ملاحظه تشمل جميع الانواع :- ذكرت الكم ممكن نستخدم اكثر من صيغه بس بحالة اذا هو حددنا بصيغه معينه ميصير نستخدم غيرها
مثلا جابلنا جمله اقتراحات وممكن نستخدم 3 صيغ, اذا كتب ويه المطلوب ( suggestion use shall we) يعني هو حددنا باستخدام shall we بس 🙂
© Salah Al-Bayati

نهاية الصورة عدنا موضوع بسيط كلش طبعا ميجي وزاري بس حبيت اوضحه، الفرق بين كلمه
Skimming و Scanning
كلمة Skimming قراءة سريعه لنص معين، بس بدون ما ادور على تفاصيل بالنص يعني اكتفي بس بلمحه سريعه حتى اعرف المكتوب يخص شنو..
وكلمة Scanning يعني ادور على معلومه معينه يعني من اقرا شي لازم اعرف الشي الي اقراه حتى ادور على الشي الي اريده ..
طبعا هاي مجرد توضيح بس بالوزاري مارح يجي الفرق بينهم ☺️🌺

التحويلات الي حجيت عليها بالتسجيل وتفيدنا بهذا الموضوع..

قاعدة الموضوع بس تعديل بسيط ..
الاسم ( فاعل ) + make/made + مفعول به + فعل مجرد
صححوها لان الملزمه صار خطأ بالطبع 👍

التحويلات الي مطلوبة حفظ.. من ظمير الفاعل إلى ظمير مفعول به.. الي مكتوبة بالشرح صاير بيها خطأ بالطبع..

التحويلات الي مطلوبة حفظ.. من ظمير الفاعل إلى ظمير مفعول به.. الي مكتوبة بالشرح صاير بيها خطأ بالطبع..

هلو
بس بين مايشحن لابتوبي اكمل الشرح مال سادس
لان الكتب بيه مخليهن

اليونت الثالث
كتاب النشاط صفحة ٥٠ فرع c
مال مهن هذا حفظ مهم



هسه نشرح if
معناها اذا
هيه اداة تربطلنه جملتين
اول وحده نسميها جملة السبب والثانيه جملة النتيجه
الجمله اللي ويه if هاي السبب
واللي عدها هاي النتيجه
If+ جملة النتيجه ،جمله سببيه.

جملة if يمكن تجي بالوسط او بالبداية ماكو فرق ولاتغير نفسها سواء بالبداية او بالوسط

و ال if بيها اربع حالات
Zero conditional
First...
Second....
Third.....


هسه نجي نفصخن شوي شوي

١/zero conditional

هاي يمته نستخدمها ؟ وشلون
هاي نستخدمها ويه الحقائق العلمية واللي مانكدر نشك بيها واللي دائماً تكون ميه بالميه

مثال للتوضيح
Plants die if we don't water them

النباتات تموت اذا ماسكيناهن بالماي
هذا الشي صحيح ومايقبل غلط لان النباتات تموت بدون ماي

مثال ثاني
If the temperature is over 100°, water boils

اذا درجه الحرارة اكثر من ١٠٠ درجه ف الماي يغلي وهلشي حقيقي

زين قاعدتها شلون ؟

قاعدتها ك الاتي

If+ مضارع بسيط، مضارع بسيط.

ليش مضارع بسيط شنو السبب ؟؟
لان المضارع البسيط هو اللي يحجي عن الحقائق العلمية والعادات اليوميه
زين وين المضارع شلون اعرفه شلون اميزه ؟
لاحظ وياي الشرح عن المضارع البسيط وشلون تعرفه وتميزه عن البقية
⬇️⬇️⬇️⬇️⬇️⬇️⬇️⬇️⬇️⬇️

الازمنه باللغة الانكريزيه تتقسم ل 3 ازمنه :

١_المضارع (الحاضر ) present tense
٢_الماضي ( شي راح) past tense
٣_المستقبل ( شي نتوقع راح يصير او ماراح يصير نوبات بسبب ظروف) future tense




بس هذن الازمنه نكدر نصيغ منهن اربع اشكال :

١_البسيط (يعني مثلا ماضي بسيط) simple tense

٢_المستمر (اللي يدل على الاستمراريه)
Progressive (continuous) tense

٣_ صيغة التام perfect tense
٤_صيغة التام المستمر
Perfect progressive tense

هذن الصبغ لكل زمن يعني مثلا المضارع راح نلكة بيه هذن الصيغ الاربعة .



