😐💔سويتلكم بوت تواصل وبوت سيات بالوصف وان شاء الله ابلش بس يصير النت زين لان حالياً النت مايخدم اي شي

يا الله توكلنة عليك
سمعليكو شونكم شخباركم 😐 بما انو طلبتوا من البداية (من الصفر) ف راح نبلش كلش كأنوا مانعرف شي عن الانكليزي
اول شي نبلش من الحروف وطريقة لفظهن الصحيح وراح اكتب كل حرف كبير بصفه حرف صغير
.
.
.
Aa
نلفظها (ئا)
مثل apple
لفظها راح يكون...ئابل ( قرايتها تختلف عن لفظها )
Bb
نلفظها (ب) شلون من نلفظ كلمة بابا اذا لفظتوا كلمة بابا عدل راح تلفظون حرف ال b عدل
مثل bird
تنلفظ بيرد 😂
Cc
هاي هنا تناقض شوي هذا الحرف اسمه (سي) بس نلفظه (گة) ومرات نلفظه (سي) بحالات بعدين اشرحهن
مثل كلمة car
نلفظها (گار)
Dd
ينلفظ (د)
مثل كلمة dog
ينلفظ دوگ
Ee
ينلفظ (ئ)
مثل elephant
تنلفظ ئلفانت
Ff
ينلفظ (ڤ)
مثل كلمة fish
ينلفظ (ڤش)
Gg
هنا هم تناقض راح يصير بالموضوع
لان اله لفظين هلحرف
١_ ينلفظ ( گ) مثل كلمة game
نلفظها گيم
٢_ينلفظ (چ) مثل كلمة😂
Gender
تنلفظ (چندر)

Hh
هذا الحرف ينلفظ (هة) مثل حرف الهاء بالعربي
مثل كلمة house
نلفظها (هاوس)
Ii
هذا لفظه يضوج 😂
(ئة)
مثل كلمة ink
نلفظها (ئنك)

Jj
نلفظه (چا) مو يروح بالكم لل چا مال بصرة 😂
المهم مثل كلمة
Jelly
نلفظها چيلي (اللي تاكلونه برمضان 😂🍮)

Kk
نلفظها (گة)
مثل كلمة
Kite
نلفظها (گايت)

Ll
نلفظه ( ل) مثلي حرف (ل ) بالعربي
مثل كلمة ليمونه
Lemon


Mm

نلفظها (مه)
مثل كلمة monkey
نلفظها
مونكي 😑 ( بس احنه نلفظه منكي)


Nn 😂
لفظها (نا)
مثل كلمة. Nose 👃🏻
نلفظه ناوز 😂

Oo
نلفظه (او)
مثل كلمة
Orange
نلفظه (اورنج )


Pp
هذا ينلفظ (پا) بحيث من تلفظه يصير شلون ضغط ع الشفايف حت يطلع الصوت صحيح
مثل كلمة
Pizza
بيتزا نكول احنه
بس لفظها يكون
(پيتزا) بحيث نشدد ع خروج الحرف من الحلك 😂 واكثر المتعلمين مايفرقون بين لفظ حرف ال (B) وحرف ال (P) بس الفرق كلش جبير باللفظ ادزلكم بصمات ع طريقة نطقهن بعدين


Qq
نلفظه (گ) نفس لفظ حرف ال (k)
مثل كلمة
Queen 👑
نلفظها (گوين)


Rr
نلفظه ( را)
مثل كلمة
Radio📻
لفظه يكون
راديو 📻 نفس العربي

Ss
نلفظه (سه)
مثل كلمة
sun 🌞
نلفظها (سن)

Tt
نلفظها (ته)
مثل كلمة
taxi
نلفظها (تاكسي)

Uu
هذا شوي كلش متناقض اله لفظين
ونستعمل اللفظين بحياتنه اليومية هواي

١_ ينلفظ ( ئا) مثل كلمة umbrella
نلفظها ئمبرلا
٢_ نلفظها (يو)
مثل كلمة
Uniform
تنلفظ (يونيفورم )


Vv
هذا جنه رقم سبعه بالعربي 😂
ينلفظ ( ڤا) مثل كلمة
Van
عبارة عن سيارة نفس هاي 🚑 تشبه سيارة الاسعاف بس مدنيه المواطنين يستخدموها
المهم لفظها راح يكون
(ڤان)😂

