كضابة يا زيف الدقون..
كضابة دعامة البلد..
كضابة افراد الجهاز ..
كضابة كيزان البلد..
كضابة ترباس السجون..
كضابة سيطان العنج..

يا الثورة شارعك لن يخون و الثورة فينا الي الابد..💚
ويل لقاضي الارض من قاضي السماء
#الشاااااااااااارع_بس

ماشه وبتسأل في خلايق الله
وليدي ي ناس ماشفتوهو
طويل ونحيل
بلون اسمر
ولابس كارهاوات أخضر
كان جو القيادة هنا
حارس ترسو متحكر
ما شفتهو
يكون يا ربي كتلوهو؟؟؟؟
والا يكونو دفنوهو.؟؟؟
والا يكونو
حبسوهو ؟؟؟؟
والا كمان
في مويه النيل دي جدعوهو ؟؟؟
وليدي ي ناس ما شفتوهو
غلبني انوم
غلبني احوم
غلبني أقوم
خلاص حيلي اتهدا
بقول باكر يجيني خبر
وعاد ما طالت المدة
بس عشمان في شوفتو
بفتش يومي كل فجه
لا عارفك حي ترزق
ولا عارفك كن متا
وحاتك قلبي اتقطع
ومافضل لي فيو حته
حشاي اتا
وغتاي اتا
وجناي اتا
وضراي اتا
وين غبتااا. ؟؟؟؟؟؟
#مفقودي_مجزرة_القياده

نقلاً عن ناظم سراج

المؤكد حتى الآن
٥ مصابين في أمدرمان
واحد برصاصة مطاطية تم إسعافه ولم ينقل للمستشفى
والأربعة الآخرين إسعفوا إلى مشفى حكومي
الأول مصاب بطلق ناري في أسفل الساق اليسرى
والثاني بضربة عصا
والثالث والرابع إختناق بسبب الغاز المسيل للدموع

الخرطوم
٣ مصابين
الأول مصاب بعبوة غاز مسيل للدموع في الساعد الأيمن.. أدى لكسر وتم عمل جبيرة للساعد.. وفي إنتظار رأي الإختصاصي لتحديد ما إذا كان في حوجة لتدخل جراحي
الثاني سقط على يده اليمنى.. وأصيب برضوض بسيطة.. وهو بخير والحمد لله
والثالث في اليد اليسرى.. سبب الإصابة غير معلومة.. والمرجح عبوة غاز مسيل للدموع.. أدت لكسر وفي إنتظار الإختصاصي لتحديد ما إذا كان في حوجة لتدخل جراحي

شرق النيل
مصاب واحد بعبوة غاز مسيل للدموع في اليد اليمنى.. تم إسعافه إلى مشفى خاص.. وهو بخير والحمد لله وخرج إلى المنزل

عن مبادرة حاضرين

هناك حاله نفسية تدعي “Alexithymia” المصاب بها يعجز عن وصف شعوره أو توصيل ما يحس به للآخرين، وقد يصل لدرجة أنه هو بنفسه لا يعلم ما يشعر به .!💛

ديل أطفال ياخ 💔 حَسبُنا الله ونِعم الوَكيل

شهيدٌ يعقبه شهيد ، أيا وطني أما كفاك كل هؤلاء مهراً لحريتك؟💔..

#الأبيض_تنزف..

لجنة أطباء السودان المركزية

عـاجل

ارتقى قبل قليل خمسة شهداء إثر إصابتهم إصابات مباشرة برصاص قناصة بمدينة الأبيض بعد خروجهم في موكب الثانويات السلمي.
١- الشهيد: أحمد عبدو عبد القادر
٢- الشهيد: حسان سعد
٣- الشهيد: محمد الفاتح
٤- الشهيد: بدر الدين عبد الله اسماعيل
٥- الشهيد: أحمد عبد الكريم (مواطن)

كما يوجد عدد كبير من الإصابات بعضها حرجة سنوافيكم بتفاصيلها لاحقاً.

#الالتزام_باعلان_الحريه_والتغيير
#مواكب_انتقال_السلطه

إعلام اللجنة
٢٩ يوليو

‏أطفال شايلين سلاح بقتلوا في أطفال شايلين اقلام💔
#الأبيض_تنزف

إرتقاء طالبة شهيدة سادسة 💔
#الأبيض_تنزف

صباحات الوجع والهم
يقوم مبسوط علي درسو
يلاقي دروسو حصة دم!!💔
#الابيض_تنزف

نبني لمنو إحنا، نبني بس لشنو 💔
يا الله من الوجع

‏وفي يوم شديد البأس والدنيا مقلوبة
مجبور رمى الكراس دنقر رفع طوبة
شاف لحية القناص بي دمو مخضوبة
تمتم قرأ الاخلاص.. كتب الكلام بالدم.. طلع القمر بوبا
‎#الأُبيض_تنزف

دين الامن و دين ابوطيره
دين الشرطه و دين العسكر
ودين الناس البايعه ضميرا
نفس الدين النزلو الله؟جوه المصحف و كتب السيره؟؟؟

الأطفال يا فَاطمة يموتوا والأحلام باقيالُهم مَصرع💔
#الأبيض_تنزف

لجنة أطباء السودان المركزية

عــاجل

ارتقاء الشهيد يونس قبل قليل من داخل العناية المكثفة متأثراً بجراحه، نتيجة الإصابة بطلق مباشر في الصدر، ليرتفع عدد شهداء مجزرة الأبيض لستة شهداء.

