمتي ساميه ورنا واكفات بالعرس.. احس يتشمتون بدموعي..

كاعده بيئس واجت نجوى تضرب على خدها.. كتلها شكو.. كالت شكولج سمر بس لا تصير مصيبه..

كتلها شكو كولي.. كالت بكر مخابر عليه من البارحه لليوم ومراده عليه راجع مخابر مازن .. ومازن عباله انتو انفصلتو وسائله عليج بكر

وكايله شنو متدري اليوم عرس سمر.. بكر ما مصدكه يكله لا سمر ما تعوفني اعرفها انته فاهم غلط.. ومتخبل وقافله بوجه مازن..

كتلها مصيبه يا الله بس لا يجي ويه جية الزفه.. حاجي امي كولي لاحمد..راح يتخبل اعرفه..

بعدني جاي احجي ويه نجوى واسمع صوت الرمي حرك الجو

-ولج سمرررررررر تعوفيني سمرررررررر اليوم احرك الدنيا عليج والله سمررررررر

ولج طفل انه عندج اني تلعبين بكلبي وتشمريني.. ولج تتزوجين غيري سمررررر

-طلعوله عمامي كلهم يصيحون عليه.. بس خافو يتقربوله حالته متهستره وسلاح بيده موجه عليهم

ويصيح طلعووووووها اليه طلعوووووها .. ومحمد اسوي دم مو عرس طلعوهاااااا

حجو وياه عمامي.. اهدئ لا تتخبل خلي البنيه تروح لحال سبيلها..

-ولكم يا سبيل هذااااااااا .. ولكم داريتها بماي عيوني.. ولكم كتلت اخوي ابن امي وابوي وخليت دمه بطوله لان يأذيها و اليوم تخونيييييييي

تعرس وتصير بحظن غيري.. وج سمر جربي اطلعي ومحمد هنا واكفلج طلقه براسج اموتج واموت روحي وراج.......يتبع

🌺🌺🌺🌺🌺

مو على كيفك حبيبي.. تبتعد وتخون وعدك 😔👎
والله لو حبيت غيري.. اكتلك واموت بعدك 🔪💔

اوف الله يعينهم ثنينهم صح حبهم غلط.. بس ثمن غلطهم غالي جدا..

#حكاية_سمر

،،،،،،،،،،،،،،بقلم الكاتبه زينب ماجد،،،،،،،،،،،،،،،،

البارت_14

بكر.. ولكم داريتها بماي عيوني.. ولكم كتلت اخوي ابن امي وابوي وخليت دمه بطوله لان يأذيها و اليوم تخونيييييييي

تعرس وتصير بحظن غيري.. وج سمر جربي اطلعي ومحمد هنا واكفلج طلقه براسج اموتج واموت روحي وراج..

سمر.. اسمعه يحجي ويصيح فرفح كلبي عليه.. اخ الله مشتاقه حتى لصوته والله ما اكدر اعوفه ..

يوووم فدوه ما اريد اتزوج عوفوني ما اريد.. الله يخليكم عوفوني..

-اشششش سكتي نفس واحد ما اريد لا تفضحينه

-شفضح اكثر من اللي دتسمعوه حرام عليكم شسوينه .. دا احجي وشفت احمد لازم السلاح ونازل..

ركضت كدامه ما اخليك تكتله ما اخليك

-وخري لججججج

-دفعني وشمرني ويريد يطلع لبكر.. اريد اطلع وراه لزمتني امي وخالاتي

راح يكتلوووووه حرام عليكم حرام.. امي تصيح واخلاتي لازميني ما اريد اتزوج عوفوني ما اريييييد

عمامي لازمين احمد ومنعوه يطلع .. وبقو عمامي يتصايحون ويه بكر وهوه يصيح ولكم ما اكتلها واروح والله بس خل تفهني ليش هيج سوت بيه..

كلماته مثل النار على كلبي.. بقيت ابجي بحركه.. والله مو بيدي والله اني ادمرت اكثر منه.. عوفوني ما اريد بعد ما اريد..

عمامي دايرين على بكر لازميه من وره وماخذين السلاح منه.. وماخذيه بالسياره..

كعدت ابجي اتندمت عل الساعه الحبيته بيها ودمرته ودمرت نفسي.. جنت اعرف هذا الزواج ميصير وهيج ممنوع ليش جازفت وحبيت..

وين جان عقلي من حبيته.. ليش ما فكرت.. ليش ما اخذت بنصيحة من كالت لا تشمرين روحج بالنار..

واني شمرتها بكل غباء وحركته وحركت روحي.. يا الاه موتني ما جاي اتحمل..

انوب المشكله كلها درت بهلعلاقه.. بس بقو ساكتين.. كالو سترو علسالفه وعدلو وجها وخل تروح بزفتها..

عدلت نجوى مكياجي.. وكوه اداري عيوني من دموعي وامسح.. اجه ابويه يمي كعد كدامي..

شمرت نفسي بحظنه قبل ما يحجي.. بابا جاي اموووت بابا كلبي احسه نار تعبت..

-اعرف شجاي تحسين ومقدر تضحيتج.. اني هم جنت شاب ومار بهاي المشاعر

بس باباتي كبرنه وعرفنه الدنيا مو بس حب.. هواي اكو علاقات اهم من المشاعر والحب..

