ش يم خشمها..

انطت ردة فعل.. اتحركت وكامت تعطس.. وتلزم بطنها.. ابتعدنه منها.. كامت تحاول تفتح..

شافتنه كل احنه عساكر و رياجيل.. اخترعت.. ولفت نفسها بالجرجف.. وتصيح منو انتووو شتردون مني..

كتلها اهدي ابويه.. اني امر فوج.. وهذي سيطره عسكريه.. طالعين بجوله تفتيشيه علسيطرات وطلعتي بوجهنه..

منو انتي.. وشعندج طالعه بليل.. منتميه لجهه معينه.. ما نكدر نفتشج لان مره.. وانطينه نداء للقياده.. تجي شرطيه تفتشج..

سمر.. والله ما عندي شي.. والله..

كمال.. لحظه لتخافين باباتي.. انتي بأمان بس كوليلي وين بيتج.. خل نرجعج..

سمر.. بقت دموعي تنزل خووف منهم.. كلهم عسكر واحدهم شضخمه والدرع فوك جسمه..

وبيهم المغطي وجها.. كمت اباوع وابجي.. اشوف واحد منهم.. يباوع لرجليه.. جريت الجرجف على رجليه بقلق وبخووف..

كمال.. شفتها تباوعلهم بخوف.. درت لكيت واحد من الحرس يباوعلها مركز بيها.. خزرتهم.. وكتلهم برااا دا اريد افتهم منها..

همسلي علاء سيدي.. خاف عميله مدسوسه بطريقنه.. كتله ولوو خل نفتهم.. ممبين عليها شي.. البنبه وجها متعوب ومريضه ما اعتقد..

طلعو.. جريت كرسي.. وكعدت كبالها.. كتلها اني النقيب كماال.. لتخافين بنتي احجي ليش طالعه بهلوكت وانتي مبينه مريضه..

بقت عيونها تكت دموع.. وتكولي.. فدوه شوفلي ملجئ دار ايتام اي شي.. بس اخذني منا وخل اعيش بعيده منهم..

كتلها منهم..؟؟ منو تقصدين.. كالت اهلي واقاربي.. باوعت للكانونه.. اشرتلها شنو هاي.. مريضه.. مسويه عمليه..

هزت راسها اي.. كتلها عملية شنو.. سكتت.. احجي.. دنكت تبجي.. كتلها اجهاض طفل موو..

رفعت راسها.. متزوجه والله .. بس ما عاد اتحمل ضلم وهربت.. فدوه شوفلي مكان اروح اله وابعد من هنا فدوه..

كمال.. كومي يله.. كالت ويين.. كتلها امي تشتغل بمنظمة حقوق الانسان.. راح اقدمج الها وهيه تشوف وضعج ما اكدر اخليج بالشارع..

سمر.. كمت امشي وراه.. هوه رجل هيج بين 30 او 40 اصلع.. ابيض.. ضخم.. وشواربه كثيفه..

طلعنه.. واحد من الحرس كاله هااا سيدي.. كاله وضعها مخربط.. الضاهر مضطهده.. راح اشوف وضعها ويه الوالده..

كاله سيدي تاني تجي الشرطيه تفحصها.. قبل لا ادخلها بيتك.. هز راسه.. صعدنه السياره..

ما مشت.. بقى كاعد يمي بالكرسي الوره.. والسايق والحارس كاعد كدام..

اجت الشرطيه.. كال انزلي وياها للتفتيش.. كتله والله ما عندي شي.. كال هوه هذا اللي نريده.. مراح تأذيج انزلي..

نزلت فتشتني من فووك ليجوه.. كالتله سيدي سليمه.. اشرلي.. اصعدي.. صعدت.. مشت السياره..

جان الجو فجر.. هسه طالع الضوه بس ماكو شمس.. بقيت ابجي.. باوعلي هوه.. ودار وجها..

وصلنه للبيت.. السياره راحت.. احنه دخلنه.. طلع المفاتيح من جوه سندانه مال صنوبر.. بالباب وفتحه..

وكف وكال تفضلي.. دخلت بيت جبير ما شاء الله.. بقيت ادور بعيوني منا ومنا.. شفت علامة الصليب كبيره على الحايط..

وصوره للعذراء.. عرفت بيت مسيحي.. الحمدلله.. اطمئنيت .. دار وجها.. كال اكعدي هنا هسه اصحي الوالده تشوف وضعج..

كعدت.. شوي واجت مره عجوز بس لابسه ثوب قصير جوه الركبه والشعر مالتها ولادي.. لحد اذنها..

كالت اهلا بنيتي.. تفضلي.. منين انتي.. كتلها من الاسكان.. كالت ليش هاربه.. كتلها. ما لكيت حل غير الهروب..

ما اريد ارجع تعبت منهم.. كالت اهلج موجودين.. كتلها أيٌـ.YESـہٌَ.. كالت وليش مرحتيلهم..

كتلها همه المشكله.. المفروض لازم التجئ الهم.. بس همه هددوني لو اطلقت يذبحوني..

وسبق اخويه كتلني.. وتعرصت لفطر بالجمجمه.. للان يأذيني.. وحملت غصب.. واجهضت..

قررت اهرب منهم.. واعيش حتى لو خدامه. بس كون مرتاحه وما اسمع حجيهم وصياحهم وتعذيبهم..
كالت لحظه لحظه.. خل نكوم هسه نسوي ريوك ونشبع بطنه وتكعدين تسولفيلي علرواء ماشي حبيبتي..

ابتسمت حسيت بالامان بكلامها.. النقيب ابو شوارب كاعد كبالي.. ويسمع.. وهوه متمدد لوره علقنفه..

كالتله امه.. كمال اصعد نام فوك اذا تعبان.. كاللها يمه جوعان.. اكل واصعد.. نسرين وين.. كالتله نايمه.. ما تكعد هسه..

رحنه للمطبخ.. اثاثهم كولش نازك وبسيط .. كعدت عل كرسي يم الطاوله.. هيه سلكت بيض.. وطلعت جبن..

كمت اساعدها.. كالت اكعدي بنتي ارتاحي.. انتي ضيفتي.. باوعلي ابو شوراب مبتسم..

كال شوفي دلال اشواق.. تره غير شكل.. كالتله يا طايح الحظ امك اني مو اشواق..

راح باس راسها وكاللها تاج راسي شعندي غيرج اخلف اجيب.. اجت بنيه كالتله لا عيني ما عندك غيرها..

اني شنو لعد.. شافتني انصدمت.. كالت اسـŝøŗŗýـــفه عدنه خطار.. ما ادرري ..

ابتسمت.. كالتلها العجوز.. تعالي شوفي كمال شمصخم.. كالتلها شنو.. كالت هاي زوجته الثانيه..

خطيه حبلانه وواكع الطفل وجابها يكول داروها يخاف عليها يعوفها وحدها بالشقه..

اشو هذا كمال ما صدك اجه جر الكرسي وكعد يمي عطاوله.. ويسويلها حركات بوجها ويضحك ويلزم ايدي..

جريت ايدي منه.. هيه صرخت كمال تحجي صدوووك.. باجيي

ي جاوبيني صدوك هذي مرت كمال..

كمال.. اي حبيبي اسف اتزوجتها وحملت بعد تورطت شسوي مجبورين نتقبلها..

نسرين.. اكلب الدنيا على راسك والله.. شنو مجبور.. بلله تعااي انتي هنا..

سمر.. وجرتني حيل.. لزمها كمال.. جذب والله جذب هاي اشواق تلعب على عقلج.. باوعتله مخنزره..

منو هاااي كمال.. حجت المره الجبيره.. كالتلها اتشاقه وياج شبيج عوبه.. هذي ضيفتي..

كالتها تحجين صدوووك باجي. واني جريتها واصيح كدامها والله عييب.. اسفه حبيبتي اعتذر والله..

ابتسمت.. كتلها الله يحفظكم لبعض.. كامت ساعدت العمه اشواق بالريوك.. تريكنه.. اني والعمه وكمال ونسرين..

حديث خفيف على الاكل.. اني ما جنت اشتهي.. بس اشرب جاي.. كالت العمه.. شبيج ماماتي اكلي..

كتلها ممشتهيه والله.. سوتلي لفة جبن صغيره.. وكالت اكلي لخاطري.. اخذت اكل.. كمال كمل..

وكاللها نسرين رايح انام.. عود ب10 كعديني.. جاوبته نوم الهنه حبيبي روح اني اكعدك..

كتلها تحبون بعض.. كالت وووو بطلعان الروح يله اتزوجنه.. وكعت تحجيلي على حبهم وزواجهم..

انوب قاطعتنه العمه.. وكالتلها احنه نريد نعرف قصتها وبعدين نحجيلها قصصنه.. ابتسمت..

وكتلها جنت بنيه صغيره بعمر ال13 غلطت مع نفسي.. وووو قصيتلها القصه كلها..

وهيه ونسرين يستمعون.. كالت نسرين اووووي اتخبل ثنين يحبون بعض ويفترقون ما اتحمل..

عفيه شلون انطاج كلبج تعوفين بكر يتزوج لو اني منج اشرد وياه والله..

كتلها احنه غير عن تقاليدكم.. هوه يعتبر اخو زوجي.. واهلي متقبلو طلاقي.. شلون اشرد وياه واني على ذمة اخوه..

نسرين.. اي جان شردتي وياه.. واطلقتي بعدين..

سمر.. ما تمشي عدنه هيج شي.. معناها اهدر دمي ودم بكر.. راح يعتبروه شرد ويه مرت اخوه..

هيج علاقه محرمه عدنه.. مو مسموحه ابدااا.. حتى لو اطلقت محد راح يقبل بزواجنه.. لان ابقى بالاسم طليقة اخوه..

وهذه المشكله اللي ما كدرت اتعداها.. كالت تحبيه هوايه موو.. باوعت.. شجاوب.. عيوني دمعت وابتسمت..

ابتسمت هيه وكالت.. مدام تحبون بعض بصدق ثقي فديوم الرب يجمعكم .. كتله انشالله..

اشواق.. زين اهلج ليش رفضوج.. بتالي تزوجتي وغلطج انستر وراح.. ليش بقو متبرين منج..

سمر.. مو متبرين.. بس انهانو هوايه بسبب اغلاطي.. وما تحملو واخويه واحد اناني وقاسي ميرحم.. وابويه للاسف يستمعله بعتباره الجبير..

اشواق.. لتخافين ماماتي.. انشالله اقدم قضيتج لل لجنه ونتناقشها وبعون الرب نكدر ناخذ كل حقوقج ونضمنها.. من اهلج ومن زوجج..

سمر.. يعني شلون قصدج ارجعلهم..

اشواق..طبعا.. ترجعين واحنه نظمن انو متتأذين وناخذ تعهد.. ونتبنى قضيتج..

بنتي البنت التطلع من بيت اهلها تصير فريسه لاولاد الشوارع.. وتعانين اكثر من معاناتهم باضعاف..

لان تصيرين مثل غزاله بوسط ذياب.. فترجعين وتتقوين وتاخذين حقوقج.. افضل من الاستسلام.

سمر.. تعتقدين اكدر..

اشواق.. اي اتكدرين.. اللي تحملت كل هلعذاب وصامده لليوم راح تتقوه وتكدر تواجه لتخافين..

وخلت ايدها على ايدي.. وابتسمتلي.. ابتسمت..

دارت وجها لنسرين.. وكالتلها نونه هيئيلها مكان تنام بيه ترتاح..

نسرين.. اي بعيني تعالي سموره.. صعدت وياها.. غرفه صغيره ام النفر.. كتلها المن..

كالت لحماي.. كتلها خاف عيب منه.. كالت لاا ديدرس بامريكا.. مو هنا.. اخذي راحتج..

تمددت.. راحت هيه و اجت.. جايبتلي ثوب خفيف كالتلي بدلي ونامي علمود ترتاحين..

كتلها اشكرج نسرين تعبتج..

نسرين.. لج يولي شنو هلحجي.. شنو قابل تقاطعت العالم.. دنامي نامي ارتاحي..

واحنه جوه اي شي تحتاجيه كولي الله عليج لتستحين.. ابتسمتلها.. متقصرين..

خليت راسي علمخده.. شخص واحد ابالي.. بكرر.. يا ترى سافر لو بعده.. انتبه لغيابي لو مشا وما همه امري..

هه يهمه امري ليش.. حيسافر ويعيش حياته.. وطفله يجيه جاهز والضيم والقهر عليه..

شجاني وطاوعت وحبيت.. لو باقيه بعيده عنه مو احسن.. لا كادره اكون وياها ولا كادره انساه..

شلون ياربي.. بين هلتفكير.. غفيت.. ما حسيت الا مغرب.. اووف والله عيب كل هلوقت نايمه..

ردت اطلع الباب.. حجابي ماكو وعيب خاف ابو شوارب موجود.. طلعت عمه اشواق..

اشواق.. هااا شو واكفه..

سمر.. ابتسمت.. استحيت شكوللها

اشواق.. لتستحين ماماتي بس اني ونسرين هنا كمال مموجود.. تعالي..

سمر.. نزلت وياها.. نسرين دتسوي بيتزااا..

نسرين.. هلوو سمسومه.. كعدتي..

سمر.. اي ههههه ما انتبهت اخذتني النومه..

نسرين.. عادي حبيبي تصير من التعب..

سمر.. كعدت وهي كدامي.. شفت الموبايل .. بقيت اباوع عليه انتبهتلي نسرين..

نسرين.. اذا تردين خابريه..

