၁ စာတွေခဏခဏမေ့လို့ ဘယ်လို လုပ်ရမလဲ။
၂ ကျက်မေ့ ဖြစ်တာကို ဘယ်လိုဖြေရှင်းပြီး ရအောင်ကျက်မလဲ။

မင်္ဂလာပါရှင့်။ ဒီနေ့မှာတော့ အစ်မက အများစုမေးကြတဲ့ စာတွေ ကျက်ပြီးမေ့ဖြစ်တယ် ဘယ်လိုလုပ်ရမလဲ ဆိုတဲ့ အပေါ်ကမေးခွန်းလိုမျိုးတွေကို ဖြေပေးမှာဖြစ်ပါတယ်။ နားထောင်ကြည့်ရအောင်။

နံပါတ် ၁ မေးခွန်းရဲ့အဖြေကတော့ ဘယ်လိုမှလုပ်လို့မရပါဘူး။ အဲ့လိုပြောလို့ စိတ်မညစ်သွားကြပါနဲ့။ လူသားတွေပဲကို မေ့တတ်တာက ပြဿနာမှမဟုတ်တာ။ နံပါတ် ၂ မေးခွန်းမှာ အဖြေရှိပါတယ်။

အစ်မတို့ကိုယ်တိုင်လည်း ရှေ့ကျက်နောက်မေ့၊ နောက်ကျက်ရှေ့မေ့ သံသရာကိုလည်ခဲ့သူတွေပါ။ ဒါမဲ့ဖြေရှင်းလို့ရပါတယ်။

No.1 စာသင်၊ စာရှင်းနေချိန်တွေမှာ ဂရုတစိုက်နားထောင်ရမယ်။ ဆရာ၊ ဆရာမတွေက စာပိုဒ်ရဲ့ ဆိုလိုရင်းတွေ အဓိပ္ပာယ်တွေကိုရှင်းပြနေတာဖြစ်တယ်။ ဒါကိုနားထောင်ဖို့ "မပျင်းပါနဲ့"။ စာပြန်ကျက်ချိန်မှာ သိပ်အသုံးဝင်ပါတယ်၊ စာလည်းမြန်မြန်ရစေပါတယ်။ ကျက်စာပဲ ကျက်ရင်ရပါတယ် ဆိုတာမျိုးမလုပ်ဘဲ စာရှင်းချိန်မှာ သေချာနားထောင်ခဲ့ပါ။ ဒါဆို ကိုယ်စာပြန်ကျက်ရင် လွယ်ကူနေမှာ ဖြစ်ပါတယ်။

No.2 မနက်ပိုင်း စာကျက်မယ်ဆို ညကျရင်ပြန်နွေးတဲ့အလုပ် လုပ်ပါ။ ညဘက် စာကျက်တယ်ဆို မနက်မိုးလင်း ပြန်နွေးပါ။ နွေးတဲ့အခါတိုင်းလဲ ကိုယ်ကျက်ပြီးသမျှ စာတိုင်းကိုနွေးပါ။ ပြောချင်တာကို ခေါက်တုံ့ခေါက်ပြန်ဖတ်၊ နွေး ခြင်းက အချိန်ကြာလာတာနဲ့အမျှ စွဲသွားမှာဖြစ်တယ်။ လက်ကချရေး ကြည့်တာလည်း အလုပ်ဖြစ်ပါတယ်။ အလွတ်ရေးတာကိုပြောတာပါ။ ရေးပြီးရင်လဲ မိဘ၊ ဂိုက်တွေကို စစ်ခိုင်းတာ မဟုတ်ဘဲ ကိုယ်တိုင်စစ်ပါ။ ရေးတော့လဲ ကိုယ်၊ စစ်တော့လည်း ကိုယ်ဆိုရင် နှစ်ခါ ကိုယ်ရတာနဲ့ ညီမျှပါတယ်။ နောက်ပိုင်း စာပြန်ကျက်ရင် စောနက အလွတ်ရေးပြီးကိုယ်တိုင်စစ်ထားတဲ့ စာအုပ်ကိုပဲ ပြန်ကြည့်ပါ။ ကိုယ်ဘယ်နေရာမှာ မှားခဲ့လဲ သိပြီးသားဖြစ်နေအောင်ပါ။ ဦးနှောက်ကမေ့သွားရင်တောင် ချရေးထားတဲ့အတွက် လက်ကစွဲနေမှာပါ။