انتو هسه شباب وعقولكم محدوده بهذا الشي.. بس من تكبرون ادركون الحياة اكثر

اكو اشياء مو لازم نتخطاها.. بابا احنه من نمنعكم من اخطائنا مو لان انانيين ومنريدلكن الخير..

بس لان نحبكم وما نريدكم تتأذون مثل متأذينه.. بابا اليمشي عكس السير يتعب.. ومجتمعنه صعب ما نكدر نواجهه..

ومستحيل نكدر نغيره.. انبياء الله عجزت عن تغير المجتمعات وغضب الله عليهم ودمرههم..

وهسه مجتمعنه بابا هم تعب وما ينصلح الا يطلع شخص حاكم مثل نبينا محمد يكدر يغير العادات والتقاليد اللي توارثناها..

بنتي اصبري.. وادعي من الله يا بويه يوفقج و يوكف وياج.. جاي يحجي واني ابجي.. كالو اجت الزفه

احس وكف كلبي.. عمي الثاني كال هذا بعده موجود بكر.. كاله الثاني.. ما يسوي شي لا تخاف حلف ما يتقرب كال بس اشوفها..

يحجون هيج يربي اني شيضل بكلبي.. اكدر اطلع كدامه وامشي ويه غيره.. اخخخخ ربي ارحمني..

مسحت دموعي.. ودخل عمار وهمه يصيحون هاي الرادها وهاي التمناها .. بس اني ما رايدته والله..

كعد يمي.. بقو يصفمون.. اني مدنكه ابد ما شلت عيني.. همس بأذني ها يحلوه شبيج.. ليش تبجين..

كتله دا ابجي على امي راح تبقى وحده.. كال والله شوكت ميعجب تعاي الهم بس بلاها دموعج..

هزيت راسي. شوي وكومونه..احس رجليه كوه شايلتني.. لزم ايدي عمار وطلعت.. لكيت بكر واكف بعيد

وفاتح باب سيارته ومنتجي عليها ومخلي ايده على راسه.. اوووف ربي كله عمري ما انسى هاي وكفته وانكسره.

احس دمرته ودمرت روحي بس ما بيدي حيله.. ما اكدر اسوي كولشي.. صعدت السياره وعيوني تراقبه..

كامت عيونه تجري وهوه يباوعلي.. احس بيها عتب هووواي وكومه جروح.. تشرحه بس دموعنه..

تحركت السياره ومشت من يمه.. بقيت اباوعله من المرايا الجانبيه.. خله راسه علسياره ويدك بأيده عليها حيل

انهد حيلي والله.. دنكت ابجي حيل.. وعمار يكولي شبيج سمر قابل بعيدين اهلج والله وعد شوكت متردين اجيبج الهم..

احس العبره خنكتني اريد اصرخ الوجع ذبحني اخ الله.. ارحمني واخذني يمك يااارب تعبت..

مشو كالو تصوير.. كتله عمار بداعتي ما اكدر.. كال بس لقطات شوي مو هواي.. كتله تعبانه..

-سمر ميصير هيج بس شوي اعرف متضايقه على مود امج بس لازم ناخذ كم صوره

-وافقت انزل.. هوه نزل وفتح الباب اليمي اخذ ايدي ونزلني.. وكفت علمرايا وكف عمار ورايا.. يعدل بالرباط مال القاط مالته..

باوعت صارت عيني بعينه.. ابتسملي وغمز.. اهووو يارب والله مو متحمله.. كال شبيج فرديها عاد

كال تعاي اضحكج.. قبل لا يدخل الجيش علينه هههه.. اكو وحده مثلج جانت تبجي وما تقبل تتزوج .. ووو بليلة عرسها..

جاي يحجي ودخلت ام التصوير.. كال بعدين اكملج النكته مال متزوجين خخخخخخ.. صدك ضحكت على سوالفه ياربي.. ابتسمتله

حاوط اديه لخصري. وكال ادري خدود لو تفاح.. ضجت و

خرت منه.. حجت المصوره.. كالت رجعي اللقطه حلوه خل اخذها ورجعي لابتسامتج..

جان يكول اخ الله شكد مبخت.. راح تطلع الرصعات مره لخ.. كتله كافي ..

-اني شعليه هيه ام التصوير تكولج ابتسمي..

-ابتسمت ابتسامه كذابيه على كد التصوير.. وبعدها اخذ كم لقطه.. وكتله كافي عمار بعد ما اتحمل..

كال لا هاهيه عادي.. اخذت نفس.. ورجعت الكب على راسي.. و اخذ ايدي وطلعنه من الاستوديو..

كلها واكفه برا.. والموسيقى مشتغله والشاب فاتحين سياراتهم و يركصوون .. صعدنه.. ومشت الزفه للبيت..

وصلنه.. نزلنه.. ذبحو يم رجلي.. ومشيت من الدم.. كعدو.. واني احجي بكلبي معقوله.. خلااص بعد ماكو بكر بحياتي..

شلون اكدر اعيش.. ياربي شحاله هسه.. البنات يركصون واني اريد اصرخ.. بداخلي نار تحرك..

كملو الركص والعشا.. كالو زفو العرسان لغرفتهم.. لزمت ايد نجوى حيل وعصرتها...

كتلها ساعديني راح انفجر ما اكدر.. كالت سمر لازم تتحملين.. هذي حياتج الجديده انسي الماضي واطوي صفحته..

