(clinic_sem12 🎓 ) - المفاضلة 5

السلام عليكم ورحمة الله وبركاته
مساء الخير لكل حد متواجد معانا في القناة و شاف الرسالة هذه
كطالبة واسمي وجدان داعوب اليوم نبي
منكم خدمة بسيطة لكن هي كبيرة عندي وعند مرح ونادية اللي هي ام مرح واكيد عند ربي حاجه عظيمة .
منو مرح ؟
مرح طفلة عمرها 13 السنة دارولها
عملية قلب مفتوح وهي صغيرة وكانت العملية (Mitral valve replacement )
الا وهي استبدال الصمام الثنائي الشرفات
طبعا العملية نجحت والحمد لله و الفضل يرجع لله اولا ثم للبروفسور حسن المقهور المتخصص في جراحة القلب اطفال ..
زي ما نعرفوا ان بعد العملية تصير مضاعفات سببها تكيف الجسم من عدمه
مرح وللأسف بعد فترة لا باس بها من العملية ظهرت عليها مضاعفات بدايتها
كانت
Lower limb oedema
وبسبب خطأ طبي في العلاج تفاقمت هذه المشكلة ومن ضعف عضلة القلب
اصبحت مرح تعاني من اعتلال في عضلة القلب بسبب زيادة قطر الغرف داخل القلب وهو ما يسمى ب DCM
Dilated cardiomyopathy
حاليا الدكاترة كلهم مشخصين ان ما ليهاش حل الا زراعة قلب ووضعها سيء جدا وما فيش كيف يعالجوا قلبها حتى بالأدوية لان القطر داخل القلب طويل هلبااا بمعنى الاتساع كبير ...
الحاجة الجميلة في الموضوع ان على قد ما شفت ناس ايمانها وثقتها بربها كبيرة لكن نادية (أم مرح) غير لاول مرة نشوف شخص واثق ثقة خالصة بالله ومتأكد تماما انه حي يحققله اللي يبيه.
رغم ان حالة مرح صعبة وما ليهاش حل الا زراعة القلب لكن ام مرح متأكدة ان ربي حي يشفي قلب بنتها ومتيقنة يقين تام ان ربي حي يكون عند حسن ثقتها ومستحييل ان يخذلها على الرغم من استحالة شفاء قلبها لوحده ولكن قالتلي وهي تبكي بأنه :-
لا يوجد شيء مستحيل على الله ان الله قادر على كل شيء وحي يشفيلي قلب بنتي، حتى لو زرعت قلب مش حي تعيش !! قلبها هو اللي ربي بيشفيه قلبها اللي داخلها قلب بنتي بس اللي ربي حي يشفيه وحي تشوفي الدكاترة يسجدوا لما يصير هكي هذاكا الدكتور الفلاني لو مؤمن حي يسجد ، متأكدة قلبها ربي حي يشفيه واثقة ثقة عمياء بربي قلب بنتي حي يولي زي ما كان ولو بنتي ماتت مش حي تموت بسبب قلبها لان قلبها ربي حي يشفيه قلتلها نتمنى الشي هذا يصير فعلا لان حي نشوفوا معجزة قدامنا واني حي نكون اول من يسجد من الفرحة قتلي مش معجزة ما فيش حاجه معجزة على ربي قلتلها هي معجزة على الانسانية قعدت تحكيلي على قصص الانبياء وكيف ربي سعادهم (سيدنا يوسف،سيدنا ابراهيم، سيدنا نوح صل الله عليهم وسلم) وقتلي كلكم حي تسجدوا وحتى اللي مش عليهم الوضوء حي يسجدوا
وحي تشوفي ان ربي حي يشفي قلب بنتي ربي معانا موجود، لما نتنفسوا ربي موجود ،نحسوا بيه لكن ما نشوفوش فيه
وهلبا كلام زي هذا برهنلي ان هي واثقة تمام الثقة (لدرجة ان فكرة لو ما صارش هكي مش خاشة دماغها بكل ابدا)
تدعي وتصل وتطلب وهي واثقة في ربي
وتقولي ان الله يقول ادعوني استجب لكم ، ان الله يقول انا عند حسن ظن عبدي بي ، قالتلي بأنه امتحان من الله لها ليختبر صبرها وهذا الامتحان حي يتم وبنتي قلبها ربي حي يشفيه كل هذا الحديث صار بيني وبينها وهي تبكي بعيد على بنتها لان مرح ما تعرف شي الى هذه اللحظة وقتلي ان مسامحة كل حد في الدنيا حتى اللي وجعوني واللي غلطوا في علاج بنتي مساامحتهم كللهم لان ربي حي يشفيلي قلب بنتي
وقعدت تردد في نفس الجملة الى نهاية الحديث اللي اختمناه بالنظر الى سماء الله الواسعة و توجيه الدعوات لجلالته وعظمته هي تدعوا الله وانا ادعوا ان يستجيب الله لها ولا يخذلها وكم اتمنى ان لا يخذلها لان اولا سوف تعود مرح صديقتي وارنوبتي الصغيرة كما كانت / ثانيا سوف ارى معجزة الآهية حية امام عيني وكم سأكون حامدة و مندهشة بل اكثر من مندهشة ان حدث هذا الشي وسبحان الله من كثرة ثقة امها اصبحت اشعر بان الله فعلا سوف يشفي قلب مرح وزدت من دعواتي لها في الصلاة في الفجر وكذلك في قيام الليل ان استطعت عليه .
الخدمة اللي نبيها منكم ولاول مرة نطلبكم في حاجه بس ياريت تساعدوني وتساعدوا بيها مرح
الدعااااء
ادعولها في سجودكم وانتم تصلوا الناس اللي تصل في الفجر ومداومة عليه (ان دعاء الفجر كان مشهودا) ادعولها ان ربي يشفيلها قلبها رجاااء الناس اللي تقيم في الثلث الأخير من الليل بالله عليكم ارجووكم رجاءا من القلب ادعوولها
ادعوولها ان ربي يشفي قلبها
حتى لو استلزم الامر انكم تكتبوا في ورقة او تخربشوا على ايدكم وتقولوا اليوم بندعوا لمرح باش ما تنسوش
حني مسلمين ولما ندعوا لبعضنا مع دعاء وثقة امها في الله قلبها حي يشفى باذن الله الواحد الاحد الذي لا الَه الا هو الرحمان الرحيم الحي القيوم
ادعولها و حاولوا تخلوا اكبر قدر من الناس اللي تعرفوهم يدعولها ما تنسووووهاش رجااءا رجاء خاص
الدعاء الوحيد اللي حي يشفيها
بجديات توجع هلباااا وتقطع القلب لان مش قادرة نتخيل حالة امها لو....
مش قادرة نتخيل خسارة طفلة زيها تتكلم معاك وتضحك وفجأة..
بلغوا بعضكم حتى اللي تشوفوهم قولولهم في طفلة اسمها مرح قلبها

👍1

2.26K viewsWijdan Daoub (Bsfku), 18:53