بس اعرف مراح يكدر يواجه المجتمع ويتغلب عليهم.. الا نكسر العادات ونصير لبعض..

وبهلحاله لازم اتبره من امي واهلي ويتبرون مني.. ويمكن يرجعون يهدرون دمي..

-سمر اذا اطلقتي بعد شعليهم..

-ما ترهم نونه .. صعب اتزوج اخو طليقي.. منو يتقبلها.. لهيج خايفه من حبه.

-والله يا سمر انتي جبانه..

-باوعتلها.. وكتلها مو بيدي اخاف.. بس لو اطلقت لا خلاص لو اعرف اهد الدنيا ما اكدر اعوفه بعد..

-تتزوجيه..

-طبعا.. يجي يخطبني من اهلي.. وكدام الناس لو النلس رفضت تجمعنه ذاك الوقت.. اكسر بالناس وبالعادات واخذه واتزوجه..

وتالي اهلي يقبلون ..مثل متقبلو بيت جدي بزواج امي.. وخاصه بكر مسؤل عن بيت اهله ويتلوكوله..

متأكده يعارضون اول بدايه ،، وبعدين يستسلمون.. دنحجي ورج موبايل نونه..

-وج. ميزو ديخابر اشوون..

-شلت راسي. امي وابويه نايمين.. كتلها على كيفج كومي.. كمنه على كييييف مثل الحراميه..

وطلعنه من البيت رحنه للحديقه الخارجيه الوره البيت.. الجو جان حيل حلو الشهر الخامس..

كعدت نونه تخابر مازن واني خابرت لبكر.. سده بوجعي ورجع خابرني لان يعرف حديقه وما عندي فلوس خخخخ

بكر.. الوو

سمر.. هلا بكر

-هلا سمسم شو تأخرتي..

-مو تانيناهم ينامون وناخابر..

-منو اللي نخابر.. قصدج نجوى

-اي تخابر حبيبها..

-يحبها متأكده منه لو هيج..

-لا ناوي يتقدملها بس تأجلت للعطله..

-هاا علخير انشالله.. اكوول شنو سالفة التانكي والسحر

-والله يا بكر سالفه تحير العقل.. ما اعرف شلون اصدك حتى اخليك تصدك للان مصدومه..

-شنو القصه سولفيلي..

-عندي خاله تقره الجبين.. وتشوف اشياء وتكول هذا نور.. سولفتلي شغلات وانطتني مواصفات وكفت عقلي..

-شسولفتلج

-كالت اكو بنيه عدها شامه بخدها.. وبينج وبينها رجال ومسويتلج سحر. وهيه عاميه عادل عني

-اش اش اش سمر لا تحجي ما حاب اسمع.

-ليش.. ؟؟

-لان بكل بساطه ما امن بهلشغلات التافها.. وعادل عمره ما حبج.. جان يحب حنين..

-بس تكول هيه حنين مسويتله سحر

-هاي شبيج .. مثقفه ودارسه تأمنين بهشغلات التافها..

-والله يا بكر ثا اعرف علعموم مخسرانين شي.. اطلع الكالولي علي.. واسوي الوصوني بيه..

الفادني خير على خير والمافادني عادي..

-شوكت ترجعون..

-باجر الصب…. دا احجي و لمحت احمد من بعيد.. قطعت الاتصال بسرعه وخليت الموبايل جوه رجلي..

وندست نجوى حيل.. هم خلت موبايلها جوه رجلها بساع.. احمد دار وجها للجهه الثانيه وما باوعلنه .

كتلها كومي خل ندخل لا ننكتل.. كمنه على كيف.. لبدنه وره الشجره نسمعه..

يكول حياتي شبيج بس لا تزعلين.. والله جنت نايم وما شفت الاتصال.. باوعت لنجوى وهزيت ايدي..
خلينه يبتعد شوي..

وتراكضنه للبيت.. كتلها شفتي الشفيه.. كالت اي سمعته..

كتلها خل انام باجر ورانه طريق.. ومن نرجع امي تتولانه بشغل الفلبينيات... ونكعد نجلف بدون رحمه..

ضحكت.. كالت يله.. رحت للفراش.. اوووف هم هيج واطلق واتزوج بكر واعيش مرتاحه..

بس عود ياربي ترهم.. اتذكرت اركان.. وشلون يعامل زوجته.. وهيه الله ما يجرعها.. يشيل الطرشي الكباله

ويحطه الها لان تتنسه.. خرب حظي اي والله. هسه اني لا حظيت بركان ولا ابكر.. رحت لعادل..

شجابني عليه.. شخلاني اوافق.. يربي والله غبيه اني شلون اضل بهلغباء..

انشالله اتزوج بكر واعيش سعيده وياه.. وانسى كل هتفكير بوجوده.. بس وعائلته. اني هم نسيت نضال..

خطيه شلون اخذ بكر وهيه حامل.. يعني وحتى لو حامل.. حتى لو عايفه بكر جان هوه سافر..

اقبل بيه وعود اني احننه على ابنه.. كافي تفكير سمر نامي.. اي انام احسن 😴😴😴

كعدنه ويه صلاة الفجر كوه افتح عيني مشبعانه نوم.. صلينه وطلعنه للبيت.. وصلنه متكسرين..

كالت امي.. يوووي البيت كله تراب. كتلها يمممممنه فدوتج العراق من الشمال للجنوب اجلح املح كله تراب..

تعبانين مابينه حيل انضف بس انام فدوه😢.. ابتسمت.. وكالت عابت بجيتي بوجه بساع.. روحن نامن..

ب12 اكعدجن هاا.. كتلها ماشي.. تراكضنا اني ونجوى.. اخذت كيمونه وبجامه منها لبست وكبل انبطحت بالكاع ونمت..

ما كعدت الا على صوت امي.. كالت يله كومن كافي نوم الساعه 3..فتحت عيني.. كوه الضوه بيها..

شفتها كاعده كبالي.. ضحكت.. ارتميت بحظنها وبست خدها.. كتلها خره بالعيال لا ابو الرجال.. والله ماما شوفتج هيج كل يوم تسوه الدنيا..

ضحكت.. كالت الله يخليج بنيتي.. بس كومي اريد احجي وياج.. كتلها كمت.. كالت بدلي الكيمونه لا يجي احمد ويشوفج هيج يتسودن..

كتلها غير بغرفتنه يا امي.. كالت هسه عوفينه.. راح اخابر عمتج ساميه ..

-اوو لا هله ولا مرحبا بوجه الفكر..

-عيب استحي.. ميصير تحجين هيج..

-يمه شايفه اشوفتني من ايام سوده. بس الله يعلم بيها..

-هسه عوفينه من هسوالف يا يمه.. اريد اخابرها على موضوع السحر..

-يوم هسه تبليني بيه اني وتكول هيه مخليته وتفرها عليه..

-لااا اكعدها كبال ابوج هيه تخجل تنطي ب

بيها..

شكرتها.. اجت هيه ونسرين للبيت يشوفوني مرتين.. نسبيا حياتي ارتاحت..

حاجيت باجي لشواق على شغل بلكت ادورلي. كالت اكتها مديرة ثانويه راح احجيلج وياها بلكت تتوسطلج وتعينج بالمدرسه مدرّسه..

كتلها علواااا اكونلج ممنونه..

فد مره الساعه 12 الضهر اندكت الباب. ماما جانت بالحمام طلعت اني. اكو رجال.

كال اني مبلغ من محكمة الكرج كتله تفضل.. كال تفضلي هذي ورقه طلاق سمر فرحان..

صفنت بوجها.. كال موجوده هيه.. خل توقعلي.. كتله اني.. كال هااا وقعيلي خويه خل اروح .

وقعتله.. واخذت الورقه.. عادل مطلكني اصلا قبل لا ارفع الدعوه.. معقوله .جريت الموبايل من جيبي..

وخابرت بكر..

-الووو

-بكر احزر شنو بيدي

-شنو ؟؟

-بكر ورقة طلاكي من عادل بيدي

-ش شن شنو لا لا لحظه .. شنو كلتي..

-هههه اني اطلكت بكر

-هههه ههههههههههه ههههه ياااااا رب . شلون وشوكت صار هيج..

-ما اعرف هسه اندكت الباب وانطوني الورقه يربي والله فرحان تكول سجن وانطوني افراج

-علخير سمسومه يارب اشوفين السعاده وكل خير..
-ما اريدها ويه غيرك..

-ههههه ولا اني..

-يمكن اني اسعد وحده بطلاقها.. شفت ماما طلعت. غلقت الجهاز وباوعتلها..

-منو دك الباب..

-مبلغ انطاني ورقة طلاقي..

-اخذت الورقه وضحكت.. وكالت انشالله تلكين الاحسن منه.. بس شنو لا غايب ولا ابد.. هيج حاف..

-ماما بس خيفكني واني ارتاح لا اريد فلوس ولا ابد..

ساعه ودخلت نونه من الدوام.. تلكيتها اركض واحظنها واكولها اطلكت اطلكت اطلكت هله هله.

-لا بربج صدوووك .. ايييييي واخيرا…

-لج تعاي نركص اني نذرت اركص هجع بس اطلك

-هههههههههههههه

-جيبينه سجينه ههههههه رحت للمطبخ جبت سجاجين وكمت ادك لوحدي واركص ..الوجن الوجن يما يا يا يمه ويهواي الووووج اني هههههههههه

-ربي يديم الضحكه سموره فرحانه بضحكتج والله .

-حظنتها وكلت الحمدلله.. مر اليوم وسوينه كيك وعصير واحتفلنه اني واختي ونخابر مازن ونضحك..
ثاني يوم.. وكفت سياره حمل بالباب. اندكت.. طلعت امي. اثاري بكر ماخذ غرفتي القديمه الاشتراها الي..

وكل ملابسي وغراضي.. فرحت بيهم.. فرغنه غرفة نونه وطلعنه السرير ابو النفر والكنتور الصغير

ونضفنه الغرفه ودزينه على نجار نصبلنه الغرفه. وكمنه انام بيها اني ونومه كولش مريحه وتخبل صارت ..

احس فعلا جنت مسحوره وارتاحيت.. وره ايام.. خابرت باجي اشواق وكالت حاجيت اختي عليج وكالت خل تجي محتاجه مدرسة انكليزي..

فرحت حيييل بالخبر.. رحت راجعت وقدمت اوراقي.. كالو الاحد الجاي تعاي داومي..

حجيت ويه احمد وكتله هيج وهيج.. كال بشرط نص الراتب الي.. كتله اي عادي هوه اني اشتغلت علمود اعينك..

اخذ نص الراتب فدوه الك.. سكت. ما حجه.. رحت لامي.. كتلها يوم اريد اروح للسوك اشتري ملابس..

خو ما اداوم بملابسي القديمه.. مدرسة انكليزي وهلله هلله وملابسي محلوه

-يمه ما تشوفين حالتنه بالكوه يا سوك.. دبري حالج بيهن وعراتب الاول عود اشتري..

-كتلها يوم هسه اني صار شهر كاعده عنا ما طلبت منكة الربع. عاد بس 100 اروح اشتري حجابات احذيه.

شنو احذيتي قديمه والله. حتى مكياج محتاجه كومه..

-شسويلج قابل عدي وما انطيج .. سمر يمه اقنعي بالعندج ولا تتبطرين..

-يووم شتبطر لخاطر الله .. مو حتى روحي لعبت.. صار شهر هنا كاعده تكول بنكلاديشيه اشتغل ليل نهار وربع نستله ما ادزولي عود ليش..

-اكوم منج انتي هواي تلغين..

-كامت.. نزلت دموعي.. شبيه حظي عود هم مول البنات البس واتنهى اووف ربي.. اجت نونه..