No.3 နေ့တိုင်း၊ အချိန်တိုင်း ကိုယ့်စိတ်ကဒါကို တွေးနေရင် စွဲလန်းသွားမှာဖြစ်တယ်။ ဥပမာ ညဘက်အိပ်မပျော်လို့ ဟိုတွေးဒီတွေး လုပ်နေမဲ့အစား ဘိုင်အိုစာမျက်နှာကြီးကို မြင်ယောင်ကြည့်လိုက်ပါ။ မနက် သို့ ညက ကျက်ခဲ့တဲ့စာကို ပြန်ဆိုကြည့်ပါ စိတ်ထဲကဖြစ်ဖြစ်။ မနက်မိုးလင်းရင်လည်း အိပ်ရာထဲက မထခင် ကိုယ်ကျက်ပြီးသား စာတွေ ဆိုကြည့်ပါ။ မျက်နှာသစ်နေရင်းလဲ အေးဆေးလဲ ဆိုကြည့်ပါ။ ဆိုနေရင်းမေ့သွားတဲ့နေရာတွေရှိရင် မှတ်ထားပြီး မျက်နှာသစ်၊ သွားတိုက် လုပ်ပြီးတာနဲ့ စာအုပ်သွားပြန်ကြည့်ပြီး အဲ့နေရာကို မှင်နီနဲ့ သော်လည်းကောင်း Highlighter နဲ့သော်လည်းကောင်း မှတ်ထားလိုက်ပါ။ ကိုယ့်မျက်စိထဲ ထင်းထွက်နေအောင်ပေါ့။

ခေါင်းစဉ်တစ်ခုပြောလိုက်တာနဲ့ ခေါင်းစဉ်အောက်ကစာတွေကို ပြောနိုင်နေရပါမယ်။ အတိအကျမဆိုနိုင်သေးရင်တောင်။ ဒီလိုဖြစ်ဖို့က ဆရာစာရှင်းချိန် နားလည်အောင်နားထောင်ထားရမှာဖြစ်ပြီး စာကျက်ရင် စာပိုဒ်ရဲ့ဆိုလိုရင်းကို နားလည်ထားရမှာဖြစ်ပါတယ်။ နောက်ပြီး အချိန်တိုင်း ပြန်နွေးရပါမယ်။

အစ်မပြောပြတာတွေအားလုံး မှန်တယ်လို့လဲမဆိုလိုပါဘူး။ မောင်လေး‌တို့ ညီမလေးတို့မှာလည်း ကိုယ်ပိုင် စာကျက်နည်းလမ်းတွေ ရှိကြမှာပါ။ ကိုယ့် စာကျက်နည်းနဲ့ ကိုယ်ကျက်တာကတော့ အကောင်းဆုံးပဲပေါ့ရှင်။ ဒါပေမဲ့တစ်ခါတစ်လေ ကိုယ့်နည်းလမ်း အဆင်မပြေလာတဲ့အခါ တစ်ခြားသောနည်းလမ်းတွေလည်း နားထောင်ကြည့်ချင်လာတယ်၊ လုပ်ကြည့်ချင်လာတယ် ဖြစ်တတ်တာကြောင့် အစ်မ ကိုယ်တိုင်လုပ်ခဲ့ပြီး အစ်မသိသလောက်လေး ပြန်ပြောပြတာပါ။ လုပ်ကြည့်လည်းရသလို၊ မလုပ်ဘဲကိုယ့်နည်းလမ်းပဲ ဆက်သုံးလည်းရပါတယ်။

လုပ်ကြည့်ချင်လာတဲ့အခါ သတိတရနဲ့ လိုက်လုပ်ကြည့်ကြပြီး အဆင်ပြေတယ်လို့ ကြားရရင်ပဲ ဝမ်းသာလှပါပြီ။

ကဲနိဂုံးချုပ်အနေနဲ့ studywithK2 group ထဲကမောင်လေး ညီမလေးတို့အားလုံး ပညာအရာမှာထူးချွန်တဲ့ လူတော်လေးတွေဖြစ်ကြပါစေ။ 2025-2026 စာဖြေနှစ်မှာလဲ ဂုဏ်ထူးရှင်ကြီးများဖြစ်ကြပါစေလို့ ဆုမွန်ကောင်း တောင်းပေးလိုက်ပါတယ်ရှင့်။

#studywithK2
#kelly