يلا بوية نكمل
اليونت السادس

راح يتعلمون التلاميذ شغلات خاصة بالمطبخ
وشلون تسوي اكلات
وشغلات تخليهم امنين بييوتهم

اكو مفردات مثل
Cook يطبخ
Addيضيف
Spread ينشر
Grate يبرش
Peel يقشر
Bake يطبخ..
.
.
. الخ مهم



اكو افعال نستخدمهن حتى ننطي تعليمات مثل
Wash اغسل
Wash your hands
اغسل ايديك

Grate ابرش
Grate the cheese
ابرش الجبن


هسه نجي للكلمات المختصرة واستخداماتهن


Gram غرام
اختصارها
g

نستخدمها لقياس الوزن
.........................


Kilogram كيلو غرام
اختصارها
Kg

تستخدم لقياس الوزن
...........................
Spoon ملعقة(خاشوكه)

اختصارها sp
نستخدمها بالمطبخ للأكل
...........................

Milimetre
مليميتر
اختصارها
mm
نستخدمها لقياس المساحة
................................
Centimeter سنتيميتر
اختصارها
Cm
نستخدمها لقياس المساحة
............................

Metre متر
اختصارها
M

نستخدمها حت نقيس المساحه
...........................

Kilometer كيلومتر
اختصارها
Km
نستخدمها حت نقيس المسافات
.
...............................

#ملاحظه
حسب اللي فهمته من
اليونت السادس واليونت السابع
انو هنه يعتمدان على على المفردات واللغة
وبعض الاحيان ماكو قواعد
واذا اكو فهي متكرره

اكثر شي المهم
اليونت الاول والثاني والثالث والخامس

بوية
اكو بالكتاب هاي الصور اللي بيهن عيون مال طباخ وواحد مخلي رجل على رجل هذا النص مهم كلش ويعتبر وزاري
لان راح يحجي عن الحوادث اللي بالبيت وشلون الجهال يتعرضون للحوادث بالبيت
وشنو انواع الحوادث
وغيرها ف هذا مهم

بوية الصورة اللي بيها بايسكل هم مهم وزاري اللي يحجي عن الدراجه وقواعد ركوبها حت ماتتأذة وزاري هاي هم

والوراها اللي بيها صح وخطأ وبيها سوي دائرة ع الكلمة هم مهم وزاري

يابوية انتبهو
بكتاب النشاط
الدرس السابع تمرين c

اكو انشاء يكول اكتب ملاحظات لأخوك واختك هذا وزاري وحفظ هم


كلتلكم كله حفظ ☹💔 ماتصدكون

بس شوي اقرأ اليونت السابع والثامن واجي

ها بوية رجعنالكم
قريته مابيهن شي قزي بس هلشغلات اللي راح اكتبهن لازم تحفظوهن

اليونت السابع
يحجي عن الحفلات والاحتفالات وكم مناسبة عامة وشلون نسوي بطاقة معايدة وكذا واهم شي هنا هو عيد الام


Mother's day
عيد الام
______________

Teacher's day
عيد المعلم
_______________

Party حفلة
................
Birthday عيد ميلاد
............
New year سنه جديدة
.............
Congratulations التهاني
...............
Presents هدايا
.............
Decorations زينة او ديكورات
..............
Cards بطاقات
............

Pictures صور
..........

Wrapping paper لف الورق
..............

هذا اليونت يعتمد على الحفظ بوية ركزو يعتمد على الحفظ

اكو قطعة بالكتاب الملون باليونت السابع
هيج اسمها يمكن
Marking A Cards
هاي مهم القطعه والاسئلة اللي عليها هم مهمة والورقة اللي وراها مهم

اكو تمرين بكتاب النشاط بس ماجاي اذكر يادرس
مكتوب هيج
Write about a present you are going to buy

هذا مهم كلش كلش


اليونت الثامن مراجعه ماليه شي

بوية خلصنة السادس الابتدائي

و باجر او عكبه ( على ماادور الكتب) نبلش وية
طلاب الثالث متوسط نشروها حت الكل يستفاد