سمر.. لا عليمن اصلا تلكيه سافر ومو اباله..

نسرين.. هذا الاهتم بيج وحبج كل هلحب ممعقوله يسافر بدون ميودعج..

خابري مخسرانه شي.. اتأكدي سافر لو لا.. حافظه رقمه..

سمر.. هزيت راسي اي..

نسرين.. اي لعد دخابري.. يله..

سمر.. دكيت رقمه.. اخابر لا.. اخابر لا.. كلت خل اخابر.. لو رقم

ه الاسيا دك معناها هوه بالعراق

واذا مقفل او خارج التغطيه معناها سافر..

دست اتصال.. انتضرت.. دك.. اي والله دك.. يعني مسافر.. موجود.. رد

بكر.. الوووو.. يتبع

🌺🌺🌺🌺🌺

#حكاية_سمر.. (( الجزء الثاني ))

،،،،،،،،،،بقلم الكاتبه زينب ماجد،،،،،،،،،،،

البارت_2

سمر.. دكيت رقم بكر.. اخابر لا.. اخابر لا.. كلت خل اخابر.. لو رقمه الاسيا دك معناها هوه بالعراق

واذا مقفل او خارج التغطيه معناها سافر..

دست اتصال.. انتضرت.. دك.. اي والله دك.. يعني ما سافر.. موجود.. رد

--------

بكر،، ما بقيت مكان ما دورته عليها.. متت بس لا صدك منتحره واني ما داري عنها.. الله ياخذني شسويت بيها..

كالتلي اخاف ارتبط بيك.. وجبرتها.. وتالي هيج يصير بيها .. يا الله وين اروح ..افتر بالشوارع مثل المخبل ما اعرف وين اروح و وين الكاها..

يا خوفي لا مخطوفه لو وواكعه بورطه شسوي ياربي شسوي..

عمامنه والدنيا كلها انكلبت ادور عليها.. اهلها بصفحه و عادل بصفحه لا خلينه مستشفيات لا دنيا كلبناها بس نريد نعرف سمر وين..

للساعه 10.. بعد ما ايست.. اخذت السياره وصفيتها بمكان فارغ.. وطلعت انتجيت علسياره وكعدت بالكاع. وادخن.. واتذكرها ملامحها وابجي..

دك موبايلي.. باوعتله.. رقم غريب.. كمزت من مكاني.. كلت بلكت هيه وواكعه بورطه وخابرتني..

وكفت على حيلي.. وكلت ..

بكر.. الوووو

سمر.. ________سكتت

بكر.. الووو منو الخاطر الله احجووو.. سمر هاي انتي دخيلج احجي..

سمر.. سمعته كال اسمي.. انعصر كلبي.. اخذت نفس..

بكر.. لكم احجو تعبت احجوووووووو سمر وين.. والله شتردون انطيكم بس كولولي هيه وييييين..

سمر.. من كال هيج نزلت دموعي.. مفكرني مخطوفه.. كتله ليش ما سافرت..

سمر.. سمر سمرررر هاي انتي .. اخخخ الله لج سمر وينج تعبت والله تعبت.. انفجرت ابجي..

كوليلي وينج.. دخيلج ما اتحمل يصير بيج شي.. اموت لو تأذيتي والله..

سمر.. بجيت.. بس اني تأذيت هوايه بكر.. هوااايه

بكر.. يعيون بكر انتي لج بس امري والله اخذج من كل هذا.. لج بس طاوعيني شنو المخليج تقبلين بهلوضع كووولي.

اختاريني وخل نروح من هلعالم..

سمر.. بكر طفلي راح .. نفسيتي ادمرت.. انته مو حاس بيه..

بكر.. والله حاس بيج والله .. بس كوليلي شسوي.. مجتفه اديه لا تقبلين تصيرين الي ولا اكدر اخذج كوه...

سمر.. بقيت ابجي بالاتصال وما احجي..

بكر.. كال دليني مكانج اجيج هسه..

سمر.. ما اريد.. عوفني .. اتركني.. تعبت منك..

بكر.. اسف والله ادري الصار بسببي بس مو بأردتي والله.. بس دليني مكانج خل اجي..

سمر.. ادليك بس متكول لاحد..

بكره.. خره بيهم اكول لمنو .. دنطيني العنوان.. انطتنياه.. اخذت سيارتي.. وكبل رحتلها.. وصلت الفرع الدلتني عليه بالاتصال..

كتلها يا بيت.. كالت حطلعلك.. ودلتني الباب.. وصلت.. فتحت الباب هيه ووكفت.. شفتها بلا وعي نزلت من السياره بسرعه وركضت اخذتها لحظني..
ابتعدت مني..

اتقربت اخذت وجها.. تبجي.. كتلها لتبجين.. والله نخلص من كل هذا ..

سمر.. بكر وكع طفلي.. ادمرت اني ادمرت..

بكر.. بقت تبجي.. كتلها والله اعرف اعرف.. دنحجي طلعت مره كبيره بالسن. شعرها ولادي..

كالت تفضل ابني.. كتلها اعتذر منكم.. سببنالكم احراج وفوضى..

اشواق.. ماكو اي اخراج تفضل..

بكر.. لا شكرا.. اخذها..

اشواق.. لا متاخذها.. هذي البنت صارت مسؤليتي..

بكر.. عقدت حاجبي.. نعم..؟؟

سمر.. ادخل هسه وبعيدين افتهم..

بكر.. دخلت.. كعدت.. سمر كعدت يمي.. والمره كبالي..

اشواق.. اني عضوه في منظمة حقوق الانسان.. وسمر دخلت برعايتي.. وراح اساندها لحتى اساعدها توكف بوجه كل انسان ظالم..

وتكدر تاخذ حقها واحنه بدورنه نسندها وندعمها.. ونتصرف لو واحد اتقرب واذاها.

اني للان ما تكلمت وياها بخصوص اللي راح انسوي.. لان هيه حاليا تعبانه.

فراح احجي كدامك واسألها شنو مطالبها..

سمر.. باجي اقدر مساعدتج.. بس اني ما اكدر ارجع لاهلي بعد.. خاصه بعد ما انهزمت.. راح يهدرون دمي..

ان كان من زوجي وان كان من اهلي..

بكر.. لتخافين اكص ركابهم والله.. بس صيري وياي

سمر.. بكر لا تعتقد اخليك تواجهم ما تكدر.. ولا اكدر اسافر وياك.. ولا اكدر افكر بيك بعد اصلا..

انته صفحه وانطوت من حياتي من يوم الحبلت مرتك.. خلاص ما نرهم بعد.. حتى لو اطلقت

بكر.. سمر اي مره اي حمل.. تعرفين كل هذا مو بعيني.. اتركي كلشي واتبعيني محد يوصلج والله..

طيب هسه انتي مو مهزومه ومحد يعرف بيج.. اني عندي بيت.. تعالي نروح بيه.. واكعدي هناك.. تحت رعايتي ومحد اله دخل بيج.

وحتى لو ما اتزوجج مجرد اخلصج من هلوضع والناس ذول..

اشواق.. ابني الانهزام مو حل.. الى متى تبقى ابيتك.. وخاصه هيه على ذمة رجل..

وهذا الرجل اخوك.. مجتمعنه شرقي.. يبيح دمها بهل حاله.. لازم سمر تتحرر من كل القيود اللي تحاوطها

مو ترجع تقيد نفسها بقيد اصعب.. وممكن ما ينحل.. خل نسمع مطالبها وهيه تقرر مصيرها..

سمر.. اول شي اريد اطلع من ذمة عادل.. ما اريد ابقى وياه لحظه تحت مسمى الزواج..

بس اللي خايفه منه اهلي.. مراح يقبلون بطلاكي..

اشواق.. اول شي.. اخذج اني و زميل الي بالمنظمه.. وا

خذ كمال ونروح لاهلج..

ونكلهم سمر تحت رعاية منظمة حقوق الانسان.. هربت من ضلمكم.. في حال لو اتعرضت لضرب او اي اعتداء منكم..

القانون راح ياخذ مجراه بهذا الخصوص.. اما بخصوص طلاقج من عادل. فتتقدمين بدعوة طلاق للمحكمه..

ونوكل محامي.. ياخذ كامل حقوقج منه..

بكر.. اني مستعد اوكل افضل محامي.. واتكفل كل مصاريفه..

اشواق.. جيد جدا.. مدام تكفلت بالدعم المادي.. فلباقي سهل.. انته اخوه لو شهدت الها ومن صالحها..

راح تنصرها اكثر.. وتفيد قضيتها

سمر.. يارب هيج واخلص من عادل واصير حره.. دا احجي بكر خله ايده على ايدي.. وكال بس صيري قويه كولشي يسهل.

بعدت ايدي منه.. كتله ليش مسافرت..

بكر.. تعتقدين اكدر اسافر وانتي مختفيه.

اشواق.. اتركم تاخذون راحتكم بالكلام..

سمر.. باوعتله مدمعه.. ليش مطلعت البارحه.. فرحت لما عرفت راح يصير عندك طفل موو..

اخ من الدنيا من تكسرني وتنصف غيري.. بجيت

بكر.. سمر تتوقعين الي بنضال شي.. رايد الطفل..؟؟ سمر ما هامني بالدنيا غيرج والله.

سمر.. كمت من مكاني.. وصحت كذاااب.. كالتلك عمتي طب شوف مرتك.. وانته ما عونت.. دخلت وهيه مزينتلك ومحظره الغرفه شموع..

لك دخلت لل4 وانته ما طلعت.. تفتهم شنو يعني ما طلعت.. وتكلي مو ابالي.. بوقت اللي اني كنت جثه مشموره بخرابه..

لك طفلي وكع من بطني.. محد كال الحمدلله على سلامتج.. لا زوج لا اهل ولا احدددد .. تعرف احساسي بذيج الساعه شنو جان..

تعرف شنو يعني بنت مكسوره بمعنى الكلمه.. تعرف احساسي شنو انهاريت ادمرت.. ما الي سند بكل هلدنيا .. كولشي خسرت بحياتي..

لا حبيبي الي.. ولا زوجي الي.. ولا اهل الي.. طيب المن عايشه فهمني.. المن.. تشمروني من ايد الايد.. محد متحملني ليييش..

بكر.. سمر والله عارف احساسج.. ولما دخلت لغرفتي والله كل قصدي اتاني البيت يفرغ ونضال تنام واجي اشوفج..

سمر فهميني شنو بيدي واسويه .. ما اكدر افرض سيطرتي على اهلي واكلهم محد يأذيها..

مو لان عاجز.. لااا اخاف عادل يتبره منج وينطيج لاهلج وترجعين لاحمد..

وبدال ما انقذج ادمرج اكثر.. سمر انتي خليتيني ما اعرف شسوي.. تخبلت.. لا انتي اطاوعيني واخذج منهم ولا كادر احميج منهم وانتي بنصهم

شسوي فهميني.. دا احجي.. هيه لزمت راسها.. داخت

كتلها سمر سمر.. يمعوده.. لزمتها.. وكعت وذبلت بيدي. صحت خاله خاله... اجو المره وابنيه ثانيه تركض..

صرخت شبيها.. كتلها ما اعرف وكعت.. مييي بسرعه.. اصحي.. اصحيي.. ماكو.. شمرت مي.. ماكو..

شلتها بساع.. وركضت للسياره.. خليتها.. المره اجت وياي.. صعدنه ورحنه للمستشفى..

نزلناها ركض للطوارئ.. دخلناها.. اجه الدكتور.. فحصها.. كال شبيها متعرضه لضربه لو لشنو..

كتله ابدا واكفه ووكعت.. دكتور شبيها.. كال ما نعرف.. خل نفحصها اول.. كتله دكتور البنت مسويه عملية اجهاض البارحه.

وعدها فطر بعظم الجمجمه من حوالي شهرين.. كال فطر بالجمجمه..!!!! عافنه ودخل ..

بقت المره يمي.. تحجي.. والله خطيه ولا تستاهل كل هلعذاب.. بنيه بكدها تشوف كل هلقسوه..

بقيت ساكت وادعي.. واروح منا واجي منا.. لحد ما كالو صحت.. طلعوها ونقلوها..

رحت يمها.. لزمت ايدها.. عيونها مدمعه وتكول بكر لا تعوفني.. كتلها يعيون بكر انتي والله ما اعوفج اطمني..

دا احجي.. واتصلت امي.. كتلها ارد علاتصال واجي.. طلعت.. كالت امي انته وين.. كتلها بره شرايده.

كالت ما عرفت عن هلكلبه شي.. كتلها ما اعرف.. صاح ممرض وراي.. دكتور.. كالت شنو انته بمستشفى..

كتلها اي.. اجيت ادور عليها بطب العدلي عسا ولعل الكه الها اثر.. كالت ماتت انشالله وخلصنه منها ومن عارها..

ما اتحملت حتى اجاوبها سديته منها.. رحت لسمر.. لكيت الدكتور.. لزمت ايدها.. والدكتور يفحص ويضربها بالكانونه..

كال مو لازم تتخربط ابد.. تره تسوء حالتها اكثر.. لافضل تاخذ اشعه لراسها باسرع وقت وتشوف الفطر..

لازم مراقبه واشعه وعلاج كل شهر على الاقل.. ميصير ينهمل.. هذا راس.. خطر اذا تضرر لا سامح الله..

لو تتخبل.. او تنشل وتقعد.. راجعو عليها يابه شنو ما رايديها.. كتله انشالله دكتور..

كتبلي دوه.. وكال ضروري تجيبها باجر للاستشاريه.. لحتى نعرض حالتها ونشخصها..

