#المضارع_التام_المثبت

اول شي لازم تعرفونه وهو انو ال (have)
متزوجه وعدها جهال بالماضي وبالمضارع هم

بالنسبة للمضارع
Have للجمع وتعرفون شنو جمع 😐
Has للمفرد 😐 لاتكلولي مانعرفه

وبالنسبة للماضي
Had
للجمع والمفرد 😂 ماتتعب وعلي

مثل
She (have) read the story
😐 نشوف الفاعل مفرد لو جمع
لكيناه فاعل ف الجواب
She has read the story
#كفشه

كلحنه عدنه مشكله بزمن المضارع التام
Present perfect tense
وببالطريقة اللي نستخدمها
لذلك راح افصخه بالتفصيل واخلي رسائل قصار مو طوال

هو زمن نستخدمه حت نحچي عن حدث او فعل صار قبل فترة بس هاي الفترة مانعرفها يعني مو محدده
(قبل ساعه او قبل يومين او قبل سنه ....الخ)
بس هذا الحدث اثاره بعدهن والنتائج باقيه

مثلا
_ Read this book, it is very nice .
_ I have read it already.

شوفوا المثال راح افصخه
مثلا عجبني كتاب وحبيت انطيه لصديقي يقراه
ف هو يجاوبني ويكلي انه قريته وخلصت صارلي هواي 😐 (فشلني الحنيط)
يعني مايذكر الفترة الل خلصها بيه يمكن مساع او يمكن قبل شهر وهكذا بس اثاره باقيه يعني (مخلص)
#كفشه

How to form the present perfect tense ? ,
شلون نصيغه يعني شلون قاعدته 😐؟

ج/ صيغته (قاعدته )ك الاتي

S+have, has +v3+تكمله

S...الفاعل حجيتلكم عنه
Have .... للجمع
Has... للمفرد
V... فعل
3.... معناه تصريف ثالث مرات نسميه

past participle
اختصاره يكون
P.P


فد مثال
I have read the book
يعني انه قريت ااكتاب بس نسيت يمته خلصته 😐 اثره القراءة
اوضح اكثر
انه قريت الكتاب وخلصت بالماضي بس ماعرف يمته
يمكن قبل اسبوع
بس اثره استمر وهو انو انه قريته وببالي انو انه خلصته

حت لا يصير خربطه بالقاعده 😐 راح افصخها هم
راح اسويها قسمين
القسم الاول وخو الفعل المساعد has
She , he,it اسم مفرد
ياخذن
Has

S+has+V(p.p)+تكمله
هاي قاعده المفرد

She has learned French already
يعني هيه تعلمت فرنسي قبل فترة 😐 لاحظو الفترة مو محدده يمكن امس يمكن مساع خلصت تعليمها

He has lost his keys
هو ضيع مفاتيحه 😐 ولحد هسه مالكاهن
ف اثر الفقدان بعده مستمر لهاي اللحظه


القسم الثاني الخاص بالجمع واللي ياخذ الفعل المساعد have
I,we,you,they
هذن جمع ياخذن
Have
القاعده مالتها راح تكون
S+have+V(P.P)+تكمله

فد مثال
I have met many people since i came here in june

شفت هواي ناس من يوم اجيت بشهر جون
يعني صارله فترة بس الحدث بعده بالحاضر

#كفشه

راح احجيلكم استخدامين لهل زمن وباجر اكمل الباقي لان بالكوة جاي اكتب ☹

يمته نستخدم هذا الزمن التعبان 🤤
When we use yhe present perfect tense?


شوفوا هو اله استخدامات هواي راح انطي اللي اتذكرهن 😶

اولاً:
في حالة التعبير عن حدث او نشاط مستمر
وهذا الحدث بدأ بوقت (محدد) بالماضي واستمر لهذا وكتنه
بس بهاي الحاله نستخدم حرف الجر
Since
وراح اشرحلكم يمته نستعملها بس بعدين

I have met many people since I came here in june
شفت هواي ناس من اول مااجيت بشهر جون
نستنتج من هلشي
انو الحدث محدد (مقابلة الناس والوقت محدد هم يعني نطانه شهر اسمه جون واثار هلحدث مستمره لهاي اللحظه)

