نحن مرقنا ما شأن رَبَّه
قلنا نشوفوا حَقَّنا وين
وقلنا نجيب بلدنا الزاهي
بعد الويل .. يضوِّي حنين
وبكرا تفوت ليالي الكُبَّه
يبقى عرسنا عرس الزين
وحبل الكضبة حبلا واهي
سيدو منو البيملا العين؟

#موكب26مارس
#مدن_السودان_تنتفض

" فَمَا ظَنُّكُم بِرَبِ العَالمين" ♥️

بي عطش لا يرويه إلّا أنت، أنت ماء قلبي والقلوب لا تَعرف التيمم يا نبض، أما أن ترتوي بمن تحب أو تَعطش حتى تجف
_ أدهم شرقاوي ♥️

بُكرة المَوكب ♥️🇸🇩
#موكب28مارس

كُل خَاطِر كان بِريدك ، إلَّا ريدِك كَان رَسول الدَّهْشَة فِي كُل الدِيار ❤️

الأطْفال يا فَاطمة بغنوا الأفراح لابُد مِن تَرجع، الأحلام الدُّونك فَاتت لَو واصلْنا صَباحها بيطلع ♥️🇸🇩✨
#موكب28مارس

السلام عليكم شباب ..


قبيل انا واصحابي زرنا أسرة الشهيد عبدالعظيم ربنا يتقبلوا قبول حسُن إن شاء الله ...
ناس بسيطين لدرجه بعيده إتونسنا مع والدو زول بشوش وفاهم .. راكز ماشاء الله من شافنا اول حاجه خش فينا احضان واتفضلوا وجيبو الشاي ..
والله نحنا خاشين عليهم الواحد مننا م كان عارف إنو ح يقول شنو او يتكلم كيف او يعبر بشنو بدون م يقلب المواجع عليهم .. حاجه كدا كانت تقيله على قلوبنا .. والد الشهيد كان بكسر الحاجه دي بإنو يبادر ويتكلم بمواضيع كتيره ..
قالي ياولدي انا والله عبدالعظيم دا كان شخصيتو براو مختلف عن كل اولادي .. كان خصوصيتو عندي ليها مكانه براها الصفات الفيو صعبه تتلقي عند غيرو ..
قلت ليو كيف قالي عبدالعظيم دا كان شخصيتو قياديه .. وزول حنيتو شديده .. فجاءة سكت وسرح بعيد .. !

قلت ليو يا ابوي كلنا اولادك وكلنا عبدالعظيم ..
قالي انا فقدو وجعني لكن وقفة الشباب والناس الجوني والإتصلو لي من جوه السودان وبره السودان خففت علي الفقد ..
كل مره بجو شباب زيكم كدا بزوروني بحسسوني انو كلهم عبدالعظيم .. والحمدلله ولدي إستشهد عشان يقدم للناس حياة أفضل وعيشه أحسن ..

"البلد دا جميل وحضارتو كبيره .. الوطن ماشيء هين يا اولادي وانا في سبيل انو الناس تاخد حريتا وتكون في دوله فيها عداله مستعد أقدم اولادي كلهم عشان الحاجه دي والحمدلله"

زياراتكم دي يا اولادي بتبسطني شديد وكل م اتذكر عبدالعظيم أتذكر انو اخوانو كتار .. والحمدلله الناس بقت واعيه..
ـــــــــــــ
والد الشهيد كان بتكلم وهو مبسوط من البت الجات من نيالا عشان تعزيهو في الشهيد ولمن قربت للبيت لقت انو في موكب عمال طوالي مشت الموكب وجاتو زياره ..

في اثناء كلامو معانا ذكر لينا امنية انو نفسو يلاقي الولد الصور الفيديو .. الكان بجري وبقول "كتلو .. وببكي بحرقه"

"لانو والله جزاو عندي كبير" .. (حسب قولو)
ــــــــــــــــــــــــــــــــــ

والد الشهيد كان صابر والله وبصبر فينا اكتر من مواساتنا ليو .. في كلمات كانت مؤثره بقول فيها وبقوينا بيها بتخليك براحه تدنقر راسك وتمسح دمعتك من غير يشوفك ..
حتى لمن هو يسكت من الكلام وياخد ليو سرحه كدا م بتقدر ترفع راسك تشوفو تخاف تشوفو يدمع ..

الزياره كانت بسيطه م إتعدت النص ساعه لكن الأثر الفيها كان قوي جداً فينا وفيهم وجملة "كلنا اولادك" بتفرح أسر الشهداء شديد .. فالحمدلله على كل حال.

ماتنسوا زيارة الناس دي وقدموا البتقدروا عليهو معنوي او مادي وربنا يجزانا ويجزاكم #سقوط_النظام
ـــــــــــــــــــــ

يمة الوطن ضايع
كايس خطاوي شليل
و شليل مشى الشارع
سايق مهيرة معاو
لي حقو بيصارع
لا بخاف من الطلقة
لا الارزقي الطامع
مهما الظلم طول
فجر الخلاص طالع🇸🇩

#مدن_السودان_تنتفض
#موكب٢٨مارس
#موكب٦ابريل
#سلمية

📌الجمعة ٢٩ مارس دي نشوف أي حي في أي مدينة البستلم الرصة والمنصة ويتوج نفسو ملك الغنجات، المكرفونات والأعلام تتصبن بدري، ٣ جوامع في الحي بتتجازف عادي، وقام بالضلام.