⏳️Rapidement

La valve aortique ✔️
#Cĥai_Maa

https://t.me/medwithextasyy

صح فال fémur راه مليح🦦🦦💁🏻‍♀️

#Cĥai_Maa

نصائح ذهبية باش تقرا وتنجح بلا ما تنطحن:

1. ماتقارنش روحك بغيرك: كل واحد وظروفو، قارن روحك بروحك – بين البارح واليوم. الميدسين ماشي سباق، راهي رحلة.


2. قرا شوي بشوي، بصح كل يوم: ساعتين في النهار خير من جمعة كاملة قراية فجأة.


3. ما تكثرش مصادر: خليك مع كور البروف، إذا ما فهمتش رجع ليوتيوب أو صحابك، بصح متخلطهاش على روحك.


4. فهم قبل ما تحفظ: الحفظ بلا فهم راهو كي الما على الرمل. افهم الكور، لخصو، حل كوسيام، وكي تلقى معلومة جديدة زيدها بالأحمر في الملخص.


5. متخليش الحفظ لليلة رعد: الحفظ لازم يكون متفرق، مش دفعة وحدة. ليلة الامتحان للراجع برك، ماشي للبداية.


6. الرقاد = تركيز: تنعس بكري وتفيق بكري، دماغك يخدم خير. بلا رقاد، راهي بلا تركيز.


7. صحة قلبك ونيتك: لي يمد ويفيد، دايم يدي خير من لي يخبش. اعطي وتعاون، والله ما يضيعكش.


8. ما تحاولش تبلع غير في 3 موديلات: قرا شوية من كلش، راهي مفاجآت في الqcm


9. متخليش توقعاتك تطير: خلي رجليك في الأرض، توقع أقل وادعي للأكثر، باش ما تتحطمش.


10. خدمة الكوسيام تفرق: كل ما تحل كوسيام، كل ما تزيد تفهم وتثبت المعلومات.


11. ماشي كل قراية جماعية مفيدة: كاين لي غير يضيعلك وقتك، خمم مع من تقرا.


12. كل واحد وطريقتو: افهم كيفاش دماغك يخدم، وقرا بالطريقة لي تفهم بيها أنت، مش كيما صحابك.


13. لازم تعاود القديم قبل الجديد: باش ما تنساش وتكون ديما فايق، راجع دايمًا قبل ما تدخل في كور جديد.


14. تشات جي بي تي صديق وفي: لخصلك الكور، يشرحلك، وحتى جيميناي يحل كوسيام!


15. القرآن يعطي بركة: خصص وقت للقراءة، خاصة سورة يس ويوسف، يعطيك راحة ووقت مبارك.

نصائح اللي كانوا عندنا في البرومو
#blue_berry

غادي نمدلكم نصيحة نتوم تع بروميار
#Cĥai_Maa

علابلي تبان منطقية وبديهية بصح مغاديش تقتنعو حتى تجو فيها
اولا ميدسين صح نقرو فجامعة سما عدنا ديك تع ترعد وخطرات يتعاودو كوسيام ويكون عندك زهر وتبلع نورمال ووو
بصح نجو للصح كاين معلومات لي تقراهم بالمعنى الحرفي هوما لاباز متنجمش تفوتهم متلن نتوما تع بروميار كاين فيزيو وايستو واومبريو واناتو نوعا ما هادو لازم تقراهم وتفهمهم لانو مبعد غادي تبني عليهم أمراض وتولي تفهم بيهم حالات مرضية وقع شوف تنجم تسكيبي بيوستات ولا شيمي بصح دو قطعا سما دروك مدام ملحقش اكزاما حاول تقراهم ملحقتش باه تروكوشيهم بصح معليش تكون على الاقل فاهم
تن تع دوزيام على قد ماراهي تبان ساهلة وبسيطة مي وحد تفاصيل غادي تستحقهم طبعا مشي كلش

كي تولي تمشي بعقلية le cour=le patient تماك تلتزم

ولا ميدسين مشي غي حفيظة ديرو في بالكم مليح
المهم حاولت نبسطلكم بزاف بش تفهمو ماكس سما قرو ومتتقلش على حاجة نت خيرتها وادا مشي نتا لي خيرتها #عش_الواقع عندك قدرة تبدله 🤝🏻 تفضل
معندكش عفس على قلبك وكمل مشي بقوسطوك
#nasihat_tbiba
#Cĥai_Maa

لي قاتلي chimie les liaisons ملقاتش des exercices
شيمي عندك تفهمي كور تعك مليح مليح وتبازي كتر على فيش تيدي تعكم خاطر لي كوسيام غادي يكونو كيفاها ومبعد تحلي les emds توع لعوام لي فاتو
تبغي تصنعي les qcm توعك كاين gizmo و كاين notebooklm
مي اكتر شي لازم تحلي خاطر تطبيق
#Cĥai_Maa

مهم تصبحو بخير ولي باغي يزيد يرسل كش حاجة يرسل نتلاقو غدو ة ان شاءالله ونتفاهمو🤝🏻
#Cĥai_Maa