#الثالث_متوسط_يونت_ون_لسن_ون

At the mall.... في مركز التسوق
هذا الدرس راح يحجي عن الشغلات اللي موجودات بالنول مثلاً بيه مصعد وبيه طوابق ...الخ
شوفوا راح تلكون بهذا الدرس كلمات مركبة
بس اول شي لازم تعرفون شنو كلمات مركبة
الكلمات المركبة يعني ندمج كلمتين ذات معنيين مختلفين حت ينطونه معنى واحد مافهمتوا صح ؟
شوفوا
Desk معناها مكتب
Information معناها معلومات
من ندمجهن سويه راح ينطونه معنى جديد
Information desk معناها استعلامات

ص ١٠ بالكتاب العادي لسن ٤ التمرين A بيه كلمات مركبة هذا وزاري التمرين
يعني مثلا ً
1_infornmation 2_air
a_bag b_desk
يكتب بالسؤال match
معناها زاوج او وصل
ف الجواب شلون راح يكون نشوف الكلمة ياهية تناسبها حت تنطينه معنى جديد ف الجواب راح يكون
1_b
2_a
وهكذا
نرجع لموضوعنا اكو كلمات بالمربع الاخضر حفظوهن يفيدنكم
المهم بهذا الدرس اكو وصف الاماكن
Describing places
نستخدم
There is واللي معناها يوجد واللي نستخدمها ويه المفرد
واللي دائماً يجي وياها ادتي التنكير (a/an)
و
there is يمكن تجي بالحالات الثلاث مثبت نفي استفهام مثل
There is a student in the class .
There is not a post office in my city.
Is there an apple on the table?

وكذا وكذا

There are نستخدمها ويه الجمع هنا ماراح نستخدم ادوات التنكير (a/an)
وهم تجي بحالاتها الثلاث مثبت ونفي واستفهام
There are two supermarkets in our town.
There are not five museums in Baghdad.
Are there three markets in your town?

شوفوا اذا شفتوا بالجمله كلمات مثل (any,some,few,lots of )
فهذا الشي يدل على انوا الاسم اللي يجي بعدها جمع ونستخدم there are

#ملاحظه
ادوات التنكير
A ......تجي ويه الكلمات اللي تبدي بحرف صحيح
An....تجي ويه الكلمات اللي بادية بحرف علة

حروف العلة
(a , e ,u ,i,o)

#كفشه

#الثالث_المتوسط_يونت_ون_لسن_تو
Tell time
هذا الدرس يعلمك شلون تكول الوقت
بين قوسين لازم تعرفون الارقام من واحد للستين بالانكريزي
المهم اكو نوعين ذاكرهن الكم
الاول هو العادي واللي ينتهي لحد ساعه ١٢ بليل
مثلا
6:10

هذا توقيت عادي نكول
Six-ten
بالسته وعشرة
اكو بيكم ماخذن half وهلسوالف مال نص وربع وثلث
هذاً مو وزاريات الوزاري جوابه مثل الفوك
المهم هذا النوع الاول سهل

النوع الثاني من الوقت واللي هو ٢٤ ساعه 😐 يسمونه التوقيت العسكري هنا شوي راح تدوخ بيه

17:10
اكثركم مايعرف بيش الساعه اذا هيج شافها ويظل يحسب يد
هنا الحل مالها بسيط وسهل طريقة كلش سهلة
17 - 12 = 5
ف اذاً ال 17 معناها بالخمسة ف تكتب five وشكد وياه عشرة عشرين اي دقيقة تكتبها

مثال ثاني حت تفتهمون
20 :15
20-12=8
ف اذاً عشرين معناها الساعه 8
ف تصير eight-fifteen الجواب مالها


#ملاحظه
اذا شفتوا وقت وبيه صفرين ف تكتبون اوكلوك
20:00
معناها بثمانية ضبط
وسلامتكم واذا مافهمتوا اعيده 😑
ونتعذر على التأخير
#كفشه