He has spoken English since he was a child
هو يحجي انكليزي من جان صغير

الحدث عدنه هو حجيه للانكليزي
وهذا الشي صار بوقت معين
يعني من جان صغير
والحدث اثاره مستمرة
وهيه حجيه للانكليزيه لحد هسه يحجي انكليزي

#كفشه

ثانياً : في حاله التعبير عن حدث او نشاط استمر في زمن او وقت بالماضي
بس هنا راح يكون الوقت غير محدد(مانعرفه) لحد وقتنه هذا

هاي الحاله عكس القبلها وراح اكللكم شلون
بالاولى حدث صار بالماضي وبيه وقت محدد
بس هنا صار بالماضي بس وقته مو محدد راح افصخه
نستخدم حرف الجر
For
عم راح افصخه الكم من اخلص
مثال
He has studied English for a long time
هو درس انكليزي من فترة طويله 😐
شفتوا ماناطانه وقد محدد يعني ماكال خلص ب 2004 لا كال فترة طويله ماحدد

الحدث هنا هو راسته للانكليزي
وهذا الحدث ماصار بوقت معلوم يعني ماحدد الوقت بالماضي
بس اثاره باقي وهو انو هو درس انكليزي ولهسه موجود اثره

مثال ثاني
They have been here for several years

هم هنا منذ سنين عديده
الحدث هنا اللي صار هو تواجد هذول الناس
بس الحدث ماصار بوقت معين يعني ماحدد فترة زمنيه
ف كال صارلهم سنين عديده
بس اثاره بعدهي للوقت الحاضر يعني بعدهم بنفس مكانهم
#كفشه

صبحكم الله بالخير ،😐
راح اكمل شرح
#المضارع_التام
وبالنسبه للبصمات بس اخلص الشرح اكتبلكم شكو شي كتبته بالانكليزي برساله والفظهن الكم


ثالثاً:
من نريد نعبر عن حدث او نشاط صار مرة وحده او مرات هواي
الزبدة
حدث مكرر بالماضي لحد هاي اللحظ
He has played football from time to time

هو يلعب طوبة من وقت لوقت

هنا الحدث اللي صار لعبه للطوبة
وهلحدث تكرر اكثر من مرة بالماضي ولحد هسه اثره باقي
يعني حت بوقتنه يلعب طوبه من وقت لوقت



رابعاً:
في حالة التعبير عن حدث او نشاط خلص من فترة قصيرة كلش وقبل وقت الحدث
يعني توه صار وخلص
مثال
He has just left
توه انكلع
She has worked very hard this week

هيه اشتغلت خوش شغل هلسبوع

#كفشه

خامسا:
للتعبير عن تجربة او انجاز

للتعبير عن تجربة
I have been to France
جنت بفرنسا 😐
يعني رحت سياحه وجربت العيشه هناك بس رجعت

للتعبير عن انجاز 😐 يعني انجاز سويته بحياتك

I have walked on the moon
مشيت على القمر (جذب يكرم الله )




شوفوا الفرق بين الجملتين

I have been to France
جنت بفرنسا يعني جان بفرنسا يجوز سياحه يجوز شغل بس تالي رجع
I have been in France for six months
انه بفرنسا من ست اشهر
يعني هو صارله ست اشهر الحنيط هناك وبعده بفرنسا مارجع



سادساً:
من نريد نوصف عمل مامخلص بس المفروض يخلص من زمان

Noor has not finished her homework yet
نور ماخلصت واجبها لهسه
يعني انه منطيها واجب والمفروض تخلصه بس ماخلصته 🤤


The rain has not stopped
المطر ماوكف
يعني المطر المفروض يوكف هسه شو ظلت تزخها قوي 😂
#كفشه

نفي المضارع التام
عدنه اداتين ننفي بيهن بكل زمن
Not
Never

هذن يجن ورة الفعل المساعد
S+has/have+not/never+v(pp)

The have studied the lesson very well
درسوا الدرس المطلوب منهم بشكل جيد

من ننفيها تصير
They have not studied the lesson very well

همه مادرسوا الدرس المطلوب منهم بشكل جيد 😐

اكو عدنه كم كلمة نستخدمهن ويه هلزمن
Already
ونعني بيها
سابقاً او للتو او الان
مثال
She has already gone
ذهبت للتو