وابدي بحياتج جديده ويه زوجج.. صعدونه للغرفه.. احساس مؤذي من تحس انته ملك شخص تحبه بس مجبةر تصير الغيره..

دخلت وكعدت علسرير.. دخل عمار.. كمت على حيلي وتراجعت.. كال اهدئي شبيج.. كتله ابتعد

-شبيج سمر اني زوجج

-اكوووولك ابتعد..

-اوك .. بس ابدل ملابسي.. بدل ملابسه اني درت وجهي منه.. وطلع.. دخلت امي وخالاتي ونجوى يودعوني..

كتلها يوم ما متحمله هنا رجعيني وياج فدوه..

-هشششش هذا بيتج بعد اسكتي وطمي كلبج.. وانسي يمه انسي.. هاي حياتج الجديده تأقلمي

-يوووم ما جاي اتحمل وجوده وياي بالغرفه.

- اشششش شنو هلحجي الماصخ سمر كافي لعب جهال وهلسوالف بطليها رجلج اله حق عليج لا تضلمي بمشاعرج

-اريد اصرخ واكولهم اني من حق شخص واحد مو اكثر .. بقت بس دموعي تجري..

بوستني امي وصتمي ودعوني ونجوى دموعها ما نشفت وياي.. طلعو.. اني بدلت.. وكعدت..

دخل عمار.. حاولت اكون هادئه بس اديه ترجف.. هوه انتبه لرجفتي.. وكف يمي واني كعده منزله راسي..

باسني براسي.. وكال اهدئي لا تتوقعين اجبرج على شي.. انتي متكدرين.. اذا تعبانه عادي اخذي راحتج..

اهم شي عندي انتي.. شوكت متكونين مرتاحه.. اني ارتاح.. كتله شكرا.. كعد يمي.. ابتعدت..

اخذ ايدي اني اباوعله بخوف.. كال بس فهميني امرج شبيج.. اني صرت زوجج وسندج وكل حياتج..

شنو يأذيج كوليلي اني اطيبج.. كتله بس تعبانه.. كال تعاي.. كتله اتركني هسه تعبانه والله..

-ما اسويلج شي شبيج خايفه تعالييي

-تمدد وجرني يمه خلاني على ايدها.. اختنكت ما اكدر.. بقيت ابجي.. هوه يمسح على شعري..

-اشششش لا تبجين بس ارتاحي.. ما اريد ابتعد رغم اعرف مضايقج.. بس اريدج تتعودين على قربي..

-صرت ابجي اكثر يربي مو طايقه هلوضع خلصني.. هوه بقى يغنيلي.. ويمسح على شعري..

-بيدي امشطلك حبيبي وامسح دموعك بأديه .. اخ منك من جمالك حتى دمعك جاذبيه.. ادلل عليه ادلل ادلل عليه يا هبة ربي من السما واجمل هديه .

-يغنيلي واني ابجي واتذكر بكر من جان يغني.. شحجيلك مضيكات..خلكي الليالي.. يارب ساعده ينساني دخيلك..

عمار يمسح على شعري ويغني.. رغم صوته بشع.. بس حسيت براحه.. وبدت عيوني تغمض وتفتح..

لحد ما نمت.. فزيت بليل كولش .. الغرفه مفتوح ضواها.. وعمار غافي يمي على نفس الوضع..

وخرت ايده مني..ووخرت الغطى.. وكمت.. اباوع الساعه..4 ونص الصبح.. موبايلي ما اعرف وينه

موبايل عمار علميز.. اخذته.. ودكيت رقم نجوى وخابرتها.. الووو

-الووو هلا حبيبتي شنو بعدج كاعده.. اي عيني عرسان

-نونه فدوه لتحاجيني هيج البيه مكفيني..

-يا حبيبتي والله كلت اغير جو عليج.. كولي

-نونه كوليلي اخباره شنو ترى كلبي نااار..

-سمر انسي حبيبتي عوفيه الله يكون بعونه وينسيه هوه هم..

-يكون بعونه!!! ليش شصاير بيه كوولي

- هاا ااأ ما بي شي

-نجوى احجي الله عليج.. كعد عمار ويبوس ويبعد شعري ويبةس بكتفي.. من كمزتي منه.. انشمر الجهاز من ايدي واتفلش..

باوعلي.. شبيييج سمر راح تخبليني.. كلتي تعبانه وعفتج ترتاحين شنو مجبوره عليه احجي..

-عمار مو هسه..

-هاي ويه منو جنتي تحجين.. وباوع للموبايل مفلش.. شنو هلتصرفات.. ويه منو جنتي تحجين بليلة عرسج..

-ويه نجوى.. ليش .. تشك بيه حظرتك..

-حظرتك.. شبيج سمر.. تره بديت امل.. اريد افتهم وضعج شنو.. مو اول زواج هذا وتخافين وتتوترين

فليش هيج تعامليني ابرود.. بشنو غلطت وياج..

-عمار تعبت بزواجي الاول.. ومريت بضروف صعبه الله يعلم شنو جامت ضروفي.. احس ذاك زواجي كابوس..

اطلكت منه بس بقت الامهم بداخلي.. عمار تعبت وياهم هووواي.. مجاي انساهم .. وبقيت ابجي..

-اش اش كافي.. لتبجين..

