🍃 السلام عليكم 🍃

اليوم راح نهدروا على موديل فيزيائي بإمتياز، و انا شخصيا منبغيهش و الي يومنا هذا معلباليش واش كنت نقرا فيه 🥲 (بلعته ب 15 قولوا الله يبارك 🙃)

البيوفيزيك ✨

_ هذا الموديل باه نكون صريحة معاكم انا حسيته جدا صامط و مش مفهوم بزاف لأن مصادر فيه قلال و الشرح في اليوتيوب ثقيل بصح فيه حاجة مليحة انه فيه جانب تطبيقي كبير بمعنى بمجرد تقبض الريتم و الحسابات راك save و تقدر تبلع فيه و بعد الدخلة ان شاء الله اذا قدرت راح نتبعلكم معاه

زي العادة السؤال المطروح دائما 🤔⁉️

واش تقراو فيه؟

و الاجابة هي ✅:

وفق البروغرام الي قرينا بيه حنا

عندنا زوج مجالات و كاين الي يزيدوا واحد ثالث:

🔮 Optique geométrique:

تقراو فيه الضوء بصفة عامة كيفاش ينعكس و لا ينكسر و كيفاش يخترق الاوساط زجاج، ماء، هواء.... و حتى المرآة و اهم حاجة هي اللونتي او العدسات اضافة للعين المجردة ( كاين الي يزيدوا حالات غير الطبيعية مثلا الي ميشوفش للبعيد و لا للقريب)

🔮 Ryonnement:

الي راح تقراو فيها شويا من قراية الشيمي حول الذرات atomistique و بعدها الاشعة
تقراو الاشعة X و جماعتها و فيها شويا نووي الي قريتوها في الباك

تنويه 📢:

✳️ بالنسبة للوحدة الثالثة كاين الي قراو فيها analyses dimensionelle الي هي التحليل البعدي كيفنا و كاين الي قراو les solutions

✳️ اما المصادر كاين ليكور نتاع الاستاذة شيباني تلقاوهم في درايف تيارت ملاح و تقدروا تستعينوا بتشات جيبيتي و لا الملخصات راح نحطهم لكم بعد ما تبداو القراية و في اليوتيوب ننصح ب discover و bacfacile و اذا كاش واحد يعرف حود احسن منهم يرسلهم

✳️ و كي العادة التيديات و ال Qcm هوما قاع الصح متنساوهمش

كانت معكم #che_rry 🍒🌷

ليكيب ماديروش على #che_rry 🙂🙂
بيوفيزيك موديل واعر شوي بصح شباب والله غي قروه مالبدية تقدو حتى تماجورو فيه نورمال شايلا حلو لي تيدي توعكم وكترو لي كوسيام و تان كوتي تع تيوري ماتهملوهاش 👌🏻🧠
كي تلحقوله انا نحطلكم المصادر وحتى الملخصات 🫀
#Cĥai_Maa

السلام عليكم 🍃

للأسف اليوم مراحش نحطلكم على حتى موديل 😔 برسك راني كي الجثة الهامدة من التعب منيش قادرة حتى نكتب ماشي لا نخمم 🥲💔

🍃 السلام عليكم 🍃

اليوم راح نهدروا على موديل خفيف ظريف ( الموديل الي ماتعرفش راسك من كرعيك فيه) 🗿

البيوستاتيستيك ✨

_ هذا الموديل هو تقريبا علم الاحصاء و باه نكون مباشرة معاكم هو موديل حسابات و رياضيات حرفيا من الي تبداو تقراو فيه و نتوما مع القوانين الي معلبالكمش في واش يفيدوكم اصلا 😑

_ 📢 مهم اهم حاجة فيه اذا كان بروفكم مليح اسيستو و اذا لا ديروا كيف ما تدير الاغلبية اقراو الملخصات ديراكت لان ليكور 90% متفهمهش حتى القوانين و غير واضحين فيهم و حلوا بزااااف Qcm و راح تبلعوا فيه باذن الله

بالنسبة لواش تقراو فيه ⁉️


✳️ على حسابنا حنا قرينا في السوماستر الاول

🔮 Les paramètres statistiques

هو الاعدادات الاحصائية مثلا تقراو كيفاش تجبدوا معدل او تكرار...