Just
معناها
منذ لحظات او وقت قصير
مثال
Do you like something to eat?
تحب تتزقنب شي ؟
No, I just had lunch
لا قبل شوي تزقنبت غدة

Yet
بالعادة نستخدمها بالنفي والاسئله فقط
وتعني
لحد هسه
واللي نعني انو هيه تشير الى ان المتكلم يتوقع شيئاً ان يحدث
مثال عن yet بس المثال هنا راح اخليه بالنفي

I have written the letter,but I have not posted yet
لقد كتبت رساله بس مارسلتها

وبالنسبة للاستفهام بالمضارع التام
ناسيه بس خل اشوفلي شي منا منا اقراه عنه واشرحه الكم

وهسه راح انطيكم استعمالات
Since
For

#كفشه

هسه نبلش باللي وعدتكم بيه
Since
For

انتبهوا كل وحده الها استعمال
راح تكولون شلون 😐؟
راح افصخها

Since
نستعملها ويه فترة بالماضي بس محدده
مثلا منذ الولادةاو منذ 1995
يعني احدد نقطه معينه بالماضي
امثله

Since 3 o'clock
Since 3 years
Since 1995




استخداماتها
وقت معلوم بالساعه يعني اكول منذ الساعه الثامنه 😐 صباحاً

Since 8 o'clock Am

ويه ايام الاسبوع
Since Monday
منذ الاثنين
يعني اسم اليوم 😑

Since February
منذ شهر فبراير 😐💔
يعني انطي اسم الشهر

Since 1995
منذ 1995
انطي رقم السنه

هذن اللي اتذكرهن 😫💔
#كفشه

For


نستخدمها من نحجي عن فترة مامحددة بالماضي
مثلا
For ten years

منذ عشر سنوات
احنه مانعرف شوكت بدت هاي العشر سنوات
بس اعرف انو المدة عشر سنوات 🙁💔



For long time
لزمن طويل طويل


استخداماتها عكس since

For ten hours
هنا ينطي ساعات ماينكي الوقت عدل يعني مايذكر الساعه يمته


هناك كلنه يذكر اسم الشهر
هنا لا
راح يكول اشهر
For six months
منذ ستتة اشهر
بس ياهنه هذن البدايه لو نهايه 🙁 مانعرف

هناك كلنه يذكر الرقم مال سنه

هنا مايذكر
ويكول
For three years
منذ ثلاث سنوات 🙁

هذن االي اتذكرهن
واللي عنده اضافات عن المضارع التام خل يدزه 🙁

#كفشه

سمعليكو شونكم شخباركم وياكم اخيكم كفشه هسه راح ابلش اشرح المضارع التام المستمر وعذروني هنا احجي على شكل مستند بس التلفون نطاكم عمره المهم ماعلينه
اول شي لازم تعرفون شنو هذا شنو نقصد بالمضارع التام المستمر
طبعا بيه شوي صعوبخه بس راح اوضحه الكم واسويه سهل

اول شي المضارع التام المستمر عباره عن عمل صار بالماضي بس بعده لهسه بس لازم ويه فترة زمنيه واللي نستخدم بيه الاداتين
Since
For
مثال للتوضيح
I have been writing a letter for two days
انا اكتب رساله صارلي يومين
افصخه الكم
هنا يعني انه بديت اكتب الرساله من يومين بس بعدني مامخلصها يعني بعدني جاي اكتب بيها
مثال ثاني حت يوضح الكم اكثر
James has been teaching at the university since June
جيمس يدرس بالجامعه من شهر يونيو يعني
القصد من الحجي بانو جيمس بدا يدرس الطلاب هناك بالجامعه من شهر يونيو وبعده لهسه لوقتنه الحاضر يدرسهم
السيبندي كرف فلوس هناك هههههه

هسه نجي للشغله الثانيه هههه بالمناسبه بعدني مافتت بالزبده
المهم
هنا احنه المضارع التام المستمر نريد نعبر عن شغله صارت توها يعني قبل شويه بالفصحى حديثا يعني ماكو فترة زمنيه
بس تجي وياها كلمات مثل
Lately
Recently
فد مثال حت نفصخه
She has been watching too much television lately
هيه تشوف التلفيزيون هواي مؤخرا
الله ياخذها ماانعمت هههههههه

هسه نفوت بالزبده هههه
صيغه المضارع التام المستمر او البعض يسميها القاعده ك الاتي
S+ has/have + been +V (ing)+تكمله
مثال لتوضيح القاعده
I have been visiting some countries to learn their cultures.
اقوم بزيارة بعض الدول للتعرف على ثقافتهم.