#الوصف_المؤدب_للناس


شوفوا مرات مانكدر نطك ططك بطك
مثلا ماريد اكول هذا كسلان
اكول شوي نازل مستواه يراد تحسين لمستواه
يعني خو مااجي اطك طك بطك واكول اليوم لبسك او لبسج مو حلو راح تنجرح المشاعر
ف اكله مثلاً لو لابس كذا لبس جان طلعت احلى


لازم قبل لاتبلشون تعرفون شنو الصفات
الصفات شي توصفون بيه شخص او شي معين
مثلا حلو ، لطيف ، ....الخ هذا وصف وهم طويل قزم هم وصف هذاوغيره

He is lazy
هنا تنجرح مشاعره ويصير عنده كره جبير
ف اكله
He is a bit lazy
هنا خففت من القوة مال الكلمة ومانجرحت مشاعره

نستخدم a bit
اذا كانت بداية الجملة مثبته نخلي قبل الصفه
a bit
حت نخفف من قوتها

والباقيات شوي يضوج شرحهن لازم كدامي يلا افهمكم ياهن





#اعطاء_اسباب


شنو نقصد بهلشي

راح اكول شي وتفهمونه
احنه ليش نروح للمدرسه ؟
الجواب حتى نتعلم
هنا نطينه سبب ذهابنا للمدرسة

اكو تلث عبارات حتى ننطي الاسباب ونكدر نختار وحدوة منهن

So you can/can't +مصدر
To help you + مصدر
So you will/ won't + مصدر

المصدر معناه فعل خالي من اي اضافة
مابيه لا s ولا ing ولاغيره
يعني يرجع لأصله اللي بالبداية مال ولادته


نكدر نستخدم اي عبارة من هذاً حتى ننطي سبب
It is easy to put up so you won't wast time

هيه سهلة النصب ف ماراح تضيع وقتك
هيه سهله هاي ااشغله يعني الشغله سهله ونطانه سبب بأنوا ماراح يضيع وقتنه بتنصيبها
The car has a CD player so you can listen to music.

السيارة بيها مشغل اقراص ف لذلك راح تستمع للاغاني
كال شغله النه بأنوا السيارة بيعا مشغل اقراص
ونطانة سبب بأنوا راح نستمع للاغاني ان شاء الله فهمتوا هاي



بالنسبة للمعاكسات ف معناها شي عكس الثاني
مثلاً
Happy عكسها سعيد sad حزين
Ugly قبيح
عكسها
Beautiful جميل

يعني صفه وعكسها صفه ثاني منافرة الها وغيرها

#كفشه

وراها راح يحجي عن المضارع المستمر والماضي المستمر

سمعليكو 🙂
نرجع نشرح وهية تصفى
بس قبل لا نشرح المضارع المستمر لازم تعرفون شنو معنى (Be) من تجي بالسؤال شنو نقصد بيها
Be
هيه أم 😂 وعدها جهال بالمضارع وبالماضي
جهالها بالمضارع همة 👇🏻
Is
Am
Are
وبالماضي جهالها 👇🏻
Was
Were
بتل بتل متزوجه ثنين😂 المهم

يعني مثلاً يجيكم سؤال صحح الفعل اللي بين قوسين (be)
ف الجواب راح يكون لازم تعرفون زمن الجملة ماضي لو مضارع 😐
She (be)reading novel now
هيه جاي تقرا روايه هسه ( يعني الوقت الحاضر ) اذا الجملة زمنها مضارع مستمر 😂
ف الجواب راح يكون
She is reading novel now
يامحفوظ السلامه ليش اختارينه
Is
والسبب لان الفاعل مفرد 😂
#كفشه

يلا نكمل 😐 بس ملاحظه ترا المضارع المستمر شوي طويل وبيه حبشكلات و اكو افعال ماياخذن ing وراح اشرحهن لاتخافون 🙂


صيغة المضارع المستمر (قاعدته )

S +is,am,are+V(ing)+تكمله
S ...تعرفونه فاعل
Is,am,are .... هذن نسميهن افعال مساعده 😂
V... فعل
Ing .... دلالة الاستمراريه 😐💔