-سمر لتضوجين والله احنه نتلابس وملابسي جديده شتردين اخذي قابل بيناتنا فرق احنه..

هزبت راسي واني ابجي.. اتصل بكر رفعته.. كال الوو..

-الوووات يا سمسم.. شلونج..

-زينه

-لا والله مو زينه شبيج.. صوتج ما يعجب.

-رحت راجعت علتعيين الكالتلي عليه باجي اشواق..

-اي وشنو ما قبلوج..

-لا مو ما قبلوني قبلوني بس

- بس شنو..

- حجيت بكلبي اذا اكله متاجه فلوس راح يكولي اني اوديلج.. عيب ما اريد منه..

كتله لاا بس تعرف احمد. شرط نص الراتب اله وبقى يحجي ويغلط وكلام زايد كلعاده..

-ومن هاي ضايجه.. سمر تردين فلوس اوديلج ما عندي مانع شكد ياخذ منج احمد اني انطيجياهن بس لتضوجين..

-لااا عادي والله خل ياخذ الراتب 600 اله 300 والي 300 كولش كافي عليه..

بس لان انطيه ومو بعينه لهيج متضايقه..

بكر.. سهله لتضوجبن نفسج ؏ كولشي خليج قويه..

-انشالله اصير قويه يله اروح باي

-سمرر

-هاا

-اقسم بلله مو هذا المضوجج .. انتي مو ماديه ومتهمج الفلوس احجيلي شنو مضوجج

-عود ليش بس انته تفتهمني وتحس بيه. . بجيت

-سبق وكتلج انتي بنيتي . حبج صار بكلبي 8 اسنين اكو ام ما تعرف ابنها شيحس..

-كتله اي امي..

-اغااار

-شنوو

-اغار تكولين امي.. اني امج اني ابوج اني اخوج اني سندج شتريدين اكونلج.. ما اقبل غيري يصير بحياتج نبر وان

-ههههههههههه يول فديت امي و ا

ينه كدامه.. واسولف وياها على كل الكالوه النه..

وعمتج تأمن بهيج سوالف.. وتحبهن ودوم تحجي بيهن.. بس الامانه لله ما تتعامل بيه..

-بكيفج يوم.. طلعت الموبايل من جيبها.. دورت اسمها وخابرت.. الو ها ام بكر اشلون خيه.. وسولفت وياها..

وسدته.. كتلها هاا.. كالت كومن بساع راح تجي هسه.. خل نمسح البيت.. كتلها يله.

طلعت فانيله طويله لبستها ونزلت.. اني خليت سطل ومسحت البيت.. ونونه راحت للمطبخ..

وامي خبطت كيكه وخلتها بالفرن.. انوب ركضت سبحت وخليت مكياج يخبل ☺ علمود ابينلها تره من فاركت وجهج الوصخ كل الخير لفاني 😝

عطرت ونزلت.. وكعدت يم بابا افرجله رجليه.. دكت عمتي الباب.. فتحتها امي.. ودخلت لابوي تسلم وتبوس راسه.

باوعتلي وتكلي ها ولج سميره جنج فرحانه بزعلتج.. كتلها مو زعل عمه مو زعل خلاص بعد طلاق فد مره.

همستلي.. تحلمين اخليج تطلكين من عادل وتنفردين بالثاني.. وكعدت.. كالتله شلونك فرحان خريت والله مشتاقتلك..

بقيت اباوعلها.. اي مو هوه بكيفج.. عفتها وطلعت.. صاحت امي.. خلن الكيك لعمتج وجيبن ببسي..

كالتلا لا والله ما اشتهي.. مسدوده نفسي.. كالتلها هسه تشوفيه ويعجبج وتاكلين.. حطيت الكيك بماعون وكلاص وقوطية ببسي..

خليتها كبالها وبدي اشيله واركعه بوجها.. بس سويت نفسي عود محترمه مؤدبه ☺

خليته كدامها وشفطت 3 كصات كيك عود ما اشتهي خرب بهبل اليلعب طنب شكد يهمبل..

كعدت اني وسولفتلها علسحر وشلون كاللنه السيد بالتاني ووره الكنتور وحتى طفلها الوكع والشرده الشردتها سمر من وره السحر..

.. وزودت عليها امي بهارات..وكالتلها يمكن حتى من وراها خربت بين رنا ورجلها وهيج ما منسعده من وره حنين..

عمتي حمت وكامت تسب وتغلط على حنين. كالت راح اروح هسه واشوف اذا صدك.. اشحتها لبيت الخلفها بنعال.

راحت عمتي.. وكالت اخابركم.. بقينه كاعدين يم بابا ناكل كيك ونشرب ببسي.. انوب كلت خل اشوف بكر اذا بالبيت..

اشوف عمتي شسوت.. صعذت فوك رمشت لبكر خابر.. كتله انته وين.. كال اني بالمحل.. كتله تكدر تروح للبيت..

كال شكو.. كتله هيج كلنه لعمتي علسحر ودلينها المكان الكاالولنه بيه الساده.. روح شوف صدك اكو وره الكنتور..

-سمر ما تبطلبن من سوالفج..

-بكررر فدوه فدوه لخاطري..

-اي دين لعد راح اروح ومن اوصل للبيت لشوف واخابرج..

-لااااا.. خليك ويايه تسولف ومن توصل البيت.. خلي هيتفون بالجهاز وخليه باذنك وسمعتي شيحجون. وانته اوكف وياهم..

- هههههه شهلفضول

-سوي الاكولك عليه بليييييز

-يابه شلون اموت ؏ خبالج.. ادللي هسه اروح..

-عفيه.. بقينه نسولف اني وياه. لحد ما وصل للبيت..

وصل للبيت..كال راح اضم الجهاز.. وكأنو مدا اتصل.. كتله ٱפگـيہ.. دخل..

عمتي تحجي ام السحوره هاجمه بيتي.. بنت ال* **** صاحت الله جابك بكر ذاك الدثو صاف ويه مريته..

كاللها شكو يمه.. كالت تعال ادفع وياي الكنتور .. ولك اروح للتانكي والكه بيه سحوره مرضتنه هجمت بيت بنت الكلاب بنت ال*******

حنين تبجي وتكلها عمه والله مو اني. وعادل يصيح سمر الساقطه تشمر سحورتها وتجين تشمريها براس هلمسكينه.. طبعا بت اخوج..

كالتله انجب يل مابيك خير.. اهمممداك يلدثو.. سمر صح سوالفها مكسره بس اعرفها ما تعرف بالسحوره وهشغلات..

بت اخوي مثقفه ودارسه مثل مرتك الملفيها من الشوارع الخايسه.. روح شوف بيت اهلها اكعد هدومنه تصير بيضه من الوصخ.

ملتهيات بالسحوره هيه وامها وضالات يبوكن رجوله امهات الرجوله ... اني اسمع وخربانه ضحك وفاتحه سبيكر وانونه يمي تضحك..

دخلت امي.. كالت هاا. كتلها اششش تعاي اسمعي.. كالت ليش تخابرين بكر.. كتلها دسمعي هسه..

صاح بيها بكر.. يمه تره ما الي خلك لهسوالف التعبانه.. تعاي خل اجر الكنتور وعوفينه من ذول..

راح بكر وعمتي بس تصيح وترزل.. جرت الكنتور واني بس الچكچكه مال الهيتفون اسمع..

لحد نا صرخت عمتي.. يماااااااااي ولكم تارسه البيت سحوره.. وراحت هدت على حنين تكتلها وتطردها بره..

وبكر يصيخ ورنا وعادل. ويبووو هوسه.. واحنه نسمع ونضحك وامي تهز بيدها.. وتكول ادري غابه ..

كتلها اي لعد شعبالج شفت المر عدهم والله.. كالت دسدي سدي لعبان نفس همزين خلصتي منهم..

وبالج تفكرين ابكر.. تطلكين.. وادورين شغل وشوكت ما تجي قسمتج تمشين.. كل علاقه اسمع بيج مسويه اذبحج..

-هسه بس خل اطلك وافتك.. غير اركص هجع والله..

-دعوفن. هسوالف. وكومن سون عشا..

-ماشي.. مر اسبوع واني بقمة الراحه.. احمد ما يباوع بوجهي. ويرزل مرات وما اهتمله..

بس اني علمود اكسب رضاه وارتاح.. اغسل اهدومه واعطرهن انضف غرفته.. احظر عشاه..

كولشي يريد مأمنته اله.. وشكد ميرزل اكوله تمون حبيبي انته اخويه الجبير.. يبقى يرزل ريروح..

شسوي مثل ميكولون لو حاجتك يم چلب كوله حجي چلوب .. ما عتدي حل للراحه غير اكسب احمد..

لان ابويه مريض.. خابرت باجي اشواق واتفقت وياها علطلاق وكالت راح ارفعلج دعوه.. واخلي محاميتي تقوم

بويه واخويه وسندي وكل حياتي..

-وفديت الضحكه اني.. هسه ارتاحيت من سمعتها

-هههههه بكر انته كولشي حلو بحياتي.. اليوم اللي ما تكون بيه ما احسبه من حياتي..

شسويت فيني يا اخي شغلت لي بالي. وعقلي وكلبي.. مرات احس روحي ثوله من كد ما اصفن بيك واشتاق لملامحك..

-هانت وربج هانت.. انشالله فد كم شهر اخطب واعلن ابحرب اما ان افوز بك حبيبتاً او اموت بحبك قتيلا..

-هههههه اسم الله عليك من القتل .. اموت لو صار بيك شي والله.. اجن..

- الله يخليج اليه.. يله راح اروح للبيت من اوصل اخابرج.. المهم ضحكتي..

-فديت كلبك.. باي.. سديته من عنده واني اتصل.. باوعت لنونه متمدده يمي.. وهيه تباوعلي..

- بمكالمه وحده حول دموع ضحكات مرسومه علغمازات..

-ضحكت.. كتلها عجيب هلبكر..

-هذا مو بكر هذا سحر.. ساحر بحيث قادر بلحظه يحول دموعج ضحك..

-الله يكتبه من نصيبي.. دا احجي.. اجتها رساله.. هيه كتلها شكو.. كالت لا ماكو شي مازن راح اروح اخابره.

كتلها وليش بره لا احد يسمعج.. كال ما اطول.. عجيب شنو اشتشرفت روما..

الليل كله تحجي ويه مازن براسي.. هسه خجلت.. عفتها ونزلت.. وبقيت اباوع مسلسلات..

لليل الساعه 1 نعست ردت انام طفيت الضوه مال الغرفه.. خابر بكر.. كال سمر اني جوه..

كتله شنووو..

-نزلي

-صفرت من الخوف لا انوب احمد موجود.. كمزت من مكاني اهرول..

رحت لغرفة احمد.. لكيته نطفي ونايم.. نزلت لاهلي فتحت الباب ماما وبابا نايمين..

ضحكت.. واخيرا راح اشوفه يارب والله مشتاقتله..

فتحت الابواب.. ورحت اركض.. اريد اشوفه.. فحت الباب الخارجي.. كاعد بسيارته مبتسم..

ومشغل اغنية الف حاء باء كاف احلى كلمه بالشفاف احبك خل يدرون ما دام احبك ما اخاف..

ضحكت واني واكفه بالباب.. اشرلي للكاع.. لكيت ضرف وعليه طابوكه.. شلت الطابوكه اخذت ابضرف..

لكيته بيه 500$ .. خليت ايدي على حلكي وفتحت عيوني حيل واضحك واباوعله هههه… يتبع

🌺🌺🌺🌺🌺

گولولها گلبي السبع
يرجف رجف يم طولها ♥️✨

#حكاية_سمر.. (( الجزء الثاني ))

،،،،،،،،،،بقلم الكاتبه زينب ماجد،،،،،،،،،،،

البارت_7

سمر.. اباوعله مبتسم ويأشرلي للكاع.. دنكت لكيت ضرف عليه طابوكه.. شلت الطابوكه واخذت الضرف..

