مكاش حاجة اسمها لازم
مواضيع مهمين فالقراية باش تطبقي المفاهيم لي راكي تتلقاي فيها
بسك فالأخير الدروس هي مجرد انطلاقة وخاصة مواد اساسية
درس هو لمحطة الاولى للتعلم لي تدي منها اهم الحاجات والمفاهيم والقوانين وغيرها لي يخلوك قادرة انك تجتازي اختبار
كاين معايير لكل موضوع في كل مادة مكيش رح تعرفي تتعاملي معاهم إلا لو سييتي تتعاملي مع هذاك الموضوع
لهذا فمن الاحسن انو ميكونش موضوع الباكالوريا هو أول موضوع تتعاملي معاه بشكل جدي

انا ننصحك تبداي تحلي مواضيع بالرغم من كلشي
تقوليلي بااش ؟ دك نشرحلك كيفاش وباش وان شاء الله نعاونك
صحا حاجة لولة نهارك لازم يكون فيه مواد مختلفة
مادتين اساسية ومادة حفظ ولغة والتوزيع طبعا على حسبك انتي ويكت تحبي تقراي كل مادة
رح نهدرو على كل صنف على حدة بسك منقدرش نعمم بعض النصائح على كامل المواد بسك هكا هدرتي يولي فيها تناقض

مواد الحفظ (اسلامية واجتماعيات)
ابداي بالفهم العمييييق للدروس اقرايهم وافهميهم ملييح , اشرحي لروحك بدارجة هاذ الحاجة بزااف تنفع صدقيني 🤌🏻 اشرحي مصطلحات ودرووس بطريقتك انتي بسك كي ترجعي ليهم رح يترسخولك احسن من انك تحفضي كي الروبو بلا ماراكي فاهمة حاجة 🤖
مستحيل تكوني متعرفيش دروس كااامل ولا مكيش فاهمة قع واش راكي تقرااي رانا في اخر العام على الاقل لازم يكون عندك فكرة
روحي للصوالح اللي لاازم تحفظيهم حرفيا كيما تعريفات الشريعة والآيات والأحاديث وتواريخ التاريخ واهم المصطلحات فالجغرافيا ,... ابداي بيهم سيي تحفظيهم مليح
بعدها روحي للمواضيع معتمدة على الفهم وديري في بالك قبل ما تبداي تحلي موضوع بلي لباك وصل ونتي مكملتيش حفاظة (تخيل فقط ). هاذ الحاجة رح تخليك تفطني لروحك شوي من جهة ومن جهة اخرى تتعلمي كيفاش تعتمدي على الفهم باش تسلكي راسك
مور ماتحلي الموضوع ومالاحسن يكون كتابيا (انا ننصحكم بالشفوي كي تكونو حافظين !) صححي لروحك وقارني بين اجاباتك واجابات التصحيح النموذجي , صححي اخطائك واكتبي تصحيح هاذيك الحاجة لي غلطتي فيها باش المرة الجاية رح تراجعي من هاذيك الورقة
كملي هكااا ومالاحسن اسلامية تكوني مسيتي كاامل الدروس وفهمتيهم واجتماعيات تكوني هضمتي كامل دروس جغرافيا وبنسبة للتاريخ يليق تخيري حرب باردة ولا ثورة كيما قاللنا بورنان هكاا باش تحكمي حاجة خير من والو !!!
كل نهار مادة هكا وكل نهار موضوع رح تصيبي روحك كملتي هاذ الخدمة في زوج سوايع ونقصتي على روحك بزااف صوالح

مواد اساسية :
ديري مادتين فاليوم
مادة متأخرة فيها ومادة راكي شوي شوي
لي متأخرة فيها ادخلي اقراي لوحدة لي مقريتيهاش بشكل خفييف وهزي المهم والاهم فقط باش تقدري تحلي تمرين وتقدري تبداي فيها المواضيع فيي اقرب وقتت .
ولي راكي مليحة فيها لازم ديري موضوع وتقيمي روحك يا لوكان تدي 1 لازم تحلي سيريو بسك الغلطة لي تديريها هاذ الايام رح تخليك تفطني لروحك وتتنبهي ليها ومتعاوديهاش
وكي قتلك الفهم ثم الفهم .. اذا كنتي تغلطي ومتفهميش غلطاتك ما درنا والو
على ذي لاازم تركزي فالموضوع ملييح ملييح وسيي تفهميه مليح باش متكونيش منوع لي يحل بلحفاظة وكل دقيقة يطل على الحل
ولازم تدعمي نقاط قوتك وتعرفيها . مثلا واحد ميفهمش كيميا ويتفاهم مع الفيزيا ماشي يرووح للكيميا ويهمل الفيزيا ويولي لاا من ولاا من
كي تدعمي نقاط قوتك فسوجي تعرفي وين تضربي ضربتك , متهتميش انو لاازم نحترف كااامل الوحدات متخلوش تفكيركم منحصر بسك راكي فنهاية لعام مكيش فبداية السنة باش تحترفي كلشش !! انقذي رووحك هذا فواش تخممي دك !!!!
مواضيع فالمواد الاساسية ضروريية راكي تهدري مع المجرب 🫣
ولي يقلك ديت 20 غير بدروس وماحليتش تمارين وخرطي راه يخرط وشكرا مديريش عليه