كتله دكتور عادي اخذها على حسابنا مو افضل من المستشفى.. كال اي اكيد.. لو عندك اخذها تره تستوجب..

كتله اشكرك.. ارتاحت شوي سمر واخذتها لبيت العمه اشواق.. كتله عمه تعبناج.. كالت ابني العمل الانساني ميحتاجله شكر وامتنان..

نسوي هذه الاعمال لحتى نتقرب من الرب.. كتلها الله يكثر من امثالج.. وصلتها للبيت..

لكيت رجال اكرع صاحب شوارب.. كاللها ها يمه شبيها البنيه..

كلت بداخلي.. اهووو هذا منو انوب عدهم..

نزلت سمر.. كتلها لحظه لحظه.. منو هذا.. كالت النقيب اللي ساعدني.. كوه تحجي

كتلها امشي ما اكدر اعوفج هنا.. كالت بكر تعبانه..

كتلها. ان يكن ما اكدر.. تقرب الرجال وسلم عليه.. ودخلني بيته.. شفته خوش ولد ومتزوج...

بس ما اخفي..

لسه ما مرتاح. بس سمر صعدت بعد ما شفتها..

كلت للعمه.. باجر اجي واخذها للدكتور الضهر.. كالت هاهيه..

سمر.. صعدت تمددت بالغرفه.. اجت يمي نسرين..
نسرين.. هااا يمعوده الحمدلله على سلامتج..

سمر.. الله يسلمج حًِــℓσνєـًِبٌُيُ

نسرين.. وج شنو هذا بكر هاااا هااا 😉..لج غير ادمرت احواله من وكعتي.. عيونه كامت تلمع والعصبيه تطاير منه..

سمر.. ابتسمت.. شلفايده.. احبه و يحبني.. بس لا اني اله ولا هوه الي.. حبنه بس احلام.. وعمر الاحلام متصير واقع للاسف.

نسرين.. لج والله ميت عليج.. لا تخسريه..

سمر.. اعرف ميت عليه.. بس شسوي.. مو بيدي.. لا اكدر انهزم وياه.. ولا اكدر اتزوجه.. الاثنين محرم عليه بمجتمعنه..

نسرين. الله يكتبلكم لبعض.. هاج هذا موبايلي اذا تردين خابريه.. وطمنيه عليج.. لان هوه سأل وكتله صعدت نامت..

سمر.. هزيت راسي.. خطيه انطتني الموبايل وطلعت.. سويت مسكول لبكر.. رد خابر..

الوووو

بكر.. الوووات.. ها شلون صرتي..

سمر.. بكر دا اتأذه كولش..

بكر.. انشالله باجر اخذج للدكتور واشوف شبيج..

سمر.. المشكله مو جسمي اللي يأذيني.. قلبي..
بكر.. اخذت نفس.. اووف يا سمر اووف.. والله جاي اتوجع اكثر منج.. بس شسوي..

لا كادر اخذج ولا كادر ابقيج.. عجزتيني..

سمر.. وتالي بكر..

بكر.. الله كريم.. هسه خل نمشي خطوه بخطوه ويه ست اشواق بلكت تكدر اطلكج من عادل بدون مشاكل..

ومن بعدها النه تصرف ثاني.. لما اطلعين من ذمته..

سمر.. بكر تتوقع النه امل.

بكر.. اخذت نفس.. كتلها انشالله.. اسمعي.. شدا اسمع واتذكرج..

سمر.. شنو..

بكر.. ابيات شعريه لنزار قباني.. بصوت القيصر.. حسيت بكل حرف انتي موجوده بيهم.. اسمعي..

أحبك جداً..

وأعرف أن الطريق إلى المستحيل طويـل

وأعرف أنك ست النساء

وليس لدي بديـل

وأعرف أن زمان الحنيـن انتهى

ومات الكلام الجميل

...

لـ ست النساء ماذا أقول

أحبك جدا...

...

أحبك جداً وأعرف أني أعيش بمنفى

وأنتِ بمنفى

وبيني وبينك

ريحٌ

وغيمٌ

وبرقٌ

ورعدٌ

وثلجٌ

ونـارُ

وأعرف أن الوصول لعينيك وهمٌ

وأعرف أن الوصول إليك

انتحـارُ

ويسعدني

أن أمزق نفسي لأجلك أيتها الغالية

ولو خيروني

لكررت حبك للمرة الثانية

...

أيا من غزلت قميصك من ورقات الشجر

أيا من حميتك بالصبر من قطرات المطر

أحبك جداً

...

وأعرف أني أسافر في بحر عينيك

دون يقين

وأترك عقلي ورائي وأركض

خلف جنونـي

...

أيا امرأة تمسك القلب بين يديها

سألتك بالله لا تتركيني

لا تتركيني

فماذا أكون أنا إذا لم تكوني

أحبك جداً

وجداً

وجداً

وأرفض من نــار حبك أن أستقيلا

وهل يستطيع المتيم بالعشق أن يستقيلا...

وما همني

إن خرجت من الحب حيا

وما همني

إن خرجت قتيلا

سمر.. هههههه الله. وما همني ان اخرج حيا او خرجت قتيلا.. للان مستعد تحارب بكر..

بكر.. لتعتقدين فد يوم امل.. لا والله حبج يكبر بكلبي مثل الطفل عند امه كلما يكبر يحلى وتتعلق بيه اكثر..

سمر.. ليش ردت تسافر.. ؟ معقوله انطاك كلبك تتركني بهلحال..

بكر.. ما انطاني.. بس من حملتي. خلاص خابت كل امالي.. شنو فايدة مشاعري.. والزواج استمر..

سمر.. وشنو تغير هسه..

بكر.. اللي تغير .. ان انتي انهزمتي.. رفضتي واقع عادل والخضوع اله.. قررتي تطلقين..

كل هذا رجع زرعلي الامل بداخلي من جديد..

سمر.. ونضال..

بكر ..شبيها نضال..

سمر.. زوجتك وحامل منك.. شلون راح تتركها..

بكر.. اخذت نفس.. باعي.. نضال وان كانت حامل مني. بس ما اعتبرها مرتي.. ما املكلها اي مشاعر.. ولا احس بمسؤليه اتجاها..

وعلى اي حال.. حتى لو ما مهزومه انتي. جان انـّ'ℳέ'ـّيٌ انهزمت وتركت كولشي..

سمر.. بس ما الها ذنب..

بكر.. ذنبها بركبت امي.. وكتلها هاي انتي بليتيني بيها.. انتي تتحمليها..

سمر.. بكر راح اكره روحي لو صرت سبب بهجرك الها..

بكر.. مو ذنبج ولا ذنبي. ما احبها شسوي.. صوج امي..

سمر.. والله ما اعرف بعد.. نعست.. اروح انام تصبح على خير..

بكر.. انتي الخير كله.. باي..

سمر.. سديته منه.. وصفنت افكر بالوضع.. يااارب اطلك من عادل واخلص وما اريد شي ثاني بس اطلك .. نمت..

ثاني يوم كعدت.. كمال جان مموجود.. نزلت ويه نسرين وباجي اشواق.. ديحظرون ريوك.. تريكنه وكملنه..

طلعت العمه اشواق لشغلها.. تركتني اني ونسرين.. ردت انضف وياها مقبلت..

شوي وكعدنه نسولف.. طب كمال.. كمزت للحجاب.. لبسته.. كال هااا شلون صرتي..

كتله زينه..

كمال.. اكول ليش ما تمشين ويانه للدكتوره بشارع فلسطين.. راح اخذ نسرين وبطريقي اخذج وياي..

مو البارحه الدكتور وصاج على فحوصات..

سمر.. اي..

كمال.. اي لعد دكومي وي نسرين خل اخذكم..

سمر.. كمت وياها.. انطتني ملابس من عدها خطيه جديد.. وقياسها يرهملي.. تقريبا نفس الضعف..

لبسنه وطلعنه.. كتلها نسرين عشنو تراجعين.. كالت علمود طفل.. صارلنه 7 اسني

ن ماكو..

كتلها الله يرزقكم انشالله.. وصلنه للعماره مال الدكتوره النسائيه.. ردت ادخل.. صاح كمال..

سمر انتي هم عل نسائيه.. كتله لاا اشعه لراسي وفحوصات..

كمال. اي لعد تعاي مو هنا الدكتور بغير عماره..

نسرين.. روحو انتو.. اني ما عليه شي.. من اكمل اخابركم..

كمال.. اوك حبيبي.. عود رمشيلي من تكملين.. يله سمر..

اخذني لغير عماره.. دخلنه سجلنه على اشعه.. وسويت.. وطلعنه بره انتاني.. كملت.. اخذناها ورحنه للدكتور..

جان الدكتور لسه مجاي.. وكدامنه 15 واحد.. بالسره.. كال كمال تعاي دنفتر ؏شارع فلسطين.. بين ميجي الدكتور ويكملون..

طلعنه.. نتمشه.. صراحه خجلانه منه.. واخجل احجي وياه على كد الكلام.. بس هوه سبورت ماخذ راحته ولا كأنو غريبه.

بقينه نفتر علشارع.. كال تحتاجين شي. كتله لااا ابدا.. نمشي..

كمال.. بكر شيصير منج.. ؟

سمر.. ابن عمتي واخو زوجي بنفس الوقت..

كمال.. هممم.. بس العلاقه البينكم حسيتها اقرب من هيج..

سمر.. يعني شلون.. ؟

كمال.. ما اعرف البارحه من استقبلته وبقيت وياه حسيته متضايق.. وخوفه عليج باين

سمر.. هممم.. ما اعرف هوه من تزوجت لليوم متكفلني.. بعد ما زوجي هملني..

كمال.. ليش هملج..

سمر.. مسولفتلك نسرين..

كمال.. ما حجينه بيج مصار مجال.. اجي تعبان وانام اكعد اطلع.. لهيج ما دريت .. بس امي كالت البنيه مضطهده.. ولازم تساعدج

سمر.. اهاا..

كمال.. اي مكلتيلي.. بكر شنو يعنيلج.. دنحجي خابرت نسرين.. رفعت خط ها نسرين.. منو .. هااا اي زين انطي رقمي خل يخابر.. اوك يله..

سمر.. شوو

كمال.. ابن الحلال بذكره.. بكر متصل بنسرين.. جاي ومحد طالع.. ومخابر نسرين.. دك موبايلي..

اكلج.. رقمه نهايته 55 ..

سمر.. اي..

كمال.. اي لعد هذا هوه خابر.. ردي عليه..

سمر.. اخذت الجهاز.. الو هاا بكر..

بكر.. سمر هاي انتي.. لج بربج غير تنطيني خبر من طلعين صار ساعه ادك بلباب..

واستحي اخابر علبنيه.. بعدين من لا جاره خابرتها وتكلي انتو بشارع فلسطين عود صدك..

سمر.. اي صح احنه هناك..

بكر.. بيا عماره..

سمر.. ما اعرف.. انداريت لكمال يا عماره.. كال التاج يمكن.. كتله عمارة التاج..

بكر.. يله مسافة الطريق اني يمكم..

سمر.. اوك.. سديت انطيته الجهاز ابتسم.. كتله اي اللي بداخلك صح بدون متحجي..

كمال.. ههههه ليش شنو البداخلي..

سمر.. ما اعرف عيونك دتلمح لمعرفة شي انته شاك بيه..

كمال.. يحبج.. ؟

سمر.. هزيت راسي. اي.

كمال. بس اخو زوجج هذا شلون..

سمر.. هيه هنا المشكله.. لهيج اني انهزمت.. لا كادره اكمل ويه اخوه.. ولا كادره اعيش عدهم.. واكابله.. ولا اكدر اطلك..

حاولت انتحر وخفت اخسر حتى ربي.. لهيج قررت انهزم.. بس من بكر ماكو مفر احس اني طير وهوه كاعي شكد ما الف لازم ارجعله..

كمال.. ما اعرف باحساسكم.. بس كـ نصيحه مني الج.. غلط مشاعرج ..حاولي تصلحين غلطج.. اخلصي من اخوه اول..

وبعدين ابدي ويه اللي ترديه.

سمر.. وهوه كذلك.. بس اريد اطلك من عادل هسه.. وبعدها اشوف نفسي..

كمال.. الله يكتبلج اللي بيه الخير..

سمر.. تسلم..

كمال.. يله تعاي نرجع.. بلكت وصل الدكتور..

سمر.. ٱפگـيہ.. رحنه صعدنه العماره.. جان الدكتور جاي.. وكدامنه 9.. بقينه كاعدين ننتظر..

وصل السره لل3 دخل بكر.. كال.. متت واني ادور شنو السالفه حتى متردون علاتصال..

باوع كمال لجهازه.. كاله صاير صامت اعتذر منك...كاله لا مشكور مدام قمت بيها وجبتها..

روح اخذ راحتك خاف زوجتك. اتانيك. كال اوك انتظركم.. كال بكر.. اني اجيبها الكم.. اخذ راحتك.. لا تنتظر

سمر.. كعدنه ننتظر دورنه. وصلنه السره شاف الدكتور الاشعه.. كال زين الفطر ملتئم نسبيا..

بس تبقى شغلة الاغماء صعبه.. انطانه علاج وصى ؏تعليمات وشلون اخذ حذري واعتني بنفسي.

بأكل بشرب.. بنفسيتي.. كملنه.. طلعنه اني وبكر بالسياره.. كال وين تردين يا مطعم..

كتله رجعني.. كال خل اعشيج بالاول.. كتله بكيفك.. مشى وبقى ساكت.. بس شغل اغاني بالسياره ..

