بعد جبدي حميد 🌚😂
انوب حط هاشتاك جوا منشورك احسن 😂
#فراتي

راح اعوف اليوم 😐 مااشرح
حت تطبقون ع المضارع البسيط بالنفي والمثبت والاستفهام


باجر الصبح اشرحه للمضارع المستمر بحيل الله
#كفشه

للمرة الرابعه على التوالي وان شاء الله مستمرين
زيارة نجف كربلاء
ركضه اطويريج
احياء ليله ١١ بين الحرمين
باجر الفجر ب٤:٣٠ متوكل ان شاء الله 🌚❤️
ديرو بالكم ع القناة لحد ما ارجع

توصل بالسلامة وزيارة مقبولة اوصيك بالدهينه وحبشكلاتها
والدعاء ولوا ادري الدعاء مالك مايوصل لراس الشارع بس حاول 😂
#كفشه

الله يسلمك 😂 كلشي ماجيبلك انجب
راح ادعي عليك لان انه دعائي ينقبل بالمكلوب 😂

جاي اشرح المضارع المستمر بالرسائل المحفوظه ولكيت كم مفردة حبيت اشاركهن الكم 🙂

Keep ... يحافظ
Keep calm.... حافظ على هدوئك



Lunch....غداء
Dinner....عشاء

She is having dinner
انها تتزقنب العشاء (سم وزقنبوت)

Onion..... بصل 😂
Eggplant.... بيتنجان والبعض يسميه بيذنجان 😂


Tornado.... اعصار

#كفشه

سمعليكو 🙂
نرجع نشرح وهية تصفى
بس قبل لا نشرح المضارع المستمر لازم تعرفون شنو معنى (Be) من تجي بالسؤال شنو نقصد بيها
Be
هيه أم 😂 وعدها جهال بالمضارع وبالماضي
جهالها بالمضارع همة 👇🏻
Is
Am
Are
وبالماضي جهالها 👇🏻
Was
Were
بتل بتل متزوجه ثنين😂 المهم

يعني مثلاً يجيكم سؤال صحح الفعل اللي بين قوسين (be)
ف الجواب راح يكون لازم تعرفون زمن الجملة ماضي لو مضارع 😐
She (be)reading novel now
هيه جاي تقرا روايه هسه ( يعني الوقت الحاضر ) اذا الجملة زمنها مضارع مستمر 😂
ف الجواب راح يكون
She is reading novel now
يامحفوظ السلامه ليش اختارينه
Is
والسبب لان الفاعل مفرد 😂
#كفشه

يلا نكمل 😐 بس ملاحظه ترا المضارع المستمر شوي طويل وبيه حبشكلات و اكو افعال ماياخذن ing وراح اشرحهن لاتخافون 🙂


صيغة المضارع المستمر (قاعدته )

S +is,am,are+V(ing)+تكمله
S ...تعرفونه فاعل
Is,am,are .... هذن نسميهن افعال مساعده 😂
V... فعل
Ing .... دلالة الاستمراريه 😐💔


اذا كان الفاعل مفرد
She,he,it, اسم مفرد
ف الفعل المساعد ناخذله ... Is

اما اذا كان الفاعل جمع 😐
We ,they, you
ف الفعل المساعد ناخذله .... Are

اما اذا كان الفاعل
I
ف ناخذله الفعل المساعد
Am


امثله 😂💔
He is playing basketball
هو جاي يلعب كرة سله
يعني جاي يلعب وبعده يلعب 😐💔

They are watching the TV
هم يشاهدون التلفيزيون
#كفشه

راح انطيكم اسأله واحلهن بس قبل لاانطيكم اسأله لازم تعررفون هذا الزمن شلون نعرفه مستمر
١_ من كلمة
Look
معناها باوع (انظر)

٢_من كلمة
Now
معناها هسه 😂(الان)
٣_ من كلمة
Listen
معناها استمع

٤_من كلمة
At the moment
معناها في هذه اللحظه

٥_من كلمة
At the present time
معناها في الوقت الحاضر

اسأله وجوابهن حت تفهمون شنو اقصد
I (be) reading a story at the moment
عرفنه الزمن مضارع وعرفناه مستمر
ف الجواب لازم يكون ك الاتي
I am reading a story at the moment

They (be) watching television now

عرفنه الزمن مضارع وعرفناه مستمر من كلمة now
هسه لازم نعرف الفاعل هنا مفرد لو جمع وانه شرحته فوك اول رساله نشوفه اذا مفرد اله فعل مساعد واذا جمع ف هم اله فعل مساعد
The ..جمع
ف الجواب يكون
They are watching television now
#كفشه