-اعرف جاي اعذبك بس تحملني فدوه.. هواي اشياء بكلبي عاجزه اكولها الك.. بس توجعني..

-بس ارتاحي والله ما اريد شي.. عادي حتى لو اتاني شهر مو فد شي.. اه شي ترتاحين..

-خليت اديه على وجهي وابجي.. تقرب يمي.. اخذ اديه وبوسهم.. وكال بس لتبجين حبي كلبي يتكطع عليج من اشوفج هيج.

.

واخذني لحظنه.. ابتعدت منه.. كتله اريد اصلي..

-بعدها الصلاة مصايره

-ولوو اريد اشكي لربي.. وديني للحمام اريد اتوضى..

-تعاي كومي..

-ساعدني اكوم.. دخلت لاحمام قفلت الباب باوعت لوجهي بالمرايا.. اوف يمرايتي كوليلي شسوي تعبت..

مو متحمله غير بكر بحياتي.. بقيت ابجي بحركه واني لازمه المغسله ومدنكه.. ياربي ساعدني..

فتحت البوري.. غسلت وجهي بالمي.. اريد بس اهدئ.. نشفت وجهي.. ورجعت توضيت.. وطلعت..

لكيت عمار مطلعلي المصلايه .. اخذت حجاب ولبسته.. وكفت صليت ركعتين.. وكعدت اناجي ربي بصوت مبحوح ما اريد عمار يسمع

يارب ساعدني.. طلعه من كلبي دخيلك.. وساعده ينساني.. ربي دخيلك.. مثل ما زرعت هلحب بكلبنه ارجع شيله ورجعنه غربه ..

ربي وفقه واسعه وخليه ينساني.. ربي لا تعذبه اكثر اتوسلك.. انقذه من ذكرياتي واوجاعي وانقذني..

رافع راسي واديه للسما وابجي.. كملت.. صليت الصبح وكمت.. لكيت عمار غافي..

غطيته.. ورجعت كعدت على الطرف الثاني من السرير.. خليت راسي علمخده واباوع لعمار وابجي بصوت مخنوك..

طفت الكهرباء.. طفى الضوه.. صارت الغرفه ضلمه.. بقيت اتذكر بكر واراجع ذكرياتي وياه..

لما اتزوج وطلع يصرخ بيومها.. لو من جان يشيلني من ادين عادل ويخليني وره ضهره ويضرب عادل..

لو من يغنيلي ردت انساك واخلص من كلام الناس واتذكر دموع عيونه.. ابجي واني اتذكر متت يربي مجاي انسى شلون اعيش هيج..

بجيت لحد ما نمت.. كعدت الصبح.. على صوت الباب.. فز عمار.. كعدت.. ضل يباوعلي..

كتله شبيك.. كال لابسه كلابيه بليلة عرسج.. من يدخلون شيكولون.. كتله ليدخلون.. اطلع وكللهم جاي تبدل.. تكمل ودخلولها

هز راسه وكام.. اول ما طلع.. رادت تفوت اخته.. كاللها هسه شيماء دقيقه جاي تبدل.. ختكمل ودخلي..

لميت شعري.. وفتحت الباب.. دخلت اخته بوستني.. وكالت امج جابت ريوك جوه يله متانيتج..

هزيت راسي.. كالت شبيج باجيه شو العيون مورمه.. كتلها لا تعب عرس تعرفين هوسه جان واني ما اتحمل ضل راسي يوجعني..

نزلت وياها لماما.. لكيتها هيه وبابا بوستهم وكعدت.. ابويه يباوع لعيوني وصافن بيهن.. حيل مورمات والجفن احمر..

ولازم ايد بأيد ويعصر بيها ويباوع لأمي ويهز راسه..

حجت امي.. شنو يمه ليش هيج عيونج وارمه.. يمى انسي كافي.. لا تعلكين روحج بالماضي بعد هذا بينج وهذا زوجج..

كتلها يووم فدوه.. الصرخه هنا واكفه.. ابلعومي عوفيني بهمي ولا تحجين..

بس كوليلي شلونه..

-انسيه يمه لا تفكرين

-عليج تراب جدو بكبره احجي فدوه..

-لا تحلفيني هيج يمه

-عليج بداعة ابوج يمه كوليلي فدوه كلبي عليه نار

-بالمستشفى..

-كالت هيج انهد حيلي.. شبيه احجي لا تكوليلي سوه بروحه شي فدوه..

-ما بيه شي.. بس سكران وشارب هواي وباقي يصرخ ويبجي وواكع صاير عنده انهيار عصبي وهسه هوه بالمستشفى..

-خليت اديه على راسي وكمت ابجي بحركه.. كلهم انتبهو.. الا انتبهت لروحي.. فقدت.. كتلها اريد اشوفه..

كامت تخزرني.. كالو شبيها.. انتبهتلهم.. كالت امي لااا خطيه ابن عمتها هيه حيل متعلقه بيه وتحبه البارحه ناقليه للمستشفى..

-كالو شبيه.. كالتهم ما بيه شي.. حادث مال سياره وما متأذي حيل حالته هسه احسن.. بس سمر حيل تحترمه ومتعلقه بيه..

بقت تحجي وياهم واني كلبي ناااار يربي ارحمني دخيلك.. كاعد يحجون واجو مازن واهله ونجوى..