بلهفه وحنين وشوگ صابر واتاني حبيبي.. كتله اووو هاي بعدك ؏حسين البصري متشبع منه..

بكر.. هههه ثقي بكل اغنيه اله اتخيلج انتي واجسدها عليج.. من لما جنتي زغيره وانه اسمعه واغنيلج وانتي مو داريه عني..

سمر.. ههههه بلهفه وحنين وشوگ .. متانيني..

بكر.. لااا البداخلي مشاعر اكبر من الحنين ومن الاشتياق.. بداخلي نار ما تطفى غيررر..

سمر.. غير بشنو ؟؟

بكر.. وصلنه.. يله انزلي..

سمر.. ههههه هذه عادته لبكر . لو حاول يتهرب من الجواب يغير الموضوع .. ويبقى الجواب حاصر عيونه..

نزلنه اني وياه.. تعشينه بدون كلام.. بس عيون تحجي بيني وبينه وابتسامات خفيفه.. ما يحتاج كلام.. غير على كد كم كلمه للحاجه..

احسه يفهمني من عيوني.. وياه اول مره احس العيون الها لغه خاصه.. ما تفهمها.. ا

لا لما يكون هذا الشخص متربع بكلبك..

كملنه.. رجعني لبيت عمه اشواق.. ما نزل.. بس اشترالي جهاز موبايل وكال. شيصير انطيني خبر..

نزلت دكيت الباب.. فتحته نسرين.. كالت فوتي الله جابج. كتلها شكو خوفتيني..

نسرين.. اخوج الاسمه احمد.. ماخذ صورتج وسائل عليج السيطره اللي اخذج كمال منها..

سمر.. اي وشكالوله..

نسرين.. كالوله النقيب كمال اخذها.. خابرو على كمال هسه.. كاللهة سلمتها لمنظمة حقوق الانسان.. ومو عندي حاليا..

وطالبين كمال باجر للاستجواب..

سمر.. دخلت.. كتلها هاا باجي شسوي.. احمد لو عرف بيه هنا يذبحني والله ما يرحمتي..

كمال.. علمود اكص راسه والله بس يتقرب. اخو اخيته خل يواجهني.. اكله انه اخذتها وشتريد تسوي سوي..

اشواق.. مو هيج الحجي ابني.. اتفقت ويه اعضاء المنظمه اليوم و باجر ناخذج اني وكم زميل ويانه تابع..

نوديج لبيت اهلج.. وكمال ويانه.. علمود تكون قانونيا وشاهد.. وناخذ عهد.. لو تأذيتي نسجن اي شخص يتعرضلج..

وراح نساعدج بدعوة الطلاق من زوجج.. لتخافين..

سمر.. بقيت متجمده من الخوف .. لزمت ايدي نسرين.. كالت لا تخافين. والله محد يكدر يلزمج قابل هيه تايها..

كتلها لو اعتبروني عار.. وكالو الاحمد اغسل عارك منو يوكف بوجه العشيره لو قررت. ماكو قانون يردعهم من قتلي..

اشواق.. لو شفتي قررو هيج قرار من بعد تعهدنا وياهم.. ساندي بكر وسافري. واحنه نقوم باجراءت الطلاق الغيابي..

وبكر هوه يتكفل حمايتج بعد لو صرتي وياه..

سمر.. اتجمعت الدموع بعيوني.. يربي دخيلك لا توصلني لهل مواصيل.. ما اريد اوصل للحد اليجبرني انهزم وفعلا اثبت العار عليه..

يا واحد يا احد يا فردا يا صمد .. انقذني ما لي غيرك احد.. اللهي اترجاك ساعدني.. لا تتركني.

خابرت بكر خبرته. كال ادري.. خابرتني امي هسه من فتحت الجهاز. وسألتني انته وين.. كتلها بهلدنيا..

كالت تعال لكينه الخانم . . صرخت كتلها وين.. خفت لا ابيت كمال .. كالت ماخذها نقيب ومنطيها لمنظمة حقوق الانسان..

وباجر احنه نروح ونسأل عليها ونجيبها سحل..

سمر،، بكر ولو حاولو يقتلوني..

بكر.. لو كان هذا قرارهم. ما عندي غير حل اخذج واشرد لحدود تركيا..

وهناك اتفق ويه ناس اطلعنه تهريب.. ما كدامنه غير حل..

سمر.. يا رب دخيلك بلطفك ورحمتك..اشملني.. يــــــتبع

🌺🌺🌺🌺🌺

#حكاية_سمر.. (( الجزء الثاني ))

،،،،،،،،،،بقلم الكاتبه زينب ماجد،،،،،،،،،،،

البارت_3

سمر،، بكر ولو حاولو يقتلوني..

بكر،، لو كان هذا قرارهم. ما عندي غير حل اخذج واشرد لحدود تركيا..

وهناك اتفق ويه ناس اطلعنه تهريب.. ما كدامنه غير حل..

سمر،، يا رب دخيلك بلطفك ورحمتك..اشملني..

بكر،، لتخافين سمر بس قوي نفسج ولا تخضعين محد يكدر يدنالج.. بس لو شافوج ضعيفه ياكلوج..

سمر،، اتوكلت على الله وهوه حسبي ما اكدر اتحكم بكولشي هوه يتكفلني..

بكر،، والنعم بلله ميخيب اللي يتوكل عليه..

سمر،، يله اروح مع السلامه..

بكر،، الله وياج ولتخافين واي شي يصير خابريني ٱפگـيہ.. مو تنسين

سمر،، انشالله .. باااي.. سديت الموبايل .. يربي شلون مشكله .. شلون لو اهلي ما تقبلوني واعتبروني عار..

يربي ردت اعيش بعيده عنهم وهم راح ارجعلهم.. عليك ياربي.. خليت راسي علمخده..

فكره تاخذني وفكره تجيبني.. لحد منمت.. كعدت الصبح.. باوعت الساعه 7..

لبست حجابي ونزلت.. امشي بالبيت .. البيت هادئه.. بس صوت قرائه يجي من الصاله.

دخلت لكيت كمال لازم كتاب وديقره.. تقربت كتله صباح الخير..

كمال.. صدق الله العظيم.. رفعت راسي.. صباح النور..

سمر.. عقدت حاجبي من صدّق.. كتله تقره قران؟؟

كمال.. اي ليش وين المشكله.

سمر.. افتكرتك مسيحي

كمال.. هههه لااا الوالده ونسرين مسيح .. اصلي مسلم والدي من عشيرة بني اسد ..

سمر.. ابتسمت.. حلوو.. اسفه قاطعت ترتيلك..

كمال.. لا عادي دا ارتل بين ميجي السايق مالتي..

سمر.. ليش باجي للان مكعدت..

كمال.. تروح ب9 وتاخذج وياها حتعرضج ؏لجنه يشوفون وضعج علمود يساعدوج..

سمر.. ممنونه منك ومن باجي هوايه.. على مساعدتكم..

كمال.. لا عادي هذا واجب انساني..

سمر.. ابتسمت.. رحت للمطبخ.. لكيت جاي على نار هادئه.. طفيته..

درت كمال وراي.. كال اذا كمل تكدرين تصبيلي استكان.. ولو اتعبج..

كتله لا ولووو .. ثواني.. صبيتله.. جاي وخليته اله علميز.. طلعت جبن من الثلاجه..

قصصت منه بماعون وخليته كدامه. ابتسم وكال شكرا..

عفته وطلعت ياكل براحته.. كعدت باجي .. صارت بوجهي.

اشواق.. ها سمر صباح الخير..

سمر.. صباح الانوار باجي..

اشواق.. لازم نبدل وترحين ويايه للـ لجنه اعرض حالتج.. الهم.. اني كتلهم عليج بس لازم يسمعون منج

سمر.. اي نطاني فكره كمال عن الموضوع. دارت وجهها لكمال وكالتله..

اشواق.. كمال انته هم اريد حظورك ويانه من نودي سمر لاهلها..

كمال.. ليش بشنو يفرق وجودي..

اشواق.. نقيب والك رتبتك وهيبتك.. كلمه حاده منك تهديد .. تنطي عدهم ردت فعل

كمال.. اي عادي ماكو اشكال.. خابريني واني استأذن واجيكم.. اهاااا اجه علاء السايق يله اني اتوكل

اشواق،، موفق .. الرب يحرسك.. طلع.. انداريت لسمر.. يله بنتي خل نتريك علمود هم يله نبدل ونروح ٱפگـيہ

سمر.. انشالله.. رادت تكوم. تسوي ريوك.. كتلها باجي اني اسوي..

اشواق.. لا حبيبتي انتي تعبانه ما اريد اتعبج..

سمر.. انتي مو تعتبريني بنتج .. وتكوليلي البيت بيتج.. خليني اخذ راحتي ابيتي ههههه..

اشواق.. اي والله بيتج واحنه خطار .. فدوه لكلبج بنيتي..

سمر.. كمت طكيت بيضتين عين.. وحميت الجاي وحظرت الطاوله كعدنه تريكنه.. كملنه..

صعدت.. تلاكت نسرين بوجهي.. صباح الخير.. كتلها صباح النور..

نسرين.. هااا وين..

سمر.. راح ابدل واروح ويه باجي علمود موضوعي..

نسرين.. اهاا موفقه.. تعاي دا انطيج ملابس مني..
سمر.. لا عادي البس مال البارحه..

نسرين.. تعاي يا عيني قابل شمنطيتج هيه ملابس..

سمر.. يسلمو.. رحت وياها اختاريت.. بنطرون ابيض وستره صفره وبدي اسود.. والجنطه وياهم..

اخذتهم ورحت بدلت.. كملت نزلت لباجي.. هيه جانت فوك تبدل.. كملت نزلت..

طلعنه بسيارتها ورحنه.. وصلنه عرفتني على ثنين رياجيل وبقو يحجون ويايه ويسألوني واني اجاوب..
وسولفتلهم قصتي بما جرت.. بس مجبت طاري بكر ومشاعره.. فقط معاناتي مع عادل واحمد..

تعاطفو ويايه.. وبقو يحجون ويايه.. ويدعموني ويقووني.. خابرت باجي على كمال..

كاللها نص ساعه واني يمكم.. اني بهلمده.. طلعت خابرت بكر.. وخبرته باللي صار.. كال تمام..

اجه كمال.. رحنه اني وباجي ورجال اسمه مؤيد عضو بمنظمة حقوق الانسان.. بسياره.

وكمال والسايق والحمايه مالته بسياره ثانيه..

وصلت بيت.. اهلي.. لا ارديا جسمي صار يرجف.. والمغص لزم بطني.. خليت ايدي على كلبي..

لزمتني باجي.. كالت لا تخافين.. واجهي بقوه.. ورفعي صوتج وسمعيهم .. ووقفي ظلمهم..

تره الظلم يحيى بالسكوت.. هزيت راسي اي..

كمال.. شحدهم يلزموها ازين شواربهم والله..

سمر.. ابتسمت.. بخوف وبقلق.. دكت باجي الباب..

اني واكفه بسدها.. فتحت امي الباب.. شافتني صرخت وفتحت اديها سمر يمه بنيتي..

ركضت لحظنها ..ماما حبيبتي وابجي.. وتكلي وج يمه ما خلينه لا مس

تشفيات لا مراكز تعتب علينه وين رحتي يمه..

سلمت عليها باجي.. وخرت امي وردت السلام..

اشواق.. نحجي علباب لو نفوت..

امي.. لا استغفر الله تفضلو..

سمر.. دنفوت.. وطلع احمد.. وصرخ بوجهي. ساقطه اجيتي.. اله اذبحج اليوم كلبه..

وهد عليه راد يضربني.. وكف كمال..

كمال.. هوب هووب تايهتلك وتهد عليها..

احمد.. دفعته قوي.. وانته منو وداخل بيتي.. اطلع برا يله براا..

كمال. احترام نفسك لك.. طلع الباج مالته كدامك نقيب كمال امر فوج.. كلمه زايده اشمرك سجن سنه ما تطلع..

احمد.. خاب دروووح يذبني سجن اطلع من بيتي اطلع.. وهاي حسابها يمي..

سمر،، راد يهد عليه،، لزمه كمال بوكسيات وتعارك هوه واحمد .. دخلو الحمايه مال كمال خذوه..

شالو احمد وهوه يصيح سمر والله اذبحج.. سمر اشرب من دمج.. ولج اني عار لو ما طميتج..

بقت دموعي.. تجري.. امي من شالو احمد واخذوه.. بقت تصرخ ابني عوفو ابني..

وتتعارك وياهم شرايدين من عدنه انتو امشو مالكم شغل بسمر احنه نحل مشاكلنه امشووو عوفو ابني ..

اشواق.. ام سمر عيني.. احنه مو ناوين نعتقل ابنج ولا جاي نهددكم..

احنه من منظمة حقوق الانسان.. والمنظمه اتبنت قضية سمر..

سمر لو تعرضت للضرب او تأذة راح يعاقب كل شخص يأذيها بالقانون.. وهذا النقيب كمال والاستاذ مؤيد شاهدين على تهجم. اخوها ومحاولت قتلها كدامنه..

امي.. شتردون انطيكم بس عوفو ابني.. ولج سمر ناويه تهجمين بيتي.. احجيييي..

سمر.. باجي فدوه عوفوه اعرف اني راح انكتل .. ما اريد اورطكم ..

اشواق.. سمر تهدي وقوي نفسج.. التفتت لكمال.. كتله اتركه.. وهدده لو سوه شي تاخذوه..