فتحته.. لكيت 500$ خليت ايدي على حلكي وفتحت عيوني حيل واباوعله واضحك...

هوه يباوع ويضحك.. اشرتله تعال.. كال طبي بعدين اشوفج.. لا يطلع واحد وتصيرلج سالفه..

ضحكت.. سوالي بيباي.. لوحتله بايدي بيباي..وراح. يبووو شكد اعشقه.. بس منين عرف اني محتاجه فلوس.. ؟؟

اكو غيرها نجيوه .. اني الج.. صعدت.. لكيتها مطفيه التيبلام مالتها وتريد تنام..

دفرتها اكعدي لج اكعدي.. بكر شعرفه اني محتاجه فلوس..

-اني كتله..

-لج عيب استحي اطلب منه..

-ما قبل ضل يلح ويحلف الا تكوليلي سمر شبيها ضايجه.. جذبت عليه.. كال لا تجذبين وكولي الصدك.. فكتله علمود ملابس للدوام ..

-خطيه جايبي خمسمية دولار..

-لااا صدوك شوكت..

-هسه

-عزززه اجه هسه بربج..

-اي والله تفاجئت بس حيل فرحت بيه.. يبووو مو جن شفت وجها جن دخلت الجنه..

وكمت فتحت الضوه وامشط شعري واغني .. يا سلام يا سلام ادي ايه حلو الغرام..

-يااااه اليكول اول حب بحياتج..

-درت وجهي عليها.. وكتلها لج اي والله جنه اول حب بحياتي..

صح جنت احب اركان.. بس ما احس بهذا الاحساس اللي دا احسه ويه بكر..

من اشوفه هيج كلبي يكوم من مكانه.. يضل يرجف فرح وحب.. اجمل لحظات عمري هيه الحظات اللي احجي بيها وياه واسمع صوته..

بحيث وصلت لمرحله بمجرد ما اسد الخط منه اشتاقله.. والاحبه اكثر.. ان هوه يحس اكثر من هذا الاحساس اتجاهي..

بكر الجامد قاسي المشاعر.. مثل الطفل بيدي.. ومثل الاب حنيته عليه.. ومثل الام اهتمامه واحساسه بيه..

اركان ما جنت احس وياه هيج.. صح اركان اول حب.. بس ما جان يرجف كلبي يمه..

ما حسيت باهتمامه وحبه مثل اهتمام بكر ومشاعره.. لج نجوى شايفه من اتزوج واني حملت..

لج صدوك حسيته تحطم.. لو بس تسمعيه وهوه يغني شحجيلك مضيكات خلكي الليالي..

لج من يحجيها صوت الشجن والعذوبه.. بصوت سكران حزين ويبجي..

لو بس تشوفيه شلون لما جان يغنيلي ويعزف وعيونه تصير تلمع وتنملي ادموع بس يباوعلي..

دفع فلوس وراد يسافر ومن عرف بيه مختفيه نسى كولشي وبس اني بقيت اباله.. كوليلي وين الكه هيج رجال يحبني ويضحيلي مثله .

-يارب تنجمعون .. بس سمر والله اشوفها مستحيل الا تهربون يله.

عود مال بابا وماما واحمد يوافقون لو اهله يوافقون.. احسها مستحيله..

-والله ما اعرف.. هوه يخطبني على سنة الله ورسوله.. لو ما قبلو شسويلهم بعد.

بريت ذمتي من اهلي.. هم لازم يشوفون مشاعري يحسون بيه مو بس اني افكر بيهم..

لو ما قبلو.. اخذ جوازي ومستمسكاتي واعوفلهم الجمل بما حمل واروح وياه..

ضفرت شعري.. ومشيت طفيت الضوه ونمنه.. ثاني يوم.. كعدت ويه نجوى وهيه تبدل تريد تروح للدوام..

-سمر مو ترحين للسوك فدوه نروح سوه ماشي..

-ماشي بس تعاي اكولج شاكول لماما لو سئلتني منين الفلوس..

-صدوك والله شتكوليلها..

-تخبزني خبز لو كتلها بكر انطاني فلوس..

-اكول خابري صديقتج هاي المسيحيه.

-مرت كمال..

-هوه كمال اسمه..

-اي

-بس والله يخبل وهيبه جنه تيم حسن😍

-😬 هسه دكولي شاكول لمرت كمال..

-شبيج خابريها وكوليلها خل تجي ومن تجي تشوفج كولي الامي اداينت منها ومن استلم راتب ارجعلهياه.

-خوش فكره .. خل اخابره .. ولو هيه تكعد ب11 عود اني اخابر باجي تكعدها..

-يله باي اني اروح. اموواح👄

-امووواح👄.. طلعت نونه نزلت سويت ريوك لاحمد.. وخليته عطاوله.. اجه اكل وكام لا حمدا ولا شكورا.

انوب رجعت نمت ساعه وكعدت.. نزلت شغلت قران بصاله.. ماما جانت كاعده توكل ابابا

رحت يمهم بست راس بابا.. وصبحت على امي.. كالت سويلنه ريوك اني وياج خل نتريك..

كتلها ماشي.. كمت اسوي الريوك.. ودزيت رساله النسرين.. من تكعدين خابريني.

خابرتني بساع خطيه.. كتلها نسرين اشونج..

-بخير الحمد لله حبيبي شخبارج..

-والله تمام.. الاهل اشونهم كمال..

-واللهي زينين.. عود اليوم اريد اجيج امر عليج عندي موضوع وياج .

-واني هم خابرتج. علمود تجين ههههه

-ليش اكو شي..

-لا والله هيج مشتاقتلج وتدرين الطلعه ممنوعه عني..

-هااا.. اي نشالله وره الغدا كمال يوصلني لبابكم واشوفج ..

-هلا بيج يروحي.. سديته منها.. كالت ماما ويه منو تحجي.. كتلها ويه نسرين.. حتجينه اليوم الضهر وره الغدا..

-هلا بيها..

-يله تعاي نتريك كملت.. تريكنه اني وماما.. وكمت نضفت وكملت الغدا وسبحت.. اجه احمد صبيتله الغدا واخذت هدومه غسل وكوي..

وهوه ما فك وجه عليه.. دوم معبس.. دا اريد اشوف اليتزوجها هم هيج يتعامل وياها لو يصيرلها حظينه..

سويت شكرلمه علسرعه.. عيب تجي البنيه وكولشي ما عندي اقدملها.. بس ببسي استحي.. فسويت بأيدي وطلعت طيبه ..

فديته لمحمد اكل 5 ههههه.. وماما تصيح عليه.. تكله بطنك حتصير مي.. كافي..

كتلها

. ماما شاب مراهق.. يريد اكل شتردين منه خل ياكل.. وحظنته وبوسته..

لل4 اندكت الباب واجت نسرين.. استقبلناها اني وماما ونجوى كعده وسوالف وضحك..

لشوي كامت ماما لبابا صاحها.. كالت نسرين سمر اريدج بموضوع..

-تفضلي..

-سمر اني احبج واثق بيج وباجي هم تموت عليج وجايه اطلب منج طلب..

-تفضلي بعيني..

-اني رحت للدكاتره وعالجت هواي موضوع العقم عندي وتالي طلعت عقيمه فد مره.

وكمال تضايق.. بس ما حسسني اعرف هوه بنفسه طفل.. ويخجل يطالب لو يكول اريد طفل..

شكد ميحبني بس اعرف متضايق من شغلة العقم ويريد طفل .. واوضحلي بصوره غير مباشره ان عادي يتزوج ويجيب طفل ثاني ونبقى بنفس حبنه.

-والمطلوب مني شنو.. بشنو اكدر اساعدكم..

-تتزوجين كمال..

-صفنت بوجها وضحكت.. تحجين صدوك نسرين..

-سمر ما عندي غيرج والله اخاف يتزوج وحده وتغيره عليه واني احبه هوايه.

وانتي طيبه واعرفج واعرف اخلاقج.. راح نتوالم.

-اول شي اني للان مكملة عدة الطلاق مال عادل.. بقالي شهر واتم..

-ننتضرج عادي..

-اسمعيني.. ثاني شي.. اني مستحيل اتشارك برجال مع مره ثانيه..

-بس عادل هم جان متزوج

-وعادل مجنت اعتبره زوج.. بيوم زواجه جنت ابجي على بكر مو عليه.. وشغله لخ.. شلون اتزوج واني اريد بكر..

ما اكدر.. غير بكر يصيرلي رجال.. ما اتحمل هلفكره..

-بس بكر هم متزوج..

-متزوج بس كلبه يمي.. وزواجه مجبر عليه.. وبيه وبلاياي هوه ناوي يطلقها.. بس اني كتله حرام ابنك..

وكال بس تجيب ننفصل.. وهيه بكيفها تريد ابنها وامنله مصرفه.. او تكول اريد اعيش حياتي واخذ ابني..

-سمر عاد بس اتزوجي فتره واطلقي منه علكد حمل الطفل وانطينياه فدوه

-بقيت صافنه بيها.. بلله شكوللها.. كتلها نسرين احبج والله بس اللي اطلبيه مو معقول..

اتزوج واخلف واطلق لا وانطي ابني شلون ترهم.. وبعدين اروح اتزوج فتره واطلق وينحسبون على راسي متزوجه. ثنين

وهمه محد بيهم صايرلي زوج .. نسرين احبج بس دتضلميني بهيج طلب..

-بقت تبجي وتكول مليت والله اريد طفل والله ما قاسملي وما اكدر اخليه يتزوج براحته..

خاف ياخذوه مني.. بقيت اهدي بيها واكولها الله موجود ولتخافين وكمال خوش رجال ما معقوله يعوفج..

كتلها تبنو طفل.. كالت تعتقدين كمال يقبل.. كتلها اكو اطفال بالميتم عمرهم ايام.. روحي واخذي

كالت فكرت بيها بس خاف ميقبل يريد من صلبه.. كتلها دشوفي.. واذا هاي كوليلي اني احجي وياه ونقنعه سوه..

خطيه هدت وشوي وراحت.. كلت لماما هيج وهيج كالتلي وراايدتني لكمال.. كالت وليش ما وافقتي..

رجال يخبل وجيبه مليان وهيبه وتصيرين انتي الاول والأخير بس تخلفين منه..

-هاااا ماما شبيج.. بعدني عده ممخلصه وتكوليلي وافقي. وبعدين اني اي زواج ما اريد

-وشتريدين يمه.. تخزينه ويه ذاك..

-لا ذاك ولا هذا كل زواج ما اريد.. وخلص وبعدين اريد اروح للسوك هسه يله كومي..

-اهووو ما خلصنه من السوك كتلج ما عندي..

-مجاي اكولج انطيني.. عندي بس اريد اروح للسوك..

-منين جبتي ولج .

-اداينت من نسرين.. وعلراتب انطيها..

-اي وبعدين وره الزواج تعيرج تكلج مو جنت اداينج..

-يا زواج يوووم رحمه لالله شبيييج..

-ما اكدر اروح للسوك ابوج محد اله هنا..

-ما عليه شي.. خلي نجوى يمه

-ما تكدرله ابوج ثقيل لو راد حاجه تكدر تشيله وتوديه للحمام وهوه بطنه متأذايه اليوم ومصخن وحاله اليوم معاجبني..

ما اكدر اعوفه.. اخذي محمد وروحي وياه شعليج قابل..

-بعد احسن.. خل اشوف محمد.. لبست ملابسي.. وعدلت نفسي.. نجوى كالت وياج.. كتلها كومي.. بدلت

وطلعنه لساحه.. لكيت محمد واكف.. كتله تعال روح وياي لسوك.. كال ماشي امشن..

