30- رقم 88 المرسوم على بدلة الهايدرا الآلية هو إشارة محتملة للعدد Tales of suspense #88، اللي فيه بتظهر نسخة روبوت من باكي بارنز بيواجه كابتن أميركا. وبالمناسبة، السلسلة دي هي اللي شهدت الظهور الأول لبيجي كارتر في الكومكس، وبالتحديد في العدد 75.

31- لقطة إطلاق بدلة الهايدرا الآلية للصواريخ على بيجي وناتاشا مع وجود القمر في الخلفية وراه، تخليه شبه شعار الهايدرا شوية.

32- طيارة شيلد اللي ركبوها كان مكتوب عليها رقم 42، وهي إشارة محتملة ل3 حاجات:
* العدد Nick Fury: Agent of S.H.I.E.L.D. #42، اللي بيواجه فيه نك فيوري أعضاء من منظمة الهيدرا.
* السجن 42 اللي ظهر ف انيميشن Earth’s mightiest heroes، واللي يشبه الغرفة الحمراء اللي ظهرت في الحلقة هنا.
* رقم 42 هو الإجابة عن سؤال الكون في رواية وفيلم الخيال العلمي hitchhiker's guide to the galaxy.

33- إعادة ظهور لشخصية ميلينا فوستوكوف اللي قامت بيها الممثلة ريتشل ويز في فيلم بلاك ويدو الأصلي. وهنا هي بتظهر كالقائدة الجديدة لمنظمة الغرفة الحمراء المسؤولة عن صناعة عميلات البلاك ويدو.

الحلقة السادسة: ماذا لو أعادت كاهورتي تشكيل العالم؟
34- بتدور أحداث الحلقة في عالم حصلت فيه الراجناروك قبل ما يوصل التيسراكت للأرض، وبنشوف شخصية "كاهورتي" اللي تم ابتكارها جديد مخصوص للمسلسل، بس بعد نجاحها في المسلسل ممكن جدًا نشوف لها قريب ظهور في العالم السينمائي الحقيقي.
*أحداث الحلقة أغلبها بلغة الموهوك، إحدى قبائل السكان الأصليين لأمريكا الشمالية، أو اللي احنا بنسميهم بالخطأ "الهنود الحمر"، وبتظهر الإبادات اللي عملها المستعمر الإسباني في القبائل دي، في منطقة تعتبر دلوقتي هي نيويورك.
اسم كاهورتي هو اسم حقيقي نابع من قبيلة الذئاب، معناه "محركة الغابة" أو اللي بتحفز اللي حواليها على الحركة والعمل، ودا مشابه جدًا للي عملته خلال الحلقة فعلًا من تحفيز وجمع المقاتلين لمواجهة المستعمر، وتغيير التاريخ.
ولأن الشخصية وعالمها جديد علينا، فهي ملهاش إيستر إيجز متصلة بالكومكس بصراحة.

الحلقة السابعة: ماذا لو عثرت هيلا على الحلقات العشر؟
حلقة مشابهة لأحداث فيلم ثور، لكن بتطبيقها على هيلا، الإبنة الأولى لأودن قبل إنجاب ثور، مع مزجها بفيلم شانج شي، لتقديم شخصية وين وو/ الماندارين وحلقاته العشرة.

35- في رسمة معركة غزو أودن وهيلا لبقية العوالم التسعة، بنشوف رموز العوالم دي مرسومين حوالين الدايرة، اللي هم: أزجارد، ميدجارد (كوكب الأرض)، يوتنهايم، سفارتلفهايم (العالم المظلم)، فاناهايم، نيدافيلير، نيفلهايم، موسبلهايم، ألفهايم (موطن جن الضوء).

36- مشهد تحطيم أودن للمطرقة ميولنير، بيتطابق بالظبط مع مشهد تحطيم هيلا للمطرقة في فيلم ثور راجناروك.

37- أودن بيتعامل مع تاج هيلا نفس معاملته للمطرقة ميولنير في فيلم ثور، بس بشوية تعديلات، زي إن التاج دا تلبسه واحدة ست بس، وإن معيار الجدارة هو إن يبقى في قلبها الرحمة.

38- بدل ما المطرقة ميولنير وقعت في نيو مكسيكو ف أمريكا خلال أحداث فيلم ثور، هنا تاج هيلا بيقع في مدينة تا لو، اللي فيها شخصية الماندارين من فيلم شانج شي.

39- هيلا هي اللي بتتعلم فنون الكونج فو والقتال بدل شانج شي، حتى هنلاقيها لابسة زي مشابه لزي شانج شي الأحمر.

الحلقة الثامنة: ماذا لو تكوّن الأفنجرز في عام 1602؟
40- زي ما واضح من العنوان، أحداث الحلقة في عام 1602، وهو مش مجرد رقم وخلاص، لأنه في الكومكس فيه سلسلة من 8 أعداد لقصص عالم موازي أحداثه بتدور في فترة 1602 بإنجلترا بالعصور الوسطى، من تأليف العبقري نيل جايمان مؤلف كومكس ساندمان ورواية American Gods وغيرهم.