سلمت عليهم كوه ورحت لغرفتي.. خليت اديه على راسي وابجي حيل شسويت بيه ياربي دمرته الله ياخذني اوووف كلبي..

دخلت نجوى وامي.. وسدو الباب.. كتلها يوووم جاي اموت نقذيني. كالت وج كافي انسي كافي لا تفمرين بيه خل يولي..

كتلها مو بيدي يمه كولشي بيه يريده.. ا جاي اتحمل قربي من عمار يمه ما اريد غير بكر..

-وج اششششش شهرتينه اششششش كافي كتلج..

-زين خل نروح نشوفه..

-ممنوع..

-اني اكول العمار.. هميت ردت اكوم. لزمتني وضربتني راشي.. وكالن اصحي عاد اصحي اعقلي ..

انسي شي اسمه بكر بحياتج.. عمار وبس زوجح ولازم بس هوه يشغل بالج..

كعدت ابجي حيل.. والمصيبه كمت ابجي ودموعي نشفت.. بس ابجي ماكو دموع.. احس البجي يخنكني لان ماكو دموع..

ربي ارحمني دخيلك كافي.. جاي ابجي.. دخل عمار.. كال اذا تردين تشوفيه وبالج يم ابن عمتج اني اخذج اله بس لا تبجين..

امي كامت تكرص بيه وتكله لاا يمه.. لا تاخذها ابد.. عروس هيه والمستشفيات مو زين عليها تصير عدها جبسه..

مسحت دموعي. دخلت امه. كابت خاله كولي يا الله الولد منيت تكلج امج زين.. لا تخربين صباحية عرسج بالبواجي..

هزيت راسي. عنار حجه وي امه.. كاللها يمه راح اخذها لسليمانيه هسه.. خل ترتاح وتبتعد من هنا..

كالتله من حقكم يمه اخذ مرتك وروح.. كتله ماكو داعي.. كال لا اكو داعي كومي لمي ملابس اليه والج وخل نمشي..

بس كثري تره بارده هناك.. كامت نجوى فتحت الكنتور وطلعت ملابسي. كمت ساعدتها كوه.. كالت سمر افرديها خلااص..

هزيت راسي.. اخذنه ملابسنه. وكولشي نحتاجه.. وطلعت ويه عمار.. الطريق كله نايمه.. ما كعدت ولا بيه حيل اكعد

..

احس البجي هد حيلي.. وصل هوه اتفق ويه ناس.. انوب اجه.. كتله شنو.. كال استأجرت شقه النا نرتاح ..

دخلنه.. الشقه بارده حيل.. كال شغلي مدفئه.. شغلتها.. وهوه طلع..

البيت مفروش وحلو.. بس بعدت الشراشف البيض من الاثاث.. حاولت انضف بس ما بيه حيل

رحت للغرفه.. بس غيرت الشراشف ونمت.. ما كعدت غير على.. وجود همار يني.. ويحاول يتقربلي..

حاولت ابعده.. بس الى متى.. خليته ياخذ حقه واني مثل الجثه وياه.. وابجي بدون صوت..

راح للحمام.. كمت لفيت نفسي وكمت ابجي بحركه واني كاعده بفراشي.. لحد ما خويت. .

حسيت بيه طلع من الحمام.. نمت بساع وخليت الغطا على راسي. دخل هوه اجه يمي شافني نايمه..باس راسي طفى الضوه وطلع..

يربي اريد اتأقلم مو متحمله ابد .. بدلت ملابسي.. وطلعت لاحمام.. سبحت.. وطلعت يمه..

لكيته طابخ شوربة عدس.. ويكولي تره بس هاي اعرف اسويها.. ابتسمت.. كتله ارتاح اني راح اسوي..

المطبخ ضيق حيل وهو يمي.. تضايقت حيل من وجوده.. وهوه مهووس كأي رجل بداية عرسه..

حاولت ما اتذمر من لمساته وهوه يمي.. وكملت.. كاعد اسوي زلاطه.. بعد شعري وباسني.. من كد ما مزبر جسمي منه..

ثرمت ايدي ويه الزلاطه وكمزت بساع.. الدم يجري من ايدي.. وهوه يصيح هاي ليش هيج..

شسويتي.. يااا الله.. غسل ايدي.. واني ابجي. . بقى يعقم.. ويكولي من جرح اصبع تبجين.. كتله يوجعني..

وهوه كلبي اليوجعني مو ليدي.. لزم انفي وعصره ويكولي اموووت عليج.. احسج شفافه رقيقه..

يربي انوب يشوفني رقيقه.. هذا اشاف بيه وهيج حبني.. خرررب حظي.. كمت كملت الاكل وهوه كال بعد ما اتقرب اخاف تنجرحين مره ثانيه..

رحمه هم زين حس .. قربه يجرحني.. كملت الكل واخذته للصاله اكلنه.. انوب كال بدلي خل افرج بسليمانيه شوي تغيرين جو..

اخذني بالشوارع وليل وبارده.. بس ذكريات بكر براسي. واني اياوع الطرق والاضويه وصوته يرن بأذني..

كملنه رجعنه للبيت.. عمار نام.. واني بقيت كاعده.. طلعت موبايلي.. فتحته.. كومه رسائل من بكر..

جاي اقره بيهم.. اتصل بكر...يتبع

🌺🌺🌺🌺🌺🌺

من الصعب تترك شخص وتبقى ذكرياته ادق بكلبك..