دخلنه السوك وسوينه هجوم كاسح.. شكو ملابس مكياج ساعات اكسسوارت.. ما بقينه شي مشتريناه..

ورجعنه.. احمد كالب الدنيا بالصياح شلون اروح ويه محمد.. اول ما دخلت ضربني راشدي كتله انته جنت نايم جان اخذتنه

كال انتي مطلكه واطلعين وحدج ويه ولد صغير. شنو ما كفاج العار الاجانه منج ساقطه تردين تصخمين وجوهنه..

وكام عليه ضربني واني اصيح و ابجي واتوسل جوه ايده وامي ونجوى ومحمد يبعدون بيه..

انوب لزم نجوى و هم نهاها كتل.. ويصيح الا أدبجن.. لزمته امي ودفعته وبقت تصيح وتغلط الله لا ينطيك

ولك خواتك ذن انته اخو لو عدو.. ولك فرحااان كوم فرحان شوف الذيابه المخلفها..

وابويه يصيح كوه .. واحمد يعيط ويغلط وصوته شعلوه ويصيح ك***اب الا اذبحهن والله..

اني استغليت صياحه وي امي جريت نجوى كوه.. بس تبجي وتصيح اريد اموووت ولا هلعيشه..

اخذتها للغرفه وقفلت الباب.. بقت تعيط وتصيح ما اريد عيشتهم والله ما اريدهم.. ولج شسويت ويضربني فهميني..

شغلطت.. كلما ضاج واجه فرغ همه بضربه عليه.. شنو خدامته اني.. الا صدك انهزم ويه مازن واكسر وجوهم..

هوه سمع كلمتها هاي… تخبل كال اليوم شيخلصها متي والله اليوم اذبحها.. واني ابجي وواكفه وره الباب واكولها..

سوده بوجهج نجوى

ولج احنه ناقصين.. ما كافي هلضيم حجيتي هلحجايه وبليتينه..

هوه يضرب بالباب ويدفع.. واني قافلته وراكفه وراه.. حاول يكسره بس الباب صاج كولش قوي ما انكسر الحمدلله

لحد ما نزل يم ابوي.. واسمعه يكوله هاي الثانيه تكول اريد انهزم ويه واحد اسمه مازن..

ولك يابه بناتك ك***اب خليني اربيهم.. اجت امي.. دكت الباب فتحته طبت وقفلت الباب..

بقت تحجي وترزل وتضرب بنجوى ورادت تليفونها وتليفوني.. كالت ممنوع بعد تليفونات عدجن..

بقينه مصفصفات بوجه بعض.. شلون لو انطيتها وخابر بكر وجاوب احمد يذبحني والله..

اخذت موبايلاتنه وحتى ما خلتنه ندز رساله.. يربي شلون والله لو خابر بكر.. انوب اني كاتبه عليه صمام الامان..

ورسايل كومه.. بس بيه رمز.. والرمز نهاية رقم بكر.. بس خاف يطلبون افتحه وهنا المصيبه..

بقينه كاعدات على نار اني و نجوى وهيه تبجي.. واني كوه اقوي بنفسي واهدي بيها..

هده البيت وكتلها ماما لا تفتحين الموبايلات ابد..

-اني قفلتهن وانطيتهن لابوج..

- يوم سويله اعادة تصنيع.. علمود ينمحي كولشي

-ولجن شمعزيات وشمصخمات وهيج خايفات احجلي..

- يوم ماكو شي. بس نجوى عدها علاقه بشاب بالجامعه وراح يتقدملها بس تخلص هلمرحله..

- منين هذا بقت نجوى تحجي وياها.. امي من عرفت بيه هيج ويحبها ويريد يتزوجها.. كالتلها ماشي ننتضر..

بس ممنوع تتواصلين وياه ابد.. انوب دارت وجها عليه.. اندارت عليه وانتي شمصخمه.. بقيت اباوع لوجها وابتسم..

-يعني شمصخمه.. بس اكو كلام بموبايلي مو لازم يشوفه احمد..

-ماكو شي ثاني..

-اكو بس مسحي احسن

- سمر شنو سالفتج انتي فهميني..

- يوم تفتهمين سالفتي بالوقت المناسب..

- بكر موو..

- سكتت واخذت نفس

-كالت مراح تبطلين. ولج الا تجيبيلنه مصيبه وتموتينه..

-والله محد اموتنه غيركم.. يوووووم خلي ابالج الشخص اللي بداخلي ما اعوفه..

ولا راح اعوفه.. ولو مقبلتو بيه والله من صدك اتمرد وكولشي اسوي.. وتعرفينه هوه ما عده شي يخاف منه. ولا اني..

فخليج ساكته افضل..

-انتي جاي اتهددين..

-لا اهدد ولا ابد.. والموضوع مو وقته لا تسويلنه سالفه هيه.. بس اقفلي الاجهزه وهذا هوه بعدين نتفاهم على غير امور..

-الله لا ينطيج راح تجلطنه بمشاكلجن .. اهمده بطني النكلتجن.. تفلت علينه وطلعت..

-ما ردينه عليه.. بس نزلنه روسنه.. سديت الباب وراها..

-وج شلون لو احمد فتح الموبايل ودك مازن..

-هسه مازن لو بكر يبووو غير ننذبح والله.. خنشوف شلون ندبرها..

لل1 بليل.. طلعت.. كلها نايمه.. احمد مطفي ضوه غرفته.. نزلت على كيييف.. فتحت باب غرفة ماما وبابا نايمين..

باوعت جهاز بابا علشحن.. رحت طفيت ضوه الممر علمود لو مديت واخذته ضلمه محد يشوفني..

اخذته وخابرت بكر وفهمته على السالفه.. كال بس ديري بالج على نفسج.. كارتونة جهازج عندي..

راح اروح اوديه للشركه انطيهم رمز التصنيع مالته علمود يتعطل ونخلص..

-فديت مراد علمدار علتفكير الجهنمي هههه… يله باي خل اوديه لنجوى تخابر مازن..

-ههههه ديري بالج على روحج سمر.. واني احاول شلون اوصلج جهاز ثاني وضميه. وتواصلو بيه..

-انشالله باي.. قفلته وكعدت نجوى خطيه تعبت من البجي لحد ما نامت.. احس اني اقوى منها لان تعلمت علقهر..

وصار عندي مناعه ما اهتم هواي من كد ما شفت.. كعدتها بساعه وكتلها خابري مازن بساع..

كمزت اخذت الموبايل وبقت تحجي بيه.. لشوي جابته. .اجت امي.. كالت ابوج شاف طول وحده منجن طبت للغرفه.

وكال صعدي شوفيهن.. كتلها محد من عدنه نزلت..

-سمر لا تلعبين وياي..

-ترددت انطيها الموبايل ما اعرف ليش.. بس غلطت. كتلها يوم مو احنه شبيج نجوي جانت نايمه..

-طلعت.. كالت ليش منطيتيها الموبايل كتلها خفت من خرب بحظي هسه شيرجعه..

سمعت احمد كعد ويكول لماما شكو.. كالتله هيج.. متت خوف من كعد احمد هذا ذيب راح يعرف بشغلة الموبايل..

بس نزل.. راد يشوف ابويه.. اني ركضت لغرفة محمد.. جان نايم خطيه فززته وكتله عمودي لو سألو على موبايل بابا

كلهم اخذته العب بيه.. كال ماشي ماشي.. وهوه منعس.. اول ما طبيت للغرفه.. سمعت صراخ احمد من جوه ..

موبايل ابوووووووي ويييييين.. باوعتلي نجوى بخوف.. كتلها عد محمد لتخافين..

طفينه ورقلنه الباب.. واحمد كام يدك ويغلط وصياحه ملى البيت .. ويصيح ولجن ساقطات..

يلوموني من اكول ما تصيرلهن جاره الا نذبحن.. نجوى تبجي واني ادعي وره الباب والخوف ماكل كلبي..

طلع محمد.. كاله شبيك احمد الدنيا ليل منا الجيران مكافي صياح والله فضحتونه..

كاله ولك خواتك ساقطات.. اذا مطلعن موبايل ابوي اكسر الباب وافلش الغرفه واطلعه.

كاله انته شبيك كلشي يصير خليته براسهن.. اني اخذت موبايل ابوي العب بيه.. هاك علمود هاي فضحتنه بليل..

فشل وراح نزل.. فتحت الباب بوست محمد.. طب هوه كال سمر صدك زغير اني بس ما اقبل تسون شي غلط ..

اني احبج لا تفشلينه بالمنطقه.. كتله شبيك حمودي متثق بيه

اني سمر.. ومو علمود شي..

انته متفهم وراح احجيلك.. نجوى وسولفتله على حب مازن ونجوى وان راح يجي يتقدم .. ولان مراهق ومهتم ومتفهم سوالف الحب.

كال علواا افرح لو اتزوجت وفرحت.. بوسته وكتله فدوه لعينك حبيبي احسن من ذاك الهمجي..

راد يطلع طبت امي.. كالت متفقه ويه احمد والموبايل انتي ماخذته. .كتلها ما سويت شي..

بس انطيت خبر لا تحد يخابر.. كالت مو بنات فلك ما تنكدرن ولجن شوي ثبتن شوي..

رزلت كلعاده وطلعت.. اصلا صارت عدنه مناعه ضد الغلط منهتم من كد ما نترزل.. سدينه الضوه ونمنه..

كالت سمر اشون وجامعتي.. كتلها اصبري تهدى الامور كم يوم وشوف وين توصل.. حتى لو تتغيبين كم يوم..

اني من اداوم اروح اطلبلج اجازه.. طمنتها شوي ونامت.. واني هم نمت.. ثاني يوم.. كهدنه كلعاده تنضيف وشغل..

للضهر اجه احمد كال فتحيلي موبايلج.. وكف كلبي من الخوف.. بس سويت نفسي ما عندي اي خوف وممهتمه..

جريت الموبايل.. فتحته.. شاشه بيضه.. محترك.. كال شبيه.. كتله هوه يشكل ما يشتغل.

وبكلبي اكول فدوه الكلب بكر سواها جان ادعبلت بالمشمش لولا عقله المدبر..

ضل يضرب بيه يريد يفتحه.. ما انفتح.. كتله احمد وغلاتك ما عندي شي.. اني ما عونت اخلص من شي لسمه زواج..

ارجع اسوي هيج.. اني بس اريد ارتاح.. وباجر اداوم وما عندي شي والله اروح واجي بطريقي.

ما رد عليه.. بس كال صيحي لذيج الساقطه.. خل تفتحلي جهازها.. بقيت واكفه.. صاح جاي احجي وياج صيحيها..

صحتها واني ين خايفه اكثر منها اجت.. كالتله ما افتحه.. لزمها من شعرها نريد نفرغها منه ماكو الى ان تخربطت من الضرب ووكعت بيده..

بقيت اصرخ وابجي واصيح وج نجوى كوووومي نجوى.. لك احمد تعال شيلها للمستشفى احمد..

يكول ومحمد ما اخذها الا تموت هاي الساقطه.. امي فرفحت وتصيح ولكن بتي ماتت الحكوووولي..يتبع

🌺🌺🌺🌺🌺

البشر من يتأذى يصيح اخ.. بس العنده هيج اخ شيصيح.. الله يلعن كل اخو ما يسند اخته..

.. متابعه شيقه..

#اعـاده_توجيـــہ_

#حكاية_سمر.. (( الجزء الثاني ))

،،،،،،،،،،بقلم الكاتبه زينب ماجد،،،،،،،،،،،

البارت_8

بقيت اصرخ وابجي واصيح وج نجوى كوووومي نجوى.. لك احمد تعال شيلها للمستشفى احمد..