لغااااات
بالنسبة للإنجليزية : هاذي طريقة صحبتي بصح رح نقولهالك بسك عاونتني جدا (ادعيلها )
هي قاتلي قريت الوحدات تع الانجلي من ناحية المصطلحات والمفاهيم وشوي وضعيات ... هكاا
والقواعد شافتهم بزاف قاتلي راجعت برك بلا تفصييل ورحت للمواضيع
تحلهم عادي ووين تلحق لدرس قواعد مش فاهماتو خلااه تروح تقراه مليح وترجع تكمل موضوعها
هكا رح تضرب عصفورين بحجر 🐥🐥 اولا حلت موضوع وهاذ الحاجة مفيدة بزااف من ناحية البناء الفكري والنص تع الانجلي بسك حل المواضيع رح يعلمك تتعاملي مع النص ومن ناحية القواعد انها قرات درس ولا زوج ولا اكثر وطبقت عليهم تمارين وفهمتهم خفييف
بالنسبة للفرنسية ابداي ديراكت المواضيع , اخطينا مدروس ومنعرف مكاش بزاف صوالح لي لاازم تعرفيهم قبل الموضوع كيما قواعد ولاا
ضربي طلة على الcompte rendu وسؤال تع الرأي تعلمي كيفاش تتعاملي معاهم
منبعد فوتي نيشاج للمواضيع وطبعا ننصحكم بالاستاذ اسامة بسك يحل مواضيع فاليوتيوب , واذا عندك دورة تع استاذ وخدوخر هذيك حاجتك المفيد هو انك تتعلمي تحلي سوجي مع استاذ
عربية محبوبة الجماهيير
عربية اذا مش قاريتها خلااص روحي شوفي دورة تع حماشي بسك داير كلش خفيف ضريف ومش لازم هو مي المهم استاذ داير كلش ومش مطول بزاف, واقرايها بعقلية انو جلسة وحدة تكمليها وتدي المهمممم !!!! بسك ساااهلة وخفيفة والله
عندك الاعراب شوية شوية دك نمدلك طريقة باش تليكيديه
اولا كي تقراي درس رح تتعلمي طبعا تعرفي الاعراب تع الجملة ولا المفردة لي تجيك فنص , وهاذ الحاجة رح تدركيهاا مالدرس مع الاستاذ + الامثلة لي يمدهملك على ذي يليق تركزييي ونتي تقرااي
وفي نفس الوقت احكمي ورقة ارسمي فيها جدول صفحة لولة خصيها لاعراب المفردات والصفحة الاخرى لاعراب الجمل
واكتبي فيها كاامل الاعراب تع كاامل الدروس بااش تشفاي عليه بسك الاعراب يحفظظ !!! (انا هاذ طريقة درتها فتعريفات الشريعة وفادتني بزاااااف فنهار لخر تع المراجعة) مور ماتمكلي تدي المهم تع دروس روحي حلي المواضيع
لا حفظ لا والو حلي المواضيع وكي تصيبي سؤال يتطلب حفظ اكتبيه متصحيح نموذجي وسيي تتعلمي تشفاي علييه
عربية لازم لااااااازم تتعلمي كيفاش تتعاملي مع البناء الفكري بسك هو لي ياكل النقاط , علابالي معظمكم يهتم للبناء اللغوي ملخر البناء الفكري هو لي يهبطو وهذا كامل المفياقة تع السوجي لي تحلو تحل البناء اللغوي منو برك !! حذااار
بناء الفكري أخطر بكثيير 💀

تبعيلي ذي العقلية برك وكملي بيها للنهار لخر, حتى يلحق نهار السبت هذااك باينة تخصصيه للمراجعة تع اسلامية وعربية
ونوووضي تقراي مبقالكش وقت ‼️🤌🏻 هاذي هي فترة انقاااذ النفس