افضل حل سوته زواجها..

لا جان عااااااانت هواي وكولشي محصلت.. صح انكسرو هواي.. بس هيه الدنيا هيج متنطيك الا تاخذ كل الحيل لعندك

اللي يكولون هيه انانيه.. بلله عليكم لو انانيه.. جان ضربت الدنيا بعرض الحائط واخذت حب حياتها وتنسعد..

اعتقد بينت بالقصه امها تلح عليها بالزواج.. وتعرفون شنو وضع المطلقه وشنو الاهانات الي تواجها بمجتمعنه الفاشل

صح شرحت القصه بتفاصيل لكن اكيد اكو هواي تفاصيل بالواقع واكثر من اللي دا اشرحه..

تدرون شنو حجي الناس عليها.. وعمتها شلون شهرت بيها..

الناس كامت تعيرها بعادل وزواجه.. ويكولون لوبيها خير ما اتزوج عليها بأول شهر من زواجها. لو بيها خير ما طلكها..

غيره وغيره من الكلام الجارح..

طيب شتنتضر من بكر.. ابوها ذممها وخيرها لو هوه لو هيه..

فلنفترض ابوها مات.. تعتقدون ينحل الموضوع..
احمد اصعب من ابوه

لو باقيه ما متزوجه لا بكر شاف عائلته ولا هيه ترتاح تبقى عايشه على امل من وهم

طيب كولولي الى متى يبقون على علاقه غير شرعيه تحت استار الليل ولا هوه مرتاح ولا هي مرتاحه..

بزواجها.. راح تتحسن امور وتتعسر امور.. والمتأذي الوحيد هي سمر

صح عمار يحبها لكن؟؟؟؟؟؟؟؟؟؟

تابعو وانتو تعرفون..

#زينب_ماجد

#حكاية_سمر ((الجزء الثاني))

،،،،،،،،،،،،،بقلم الكاتبه زينب ماجد،،،،،،،،،،،،،

البارت_15

كملنه رجعنه للبيت.. عمار نام.. واني بقيت كاعده.. طلعت موبايلي.. فتحته.. كومه رسائل من بكر..

جاي اقره بيهم.. اتصل بكر... والجهاز صوته عالي اريد اقفله ماكو..

كعد عمار..انطيته صامت.. كال منو.. كتله ماما..

-اي ردي

-لااا عادي باجر اكلمها.. احجي وكلبي يرجف .. اوف شسويت بنفسي.. طلعت رقمه وخليته بلائحة الرفض..

حتى شوكت ميتصل يلكاني مغلق.. خل يأيس مني ويشوف حياته.. كافي اعذبه واعذب روحي خلاص تزوجت لازم اكطع كل امل بيه..

واجبر نفسي على نسيانه.. بس شلون انسى ياربي.. مجرد فكرة انو اني انسى بكر تذكرني بكل لحظاته وياي واتعذب..

طلعت بره .. اخذت رسايله واقره بيهم.. سمر بس كوليلي ليش هيج سويتي مو كلتيلي ما اعوفك وما اتخيل روحي ويه غيرك..

ولج تكوليلي شوكت البسلك الابيض وتالي تلبسي لغيري ليش بس جاوبيني ليش .

اريد اقره دموعي يمنعني من الشوف.. شكدر اجاوب.. فتحت الرفض ودزيتله رساله..

انساني.. اعتبرني خاينه وانساني دخيلك وابتعد الله يوفقك.. دزيته ورجعته بقائمة الرفض..

شمرت الموبايل وخليت راسي بين رجلي واديه فوك راسي وابجي حيل الهي فدوه خليني انساه.. تعبت لا اكدر اصير اله ولا اكدر انساه

دا ابجي اجه يمي عمار.. مسحت دموعي واني مدنكه.. ورفعت راسي هااا.. كال شبيج تبجين..

كتله لاا هيج راسي يوجعني.. كال تعاي.. كتله عمار مو وقتها راسي صادعني..

-اي دتعاي هسه اني شمسويلج قابل

-اخذ ايدي ورحنه لغرفة النوم.. كعد هوه كال كعدي.. كعدت على طارف السرير..

اخذ راسي وخلاه على رجله.. وبقى يدلك شعري وراسي.. كال جاي ترتاحين هيج هزيت راسي اي..

فعلا احس راسي ارتاح وهوه يدلك.. لحضات وغفيت.. ما فزيت الا على تحركه هوه.. شال راسي من رجله وتمدد

كعدت.. كال تعاي رجعي.. اخذت مخده ونمت وخليت راسي عليها ونمت.. كال جاي اضايقج اني..

-هزيت راسي بعيون ناعسه وكتله لااا.. اخذ ايدي خلاها جوه خده ونام.. شوي ووخرتها منه..

ما حس عليه.. نام .. درت وجهي منه ونمت.. من انام فقط اتخيل بكر وياي وان كل هذا ما صار..

كمت هواي التجئ للنوم.. لان اشوف نفسي بالحلم وي بكر.. بس من اكعد والكى عمار اتضايق حيل

احاول انسى.. بس ما اكدر.. ما اريد انام علمود ما اشوف بكر.. ولا اريد اكعد واشوف واقعي.. صرت بموقف كرهت روحي..

خلص الاسبوع واني مطالعه ابد من البيت عمار مرات يحجي يكول لعد عليمن كلفت نفسي واجيت هنا لسليمانيه نشم هوا..

