Message From: 900623

اي والله علا صح كلامچ واني وحده من ضحايا هاذي الكلمه وتسرعت بالأختيار وهسه اريد اطلگ واني عمري ٢٦ !

'نصيحه للبنات لتخلون اي كلمه تأثر بيكم هاذي نصيحه من اخت 💔'

ليش تطلكين؟

جم بنية دخلت جامعة هدفها تخلي احد يباوع عليها ويزوجها
حتى لاحد يكول عليها عانس وماحصلت شي
صار هدف البنية الي تدخل جامعة (تكبل)
حتى لا تتخرج وهي مامحصلة شي
اللبس والمكياج
كله حتى تكبل حتى يكولون عليها حلوة
ولاحد يكلي لا غلط كلامج
اني بنية ٥ سنوات دخلت وشفت

هذيج حصلت رجال واني ماحصلت
صارن البنات يحيرن شلون يجذبن الرجال حتى لاحد يكول عليها عانس ماحصلت شي وفلانة حصلت

الولد يدخل جامعة حتى يسوي علاقات
والبنات تدخل حتى تزوج

اصلا كعدت الصبح والمكياج من الصبح
والولد لازمين الساحات مال جامعات من الصبح

ع شنو
ع الدراسة؟؟؟؟؟

والتصنع بالكلام والرقة المفرطة كدام الشباب
والضحكة والعطر واصل لآخر قاعة
هذا للدراسة؟؟

قلة قليلة جدًا قليلة
داخلة صدك تريد شهادة
ومعدودين ع الأصابع
اذا واحد صارحها تدك طبل فلان صارحني

بس اليوم البنات تطلع من السادس براسها هاي الأفكار
رتبي روحج
حفي حواجبج
لبسي وتونسي

هي كلها ٤ سنوات

وتتغير البنية جذريًا حتى الجبس تأكله بالجطل كدام الزلم والرقة والتميع يصير لأبعد خدود
والذنب مو ذنبها
ذنب الي تخرجت وتكلها سوي هيج هيج
ذنب الي ياهو يشوفها يكلها ها بعدج
راح تعنسين
ذنب الصفحات بالانستا والبنات
الي تحسها ما رايحة تدرس
صفحتها عرض أزياء ملابس، واغاني
وتدخل البنبة جامعة متخبلة تحير شسوي بروحها تحير

تجي من بيتها بعبايتها
تدخل الجامعة تنزعها
تكلها ليش شفرق ولد الجامعة عن ولد الشارع تكلك لا تضايقني

احنا نفتقر للوعي

راسمين البنية انسانة لازم ترتبط برجل
حتى تصير الها قيمة حتى تكون انسان
كوني مبتذلة حتى الرجل يباوعلج وماتبقين عانس

اذا تبقين بحدود الله ومحافظة ع نفسج
خطية مراح تحصلين احد
ونرسم هالصورة وننقلها ونخبل هالمراهقات

فالوظيفة وظيفة كل واحد بينا
يااخواتي مثل ما البنات الي ينشرون
لبسهم وأغاني ويصورون هالوهم وينقلوا
المفروض احنا نشتغل
كل وحدة بينا هي بنت الزهراء عليها السلام
احنا محسوبين ع الزهراء
استغلوا صفحاتكم
ومواقع النت
لتصحيح هالفكرة
نشروا علوم اهل البيت عليهم السلام
كون تصرفاتنا هي تحجي أقوال البيت عليهم السلام
كون الي يشوفج يكول والنعم من امها

احنا امنا الزهراء عليها السلام

ورددوا لأجل فاطمة وفي طريق فاطمة وفي درب فاطمة

اليوم اذا انتِ راح تدخلين جامعة
خلي الي بالجامعة يهابج بلبسج بافعالج بتصرفاتج خلي عندج هدف
وكوني قدوة يتقتدى بيها بالخير
مو انسانة ضعيفة كل كلمة ترعزعني وتخليني اتخلى عن مبادئي
واكون نسخة متكررة من هالوضع التعبان

انسانة ادخل
مو انسان مبتذلة اصير مهرج حتى أعجب رجال!

ان شاء الله عمرج ماعجبتي رجال
منو كلج الله خلقج لأجل إعجاب رجل!!!