يكول ومحمد ما اخذها الا تموت هاي الساقطه.. امي فرفحت وتصيح ولكن بتي ماتت الحكوووولي..

صحت بيها دكومي يمه كومي جيبيلها سياره راح تمووووووت كومي.. كامت تركض لبست عبايتها احمد وكف كبالها..

يكلها ما اطلعين اني اريد اغسل عارهن.. حتى هاي المطلكه اكتلها.. دفعته امي وشالت النعال وهدت عليه وتصيح ..

الله ياخذك ابن الكلب يلعن الساعه العاشرتكم بيها زمرة ذياب مو بشررررر.. دفعته واخذت عبايتها وركضت..

وصلت للباب.. طلع محمد جايب تكسي خطيه.. رجعتلي بسرعه… كتلها اروح وياج.. كالت ابقي يم ابوج انتي لا يصير بيه شي..

بقيت ابجي واكلها يوم فدوه خل اروح.. شالت نجوى هيه ومحمد وطلعت.. سمعت صياح بابا ركضت لغرفة ابويه.

لكيته واكع من السرير.. ويكولي شبيها اختج سمر.. كعدته علسرير عدلته.

- نجوى شبيها احجي..

- هذا ابنك الكلب موتها ..بابا نجوى وكعت ..ويمكن ماتت من وره هلكلب المايرحم.. حجيت هيج واحمد صار فوك راسي..

-ولج اني كلب ساقطه.. اليوم اشرب دمممممج والله.. لزمني من شعري.. وضربني..

دفعته حيل.. وكتله شرايد من عدنه شاريد كووووول ولك هيه بقت بس روحي املكها اخذها و خلصني..

ما عده شي اخسره واخاف عليه موتني وخلصتي منك ومن عرلم الزفر مثلكمليت من هلعيشه مليت..

اني ادفع بيه واحجي وهو يضرب ويغلط.. واكله بعد بعد موتني خلصني منك يا ظالم..

تعاركنه كدام ابويه.. وهوه يصيح بصوت ثكيل كوه يحجي.. الى ان تخربط.. ركضنا ثنينه انصحي بيه ماكو..

كتله مات من وراك والله من وراك.. موتت ابويه.. صرخ كاااااافي بت الكلب كااافي.. شيليه وياي للسياره..

دنك احمد خليت بابا على ضهره وركضت كدامه فتحت الباب.. والسياره.. صعدته..

كتله خل اجي وياك.. ما حجه وياي. اخذ بابا وطلع.. يربي على منو ابجي على ابويه لو على نجوى..

شلون يربي شلون.. ابويه بس لا مات.. اوووف نجوى.. بقيت ساده الباب وكاعده ابجي..

لا عندي موبايل واخابرهم واشوف احوالهم.. ولا اندلهم واروح.. يربي شصار بيهم..

من 4 العصر لل11 بليل ومحد موجود.. اجوي عمامي.. وجايبين ابويه.. بس متخربط الحمدلله..

كتلهم احمد وينه.. كالو اشتكت عليه نجوى واخذوه..كتلهم يعني نجوى بخير..

كالو.. قبل ساعتين صحت.. عدها كسر برجلها.. ونزف داخلي.. الكلبه كنالها لا تعترفين عليه.

ما سمعت ومن اجو سألوها كالتلهم اخوي احمد.. كتلهم حللل عساه بالموت انشالله.. وليش ما تشتكي..

كال عمي.. انتن صدك ممربايات.. كتله وليش ممربايات.. شسوينه.. انطيني شنو الغلط الغلطناه..

من يوم يومه يضربنه ويكتل بينه بسبب وبدون سبب.. شفت المر ويه عادل وما يقبل اطلك منه..

وعلمود الفلوس اتعين واساعده قبل بطلاكي.. هذا مو اخ هذا غظب.. بعدين صدت عيني على ابويه. سكتت..

مو لازم احجي هيج كدامه واضوجه لا انوب هم يوكع.. يربي بكلبي نار شكبرها على اختي هسه شلون بيه وين الكاها..

كتله عمو انطيني موبايلك اخابر على ماما.. اتصلت.. كتلها شلونها..

-شلونها.. راح اذبحها وارجع اموتها احسن..

-شبيج يمه البنيه تعبانه علكيفج وياها..

-ولج اكو اخت تشتكي على اخوها..

-بلله عكسي سؤالج وكولي اكو اخ يسوي هيج باخته..

-اكلج شتردنه.. تلعبن شلم بلم ويسكت.. تسكتين انتي الثانيه اجي افرك حلكج والله

- يمه شلعبنه.. واعدنه وطلعنه.. كسرنه وجوهكم.. شسوينه كولي.. شو متحملين المر من وراكم وساكتين..

سدته بوجهي.. رحت للمطبخ جبت مي وديته لابويه شربته دواه.. ونومته.. وهو يصيح احمد لو سجنتنه ما ارضى عليجن لا دنيا ولا اخره..

كتله لا تخاف بابا حبيبي انته بس ارتاح واحمد اكيد يطلع قابل يضل هنا بس شوي فركة اذن..

بقيت اعتني بابويه يومين.. بس صعب ويخجل مني.. ونجوى ما قبلو يطلعوها من المستشفى الا تتحسن حالتها وتتعدى مرحلة الخطر..

خابرتني امي.. كالت يمه تعاي هنا ابدالي.. ويه نجوى واني اجي للبيت بس ارتاح نص يوم وارجع بليل..

كتلها ماشي.. بدلت ورحت للمستشفى وصلت نجوى ذبلانه وجها صاير اصفر.. حظنتها وبجيت..

كالت سمر مازن.. كتلها عوفينه من هلحجي هسه حبيبه بس خل تتحسن حالتج الله كريم..

بس هاا صدك.. تنازلي عن احمد تره ما يصير نحبس اخونه.. مهما يكون اسمه اخ.. كالت بكيفج سمر تعبانه مابيه اجادل

رحت للدكتور حجيت وياه.. كال يجي الضابط وياخذ اقوالها وتنازلها ويفكون عنه.. كتله وطلعتها..

كال باجر او بعدها.. كتله دكتور اكتبلنه هسه.. كال ما اكدر لازم ننطيها علاجها.. ونشوف حالتها وبعدها نقرر..

كتله دكتور.. مغادره على مسؤليتنه.. كال بكيفكم.. سجلت مغادره.. ولبست نجوى ومشيت للبيت..

كتلها تحسين نفسج احسن.. كالت اي شوي.. صعدتها بالغرفه واهتميت بيها ودخلتها سبحتها.. ا

رتاحت..

لليل احمد اجه.. طب عليها.. اجت امي وكفت كباله.. كاللها سهله نجوى ولج انتي تسجنيني .. الا اعلمج..

عافها وطلع.. يبوووه شيخلصها.. نمت من وقت.. لازم باجر اداوم اتغيبت يوم واني بعدني ابدايتها..

كعدت ثاني يوم.. صح الاجواء محزنه بالبيت.. بس فكرة تعينت وراح اشتغل.. خلت بكلبي فرحه ونشاط..

سبحت ومكيجت ولبست.. بنطرون اابيض.. وستره سوده وبدي احمر.. ونسقت وياهم الحجابه ولفيته لفه حلوه..

اتعطرت وطلعت.. وصلت للمدرسه.. طالبات اشكال الوان.. رحت للاداره.. تكلمت مع المديره.

جانت ضايجه لان تغيبت البارحه.. بس سولفتلها على وضع اختي وتعامل احمد وياهاا..

اتعذرت.. كالت اشواق سولفتلي على حالتج.. و
كملت الشغل يمها.. وكالتي استلمي الجدول مالتج وبلشي..

كمت من يمها دك الجرس.. اصطفاف.. وكفت بالساحه.. والطالبات.. ينشدون.. موطني موطني..

اوووف يا موطني الى متى تبقى بناتك معذبات وشايلات الهم فوك روسهن.. المات رجلها وتحملت ثقل الاطفال..

واللي زوجها عاهه.. ويطلكوها وتصير هيه الضحيه.. والبنت العدنه مظلومه ومغصوب منها اقل حقوقها..

تحت مسمى عادات وتقاليد.. شوكت يا موطني تنصفنه.. دمعت عيني واني اباوع االاصطفاف.. شكد مشتاقه لايام الثانويه والمدرسه..

كمل الاصطفاف.. شفت الجدول اللي انطونياه.. اول درس عندي بصف خامس علمي ج ..

رحت دخلت الصف.. استاند أب.. وقفن.. اخذت نفس باوعتلهن.. سيداون.. كعدو.. اباوعلهم..

ما حجيت اي شي.. بقيت امشي بين الرحلات.. وبس صوت الكعب مال حذائي يطقطق بالصف..

والبنات يباوعولي واني اروح واجي.. دا امشي.. اجت بنت.. دكت الباب.. كتلها نعم..

كالت ست صفي اكدر ادخل.. باوعت لساعتي.. ب8وثلث باوعتلها من فووو ليجوه..

الجاكه مالتها لحد الركبه.. والقراصه مالتها بكد بغداد على راسها والحجاب مطلعه منه الكذله مشسوره ومنفوشه..

والمكياج خفيف واضح بوجها.. كتلها شافوج الاداره قبل لتجين لهنا.. كالت لاا..

-اتقربت منها.. انتي محجبه ..

-اي ست..

-اذا محجبه.. فليش مطلعه شعرج..

-موديل ست..

-هههه موديل.. بس بهلطريقه.. انتي لا راضيه الله ولا عباده.. لو تلبسي محتشم.. لو انزعيه.. عادي مو عيب.. العيب اذا تلبسيه هشكل..

-سكت.. باوعت لاضافرها.. طوال ومصبغات.. روحي للاداره يجيكوج وتعالي..

-ست بس هلمره فدوه والله بعد ما البس هشكل..

-باوعت للطالبات.. كتلهم اني مدرسه جديده هنا.. وما اعرف النظام بالمدرسه..

بس النظام السائد الاعرفه بالمدارس ميقبلون بهلوضعيات.. يا ترى هنا عادي..

كالو لااا ست.. كتلهم صبغ الاصافر عادي..

-لا ست..

-القراصه الجبيره

-لا ست..

-باوعتلها.. جان اشوف اكو ضوه يلمض من وره صدريتها.. اتقربت من يمها .. كتلها ارفعي اديج..

-ست فدوه بس هلمره..

-ارفعييييي اييييييدج..

-سحبت الجهاز من يم صدرها بخفه.. ورديت علاتصال.. الولد حجه.. اوف شلون طعم شفايفج تخبل اصلا بس رحتي مني اشتاقيتلج ادمنت عليج شلون بيه..

سديت الخط.. كتلها لو اخته يقبل تتأخر على دوامها علمود تقضي وقت سخيف مع شاب غريب..

بقت تبجي وتكلي ست والله بعد ما احجي وياه بس لا تكولين.. كتلها فوتي.. والجهاز راح يتسلم للاداره..

دخلت.. كتلهم باعولي هنا.. جديده هنا لكن احب امشي بنظام.. الطالبه التحظر درسي.. ما تخالف القوانين..

الكذله تنشال من الوجه.. الشعر تلموه.. مو اني اشرح وحدتجن الكاها ملتهيه تعدل بالكذله. وضاربه الوضعيه

ما احب هلشي.. تعاملكم اسلوبكم نظافتكم.. عليها مني درجات.. حتى لو راسبه انجحها لو كانت مؤدبه وتعاملها لطيف..

وتحظر وياي اليومي وبالها يمي.. وسوالف احب وهلشغلات اتركوها.. اهتمو حاليا بدراستكم..

انتو بعمر مراهقه.. ومن السهل ينلعب بعقولكم.. ادخلو الجامعه وبعدها حبو اللي تريدوه..