#الالتزام_باعلان_الحريه_والتغيير
#مواكب_انتقال_السلطه

إعلام اللجنة
٢٩ يوليو

آخر تحديث لقائمة المصابين والشهداء بمستشفى الأبيض.
#مجزرة_طلاب_الأبيض

ياخوانا في كلام حار بس لازم يتقال يعني !

الناس دايرة قحت تعمل شنو..؟!

المواجهة حاليًّا بين المجتمع المدني بمختلف أطيافه ضد المجلس العسكريّ البيمثل الأجهزة الأمنية المختلفة ، يعني الناس الما عندهم سلاح ضد الناس عندهم سلاح

أدبيات العمل السلميّ في الفكر السياسي بتؤكد أنو عنده حدود بيقيف فيها ، الثورة السلمية القايمة على المظاهرات والإضرابات النقابية ممكن تنتج إصلاحات سياسية من توسيع لمجال الحريات أو تسريع الانتخابات أو غيرا ، وممكن تسقط نظام لو الجيش انحاز ليها بحكم أنه مجال ضغطها الأساسي هو المجتمع المدنيّ ، لكن أصلًا ما بتسقط مجلس عسكريّ

الجنرال بينوشيه في تشيلي انقلب على الرئيس المنتخب ديمقراطيًّا آلندي ، فدورت اضرابات ومظاهرات وكده ، لكن بسبب أنو الجيش كان فاسد وبسبب الدعم الأمريكي للانقلاب بينوشيه بلّ النقابات والمتظاهرين وقتل 40000 نفر وقمع المجتمع المدني كلهّ وماتت الثورة بعدا ، الخميني في إيران ثورته كانت ضد مدنيّ اللي هو نظام الشاه لكن بسبب أنو الطابع بتاع الحكم كان معسكر بالجيش وبجهاز الأمن الساڤاك فكان اشبه بنظام عسكريّ -خاصة بعد ثورة مصدق في الخمسينات-، فالثورة نجحت بعد لجان الأحياء حقتم واللي بقا اسمها الحرس الثوري مشت هجمت على ثكنات الجيش والسافاك والثورة بقت عنيفة ومسلحة وقتلوا قيادات في الجيش وعساكر ساي واعتقلوا جزو ، صحيح السياق العالميّ حاليًّا مختلف حبتين في درجة تأثير السلمية على الأنظمة الحاكمة لكن برضو ما حيصل مرحلة عساكر يسقطوا بالسلمية

نحن عندنا ثلاثة أجهزة كلها على قلب مجلس واحد حاليًّا ، وبحكم أنها ما مدنية وعندها عقيدة ووجدان مصاغ بطريقة معينة فالموت والاضرابات والرفض السياسيّ ما بيفرق معاها أصلًا ، كيف سلميتنا حتقدر عليهم وحتسقطم ، ولا هو نحن حنردد الشعار ده بدون ما يكون في راسنا سيناريو واضح للبيحصل

الناس الدايرين قحت توقف المفاوضات بعدا ماف حل غير الثورة المسلحة ، لكن في ظل ظروفنا دي هل نحن حنقدر على تكلفة الحاجة دي ، وهل في احتمالية أننا ننجح ضدهم فعلًا..؟!

وقف ااتفاوض نهائيًا بين قحت والمجلس العسكريّ ممكن يكون موقف بطولي شديد وأخلاقي للعوارة ، بنفس بطولية عبدالرحمن النجوميّ وهو بيقود سرية صغيرة فيها أطفال ونساء وداير يفتح بيها مصر ، وبطولية عبدالله التعايشيّ وهو بيقود الأنصار في أم دبيكرات ضد الإنجليز الغزاة ، لكن صعب نقول أنو هو الموقف الصحيح والبيحقق المصلحة الأعمّ

أنا ياخوانا ما عندي رأي ولا شايف ممكن نعمل شنو بسبب جهليّ الشديد ، في أسئلة كتيرة قدرتا أجاوبا من القراية زي الجاوبتها فوق دي ، لكن كل ما افكر في سيناريو بتجيني أسئلة كمية بتحول بيني وبين القرار ، فكروا أنو قحت بتمر بنفس الأسئلة دي واحتمال هي دايرة مصلحتنا فعلًا ، المسارعة في التخوين ده داء ضار جدّا

قحت بلداء وفيهم لوثة أنانية وأمراض السياسة القديمة ، لكن ده ما بيعني أنهم خونة وبيتجاروا بالدم ، لمن نحن ننتقدم مفروض يكون عندنا تصور لأنو نحن دايرين منهم شنو ما بس زول ديرين نلقي عليو اللوم

والله أنا لمن أفكر في أنو لو محلهم حاعمل شنو ، بحسهم في وضع لا يحسدون عليه ، لو عندك موقف أحسن من موقفم قوله وأشرحه بدل ما نرمي زعلنا فيهم بدون واقعية

والله المستعان
#منقووول