Ww

هذا نلفظه (و)
مثل كلمة.
Window
يعني شباك بالعربي
نلفظه
(ويندو)
Xx
هذا لفظه يختلف 😂 هم
نلفظه (اكس ومرات گس ينلفظ بس الاكثر اكس ينلفظ )
مثل كلمة
X-ray
تنلفظ هنا (اكس راي)

Yy
هذا نلفظه (ي)
مثل
Yo-yo
نلفظه (يو-يو)
هاي اللعبة اللي بيها خيط ودوامة من نهدها تظل تفتر 😂

Zz
هذا لفظه يكون (ز)
مثل كلمة
Zebra حمار وحشي

نلفظه
(زيبرا)



هاي الحروف خلصناهن وشلون نلفظهن 😐
وراها راح ابلش بشي ثاني ب ٩ بس نصيحه اخوية
جيبولكم دفتر ابو ربع او دفتر مسودات
وشنو اكتبه من شرح او كلمات كتبوهن بالدفتر وخلال هلشي راح يصير عدكم معلومات بكد السليمة 😂

اقروها عدل 😐 لان اهم شي واول خطوة تقرون الرساله الفوك وعلى كيفكم لاتضوجون من الرساله لان بيها شرح بالتفصيل

الكلمات اللي مستخدمهن بالشرح ومعناهن
Apple...تفاحه
Bird....طائر
Car... سيارة صغيرة
Dog.... چلب
Elephant.... فيل
Fish.... سمچة
Game..... لعبة
Gender....الجنس يعني مذكر لو مؤنث
House...بيت
Ink.... حبر
Jelly ...چلي اللي ناكله برمضان
Kite....طائرة ورقية
Lemon.... ليمونه
Monkey.... قرد
Nose ...خشم
Orange...برتقاله
Pizza.... بيتزا
Queen...ملكة
Radio.... راديو
Sun.... شمس
Taxi...تكسي
Umbrella .... مظله او احنه نسميها شمسيه
Uniform.... زي موحد
Van ..... سيارة تشبه سيارة الاسعاف من حيث الشكل بس يستعملها المواطن العادي بنقل اغراضه ويشتغل بيها
Window.... شباك
X-ray... اشعة شلون من واحد تنكسر ايدة يروح يسوي اشعة يم الدكتور حت يشوف شنو نوع الكسر
Yo-yo....هاي لعبة. بيها حبل واكثركم شايفها
Zebra.... حمار وحشي بس ماعرف ليش ماموجود بالملصقات 😂

اي بعدين خل ادلل كرشي باالاول 😂

😂 غير عليكم حظ
ردت الفظ الكم الحروف بالطريقة الصحيحة وصارت هوسة جابوا لبلي وظلوا يلعبون اذا كلش بعدين الفظهن وبخدمتكم

😐💔 صباح الليل عليكم راح يوصللكم بصمة بصوتي يكرم الله (همزين نايمين حت لاتخترعون وتظلون كاعدين)
الصوت ادري يخرع بس استحملوا هل كم دقيقة 😂 رحمه لأهلكم
واي شي غلط او تردونه كولوا عادي اخيكم انه لاتستحون وعلي

شوكت نلفظ الC (ك) و شوکت نلفظهة (س)

نلفظهة (س)اذا اجت بعدها هذي الحروف (I,Y,E) مثل City ..Center،
و من تجي بعدها باقي الحروف نلفظهة ك 🙂😂😂
.
.

شكراً للدافنشية ع هاي المشاركة 😂

😐 سمعليكو
اليوم راح اكمل (بعدين)
اكو حروف نلفظهن بموقع معين حسب شروط وحرف مانلفظهن هم حسب شروط
واكو حروف من تجي بموقع معين لفظهن يختلف كلش كلش
من اخلص هاي وراها راح ابلش وياكم بغير شي
اكمل كتابتهن وادزهن هنا


احلف عليكم اكثركم مايعرف هلشي 😂
بس ان شاء الله راح اخليكم تعرفون 😐 كلشي يخص الانكليزي 😶

