مازرع الله بقلبك أمراً إلاّ وهو كافلٌ لحظة تحقيقه لك

تقريبا هاذي الحالة تنتاب اي واحد و هي حاجة طبيعية بسك راك قريت 12 سنة و مديتها من عمرك باش توصل لعام الباك و دك راك فالشوط التالي لي يحسم الماتش كامل
U care and u should care
حاجة طبيعية أنك تخاف من نتيجتك ، و لا أنك تحس روحك بديت تضيع و خص واحد يوجهك و يوريلك الأخطاء ليقاعد تدير فيهم بلا ماتجيبلهم بال، تحس روحك كرهت ، عييت ، وش لازم ندير دك ، لوكان الباك يجي صعيب ، لوكان يركزو على الدروس الأخيرة ،لوكان نغلط نفس الغلطات ليقاعد نديرهم دك ، و شحال من لوكان أخرى .
الخوف هذا الطبيعي يا أخي ،
مي علابالك وش هي الحاجة ليتصنع الفرق دكا ؟؟ و وش هي الحاجة ليتميز تلميذ على آخر و تخلي علامتو تتغير ؟
الحاجة هادي هي كيفاه تكونطرولي الخوف و الستراس دكا و تقدر تافونسي وش بقا بدل ماتبقا تعيي روحك بالتخمام بلا فايدة .
بقا شهر للباك ، اسك هذا التخمام تع نوصل و لا منوصلش حيجيب فايدة ، وش قاعد ندير انا أصلا كينقول بلاك نوصل و لالا ؟ اسك كاين فايدة و لا كاش عفسة حتصرالي
الإجابة ليعلابالي و علابالك بيها هي لالا .
طريقة التفكير هو منبع المشاكل و منبع الحلول في آن واحد .
اذا قعدت تخمم على رسوبك من نجاحك و وش كنت قادر تدير ، و بلاك ضيعت وقت مقبل ، حتتقلق ، يفرز ادرنالين ، ينقص تركيز ، مخك يولي حاب يهرب مالحالة لي فيها غير بالرقاد
نتيجة ذلك تولي القراية ليتقراها تحس بلي ماراك تستوعب والو ، نعاس حاكمك طول النهار فالوقت لي لازم تصحصح فيه و تمد أقصى ماعندك دك .
بديت تفيق الحل وش هو و لا؟🤌🏻
نديرو لحظة تفكير و نخمو منطقيا ، السعي سعيت ، التعب تعبت ، قريت 12 عام باش تدي مفتاح يخليك تدخل التخصص ليحابو برك
صبرت سنين من عمرك، هان عليك شهر تزيد تمد فيه وش تقدر و تدي المفتاح هذا ؟
حاس روحك عييت ، لازم تعيا
جمال النجاح أنو يجي بعد تعب مش بالساهل .
بقالك أسابيع و خلاص علاه تخلي روحك بالطاقة السلبية و تبريزي عمرك و لي معاك ،

آخر مرة ديت فيها 20 في مادة الرياضيات كانت فالبيام و من ثم ماعودتش شفتها مرة أخرى حتى الباك ، علابالك وش معنتها ثلاث سنين و انا نقرا كل فرض و كل اختبار باش نديها و منبعد لالا ، ثقتي في روحي من ناحية الرياضيات بالذات بدات تتزعزع و شيئا فشيئا بدا يدخلني تخمام تع واقيل مافيهاش صح مع الرياضيات تع الليسي .
في هذي اللحظة بالذات و كي فقت بلي ثقتي بدات تتزعزع قلت خلاص لازملها حل
علاه مانوصلش انا و كل عام الناس توصل
على أي اساس مخوفتني قراية تع الليسي و الناس راي تعدد ف الدكتوراه
الهاته الدرجة نفسك هانت عليك ؟
في هذه الدوامة، النقطة الفاصلة كانت كيدخلت في راسي انو الحل الوحيد لانقاذ ماتبقى اني نكمل نخدم مش نخمم ، كل نهار حتريفيزي فيه و لو حرف عندو دور و حيزيد من نتيجتك ، كل نهار تقعد فيه فهادي الدوامة حتسوء حالتك النفسية ، حتخسر ثقتك بروحك و تكمل نحو الأسوء .
مالا صاي حبس علينا الخوف هذا ، احكم ورقة بيضاء اكتب كامل وش حاس ، مخاوفك ، وش راو يقلق فيك ، اكتب كلش حرفيا كامل الهدرة ليحاب تقولها و ليكنت حاب واحد يسمعك علاجالك ، اكتب كلش .
و كي تكمل عبالك وش تدير ، قطعها
قطعها ، احرقها و لا ارميها و قال خلاص خصنا حل مش غير هدرة.
احكم ورقة بيضاء اخرى و اكتب وش هو المشكل ليراك تشوف فيه مش حيخليك توصل لهدفك و خصو يتحل ، درس ماراكش فاهمو مليح ، مصطلحات ماحفظتهمش ، قواعد نسيتهم ، و لا مواضيع ماحليتهمش
كل مشكل ديرلو سهم و اكتب الحل و لا الحلول تاعو .
و توكل على ربي و بدا تطبق و كل مرة تكمل حاجة قال اقتربنا من الهدف ، طلعنا نقطة تع فيزيك ، ضمنا المواد الفرنسية و هي رايحة.
هذي هي الطريقة ليخلاتني نتحمس نروح نجوز الباك و نستنى غير وقتاه ختبر روحي و نشوف بلي حليت المشاكل ليكانو فالطريق .
صدقوني كي اقتنعت بهاذي صح ، وليت كل مرة نروح نتبسم و نضحك لدارنا و نقلهم علابالكم الباك مابقالوش و هوما مدهوشين فيا .
هاذي ليتخليك متحمس تروح للباك لييخوفو بيه ، خليك متحمس باش تدي المفتاح ليتوصل بيه التخصص ليتحوس عليه و المجال ليتشوف فيه روحك ، و دايما اتفكر بلي راك عاد فالبدية تع المشوار الجامعة و الماستر و الدكتوراه و أكثر من ذلك مش حيكون أسهل من الباك ، مي قدرتك على المواجهة و كيفاه تتحكم فالستراس هي ليحتخليك توصل بعيد .
نهايةً، جامي يخيب ظنك بربي ، تيقن بلي سيسير لك طريقك و يسهلها لك ، توكل عليه في كل خطوة تخطوها ، حصن نفسك بالأذكار ، و أقرا ورد من القرآن كل ماتحس روحك متضايق ،
و ادعي إن الدعاء يغير الأقدار . ❤️‍🩹

دعواتكم لي بشفاء جزاكم الله

نقوللكم كيف ني ندير مع تواريخ 🙋🏻او مصطلحات في تكرار ! 🔃

يارب نهاية الطريق اقتربت، نحن في خطواتنا الاخيرة موقنين انك أعظم من إن تضيع تعبنا، أعظم من إن تترك اعيننا حزينة، أعظم من أحلامنا، انت أڪرم من أن تردنا فارغين، نحن بانتظار العوض منك 🤍

غبت عليكم🙂🫩

‏الله قادر على, تغيير ما لا يتغيَّر فـ تفائل.

39days and 2h and 51min…..🚀