تالي مخلصتها نوم.. طلعنه بس للالعاب.. اخذت برد.. ورجعت تمرضت او مرضت نفسي علمود بس انام وابعد عمار مني..

فهوه اتجنب مضايقتي لان مريضه.. بس ما انكر خطيه ضل بس يداري بيه.. لكن المشكله كلبي شلوون..

احس مقفووول ابد مابيه مجال ومفتاحه بيد بكر.. شلون اخلص نفسي من هيج حياة.. احس داخلي سجن ما اعرف شلون اطلع منه

كملنه الاسبوع رجعنه للبيت..

وهنا بديت اتعرف على عالمي الجديد اللي شمرت نفسي بيه..

اول ما فتحنه الباب ودخلت.. وما احس الا مكناسه انضربت بوجهي.. خليتي ايدي واتذمرت..

باوعت.. جهال ثنين ولد يخوف ويركض وره الثاني.. باوعت لعمار كتله منو ذوله ..

-اطفالي... عبودي .. ولودي تعالو بابا

-اجو يمه بوسهم وكاللهم هاي ماما جديده اسمها سمر..

-ابتسمتلهم.. وليد سلم.. والثاني دنكت ابوسه ضربني كله براسه على انفي وشرد.. حيل توجعت..

-سمر اني كتلج عندي طفل مجنون..

-هزيت راسي واني مخليه ايدي على انفي .. اللي اكتشفته هوه مو بس مجنون هوه منغولي

والمناغله درجات.. اكو بيهم الفاهم والعاقل لكن يبقى عنده تصرف طفولي.. واكو لا مثل المجانين..

عبد الله منغولي مجنون.. دخلت.. سلمت على امه.. حجيه بعمر ال65 سنه.. و اخو عمار مسلم.. طالب اعدادي..

واخته ارمله وعدها 3 اطفال 2 بنات وولد.. والبقيه متزوجات بس بنفس الفرع.. واكو اخ اكبر من عمار عازل ابيت بعيد عنه اسمه حمزه..

سلمت وكعدت.. امه بسرعه نبتني..

-يمه سمر بعد هوه البيت بيتج وانتي طلعتي السبعه..

-اي

-شنو اي

-كملي حجيج دا استمعلج

-لا هوه جاي اكلج البيت بيتج صار بعد حاولي تساوين بين البيت والدوام..

-هااا .. عرفت تقصد الشغل.. كاللها عمار يوم هسه خل ترتاح من السفر طريق سليمانيه يتعب وباجر تبلش وياكم..

-انته اطلع منها عيب.. لا تدخل بسوالف النسوان..

-عرفت هاي ساميه نبر تو هنا عندي.. الله لا ينطيج ساميه حتى هنا لكيت شبيهتج..

-صعدت من يمهم.. لميت غراضي ونضفت غرفتي واني تايه بوضعي وافكر ابكر وشصاير بيه هسه..

لازم اخابر نجوى تشوفلي اخباره.. اجيت اخابر.. وتركت الموبايل لااا لازم انساه..

دا افكر.. دخلت شيماء.. اكلج سموره ما تكومين وياي

-وين

-نغسل الفرش مال العرس لحد هسه ما غاسلتهن.. بس اني بالبيت وتعرفين الوالده جبيره

-اي بعيني هسه انزل

-اي فدوه العينج حبيبتي

-لميت الغرفه بساع وعطرتها وطلعت.. نزلت لكيتها مطلعه 5 زوالي وحده فوك الخ ومنكعت

هن.. وشامره تايد..

باوعتلهن.. اجيت اغص.. الدنيا بارده تجمد مو مال اغسل هيج.. وحتى جاره مي من الماطور بارد يجرش حتى مو دافي..

بس سكتت عيب احجي.. شمرتلي الفرچه وكعدت اغسل.. اباوع شيماء ماكو.. بس اني اغسل..

صحت عليها جان تكلي يااا فدوه الكلبج امي صاحتني الحجيه ما تقبل تكعد وحدها الا اكابلها كمليهن وحدج ولو اتعبج..

بقيت صافنه.. هزيت راسي.. وغسلت غسلت لحد ما حسيت حيلي انهد واديه ما احس بيهن من البرد..

وهذا عبودي تعبني كل شوي يشمر تايد واغسل وراه.. كملت لميتهن وغسلت الطرمه وصعدت..

اخذت ملابس ورحت سبحت.. كل شوي ينزل المي البارد عليه واستحي اصيح.. لعبت نفسي. اثاري جنت عايشه بخير واني ما ادري

كملت كوه وطلعت.. لكيت صوبه بالممر.. اخذتها وشغلتها بالغرفه.. وكعدت ادفه عليها..

شوي وما احس الا صياح كاب بالبيت.. طلعت مسلم يصيح وخابص الدنيا.. العرفته يحجي الصوبه ماكو..

كتله اعتذر اني اخذتها.. باوعلي وكال اكوم ادفرج.. منو كالج تاخذيها ممنوع توصلين لغراضي بنت الكلب..

بلعتها وسكتت .. طلعت الصوبه اله.. جان يشيلها ويكسرها.. ويكولي مدام شغلتيها انطيني فلوسها..

كتله ليش كسرتها.. يكولي اشتريتها ب150 الف وانتي تشغليها يله انطيني 150 الف..