لان بذاك الوقت.. العقل راح يبلغ وراح تعرفن شنو تردون. وشنو مشاعركم.. بقيت احجي وياهن وانصحهم.. النصائح اللي ما اخذتها اني..

واخذت واعطيت معاهم وفرفشت الجو.. وهنه انطلقن يعرفن عن نفسهن.. بعدين وقفت الضحك وكمت اشرح الماده.

زين احسهم يستوعبون عليه.. للحظه نسيت اني منو ونسيت ضروف البيت وهمومنه.. التهيت بتدريس الطالبات..

لحد ما دك الجرس.. ما تعرفت كولش علمدرسات. للان احسهم غريبات.. كملت طلعت للبيت دخلت احمد يصيح..

اهووو هم رجعت لو فارشه بالمدرسه ونايمه هواي احسنلي.. رجعت بدلت وصليت.. صبيت غده تغدينه..

ورحت نمت.. نونه ما الها خلك بس نايمه.. ثاني يوم الصبح هم طلعت الصبح.. دا اشر لسياره ..

وكفت كبالي سياره.. بس حديثه مو مال تكسي.. بقيت ابوع على وضعها..

نزل السايق.. ووكف كبالي.. كال انتي سمر..

-كتله اييي.. منو حظرتك..

-سمر اني مازن.. صار 3 ايام اراقب البيت وشفتج دخلتي الضهر البارحه. واتذكرت كالتلي عليج نجوى تعينتي..

لهيج انتضرتج الصبح علمود احجي وياج..

-باوعتله.. يويلي شكله يخبل جنه طفل العيون شهل و

الشعر اشكر واللحيه شكره.. والخدود حمرر..

والوجه تعبان وشعره مبهذل مبين حالته تعبانه وحيل منقهر على نجوى. ذكرني ابكر من يتحطم علمودي..

هم هيج وجهه يتعب واللحيه واشعر هوسه.. بس الفرق هذا وجه منور.. بكر طافيه الكهرباء بوجها هههههه.. عابت احجي على رويحتي .

كتله هلا مازن شنو التريده.. كال اصعدي اوصلج للدوام ومنها احجي وياج.. كتله ٱפگـيہ..

صعدت.. ومشى.. كال سمر والله منهار بدونها لا ليلي ليل ولا نهاري نهار الله يخليج اشونها..

سمعت من زميلتنه هيه بالمستشفى وروحي طلعت.. ما عرفت بيا طريقه اوصللها..

-مازن تريد نجوى ترتاح..

-طبعا

-جيب اهلك واخطبها ومن تخلصون الفاينل اتزوجها.. وبهيج مراح تخليها بمواجهه ويه اهلي..

-مستعد والله اليوم اجيب امي.. اني حجيت لاهلي صار شهرين. ومتانين كلمه مني علمود يتقدمون ويخطبوها اليه..

-اي لعد هاهيه.. جيب اهلك اليوم وفض الموضوع.. بلكت ترجع لجامعتها تغيبت عنها صار اسبوع..

-ماشي.. اليوم اخلي امي تجيكم.. فتح الجكمجه مال السياره وطلع كارتونه.. بيها جهاز جديد..

وشريحة هاتف جديده.. كال وصليهم لنجوى بس خل تسمعني صوتها واطمن عليه..

كتله ماشي ادلل.. وصلت للمدرسه نزلت.. لكيت بكر صاف سيارته شويه عن المدرسه ..يبو اليوم شيخلصهاا..التمو الحبايب

باوعلي نزلت من سيارة مازن.. عقج حاجبه.. يابووو شكد فرحت بشوفته.. رحت يمه..

كتله هلا بكر.. حركه بحاجبه وكال منو هذا.. كتله معجب. رفع حاجبه.. معجب.. كتله اي لطش الا يرقمني..

تالي مو رقمني.. اشترالي موبايل وشريحه.. باوووووع..

-سمر اني جدي محترك من الشوگ عليج اجي الكاج نازله من سيارة ولد وتكوليلي معجب عود شنو معناها..

-شسوي لطش بعد.. معجب.. يله الله يكثرهم..

-سمرررر شبيج ثكلي شوي..

-ماشي ثكلت.. 😐

-للمره الاخيره اسئلج منو هذا.. حجاها بعصبيه..

- ضربت على انفه بخفه.. لك يا ككو انته شبيك.. هذا مازن..

-يا صخام

-ولك هذا صخام غير تكول كلوب

-دار وجها وراد يصعد..

-يمعووود اتشاقى وياك شبيك.. مازن حبيب نجوى خطيه حالته مدمره من وره نونه والوم حيجيب اهله خطابه

-وليش مكلتي هيج من البدايه ليش تجذبين..

-احب اشعل نار الغيره.. يمه يمه تخبل غيرتك.. شلونك..

-عندج شي.. اريد احجي وياج..

-اممم الدرس الاول شاغر.. عادي اكدر اتأخر شوي يله..

صعدت وياه.. كال سمر اريد اطلك نضال..

-بكر مو وقتها.. اجلها شوي..

-سمر مو متحمل تصرفاتها وتصرفات امي.. يوميه تحجي براسها وتخليها تلبسلي وتدخلي للصاله وتقفل علينه الباب..

-اي وشسويت..

-يعني شسويت.. ارفضها اكيد.. اكلها لا تتأملين بزواج بيه بنت الناس اتركيني ما ترد..

-بكر لتلومها تره اني اول ما تزوجت. سمعتها تشكي لامها.. وامها بقت ترزل بيها وتكلها جيبه مليان شلج بكلبه..

ترجعين للفكر مال ابوج.. عيشي بضله ملكه..

-هاي شوكت سمعتي هيج حجي

-بصباحية عرسك.. لما جنت سكران وعايفها.. شكت لامها واني جنت ماره من غرفتك..

-سمر مو متحمل وجودها.. والله .. تصرفاتها هيه وامي حيل مضوجتني.. وج تتعره وتدخلي.. احس تلعب نفسي..

اتخبل انحط بيهيج موقف وامي ما جاي تجوز..

-بكر اخاف هسه اطلكها وامك تشتغل شغلها وتجبرني ارجع لعادل.. تعرفها تكدر تلعب بلعقول..

بس خل اخلص من عادل تماما.. وبعدين سوي اللي تريده.. او تقدملي وبقيها على ذمتك هيه تختار طريقها..

-ما اعرف ما اعرف.. ارجعج للمدرسه لا تتأخرين.. وصلت للمدرسه نزلني وكال هاج هذا موبايل خليه يمج..

كتله صلوات على محمد.. اليوم الخير التم .ابتسم.. وكال ديربالج على نفسج..

راح اني دخلت للمدرسه.. جان الدرس شاغر.. دخلت غرفة المدرسات.. تعرفت الى كم مدرسه وعرفتهم عليه..

جاي اطلع من الاداره للصفوف.. اجتي البنت البارحه رزلتها.. كتلها ها امنه خير..

- ست اكدر احجي وياج..

- كولي..

-ست استحي..

-اخذتها ورحت للساحه.. كتلها اعتبريني اختج واحجي..

-ست انـّ'ℳέ'ـّيٌ يتيمه امي وابويه متوفين.. وعايشه وي اخوي.. صح فري بس يبقى مثل كل رجل عراقي غيور ما يقبل بالغلط

- المطلوب..

-ست.. البارحه الولد السمعتي خابر وحجيتي وياه.. مجبوره اطلع وياه..

-ليش مجبوره..

-ست اني جنت احبه وواثقه منه.. بس قبل شهر عيد ميلادي وكال محظرلج مفاجأه..

ضربت الدوام ورحت وياه اخذني لبيت اول شي ما قبل ما ادخل .. ما قبلت.. زعل وكال انتي متثقين بيه..

دخلت انطاني هدية عيد ميلادي.. وبعدين راد مني بس بوسه.. انطيته وهوه هجم عليه لحد ما اخذ عذريتي..

-اووف منج.. اي كملي.. تحجي وهيه تبجي

-ست من بعدها كام يهددني اذا ما تطلع واروح وياه يخبر اخويه ويكله هيج وهيج اختك..

-وهسه..

-ست ما اعرف شلون اخلص منه فدوه ست خلصيني..

-والله يا امنه شكولج.. موضوعج صعب.. شلون نكدر نسيطر علولد.. لازم نوصلها للشرطه..

واذا عرفت الشرطه.. انفضحتي اشوون..

-ست فدوه الله يخليج دبريني..

-يا حبيبي هاي مصير التصدك بشباب هلوكت.. واحدهم يسوي نفسه فاندام ومن ياخذ اللي يريده يكولج بايباي لندن..

-ست والله عبالي يحبني.. هوه جان يموت عليه وحتى فلوس ورصيد ينطيني..

-اي يا امي اي واحد ينطيج فلوس صدكتيه.. ما هوه اخذ الاعز من فلوس الدنيا كلها شيفيد بعد..

بقت تبجي.. كتلها اصبري ايام. وانشوف شلون نحلها وانتي اتعذري منه وخلي اخوج يوصلج للمدرسه مو الخط..

وكوليله اخوي شك وما اكدر اجيك هلفتره بس تنحل المشكله اعوضك وسايريه بدون متتقربين منه لحد منشوف حل..

ويله خل ندخل للدرس.. اخذتها ودخلت للدرس.. اول ربع ساعه انطيتهم محاظره اخلاقيه.

حجين ونصحت البنات من هذا الطريق.. وحتى علعاده حجيتلهم خاف يوكعون بنفس الوكعت بيه..

بعضهم افتهم. والبعض الثاني من البنات رادو شرح مفصل.. اعتذرت اشرحلهم..بس طول الدرس جانت وحده تهمس للثانيه ويحجن مخاطر هاي العاده ويذمن بيها..

ما صحت عليهم او كتلهم انتبهو للدرس.. خليهم يمليهم الرعب من هاي العاده الشنيعه اللي اعدمت حياتي..

كملت يومي.. ورحت للبيت. اول شي دخلت لماما.. كتلها يوم مازن اللي يريد نجوى اليوم جاي هوه واهله خطابه عليها حظري نفسكم..

كالت صدك والله.. كتلها فرحتي.. كالت يمه ليش ما افرح اذا يحبها وخوش ولد واجاها من الباب.. وحالتهم زينه..

ليش ما افرح قابل يايمه ما تمنالجن السعاده.. بس شسوي يا بنيتي.. مجتمعنه صعب..

-اصعد ابشرها خل تفرح خطيه.. صعدت.. لكيتها صافنه على اغنية تغمض عيوني شوكت وتبجي..

كتلها الخبر العندي الج راح يطيرج.. مسحت دموعها بيئس وكالت شكو ..

كاتلها كومي حظري روحج.. مازن واهله اليوم حيجون خطابه.. كمزت من مكانها..

-لاااااال برررربج..

-اي والله..

-لا لا عود صدوك

-هههههه اي والله شبيج

-ما اصدك سمر ما اصدك كرصيني..

-يرويحة سمر انتي.. لج بس فرحتج هاي تسوه عندي الدنيا.. وحظنتها.. وخرت تسأل..

وين شفتي وشكالج.. شلونه حزنان عليه مووو سمرررر احجي..

-لج غير التفاحه تخبل انهجم بيت اختيارج يذبح هلكد ما حلوه.. انووب الاحمر ياكل ويشرب عليه..

-يا ويلي والله مشتاقه اشوفه.. وبقت تبجي..

-لج يولي اهله حيجون مو وكت بجي خل انضف البيت انسوي حلويات نرتب نفسنه دكومي..

-اي اي سمر كوليلي شلبس..

-راحت فتحت الكنتور وطلعت كل الملابس.. كتلها تراكسود بسيط وحلو.. وضفيره مايله.. وشوية مكياج اطلعين كمر وتخبليييين..

