صباح الخير
انا اخوك كريم جاي اقولك ان ال بيسعي بيلاقي كرم وستر من ربنا
مفيش حاجة اسمها اصل الدولة فيها وفيها واصل ظروفي فيها وفيها انا وانت ال بيرزقنا ربنا ف بنتوكل ع ربنا ونسعي ونتعب ونيتنا كلها توكل ع الله سبحانه

لو نيتك غير دا اعرف انك غلط اوي وهتتعب فتوكل ع الله واسعي وبطل تحط اعذار لنفسك

" وَقَالُوا الْحَمْدُ لِلَّهِ الَّذِي أَذْهَبَ عَنَّا الْحَزَنَ ۖ إِنَّ رَبَّنَا لَغَفُورٌ شَكُورٌ "

ف أوقات بتمر عليك بتكون صعبة جدا انك تتحملها وتايه فيها وأيامك كلها خلال الفترة دي دماغك شغالة تفكير بتوهان ف كل حاجه ، بتفكرك بالحاجات السلبية والإيجابية وتخّلي ناس معينه عنك ف تلاقي نفسك وحيد تماماً وأفكار دماغك توصلك لاكتئاب شديد

بعدها تعيد النظر بس ف كل اللي حصل خلال الفترة دي هتلاقي أن ربنا سلّم ولطف بيك ف كل شعور حسيته
شعور خوف وقلق وتوتر واكتئاب ، كل حاجه منهم ربنا كان لطيف بيك وهونها عليك وانزل السكينه والاطمئنان ف قلبك بشكل كبير أن كل حاجه هتتحل ولا بأس هتحاول تاني واللي اتخلي عنك الحمد لله ربنا ليه حكمة واسعي تاني ورتب أولوياتك ورتب كل الأفكار اللي ف دماغي
وأهم حاجه هدي نفسك تماماً ومفيش توتر ، دي دنيا ودار ابتلاء ف ليه ترهق نفسك ف التفكير الزائد ما ممكن حياتي كلها تنتهي ف اللحظة دي وانا اللي كنت شايلة همها !

نستعيذ بالله من الشيطان الرجيم ونصلي ركعتين شكر لله وندعي ربنا يلطف بينا ويجبرنا ف مطالبنا
ونرجع تاني لاذكارنا حصننا ولورد القرآن ولحفظ القرآن ونجدد النيه ونخلصها لوجه الله الكريم .

انت مطالب بالسعي. امسح دموعك وقوم كمل سعي

اتعلمت إني أحاول وأبدأ مهما كانت الظروف.
ومع الوقت فهمت إن التفكير لوحده عمره ما كان حل.
لو بفكر أبني بيت، مش هيفضل تفكير…
لازم أجيب طوبة، وشوية أسمنت، أحدد المكان، وأتحرك، وأقول: أبدأ بعون الله.
مفيش تفكير ولا كلام بيحقق حاجة.
اللي بيحقق أهدافك إنك تقوم وتتحرك وتحاول.
عندك امتحان؟
بدل ما تقعد تشتكي وتلطم على النت، افتح الكتاب وذاكر صفحتين وابدأ.
لازم نبدأ… مفيش حل تاني.
ومحدش يضحك عليك ويقنعك إن التفكير لوحده بيأكل عيش.

صباح الخير
الانسان مدين للناس ال بتقف معاه ف التعب ولحظات الضعف مع انهم عددهم قليل بس قيمتهم بتكون كبيرة

انا بحاول يوم ورا يوم وبفشل وبحاول وبفشل وبحاول وبنجح
مفيش نجاح بدون فشل ف متخليش اي فشل يوقفك انك توصل للنجاح ال انت مستنيه حاول وافشل لحد ما توصل للنجاح

صباح الخير
احنا بنسعي وبنحاول النتيجة دي مش بتاعتنا ف احمد ربنا وكمل ومتبصش وراك

"وأنَّ سعيه سوف يُرى" = التنازُل عن مِلكيّة النتائج.

بُكرة نِنِجح،
بُكرة نحِاول تاني وِ تالِت،
بُكرة نبقىَ عكس الناس ما قالِت 🤎.))

"ليس عليك إلا السعي!

وقد تأتيك نفحة من توفيق الله تدفعك للأمام بعشرات أضعاف سعيك".

