Никарагуа ахада Даниель Ортега агәыӷра ааирԥшит Урыстәыла "Украина зԥашә зышьҭыз афашизм" ишаиааиуазы.

Никарагуатәи арбџьармчқәа раԥҵара 45 шықәса ахыҵра иазкыз, Преоброжентәи аполк злахәыз ауснагӡатә аҿы Ортега иажәахә аҟны иазгәеиҭеит 1979 шықәсазтәи ареволиуциа ашьҭахь ар реиҿкаараҿы атәыла ишацхрааз Асовет Еидгыла.

"Иахьа ҳара апарад аҿы иаабоит усҟантәи аамҭазы иҳамаз абџьар, иахьатәи аамҭа иақәшәо абџьар, избанзар Урыстәыла аиашьа иаҳзаҩызоу тәылоуп, никарагуатәи ажәлар ирыдгыло тәылоуп", — иҳәеит Ортега.

Аԥсны адәныҟатәи аусқәа рминистр Сергеи Шамба Урыстәыла иҟоу Аԥсны ацҳаражәҳәаҩ Алхас Кәыҵниа диԥылеит.

Дара алацәажәеит аԥсны-урыстәылатә усеицура, иара убасгьы асоциалтә ҳақәа рҿы икьыԥхьу, Урыстәыла ахада Иусбарҭа анапхгаҩы ихаҭыԥуаҩ Дмитри Козаки Аԥсны ахада Аслан Бжьаниеи реилацәажәараҟынтә ишьақәырӷәӷәам аматериалқәа ҳәа аанацҳауеит аусбарҭа.

Афото © Аҧсны АдәАР

Ҩ-маининг-фермак аадырԥшит Аҟәа ҳәа аанацҳауеит Аԥсны АҩАР.

▪️Акриптовалиута арҳаразы 7 аппаратк рбеит Лагәлаа имҩаҿы игылоу аҩны №2А аспорттә зал аҟны. Аԥшәма Анжела Казариан лганахьала административтә материал шьақәыргылоуп.

▪️3 "машьынкак" Анри Саӡба иҩнаҿы, Гәымсҭатәи аиланхарҭа аҩ. №7 аҟны иаарԥшуп. Саӡба административтә ҭакԥхықәра иқәҵоуп.

Авидео © Аҧсны АҩАР

Сынтәа жә-нызқь гектар аџьықәреи лаҵоуп Аԥсны, 15 нызқь тонна аҽаҩра иазыԥшуп иҳәеит ақыҭанхамҩа аминистр Беслан Џьопуа, арадио Sputnik Аԥсны аинтервиу анеиҭоз.

Иара иажәақәа рыла, абжьааԥны аҽаҩра 18-19 нызқь ҟалалон, аха сынтәа алапҟьа иаԥырхагоу ахәаҷа, урысшәала иуҳәозар "кукурузная совка", ахьцәырҵыз азы аҽаҩра еиҳа имаҷхеит.

Аминистр инарҭбаау иҿцәажәара шәазыӡырҩыр шәылшоит абра.

Аԥсны афинансқәа рминистрра иҭнаҵаауеит урыстәылатәи рколлегацәа афинанстә ресурсқәа рликвидра анапхгараҿы ирымоу аԥышәа ҳәа арадио Sputnik апрограмма "Атәылауаҩи аиҳабыреи" иазеиҭеиҳәеит аминистр ихаҭыԥуаҩ, ахазынаҭра аиҳабы Саид Гәбаз.

"2023 шықәсазтәи арбагақәа ртәы ҳҳәозар, Урыстәыла абиуџьет иахыԥхьаӡалоуп 600 миллиард мааҭ инеиҳаны, аликвидра (абиуџьет зых иақәиҭу ацәынха) ахархәарала дара идырҳаз", — ҳәа иҳәеит иара.

Уажәы аԥснытәии урыстәылатәии аганқәа еиқәдыршәоит аинырраз амҩақәҵага. Иазԥхьагәаҭоуп аиԥыларақәеи асеминарқәеи рымҩаԥгара аликвидра анапхгараҭара амеханизм аҭҵааразы ҳәа иҳәеит Гәбаз.

Иԥсҭазаара далҵит ауаажәларратәи аполитикатәи усзуҩ, Аԥсны Афырхаҵа Альберт Тополиан ҳәа аанацҳауеит ареспубликаҿ иҟоу аерман уаԥшь.

