العفو هذا واجبي واقل شيئ نقدر نفيدكم بيه ان شاء الله تكونو تستفادو من هذه الصفحة والمعلومات الي نقدمها ولو بنسبة 0.01٪
مشكور او مشكورة صاحبة الرسالة هذه بارك الله فيك ولك بالمثل ان شاء الله اضعاف مضاعفة 🤍✨

يكفيك الحال عادي حنا العام لي فات عطاونا فيها 5 سمانات برك 4 قراية وسومان بلوكي والسمانة لولة راكم عارفين دايما post controle ايا تقريبا كانو عندنا فيها غير 4 سمانات والحمدلله تقريبا اغلب برومو طلعنا وكاينو كاين نقاط ممتازة عادي جدا يعني مزال مفاتش الحال حتى اذا مزال مبديتوش طوووول مفاتكم والو مزال عندكم الوقت تقدرو تبداو تقراو وتلحقو وطلعو باذن الله

هذا ميساج لقيت منو بزااااااااف شوفو انا كي ديت الباك تاعي كنت حاب تخصص طبي مي مكنتش محدد بين ميدسين ودونتيست ولكن كنت حاب دونتيست اكثر لانو ميقراوش بزاف وكذا مي انا صراحة كنت باغي ميدسين مي كي عادت طريق طويلة كيما يقولو محبيتش نديرها صليت استخارة ودرت ميدسين والحمدلله رغم كل الضغط الي نفوتو عليه مي مندمتش عليها بالنسبة ليا تبقى مهنة نبيلة قبل كل شيئ بالنسبة الي داروها ومش حابينها نحكيلكم حكاية حكاهالي طبيب كنت نسطاجي عندو في الصيف قالي انا كي ديت باك تاعي مكنتش باغي طوووول ميدسين مي دارنا دايما يانسيستيو عليه باه يديرها ويسييو يقنعوه ايا دارها وهو مش باغيها وبقا مش حابها حتى وهو يقرا فيها حتان كطريام كي بدا سيكل كلينيك وبدا يشوف المرضى والامراض تاعهم والي يتحسنو ويبراو حبها وعجباتو وضرك في السبيطار وين كنت نسطاجي مكانش واحد ميهدرش عليه من افضل الاطباء ربي يبارك والمرضى كامل يبغوه ويحترموه يعني ماشاء الله مي جامي شفت مرضى يحبو طبيب كيما هو سعني هذه الاشياء تبان بسيطة مي ممكن تغيرلك وجهة النظر تاعك 180 درجة

اول كوش نقرا كور تاعي نفهمو بيا وكل بارتي نقراها نعاود نسيي نشرحها لروحي باه نتاكد اني فهمتها وكي نكمل كور كامل نعاود ثاني نشرحو لروحي باه نتاكد بلي فهمتو وفي الكوش دوزيام بنفس الطريقة نحكم كور تاعي ونحاول نشرحو مرة اخرى لنفسي باه نثبت معلومات اكثر ونحل كيسيام باه نعرف علواه يركزو ليبروف وآخر كوش ندير قراءة برك للكور تاعي ونركز على الحوايج الي يجيبو عليهم كيسيام بزاف وقبل كونطرول في ليل نحل كنطرول عام ليفات باه ندي فكرة

ايه دايما يمدولكم سومان بلوكي قبل كنطرولات تاعكم وكاين حتى لي يمدولهم سمانتين على حسب قفازة تاع ليديليقي تاعكم

بالنسبة للدورة درتها لغاية في نفسي منقدرش نخبركم سبب علاش
مي كي درتها عمري ما شاركت معاهم حاجة ومحطيتهالكمش هنا بخلاف شرح تاع ليكور والي مسجلين عندي شايفين ويعرفو فالفائدة تاعي من هذه الدورة مش دراهم فقط مي انا كي يسجل عندي انسان ويبدا يقرا ويقلي ربي يحفظك وفهمت وشرحك هايل وسهلتها علينا صدقوني غير وكانو حطلي الدنيا بين يديا

3éme année
Faculté de Batna

بيوفيزيك مقريتهاش مكانش عندي الوقت
فيزيو قريتها من عند مريم راها حاطة فيديوات في اليوتيوب شرحها هايل وليكور الي مدارتهمش قريتهم وحدي وكاين الي اسيستيت فيهم

هي بلاي ليست وقيل ماشي مرتبين ليكور مي راني رتبتهملكم في الاميساج الطويل هذا لول الي فيه مصادر مرتبين ثم افضل
انا شخصيا يعجبني شرحها تشرح بالتفصيل متخليلكش البس هذاك تاع حاجة تسقسي عليها وتعاود باه الي مفهمش يفهم والي فهم يروكوشي معاها فنعم نظن انو يكفيوكم فيديوات تاعها تفهمو بيا الفيزيو تاع نورو

الباك تاعي ديت 16.18 وموزون 17.12
طلعت دوزيام ب11.17 وسطاجيت في chirurgie bozzoran et pneumo

