حبيت أتعرف أكتر على عالم كومكس Hellboy أحد أفضل إصدارات دار نشر Dark Horse، فبدأت بقراءة المجلد الأول من تجميعة هيلبوي Hellboy Omnibus، وبالتوازي بدأت إعادة مشاهدة أفلامه اللي شفتها زمان وقت نزولها، بداية بالجزء الأول في 2004، والتاني في 2008، وصولًا للجزء الجديد في 2019 اللي للأسف مكانش حلو :(
الجزءين القدام رائعين، وانبسطت جدًا جدًا بكمية الالتزام بالكومكس اللي عاملينها، والاتقان في تصوير الشخصيات في فترة انتشرت فيها افلام الكومكس اللي اتربينا عليها ف طفولتنا ومراهقتنا ^_^
..
هيلبوي شخصية مميزة لشيطان انتقل لعالمنا وهو طفل، فيقوم بتربيته عالم مسؤول عن انشاء منظمة حكومية للتحقيق في الغرائب والماورائيات، ويبقى الشيطان المدعو بفتى الجحيم Hellboy أبرز عملاء المنظمة دي، بمساعدة فريقه للتحقيق في القضايا السحرية العجيبة، وايقاف الاخطار الغرائبية لحماية البشر والعالم من الدمار...
مزيج رائع من الرعب والسحر والغرائبيات والشياطين والكائنات الاسطورية ونظريات المؤامرة والأشباح والديانة المسيحية الكاثوليكية..

في عدد الكومكس What if? #113 الصادر ب1989، بنلاقي إيه اللي هيحصل لو توني ستارك هو اللي بقى الساحر الأعظم :D ودا اللي كان ممكن فعلًا ف فيلم infinity war لمشهد سريع، بس للاسف اتشال ف المونتاج الأخير للفيلم...
هنا توني بيتعرف على د.ستيفن سترينج في حفلة، وتوني بيعرض على سترينج يوصله وهما راجعين بعربيته، فيعمل توني الحادثة، وتتصاب إيدين سترينج زي القصة الأصلية..
توني بيشعر بالذنب، فيعرض على سترينج يكون المساعد بتاعه في شركاته، ويوعده بالبحث على علاج لإيده، ويسافر توني ف رحلات كتيرة لغاية اما يقابل الancient one، ويكشف له خيانة موردو زي ما سترينج عمل بالقصة الأصلية، ف يقرر الancient one انه يمنح لتوني لقب الساحر الاعظم...
بيفضل سترينج مساعد للساحر الاعظم توني ستارك، وتوني بيدمج التكنولوجيا بالسحر في بذلته الخاصة لمواجهة السحرة والأشرار، لكن سترينج بيشعر بالغيرة، ويخون توني باللجوء لدورمامو الشرير، ويتسحب توني للعالم المظلم ويواجه دورمامو اللي بيحاول يغزو عالمنا، ويعرف سترينج غلطته فيساعد توني ضد دورمامو...
بتنتهي القصة بفوز توني طبعًا، ونفيه لدورمامو بعيدًا عن عالمنا، ويفضل سترينج بالعالم المظلم برفقة الساحرة كليا.