راح كمال شوي واجه جايبه والحمايه وراه.. واحمد بده ياكلني وهوه واكف..

دخلو جوه كعدو بالصاله.. بابا جان نايم جوه.. من سامع بالصياح.. مخلي نجوى تشيله على كرسي متحرك..

واجه.. شافني دار وجها مني.. ويحجي وي امي والسانه ثكيل شفته بهلوضع انهاريت..

كمت ابجي.. اجت نجوى حظنتني حيل وتبجي وتكولي سموره والله خفت صاير عليج شي..

والله ردت اجن بغيابج.. عبالي انتحرتي. بوستها وكتلها الله موجود ما تاركني..

دنحجي وطب عادل لزمني من راسي.. وضربني بوكس على حلكي ضل يجري دم وهم فوكاي

ويصرخ ساقطه بنت الكلب تردين تفظحيني تشردن من بيتي.. تردين تجيبيلي العر.. ولج احنه عار اذا ما كتلناج.. بقت نجوى وامي يدفعوني بيه واني اصرخ وهوه يضرب

لحد ما لزمه كمال ودفع للحايط وجرتني باجي اشواق وراها واني ابجي وامسح الدم من حلكي

واصيح .. الله لا ينطيك يا كلب يا حقير .. ما كفاكم اخذتو حتى طفلي البطني.. شاريد مني بعد شرايد هيه بس روحي بقت اخذوها وخلصوني..

اني اصيح وهوه يصيح ويغلط ويكول اشرب من دمج والله ولازمه ابوه وابن عمه صلاح..

كمال.. لك انته صاير رجال وتتقوه على مره.. تفوو💦 علمراجل اللي تستقوي علنسوان..

عادل ..انته منو وادافعلها ابن الكلب.. صاحبها .. اكيد لاعبه وياك ال****** ..وجاي ادافعلها.. وبقى يتضارب ويه كمال

سمر.. عادل يصيح وكمال يصيح ويبوو الهوسه ما تعرف منين واحمد لازمينه الحمايه بالصاله..

يافضيحتج يا سمر منين ما اخليها سوده مصخمه..

وهمه يتعاركون.. ادخل الاستاذ مؤيد ..

مؤيد.. تره هذي مو حاله.. شنو هلتهجم على هلبنت المستضعفه..

فعلا طلعت مضطهده من قبل اقرب الناس الها.. بافعالكم. هاي عبالكم ما تتحاسبون..

هذه انسان واذيتها راح يعاقبكم عليهارالقانون واني والنقيب واالاستاذه اشواق نشهد على الضرب والتهجم اللي تعرضتله البنت سمر..

خليل.. قانونيش هذا يابه .. القانون ما اله دخل بينه.. بتنه شردت من بيتنه ونريد نربيها..

احنه ناس ولد عشاير .. شنو تاليتنه نسوانه تشرد من بيوتنه.. وما ندري وين تهرم وتلعب ..ومن نريد نحاسبها يوكفلنه القانون..

مؤيد.. تحاسب بنت ما غلطت .. ميجوزلك ولا يجوز لاي عشيره كانت.. لو ماسكها بفعل حرام جان القانون اعطاكم الحق. .

بس البنت عدها شهود ان هي كانت مريضه وتتعالج ومكانت بغير وضع..

والنقيب كمال يشهد هوه وحمايته وافراد سيطرة الاسكان ان سمر جانت طالعه فجر الساعه 4 وعشره تحديدا ..

وجانت بحاله يرثى خارجه من عمليه جراحيه بيومها واغمى عليها.. وتم نقلها للمستشفى ومعالجتها

واكو تقارير مشتشفى وكلام دكتور يثبت هذا الشي وان هي كانت تعالج ما كانت بغير مكان..

فاي عشيره واي تقاليد تحكم على بنت بالقتل وهيه ما اذنبت.. احنه مو بغابه والقانون ومنظمات حقوق الانسان وجدت..

لنصرة هكذا اناس مضطهدين.. واكولها كدامكم.. سمر بالغه وقضيتها انرفعت واني والست اشواق والنقيب كمال

شاهدين على تعرضكم الها وضربكم واراقت دمها.. وقادرين هسه ناخذ زوجها واخوها ونحكمهم..

بس احنه ما نريد نعقد الامر.. وخاطب بالتي هي احسن.. راح نجي بالحسنى.. لو شفنه الحسنى ما فادت ..ذاك الوقت راح نتصرف قانونيا ضدكم..

سمر.. بقو يجادلون ويحجون وعادل يحجس ويفشر بصفحه وكمال يرد عليه وعمو

خليل يحجي والاستاذ مؤيد يرده..

واصواتهم ضخمه تعالت بالبيت .. بهلاثناء ابوي يحاول يحجي بس صوته كوه يطلع..

ما تحمل وتخربط.. ضجو بيه.. واخذه احمد وخلاه بالسياره وركض بيه وامي تلطم على خدها وتدعي عليه

عزا العزاج سمر.. راح تذبحين ابوج.. راح تموتيه من وره مصايبج.. بقت باجي اشواق تهدي بيها وتحجي وياها..

واني ونجوى واكفات يم الدرج ونبجي.. انوب دخل استاذ مؤيد وعمو خليل وعادل وابن عمه صاحوني..

اجيت كعدت بالصاله حجه وبايه استاذ مؤيد.. كال بنتي هاي احنه هنا كاعدين لنحل موضوعج..

شنو اللي ترديه.. كتلهم ما اريد شي غير طلاقي من عادل..

صرخ عادل.. واليكول اني ميت على شكولج بنت الكلب.. ولج انتي خلج كح.. شمروج على كلبي وخلوني استر عليج..

كاعده بنص بيتي وتعشك اخوي شايفين هيج سامعين بيها قبل مره تعشك اخو رجلها..

ولج مو زين اني صابر على خياساتج.. لو ما امي من زمااان اني شامرج وخل يكون بعلمج يحقلي اخلي طلقه براسج واكتلج..

مؤيد.. لحظه لحظه لا تاخذنه بصياحك ابني.. تتهم زوجتك بعلاقه غير شرعيه مع اخوك.. هذه تهمه خطيره ..عندك دليل يثبت هلشي..

عادل.. كلها تدري الساقط الماخذ دور العاشق الولهان شنو مشاعره اتجاها..

سمر.. اذا تعرف بمشاعره وبكر عنده هيج مشاعر وانته تدري بيها وساكت اذن انته مو رجال وفد واحد مكرن

وقابل تخليني على ذمتك وانته تعرف مرتك عدها علاقه ويه اخوك.. كام يغلط ويفشر بصياح..

كعدوه. كالو سمر اكو هيج شي بينج وبين اخوه توجد هكذا علاقه..

كتلهم ابدا.. بكر رجل وكفلي وكفة اخ.. وهذا الكدامك اليكول سترت عليها.. ما ستر عليه.

وانما تفاوض ويه اخوه عليه وباعني اله ب10 ملايين.. اكو رجال يبيع مرته لاخوه بفلوس..

عادل.. ولج بنت الكلب اني بايعج بنت*****

سمر.. اي بعتني والكل يشهد. وره زواجك انته المصرف تاخذه من بكر وما عندك اي وضيفه منين جبت فلوس المهر والزواج لما اتزوجت..

جيبو بكر وهوه يشهد اخذ من عنده 10 ملايين في سبيل ما ينطيني لاخوي ويذبحني ويستر عليه.. واني اصلا لاغلطانه وي احد ولا ابد. وهوه كولش زين يعرف هلشي.

وكال لبكر انطيني الفلوس وانته شيل مسؤليتها.. وعشت عمري كله على بكر الربع دينار اخذه من بكر..

ما كلف نفسه فد يوم وصرف عليه.. حتى توصيلة الجامعه جان بكر متوليها ياخذني ويجيبني..

وين جانت غيرتك من هوه شايل مسؤليتي ومتولي حمايتي ودراستي.. يا رجل يا محترم هسه جاي اطلع بكر مو زين وعينه نكسه.. العايش كل عمرك بخيره

عادل.. رجال و غصبا عليج كح… اني جنت مأمن بيكم تاليتكم تسافرون لالمانيا الله يعلم شصار بينكم هناك..

واجت مناك كبل طلبت طلاك.. ولما احمد ما قبل وكسر راسج وراد يكتلج..

بكر الكلب كعد يتوسلي علمود ارجعج على ذمتي وما انطيج لاحمد يكتلج..

سمر.. لك عيب استحي واحفظ مي وجهك هذا الكلام يقلل منك ميرفعك تتهمني هسه عندي علاقه ويه اخوك.. وانته مبقيني ابيتك وممطلكني..

.. لما جنه بالمانيا رحنه علاج لعيونه والكل يشهد بهلشي.. وابراهيم جان ويانه مسافر..

جيبه وخل يشهد شنو جنه نسوي بالمانيا.. ولما طلبت الطلاك من. وره كلامكم عليه..

رحت وياه اساعده بصفته اخ.. اشكال والوان الحجي شمرتو عليه.. وطلعتوني ساقطه..

وقررت اتركم عشنو باقيه وياك متكلي انته هم رجال وابقى وياك بس غير ضيم اهلي شامرني عليك..

مؤيد.. ابني عيب تتهم زوخج باخوك وانته ما عندك دليل عليهم .. اللي فهمناه من الكلام ..اخوك جان متكفل مرتك..

وشايل مسؤليتك.. وانته اللي انطيته وسمحتله يتكفل مرتك.. ومدام انته حملت اخوك حمايتها ومسؤليتها..

عيب تجي تتهمه بهيج تهمه وتكول عليه عنده علاقه وياها..

عادل.. شتهم ولكم انتم تفهمون لو لا .. يابه احجي لخاطر الله .. ما جان الليل كله يبجي ويصرخ باسمها وهوه سكران

ما رفض يتقرب المرته عروس علمود سمر. ما قرر يترك مرته ويسافر بس لان سمر حبلت مني..

ولكم كل هذا بالعه وساكت من وره امي اليوميه تحجي براسي وتكلي اسكت..

كله من وره امي علمود المصرف والفلوس الينطيهايه بكر خلتني ارضى اسمع اخوي يصيح باسم مرتي واسكت..

مؤيد.. هذه اتهامات خطيره ابني .. انطينه دليل ملموس يؤكد ان اكو علاقه غير شرعيه بين سمر واخوك..

انطينه شاهد واحد على كلامك..

عادل.. بويه احجي شبيك ساكت.. مو انته اليوميه تجر بكر من الكراج وهوه لازم العود ويغنيلها ويصيح بسمها.. وتكله فضحتنه

خليل.. عادل تجاوزت حدك.. عيب بكر اخوك الجبير وما يسوي الكلته.. بكر ابني واعرفه ذهب ما يطلع منه الشين.

سمر.. فرحت بداخلي من عمو خليل ما انطه ابكر.. واني اعرف خليل كولش زين يدري بمشاعر بكر.. بس ما انطه بيه.

لان بكر هوه الكل بلكل الهم ولو اعترف عليه راح يخسره .. وخليل حيل يحترم بكر وما ينطي بيه حتى لو سوه الغلط..

سمر.. شفتو.. ابوه بنفسه ديكذبه ولسه يتهمني.. هيج رجل من حقي اطلب الطلاق منه. لان ما شفت منه غير الاذيه والقهر..

من حقي اعي

ش براحه.. لا غلطت ولا ارتكبت حرام .. ودا اتعاقب بدون ميطلع مني غلط..

همه يتهموني بكلام ويصدكون نفسهم.. عادل كام يشيل روحه ويركعها ويتحلفلي ويصيح وعافنه وطلع ..

وخليل مخنز عليه شلون هيج حجيت.. طلعو كلهم باوعتلي باجي اشواق وكالت التليفون يمج اي شي يصير وياج خبرينه..

كتلها انشالله.. كالت احنه اخذنه تعهد لو تعرضولج بعد نتصرف قانونيا ونحكمهم ..

طلعوو.. اجت امي.. كالت الله ياخذج ولج فضحتينه ولج مي ما خليتي بوجوهنه مي نزلتي روسنه .. انتي ما تستحين..

-شسويت يمه. هاي فوك ما تصيرين ويايه وتنصريني.. تصيرين ضدي.. شسويت..

-الا كولي شنو الما سويتيه.. ولج يمعزايه اكو وحده تسوي سوايتج.. تشردين من بيت رجلج.

-يمه شردت من بيت رجلي من ضلمهم.. ما شردت ويه صاحبي لغير محافظه وكسرت وجوه اهلي..

حجيت هيج.. ضربتني راشدي حيل..

-وج سمر تعيريني .. ولج بت بطني تحجين وياي هيج.. انعل الساعه الجبتج بيها حقيره

-يمه كافي لخاطر الله كافي.. مليت تعبت مليييييت ..تحللون النفسكم وتحرمون عليه.

انطوني ذنبي شسوووويت.. اكدر اسوي السويتيه انتي.. واشرد ويه اللي اريده واعوفكم وراي وما اهتم لسمعتكم

واعيش اجمل حياة بعيده عنكم وعن ظلمكم.. اكدر باستطاعتي كولشي اسوي وما سويت..

ليش جاي اتعاقب.. يعني تجبروني علحرام كوه.. يمه حرام عليكم والله.. تعبت والله تعبت..

لا روح ولا جسد ضل عندي.. حيل ما ضل بيه من القهر والله .. دكاااافي.. عفتها وصعدت ابجي..

اجت يمي نجوه تبجي وتمسح بدموعي.. كتلها نجوى شسوي مليت.. ولج بكر ينتظر الكلمه مني..