اذا كان الفاعل مفرد
She,he,it, اسم مفرد
ف الفعل المساعد ناخذله ... Is

اما اذا كان الفاعل جمع 😐
We ,they, you
ف الفعل المساعد ناخذله .... Are

اما اذا كان الفاعل
I
ف ناخذله الفعل المساعد
Am


امثله 😂💔
He is playing basketball
هو جاي يلعب كرة سله
يعني جاي يلعب وبعده يلعب 😐💔

They are watching the TV
هم يشاهدون التلفيزيون
#كفشه

راح انطيكم اسأله واحلهن بس قبل لاانطيكم اسأله لازم تعررفون هذا الزمن شلون نعرفه مستمر
١_ من كلمة
Look
معناها باوع (انظر)

٢_من كلمة
Now
معناها هسه 😂(الان)
٣_ من كلمة
Listen
معناها استمع

٤_من كلمة
At the moment
معناها في هذه اللحظه

٥_من كلمة
At the present time
معناها في الوقت الحاضر

اسأله وجوابهن حت تفهمون شنو اقصد
I (be) reading a story at the moment
عرفنه الزمن مضارع وعرفناه مستمر
ف الجواب لازم يكون ك الاتي
I am reading a story at the moment

They (be) watching television now

عرفنه الزمن مضارع وعرفناه مستمر من كلمة now
هسه لازم نعرف الفاعل هنا مفرد لو جمع وانه شرحته فوك اول رساله نشوفه اذا مفرد اله فعل مساعد واذا جمع ف هم اله فعل مساعد
The ..جمع
ف الجواب يكون
They are watching television now
#كفشه

استخدامات المضارع المستمر
١_ عمل يحدث الان ( شي جاي نسويه هسه مثلاً شلون جاي اكتبلكم شرح يعني هذا شي جاي يصير هنا )
مثلا
I am having lunch
انه جاي ازقنب غدة 😂
يعني شي جاي نسويه
مثلا انتوا جاي تتابعون القناة والشرح اول بأول
You are watching step by step channel

الاستخدام الثاني
٢_ حاله مؤقته
راح افهمكم مثلا انتوا ترحون فد سفرة لمكان بالخارج ومالكيتوا شقة حته تسكنون بيها وتالي تتذكرون عدكم قرايب عايش بهاي الدوله وتخابرونه وتكعدونه وياه مدة مؤقته لحد ماترجعون لبلدكم

I cannot find a flat ,so Iam living with my brother
انه مالكيت شقة لذلك حاليا ساكن ويه اخوي بشقته 😂
يعني مدة من الزمن وينطرد 😂
#كفشه

انتبهوا من شغله كلش واكثر اللي يتعلمون انكليزي واللي متعلمين انكليزي يغلطون بيها
وهيه افعال الحس والادراك 😐💔
يعني اكو افعال مايصير نظيفلهن ماعرف نضيفلهن ing
وراح انطيكم الافعاال
Wish ... يتمنى
Want...يريد
Hate...يكره
Prefer....يفضل
Love ....يحب
Like...يحب او يفضل
Know ....يعرف
Believe....يصدق
Imagine...يتخيل
Think...يفكر
Need....يحتاج
Remember....يتذكر
Understand....يفهم
Mean...يقصد
Realize...يدرك
Seem....يبدو
Own....يملك
See....يرى
Hope....امل او رجاء
Suppose....يفترض
Forget...ينسى
Contain...يحتوي
Appear... يظهر
Sound...صوت
Belong...يلائم او ينتمي



راح انطي فد مثال وتفهمون شقصد
He is wanting to buy a new computer 😐💔
هو يريد يشتري كمبيوتر جديد
اقروا الجملة حت من تقروها تحسوها مو حلوة ومو قانونيه 😂
بس لاحظو هاي الجملة
He wants to buy a new computer
نفس المعنى بس اقروها راح تحسونها
حلوة وبمكانها جاية
لان مثل ما كلتلكم
Want
مايصير يجي وياها ing لانها من افعال الحس والادراك 😐💔