41- في لقطة ورشة توني ستارك، بنلاقي على جنب تصميمات أولية لبدلة مدرعة وفيها جناحين، كنسخة قديمة مناسبة للعالم دا من بدلاته العصرية بتاعت عالمنا، بل وفيها دايرة في منطقة الصدر مشابهة لمنطقة المفاعل الخاصة ببدلات توني. وكمان تحت البدلة اللي ع الشمال، فيه درع قديم عليه نجمة، كإشارة لصنع ستارك لدرع كابتن أميركا. بالإضافة لفوق هنلاقي خوذة تشبه خوذة الماندلوريان من مسلسله الخاص بعالم ستار وورز المملوك لديزني، اللي أخرجه المخرج جون فافرو "هابي هوجان"، وهو نفس مخرج أفلام آيرون مان.

42- جنب بيجي بنلاقي خوذة تشبه خوذة بذلة توني ستارك الأولى اللي عملها في الكهف لما كان مخطوف.

43- ورا توني فيه مطرقة تشبه ميولنير مطرقة ثور، ورغم إنها ممكن تكون مطرقة عادية بيستعملها في أعمال الحدادة عنده، لكن في مشهد بعد كده ف الحلقة بنشوف ثور بيسأل لوكي فين المطرقة، ف لوكي بيجاوبه إنها ضاعت منه، فممكن تكون هي فعلًا.

44- ستيف روجرز هنا عامل دور روبن هود، حتى مخليين اسمه "روجرز هود". وكمان كابتن كارتر قالت جملة "I don’t think I will"، في إشارة لنفس الجملة اللي قالها ستيف روجرز العجوز في نهاية فيلم إيندجيم.

45- في لقطة سريعة، بنلاحظ إن الجلاد المسئول عن تنفيذ أحكام الإعدام في المملكة هو ريد سكال ذات نفسه.

46- طريقة تفعيل بيجي لإختراع توني، تتشابه جدًا مع طريقة تشغيل بذلة آيرون مان موديل 5 في فيلم آيرون مان 2

47- في صراع ستيف روجرز ضد ثانوس ف فيلم إنفنتي وور، مكانش ثانوس لسه حصل على حجر العقل من فيجن، لكن هنا في الحلقة بنلاحظ إن حجر العقل موجود في قفاز ثانوس، ف ده معناه إن ف العالم ده كان ستيف هو اللي واجه ثانوس قبل ما يستخدم الأحجار بدل ثور، أو إنه واجهه مرة في الأول قبل اكتمال الأحجار، وبعدها مرة تانية بعد حصوله على الحجر الأخير. فعلًا بيقدر يتعارك طول اليوم زي ما بيقول.

الحلقة التاسعة: ماذا لو تدخّل سترينج سوبريم في الأحداث؟
48- الحلقة النهائية اللي بنعرف فيها خطة سترينج سوبريم، ونكتشف من خلالها حقيقة كل اللي حصل خلال الموسم التاني، مع معركة جبارة بنشوف فيها استخدام هايل لأسلحة عظيمة.
*تتر مقدمة الحلقة اتغير وبقى فيه نسخ من الشخصيات اللي ظهرت ف المسلسل وجنبهم جملة قالوها في الحلقات زي: توني ستارك في بدلته على كوكب ساكار، هابي هوجان بعد تحوله لهالك، تشالا بشخصية ستار لورد، كاهورتي، بل فوستر بشخصية جاينت مان/ جالوت، سترينج سوبريم، بيجي كارتر، وقبلها ريد جارديان "مظهرش في الموسمين، بس هيظهر في الموسم التالت حسب ما مارفل أعلنت ونزلت مشهد عندها بكده".

49- سترينج سوبريم محتفظ بالنسخ الشريرة اللي هددت المالتيفرس، في طريقة مشابهة لإحتفاظ الcollector بالغنائم في فيلم جارديانز، أو ميجيل أوهارا/سبايدرمان-2099 في فيلم سبايدرفيرس واحتفاظه بكل اللي بيتخطوا الأحداث الcanon ف المالتيفرس.

50- الشخصيات اللي سترينج سوبريم حابسهم منهم: آلترون الخارق من نهاية الموسم الأول، جني الكريسماس اللي سترينج امتص طاقته في الموسم الأول، نسخة من ثانوس، الكولكتور من حلقة 2 من الموسم الأول، ونسخة من لوكي بأزياء رعاة البقر ومسدساتهم القديمة، وين وو من حلقة 7 الموسم الثاني، ونسخة من هيلا غير بتاعت الموسم التاني، نسخة مدرعة من روكيت راكون، الطفل بيتر كويل من حلقة2 الموسم التاني، نسخة من هالك مشع لابس درع أزجاردي، كورفس جليف مساعد ثانوس، ونسخة من ثور.
ولما بيجي بتحطم السجون دي، بنشوف نسخ أكتر، زي: هابي هوجان المتحول لهالك، هوارد البطة، ستار لورد وهو خارج منه طاقة إيجو الزرقا اللي شوفناها في نهاية فيلم جارديانز2، التنين العظيم من فيلم شانج شي، فيجن، جندي شيتوري، كول أوبسيديان وبروكسيما ميدنايت مساعدين ثانوس، كابتن مارفل، وين وو بشعر أبيض، كورج، جماعة من السكرولز، دراكس، واندا الزومبي.