بالانكريزي عنده حروف اسمهن الحروف المركبة 😐
هذن الحروف يتغير لفظهن اذا اجن بموقع معين
او اذا اجن ويه حروف ثانيه 😂 وراح افهمكم اكثر
.
.
.
ia
ينلفظ هلحرف المركب
(ياا)
مثل
India
نلفظ الكلمة
(ئنديا)

حرف ال C
شرحت عنه
.
.
Cia
ينلفظ (ش)
مثل كلمة
Special

نلفظها
(سبشل)


Cie
تنلفظ (ش)
مثل كلمة
Species

نلفظها
سبشز😐

Tur

تنلفظ
(چر)
مثل كلمة
picture
نلفظها
بگچر

Ch
الها لفظين
١_ نلفظه (گ)
مثل كلمة
Chemical
گيمكل

٢_نلفظه (تچ)
مثل كلمة
Teacher


Gh
الها تلث الفاظ

١_تلفظ (ڤ)
مثل كلمة
Laugh
نلفظه
(لاڤ)
٢_نلفظه (گه)
مثل كلمة
Ghassan
,نلفظه
(گاسان) هذا اسم ولد اسمه غسان 😂

٣_ هنا يكون صامت ماينلفظ
مثل
Bought
نلفظه
(باوت)
😂


Kh
نلفظها
(گ)
مثل كلمة Khalid
نلفظها
(گالد)😂 اسم ابوي

Ph
تنلفظ (ڤ)
مثل كلمة
Phone
(ڤون)

Sh
تنلفظ (ش)
مثل كلمة
Shadow
تنلفظ
(شادو)

Th
الها لفظين
١_تنلفظ (ذة)
مثل
This
نلفظها
(ذسس)
٢_ نلفظها (ث)
مثل كلمة
Three




Sio
نلفظها
(شن)
مثل كلمة
Television
نلفظها
(تلفشن)



Su
الهاا لفظين

١_نلفظها
(ش)
مثل كلمة
Sugar

نلفظها
(شوگر)

٢_نلفظها (چه)
مثل كلمة
Usual
نلفظها يوچول

Tio

ينلفظ (ش)
مثل كلمة
Examination
نلفظها
(ئگزامنيشن)



Tia
,هم نلفظها (ش)
مثل كلمة
Egyptian
نلفظها
(ئچبشن)

خلصنه المركبات 😐




هسه اكو حروف يصيرن ساكتات ينلصمن بالحجي بس بالكتابة موجودات
راح اكولهن 😐


حرف ال (b)
مانلفظه بالحجي اذا اجه ورة حرف (m)
مثل كلمة
Comb
نلفظه
كم


حرف (k) هم مانلفظه اذا اجه وراه حرف (n)
مثله كلمة kneel
نلفظها
نييل


حرف ( L)
اذا اجه بين حرف d
وحرفي ال ou
ماينلفظ
مثل كلمة could
نلفظها
كود😐


واذا اجه بين خرف ال m
وحرف ال a
هم ينلصم وماينلفظ

مثل calm
نلفظها كام😐

واذا اجه لين حرف ال a
وحرف ال f
هم يسكت
مثل كلمة
Half
نلفظها هاف 😂


واذا اجه بين حرف a
وحرف k
هم ماينلفظ
مثل كلمة talk
نلفظها
تاك 😂
الاكثريه يلفظوها تالك
بس غلط لان لفظها
الصحيح تاك

حرف m مانلفظه اذا اجه بعد حرف ال n
مثل كلمة 😂
Damn
😂 نلفظها
دام


حرف w, ماينلفظ اذا اجه وراه حرف ال r
مثل كلمة
Write
اكثرنه يلفظها
ورايت 😂 الصراحه
بس لفظها هيج غلط
ولفظها الصحيح
يكون رايت



حرف ال t
ماينلفظ اذا وقع بين حرفي ال s
وال en
مثل كلمة
Listen
,مو تلفظوها لستن 😂
لا غلط
لان لفظها
لسن 😑


وخلصنه عذرونه ع طول الشرح بس بالتفصيل حت تفتهمون عدل 😐

بس هذن الرسالتين شرحهن طويل اعذروني وعلي بعد اخيكم لان لازم اخلصهن برساله وحده
وانتوا عدكم اليوم كله تقرونهن حت بليل نبلش ندخل بمواضيع اعمق
بس منا ورايح الشرح راح يكون قصير ومفهوم وبسيط ومحبوب