Иара 89 шықәса ихыҵуан.

📎 Альберт Тополиан диит мшаԥы 2 1935 шықәсазы. Аԥсны амилаҭ-хақәиҭратә қәԥара аветеран, 1992-1993 шықәсқәа рызтәи Аԥсны жәлар Рџьынџьтәылатә еибашьра алахәыла, Баграмиан ихьӡ зхыз аерманцәа рбаталион аерманцәа рбаталион аибашьҩы. Аибашьра ашьҭахь Апарламент аиҳабы ихаҭыԥуаҩс, аиҳабыра рхада ихаҭыԥуаҩс дыҟан.

Тополиан еиуеиԥшымыз ашықәсқәа рзы Аԥсны Иреиҳаӡоу асовет ахантәаҩы ихаҭыԥуаҩ, Атәылахьчараз аҳәынҭқарратә еилакы ахантәаҩы ихаҭыԥуаҩ, Жәлар реизара аиҳабы ихаҭыԥуаҩ, аԥыза-министр ихаҭыԥуаҩ, Ауаажәларратә палата амаӡаныҟәгаҩ ихаҭыԥуаҩ.

Альберт Тополиан — "Ахьӡ-Аԥша" аорден II аҩаӡара ианашьоуп.

Аԥсуа милаҭтә хәмарра "Аимҵакьачара" иазку ареспубликатә жәларбжьаратәи аицлабраҟны еиндаҭлоит жә-командак.

Ахәмарра аԥҟарақәа рыла, акомандақәа ркаԥданцәа лабала аҽхәыцмпыл иасуеит. Убри аан уи ампыл досу икомандахь иршәроуп. Ампыл зкыз деиханы амбанӡа днаӡароуп егьи акоманда алахәылацәа дрымпыҵамшәакәа.

🖇Аԥсуа милаҭтә хәмарра "Аимҵакьачара" иазку жәларбжьаратәи аицлабра аартит Аҟәа. Атурнир цәыббра 6 рҟынӡа имҩаԥыслоит. Аиҿкааҩцәа: Адунеизегьтәи аԥсуа-абаза конгресс, Аԥсадгьыл ахь ахынҳәразы аилак, Аԥсны аҿари аспорти русқәа рзы Аҳәынҭеилакы.

Гәылрыԥшь араион Маҷара ақыҭан зыԥсадгьыл ахь ихынҳәыз аҭаацәарақәа рсиа шеиқәдыршәоз еиҭеиҳәеит Аԥсадгьыл ахь ахынҳәраәы аҳәынҭеилакы асоциал-бзазаратә ҟәша аиҳабы Алиас Нанба.

Раԥхьа иргыланы ҳзызхәыцуаз — ахәыҷы рацәа змоу, аиаҭымцәа, аибашьра аветеранцәа рҭаацәарақәа роуп иҳәеит Нанба.

🖇 Гәылрыԥшь араион Маҷара ақыҭан зыԥсадгьыл ахь ихынҳәыз 24 ҭаацәара ауада ҿыцқәа рцаԥхақәа роуит. Анхарҭа ҭыԥқәа зауа рсиаҿы иҟоуп зыԥсадгьыл ахь ихынҳәыз 380 ҭаацәара.

Авидео © Аԥсуа телехәаԥшра

Ашьапылампыл дәы ҿыц рзеиҿкаауп Гал ақалақь аҩбатәи абжьаратә школ аҵаҩцәа. Аха урҭ инарҷыданы ақалақь аспорт иазҿлымҳау аҿар реиԥш, араион аҟны инхогьы уа аҽазыҟаҵаразы алшара рзаԥырҵарц ргәы иҭоуп.

Ари аус шеиҿкаахаз, ашколи ақалақьи рзы ахҭыс аҵакы далацәажәеит ашкол адиректор Ахра Кәакәасқьыр.

"Аспорттә дәы еиҿкааны, фымцала еиқәыршәаны, иахьа унеины ашьапылампыл уасыртә еиԥш аҭагылазаашьа ҟаҵаны ацаԥха ҳнапы иадыркит. Аҵарашықәс ҿыц алагара аҽны официалла иаартны арҵаҩцәеи аҵаҩцәеи рыбжьара аиҩызаратә хәмарра мҩаԥган. Макьана арҵаҩцәа аиааит, аха агәыӷра ҳамоуп аҵаҩцәа рыхәмарра еиӷьхоит ҳәа", - иҳәеит Кәакәасқьыр.

