Heart sounds

هو الصوت الي يصدره القلب
طبعا حني نقدرو نميزو صوتين فقط
لكن phonocardiogram يقدر يميز اربعة اصوات

على كل انا شرحته في دورة القلب لكن حنزيد نشرح الصوت الاول والثاني بالتفصيل لانهم الاهم

1rst heart sound:-

قلنا يسببه اغلاق atrioventricular valve وهو اعلى صوت واطول صوت من ناحية المدة وعنده شدة عالية وطبقة صوت منخفضة

واحسن جيهة تسمع فيها الشيء هذا هو left 5th intercostal space

2nd heart sound:-

وهو الي يصير عند غلق semilunar valve مدته اقل من الي قبله وشدته اقل لكن طبقة الصوت عالية عنده وافضل مكان تقدر تسمعه فيه هو 2nd intercostal space

طبعا حتلاحظوا انه صمامات الاورطا حتتسكر قبل صمامات pulmonary وخصوصا في الشهيق حيث يتأخر pulmonary 0.05من الثانية

اما في الزفير الفرق ميكونش كبير وممكن حتى ميكونش ف فرق من الاصل ولو في فرق فحيكون حوالي 0.02 من الثانية

العوامل الي تأثر في قوة الصوت:-
بأختصار هي شدة الصوت وطبعا في الصوت الاول تعتمد على ضغط البطين يعني كل ما كان ضغطه اكبر كل ماتسكرت الصمامات اقوى وهكي زاد الصوت

اما بالنسبة للصوت الثاني فتعتمد شدته عل الضغط في الاورطا والبولموناري يعني لو كان الضغط فيهم اكبر حتتسكر الصمامات بقوة ويقوى الصوت

ملاحظه:-ميزيدش ضغط البولموناري الى في حالة mitral stenosis و left ventricular failure
بتقولو شن دخلهم فيه هما في جيهة وهو في جيهة
تعالوا نتخيلوها

تخيلو انه الصمامات مخليين فتحة ضيقة للبطين او البطين فيه مشكله هكي حيسبب ان الدم في الاذين بيتراكم ولما بيتراكم بيخلي الدم في اوردة البولموناري يتجمع لانه مش لاقي وين يفضي بما انه الاذين معبى هلبا وهكي الرئة حتكون معبية لانها مش حتقدر تفرغ في الاوردة لانهم معبيات وهكي الشريان الرئوي الي يجيب من البطين الايمن حيتعبى ويزيد ضغطه لانه مش لاقي وين يفضي بما انه الرئة معبية

Venous pulse

طبعا نقيسوه بواسطة jugular vein pulse

طبعا شن هو pulse هو الشعور باي تغير في الضغط
ويكون على شكل رسم بياني

اولا (a):-
تصير لما ينقبض الاذين ولما ينقبض الاذين ضغطه بيزيد يعني معش حيستقبل دم فالدم بيتراكم في jugular vein مما يسبب في زيادة ضغطه هذه الزيادة هي الي بنحسوها وبنقيسوها

ثانيا (c):-

تصير لما تتصكر atrioventricular valve فلما تتصكر معناها الدم بيقعد في الاذين ومعش حينزل للبطين فلذلك بيتعبى الاذين ومعش يقدر يستقبل من jugular vein مما يسبب في تراكم الدم فيه ويزيد ضغطه

ثالثا(x):-
الي بيصير انه atrioventricular valve بترتخي كا استعداد للفتح لما ترتخي لوطا حيزيد حجم الاذين مما تسمح انه يقل ضغطه شوي وتبدا في مساحة انه يستقبل دم من jugular vein وهكي يقدر يفرغ فيه مما بيقلل الدم في jugular vein وهكي يقل ضغطه

رابعا(v):-
بعد ما قعد jugular vein يصب في الاذين حيتعبى الاذين من جديد وهكي ضغطه حيزيد ومعش يقدر يستقبل لذلك حيتراكم الدم من جديد في jugular وضغطه يزيد
ومن شدة زيادة الضغط في الاذين لين حتنفتح الصمامات وعندها تصير👇

خامسا (y):-
تفريغ الدم في البطين وهكي ضغط الاذين بيقل ويقدر يستقبل دم من jugular vein وهكي ضغطه حيقل