صباح الخير 😐
امس ردت ابلش بالازمنه بس رجعت تعبان وعلي وظليت ادرس اللي عندي لان عدهم امتحان 😐
المهم
.
.
راح ابلش اشرح الازمنه
بس مو كلهن لا لان تصير لويصة عليكم ف راح اشرح زمن زمن كل يوم زمن حت تسيطرون عليهن
ف اللي يحب غيره يستفاد خصوصاً الثالث والسادس خل يدزله الشرح
يلا شوي وارجع انشره الشرح

الازمنه باللغة الانكريزيه تتقسم ل 3 ازمنه :

١_المضارع (الحاضر ) present tense
٢_الماضي ( شي راح) past tense
٣_المستقبل ( شي نتوقع راح يصير او ماراح يصير نوبات بسبب ظروف) future tense




بس هذن الازمنه نكدر نصيغ منهن اربع اشكال :

١_البسيط (يعني مثلا ماضي بسيط) simple tense

٢_المستمر (اللي يدل على الاستمراريه)
Progressive (continuous) tense

٣_ صيغة التام perfect tense
٤_صيغة التام المستمر
Perfect progressive tense

هذن الصبغ لكل زمن يعني مثلا المضارع راح نلكة بيه هذن الصيغ الاربعة .



اول زمن اللي راح اشرحه

المضارع البسيط واللي قاعدته تكون ك الاتي
Subject +verb 1+object

Subject يعني الفاعل
Verb الفعل
وبالنسبة لرقم 1اللي بصف الفعل ف هذا معناه الفعل يكون بالتصريف الاول يعني بعده ما اجاله اي تغيير
مثلاً work هذا الفعل بعده ماصاير اي تغيير عليه لا بالحاضر ولا بالماضي ولا بالمستقل
شوفوا لان بالماضي راح يكون worked
هنا صار تصريف ثاني لان تغير وراح افهمكم اكثر من اخلص
Object معناها المفعول به يعني انه ماعرف بالعربي بس يعني الشي اللي سواه الفاعل




مثل
I live in New York
انا اعيش في مدينة نيويورك

الشرح بعده ماخلص جاري التكمله 😐👇🏻

ركزولي بالمثال الفوك 👆🏻اقروه شوي مرتين او تلث مرات وتالي انزلوا على تكملة الشرح


بالمضارع البسيط اذا كان عدنه الفاعل مفرد مثل
She
he
it
او اسم مفرد يعني مثلا اسم احمد هذا اسمي
اسم مفرد يخص شخص واحد
ف اذا كان الفاعل مفرد ف نظيف
S للفعل
هاي نسميها s الشخص الثالث
يعني الغائب او الغايب البعض يسميها
مو مالت الجمع 😐 انتبهوا
مثل
He plays tennis
هو يلعب تنس
لاحظو الفاعل مفرد
ف احنه جاي نحجي عن شخص ثاني ماجاي نحجي عن روحنه بين قوسين 😂(هلشخص اللي جاي نحجي عنه غائب وجاي نحش بيه )

.
.
اما اذا كان الفاعل
I
You
They
We
او اسم جمع
ف الفعل مانضيفله اي شي يبقى على حطته مثل المثال اللي نطيته فوك
I live in New York
شوفوا الفاعل عدنه
I
واحنه كلنه اذا اجه i او بقية الافعال مثل
You
We
They
او اسم جمع
ف الفعل مانضيفله اي شي بالمضارع البسيط
لاحظوا الفعل live
خالي من اي اضافه كلشي مابيها ع حطتها 😋

ياالله نكمل لان الاكثر كالوا مفهوم الشرح الحمد لله افتخر انوا شرحي جاي تفتهمون عليه

المهم نكمل
المضارع البسيط اله استخدامات

١_عادة يوميه
نقصد بيها انو شي نسوي يوميه
مثلاً احنه يوميه نكعد الصبح او مثلا
I go to school everyday
انه اروح للمدرسه يوميه
ف هنا تعتبر عادة (روتين يومي)
Ali drinks milk every morning
علي يشرب حليب كل صبح يعني من يكعد يشرب حليب وهذا الشي صار عاده او روتين يومي بحياته


