: 🎶 شـــــغَف🖤

Forwarded from Abla m.ä

اليوم 23/12/2018
المكان استاد الهلال امدرمان
الزمان الساعه ٩ مساء
الكوره خلصت ومافي اي شي حصل لسا
في اتنين شجعان بدو الهتاف الشعب يريد اسقاط النظام
في اتنين خشو معاهم الصوت على اكتر
في لحظات بسيطه كل المدرج هتافو زاد والصوت بقى اعلى
لحظه تانيه نص الاستاد بدا يهتف
الابطال طلعو الشارع العدد كبر
من استاد الهلال لشارع العرضه الهتافات اكتر والعدد زايد
وصلنا شارع الاربعين واتجهنا على شارع السلاح الطبي
العدد ماشي في زياده
ما اقدر اوصف ليكم كميه الحماس والطاقه الكانت في
الصوت كان واحد وعالي وبتسمع على بعد .. و ماشين وسط زغاريد النسوان و بشّير الاعمام الكبار ..
يعني والله ما شفنا مخرب وااحد في المظاهرة دي ياخي كانو اغلبيتهم شباب ب درجة وعي عالية جدا ياخي حتى الاطفال البجو كانو برجعوهم من المظاهرة ..
كنا شعب واحد واحساس الفخر لاول مره ب بلدك وب اخوانك المعاك كل زول بيوجه الجنبو وكل زول خايف على كل المعاهو وكلنا بصوت واحد نحن جند الله جند الوطن
وعلم السودان مرفوع فوق
ااااخ ياخ من الاحساس والله فاااااااتكم
والحمدلله على كميه الرضا والفرح الحاسينو الليله

ووصلنا السلاح الطبي وما ادراك ما السلاح الطبي وقفنا في الصينيه وفي لحظه جو ناس الامن والغريبه انو طول الطريق ما ظهرو وقلنا دا شرك بعد عايزين نخش الكبري
بدو يضربو البمبان الناس جرت راجعين جزو خش بانت شرق وجزو خش السلاح الطبي
ومن هنا اكبر تحيه للجياشه ما قصرو والله تب وتسلم البطن الجابتهم دخلونا السلاح ومنعو ناس الامن والشغب يخشو لينا
لدرجه علت اصواتهم وفي ضابط جيش ياسللااام عليهو قال لعساكرو السلاح الشايلنو دا شايلنو شكل ؟؟ اضربو نار في اي زول يجي من الشرطه ولا الامن خاشي السلاح ومافي زول من الشباب ديل يطلعوهم بره
مع انو في بمبانين اتضربو جوه الباركنق بتاع السلاح
ولا راعو لعيانين ولا مرافقين ولا انو المنطقه تابعه للجيش
شويه شويه المتظاهرين طلعو بعربات الخاصه ماقصرو معانا الشباب كلهم والله شكرا ليكم
وماننسى الناس الكانت بتدعي لينا والله دعوااااتكم وصلتنا والله انتصرنا وكان يوم والله للتاريخ
مافي زول مننا حاينساهو كان من اجمل ايام حياتنا والله
في النهايه عايز انبهكم بتمنى انو الناس ماتنشر اي بوست الا تتاكد منو مع انو عارفين نيتكم صافيه بس برضو الناس تعمل حسابها وتتاكد

تحيه ل اولاد امدرمان ولمشجعين الهلال
وتحيه خاصه للاربعه الشباب الولعو الشراره
والله ابطال

ربنا يحفظ بلدنا وشعبنا وان شاء الله تكون سنه جديده كلها خير وبركه ويسر على الناس
لانشوف جيعان ولا عيان ماقادر ياكل ولا يتعالج

ويرحم شهدائنا الابطال ونهدي لاهلهم اليوم دا وما كفيناكم ولا وفيناكم حقكم
واي زول اتضرب الليله ولا اعتقلوهو بقول ليهو الطلقه ما بتقتل بقتل سكات الزول
و كنت راجل شجاع
#مدن_السودان_تنتفض

1 viewMuzan Lutfy, 07:53