صباح الخير اسعد الله صباحكم و سدد خطاكم و جعل الجنة مثوانا و مثواكم يارب العالمين 🍁💚

مهم باذن الله و توفيقه بلعت الديجاستيف و وقتي للاونيتي الجاية اطول شويا سو راح مبعد ان شاء الله للدوزيام نحطلكم المصادر الي راح تقراو بيهم

و البروميار راح ان شاء الله نبدا معاكم بيوشيمي و التيديات شيمي مي وينتا و كيفاه مبعد نقوللكم (نحوس نرقد ذو يومين مليح 😂)

دمتم في رعاية الله و حفظه 🤲🏻
#che_rry

هدا لي قتلكم خدمو بيه لي كوسيام لبارح
#Cĥai_Maa

⛔️ salut les collègues

Donc Cet homme 31 ans * a été blessé dans un accident de voiture
Le tuyay métallique lui a transpercé la poitrine,heureusement il n'a pas touché son cœur. Mais il a perdu l’un de ses poumons

حادت كان خطير لدرجة اطباء نجمو يشوفو داخل داك تويو
#Cĥai_Maa

السلام عليكم 🍃

بما اني الحمد لله بلعت بروميار بمعدل يعتبر
مليح مع ان الوقت كان قليل و مع لاغراف و الحمد لله نفس الشئ في الدوزيام في كل من الكارديو و الديجاستيف فقررت اني نعاونكم بالطرق الي نقرا بيه و كيفاش تستغلوا وقتكم احسن استغلال في السومان بلوكي 🍁

للتنويه برك انا منيش انسانة قراية بزاف و منظمنش طرق قرايتي انهم ينفعوا الجميع بصح نفضل اني نعاون اكبر عدد ممكن، مهم وفقكم الله وسدد خطاكم و جعلكم من الناجحين في الدارين 🩵
#che_rry

اول نقطة: هي التوكل على الله 💚

كي نقوللكم التوكل متقولوليش رانا متوكلين و خلاص خصكم صح صح تستشعروا هذاك التوكل و بلي سعيكم مرهون بتوفيق الله سبحانه و تعالى و تكون قرايتكم و علمكم هذا بنية العبادة استشعروا الامر في صلاتكم و في دعائكم.
و استغلوا مواطن الدعاء خاصة في الساعة الاخيرة من الجمعة و بعد الفجر و عند هطول الغيث و ادعوا بالبركة في الوقت و الجهد و السعي و اسألوا الله الصواب في الجواب و السهولة في الفهم و الحفظ .
و اقراو القرآن خلال الدراسة لان فيه بركة عظيمة و الله تحسوا ربي زادلكم في وقتكم بزااااف

النقطة الثانية: الوقت المناسب للدراسة⌚

هنا لازم تتعلموا ان التسويف و التأخير مراح يوصلكم لحتى نقطة و ماشي غير في القراية انما في حياتكم اليومية كي تعرفوا حاجة تشدكم عن السعي في الارض و تضيعلكم الوقت بعدوا عليها بما فيها التلفون.
و لازم تعرفوا وينهم الاوقات الي صح صح تقرا فيهم مليح ماشي برسك الناس تسهر انت ثاني تسهر و لا الناس تبكر انت ثاني تبكر
خير وقت دماغك انت يساعده مثلا انا نركز مع الصباح و بعد العصر منيش مجبرة نبات نايضة و ماشي مجبرة نبكر على 3 و 4 غير بعد الفجر كافيتني وافيتني و نرقد مليح و جامي نقصت سوايع رقادي لان اذا نعست ماعندها حتى معنى راك تقرا في جملة و دماغك مهوش يستقبل فيها.

النقطة الثالثة: اسك نأسيستي و لا لا

انا شخصيا منبغيش نقبض بلاصة لوقت طويل الله غالب منطيقش نأسيستي كل يوم صباح و عشية سو نخير برك ليبروف الي يساعدوني نحضر عندهم و في الغالب نعتابر حضوري هذا كافتتاحية للكور بعدها نقدر نزدم عليهم ديراكت و اذا مأسيستيتش جامي نبدا الكور نيشان حتى نطل عليه و نعرف واش فيه و نتهئ نفسيا

النقطة الرابعة: التخطيط📃

اذا مكنتش شخص مخطط او تعتمد على المخططات غادي تيه بسيف عليك اذا ماشي دوكا مبعد، تعلموا قبل ما تبداو تعرفوا ليكور الي عندكم و وينتا تقراوهم و بواش تبداو و المصادر قاع تستفوهم و تخدموا جدول تعلقوه قدامكم تشوفوه كل يوم باه تعرفوا وين وصلتوا و واش مزاللكم حتى اذا متعرفوش جيبوهم واجدين مهم المسار يكون واضح قدامكم