علمود اروح وياه ونعيش حياتنه.. ورافضه وساكته ومتحمله.. علمود لا ااجيبلهم العار وتالي اطلع مو زينه..

نجوى.. بكر يعرف بيج.. انتي وين جنتي..

سمر.. مسحت دموعي.. كتلها اي..

نجوى.. وج شلون عرف هوه الاجانه متخبل وكال سمر ماكو..

-شوكت اجاكم…

-قبل يومين من الصبح جان حيل مقهور ويدور عليج..

-اي خابرته بيومها بليل وكتله ودليته عليه..

-وما كاللنه واحنه ميتين اندور عليج..

-شيكلكم.. بيومها دخلت مستشفى.. وحارو بيه

-صدوك اتذكرت شلون وكع طفلج اتخبلت من سمعت حامل واجهضتي شلوون عادل مو ميتقربلج.
-لج الكلب تقربلي بليله وطبعا بتخطيط وجبر من عمتي ساميه.. علمود تجبر بكر يأيس مني وياخذ مرته..

-واخذها..

- لاا بس سكر كولش لحد الثماله بيومها لما عرف عادل متقرب مني.. وهمه استغلو الوضع وخلوه يدخل على مرته..

- خطيه والله يكسر خاطري لو تشوفيه شلون اجانه هنا والدموع تلمع بعيونه وهوه يصيح راح اتخبل وين الكاها..

-ابتسمت.. مسحت دموعي.. ذكرتيني بيه.. خل اخابره انطيه خبر هسه تلكين بكلبه النار..

خابرته.. رد .. الو هااا بكر..

-وج يمعوده متت وين صرتي .. شصار فهميني..

سولفتله الصار كله..

-عادل واحمد مراح يعوفوج سمر.. راح يتفقون ويقتلوج حظري شغلاتج خل اجي اخذج..

-ميسوون شي بكر الاستاذ مؤيد خوش حجه وياهم وباجي وكمال ما اعتقد يسوون شي..

-وج انتي تضلين غبيه.. وين اكو قانون بالعراق ويحميج من العشاير راح يموتوج ويكولون انتحرت لو اختفت..

-بكر والله ما اتوقع هلشي .. كافي عوفها على الله..

-نجوى يمج

-اي

-انطينياها

-هاك.. اخذته نجوى كالتله ها بكر..

-نجوى فتحي عيونج واذاناتج زين واتسمعي بانحاء البيت على كل كلمه يكولوها..

تره مراح يسكتون اعرفهم.. راح يحاولون يسون بيها شي. لو حسيتي بخطر خابريني فورا..

-اوك ماشي

-نجوى ما اوصيج حياتها متوقفه عليج.. لو ما درتي بالج عدل ممكن يكتلوها وياخذوها واحنه ما ندري

-لا هاهيه والله راح انزل وابقى مراقبه..

-اي فدوه عفيه ما اوصيج.. انطيني سمر..

-الوو هاا بكر..

- سمر كل ساعه تراسليني.. مو ضروري تتصلين.. حتى لو مسج وطمنيني انتي بخير ٱפگـيہ ..

- ٱפگـيہ

-يله باي .. راح يضل بالي يمج هااا مو تنسين كل ساعه طمنيني لتخليني بالنار..

-افتهمت.. مع السلامه. وج هذا هوااي متأثر بوادي الذئاب .. دا احسه مراد علمدار ويخطط ويوصي ههههه

-ما خسرانين شي هوه اعلم بيهم ويعرفهم.. نراقب ونشوف..

-لا يمعوده القانون وكف ويايه بعد ميكدرون يحجون كلمه.. شفتيهم عادل واحمد شلون سكتو وطلعو ما كدرو يواجهوهم.. يخافون بعد لا يدخلون السجن

-انشالله تكدرين تاخذين خقج..

- اخذت نفس انشالله.. تمددت.. وكتلها اذا اجه بابا كوليلي راح انام.. كالت ماشي..

نمت لهناك وما احس الا نجوى تكعدني بخوف.. وتصيح سمر سمر اكعدي بساع اكعدي..

كتلها شبيج ها شكو شصاير.. كالت جابو بابا هسه ونومو بالصاله وطلعت اجيبله شرشف

واسمع احمد يحجي ويه عادل ويكله اي اليوم بليل اكتلها موت وعود انتظركم حظر سيارة صلاح نشمرها ؏سده

ونغسل عارنه ولا من شاف ولا من دره المهم نبيض وجهنه بين العشاير ونكتلها.. يتبــــــع

🌺🌺🌺🌺

#حكاية_سمر.. (( الجزء الثاني ))

،،،،،،،،،،بقلم الكاتبه زينب ماجد،،،،،،،،،،،

البارت_4

سمر ،،نمت لهناك وما احس الا نجوى تكعدني بخوف.. وتصيح سمر سمر اكعدي بساع اكعدي..

كتلها شبيج ها شكو شصاير.. كالت جابو بابا هسه ونومو بالصاله وطلعت اجيبله شرشف

واسمع احمد يحجي ويه عادل ويكله اي اليوم بليل اكتلها موت وعود انتظركم حظر سيارة صلاح نشمرها ؏سده

ونغسل عارنه ولا من شاف ولا من دره المهم نبيض وجهنه بين العشاير ونكتلها..

بقيت صافن.. صرخت بيه سمر دكومي شبيج..

-شسوي نجوى وين اروح اخاااف .. بقيت ابجي..

-لج يا حبيبتي ما كدامنه غير حل .. خابري بكر خل يتصرف.. وخابري هاي التعرفيها بالمنظمه.. بلكت هم تكدر تتصرف بهلوضع..

-وين موبايلي.. بقيت ادور..

-هذا هذا..

-اوووف يا الله مطفي.. وين الشاحنه..

-جوه .. راح انزل اجيبها..

-لحظه اجي وياج اشوف الوضع.. نزلنه ثنينه.. اخذت الشاحنه.. شفت بابا دتنومه ماما..

اتقربت.. امي كالت اطلعي سمر.. كتلها ماما بس احظنه..

-ابوج تعبان يمه بعدين اطلعي هسه

-بابا حبيبي .. والله مسويت شي.. سامحني لو اذيتك بدون قصد.. جنت متوقعه من ابويه ردت فعل عنيفه ضدي..

بس العجيب فتحلي اديه.. من شفته فاتحلي حظنه اووف مثل واحد محترك ويريد يشمر روحه بنهر ويرتاح..

رتميت بحظن بابا ابجي وهوه يبجي خطيه.. ويحجي كلام كوه ينفهم.. باوعتله واني ابجي..

يكولي بابات دفعتي ثمن اغلاطي.. كتله لا بابا اغلاطي اني.. انته مغلطت وياي..

كال لااا جنت اعتقد هيج بس الله ضوكني نفس النار الضوكتها لجدج ابو امج..

لما جنتو تحجون وتتعاركون واتخربطت.. شفت جدج سيد حسن .. امي كالتله شفت ابوي..

كال اي.. جاي يتشمت يكولي هااا عبالك حوبتي ما خطتك.. من نهبت بتي من بيتي وكسرت وجهي..

انه سيد ابن رسول الله.. وانته جنت متجبر عليه برتبتك .. واخذت بتي من بيتي وكسرت وجهي وجبرتني اسكت..

دار الزمن بيك وخلاك الله بنفس الوضع الحطيتني بيه.. بتك تشرد وتكسر وجهك.. وبعد وبعد..

بقيت صافنه بوجه ابويه.. كتلها ماما ليش جدو شبيه..

-من اخذني ابوج من بيت اهلي وشردنه سوه ابوج جان ضابط بجيش العراقي..

وابوج هدد ابوي..لو تقربت من حياتنا .. او تحاول تأذي رجاء.. راح اتهمك انته عميل للخميني بذاك الوكت جانت اكو حرب بين العراق وايران..

وابوي خاف على اخوتي.. من ابوج واتبره مني .. بس كتله القهر من بعدي.. انجلط بعد ما انهزمت.. وعلى اثر الجلطه مات..

كتلها يعني بابا صدوك جان ناوي ينطي بخوالي.. كالت لا بس هيج تهديد هدد ابوي علمود لا يتقرب مني..

لان ابوي الله يرحمه جان رافض الزواج من غير سيد.. يريدني بس لولد عمي.. ما يقبل نتزوج غربه..

عده العلويه ما تطلع من نسل الساده وتتزوج غريب.. واني حبيت ابوج وطاوعته وصار اللي صار..
حجه ابوي.. جنت احسها هينه وخلصت.. بس ما حسّبت للدنيا دولاب تفر تفر وترجعك لنفس المكان الخليت غيرك بيه..

وهاي اني جاي ادفع ثمن اغلاطي ويه سيد حسن.. من كسرت وجها واخذت بنته غصب..

كسر وجهي ابنتي.. نزلت دموعه وهوه كوه يحجي ولسانه. ثكيل.. ويصيح ربي سامحني ..

حظنت بابا وبجيت.. وبعدين.. باوعتله..وكتله بابا والله شفت ضيم وقهر ما اعتقد بنيه تتحمله..

وجان باستطاعتي انهزم ويه شخص وارتاح.. واكسر وجهك مثل ما سوت ماما.. بس والله بابا ما كدرت انطي بيك..

كلما افكر بهلاحتمال انته تصير بعيوني.. والله بابا ما هانت عليه تربيتك وحنيتك ودلالك من جنت صغيره..

كل ذوله وكفو بعيوني وخلوني اتحمل المر في سبيل ما انزل راسك.. بس بابا اللي صار مو قصدي والله مو قصدي انهزم..

اختك ضالمه.. يا بابا ضالمه.. وزوجي باعني لاخوه بليلة عرسي

الاب.. باعج بيوم عرسج شنو .. يحجيها بثقل

سمر.. بابا عادل يعرف اني مغلطت ويه احد.. ويعرف اني شنو.. ورغم هذا.. بليلة عرسي اتفق ويه بكر..

ينطيه 10 ملايين وياخذني بكر ويتحمل مسؤليتي.. وبلفعل اخذ الفلوس من عنده واتزوج بيهن..

وبعد ما اتزوج انكلب.. وكام يتأمر ويتحكم عليه.. بابا والله حاولت اكونله زوجه ودوم جان يصدني..

ما اتقربلي الا ما بعد ما جبرته عمتي عليه.. علمود تحقق هدف ابالها.. ومن ليلتها ماسأل عني ابد..

بابا شفت وياهم قسوه وضلم اتحدى انسان شاف بكدي.. بابا من انهزمت مو حتى اكسر وجهكم..

لا والله بابا ما جان هذا قصدي.. بس انتم اهلي وتبريتو مني.. وعفتوني لرجال لا يريدني ولا يتقربلي..

وبس يضرب.. وعيال بس تهين وتستصغر.. بيومها بابا خسرت حتى طفلي اللي حسيته الي امل بالحياة رغم كرهي لابوه..

تأملت يصير عندي طفل اتسلى بيه وانسى اشياء هوايه ابالي.. وبنيت بيه امنيات.. تالي بليله ويوم يضيع مني بدون سبب..

بابا والله بيومها كرهت روحي.. حسيت ما الي مكان بهلدنيا.. والله خوفي من الله المنعني اموت.. الا جان انتحرت من زماان..

احجي وياه وابجي.. وابوي مدنك راسه ودموعه تجري.. مسحتله دموعه.. وكتله بابا كولشي ما اريد بس خ

ليني يمك..

خليت راسي بحظنه.. احس روحي طفله صرت وادور على حنانه.. اتقربت امي من يمنه..

وباست راسي.. نجوى ضحكت.. كالتلها ماما غرت بس بابا حاظن سمر تعالي حظنيني.. حظنتنه ثنينه ودموعنه بعيونه..

بعدين وخرت.. وكلت البابا.. نجوى سامعه احمد ديتفق ويه عادل يجون اليوم بليل يقتلوني بدون علم واحد ويشمروني..

كالت امي خيولي.. اليوم نامن هنا بغرفتنه.. واقفل الباب لباجر نحجي وياه اني وابوج..

خطيه فرشتلنه يمهم.. وبابا شلنه لسريره نومناه.. ونمنه اني ونجوى بغرفة مما وبابا ولازمين ادين بعض ونباوع لوجه بعض ونبتسم..

همستلي.. صدك ولج.. مخابرتي بكر.. كتلها باجر اخابره..

-وج خطيه يضل الليل كله مشغول باله عليج لو ما خابرتي وجهازج مغلق..

-شسوي جهازي طافي وين الكه هسه الشاحنه واخليها بدكمه واشحن اهلي نايمين.. اني باجر اخابره..

-انتي صدك ما عدج احساس.. اني من يمي مكسور خاطري على بكر.. وانتي ممهتمه..

-لج شلون ممهتمه.. والله ابودي اكوم واخابره بس صعب افتح قفل الباب واشحن واخابر.. لا يجي احمد..

طلعت جهازها من صدرها.. وكالت هاج.. دزيله رساله ولا تخليه باله مشغول.. ضحكت..

-حافظه رقمه مـℳOــو

-اي اي.. نحجي همس.. اخذت جهازها.. دكيت رقمه.. ودزيت رساله..

💬بكر اني سمر.. هذا جهاز نجوى اني نايمه بغرفة ماما وبابا.. لتخاف عليه.. تصالحنه اني وبابا وبعد ماكو خطر عليه 💬

دزليتها.. ثواني وجاوب برساله..