٢_ حقائق علمية او حاله دائمة
اللي نقصد بيه انو فد شي يعتبر حقيقة علميه يكتشفها العلم
.
.
الحالة الدائمة يعني شي حقيقي بس ثابت
مثل انو يغلي عند درجة حرارة 100C

Water boils at 100C
هذا الشي ثابت مايتغير 😐 لان مامعقول

الماي يغلي بدرجة 100 تحت الصفر

وبالنسبة للحقيقه العلمية مثل
The earth moves around the sun
الارض تدور حول الشمس
هاي حقيقه علمية الكل متفق عليها

هذا الشرح الفوك كله عن المضارع البسيط المثبت
وهسه نبلش النفي
المضاره البسيط اله اداتين نستعملهن للنفي وللسؤال :
١_Does
واللي هيه نستعملها للمفرد وارجع واعيد المفرد اما يكون
She
He
It
او اسم مفرد

٢_Do
للجمع
والجمع هم اعيدهن الكم
I
You
We
They
اسم جمع

.
.
.

قاعدة النفي راح تكون ك الاتي :

Subject +do,does +not +التكمله
مثل
She does not speak English
هيه ماتحجي انكليزي
هسه نجزء الجمله حسب القاعده
ال subject=she
لان مفرد ف نستخدم does
ونخلي الnot حت ننفي
ووراها التكمله مال الجملة

شرحنه المثبت بالمضارع البسيط
وشرحنه النفي بالمضارع البسيط
هسه نبلش نشرح الاستفهام (السؤال) بالمضارع

قاعده الاستفهام ك الاتي بس انتبهوا ماكو اي اضافه للفعل

Do,Does +S+V+تكمله +?
هسه راح افصخلكم القاعده بالتفصيل بس ركزوا شوي

احنه عدنه الجمله دائماً تبدي بالفاعل (S)
بس بالاستفهام العكس
لان قاعدتنه تبلش بأداة الاستفهام
نقدم الاداة قبل الفاعل
وبنهاية الجملة نخلي علامة استفهام (؟)
هسه ننطي كم مثال ونفصخهن
Do you speak English?
اداة الاستفهام بالمثال
Do
لان عدنه الفاعل
You
ومثل مااتفقنه الفعل خالي من الاضافه
الفعل speak معناه تحجي
ماموجود بيه اي اضافه
والتكمله عاديه
وشوفوا بنهاية الجملة علامة الاستفهام
(?)
انتبهوا عليها بالامتحان
لان لنفترض الجمله عليها درجتين
اءا جاوبت الجمله صح وبدون ماتخلي علامة الاستفهام ف راح ينطيك درجه وحده
خل ناخذ فد مثال ثاني
Does it work?
الاداة بالجملة لكيناها
Does
لان الفاعل مفرد
It
والفعل work
مابيه اي اضافه
وعلامة الاستفهام بنهاية الجملة

انطيكم فد ملاحظه
شوفوا اكثركم مايكدر يميز زمن عن زمن 😐 انه جانت تواجهني هلمشكله بالمدرسه بس تخطيتها وراح اكللكم شلون

بالمضارع البسيط
راح تلكون
S
بنهاية الفعل
راح تلكون الاداتين
Do,Does بالجملة او القصه او الرواية او المقاله
راح تلكون ظروف التكرار
Usually غالباً
Sometimes احياناً
Often اكثر الاحيان
Always دائماً
Never ابداً
او ينطيك بين قوسين
(Present simple)
هنا تصير اوضح الكم


وكل زمن راح اكللكم شلون تميزونه عن غيره من الازمنه

بليل نبلش بالمضارع المستمر
واذا شرحي مو زين او مافهمتوا بس كولوا رحمة لأهلكم 😐
او اذا اكو غلط كولوا الواحد هم يتعلم من اخطأه
واذا اضافه عدكم هم كولوا

حسيون اذا شرحي بيه شي غلط كول 😂

نصيحة اذا ردتوا تتعلمون وعدكم طموح لاتملون بسرعه لان راح تنهدم طموحاتكم

اقروا فد قطعه صغيرة وحاولوا تطبقون عليها الشرح مال المضارع البسيط
من حيث المثبت والنفي والاستفهام
اقروا وطلعوا حت لو كان غلط اللي طلعتوه لان من تخطأ راح تتذكر خطأك وماتعيده وشكراً
بليل نبلش بالمضارع المستمر