الدرس الثاني والثالث بيه بس مسلته ماعرف اذا شي مهم او لا اللي يعرف شي عنه خل يدز ع بوت التواصل حت نعرف لان اللي اشوفه بس مسلته

الدرس الرابع بيه المضارع البسيط ☝️☝️☝️☝️☝️☝️ فوگ تلكون الشرح

وبيه هم الماضي البسيط 👇👇👇👇

مثل ماكلتلكم اشرحلكم الماضي
المهم
توكلنة على الله

#الماضي_البسيط

مثل ماكلنه نعرف مصطلح (الماضي) يبين النه انوا شي صار وانتهى يمكن قبل يوم يمكن قبل سنه من وكتنه هذا
مثلا
we went to the cinema yesterday

احنه رحنه للسينما البارحه


خل نتعمق شوي
همه راحوا للسينما لنفترض شافوا فلم سبايدر مان الجديد 😐💔
زين من راحوا امس معقولة بقوا لهاي اللحظه بالسينما ☻💔 اكيد لا لان لازم يرجعون للبيت خاف ينكتلون
المهم همه راحوا امس وخلص

#فهمتوا_؟

اذا مافهمتوا كولوا 😐💔

المهم الماضي نعرفه من كم كلمة توضحلنه انوا هذا الزمن زمن الماضي البسيط

مثل

yesterday معناها البارحه
from - to
من -الى
I worked in Canada from 1990-1995
انه اشتغلت بكندا من سنه ١٩٩٠-١٩٩٥
يعني اشتغلت وخلص شغلي ورجعت

last week الاسبوع الفات
#كفشه

نرجع لسالفتنه
قاعدته تكون ك الاتي

S +V.2 +تكمله

I worked in Germany
هاي الجملة طبقت كل شروط القاعدة المطلوبة
نستخدم الماضي للتعبير عن شي صار وانتهى وقت
ومرات نستخدمه ويه الجملة الشرطية اللي راح اشرحلكم ياها غير مرة 😐💙



وذكروني خاف نسيت شي منا منا 😐💙
جاي اعتمد ع المعلومات اللي اتذكرهن ف اللي عنده معلومه لايبخلها على غيره شمالكم تحصلون حسنات
#كفشه

عندي صيغتين اعبر بيهن عن الماضي
الاول بأستخدام الافعال المساعدة (was/were)


Was للمفرد

He
She
It
I

اسم علم مفرد

Were للجمع



They
We
You


بالنفي نضيف not للفعل المساعد
ف تصير wasn't للمفرد
Weren't للجمع

وبالسؤال نقدم الفعل المساعد بالبداية ونخلي علامة الاستفهام


الطريقة الثانية
فعل يحمل ed(قياسي) او شاذ
هم لازم استخدم الفعل المساعد (did) حت بالنفي يكدر يشيل ال not


مثل
I played football yesterday
لعبت طوبة البارحة حدث صار وخلص خو ما من امس العب طوبة

هاي بأبسط طريقة جاي افهمكم ياها


بالنفي ( مانكدر نخلي نوت ببحدها ف لازم عدنا فد شي يكدر يشيل not ف هنا بهاي الحالة لازم نخلي didn't

ف تصير
I didn't play football yesterday
انه مالعبت طوبة البارحة


لاحظو فد شي وياي
بالمثال الاول من
I played...

ضفت ed

بس من كلت
l didn't play....
ماخليت ed

ف هذا شنو يعني ؟

يعني انو من نظيف ماعرف نضيف
Did
ف الفعل يرجع لأصل بدون اضافة يعني نحذف الاضافه منها


هاي بالنفي

بالسؤال نقدم الفعل المساعد
بالبداية ونضيف ماعرف نظيف علامة الاستفهام





#ملاحظه
كل سؤال بادي بفعل مساعد مثل
Is
Am
Are
Was
Were
Do
Does
Did

الجواب عنهن راح يكون قصير
اما
yes او no

الدرس الخامس هم مسلته وكلان تبن 🤦‍♂️💔

الدرس السادس بيه مال لوسي مهم وزاري اسئلة وصح وخطأ وغيرها موجودة بكتاب النشاط مهم وزاري

الدرس السابع الدعوات حت نسوي دعوة ندعي بيها شخص وكذا


ف بهاي الطريقة راح تكون

Would you like to +فعل مجرد
+تكملة +علامة استفهام


Would you like to come to our party ?

Shall i +فعل مجرد
+تكملة +علامة استفهام


Shall I get the cheapest seat?

السؤال راح يكون بالوزاري بهاي الطريقة

Invite your friend to come to the school graduation party (Use: would you like)

الجواب


Would you like to come to the school graduation party?