Аицәажәара шәаҳар шәылшоит Sputnik Аԥсны асаит аҿы.

Аԥсны иҟоу Россотрудничество ахаҭарнакра анапхгаҩ ҿыц дарҭеит.

Уи Владислав Куликов иоуп, абри азы адырра ҟанаҵоит Аурыс ҩны апресс-маҵзура.

Иахьа иара Гал араион даҭааит, Гал араион ахада Константин Ԥлиеи, Гал агуманитартә коллеџь аиҳабы Гәында Кәарҷиаԥҳаи, Иаарту аҵара ацентр анапхгаҩы Игор Басови иареи аусеиура азҵаарақәа ирылацәажәеит.

📎 2022 шықәса рашәарамза инаркны ахаҭарнакра напхгара аиҭон Дмитри Федотов.

Ашықәс иалагазар Аԥсны абиуџьет 3,4 миллиард мааҭ ашәахтәқәа аланагалахьеит.

Ари 14% рыла еиҳауп иазгәаҭан иҟаз 3,06 миллиард мааҭ раасҭа ҳәа аанацҳауеит Ашәахтәқәеи аизгақәеи рзы аминистрра апресс-маҵзура.

Аԥсны ашьапылампыл азы иреиҳаӡоу алига Аԥсны "Супер-лига" сынтәагьы, ҵыԥх еиԥш, иалахәыц аа-командак алахәуп ҳәа арадио Sputnik астудиаҿы адырра ҟаиҵеит Ашьапылампыл азы афедерациа апресс-атташе Алхас Манаргиа.

Урҭ акомандақәа "Гагра", "Нарҭ", "Динамо", "Бзана", "Ерцахә", "Афон", "Риҵа", "Саӡ" роуп.

Аԥсны актәи алига ҳәа иԥхьаӡоу Амилаҭтә шьапылампылтә лига акәзар, уи сынтәа иалахәуп 11 команда — "Бзыԥ", "Ҷлоу", "Самырзаҟан, "Динамо 2", "Уарча", "Саӡ 2", "Лыхны", "Риҵа 2", "Аӡҩыбжьа", "Гагра 2", "Шахтиор".

Манаргиа иажәақәа рыла, ари алигаҟны сынтәа ацәыӡ ҟалеит — "Ешыра" акоманда алахәхаӡом, раԥхьа иргыланы ашьапылампыласыҩцәа разымхара иахҟьаны.

📎 Ашьапылампыл азы Аԥсны "Супер-лига" ачемпионат иалагеит аҟәатәи "Нарҭи" "Гагреи" цәыббрамза 4 рзы рыхәмаррала, аҳҭнықалақь акоманда 2:1 ҳәа аиааира агеит.

Еиду америкатәи аштатқәа асанкциақәа аларгалеит жәларбжьаратәи аинформациатә маҵзура "Россия сегодня", РИА Новости, RT, Sputnik, Ruptly рганахьала ҳәа аанацҳауеит америкатәи Афинансқәа рминистрра.

Асанкциақәа ирықәшәеит иара убас Маргарита Симониани RT аусзуҩцәақәаки.

Очамчыратәи "Ерцахә" амбициа бзиақәа змоу командоуп иҳәеит арадио Sputnik аинтервиу азҭаз Ашьапылампыл азы афедерациа апресс-атташе Алхас Манаргиа, мрагыларатәи аган аҿы ашьапылампыл аҿиара азҵаарақәа дырзааҭгыло.

Тҟәарчалтәи "Шахтиор" акәзар, амилаҭтә шьапылампылтә лигаҿоуп иахьыхәмаруа, иара уаҟагьы аԥхьагылара рымаӡам иҳәеит иара.

Тҟәарчали Гали ашьапылампыл аҿиараҟны уадаҩрақәас ирымоу адәқәа рыҟамзаареи ауаа разымхареи роуп ҳәа инаҵшьны иазгәеиҭеит Манаргиа.

Аԥсны аҳазалхратә шәарақәа ажьырныҳәа-цәыббрамза рзы рыплан ахыхь инагӡоуп 29% рыла.

Иазгәаҭан ирымази фактла иаланагалази еивырго 622 миллион мааҭ ыҟоуп ҳәа аанацҳауеит Аҳазалхратә еилакы апресс-маҵзура.