بله هذا شحجي وياه.. لزمني من ملابسي راد يضربني لزمته امه كالتله المره عروس علكيفك شويه..

وصاحت بيه طبي جوه.. دخلت وسديت الباب.. وفقط اتذكر شلون بكر من جان عادل يضربني ويشيلني من اديه ويخليني وره ضهره..

ويدافعلي.. كعدت ابجي بحركه عليه.. اخ يا كلبي ربي موتني وريحني دخيلك تعبت هاي هم عيشه..

جاي ابجي ودخل عمار.. كال شبيج.. كتله ماكو شي بس اخذت الصوبه ادفيت عليها مسلم هيج وهيج سوه..

كال هذا نحس بحاجته لا تتقربين يمه. كتله شمدريني عبالي مثل بيت اهلي كل حاجه بالبيت متاحه للجميع..

دنحجي وجان تدخل شيماء سمر كومي ساعديني بالعشا وطلعت بقيت صافنه..

كتله اكولك.. اهلك ما عدهم شي اسمه دك الباب قبل الدخول

-شبيها يا سمر قابل وين داخله غير غرفة اخوها

-بس احنه متزوجين والنه خصوصيتها.. وحاليا عرسان يعني ممكن تدخل علينه بوضع مو لائق

-يا لائق سمر بروح اهلج عوفي كلام المدرسين هذا هوه اني شايف منج وضع مو لائق علمود تدخل اختي وتشوف

-هذا مو عذر.. وبعدين شتقصد انته اشايف مني.. شتريد مثلا ..العليا دا اسويه

-هااا انعم الله لعد اذا هيج..

-عافني وكام.. هذا شبيه.. هوه بس ناقصها انته.. وتكمل عليه..

كمت نزلت للمطبخ.. لكيت عمار طب كبالي.. كالت هذا عجين مال كباب سويته كليه..

كعدت اكلي.. وعمار ياخذ ومسلم ياخذ.. تضايقت.. بس ضحكت.. اتذكرت لما جنت اكلي وبكر وعادل ياخذون ويحركون كلبي..

اخ الله صرت اتحسر حتى على ذيج الايام.. امده حظي اي والله.. كملت.. كالت الحجيه بس هذا الكلفتي نفسج بيه يا عروس

كتلها هوه العجين كله سويته وكليت وياه طماطه شسوي اكثر ماكو شي بثلاجه..

-يعني قصدج احنه فكور

-لا مو هيج خاله بسسس---

-هوه شنو بس تكولين ثلاجتكم فارغه

-يعني كلمن ثلاجته فارغه فكر.. الموجود سويته شأكدر اسوي اكثر..

خليت الصينيه بالكاع وصعدت.. اجه عمار.. كال ليش تحجين هيج ويه امي.. كتله انته وياي لو ضدي

-اني وياج بس ميصير تحجين هيج وياها هيه حجيه جبيره احترمي

-درت وجهي منه بنرفزه واتغطيت ونمت.. حاول يتقرب يمي.. متنعت لعبت روحي منهم كلهم..

كعدت الصبح.. كعدته.. هوه كالب وجه.. شلون منعته.. مهتميتله.. كمت بدلت.. كتله تكوم توصلني لو لا..

كام يبدل بدون ميحجي وياي.. اني عفته ونزلت.. جان الحجيه تكولي غسلي مواعين العشا قبل لا اطلعين للدوام..

بقيت صافنه هاي ما غاسليهن من البارحه متانيني.. كتلها مبدله كامل خليهن من ارجع..

كالت شنو متعلمه ابيت ابوج علخيسه تخلين المواعين وتنامين..

-واللهي ماما معلمتنه اللي ياكل وميغسل مواعينه فهذا فعلا وصخ.. حجيتها وطلعت..

طلع عمار وراي.. عاقد حواجبه ومعاجبه الوضع.. عفته مهتميت.. صعدت.. اخذنه ست نرمين والطالبات ووصلنه للمدرسه..

نزلو.. كال يله نزلي.. كتله من شنو متضايق.. كال ماكو شي.. كتله عمار انته كلت راح اتحملج..

-واذا كلت اتحمل اطيحين حظي

-حشاك.. اسفه.. اوعدك اتغير بس ساعدني.. ابتسم ومد باسني بخدي وكال هاي ولا يهمج يله روحي موفقه..

من باسني.. ووخر اللي تفاجئت بيه بكر كبالنه.. بقيت صافنه حتى ما سمعت عمار شكال. بقيت مصدومه واباوعله

انتبهت على عمار وهوه يصيح يله انزلي خل اروح شبيج..

انتبهت.. ونزلت.. ودموعي اتجمعت بعيني.. لف عمار وراح.. شفت بكر متجه اليه. اسرعت ردت ادخل المدرسه

جان يلزمني من زندي حيل ويجرني.. كتله رجاءا بكر اتأخرت لازم ادخل.. لزمني من وجهي حيل ومخلي عيونه بعيوني..

واحس نار يطلع منهن من كد عصبيته..

-عبالج اخليج تتهنين ومحمد اهجم حياتج هجم.. واخلي هذا النعال الاسمه رجلج يدمرج تدمير بس اصبري..

وشوفي انتقامي منج شلون راح يصير.. الا كل كسره بكلبي اخليها تهدم حياتج.. وما ارتاح ا