اول زمن اللي راح اشرحه

المضارع البسيط واللي قاعدته تكون ك الاتي
Subject +verb 1+object

Subject يعني الفاعل
Verb الفعل
وبالنسبة لرقم 1اللي بصف الفعل ف هذا معناه الفعل يكون بالتصريف الاول يعني بعده ما اجاله اي تغيير
مثلاً work هذا الفعل بعده ماصاير اي تغيير عليه لا بالحاضر ولا بالماضي ولا بالمستقل
شوفوا لان بالماضي راح يكون worked
هنا صار تصريف ثاني لان تغير وراح افهمكم اكثر من اخلص
Object معناها المفعول به يعني انه ماعرف بالعربي بس يعني الشي اللي سواه الفاعل




مثل
I live in New York
انا اعيش في مدينة نيويورك

الشرح بعده ماخلص جاري التكمله 😐👇🏻

ركزولي بالمثال الفوك 👆🏻اقروه شوي مرتين او تلث مرات وتالي انزلوا على تكملة الشرح


بالمضارع البسيط اذا كان عدنه الفاعل مفرد مثل
She
he
it
او اسم مفرد يعني مثلا اسم احمد هذا اسمي
اسم مفرد يخص شخص واحد
ف اذا كان الفاعل مفرد ف نظيف
S للفعل
هاي نسميها s الشخص الثالث
يعني الغائب او الغايب البعض يسميها
مو مالت الجمع 😐 انتبهوا
مثل
He plays tennis
هو يلعب تنس
لاحظو الفاعل مفرد
ف احنه جاي نحجي عن شخص ثاني ماجاي نحجي عن روحنه بين قوسين 😂(هلشخص اللي جاي نحجي عنه غائب وجاي نحش بيه )

.
.
اما اذا كان الفاعل
I
You
They
We
او اسم جمع
ف الفعل مانضيفله اي شي يبقى على حطته مثل المثال اللي نطيته فوك
I live in New York
شوفوا الفاعل عدنه
I
واحنه كلنه اذا اجه i او بقية الافعال مثل
You
We
They
او اسم جمع
ف الفعل مانضيفله اي شي بالمضارع البسيط
لاحظوا الفعل live
خالي من اي اضافه كلشي مابيها ع حطتها 😋

ياالله نكمل لان الاكثر كالوا مفهوم الشرح الحمد لله افتخر انوا شرحي جاي تفتهمون عليه

المهم نكمل
المضارع البسيط اله استخدامات

١_عادة يوميه
نقصد بيها انو شي نسوي يوميه
مثلاً احنه يوميه نكعد الصبح او مثلا
I go to school everyday
انه اروح للمدرسه يوميه
ف هنا تعتبر عادة (روتين يومي)
Ali drinks milk every morning
علي يشرب حليب كل صبح يعني من يكعد يشرب حليب وهذا الشي صار عاده او روتين يومي بحياته


٢_ حقائق علمية او حاله دائمة
اللي نقصد بيه انو فد شي يعتبر حقيقة علميه يكتشفها العلم
.
.
الحالة الدائمة يعني شي حقيقي بس ثابت
مثل انو يغلي عند درجة حرارة 100C

Water boils at 100C
هذا الشي ثابت مايتغير 😐 لان مامعقول

الماي يغلي بدرجة 100 تحت الصفر

وبالنسبة للحقيقه العلمية مثل
The earth moves around the sun
الارض تدور حول الشمس
هاي حقيقه علمية الكل متفق عليها

هذا الشرح الفوك كله عن المضارع البسيط المثبت
وهسه نبلش النفي
المضاره البسيط اله اداتين نستعملهن للنفي وللسؤال :
١_Does
واللي هيه نستعملها للمفرد وارجع واعيد المفرد اما يكون
She
He
It
او اسم مفرد

٢_Do
للجمع
والجمع هم اعيدهن الكم
I
You
We
They
اسم جمع

.
.
.

قاعدة النفي راح تكون ك الاتي :

Subject +do,does +not +التكمله
مثل
She does not speak English
هيه ماتحجي انكليزي
هسه نجزء الجمله حسب القاعده
ال subject=she
لان مفرد ف نستخدم does
ونخلي الnot حت ننفي
ووراها التكمله مال الجملة

شرحنه المثبت بالمضارع البسيط
وشرحنه النفي بالمضارع البسيط
هسه نبلش نشرح الاستفهام (السؤال) بالمضارع

قاعده الاستفهام ك الاتي بس انتبهوا ماكو اي اضافه للفعل

Do,Does +S+V+تكمله +?
هسه راح افصخلكم القاعده بالتفصيل بس ركزوا شوي

احنه عدنه الجمله دائماً تبدي بالفاعل (S)
بس بالاستفهام العكس
لان قاعدتنه تبلش بأداة الاستفهام
نقدم الاداة قبل الفاعل
وبنهاية الجملة نخلي علامة استفهام (؟)
هسه ننطي كم مثال ونفصخهن
Do you speak English?
اداة الاستفهام بالمثال
Do
لان عدنه الفاعل
You
ومثل مااتفقنه الفعل خالي من الاضافه
الفعل speak معناه تحجي
ماموجود بيه اي اضافه
والتكمله عاديه
وشوفوا بنهاية الجملة علامة الاستفهام
(?)
انتبهوا عليها بالامتحان
لان لنفترض الجمله عليها درجتين
اءا جاوبت الجمله صح وبدون ماتخلي علامة الاستفهام ف راح ينطيك درجه وحده
خل ناخذ فد مثال ثاني
Does it work?
الاداة بالجملة لكيناها
Does
لان الفاعل مفرد
It
والفعل work
مابيه اي اضافه
وعلامة الاستفهام بنهاية الجملة