وفيك بارك ربي يحفظك الحمدلله انك فهمتو فرحتوني
بالنسبة للبيوفيزيك معنديش مصدر مي باه نديرو حاجة مليحة الي يقراها من مصدر خارجي ويعجبو يشاركو معايا باه نحطو مع زملائكم هكا باه تعم الفائدة 🤍✨

هي من حيث الصعوبة تاع ليكور لا مش صعيبة عادي جدا كيفها كيف باقي السنوات مشكل تاعها انا شارجي بزاااااف عندنا 4 اينيتي مع 5 ليموديل ونقروهم مع بعض وكي نعقبوهم ورا بعض بسناتهم غير سمانة سمانة هذي الحاجة الي مش مليحة فيها فقط اما بالنسبة للصعوبة عادي

شوفي النقطة في الميدسين منقلكش معندهاش معنى الي يقولك هذي الهدرة يكذب عليك نقطة مهمة لكن متعكسش مستوى تاعك فممكن فقط ملقيتيش طريقة الدراسة الي تساعدك وتقدري تدي بيها ممكن الخلعة انا نعرف عباد معايا كي نكونو نقراو ولا في سطاج ربي يبارك تحسو ماجور دو برومو هاز معلومات يعرف يدير ايكزاما ويشخص نورمال مي في كونطرول نلقاهم مديين 10 ولا 11 هل هذا انو طبيب فاشل بابع لا ممكن يخاف من كنطرول ممكن قلة تركيز عادي جدا
بالنسبة للكيرسيس ميتحسبش بروميار ودوزيام من طروازيام يبدا
والتخصص مزال الحال باه تحكمي انك تقدريلو ولا لا ضرك
انا وش نقدملك نصيحة بما انو مزال الحال اخدمي على طريقة الدراسة تاعك لانو مش راح تخسري والو ضرك

هي هذا النوع من الادوية يدير احتباس سوائل لكن في الحالة تاعك بما انو لمدة 5 ايام فقط يعني مش راح يكون التاثير تاعو كبير وبالتالي ميشكلش خاطر عليك وبما انو يعني عطاهولك طبيب نظن انو عارف واش يدير فلاداعي للقلق فمدة العلاج قصيرة مش راح يكون كاين ضرر او اعراض جانبية

انا منقدرش نعطيك رأيي في حاجة انا درتها
لكن وش نقدر نقلك انو كل درس شرحتو في الدورة شرحتو من قلبي وتعبت عليه وحاولت نقدم فيه واش عندي فانا نظن اني حاولت نبسطلكم ونوصل الفكرة قدر الامكان
الي سجلو في الدورة يعطيونا رايهم هنا من فضلهم ☺️✨

الحمدلله انها عجبتكم الفكرة
لانو كاين ناس تحشم ومتحبش تسقسي لذلم هكا يكون ارتح ليها 😁

كيما قلت مزال الحال باه تحكمو انكم كفؤ لامتحان ريزيدانا ولا لا اخدمو على طريقة دراسة تاعكم ضرك باه مباعد متتعبوش ودروس السنة اولى وثانية يدخلو في ريزيدانا خاصة فيزيو في كوتي بيلوجيا
بالنسبة للكورسيس وقت ياثر في حالة يكونو زوج نفس معدل فالي كيرسيس تاعو اكبر يكلاسي قبل

انا ني قلتلكم بلي هدفي انو نفيدكم ماشي دراهم برك واي واحد يسالني على المصادر منجبدش الدورة لاني منبغيش نحرج اي شخص بلاك مش حاب يسجل ولا حاب يقرا وحدو فلذلك نعطيه المصادر عادي جدا
ربي يحفظك ان شتء الله ميساج تاعك جميل ومزال الحال باه تقراو ربي يوفثكم ان شاء الله ويسهللكم ونشوفكم مطلعين كامل

يكفيك انك تطلعي عادي مزال الحال انا كان عندي صاحبي طلع ديجيستيف وايرينار وجينيتيك ومدي تحت 13 وباقي كامل مطلعهمش مدي 7 و8 وطلع عامو عادي فمكان لاه الخوف التيبي راه يعاون وخليو ثقتكم بربي كبيرة

في كونكورات ليجينيراليست في السيفي يكون محطوط كورسيس هو الي يدخل مي تقييم يكون على عدة معايير ماشي غير المعدل

بالطبع كاين فروقات في ليسارفيس كاين اطباء لي يساعدوك ويشرحولك وكاين لي ميديهاش فيك
مثلا انا في شيريجي مهزيتش بزاف مكانوش لاتيين بينا ثما مام المرضى مكانش بزاف انا كان انتارن ثما ربي يرزقو ان شاء الله ويوفقو وين يكون كان دايما يديني معاه نهدرو مع المرضى نقراو ليدوسي يشرحلي مي في بنومو سارفيس هايل هزيت منو صح المرضى ناس ملاح وليريزيدو يشرحولنا وليزانتارن كيف كيف الطبيبة لي حاكمتنا متهلية فينا كثر من ليزانتارن😂 تشرحلنا وتنعتلنا كلش
فكل سارفين وكفاه حسب ليبارسونال لي فيه