اكو شويه خبيصة بسالفه الفعل
Think
اله حالتي واله معنيان 😂(شحلاة الانكليزي اذا ثنين وفوك بس يضيفون s ويصير جمع بس بالعربي تصير رطينه 😂)
المهم
المعني الاول
يفكر think
اذا اجة كلمة think بالجملة وكان معناها يفكر ف هنا نكدر نخلي ing
مثل
I am thinking
انه جاي افكر
والمعنى الثاني يعتقد
يعني اذا اذا اجه بالجملة ومعناه يعتقد
ف مايصير نضيف ing
مثل
I think he is lazy
انه اظن انوا هلشخص كسلان
هنه اجه بمعنى يعتقد 😐 ف مايصير نضيف ing
#كفشه

ياالله توكلنه
#الماضي_المستمر


طبعاً اول شي لازم تعرفون شنو نقصد بهذا الزمن 😐💙
هذا الزمن عبارة عن زمن 😂😂
نستخدمه للتعبير عن حدث صار واستمر بالماضي
مرات يميز هذا الزمن يعني الماضي المستمر ادوات وكلمات مفتاحيه خلشرح هذن اول شي 👇 ووراها الكلمات المفتاحيه ووراها قاعدة هذا الزمن :
While
When


شنو نقصد بهذن الادوات 😐❤
يامحفوظين السلامه هذن نستخدمهن بالماضي من يصير حدث ويجي حدث ثاني يكطعه
خلنحجي بالعاميه
انه جاي اسولف ويه نوير صاحبي واجه حميد جريمة كطع سالفتنه وكال امشوا نروح نشتري ع حسابي 😂

مثال بالفصحى
She was eating when he called her
يعني هيه جانت تزقنب واتصل عليها حت يكلها احبنج كفوشتي 🌚💙 وخلاها تغص
سرسري يكرم الله


المهم
لاحظوا وياي شغله
When
يجي وراها ماضي بسيط
While
يجي وراها ماضي مستمر 🙄
خلفصخه شوي الكم

While John was sleeping last night, someone stole his car
من جان هلولد اللي اسمه جون نايم البارحه،واحد اجه وخمط سيارته

we were eating, when my father came
جنه ناكل، ابوي دخل

لاحظوا
الزمن اللي اجه بنفس جملة while
اجه ماضي مستمر

واللي بجمله
when
اجه ماضي بسيط

مايهم اذا صارت الجملة هيج
when my father came, we were eating
نفس الشي ماتغير التركيب ولا الجمله تغيرت

#كفشه

نكمل سوالفنه مال
#الماضي_المستمر

قاعدته ك الاتي
S+was/were +V(ing)+تكمله
مثل
I was watching the TV
جنت اباوع تلفيزيون

مرات نشوف هذا الزمن مستخدمينه بفترة الماضي بس بوقت محدد يعني حالة مؤقته
مافهمتوا صح ؟
هس افهمكم
I was playing basketball last hour
جنت العب كرة سله الساعه اللي فاتت

يعني فترة مؤقته ماصارلها هواي من صارت


ومرات تلكون بيه استخدامات متكررة
وبشكل دائم
وراح تلكون بيه
Always ... معناها دائماً
Constantly ....معناها بأستمرار

مثل
She was always coming to class late
هيه دائماً تجي متأخرة للصف

I didn't like them because they were constantly complaining

انه ماحبيتهم لان دائماً يتذمرون
يعني يكركون عليه😂

شوفوهن المثال الاول معناها انوا هيه تعودت وصار بشكل دائم تجي متأخرة للصف
مثلي انه هم جنت هيج واكول ازدحام 😂
والثاني هم كذالك
لان همه يكركون هواي يوميه يوميه



#انتبهوا
افعال الحس والإدراك مايجن ويه الماضي المستمر
وانما يجن ويه الماضي للبسيط والماضي التام


واذا مافهمتوا كولوا

#كفشه