🤦‍♂️💔 صبحهم ليلهم ظهرهم عصرهم هلغنيه

How long
واللي معناها من يمته

نستخدمها للسؤال عن المدة ونسستمها ويه المضارع التام والمضارع التام المستمر


اول شي ويه المصارع التام
How long +have/ has+ فاعل+ p.p+ تكمله+ ?

How long have you been married?
من يمته معرس


ويه المضارع التام المستمر

How long +have/has +فاعل+been +v(ing)+تكمله+?

How long have you been waiting?
من يمتهه تنتظر ؟


ال
Since, For
مشروحات فوك تلكونهن



هسه نجي لموضوع ال
Been , gone

شنو هذن؟
شوفو
Gone ذهب ولم يعد
يعني واحد سافر ومارجع لهسه
مثلا
Ali is in a holiday, he has gone to Dubai
علي بعطله وراح لدبي
يعني بعده مارجع
زمن هاي الجملة دائما مضارع بسيط


هسه been واللي معناها راح ورجع
زمن هاي الجملة يكون ماضي بسيط

My family and I had a good time there, we have been to Turkey
انه واهلي قضينه وقت حلو بتركيا



شوفو طريقة السؤال
Ali is in a holiday, he has (been/gone) to Dubai
(Choose)

هيج السؤال
ف انه شسوي لازم هنا
اشوف زمن الجملة اذا ماضي بسيط ف اختار been
واذا مضارع بسيط ف اختار gone
هنا عندي مضارع بسيط
ف لازم اختار gone

والله صوت يخبل🤤💔 خليطربنه بعد صاحب الصوت اللطيف
كون اغاني بيها ردح حزين

الفرق مابين الماضي البسيط والمتضي التام شارحينه الكم ؟
ردو بسرعه 😑💔 فدوة

عبارات الوصل
Relative clause

هذن نستخدمهن حته نربط بيهن جملتين بحيث من نخلي وحده من عبارات الوصل راح الجملتين يصيرن جملة وحده
بحيث الجملة الثانيه راح تنطي معلومات اما اساسيه او اضافية
توصفلنه الفاعل او المفعول به للجملة الثانيه

وهاي العبارات نستخدمهن ويه عبارات الوصل

Who للعاقل
Which غير العاقل
That للعاقل وغير العاقل
Where للمكان
Whose للتملك

الشرح اللي عليها صعب الصراحه
بس راح انطيكم الزبدة


اذا راد مني بالسؤال اخلي عبارة وصل وكون هلعبارة توصف الفاعل مال الجملة الاولى راح ناخذ اول شي
Who

Michel still rides a bike. He is 70 years old
(Relative clause)

هنا عندي لازم اختار العبارة الصح

اول شي قبل كلشي لازم اسوب هلخطوات

اول شي ناخذ فاعل الجملة الاولة بس
Michel
ثاني شي نخليله ضمير وصل مناسب اله
Who لان عاقل الفاعل
ثالث شي فاعل الجملة الثانيه نحذفه اذا كان يحجي عن نفس الفاعل مال جملة الأولى


رابع شي نكتب الباقي مال جملة ثانية

خامس شي نكتب الباقي مال جملة الاولة


الجملة اللي نريد نعدل عليها
Michel still rides a bike. He is 70 years old

نمشي خطوة بخطوة
Michel who is 70 years old still ride a bike


اقرو الخطوات وشوفو الحل



Which نفس الشي الفوك الخطوات



Where
بهاي الحاله مانحذف فاعل الجملة الثانيه
واذا لكينه there فهذا يدللنه ع المكان بالجواب نحذفها



Whose نفس الخطوات بس تحفظون تحويل الضمائر


That
نفس الشي
بس يمكن نستخدمها ويه العاقل وغير العاقل



هذا الشي من نريد.نوصف الفاعل

زين من نريد نوصف المفعول به شلون ؟؟
اول شي المفعول بيه هو اللي يجي بعد الفعل
فاعل فعل مفعول به