ونباوع سوه للمرايا.. وحظنتني سمر فرحانه كولش فرحانه.. كتلها دوووم يربي مو يوم يله خل ابدل ونبدي..

وهااا صدوك.. ودالج موبايل بايدي بالجنطه تلكيه هوه الشريحه.. طلعت ابيض.. كتلها لا مو هذا الثاني..

-شنو اثنين..

-هههههه غير بكر اليوم هم انطاني جهاز التمو.. اخذت الجهاز. وشكلت السيمكارت وخابرت..

بدلت وكملت.. انوب كمنه اني وياها انضف ونعدل البيت.. للعصر واجت ام مازن واختها واخته وعمته..

بس مبينين ناس راقين.. كالتلها امي ناخذ رأي اخوها وابوها ونردلكم جواب..

اجه احمد بليل وكالتله امي.. يكللها انطيها للكلاب وما انطيها الهم.. كالته وشبيهم غير نسأل عليهم الولد اريد بتنه وهيه رايدته ليش نوكفف بطريقهم..

كاللها هاي بتج السجنتني ما ازوجها للي تريده .. واعتبري من باجر جايين اهل صاحبي لخطبتها.. يتبع

🌺🌺🌺🌺🌺

#حكاية_سمر (((الجزء الثاني)))

،،،،،،،،،،،،،،،بقلم الكاتبه زينب ماجد،،،،،،،،،،،،،،،،

البارت_9

اجه احمد بليل وكالتله امي.. يكللها انطيها للكلاب وما انطيها الهم.. كالته وشبيهم غير نسأل عليهم الولد اريد بتنه وهيه رايدته ليش نوكفف بطريقهم..

كاللها هاي بتج السجنتني ما ازوجها للي تريده .. واعتبري من باجر جايين اهل صاحبي لخطبتها..

امي كامت تحجي وتصيح عليه.. راح يم ابوي يكله يابه صديقي حازم انته تعرفه وتعرف اخلاقه راد نجوى مني..

واني بعتباري المسؤول هنا بعدك..راح اوافق على زواج نجوى.. ابويه كاله اي هاهيه عفيه..

بقيت صافنه.. يابه يا خير هذا الولد شاريها لاختي وجايها من الباب شتردون اكثر..

كام احمد..ويكلي ولج انتي متحمل عليج هوووواي.. فوك ما نشمرتي عدنه مطلكه ينسمعلج صوت..

وكام عليه يضربني..دفعته حيل وكمت اتعرك وياه.. لك انته واحد عار كدرتك بس علينه..والله م ابيك خير .

كافي تعبنه كاااافي..هوه يضرب واني ادفع وازلغ بيه..وامي وامحمد يفرغون بيناتنا..

جرتني امي منه كووه.. وصعدتني..

-وج انتي ما تستحين توكفين بوجه اخوج..انتي بكده..

- كافي مليت منكم كااافي تعبت ما تستحين ما تستحين ما تستحين..

كولشي اسويه كلتو ما تستحي.. بس لاني بنيه.. وهوه كولشي يسوي محد يكله عيب..

هذا دلالج بيه خربه ابني وابني وسلطتيه فوك روسنه.. واحنه مخلصته ويانه تكفخ ..

شطيح حظي غيرج.. من جبرتيني اتزوج والمره ما الها غير بيت رجلها .. هدمتو حياتي بهمجيتكم..

وهسه جايين على اختي.. كافي تعبنه كافي.. والله ما اسكت.. لو اعرف اكلب الدنيا على روسكم ما اسكت..

-الله ياخذج انشالله ونخلص منج..يلام بيج من يريد يذبحج..

-والله ما شردت ويه الاريده وكسرت وجوه اهلي علممود يذبحني..

-ولج انتي شو ما تستحين..

- رادت تكوم تضربني.. دفعتها اي ما استحي ولا راح استحي بعد..كافي نستحي نستحي وماكلين تبن..

نتحمل المر علمود ما انزل روسكم..وانتو مكسرين روسنه كااافي مليت كافي..اريد صدك ما استحي بعد وارد اشوف حظي شلون يكعد..

صعد احمد وراد يدخل الغرفه ويصيح وامي قافله الباب. ويكول اذبحج والله كح****

كتلها اشو فتحي الباب فتحي.. غركانه اني مطر صيفه ما يأثر بيه اشو فتحي..

-ولج وخررري طلعتي روحي وخري..

-اني الطلعت روحي اني اني انيييييييي ما عندي شي اخسره بس هلروح خل ياخذها واخلص وخري..

دفعتني حيل..كعدت ابجي بحركه.. ونجوى كاعده بالزاويه تبجي..كمت يمها..

كتلها كاافي.. ما اريدج تبجين.. وعد مني ما اخلي غير مازن ياخذج لو اعرف اكلب الدنيا عاليها واطيها..

خلت راسها بحظني وكامت تبجي.. خظنتها وابجي وامي واحمد يتصايحون..

لشوي راح احمد ونزلت امي.. خابرت بكر ابجي واكوله تعبت..كال خليج قويه..الضعيف ينوكل .

نجوى ما الها غيرج.. لو ضعفتي تضعف وهذا الكلب يزوجها..

-كتله واذا ما كدرت احميها بكر شلون..

-نزلي لابوج واحجي وياه..

-شحجي..

-كوليله اذا صدك وافقت على زواج نجوى من صديق احمد..لا تلومها باللي تسويه وتكول كسرت وجهي..

-اخاف عليه يوكع ويموت..

-ولو ما حجيتي احتمال نجوى التموت..احجي وياه بطريقه ما تغضبه وتوكعه المهم نقذيها .

-كتله ماشي.. سديته من بكر.. نزلت جوه سمعت امي تقنع بابويه وتكله لا توافق على خطبتها من حازم..

وهوه يكولها.. الولد نعرفه ونعرف اخلاقه .. والتعرفه احسن من الماتعرفه..

دخلت عليهم.. اضحك هههههههههههه.. التعرفه احسن من الماتعرفه موووو.. انطيتني لاختك..باوعها شسوت بيه..

انطيتني لابن اختك..وشوف شلون ظمرني.. واخلاقه زفت يطفر عبيوت الجيران وينام وينام ويه مرت جاره..

هاي الاخلاق التعرفها..يشرب عررك 24 ساعه وسكران..هاي الاخلاق اللي تريدها..

مالكم كيف تحكمووون.. يابه كافي ارحمونه دخيلكم..

-انتي هواي صايره السان..وحيل ضايج منج..

-يابه ضلمكم هوه الطلع الساني.. عجزت عجزت عجزت.. وما شفت خير من عجزي كدامكم.. غير الذل

ما ضل عندي شي واخاف اخسره.. اتمنى الموت بكل لحظه فليش اخاف بعد واني عندي بس روحي ادفعها واخلص..

-كال ابن عمتج هجرج من وره سوالفج المكسره لا تشمرين الصوج بيه..

-اي سوالف بابا..هوه ماخذ مرته قبل الزواج ويستشرف براسي..

-الرجال ما عليه عيب..

-لما مايكون عدكم تبرير مقنع للقذار اللي يسووها الرياجيل.. تكولون الرجال ما عليه عيب..

واحنه المتحملين عذاب المر.. تكولون علينه سوالفنه مكسره..

-بابا اخر كلام وياك واكولها الك..لو ما وافقت على زواج نجوى اتوقع يصير بيك مثل ما سويت بجدو..

-ولجن تهددني بنات الكلب.. استغليتي نومتي ومرضي وصرتي تتجاسرين سمرر..

-حشاك بابا لا اتجاسر ولا ابد..بس هيه الدنيا دواره وانته حللت لنفسك ظن تنهزمت وي ماما وتحرم علينه..

ما عرفت من اخذت امي وانهزمت.. انته حللت علينه هذا الشي اذا انتو قدوتنا سويتو هشكل ليش تمنعونه..

حجيت هيج شي. اهرف اذيته.. بس هذا الموضوع كولش حساس عد بابا وادري راح يفكر بيها الف مره ويخاف.. لا نجوى تكسر وجهه وتنهزم..

رحت صعدت يمها.. تبجي وتكولي يا فرحه ما تمت.

-اتم وربج اتم بس اصبري.. بقيت اهدي بسها وامسح على راسها وهيه نايمه.. كعدت ثاني يوم رحت للدوام..

دخلت لغرفد المدرسات فتحت خانتي..خليت جنطتني.. وشفت جدولي. ورحت للاصطفاف..

كملنه. اجتي البنيه الاسمها امنه..وكالتلي ست فدوه انقذيني..كتلها والله يا امنه مشاكل فوك راسي تهد الحيل..شبيدي..

اتذكرت النقيب كمال..كتلها لحظه..اني باجر اردلج جواب ماشي.. كالت ماشي..رحت حظرت دروسي..

لل11 خابرت نسرين..كتلها اريد رقم كمال.. كالت ليش..كتلها محتاجته بشغله امنيه..

انطتنياه..دكيت عليه..الووو

-الووو تفضلو..

-شلونك كمال..

-منو..

-اني سمر

-اهاااا هلا سمر يابه شلونج شلون الصحه

-والله تمام..

-اخوج اشلونه وياج .

-ذيل الكلب ما ينعدل.. شنسوي.. مو هذا موضوع.. خابرتك على موضوع ثاني .

-اي بالخدمه..طبعا تفضلي..

-اكدر اشوفك واتفق وياك..

-عادي وره 12 اجي عليج نروح نتغده ومنها نسولف بموضوعج..

-اووك.. انتضرك..كملت دوامي لل12 ونص.. رمش كمال طلعتله.. رحت وياه كعدنه بمطعم..

نزلنه غدا..كص دجاج..اكلنه..كتله كمال اريدك تساعدني بموضوع..

-اي كولي..

-عندي بنت كن طالباتي. هيج وهيج ولد لاعب عليها..ويستغلها يوميه لنزواته والبنت جدا خايفه..

-افتهمت.. تتفقين ويه البنيه..تخابره وتسجل مكالمته بليل وهوه يهددها.. او تخليه يشرحلها ليش هيج يسوي بيها..

علمود يثبت على نفسه..وتتفق وياه وتروح باجر اله للشقه.. واني والحمايه مالتي نكون مترقبيها ونكمشه ونتصرف وياه..

-اهاااا جيد ممنونه منك..

-اااا نسرين حاجتج بالموضوع..

-عقجت حاجبي.. اي موضوع...

-موضوع الزواج..هيه عرضت عليه اتقدملج واني حبيت الفكره..

-لااا اعتذر طبعا.. مثل متعرف اني مرتبطه ما اكدر

-هاأاا براحتج علعموم خلي البنيه تتواصل وياي علمود ناخذ منها المعلومات الكافيه..

-انشالله..يله ترخص لازم ارجع..الساعه 1 ونص ما اكدر اتأخر..

-اوصلج كومي..

-اشكرك جدا.. بيتنا قريب منا..

-وان يكن.. اوصلج ميصير..

-اشكر اهتمامك.. بس مشاكل مع اخواني..لو شافوني نازله من سيارتك ممكن اكون باحراج..

-اهااا اذا هيج براحتج..

-ترخصت منه ورجعت للبيت..اول ما دخلت حظنتني نجوى وتكولي

-سمر سمر بابا وافق على زواجي

-ولله 😃😃😃 يحبيبتي يروحي انتي.. عرفت كلام البارحه اثر بيه..

-كال بس نروح نسأل عليه بالمنطقه..

-اي طبعا هذا الشي من حقه..

دخلت بدلت وكملت.. وتغدينه فرحانين.. اجه احمد يصيح ويعيط ويه بابا شلون يوافق..

كاله هذا اختيارها..حرام اجبرها..كاله شنعرف عنه..كاله هيه تتحمل مسؤلية اختيارها احنه معلينه..