🔮 Les probabilités et l'estimation

هوما الاحتمالات تقريبا كيف الي قريتوهم في الباك

✳️ السوماستر الزاوج قرينا

🔮 Les test hypothèse, d'anova et khi 2

هاذو كي تلحقولهم تفهموهم لان معنديش كيفاه نشرحهم لكم

🔮 L'informatique

تقراو فيها شويا على الذكاء الاصطناعي و كيفاه يقدر يعاونكم


كانت معكم #che_rry 🍒🌷

🍃 السلام عليكم 🍃

_ اليوم راح نهدروا على آخر موديل انويال الي تقراوهم على مدار العام و هو

Cytologie 🦠

_ هي بالعربية علم الخلايا و هو اكثر موديل نتاع حفيظ و فيه تفاصيل دقيقة كثيرة بزااااف 😔 و لكن هو الموديل الوحيد الي دروس الي فيه كامل جازوا عليكم من قبل و لو بشكل سطحي ✨

_ دوكا زي العادة السؤال المطروح دائما 🤔
واش تقراو فيه ⁉️

و الجواب هو ✅

_ راح تقراو على الخلايا انواعها و مكوناتها و كيفاه تكون متصلة ببعضها البعض و هاذو كامل يتوزعوا على فترتين تتعرفوا في:

🔮 السوماستر الاول:

على انواع الخلايا حقيقة و بدائية النواة و على الغشاء الي يحيط بيها و كيفاه تتصل ببعضها البعض...

🔮 و السوماستر الثاني:

تدخلوا اكثر في المكونات مثلا النواة الريبوزومات جهاز غولجي و حتى تعاودوا تقراو كيفية تركيب البروتين...

📢📢 بالنسبة للتيديات و التيبيات راح نهدر عليهم بشكل منفصل مبعد



كانت معكم #che_rry 🍒🌷

صباحكم عسل 🍯🍃

_ للمهتمين بتعلم اللغة الانجليزية الطبية هذا ليكم ✨

عفوا 😁

#che_rry 🍒🌷

🍃 السلام عليكم 🍃

_ اليوم راح نهدروا على اول موديل سوماستريال ( هوما في الاصل 04) بمعنى تقراوه سوماستر واحد و لكن هذا المويل مهم جدا و تستحقوه و الي هو:

اومبريولوجي " علم الأجنة " ✨✨

انا شخصيا مكنتش نبغيه 🗿 بصح بزاف كان يعجبهم و قراوه بذمة و ضمير، مشكلته في التفاصيل يعني حتى الايام و لازم تتفكروهم مليح فيه

دوكا كي العادة السؤال المطروح 🤔

واش تقراو فيه ⁉️

والاجابة هي ✅

_ عندكم فيه تقريبا 07 دروس رئيسية اضافة للتيديات و هاذو الدروس يشملوا

🔮 Spermatogénèse
🔮 Ovogénèse et ovulation
🔮 Fécondation
🔮 Les 4 premières semaines embryonnaires

📢📢 لازم تركزوا فيه مليح و تتفكروا على الاقل العمونيات خاصة الاسبوع الثالث و الرابع للجنين لان تحتاجوهم مبعد بزاااف

📢📢 بالنسبة للقراية طبعا نقولها و نعاودها الي باغي يبلع مليح عليك و على الكوسيام و اذا حسيتوا بالسماطة في ليكور تفرجوا فيديوات يوتيوب 3D يجوا قصار و يسهلولكم الفهامة

كانت معكم #che_rry 🍒🌷

🍃 السلام عليكم 🍃

_ اليوم راح نهدروا على ثاني اكثر موديل قريب لقلبي و اكثر موديل راح تبغوه لان ليكور نتاوعه اغلبهم ساهلين ( الاغلب ماشي قاع 🗿) و معلوماته اغلبيتهم تعرفوهم

الفيزيولوجي " علم الوظائف " ✨

_ موديل ساهل ظريف تقراوه في سوماستر واحد فقط و عدد دروسه تقريبا 10 برك

📢📢 اليوم بدون السؤال المطروح لان راح تقراو فيه بزاف صوالح و نوعا ما عشوائيات مثلا:

🔮 La membrane plasmique et les tansports membranaires:
تقراو فيها الغشاء الهيولي و كيفاش يصراو المبادلات فيه

🔮 Tissu nerveux:
تقراو على الاعصاب و كيفاه تنتقل الرسالة و على المشابك

🔮 Physiologie des musckes squelettique:
كيفاه يصرا الانقباض و الانبساط في العضلات

_ يعني عبارة عن وظائف عشوائية، اما القراية من الاحسن من بوليكوب نتاعكم و خاصة نتاع تيارت 2024 بزااااف شباب و منظم

كانت معكم #che_rry 🍒🌷

🍃 صباح الخير و الفل و الياسمين 🍃🌺

_ مهم بما انه خلاص جات الدخلة و راح تبدا القراية ( علبالي قاع مناش مستعدين نفسيا 🥲) على اي حال بقاولي زوج ليموديل سوماستريال راح نهدر عليهم دوكا و بعدخا باذن الله راح نبداو سلسلة المصادر و نولي نرسللكم ليدرايف و قنوات اليوتيوب الكتب....

اول موديل راح نهدر عليه هو:

ايسطولوجي "علم الانسجة" ✨

_موديل شويا بزاف سامط مفيهش صوالح يحمسوك باه تقرا اطلاقا بصح هو واحد من اهم اعمدة الميدسين و راح تسحقوه بالبزاف سو اقراوه مليح

واش تقراو فيه ⁉️

و الجواب هو ✅

_ كما يشير الاسم راح تقراو على انواع الانسجة، راح تتعرفوا اساسا على النسيج واش يحتوي و الانواع نتاعهم مثلا
🔮 Tissu conjonctif
🔮 Tissu osseux
🔮 Tissu sanguin......

_ و ثاني راح تزيدوا تيديات تشوفوا فيهم هاذو الانسجة بالميكروسكوب و تزيدوا تتعرفوا على طبقات الجلد

📢📢 عامة هذا الموديل مهوش صاعب انما مفصل بزااااف و كوسيام نتاعه يعتمد على هاذوك التفاصيل

📢📢 و بالنسبة لمين تقراوه انا شخصيا ننصح بسيف الدين مزعاش في اليوتيوب كيما كاين قنوات و خداخرين تلقاو عندهم فيديوات غير قصار تدوا منهم العموميات

الموديل الاخير عندنا هو

SSH " santé societé humanité " ✨

_ كيما راكم تشوفوا الاسم يشير الى 03 صوالح اساسية الي هي:
🔮 الصحة
🔮 المجتمع
🔮 الانسانية

_ بمعنى هذا الموديل تقراو فيه التأثير بين هاذو ثلاثة على بعض:

اخلاقيات المهنة، واجباتك كطالب طب او طبيب و كذلك حقوقك، القوانين الي لازم تلتزم بها، واش لازم تقول واش مالازمش تقول.... يعني حفاظا على روحك من اي مشكل باه متضر لا روحك لا المريض نتاعك.

📢📢 تحسه عبارة عن قوانين و لا مادة ادبية كثر من انها علمية.

كانت معكم #che_rry 🍒🌷

اتمنى لكم دخول جامعي موفق 🌼

السلام عليكم .. انا ملاك طالبة سنة ثانية طب حبيت نشارك معاكم هذه المقدمة التي تحتوي على معلومات ونصائح في ما يخص les modules لي غاذي يطرقولها سنة اولى طب نتمنى تنشروها و اجركم على الله.

بعدما نشوف الفوط لوين يوصل نبدا نحطلكم الصوالح على حساب اللغة الي الاغلبية راهم يقراو بيها

أهم ثلاث مواقع تحتاجهم كطالب طب،طب اسنان او صيدلة 🩻🫀 ✨:

1_ Mystidia:

تلقاو فيه الدروس الملخصات و حتى الفيديوات وفق المنهج نتاعنا.

2_ Magicschool Ai:

تقدروا فيه تحولوا الدروس الي Qcm.

3_QCM HUB:

موقع لحل Qcm Qcs و حتى cas cliniques


#che_rry 🍒🌷

Programme du deuxième année ✨