متصعبهاش على روحك
حاجة لي لازم تقراها فمدة قصيرة متبقاش تقوول لاا ولازم نحترف ولازم نتمكن ومنعرف
مبقااش وقت للاحتراف وتقرا درس وتحل عليه 40 تمريين ودير ملخص و...
مبقاش وقت !!! دك لازم كل يوم تخلع روحك بموضوع وتقول لروحك : لكان رحت للإختبار بهاذ المستوى كيفاش رح ندير ؟
لازم تتعلم تسلك راسك بالفهم ولاازم تتعلم متخافش مالسوجيات
راك في فترة حساسة فييق لروحك !
منيش نخلع فيكم ومنيش نديرلكم فالسترااس بلعكسس
راني حابتكم متكبروش نظرتكم للباااك وديروه حاجة كبيييرة بزااااااااااف
حابتكم تتعلمو كيفاش تتمشاو بذكااء هاذ الفترة !!
تكون ذكي وتخطيك من تضييع الوقت وتوقف بجدية تقراا
تكون ذكي وتعرف كيفاش تدعم نقاط قوتك وتسلك رااسك بالفهامة وتخختصر الوقت في الصوالح لي ميستاهلوش تكسار الرااس وتخلي الخدمة لكبيرة للمواد لي يستااهلو تكسر راسك علاجالهم !!!
تكون ذكي فالتعامل وليس في أنك تتحول الى نابغة 🤓
-
نتمنى تكونو فهمتوني . سمحولي ليميساج طوال لكن آخر مرة نهدر هكا بالتفصيلل
بقا وقت الخدمة والتنفيذ خلااص وقت النصاائح
ادعولي ادعولي ادعولييي 💕

اختبار لتقييم حفظكم فيما يخص تواريخ الوحدة الاولى في التاريخ 👇🏻.
من صفحة الطالب AUDEN

- الاختبار يتضمن 20 سؤال ، ذات خيار واحد .
- اقراو السؤال مليح مليح و اختاروا بعناية .
- من فضلكم بعدو عليكم الملخصات و الكراريس ، باش ما تشوفوش الاجابة .

جاوبو و في الاخير اضغطو على استظهار النتيجة و قولولي شحال جبتو من 20 ⬇️

https://docs.google.com/forms/d/e/1FAIpQLSeVm86-5j7RHCv-x2oSusrQXdrOgkE73rV_OMWqbRVuMZKRBg/viewform

20 موضوع للمراجعة في العلوم الفيزيائية مع الحل 🤍📢

300 موضوع تجريبي في مادة الرياضيات مع الحل 💕

عجبوني تمارين الاعداد المركبة 🥹🤌🏻
اختكم هذا وين تفكرتهم حرفيا حرفيااا !!

‏" إذا قامت الساعة وفي يد أحدكم فسيلة فليغرسها "

‏لا تستسلم لأيّ فكرة تحاول أن توهمك أن الوقت قد انتهى و أن الأوان قد فات و أن الفرص قد انتهت أو أنك لا تملك وقتاً كافياً للتقدم !
طالما لم توزع أمامك المواضيع ، فأنت تستطيع أن تفعل شيئاً، ان تتقدم قليلا . لذا استمر حتى النهاية، حتى آخر دقييقة .🫶🏻
-
17 يوم قبل الإمتحـان ⏳

ملفات مفيدة في العلوم الاسلامية ⬇️🎀

فكرة التعريفات طبقتها العام الماضي لكن على شكل مراجعة كتابية في الايام الاخيرة وافادتني بزاف ... يعني ما كتبتش من هاذ الملخص سيي نكتب وحدي باش نختبر روحي . واذا الوقت كفاني نعاودها العام هذا ثاااني !!
بحكم انو التعريفات شرطها انو تُحفظ حرفيا , رح تساعدكم هاذ الفكرة 🌟
دعواتكم لي بالتوفيق والتيسيير 💕

مبيد وتين مهيش تفتح نسرقولها تصويرة في الخفاء العلني 🤌🏻😌

شوفوا
شرايكم تبعدوا على تيليفون شوية 🥲
مكاش لا مجموعاات لا محادثاات لازم تبعدوا بسك أي فترة راها مهمة فنهارك
زير روحك شوية مبقاش صااي وتشبع من كلشششش وتشبع راحة !!. اذا تعبت مالقراية روح صلي ركعتين وريح شوية وارجع نوض تقرا
اعزل روحك باش تتعلم تتحمل مسؤولية تع حاجة وتكون سيريو 🤌🏻

هاذ الأيام اذا ما استغللتهمش مليح ولا قدر الله متوصلش وين حاب رح يبقاو غير هوما في باالك حياتك كاامل !! (ان شاء الله كامل توصلوا لمبتغاكم)
سقسي المجرب 🤌🏻💔
-
المهم انا نحيت حسابي الشخصي خليت حساب فارغ راني بيه بسك نسحق تلقرام من ناحية المراجع وما درت حتى قنااة 🥲🤌🏻 انتهى وقت التشتييت !
بصح لازم نحفز جيش معايا باش نكمل فذي العقلية 🫶🏻