الحمد لله وأخيرا الخميس

كافئ نفسك بحاجه بتحبها وهون عليك شويه اي ضغط ، نفسك ليها حق عليك . 🤎

وتوكل ع الله

أكبر جناية في حق نفسك ؛ أن تُسلم "ميزان" قيمتك لأشخاص لا يملكون في الأساس حق التقييم.
قد تكون "تحفة فنية" نادرة ، لكنك ستبقى مجرد "خردة" رخيصة.. ما دمت معروضًا على رصيف الجهلاء..

لـ سامح عبد الظاهر

اللي اشترى دهب ، شقة ، أو عربية من سنتين عدا ، واللي اتجوز من أربع سنين فاتوا فلت ، واللي بدأ مشروع ربنا كرمه...
وأنا هنا قاعد بطولي لا معايا دهب ، ولا عقارات ، ولا أسهم ، ولا حتى رصيد في البنوك.
يمكن الكلام ده يبان كأنه من شخص حاسس نفسه ضايع، مش مأمّن مستقبله عنده فوبيا القطار اللي فات ، وإحساس إن الكل سبقه ، وهو لسه واقف في المحطة. لكن الحقيقة إنه من شخص لسه ما أدركش سعة خزائن الله واللي مفاتيحها بيده وحده ، ولا أدرك حكمته في توزيع الأرزاق.

ولو جينا نبص لكام سنة فاتوا ، هنلاقي إن في ناس فعلا اتجوزت وجرام الدهب بـ 150 جنيه ، وناس اتجوزت وهو بـ 800 جنيه. مع إن التاني خمس أضعاف الأول ، بس المشترك ما بين الاتنين إن الجواز كان بالنسبة ليهم أمل.

زمان لما الأسعار غليت في المدينة والناس قلقت و راحت تشتكي لواحد من السلف الصالح ، رد عليهم برد يدرس.. قالهم: "والله ما أبالي لو أصبحت حبة القمح بدينار! عليَّ أن أعبده كما أمرني ، وعليه أن يرزقني كما وعدني."

فأكبر وهم بنعيشه هو إننا حاسين إننا متأخرين أو إن في قطر فاتنا ، لكن الحقيقة بتبدأ تظهر لما نعرف إن المطلوب مننا إننا نوقن إنه ما فاتناش في الدنيا حاجه ، علشان الدنيا دي محدش فيها بيفوته حاجه ... كل واحد بياخد نصيبه في وقته ، وبالطريقة اللي ربنا اختارها له.
والحمد لله أنه هو وحده المتكفل بالجواز ، والرزق ، وبالستر والإكرام مش السوق والبورصة.

ازيك،
محدش بيحاول محصلته بتكون صفر .

سلام الله عليكم ورحمته وبركاته

بندخل تجارب جديدة علشان نكتسب خبرة ونطلع أقوي منها
وبشكل عام فداك اي حاجه .🤎

🤎.

صباح الخير يا صديقي.
انا جاي اقولك ان مافيش سعي بيروح هدر

"وليغلبن لطفه خوفي"

كلنا من كام سنة ، كان فيه حاجات بنبص لها من بعيد ونفسنا فيها ، ومكنش معانا تمنها. النهاردة اشتريناها وهي تمنها ١٠ أضعاف ما كانت عليه وقتها ، وبقينا قادرين نشتريها عادي.

دلوقتي برضو في حاجات فوق طاقتنا وشايفينها صعبة وغالية ، بس عارفين إننا هنوصل لها في الوقت اللي ربنا هيأذن بيها فيه.

والموضوع مش حسابات دول ، ولا سياسات ، ولا اقتصاد ، الرزق ليه حسبة تانية خالص ، عقلنا المحدود بيعجز عن فهمها ، وكل ما حاولنا نحللها بالورقة والقلم بتتعقد أكتر.

العقل بيعجز يفهم إزاي الستر بيمشي ، وإزاي الأبواب بتتفتح في عز الضيق.. فبلاش تحسبها بزيادة وتتعب نفسك وتعيش هم حاجه مين عارف هتحصل ولا لا.

واللي رزقك وأنت مش قادر ، هيرزقك وأنت فاكر إنك مش هتقدر ، واللي رزقك قبل كدا حي باق لايموت ، وهيرزقك تاني.🤎