الحمدلله حيييل فرحت بهلخبر.. نر اليوم بسعاده وفرح اني ونجوى .. كملت تصحيحات الدفاتر الامتحانيه مال بنات ونمت

ثاني يوم كعدت رحت لدوامي كلعاده.. بكر علاقتي بيه جيده ما تتعده الكلام بالموبايل.. ما متجاوزين اكثر..

وره ايااام..خابرني كمال كال سمر كمشنا الولد وشمرته بالتوقيف بتهمة ابتزاز البنات واجبارهم على الرذيله

-عفيه عليك مشكور والله يكتبها في ميزان حسناتك.. بس هااا ديربالك تجيب سيرتها خطيه تروح سمعتها..

-لااا بس باجر لتزم تجي تثبت اقوالها..

-شلون تجي.. بنيه هيه شيدخله مركز..

-كال اجراءات ضروريه مو بكيفي..

-كتله ماشي باجر خلال الدوام اخذ اجازه واجيبها..كال ماشي..

ثاني يوم..كعدت.. نجوى هم كعدت تروح لدوامها..كالت سمر اليوم حيجون اهل مازن ويقررون الحاظر والغايب..

-انشالله بيها الخير..رحت لامدرسه.. شافتني امنه.. بقت تبجي بوجهي وتخاف.. فهمت المديره على سالفتها..

اول بدايه نزلت بيها رزاله غسل ولبس.. بعدين اتعاطفت وياها..وسمحتلي اخذها ونروح..

رحت بس خايفه كولش.. صعبه ادخل مخفر..واني بهلوضع.. انوب مطلكه لو شافني احد.. يسويني ملطشه..

بس شسوي مجبوره. رحت وياها.. دخلنه المخفر.. كلها شرطه ورياجيل...وقلبي نبضاته يقرء الف من الخوف..

خابرت نقيب كمال.. اجانه.. اخذنه للضابط المتولي قضيتها.. ادلت باقوالها.. وكملت.. بعد ما نصبتها مناحه..

كملنه.. طلعنه وكمال ويانه.. وصلها للبيت. ورحنه كال ماكو عذر اوصلج علشارع مال بيتكم..

كتله اوك..مشينه وهوه يحجي.. كتله شخبار نسرين..

كال زينه. كتله انته مو تحبها ليش تريد تتزوج عليها..

-سمر اني احبها لنسرين..ومو بس احبها اعشقها..بس صار 8 سنوات. ويا دكتور نروح..ميسويلها علاج ويكول عقم 80%

وصابر واكول اتحمل بلكت الها علاج..بس من عرفت هبه عقيمه نهائي. كتلها بموضوع الزواج بطريقه حاولت ما اجرحها..

-بس انجرحت

-اي شنو بيدي يا سمر.. را ادخل ال40 واني الطفل حسره بكلبي

-زين اتبنو طفل..

-لااا ما اكدر اروح اجيب نغوله ابيتي ما اكدر

-هوه طفل تكسب بيه ثواب لو اهذته..شعليه باهله تعتمد على تربيتك

-جج لا سمر لا العرق دساس.. اذا جان ابن حرام..واخليه ابيتي. الله يعلم شيطلع..

-زين اكو شغله

-وهيه..

-ليش ما تتزوج امنه..هيه خوش بنيه.. بس غلطة مراهقه.

.

-انته تريد طفل.. اخذها واستر عليها من القتل. ومنها تخلفلك الطفل.. دار وجه عليه..

-صدك تحجين

-اي والله شبيك..

-لج عمرها 17 سنه واني شكبرني بكد بنتي هيه..
-ترهم عادي هيه مو بالاعمار انته قلبك كبير وراح تتفهمها..

-وشحلاتها بنيه صغيره تصيرلك مره. يبختك وين ماكو حاته. هههههه

-ههههههه ما اعرف.. صراحه اني من شفتها استخطيتها..بس ما خطرت ابالي اتزوجها..

-اي اخذها واستر عليها.. تره اخوها لو عرف بحالتها يمكن يذبحها وتموت خطيه..

-اني اخابرها واتواصل وياها.. لو شفتعا ترهملي مره ليش لا..

-وصلت للبيت.. سلمت عليه و نزلت.. شفت بكر واكف علشارع...

طلعت موبايلي..وخابرته..كال وين جنتي.

-بالمدرسه غير وين جنت..

-اوك سمر اخذي راحتج.. فر صعد بسيارته..انوب رجع حجه.. كال عفكره رحتت بل10 للمدرسه كالو اخذت اجازه..

-كتله بكر مو هيج..سد الخط بوجهي..ومشى..

خابرت عليه اريد.. ابد ولا رد..يا الله انوب شافني نازله من سيارة كمال وهوه شلون يتخبل منه.

رحت للبيت..اخذت موبايل نجوى هم ميرد..كعدت طالعه روحي يالله شبيه جذبت عليه هوه اكثر واحد يتفهمني..

شبيه ما كتله.. طبت نجوى تركض..

-سمر سمر سمر

-ها ها شبيج نجوى ع كيفج..

-سمر اهل مازن راح يجون اليوم ويعقدولنه شيخ..ولما نخلص الفاينل..نتزوج .

-وشمدريج. مازن ملي. وهسه ابوه خابر ابويه.. واتفق وابويه وافق..

-شنو يعني ماكو خطبه. يمعوده نريد نفرح

-لج فرحتي بمازن خطبه شكو يمااااااااي راح يوكف كلبي..

-ههههه بالعافيه حبيبتي عساها دوم هلفرحه.. شكد ما فرحت لاختي وبزواجها..

بس اكو هيج حزن بداخلي. . مو حسد لااا اسم الله احسد اختي. ابد بس يعني ليش دوم الفرحه يمي متوصل..

من اخابر بكر.. وينطيني مشغول اتخبل..احس خسرت كولشي..ويمكن يشوف غيري ويروح لزوجته

مو امنعه من زوجته.. بس احسه هوه من حقي وحدي.. وخايفه من تركه اليه.. دزيتله رساله بكر غدوه افهمني.. احجيلك كولشي بس افتح خط..

خابر عليه..الووو

-الوووو بكر فدوه بس اسمعني..

-ما اريد اسمع كولشي.. بس سؤال..

-بكر مو قصدي اكذ.....

-كللللللللللت سؤال

-جواب..

-كمال عنده نية زواج بيج..طلب هيج شي..

-باووووعلي

-اختصريلي باي لو لااا لا ادوخيني

-مو هيج بس اسمعني

- اي لو لاااااااااا

-اي بس..... قاطعني وسد الخط.. بقيت ابجي.. لا بكر لااا الا انته لا تعوفني ما اتحمل والله..

بقيت معتكفه بغرفتي.. اجت نجوى حاجتني.. ما ردت اضوجها.. كتلها مريضه شوي تعبانه بس ارتاح..

نومتني وغطتني وكالتلي ارتاحي.. بقيت ابجي.. لشوي سمعت اهل مازن اجو..

كلت لازم اوكف ويه اختي بهليوم..رفعت شعري..وبدلت تراك حلو ونزلت..

دخلت علنسوان.. سلمت.. سلمن وسلامهن حلو.. كعدت.. كالن ام احمد بناتج لوات وناعمات..

سمر متزوجه. . كلت اهووو رجعنه للسوالف التعبانه..كالتلها امي.. والله اتزوجت.. بس اشون زواجه كشره..

زوجناها لابن عمتها بس طلع ماخذها علمود يرضي امه.. واتزوج عليها وهجرها.. ويتريت بس هيج..

شايفه مرته شسوت بيها بالسحوره مالتها.. وسولفتلهم معزوفتي الحزينه..

كالن كملت عدتها لو لااا نريدها ويه اختها لابن خالة مازن اسمه عمار شلون ولد دره مال الله..

كالتلهن امي.. اي كملت عدتها البارحه..باوعتلي.. باوعتلي كالت هيه 3 غسلات مو هيه.. غسلتي 3 غسلات مووو ... كتلها اي..

خرررب شلون بأمي تعزم عليه..كملو الرياجيل..وكالو صيحو البنت.. غطينه نجوى وراحت عقدولها واشتغلت الهلاهل..

فرحت افرحتها واني اشوف الضحكه بين عيونها ..

كمنه نصف والنسوان تهلهل.. كملو وراحو ونجوى كل شوي تحظني من الفرحه ..

كملنه.. صعدت اخابر بكر ميرد يا الله ميرد.. تالي ايست وعفته ونمت..مر اسبوع وهوه ميرد..

اخر شي.. كتله بكر اني متانيتك بمطعم الساعه لو ما اجيت والله اكتل روحي.. ورحت ثاني يوم وره الدوام للمطعم..

انتضرته انتضرته..ما اجه.. طلعت روحي. عفت المطعم وطلعت.. باوعت السيارات تمشي..

فعلا ايست من الحياة بيومها وردت اشمر روحي بالشارع جوه السيارات..دخلت الشارع والسيارات سريعه دخلت بيئس..

واسم صراخ من وراي سمرررررر لاااا... درت وجهي عليه.. وما احس الا سياره كبال وجهي ودك هووورن حيييل...يتبع

بس شغله حبيت اوضحها..لقصة حكاية سمر..

اذا ترجعون لاول جمله بالجزء الاول..راح تلكوني مختصره القصه بكاملها بعبارة (لكل فعل ردة فعل..ولكل خطأ جزاء)

قصة سمر عباره عن اخطاء ..انطي بيها العبره لحتى الغير يتعلم منها..

لما غلطت اول بدايه بالعاده..شفتو جزاءها الدفعتها شنو..وشلون انهانت..هذه اول غلطه..

الغلطه الثانيه..حبها لبكر ببيت زوجها..حتى وان كانت مجبره لكن ماكو تبرير للغلط..ودفعت ثمنه غالي.. بقتلها ودخولها المستشفى وحتى فرض عادل عليها واجهاظ طفلها.. ولسه القصه مخلصت وراح تكملون العبره منها..

العبره الثالثه..هوه انهزام اهل سمر وزواجهم بدون رضا اهلهم..وضربهم للعادات والتقاليد.. والعبره منها اريد اوصللكم..

ان كل غلط انتو تسووه.. راح تخلوه مباح لاولادكم..لان انتو قدوة اولادكم..لما تغلطون..اولادكم راح يغلطون مثلكم على نفس الخط.. وبهيج يدفعون الثمن غااالي لمخالفتهم العادات..وديلاقوها باولادهم..

اما عن سمر..وتصرفها.. وسمر وكحه .. لا ابدا ما اشوف سمر وكحه..

سمر انجبرت تصير وكحه.. من القهر الشافته.. ولازم تصير هيج وادافع عن نفسها وعن اختها..بلله عليكم..سكوتها عن حقها شجابلها..غير القبول بالذل والخضوع لناس قذره..

لو ساكته مثل كل مره وتكتفي بالبجي. . جان هسه اختها انجبرت تتزوج صديق اخوها وادمرت حياتها..

وهذا يدل على احنه مجتمع متخلف.. اذا المرا صارة قويه تكولون عليها وكحه..واذا قبلت تنهان وتتكفخ.. تكولون عليها خوش مره وتتحمل..

ميصيرلنه جاره ولا حالتنه تتعدل لان انتو عقولكم هيج..المرأه نفسها ضد اختها المرأه وتكسرها لو صارة قويه وتكول عليها وكحه..

من البدايه نوهت..قصة سمر للتوعيه لا لنشر الاباحه..لان كل غلط دا اذكره اكتب معاها ثمن هلغلط اللي يدفعوها شخصيات القصه..

احمق اللي ينتبه للغلط وحده ويتغاضى عن جزاء هلغلط وشنو الثمن..

قصة سمر للعقول الراقيه اللي تفتهم العبره من كل هلاغلاط..