Авокал-инструменталтә ансамбль "Гәында" алахәхоит Москва имҩаԥысуа Амилаҭтә ҟазаразы жәларбжьаратәи афестиваль "Золотое кольцо".

Ансамбль асахьаркыратә напхгаҩы, Аԥсны Жәлар рартистка Роза Чамагәуаԥҳа арадио Sputnik аҟны еиҭалҳәеит афестиваль ахь ирго апрограмма шеиҿкаау.

Чамагәуаԥҳа лажәақәа рыла, актәии аҩбатәии амшқәа рзы 10-10 минуҭ иқәгылоит, ахԥатәи амш азы 15 минуҭ.

Афестиваль аҳәаақәа ирҭагӡаны ансамбль "Гәында" ақалақь Владимир аҟны ахатә концертгьы мҩаԥнагараны иҟоуп ҳәа азгәалҭеит Чамагәуаԥҳа.

Еиду аштатқәа гаӡарыла егьырҭ атәылақәа адоллар мап ацәыркыртә иҟарҵоит ҳәа иҳәеит Владимир Путин Адунезегьтәи аекономикатә форум аҟны иқәгылараҿы.

Иара иҳәеит Урыстәыла адоллар мап шацәнамкуаз, иара мап ацәыркит, убри азы егьырҭ алшарақәа ԥшаатәхеит.

"Амилаҭтә валиутақәа рахь ҳаиасит. Иақәгәыӷуан (ЕАА- азгә.) ҳара ҳҿы зегь аилаҳара, аха ахырхарҭа аҽакхеит. Авалиута ахархәара ахырхарҭа аекономика аҿиара иадҳәалоуп", — ҳәа иҳәеит иара.

Sputnik — АЕФ -2024 аинформациатә партниор хада.

Адунезегьтәи аекономикатә форум аҿы Владимир Путин Курсктәи аобласт аҿы иҟоу аҭагылазаашьа ахҳәаа аиҭеит:

▪️ Киев иаҭахын Урыстәыла Донбасс имҩаԥнаго ажәылара аанкылара, аха иалымшеит;

▪️ Украинатәи аруаа рымчқәа ԥсыҽхеит, убри аан Урыстәылатәи Арбџьармчқәа ржәыларақәа дырццакит;

▪️ Украина ацәыӡқәа афронт еиланаԥыххаауеит, аибашьразы ирымоу алшарақәа рцәыӡуеит, уи ауп Урыстәылагьы иахықәку.

Sputnik — АЕФ -2024 аинформациатә партниор хада.

Аслан Бжьаниа адышшылара ҟаиҵеит ауаажәларратәии аполитикатәии аусзуҩ, Аԥсны Афырхаҵа Альберт Тополиан иԥсҭазаара дахьалҵыз инамаданы.

Атәыла ахада иазгәеит Аџьынџьтәылатә еибашьраан атәыла ахьчареи аибашьра ашьҭахь аԥсуа ҳәынҭқарра арҿиареи рус аҿы Тополиан илагала дуқәа.

"Аибашьра ашьҭахьтәи аамҭақәа рзы Альберт Тополиан активла далахәын аҭынч ԥсҭазаара ашьақәыргылара еиуеиԥшым аҳәынҭқарратә маҵзурақәа дырхагыланы. Иара иԥсҭазаара зегьы ҿырԥшыган Аԥсадгьыл амаҵ аураҿы", — аҳәоит адышшыларатә шәҟәы аҟны.

Ахәыҷтәы-қәыԥштә шьапылампылтә лигаҿы 1500-ҩык ахәыҷқәа хәмаруеит иҳәеит Ашьапылампыл азы афедерациа апресс-атташе Алхас Манаргиа, арадио Sputnik аинтервиу аҭо.

Ахәмаррақәа асабшеи амҽышеи имҩаԥысуеит.

Ахәыҷтәы лига амҩаԥгараҿы ауадаҩрақәа ыҟоуп — иахьыхәмаруа аҭыԥ аҟамзаареи аӡбаҩцәа разымхареи ҳәа азгәеиҭеит Манаргиа.

Арадиостудиаҟынтәи инарҭбаау авидеонҵамҭа шәахәаԥшыр шәылшоит абра.

Аҩада Ешыра, Гәымсҭа ацҳа иахьаҵанакуа амҩаду аҿы амашьынақәа реишьҭагыла рацәахеит.

Лабҿаба избаз изларҳәо ала, ацҳаҿы автобус еихәлахеит.