ترا احنا عدنا مولاتنا فاطمة الزهراء عليها السلام
والسيدة زينب عليها السلام

المفروض نتعلم من عزتهن وكرامتهن

مو اهين نفسي واخلي نفسي مثل مايريد المجتمع الغربي مجتمع الكفر

بعدين هاي اني بحجابي وعباتي
تقبل تقبل
ماتقبل الله وياك

عليمن هالخبصة؟ عليمن الطش وجهي ٥٠ لون
ولبسي يومية اغيره
ومشيتج تتحول وصوتج يتحول صافورة
حتى يقبل بيج؟؟

لا أكون انسانة الي قيمتي الي مكانتي الي الله حفظها الي
اشتغل ع نفسي اتعب ع نفسي
والي يشاركني حياتي كون يحترمني كإنسانه
مو شخص يدورني ع شكلي يوم يومين يمل
اذا انتِ خلصتي عمرج تفكرين شلون تعجبين رجال
وعجبتي
وبعدين حياتج شنو الي قدمتي بيها
هي الحياة بس كون أحصل رجال واكعد واسكت؟؟

كل شخص أفكاره الي يطرحها ع العالم اذا جانت افكار تخلق بداخل هالعالم وهم وبعيدة عن الاسلام
هو مسؤول امام الله
ولا تكلي صفحتي واني حر
الي حاطات حسابات انستا وينشرن طلعتهم وطباتهن ولبسهن ومكياجهن
كل وحدة تتاثر بيهن هي مسؤولة عنها
وانتو هم مسؤولين
منو تابعون
مضيعين وقتكم بمتابعة ناس مفيدة لو فارغة تخلق بداخلكم حسرات ع امور دنيوية

Message From: 866015

كلآمـج آجآ بــوقته كلشـ سـبــح ـآن آلله هآي آلفتره ضـليت آشـوف آلنآسـ وكل سـآع وكلت شـوف هذآ وشـوف ذآك آشـلون عآيشـ وفد فتور صـآر عندي هسـه رجعت لفكر آنه هآي آلآشـيآء دنيويه مآ رآح آتفيد بــآلآخره هي فقطـ رآح آجرني للهآويه شـكر لله وآلج يآ ح ـبــيبــه آلقلبــ.♥️🌿.

الافضل ما تابعون هيج ناس ابدا
شنو استفاد من اتابع بنات طلعت نشرت صور المطعم
طبت نشرت صور ملابسها
داخلة جامعة تنشر لبست هيج اليوم
واكلت هيج
كله هذا ينعكس ع روحية الإنسان ويخلق بداخله عدم قناعة ومقارنة

Message From: 245644

السلام عليكم
تعرفين علا آنـــــي جنت اخاف ادخل للجامعه
خاف ادخل ومحد يحبني وخاف ادخل والكه بنات احلى مني وخاف ادخل الجامعه واتخرج واني ما متزوجه او مخطوبه وخاف ادخل الجامعه ومن اتخرج يكولولي معنسه طبعا والله ما جنت هيج مخليه بالي بس مره ردنه نخطب لأخوي الجبير وجانت البنيه خريجه فـ اخوي الي الاصغر كال ما زال متخرجه وما متزوجه يعني مو حلوه لا تروحون تشوفونها لان كل الحلولات يتزوجن حتى قبل لا يدخل الجامعه وكونه اخوي اكبر مني فـ من الاكيد اتأثر بكلامه ضناً مني ان كلامه صح وحتى كلت من ادخل الجامعه راح اخلي مكياج وبعد ما البس العبايه الاسلاميه واتعلم البس كعب ووووو بس شنو صار يا علا سبحان الله رب العالمين اشكد يحبني يا علا آنـــــي هسه المفروض جامعه مرحله اولى بس آنـــــي هسه صف رابع علمي جنت اكول ليش ادرس وما انجح وليش تعبي يروح هيج وليش مرات يكون ما الي خلك للدراسه اثاري كلشي بيه حكمه الله يريد يأخرني عن دخولي للجامعه حتى اعرف آنـــــي رايحه للجامعه ادرس مو حتى ادور علاقات واليوم انتي اكدتيلي الله ما يريدني اكون سلعه رخيصه
شكراااا هوايه يا علا والله كلمت شكر قليله بحقج وان شاء الله دعائنه راح يضل يرافقج حتى بعد التخرج ♥️♥️

عليكم ورحمة الله
شفتوا تأثير الكلمة؛!!
اخوها خلاها تفكر هيج بسبب كلمة بسيطة؟؟ لو منحرفة ماجان اخوها امام الله مسؤول؟؟
شفتوا هاي الكلمات البسيطة الي تنكال شلون تكلب حياة بشر لو بطريق صحيح لو بالانحراف