طبعا في حالات مرضية قد تزيد في الرسم ابياني

مثلا زي stenosis او av block هني بش يفرغ الاذين دمه للبطين محتاج انه ينقبض بقوة وهكي حيخلي ضغطه يزيد مما حيكون a wave اكبر من المعتاد

Cardiac cycle

هي عبارة عن مرحلتين مرحلة انقباض (systole)
ومرحلة انبساط (diastole)

وطبعا الانبساط يكون اطول مدة

طبعا عند الانقباض ميطلعش الدم كله بل يقعد شوية دم لذلك نسموه end systolic volume
وقيمته 50ml

ونفس الشي عند الانبساط end diastolic
وقيمته 120ml

volume

توا بنحكوا عن خطوات الانقباض والانبساط:-

الانقباض:-👇👇
اول مرحلة تصير فيه(isovolumic contraction):-

الي يصير انه البطين بينقبض والانقباض هذا حيخلي الصمامات الموجودة بين بين البطين والاذين تتسكر وتسكرها تخيلوه زي تسكير الباب يعني حيسبب صوت وهذا الصوت بالنسبة للقلب يتسمى 1rst heart sound بش ميرجعش الدم للاذين وفي نفس الوقت الضغط حيرتفع في البطين مما بيسبب في فتح semilunar valve

بش ينضخ الدم من شدة الضغط

وهذا الشي يبان ف الرسم البياني على شكل (C)

من ثم تصير مرحلة rapid ejection:-👇👇

الي قلنا انه يزيد الضغط في البطين مما يسبب في فتح الصمامات semilunar ولما ينفتحوا فجأة يسبب الشي هذا في دفع الدم بقوة شديدة

تخيلوها زي لما يكون مكان معبى بالناس ومسكر وتجي تفتح الباب
خير مثال للشيء هذا احني يوم امتحانات العملي😂

وبعدها هكي يمشي الدم ويمشي ويمشي لين خلاص البطين يبدا يفرغ ويقل ضغطه وهكي معش يبدا الدم يمشي بسرعة وهذه المرحلة تتسمى reduced ejection وينقص الضغط اكثر لين معش يقدر البطين يدفع الدم وعند هذه الحالة يخدم momentum لو تذكروا قانون العزم قبل انه يخدم ضد الضغط يعني هو اشبه بي active transport من حيث انه يعمل عل نقل الدم من منطقة ذات ضغط منخفض لعالي

نجوا لخطوات الانبساط:-

يبدا بي isovolumic relaxation:-👇👇
هي المرحله الي يزيد فاها ضغط الاورطا هلبا مما يؤدي لاغلاق semilunar valve مما تسبب في صوت الي هو 2nd heart sound
ويقل فاها ضغط البطين مما يؤدي الى فتح atrioventricular valve

وهذه المرحلة تكون في الرسم البياني (V)لان الاذين الضغط فيه عالي لانه معبى دم وكيف بيبدا في التفريغ

طبعا لما تنفتح atrioventricular valve فجأه هذا الشيء يؤدي لي تدفق الدم بقوة تجاه البطين مما يؤدي لاصطدام الدم بقوة بجدار البطين مما يؤدي الى اصدار صوت اسمه 3th heart sound وهذه المرحلة تتسمى بي rapid filing phase
وحتى هذه المرحلة قاعد فيها ضغط الاذين اعلى من البطين لانه البطين متمدد هلبا وقاعد كيف يتعبى يعني متعباش كليا

وبعدها تجي مرحلة diastasis
وهذه المرحلة تصير لما الضغط البطيني يبدا يزيد والضغط الاذيني يقل مما يؤدي الى التدفق ببطئ
بعدها تجي مرحلة مش مهمة جدا الى في الحالات المرضية زي انسداد القلب الكلي زي في 3rd AV block او في النبض السريع tachycardia او عند stenotic الي هو مرض تسببه البكتيريا حيث تسبب في ضيق atrioventricular valve
في كل هذه المراحل يبدا انقباض الاذين مهم جدا بنسبة 25٪ في ملئ البطين وتعمل على تكوين صوت 4th heart sound
وهذه المرحلة اسمها atrial systole
ويكون شكلها (A)

هذا شرح في السي في اس حبيت الطلبة يستفيدو منه طبعا نفس الكتاب يعني مفيش اختلاف

مشاركة من زميلتنا بارك الله فيها 🌸👆🏻

- المحاضرة الثالثة CVS على تسجيلين( د. عبدالبارئ مروان)