استخدامات المضارع المستمر
١_ عمل يحدث الان ( شي جاي نسويه هسه مثلاً شلون جاي اكتبلكم شرح يعني هذا شي جاي يصير هنا )
مثلا
I am having lunch
انه جاي ازقنب غدة 😂
يعني شي جاي نسويه
مثلا انتوا جاي تتابعون القناة والشرح اول بأول
You are watching step by step channel

الاستخدام الثاني
٢_ حاله مؤقته
راح افهمكم مثلا انتوا ترحون فد سفرة لمكان بالخارج ومالكيتوا شقة حته تسكنون بيها وتالي تتذكرون عدكم قرايب عايش بهاي الدوله وتخابرونه وتكعدونه وياه مدة مؤقته لحد ماترجعون لبلدكم

I cannot find a flat ,so Iam living with my brother
انه مالكيت شقة لذلك حاليا ساكن ويه اخوي بشقته 😂
يعني مدة من الزمن وينطرد 😂
#كفشه

انتبهوا من شغله كلش واكثر اللي يتعلمون انكليزي واللي متعلمين انكليزي يغلطون بيها
وهيه افعال الحس والادراك 😐💔
يعني اكو افعال مايصير نظيفلهن ماعرف نضيفلهن ing
وراح انطيكم الافعاال
Wish ... يتمنى
Want...يريد
Hate...يكره
Prefer....يفضل
Love ....يحب
Like...يحب او يفضل
Know ....يعرف
Believe....يصدق
Imagine...يتخيل
Think...يفكر
Need....يحتاج
Remember....يتذكر
Understand....يفهم
Mean...يقصد
Realize...يدرك
Seem....يبدو
Own....يملك
See....يرى
Hope....امل او رجاء
Suppose....يفترض
Forget...ينسى
Contain...يحتوي
Appear... يظهر
Sound...صوت
Belong...يلائم او ينتمي



راح انطي فد مثال وتفهمون شقصد
He is wanting to buy a new computer 😐💔
هو يريد يشتري كمبيوتر جديد
اقروا الجملة حت من تقروها تحسوها مو حلوة ومو قانونيه 😂
بس لاحظو هاي الجملة
He wants to buy a new computer
نفس المعنى بس اقروها راح تحسونها
حلوة وبمكانها جاية
لان مثل ما كلتلكم
Want
مايصير يجي وياها ing لانها من افعال الحس والادراك 😐💔



اكو شويه خبيصة بسالفه الفعل
Think
اله حالتي واله معنيان 😂(شحلاة الانكليزي اذا ثنين وفوك بس يضيفون s ويصير جمع بس بالعربي تصير رطينه 😂)
المهم
المعني الاول
يفكر think
اذا اجة كلمة think بالجملة وكان معناها يفكر ف هنا نكدر نخلي ing
مثل
I am thinking
انه جاي افكر
والمعنى الثاني يعتقد
يعني اذا اذا اجه بالجملة ومعناه يعتقد
ف مايصير نضيف ing
مثل
I think he is lazy
انه اظن انوا هلشخص كسلان
هنه اجه بمعنى يعتقد 😐 ف مايصير نضيف ing
#كفشه

خلص 😐💔 هاي الشرح حسب اللي اذكره وراح اشوفلي كتاب شي هم اقراه واشوف خاف ناسي شي منا منا
صدك تردون انطيكم الفرق بين المضارع البسيط والمستمر ؟
#كفشه

الشرح فوك حاولوا تطبقون عليه منا لباجر لهيج وقت
ماراح اشرح لحد ماتخلصون تطبيق
بس راح انشر مفردات وحبشكلات
#كفشه

هاي اكو كلمتين من ندمجهن سوية ينطنه معنى ثاني جديد 😋❤
حبيت اشاركهن الكم وهم خوش مفردات
#كفشه

😂 استاهل نوت 8 منكم على هلشرح يكرم الله 😂😂
#كفشه

بس نبههم اللفظ مال الكلمات يختلف ورا ما ندمجهن

انتبهوا للنوت 8 من تجيبونه كلولي 😂
قصدي انتبهوا ع اللفظ

صدك اللي عنده قناة خاصه بيه ومشترك بقناة التعليم مالتنه
خل يدزلي معرف قناته حته ااشترك بيها 😂
#كفشه

هاي حبشكلاي جديدة هم تكدرون من كلمة وحده تطلعون طن مفردات
#كفشه