الدرس الثامن هم مسلته
الدرس التاسع
بكتاب النشاط تمرين c
مال تعاريف مهم

الدرس العاشر كله مهم وزاري

😂💔 شكراً شكراً

خلي احجي فد شي

اذا ماتعرفني لاتظل تفسر شخصيتي على كيفك وكلساع كايل شي عني 😂💔
اي عمي انه منحرف وموخوش بشر وانسان سيء ومأذي هواي ناس

ماجابرك تجي تحجي وياي لو تعاشرني يااخي ماتوسلت بيك حت تجي تحجي وياي 😂 انه شخصيتي تقريباً مبهمة كل شوية مزاج ف انت مامجبور تجي تحجي وياي والله اريد اسولف وياك من اكلهم انه مو خوش بشر ومنحرف وفاسق وكل الصفات الموزينه بيه يظل يحجي عليه 😂💔 لو يكلي سلمتك بيد العباس( عليه السلام) راح يصكعك وينومك نومه ابدية يابة علواه علواه خل انام نومه ابدية 😂💔 والله شعب ماتصيرله اي چارة
خصم الحچي انه مو خوش بشر لاتعاشروني 😂💔 ونحلت السالفه

اليونت الثالث
Superlative and comparison adjectives
درجات المقاررنه والمفاضلة

راح اشرحها بالتفصيل

المقارنه: هي المقارنه بين شيئين او شخصين

المفاضلة : هي مقارنه بين شخص ومجموعه من الاشخاص او بين شيء وعدة اشياء



الصفه من تكون متكونه من مقطع واحد نظيف er للصفة ف راح تصير مقارنه
وبالمفاضلة نظيف est

مثل

Small➡️smaller بالقارنه
Small ➡️smallest بالمفاضله

Ali is smaller than huda
مقارنه

Ali is the smallest in the class
مفاضلة

.............................................

من تتكون الصفه من مقطع واحد وينتهي بحرف e نضيف بس r بالمقارنه
و بالمفاضله st
مثل
Large➡️larger مقارنه
Large ➡️ largest مفاضله

.............................................


الصفه اللي متكونه من مقطع واحد ومنتهية بحرف صحيح واحد مسبوق بحرف علة واحد نضاعف الحرف الاخير ونضيف er بالمقارنه
ونضيف est بالمفاضله


مثل
Big ➡️bigger مقارنه
Big ➡️biggest مفاضلة


.............................................


اذا الصفه ام المقطع الواحد منتهية بحرف y وقبله حرف صحيح
نقلب ال y الى i ونضيف er بالمقارنه ونضيف est بالمفاضله

مثل

Happy ➡️happier مقارنه
Happy ➡️happiest مفاضلة

.............................................


اذا انتهت الصفه ام المقطع الواحد بحرف y وقبله حرف عله
ف مايقلب ويبقه على حطته ونضيف er بالمقارنه
ونضيف est بالمفاضله


.............................................

اذا الصفه متكونه من مقطعين او اكثر نضيف more قبل الصفه بالمقارنه
ونضيف most قبل الصفه بالمفاضله

مثل
Beautiful ➡️more beautiful
مقارنه
Beautiful ➡️most beautiful
مفاضله

.............................................


زين احنه شلون نعرف هاي الصفه متكونه من مقطعين او مقطع واحد ؟

هذا الشي يعتمد على حروف العله اللي بالكلمة
مثل مانعرف عدنه خمس حروف عله
a,u,i,e,o

زين مافهمنه شتقصد ؟
شوفو نحسب حروف العله اللي بالكلمة
اذا بيها حرف عله واحد ف هاي صفه ام مقطع واحد
مثل nice

زين هسه نايس بيها حرفين عله
i/e

انتبهو حرف ال e اللي بنهاية الكلمة نغلس عنه ونهمله
ف يبقة عدنه حرف i بس

هسه مثال ثاني

Cheap
هاي هم مقطع واحد

اوكف اوكف استاذ انت كلت اذا كلمة بيها حرف عله بالنص وبي بيها حرف e بالاخير ف تعتبر حرف واحد لان راح نهمل ال e

زين كلمة cheap
حرفي ال e / a
موجودات وحده بصف الثانية ف هاي تعتبر ام مقطعين صح ؟

لا بوية غلط هذا الشي والسبب
اذا شفتو حرفين علة واحد ورة الثاني ف نعتبرهن حرف واحد وبكلمة cheap حرفي العلة a,e
واحد ورة الثاني ف يعتبرن مقطع صوتي واحد وكذا بقية الحال
فهمتو ؟
.............................................


من نشوف كلمة than بالجملة ف هاي الجملة بدرجة المقارنه

A bear is ..... than a wolf
(Biggest/ bigger/ big)
ف نختار الصفه اللي بدرجة المقارنه bigger ليش لان عدنه than بالجملة

.............................................

من نشوف قبل الفراغ the
ف الجملة بالتفضيل يعني الصفات اللي تنتهي بدرجة التفضيل
مثل
Who is the ...... student in the school?
( more intelligent/ most intelligent/ intelligent)
نختار الصفه اللي بيها درجة مفاضله most intelligent والسبب عدنه the قبل الفراغ .

اذا مافهمتو كولو

اكو صفات شاذه تحفظونهن 🤦‍♂️💔 كم وحده هنه مو هواي بالكتاب

هاي الطريقة الاولى فوك 👆

هسه الطريقة الثانية اللي موجودة بالكتاب

هسه اجي اطبق حسب القاعدة

A bear is not as fast as lion

A bear = الاسم الاول
Is not = الفعل المساعد
as + الصفه بدون اضافات +as
Lion= الاسم الثاني

هاي الطريقة طريقة المقارنه السلبية 👆👆