اي الأخبار ؟
صليت فرضك وقرأت وردك وقرأت الكهف وصليت ع نبينا الحبيب وروقت ع نفسك وعملت ريفرش لدماغك ؟

يلااا بينا بقي نكمل سعي ونبدأ نجهز تاسكاتنا ونتوكل ع الله .☘

ديما شعور التعب والالم واي حاجه بتكون صعبه عليا بتخليني احس انها بداية لانطلاقة قوية ف حياتي بكرم ربنا،الشعور دا بحسه ديما وجوا نفسي بحس ان ربنا بيبتليني علشان يعوضني خير عمري ما ظنيت ف ربنا خير واتخذلت ديما بيكرمني وبيعطيني حقي وزيادة عنه. انا عمري ما كنت شخص كامل ولا هكون الكمال لله وحده ديما عندي قصور وربنا ديما بيديني اكبر من حقي

بما اننا في ايام مفترجه انا عاوز اذكر نفسي واذكركم بنعم الله علينا
احنا عمرنا ما عملنا ال علينا صح في السعي النجاح ال بنحققه بكرم ربنا ربنا ما يحرمنا من كرمه ويديم النعم ال عايشين فيها

الحمدلله

🤎.

السلام عليك

كيف حالك!
يارب تكون بدأت يومك كويس النهاردة واستغليته رغم كل الصعاب اللي واجهتك. 🤎

لو الإمتحات بكرة الصبح ف انت لسه معاك وقت!
والله لسه معاك وقت ولسه تقدر تنجز وتركز وتخلص كل اللي عليك

ابدأ بركعتين قضاء الحاجه وبعدها صفحه قرآن وبعدها جهز كتبك وانصب عليها لحد ما تنجز وتخلص كله !

صدقني انت تقدر وانت قدها بس حاول ومتستسلمش.🤎

مساء الخير
من ٤ سنين كنت لسه متخرج والدنيا قافله ف وشي ف زي اي شاب قدمت ف كل حاجه تقريبا ومنهم مجال البنوك (كنت غلطان) وساعتها كنت مضايق اووي ان محدش بيرد و النهاردة بعد سنين جالي اوفر ٣ بنوك ورفضتهم ربنا اراد انها متجيش ف وقت ال كنت محتاجها فيه علشان مروحش اشتغل ف حاجه ربنا حرمها

انا عاوز اقولك بس ان التآخير خير اوي ديما بيكون كرم ونعمه من ربنا ان ياخر عنك حاجه هي ضرر ليك ويكرمك بالخير

متيأسش من المحاولة!

أسعى لـ هدفك بكل ما أوتيت من قوة.🤎

صباح الخير
النهاردة اول يوم من 10 ذي الحجه أفضل أيام السنه

ابدأ يومك ب ورد قرآن وأذكارك واستعين بالله ولا تعجز ف دراستك دي عبادة برضو والأجر عظيم ف الأيام المباركة دي بإذن الله

وأكثر من الدعاء ليك ولكل أحبابك ودثرونا ف دعائكم بظهر الغيب .🤎

أي إنجاز عملته النهاردة ف الجو دا عاااش ليك
حقيقي والله عاااش ليك ولكل محاولة وكل سعي ف جو صعب زي النهاردة

ولو ف شغل ف الله يعينك ويرزقك من واسع فضله وكرمه

بإذن الله ربنا يأجرنا ع سعينا كله ويضاعف أجرنا ف الأيام المباركة دي مع صيامنا

اللهم تقبل منا وأجرنا من نار جهنم.🤎

صباح الخير
بسم الله ابدأ يومك ع خير
رتب أوضتك ورتب كتبك واستعين بالله ولا تعجز ، لو ف الشغل هون عليك ومتضغطش ع نفسك راحتك النفسية أهم من أي حاجة وأي مرتب برضو!😁

قبل أي حاجة متنساش وردك من القرآن وركعتين الضحي.🤎

اي أخبار الإنجازات ؟

خد بريك أعمل ريفرش وتعالي نكمل

هقولك حاجه تحت بند متغلطش غلطتي!