💬 احتركو اهلج لج متت خوف عليج والله.. ما مطمن لعادل وصلاح واكفين وديتفقون على شي.. ويخابرون خايف لا متفقين ويه احمد عليج واخابرج ومغلق نشف دمي علعموم اني اصلا صاف سيارتي بفرعكم كلت خاف يصير شي اتلاحك💬

جاوبته 💬 امنيه وحده اتمناها من الله وهوه انته💬

💬لتعتبريني امنيه.. الامنيات صعب تتحقق.. اعتبريني حاجه.. واطلبيها من الله💬

ردت اجاوبه.. همست نجوى خب هيووو حتخلصين الرسايل هيه باقيه بس 20 رساله مجانيه .. اريدهم ل مازن..

باوعتلها هيج 😒 انجبي انتي ومازن.. دزيتله.. 💬بكر فرحانه كولش لان تصالحت ويه بابا💬

💬يارب انشالله دوم الفرحه ما تفاركج💬

💬بكر💬

💬عيونه وكلبه💬

💬هههه الله يحفظك اليه💬

💬الله لا يحرمني منج.. بودي اسمع صوتج ممكن💬

💬صعب بابا وماما نايمين يمنه💬

💬بس شوي علمود يطمئن كلبي💬

💬اوك خابر لان هاي الجلفه ما عدها رصيد 💬

بمجرد ما دزيتها اتصل. ورج الموبايل بيناتنا.. الرجه قويه حسيت كلبي راح فتحت خط بساع..

همست.. وهاي سمعت صوتي يله روح اهلي نايمين..

-ما اروح حاب ابقى علخط حتى لو بس لسمع نفس..

-همست هذا موبايل نجوى خاف حبيبها يتصل ويلكاه مشغول خطيه..

همستلي نجوى لا عادي.. دزيت رساله لمازن وكتله اليوم مراح اتصل بيك وهوه يتفهم..

ضميت الجهاز جوه البطانيه وكتلها احركج هسه.. وج من يسمع هيج بعد يلطش وميسده..

كالت ايي هسه احجي وياه همس شكو.. واحنه جوه البطانيه واشخير امي واصل لامريكا..

انطيتها غمه بوجها ترس. ورجعت الاتصال يم اذني.. وبكر يضحك ويكول سمسم وين رحتي خبله انتي..

جاوبته ها ها موجوده.. بس تره ما اكدر احجي..

-ما حاج تحجين بس استمعيلي واني احجي..

-بشرط تغنيلي

-غالي والطلب رخيص.. شتردين اغني..

-بكيفك

-اوك اسمعي لعد.. راح اغنيلج موال عادي

-اي اي عادي

- احم احم ..امل منك اصد عنك.. جذب من كاااال اعوووفنك..

لو حطو بدربي النااااار بدمع عيني لطفيهة وادك بابك واشوفك..

واهدّم حاجز المبني واحيلة عنك وعني.. وحاجيك وتحاجيني واسمعنك..

شتريد اتصييييير طير اطّير.. اطير ويااااك ومن اتحط الزمنك..

شتريد اتصير نجم بسماااااي هم تلمع واشوفنك..

شتريد اتصير سمج بالماي.. هم تطلع واصيدنك

اتريد اتموت. انه اموت وياك وكبل ما اموت اصيحن حييييييل احبنك..

-هههههه هلله هلله يبخت العدها هيج صوت يغنيلها

-هههههه يله روحي ما اريد اضغط عليج اكثر خاف اهلج يسمعون.. ديري بالج على نفسج سمر..

واي شي اي شي يصير خابريني.. لا تعوفيني..

-اوك بس انته روح لا تبقى نايم بسيارتك بالفرع.. روح للبيت..

-انشالله.. باااي..

-باي.. سديته من بكر. لكيت 4 رسايل من مازن.. اباوع لنجوى غفت.. فتحت الرسايل..

لكيته دازلها.. 💬شنو نونه كلتيلي ما اكدر اتصل بيك اليوم واخابر بس اسمع صوتج والكاج مشغول شنو معناها💬

ورساله ثانيه كاتب هاي بعدج مشغول.. انوب.. اوك نونه مع الاسف .. ورساله لخ كاتب.. خوش هينه عرفت قدري عندج شنو

دزيتله اسفه مازن.. اني سمر اخت نجوى وموبايل نجوى عندي وهيه هياتها نايمه يمي.. واني جنت احجي بالموبايل.. لتضوج فدوه باجر اخليها تخابر

دز لاا عادي اسف عبالي هيه ومتجاوبني اخذي راحتج...

غلقت الجهاز حاولت انام.. بطني اطلع اصوات من كد الجوع.. علريوك الاكلته ويه كمال وباجي اشواق للان مماكله..

بس اخاف اطلع اكل.. اوووف ياربي.. هسه وكتها اجوع.. لا انوب اطلع ويلزمني احمد شيخلصني.

ما كدرت من الجوع الا ا

طلع احس روحي انخرطت من الجوع.. طلعت علكيييف.. فتحت الباب.

البيت هاااادئ.. مشيت.. سمعت صوت من وراي.. سمر.. كمزت.. شفته اخويه محمد ضحكت كتله هله حبيبي حمودي اشونك..

اجه بوسني وسلم عليه.. كتله وين جنت.. كال ادرس يم جماعتي. كتله فدوه لطولك والله مشتاقتلك..

باوعت الساعه 11.. كال والله ضل بالي عليج من كالو شردت. كتله حمودي شسوي تعبت والله تعبت..

كال معليج بعادل السكط بعد لترحين.. بست خده.. كتله ياريت البعير اخوك مثلك.. جان اني بخير..

كال معليج باحمد هذا حمار. ضحكت.. وحظنته.. محمد عمره 12 سنه اخوي الصغير بس حيل احبه..

من هوه واصغير اني وياه واعلمه ومتحملته اكثر من امي.. مرات احسه ابني مو اخوي..

كال جوعان.. كتله والله اني هم جوعانه .. تعال دنسوي اكل.. رحنه للمطبخ.. كتله محمد ابقى يمي خاف يجي احمد..

كال ماشي.. طلعت كبه موصليه من الثلاجه وكليتها للسرعه وكليت طماطه.. خليته دناكل.. لشوي طب.. احمد..

اني كمت من مكاني بساع من الخوف.. اجه صرخ ساقطه عبالج ما الزمج.. واجه لزمني من شعري ومحمد يحيل بيناتنه..

محمد.. احمد شبيك عوفهااا..

احمد.. وخرت انته خل اربيها.. لج انتي ما ارتاح اذا ما ادفنج والله. حقيييره كلبه

سمر.. احمد الله يخليك عوفني والله ما سويت شي ابوس ايدك احمد.. اصيح

محمد.. دووووخر منها هيه شنيه تايهتلك.. ودفع احمد مني حيل ووكعه..

احمد.. لك سكط توووكعني.. اليوم اذبحكم ثنينكم والله..

سمر.. احمد دار وجها للكاونتر يدور سجين.. ومحمد دفعني للباب ويكلي شردي.

خفت لا يسوي بيه شي.. بقيت واكفه.. احمد اخذ سجين ودار وجها عليه تعاااي ساقطه. ومحمد ركض لزمه ويتعارك وياه..

بس اصغير ما يكدرله.. طلعت امي وبقيت تصيح انته شبيك متكلي فوك ظيمنه تزيدها علينه.

احمد.. هااي بتج الا اذبحها والله تريد تطلك وتنام بروسنه. هوه انتو كوه متحملكم والله اشمركم بالشارع..

امي.. لا خلف الله عليك بعده ابوك هسه وكع ومنيت علينه بصرفك.. شصرفت هاا شصرفت..

كل هلملايين ضاميها للعازه وخليتها بين اديك شتريد بعد.. لان اشتغلت صار اسبوع وتصرف علبيت منيت علينه..

سمر.. شفت الحجي غير شكل.. يعني اكو مشاكل بالبيت غيري.. واللي هيه المصرف ومسؤلية البيت صارت ابيد احمد بعد وكعت بابا…

بقيت يم الدرج واكفه.. واباوعلهم واحمد يصرخ ويه امي.. وامي تصيح..

احمد.. والله لو تعيش بالشارع هاي الساقطه ما اصرف عليها ..

سمر.. انته مستثقل عيشتي.. اذا علعيشه اطمن ما اخليك. تصرف عليه فلس احمر بس كفني شرك..

امي.. وك يمه كافي تعبنه والله.. تذبح اختك شتستفاد غير تضيع شبابك وتنسجن..

احمد.. لااا ما انسجن هاي ساقطه وقتلها يتسمه غسل عار.. ما اتحاسب عليه

امي.. وك يمه يا غسل عار اختك ما غلطت ولو كتلتها القانون يسجنك واذا بحث وما لكاها غلطان تخلص عمرك بالسجن..

لا تخلي عادل وغيره يلعبون بعقلك .. اعقل يمه مالنه غيرك والله.

احمد.. اني مليت منكم مليت شنو ابتليت صرت جبير..

سمر.. اذا علمصرف ومسؤلية البيت احمد والله اوعدك ادور تعيين واشتغل واعينك بالمسؤليه والله..

شفته باوعلي وسكت.. الضاهر الحمل الصاير على ضهره ما متحمله .. مو كدها.. دارلي وجها وكال..

باعي.. خلال شهر اذا ما لكيتي تعيين وتوضففتي وخليتي الراتب بيدي والله اذبحج اذا اطلكتي واكلهم شفتها ويه واحد..

بقيت صافنه بوجها .. هذا من كل عقله يحجي. اكو هيج اخ يعامل اخته.. بس شسوي لا حول ولا قوه..

كتله والله اوعدك.. ادور علشغل دواره وانطيك الراتب تدلل بس احمد الله يخليك عوفني اعيش تعبت من عادل وسوالفه المكسره..

طلع الموبايل من جيبه خلاه علطاوله ودنك وخله اديه على راسه.. اتقربت يمه.. امي كالت لا تتقربين منه عوفيه..

كتلها بس شوي. اتقربت.. يمها.. مديت ايدي لشعره.. دفعني وصرخ وخري مني تلعب روحي منج..

كتله احمد اني اختك والله مو عدوتك.. واقسم بالقران العظيم وجيبه وخليه كدامي. اذا فد يوم غلطت ويه واحد او سويت حرام..

لك انته اخويه وتعرف تربات امي وابويه شلون علمونه.. شلون تشك بيه اسوي الغلط..

بقى مدنك.. وما رد.. كتله لتضوج والله اذا علمصرف اني اعينك بيه لتشيل هم..

كال كدامج شهر والله اذا متعينتي اذبحج لو ارجعج لعادل غصب وهوه يتصرف وياج.. حجه وطلع.. باوعت لامي.. كتلها راتب بابا وين ليش احمد يشتغل..

كالت راتب ابوج انكطع.. والفلوس العدنه شمرناها على علاج ابوج.. جان مشلول هسه رحمه يحجي ويكدر يشيل ايده خفيف..

بس ما بقت عدنه فلوس.. عدنه بيت غير هذا نريد نأجره ودكينه بيه قطعه للايجار بس للان ماكو. واحد اجانه على ايجاره..

كتلها اذا علبيت.. انطيه لبكر يأجره هوه دلال ويشتغل بهلشي.. بس راتب بابا ليش مطلع غير تقاعد مالته.

-يا تقاعد متكليلي.. انشلت رجلينه من الروحه والرجعه علمعامله مال التقاعد.. بعد خدمه كل هلسنين بالجيش ينشمر ومحد بحاله حتى تقاعد ماكو..

محد يه

تم ويمشي الامور كلها فساد ورشاوي.. واني ما ضل تحت ايدي وانطي علمود يخلصولنه المعامله..

-الله موجود.. هسه الحمدلله خلصت من عقدت احمد الباقي سهل.. نشوف شلون ندبرها..

درت وجهي.. شفت نجوى كبالي.. كتلها كعدتي..

-صار ساعه واكفه يمج هسه يله انتبهتي

-ههه ما انتبهت والله.. اتقربت لاذانها.. وكتلها تره خابر مازن ولكاه مشغول وزعل.. خابريه اذا تكدرين.. اني فهمته الجهاز بيدي..

كالت راح اصعد اكمل نومتي فوك واخابره.. كتلها بكيفج.. امي طبت جوه تنام.. بس محمد بقى واكف..

كتله روح نام حبيبي وراك مدرسه.. كال رايح.. شرب مي وصعد.. لميت المطبخ من الهوسه..

ودا اطفي الضوه.. شفت موبايل احمد عطاوله يرن.. باوعته مكتوب عادل.. فتحت.. خط..

كاله هااا احمد متانيك.. كتله انته متستحي.. متخجل.. لك عمري كله مشايفه واحد ناقص رجوله مثلك ..

كال ولج اذا ما اذبحج فلا اتسمه عادل..

-خب دروح لك.. شكد كرهتك .. لا تحاول توصل يمنه وطلاك اطلك غصبا عليك.. كال اريد اشوف شلون اطلكج الا اشلع كلبج..

كتله مو اكولك مو رجال.. صدك انته مو مال احترام.. واطلب منك طلاك..

بلله هوه انته رجال واطلكني.. لا حبيبي المثلك اني اخلعه احسن.. حتى اذا منهانيت كفايه اهينك بالزايد..

بقى يغلط ويفشر .. لعبت روحي من من الغلط مالته وسديته بوجها .. رفعت راسي للسما.. كتله يارب عونك..

عفت الموبايل علطاوله ورحت انام.. دخلت غرفت بابا وماما.. ماما مخليه راسها على صدر بابا ونايمه..