النقطة الخامسة: افضل طرق الدراسة

بالنسبة لي كاين بزاف طرق تقدروا تسقسوا Ai و لا من اليوتيوب و تدوا واش يساعكم بصح انا نبغي البومودورو لانها تعاوني نعرف شحال قريت وقت و تربطني في بلاصتي حتى يكمل وقتي
و كي نراجع نبغي نحفظ ب active recall بحيث نقرا الكور و نحطه بجيه و نعاود نستحضر و نشرحه لروحي في ورقة و لا طابلوا و ممكن حتى في فوكال و تقدر تعاود تسمعه وقت ما كنت مهوش طالعلك تقرا

ودوك نحطلكم كيفاه تروكوشوا في المنشور الي بعده ✨
#che_rry

الكوش الأولى:

هنا انا نجيب الكور نتاعنا و نحط معاه جيميني و كاش كتاب كنت اصلا مديسيديا نقرا بيه و سيرتو اناتومي لانني منبغيش نقرا بلا تصاور باينين و مسقمين.
بعدما نضرب طلة الكور واش فيه و قادر نشوف فيديو عليه سيرتو فيزيو لانها بزاااااف مخلطة في الدوزيام نبدا نقرا و نفلي الكور صفحة بصفحة على آخره و نسقسي جيميني باه نقبض غاية و نخربش في الكور و نترجم و تصيبوني ملوناته مخربشة فيه بقلم رصاص...
الوقت منقدرش نقوللكم على حساب الموديل و طول الكور كاين الي يدولي زوج سوايع و كاين ال يديلي نهار و في الغالب هاذي الطريقة تخدملي في ليموديل كيما اناتو ايسطو سيتو....
اما ليموديل نتاع الفهامة كيما فيزيو بيوشيمي بيوفيزيك فغالبا نقرا بالجزء نفهمه و غير بال Ai (تحيا جيميني btw) اعرفوا غير كيفاش تسقسوه، مهم بعدما نفهمه نكتبهم بشكل مخطط و لا كلمات مفتاحية مهم كيشغل نعاود نبسط الكور في وراقي هاذو مهمش ملخصات انما شرح للكور و هوما الي في الغالب نبارطاجيهم

الكوش الثانية:

هنا صايي نكون قريت الكور من قبل و فليته و خلاص يعني راه وقت الذاكرة هنا ترجع للبنادم واش من نوع ذاكرة عنده
اذا صورية يرجع يقرا كوره و يركز على واش راه مخربش و واش راه ملون ممكن حتى يشوف في اليوتيوب.
اذا كتابية كيفي انا يجيب و رقة بيضاء يقسمها بالعرض و يقرا الكور من جديد و اي معلومة و لا رسمة تساعده يعاود يكتبها و يرسمها نديروا vascularisation مثال تقدر ترسم الارتار كخيط فقط و تخرج les branches منه و تكتب قدامه كيسموه و واش يغذي
و لا مثلا في الايسطو تكتب epth و تكتب نوعه و واش من خليه فيه و ترسمها باه تتفكر شكلها و تعرف نوع نواتها و لا واش تدير و تبقى هكذا تلقى روحك ملخص
اما فيزيو و جماعته برسك نكون ملخصتهم من قبل فغالبا الكوش الزاوجة نشوف فيديوات و نعاود نقرا واش كتبت و نحل كوسيام باه نتفكر

الكوش الثالثة:

الي في غالب تكون في سيمانة الاكزامان و لا قبله بايام قلية نقرا الملخصات و نحفظ ب active recall و قليل وين نرجع للكور نحل كوسيام و الي جبتهم غالط نشوف علاه و كي نشك نبحث فيه و نخدم كوسيام نوت يعني اي كوسيام غريب تلقيت بيه و لا غلطت فيه نكتبه و هو الي نراجع بيه ليلة الاكزامان

ليلة الاكزامان:

صايي يكون عندي بقاج هنا غير نعاود نقرا ملخصاتي و نعاود نشوف كوسيام نوت و نرقد مليح برسك قريت قبل و عاودت و ميكونش بين وقت الامتحان و الكوسيام الي حليتهم وقت طويل سو مش راح ننساهم في الغالب حتى الكوش الثالثة و يكون عليه يومين و لا ثلاثة يعني مش راح نكون مخلطة و لا ناسية بزاف

مهم ارقدوا مليح و كولوا اكل صحي ينفعكم و يغذيكم و متبقاوش غير تشكوا راه البروف يطول علينا رانا نقراو بزاف راهم يدولنا الوقت نظموا رواحكم برواحكم و اسعاوا رانا كبار و منا تبدأ المسؤولية الحياة مهيش وردية و يديرولكم خاتم قد صبعك كيما الجامعة كيما الحياة العملية و غادي تتلقاو بصعوبات بزاف متسكتوش على حقكم كيما متبالغوش في طلباتكم مكاش الي راح يمدلكم قاع واش راكم باغيين و ربي يوفقكم و يسهللكم اموركم و يبارك لكم في وقتكم و مساعيكم و تبوأتم من الجنان مقاعد 🩵
#che_rry