شلون نخلي عبارات وصل من نريد نوصف المفعول به مال جملة الاولى

نمشي ع الخطوات الجاية
اول شي
نكتب الجملة الاولى كاملة بدون اي حذف ولا اي شي

ثاني شي نخلي عبارة وصل تناسب المفعول به
هل هو عاقل غير عاقل مكان...الخ
ثالث شي
نحذف فاعل الجملة الثانية اذا جان يعود للمفعول به مال جملة الاولى

رابع شي
الضمير it ينحذف
خامس شي
نكتب باقي الجملة


هاي خطوات نجي للمثال والحل

Sally has a son, he is 6 years old

لاحظو وياي الجملة الثانية وصفتلي ابن سالي انو عمره ٦ سنوات ماوصفت سالي

المهم اجي اطبق حسب الشروط
ازل شي ننزل الجملة الازلى بدون حذف
Sally has a son,

نزلتها

ثاني خطوة اشوف شنو يناسبها من عبارات الوصل
هنا لازم اختار who لان عندي عاقلين

ف تصير الجملة ك الاتي
Sally has a son who

خلينه عبارة وصل

هسة الخطوة الثالثة
نحذف فاعل الجملة الثانية اذا جان يعود للمفعول به مال جملة الاولى

مفعول الجملة الاولى هو son الابن
وفاعل الجملة الثانيه he
ف he تعود للson
ف شنسوي نحذف الفاعل he

رابع شي نحذف الضمير it اذا لكيناه
هنا ماموجود it
ف نروح ع خامس شي وهو نكتب باقي الجملة
Sally has a son who is 6 years old.


وهذا الحال ويه بقية عبارات الوصل


بالمختصر المفيد
بس تحذف فاعل الجملة الثانية وتخلي وحدة من عبارات الوصل المناسبة


كتاب النشاط ص 106 فرع c
شوفوه

وفرع b هم
وفرع d هم
شوي مهمات




مرات ينطيني ياهن بين قوسين يعني اختار مثلا اما where او who على سبيل المثال يعني ضمير الوصل المناسب
ف هنا لازم اعرف كم شغله


اذا اجه قبل الفراغ فاعل عاقل وبعد الفراغ فعل مساعد او فعل
ف نختار who


اذا اجه قبل الفراغ اسم غير عاقل
وبعد الفراغ فعل او فعل مساعد ف نختار which


اذا اجه قبل الفراغ اسم مكان او غير عاقل
وبعد الفراغ واحد من هذن
They
We
You
I
She
He
ف نختار where

اذا اجه قبل الفراغ اسم وبعد الفراغ هم اسم
ف نختار whose

اتمنى فهمتوه

هسه نجي لليونت السادس والمبني للمجهول

قاعدة المبني للمجهول
بزمن المضارع البسيط

اول شي لازم تعرفون شلون تميزون زمن المضارع عن زمن الماضي او المستقبل وهذا الشي شارحه فوك

هسه نجي نشرح
اول شي نسويه اول خطوة
نشوف زمن الجملة هل هيه ماضي او مضارع

هسه راح نبلش بزمن المضارع


اذا كان عدنه الفاعل مفرد
She ,he , it , اسم علم
ف ننعوضه ب is
واذا كان الفاعل جمع
They,we,you
نعوضه ب are



ثاني خطوة نسويها نحذف الفاعل
سواء كان مفرد او جمع
She
He
It
Ahmed
They
We
You

نحذفهم ونعوض ببدالهن اما is للمفرد
او are للجمع

ثالث خطوة نسويها
نحول المفعول به
Object
ببداية الجمله

زين استاذ شنو المفعول به مانعرفه 😐💔
راح اكلك شي بسيط
المفعول به تلكاه ورة الفعل
Ahmed writes the letter
Ahmed =فاعل
Writes = فعل
The letter = مفعول به

شنو يجي ورة المفعول به هذا يعتبر تكمله

نكمل هسه
نخلي المفعول به بالبداية
وراها الفاعل الحذفناه مفرد لو جمع ؟ اذا مفرد نخلي is
واذا جمع نخلي are

والفعل نحوله تصريف ثالث
لازم تحفظون التصاريف