ضحكت.. شكد كبار بس لليوم احسهم عشاك.. استحيت ابقى نايمه يمهم.. اخذت موبايلي.

وطلعت.. جريت الشاحنه وصعدت فوك.. دخلت لكيت نجوى تحجي.. كتلها هااا ام الحب.. غمزتلها دتحجين ويه مزمز..

كالت عيني اسمه ميزو.. كتلها بيبسي اطيب.. كالت الببسي مخليته الج.. كتلها عبالج قصفتيني وعود بكر اسمر..

لا حبيبي بكر يخبل.. بس سماره يجنن شنو ابيض وويع راح موديله.. على كولتهم الابيض يتوسخ سريعا😝

نجوى،، مازن يكول.. والاسمر يجلح..ههههههه

-اشو جيبي خل احجي وياه.. تعال لك منو هذا اليجلح..

-خل يفيدج لمصخم يابه هههههههه

-تروحله فدوه ابو حلك جايب روحك وياها عنده لكز انته بكده خخخخخ..

-ههههههههه عمي الله يزيده شرايد منه.. شلونج خيتي..

-هلا بيك مازن شلونك.. طبعا اختي العوبه كولش هواي تسولفلي بيك

-هههه وهيه كلش هواي تبجي عليج يمي..

-باوعت لنجوى وغمزتلها هااا هااا تحبيني وتبجين عليه..

-ياااا عابتلج والله.. ابجي عليج.. اصلا يجذب عليج..

-مازن اسفه اني مو حاروكه.. بس نجوى تكول انته جذاب.. تقبل حبيبتك هيج تحجي عليك لا مع الاسف نجوى خاب الامل بيج..

-دنطينياها خل اربيها..

-اي عفيه هيج اريدك سبع.. هاج خلي يربيج.. انطيته الها جان تكله يحبيبي فدوه اسمعي يصرخ لج احبببج.

-كتلها مع الاسف طلع مو سبع.. كالت انجبي.. صحت بالموبايل يله تصبحوووون عخير..

صاح هوه بس فكينه وروحي.. واحنه نشوف الخير.. كتله لا يا ابن الاوادم.. تتعاي جيبي الموبايل..

اخذتها وكتله بعد ممنوع تخابر اختي بوجودي يله باي ههههه… وسديته.. كالت منو سمحلج..

كتلها بكيفي. 😝 .. ورحت للسرير..

نجوى.. انتي حتنامين علسرير..

سمر.. اي😌 بما انو اني راح استقر هنا فتعلمي منا وجاي السرير الي بنتي.. دبري حالج بالكاع..

نجوى.. ايوووو هاي شغله تفيدج والله هذا سرير معليه 😭 ونتعارك علسرير.. هيه تدفع واني ادفع..

جان احمد يضرب علباب ويكول ساقطات صوتجن .. وكعنه اثنينه وانخلسنه😐.. باوعنه البعض وانفجرنه ضحك..

خلينه المخده ونامت ويايه علسرير سوه.. رغم حصره.. بس يمكن اجمل ليله بعمري.. انام واني ما افكر اكو خطر ؏ حياتي..

كعدنه الصبح.. الساعه 11.. على صوت امي وهيه تصيح صار الضهر دكعدن عااد..

ياااربي شكد مشتاقه لهيح اجواء.. حتى صياح امي احسه نعمه لازم اشكر الله عليها..

كعدنه اثنينه.. كالت امي.. راح نروح للنجف.. انزور ابوج.. طالبتها من الامام علي يكومه على حيله ترحن وياي..

كتلها علووووووا والله ماما مشتاقه ازور كالت يله راح نروح بعد الضهر احمد ياخذنه..

كتلها ليش مو دوام باجر.. كالت لا جمعه باجر لا احمد ولا نجوى ولا محمد عدهم دوام لهيج كلت نزور.. وهم نرتاح من المشاكل الصارت..

كتلها لعد صدوك ليش ممداومه نجوى..

-ما رحت علمود بقيت نايمه يمج

-يمه فدوه لاخيتي وحظنتها.. يله نكوم نكمل شغل لا ست رجاء تخبصنه..

-يله..

-كمنه اني ونجوى نضفنه البيت كله وكملنه الاكل وسبحنه وبدلنه لل3 طلع احمد.. ما يحجي وياي وشايل خشمه.. شريد منه المهم جاز مني

اخذ ابويه وصعده بالسياره واني وماما ونجوى ليوره كاعدين.. ومحمد كعد بكرسي صغير وره اتكسر خطيه.. بس تمدد

لل6 ونص وصلنه الامام.. زرنه ودعينه وكعدنه نتعشه.. لل9 بليل رحنه لبيت اهل ماما..

خطيه فرحو بينه .. بس جنه ميتين تعب.. كلنه نمنه.. ثاني يوم.. كالت ماما راح اروح لبيت خالتي ام اركان ترحو

ن وياي..

من سمعت بيت اركان نكز صار بكلبي.. خايفه اشوفه بعد كل هلسنين.. بيا وجه اكابله..

كتلها ماما ما اريد اروح خليني ابيت جدو هنا احسن.. كالت دكومن روحن عيب اصلا هيه عزمتنه.. نجي للنجف ومنمر بيهم زحمه

كتلها اووف حبكت الا كلنا.. كالت نجوى دكومي شنو خايفه تواجيه.. شبيج سمر خليج قويه..

كتلها شايفه اخر مره خابرني شلون منهار ويبجي بليلة عرسه.. ويكولي ما ترتاحين بحياتج كلها وكولي سيد اركان كال.. هاي حوبتي..

وصدك من يوم الغدرته وعفته لليوم والله ما شفت راحه..

نجوى،، اهووو هسه ابوي الا يتزوج علويه.. مو طاح حظنه من كد ما يشورون بينه بلله شمستفادين

سمر .. اي بالله صدوك طاح حظنه هههههه.. بجهه حوبة سيد حسن الطيح حظ ابوي وخلاه مشلول..

وبجهه سيد اركان السود وصخم حياتي بحوبته.. المفروض يكتبون على الساده خطر ممنوع الاقتراب. اليقترب يطيح حظه هههههه

نجوى،، ههههههههه

امي.. اخ يلقهر ولجن بعدج تتضاحكن دكوووومن..

سمر.. يا ستار يا ربي.. تكول رعيد مو صوت.. لبسنه وكملنه.. ورحنه وياها..

طبعا عادة من نجي للنجف نلبس عبايه منطلع بالبنطرون لان خوالي ميقبلون عاداتهم هيج ما عدهم بنيه تطلع سافره بدون عباه..

واني يطيح حظي منها.. احس شايله جبل فوك راسي واطوطح بيها واتعثر.. ما اعرف شلون تلبس..

الزياره عندي شده من وره العبايه.. لبسنه ورحنه.. مشين.. واني شايله العبايه.. خاف تدمر..

صاح خالو .. خالي نزلي عباتج لا ترفعيها.. كتله خالو توكع بالطين طويله عليه.. كال خالو العبايه الما تطّين معناها ما ملبوسه للستر..

-خرررب هاي شلون بلوه يربي.. انوب ادخل لبيت اركان مطينه شهلحظ..اباوع لنجوى نفس حالي تجيبها منا وتردها هنا.. ضلينه نباوع لبعض ونضحك على نفسنه

وصلنه.. بعد ما هلكنه.. مو تكول فرعين.. شطولهن صارن.. دكينه الباب.. فتحته خالتي يبووو اخذتنه بحظنها شكد مشتاقيلها..

خالتي بنت خالة ماما تصير اخت اركان الجبيره.. بس حيل نحبها استقبلتنه بلهله ورحبت بينه..

وبيبي هم فرحت .. كعدنه وهمه يسلمون .. اجت بنيه ما شايفتها. قبل.. عرفتها مرت اركان.. بس هلكد حلوه خرررب ..

العيون خضر وبيضه تجنن.. همست لنجوى هذا اركان شبيه.. صدك مخبل بليلة عرسه يشوف هيج وجه ويبجي على وجهي المصخم..

صدك لو كالو الحب اعمى.. كالت دكومي شوفيها شلون جامده.. انتي صدك حنطيه بس دمج حلو وبس غمازاتج كافي..

كتلها يماااي بعد اختج خوش رفع للمعنويات يمه فدوه.. بعد السلام والكعده.. كمنه. ويه البنات للمطبخ.

وعفنه الرياجيل بالصاله.. وكفنه.. اني لابسه بنطرون وقميص.. بس لافه العبايه على خصري..

ومخليتها على اديه وواكفه.. كتلها شسمج.. لمرت اركان.. كالت اسمي زهراء.. كتلها هلا بيج..

كالت وانتي.. كتلها سمر.. اشو هاي بس سمعت اسمي.. انصرعت وكالت هوه انتي سمر..

كتلها سامعه بيه.. عافتني ومشت بس مبينه ما حبتني ضاجت.. باوعت لـ نجوى هاي شبيها.. سوتلي حركه بحواجبها شمدريني..

دنحجي وطب اركان .. من شفته المغص لزم بطني ما اعرف ليش.. متغير صاير اسمر.. وضعفان نص وجها لحيه..

ما انتبهلي.. وهوه يحط المسواك بالمطبخ.. حجت امي وراه.. كالته شلونك سيد اركان.. واحنه واكفات وره امي..

دار وجها.. وكال هلا ام احمد.. جاي يسلم وانتبهلي.. ضل صافن ويتلعثم بسلام..

كتله شلونك اركان وابتسمت.. يتبع

🌺🌺🌺🌺 👉

اكو عبره حابه اوضحه وانطيها حقها بالقصه واركز عليها.. وهيه الاهل وهروب البنت مع الشاب..

تره يا جماعه.. حتى لو كانت المشاعر صادقه بينك وبين من تحب.. لا تفضل هلمشاعر على اهلك..

خاصه البنت.. راعي سمعت ابوج اللي هيه امانه بعنق كل بنت.. هذا الاب التعب والنكسر ظهره علمود يئمن لقمة عيشج..

مو لازم تكسرين وجه علمود شاب.. حتى لو كان يحبج من صدك.. تره الدنيا دواره وشتسوين باهلج يدور الزمن واولادكم يسووه بيكم..

حتى الشباب.. اتركونه من اللي ما عدهم ضمير ويلعبون على بنات العلم.. كلامي للراقين بيهم..

لما تحب بنت.. خلي اهلها بين عيونك.. تره حبك وحده مو كافي الها.. ابوها التعب والربى ميصير تخلي حبيبتك توكف بوجهم. علمودك..

يدور الزمن وتصير بنتك توكف كبالك وتكلك هذا يحبني ويريدني شنو موقفك.. بهذاك الوقت يكون..
تقبل بنتك هيج تنكر تعبك عليها وتضحي بيك علمود اللي اتحبه.. اي نعم هذا اللي يصير.. لو خليت حبيبتك ضد اهلها

لا تكول/ي اني من اكبر ويصير عندي ابناء راح اتفهمهم واكون سبورت لااااا انتو غلطانين..

هذا الكلام تكولو هسه لان انتو بمرحلة شباب.. بعد 20 سنه من تكبري وعقلك يكبر وتصير بعقل بالغ مو بعقل شاب راح تتغير هذي النضريات

تعرفون ليش.. لان بهذاك الوقت.. راح تكونون راشدين.. وخاضعين لعادات مجتمعنه الشرقي..

وخاصه البنت.. اليوم انتي شابه وتحبين.. باجر لما تكونين ام خوفج على بنتج راح تغير وجهة نظرج اتجاه الشي الاسمه حب..

الحب راح تشوفي شي خطر جدا على بنتج.. حتى لو ك

ان المقابل يحب وصادق.. لكن خوفج كأم راح يخليج حذره وتتعاملين معاها بقوه لمصلحتها مو كره الها..

فاذا كنتي تردين بنتج اطيعج في ما بعد.. طيعي اهلج.. لا تبيعين ابوج اللي اتحمل الحر والمطر علمود يجيبلج اللكمه..

وتكسرين وجه وتنزلين راسه بين اقاربه وعشيرته علمود واحد حبيتيه .. اتأكدي الله مراح يهنيج ويسعدج بحياتج..

وادور الدنيا وتوكعين بمكان ابوج ويتركبج العار.. مثل ما ركبتيه لابوج..

لحد يكول هوه هم اهلي شمقدميلي.. باعو فلان وعلان يسافر ويروح ومول ويفتر واني حصره عليه الحاجه..

انصحكم لا تباوعون ليفوك.. وباوع للي اقل منكم واحمدو ربكم على النعمه.. الاب والام اللي يتعبون ويهلكون نفسهم

علمود يسدولج حاجه.. شكري الله عليهم تره همه ممحصلين منكم شي.. عطاءهم الكم بدون مقابل..

لتكولين اهلي شمقدميلي.. اعكس السؤال وكول اني شمقدم لاهلي اللي تعبو سهرو وعانو علمود يربونه..

يكفيهم وصلوك لهل عمر وما خلوك تمد ايدك لغريب وتكول انطيني.. هذي نعمه لازم تشكرون ربكم عليها..

الام والاب خيمه.. شكد ميقسون عليك لمصلحتك علمود يمشوكم للطريق الصحيح اللي تعب عليك ويقدملك مصرف واكل ومسكن بلاش..

وما محصل منك شي.. هذا لتعتقده يكرهك.. وانما قسوته وياك حب وعطف وخوف عليك من هلوقت.. خاف يضيعك..

اختصار عبرتي.. راعو اهلكم وخافو الله بيهم.. لان الدنيا دولاب تفر وترجعلك..