بلاش اي حاجه نفسك فيها وعايز تحققها وتوصلها تعرف حد بيها
مهما كان" الحد " دا مين
بس أهلك الأرجح تقول بس الأفضل برضو لما توصل تقولها

والله انا كل حياتي تقريباً واقفه بسبب الحوار دا من يوم تخرجي هو الإنسان أكيد حياته كلها مش بيحكي تفاصيلها بس فيه تفاصيل كدا أشخاص مقربين أصحاب وعشرة عمر بتقع بلسانك وتقول وف نفس الوقت هما أمان ليك ومش بيحسدوا بقصد الحسد ولكن طبيعية اي إنسان مش بيحب حد أحسن منه إلا ما رحم ربي

ف خلاصة الحوار أعمل بحديث رسولنا الكريم صلى الله عليه وسلم واستعين ع قضاء حوائجك بالكتمان هتسلم وهتوصل بعون وتوفيق من ربنا.🤎

كُلما مررتُ ببالك ولو سهواً، ادعُ لى... 🤎

صباح الخير
يوم جديد محاولة جديدة كالعادة متيأسش من المحاولة ويلا كوبايه شايك وتعالي تبدأ ولو بدأت ف عاااش ليك كمل


متنساش وردك وصلاة الضحى.🤎

صباح الخير

يومك ملئ بالإنجازات وتوفيق وكرم ربنا بإذن الله
أستعين بالله ولا تعجز 🤎

أكثر من الدعاء إحنا ف أعظم أيام السنة

ورحمة ومغفرة عظيمة من ربنا الكريم سبحانه.
ودثروني في دعائكم .🤎

شد حيلك وإنجز وفيه مسدج حلوة بإذن الله ليك اخر اليوم .🌚

أي أخبارك ؟
عارفه وضعك دلوقتي ومقدراة جدا أنك مضغوط دراسة ومشاعر سواء كانت مشاعر التخرج أو مشاعر من أنواع أخري أو الاتنين ! عادي عادي بتحصل 😅
المهم بقا حبيت أفكرك وأديك دافع أن كل دا هيعدي وهتمر بستر وكرم وتوفيق ربنا كلها والله

دا إزاي بقا؟ أهو إحنا ف أعظم أيام السنة عند ربنا الكريم وداخلين ع يوم عظيم يوم عرفه المبارك " بلغنا الله إياه ف عفو وعافيه يارب" وبعدها عيد الأضحى المبارك ف الأيام دي أيام كبيرة وعيد وفرحة وبهجة ع قلبك والغالب الأعم لكل الناس بتكون إجازة سواء شغل ولله الحمد أو مذاكرة وامتحانات

ف معلش تعالي ع نفسك الغاليه دي أسبوعين أو تلاته بالكتير وإنجز وبص عايزاك تقاتل اللي عليك لحد ما تخلص بجد

ووقتها يبطل هترتاح وتأخد اجازة حلوة وبريك كدا ونبدأ نكمل سعي برضو ف الكورسات مش هسيبك!😁

أما لو شغل بقا ف أنت بقا هتفصل دماغك اجازة العيد بإذن الله بلا أي عبث وضغط وترتاح فيهم

ربنا يوفقنا جميعاً يارب إلي ما يحب ويرضى ومتنسونيش من دعائكم جزيتم الجنة.🤎

‏﴿وَاللَّهُ يَهدي مَن يَشاءُ إِلى صِراطٍ مُستَقيمٍ﴾

ازيك يا صاحبي
انا اخوك ال ديما عاوز مصلحتك وجاي من بعدين وبقولك ان الحياه يا تعافر فيها وانت واثق من ربنا ثم ع دراعك وبوصلتك هي صلاتك وقربك من ربنا يا تعتمد ع البشر فتنزل ع رقبتك تتكسر

يا صاحبي محدش هيقف جمبك غير ربنا ثم اهلك ف متعشمش كتير في حد غير ربنا الحياه بعدين صعبه بس ثقتك في ربنا هتخليها سلسه باذن الله مش هقولك ساهله لان هبقي بكدب عليك بس مفيش حد متوكل ع ربنا بيقع

قوم انفض ترابك وتوكل ع ربنا وكمل طريقك وخلي ثقتك في ربنا اقوي من اي شئ ممكن يتخيله عقل بشر

افتكر اخوك بدعوة في الأيام المفترجه دي يمكن دعوتك تكون سبب خير ليا ولك المثل